SURA YOHANE

Table of Contents

 

SURA YOHANE

YOHANE FAZA 1

I. Fa’asalaŵa Keriso ba fa’atobalinia niha. II. Ifaduhu’õ ia Yohane andrõ, samayagõ idanõ. III. Ifaduhu’õ Yesu. IV. Nifahaõ Yesu si fõfõna; Andrea ba fetero. V. Filifo ba Natana’eli.

1 I. Ba mbõrõta so daroma li andrõ, ba khõ Lowalangi daroma li andrõ, ba taroma li andrõ, ba no Lowalangi. (F. 17, 5; 8, 58. Yoh. I. 1, 1 b. t. 5, 20. Fam. 19, 19). 

2 Khõ Lowalangi so ia ba mbõrõta. (Amaed. 8, 22 b. t.). 

3 Khõnia mbõrõta hadia ia fefu. Sambalõ lõ’õ, si so, si tenga khõnia mbõrõta. (Kor. I. 8, 6. Kol. 1, 16. Heb. 1, 2; 11, 3. Sin. 33, 6). 

4 Khõnia so wa’auri, ba haga ba niha wa’auri andrõ. (F. 5, 26; 14, 6; 8, 22. Yoh. I. 5, 11. 12). 

5 Ba humaga haga andrõ, ba zogõmigõmi, ba lõ ihalõ ia sogõmigõmi. (Kor. II. 4, 6. Luk. 1, 78 b. t. F. 3, 19; 9, 5). 

6 So niha, nifatenge Lowalangi, Yohane dõinia. (Luk. 3, 2. b. t.). 

7 Da’õ zi mõi mamaduhu’õ, ena’õ ifaduhu’õ haga andrõ, ena’õ dozi mamati khõnia. (F. 5, 33 b. t.). 

8 Tenga ya’ia haga andrõ, ha ba wamaduhu’õ haga andrõ. (F. 3, 28). 

9 Mõi sa’ae ba guli danõ haga si ndruhu andrõ, sohagaini niha fefu. (F. 12, 46). 

10 No so ia ba guli danõ, ba khõnia mbõrõta hadia ia, fefu, ba lõ aboto ia ba dõdõ niha ba guli danõ. (A. 3—5). 

11 No khõnia ba zi mõi ia, ba lõ lafonaha ia khõra banuania. (F. 19, 15. Mat. 13, 57. Sin. 69, 9). 

12 Ba ha wa’ato zamonaha ya’ia, khõra itehe, tobali ono Lowalangi ira, khõ zamati ba dõinia andrõ. (Hos. 1, 10. Yoh. I. 3, 1. Gal. 3, 26). 

13 Tenga moroi ba ndro tumbu ira, ba tenga moroi ba wa’edõna nõsi niha ba tenga moroi ba wa’edõna ndra matua, moroi ba Lowalangi tumbu ira. (F. 3, 3 b. t. Yak. 1, 18. Fet. I. 1, 23. Yoh. I. 5, 1. 4). 

14 Ba no tobali õsi niha daroma li andrõ, ba no so ia khõda, ba no anehega lakhõminia, hulõ lakhõmi Nono, si ha sambua khõ Nama, si no a’oi so fa’ebua dõdõ, awõ wa’aduhu. (A. 1; F. 11, 40. Yoh. I. 4, 2. 9. Mat. 17, 2. Tim. I. 3, 16. Fet. II. 1, 16 b. t.). 

15 Ifaduhu’õ ia Yohane, mu’ao ia, imane: Ya’ia da’õ, niŵa’õgu: Fõnagu zi so furigu dania, me no ofõna ia moroi khõgu. (Mat. 3, 11). 

16 Me no manema ita fefu fa’ebua dõdõ si lõ aetu’aetu moroi ba zi no a’oi so khõnia. (Kol. 1, 19; 2, 9). 

17 Sama’ema oroisa Moze, ba khõ Yesu Keriso mbõrõta wa’ebua dõdõ ba bõrõta wa’aduhu. (Hal. zin. 7, 38. Sin. 89, 3. 15).

18 Lõ irai i’ila Lowalangi niha, da’õ zanutunõ khõda, Ono andrõ, si ha sambua, si so ba gaheta Nama. (F. 6, 46. Moz. II. 33, 20. Mat. 11, 27).

19 II. Ba da’õ wamaduhu’õ Yohane, me lafatenge khõnia gere, awõ nono Lewi, niha Yehuda, banua Yeruzalema, ba wanofu khõnia: Ha niha ndra’ugõ? (F. 5, 33). 

20 Ba i’ombakha’õ; tenga Keriso andrõ ndra’o. (F. 3, 28. Hal. zin. 13, 25). 

21 Ba lasofu khõnia: Ba hadia? Eliya ndra’ugõ? Imane: Tenga. Lamane: Ya’ugõ zama’ele’õ andrõ? Imane: Tenga. (Mat. 11, 14). 

22 Ba lamane khõnia: Ba ha niha ndra’ugõ? Ena’õ maŵa’õ khõ zamatenge ya’aga. Hadia niŵa’õu ba khõu andrõ? 

23 Imane: ”Li zi’ao ba danõ si mate ndra’o: Mifadaya lala Zo’aya, si mane niŵa’õ Yesaya andrõ, sama’ele’õ”. (Yes. 40, 3). 

24 Ba sinenge warizaio zinenge andrõ. 

25 Ba lasofu khõnia, lamane khõnia: Ba hana wa mamayagõ idanõ ndra’ugõ na tenga Keriso andrõ ndra’ugõ, ba tenga Eliya, ba na tenga sama’ele’õ andrõ? 

26 Itema lira Yohane, imane: Samayagõ idanõ ndra’o; no so khõmi zi lõ mi’ila, (Mat. 3, 11) 

27 si so furigu; no ambõ ndra’o khõnia, utoto’õ mbõbõ mbadagahenia. (A. 15. Mal. 3, 1).

28 Ba Mbetania da’õ, yefo Yoridano, ba da’õ mamayagõ idanõ Yohane. (F. 10, 40).

29 III. Ba sara wongi aefa da’õ, ba i’ila Yesu, si mõi khõnia, ba imane: Hiza nono mbiribiri andrõ khõ Lowalangi, sangeheta horõ nõsi guli danõ. (Yes. 53, 5. 7 b. t.). 

30 Da’õ niŵa’õgu: Furigu so dania niha, si no fõnagu, me no ofõna ia moroi khõgu. 

31 Ba lõ aboto ba dõdõgu ia, ba ena’õ oroma ia ba Ndraono Gizeraëli, andrõ mõi ndra’o, mamayagõ idanõ. 

32 Ba mamaduhu’õ Yohane, imane: No u’ila Geheha, si mõi tou, moroi ba zorugo, hulõ marafadi ia ba ahono ia khõnia. (Mat. 3, 16 b. t.). 

33 Ba lõ aboto ba dõdõgu ia, ba samatenge ya’õ, ba wamayagõ idanõ, da’õ zanguma’õ khõgu: ni’ilau si mõi tou Eheha, ba ahono khõnia, da’õ zamayagõ Eheha ni’amoni’õ niha. (Hal. zin. 1, 5).

34 Ba no u’ila ia ba no ufaduhu’õ, wa Ono Lowalangi da’õ. (F. 3, 34—36).

35 IV. Ba sara wongi aefa da’õ, ba so zui Yohane, awõ nifahaõnia, darua. 

36 Ba inehegõ Yesu, sanõrõ, ba imane: Hiza nono Mbiribiri andrõ, khõ Lowalangi. (Fet. I. 1, 18). 

37 Larongo niŵa’õnia nifahaõnia, si darua andrõ, ba la’o’õ Yesu. 

38 Ba ibali’õ ia furi Yesu, ifaigi ira, solo’õ ba imane khõra: Hadia ni’aluimi? 

39 Ba lamane khõnia: Hezo nahiau omo, Rabi? samahaõ geluahania. 

40 Imane khõra: Mi’ae mifaigi. Mõi ira, lafaigi nahiania, ba la’iagõ khõnia si ma’õkhõ andrõ; so labõzi õfa. (Mat. 4, 18). 

41 Samõsa Gandrea, talifusõ Zimoni Fetero, samondrongo khõ Yohane, solo’õ Yesu. 

42 Ba ofõna falukha da’õ khõ dalifusõnia Simoni andrõ, ba imane khõnia: No masõndra Mesia andrõ; nibayoini (Keriso) geluahania. (Dan. 9, 25. Sin. 2, 2).

43 Ba i’ohe khõ Yesu. Ba inehegõ ia Yesu, ba imane: Simoni ndra’ugõ, ono Yohane, labe’e tõimõ Kefa; gowe (Fetero) geluahania. (Mat. 16, 18. Mar. 3, 16).

44 V. Ba mahemolu õ, ba mofanõ Yesu, ena’õ isaŵa Galilaia, ba falukha ia Wilifo. Ba imane khõnia Yesu: O’õ ndra’o. 

45 Ba banua Mbetisa’ida Wilifo andrõ, banua ndra Andrea Fetero. 

46 Falukha khõ Natana’eli Wilifo andrõ, ba imane khõnia: No masõndra nisura Moze ba zura goroisa, nisura zama’ele’õ, Yesu andrõ, ono Yosefo, banua Nazareta. (F. 21, 2. Luk. 24, 27; 3, 33. Yes. 7, 14. Yer. 23, 5 b. t.). 

47 Imane khõnia Natana’eli: So zi sõkhi, si otarai Nazareta? Imane khõnia Filifo: Ae faigi. (F. 7, 41. 52). 

48 I’ila Natana’eli andrõ, si mõi khõnia, Yesu, ba imane khõnia: Hiza zi ndruhu Ndraono Gizeraëli, si lõ falimosa ba dõdõ. 

49 Imane khõnia Natana’eli: He moroi õ’ila ndra’o? Itema linia Yesu, imane khõnia: Me lõ nikaoni Wilifo ya’ugõ na, me so’õ ba mbõrõ marafala andrõ, ba no u’ila’õ. (Sin. 139, 1 b. t.). 

50 Imane khõnia Natana’eli: He Rabi, ono Lowalangi ndra’ugõ, razo Ndraono Gizeraëli! (F. 12, 13. Mat. 16, 16). 

51 Itema linia Yesu, imane khõnia: Me no uŵa’õ khõu, no u’ila’õ, ba mbõrõ marafala andrõ, andrõ mamati ndra’ugõ! So dania ni’ilau, sebua moroi andrõ. 

52 Ba imane na khõnia: Si ndruhundruhu niŵa’õgu khõmi, mi’ila dania, teboka mbanua si yaŵa, ba mangõrõngõrõ miyaŵa ba mitou mala’ika Lowalangi, khõ Nono Niha. F. 3, 13. Moz. I. 28, 12).

 

YOHANE FAZA 2

I. Falõŵa ba Kana. II. Ihaogõ gosali Yesu. III. Mangelama Yesu.

1  Dua wongi aefa da’õ, ba so walõŵa ba Kana ba Galilaia, ba so nina Yesu ba da’õ. (F. 1, 44). 

2 Ba lakaoni gõi Yesu, awõ nifahaõnia, ba walõŵa andrõ. 

3 Ba lõ agu khõra, me no ahori nagu walõŵa. Ba imane ina Yesu khõnia: Lõ agu. 

4 Imane khõnia Yesu: Hana ndra’ugõ khõgu, alawe? Tenga na inõtõ khõgu. 

5 Imane inania ba genoni andrõ: Na so niŵa’õnia khõmi, ba mi’o’õ. 

6 Ba so ba da’õ rumbi, õnõ, naha nidanõ, ba wanasa khõra, huku khõra ba niha Yehuda, fa tõlu yõu zambua. (Mar. 7, 3 b. t.). 

7 Imane khõra Yesu: Mifõnui idanõ rumbi andrõ. Ba lafõnui irugi mbewe. 

8 Ba imane khõra: Misou saae, ba mi’ohe khõ zatua zangai halõŵõ. Ba la’ohe. 

9 Ba me no itandra satua zangai halõŵõ nidanõ andrõ, si no tobali agu, ba me lõ i’ila, he moroi — ba la’ila sa enoni andrõ sana’u idanõ andrõ — ba humede zatua zangai halõŵõ khõ zangowalu, (F. 4, 46), 

10 imane khõnia: Ofõna labe’e nagu si sõkhi dozi niha, ba dania, na no abuso ira, ba labe’e zambõ fa’asõkhi; ba ya’ugõ, ba no õtenagõ nagu si sõkhi, irugi da’e.

11 Ba Kana ba Galilaia ilau da’õ Yesu, bõrõta dandra andrõ, i’oroma’õ lakhõminia, ba mamati khõnia nifahaõnia andrõ. (F. 1, 14).

12 II. Aefa da’õ mõi ia misi tou, ba Gafanauma, ya’ia ba inania ba talifusõnia ba nifahaõnia. Ba lõ ara ira ba da’õ. (Mat. 4, 13; 13, 55).

13 Ba no ahatõ gowasa fasa ba niha Yehuda, ba mõi misi yaŵa Yesu ba Yeruzalema. (F. 6, 4). 

14 Ba i’ila ba gosali zamawa saŵi ba biribiri ba marafadi, awõ zanuka ana’a, sidadao ba da’õ. (Mat. 21, 12 b. t.).

15 Ba ifazõkhi mbõzibõzi sinali, ba ifofanõ ira fefu ba gosali, ba biribiri ba saŵi andrõ; ba iduwagõ gana’a zanuka andrõ, iso’agõ meza khõra.

16 Ba imane ba zamawa marafadi: Mi’ohe misa da’õ, bõi mibali’õ kade nomo Namagu. 

17 Ba itõrõ tõdõ nifahaõnia niŵa’õ ba zura: ”No i’ado fõnu andrõ ba nomomõ.” (Sin. 69, 10). 

18 Ba latema linia niha Yehuda, lamane khõnia: Hadia dandra, ni’oroma’õu khõma, wa tola õlau da’õ? (F. 6, 30). 

19 Itema lira Yesu, imane khõra: Midudugõ gosali andre, ba ha tõlu ngaluo, ba u’azõkhi. (Mat. 26, 61). 

20 Ba lamane khõnia niha Yehuda; Õfa wulu a õnõ fakhe wangotomosi osali andre, ba ha tõlu ngaluo õ’azõkhi. 

21 Ba osali botonia niŵa’õnia. (Kor. II. 5, 1).

22 Ba dania, me no maoso ia moroi ba ngai zi mate, ba itõrõ tõdõ nifahaõnia niŵa’õnia andrõ, ba faduhu dõdõra ba zi so ba zura, ba ba niŵa’õ Yesu. (Luk. 24, 8. 44. 45).

23 III. Ba me so ia ba Yeruzalema, ba gowasa fasa, ba ato zamati ba dõinia, me la’ila dandra andrõ khõnia, nifazõkhinia. (F. 4, 48). 

24 Ba lõ faduhu dõdõ Yesu khõra, bõrõ wa’aboto ba dõdõnia ira, (F. 6, 64. Mar. 2, 8), 

25 awõ wa lõ moguna khõnia, la’ombakha’õ khõnia niha; noa sa i’ila manõ, ha ya’ia, hadia zi so ba dõdõ niha.

 

YOHANE FAZA 3

I. Huhuo Yesu khõ Nikodemo andrõ. II. Ifuli ifaduhu’õ Yesu Yohane.

1 I. Ba so niha, farizaio, Nikodemo dõinia, salaŵa ba niha Yehuda. (F. 7, 50. 19, 39). 

2 Da’õ zi mõi khõ Yesu ba zi bongi, imane khõnia: He samahaõ? ma’ila, samahaõ si otarai Lowalangi ndra’ugõ, me samõsa lõ sangila mamazõkhi tandra andrõ, nifazõkhiu, na lõ itolo ia Lowalangi. (F. 9, 24. 33. Hal. zin. 10, 38. Luk. 20, 21). 

3 Itema linia Yesu, imane khõnia: Si ndruhundruhu niŵa’õgu khõu, na lõ tumbu moroi si yaŵa niha, ba tebai i’ila mbanua Lowalangi andrõ. (F. 1, 13. Yoh. I. 3, 9).

4 Imane khõnia Nikodemo: He iwisa tumbu niha, na no atua ia? Hadia, i’ila ifuli ia ba dalu ninania, ba ifuli tumbu? (Kor. II. 5, 17).

5 Itema linia Yesu: Si ndruhundruhu niŵa’õgu khõu, na lõ tumbu moroi ba nidanõ ba moroi ba Geheha niha, ba tebai mõi la ba mbanua zorugo andrõ. (Hes. 36, 25 b. t. Tit. 3, 5). 6 Õsi niha zi tumbu ba nõsi niha, ba eheha zi tumbu khõ Geheha. (Moz. I. 5, 3; 6, 3. Sin. 51, 7). 

7 Bõi ahõlihõli dõdõu, me no uŵa’õ khõu, lõ tola lõ tumbu moroi si yaŵa ami. 

8 Angi andrõ, ba isaŵa zomasi ia, ba õrongo hõngõhõngõnia, ba lõ õ’ila, heza i’otarai, ba heza isaŵa. Si manõ gõi dozi si tumbu khõ Geheha. (Sangomb. 11, 5). 

9 Itema linia Nikodemo, imane khõnia: He wisa lala da’õ? (Luk. 1, 34. 35). 

10 Itema linia Yesu, imane khõnia: Samahaõ Iraono Gizeraëli ndra’ugõ, ba lõ aboto ba dõdõu da’õ? (Moz. V. 30, 6. Sin. 51, 12. Hes. 11, 19). 

11 Si ndruhundruhu niŵa’õgu khõu, saboto ba dõdõma maŵa’õ, ba ni’ila hõrõma mafaduhu’õ, ba lõ mirema wamaduhu’õma. 

12 Na lõ mamati ami, na uŵa’õ khõmi zi so ba guli danõ, ba he miwisa wamati, na uŵa’õ khõmi zi so ba zorugo? 

13 Ba lõ si mõi yaŵa ba zorugo, baero zi no mõi tou, si otarai zorugo, Ono Niha andrõ, si so ba zorugo. (F. 6, 38. 62. Efes. 4, 9 b. t.). 

14 Ba hulõ gulõ andrõ, nituwu Moze yaŵa, ba danõ si mate, si manõ gõi te’alaŵa’õ yaŵa dania Nono Niha, lõ tola lõ’õ, (Moz. IV. 21, 8. 9. F. 12, 32. 33), 

15 ena’õ so wa’auri si lõ aetu ba zamati khõnia fefu. (Mar. 16, 16. Rom. 3, 25).

16 Si manõ sa wa’omasi Lowalangi nõsi guli danõ, no ibe’e Nononia andrõ, si ha sambua, ena’õ lõ tekikõ dozi samati khõnia, ena’õ so khõra wa’auri si lõ aetu. (Yoh. I. 4, 9. Rom. 8, 32). 

17 Tenga sa ba wanguhuku õsi guli danõ ifatenge ba guli danõ Nononia Lowalangi, afu’afunia te’orifi khõnia nõsi guli danõ. (F. 12, 47. Luk. 9, 56. Mat. 18, 11). 

18 Samati khõnia ba lõ lahuku, ba si no muhuku zi lõ mamati, me lõ mamati ia ba dõi Nono Lowalangi andrõ, si ha sambua. (F. 5, 24. Tes. II. 2, 12). 

19 Da’õ wanguhuku; no mõi ba guli danõ haga andrõ, ba no omasi niha da’ogõmigõmi, moroi ba haga, me si lõ sõkhi mbuabuara. (F. 1, 4 b. t.). 

20 Dozi lõ omasi haga zamazõkhi si lõ sõkhi, ba lõ la’ondrasi haga, fa lõ te’otu’õ ira ba nifazõkhira andrõ. (Efes. 5, 13. Yob. 24, 13—16).

21 Ba i’ondrasi haga samazõkhi si duhu, ena’õ oroma mbuabuania, me nilau ba khõ Lowalangi. (Mat. 5, 16).

22 II. Aefa da’õ, ba mõi ba danõ Yudaia Yesu, awõ nifahaõnia, ba da’õ so ia, ba soso ira khõnia, ba mamayagõ idanõ ia. (F. 4, 1. 2). 

23 Ba Yohane gõi, mamayagõ idanõ gõi, ba Gaino, ba zi tambai Zalima, me ebua nidanõ ba da’õ, ba mõi ba da’õ niha lafabayagõ’õ idanõ ira. 

24 Lõ’õ na sa mube’e ba gurunga Yohane. (Mat. 14, 3). 

25 Ba faguagua ira, nifahaõ Yohane niha Yehuda, ba wangehao andrõ. 

26 Ba mõi ira khõ Yohane, ba lamane khõnia: He samahaõ! faigi da’õ, mamayagõ idanõ da’õ no, si no mõi khõu, yefo Yoridano, nifaduhu’õmõ, ba dozi niha zangondrasi ya’ia. (F. 1, 25—34. Mat. 3, 11. 13 b. t.). 

27 Itema lira Yohane, imane: Tebai ihalõ khõnia hadia ia niha, na tenga nibe’e khõnia moroi ba zorugo. (Kor. I. 4, 7). 

28 Ya’ami zi so ba mbõrõ khõgu, wa no uŵa’õ: Tenga Keriso andrõ ndra’o, nifatenge ndra’o fõnania. (F. 1, 20. 30). 

29 Ha õkhõ so nono nihalõ, da’õ zangowalu, ba omuso sibai dõdõ zi fahuwu khõ zangowalu andrõ, si so ba da’õ ba wamondrondrongo khõnia, na irongo li zangowalu; ba na a’oi so wa’omuso dõdõ andrõ khõgu. (Mat. 9, 15).

30 Lõ tola lõ manõi ia, ba lõ tõla lõ awuwu ndra’o. 

31 No fõna dánõ bõ’õ fefu zi otarai si yaŵa. Moroi ba guli danõ, zi otarai guli danõ, ba moroi ba guli danõ hedehedenia. Ba si otarai zorugo, (F. 3, 23. Kor. I. 15, 47), 

32 ba ni’ila hõrõnia, awõ nirongonia, ifaduhu’õ, ba lõ samati famaduhu’õnia. (F. 3, 11; 1, 11). 

