SURA YAKOBO

Table of Contents

 

SURA YAKOBO

 

YAKOBO

FAZA 1

 

I.                  Fangowai. II. Famarou tõdõ, ba wanaha tõdõ, na so wamakao. III. Bõrõ wanandraigõ. IV. Hadia zi sõkhi folo’õ.

 

1 I. Yakobo zanura da’e, enoni Lowalangi andrõ ba enoni Yesu Keriso, ba zi felendrua tua andrõ, sizaewe misa; ya’ahowu! (Gal. 1. 19. Yud. 1. Fet. I. 1, 1).

2 II. Mibe’e fa’omuso dõdõ manõ, ya’ami ira talifusõgu, na oya itõrõ ami fanandraigõ, hadia ia ngawalõ; (Fet. I. 4, 13. Mat. 5, 11. 12. A. 12); 

3 me no aboto ba dõdõmi, na no mutandraigõ wamatimi, ba fanaha tõdõ lualua. (Rom. 5, 3. 4). 

4 Ba famo’ahonoa dania wanaha tõdõ andrõ, ena’õ mo’ahonoa ami, si lõ sala, ba bõi ambõ hadia ia. (Heb. 10, 36). 

5 Ba na so ba khõmi zambõ fa’atuatua, ba yamu’andrõ khõ Lowalangi, same’e manõ, fefu gofu ha niha zangandrõ, lõ ihedehede’õ; ba tebe’e khõnia. (F. 3, 17. Mat. 7, 7). 

6 Ba yafaduhu dõdõnia, ba wangandrõ, bõi mangiwa; sangiwa tõdõ sa, ba no hulõ ndrulu nasi, nifadauludaulu nangi, nifangõrõngõrõ misa. (F. 5, 15. 16. Mat. 7, 7). 

7 Bõi sa yamuŵa’õ tõdõnia niha si manõ, so dania hadia ia zinemania khõ Zo’aya; niha si dua tõdõ, 

8 samangõrõngõrõ manõ nilaunia, fefu. 

9 Ba talifusõ, side’ide, ba yamusuno ia, ba wa’asalaŵania; (Luk. 1, 47. 52); 

10 ba so’ana’a, ba yamusuno ia ba wa’ide’idenia, me no lala mbowo ndru’u dania lalania. (Kor. II. 12, 9. Fet. I. 1, 24). 

11 Tumbu luo, so wa’aukhu zino, ba aleu ndru’u andrõ, ba bowonia, ba atoru, ba taya wa’asõkhinia; si manõ gõi dania wa’aleu zo’ana’a, ba lalania andrõ. (Sin. 90, 5. 6).

12 Ya’ahowu niha, sanaõgõ fanandraigõ andrõ, na no faduhu dõdõ dania khõnia, ba itema dakula fa’auri andrõ, nifabu’u Zo’aya ba zangomasi’õ ya’ia. (A. 2. F. 5, 11. Yob. 5, 17 b. t. Tim. II. 4, 8. Fam. 2, 10).

13 III. Bõi yamuŵa’õ niha, na tetandraigõ ia: Moroi khõ Lowalangi, wa tetandraigõ ndra’odo: Lowalangi, ba tebai tetandraigõ ba zi lõ sõkhi, ba ya’ia, ba lõ itandraigõ niha. 

14 Ba dozi nitandraigõ, ba ba wangisõ dõdõra tezõbizõbi ira ba tedõnisi. 

15 Awena dania, na no abeto wangisõ andrõ, ba i’adonogõ horõ, ba horõ andrõ, na no mufalua, ba i’adonogõ wa’amate. (Moz. I. 3, 6. Rom. 6, 23). 

16 Bõi elungu ami, ya’ami ira talifusõgu, somasi ndra’o. 

17 Ha sambalõ ame’ela si sõkhi, ba ha sambalõ buala so’ahonoa zi otarai moroi si yaŵa, moroi khõ Nama zihaga andrõ, mitou, ba zi lõ fa’atobali, ba he fa’atelumõlumõ. (Yoh. 3, 27. Sin. 139, 12. Rom. 11, 29). 

