SURA TIMOTEO II

Table of Contents

 

SURA TIMOTEO II

 

TIMOTEO II.

FAZA 1

 

I.                  Fangowai Waulo. II. Ifarou dõdõ Dimoteo, fa bõi aiwõ ia wamaduhu’õ turia somuso dõdõ andrõ. III. Isuno Gonesiforo andrõ.

 

1 I. Faulo zanura da’e, sinenge Keriso Yesu andrõ, moroi ba nilau dõdõ Lowalangi, dali wamabu’u fa’auri andrõ, ba khõ Keriso Yesu, (Tim. I. 1, 1. Yoh. I. 2, 25),

2 khõ Dimoteo andrõ, ono omasiõ khõnia. Yafalukha’õ wa’ebua dõdõ, ba fa’ahakhõ dõdõ, ba fa’ohahau dõdõ, khõ Lowalangi Ama, ba khõ Keriso Yesu, So’aya ya’ita! (Tim. I. 1, 2).

3 II. U’andrõ saoha gõlõ khõ Lowalangi, nifosumangegu, i’otarai ndra tuagu, lõ sinegu dõdõgu khõgu, lõ aetu gõi itõrõ ligu ndra’ugõ, na mangandrõ ndra’o, bongi ma’õkhõ (Hal. zin. 23, 1), 

4 oi so wehulu dõdõgu, ena’õ falukhado khõu, itõrõ tõdõgu daw̃a hõrõu andrõ, ena’õ fahõna khõgu wa’omuso dõdõ. (F. 4, 9. 21). 

5 Me no tefasugi ba dõdõgu wamatimõ andrõ, si lõ famini tõdõ, si no ofõna monahia ba dõdõ gaweu Loise ba ba dõdõ ninau. Oinike, ba udõnadõna, ba dõdõu gõi. (Hal. zin. 16, 1). 

6 Da’õ mbõrõ, wa ufasugi ba dõdõu, ena’õ õfado’õ game’ela Lowalangi andrõ, si so ba dõdõu, moroi ba wanufa hõgõu tangagu. (Tim. I. 4, 14). 

7 Tenga sa Eheha sada’uda’u nibe’e Lowalangi khõda, no Eheha sabõlõ, Eheha ba wa’omasi, Eheha ba wangonangegõ nibe’enia khõda. (Rom. 8, 15). 

8 Ba bõi aila ndra’ugõ, wamaduhu’õ turia Zo’aya ya’ita, ba bõi aila’õ ba khõgu andre, nitaha andrõ khõnia, yafao ndra’ugõ wanaha famakao andrõ, ba duria somuso dõdõ andrõ, dali wa’abõlõ Lowalangi andrõ, (F. 2, 3. 4, 5), 

9 si no mangorifi ya’ita, si no mogaoni ya’ita, fogaoni ni’amoni’õ; tenga dali mbuabuada, dali nihonogõl dõdõnia, ba fa’ebua dõdõ andrõ, si no falukha ita, ba khõ Keriso Yesu, fõna nga’õtõ danõ andrõ, (Tit. 3,

5. Efes. 1, 4. 11), 

10 nifa’ele’õ iada’e, ba wa’ato’ele zangorifi ya’ita andrõ, Keriso Yesu, si no mamakiko fa’amate andrõ, ba si no mangasogõ fa’auri ba fa lõ tekiko, moroi ba duria somuso dõdõ andrõ, (Heb. 2, 14. Kor. I. 15, 55—57), 

11 ba nifataro ya’o sangombakha ba sinenge ba samahaõ. (Tim. I. 2, 7). 

12 Da’õ gõi mbõrõ, wa utaõgõ zi mane da’õ, ba lõ’õ sa aila ndra’o ba khõnia; noa sa u’ila ha khõ mamati ndra’o, ba no faduhu dõdõgu, abõlõ ia, tola i’irõ’õ khõgu nibe’e ba dangagu andrõ, irugi luo safuria andrõ dania. (F. 2, 9. Kol. 1, 5). 

13 O’õ dulada wamahaõ si ndruhu andrõ, nirongou khõgu, ba wamati, ba ba wa’omasi ba khõ Keriso Yesu. (Rom. 6, 17. Tim. I. 6, 3. Tit. 2, 1). 14 Irõ’irõ’õ nibe’e khõu andrõ, si sõkhi andrõ, yamutolo’õ Eheha ni’amoni’õ andrõ, sonahia ba dõdõda. (Tim. I. 6, 20).

