SURA YUDA

Table of Contents

 

SURA YUDA

 

YUDA

Faza 1

 

I.                  Fangowai. II. Samaelungu andrõ, ba buabuara si lõ sõkhi. III. Famarou tõdõ, ena’õ abe’e ira, ba wamati. IV. Fango’ozui sura.

 

1 I. Yuda zanura da’e, enoni Yesu Keriso, talifusõ Yakobo, ba nikaoni andrõ, ni’omasi’õ, ba khõ Lowalangi Ama, ba nirorogõ khõ Yesu Keriso. (Yak. 1, 1. Mat. 13, 55. Kor. I. 1, 2. Yoh. 17, 11. 15).

2 Yafalukha ami wa’ahakhõ dõdõ ba fa’ohahau dõdõ ba fa’omasi, yatedou khõmi. (Fet. II. 1, 2).

3 II. He ya’ami ni’omasi’õ! me no i’o’oudo tõdõgu, ba wanura khõmi, he wisa wangorifi andrõ, si no faoma falukha ita, ba lõ tola lõ usura khõmi wamarou dõdõ, uŵa’õ, ena’õ mitimba zi fa’udu ba wamati andrõ, si no mufa’ema zamuza, ba ni’amoni’õ andrõ. (Tim. I. 6, 12).

4 Noa sa fatewu õsa niha, ba nitandrõsaigõ huku andrõ, ba zura, fõna sa’ae; si no mangerogõ Lowalangi; labalia’õ, ba wa’asilõyaŵa la’oguna’õ wa’ebua dõdõ Lowalangida andrõ, ba samatõrõ ya’ita andrõ, si ha samõsa, So’aya ya’ita, Yesu Keriso, ba la’osilõ’õgõ. (Fet. II. 2, 1—3. Gal. 2, 4; 5, 13. Tit. 1, 16). 

5 Ba ufasugi ba dõdõmi, me no mi’ila zamuza fefu, hadia ia, wa no ifakiko zi lõ mamati So’aya, ba zi samuza andrõ, me no aefa i’efa’õ ira ba danõ Miserayi. (Heb. 3, 16—19). 

6 Ba he mala’ika andrõ, si lõ mangaro’õ khõra fa’asalaŵara, sondrõi nahiara andrõ, ba no itaha ba rate si lõ mamalõmalõ, bakha ba zogõmigõmi, ba wanguhuku ya’ira, na baŵa sebua andrõ dania. (Yoh. 8, 44. Fet. II. 2, 4. 9). 

7 Si mane Sodoma ba Gomora ba banua ba ngaira andrõ, si no mohorõ gõi, hulõ si mane ya’ira, si no molohi õsi niha bõ’õ, me no mube’e famaedo ira, me lataha wotu andrõ, ba galitõ si lõ matemate. (Fet. II. 2, 6. Moz. V. 29, 23. Moz. I. 19, 5. Yes. 66, 24. Mat. 25, 41). 

8 Ba si manõ sa gõi da’õ, sangifingifi andrõ, lata’unõi nõsira, lõ ba dodõra zalaŵa, latandraŵaisi zolakhõmi. (Fet. II. 2, 10). 9 Ba satua mala’ika andrõ, Mikhaëli, me fasoso ira Gafõkha, me fahuhuo ira, ba mboto Moze andrõ, ba ata’u ia i’etu’õ hukunia, fanandraŵaisi, imane: Yamu’otu’õ ndra’ugõ So’aya! (Fet. II. 2, 11. Dan. 12, 1. Fam. 12, 7). 

10 Ba ya’ira andrõ, ba latandraŵaisi zi lõ la’ila na i, ba hadia zi no to’ua la’ila, si mane saliŵaliŵa ba danõ, si lõ tõdõ, ba lahalõ famakikora. (Fet. II. 2, 12). 

11 Alai ira, me no latõrõ lala Ga’ino andrõ, ba me no adõni dõdõra ba wamaelungu luo Mbile’amo andrõ, ba me no tekiko ira, ba wolaŵa Gora andrõ. (Yoh. I. 3, 12. Fet. II. 2, 15. 16. Moz. IV. 16). 