18 Nilau dõdõnia, wa no i’adonogõ ita, moroi ba daroma li si duhu andrõ, ena’õ bõrõta nifazõkhinia ita. (Fet. I. 1, 23). 

19 Ya’aboto ba dõdõmi, ya’ami ira talifusõgu, somasi ndra’o: dozi niha, ba ndramu’alio’õ wamondrongo, bõi ndramufahulõ wehede, ba bõi alio wofõnu. (Sangomb. 5, 1. Amaed. 17, 27). 

20 Fõnu niha andrõ sa, ba lõ ilau zatulõ, wamaigi Lowalangi. (Amaed. 29, 22. Efes. 4, 26).

21 Andrõ mibõhõli fefu, hadia ia, zi ra’ira’iõ andrõ, awõ fefu walõsõkhi andrõ, si no fahõna, ba mibologõ dõdõmi wamonaha taroma li andrõ, nitanõ ba dõdõmi fangorifi nosomi. (Kol. 3, 8. Kor. I. 15, 1. 2).

22 IV. Ba mi’o’õ daroma li andrõ, ba bõi ha famondrongo manõ, wolimo ya’ami. (F. 2, 14. Mat. 7, 21. Luk. 11, 28). 

23 Na so zamondrongo taroma li andrõ, ba na lõ i’o’õ, ba no hulõ niha samaigi bawania ba zõrõmi; 

24 na no ifaigi ia, ba mofanõ sa’ae ia, ba i’anema’õ olifu, he wisa khalakhalania. 

25 Ba si no monehegõ oroisa fangefa andrõ, si no mo’ahonoa, ba si lõ tebulõ ba da’õ, si tenga ha samondrongo, solifu; na solo’õ gõi ia: da’õ zodõŵadõŵa tõdõ dania, ba wolaunia andrõ. (F. 2, 12. Rom. 8, 2. Yoh. 13, 17). 

26 Na so zanguma’õ tõdõnia, samosumange Lowalangi ia, ba na lõ itaha lelania, na ilimo dõdõnia, ba no faya wamosumangenia Lowalangi. (F. 3, 2 b. t. Fet. I. 3, 10). 

27 Da’õ zi sõkhi wamosumange Lowalangi, si lõ si fabaya hadia ia, wamaigi Lowalangi Ama: na mõi ita mutolo zi lõ ama, si lõ ina, awõ zi no mate donga ba wa’abu dõdõra, ba na tafaigi, fa bõi gõna ita si ra ira’iõ andrõ, ba niha guli danõ. (Yes. 1, 17. Mat. 25, 36).

 

YAKOBO

FAZA 2

 

I.                  Famangelama fa bõi ebua dõdõ zambuana ba II. bõi zi lõ buabua si sõkhi ba wamati.

 

1 I. Ya’ami ira talifusõgu, bõi mi’ebua’õ dõdõmi zambuana, ba wamati andrõ, khõ Zo’aya lakhõmi andrõ khõda, Yesu Keriso. 

2 Na so ena’õ zi mõi ba gowuloami niha solaeduru balaki, sobaru baru luo, ba na so gõi zi mõi, si numana, sobaru si lõ sõkhisõkhi; 

3 ba mifaigi ena’õ zobaru baru luo andrõ, ba mimane ena’õ: Dadao ba da’e, ya’ugõ faigi zi sõkhi nahau; ba na mimane ba zi numana andrõ: Ya’ugõ, ba ba da’õ iagõ, zizio, ba ma tou dadao, tou mbakubaku gahegu andre! 

4 ba tenga no mifonaha wanufa dõdõmi, ba tenga no sanguhuku, si so era’era si lõ sõkhi, ami? 

