SURA TESALONIKA I

Table of Contents

 

SURA TESALONIKA I

 

TESALONIKA I.

FAZA 1

 

I.                  Fangowai Waulo. II. Fangandrõ saoha gõlõ, ba fa’omuso dõdõ, ba wamati mbanua Desalonika andrõ.

 

1 I. Faulo zanura da’e ba Siliwano ba Timoteo, ba mbanua andrõ, ba Desalonika, ba khõ Lowalangi Ama, ba ba khõ Zo’aya, Yesu Keriso. Yafalukha ami wa’ebua dõdõ ba fa’ohahau dõdõ. (Tes. II. 1, 1. 2. Hal. zin. 17, 1. 10).

2 II. Lõ mamalõmalõ wangandrõma saoha gõlõ khõ Lowalangi. (Tes. II. 1, 3. Kol. 1, 3), 

3 ba khõmi andrõ fefu, itõrõ lima ami, na mangandrõga; lõ aetu wa itõrõ tõdõma mbuabua wamatimi andrõ, ba fa’owõlõ’õlõ wa’omasimi, ba fa’anau gõlõ wanõtõnami andrõ, khõ Zo’aya ya’ita, Yesu Keriso, fõna Namada Lowalangi, (F. 5, 8. Kor. I. 13, 13), 

4 me no aboto ba dõdõma, wa no nitutuyu ami, ya’ami ira talifusõ, ni’omasi’õ Lowalangi, (Tes. II. 2, 13 b. t.), 

5 me no irugi ami turia somuso dõdõ andrõ, khõma, tenga ha ba li, no fao gõi wa’abõlõ ba Eheha ni’amoni’õ, ba no abõlõ wa lõ aiwõ; mi’ila sa he wisa ndra’aga, ba khõmi andrõ, bõrõ ami. (F. 2, 13 b. t. Kor. I. 2, 4. 5). 

6 Ba no tobali solo’õ khõma ami ba solo’õ khõ Zo’aya, me no mifonaha daroma li andrõ; no oya zi fao famakao, ba no omuso dõdõmi, moroi khõ Geheha ni’amoni’õ; (Kor. I. 11, 1. Hal. zin. 17, 5 b. t.); 

7 ba no tobali famaedo ami ba zamati fefu, ba Makedonia ba ba Nakhaya. 

8 Moroi ba khõmi sa terongo daroma li Zo’aya andrõ, tenga ha ba Makedonia ba ba Nakhaya, no ba mbanua bõ’õ fefu teturia wamatimi ba Lowalangi, tobali alakha lõ’õ sa’ae itõrõ lima. (Kor. II. 12, 15). 

9 Ya’ira sa zanutunõ, he wisa we’amõima ba khõmi, ba he wisa wamulimi ya’ami ba Lowalangi, wondrõi adu andrõ, ba wolo’õ khõ Lowalangi sauri andrõ, si ndruhu, (Hal. zin. 18, 3; 20, 18 b. t. 34), 

10 ba ba wombalombaloi Ononia andrõ, moroi ba zorugo, nisusuginia moroi ba ngai zi mate, Yesu, sangefa’õ ya’ita ba wõnu dania andrõ. (F. 4, 16. Fil. 3, 20; Rom. 5, 9).

 

TESALONIKA I.

FAZA 2

I.                  Lõ farõi Waulo, i’omasi’õ mbanua Desalonika andrõ, hulõ wa’omasi nama nononia. II. Famonahara turia somuso dõdõ andrõ. III. Fehulu dõdõ Waulo khõra.

 

1 I. Mi’ila sa, ya’ami ira talifusõ, wa no tenga zayazaya gõlõ we’amõima ba khõmi. (F. 1, 5, 9). 

2 Noa sa ma’abe’e’õ ndra’aga, ba khõ Lowalangida, me no mataõgõ ua wamakao ba me no la’osiwawõi ndra’aga, ba Wilifi, nirongomi, ba wangombakha khõmi turia somuso dõdõ andrõ khõ Lowalangi; no oya zi fao famakao. (Hal. zin. 16, 22 b. t.; 17, 5).

3 Tenga sa moroi ba wa’elungu wangombakha’õma, ba tenga moroi ba walõsõkhi, ba tenga ba wa’onekhe; (Kor. II. 2, 17); 

4 me no iŵa’õ Lowalangi tola ndra’aga, tola ibe’e ba dangama duria somuso dõdõ andrõ, ba muhede ndra’aga, tenga afuma la’omasi’õ ndra’aga niha, afuma i’omasi’õga Lowalangi andrõ, sanandraigõ tõdõma. (Tim. I. 1, 11. Gal. 1, 10. Nga’ot. I. 29, 17). 