33 Samati famaduhu’õnia, ba i’a’aro’õ, wa no si ndruhu Lowalangi. (Yoh. I. 5, 10). 

34 Li Lowalangi wedehe nifatenge Lowalangi, me no tenga nisu’a Geheha, nibe’e Lowalangi. (Sin. 45, 8. Kol. 1, 19). 

35 I’omasi’õ Nono Ama, ba no ahori ibe’e ba dangania fefu hadia ia. (F. 5, 22; 13, 3. Mat. 11, 27). 

36 Khõ zamati khõ Nono andrõ so wa’auri si lõ aetu; lõ i’ila dania wa’auri si lõ mamati khõ Nono andrõ, lõ tebulõ wõnu Lowalangi khõnia. (Yoh. I. 5, 12).

 

YOHANE FAZA 4

I. Huhuo Yesu ba ndra alawe Zamaria andro. II. Mamati mbanua Zamaria andrõ. III. Latema ia banua Galilaia. IV. Ifadõhõ wõkhõ nono genoni zalaŵa.

1 I. Me no irongo Yesu, na larongo farizaio, ato nifahaõ Yesu ba ato nibayagõnia idanõ, moroi khõ Yohane (F. 3, 22. 26). 

2 — ba tenga sa Yesu zamayagõ idanõ, ha nifahaõnia — 

3 ba irõi Yudaia, ifuli isaŵa Galilaia. (A. 45). 

4 Ba ba Zamaria lalania. 

5  ba irugi mbanua Zamaria ndrõ, sotõi Sichara, ba ba zitambai mbenua andrõ, nibe’e Yakobo khõ nononia Yosefo (Moze 1. 33, 19; 48,22).

6. Ba so bada’õ gumbu Yakobo. Ba me no erege dõdõ Yesu wekoli, ba mudadao ia ba zinga gumbu andrõ so laluo.

7 So moroi sa ndra alawe Zamaria ba wana’u idanõ.

8Imane khõnia Yesu: be’e õgu ubadu. Noa sa mofanõ ndra nifahaõnia miyomo ba mbanua ba wowõli gõ.

9 Imane khõnia ira alawe Zamaria andrõ: hadia wa õ’andrõ khõgu nidanõ? Niha Yehuda sa ndra’ugõ ba ira alawe Zamaria ndra’odo. (Luk. 9, 53. Eser. 4, 1 b. t.).

10 Itema linia Yesu, imane khõnia: Na õ’ila ena’õ mbuala Lowalangi andrõ, ba na õ’ila, haniha zanguma’õ khõu: be’e õgu, ubadu; ba no mangandrõ ndra’ugõ khõnia mena’õ, ba no ibe’e khõu nidanõ gumbu. ( Sin. 36, 10, Fam. 21, 6).

11 Imane khõnia ira alawe andrõ: Ba lõ khõu fana’u Tua, ba no abakha mba’a, ba he moroi khõu nidanõ gumbu andrõ?

12 Hadia, ebua ndra’ugõ moroi khõ duada Yakobo, same’e ba’a andre khõda, samadu idanõnia, awõ nononia, awõ gurifõnia?

13 Itema linia Yesu, imane khõnia: ifuli owõkhi dõdõ dozi samadu idanõ andre,

14 ba irugi zi lõ aetu, ba  lõ’õ manõ owõkhi dõdõ zamadu idanõ nibe’egu khõnia, tobali umbu ba dõdõnia nidanõ andrõ, nibe’egu khõnia, tobali umbu ba dõdõnia nidanõ andrõ, nibe’egu khõnia, sangumbungumbu sanawa fa’auri si lõ aetu. (F. 7. 38.39. Jes 12)

 

27 Ba ba da’õ so ndra nifahaõnia, ba ahõlihõli dõdõra, me fahuohuo ia ba ndra alawe, ba lõ’õ zui sanofu: Hadia ni’aluimõ, ba ma: hadia huhuomõ khõnia? 

28 Ba irõi sa’ae nasoa khõnia ira alawe andrõ, mõi ia miyomo ba imane ba mbanuara: 

29 Mi’ae mifaigi niha, si no mangombakha khõgu fefu hadia ia nilaugu! Hadia, tenga Keriso andrõ da’õ? 

30 Ba mõi ira moroi yomo, la’ondrasi. 

31 Ba barõ õ muhede khõnia nifahaõnia, lamane: A gõu, samahaõ. 

32 Ba imane khõra: So gõgu, ni’ā, si lõ mi’ila. 

33 Ba faoma lamane nifahaõnia khõ nawõra: Hadia, so zi no molohe gõ khõnia? 

34 Imane khõra Yesu: Ogu da’õ, na u’o’õ zomasi zamatenge ya’o, ba na u’asiwai halõŵõ andrõ khõnia. (F. 6, 38. Sin. 40, 9). 

35 Hadia, lõ miŵa’õ: Hatõ õfa waŵa, ba famasi sa’ae? Hiza, uŵa’õ khõmi: Mifaõga hõrõmi, ba mifaigi nowi, noa sa’ae a’usõ, tandra wa basitõ. (Mat. 9, 37). 

36 Itema sa’ae luo samasi, ba i’ozaragõ mbua ba wa’auri si lõ aetu, ena’õ faoma omuso dõdõra, he sanaru, ba he samasi. (Kor. I. 3, 6 b. t.). 

37 Ba da’õ sa duhu niŵa’õ andrõ: Samõsa zanaru ba samõsa zamasi.

38 No ufatenge ami ba wamasi, ba zi lõ erege dõdõmi. No mohalõŵõ niha bõ’õ, ba ya’ami zanohugõ holõŵõra andrõ. (Hal. zin. 8, 5 b. t.).

39 II. Ba ato zamati khõnia banua Zamaria, banua da’õ no mege, ba niŵa’õ ndr alawe andrõ, samaduhu’õ: No i’õmbakha’õ khõgu fefu hadia ia nilaugu. 

40 Ba me no la’ondrasi ia banua Zamaria andrõ, ba la’andrõ khõnia, i’iagõ khõra da’õ; ba dua wonginia ba da’õ. 

41 Ba ato zamati ba wangombakhania,

42 ba lamane ba ndra alawe no mege: Tenga sa’ae ba ni’ombakha’õmõ mamati ndra’aga, noa sa’ae marongo ba no ma’ila, wa si ndruhu sangorifi õsi guli danõ da’õ. (F. 17, 8).

43 III. Ba aefa zi dua wongi, ba iheta ia ba da’õ, isaŵa Galilaia. 

44 Ifaduhu’õ sa Yesu, te’ositengagõ zama’ele’õ ba mbanuara. (Mat. 13, 57).

45 Ba me no irugi Galilaia, ba latema ia banua Galilaia, me no la’ila nilaunia ba Yeruzalema, ba gowasa fefu. Noa sa mõi ira gõi ba gowasa. (F. 2, 23).

46 IV. Ba irugi zui Kana ba Galilaia ba nibali’õnia agu idanõ. Ba so genoni razo, sofõkhõ ono, ba Gafanauma. (F. 2, 19). 

47 Me irongo da’õ, so Yesu, si otarai Yudaia, si mõi ba Galilaia, ba mõi ia khõnia, ena’õ mõi ia misi tou, ba wamadõhõ fõkhõ nononia, si onali mate. 

48 Ba imane khõnia Yesu: Na lõ ni’ilami tandra ba ila’ila, ba lõ mamati ami. (F. 2, 18; 20, 29). 

49 Imane khõnia enoni razo andrõ: He Tua! ae mitou, fatua lõ mate nonogu andrõ. 

50 Imane khõnia Yesu: Ae’e, auri nonou. Faduhu dõdõ niha andrõ ba li andrõ, niŵa’õ Yesu khõnia, ba mõi. 

51 Ba me no irugi si tou, ba falukha ia zawuyunia ba la’ombakha’õ khõnia: Auri nonou. 

52 Ba isofu khõra, ha wa’alaŵa luo, me abe’e ia. Ba lamane khõnia: Menewi, manaere wa’alaŵa luo, ba tebato wa’aukhu. 

53 Ba aboto sa’ae ba dõdõ nama nono andrõ, da’õ wa’alaŵa luo, me iŵa’õ khõnia Yesu: Auri nonou. Ba mamati ia, awõ zoroiyomonia fefu. (Hal. zin. 16, 15. 31 b. t.).

54 Me i’otarai Yudaia, me numalõ ia ba Galilaia, ilau da’õ Yesu, dombua sa’ae ba da’õ dandra andrõ. (F. 2, 11).

 

YOHANE  FAZA 5

I. Sofõkhõ ba mbaŵa Betesa. II. Ifaduhu’õ Yesu, wa no Lowalangi zamatenge ya’ia.

1 I. Aefa da’õ, ba so gowasa niha Yehuda, ba mõi misi yaŵa ba Yeruzalema Yesu. 

2 Ba so ba Yeruzalema mbaŵa, ba zinga mbawa gõli mbiribiri, Betesa dõinia ba li Heberaio, ba lima nose. (Neh. 3, 1). 

3 Ba ato niha sofõkhõ ba nose andrõ, awõ zau’a, awõ zombuyumbuyu, awõ zofõkhõ baõsi, (labalobaloi wa’atekiba nidanõ. (Fam. 16, 5). 

4 Itaria mõi tou mala’ika, ba mbaŵa andrõ, ba ifakiba nidanõ, ba dõhõ wõkhõ zi fõfõna mõi si tou ba mbaŵa, na aefa tekiba nidanõ, gofu hadia gõi wõkhõnia). 

5 Ba so ba da’õ niha, si no tõlu ngafulu a ŵalu fakhe wa’ara fõkhõ. 

6 Me i’ila da’õ Yesu, ba me oroma khõnia, no ara sibai ia, ba imane khõnia: Omasi’õ na dõhõ wõkhõu? 

7 Itema linia sofõkhõ andrõ, imane; Lõ khõgu niha, Tua, solohe ya’o si tou ba mbaŵa na tekiba nidanõ, ba na so ndra’o, ba no mõi si tou dánõ bõ’õ, fõnagu. 

8 Imane khõnia Yesu: Faoso, fazaŵa gasomõ ba owaõwaõ! (Mat. 9, 6. Hal. zin. 9, 34). 

9 Ba dõhõ wõkhõ niha andrõ ifazaŵa gasonia ba mowaõwaõ. Ba luo sabato, me luo da’õ. 

10 Ba lamane niha Yehuda khõ nifadõhõ fõkhõ andrõ: Luo sabato, ba lõ tola õ’ohe gaso. 

11 Itema lira, imane: Samadõhõ fõkhõgu andrõ zanguma’õ khõgu: Fazaŵa gasomõ ba owaõwaõ. 

12 Ba lasofu khõnia: Ha niha da’õ, zanguma’õ khõu: Fazaŵa ba owaõwaõ? 

13 Ba lõ i’ila sofõkhõ andrõ ha niha, noa sa iheta ia Yesu, me no ato niha ba da’õ. 

14 Aefa da’õ, ba falukha khõnia Yesu, ba gosali, ba imane khõnia: Faigi, no dõhõ wõkhõu, bõi sa’ae fazõkhi horõ, fa lõ gõna ndra’ugõ sabõlõbõlõ moroi andrõ. (F. 8, 11. Mat. 12, 45). 

15 Mõi niha andrõ, iŵa’õ ba niha Yehuda, Yesu zamadõhõ fõkhõnia. (A. 10.).

16 Ba andrõ lagohi Yesu niha Yehuda, me no ilau da’õ ba luo sabato. (F. 7, 22 b. t. 9, 16).

17 II. Ba humede ia khõra, imane: Mohalõhalõŵõ Namagu, irugi da’e, ba ya’o gõi, mohalõŵõ. (F. 9, 4). 

18 Andrõ mendrua manõ la’alui wamunu ya’ia niha Yehuda, me tenga ha fanaŵõnia oroisa sabato, me iŵa’õ gõi, Lowalangi Namania, ba me ifaomagõ ia khõ Lowalangi. (F. 10, 30—33). 

19 Ba humede khõra Yesu, imane khõra: Si ndruhundruhu niŵa’õgu khõmi, lõ i’ila ilau hadia ia Ono, na moroi khõnia, na lõ ni’ilania, ilau Ama; nilau da’õ sa ilau gõi Ono, si manõ gõi. (F. 5, 30). 

20 Noa sa i’omasi’õ Nono Ama, ba fefu nilaunia, ba i’oroma’õ khõnia, ba i’oroma’õ khõnia dania halõŵõ, sebua moroi andrõ, ena’õ ahõlihõli dõdõmi. (F. 1, 51). 

21 Hulõ si mane fanusugi Nama si mate, si mane fangorifinia ya’ira, si manõ gõi Nono, i’orifi zomasi ia. 

22 Lõ’õ sa gõi ihuku niha Ama, noa sa ibe’e khõ Nono wanguhuku andrõ fefu, (F. 3, 35. Sin. 72, 1. Hal. zin. 17, 31. Mat. 25, 32). 

23 fa dozi lafosumange Nono, si mane famosumangera Ama. Si lõ mamosumange Ono, ba lõ’õ gõi ifosumange Nama, samatenge Ono. (F. 14, 13. Fil. 2, 10. 11. Yoh. I. 2, 23). 

24 Si ndruhundruhu niŵa’õgu khõmi, so wa’auri si lõ aetu khõ zamondrongo ligu, na mamati ia khõ zamatenge ya’o, ba lõ lahuku ia; noa sa isaŵa wa’auri, i’otarai wa’amate. (F. 3, 18. 37; 8, 51). 

25 Si ndruhundruhu niŵa’õgu khõmi, irugi baŵa dania, ba no ireogi iya’e, ba larongo li Nono Lowalangi si mate, ba sauri zamondrongo andrõ. (F. 11, 43. Mat. 11, 5. Efes. 5, 14). 

26 Hulõ si mane khõ Nama sa, si so fa’auri ba dõdõnia si manõ gõi mbe’enia khõ Nono, ena’õ so wa’auri ba dõdõnia. (F. 1, 4; 11, 25. Yoh. I. 5, 20). 

27 Ba no itehe khõnia wanguhuku, bõrõ me no Ono Niha ia. (Dan. 7, 13. 14. Mat. 25, 31). 

28 Bõi ahõlihõli dõdõmi ba da’õ! Irugi baŵa dania, ba larongo linia dozi si so ba lewatõ, (Tes. I. 4, 16), 

29 ba mõi ira yaŵa: samazõkhi si sõkhi, ba ba wemaoso ba wa’auri, ba solo’õ si lõ sõkhi, ba ba wemaoso ba huku. (F. 9, 40. Dan. 12, 2). 

30 Lõ u’ila ulau hadia ia, na moroi khõgu, u’o’õ nirongogu, wanguhuku, ba no atulõ wanguhuku andrõ khõgu. Lõ u’alui zomasi ndra’o, somasi zamatenge ya’o u’alui. (F. 5, 19; 6, 38). 

31 Na ya’o zamaduhu’õ ya’o, ba tenga si duhu wamaduhu’õgu. (F. 8, 13; 14, 54). 

32 Tánõ bõ’õ zamaduhu’õ ya’o, ba mi’ila, wa no si duhu wamaduhu’õnia, famaduhu’õnia ya’o. (Mat. 3, 17). 

33 No mifatenge khõ Yohane, ba no ifaduhu’õ zi duhu. (F. 1, 19 b. t.). 

34 Ba ya’o, ba tenga ba niha utema wamaduhu’õ andrõ, ba andrõ uŵa’õ da’õ, ena’õ te’orifi ami. 

35 Fandru siholahola da’õ no mege, sihaga, ba no omasi ami, mi’omusoi’õ, dõdõmi, si lõ arara, ba haga andrõ khõnia. 

36 Ba no so khõgu wamaduhu’õ ba da’õ, sebua moroi khõ Yohane. Halõŵõ andrõ sa, nibe’e Nama khõgu, ba wangasiwai ya’ia, halõŵõ andrõ, nihalõgu, da’õ zamaduhu’õ ya’o, wa no Ama zamatenge ya’o. (F. 10, 25; 14, 10. 11). 

37 Ba samatenge ya’o andrõ, Ama da’õ zamaduhu’õ ya’o. Ba lõ mirai mirongo linia, ba nga’eunia, ba lõ ni’ilami. (F. 8, 18; 1, 18). 

38 Ba lõ ahono ba dõdõmi daroma linia, me lõ mamati ami khõ nifatengenia andrõ. (F. 10, 26. Kor. II. 3, 15). 

39 Mi’alualui ba zura, me miŵa’õ so khõmi ba da’õ wa’auri si lõ aetu; ba ya’ia zamaduhu’õ ya’o; (Yes. 34, 16. Sin. 40, 8. Luk. 24, 27); 

40 ba lõ edõna mõi ami khõgu, ena’õ so khõmi wa’auri. 

41 Lõ utema zumange nibe’e niha. 

42 Ba no u’ila ami, wa lõ khõmi fa’omasi Lowalangi ba dõdõmi. 

43 Ba dõi Namagu so ndra’o, ba lõ mifonaha ndra’o. Na so dania dánõ bõ’õ, ba dõina manõ, ba mifonaha. (F. 7, 28). 

44 He miwisa mamati, me faoma mitema zumange khõ nawõmi, ba seomange andrõ khõ Lowalangi, si ha sambua, ba lõ mi’alui? (F. 12, 42. 43). 

45 Bõi miŵa’õ tõdõmi, ya’õ zangadugõ ya’ami khõ Nama; so zangadugõ ya’ami, Moze, ba zanõtõna ami. (Moz. V. 31, 26 b. t.). 

46 Na mamati ami khõ Moze, ba mamati ami khõgu gõi ena’õ, noa sa ibe’e ba zura da’õ hadia ia khõgu. (Moz. I. 3, 15; 49, 10. Moz. V. 31, 15 b. t.). 

47 Ba na lõ mamati ami ba zura da’õ, ba he miwisa mamati ba niŵa’õgu?

 

YOHANE 6

I. Fame’e gõ ba niha si lima ngahõnõ. II. Mowaõwaõ ba dete nidanõ Yesu. III. Huhuonia ba Gafanauma. IV. Famaduhu’õ Wetero.

(A. 1—14: Mat. 14, 13—21. Mar. 6, 31—44. Luk. 9, 11—17.)

1 I. Aefa da’õ, ba mofanõ Yesu, i’õtõ mbaŵa Galilaia andrõ, baŵa Diberia. 

2 Ba ato zolo’õ ya’ia niha, me no la’ila dandra andrõ, nifazõkhinia ba zofõkhõ. 

3 Ba mõi ba hili Yesu, mudadao ia ba da’õ, awõ ndra nifahaõnia. 

4 Ba no ahatõ wasa, owasa niha Yehuda andrõ. (Moz. III. 23, 5 b. t.). 

5 Ba ifaõga hõrõnia Yesu, ba i’ila, ato zi mõi khõnia niha, ba imane khõ Wilifo: Heza ta’õli gõ, ena’õ manga da’õ? (F. 1, 44). 

6 Ba wanandraigõ ya’ia iŵa’õ da’õ, noa sa i’ila, he iwisa dania. 

7 Itema linia Filifo, imane: Lõ irugi õra si otu rufia fowõli roti, he ha ma’ifu zamõsa tebe’e. 

8 Imane khõnia nifahaõnia samõsa, Andrea, talifusõ Zimoni Fetero andrõ: 

9 So ba da’e ndraono, si so roti gandru, lima, ba dua rozi gi’a. Ba ha wa’arõu da’õ ba zi manõ fa ato?

10 Imane Yesu: Mifedadao niha. Ba no abõlõ ndru’u ba naha andrõ. Ba mudadao ndra matua, mato lima ngahõnõ ira. 11 Ba ihalõ roti no mege Yesu, i’aohasi gõlõ Lowalangi, ba ibe’e ba zidadao andrõ, si manõ gõi ba gi’a andrõ, ha wa’oya zomasi ira. (Sin. 145, 16). 12 Ba me no abuso ira, ba imane ba nifahaõnia; Mi’ozaragõ gakhõkhõla, si tosai, fa bõi tefara’u hadia ia. 13 Ba la’ozaragõ ba felendrua lafo’õsi kude, akhõkhõla roti gandru andrõ, si lima, si tosai ba zi no manga andrõ.

14 Ba me la’ila niha dandra andrõ, nifazõkhinia, ba lamane: Si ndruhu, da’õ zama’ele’õ andrõ, si mõi ba guli danõ. (F. 7, 40. Moz. V. 18, 15 b. t.).

(A. 15—21: Mat. 14, 22—36. Mar. 6, 45—56.)

15 Ba me i’ila Yesu, mõi ira dania, lara’u ia, ba wamali’õ razo ya’ia ba ifuli iheta ia, isaŵa hili, ha ya’ia. (F. 18, 36).

 

16 II. Ba me tánõ owi, ba mõi mitou ndra nifahaõnia ba mbaŵa mõi ira baowo, 

17 la’õtõ mbaŵa, lasaŵa Gafanauma; ba ikhamõ ira fa’abongi, ba lõ’õ na si mõi khõra Yesu. 

18 Modulu sibai mbaŵa, me angi sabe’e. 

19 Ba me no tõra saza woloyora, ba la’ila Yesu, sowaõwaõ ba dete nidanõ, no ahatõ ia ba nowo, ba ata’u ira. 

20 Ba imane khõra: Ya’odo, bõi mi’ata’ufi!

21 Ba lafa’amõi ia baowo mena’õ, ba ireogi si’aikõ owo danõ si mõi ira.

22 III. Ba mahemolu õ, ba la’ila niha si so yefo mbaŵa lõ owo bõ’õ ba da’õ, baero zi sambua andrõ, ba no la’ila, lõ fao Yesu khõ ndra nifahaõnia, we’amõi baowo, ha nifahaõnia zoloyo. 

23 — So sa nowo bõ’õ, si otarai Diberia, si mõi ba zahatõ ba naha andrõ, ba ni’ara roti andrõ me no mangandrõ saoha gõlõ Zo’aya. 

24 — Ba me la’ila niha, lõ Yesu ba da’õ ba lõ’õ gõi ira nifahaõnia, ba mõi ira gõi ba nowo andrõ, lasaŵa Gafanauma, mangalui Yesu. 

