SURA YOHANE I
SURA
YOHANE I
YOHANE
I.
Faza
1
I.
Famaduhu’õ Yohane Yesu. II. Lõ
tola lõ tatehe, wa si so horõ ita.
1 I.
Si otarai mbõrõta andrõ, nirongoma, ni’ila hõrõma, si no anehe ndra’aga, ba nibabaya
dangama andrõ, ba daroma li fangorifi andrõ. (Yoh. 1, 1. 14; 20, 27).
2 Ba
no tefa’ele’õ wa’auri andrõ, ba no ma’ila, ba mafaduhu’õ, ba ma’ombakha’õ khõmi wa’auri andrõ, si lõ aetu,
si no so khõ Nama, ba si no mufa’ele’õ khõda. (Yoh. 1, 4; 17, 3. 5).
3 Ni’ilama andrõ,
nirongoma, ma’ombakha’õ khõmi gõi, ena’õ awõma ami gõi, ba
awõ Nama sa ita, ba awõ Nononia, Yesu Keriso. (Yoh. 41, 23).
4 Ba
da’õ
nisurama khõmi, ena’õ a’oi soi wa’omuso dõdõmi. (Yoh. 15, 11. Fet. I. 4, 13).
5 II. Ba da’õ duria andrõ,
nirongoma khõnia, ni’ombakha’õma khõmi, wa no haga Lowalangi, awõ wa lõ
hadia ia wa’ogõmigõmi
ba dõdõnia. (Yoh. 1, 9; 8, 12).
6 Na
taŵa’õ,
awõnia ita, ba na tatõrõ zogõmigõmi, ba no mofaya ita, ba tenga si duhu nilauda.
(F. 2, 9. Yoh. 12, 35 b. t.).
7 Ba
na tatõrõ haga, si mane fe’asonia ba haga, ba no fa’awõ ita, ba ihaogõ ita
do Nononia Yesu, iheta horõda fefu. (Efes. 5, 8. 9. Fam. 1, 5. Heb. 9, 12.
14).
8 Na
taŵa’õ
lõ horõda, ba tafowõhõ ita, ba si duhu lõ’õ ba dõdõda. (Amaed.
20, 9; 28, 13).
9 Na
ta’ombakha’õ horõda, ba lõ farõi
ia, ba no satulõ ia, fa i’efa’õ khõda horõ andrõ, ba fa ihaogõ ita, fa iheta
fefu zi lõ atulõ. (Sin. 32, 3—5. Tit. 2, 14).
10 Na taŵa’õ, lõ nifazõkhida horõ, ba tabali’õ sofaya ia, ba taroma
linia andrõ lõ’õ,
ba dõdõda. (Rom. 3, 4. 10).
YOHANE
I.
Faza
2
I. Yesu zangatulõ’õ niha ba Lowalangi. II. Tandra wa awõ Lowalangi ba awõ Yesu
ita. III. Bõi ta’omasi’õ hadia ia zi so ba guli danõ. IV. Famangelama ba zamaelungu
andrõ.
1 I. He ya’ami iraonogu! Andrõ usura khõmi
da’õ, fa bõi mifazõkhi horõ. Ba na so zamazõkhi
horõ, ba so khõda zi lului manguma’õ khõ Nama, Yesu Keriso, satulõ
tõdõ andrõ. (Rom. 6, 1. 2. Yes. 53, 11. 12).
2 Ba ya’ia hõli ba horõda andrõ, ba
tenga ha ba horõda andrõ, no ba horõ nõsi guli danõ ma’afefu gõi. (F. 4, 10. Kor. II.
5, 18. 19).
3 II. Ba ba da’õ oroma khõda, wa no aboto ba
dõdõda ia, na ta’o’õ goroisania. (F. 3, 6. Yoh.
14, 21. Mat. 7, 21).
4 Na so zanguma’õ: No aboto ba dõdõgu ia, ba na
lõ i’o’õ goroisania, ba sofaya da’õ, ba si duhu lõ’õ ba dõdõ da’õ. (F. 4, 20).