5 Lõ’õ sa marai masuno niha, wondrõnisi ya’ira, mi’ila, ba lõ nibini’õma tõdõma, wangalui harema; Lowalangi zangila. (Kor. II. 4, 2; 12. 14). 

6 Lõ’õ gõi ni’aluima sumange ba niha, he ba khõmi, ba he ba niha bõ’õ; tola sa ma’ebua’õ ndra’aga mena’õ, me no sinenge Keriso ndra’aga; (Yoh. 5, 41. 44); 

7 ba no mahaogõhaogõ, ba khõmi, hulõ zamaenu ono, ba wondrorogõ ononia. 

8 Si manõ wehulu dõdõma khõmi, ba no aoha gõlõma, tenga ha turia somuso dõdõ andrõ khõ Lowalangi mafa’ema khõmi, nosoma gõi, ba no khõmi, me no omasiga ami. (Kor. II. 12, 15).

9 Dõrṍ itõrõ tõdõmi, ya’ami, ira talifusõ, wa’erege dõdõma ba famakaoma andrõ; bongi ma’ṍkhõ mohalõhalõŵõ ndra’aga, ena’õ samõsa lõ’õ, ba khõmi, sabu tõdõ ba khõma andre, me maturiagõ khõmi duria somuso dõdõ andrõ, khõ Lowalangi. (Hal. zin. 18, 3; 20, 18 b. t. 34). 

10 No anehe ami ba no anehe Lowalangi wa’ohauhauma ba fa’atulõ dõdõma andrõ, awõ wa no lõ sinegu khõma, ba khõmi samati andrõ. 11 Mi’ila he wisa wango’ouma ya’ami, dozi ami, ba he wisa wamarouma tõdõmi, hulõ nama khõ nononia, (Kor. I. 4, 14. 15),

12 ba he wisa wamaduhu’õma khõmi, ena’õ mihaogõ mbuabuami, ena’õ si nangea khõ Lowalangi andrõ, sogaoni ya’ami banuania, ba ba lakhõmi andrõ khõnia. (Efes. 4, 1).

13 II. Andrõ lõ mabato gõi wangandrõ saoha gõlõ khõ Lowalangi, me no mifonaha daroma li Lowalangi andrõ, nirongomi khõma, tenga si mane taroma li niha, no si mane si ndruhunia, si mane taroma li Lowalangi, si no abõlõ gõi ba dõdõmi, ba dõdõ zi no mamati andrõ. (F. 1, 2—6). 

14 Noa sa solo’õ ami, ya’ami ira talifusõ, no mi’o’õ ba mbanua Lowalangi andrõ, si so ba Yudaia, ba khõ Keriso Yesu, me no mitaõgõ gõi wamakao si manõ, ba dalifusõmi, si mane ya’ira ba niha Yehuda, (Hal. zin. 17, 5. 13; 8, 1), 

15 si no mamunu gõi So’aya, Yesu, awõ zama’ele’õ andrõ, si no molohi ya’aga gõi; lõ omasi Lowalangi ira, ba no fa’udu ira ba niha fefu; (Hal. zin. 3, 15; 7, 52);

16 sanenaŵa ya’aga ba wangombakha ba niha baero, ena’õ te’orifi ira, ba wamõnõkhi horõra; lõ mamalõmalõ. Ba no gõna ira fõnu Lowalangi, fondrege. (Hal. zin. 13, 45; 14, 2. Dan. 9, 26. 27).

17 III. Ba ya’aga andre, ya’ami ira talifusõ, me lõ ya’ami khõma, si lõ ararā — fa lõ i’ila ami hõrõma, tenga fa lõ ba dõdõma ami — ba no humulu sibai dõdõma, ena’õ ta’ila bawa ita, omasi sibai ndra’aga. 

18 Andrõ mõiga khõmi mena’õ, ya’odo andre, Faulo, samuza ba samuza tõ zui, ba no itimbaga Satana. 

19 Ha niha sa dõtõnafõma ba fa’omuso dõdõma ba takulama, fanuno ya’aga? Tenga ya’ami gõi, fõna Zo’aya ya’ita andrõ, Yesu, ba wa’asonia andrõ dania? (Kor. II. 1, 14). 

20 Ya’ami sa lakhõmima ba fa’omuso dõdõma. (F. 3, 9).

 

TESALONIKA I.

FAZA 3

 

I.                  Sosó dõdõ Waulo mbanua Desalonika andrõ. II. Irara dõdõnia, me lõ tebulõ wolo’õra. III. Fangandrõnia, salahira.