25 Ba me lasõndra ia, yefo mbaŵa, ba lamane khõnia: He samahaõ, ha mega õrugi da’e? 

26 Itema lira Yesu, imane: Si ndruhundruhu niŵa’õgu khõmi, tenga ba da’õ mi’alui ndra’o, me no mi’ila dandra; me no mi’ā roti andrõ, me no abuso ami, andrõ mi’alui ndra’o. 

27 Bõi mi’a’asogõ gõ andrõ sobou dania, õ si lõ tebulõbulõ andrõ, ba wa’auri si lõ aetu, mi’asogõ, nibe’e Nono Niha khõmi; da’õ sa nifaduhu’õ Nama, Lowalangi. (F. 4, 14; 10, 36). 

28 Ba lamane khõnia: He mawisa ena’õ, ba wangai halõŵõ andrõ khõ Lowalangi? 

29 Itema lira Yesu, imane khõra: Da’õ halõŵõ khõ Lowalangi, na mamati ami khõ nifatengenia andrõ. (Yoh. I. 3, 23). 

30 Ba lamane khõnia: Ba hadia dandra, nifazõkhiu, ena’õ ma’ila, ba ena’õ mamati ndra’aga khõu? Hadia ni’asogõmõ? (F. 4, 18. Mat. 12, 38). 

31 No la’ā ”mana” ira tuada, ba danõ si mate; si mané ba zura: ”No ibe’e õra roti moroi ba mbanua si yaŵa”. (Moz. II. 16, 4. 15. Sin. 78, 24). 

32 Ba imane khõra Yesu: Si ndruhundruhu niŵa’õgu khõmi, tenga Moze zame’e khõmi gõ andrõ, moroi ba mbanua si yaŵa, Amagu zame’e khõmi gõ si ndruhu andrõ, moroi ba mbanua si yaŵa. (F. 6, 49 b. t. Moz. V. 8, 3). 

33 Da’õ sa gõ andrõ, nibe’e Lowalangi, si mõi mitou moroi baa mbanua si yaŵa, fangorifi nõsi guli danõ. 

34 Ba lamane khõnia: He Tua, bõi bulõ’õ wame’e khõma gõ andrõ. 

35 Ba imane khõra Yesu: Ya’odo gõ fangorifi, lõ’õ sa’ae olofo zi mõi khõgu, ba lõ’õ manõ sa’ae owõkhi dõdõ zamati khõgu. 

36 Ba uŵa’õ khõmi, noa gõi mi’ila ndra’odo, ba lõ mamati ami. 

37 Si mõi khõgu fefu nibe’e Namagu khõgu, ba lõ’õ manõ utibo’õ zi mõi khõgu. (F. 17, 6. 9. 11). 

38 Tenga ba wolau somasi ndra’o mõido tou moroi ba zorugo, ba wolau somasi samatenge ya’o mõido tou. (F. 4, 34. Luk. 22, 42). 

39 Da’õ zomasi zamatenge ya’o, ena’õ lõ si taya khõgu ba nibe’enia khõgu fefu, ena’õ na ususugi ia, na luo safuria andrõ. (F. 10, 28. 29). 

40 Da’õ sa zomasi Namagu, ena’õ so wa’auri si lõ aetu khõ zangila Ono fefu, samati khõnia, ba ya’o zanusugi ya’ira, na luo safuria andrõ. (F. 3, 14 b. t.). 

41 Ba kumõkõkõkõ niha Yehuda khõnia, me no iŵa’õ: ya’odo gõ andrõ, si no mõi mitou moroi ba mbanua si yaŵa, ba lamane: 

42 Tenga Yesu da’õ, ono Yosefo, ni’ilada ama ba ina? Ba hana wa iŵa’õ da’õ: Moroi ba mbanua si yaŵa u’otarai? (Mat. 13, 55 b. t.). 

43 Itema lira Yesu, imane khõra: Bõi mikõkõkõkõ khõ nawõmi. 

44 Lõ sangila mõi khõgu, na tenga Amagu, samatenge ya’o, zondrõnisi ya’ia; ba ya’o zanusugi ya’ia na luo safuria andrõ. (F. 6, 37. 39. 65. Mat. 16, 17). 

45 No so ba zura zama’ele’õ: ”Nifahaõ Lowalangi ira dania, fefu”. Dozi mõi khõgu samondrongo khõ Nama, sanõngõni. (Yes. 54, 13. Yer. 31, 33. 34). 

46 Tenga fa no i’ila Nama niha, baero zi otarai Lowalangi andrõ, da’õ zi no mangila Lowalangi. (F. 1, 18. Tim. I. 6, 16). 

47 Si ndruhundruhu niŵa’õgu khõmi, khõ zamati so wa’auri si lõ aetu. (F. 3, 36). 

48 Ya’o roti fangorifi andrõ.

49 No la’ā ”mana” ira tuami, ba danõ si mate, ba no mate ira. (Kor. I. 10, 3. 5). 

50 Da’õ roti fangorifi, si otarai mbanua si yaŵa, ena’õ na i’ā ia niha, ba lõ mate ia. 

51 Ya’o roti andrõ, sauri, si otarai mbanua si yaŵa, na so zi manga roti andrõ, ba auri ia, irugi zi lõ aetu; ba roti andrõ gõi, nibe’egu dania, õsigu andre, ba no fangorifi nõsi guli danõ. (Luk. 22, 19). 

52 Ba mowasoso niha Yehuda, lamane: He iwisa da’õ fa tola ibe’e ni’ada nõsinia? 

53 Ba imane khõra Yesu: Si ndruhundruhu niŵa’õgu khõmi, na lõ mi’ā nõsi Nono Niha, na lõ mibadu ndronia, ba lõ fa’auri khõmi, ba dõdõmi. (Mat. 26, 26 b. t. Kor. I. 11, 27). 

54 Si manga nõsigu, samadu dogu, da’õ zi so fa’auri si lõ aetu, ba ya’o zanusu gi ya’ia, na luo safuria andrõ. 

55 Õsigu sa zi ndruhu gõ ba dogu zi ndruhu nibadu. 

56 Lõ aheta khõgu zi manga nõsigu, samadu dogu, ba lõ aheta ndra’o khõnia. (F. 15, 5). 

57 Si mane famatenge Nama sauri andrõ ya’o, awõ wa no bõrõ Nama, wa no sauri ndra’o, si manõ gõi zi manga ya’o, bõrõ ndra’o, wa sauri ia. (F. 5, 26). 

58 Da’õ roti andrõ, si otarai mbanua si yaŵa; tenga si mane ira tuami, si manga ba mate: Si manga roti andrõ, ba auri, irugi zi lõ aetu. 

59 Ba zekola iŵa’õ da’õ, me mamahaõ ia, ba Gafanauma. 60 Ba ato nifahaõnia, ba lamane, me larongo da’õ; Huliuo sabe’e da’õ, ha niha zanaha mamondrongo da’õ? 

61 Ba me i’ila tõdõnia Yesu, kumõkõkõkõ nifahaõnia ba da’õ, ba imane khõra: Hadia, fatuwu khõmi da’õ? 

62 Ba he wisa, na mi’ila dania, mõi yaŵa Nono Niha, ba zi so ia fõna? (Yoh. 3, 13; 20, 17. Mar. 16, 19). 

63 Eheha zangorifi, lõ’õ manõ guna nõsi niha. Eheha ba fa’auri daroma ligu andrõ, niŵa’õgu khõmi. (Kor. II. 3, 6). 

64 Ba so õsa ba khõmi, zi lõ mamati. Noa sa i’otarai mbõrõta i’ila Yesu, ha niha zi lõ mamati, ba ha niha zi manga mbõlinia dania. (F. 2, 25).

65 Ba imane: Andrõ uŵa’õ khõmi: Lõ sangila mõi khõgu, na tenga nibe’e Nama khõnia. (F. 6, 44).

66 IV. I’otarai da’õ, ba ato zamuli ya’ira, nifahaõnia, ba lõ’õ sa’ae faofao ira khõnia. 

67 Ba imane Yesu ba zi felendrua: Hadia, sofanõ gõi ami? 

68 Itema linia Simoni Fetero, imane: He Tua, ba õkhõ mõiga? So khõu daroma li fangorifi, ba wa’auri si lõ aetu. 

69 Ba no mamati ndra’aga ba no aboto ba dõdõma, ya’ugõ ni’amoni’õ andrõ khõ Lowalangi. (F. 1, 50; 11, 27). 

70 Itema lira Yesu: Tenga felendrua ami, nitutuyugu? Ba afõkha zi samõsa. (Luk. 6, 13). 

71 Yuda andrõ, ono Zimoni, banua Kariota, niŵa’õnia; da’õ sa zi manga mbõlinia dania; samõsa ia ba zi felendrua. (F. 12, 4; 18, 3).

 

YOHANE 7

I. Fekoli Yesu ba Yeruzalema, ba gowasa nose daha geu. II. Huhuo Yesu ba gosali. III. Lõ faoma dõdõ niha sato khõnia, ba lõ’õ gõi faoma dõdõ zalaŵa rafe.

1 I. Aefa da’õ, ba itõrõi Galilaia Yesu, lõ’õ sa edõna ia itõrõi Yudaia, me la’alui wamunu ya’ia niha Yehuda. (F. 5, 16. 18). 

2 Ba no ahatõ gowasa niha Yehuda, owasa nose daha geu. (Moz. III. 23, 34 b. t.). 

3 Ba lamane khõnia ira talifusõnia: Heta’õ ba da’e, ae misi yaŵa ba Yudaia, ena’õ la’ila gõi ira nifahaõmõ halõŵõu andrõ, nihalõu. (Mat. 12, 46). 

4 Lõ solau hadia ia ba zi tobini, si lõ edõna aiwõ gõi. Na õlau zi manõ, ba oroma’õ ndra’ugõ ba niha. 

5 Talifusõnia andrõ gõi, ba si lõ mamati khõnia. (Sin. 69, 9. Mat. 3, 21). 

6 Imane khõra Yesu: Tenga na inõtõ khõgu, ba inõtõ khõmi andrõ, ba gofu ha wa’ara. (F. 2, 4). 

7 Khõmi, ba tebai fatiu dõdõ niha guli danõ, ba khõgu, ba fatiu dõdõra, me ufaduhu’õ khõra, wa lõ sõkhi mbuabuara. 

8 Mi’ae misi yaŵa ba gowasa, ya’odo, lõ mõi misi yaŵa ba gowasa, me lõ irugi na inõtõ andrõ khõgu. 

9 Aefa iŵa’õ da’õ, ba i’iagõ Galilaia. 

10 Ba me no mõi misi yaŵa ba gowasa ndra talifusõnia, ba awena mõi ia gõi misi yaŵa; lõ i’oroma’õ, ibini’õ. 

11 Ba la’alui ia niha Yehuda, ba gowasa, lamane: Heza so ia? 

12 Ba tobali fasosota sabõlõbõlõ, ba khõnia andrõ, ba niha sato. So zanguma’õ: Si sõkhi ia. Ba so zanguma’õ: Lõ’õ ifaelungu niha. (F. 9, 16).

13 Ba lõ’õ zui si lõ aiwõ manguma’õ hadia ia ba khõnia, ba wa’ata’ura niha Yehuda. (F. 9, 22).

14 II. Ba me no talu gowasa, ba mõi miyaŵa Yesu ba gosali ba mamahaõ. 

15 Ba ahõlihõli dõdõ niha Yehuda, lamane: He moroi i’ila zura da’õ, me lõ mufahaõ? (Mar. 6, 2). 

16 Ba itema lira Yesu, imane Tenga khõgu wamahaõgu andrõ, khõ zamatenge ya’o. (F. 8, 26. 28; 14, 24). 

17 Na so zedõna molo’õ somasi ia, ba dõdõnia aboto hadia ia ba wamahaõ andrõ, na moroi ba Lowalangi ia, ba na moroi ba khõgu muhede ndra’o. (F. 3, 33). 

18 Sihede moroi ba khõnia, ba mangalui lakhõmi khõnia. Ba sangalui lakhõmi zamatenge ya’ia, da’õ zi ndruhu, ba lõ si lõ atulõ ba dõdõnia. (F. 5, 41. 44). 

19 Tenga Moze zame’e oroisa khõmi? Ba samõsa lõ’õ ba khõmi solo’õ oroisa andrõ. Hana wa mi’alui wamunu ya’o? (Hal. zin. 7, 52. 53. Mat. 12, 14). 

20 Latema linia niha sato, lamane! Sobekhu ndra’ugõ! Ha niha zangalui famunu ya’ugõ? (F. 8, 48; 10, 20). 

21 Itema lira Yesu, imane khõra: Ha sambalõ halõŵõ nihalõgu, ba oi sahõlihõli tõdõ ami. (F. 5, 16). 

22 No ibe’e khõmi wamoto andrõ Moze, tenga me moroi khõ Moze ia, me moroi khõ ndra tua, ba ba luo sabato miboto niha. (Moz. III. 12, 3. Moz. I. 17, 10. 12). 

23 Na laboto niha ba luo sabato, fa lõ tesawõ goroisa Moze andrõ, ba hadia, mofõnu ami khõgu, me no abe’e niha, ma’asambua, ube’e ba luo sabato? (F. 5, 9). 

24 Bõi mibe’e balazi ni’ila hõrõ, ba wanguhuku hadia ia, mi’atulõ’õ wanguhuku (Moz. V. 1, 16. 17; 16, 19). 

25 Ba laŵa’õ banua Yeruzalema õsa: Hadia, tenga da’õ ni’aluira famunu? 

26 Ba hiza, lõ ata’u ia muhede, ba lõ hedehedera khõnia. Ma duhu no aboto ba dõdõ zalaŵa, wa Keriso da’õ? 

27 Ba no ta’ila, he moroi da’õ, ba na so Keriso andrõ, ba lõ sangila he moroi ia. (F. 6, 42). 28 Ba mu’ao Yesu, me mamahaõ ia ba gosali, imane: Mi’ila sa ndra’o, ba mi’ila, he moroi ndra’o. Ba tenga moroi khõgu mõi ndra’o, so sa zi duhu, samatenge ya’o, si lõ mi’ila. (F. 5, 43; 8, 19. 42 b. t.). 

29 Ya’o zangila ya’ia, me moroi khõnia ndra’o, ba me no ya’ia zamatenge ya’o. (Mat. 11, 27). 

30 Ba la’alui wondra’u ya’ia, ba lõ’õ sa sombambaya ya’ia, me lõ’õ na irugi inõtõ andrõ khõnia. (F. 8, 20; 13, 1). 

31 Ba ato zamati khõnia ba niha sato, ba lamane: Na so Keriso andrõ, ba hadia, oya ifazõkhi dandra, moroi ba nifazõkhi da’õ? (F. 8, 30). 

32 Larongo farizaio, wa si manõ wangõngõngõngõsa niha sato ba khõnia; ba lafatenge genonira ere sebua ba farizaio, ena’õ lara’u ia. 

33 Ba imane Yesu: Lõ ara tõ ndra’o khõmi, ba mofanõdo khõ zamatenge ya’o andrõ. (F. 12, 25; 13, 33; 14, 12; 16, 28). 

34 Mi’alui ndra’o dania, ba lõ misõndra ndra’o, ba tebai mõi ami ba zi so ya’o. (F. 8, 21; 12, 26. Amos. 8, 12). 

35 Ba faoma lamane khõ nawõra niha Yehuda: Heza mõi ia dania, wa lõ tasõndra ia? Ma mõi ia ba zizaewe andrõ, ba Ndrawa Heleni, mamahaõ Dawa Heleni? (Fet. I. 1, 1).

36 Hadia wehede andrõ, niŵa’õnia: Mi’alui ndra’o dania, ba lõ misõndra ndra’o; ba tebai mõi ami ba zi so ya’o? 

37 Ba me luo gowasa safuria, sebua, ba so Yesu, mu’ao ia, imane: Na so zowõkhi tõdõ, ba yamõi khõgu, mamadu? (Moz. III. 23, 36. F. 4, 10. 14. Fam. 22, 17).

38 Moroi ba nõsi zamati khõgu mangele dania hohou nidanõ gumbu, si mane niŵa’õ ba zura. (Hes. 47, 1. Yes. 44, 3).

39 Ba Geheha sa iŵa’õ da’õ, nitema zamati khõnia dania; lõ si so Geheha na, me lõ mufolakhõmi Yesu na. (F. 16, 7; 20, 22).

40 III. Ba so ba niha sato õsa, lamane me no larongo wehede andrõ: Si ndruhu zama’ele’õ andrõ ia. (F. 6, 14). 

41 Ba so dánõ bõ’õ ba lamane: Keriso ba tánõ bõ’õ, ba lamane: Hadia sa, ba Galilaia i’otarai Keriso? (F. 1, 47). 

42 Tenga no muŵa’õ ba zura, moroi ba ma’uwu Dawido, moroi ba mbanua side’ide andrõ, Betilekhema, ba zi so Dawido fõna, i’otarai Keriso? (Sin. 132, 11. Mikh. 5, 2. Mat. 2, 5. 6).

43 Ba tobali lõ fagõlõgõlõ dõdõ niha sato ba khõnia andrõ. (F. 10, 19).

44 So ba khõra zondra’u ya’ia ena’õ, ba lõ’õ zui sombambaya ya’ia. 

45 Ba lafuli ira ba gere sebua ba ba warizaio enoni no mege, ba lamane khõra da’õ: Hana wa lõ mi’ohe ia? 

46 Latema lira enoni andrõ, lamane: Lõ irai si manõ niha wehede, si mane fehede niha da’õ. (Mat. 7, 28. 29). 

47 Latema lira farizaio, lamane: Hadia, no tefaelungu ami gõi? 

48 Hadia, so zamõsa salaŵa, ba ma farizaio, si no mamati khõnia? (F. 12, 42. Kor. I. 1, 26. 27). 

49 Ha sa niha sato andrõ, si lõ aboto ba dõdõ oroisa, ba ni’elifi da’õ. 

50 Imane khõra Nikodemo, awõra: (F. 3, 1. 2). 

51 Hadia, ihuku gõi niha oroisa khõda, na lõ murongo ua hadia ia, khõnia, na lõ aboto ba dõdõ nilaunia? (Moz. II. 23, 1. Hal. zin. 25, 16). 

52 Latema linia, lamane khõnia: Hadia, moroi ba Galilaia gõi ndra’ugõ? Alui ba faigi, lõ sama’ele’õ, si otarai Galilaia. (Mar. 14, 70. Yes. 9, 1. 2).

 

YOHANE 8

I. Sohorõ. II. Huhuo Yesu ba niha Yehuda.

1 I. Ba mõi ba gahe hili wanikha Yesu. (Luk. 21, 37. 38). 

2 Ba me no moluo, ba ifuli ia ba gosali, ba oi la’ondrasi ia niha, ba mudadao ia mamahaõ ya’ira. 

3 Ba la’ohe khõnia sangila amakhoita ba farizaio ndra alawe, nira’u baewawõ, lafa’aso ba gotaluara, lamane khõnia: 

4 He samahaõ, nira’u baewawõ ndra alawe andre. 

5 Ba ba goroisa iŵa’õ khõda Moze, nibunu zi manõ, nitebu kara, ha ya’ugõ, ha õŵa’õ? (Moz. III. 20, 10). 

6 Fanandraigõ ya’ia, wa laŵa’õ da’õ, ena’õ la’ila mu’adugõ ia. Ba ifaõndrõ ia tou Yesu, isura danõ turunia. (Luk. 11, 53. 54; 10, 25 b. t.). 

7 Ba me lõ labato wanofu khõnia, ba ifuli ifaõga ia, ba imane khõra: Na so ba khõmi zi lõ horõ, ba yamubõrõtaigõ wanebu kara ya’ia. (Moz. V. 17, 7. Rom. 2, 1). 

8 Ba ifuli ifaõndrõ ia manura tanõ. 

9 Ba ya’ira, me larongo da’õ, ba me itegu ira tõdõra, ba monizanizara wofanõ, i’otarai zatua, numalõ ba zafuria, ba torõi Yesu, ha ya’ia, awõ ndra alawe andrõ, ba gotaluara no mege. (Rom. 2, 15. 22). 

10 Ba me no ifaõga ia Yesu ba me lõ ni’ilania niha, baero ndra alawe, andrõ, ba imane khõnia: He alawe, heza so da’õ, sangadugõ ya’ugõ? Lõ sanguhuku ya’ugõ?

11 Ba imane: Lõ’õ, Tua. Imane khõnia Yesu: Ba ya’odo gõi, lõ uhuku ndra’ugõ. Ofanõ, ba bõi sa’ae fazõkhi horõ. (F. 3, 17; 5, 14).

 

12 II. Ba ifuli muhede khõra Yesu imane: Ya’odo haga nõsi guli danõ andrõ. Solo’õ ya’o, ba lõ mowaõwaõ ba zogõmigõmi, so sa’ae khõnia haga ba wa’auri andrõ. (F. 1, 4. 9. Yes. 49, 6). 

13 Ba lamane khõnia farizaio: Ya’aegõ nifaduhu’õ mõ, lõ duhu wamaduhu’õmõ andrõ. (F. 5, 31). 

14 Itema lira Yesu, imane khõra: He ya’o samaduhu’õ ya’odo, ba duhu zui wamaduhu’õgu, me no u’ila, he moroi ndra’o, ba heza mõido, ba ya’ami, ba lõ mi’ila, he moroi ndra’o ba heza mõido. (F. 7, 28. 33). 

15 Õsi niha dali wanguhuku khõmi, ya’o ba lõ uhuku niha. (F. 7, 24; 8, 11). 

16 Ba he manguhuku ndra’o, ba si ndruhu wanguhukugu, me no tenga ha ya’o, daruaga sa’ae samatenge ya’o. (F. 8, 29; 5, 30 b. t.). 

