SURA TIMOTEO I

Table of Contents

 

SURA TIMOTEO I

 

TIMOTEO I.

FAZA 1

 

I.                  Fangowai Waulo. II. Ndramangelama ba zamahaõ andrõ, samaelungu niha. III. Isuno wa’ebua dõdõ Lowangi Faulo. IV. Oroisania khõ Dimoteo.

 

1 I. Faulo zanura da’e, sinenge Keriso Yesu andrõ, dali goroisa Lowalangi, sangorifi ya’ita, ba oroisa Keriso Yesu andrõ, tõtõnafõda, (Kor. I. 1, 1. Kol. 1, 27),

2 khõ Dimoteo andrõ, si ndruhu nononia andrõ, ba wamati. Yafalukha’õ wa’ebua dõdõ ba fa’ahakhõ dõdõ ba fa’ohahau dõdõ, khõ Namada Lowalangi, ba khõ Keriso Yesu, So’aya ya’ita. (Tim. II. 1, 2. Kor. I. 4, 17. Tit. 1, 4).

3 II. Si mane famarougu tõdõu, fa õ’iagõ Nefeso, me mõido ba Makedonia, ena’õ õŵa’õ khõra õsa, bõi lafaehusi wamahaõ, (Hal. zin. 20. 1. 4), 

4 ba bõi la’o’õ gamaedola andrõ, ba fanutunõ nga’õtõ andrõ, si lõ aetu, famobõrõ waguaguasa, moroi ba wogunania ba wamatõrõ Lowalangi banuania andrõ, ba wamati. (F. 4, 7. Tit. 1, 14).

5 Ba ba da’õ moguna goroisa, ba wanga’asogõ fa’omasi, soroi ba dõdõ si no ohauhau, ba ba dõdõ si lõ fategu, ba ba wamati si lõ famini; (Kol. 3, 14. Rom. 12, 9); 

6 noa sa so õsa zi no mondrõi da’õ, solau huhuo si lõ boto. (F. 6, 4. b. t. 20). 7 No labali’õ samahaõ ba goroisa ira, ba lõ saboto ba dõdõra, he niŵa’õra, ba he nifaduhu’õra. 

8 Ba no ta’ila, si sõkhi goroisa andrõ, na atulõ wamoguna’õ niha ya’ia, (Rom. 7, 12), 

9 na no i’ila, tenga ba zatulõ goroisa andrõ, ha ba zolalõ, ba ba zi lõ mamondrongo li, ba ba zi no mangerogõ Lowalangi, ba ba zamazõkhi horõ, ba ba zi lõ ohauhau, ba ba zi lõ sõkhi, ba zamunu ama, ba ba zamunu ina, ba ba zange’e, (Gal. 5, 23), 

10 ba ba zohorõ, ba ba zohorõni ono matua, ba zanagõ niha, ba ba zofayafaya, ba ba zi mõi ba hõlu ba zi lõ duhu, ba ma hadia ia mbõ’õnia, si lõ faudu ba wamahaõ si ndruhu andrõ, (Kor. I. 6, 9 b. t. Moz. II. 21, 16),

11 dali duria somuso dõdõ andrõ, turia lakhõmi Lowalangi sohahau tõdõ andrõ nibe’e ba dangagu. (Tes. I. 2, 4).

12 III. U’andrõ saoha gõlõ khõ Keriso Yesu, So’aya ya’ita, sangabõlõ’õ ya’o, me no iŵa’õ tõdõnia, lõ farõi ndra’õ, me ifataro ndra’o ba halõŵõ andrõ, 

13 ya’odo andre, sanandraŵa fõna ba solohi ba sangosiwawõi; ba no falukhado wa’ahakhõ dõdõ, me lõ’õ na u’ila watahõgõ, me ulau da’õ, me lõ faduhu dõdõgu na. (Gal. 1, 13 b. t. Hal. zin. 8, 3; 3, 17). 

14 Bo no fahõna wa’ebua dõdõ Zo’aya ya’ita andrõ, awõ wamati ba awõ wa’omasi andrõ, ba khõ Keriso Yesu. (Kor. I. 15, 10). 