15 III. Noa sa õrongo, wa no ahori la’erogõ ndra’o si so ba Azia andrõ, ira Figélo ba Hemogene. (F. 4, 10. 16). 

16 Yamuhakhõsi tõdõ So’aya zoroiyomo Gonesiforo andrõ, fefu, me no asese i’okafui dõdõgu, ba lõ saila ia ba rategu andre. (F. 4, 19). 

17 Me mõi ia ba Roma, ba no iforege wangalui ya’o, ba no isõndra ndra’o. 

18 Yamutolo ia So’aya, ena’õ falukha ia wa’ahakhõ dõdõ khõ Zo’aya, na luo safuria andrõ dania; ba ha wa’ebua wanolonia ba Nefeso, ba no ya’ugõ zabõlõ mangila. (Mat. 5, 7).

 

TIMOTEO II.

FAZA 2

 

I.                  Fango’ou, fa bõi atage ba wasõndrata andrõ. II. Famangelama ba wamaelungu ba III. ba golalõw̃a nono matua, ba IV. Ba waguaguasa ba zi lõ boto.

 

1 I. Ba ya’ugõ onogu, ba ya’abe’e ndra’ugõ, ba wa’ebua dõdõ andrõ, ba khõ Keriso Yesu. (Efes. 6, 10). 

2 Ba hadia nirongou khõgu, ba zi no ato ba mbõrõ, da’õ fa’ema ba niha si lõ farõi, si tola mamahaõ dania niha bõ’õ gõi. (F. 1, 13). 

3 Yafao ndra’ugõ wanaha famakao, amaedola zi mõi manuwõ, awõ Keriso Yesu, si sõkhi. (F. 1, 8). 

4 Fefu, ha niha zi mõi manuwõ, ba lõ ihalõ rõrõnia wangalui balazo, afunia i’omasi’õ ia solohe ya’ia andrõ. (Kor. I. 9, 25 b. t.). 5 Ba he no si fasõndra niha, ba lõ’õ sa lafotakula ia, na si lõ gõna wasõndratania andrõ. 6 Da’õ zi fõfõna mangoguna’õ bua nowi, sonowi andrõ, sohalõw̃õ. (Kor. I. 9, 10). 

7 Tanõ ba dõdõu hadia niw̃a’õgu; ibotokhi sa dania ba dõdõu So’aya, fefu hadia ia. (Amaed. 2, 6). 

8 Tõrõtõrõ tõdõu Yesu Keriso, nisusugi moroi ba ngai zi mate, ma’uwu Dawido andrõ, dali duria somuso dõdõ andrõ khõgu; (Rom. 1, 3. Kor. I. 15, 4. 20); 

9 da’õ mbõrõ, wa utaha wamakao, irege rate andrõ, hulõ zamarukhu; ba lõ’õ sa mufesu daroma li Lowalangi andrõ. (F. 1, 8. 12. Hal. zin. 28, 30. 31). 

10 Andrõ utaha fefu, hadia ia, bõrõ nitutuyu andrõ, ena’õ lakhamõ gõi wangorifi andrõ, ba khõ Keriso Yesu, awõ lakhõmi andrõ, si lõ aetu. (Kol. 1, 24). 

11 Si ndruhu daroma li andrõ: na no fao ita ba wa’amate, ba fao gõi ita ba wa’auri; (Rom. 6, 5. 8); 

12 na tataha wamakao, ba awõ gõi ita dania, ba wa’asalaw̃a; na ya’ita mangosilõ’õgõ, ba ya’ia gõi mangosilõ’õgõ ya’ita dania; (Rom. 8, 17. Mat. 10, 33);

13 na farõi ita, ba lõ’õ sa farõi ia; tebai sa i’osilõ’õgõ ia. (Rom. 3, 3).

14 II. Da’õ fasugi ba dõdõra; õw̃a’õ sibai khõra, fõna Lowalangi, fa bõi faguagua ira, si lõ guna, si ha sambalõ famakuyu samondrongo, (Tim. I. 6, 4. 5). 