17 Ba noa gõi so ba goroisa khõmi, si duhu wamaduhu’õ zi darua. (Moz. V. 17, 6; 19, 15). 

18 Ya’odo zamaduhu’õ ya’o, ba ifaduhu’õ ndra’o samatenge ya’o, Amagu. (F. 5, 37). 

19 Ba lamane khõnia: Heza so Namau andrõ? Itema lira Yesu, imane: Lõ mi’ila ha niha ndra’o, ba lõ’õ gõi mi’ila ha niha Namagu andrõ. Na mi’ila ena’õ ha niha ndra’o, ba mi’ila gõi ha niha Namagu andrõ. (F. 16, 3; 14, 7). 

20 Ba zinga naha game’ela iŵa’õ da’õ, me mamahaõ ia ba gosali. Ba lõ sondra’u ya’ia, me lõ’õ na irugi inõtõ andrõ khõnia. (Mar. 12, 41. F. 7, 30. Luk. 22, 33). 

21 Ba imane zui Yesu khõra: Mofanõ ndra’o, ba mi’alui ndra’o dania, ba mate ami ba horõmi. Tebai mõi ami ba zi mõi ndra’o. (F. 7, 33. 34). 

22 Ba lamane niha Yehuda: Ta’ila na ibunu ia dania, wa iŵa’õ: Tebai mõi ami ba zi mõi ndra’o? (F. 7, 35). 

23 Ba imane khõra: Moroi si tou ami, moroi si yaŵa ndra’odo; moroi ba guli danõ andre ami, tenga moroi ba guli danõ andre ndra’odo. (F. 3, 31). 

24 Andrõ no uŵa’õ khõmi, si mate ami ba horõmi. Na lõ’õ sa mamati ami, wa ya’odo, ba si mate ami ba horõmi. (F. 4, 26). 

25 Ba lamane khõnia: Ha niha ndra’ugõ? Imane khõra Yesu: Niŵa’õgu khõmi gõi, i’otarai mbõrõta. (Hes. 12, 25. Yes. 52, 6). 

26 Oya niŵa’õgu ba khõmi andrõ, ba oya nihukugu, ba samatenge ya’o, ba no si ndruhu, ba nirongogu khõnia, da’õ niŵa’õgu ba niha ba guli danõ. (F. 3, 33). 

27 Ba lõ aboto ba dõdõra, wa Amania niŵa’õnia khõra. 

28 Ba imane Yesu: Na no mi’alaŵa’õ yaŵa dania Nono Niha, awena dania aboto ba dõdõmi, wa ya’odo, awõ wa lõ hadia ia zoroi ba khõgu, nilaugu. U’o’õ wamahaõ Namagu ya’o, da’õ huhuogu. (F. 12, 32; 5, 19; 7, 16).

29 Ba faofao khõgu zamatenge ya’o. Lõ irõi ndra’o, ha ya’o, me lõ mamalõmalõ ulau zomasi ia. 

30 Me iŵa’õ da’õ, ba ato zamati khõnia.

31 Ba imane Yesu ba niha Yehuda, si no mamati khõnia: Na lõ tebulõ ami ba daroma ligu andrõ, ba si ndruhu nifahaõgu ami; (F. 7, 17); 

32 ba aboto ba dõdõmi zi duhu, ba i’efa’õ ami si duhu andrõ. (Gal. 5, 1. Yak. 1, 25). 

33 Latema linia, lamane: Ma’uwu Gaberahamo ndra’aga, ba lõ marai mõi sawuyu niha bõ’õ, hadia wa õŵa’õ: Ni’efa’õ ami? (Mat. 3, 9. Neh. 9, 36). 34 Itema lira Yesu, imane: Si ndruhundruhu niŵa’õgu khõmi, sawuyu horõ zamazõkhi horõ. (Rom. 6, 16. 20). 

35 Ba tenga sa si lõ mamalõmalõ yomo zawuyu, si lõ mamalõmalõ nono. (Moz. I. 29, 10; II. 21, 2. Sin. 23, 6). 

36 Ba na i’efa’õ ami Ono andrõ, awena aefa sibai ami. (Rom. 6, 18; 8, 2). 

37 U’ila, wa no ma’uwu Gaberahamo ami; ba mi’alui wamunu ya’o, me lõ fakhai daroma ligu ba dõdõmi. (F. 5, 18). 

38 Uŵa’õ hadia ni’ilagu khõ Namagu; ba ya’ami sa gõi, mi’o’õ nirongomi khõ namami andrõ. 

39 Latema linia, lamane khõnia: Aberahamo duama. Imane khõra Yesu: Na ma’uwu Gaberahamo ami, ba mi’o’õ ena’õ mbuabua Gaberahamo. (Gal. 3, 7). 

40 Ba mi’alui sa wamunu ya’o, niha sanguma’õ khõmi si duhu, nirongogu khõ Lowalangi; tenga si manõ Gaberahamo. 

41 Buabua namami andrõ mi’o’õ. Lamane khõnia: Tenga ono horõ ndra’aga, ha samosa namama, Lowalangi. 

42 Imane khõra Yesu: Na amami Lowalangi mena’õ, ba mi’omasi’õ ndra’o. Moroi ba Lowalangi sa mbõrõtagu, ba da’õ u’otarai; tenga sa moroi ba khõgu, wa no so ndra’o, ya’ia sa zamatenge ya’o. (F. 5, 43; 16, 27). 

43 Hana wa lõ aboto ba dõdõmi wehedegu, wa tebai mifondrondrongo ligu? F. 6, 60. Kor. I. 2, 14). 

44 Moroi ba Gafõkha ami, ba no edõna ami mi’o’õ wa’omasi namami andrõ. No samunu niha da’õ, i’otarai mbõrõta, ba lõ ni’agõnia si duhu, lõ’õ sa si duhu ba dõdõnia. Na iŵa’õ waya, ba moroi ba zi so khõnia muhede ia, sofaya sa ia ba ama zofaya. (Yoh. I. 3, 8. 10. Moz. I. 3. Fet. II. 2, 4). 

45 Ba me no si duhu niŵa’õgu, andrõ lõ mamati ami. 

46 Ha niha ba khõmi zanegu horõ ba khõgu zambalõ? Na uŵa’õ zi duhu, ba hana wa lõ mamati ami khõgu? (Fet. I. 2, 22. Kor. II. 5, 21). 

47 Si otarai Lowalangi, ba ifondrondrongo li Lowalangi, andrõ lõ mamondrongo ami, me tenga moroi ba Lowalangi ami. (F. 18, 37. Yoh. I. 4, 6). 

48 Latema linia niha Yehuda, lamane khõnia: Tenga si duhu niŵa’õma, wa Dawa Zamaria ndra’ugõ, sobekhu? (F. 7, 20). 

49 Itema lira Yesu, imane: Tenga sobekhu ndra’odo, ufosumange sa Namagu, ba ya’ami, ba mi’o’aya ndra’o. 

50 Ba lõ u’alui zumangegu, so zangalui ya’ia, sanguhuku. (F. 5, 41). 

51 Si ndruhundruhu niŵa’õgu khõmi, na so zolo’õ ligu, ba lõ’õ manõ i’ila wa’amate, irugi zi lõ aetu. (F. 5, 24; 11, 25 b. t.). 

52 Lamane khõnia niha Yehuda; Awena aboto ba dõdõma, wa sobekhu ndra’ugõ. No mate Gaberahamo, awõ zama’ele’õ andrõ, ba õŵa’õ: Na so zolo’õ ligu, ba lõ’õ manõ itandra wa’amate, irugi zi lõ aetu. (Sakh. 1, 5). 

53 Hadia, ebua ndra’ugõ, moroi khõ duada Aberahamo, si no mate? Ba sama’ele’õ andrõ, ba no mate. Hadia õbali’õ ndra’ugõ? 

54 Itema lira Yesu imane: Na ufolakhõmi ndra’o, ba faya lakhõmigu andrõ. Amagu zamolakhõmi ya’õ, niŵa’õmi: Lowalangima ia. (F. 5, 31. 32). 

55 Ba lõ aboto ba dõdõmi ia, ba ya’o, ba sangila ya’ia. Ba na uŵa’õ ena’õ, lõ u’ila ia, ba sofaya ndra’o, si mane ya’ami. Ba no u’ila ia, ba u’o’õ linia. (F. 7, 28).

56 Owuawua dõdõ duami Aberahamo, ena’õ i’ila mbaŵagu andrõ, ba i’ila, ba omuso dõdõnia. (Heb. 11, 13). 

57 Lamane khõnia niha Yehuda: Ambõ na lima wulu fakhe ndra’ugõ, ba no õ’ila Gaberahamo? (Luk. 3, 23). 

58 Imane khõra Yesu: Si ndruhundruhu niŵa’õgu khõmi lõ Aberahamo na, ba so ndra’o, (F. 1, 1. 2. Yes. 43, 13. Moz. II. 3, 14). 

59 Ba latuyu gara, ba wanebu ya’ia. Ba ibini’õ ia Yesu, ba iheta ia ba gosali. (F. 10, 31; Moz. III. 24, 16. Luk. 4, 30).

 

YOHANE 9

I. Famokai hõrõ zau’a moroi ba dalu ninania. II. Lasekhegõ nibokai hõrõ andrõ farizaio. III. Huhuo Yesu ba warizaio.

1 I. Me itõrõ Yesu, ba i’ila niha, sau’a moroi ba dalu ninania. 

2 Ba lasofu khõnia nifahaõnia, lamane: He samahaõ, ha niha zamazõkhi horõ, da’e, ma ira amania, wa no au’a ia moroi ba dalu ninania? (Luk. 13, 2). 

3 Itema lira Yesu, imane: Tenga da’e zamazõkhi horõ, ba tenga gõi ira amania; ba ena’õ te’oroma’õ ba khõnia wolau Lowalangi, andrõ si manõ. (F. 11, 4). 

4 Lõ tola lõ tahalõ halõŵõ zamatenge ya’ita, fatua moluo. Bóngi dania, ba lõ sangila mohalõŵõ. (F. 5, 17. 19). 

5 Fatua sodo ba guli danõ, ba haga ba guli danõ ndra’odo. (F. 8, 12). 

6 Aefa iŵa’õ da’õ, ba idiloi danõ ba ibali’õ tambu gilo andrõ, ba igule’õ dambu andrõ ba hõrõ andrõ, (Mar. 8, 23),

7 ba imane khõnia: Ae sasai mbawau ba mbaŵa Ziloa andrõ, ”nifatenge” geluahania. Ba mõi ia, isasai mbawania, ba me ifuli ia, ba no i’ila niha.

8 II. Ba lamane banuara, awõ zi no mangila ya’ia fõna, me mangandrõngandrõ bõli gõ ia: Tenga ya’ia da’õ, sidadao, mangandrõngandrõ bõli gõ? (Hal. zin. 3, 10). 

9 Ba so zanguma’õ: Ya’ia. Ba so gõi zanguma’õ: Tenga, ba no fakhilikhili ia khõnia. Ba ya’ia iŵa’õ: Ya’odo da’õ. 

10 Ba lamane khõnia: He wisa, wa tebokai hõrõmõ? 

11 Itema lira, imane: Niha andrõ, sotõi Yesu, ifazõkhi dambu ba igule’õ ba hõrõgu, ba imane khõgu: Ae ba Ziloa, sasai mbawau. Ba mõido, ba me no usasaido, ba u’ila niha. 

12 Lamane khõnia: Heza so ia? Imane: Lõ u’ila. 

13 Ba la’ohe ia ba warizaio, zau’a fõna andrõ. (F. 7, 32; 11, 46). 

14 Ba luo sabato, me luo ifazõkhi dambu andrõ Yesu, me ibokai hõrõnia. (F. 5, 9 b. t.). 

15 Ba lafuli lasofu khõnia farizaio gõi, he wisa, wa i’ila niha. Ba imane khõra: Tambu ibe’e ba hõrõgu, ba no usasai mbawagu, ba u’ila niha. 

16 Ba lamane farizaio õsa: Tenga si otarai Lowalangi niha andrõ, me lõ i’amoni’õ luo sabato. Ba lamane tánõ bõ’õ: He moroi i’ila ifazõkhi dandra si manõ niha si so horõ? Ba lõ faoma dõdõra. (F. 7, 43). 

17 Ba lafuli lamane khõ zau’a andrõ: Ba ya’ugõ, hadia õŵa’õ ba khõnia andrõ, me no ibokai hõrõu? Ba imane: Sama’ele’õ ia. (F. 4, 19. Luk. 24, 19). 

18 Ba lõ faduhu dõdõ niha Yehuda khõnia, wa no au’a ia fõna, awõ wa i’ila niha iada’e, irege muhede ira khõ ndra ama zi no teboka hõrõ andrõ. 

19 Ba lasofu khõra, lamane: Hadia, onomi da’õ, niŵa’õmi no au’a ia moroi ba dalu ninania? 

20 Ba he wisa wa i’ila niha iada’e? Ba latema lira ira amania, lamane: Ma’ila, wa onoma da’õ, ba no au’a ia, moroi ba dalu ninania; 

21 ba he moroi wa i’ila niha iada’e, ba lõ ma’ila, ba ha niha zamokai hõrõnia, ba lõ ma’ila. Misofu khõnia, noa sa’ae wa’ebuania, ba iŵa’õ dania hadia ia khõnia. 

22 Me ata’u ndra amania niha Yeduda, andrõ laŵa’õ da’õ. Noa sa mamagõlõ niha Yehuda, na so ena’õ zanguma’õ Keriso Yesu andrõ, ba latibo’õ ia banua (F. 7, 13; 12, 2). 

23 Andrõ laŵa’õ ira amania: Noa sa’ae wa’ebuania, misofu khõnia. 

24 Awena muhede ira zamuza tõ ba niha andrõ, sau’a fõna, ba lamane khõnia: Fosumange Lowalangi, ya’aga, ba ma’ila, wa no si so horõ niha andrõ. (F. 8, 46). 

25 Itema lira, imane: Lõ u’ila, na si so horõ ia, sambalõ u’ila, sau’a ndra’o fõna, ba u’ila niha iada’e. 

26 Ba lamane khõnia: He iwisa khõu? He iwisa wamokai hõrõu? 

27 Itema lira, imane: Noa sa’ae uŵa’õ khõmi, ba lõ nifondrondrongomi. Hana wa omasi ami, mirongo zamuza tõ? Ma edõna ami gõi mõi nifahaõnia? 

28 Mofõnu ira khõnia, lamane: Ya’ugõ nifahaõnia, nifahaõ Moze ndra’aga. 

29 Ma’ila, wa no muhede Lowalangi khõ Moze, ba da’õ, ba lõ ma’ila, he moroi ia. (F. 7, 27; 8, 14).

30 Itema lira niha andrõ, imane khõra: Ba da’õ so zahõlihõli dõdõda, wa lõ mi’ila, he moroi ia, ba no ibokai hõrõgu. 

31 No ta’ila, lõ ifondrondrongo li zi so horõ Lowalangi ba na so zangata’ufi ya’ia, solo’õ somasi ia, khõnia ifondrondrongo. (Yob. 35, 13. Sin. 145. 19. Amaed. 15, 8). 

32 I’otarai mbõrõta ba lõ murongo, so niha samokai hõrõ zau’a moroi ba dalu ninania. 

33 Na tenga si otarai Lowalangi da’õ, ba tebai ilau hadia ia mena’õ. 

34 Latema linia, lamane khõnia: Me tumbu ndra’ugõ, ba no si so horõ manõ ndra’ugõ, ba õfahaõ ndra’aga? Ba latuli’õ ia baero. (F. 9, 2. 3). 

35 Irongo Yesu, wa no latuli’õ ia baero, ba me falukha ia khõnia, ba imane khõnia: Hadia, mamati ndra’ugõ khõ Nono Niha andrõ? 

36 Itema linia, imane: Ha niha ia, Tua, ena’õ mamati ndra’o khõnia? 

37 Imane khõnia Yesu: Noa sa õ’ila ia, ba sihede khõu, da’õ ia. (F. 4, 26).

38 Ba imane: Mamati ndra’o, Tua! ba manga lulu ia khõnia.

39 III. Ba imane Yesu: Bõrõ huku, wa mõi ndra’o ba guli danõ andre, ena’õ la’ila niha sau’a, ba ena’õ au’a zangila niha. (Mat. 13, 14. 15). 

40 Larongo farizaio õsa, si fao khõnia ba da’õ, ba lamane khõnia: Ba hadia, sau’a gõi ndra’aga? 

41 Imane khõra Yesu: Na sau’a ami, ba lõ horõmi ena’õ, ba iya’e, ba miŵa’õ: Ma’ila niha: ba lõ tebulõ horõmi. (F. 15, 22. Hes. 13, 10. 16).

 

YOHANE 10

I. Itohugõ huhuonia andrõ ba warizaio Yesu. II. Kubalo si sõkhi Yesu. III. Lafuli latebu kara ia ena’õ.

1 I. Si ndruhundruhu niŵa’õgu khõmi, si lõ manõrõ bawandruhõ andrõ, we’amõi ba kandra mbiribiri andrõ, sanawõ ba’aba’a, ba sanagõ da’õ ba samara’u. (Yer. 23, 2 b. t. Sin. 23). 

2 Sanõrõ bawandruhõ da’õ gubalo mbiribiri. (A. 7). 

3 Khõnia ibokai sanarõ ba mbawadruhõ andrõ, ba lafondrondrongo linia biribiri, ba humede ia ba mbiribiri tána khõnia itõtõi dõi, ba i’ohe baero. (Yes. 43, 1). 

4 Ba na no ibe’e baero dána khõnia fefu, ba mowaõwaõ ia, ba la’o’õ ia biribiri, noa sa la’ila linia. 

5 Ba lõ la’o’õ niha bõ’õ, moloi sa ira khõnia, me lõ la’ila li niha bõ’õ. 

6 Amaedola andrõ iŵa’õ khõra Yesu, ba lõ aboto ba dõdõra hadia ia, niŵa’õnia khõra. 

7 Ba imane Yesu: Si ndruhundruhu niŵa’õgu khõmi, ya’odo mbawandruhõ ba mbiribiri. 

8 Dozi ira, ha wa’ato zi no mõi, ba no sanagõ ba no samara’u, ba lõ lafondrondrongo khõra biribiri. (Mat. 7, 15; 23, 13). 

9 Ya’o mbawandruhõ. Na so zanõrõ ya’o, we’amõi bakha, da’õ ni’orifi, ba mõi ia bakha ba mõi baero, ba isõndra gõ. (F. 14, 6. Moz. IV. 27, 17. 21).

10 Lõ mõi zanagõ, na tenga ba wanagõ ba ba wamunu ba ba wamakiko. Ba da’õ mõi ndra’o, ena’õ so khõra wa’auri ba ena’õ fahõna khõra hadia ia andrõ. (Sin. 23, 1. Fet. I. 2, 25).

11 II. Ya’odo gubalo si sõkhi andrõ. Kubalo si sõkhi ibelegõ nosonia fõna mbiribiri. (Yes. 40, 11. Hes. 34, 11 b. t. Yoh. I. 3, 16). 

12 Moloi genoni, si tenga kubalo, si tenga sokhõ biribiri, na i’ila nasu gatua moroi sa, irõi mbiribiri, ba ira’u asu gatua ba ifazawili. (Sakh. 11, 16 b. t.). 

13 Me enoni ia, ba me lõ ba dõdõnia mbiribiri. 

14 Ya’odo gubalo si sõkhi andrõ, ba no aboto ba dõdõgu dána khõgu, ba no aboto ba dõdõ dána khõgu ndra’odo. (Tim. II. 2, 19). 

15 Si mane fa’aboto ba dõdõ Namagu ndra’o, ba si mane fa’aboto ba dõdõgu Namagu. Ba ubelegõ nosogu fõna mbiribiri. (Mat. 11, 27. Mar. 10, 45). 

16 Ba so khõgu na mbiribiri bõ’õ, si tenga moroi ba kandra andre, ba lõ tola lõ uhalõ ira, ba lafondrondrongo ligu dania ba tobali ha sambawá nikubaloi ba ha samõsa gubalo. (F. 11, 52. Mat. 8, 11. Yes. 49, 6. Sakh. 14, 9. Efes. 2, 14 b. t.). 

17 Andrõ i’omasi’õ ndra’o Amagu, me ube’e nosogu, ba wanema ya’ia mangawuli. (F. 2, 19. Yes.53, 10). 

18 Lõ sangai ya’ia khõgu, ube’e sa’ae ia, nilau dõdõgu. Tola ube’e ia, ba tola ufuli uhalõ. Oroisa andrõ no utema khõ Namagu. (F. 18, 6; 14, 31). 

19 Ba fabõ’õ zui dõdõ niha Yehuda, ba niŵa’õnia andrõ. (F. 7, 43). 

20 Ba ato khõra zaguma’õ: Sobekhu, sowõhõ, hana wa mifondrondrongo khõnia? (F. 7, 20). 

21 Ba lamane tánõ bõ’õ: Tenga fehede zobekhu wehede andrõ. Hadia, i’ila ibokai hõrõ zau’a bekhu? (F. 9, 30 b. t. Moz. II. 4, 11). 

22 Ba luo we’amoni’õ osali ba Yeruzalema, baŵa deu. 

23 Ba manõrõnõrõ Yesu ba zinga gosali, baolayama Zelomo andrõ. (Hal. zin. 3, 11; 5, 12).

24 Ba lafasui ia niha Yehuda ba lamane khõnia: Heza irugi lõ ahono dõdõma õbe’e? Na Keriso ndra’ugõ, ba ŵa’õ khõma, bõi aiwõ ndra’ugõ. (F. 8, 25). 

25 Itema lira Yesu, imane: No uŵa’õ khõmi, ba lõ faduhu dõdõmi; halõŵõ andrõ, nihalõhalõgu ba dõi Namagu, da’õ zamaduhu’õ ya’o. F. 5, 36). 

26 Ba lõ faduhu dõdõmi, me tenga biribirigu ami. (F. 8, 45. 47). 

27 Lafondrondrongo ligu biribirigu, ba no aboto ba dõdõgu ira, ba la’o’õ ndra’o. 

28 Ba ube’e khõra wa’auri si lõ aetu, ba lõ tekiko ira, gõtõgõtõ wa’ara ba lõ sanõbi ya’ira ba dangagu. (F. 8, 51; 5, 24. Rom. 8, 38 b. t. Fet. I. 1, 5). 