15 Si ndruhu daroma li andrõ ba si nangea tafonaha manõ, wa no mõi ba guli danõ Keriso Yesu, ba wangorifi si so horõ; sebuara ndra’odo. (Mat. 1, 21; 9. 13). 

16 Ba andrõ tehakhõsi tõdõ ndra’o, ena’õ ba khõgu, ba zebua honõ andrõ, i’oigõ wangoroma’õ fa’ebolo dõdõnia Yesu Keriso, dumaduma ba zamati khõnia dania ba wanema fa’auri si lõ aetu.

17 Ba razo zi lõ aetu andrõ, si lõ tebulõ, si lõ oroma, Lowalangi si ha samõsa andrõ, ba nifosumange ba nisuno, irugi zi lõ aetu. Yaduhu. (Rom. 16, 27. Yud. 25).

18 IV. Da’õ goroisagu khõu, ya’ugõ onogu Timoteo, dali li wama’ele’õ andrõ fõna, nitandrõsaigõ khõu, ena’õ õ’o’õ da’õ, wolau fasõndrata andrõ, si sõkhi, (F. 6, 12), 

19 ba ena’õ lõ õbõhõli wamati, ba ena’õ lõ tebulõ wa lõ sinegu dõdõu khõu; noa sa so õsa zi no manibo da’õ, ba no taya wamatira, hulõ zaboto awo. (F. 6, 10. 21. Hal. zin. 24, 16). 

20 Ya’ia khõ ndra Himenaio Alesandro, nitou’õgu ba danga Zatana, ena’õ te’otu’õ ira, fa bõi sa’ae manandraŵa. (Tim. II. 2, 17. 18; 4. 14. Kor. I. 5, 5).

 

TIMOTEO I.

FAZA 2

 

I.                  Famarou tõdõ, ba wangandrõ. II. He lawisa ira matua ba he lawisa ira alawe, ba gowuloa ba migu andrõ.

 

1 I. Ba si fõfõna sibai, ba ufarou dõdõmi ba wangalulu ba ba wangandrõ, ba ba wangandrõ salahi nawõ, ba ba wangandrõ saoha gõlõ; mifarahugõ niha fefu. (Fil. 4, 6). 

2 Mifarahugõ razo ba salaŵa, fefu, ena’õ ahono ita, ba ena’õ lõ hadia ia, ena’õ a’oi so wolo’õ khõ Lowalangi, awõ wa’amoadu. 

3 Da’õ zi sõkhi, da’õ zomasi Lowalangi, sangorifi ya’ita, 

4 somasi na ahori te’orifi niha, na dozi lasõndra wa’aboto ba dõdõra zi duhu. (Hes. 18, 23. Fet. II. 3, 9). 

5 Ha sa samõsa Lowalangi, ba ha samõsa zama’ema ba gotaluara Lowalangi niha, ya’ia niha andrõ, Keriso Yesu, (Yoh. 17, 3. Heb. 9, 15), 

6 si no mame’e ya’ia, hõli niha fefu, nifaduhu’õ ba ginõtõnia, (Tit. 2, 14. Mat. 20, 28).

7 Ba nifataro ya’o sangombakha ba sinenge — si duhu niŵa’õgu, tenga faya — samahaõ niha baero, ba wamati ba ba zi duhu. (Tim. II. 1, 11. Rom. 9, 1; 1, 5).

8 II. Ba da’õ zomasido: mangandrõ ndra matua, gofu heza so ira, lafazaŵa danga ni’amoni’õ, si lõ fõnu ba si lõ faguaguasa. (Kor. I. 14, 34. Mar. 11, 25. Yak. 1, 6). 

9 Si manõ gõi ndra alawe, ndramangehao baru soadu, ba yafao wa’aila ba fa’amoadu; bõi fondrandra bu ba manimani ba nukha sebua bõli, (Fet. I. 3, 3—5), 

10 hadia zi nangea ba ndra alawe sanguma’õ sangata’ufi Lowalangi ira; buabua si sõkhi wangehaora. (Tit. 2, 3 b. t.). 