5 Ba na so zolo’õ linia, ba khõnia mo’ahonoa wa’omasi Lowalangi andrõ, si ndruhundruhu.
Ba da’õ aboto ba dõdõda, wa ba khõnia so ita. (F. 5,
3; 4, 12).
6 Na so zanguma’õ, ba khõnia ahono ia, ba mo’õmõ ia, fa si mane amuata da’õ gõi gamuatania. (Yoh. 13,
15).
7 He ya’ami no’omasi’õ, tenga oroisa si bohou usura khõmi,
oroisa si no ara, si no so khõmi, i’otarai mbõrõta; taroma li
andrõ, nirongomi, i’otarai mbõrõta, goroisa si no
ara andrõ. (F. 3, 11. Yoh. II. a. 5.).
8 Oroisa si bohou zui usura
khõmi, si no duhu ba khõnia ba ba khõmi, me si taya zogõmigõmi andrõ, ba me humaga
sa’ae haga andrõ, si ndruhu. (Rom. 13, 12).
9 Na so zanguma’õ, ba haga so ia, ba na fatiu
dõdõnia ba dalifusõnia, ba ba zogõmigõmi so ia, irugi da’e.
10 Sangomasi’õ talifusõnia, ba no ahono ba
haga, ba lõ ba khõnia fangala.
11 Si fatiu tõdõ khõ dalifusõnia,
ba ba zogõmigõmi so ia, sogõmigõmi itõrõ, ba lõ i’ila, heza isaŵa, me no ifobalunõ
hõrõnia sogõmigõmi andrõ. (F. 3, 14. 15. Yoh. 12, 35).
12 III. Ufa’ohe’õ zura khõmi, ya’ami iraono, me no mu’efa’õ khõmi horõmi, bõrõ dõinia. (Luk.
24, 47).
13 Ufa’ohe’õ zura khõmi, ya’ami ira ama, me no aboto ba
dõdõmi zi otarai mbõrõta andrõ. Ufa’ohe’õ zura khõmi, ya’ami ono matua, me no milaŵa
Gafõkha. No ufa’ohe’õ zura khõmi, ya’ami iraono, me no aboto ba
dõdõmi Nama. (Yoh. 1, 7. Efes. 6, 11 b. t.).
14 No ufa’ohe’õ zura khõmi, ya’ami ira ama, me no aboto ba
dõdõmi zi otarai mbõrõta andrõ. No ufa’ohe’õ zura khõmi, ya’ami ono matua, me no sabõlõ
ami, ba me ahono ba dõdõmi daroma li Lowalangi, ba me no milaŵa Gafõkha.
15 Bõi mi’omasi’õ nõsi guli danõ, ba ma hadia
ia, zi so ba guli danõ. Na so zangomasi’õ õsi guli danõ, ba lõ
fangomasi’õ Ama ba dõdõnia. (Rom. 12, 2. Yak. 4, 4).
16 Me tenga moroi khõ Nama,
me moroi ba nõsi guli danõ fefu, hadia ia, zi so ba guli danõ, he fa’omasi nõsi niha, ba he fa’omasi hõrõ, ba he fayaŵasa
andrõ, ba gana’a.
17 Ba si taya nõsi guli
danõ,awõ wa’omasinia andrõ, ba solo’õ somasi Lowalangi, ba lõ tebulõ,
irugi zi lõ aetu. (Kor. I. 7, 31. Fet. I. 1, 24).
18 IV. He ya’ami iraono! Amozua sa’ae, ba si mane nirongomi, so
dania zi fa’udu khõ Keriso, ba no ato iada’e zi tobali si fa’udu khõ Keriso. Moroi ba da’õ aboto ba dõdõda, wa amozua sa’ae. (Fet. I. 4, 7. Tes. II. 2,
3 b. t. Yoh. I. 4, 3. Yoh. II. a. 7).
19 Ba khõda la’otarai, ba tenga awõda ira; na
awõda sa ira mena’õ, ba lõ laheta ira khõda mena’õ, ba ena’õ oroma, wa lõ dozi awõda ira.
