AGENDRE WEMANGA GÖ NI’AMONI’Ö (NA TENGA SI FAO BA MIGU)

Updated: 24 Jun, 2025 • 0 • min read

Table of Contents

AGENDRE WEMANGA GÖ NI’AMONI’Ö

(NA TENGA SI FAO BA MIGU)

1. Manuno: Buku Zinunö 186. HEZO YESU SOMASIDO

- Hezo Yesu somasido, no humulu dödögu.

Me töra abua noro, no fahöna horögu.

No abu sibai dödögu, oya golalöẅagu.

Ha So’aya zangefa’ö, fefu horö nilaugu.

- Lö utaha sa dödögu, na lö möido khö-U, Yesu.

Ya’ugö dötönafögu, sangefa’ö ba huku.

Enaö na usöndra gafi, ba zi lö ara sibai.

Ba usawö fefu hili, fa ukhamö Yesu göi.

2. Fogaoni: Ya’o Gö fangorifi, Iwa’ö Yesu, si möi khö-Gu, ba döhö wa’olofo, ba sifaduhu tödö khö-Gu, ba lö sa’ae owökhi dödö. Yaduhu!

3. Manunö: Buku Zinunö No: 186

Ondrasi ndra’o, he Yesu, börö wa‟omasi-Mö.

Efa’ö horögu fefu, Ya’ugö dötönafö.

Bè wa’ahono dödögu, böi aefa ndra’o khö-Mö.

Da u’olembai Ndra’ugö, lumö’ödo tanga-Mö.

4. Renungan:

5. Fanekhegö Tödö:

He ya’ami ira talifusö ni’omasi’ö ba khö Keriso Yesu.

No owulo ita ba da’e si fao fa’owuawua dödö, ba we’amöi ba watomesa khö Lowalangi, wanema’ö howuhowu fangorifi ba khö Zo’aya ya’ita Yesu Keriso.

Si tekiko mena’ö ita börö horöda, me i’otarai iraono ita irugi iada’a, ba si lö sökhi gera’era dödöda, lö sa si faehu ita. Föna Lowalangi, ba oi si so horö ita, no fagölögölö manö. Na taŵa’ö, lö horöda, ba talimo ita, ba si duhu lö’ö ba dödöda. Samini tödö, ba sombalugö horönia, ba lö aefa sa ba danga gafökha, solau si lö atulö, ba lö monaha ba naha Lowalangi. Böi elungu ita! Lowalangi, ba lö Ibe’e Ia ni’o’aya, fa’ata’u awö wa’abu dödö lualua wangositengagö Lowalangi, ba luo horö, ba fa’amate.

Andrö göi Ifarou dödöda Lowalangi, ba wamalalini era’era, Imane: si lö mangata’ufi Lowalangi na, ba ya muröi lalania ba ya mu’o’ö li Zo’aya. Hadia sa guna na oya isöndra hare niha ba gulidanö, ba na te’ala ia nosonia? Lö’ö göi höli noso khönia. Andrö mi’ide’ede’ö ami föna Lowalangi, ba wangombakha horömi. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö.

6. Manunö: 232. NO SOMUSO TÖDÖ NDRA’O

- No somuso tödö ndra’o, me so khögu wangefa.

No I’ori fi ndra’odo, horögu no iheta

Reff:

Fa’abölö ndro Yesu, zamohouni tödö gu.

Eheha Ibè khögu, Ye su, Yesu, Yesu.

- No Isusugi dödögu, Ihagaini Eheha.

Ifa’ele’ö horögu, ba fefu golalöẅa.

Reff: Fa’abölö ndro Yesu, ....

7. Fama’anö Muzizio zato

Pdt : He ya’ami ira talifusö. Da möi ita ba watomesa khö Lowalangi, ba wanema buala fa’ebua dödö-Nia, ba khö Zo’aya ya’ita Yesu Keriso, si no mate ba horöda, ba si no ifuli maoso wo’alani fa’amate, irege falukha ita wangorifi ba fa’ohahau dödö. Ba si föföna ua da tasekhegö ita we’amöi föna Zo’aya

Hadia edöna ami mi’ombakha’ö horömi khö Lowalangi, sangila era’era dödö niha? Hadia, lö mibini’ö, wa no misawö goroisa-Nia fefu? Hadia, abu dödömi ba da’ö, mi’ogorofi sa’ae wolau horö? Na si manö, ba mitema ligu: “tebai mabini’ö horöma”.

Sato: Tebai Mabini’ö horöma

Pdt : Hadia faduhu göi dödömi lö sameta horö baero Yesu Keriso, si no manaögö huku salahimi? Na faduhu dödömi ba da’ö ba mitema ligu wanguma’ö: “Faduhu dödöma”

Sato: Faduhu dödöma

Pdt : Hadia, edöna ami mibeta ba dödömi wayaŵasa, awö watiusa, awö wa’afökhö dödö? Hadia edöna ami mi’efa’ö zala zi so sala khömi? Hadia edöna ami mi’ogorofi mbuabua niha si sagötö tanö andrö, ba wamöhöi ya’ia, ba mitema ligu: “edönaga ya itologa Lowalangi.”

Sato: Edönaga ya itologa Lowalangi.

8. Fangombakha Hörö:

Pdt: Mangandrö ita ba wangandrö fa’ahakhö dödö Lowalangi:

He Lowalangi! Niha si so horö ndra’aga, ma’ombakha’ö horöma khö-U: oya nilauma si lö sökhi, salama khö-U ba tenga göi zide’ide. Oya göi ngawalö zi lö sökhi ba dödöma bakha: Fayaŵasa, fa’afökhö dödö, ba fatiusa; no ambö famati, ba no oya na danö bö’ö, si lö atulö nifaluama tanöföna-U.