11 Ya’ahonohono ndra alawe, wamahaõ ya’ia, ya’a’oi so wolo’õnia li. (Kor. I. 14, 34. 35). 

12 Lõ utehe ba ndra alawe wamahaõ niha bõ’õ, ba he famatõrõ ira matua, yamuhonogõ ia, (Efes. 5, 22. Kol. 3, 18. Fet. II. 3, 1 b. t.). 

13 Ofõna sa tefazõkhi Gadamo, awena Khawa. (Moz. I. 2, 18 b. t.). 

14 Ba tenga Adamo nifaelungu, ba ira alawe nifaelungu, isawõ goroisa. (Kor. II. 11, 3. Moz. I. 3, 6). 

15 Ba ni’orifi sa ia, ba wadono, na lõ aefa khõra wamati ba fa’omasi ba fangohauhau, awõ wa’amoadu. (Tit. 2, 4. 5. Kor. I. 7, 25. 26).

 

TIMOTEO I.

FAZA 3

 

I.                  Hadia zi sõkhi amuata zanaro andrõ, ba II. amuata genoni andrõ ba amuata wo’omora. III. Tuho wamahaõ.

 

1 I. Si ndruhu daroma li andre: Na so zangalui halõŵõ zatua niha Keriso andrõ, ba halõŵõ si sõkhi i’alui. (Hal. zin. 20, 28). 

2 Ba satua andrõ, ba bõi mosinegu, bõi samodombua donga, bõi sambõ era’era, ha satuatua, si sõkhi bõwõ, same’eme’e gõ dome, sangila mamahaõ. (Tit. 1, 6. b. t. Tim. II. 2, 24). 

3 Bõi samadumadu tuo, ba bõi si fabagobago, ha sebolo tõdõ, si lõ faguagua, si lõ omasi ana’a; (Moz. III. 10, 9 b. t.); 

4 sangila mangehao, wamatõrõ soroiyomonia, si so ono solo’õ linia, si no a’oi so fa’amoadu. — 

5 Na so zi lõ mangila mamatõrõ soroiyomonia, ba he iwisa wondrorogõ banua Lowalangi andrõ? — 

6 Bõi si bohou mubayagõ idanõ, fa bõi fayaŵa ia, ba fa lõ gõna ia huku andrõ, khõ Gafõkha.

7 Ba lõ tola gõi lõ sõkhi duriania ba zi so baero andrõ, fa bõi tetandraŵaisi ia, ba fa bõi alau ia ba dandraŵa Gafõkha. (Kol. 4, 5).

8 II. Ba si manõ gõi genoni andrõ: si sõkhi amuata, bõi dua lela, bõi samadumadu tuo, bõi sangalui ana’a si lõ atulõ, (Hal. zin. 6, 3 b. t.), 

9 si lõ mamõhõi si no tobini andrõ, famati andrõ, ba dõdõ si lõ sinegu. (Hal. zin. 24, 16). 

10 Ba nitandraigõ gõi ira ua, ba awena tola mõi ira enoni, na lõ sinegu. 

11 Ya si manõ gõi ndra alawe: si sõkhi amuata, bõi samõbõgõ si lõ duhu, bõi sambõ era’era; si lõ farõi, gofu hadia ia. (F. 5. 9; 2, 9). 

12 Ba enoni andrõ, ba si ha sambua donga, sangehaogõ famatõrõ onora ba soroiyomora, fefu.

13 Lasõndra sa khõra naha si sõkhi sangehaogõ fangai halõŵõra andrõ, ba fahõna dania khõra wa lõ aiwõ, ba wamati andrõ, ba khõ Keriso Yesu, labe’e. (Mat. 25, 21; 19, 28. Luk. 19, 17. 19).

14 III. Da’õ nisuragu khõu, ba udõnadõna, alio usõndra we’amõi khõu; ba na ara ndra’o,

 15 ba ena’õ na õ’ila, he lawisa ba nomo Lowalangi andrõ, ya’ia mbanua Lowalangi sauri andrõ, ehomo zi duhu andrõ ba danedanenia. (Efes. 2, 19 b. t. Heb. 3, 6). 

