SURA TITO

Table of Contents

 

SURA TITO

 

TITO

Faza 1

 

I.                  Fangowai Waulo. II. He wisa zi sõkhi amuata zatua andrõ, nitutuyu. III. Samahaõ samaelungu andrõ, ba Gereta.

 

1 I. Faulo zanura da’e, enoni Lowalangi andrõ, sinenge Yesu Keriso, ba wamati nitutuyu Lowalangi andrõ, ba ba wa’aboto ba dõdõra zi duhu, ba wolo’õ li Lowalangi andrõ, (Rom. 1, 1), 

2 bõrõ wanõtõna andrõ, fanõtõna fa’auri si lõ aetu andrõ, nifabu’u Lowalangi, si lõ mofaya, fõna gõtõ danõ andre. (Rom. 16, 25). 

3 Ba noa sa ifa’ele’õ daroma linia, me inõtõnia, ba wangombakha andrõ, nibe’e ba dangagu, dali goroisa Lowalangi andrõ, sangorifi ya’ita. (Tim. I. 2, 6. 7).

4 Khõ Dito andrõ, si ndruhu nonogu, dali wa no faoma wamati. Yafalukha’õ wa’ebua dõdõ ba fa’ohahau dõdõ, khõ Lowalangi Ama, ba khõ Keriso Yesu, sangorifi ya’ita andrõ. (Gal. 2, 3. Kor. II. 8, 23. Tim. I. 1, 2).

5 II. Da’õ mbõrõ, wa no urõi ndra’ugõ ba Gereta, ena’õ õ’a’atulõ zi tosai andrõ, ba ena’õ õdozigõ banua, wamataro satua; õ’o’õ niŵa’õgu khõu; (Hal. zin. 14, 23. Tim. II. 2, 2); 

6 na so zi lõ sinegu, si ha sambua donga, si so ono samati, si lõ turia wa’asilõyaŵa, ba he turia wa lõ molo’õ li. (Tim. I. 3, 2 b. t.). 

7 Sanaro andrõ sa, ba lõ tola mosinegu, ya si mane satua zangai halõŵõ, khõ Lowalangi, bõi same’e manõ ba nikhoi dõdõnia hadia ia, ba bõi si ono wõnutõ, ba bõi samadumadu tuo, ba bõi si fabagobago, ba bõi sangalui ana’a si lõ atulõ; (Kor. I. 4, 1. Tim. II. 2, 24); 

8 ha same’eme’e gõ dome, somasi si sõkhi, satuatua, satulõ tõdõ, sohauhau, si hõndrõgõ si lõ sõkhi;

9 si lõ mamõhõi taroma li si ndruhu andrõ, si faudu ba wamahaõ andrõ, ena’õ faoma i’ila, he famarou tõdõ, ba wamahaõ si ndruhu andrõ, ba he famaduhu’õ tõdõ zamadaõ andrõ. (Tim. II. 4, 2; 1, 13).

10 III. Ato sa zi lõ mamondrongo li, solau huhuo si lõ boto, ba samowõhõ niha bõ’õ, abõlõbõlõ ba niboto. (Hal. zin. 15, 1). 

11 Nifa’afu bawa da’õ; ya’ira zamakuyu niha, so, ba samba omo manõ, ba wamahaõ si lõ tola andrõ, khõra, wangalui ana’a si lõ sõkhi. (Tim. II. 3, 6. Fet. I. 5, 2). 

12 No iŵa’õ sama’ele’õ khõra, oi ya’ira, imane: ”Sofaya manõ Ndrawa Gereta andrõ, utu ndru’u safaito, sedõna manõ mangamanga lõ halõŵõ.” (Hal. zin. 17, 28). 

13 Ba si ndruhu niŵa’õnia andrõ, ba andrõ abe’e’õ wangotu’õ ya’ira, ena’õ atulõ wamatira; 

14 ba bõi ndramu’o’õ wayafaya niha Yehuda andrõ, ba amakhoita niha sangerogõ si duhu. (F. 3, 9. Tim. I. 1, 4 b. t.). 

15 Ba zohauhau tõdõ, ba lõ hadia ia zalakha, ba ba zi ra’ira’iõ, ba ba zi lõ mamati, ba oi salakha manõ, fefu, hadia ia; noa sa moda’i gera’erara, ba he tõdõra. (Rom. 14, 14. 20. Luk. 11, 39 b. t.). 