 

1 I. Andrõ edõnaga, ha ya’aga zi torõi furi ba Natena, me no tebai mataha sa’ae, (Hal. zin. 17, 15. 16), 

2 ba no mafatenge Dimoteo andrõ, talifusõma, enoni Lowalangi andrõ, ba duria somuso dõdõ andrõ khõ Keriso, ba wangabe’e’õ ya’ami, ba ba wamarou tõdõmi, ba wamatimi andrõ, (F. 1, 1), 

3 ena’õ lõ sangiwa tõdõ, ba wamakao andrõ, noa sa mi’ila wa no nihonogõi khõda da’õ. (Efes. 3, 13. Tim. II. 3, 12).

4 Me soga khõmi gõi sa’ae, ba no mahõnagõ maŵa’õ khõmi, gõna dania ita famakao, ba no itõrõ ba no mi’ila. (Hal. zin. 14, 22).

5 Andrõ gõi wa no ufatenge, me tebai utaha sa’ae, ba wamaigi famatimi andrõ, ma no itandraigõ ami sanandraigõ andrõ, ba ma no tobali zayazaya gõlõ halõŵõma andrõ. (Mat. 4, 3).

6 II. Ba iada’e, me no mangawuli khõma Dimoteo, moroi ba khõmi, me no ituriagõ khõma wa’asõkhi wamatimi ba fa’asõkhi wa’omasimi, awõ wa lõ’õ manõ olifu ami ndra’aga, awõ wehulu dõdõmi, ba wangila ya’aga, si mane fehulu dõdõma, 

7 ba wangila ya’ami; andrõ wa no terara dõdõma, ba khõmi andrõ, ya’ami ira talifusõ, ba wa’afõkhõ andrõ fefu, ba ba wamakao andrõ khõma,

8 bõrõ wamatimi andrõ; noa sa auri ndra’aga iada’e, na abe’e ami ba khõ Zo’aya.

9 III. Hadia sa zulõ, si tola mabe’e khõ Lowalangi, fangandrõ saoha gõlõnia, ba khõmi andrõ, ba wa’omuso dõdõma andrõ fefu, ba khõmi, fõna Lowalangida? (F. 2, 19. 20. Yoh. III. 4). 

10 Bongi ma’õkhõ ma’abõlõgõ sibai wangandrõ, ena’õ fa’ila bawa ita, ba ena’õ ma’asiwai hadia ia zambõ na, ba wamatimi andrõ. (Rom. 1, 10. 11). 

11 Ba ya’ia, Lowalangi, Amada, ba yamufolala ndra’aga khõmi ba So’aya ya’ita andrõ, Yesu. 

12 Ba khõmi, ba yamudou’õ So’aya wa’omasimi nawõmi ba fa’omasimi niha fefu, si mane fa’omasima ami gõi, ena’õ fahõna, (F. 4, 9. 10), 

13 ba wanga’aro’õ tõdõmi, ena’õ lõ sinegu, ba wa’ohauhau, fõna Namada Lowalangi, ba wa’aso Zo’aya ya’ita, Yesu, na fao ni’amoni’õ andrõ khõnia, fefu. Yaduhu. (F. 5, 23. Tes. II. 1, 7. 10).

 

TESALONIKA I.

FAZA 4

 

I.                  Famarou tõdõ, ba wa’ohauhau ba ba wa’adõlõ dõdõ, ba II. ba wangomasi’õ talifusõ. III. Fangombakha he wisa zi no mate andrõ, ba fondrara tõdõ ba da’õ.

 

1 I. Ba hadia na baero õ, ya’ami ira talifusõ, ba ma’andrõ khõmi, ba mafarou dõdõmi, ba khõ Zo’aya ya’ita andrõ, Yesu, ena’õ tedou manõ na wanõrõmi lala andrõ, nirongomi khõma, he wisa ia, he wisa zomasi Lowalangi, si mane fanõrõmi sa’ae. (Kor. I. 15, 58). 

2 Noa sa mi’ila hadia goroisa, nibe’ema khõmi, moroi khõ Zo’aya ya’ita andrõ, Yesu. (Tes. II. 3, 6). 

3 Da’õ sa wa’omasi Lowalangi fangohauhau’õ ya’ami, ena’õ lõ mibabaya wohorõ, (Kor. I. 6, 18), 

4 ena’õ i’ila i’alui ndrongania zamõsana, ena’õ ohauhau, ba ena’õ lõ hadia ia zaila ita. (Kor. I. 6, 13 b. t.). 5 Bõi omasi ami mohorõhorõ, si mane niha baero andrõ, si lõ mangila Lowalangi. (Rom. 1, 24). 