16 Ba tenga faya, wa no ebua zi no tobini andrõ, ba wolo’õ andrõ khõ Lowalangi: si no tefa’ele’õ ba nõsi niha, nifa duhu’õ ba khõ Geheha, si no mangoroma’õ ya’ia ba mala’ika, nituriagõ ba niha baero, ba zi no faduhu dõdõ niha ba guli danõ, da’õ ni’ohe yaŵa ba lakhõmi, (Yoh. 1, 14. Kol. 2, 9. Rom. 1, 3, 4. Kor. I. 15, 5—9. Efes. 1, 20 b. t.).

 

TIMOTEO I.

FAZA 4

 

I.                  Samaelungu. II. Hadia guna wolo’õ andrõ, khõ Lowalangi. III. Ifarou dõdõ Dimoteo Faulo, ena’õ ihaogõ wangai halõŵõnia andrõ.

 

1 I. Noa sa iŵa’o sibai Eheha, so ba gõtõ dania õsa zondrõi famati andrõ, solo’õ ba geheha samaelungu, ba solo’õ famahaõ mbekhu, (Tim. II. 3, 1 b. t. Fet. II. 3, 3. Yoh. I, 2, 18. Tes. II. 2, 9 b. t.), 

2 bõrõ wamini tõdõ zolau faya andrõ, si no falemba tandra ba dõdõra, (Tim. II. 3, 5), 

3 sanenaŵa fangowalu ba femanga gõ, nifazõkhi Lowalangi, ba wemanga ya’ia, na fao wangandrõ saoha gõlõ, ba zamati andrõ, si no aboto ba dõdõ si duhu. (Kor. I. 7, 28. 36. 38. Kol. 2. 16. 20—23). 

4 Si sõkhi sa fefu nifazõkhi Lowalangi, ba lõ hadia ia nitimba, na fao wangandrõ saoha gõlõ, ba wangoguna’õ ya’ia; (Kor. I. 10. 30. 31);

5 ba daroma li Lowalangi ba ba wangandrõ te’amoni’õ sa’ae ia.

6 II. Na õŵa’õ da’õ ba dalifusõ, ba enoni Keriso ndra’ugõ, si sõkhi, ba fangabõlõu daroma li ba wamati andrõ ba famahaõ si ndruhu, ni’o’õmõ andrõ. (Tim. II. 3, 15). 

7 Ba bõi tehe gamaedola si lõ boto andrõ, fayafaya andrõ; ba famaha ndra’ugõ ba wolo’õ khõ Lowalangi. (F. 1, 4. Tit. 1, 10 b. t.). 

8 Lõ’õ sa bõrõ moguna wamamaha boto andrõ; ba folo’õ khõ Lowalangi andrõ, ba moguna manõ, gofu heza ia, ba no tefabu’u khõnia wa’auri iya’e ba fa’auri dania. (F. 6, 6 b. t. Sin. 34, 10; 37, 4. Mat. 6, 33). 9 Si ndruhu daroma li andrõ, ba no si nangea tafonaha manõ. 10 Ba da’õ sa ma’eregeisi dõdõma, ba fasõndraga, me no madõnadõna khõ Lowalangi sauri andrõ, sangorifi niha fefu, ba ofõna zamati andrõ. (F. 2, 3. 4).

11 Da’õ ŵa’õ khõra, ba ba da’õ fahaõ ira.

12 III. Bõi yamu’ositengagõ ndra’ugõ niha, me ono matua na ndra’ugõ; ya dumaduma ndra’ugõ ba zamati, ba huhuo, ba ba mbuabua, ba ba wa’omasi, ba ba wamati, ba ba wa’ohauhau. (Tit. 2, 7. 15, Kor. I. 16, 11). 

13 Irege so ndra’o, ba bõi bato wombaso sura, ba bõi bato wamarou tõdõ ba famahaõ. 

14 Bõi ositengagõ game’ela andrõ, si so ba dõdõu, nibe’e khõu, ba wama’ele’õ andrõ, me latufa hõgõu tanga satua andrõ. (Tim. II. 1, 6) 

15 Da’õ tõrõtõrõ tõdõu, da’õ fatoutou, ena’õ oroma wa’atedoumõ, ba khõra fefu. 

16 Faigifaigi he wisa ndra’ugõ, ba he õwisa wamahaõ andrõ; bõi bõhõli da’õ. Na õ’o’õ da’õ, ba õ’orifi ndra’ugõ, awõ zamondrongo andrõ khõu. (Hal. zin. 20, 28).