5 Mifondrondrongo, ya’ami ira talifusõgu, somasi ndra’o! Tenga no itutuyu Lowalangi zi numana ba guli danõ andre, ena’õ fahõna khõra wamati andrõ, ba ena’õ sanema ondrõita ira, banua andrõ, nifabu’unia ba zangomasi’õ ya’ia andrõ? Ba ya’ami, ba no mi’ositengagõ zi numana andrõ (Kor. I. 1, 26). 

6 Hadia, tenga so’ana’a andrõ zamalangõgõ ya’ami, ba tenga ya’ira zanõbi ya’ami ba rafe? 7 Tenga ya’ira zango’aya tõi si sõkhi andrõ, si no mube’e bõrõ dõimi andrõ? (Fet. I. 4, 14). 

8 Ba na mi’o’õ goroisa razo andrõ, si so ba zura: ”Omasi’õ zahatõ khõu, si mane fa’omasiu ndra’ugõ,” ba no si sõkhi milau. (Moz. III. 19, 18. Gal. 5, 14. Mat. 22, 36 b. t.). 

9 Ba na mi’ebua’õ dõdõmi zambuana, ba mamazõkhi horõ ami, ba ifaduhu’õ khõmi oroisa, wa no sanawõ ami. (Moz. III. 19, 15). 

10 Na so sa ena’õ zolo’õ oroisa, ma’afefu, ba na isawõ zambalõ, ba no mo’õmõ ia ba goroisa ma’afefu. (Moz. V. 27, 26. Mat. 5, 19). 

11 Sanguma’õ: ”Bõi ohorõ!” da’õ gõi zanguma’õ: ”Bõi ange’e.” Ba he lõ mohorõ’õ, ba na mange’e’õ, ba no tobali sanawõ oroisa ndra’ugõ. (Moz. II. 20, 13. 14). 

12 Mimanõ wehede, ba mimanõ wolau, si mane niha nihuku ba goroisa fangefa andrõ dania. (F. 1, 25).

13 Lõ’õ sa fa’ahakhõ dõdõ ba wanguhuku si lõ mangahakhõsi tõdõnia; ba i’ositengagõ wanguhuku fa’ahakhõ dõdõ andrõ. (Mat. 25, 34 b. t. 41 b. t. Mat. 5, 7).

14 II. Hadia guna, ya’ami ira talifusõgu, na so zanguma’õ, so khõnia wamati, ba na lõ buabua? Hadia, i’ila, i’orifi ia famati andrõ? (F. 1, 22. Mat. 7, 21. Rom. 3, 31. Tit. 3, 8). 

15 Ba na so dalifusõ matua, ba ma talifusõ alawe, si lõ nukha ba sambõ balazo, ndrege zi ma’ṍkhõ; 

16 ba na so ba khõmi zanguma’õ khõra: Mi’ae’e, ya’ohahau dõdõmi, mi’oleu, ba mi’abusoi’õ ami! ba na lõ mibe’e zoguna fangehao mbotora, ba hadia guna? (Luk. 3, 11). 

17 Si manõ gõi wamati andrõ, na lõ buabua; no amaedola zi lõ noso. (F. 2, 26. Gal. 5, 6. Kor. I. 13, 2). 

18 Ba ma so zanguma’õ: Khõu wamati, ba khõgu mbuabua. Oroma’õ khõgu wamatimõ andrõ, si lõ buabua, ba ba mbuabuagu u’oroma’õ khõu wamati andrõ. (Mat. 7, 20). 

19 Hadia, no faduhu dõdõu, wa ha sambua Lowalangi? Si sõkhi da’õ: faduhu gõi dõdõ mbekhu ba da’õ, ba humokha mbura. (Mar. 1, 24. Hal. zin. 19, 15). 

20 Ba hadia, omasi’õ õ’ila, ya’ugõ niha si lõ tõdõ, wa lõ guna wamati si lõ buabua? 

21 Tuada Aberahamo andrõ, hadia, tenga moroi ba mbuabua isõndra wangatulõ, me ibe’e sumange nononia Iza’aki andrõ? (Moz. I. 22, 9—12; Heb. 11, 17). 