(Hal. zin. 20, 30. Kor. I. 11, 19).
20 Ba no so khõmi wamayoini
andrõ, khõ ni’amoni’õ andrõ, ba mi’ila fefu, hadia ia. (Kor. II.
1, 21. 22).
21 Tenga andrõ ufa’ohe’õ zura khõmi, me lõ mi’ila zi duhu, andrõ ufa’ohe’õ khõmi, me no mi’ila, ba me tenga moroi ba zi duhu
fefu, hadia ia, waya.
22 Ha niha zofaya, baero
zangosilõ’õgõ, wa Keriso andrõ Yesu? Da’õ zi fa’udu khõ Keriso, sangosilõ’õgõ Ama, awõ Nono. (F. 2, 18. Yoh.
20, 31. Fet. II. 2, 1).
23 Dozi sangosilõ’õgõ Ono, ba lõ’õ gõi khõra Ama; sanehe Ono, ba
khõnia so gõi Nama. (F. 4, 15. Yoh. 5, 23. Yoh. II. a. 9.).
24 Nirongomi, i’otarai mbõrõta, ba ya’ahono ba dõdõmi. Na ahono ba
dõdõmi nirongomi, i’otarai mbõrõta, ba ahono gõi
ami ba khõ Nono ba ba khõ Nama. (Yoh. 14, 23).
25 Ba da’õ gamabu’ula li andrõ, nifabu’unia khõda: fa’auri si lõ aetu andrõ. (F. 5,
11. Yoh. 10, 28).
26 Da’õ nisuragu khõmi, ba zamaelungu
ya’ami andrõ,
27 ba ya’ami — ba no ahono ba dõdõmi
wamayoini andrõ, nitemami khõnia, ba lõ moguna khõmi, ifahaõ ami niha, mi’iagõ sa’ae ba khõnia, dali wamahaõ wamayoininia
ya’ami andrõ, ba ngawalõ hadia ia, fefu, ba no si
duhu, ba tenga faya; mi’o’õ wamahaõnia ya’ami andrõ. (Yoh. 14, 26; 16,
13).
28 Ba da’õ, ya’ami iraono, mi’iagõ ba khõnia, ena’õ lõ aiwõ ita, na i’oroma’õ ia dania, ba ena’õ lõ te’ailasi ita khõnia, ba wa’asonia. (Yoh. 15, 4. F. 4, 17).
29 Na mi’ila, satulõ ia, ba ya’aboto ba dõdõmi, wa khõnia tumbu
gõi dozi solau satulõ andrõ. (F. 3, 7—10).
YOHANE
I.
Faza
3
I.
Fa’ohahau dõdõ nono Lowalangi ba
tõtõnafõra. II. Tandra wa ono Lowalangi ira: Fa’atulõ dõdõ ba fa’omasira
dalifusõ, III. ba lualua da’õ:
Fa lõ aiwõ ira khõ Lowalangi.
1 I. Mifaigi, ha wa’ebua wa’omasi andrõ, ni’amualagõ Nama khõda, fa ono
Lowalangi dõida, ba fa duhu gõi ononia ita. Da’õ mbõrõ, wa lõ aboto ba dõdõ
niha guli danõ ita, me lõ saboto ba dõdõra ia. (Yoh. 1, 12. Gal. 4, 6. Yoh. 17,
25).
2 He ya’ami ni’omasi’õ! ono Lowalangi ita iada’e, ba lõ’õ na mu’oroma’õ, hadia ita dania. No ta’ila, na no mu’oroma’õ dania, ba fakhilikhili ita khõnia,
me tanehegõ dania ia, he wisa ia. (Rom. 8, 16 b. t. Kol. 3, 4. Fil. 3, 21).
3 Ba dozi sanõtõna da’õ khõnia, ba lahaogõ ira, si
mane ya’ia, si lõ si ra’ira’iõ. (Heb. 12, 14).
4 II. Dozi samazõkhi horõ, ba lasawõ gõi
goroisa, ba fanawõ oroisa horõ andrõ. (F. 5, 17).