 

TIMOTEO I.

FAZA 5

 

Famobawa lala: I. He lawisa ba lakha mbanua, ba ba wondrorogõ ya’ira, ba II. he lawisa ba zatua mbanua, ba ba wangotu’õ ya’ira, ba III. bõ’õnia, sakhõkhõ.

 

1 I. Niha satua, ba bõi feta’u, ba farou dõdõnia, hulõ na amau, ba ono matua, ba hulõ na talifusõu; (Moz. III. 19, 32); 

2 ira alawe satua, ba hulõ na inau, ba ono alawe, ba hulõ na talifusõu alawe, ni’onangegõ sibai. 

3 Lakha mbanua andrõ, ba fosumange, na si ndruhu lakha mbanua. 

4 Ba na so lakha mbanua si so ono, ba ma ma’uwu, ba ndramufamaha ira ua, wolo’õ huku Lowalangi, ba wondrorogõ soroiyomora, ba ba wamasulõni khõ ndra inara nitemara; da’õ sa zomasi Lowalangi. ( Mark. 7, 10 b. t.). 

5 Ba si ndruhu lakha, si lõ olembata, ba no manõtõna khõ Lowalangi, ba lõ ibõhõi wangandrõ ba fangalulu bongi ma’ṍkhõ. (Luk. 2, 37). 

6 Ba samorege femangamanga, ba ma hadia ia, ba no mate auri. (Fam. 3, 1). 

7 Ba da’õ goroisa, ni’ombakha’õu, ena’õ lõ sinegu khõra. 

8 Ba na so zangositengagõ sahatõ khõnia, ba mendrua manõ na soroiyomonia, ba no i’osilõ’õgõ wamati, ba abõlõ walõsõkhinia, moroi ba walõsõkhi zi lõ mamati. (F. 3, 5). 

9 Na latanõ ba zura dõi lakha mbanua, ba bõi ambõ õnõ ngafulu fakhe wa’atua, si ha sambua donga fõna, ba si sõkhi turia, ba mbuabua, (Rom. 16, 1), 

10 na no i’e’ebua ndraono, na no ibe’ebe’e gõ dome, na no isasai gahe ni’amoni’õ andrõ, na no itolotolo zi tosasa, na no i’alui mbuabua si sõkhi, fefu, hadia ia ngawalõ. (Heb. 13, 2. Yoh. 13, 14). 

11 Na lakha mbanua sambõ fa’atua, ba bõi tehe; na no mohokha ira sa, si fa’udu khõ Keriso, ba edõna ira mõi nihalõ, 

12 ba lalu’i dahi andrõ, wa no farõi ira, ba nifabu’u andrõ, si fõfõna. 

13 Ba fabõbõ ba da’õ, wa lafamaha ira wangerongero lõ mohalõŵõ, ba tenga ha fa lõ mohalõŵõ, wa’oya gõi mbewe, lahalõ khõra zi tenga khõra, lalau huohuo si lõ gõna. (Amaed. 10, 19. Tes. II. 3, 11). 

14 Andrõ omasido, na mõi nihalõ lakha mbanua sambõ fa’atua, na mo’ono, na tobali samatõrõ soroiyomora ira, ba na lõ lafobõrõ wanandraŵaisi ba zi fa’udu andrõ; (Kor. I. 7, 9. 39. 40); 

15 noa sa aheta õsa, la’o’õ Zatana.

16 Na so zamati, ira alawe, si so lakha mbanua, ba yamurorogõ, ba bõi mõi noro dõdõ mbanua, fa la’ila latolo zi ndruhu lakha mbanua.

17 II. Satua andrõ, sangehaogõ fangai halõŵõra, ba nifodua winaeta zumangera, ba mendrua manõ ba zi so halõŵõ fahuhuosa ba famahaõ. (Tes. I. 5, 12. 13). 