16 Laŵa’õ sa, no aboto ba dõdõra Lowalangi, ba ba mbuabuara, ba la’osilõ’õgõ ia; ni’ogorofi ira, si lõ mamondrongo li, ba si tebai ba mbuabua si sõkhi andrõ fefu. (Tim. II. 3. 5).

 

TITO

Faza 2

 

I.                  Hadia zi sõkhi amuata niha Keriso, amuata ndra matua, ba amuata ndra alawe, amuata nono matua, ba amuata zawuyu. II. Famasugi ba dõdõ fa’ebua dõdõ Lowalangi andrõ, si no mufa’ele’õ.

 

1 I. Ba ya’ugõ, ba hadia zi faudu ba wamahaõ si ndruhu andrõ, da’õ ombakha’õ; (F. 1, 9); 

2 ena’õ, bõi sambõ era’era ndra matua satua andrõ, ena’õ si sõkhi amuata ira, satuatua, ena’õ atulõ wamati, awõ wa’omasi, awõ wanaha tõdõ andrõ. 

3 Ba si manõ ndra alawe satua, ba gamuatara, ena’õ soadu ba ni’amoni’õ andrõ, bõi samõbõgõ si lõ duhu, bõi samorege famadu tuo, ena’õ samahaõ ba zi sõkhi, (Tim. I. 3, 11; 5, 10), 

4 ena’õ lafamaha zawena muhalõ, ba wangomasi’õ ira matuara ba onora; 

5 lafamaha, ena’õ atuatua ba ohauhau, ena’õ lahaogõ halõŵõra baomora, ba ena’õ la’o’õ li ndra matuara, fa bõi tetandraŵaisi daroma li Lowalangi andrõ. (Efes. 5, 22 b. t.). 

6 Si manõ gõi ba nono matua: õfarou dõdõra, ena’õ atuatua. 

7 Fefu hadia ia, ba be’e dumaduma ndra’ugõ, ba mbuabua si sõkhi, ba ba wamahaõ, ba bõi fabaya zi lõ gõna, yamoadu, (Tim. I. 4. 12. Fet. I. 5, 3), 

8 fehede satulõ wehedeu, si lõ sinegu, ena’õ aila zi fa’udu andrõ, na tebai ibõbõgõ khõda zi lõ sõkhi. (Fet. I. 2, 12; 3, 16).

9 Sawuyu andrõ, ba farou dõdõ, ena’õ la’o’õ li zokhõ ya’ira: ena’õ lafaigi zomasi zokhõ, fefu, hadia ia, bõi ndramamadaõ, (Efes. 6, 5 b. t. Tim. I. 6, 1. b. t.),

10 bõi managõ, ena’õ a’oi so wa lõ farõi ira, si sõkhi, ena’õ moturia lala Lowalangi, sangorifi ya’ita ba khõra andrõ, fefu, labe’e.

11 II. Noa sa to’ele wa’ebua dõdõ Lowalangi andrõ, sangorifi niha fefu; (F. 3, 4. Yoh. I. 4, 9); 

12 ifahaõ ita, ena’õ tabõhõli wa lõ ba dõdõda Lowalangi, awõ wangisõ andrõ, ba guli danõ, ba ena’õ satuatua ita, ba satulõ tõdõ, ba solo’õ li Lowalangi, ba gõtõ da’e ba guli danõ, (Fet. I. 2, 11. Yoh. I. 2, 15 b. t.), 

13 sombalombaloi tõtõnafõ andrõ, sohahau dõdõ, ba fa’ato’ele lakhõmi Lowalangi sebua andrõ, sangorifi ya’ita, Keriso Yesu, (Kor. I. 1, 7. Fet. 1, 7), 

14 si no mame’e ya’ia, salahida, ba wangefa’õ ya’ita, ba zi lõ atulõ fefu, ba ba wangehao ya’ita, banua khõnia, sowõlõ’õlõ ba mbuabua si sõkhi. (Gal. 1, 4. Tim. I. 2, 6. Efes. 5, 27; 2, 10). 

15 Da’õ ombakha’õ, ba farou dõdõra, ba oigõ dõdõu wangotu’õ. Bõi yamu’ositengagõ ndra’ugõ niha, ha niha ia. (Tim. I. 4, 11. 12.)