22 Õ’ila ba da’õ, itolo ba mbuabua andrõ famati, ba moroi ba mbuabua andrõ tefo’ahonoa wamati, (Rom. 4, 3. Fet. II. 1, 5—10),

23 ba itõrõ zi so ba zura andrõ, imane: ”Ba mamati Gaberahamo khõ Lowalangi, ba tebe’e fa’atulõ dõdõnia da’õ, ba si fahuwu khõ Lowalangi dõinia”. (Moz. I. 15, 6. Nga’õt. II. 20, 7. Yes. 41, 8). 

24 Mi’ila ba da’õ, ba mbuabua isõndra wangatulõ niha, ba tenga ha ba wamati. 

25 Si manõ gõi Rakhaba andrõ, sohorõ andrõ, hadia, tenga ba mbuabua isõndra wangatulõ, me ifa’amõi yomo khõnia zinenge andrõ, ba me ifatõrõ ba lala bõ’õ, wamofanõ? (Yos. 2, 1 b. t. Heb. 11, 31). 

26 Hulõ si mane boto sa, si lõ fa’auri, na lõ noso, si manõ gõi wamati andrõ, lõ fa’auri, na lõ buabua.

 

YAKOBO

FAZA 3

 

I.                  Bõi ato zamahaõ; bõi oya mbewe. II. Fa’atuatua si ndruhu.

 

1 I. Bõi ato ami zamahaõ, ya’ami ira talifusõgu; noa sa mi’ila tedou dania wa’abe’e huku, nifatõrõ khõda. (Mat. 23, 8. Hes. 33, 7. 8). 

2 Asese sa sala ita, dozi ita. Na so zi lõ sala ba li, ba no niha si no mo’ahonoa ia, sangila mamatõro botonia ma’asambua. (Sin. 19, 13).

3 Na tabe’e ba mbawa kudo zi’õli andrõ, fa la’o’õ khõda, ba tafatõrõ mbotora, ma’asambua. (Sin. 32, 9). 

4 Hiza gõi, nowo andrõ, ha wa’ebua ia, ba he ŵa’ae angi sabe’e wamofanõ, ba tebali’õ zui amuri side’ide sibai andrõ, heza nilau dõdõ zamatõrõ ya’ia. 

5 Si manõ gõi lela andrõ, ndrotondroto side’ide ia, ba no ebua hokha. Hiza wa’ide’ide galitõ, ba ha wa’ebua gatua itunu. (F. 1, 26). 

6 Alitõ lela andrõ, fa’ebua nõsi guli danõ ma’afefu wa’ebua zi lõ atulõ andrõ, khõnia, no fõna ndrotondroto bõ’õ lela andrõ, lõ sõkhi mbotoda ma’asambua ibe’e, ifohola roda wa’auri andrõ, ba nifohola narako ia. (Amaed. 16, 27; Mat. 15, 11. 18). 

7 Telaŵa sa fefu ngawalõ gutu ndru’u, ba fofo, ba ulõ, ba saliŵaliŵa ba nasi andrõ; noa sa ilaŵa niha, 

 

8 ba lela andrõ; noa sa ilaŵa niha, ba lela andrõ, ba lõ sangila molaŵa ya’ia niha; si lõ sõkhi andrõ, si lõ ahonohono, si no fahõna langu famunu. (Sin. 140, 4). 

9 Fanuno Zo’aya, Ama, ia khõda, ba fangelifi niha, nibe’e famaedo Lowalangi. (Moz. I. 9, 6). 

10 Ha sambua mbawa, ba faoma i’otarai ia, he fanuno, ba he fangilifi. Bõi si manõ, ya’ami ira talifusõgu! 

11 Hadia, ha sambua gumbu, ba faoma alua khõnia, he sami, ba he ladu? 12 He wisa, ya’ami ira talifusõgu, i’owua mbua falo tõla marafala, ba i’owua marafala tõla nagu? Ba tebai alua nidanõ sami ba ladu. (Mat. 7, 16).