18 Noa sa so ba zura: ”Bõi fosare’a mbawa gõrõbao samõbõrõ fakhe,” ba: ”No sinangea labe’e luo ba zohalõŵõ.” (Moz. V. 25, 4. Mat. 10, 10). 

19 Bõi tema na la’adugõ zatua, na tenga darua, ba ma datõlu zi so ba mbõrõ. (Moz. V. 19, 15). 

20 Si so lalõ otu’õ, ba zi so sato fefu, ena’õ ata’u gõi dánõ bõ’õ. (Mat. 18, 17. Gal. 2, 14).

21 Uŵa’õ sibai khõu, fõna Lowalangi, ba fõna Keriso Yesu, ba fõna mala’ika nitutuyu andrõ, ena’õ lõ olifu’õ da’õ, ena’õ lõ aõsõ õ’etu’õ huku, ba ena’õ lõ ebua dõdõu zambuana, wolau hadia ia, fefu. (F. 6, 13. 14).

22 III. Bõi aõsõ tufa tanga hõgõ niha, gofu ha niha ia, ba bõi fabaya ndra’ugõ ba horõ niha bõ’õ; bõi tobaya khõu hadia ia zi lõ sõkhi. (F. 3, 10. Kor. II. 6, 14). 

23 Bõi sa’ae ha sambalõ idanõ õbadu, õfake sa nagu ma’ifu, ba dalumõ andrõ, ba me asese mofõkhõ’õ. 

24 So õsa niha soroma horõ, ihulõ huku, ba so gõi, ba moroi furi. (Gal. 5, 19 b. t.). 

25 Si manõ gõi mbuabua si sõkhi andrõ, oroma, ba ba zi tenga si manõ, ba tebai sa atṍ tobini dania. (Gal. 5, 22 b. t.).

 

TIMOTEO I.

FAZA 6

 

I.                  Oroisa ba zawuyu. II. Bõi fayaŵa niha Keriso ba bõi faguagua ba bõi la’omasi’õ gana’a. III. Famarou tõdõ Dimoteo.

 

1 I. Ha wa’ato zawuyu andrõ, solu’i kalo mbagi andrõ, ba ndramu’oigõ dõdõra wamosumange sokhõ ya’ira, fa bõi tetandraŵaisi dõi Lowalangi, awõ wamahaõ andrõ. (Efes. 6, 5 b. t. Tit. 2, 9. 10).

2 Ba si so sokhõ samati, ba bõi ndramu’ositengagõ, me no talifusõ; mendrua manõ sa lahaogõ wangai halõŵõra, me no samati ba ni’omasi’õ zoguna halõŵõ si sõkhi andrõ. Ba da’õ fahaõ ira, ba da’õ farou dõdõra. (Filem. 16).

3 II. Na so zi tenga si manõ famahaõ, si lõ molo’õ si ndruhu andrõ, niŵa’õ Zo’aya ya’ita, Yesu Keriso, ba famahaõ si faudu ba wolo’õ andrõ, khõ Lowalangi, (Gal. 1, 6 b. t. Tim. II. 1, 13), 

4 ba si fayaŵa da’õ, lõ saboto ba dõdõnia hadia ia, no mofõkhõ ia, ni’alualui dõdõ andrõ ba faguaguasa wõkhõnia, ba ba da’õ tumbu dania wa’afõkhõ dõdõ, ba fasosota, ba famaudu dõdõ, si lõ sõkhi, (F. 1, 4. 7. Tim. II. 2, 14),

5 ba faguaguasa, si lõ aetu, ba niha si no tekiko era’era, si no taya si duhu, sanguma’õ tõdora fangalui ana’a wolo’õ andrõ, khõ Lowalangi. (Tim. II. 3, 5. 7. 8). 

6 Ba si ndruhu, fangalui sebua wolo’õ andrõ, na fao wa’ahono dõdõ ba zi ho so, (F. 4, 8. Sin. 37, 16. Heb. 13, 5). 

7 Lõ’õ sa hadia ia ni’oheda ba guli danõ andre, me awena so ita, me tebai gõi ta’ohe hadia ia, na tarõi guli danõ. (Yob. 1, 21. Sin. 49, 18). 