6 Ba fa bõi ilimo dalifusõnia zamõsana, ba waniaga, ba bõi i’alani; oi sa nihuku Zo’aya dania da’õ, si mane ni’ombakha’õma khõmi sa’ae gõi, si mane nifaduhu’õma khõmi. (Kor. I. 6, 7. 8). 

7 Tenga sa ba walõsõkhi, me ikaoni ita Lowalangi, ba wangohauhau’õ ya’ita ikaoni ita. (Fet. I, 1, 14—16).

8 Andrõ sa, na so zangositengagõ da’õ, ba tenga niha i’ositengagõ, Lowalangi i’ositengagõ, same’e gõi Eheha ni’amoni’õ andrõ khõmi. (Luk. 10, 16. Kor. II. 5, 5).

9 II. Ba ba wangomasi’õ talifusõ andrõ, ba alakha lõ masura khõmi hadia ia; ya’ami andrõ, ba noa sa ifahaõ Lowalangi, ena’õ faoma mi’omasi’õ nawõmi. (F. 3, 12. Rom. 12, 10. Yoh. I. 2, 27). 

10 Ba milau sa’ae da’õ, ba dalifusõ andrõ, fefu, ba danõ Makedonia ma’asagõrõ. Ba mafarou dõdõmi, ya’ami ira talifusõ, ena’õ todoudou manõ na khõmi, (F. 1, 7; 3, 12), 

11 ba ena’õ mi’alui, fa ahono ami, fa ifaigi zamõsana hadia ia khõnia, ba ihalõ halõŵõnia, si mane niŵa’õma khõmi; (Tes. II. 3, 6—12. Efes. 4, 28);

12 ena’õ lõ sinegu zi so baero andrõ, khõmi, ba ena’õ lõ moguna khõmi niha bõ’õ. (Fet. I. 2, 12).

13 III. Ba lõ edõna mabini’õ khõmi, ya’ami ira talifusõ, he wisa ba zi no mate andrõ, fa bõi abu dõdõmi, si mane tánõ bõ’õ andrõ, si lõ fanõtõna. (Kor. I. 15, 16 b. t.). 

14 Na mamati ita sa, no mate Yesu ba no ifuli auri, ba ba zi manõ gõi ifafatõrõ’õ khõ Yesu Lowalangi zi no mate andrõ, awõnia. (Kor. I. 6, 14). 

15 Taroma li Lowalangi sa niŵa’õma andre khõmi: ya’ita andre, sauri, si tosai, irugi wa’aso Zo’aya andrõ, ba tenga fõna zi no mate ita dania. (Kor. I. 15, 23. 51 b. t.). 

16 Ya’ia dania, So’aya, zi mõi mitou, moroi ba zorugo, na so we’ao andrõ, na mu’ao zatua mala’ika andrõ, na tefolī dorofe Lowalangi andrõ, ba ofõna maoso zi no mate andrõ, ba khõ Keriso. (Tes. II. 1, 7 b. t. Mat. 24, 31). 

17 Awena dania tefazaŵa ita, ya’ita sauri, si tosai, ba lawuo, fao ita khõra, ba wamaondragõ So’aya, ba dalu mbanua; ba tobali awõ Zo’aya ita, si lõ mamalõmalõ. (Yoh. 12, 26; 14, 3). 

18 Andrõ faoma mibe’e fondrara dõdõ nawõmi daroma li andre.

 

TESALONIKA I.

FAZA 5

 

I.                  Lõ ta’ila ginõtõ wa’aso Zo’aya andrõ. II. Bõi mõrõmõrõ ita, nibazebaze’õ. III. Famarou tõdõ, bõ’õnia. IV. Fango’ozui sura.

 

1 I. Ba ba mbaŵania, ba ba ginõtõnia andrõ, ba lõ moguna khõmi lasura khõmi hadia ia, ya’ami ira talifusõ. 2 Ya’ami sa’ae zangila sibai hulõ wa’aso zanagõ, ba zi bongi, si manõ wa’aso mbaŵa Zo’aya andrõ dania. (Fet. II. 3, 10. Mat. 24, 3. 36. 43 b. t.) 3 Na laŵa’õ sa’ae dania: No atulõ, no ahono; awena dania i’ozumagõ ikhamõ ira fa’atekiko, hulõ si mane fa’afõkhõ hulu ba zanabina, ba tebai moloi ira. (Yer. 6, 14. Luk. 21, 35).