5 Ba no mirongo, wa andrõ
tefa’ele’õ ia, ena’õ iheta horõ andrõ, ba lõ horõ
ba dõdõnia. (F. 1, 7. Fet. I. 2, 24).
6 Dozi sahono khõnia, ba lõ
mamazõkhi horõ. Dozi samazõkhi horõ, ba lõ larai la’ila ia, ba lõ saboto ba dõdõra
ia. (F. 2, 3 b. t.).
7 He ya’ami iraono! bõi yamufaelungu
ami niha. Solau satulõ, da’õ zatulõ, si mane ya’ia andrõ, si no atulõ. (F. 2,
26, 29. Efes. 5, 6).
8 Moroi ba Gafõkha zamazõkhi
horõ; moroi ba mbõrõta sa ifazõkhi horõ Afõkha. Ba da’õ tefa’ele’õ Nono Lowalangi, ena’õ ifakiko halõŵõ Gafõkha. (Yoh.
8, 44. Heb. 2, 14).
9 Dozi si tumbu ba
Lowalangi, ba lõ mamazõkhi horõ, me lõ tebulõ danõmõnia ba dõdõra, ba tebai
mamazõkhi horõ ira, me no moroi ba Lowalangi ira. (F. 5, 1. 18. Fet. I. 1, 23).
10 Ba da’õ oroma, ha niha nono
Lowalangi, ba ha niha nono Gafõkha. Dozi si lõ molau satulõ, ba tenga moroi ba
Lowalangi ira, awõ zi lõ mangomasi’õ talifusõnia. (F. 2, 29; 4,
8). 11 Da’õ sa duria, nirongomi, i’otarai mbõrõta, fa faoma ta’omasi’õ nawõda. (F. 2, 7. 8. Yoh. 13,
34).
12 Bõi si mane Ka’ino andrõ, soroi ba Gafõkha samunu
akhinia; ba hana wa ibunu? Me no si lõ sõkhi mbuabuania, ba me satulõ sa mbuabua
nakhinia. (Moz. I. 4, 8).
13 Ba bõi ahõlihõli dõdõmi, ya’ami ira talifusõ, na fatiu dõdõ
niha guli danõ khõmi. (Yoh. 15, 18 b. t.).
14 No ta’ila, no awu’a ita ba wa’amafe, no tasaŵa wa’auri, me ta’omasi’õ dalifusõ; si lõ mangomasi’õ, ba lõ tebulõ ba wa’amate. (F. 2, 10. 11).
15 Samunu niha dozi si fatiu
tõdõ ba dalifusõra; ba mi’ila, lõ samunu niha, si so fa’auri si lõ aetu, si lõ tebulõ
ba dõdõnia. (Mat. 5, 21. 22. Gal. 5, 21).
16 Ba da’õ no aboto ba dõdõda wa’omasi andrõ, me no ibelegõ
nosonia fõnada, ba mo’õmõ gõi ita, tabelegõ nosoda
fõna dalifusõda. (Yoh. 15, 13).
17 Ba na so zi so ana’a guli danõ, ba na i’ila, ambõ khõ dalifusõnia, ba
na iduhõ dõdõnia khõnia, ba hezo wa’omasinia Lowalangi andrõ, ba
dõdõnia? (Moz. V. 15, 7. b. t. Yak. 2, 15. 16).
18 He ya’ami iraono! bõi ba li ta’omasi’õ nawõda, ba bõi ba lela, ba
nilauda khõnia ta’omasi’õ ia, ba si ndruhundruhu. (Rom.
12, 9. 13).
19 III. Ba ba da’õ aboto dania ba dõdõda, wa
moroi ba zi duhu ta’otarai, ba faduhu dõdõda
fõnania tabe’e, (Yoh. 18, 37),
20 wa no ebua Lowalangi,
moroi ba dõdõda, awõ wa no aboto ba dõdõnia fefu, hadia ia; na i’adugõ ita tõdõda. (Yes. 55,
7—9).