He Yehowa, hakhösi dödö-U ndra’aga ba wa’omasi-Mö andrö! Efa’ö khöma horöma ba wa’ebua dödö-Mö andrö! Sasai ndra’aga ba horöma andrö börö nono-U Yesu Keriso si no mangöhöli ya’aga. Yaduhu.

(Tebe’e ginötö ba wangandrö ba dödö zamösana 1-2 meniti)

9. Turia Wangefa Horö:

Pdt: Me no mi’ombakha’ö horömi ba wogamö fangefa, ba na sindruhundruhu mangesa dödömi ba horömi ba wanötöna fangorifi khö Yesu Keriso, ba tola ufaduhu’ö khömi: wa I’efa’ö horömi fefu Lowalangi, börö wamakao andrö nitaögö Yesu So’aya ya’ita!

mudadao zato

10. Manunö: BZ 232. NO SOMUSO TÖDÖ NDRA’O

Andrö göi wa ufabu’u, u’ogorofi horö.

Me usöndra wangatulö, so wa’ahono dödö.

Reff: Fa’abölö ndro Yesu, ....

11. OROISA YESU SANANDRÖSA BA WEMANGA GÖ NI’AMONI’Ö:

Ya’ami banua niha Keriso ni’omasi’ö. Mifondrondrongo daroma Li Lowalangi, sanandrösa ba Wemanga Gö Ni’amoni’ö: “So’aya ya’ita Yesu me bongi andrö, me te’a mböli-Nia, me orudu manga Ia khö ndra nifahaö-Nia, ba Ihalö roti, (mufazawa roti) I’aohasi gölö Lowalangi, ba Iboboto roti andrö, Ibe’e khö ndra nifahaö-Nia, ba Imane: “Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o”. Si manö göi Ihalö mako, (mufazawa mako) me no aefa manga ira, I’aohasi gölö Lowalangi, ibe’e khöra, ba Imane: “Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o”.

Ba li-Nia andre Ifaduhu’ö sibai khöda Yesu wanguma’ö. Ero na mi’a roti andre (mufazawa roti), ero na mibadu nösi mako andre (mufazawa mako), ba Uforoma’ö sibai khömi wa’omasi-Gu ami, awö wa’ahakhö dödö-Gu; niha sitekiko ena’ö ami, na lö Ubelegö mena’ö wa’auri-Gu fönami, fa böi sa’ae itörö tödö Lowalangi horömi, ba wanguhuku ya’ami. Börö wa’amate ba femaoso Zo’aya ya’ita Yesu Keriso wa tasöndra wangefa horö awö wangorifi. Andrö dozi sanema ha sambua boto sa’ae, ha sambua wamati, ha fa’omasi ba fanötöna, Ya faofao khömi Geheha Ni’amoni’ö.

12. Manunö: BZ. 230. U’ILA WA NO FA’OMASI

- U’ila wa no fa’omasi, zi falukhado khö-U, Yesu.

Heẅa’ae tenga sinangea, na dali gamuatagu.

Me no aefado ba wönu,

andrö mangaluludo khö-U, moroi sibai ba dödögu.

- Ya’odo niha si lö sökhi, ba no omasi’Ö Yesu.

Horögu fefu Öbè aefa, Öbohounido Eheha-U.

Börö wemöna-Mö, Yesu, zanga’aro’ö tödögu, ba wogamö saẅatögu.

13. Fama’ema/ Fanema’ö Gö Ni’amoni’ö

Imane Yesu: Mi’aine khö-Gu dozi serege tödö, Ufolombase ami.

----------------------Fama’ema Roti awö Agu-----------------------

1) Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o, (fama’ema roti).

2) Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu ha me’uga mibadu da’e, ba mitörötörö tödömi Ndra’o, (fama’ema agu).

Ena’ö Boto ba Do Zo’aya ya’ita Yesu Keriso, ni’amoni’ö ba solakhömi andrö, da’ö zangabölö’ö ba sondrorogö ya’ami irugi zi lö aetu. Mi’angawuli si fao fa’ohahau dödö. Ya mufahowu’ö ami Lowalangi, Yaduhu.

(Mangawuli ba nahia zamösana, ba latörö wama’ema fasömbata ba nahia si no mufa’anö, ba na tenga si möi föna wamalua femanga Gö Ni’amoni’ö, ba ba ginötö manunö fanete da’e, ba da’ö te’owuloi wasömbata).

14. Manuno: 460. BA NGAWALÖ ZAGALIO TAYA

Ba ngawalö zagalio taya, aolo’aolo dödögu.

Hulö zi lö dania fönagu fanulöni nilaugu.

Andrö lö ada’uda’u dödögu, hulö zi lö fanguhuku.

Me uwai lö sulö gamuatagu, na mangawuli Yesu.

Ihawui ndra‟odo fa’ata’u, wolaẅa emaligu.

Me no sambö’ambö wamatigu, wangomasi’ö Yesu.

Andrö u’alui Yesu, kubalogu, sangaro’ö famatigu.

Afu tola urugi khamötögu, fa’auri si lö aetu.

15. Fangandrö + Famatenge + ba Howuhowu

16. Manunö: 503. NO UFILI U’O’Ö YESU

- Ba no ufili u’o’ö Yesu

ba no ufili u o’ö Ye-su

ba no ufili u’o’ö Yesu

tebai uröi tebai uröi.

- He lö awögu ba gulidanö 3 x

Tebai uröi, tebai uröi.

Ya’ahowu