29 Ebua moroi ba dánõ bõ’õ fefu Namagu, same’e ya’ira khõgu, ba lõ sangila manõbi ya’ira ba danga Namagu. (F. 14, 28).

30 Ha sambua ndra’aga Amagu. (F. 10, 37. 38; 5, 23; 17, 10; 11, 21).

31 III. Ba latuyu zui gara niha Yehuda, ba wanebu ya’ia. (F. 8, 59).

32 Humede khõra Yesu, imane: No oya halõŵõ si sõkhi, ni’oroma’õgu khõmi, dali Namagu. Hezo mbõrõ ba halõŵõ andrõ, wa mitebu kara ndra’o? (Mar. 7, 37). 

33 Latema linia niha Yehuda, lamane: Tenga ba halõŵõ si sõkhi andrõ matebu kara ndra’ugõ, ba wangaohangaoha andrõ, ba me õbali’õ Lowalangi ndra’ugõ, ba no niha ndra’ugõ. (F. 5, 18. Mat. 26, 65). 

34 Itema lira Yesu, imane: Tenga no so ba zura goroisa khõmi: ”No uŵa’õ, Lowalangi ami?” (Sin. 82, 6).

35 Na ibe’e tõi da’õ Lowalangi, ba nitandrõsaigõ li Lowalangi andrõ — ba tebai tewu’ai zura — (Mat. 5, 18 b. t.), 

36 ba hadia, ba miŵa’õ ba ni’amoni’õ Nama andrõ, ba nifatengenia ba guli danõ; Mangaohangaoha ndra’ugõ, me no uŵa’õ: Ono Lowalangi ndra’o? (F. 7, 17—23). 

37 Na lõ uhalõ halõŵõ Namagu, ba bõi mi’amati khõgu. 

38 Ba na uhalõ ia, ba mi’amati ba holõŵõgu, na lõ mamati ami khõgu, ena’õ mi’ila, ba ena’õ aboto ba dõdõmi, ba dõdõgu so Namagu ba ba dõdõ Namagu so ndra’o, (F. 15, 24; 14, 9—11). 

39 Ba latandraigõ zui, wondra’u ya’ia, ba iheta ia ba dangara. 

40 Ba mofanõ zui ia miyefo Yoridano, ba zi so Yohane, me awena mamayagõ idanõ ia. (F. 1, 28). 

41 Ba ato zangondrasi ya’ia ba lamane: Lõ’õ sa nifazõkhi Yohane tandra: ba fefu niŵa’õ Yohane ba khõ da’e, ba no si duhu. (F. 1, 26 b. t.; 3, 27 b. t.). 

42 Ba ato zamati khõnia ba da’õ.

 

YOHANE 11

I. Fanusugi Lazaro. II. Famagõlõ gere: ba wamunu Yesu.

1 I. Ba so zofõkhõ, Lazaro, banua Mbetania, banua ndra Maria Marata, talifusõnia. (Luk. 10, 38. 39). 

2 Ba Maria zamayoini So’aya fanikha samohua, solosi ahe Zo’aya bunia; talifusõ da’õ, Lazaro, zofõkhõ. (F. 12, 3. Mat. 26, 7 b. t.). 

3 Ba lafatenge khõ Yesu ira talifusõnia alawe, lamane: He Tua, faigi, somasi ndra’ugõ andrõ, ba no mofõkhõ. 

4 Ba me no irongo da’õ Yesu, ba imane: Tenga fõkhõ ba wa’amate wõkhõ andrõ, fõkhõ famolakhõmi Lowalangi, ena’õ tefolakhõmi Nono Lowalangi ba da’õ (F. 9, 3). 

5 Ba no omasi Yesu Marata andrõ ba talifusõnia ba Lazaro andrõ. 

6 Ba me no irongo mofõkhõ ia, ba dua wongi na ia ba zi so ia. 

7 Aefa da’õ, ba imane khõ ndra nifahaõ: Datafuli ita ba Yudaia. 

8 Lamane khõnia ira nifahaõ: He samahaõ, ha mega no, ba labunu ndra’ugõ mena’õ niha Yehuda, latebu kara ndra’ugõ mena’õ, ba õfuli mõi ba da’õ? (F. 10, 31). 

9 Itema lira Yesu: Tenga felendrua za zi ma’õma’õkhõ? Na so zofanõ ba zi ma’õkhõ, ba lõ manendre ia, me i’ila haga andrõ ba guli danõ. (F. 9, 4. 5). 

10 Ba na so sofanõ bóngi, ba manendre, me lõ khõnia haga andrõ. (E. 12, 35). 

11 Da’õ niŵa’õnia; ba me aefa da’õ, ba imane khõra: No mõrõ Lazaro andrõ, si fahuwu khõda, ba moido mususugi ia. (Mat. 9, 24. Kor. I. 15, 20). 

12 Ba lamane khõnia ira nifahaõ: He Tua, na mõrõ ia, ba abe’e. 

13 Ba fa’amatenia niŵa’õ Yesu, ba lawai si ndruhu femõrõ niŵa’õnia. 

14 Awena iŵa’õ khõra Yesu, lõ ibini’õ: No mate Lazaro. 

15 Ba omuso dõdõgu, bõrõ ami, me lõ ya’o ba da’o, ena’õ faduhu dõdõmi. Ba mitabu khõnia. 

16 Ba imane Toma andrõ, nifotõi si faero, ba naŵonia nifahaõ: Damõi ita gõi, ena’õ mate ita awõnia. (F. 20, 24 b. t.). 

17 Ba me irugi Yesu, ba irongo, no õfa bonginia ba lewatõ. 

18 Ba ahatõ ba Yeruzalema Mbetania andrõ, so dua mbadu fofanõ. 

19 Ba no ato niha Yehuda, si mõi khõ ndra Marata Maria, ba wondrara tõdõra, ba khõ dalifusõra andrõ. 

20 Ba me irongo Marata so Yesu, ba ifaondragõ, ba dumadao yomo Maria. 

21 Ba imane Marata khõ Yesu: He Tua, ena’õ na ho so ndra’ugõ ba da’e, ba lõ mate mena’õ dalifusõgu andrõ. (A. 32). 

22 Ba iada’e gõi, ba u’ila, hadia ni’andrõu khõ Lowalangi, ba ibe’e khõu Lowalangi. (F. 9, 31. 33). 

23 Imane khõnia Yesu: Maoso dania dalifusõu andrõ. 

24 Imane khõnia Marata: U’ila sa, maoso ia dania, ba wemaoso andrõ na luo sa furia (Luk. 14. 14. F. 5, 25. Hal. zin. 24, 15). 

25 Imane khõnia Yesu: Ya’odo wemaoso ba fa’auri, samati khõgu, ba auri, he ŵa’ae mate ia. (F. 3, 36; 5, 26; 6, 40. 54). 

26 Ba dozi sauri, samati khõgu, ba lõ mate, irugi zi lõ aetu. Hadia, faduhu dõdõu ba da’õ? (Yoh. 8, 51). 

27 Imane khõnia: E, Tua, mamati sa’ae ndra’o, wa Keriso andrõ ndra’ugõ, Ono Lowalangi, si mõi ba guli danõ. (F. 6, 69). 

28 Ba aefa iŵa’õ da’õ, ba mõi ia muhede khõ dalifusõnia, Maria, nibini’õ, imane: No so zamahaõ, ba muhede ia khõu. 

29 Ba ya’ia, me irongo da’õ, ba i’alio’õ ifazaŵa ia, ifaondragõ. 

30 Ba lõ’õ na nirugi Yesu banua, ba zi fakhamõ Marata khõnia mege so ia na. 

31 Ba me la’ila niha Yehuda, si so khõnia yomo ba da’õ, sondrara tõdõnia, i’alio’õ wamazaŵa ya’ia Maria ba mõi, ba la’o’õ ia, lawai sa mõi ia ba leŵato, ba wege’ege ba da’õ. 

32 Ba me irugi Maria ba zi so Yesu, me i’ila ia, ba ituhi danõ fõnania, imane khõnia: He Tua, ena’õ na ho so ndra’ugõ ba da’e, ba lõ mate mena’õ dalifusõgu andrõ. (A. 21). 

33 Ba me i’ila Yesu, mege’ege ia, ba mege’ege niha Yehuda andrõ si fao khõnia, ba mofõnu ia ba dõdõnia, ba ifatalikhõ ia. (Mar. 8, 12). 

34 Ba imane: Heza labe’e ia? Lamane khõnia: Ae faigi, Tua. 

35 Me’e Yesu. (Luk. 19, 41). 

36 Ba lamane niha Yehuda: Hiza wa’omasinia ia. 

37 Ba so ba khõra zanguma’õ: Hadia, lõ i’ila i’orifi da’õ gõi mena’õ samokai hõrõ zau’a andrõ? (F. 9, 6. 32). 

38 Ba mofõnu zui Yesu ba dõdõnia, ba irugi lewatõ. Ba tõgi narõ gara lewatõ andrõ, nifolagõ gowe. (Mat. 27, 60). 

39 Ba imane Yesu: Mifazaŵa gowe andrõ. Imane khõnia talifusõ zi mate andrõ, Marata: He Tua, abõu sa’ae; no õfa bonginia ae. 

40 Imane khõnia Yesu: Tenga no uŵa’õ khõu, na faduhu dõdõu, ba oroma khõu lakhõmi Lowalangi? (F. 11, 4. 23). 

41 Awena lafazaŵa gowe andrõ. Ba ifaõga hõrõnia Yesu, ba imane: He Ama, saoha gõlõu, me no õfondrondrongo ligu! (F. 17, 1). 

42 Ba u’ila, lõ mamalõmalõ, wa õfondrondrongo ligu, ba bõrõ niha sato andre, samasui ya’o, wa uŵa’õ, ena’õ faduhu dõdõra, wa no ya’ugõ zamatenge ya’o. (Yoh. 12, 30). 

43 Ba me aefa iŵa’õ da’õ, ba i’ebua’õ linia we’ao, imane: He Lazaro, ae baero! 

44 Mõi baero zi mate, no mu’olohuni gahenia ba tangania lembe ba lewatõ, ba bawania, ba nibalugõ lembe folosi mbõbõi. Ba imane khõra Yesu: Mitoto’õ khõnia ba mifofanõ ia. (Luk. 8, 49 b. t.; 7, 11 b. t.). 

45 Ba ato zamati khõnia niha Yehuda, si no mõi khõ Maria, me la’ila nilau Yesu. (F. 7, 31).

46 Ba so õsa khõra, zi mõi ba warizaio, la’ombakha’õ khõra hadia nilau Yesu.

47 II. Ba lafalukha’õ zalaŵa rafe sebua sangila amakhoita ba farizaio ba lamane: He tawisa? Oya sa ifazõkhi tandra niha andrõ. (Mat. 26, 3 b. t.; Luk. 16, 31). 

48 Na tatehe manõ khõnia zi manõ, ba ahori mamati ira khõnia, ba mõi dania Ndrawa Roma ba la’okhõgõ danõda, fabaya niha. (F. 12, 19). 

49 Ba imane khõra awõra si samõsa, Kayafa, ere sebua zi dõfi andrõ: Lõ mi’ila watahõgõ hadia ia, ba lõ mifatoutou, 

50 wa mohare ita, na mate zamõsa niha, salahi mbanuada andre, fa õi tekiko mbanuada andre ma’afefu. (F. 18, 14). 

51 Ba tenga moroi khõnia, wa iŵa’õ da’õ, me no ere sebua ia zi dõfi andrõ, ba mama’ele’õ ia; mate sa dania Yesu salahi mbanuara andrõ. (Amaed. 16, 1. 10. Sam. I. 1, 17). 

52 Ba tenga ha salahi mbanuara, ena’õ i’owuloi gõi nono Lowalangi andrõ, sizaewe, ena’õ orudu (F. 10, 16).

53 I’otarai luo da’õ, ba mamagõlõ ira sa’ae, ba wamunu ya’ia. (Mat. 21, 38). 

54 Ba lõ’õ sa’ae i’oroma’õ ia Yesu ba niha Yehuda, mofanõ ia ba da’õ, isaŵa danõ ba zinga danõ si mate, banua andrõ, sotoi Eferayi, ba da’õ sosó ia, awõ nifahaõnia. 

55 Ba no ahatõ wasa andrõ, ba niha Yehuda. Ba ato zi mõi misi yaŵa ba Yeruzalema, moroi ba da’õ, fõna wasa andrõ, ba wangehao ya’ira. (F. 6, 4. Nga’õt. II. 30, 17). 

56 Ba la’alui Yesu, ba faoma lamane khõ nawõra, me so ira ba gosali: Hadia ba dõdõmi, wa lõ mõi ia ba gowasa? (F. 7, 11). 

57 Ba no labe’e goroisa ira ere sebua ba farizaio, na so zangila, heza so ia, ba i’ombakha’õ, ena’õ lara’u ia. (F. 9, 22).

 

YOHANE 12

I. Tebayoini Yesu ba Mbetania. II. Famagõlõ warizaio ba khõ Lazaro andrõ. III. Fe’amõi Yesu miyomo ba Yeruzalema. IV. Niŵa’õ Yesu, me so Ndrawa Heleni, samaigi ya’ia ena’õ. V. Lõ mamati niha Yehuda.

(A. 1—8: Mat. 26, 6—13. Mar. 14, 3—9.)

1 I. Õnõ bongi lõ fasa, ba mõi ba Mbetania Yesu, ba zi so Lazaro andrõ, nisusuginia moroi ba ngai zi mate. (F. 11, 1. 43 b. t.). 

2 Ba labe’e gõnia ba da’õ, ba sangai halõŵõ Marata. Ba samõsa Lazaro, awõnia ba wemanga. (Luk. 10, 39. 40). 

3 Ba ihalõ Maria zakiti zi ndruhu wanikha narawasu, samohua, sebua bõli, ibayoini gahe Yesu ba i’osi bunia; ba afõnu nomo hua wanikha andrõ. 

4 Ba imane Yuda andrõ, banua Kariota, nifahaõnia si samõsa, si manga mbõlinia dania: (F. 13, 26 b. t. 18, 2). 

5 Hana wa lõ la’amawa wanikha andrõ, otu a lima wulu rufia mbolinia mena’õ, ba labe’e ba zi numana? 

6 Ba tenga me so ba dõdõnia zi numana iŵa’õ da’õ, me no sanagõnagõ ia, me khõnia so naha gefe, me ihalõhalõ game’ela andrõ. (Luk. 8, 3 F. 13, 29). 

7 Ba imane Yesu: Bõi tegu ia; no i’irõ’õ da’õ, irege luo wogo’o ya’o.

8 Si lõ mamalõmalõ awõmi zi numana, ba ya’o, ba tenga si lõ mamalõmalõ khõmi.

9 II. Ba ato zamondrongo niha Yehuda, no so ia ba da’õ, ba mõi ira, tenga ha Yesu mbõrõ, ba wamaigi Lazaro gõi, nisusuginia moroi ba ngai zi mate. 

10 Ba mamagõlõ gere sebua, ena’õ labunu gõi lazaro andrõ;

11 bõrõ sa ia, wa ato zi so niha Yehuda, samati khõ Yesu.

(A. 12—18: Mat. 21, 1—11. Mar. 11, 1—10. Luk. 19, 29—38.)

12 III. Sara wongi aefa da’õ, me larongo, niha sato, si no mõi ba gowasa, no mõi ba Yeruzalema Yesu, 

13 ba lahalõ mbulu nohi, mõi ira mamaondragõ ya’ia, mu’ao ira: Hosana, ya’ahowu zi so andrõ, ba dõi Zo’aya, razo Ndraono Gizeraëli andrõ! (Moz. III. 23, 40). 

14 Ba me isõndra nono galide Yesu, ba i’okudo, itõrõ zi so ba zura andrõ: 

15 ”Bõi ata’ufi, ono Ziona alawe, hiza, so razomõ, i’okudo nono galide”. (Sakh. 9, 9). 

16 Lõ’õ sa i’anema’õ aboto ba dõdõ ndra nifahaõ da’õ ba me no tefolakhõmi Yesu, awena itõrõ tõdõra, wa ba khõnia tesura da’õ, awõ wa no lamanõ khõnia. 

17 Ba lafaduhu’õ niha sato, si fao khõnia, wa no humede ia khõ Lazaro andrõ ba lewatõ, wa no isusugi ba ngai zi mate. (Luk. 19, 37). 

18 Andrõ gõi la’ondrasi ia niha sato, me no larongo, no ifazõkhi dandra andrõ.

19 Ba faoma lamane farizaio khõ nawõra: Mi’ila, lõ’õ manõ fakhai wolaumi. Hiza, ahori manõ la’o’õ niha ba guli danõ. (F. 3, 26; 11, 48).

 

20 IV. Ba so Ndrawa Heleni õsa, awõ zi no mõi miyaŵa, mangalulu ba gowasa. (F. 7, 35). 

21 Da’õ zi mõi khõ Wilifo andrõ, banua Mbetisa’ida, ba Galilaia, la’andrõ khõnia, lamane: He Tua, omasiga ma’ila Yesu. (Luk. 19, 3). 

22 Mõi Wilifo, iŵa’õ khõ Gandrea, ba mõi ira, darua ira, Andrea Filifo, laŵa’õ khõ Yesu. 

23 Ba itema lira Yesu, imane: No irugi inõtõ andrõ ba wamolakhõmi Ono Niha. (F. 17, 1; 13, 32). 

24 Si ndruhundruhu niŵa’õgu khõmi, na lõ tetaru ba danõ zi samba ngawua ulitõ, ba na lõ obou, ba ha ya’ia manõ; ba na obou ia ua, ba oya mbuania. (Kor. I. 15, 36 b. t.). 

25 Khõ zomasi nosonia aetu ia, ba si fa’udu ba nosonia ba guli danõ andre, ba irorogõ ba wa’auri si lõ aetu. (Luk. 17, 33). 

26 Na so zi mõi enonigu, ba yamu’o’õ ndra’o, ba ba zi so ya’o, ba da’õ gõi so genonigu dania. Na so zi mõi enonigu, ba ifosumange Amagu (Luk. 9, 23. F. 14, 3). 

27 Iada’e, ba abu dõdõgu, ba hadia niŵa’õgu? He Ama, efa’õ ndra’o ba ginõtõ andre! Ba andrõ urugi ginõtõ andre. (Mat. 26, 38. 39). 

28 He Ama, folakhõmi dõimõ! Ba so li, si otarai zorugo, imane: No ufolakhõmi, ba ufuli ufolakhõmi dania! (Mat. 3, 17). 

29 Ba lamane niha sato, si so ba da’õ, me larongo da’õ: Mu’ugu mbanua! Ba so gõi zanguma’õ: No muhede khõnia mala’ika. (Hal. zin. 23, 9). 

30 Itema lira Yesu, imane: Tenga ya’o mbõrõ, wa so li andrõ, ya’ami mbõrõ. (F. 11, 42). 

31 Fanguhuku õsi guli danõ andre iada’e, iada’e, tetibo baero zalaŵa guli danõ andre. (F. 16, 11; 14, 30). 

32 Ba ya’o, na no te’alaŵa’õ yaŵa ndra’o, moroi ba danõ, ba ahori udõnisi ira khõgu. (F. 3, 14; 8, 28). 

33 Ba wangombakha he wisa wa’amatenia dania iŵa’õ da’õ. 

34 Ba latema linia niha sato, lamane: No marongo ba zura goroisa, lõ tebulõ Keriso andrõ irugi zi lõ aetu; ba hana wa õŵa’õ ni’alaŵa’õ yaŵa Nono Niha? Ha niha Nono Niha andrõ? (Sin. 45, 7; 72, 7. 17; 110, 4. Yes. 9, 7. Hes. 37, 35. Dan. 7, 13. 14). 

35 Ba imane khõra Yesu: Ma’ifu tõ na so ba khõmi haga andrõ. Mi’oguna’õ haga andrõ, ba lalami, fa lõ ikhamõ ami fa’ogõmigõmi. Sowaõwaõ ba zogõmigõmi, ba lõ i’ila, heza isaŵa. (F. 7, 33; 11, 9. 10).

36 Mi’oguna’õ haga andrõ, wamati ba haga andrõ, ena’õ tobali ono haga ami. Da’õ niŵa’õ Yesu, ba mofanõ ia, ibini’õ ia khõra.

37 V. Ba he no si manõ wa’oya dandra nifazõkhinia ba zanehe ira, ba lõ’õ zui mamati ira khõnia. (Hal. zin. 2, 22. Mat. 26, 1—5). 

38 Ena’õ itõrõ niŵa’õ Yesaya andrõ, sama’ele’õ, me imane: He So’aya, ha niha zi faduhu tõdõ ba wangombakha’õma andrõ, ba tanga Zo’aya andrõ, ba ha khõ tefa’ele’õ? (Yes. 53, 1). 

39 Andrõ tebai mamati ira, iŵa’õ gõi Yesaya: (Yes. 6, 9. 10. Mat. 13, 14 b. t.). 

40 ”No ifobalunõ hõrõra ba no i’abe’e’õ dõdõra, ena’õ lõ la’ila hõrõra, ba ena’õ lõ aboto ba dõdõra, ba fa bõi lafalalini gera’erara, ba fa bõi u’orifi ira.” 

41 Da’õ niŵa’õ Yesaya, me no i’ila lakhõminia, ba me itõrõ linia ia. (Yes. 6, 1). 

42 Ba ato sa zui zamati gõi khõnia salaŵa, ba bõrõ warizaio, wa lõ la’ombakha’õ, fa bõi latibo’õ banua ira. (F. 7, 48, 9, 22). 

43 Omasi sa ira zumange ba niha, moroi ba zumange ba Lowalangi. (F. 5, 44). 

44 Ba mu’ao Yesu, imane: Samati khõgu, ba tenga khõgu mamati ia, khõ samatenge ya’o mamati ia. (F. 7, 16). 

45 Ba sangila ya’o, ba i’ila zamatenge ya’o andrõ. (F. 10, 30; 14, 9). 

46 Haga ndra’o, si no mõi ba guli danõ, ena’õ bõi sa’ae so ba zogõmigõmi dozi samati khõgu. (F. 8, 12). 

47 Ba na so zamondrondrongo ligu, ba na lõ i’o’õ, ba tenga ya’o zanguhuku ya’ia. Tenga sa ba da’õ mõi ndra’o, ba wanguhuku õsi guli danõ, ena’õ u’orifi nõsi guli danõ. (F. 3, 17). 