15 Forege wangalui, ena’õ si nangea khõ Lowalangi ndra’ugõ, sohalõw̃õ si lõ aiwõ, sangehaogõ fangoguna’õ taroma li si duhu andrõ. (Tim. I. 4, 6). 

16 Timba wamakhai mbewe andrõ, si lõ boto; tedoudou manõ sa khõra, wa lõ la’o’õ khõ Lowalangi. (Tim. I. 6, 20), 

17 ba manananana dania lira andrõ, hulõ mbou auri. Ya’ia ndra Himenaio Fileto, (F. 3, 13. Tim. I. 1, 20), 

18 si no elungu, si no mondrõi si duhu, wanguma’õ no aefa wemaoso zi mate andrõ, ba so õsa nifawukara famati. (Tim. I. 6, 21. Kor. I. 15, 19). 

19 Ba lõ’õ sa atõ tebulõ danedane saro andrõ khõ Lewalangi, ba da’õ dandronia: ”No aboto ba dõdõ Zo’aya dána khõnia andrõ,” ba: ”ndramurõi zi lõ atulõ dozi sanõtõi tõi Zo’aya andrõ.” (Yoh. 19, 14. 27. Mat. 7, 22. Fam. 2, 13). 

20 Ba ba nomo sebua ba tenga ha gamagama balaki ba gamagama firõ, so sa gõi gamagama eu ba gamagama tanõ, ba nifake ba zoadu õsa, ba ba zi lõ moadu õsa. (Rom. 9, 21).

21 Ba na so zi no mangeheta ya’ia ba zi manõ, ba fakake ba zoadu ia dania, ni’amoni’õ, ba soguna ba zokhõ omo, nihaogõ, ba ngawalõ mbuabua si sõkhi, fefu. (Kor. II. 6, 17 b. t.).

 

22 III. Erogõ wangisõ nono matua andrõ, ba gohi wa’atulõ dõdõ ba famati ba fa’omasi ba fefao dõdõ ba zangarõfi li So’aya andrõ, soroi ba dõdõ si no ohauhau. (Tim. I. 6, 11).

23 IV. Ba amadõniw̃a faya andrõ, si lõ gõna, ba timba, me no õ’ila, ha fasosota zi tumbu ba da’õ. (F. 2, 14. 16). 

24 Ba enoni Zo’aya, ba bõi yafasoso, yamuhaogõ linia, ba niha fefu, ya’enahõi wamahaõnia, ya’ebolo dõdõnia ba niha si lõ sõkhi, (Tit. 1, 7. 9), 

25 yamuhaogõhaogõ wanegu samadaõ andrõ, ma atõ ibe’e khõra Lowalangi wamalalini era’era, fa aboto ba dõdõra zi duhu. (Tes. I. 5, 14), 

26 fa tokea ira, ba wangefa’õ ya’ira ba dandraw̃a Gafõkha andrõ, si no mama’ala ya’ira, ba wolo’õ nilau dõdõnia andrõ. (Efes. 5, 14).

 

TIMOTEO II.

FAZA 3

 

I.                  Famahaõ famaelungu andrõ. II. Famarou tõdõ Dimoteo, fa bõi ibõhõli lala andrõ, ni’ombakha’õ ba zura ni’amoni’õ andrõ.

 

1 I. Ba bõi zi lõ aboto ba dõdõu: so dania mbaw̃a si lõ sõkhi, ba gõtõ safuria andrõ. (Tim. I. 4, 1 b. t.). 

2 Amuata niha ba da’õ, ba ha tána khõra la’alui, somasi ana’a ira, ba sanuno ya’ira, ba si fayaw̃a, ba sanandraw̃a, ba si lõ mamondrongo li ndra amara, ba si tebai mangandrõ saoha gõlõ, ba sango’aya Lowalangi, (Rom. 1, 29 b. t.), 

3 ba si lõ mangomasi’õ awõra, ba si farõi, ba samõbõgõ si lõ duhu, ba solaulau manõ hadia ia, ba si tebai ahono, ba si lõ omasi si sõkhi, 

4 ba si manga mbõli, ba si lõ tõdõ, ba sebua hokha, ba somasi isõ’isõ dõdõra, moroi ba wa’omasira Lowalangi; (Fil. 3, 19); 

5 hulõ solo’õ khõ Lowalangi ira, wamaigida, ba no sangosilõ’õgõ fa’abõlõ wolo’õ andrõ. Ba ya’ugõ erogõ niha si manõ. (Tit. 1, 16. Mat. 7, 15). 