13 II. Ha niha ba khõmi zatuatua ba sotõdõ? Yamu’oroma’õ ba wa’atulõ wolo’õnia mbuabuania ba wa’ebolo dõdõ, ba wa’atuatua andrõ. (Amaed. 15, 2; 16, 21. Efes. 5, 15). 

14 Ba na so ba dõdõmi wa’afõkhõ ba fasosota, ba bõi misuno ami, ba bõi milau waya, wamini’õ si duhu. (Efes. 4, 31). 

15 Tenga fa’atuatua si otorai moroi si yaŵa da’õ, moroi ba guli danõ da’õ moroi ba dõdõ manõ, moroi ba mbekhu. (Kor. I. 2, 6 b. t. ; 3, 19). 

16 Ba zi so fa’afõkhõ dõdõ sa, ba fasosota, ba da’õ so gõi wamakuyu, awõ ngawalõ wolau si lõ sõkhi, fefu. (Gal. 5, 15. Kor. I. 3, 3). 

17 Ba fa’atuatua andrõ, si otarai moroi si yaŵa, ba si ofõna khõnia, ba no ohauhau, ba fanete da’õ, ba lõ fasosota, ebolo dõdõ, i’o’õ li, no fahõna khõnia wa’ahakhõ dõdõ ba buabua i sõkhi, lõ i’ebua’õ dõdõ zambuana, lõ mamini tõdõ. (Tim. I. 1, 5. Amaed. 12, 1).

18 Ba si lõ fasosota zamazaewe bua wa’atulõ dõdõ andrõ, ba wa’atulõ. (Yes. 32, 17. Fil. 1, 11).

 

YAKOBO

FAZA 4

 

I.                  Itegu ira Yakobo, ba wasosota andrõ, ba II. ba wanandraŵaisira aŵora, ba III. ba wayaŵasa.

 

1 I. He moroi wa lõ atulõ ba khõmi, ba he moroi waguaguasa andrõ? Tenga moroi ba wasõndrata wangisõmi andrõ, ba nõsimi? (Rom. 7, 23). 

2 Mangisõ ami, ba lõ manema ami; mange’e ami ba afõkho dõdõmi, ba tebai mikhamõ; fasõndra ami ba manuwõ ba lõ khomi, me lõ mangandrõ ami. 

3 Mangandrõ ami, ba lõ mitema, me si lõ sõkhi wangandrõmi andrõ; ena’õ m’a ia, ba wangisõmi andrõ. (Sin. 66, 18). 

4 Ya’ami sohorõ, ira matua ba ira alawe, hadia lõ mi’ila wa no si fa’udu ba Lowalangi wahuwusa ba niha guli danõ? Tobali na so zomasi fahuwõe ba niha guli danõ, ba ibali’õ si fa’udu khõ Lowalangi ia. (Mat. 6, 24. Yoh. I. 2, 15. Rom. 8, 7). 

5 Ma miwai fayafaya niŵa’õ ba zura andrõ? Solohu Geheha andrõ, nifonahania ba dõdõda; (Yes. 42, 8); 

6 ba ebua sa atṍ na wa’ebua dõdõ andrõ, ni’a’asogõnia; andrõ imane: ”Itimba Lowalangi zi fayaŵa andrõ, ba i’ebua’õ dõdõnia ba zangide’ide’õ ya’ira”. (Amaed. 29, 23. Luk 1, 52). 

7 Ba mi’ae barõ mbawa Lowalangi. Mitimba Gafõkha, ba moloi ia, irõi ami. (Fet. I. 5, 6. 8. 9.). 

8 Mi’ondrasi Lowalangi, ba i’ondrasi ami! Mihaogõ danga, ya’ami si so horõ! ba mi’ohauhau’õ dõdõ ya’ami si dua tõdõ! (Nga’õt. II. 15, 2. Yes. 1, 16). 