48 Khõ zangositengagõ ya’o, si lõ mamonaha taroma ligu, khõnia so sa’ae zanguhuku ya’ia; taroma ligu andrõ, niŵa’õgu, da’õ zanguhuku ya’ia, na luo safuria andrõ. (F. 3, 18. Mar. 16, 16). 

49 Tenga sa moroi khõgu manõ niŵa’õgu; samatenge ya’o, Amagu, ba no ibe’e goroisa khõgu, hadia niŵa’õgu, hadia wehedegu. (F. 5, 19 b. t.). 

50 Ba u’ila, fa’auri si lõ aetu goroisania andrõ. Andrõ u’o’õ niŵa’õ Namagu khõgu, ba wehedegu andrõ.

 

YOHANE 13

I. Fanasai ahe. II. Fangombakha si manga mbõli. III. Oroisa ba wangomasi’õ awõ. IV. Fangombakha fangosilõ’õgõ Wetero.

1 I. Ba fõna gowasa fasa andrõ, me no i’ila Yesu, no irugi inõtõ, aheta ia ba guli danõ andre, mõi ia khõ Nama, si mane fa’omasinia dána khõnia ba guli danõ, fõna, si manõ ŵa’omasinia ira irugi gamozua. (Mat. 26, 2. F. 16, 28). 

2 Ba me manga ira ena’õ, me no ibe’e ba dõdõ Yuda andrõ, ono Zimoni, banua Kariota wemanga mbõli Yesu Afõkha — (Luk. 22, 3) 

3 he ŵa’ae no i’ila Yesu, no ibe’e ba dangania fefu hadia ia Ama, ba he ŵa’ae i’ila, khõ Lowalangi i’otarai, ba ba Lowalangi mõi ia, — (F. 3, 35), 

4 ba maoso ia ba ngai gõ, iheta mbarunia, ihalõ lembe, ba i’olembe. 

5 Aefa da’õ, ba ilau nidanõ ba naha wanasa, ba ibõrõtaigõ isasai gahe ndra nifahaõ, ba i’osi lembe andrõ, ni’olembenia. 

6 Ba irugi Zimoni Fetero, ba imane khõnia da’õ: Ya’ugõ zanasai ahegu, Tua? 

7 Itema linia Yesu, imane khõnia: Iada’e ba lõ õ’ila hadia nilaugu, ba aboto ba dõdõu dania. 

8 Imane khõnia Fetero: Irugi zi lõ aetu, ba lõ tola õsasai gahegu. Itema linia Yesu, imane: Na lõ usasai’õ, ba tenga si fabõbõ khõgu ndra’ugõ. (Kor. I. 6, 11. Fam. 1, 5). 

9 Imane khõnia Simoni Fetero: He Tua, bõi ha sambalõ ahegu, tanga gõi ba hõgõ. 

10 Imane khõnia Yesu: Akha lõ isasai ia si no mondri, noa sa muhaogõ nõsinia ma’afefu, ba no muhaogõ ami, ba lõ dozi. (F. 15, 3. Tit. 3, 5). 

11 Noa sa i’ila zi manga mbõlinia, andrõ iŵa’õ: Lõ dozi muhaogõ ami. (F. 6, 64. 70). 

12 Ba me aefa isasai gahera ba i’obaru mbarunia ba ifuli mudadao, imane khõra: Hadia, no aboto ba dõdõmi nilaugu khõmi? 

13 Mibe’e tõigu zamahaõ ba So’aya ba si sõkhi, na miŵa’õ da’õ, si ndruhu da’õ. (Mat. 23, 8. 10). 

14 Ba na no usasai gahemi, ya’odo andre, So’aya ya’ami, samahaõ ya’ami, ba mo’õmõ gõi ami, wanasai ahe nawõmi. (Luk. 22, 26. 27). 

15 Famaedo nibe’egu khõmi, ena’õ mi’o’õ nilaugu khõmi. (Fet. I. 2, 21). 

16 Si ndruhundruhu niŵa’õgu khõmi, tenga sebua, moroi khõ zokhõ ya’ia, zawuyu, ba tenga sebua, moroi khõ zamatenge ya’ia zinenge. (F. 15, 20. Mat. 10, 24). 17 Na no mi’ila da’õ, ba ya’ahowu ami, na mi’o’õ, wolau ya’ia. (Mat. 7, 21. 24. Yak. 1, 25).

18 Lõ dozi ami da’õ, niŵa’õgu; u’ila, ha niha nitutuyugu. Ba ena’õ itõrõ zi so ba zura andrõ: ”Awõgu ba wemanga andrõ, ba no ifazaŵa mbõrõ sisinia khõgu. (Sin. 41, 10. Mat. 26, 23). 

19 I’otarai da’e, uŵa’õ khõmi, fatua lõ alua, ena’õ faduhu dõdõmi, wa ya’odo, na no alua dania. (F. 14, 29; 16, 4).

20 Si ndruhundruhu niŵa’õgu khõmi, samonaha, na so nifatengegu, ba ifonaha ndra’o; ba samonaha ya’o, ba ifonaha zamatenge ya’o andrõ. (Mat. 10, 40 b. t.).

21 II. Aefa iŵa’õ da’õ Yesu, ba abu dõdõnia, ba ifaduhu’õ, imane: Si ndruhundruhu niŵa’õgu khõmi, samõsa ba khõmi zi manga mbõligu dania. (Mat. 26, 21 b. t.). 

22 Ba faoma lafaigi nawõra ira nifahaõ, lõ la’ila, ha niha niŵa’õnia. (F. 19, 26). 

23 Ba so zamõsa nifahaõ, sidadao ba ngai Yesu, ni’omasi’õ Yesu. 

24 Da’õ nikhawi Zimoni Fetero tanga, imane khõnia: Ombakha’õ khõgu, ha niha niŵa’õnia. 

25 Ba ihole’õ ia ba doto Yesu, imane khõnia: He Tua, ha niha? 

26 Itema linia Yesu: Da’õ ia, ni’ungugõgu õ, sambawa, nibe’egu khõnia. Ba i’ungugõ gõ, sambawa, ba ibe’e khõ Yuda andrõ, ono Zimoni, banua Kariota. 

27 Ba me aefa itema gõ andrõ, ba mõi ba dõdõnia Zatana. Ba imane khõnia Yesu: Ta’ita’i, lau nilaumõ. (F. 13, 2). 

28 Ba lõ ba nawõnia ba wemanga andrõ saboto ba dõdõ da’õ, hana wa iŵa’õ khõnia da’õ. 29 So zanguma’õ tõdõra, me so khõnia naha gefe, iŵa’õ khõnia Yesu: Õli hadia zoguna khõda ba gowasa, ba ma ena’õ na ibe’e ba zi numana ma’ifu. (F. 12, 6).

30 Ba me no itema gõ andrõ, ba i’anema’õ mõi ia baero. Ba no bóngi. (F. 18, 3).
31 III. Ba me no mõi ia baero, ba imane Yesu: Awena tefolakhõmi Nono Niha, ba no tefolakhõmi Lowalangi ba khõnia. (F. 12, 23). 

32 Na no tefolakhõmi Lowalangi ba khõnia, ba ifolakhõmi gõi ia Lowalangi, ba khõnia, ba i’anema’õ ifolakhõmi. 

33 He iraono, ha ma’ifu tõ na sodo khõmi. Mi’alui ndra’o dania, ba hulõ si mane niŵa’õgu no ba niha Yehuda: Tebai mõi ami ba zi mõi ndra’o, si manõ gõi niŵa’õgu khõmi iada’e. (F. 7, 34). 

34 Oroisa si bohou ube’e khõmi, ena’õ mi’omasi’õ nawõmi; si mane fa’omasigu ami, ena’õ ya’ami gõi, faoma mi’omasi’õ nawõmi. (Yoh. 15, 12. 13. Efes. 5, 2. Yoh. I. 3, 11. 14. 23).

35 Ba da’õ aboto ba dõdõ niha fefu, wa no nifahaõgu ami, na so khõmi wa’omasimi nawõmi. (Yoh. I. 2, 5).

36 IV. Imane khõnia Simoni Fetero: He Tua, heza mõi’õ? Itema linia Yesu, imane: Tebai õ’o’õ ndra’o iada’e ba zi mõi ndra’o, ba õ’o’õ sa ndra’o na furi. (F. 21, 18. 19). 

37 Imane khõnia Fetero: He Tua, hana wa lõ u’ila u’o’õ ndra’ugõ iada’e? Ubelegõ nosogu fõnau. (Luk. 22, 33 b. t.). 

38 Itema linia Yesu, imane: Õbelegõ nosou fõnagu? Si ndruhundruhu niŵa’õgu khõu, lõ fakhamõ miwo zilatao, irugi no medõlõe õ’osilõ’õgõ ndra’o.

 

YOHANE 14

Huhuo Yesu ba nifahaõnia, safuria. I. Ifarou dõdõra ba wamati khõ Lowalangi ba ba wamati khõnia. II. Faoma ira, darua ira Amania. III. Ifabu’u Geheha ni’amoni’õ. IV. Famahowu’õ ba fondrara tõdõ.

1 I. Bõi abu dõdõmi. Mi’amati ba Lowalangi ba mi’amati khõgu. (Mar. 11, 22. F. 12, 44). 

2 Oya nahia ba nomo Namagu, ba na tenga si manõ mena’õ, ba no uŵa’õ khõmi. Mõido sa muhaogõ naha khõmi. (Kor. II. 5, 1.). 

3 Ba na no mõido, na no uhaogõ naha khõmi, ba mangawulido, ba uhalõ ami khõgu, ena’õ so ami gõi ba zi so ya’o. (F. 17, 24).

4 Ba no mi’ila lala ba zi mõi ndra’o.

5 II. Imane khõnia Toma: He Tua, lõ ma’ila, heza mõi ndra’ugõ, ba he moroi ma’ila lala? 

6 Imane khõnia Yesu: Ya’odo lala, ya’odo wa’aduhu, ya’odo wa’auri. Lõ sondrugi Ama, na lõ itõrõ ndra’o. Heb. 10, 19). 

7 Na no aboto ba dõdõmi ndra’o, ba aboto gõi ba dõdõmi Namagu dania. Ba i’otarai da’e, ba aboto ba dõdõmi ia, ba no mi’ila ia. (F. 8, 19). 

8 Imane khõnia Filifo: He Tua, oroma’õ khõma Nama, ba ahono dõdõma. 

9 Imane khõnia Yesu: Si manõ wa’ara awõmi ndra’o, Filifo, ba lõ aboto ba dõdõmi ndra’o? Si no mangila ya’o, ba no i’ila Nama; ba hana wa õŵa’õ: Oroma’õ khõma Nama? (F. 12, 45. Kol. 1, 15. Heb. 1, 3. Kor. II. 4, 4. 6). 

10 Hadia lõ faduhu dõdõu, wa ba dõdõ Nama so ndra’o, awõ wa ba dõdõgu so Nama? Taroma li andrõ, niŵa’õgu khõmi, ba tenga moroi ba khõgu uŵa’õ ia. Ba ihalõ halõŵõnia Ama, si lõ tebulõ ba dõdõgu. 

11 Mifati khõgu, wa ba dõdõ Nama so ndra’o, awõ wa ba dõdõgu so Nama; ba na lõ’õ, ba mi’amati ba halõŵõ andrõ. (F. 10, 38). 

12 Si ndruhundruhu niŵa’õgu khõmi, ihalõ dania halõŵõ andrõ, nihalõgu, samati khõgu, ba sebua moroi andrõ ihalõ, me khõ Nama mõi ndra’o, (Mat. 17, 20. Hal. zin. 2, 41; 5, 15) 

13 ba hadia ni’andrõmi, ba dõigu, ba u’o’õ, ena’õ tefolakhõmi Nama ba khõ Nono. (F. 15, 7; 16, 23).

14 Na so ni’andrõmi khõgu ba dõigu, ba u’o’õ. (Yoh. I. 5, 14. 15).

15 III. Na mi’omasi’õ ndra’o, ba mi’o’õ goroisagu. (F. 15, 10. Yoh. I. 5, 3). 

16 Ba ya’o, ba u’andrõ dania khõ Nama, ba ibe’e khõmi zanolo tánõ bõ’õ, ena’õ lõ aefa ia khõmi, irugi zi lõ aetu; (F. 14, 26). 

17 Eheha si duhu andrõ, si tebai latema niha guli danõ, me lõ la’ila, me lõ aboto ba dõdõra. Ba dõdõmi no aboto ia, me lõ aefa ia khõmi, ba ba dõdõmi so ia dania. (Yoh. I. 5, 6). 

18 Lõ urõi ami, hulõ zi lõ ama, si lõ ina, mõido khõmi. (Mat. 28, 20). 

19 Ma’ifu tõ na, ba lõ’õ sa’ae la’ilado niha guli danõ, ba ya’ami zangila ya’o, auri sa ndra’o, ba sauri gõi ami dania. (F. 16, 16. Hos. 6, 2). 

20 Na luo da’õ, ba aboto ba dõdõmi, wa ba dõdõ Nama so ndra’o, awõ wa ba dõdõgu so ami ba ba dõdõmi so ndra’o. (F. 17, 23 b. t.). 

21 Si so oroisa andrõ khõgu, solo’õ ya’ia, da’õ zomasi ya’o. Ba ni’omasi’õ Namagu zomasi ya’o; ba ya’o gõi u’omasi’õ ia ba u’oroma’õ ndra’o khõnia. (A. 15). 

22 Imane khõnia Yuda, tenga banua Kariota andrõ: He Tua, hadia ia wa õ’oroma’õ ndra’ugõ khõma, ba lõ õ’oroma’õ ndra’ugõ ba niha guli danõ? 

23 Itema linia Yesu, imane khõnia: Na so zomasi ya’o, ba i’o’õ ligu, ba i’omasi’õ Amagu, ba mõiga khõnia, ba ba khõnia ma’iagõ. (Efes. 3, 17 b. t.). 

24 Si lõ mangomasi’õ ya’o, ba lõ i’o’õ ligu. Ba taroma li andrõ, nirongomi, ba tenga khõgu, no khõ zamatenge ya’o, khõ Nama. (F. 7, 16 b. t.). 

25 Da’õ niŵa’õgu khõmi, fatua lõ ahetado khõmi.

26 Ba sanolo andrõ, Eheha ni’amoni’õ, nifatenge Namagu dania ba dõigu, da’õ zamahaõ ya’ami, ba da’õ fefu, ba ahori ifasugi ba dõdõmi niŵa’õgu khõmi. (F. 15, 26; 16, 14. Fil. 1, 9—11).

27 IV. Urõi khõmi wa’ohahau dõdõ, fa’ohahau dõdõ khõgu ube’e khõmi. Bõ’õ nibe’e niha guli danõ, bõ’õ nibe’egu. Bõi abu dõdõmi ba bõi ata’u ami. (F. 16, 33. Rom. 5, 1. Fil. 4, 7). 

28 No mirongo, me uŵa’õ khõmi: Mofanõ ndra’o ba ufulido khõmi. Na mi’omasi’õ ndra’o, ba omuso dõdõmi ena’õ, me khõ Nama mõido, me no sebua moroi khõgu Nama. (F. 10, 29. Fil. 2, 6 b.

t.). 

29 Ba noa sa uŵa’õ khõmi, fatua lõ alua, ena’õ faduhu dõdõmi, na alua dania. (F. 13, 19).

30 Lõ’õ sa’ae oya huhuogu khõmi, so sa’ae zalaŵa guli danõ andrõ, ba lõ isõndra hadia ia khõgu; (F. 12, 31. Luk. 22, 53), 

31 ba ena’õ aboto ba dõdõ niha guli danõ, omasido Nama ba u’o’õ hadia niŵa’õ Nama khõgu, ba mifaoso, taheta ita ba da’e! (F. 10, 18).

 

YOHANE 15

I. Amaedola: Tõla nagu. II. Famarou tõdõ ba wangomasi’õ awõ. III. Fondrara tõdõ ba watiusa niha guli danõ.

1 I. Ya’odo dõla nagu si ndruhu andrõ, ba si so kabu nagu Namagu. 

2 Fefu ndraha ba khõgu, si lõ mowua, ba iheta, ba fefu zowua, ba ihaogõ, ena’õ tedou wa’oya mbuania. (Mat. 15, 13. Fil. 1, 9—11). 

3 Si no muhaogõ ami, bõrõ daroma li andrõ, niŵa’õgu khõmi. (F. 13, 10. Efes. 5, 26). 

4 Mi’iagõ ndra’o, ba u’iagõ ami. Hulõ ndraha, si tebai mowua, ha ya’ia, na tenga sa’ae ba dõla nagu so ia, si manõ gõi ami, na tenga sa’ae ba khõgu so ami. 

5 Ya’odo dõla nagu andrõ, daha ami. Sangiagõ ya’o, na u’iagõ ia gõi, daõ zoya bua, me tebai milau hadia ia, na lõ ya’o. (Kor. II. 3, 5). 

6 Nitibo’õ na so zi lõ mangiagõ ya’o, hulõ ndraha, ba mate, ba la’ozaragõ ba latibo’õ ba galitõ ba akhozi. (Mat. 3, 10). 

7 Na mi’iagõ ndra’o, ba na lõ aefa ba dõdõmi daroma ligu, ba mi’andrõ hadia zomasi ami, ba tebe’e khõmi. (F. 14, 13. Mar. 11. 24). 

8 Ba da’õ tefosumange Namagu, ena’õ oya mbuami, ba ena’õ tobali nifahaõgu ami. 

9 Si mane fa’omasi Nama ndra’o, si manõ gõi wa’omasigu ami. Mi’iagõ wa’omasigu andrõ. 

10 Na mi’o’õ goroisagu, ba da’õ mi’iagõ wa’omasigu, si mane folo’õgu oroisa Namagu, be u’iagõ wa’omasinia. (F. 14, 15).

11 Da’õ niŵa’õgu khõmi, ena’õ so ba dõdõmi wa’omuso dõdõ andrõ khõgu, ba ena’õ a’oi so wa’omuso dõdõmi. (F. 16, 24).

12 II. Da’õ goroisagu, ena’õ faoma mi’omasi’õ nawõmi, si mane fa’omasigu ami. (F. 13, 34). 

13 Fondrege wa’ebua wangomasi’õ awõ, na ibelegõ nosonia niha fõna zi fahuwu khõnia. (Rom. 5, 6 b. t.).

14 Si no fahuwu khõgu ami, na mi’o’õ hadia niŵa’õgu khõmi. (Luk. 8, 21). 

15 Lõ’õ sa’ae ube’e tõimi genoni, enoni, ba lõ i’ila, hadia nifazõkhi zokhõ ya’ia; ba no ube’e tõimi zi fahuwu, noa sa u’ombakha’õ khõmi fefu nirongogu khõ Namagu. (Yak. 2, 23). 

16 Tenga ya’ami zanuyu ya’o, ya’o sa zanutuyu ya’ami, ba no ufataro ami, ena’õ mõi ami mowua, ba ena’õ lõ tebulõ mbuami, ena’õ ibe’e khõmi Ama hadia ni’andrõmi khõnia ba dõigu. (F. 16, 23).

17 Da’õ goroisagu khõmi, ena’õ faoma mi’omasi’õ nawõmi.

18 III. Na fatiu dõdõ niha guli danõ khõmi, ba ya’aboto ba dõdõmi, no ofõna fatiu dõdõra khõgu. (Yoh. I. 3, 13). 

19 Na awõ niha guli danõ ami ena’õ, ba no omasi ena’õ niha guli danõ dána khõra andrõ; ba me no tenga awõ niha guli danõ ami, me no ututuyu ami ba niha guli danõ, andrõ wa fatiu dõdõ niha guli danõ khõmi. (F. 17, 14). 

20 Mitõrõtõrõ tõdõmi li andrõ, niŵa’õgu khõmi: Tenga sebua moroi khõ zokhõ ya’ia zawuyu. Na no lagohi ndra’o, ba lagohi gõi ami; na no la’o’õ ligu, ba la’o’õ gõi limi. (F. 13, 16. Mat. 24, 9). 

21 Ba bõrõ dõigu, wa lalau khõmi da’õ fefu, me lõ saboto ba dõdõra zamatenge ya’o. (F. 16, 3). 

22 Na lõ si mõido mena’õ, muhede khõra, ba lõ horõra. Ba iada’e, ba lõ tahi khõra ba horõra andrõ. (F. 9, 41). 

23 Si fatiu tõdõ khõgu, ba fatiu gõi khõ Namagu. (F. 5, 23). 

24 Na lõ nihalõgu mena’õ ba khõra halõŵõ andrõ, si lõ irai ihalõ niha bõ’õ, ba lõ horõra ena’õ, ba iada’e, ba no la’ila, ba noa zui fatiu dõdõra khõgu ba khõ Namagu. (F. 10, 37. 38). 

25 Ba ena’õ itõrõ li andrõ, nisura ba zura goroisa khõra: ”No fatiu dõdõra khõgu, ba lõ bõrõbõrõ”. (Sin. 35, 19; 69, 5). 

26 Na so zanolo andrõ, nifatengegu khõmi dania, si oroi khõ Nama, Eheha si duhu andrõ, si otarai Nama, da’õ zamaduhu’õ ya’o. (F. 14, 16. 26). 

27 Ba ya’ami gõi, ba samaduhu’õ, me no i’otarai mbõrõta faofao ami khõgu. (Hal. zin. 1, 8. 21 b. t.; 5, 32).

 

YOHANE 16

I. Iŵa’õ ba nifahaõnia Yesu, lagohi ira dania. II. Iŵa’õ khõra, moguna khõra, na mõi ia khõ Nama. III. Ibe’e fondrara dõdõra, wa ifuli la’ila ia dania. IV. Ifabu’u khõra tefondrondrongo wangandrõ, na ba dõinia. V. Ihõnagõ iŵa’õ khõra, zumaewe ira dania.