21 He ya’ami ni’omasi’õ! na lõ i’adugõ ita tõdõda, ba so khõda
wa lõ aiwõ, khõ Lowalangi. (Heb. 4, 16), 22 ba hadia ia ni’andrõda ba tatema khõnia, me ta’o’õ goroisania, ba me talau
zomasi ia. (F. 5, 14. 15. Mar. 11, 24. Yoh. 15, 7).
23 Ba da’õ goroisania, ena’õ mamati ita ba dõi Nononia, Yesu
Keriso, ba ena’õ faoma ta’omasi’õ nawõda, si mane ni’oroi’õnia khõda. (Yoh. 6, 29; 15,
12. Efes. 5, 2).
24 Ba na so zolo’õ oroisania, ba ba khõnia ahono
da’õ, ba ya’ia gõi, ba lõ tebulõ ba zi
manõ. Ba ba da’õ aboto ba dõdõda, wa lõ tebulõ
ia ba khõda, ba Geheha andrõ, nibe’enia khõda. (F. 4, 13. Yoh. 14,
23. Rom. 8, 9).
YOHANE
I.
Faza
4
I.
Famangelama, ba zamaelungu andrõ. II. famarou tõdõ, ba wangomasi’õ talifusõ bõrõ wa’omasi Lowalangi ita.
1 I. He ya’ami ni’omasi’õ! bõi dozi eheha faduhu
dõdõmi, mitandraigõ sa geheha andrõ, na moroi ba Lowalangi ira. No ato zama’ele’õ sofaya, si mõi ba niha ba guli
danõ. (Tes. I. 5, 19—22. Yoh. 2, 18. Fet. II. 2, 1).
2 Ba da’õ aboto ba dõdõmi Geheha
Lowalangi: Dozi eheha, sanehe Yesu Keriso, si no tobali õsi niha, ba moroi ba
Lowalangi da’õ; (Yoh. 1, 1—14);
3 ba dozi eheha, si lõ
manehe Yesu, ba tenga moroi ba Lowalangi, ba da’õ gamuata zi fa’udu khõ Keriso andrõ,
nirongomi, so ia, ba no so ia sa’ae ba guli danõ. (F. 2, 18. 22.
Tes. II. 2, 7).
4 Moroi ba Lowalangi ami, ya’ami iraono, ba no milaŵa da’õ, me no ebua zi so ba dõdõmi,
moroi ba zi so ba niha ba guli danõ andrõ. (F. 5, 4. Luk. 11, 22).
5 Moroi ba guli danõ ira,
andrõ moroi ba guli danõ huhuora, ba niha guli danõ zamondrongo khõra. (Yoh.
15, 19).
6 Moroi ba Lowalangi ita.
Si no aboto Lowalangi ba dõdõ, da’õ zamondrongo khõda; lõ
ifondrondrongo khõda si tenga moroi ba Lowalangi. Moroi ba da’õ aboto ba dõdõda Geheha si duhu
ba eheha samaelungu. (Yoh. 8, 47; 17, 14).
7 II. He ya’ami ni’omasi’õ! data’omasi’o nawõda, me no moroi ba
Lowalangi wa’omasi andrõ, ba me no si tumbu ba Lowalangi
dozi sangomasi’õ awõra, ba me no aboto ba
dõdõra Lowalangi. (F. 3, 11).
8 Si lõ mangomasi’õ awõnia, ba lõ saboto ba
dõdõnia Lowalangi, me no fa’omasi Lowalangi.
9 Ba da’õ no oroma wa’omasi Lowalangi andrõ, ba khõda,
me no ifatenge ba guli danõ Nononia Lowalangi, ononia si ha sambua andrõ, ena’õ auri ita balazi ia. (Yoh. 3,
16).
10 Ba da’õ so wa’omasi andrõ, tenga wa no ta’omasi’õ Lowalangi, no wa no i’omasi’õ ita, awõ wa no ifatenge
Nononia, hõli, ba horõda. (Rom. 5, 8. Kor. II. 5, 19. 20).