9 Ya’afõkhõ khõmi wamakaomi, ba mi’abusi tõdõ ba mi’ege’ege! Yatobali fa’abu dõdõ wa’ikimi andrõ, ba yatobali fa’aila wa’omuso dõdõmi andrõ! (F. 5, 1. Mat. 5, 4).

10 Mi’ide’ide’õ ami fõna Zo’aya, ba ibali’õ salaŵa ami. (Mat. 18, 4; 23, 12).

11 II. Bõi mitandraŵaisi nawõmi, ya’ami ira talifusõ! Na so zanandraŵaisi talifusõnia, ba ma sanguhuku talifusõnia, ba itandraŵaisi goroisa, ba ihuku goroisa. Ba na õhuku goroisa, ba tenga solo’õ oroisa ndra’ugõ, no sanguhuku ya’ia ndra’ugõ. (Sin. 15, 1—3. Mat. 7, 1. Yak. 1, 25).

12 Ha samõsa zame’e oroisa, ba sanguhuku, sangila mangorifi ba sangila mamakiko. Ba ya’ugõ, ha niha ndra’ugõ, sanguhuku awõnia? (Mat. 10, 28. Rom. 14, 4).

13 III. Ba mifondrondrongo, ya’ami sanguma’õ: Ma’õkhṍ, ba ma mahemolu mofanõga, masaŵa mbanua heza, ba dõfi dania ndra’aga ba da’õ, maniaga ba mangalui hare; (Luk. 12, 18 b. t.); 

14 si lo mangila he wisa mahemolu. Hadia sa nosomi andrõ? Zauzau ami, si lõ ararā oroma, ba taya sa’ae. (Amaed. 27, 1. Sin. 144, 4). 

15 Ba mimane ena’õ: Na omasi Lowalangi ba na so noso, ba malau da’õ, ba ma da’õ. (Hal. zin. 18, 21). 

16 Ba iya’e, ba misuno ami, ba wayaŵasami andrõ. Fefu wayaŵasa si manõ, ba no si lõ sõkhi. (Kor. I. 1, 31). 

17 Ba na so zangila molau si sõkhi, ba na lõ ilau, ba horõ da’õ khõnia. (Luk. 12, 47).

 

YAKOBO

FAZA 5

 

I.                  So dania wotu zo’ana’a si lõ atulõ andrõ. II. Famarou tõdõ, ba wanganau õlõ, ba wombase. III. Bõi mõi ba hõlu. IV. He lawisa, na omuso dõdõ ba na abu dõdõ, ba he lawisa ba zofõkhõ ba ba zi no elungu.

 

1 I. Ba mifondrondrongo, ya’ami so’ana’a, mi’ege’ege ba mi’angarõngarõ, ba wa’afõkhõ andrõ sanõrõ ya’ami dania. (Amaed. 11, 28. Luk. 6, 24. Tim. I. 6, 9). 

2 No obou nibayabayami, ba no i’ā hama nukhami andrõ. 

3 Ana’ami andrõ ba firõmi, ba no i’ā howu, ba tobali famaduhu’õ dõdõmi howunia andrõ, ba i’ā nõsimi, hulõ galitõ. No mihõna girõgirõ ba luo safuria andre. (Mat. 6, 19). 

4 Hiza, mu’ao sibai luo zohalõŵõ andrõ, nitahami andrõ, luo zohalõŵõ si no mõi mamasi nowimi, ba no irugi dõgi dalinga Zo’aya ngahõnõ fe’ao zamasi andrõ. (Moz. V. 24, 14. 15). 

5 No miforege wemanga, ba no mi’abusoi’õ ami, ba guli danõ andre no mibula dõdõmi, ba luo wamahõ. (Luk. 16, 19. 25).

6 No mi’etu’õ huku zatulõ andrõ, ba no mibunu; lõ ilaŵa ami.

7 II. Ba mibologõ dõdõmi, wombase, ya’ami ira talifusõ, irugi wa’aso Zo’aya. Hiza, ibase’õ mbua danõ, sebua bõli andrõ, sonowi, wamologõ tõdõnia ba khõnia, irege itema deu si fõfõna andrõ ba teu safuria. (Tit. 2, 13. Hos. 6, 3). 