4 II. Ba ya’ami, ira talifusõ, ba tenga si so ba zogõmigõmi, fa ikhamõ ami baŵa andrõ hulõ zanagõ. 5 Ono haga sa ami fefu, ono zi ma’õkhõ; tenga ba zi bongi so ita, ba tenga ba zogõmigõmi. (Efes. 5, 8).6 Ba bõi mõrõmõrõ ita, si mane tánõ bõ’õ andrõ, ena’õ si no maoso ita, si lõ mabumabu. (Rom. 13, 11 b. t. Fet. I. 5, 8; 4, 7). 7 Si mõrõ sa, ba ba zi bongi mõrõ, ba si mabu andrõ, ba ba zi bongi mabu. 8 Ba ya’ita, me no ba zi ma’ṍkhõ ita, ba bõi mabumabu ita, ta’obaru gõrõba famati andrõ, ba õrõba fa’omasi, ba ta’otakula dakula andrõ, fanõtõna fangorifi. (F. 1, 3. Efes. 6, 14—17). 9 Tenga sa ba wamatõrõ fõnu khõda ihonogõi ita Lowalangi, ha ba wanõndra fangorifi, ba khõ Zo’aya ya’ita, Yesu Keriso, (Tim. I. 2, 4. Tes. II. 2, 14), 10 si no mate salahida, ena’õ auri ita, fao khõnia, awõnia, he si no maoso, ba he si mõrõ ita. (Rom. 14, 7—9). 11 Andrõ faoma mifaraou dõdõ nawõmi, ba faoma mitolo nawõmi, si mane folaumi sa’ae gõi. (Heb. 10, 24 b. t.).

12 III. Ba ma’andrõ khõmi, ya’ami ira talifusõ, bõi zi lõ aboto ba dõdõmi zi no erege tõdõ wohalõŵõ ba khõmi, ba fõnami andrõ, ba khõ Zo’aya, samobawa lala khõmi. (Tim. I. 5, 17); 13 ba bõi zi lõ mifosumange ira, ba mi’omasi’õ sibai ira, bõrõ halõŵõra andrõ. Bõi mifaguagua khõ nawõmi! (Heb. 13, 17). 14 Ba mafarou dõdõmi, ya’ami ira talifusõ, mitegu zi lõ atulõ folo’õ huku, mirara dõdõ zabu tõdõ; mitolo zambõ fa’abõlõ, mibologõ dõdõmi khõra fefu. (Tes. II. 3, 6. 11 b. t. Gal. 6, 1. 2). 15 Mifaigi, fa bõi falukha zanulõni si lõ sõkhi awõnia si lõ sõkhi; ba bõi mifamalõmalõ wangalui folau si sõkhi, he khõ nawõmi, ba he ba niha bõ’õ fefu. (Rom. 12, 9. 17. Fet. I. 3, 9—11). 16 Bõi mamalõmalõ wa’omuso dõdõmi. (Fil. 4, 4). 17 Bõi aetu’aetu wangandrõmi. (Luk. 18, 1). 18 Fefu hadia ia, ba mi’andrõ saoha gõlõ; da’õ sa zomasi Lowalangi, ba khõ Keriso Yesu, ba khõmi. (Efes. 5, 20). 

19 Bõi mibunu Geheha andrõ. (Kor. I. 14, 39. Tim. I. 4, 14). 

20 Bõi mi’ositengagõ wama’ele’õ andrõ. (Kor. I. 14, 1 b. t.). 

21 Mitandra fefu, hadia ia, ba si sõkhi, ba mihalõ khõmi. (Kor. I. 14, 29. Yoh. I. 4, 1).

22 Si lõ lõkhi, fefu, hadia ia ngawalõ, ba bõi mibabaya. (F. 4, 12).

23 IV. Ba ya’ia, Lowalangi wa’ohahau dõdõ andrõ, ba yamufaulugõ wangehao ya’ami, ena’õ terorogõ gehehami, awõ nosomi, awõ mbotomi, fa lõ hadia ia, fa lõ sinegu, irugi wa’aso Zo’aya ya’ita andrõ, Yesu Keriso! (F. 3, 13. Heb. 13, 20 b. t. Kor. I. 1, 8). 

24 Lõ farõi zogaoni ya’ami andrõ, ya’ia gõi zamalua dania. (Tes. II. 3, 3. Kor. I. 1, 9). 

25 MI’angandrõ, salahima, ya’ami ira talifusõ. (Tes. II. 3, 1). 

26 Mi’owai dalifusõ fefu fa’agosa bawa ni’amoni’õ andrõ. (Rom. 16, 16). 

27 Ube’e ba hõlu ami, khõ Zo’aya, fa mifabaso’õ zura andre, ba dalifusõ fefu. 

28 Yafalukha ami wa’ebua dõdõ Zo’aya ya’ita, Yesu Keriso. (Rom. 16, 20. 24).