11 He ya’ami ni’omasi’õ! na no imanõ wangomasi’õ ya’ita Lowalangi, ba mo’õmõ gõi ita fangomasi’õ awõda.
12 Samõsa lõ niha si no irai
mangila Lowalangi; na ta’omasi’õ nawõda, ba lõ tebulõ ia ba
dõdõda, ba mo’ahonoa ba dõdõda wangomasi’õda ya’ia. (Yoh. 1, 18).
13 Ba da’õ aboto ba dõdõda, wa lõ tebulõ
ita ba khõnia, awõ wa lõ tebulõ ia ba dõdõda, me no ibe’e khõda Gehehania andrõ, õsa.
(F. 3, 24).
14 Ba no anehe ndra’aga ba mafaduhu’õ, wa no ifatenge Ama Nononia,
sangorifi õsi guli danõ. (Mat. 3, 17. Yoh. 3, 17).
15 Na so zanehe, Ono
Lowalangi Yesu, ba ba dõdõnia lõ tebulõ Lowalangi, ba ya’ia, ba lõ tebulõ ba khõ
Lowalangi. (Yoh. 6, 69; A. 2).
16 Ba no aboto ba dõdõda wa’omasi Lowalangi ita, ba no faduhu
dõdõda ba da’õ. Lowalangi, ba no fa’omasi, ba lõ tebulõ ba khõ
Lowalangi zi lõ tebulõ ba wa’omasi andrõ, ba lõ tebulõ
Lowalangi ba dõdõnia. (F. 4, 8. 12).
17 Ba da’õ mo’ahonoa wa’omasi andrõ khõda, fa lõ ata’u ita, na luo wanguhuku andrõ,
me no si mane ya’ia gõi ita, ba guli danõ andre.
(F. 2, 28. 6).
18 Lõ fa’ata’u ba wa’omasi andrõ, ifofanõ sa wa’ata’u fa’omasi si no mo’ahonoa, me no fa’afõkhõ wa’ata’u; ba sata’u ba lõ mo’ahonoa na ba wa’omasi. (Rom. 8, 15).
19 Ta’omasi’õ ia, me no ofõna i’omasi’õ ita.
0 Na so zanguma’õ: Omasido Lowalangi, ba na
fatiu dõdõnia ba dalifusõnia, ba sofaya ia; Si lõ mangomasi’õ talifusõnia sa, ni’ila hõrõnia, ba tebai omasi ia
Lowalangi, si lõ i’ila hõrõnia. (F. 3, 17; 2, 4).
21 Ba da’õ goroisa, nibe’enia khõda, ena’õ i’omasi’õ gõi dalifusõnia sangomasi’õ Lowalangi. (F. 3, 23. Yoh.
13, 34).
YOHANE
I.
Faza
5
Famati dandra, wa ono
Lowalangi niha, ba ya’ia
gõi wangabõlõra.
1 Dozi samati, wa no
Keriso andrõ Yesu, ba moroi ba Lowalangi tumbu ira, ba dozi somasi so’ono ya’ia, ba la’omasi’õ gõi zi no tumbu khõnia andrõ.
(F. 4, 2. 15. Yoh. 1, 12. 13).
2 Ba da’õ aboto ba dõdõda, wa ta’omasi’õ nono Lowalangi, na omasi ita
Lowalangi, ba na ta’o’õ goroisania.
3 Da’õ sa wa’omasida Lowalangi, ena’õ ta’o’õ goroisania, ba tenga safõkhõ
wolo’õ oroisania. (Yoh. II. a. 6. Yoh. 14, 15. Mat.
11, 30).
4 Fefu sa, zi tumbu ba
Lowalangi, ba abõlõ moroi ba zoroi uli danõ, ba da’õ wa’abõlõ, sabõlõ moroi ba zoroi uli
danõ andrõ, famatida andrõ. (F. 2, 15 b. t. Kor. I. 15, 57).
5 Ha niha zabõlõ moroi ba
zoroi uli danõ, baero zamati, wa Ono Lowalangi Yesu? (Rom. 8, 37).
6 Da’õ ia, zi no mõi, balazi nidanõ,
ba balazi ndro, Yesu Keriso; tenga ha idanõ khõnia, no idanõ awõ ndro; ba Eheha
andrõ zamaduhu’õ; me no si duhu Geheha andrõ.