8 Ba ya’ami gõi, ba mibologõ dõdõmi, mibalobaloi, mi’a’aro’õ dõdõ, noa sa ahatõ wa’aso Zo’aya andrõ. (Nga’õt. II. 15, 7. Fet. I. 4, 7). 

9 Bõi mi’angarõngarõ ba khõ nawõmi, ya’ami ira talifusõ, fa bõi tehuku ami; hiza, so moroi sa zanguhuku andrõ. (Mat. 24, 33). 

10 Mihalõ famaedo ba wanaha famakao ba ba wamologõ tõdõ andrõ zama’ele’õ andrõ, si no fahuhuo ba dõi Zo’aya, ya’ami ira talifusõ. (Heb. 11, 36 b. t. Mat. 5, 12).

11 Hiza, tafahowuhowu’õ zi no manaha tõdõra. No mirongo wanaha Yobi andrõ tõdõnia, ba lualua Zo’aya, ba no mirongo; me no sahakhõ sibai tõdõ Zo’aya ba sogolõ tõdõ. (F. 1, 12. Yob. 1, 21; 42, 10. Moz. II. 34, 6 b. t.).

 

12 III. Ba si ofõna sibai, ya’ami ira talifusõgu, ba bõi mi’ae ba hõlu, bõi mibe’e hõlu zorugo, ba bõi gõi tanõ, ba ma hadia ia mbõ’õnia. Da’õ khõmi: Ya’ia, na ya’ia, ba: lõ’õ, na lõ’õ, fa lõ gõna ami huku. (Mat. 5, 34—37).

13 IV. Na so ba khõmi zi gõna famakao, ba yamangandrõ, na so zohahau tõdõ, ba yamanunõ. (Sin. 50, 15. Efes. 5, 19). 

14 Na so zofõkhõ ba khõmi, ba yamufahede’õ ba zatua mbanua, ba ndramangandrõ ba khõnia, ba ndramubayoini ia fanikha, ba dõi Zo’aya; (Mar. 6, 13); 

15 ba i’orifi dania zofõkhõ andrõ fangandrõ andrõ, soroi ba wamati, ba i’abe’e’õ So’aya, ba na so horõ, nifazõkhinia, ba te’efa’õ khõnia. (Mar. 16, 18. Mat. 9, 2). 

16 Ba faoma mi’ombakha’õ khõ nawõmi horõmi, ba faoma mi’angandrõ, salahi nawõmi, ena’õ tefadõhõ wõkhõmi; abõlõ sibai wangandrõ niha satulõ, na moroi ba dõdõ. (Sin. 145, 18. 19. Amaed. 15, 29). 

17 Eliya andrõ, ba no niha, si mane amuatada gamuatania, ba mangandrõ ia, moroi si’aikõ ba dõdõ, fa bõi moteu, ba lõ teu ba danõ, medõlu fakhe a matonga. (Hal. zin. 14, 15. Luk. 4, 25. Fam. 11, 6). 

18 Ba ifuli mangandrõ, ba so deu, moroi yaŵa ba mbanua, ba mowua danõ. (Raz. I. 18, 42 b. t.). 

19 He ya’ami ira talifusõgu! Na so ba khõmi zi no elungu, si no mondrõi si duhu, ba na so zolohe ya’ia mangawuli, (Mat. 18, 15), 

20 ba bõi zi lõ aboto ba dõdõ da’õ: Solohe mangawuli samazõkhi horõ, moroi ba lala elungua andrõ, ba i’efa’õ nosonia ba wa’amate ba oya ibalugõ horõ. (Amaed. 10, 12. Fet. I. 4, 8).