6 Oi ya’ira sa zanõrõi omo, ba wondrõnisi ira alawe, si no fahõna horõ, solo’õ manõ fangisõ dõdõra, ha wa’oya ngawalõ, (Fet. II. 2, 14), 

7 si lõ mamalõmalõ wamahaõ ya’ira, ba si tebai mogamõ fa’aboto ba dõdõra zi duhu. 

8 Ba hulõ si mane famadaõ ndra Yane Yambere andrõ khõ Moze, si manõ gõi wamadaõ da’õ no mege si duhu. Niha si no fakuyu tõdõ, si lõ aro famati andrõ. (Moz. II. 7, 11. 22. Hal. zin. 13, 8. 10. Tim. I. 6. 5). 

9 Ba lõ’õ sa atõ ara wolaura andrõ, oroma sa dania ba niha fefu, wa si lõ tõdõ ira, si mane ba khõra andrõ fõna gõi. (Moz. II. 7, 12; 8, 18; 9, 11).

10 Ba ya’ugõ, ba no õ’o’õ khõgu, ba wamahaõ andrõ, ba ba gamuata, ba ba nilau dõdõ, ba ba wamati, ba ba wa’ebolo dõdõ andrõ, ba ba wa’omasi, ba ba wanaha tõdõ, 

11 ba wolohi andrõ, ba ba wamakao andrõ, si no gõna ndra’o, ba Gandriokhia ba ba Nikonia ba ba Lisitera; no utaõgõ wolohi si manõ, ba no i’efa’õ ndra’o So’aya, ba da’õ fefu. (Kor. II. 1, 8. 10. Hal. zin. 13, 50; 14, 5. 19). 

12 Ba dozi sedõna molo’õ li Lowalangi, ba khõ Keriso Yesu, ba gõna folohi dania. (Fet. I. 4, 12 b. t. Yoh. 15, 18 b. t.).

13 Ba ba niha si lõ sõkhi, samowõhõ niha bõ’õ, ba tedoudou manõ walõsõkhi, lafaelungu niha bõ’õ, ba nifaelungu gõi ira.

14 II. Ba ya’ugõ andrõ, ba bõi bõhõli zi no õrongo, awõ zi no faduhu dõdõu; me no õ’ila, ha khõ õrongo ia, (F. 1, 12. 13), 

15 awõ wa no õ’ila zura ni’amoni’õ andrõ, i’otarai iraono ndra’ugõ, sangila mangatuatua’õ ya’ugõ, ba wangalui fangorifi ba mbanua furi andrõ, soroi ba wamati andrõ, khõ Keriso Yesu. (F. 1, 5. Yoh. 5, 39).

16 Fefu nõsi zura andrõ, ba Eheha Lowalangi zame’e ba dõdõ niha, ba moguna ia, ba wamahaõ, ba ba wangotu’õ ba ba wanga’azõkhi, ba ba wamamaha ba wa’atulõ dõdõ, (Fet. II. 1, 19—21), 

17 ena’õ mo’ahonoa genoni Lowalangi andrõ, si no to’õlõ ba ngawalõ mbuabua si sõkhi andrõ fefu.

 

 

TIMOTEO II.

FAZA 4

 

I.                  Famarou tõdõ Dimoteo andrõ, ena’õ ihaogõ wangai halõw̃õnia. II. Lõ ara tõ Waulo. III. Fangombakha hadia ia. IV. Fango’ozui sura.

 

1 I. Uw̃a’õ sibai khõu, fõna Lowalangi, ba fõna Keriso Yesu, sanguhuku dania niha sauri, awõ zi no mate, ba wa’ato’elenia, ba ba mbanuania andrõ: (Tim. I. 6, 13. Hal. zin. 10, 42): 

2 Ombakha’õ daroma li, bõi bulõ’õgõ, he baw̃a, ba he tenga baw̃a, otu’õ ira, farou dõdõra, ba feta’u ira, ba ya’a’oi so wa’ebolo dõdõu, awõ wamahaõ, (Tim. I. 4, 13; 5, 20). 