8 Ba na so khõda mbalazo, awõ nukha, ba noa khõda da’õ. (Amaed. 30, 8 b. t.). 

9 Ba sedõna mangebua ana’a, ba gõna fanandraigõ, ba tandraŵa, ba oya wangisõ fayafaya ba fangisõ fama’ala, sangahanigõ niha ba wa’atekiko, ba ba wa’amate. (Amaed. 23, 4 b. t.; 28, 20. Mat. 13, 22).

10 Noa sa baya ngawalõ hadia ia zi lõ sõkhi fefu wa’omasi gana’a andrõ, ba no elungu õsa, no larõi wamati, wangalui da’õ, ba no oya nifobõrõra khõra fa’afõkhõ. (Luk. 12, 15 b. t.).

11 III. Ba ya’ugõ, niha Lowalangi, ba timba zi mane da’õ; ba alui wa’atulõ dõdõ, ba folo’õ andrõ, khõ Lowalangi, ba famati, ba fa’omasi, ba fanaha tõdõ, ba fa’ebolo dõdõ. (Tim. II. 2, 22). 

12 Lau fasõndra, fasõndrata si sõkhi andrõ, fasõndrata wamati; ra’u wa’auri si lõ aetu andrõ, ba nikaoni ya’ugõ, ba ba nilaumõ famaduhu’õ si sõkhi andrõ, ba zi no ato ba mbõrõ. (F. 1, 18. Tim. II. 4, 7 b. t. Fil. 3, 12 b. t.). 

13 Uŵa’õ khõu fõna Lowalangi, sangorifi fefu hadia ia, ba fõna Keriso Yesu, si no molau famaduhu’õ si sõkhi andrõ, fõna Wondrio Filato andrõ: (F. 5, 21. Mat. 27, 11. Yoh. 18, 37): 

14 O’õ goroisa andrõ, bõi gõna hadia ia, bõi falukha zinegu, irugi wa’ato’ele Zo’aya ya’ita andrõ, Yesu Keriso, (Tes. I. 3, 13), 

15 ni’oroma’õ Zamatõrõ andrõ dania, na inõtõnia, Samatõrõ andrõ, sohahau tõdõ, si ha samõsa, razo razo andrõ, ba So’aya sokhõ, (Fam. 19, 16), 16 si so fa lõ mate, si ha khõnia, si so ba haga andrõ, ba zi tebai mõi niha, si lõ irai i’ila niha, ba si tebai gõi i’ila. Ya khõnia zumange ba fa’abõlõ si lõ aetu. Yaduhu. (Yoh. 5, 26. Moz. II. 33, 20). 

17 Ba zi so ana’a, ba guli danõ andre, ŵa’õ, bõi fayaŵa ira, bõi ndramudõnadõna ba gana’a, si lõ aro andrõ, khõ Lowalangi ndramudõnadõna, si lõ mangambõsi khõda, wame’e hadia ia, ba wangoguna’õ ya’ia; (Yob. 31, 24. Mat. 10, 24. Luk. 12, 20); 

18 ndramutolo nawõra, yafahõna khõra mbuabua si sõkhi, bõi atali ira, ya’ahakhõ dõdõra nawõra; (Heb. 13, 16. Yoh. 3, 21); 

19 ba wangõhõna khõra girõgirõ danedane si sõkhi, ba gõtõ dania, ena’õ lakhamõ zi ndruhu fa’auri andrõ. (Mat. 6, 20. Luk. 16. 9). 

20 He Timoteo! irõ’irõ’õ nibe’e khõu andrõ, bõi babaya huohuo andrõ si lõ boto, si lõ guna andrõ, ba amadõniŵa wa’atuatua faya andrõ; (Tim. II. 1, 14; 2, 14. 16); 

21 so õsa zi no molo’õ da’õ, ba no elungu, no larõi wamati. — Yafalukha’õ wa’ebua dõdõ! (F. 1, 6. 19. Tim. II. 4, 22).