12 Da’õ zolau si lõ sõkhi, ba gowuloa fa’omasi andrõ khõmi, si lõ ada’uda’u orudu ba wemangamanga; ya’ira zokubaloi ya’ira; no lawuo si lõ teu ira, ni’oloi’õ nangi, eu sangaruwu na baŵa deu, si lõ bua, si no mendrua mate, si no abo’a baya, (Fet. II. 2, 13. 17. Hes. 34, 2. Mat. 7, 19), 

13 dulu nasi sabõlõ, saila ita khõra gotu’otu, dõfi selungulungu, ba ni’irõ’õ si bongi andrõ, sogõmigõmi andrõ, si lõ aetu. (Yes. 57, 20. Fet. II. 2, 17).

14 Ba noa sa gõi ifa’ele’õ he wisa ira Khenoki andrõ, fitu nga’õtõ i’otarai duada Adamo, no imane: ”Hiza, mõi Zo’aya, awõ ngafulu ngahõnõ ni’amoni’õ andrõ khõnia, (Moz. I. 5, 18. 22. Moz. V. 33, 2. Mat. 25, 31), 

15 ba wanguhuku fefu, ha niha ira, ba ba wangotu’õ fefu zi no mangerogõ Lowalangi, ba khõra andrõ, ba mbuabuara andrõ fefu, falõsõkhi andrõ, nifa’uara, ba ba wehede safaito, fefu, nilau zanao horõ andrõ, si no mangerogõ Lowalangi, khõnia.” (Tes. II. 1, 7. 8. Mat. 12, 36). 

16 Sikõkõkõkõ andrõ, sanahigõ Lowalangi, ba nifatõrõnia khõra, sanõrõ lala wangisõra, ba fayaŵasa lualua mbewera, lasuno niha ba zi so ira, na so harera ba da’õ. (Fet. II. 2, 18. Yak. 2, 1. 9). 

17 Ba ya’ami ni’omasi’õ, ba mitõrõtõrõ tõdõmi daroma li andrõ, si no lahõnagõ fanguma’õ sinenge Zo’aya ya’ita, Yesu Keriso, (Fet. II. 3, 2), 

18 me lamane khõmi: ”Ba gõtõ safuria dania, ba so zango’aya, sanõrõ lala wangisõra andrõ, ba wa’elungura.” (Fet. II. 3, 3 b. t. Tim. II. 4, 1 b. t.). 19 Si oniagõ ya’ira andrõ, sanõrõ lala niha; si lõ eheha. (Amaed. 18, 1. Rom. 16, 17. Kor. I. 2, 14).

20 III. Ba ya’ami ni’omasi’õ, ba mi’a’azõkhi ami, ba wamatimi andrõ, ni’amoni’õ sibai, ba mi’angandrõ, balazi Geheha ni’amoni’õ. (Kol. 2, 7).

21 Mi’aro’õ ami, ba wa’omasi Lowalangi ita, midõnadõna wa’ahakhõ dõdõ Zo’aya ya’ita, Yesu Keriso, ba wa’auri si lõ aetu. (Tit. 2, 13). 

22 Ba mihakhõsi tõdõ õsa, sangiwa tõdõ; (Tim. II. 2, 25);

23 mi’orifi, misõbi ba galitõ; ba tánõ bõ’õ, ba mihakhõsi tõdõ, ba mi’ata’ufi, ba mi’ogorofi gõi mbaru andrõ, si no ra’ira’iõ ba nõsi niha andrõ. (Rom. 11, 14. Kor. I. 3, 15).

24 IV. Ba khõnia, sangila mondrorogõ ya’ami, fa lõ manendre ami, sangila mama’aso ya’ami fõna lakhõminia andrõ, si lõ sinegu ba sowuawua tõdõ, (Tes. I. 5, 23. Rom. 16, 25 b. t.), 

25 khõ Lowalangi si ha sambua andrõ, sangorifi ya’ita, balazi Yesu Keriso, So’aya ya’ita, ya khõnia lakhõmi ba fa’asalaŵa ba fa’abe’e ba fa’abõlõ, i’otarai fõna nga’õtõ danõ, ba iada’e, ba gõtõgõtõ wa’ara dania! Yaduhu. (Fet. II. 3, 18. Tim. I. 1, 17; 2, 3).