1 I. Da’õ niŵa’õgu khõmi, fa bõi fatuwu khõmi. (Mat. 13, 21). 

2 Latibo’õ banua ami dania. Ba irugi baŵa dania, ba dozi samunu ya’ami, ba lawai famosumange Lowalangi. (Mat. 24, 9. Hal. zin. 8, 1. 9, 1 b. t.; 23, 12). 

3 Ba me lõ aboto ba dõdõra Nama ba ya’a, andrõ lalau khõmi da’õ. (F. 15, 21. Kor. I. 2, 8). 

4 Ba andrõ uŵa’õ khõmi da’õ, ena’õ, na no irugi baŵa da’õ, ba mitõrõtõrõ tõdõmi, wa no uŵa’õ khõmi. Ba tenga si otarai mbõrõta uŵa’õ khõmi da’õ, me no faofao ndra’o khõmi. (F. 13, 19). 

5 Ba iada’e, ba mofanõ ndra’o khõ zamatenge ya’o, ba samõsa lõ ba khõmi sanofu khõgu: Heza mõi’õ? (F. 7, 33; 13, 36). 

6 Ba me no uŵa’õ khõmi da’õ ba no a’oi so wa’abu dõdõmi.

7 Ba si ndruhu niŵa’õgu khõmi, moguna khõmi, na mofanõ ndra’o. Na lõ mofanõ ndra’o, ba lõ mõi khõmi zanolo andrõ; ba na mõido, ba ufatenge ia khõmi.

8 II. Ba na so da’õ, ba i’otu’õ niha guli danõ, ba horõ ba ba wa’atulõ dõdõ ba ba huku. 

9 Ba horõ, me lõ mamati ira khõgu. (F. 3, 18). 

10 Ba wa’atulõ dõdõ, me sofanõ khõ Nama ndra’o, ba me lõ mi’ilado sa’ae. (Rom. 4, 25; 8, 34). 

11 Ba huku, me no tehuku zalaŵa guli danõ andre. (F. 12, 31). 12 Wa’oya na niŵa’õgu khõmi, ba tebai mitaha iada’e. 

13 Ba na so da’õ, Eheha si duhu andrõ, ba i’oroma’õ khõmi lala ba zi duhu fefu. Tenga sa soroi khõnia wehedenia, fefu hadia ia nirongonia, iŵa’õ, ba hadia zi so dania, ba i’ombakha’õ khõmi. (F. 14, 17. Yoh. I. 2, 27). 

14 Ya’ia zamolakhõmi ya’o, me moroi ba zi so khõgu itema ba i’ombakha’õ khõmi. (Yoh. 14, 26).

15 Fefu hadia ia zi so khõ Nama, ba khõgu da’õ. Andrõ uŵa’õ, itema ba zi so khõgu, ba i’ombakha’õ khõmi. (F. 17, 10).

16 III. Ma’ifu tõ na, ba lõ mi’ilado sa’ae, ba ma’ifu tõ zui, ba mi’ilado. (F. 14, 19. 28). 

17 Ba faoma lamane khõ naŵora nifahaõnia õsa: Hadia da’õ, niŵa’õnia khõda: Ma’ifu tõ, ba lõ mi’ilado, ba ma’ifu tõ zui, ba mi’ilado, ba: mofanõ ndra’o khõ Nama? 

18 Ba lamane: Hadia da’õ, niŵa’õnia: Ma’ifu tõ? Lõ ma’ila hadia niŵa’õnia. (F. 7, 33—36). 

19 Aboto ba dõdõ Yesu, lasofu khõnia dania, ba imane khõra: Da’õ nizofuzofumi khõ nawõmi, me no uŵa’õ: Ma’ifu tõ, ba lõ mi’ilado ba ma’ifu tõ zui, ba mi’ilado? 

20 Si ndruhundruhu niŵa’õgu khõmi, mege’ege dania ami ba mange’esi, ba omuso dõdõ niha guli danõ; sabu tõdõ ami, ba tobali sa fa’omuso dõdõ wa’abu dõdõmi andrõ. 

21 Abu dõdõ ndra alawe, na madono ia, me no irugi baŵania, ba na no i’adonogõ nono andrõ, ba lõ’õ sa’ae itõrõ tõdõnia wa’afõkhõ andrõ, ba wa’omuso dõdõ, me no tumbu niha andrõ, ba guli danõ. (Yes. 26, 17 b. t.).

22 Ba ya’ami gõi, abu sa dõdõmi iada’e, ba ufuli ufaigi ami, ba omuso dõdõmi, ba lõ sangeheta khõmi fa’omuso dõdõmi andrõ. (Luk. 24, 41. 52. Yes. 16, 10—14; 35, 10).

23 IV. Ba na luo da’õ, ba ma’ifu lõ misofu khõgu. Si ndruhundruhu niŵa’õgu khõmi, na so ni’andrõmi khõ Nama, ba ibe’e khõmi, ba dõigu. (F. 15, 7. 16). 

24 Irege da’e, ba lõ ni’andrõmi ba dõigu. Mi’andrõ, ba mitema, ena’õ a’oi so wa’omuso dõdõmi. (F. 15, 11). 

25 Amaedola khõgu, wanguma’õ khõmi da’õ. Irugi baŵa dania, ba lõ’õ sa’ae uŵa’õ gamaedola khõmi, ba lõ aiwõdo wangombakha khõmi hadia ia khõ Nama. 

26 Na luo da’õ ba mangandrõ ami ba dõigu, ba lõ uŵa’õ khõmi, mangandrõ ndra’o khõ Nama salahimi. (F. 14, 16. Heb. 7, 25). 

27 Ya’ia, Ama, zangomasi’õ ya’ami, me no mi’omasi’õ ndra’odo, ba me no faduhu dõdõmi, khõ Lowalangi u’otarai. (F. 14, 21; 17, 8. 25).

28 Khõ Nama u’otarai, ba no mõido ba guli danõ; ba urõi zui guli danõ ba mõido khõ Nama (F. 13, 3).

29 V. Lamane ira nifahaõ: Hiza, iada’e lõ aiwõ ndra’ugõ muhede, ba lõ õŵa’õ gamaedola. 

30 Aboto sa’ae ba dõdõma, wa no õ’ila fefu hadia ia, ba lõ moguna khõu, isofu khõu niha. Ba da’õ faduhu dõdõma, wa khõ Lowalangi õ’otarai. (F. 21, 17). 

31 Itema lira Yesu, imane: Iada’e faduhu dõdõmi? 

32 Hiza, irugi baŵa dania ba no irugi iya’e, ba oi zara tefazawili ami, isaŵa dána khõnia zamõsana, ba mirõi ndra’o, ba ya’o, ba tenga ha ya’odo, me faofao khõgu Nama. (Mat. 26, 56. F. 8, 29). 

33 Da’õ niŵa’õgu khõmi, ena’õ so khõmi wa’ohahau dõdõ ba khõgu. Ba guli danõ so wa’afõkhõ khõmi, ba bõi mibusi dõdõmi, no ulaŵa niha guli danõ. (F. 14, 27. Yoh. I. 5, 4).

 

YOHANE 17

Mangandrõ Yesu: I. Hadia khõnia, II. hadia khõ zinengenia, ba III. hadia khõ zamati bõ’õ, fefu.

1 I. Da’õ niŵa’õ Yesu, ba ifaõga hõrõnia miyaŵa ba zorugo, ba imane: He Ama, no irugi inõtõ; folakhõmi Nonou, ena’õ ifolakhõmi ndra’ugõ Ono. (F. 12, 23. 28). 

2 Si mane fame’eu barõ mbawania fefu niha, ena’õ idozigõ fa’auri si lõ aetu nibe’eu khõnia andrõ. (Mat. 28, 18. F. 3, 35; 6, 37). 

3 Da’õ wa’auri si lõ aetu, ena’õ aboto ba dõdõra ndra’ugõ, Lowalangi si ndruhu andrõ, si ha sambua, ba ena’õ, aboto ba dõdõra zinengeu andrõ, Yesu Keriso. ( Kor. I. 8, 6).

4 No ufolakhõmi ndra’ugõ ba guli danõ, no u’asiwaligõ halõŵõ andrõ, nibe’eu khõgu, ba wangai ya’ia (F. 4, 34).

5 Ba iada’e, ba folakhõmi ndra’o, awõu, ya’ugõ, Ama, lakhõmi si no so khõgu ba khõu, fõna wa’aso danõ’a andrõ. (F. 1, 1 b. t. Fil. 2, 6).

6 II. No ufa’ele’õ dõimõ ba niha andrõ, nibe’eu khõgu, moroi ba niha guli danõ. Khõu ira, ba no õbe’e khõgu, ba no la’o’õ liu. 

7 Aboto sa’ae ba dõdõra, wa moroi khõu fefu hadia ia nibe’eu khõgu. 

8 Me no ufa’ema khõra daroma li andrõ, nibe’eu khõgu, ba no latema, ba si ndruhu no aboto ba dõdõra, wa moroi khõu u’otarai, ba no faduhu dõdõra, wa no ya’ugõ zamatenge ya’o. (F. 16, 27. 30). 

9 Mangandrõ ndra’o, salahira, tenga salahi niha guli danõ mangandrõdo, khõra sa, nibe’eu khõgu, me no khõu ira. (Heb. 7, 25). 

10 Ba khõu fefu zi so khõgu, ba khõgu fefu zi so khõu, ba no tefolakhõmi ndra’o ba khõra (F. 16, 15). 

11 Ba lõ’õ sa’ae sodo ba guli danõ, ba so sa ira ba guli danõ, khõu mõi ndra’odo. He Ama ni’amoni’õ! Taha ira, ba dõimõ, nibe’eu khõgu andrõ, ena’õ ha sambua dõdõra, si mane tõdõda andrõ. (F. 10, 30). 

12 Me sodo khõra, ba ya’o zanaha ya’ira, ba dõimõ, nibe’eu khõgu andrõ ba no urorogõ ira, ba lõ si tekiko ba khõra, baero nono wa’atekiko andrõ, ena’õ itõrõ zi so ba zura andrõ (F. 13, 18; 6, 70. Sin. 109, 8). 

13 Ba mõido khõu iada’e, ba uŵa’õ da’õ ba guli danõ, ena’õ a’oi so khõra wa’omuso dõdõ andrõ khõgu, ba dõdõra (F. 15, 11). 

14 No ufa’ema khõra daroma limõ, ba no fatiu dõdõ niha guli danõ khõra, me tenga moroi ba niha guli danõ ira, si mane ya’o, si tenga moroi ba niha guli danõ (F. 15, 18. 19). 

15 Lõ u’andrõ, õheta ira ba guli danõ, ba ena’õ õrorogõ ira, ba õ’efa’õ ba Gafõkha; (Yoh. I. 5. 18. Tes. II. 3, 3.). 

16 Tenga moroi ba niha guli danõ ira, si mane ya’o, si tenga moroi ba niha guli danõ. 

17 Amoni’õ ira ba zi duhu; taroma limõ zi duhu. (Sam. II. 7, 28. Sin. 119, 160). 

18 Si mane famatengeu ya’o ba guli danõ, si manõ gõi wamatengegu ya’ira ba guli danõ. (F. 20, 21).

19 Ba u’amoni’õ ndra’o salahira, ena’õ ni’amoni’õ ira gõi ba zi duhu. (Heb. 7, 27; 10, 9. 10. Tit. 2, 14).

20 III. Ba tenga ha khõra ni’andrõgu, ba zamati khõgu ba lira no gõi, (Rom. 10, 17), 

21 ena’õ ha sambua dõdõra, dozi ira, si mane ya’ugõ, Ama, ba khõgu, ba si mane ya’o ba khõu, ena’õ yáira gõi, ba khõda so ira; ena’õ faduhu dõdõ niha guli danõ, ya’ugõ zamatenge ya’o. (Hal. zin. 4, 32). 

22 Ba no ube’e khõra lakhõmi andrõ, nibe’eu khõgu, ena’õ ha sambua dõdõra, si mane tõdõda andrõ, si ha sambua. (Rom. 8, 15 b. t.; 29 b. t.). 

23 Ya’o ba khõra ba ya’ugõ ba khõgu, ena’õ mo’ahonoa wa ha sambua dõdõra, ena’õ aboto ba dõdõ niha guli danõ, ya’ugõ zamatenge ya’o, ba no õ’omasi’õ ira, si mane fa’omasiu ndra’o. (Efes. 4, 3. 13—16. Kor. I. 6, 17). 

24 He Ama, omasido na awõgu ba zi so ya’o nibe’eu khõgu andrõ, ena’õ anehe ira lakhõmigu, nibe’eu khõgu, me no õ’omasi’õ ndra’o, fõna wamazõkhi danõ’a. (F. 12, 26. Yoh. I. 3, 2. Mat. 25, 34). 

25 He Ama satulõ! lõ’õ sa aboto ba dõdõ niha guli danõ ndra’ugõ, ba ba dõdõgu aboto ndra’ugõ, ba na aboto ba dõdõ da’e, wa no ya’ugõ zamatenge ya’o. (F. 8, 19. Mat. 11, 25). 

26 Ba no u’ombakha’õ khõra doimõ, ba u’ombakha’õ na dania, ena’õ so ba dõdõra wa’omasi andrõ, fa’omasiu ndra’o, ba ena’õ so ba dõdõra ndra’odo. (Sin. 22, 23. F. 15, 9).

 

YOHANE 18

I. Lara’u Yesu. II. I’osilõ’õgõ Yesu Fetero. III. Isekhegõ Yesu ere sebua andrõ, Hanasi. IV. Ifuli i’osilõ’õgõ Yesu Fetero. V. Isekhegõ ia Filato.

1 I. Aefa iŵa’õ da’õ Yesu, ba mõi ia baero, awõ ndra nifahaõnia, i’õtõ mbombo andrõ, Kendrona, ba so kabu ba da’õ, ba da’õ bakha mõi Yesu, awõ nifahaõnia. (Mat. 26, 36 b. t.; Sam. II. 15, 23). 

2 Ba no i’ila gõi naha andrõ Yuda andrõ, si manga mbõlinia, me asese mõi ba da’õ Yesu, awõ nifahaõnia. (Mat. 26, 47 b. t.). 

3 Ba me no ihalõ Yuda zaradadu ba enoni gere sebua ba enoni warizaio, ba mõi ia ba da’õ, la’ohe wandru ba sulu ba fangõna. 

4 Ba no i’ila Yesu fefu zi gõna ia dania, ba mõi ia baero, imane khõra: Ha niha ni’aluimi? (F. 13, 1).

5 Latema linia, lamane: Yesu, banua Nazareta andrõ. Imane khõra Yesu: Ya’odo da’õ. Ba so gõi ba da’õ Yuda, si manga mbõlinia, awõra. 

6 Ba me iŵa’õ khõra: Ya’odo da’o! ba lawuwu furi, alau tou ira ba danõ. 

7 Ba ifuli isofu khõra: Ha niha ni’aluimi? Ba lamane: Yesu, banua Nazareta. 

8 Itema lira Yesu, imane: No uŵa’õ khõmi, ya’odo da’õ. Ba na mi’alui ndra’o, ba mifofanõ da’e. (F. 10, 18). 

9 Ena’õ itõrõ niŵa’õnia no: Samõsa lõ si taya khõgu nibe’eu khõgu andrõ. (F. 17, 12). 

10 Ba me so wõda khõ Zimoni Fetero, ba isõbi, ba igukhui zawuyu gere sebua, i’eŵa dalingania, kambõlõ. Malikho dõi zawuyu andrõ. (Mat. 26, 51 b. t.). 

11 Ba imane Yesu khõ Wetero: Saembõegõ wõda. Hadia, lõ ubadu nõsi mako andrõ, nibe’e Namagu khõgu? (Mat. 26, 39). 

12 Ba lara’u Yesu saradadu ba kumandra ba enoni niha Yehuda andrõ ba labõbõ ia. (Mat. 26, 57 b. t.). 

13 Ba la’ofõnai’õ wolohe ya’ia khõ Hanasi, matua Kayafa da’õ, ba ere sebua Kayafa zi dõfi andrõ. (Luk. 3, 2).

14 Ba Kayafa zanguma’õ ba niha Yehuda no, sõkhi na mate zamõsa, salahi mbanuara andrõ. (F. 11, 50).

15 II. Ba i’o’õ Yesu Simoni Fetero ba samõsa nifahaõ bõ’õ. Ba no fa’ila li nifahaõ andrõ khõ gere sebua, ba fao ia khõ Yesu, we’amõi ba golayama gere sebua. (F. 20, 2). 

16 Ba baero so Wetero, ba zinga mbawandruhõ. Ba mõi baero nifahaõ si samõsa andrõ, si no fa’ila li khõ gere sebua, fahuhuo ia ba zanaro ba mbawandruhõ, ono alawe, ba i’ohe bakha Wetero. 

17 Ba imane khõ Wetero sawuyu ono alawe andrõ, sanaro ba mbawandruhõ: Tenga ya’ugõ gõi nifahaõ niha andrõ? Imane: Tenga. (Mat. 26, 69 b. t.).

18 Ba so ba da’õ zawuyu ba enoni, no la’ebua’õ galitõ, o’afu ira, moleu. Ba so gõi Wetero ba da’õ, ba ngaira, moleu gõi ia.

19 III. Ba isofu khõ Yesu ere sebua ba nifahaõnia ba ba wamahaõnia andrõ. 

20 Itema linia Yesu, imane: Lõ urai aiwõ fahuhuo ba niha, lõ aetu mamahaõ ndra’o ba zekola ba ba gosali, ba zi mõi niha Yehuda fefu, lõ huhuogu ba zi tobini. (F. 7, 14. Mat. 26, 50). 

21 Hana wa õsofu khõgu? Sofu, ba zi no mamondrongo hadia niŵa’õgu khõra. Hiza, ya’ira zangila, hadia niŵa’õgu. 

22 Ba me iŵa’õ da’õ, ba itema ifalisi mbawa Yesu enoni, samõsa, si so ba da’õ, imane: Hadia, õmanõ wanema li gere sebua? 

23 Itema linia Yesu, imane: Na sala wehedegu, ba ombakha’õ, hadia zi lõ sõkhi, ba na lõ sala, ba hana wa õbõzido? (Mat. 5, 39).

24 Ba ifa’ohe’õ ia Hanasi khõ gere sebua andrõ, Kayafa, lõ mutoto’õ mbõbõ.
25 IV. Ba so Zimoni Fetero, moleu. Ba lamane khõnia: Hadia, tenga ya’ugõ gõi nifahaõnia? Ba i’osilõ’õgõ, imane: Tenga. 26 Imane sawuyu gere sebua, samõsa, talifusõ ni’eŵa Wetero talinga: Tenga no u’ila ndra’ugõ, awõnia ba kabu?

27 Ba ifuli i’osilõ’õgõ Fetero. Ba i’anema’õ miwo zilatao. (F. 13, 38).

28 V. Ba la’ohe ba gõdo gumandru Yesu, la’otarai Kayafa; si hulõ wongi. Ba lõ mõi ira ba gõdo, fa lõ latõrõ zalakha, ena’õ la’ila manga wasa andrõ. (Mat. 27, 1 b. t. Mar. 15, 1 b. t. Luk. 23, 1 b. t.). 

29 Ba mõi baero khõra Wilato, imane: Hadia, wangadu khõmi ba niha andre? 

30 Latema linia, lamane khõnia: Na tenga samazõkhi si lõ sõkhi da’õ, ba lõ mabe’e ba dangau ia mena’õ. 

31 Ba imane khõra Filato: Mihalõ ia, ya’ami, ba mi’o’õ goroisa andrõ khõmi, wanguhuku ya’ia. Ba lamane khõnia niha Yehuda: Lõ tola mabunu niha. (F. 19, 6. 7). 

32 Ena’õ itõrõ li Yesu, niŵa’õnia ba wangombakha he wisa wa’amatenia dania. (F. 12, 32. 33. Mat. 20, 19). 

33 Ba ifuli ia yomo ba gõdo Filato, humede ia khõ Yesu, imane khõnia: Hadia, razo niha Yehuda ndra’ugõ? (Mar. 15, 2. Luk. 23, 2). 

34 Itema linia Yesu, imana: Hadia, moroi khõu õwa’õ da’õ, ma tánõ bõ’õ zangombakha ya’ia khõu, ba khõgu andre? 

35 Itema linia Filato, imane: Hadia, niha Yehuda ndra’odo? Iwau ba ere sebua andrõ zame’e ba dangagu ya’ugõ; hadia horõu? 

36 Itema linia Yesu, imane: Tenga moroi ba guli danõ andre mbanuagu andrõ, na moroi ba guli danõ andre mbanuagu, ba molaŵa mena’õ genonigu andrõ, fa bõi tebe’e ba danga niha Yehuda ndra’o; ba no tenga sa moroi ba da’õ mbanuagu. (F. 6, 15. Mat. 26, 52. 53). 

37 Ba imane khõnia Filato: Ba razo sa atṍ ndra’ugõ? Itema linia Yesu: Ya’ia niŵa’õu, razo ndra’odo. Andrõ tumbu ndra’o, ba andrõ mõido ba guli danõ, ba wamaduhu’õ si duhu. Dozi si otarai zi duhu, ba lafondrondrongo ligu. (Luk. 23, 3. Tim. I. 6, 13. F. 8, 47). 

38 Imane khõnia Filato: Hadia zi duhu? Ba me aefa iŵa’õ da’õ, ba mõi ia baero zui, ba niha Yehuda, ba imane khõra: Lõ usõndra khõnia horõ. (F. 14, 6. Luk. 23, 4). 

39 Ba no huku ba khõmi, ube’e aefa khõmi zamõsa, ba gowasa fasa andrõ. Hadia, omasi ami, ube’e aefa khõmi razo niha Yehuda andrõ? (Mar. 15, 6. 9). 

40 Ba mu’ao zui ira, lamane: Bõi da’õ, Baraba andrõ efa’õ. Ba samara’u Mbaraba andrõ. (Mat. 27, 21. Hal. zin. 3, 14).

 

YOHANE 19

I. Labõbõzi Yesu ba la’o’aya. II. La’etu’õ huku. III. Laforõfa. IV. So ba ngai rõfa Maria ba Yohane. V. Mate Yesu. VI. Lako’o ia.