3 Irugi sa dania baw̃a, si tebai lataha wamahaõ si ndruhu andrõ, ba lahõna dania khõra zamahaõ somasi ira, si maoso mbõrõ dalingara, (Yer. 5, 31. Mikh. 2, 11), 

4 ba la’erogõ zi duhu, lõ lafondrondrongo, ba la’otahõgõ wayafaya andrõ. (Tit. 1, 14).

5 Ba ya’ugõ andrõ, ba bõi fawuka dõdõu, gofu hadia ia ngawalõ, taha wamakao, halõ halõw̃õu, halõw̃õ zangombakha turia somuso dõdõ andrõ; fo’ahonoa nibayabayau andrõ, (F. 2, 3. Kol. 4, 17).

6 II. Ya’odo sa, ba nibe’e sumange sa’ae, ba lõ ara tõ, ba irugi baw̃a wangefagu andrõ. (Fil. 2, 17). 

7 Fasõndrata si sõkhi andrõ, ba no ulau, ba tõrõw̃a andrõ, ba no u’o’ozui, lõ nibõhõligu famati andrõ. (Tim. I. 6, 12. Hal. zin. 20, 24).

8 Ba iada’e sa’ae, ba no mufõfõ’õ khõgu dakula ba wa’atulõ dõdõ andrõ, nibe’e Zo’aya andrõ, sangatulõ’õ fanguhuku, khõgu dania, na luo safuria andrõ, ba tenga ha khõgu, idozigõ gõi zangomasi’õ fa’ato’elenia andrõ. (Kor. I. 9, 25. Yak. 1, 12. Fam. 2, 10).

9 III. Ta’ita’i, ena’õ aliõ mõi’õ khõgu. 

10 Noa sa irõido Dema andrõ, me no omasi ia gõtõ da’e, ba no mõi ia ba Desalonika; Kereke andrõ, ba no mõi ba Galatia, ba Tito, ba no isaw̃a Dalamatia; (Kol. 4, 14); 

11 ha Luka nawõgu; ohe awõu Mareko andrõ, moguna sa ia khõgu, ngoningonigu. (Kol. 4, 10). 

12 Tikhiko andrõ, ba no ufatenge ba Nefeso. (Kol. 4, 7). 

13 Baru sebua andrõ, nirõigu ba Deroa, khõ Garafo, ohe, na mõi’õ ba da’e, ba sura andrõ, ofõna guli geu andrõ. 

14 No oya ilau khõgu zi lõ sõkhi Alesandro, siambu andrõ; isulõni dania khõnia So’aya mbuabuania andrõ; (Tim. I. 1, 20. Sin. 28, 4. Kor. II. 11, 15); 

15 ba ya’ugõ gõi , angelama khõnia; noa sa iforege wamadaõ niw̃a’õma andrõ. 

16 Me tesekhegõ ndra’o, si fõfõna andrõ, ba samõsa lõ sango’awõgõ ya’o, noa sa ahori larõi ndra’o; bõi yatebe’e õmõra! 

17 Ba no fa’awõ khõgu Zo’aya, ba no i’abõlõ’õ ndra’odo, ena’õ u’asiwai wangombakha andrõ, ba ena’õ larongo fefu soi; ba no te’efa’õ ndra’o ba mbawa zingo. (Hal. zin. 27, 24; 9, 15).

18 Ba i’efa’õ dania ndra’o So’aya, ba nifakhai dõdõ andrõ, si lõ sõkhi, fefu, ba i’orifi ndra’o, i’ohedo ba mbanuania andrõ, ba zorugo. Ya khõnia lakhõmi, gõtõgõtõ wa’ara! Yaduhu. (F. 3, 11. Mat. 6, 13).

19 IV. Owai Werisa andrõ ba Akila, ba si samba omo ndra Onesiforo andrõ. (F. 1, 16. Hal. zin. 18, 2). 

20 No torõi ba Gorindro Geraso; Terofimo andrõ, ba no urõi ba Mileti, mofõkhõ. (Hal. zin. 19, 22; 20, 4, 15). 

21 Ta’ita’i we’amõi, fatua lõ baw̃a deu. La’owai ndra’ugõ ira Oibulo Fudeo ba Lino ba Kalaudia ba talifusõ andrõ, fefu. 

22 Ya awõ dõdõu Zo’aya! Yafalukha ami wa’ebua dõdõ! (Gal. 6, 18).