 

TITO

Faza 3

 

I.                  Ni’o’õ li zalaŵa, ba ni’ebua’õ dõdõ ba niha fefu. II. Bõi faguagua. III. Fango’ozui sura.

 

1 I. Fasugi ba dõdõra, fa la’o’õ li zalaŵa, ba li zokhõ ya’ira, fa lafondrondrongo, fa bõi abua gõlõra, ba wolau si sõkhi, fefu, hadia ia. (Rom. 13, 1 b. t. Fet. I. 2, 13 b. t.). 

2 Bõi latandraŵaisi niha, ha niha ia, bõi fasosososo, ena’õ lahaogõhaogõ, ena’õ oroma, wa no a’oi so wa’ebolo dõdõra, ba niha fefu. (Tim. II. 2, 24. Kol. 3, 12). 

3 Ya’ita gõi fõna, ba noa sa si lõ tõdõ, ba si lõ molo’õ li, ba si no elungu, ba sawuyu wangisõ andrõ, ba sawuyu zomasi dõdõ andrõ, si no oya ngawalõ; no tatõrõ lala si lõ sõkhi, awõ lala wa’afõkhõ dõdõ; no ni’ogorofi ita, ba no faoma fatiu dõdõda khõ nawõda. (Efes. 2, 2 b. t.).

4 Ba me no to’ele wa’asõkhi dõdõ Lowalangi, sangorifi ya’ita, awõ wa’omasinia niha, (F. 2, 11), 

5 ba no i’orifi ita, tenga moroi ba mbuabuada, ba wa’atulõ dõdõ, balazi wa’ahakhõ dõdõnia andrõ, ba wemondri andrõ, ba wa’atumbu si bohou, ba ba wamohouni andrõ, khõ Geheha ni’amoni’õ, (Tim. II. 1, 9. Fet. I. 1, 3. Yoh. 3, 5. Efes. 5, 26 b. t.; 4, 23. Rom. 6), 

6 nihõnania khõda, wolau ya’ia, nifa’ema Yesu Keriso, sangorifi ya’ita; (Hes. 36, 25 b. t.); 

7 ena’õ satulõ ita, iŵa’õ Lowalangi, moroi ba wa’ebua dõdõnia, ba tõtõnafõda gondrõita andrõ, fa’auri si lõ aetu. (Rom. 8, 24 b. t.).

8 Si ndruhu daroma li andrõ, ba omasi ndra’o, na õfaduhu’õ sibai da’õ, ena’õ owõlõ’õlõ zi no mamati ba Lowalangi, wamalua buabua si sõkhi. Da’õ zi sõkhi, ba da’õ zoguna ba niha. (F. 3, 14).

9 II. Ba amadõniŵa andrõ, si lõ boto, ba fanutunõ nga’õtõ, ba fasosota, ba faguaguasa andrõ, ba goroisa, ba bõi babaya; lõ’õ sa gunania, no si lõ boto. (F. 1, 14). 

10 Na so zi fasambua famahaõ, ba bõhõli, na no õtenaŵa ia, irege mendrua, (Rom. 16, 17; Mat. 18, 15 b. t.),

11 ya’aboto ba dõdõu, wa no tefuyu dõdõ zi manõ, awõ wa samazõkhi horõ ia, awõ wa ya’ia zanguhuku ya’ia. (Tim. I. 6, 4. 5).

12 III. Na ufatenge khõu Gatema andrõ, ba ma Tikhiko andrõ, ba ta’ita’i ae khõgu, ba Nikofoli; ba da’õ sa sodo na baŵa deu, uŵa’õ. 

13 Tolo Zena andrõ, sangila amakhoita, ba Afolo andrõ, wama’anõ ya’ira, ba wofanõ, haogõ, fa bõi ambõ khõra hadia ia. (Hal. zin. 18, 24).

14 Ba ndramufamaha gõi ira banuada, wanolo niha bõ’õ ba zoguna, ndramuhaogõ, fa bõi si lõ buabua si sõkhi ira. — 

15 La’owai ndra’ugõ awõgu andre fefu. Owai fefu zomasi ya’ita, ba wamati. Yafalukha ami fefu wa’ebua dõdõ! (Fil. 4, 23).