(Yoh. 19, 34. 35; 15, 26).
7 Tõlu sa zamaduhu’õ, (Mat. 28, 19. Yoh. 1, 1; 16,
13—15).
8 Eheha andrõ, ba idanõ
andrõ, ba do andrõ, ba ha sara zi tõlu andrõ. (Heb. 10, 15. Hal. zin. 10, 47. Yoh.
3, 5. Mat. 26, 28).
9 Na faduhu dõdõda ba wamaduhu’õ niha, ba no ebua na wamaduhu’õ Lowalangi; da’õ sa wamaduhu’õ Lowalangi andrõ, famaduhu’õnia Ononia. (Yoh. 8, 17. 18;
5, 37).
10 Khõ zamati khõ Nono
Lowalangi so wamaduhu’õ andrõ, ba dõdõnia. Si lõ
mamati li Lowalangi, ba no ibali’õ sofaya Lowalangi, me lõ
nifatinia famaduhu’õ andrõ, famaduhu’õ Lowalangi Ononia. (Rom. 8,
16. Yoh. 3, 33).
11 Ba da’õ wamaduhu’õ andrõ: wa no ibe’e khõda Lowalangi wa’auri si lõ aetu, awõ wa ba khõ
Nononia so wa’auri andrõ. (Yoh. 1, 4).
12 Khõ zi so Ono andrõ, khõnia
so wa’auri andrõ; ba zi lõ Ono Lowalangi andrõ, ba khõnia
lõ fa’auri andrõ. (Yoh. 3, 36; 5, 24).
13 Da’õ nisuragu khõmi, ena’õ aboto ba dõdõmi, so khõmi wa’auri si lõ aetu, khõmi samati
ba dõi Nono Lowalangi andrõ. (Yoh. 20, 31).
14 Ba da’õ wa lõ aiwõ, si so khõda ba khõnia:
na so ni’andrõda, hadia ia, si faudu ba zomasi ia, ba
ifondrondrongo khõda. (F. 3, 21. 22. Yoh. 14, 13. 14).
15 Ba na no aboto ba dõdõda
ifondrondrongo khõda, na so ni’andrõda, ba aboto gõi ba
dõdõda, wa tatema ni’andrõda khõnia.
16 Na so zangila, mamazõkhi
horõ dalifusõnia, horõ si tenga bõrõ wa’amate, ba yamangandrõ, ba ifa’aso khõnia wa’auri, khõ zamazõkhi horõ si
tenga bõrõ wa’amate. So horõ bõrõ wa’amate, ba tenga da’õ niŵa’õgu yamangandrõ. (Mat. 12, 31.
32. Heb. 6, 4 b. t.).
17 Horõ fefu, hadia ia, zi
lõ atulõ, ba so horõ si tenga bõrõ wa’amate. (F. 3, 4).
18 No ta’ila, dozi si tumbu ba
Lowalangi, ba lõ lafazõkhi horõ; dozi sa, si tumbu ba Lowalangi, ba lõ aefa khõnia,
ba lõ ibabaya Afõkha. (F. 3, 9. Yoh. 17, 15).
19 No aboto ba dõdõda, wa
moroi ba Lowalangi ita, ba ba danga Gafõkha so nõsi guli danõ, ma’afefu. (F. 4, 4. 5. Gal. 1, 4).
20 Ba no tarongo, wa no mõi
Nono Lowalangi, si no mame’e khõda tõdõ, ena’õ aboto ba dõdõda zi ndruhu
andrõ; ba ba khõ zi ndruhu andrõ so ita, ba khõ Nononia Yesu Keriso. Da’õ Lowalangi si ndruhu ba fa’auri si lõ aetu. (Yoh. 17, 3;
14, 6; 20, 28. Fam. 3, 7. Rom. 9, 5. Tim. I. 3, 16. Yoh. I. 1, 1. 2).
21 He ya’ami iraono! Mi’angelama ba nadu andrõ. (Kor.
I. 10, 14).
Posting Komentar