(A. 1—3: Mat. 27, 27—30. Mar. 15, 16—19.)

1 I. Aefa da’õ, ba ihalõ Yesu Filato, ifabõzi’õ. 

2 Ba lalalau dakula doi saradadu, lafotakula ia, ba lafobaru ia baru luo soyo, 

3 ba la’ondrasi ia, ba lamane: Ya’ugõ, razo niha Yehuda? Ba lafalisi mbawania. 

4 Ba mõi baero zui Wilato, imane khõra: Hiza, u’ohe ia baero khõmi, ena’õ aboto ba dõdõmi, lõ usõndra horõ. (F. 18, 29. 38).

5 Ba mõi baero Yesu, mokofia ia takula doi andrõ, ba mobaru baru luo soyo no mege. Ba imane khõra Filato: Hiza niha andrõ! (Sin. 22, 7. Yes. 53, 3).

6 II. Ba me la’ila ia ere sebua ba enoni andrõ, ba mu’ao ira: Forõfa! forõfa! Imane khõra Filato: Mihalõ ia, ya’ami, ba miforõfa, ya’odó, lõ’õ sa usõndra horõnia. (Luk. 23, 21. F. 18, 31). 

7 Latema linia niha Yehuda, lamane: So goroisa khõma, ba ba goroisa andrõ, ba si mate ia, me no ibali’õ Ono Lowalangi ia. (Mat. 26, 63—66. Moz. V. 18, 20. F. 10, 33). 

8 Me irongo niŵa’õra andrõ Filato, ba tedou wa’ata’unia, 

9 ba ifuli ia yomo ba gõdo, ba imane khõ Yesu: Heza moroi ndra’ugõ? Ba lõ itema linia Yesu. (Mat. 27, 12 b. t.). 

10 Imane khõnia Filato: Hadia, lõ muhede’õ khõgu? Lõ õ’ila, wa tola u’efa’õ ndra’ugõ ba tola uforõfa ndra’ugõ? 

11 Itema linia Yesu, imane: Lõ tola õlau hadia ia khõgu ena’õ, na tenga nitehe khõu moroi si yaŵa. Andrõ ebua horõ zame’e ba dangau ya’o. (Rom. 13, 1). 

12 I’otarai da’õ, ba i’alui Filato wangefa’õ ya’ia. Ba mu’ao niha Yehuda, lamane: Na õ’efa’õ da’õ, ba tenga ni’omasi’õ kaizaro ndra’ugõ. Fefu, ha niha zamali’õ razo ya’ia, ba no si fa’udu khõ kaizaro. (Luk. 23, 2). 

13 Ba me no irongo niŵa’õra andrõ Filato, ba i’ohe baero Yesu, ba mudadao ia ba dadaoma zanguhuku, ba naha andrõ sotõi ”nibale kara”, ba li Heberaio, ba ”Gabata”. (Mat. 27, 19). 

14 Ba baŵa wangehao ba gowasa fasa, so labõzi õnõ. Ba imane ba niha Yehuda: Hiza razomi! (Mar. 15, 42).

15 Ba mu’ao ira: Heta! heta! forõfa ia! Imane khõra Filato: Hadia, uforõfa razomi? Latema linia ere sebua, lamane: Lõ razoma baero kaizaro. (Luk. 23, 18. Hal. zin. 3, 13).

(A. 16—24: Mat. 27, 31—44. Mar. 15, 20—32. Luk. 23, 26. 33—39)

16 III. Awena ibe’e niforõfa. Ba la’ohe Yesu. 

17 Ba i’osa’õ rõfania, ba mõi ira baero, lasaŵa naha andrõ, sotõi ”sokamu’u,” ”Gologata” ba li Heberaio. (Moz. I. 22, 6). 

18 Ba da’õ laforõfa ia ba darua naŵonia, samõsa dambai, ba gotaluara labe’e Yesu. 

19 Ba ifazõkhi gõi zura Filato, ibe’e ba hõgõ rõfa ”Yesu, banua Nazareta, razo niha Yehuda” nisurania. 

20 Ba ato zombaso sura andrõ niha Yehuda, me no ahatõ ba mbanua naha andrõ, ba niforõfa Yesu, ba no mube’e li Heberaio ba li Ndrawa Roma ba li Ndrawa Heleni. 

21 Ba lamane ere sebua ba niha Yehuda khõ Wilato: Bõi sura: razo niha Yehuda, sura wa no iŵa’õ: Razo niha Yehuda ndra’o. 

22 Itema lira Filato, imane: Lõ tebulõ nisuragu andrõ. 

23 Ba me no aefa laforõfa Yesu saradadu, ba lahalõ nukha nia, la’o’õfa, sambua ni’o’õfa zamõsa, awõ gamezania. Ba si lõ tagutagu gameza andrõ, nisoso, i’otarai si yaŵa, ma’asagõrõ.

24 Ba faoma lamane khõ nawõra; Bõi tataba ia, datalau fadahõdahõ khõnia, ha khõ mõi ia. Ena’õ itõrõ zi so ba zura: ”No lafaosa khõra nukhagu, ba no fadahõdahõ ira ba gamezagu.” Da’õ nilau zaradadu andrõ. (Sin. 22, 19).

25 IV. Ba so ba ngai rõfa Yesu ninania ba talifusõ ninania, Maria, fo’omo Kelofasi andrõ ba Maria, banua Magadala andrõ. (Mar. 15, 40. Mat. 27, 56). 

26 Ba me i’ila ninania Yesu, awõ nifahaõnia andrõ, somasi ia, ba ngainia, ba imane khõ ninania: Heza nonou, alawe! (F. 20, 2; 2, 4).

27 Aefa da’õ, ba imane khõ nifahaõ andrõ: Hiza ninau! Ba i’otarai da’õ, ba i’ohe ia baomonia nifahaõ andrõ.

28 V. Me aefa da’õ, me no i’ila Yesu, no awai, fefu hadia ia, ena’õ itõrõ zi so ba zura; ba imane: Owõkhi dõdõgu! (F. 17, 4. Sin. 69, 22).

29 Ba so ba da’õ zamba nahia niro aisõ. Ba lafõnui rabo, labe’e ba mbalõ zukhu ba la’oro’õ khõnia, ba mbawania. (Mat. 27, 48). 

30 Ba me no ibadu niro aisõ andrõ, ba imane: No awai! Ba ileagõ hõgõnia, ba aetu noso. (Mat. 27, 50). 

31 Ba la’andrõ khõ Wilato niha Yehuda, ena’õ na lafafatõ waha niforõfa ba laheta ira, me baŵa wangehao, fa bõi torõi ba rõfa mbotora, ba luo sabato; ebua sa luo sabato andrõ. (Moz. V. 21, 23). 

32 Ba mõi zaradadu, lafafatõ waha zi darua, niforõfa awõnia. 

33 Ba me larugi Yesu, me la’ila, no mate ia, ba lõ lafafatõ wahania, 

34 ba ifahõ ngainia ikhu doho saradadu si samõsa, ba i’anema’õ alua ndro, si faruka idanõ. (Yoh. I. 5, 6. Heb. 9, 11; 12, 18 b. t.). 

35 Ba si no mangila da’õ zamaduhu’õ da’õ, ba duhu wamaduhu’õnia; i’ila wa si duhu niŵa’õnia, ena’õ mamati ami gõi. 

36 Andrõ si manõ, ena’õ itõrõ zi so ba zura: ”Sara bõi lafatõ tõlania”. (Moz. II. 12, 46. Sin. 34, 21).

37 Ba si mané zui ba zura bõ’õ: ”Anehe dania ira nifahõra andrõ.” (Sakh. 12, 10. Fam. 1, 7).

(A. 38—42: Mat. 27, 57—61. Mar. 15, 42—47. Luk. 23, 50—55.)

38 VI. Ba me no aefa da’õ, ba i’andrõ khõ Wilato Yosefo, banua Garimatia, ena’õ tola iheta mboto Yesu; nifahaõ yesu ia gõi, ba ibini’õ, fa’ata’unia niha Yehuda. Ba itehe Filato. Ba mõi ira, laheta. (Luk. 23, 50). 

39 Ba so gõi Nikodemo andrõ, si mõi khõnia no, si fõfõna, ba zi bongi, i’ohe emuri ba aloë, nifaruka, mato safiku. (F. 3, 1 b. t.; 7, 50).

40 Ba lahalõ sa’ae mboto Yesu, la’olohuni muko, ba lalau zamohua andrõ; si manõ huku ba niha Yehuda, wogo’o si mate. 

41 Ba so ba zahatõ ba niforõfa Yesu kabu, ba so lewatõ si bohou ba kabu andrõ, ba zi lõ larai lako’o niha. 

42 Ba ba da’õ labe’e Yesu, ba mbaŵa wangehao andrõ, ba niha Yehuda, me sahatõ lewatõ andrõ. (Yer. 53, 9).

 

YOHANE 20

I. Femaoso Yesu. II. I’oroma’õ ia khõ Maria andrõ, banua Magadala, III. ba ba nifahaõ, IV. ba khõ Doma. V. Tani wa tesura zura andre.

1 I. Sara wongi aefa zabato, ba mõi ba lewatõ Maria andrõ, banua Magadala, ihulõ wongi, me ogõmigõmi na, ba i’ila, no laheta gowe andrõ ba lewatõ. (Mat. 28, 1). 

2 Ba fagohi ia khõ Zimoni Fetero ba khõ nifahaõ si samõsa andrõ, ni’omasi’õ Yesu, ba imane khõra: No lahalõ Duada, ba lewatõ, ba lõ ta’ila heza labe’e ia. (F. 13, 23). 

3 Ba mõi Wetero, awõ nifahaõ si samõsa andrõ, lasaŵa lewatõ. 

4 Ba faoma fagohi ira, darua ira. Ba alio nifahaõ si samõsa andrõ wagohisa, moroi khõ Wetero, ya’ia zi fõfõna mondrugi lewatõ, 

5 ba me ifaigi bakha, ba i’ila muko andrõ, nitou’õ tou; ba lõ’õ sa mõi ia bakha. 

6 Ba so Zimoni Fetero, i’o’õ, mõi ia tou ba lewato, ba i’ila muko andrõ, nitou’õ tou. 

7 Ba lõ mu’orudugõ ba muko andrõ zaembu, si so ba hõgõ Yesu mege; no lagõlugõ, sambua nahania. (F. 11, 44). 

8 Ba awena mõi tou gõi nifahaõ si samõsa andrõ, si fõfõna mondrugi lewatõ, ba i’ila, ba faduhu dõdõnia. 

9 Lõ’õ na sa aboto ba dõdõra zi so ba zura, wa lõ tola lõ maoso Yesu moroi ba ngai zi mate, (Kor. I. 15, 4. Sin. 16, 10. Hal. zin. 2, 25 b. t.).

10 Ba lafuli ira khõra nifahaõ andrõ.

11 II. Ba no so ba zinga lewatõ Maria andrõ, mege’ege. Ba me mege’ege ia, ba ifaigi bakha ba lewatõ, 

12 ba i’ila mala’ika, darua, sobaru safusi, sidadao, samõsa tánõ ba hõgõ, samõsa tánõ ba gahe, ba nibe’e boto Yesu mege. (Mat. 28, 5 b. t. Mar. 16, 5). 

13 Lamane khõnia: Hana wa mege’ege ndra’ugõ, alawe? Imane khõra: No lahalõ Zo’aya ya’o, ba lõ u’ila, heza labe’e ia. 

14 Me aefa iŵa’õ da’õ, ba ibali’õ ia furi ba i’ila Yesu; no so ba da’õ, ba lõ i’ila, wa Yesu da’õ. (Mar. 16, 9). 

15 Imane khõnia Yesu: Hana wa mege’ege ndra’ugõ, alawe? ha niha ni’aluimõ? Iwai sohalõŵõ ba kabu, ba imane khõnia: He Tua, na ya’ugõ zangoloi’õ ya’ia, ba ombakha’õ khõgu, heza õbe’e ia ba mõido muhalõ. (F. 19, 41). 

16 Imane khõnia Yesu: He Maria! Ba ibali’õ ia, imane khõnia, ba li Heberaio: Rabuni! he samahaõ! geluahania. 

17 Imane khõnia Yesu: Bõi babaya ndra’o, lõ’õ na si mõi ndra’o yaŵa khõ Namagu. Ba ae ba dalifusõgu andrõ, ba ŵa’õ khõra: Mõido yaŵa khõ Namagu, ba khõ Namami, khõ Lowalangigu, ba khõ Lowalangimi. (Mat. 28, 9. 10. F. 6, 62. Heb. 2, 11. 12. Kor. I. 11, 3).

18 Ba mõi maria andrõ, banua Magadala, i’ombakha’õ ba nifahaõ: No u’ila Duada, ba da’õ niŵa’õnia khõgu. (Mat. 16, 10).

19 III. Ba me tánõ owi, me luo migu, me no mulazi mbawandruhõ, ba zi so ndra nifahaõ, ba wa’ata’ura niha Yehuda, ba mõi Yesu, so ia ba gotaluara, ba imane khõra: Ya’ohahau dõdõmi! (Luk. 24, 36). 

20 Ba me aefa iŵa’õ da’õ, ba i’oroma’õ khõra danga, awõ ngai. Awena omuso dõdõ ndra nifahaõ, me la’ila Zo’aya. (F. 19, 34; 16, 32). 

21 Ba ifuli imane khõra: Ya’ahahau dõdõmi! Hulõ si mane famatenge Nama ya’o si manõ gõi wamatengegu ya’ami. (F. 14, 27; 17, 18). 

22 Ba me no iŵa’õ da’õ ba ihehaini ira, ba imane khõra: Mitema Geheha ni’amoni’õ. (Luk. 24, 49).

23 Na so ni’efa’õmi horõ, ba aefa khõra, ba ba zi lõ mi’efa’õ ia, ba lõ aefa. (Mat. 16, 19; 18, 18).

24 IV. Ba lõ Toma, awõ zi felendrua andrõ, nifotõi si faero, me so Yesu. (F. 11, 16). 

25 Ba la’ombakha’õ khõnia nifahaõ bõ’õ andrõ: No ma’ila Duada. Ba imane khõra: Na lõ u’ila ba dangania laheto gosõ’osõ andrõ, ba na lõ ube’e durugu ba laheto gosõ’osõ andrõ, ba na lõ utufa tangagu ngainia, ba lõ faduhu dõdõgu. (Sin. 22, 17). 

26 Ba fitu bongi aefa da’õ, ba so zui si bakha ndra nifahaõnia, ba so gõi Doma. So Yesu, me no mulazi mbawandruhõ, so ia ba gotaluara, ba imane: Ya’ohahau dõdõmi! 

27 Awena iŵa’õ khõ Doma: Oro’õ durumõ, ba da’e, ba faigi dangagu, ba oro’õ dangau, ba tufa ngaigu, ba bõi zi lõ faduhu dõdõu, yafaduhu sa’ae. 

28 Itema linia Toma, imane khõnia: So’aya ya’o ba Lowalangigu! (F. 1, 1. Rom. 9, 5).

29 Imane khõnia Yesu: Me no õ’ilado, andrõ wa no faduhu dõdõu. Ya’ahowu zi faduhu tõdõ, he lõ mangila hõrõra! (F. 4, 48. Fet. I. 1, 8. Heb. 11, 1. 27).

30 V. Ba oya na sa dandra bõ’õ, nifazõkhi Yesu, ba zanahe ndra nifahaõ, si lõ musura ba zura andre. (F. 21, 25. Hal. zin. 1, 3). 

31 Ba no musura da’e, ena’õ faduhu dõdõmi, Keriso Yesu, Ono Lowalangi, ba ena’õ so khõmi wa’auri si lõ aetu, ba dõinia andrõ, na faduhu dõdõmi. (F. 3, 16. Yoh. I. 5, 13).

 

YOHANE 21

I. I’oroma’õ ia Yesu ba nifahaõnia, ba zinga mbaŵa Diberia andrõ. II. Huhuonia khõ Wetero.

1 I. Aefa da’õ, ba ifuli i’oroma’õ ia Yesu ba nifahaõnia, ba zinga mbaŵa Diberia andrõ. Imane wangoroma’õ ya’ia: 

2 Faoma so ira, Simoni Fetero ba Toma, nifotõi si faero, ba Natana’eli, banua Kana, ba Galilaia, ba ono Zebedaio andrõ ba darua na nifahaõnia bõ’õ. (F. 1, 46). 

3 Imane khõra Simoni Fetero: Mõido mangai i’a. Lamane khõnia: Mõiga gõi, awõu. Ba mõi ira mitou, ba dundraha, ba lõ ahulu ira, ba zi bongi andrõ. (Luk. 5, 5). 

4 Ba me moluo sa’ae, ba so Yesu, ba mbewe nidanõ. Ba lõ’õ sa la’ila nifahaõ andrõ, wa Yesu da’õ. (F. 20, 14). 

5 Ba imane khõra Yesu: Hadia, so gõda ma’ifu, ya’ami, iraonogu? 

6 Lamane khõnia: Lõ’õ Imane khõra: Ba gambõlõ dundraha milau giri, ba misõndra. Awena lalua, ba tebai sa’ae lasõbi, ba wa’oya gi’a. (Luk. 5, 6). 

7 Ba imane nifahaõ andrõ, ni’omasi’õ Yesu, khõ Wetero: Tuada! Ba me irongo Simoni Fetero, Tua, ba molembe ia, lõ nukhania, ba itibo’õ ia ba nidanõ. (Mat. 14, 28 b. t.). 

8 Ba ba dundraha la’o’õ nifahaõ bõ’õ andrõ; lõ’õ sa arõu danõ, ha mato dua ngaotu hela: lasõbi gi’a no mege, ba giri. 

9 Ba me mõi ira baene, ba la’ila mbo galitõ, tou ba danõ, ba no so bawu gi’a, awõ roti. 

10 Imane khõra Yesu: Mi’ohe gi’a andrõ, sawena mihalõ, õsa. 

11 Ba mõi yaŵa Zimoni Fetero, isõbi baene giri, no afõnu i’a sebua, otu a lima wulu a tõlu rozi. Ba he si manõ wa’oya, ba lõ’õ zui atika giri. (Mat. 13, 47. 41). 

12 Imane khõra Yesu: Mi’aine, milau manga. Ba dozi alaŵõ ndra nifahaõ, wanofu khõnia: Ha niha ndra’ugõ? Me no la’ila, wa So’aya. 

13 So Yesu, ihalõ roti no mege, ibe’e khõra, ba si manõ gõi gi’a andrõ. (Hal. zin. 10, 41).

14 Medõlu sa’ae, mõi da’õ, i’oroma’õ ia Yesu ba nifahaõnia, me no aefa maoso ia, moroi ba ngai zi mate. (F. 20, 19. 26).

15 II. Ba me aefa manga ira, ba imane Yesu khõ Zimoni Fetero: He Simoni, ono Yohane, hadia, abõlõ omasi’õ ndra’o, moroi ba wa’omasi da’e ndra’o? Imane khõnia: E Tua, õ’ila, omasido ndra’ugõ. Imane khõnia; Kubaloi nono mbiribiri khõgu. (F. 13, 37). 

16 Ba ifuli imane khõnia: He Simoni, ono Yohane, hadia, omasi’õ ndra’o? Imane khõnia: E Tua, õ’ila, omasido ndra’ugõ. Ba imane khõnia: Kubaloi mbiribirigu. (Luk. 22, 32). 

17 Ifuli imane khõnia, no medõlu: He Simoni, ono Yohane, hadia, omasi’õ ndra’o? Abu dõdõ Wetero, me ifuli imane khõnia no medõlu: Hadia, omasi’õ ndra’o? ba imane khõnia: E Tua, fefu hadia ia õ’ila, ba no aboto ba dõdõu, omasido ndra’ugõ. Ba imane khõnia: Kubaloi mbiribirigu. (F. 16, 30; 2, 25. Hal. zin. 20, 28).

18 Si ndruhundruhu niŵa’õgu khõu, me ono matua ndra’ugõ, ba no ya’ugõ zamakhai bõbõ talumõ, ba mõi’õ heza zomasi’õ; ba na atua ndra’ugõ, ba õ’oro’õ dangau, ba niha bõ’õ zamakhai bõbõ talumõ, ba i’ohe’õ ba zi lõ omasi’õ. (Fet. I. 5, 1. Hal. zin. 21, 11. Fet. II. 1, 14). 

19 Ba wangombakha he wisa wa’amatenia dania ba wamolakhõmi Lowalangi, iŵa’õ da’õ. Ba me aefa iŵa’õ da’õ, ba imane khõnia: O’õ ndra’o. (F. 13, 36. Fet. I. 4, 16). 

20 Ba me ibali’õ ia furi Fetero, ba i’ila, molo’õ nifahaõ andrõ, ni’omasi’õ Yesu, sidadao gõi ba ngai Yesu, ba wemanga no, sanofu no: He Tua, ha niha zi manga mbõliu? (F. 13, 25). 

21 Ba me i’ila da’õ Fetero, ba imane khõ Yesu: Ba hana da’e, Tua? 

22 Imane khõnia Yesu: Na omasido, lõ tebulõ ia, irege sodo, ba hana wa õhalõ khõu? Ya’ugõ, o’õ ndra’o. (Fam. 1, 7. 9 b. t.). 

23 Da’õ mbõrõta, wa laŵa’õŵa’õ ba dalifusõ andrõ: Lõ mate nifahaõ andrõ. Ba lõ niŵa’õ Yesu khõnia, lõ mate, imane: Na omasido, lõ tebulõ ia, irege sodo. 

24 Da’õ nifahaõ andrõ, samaduhu’õ da’e, sanura gõi da’e, ba no ta’ila, wa no si duhu wamaduhu’õnia. (F. 16, 35. Fam. 1, 2). 

25 Ba oya na sa mbõ’õnia, nilau Yesu, ba na lazarazara wananõ ba zura ena’õ, ba ba dõdõgu, ba lõ itaha uli danõ ma’asagõrõ zura andrõ, nitanõ ya’ia. (F. 20, 30).