SURA TESALINIKA II

Table of Contents

 

SURA TESALINIKA II

 

TESALONIKA II.

FAZA 1

 

I.                  Fangowai Waulo. II. Fa’omuso dõdõnia, me no abe’e mbanua Desalonika andrõ, ba wamakao andrõ fefu. III. Fangandrõnia, salahira.

 

1 I. Faulo zanura da’e ba Siliwano ba Timoteo, ba mbanua andrõ ba Desalonika, ba khõ Namada, Lowalangi, ba ba khõ Zo’aya, Yesu Keriso. (Tes. I. 1, 1). 2 Yafalukha ami wa’ebua dõdõ, khõ Namada Lowalangi ba khõ Zo’aya, Yesu Keriso. (Kor. I. 1, 3).

3 II. Mo’õmõ ndra’aga khõ Lowalangi, lõ mafamalõmalõ wangandrõ saoha gõlõ khõnia, bõrõ ami, ya’ami ira talifusõ; si manõ zi nangea, me manõi sibai wamatimi, ba dozi ami, ba tedoudou wa’omasimi nawõmi. (Tes. I. 1, 2. 3; 3, 6). 

4 Tobali masuno ndra’aga, ba mbanua Lowalangi misa, ba khõmi andrõ, bõrõ wa’anau gõlõmi ba famatimi andrõ, ba wolohi andrõ fefu, khõmi, ba ba wamakao andrõ, nitahami. (Tes. I. 2, 14. 19). 

5 Tandra wanguhuku Lowalangi andrõ da’õ, fanguhuku si no atulõ, wa tola khõmi dania mbanua Lowalangi andrõ, da’õ sa gõi mbõrõ, wa mitaha wamakao. (Fil. 1, 28. Fet. I. 4, 17).

6 Me atulõ sa atõ ba Lowalangi, tesulõni wamakao ba zamakao ya’ami; (Rom. 12, 19); 

7 ba khõmi, nifakao andrõ, ba fangokafu dõdõ, awõma, na to’ele dania Zo’aya, Yesu, moroi ba zorugo, awõ mala’ika wa’abõlõnia andrõ, (Fet. I. 4, 13. Tes. I. 4, 16), 

8 ba holahola galitõ, na ilau mbalõ ba zi lõ aboto ba dõdõ Lowalangi, ba ba zi lõ molo’õ turia somuso dõdõ andrõ, khõ Zo’aya ya’ita, Yesu. 

9 Gõna fotu dania ira, fa’atekiko si lõ aetu, moroi ba mbawa Zo’aya, ba moroi ba lakhõmi wa’abõlõnia andrõ, (Mat. 25, 41. 46),

10 na so ia, ba wamolakhõmi ya’ia, ba niha ni’amoni’õ andrõ khõnia, ba ba wame’e sahõlihõli dõdõ ya’ia, ba zamati andrõ, fefu — me no faduhu dõdõmi, ba wamaduhu’õma andrõ — na luo da’õ. (Hal. zin. 1, 11. Kol. 3, 4).

11 III. Andrõ gõi lõ mafamalõmalõ wangandrõ, salahimi, ena’õ ibe’e Lowalangida, si nangea nikaoni ami, ba ena’õ iforege wamo’ahonoa fa’omasimi zi sõkhi, awõ halõŵõ wamati andrõ. (Tes. I. 2, 3; 2. 12), 

12 ena’õ tefolakhõmi dõi Zo’aya ya’ita andrõ, Yesu, ba khõmi, ba ena’õ tefolakhõmi ami, ba khõnia, dali wa’ebua dõdõ Lowalangida andrõ ba fa’ebua dõdõ Zo’aya, Yesu Keriso.

 

TESALONIKA II.

FAZA 2

 

I.                  Fangawuli Keriso ba samaelungu sebua andrõ, fõnania. II. Famarou tõdõ, fa bõi mangiwa.

 

1 I. Ba ma’andrõ khõmi, ya’ami ira talifusõ, ba wa’aso Zo’aya ya’ita, Yesu Keriso andrõ, ba ba wangowulo ya’ita khõnia, (Tes. I. 4, 15—17),

2 fa bõi alio mangiwa dõdõmi, ba bõi alio tokea, he ba geheha, ba he ba daroma li, ba he ba zura, hulõ na ya’aga zama’ohe’õ, hulõ na no irugi luo Zo’aya andrõ. (Tes. I, 5, 2. Mat. 24, 4 b. t.). 

3 Bõi ifaelungu ami niha, gofu he wisa; lõ’õ sa tola lõ itõrõ ua fa’aheta andrõ, ba lõ tola lõ oroma ua niha golalõŵa andrõ, ono wa’atekiko andrõ, (Mat. 24, 10—12. Tim. I. 4, 1 b. t. Fet. II. 3, 3 b. t. Dan. 7, 25. Yoh. I. 2, 18), 

4 si fa’udu andrõ, sangebua’õ ya’ia, moroi ba zotõi Lowalangi ba moroi ba zotõi ni’amoni’õ fefu, tobali dumadao ia ba gosali Lowalangi andrõ, ba ibali’õ Lowalangi ia. (Dan. 11, 36. Yes. 14, 13. 14. Rom. 13, 5 b. t.). 

5 Hadia, lõ itõrõ tõdõmi, wa no uŵa’õ khõmi da’õ, me sodo khõmi na? 

6 Ba iada’e, ba no mi’ila hadia zanaha na inõtõ wa’oromania andrõ. 

7 Noa sa abõlõ zi tobini andrõ, olalõŵa andrõ, hatṍ sanaha andrõ, irege da’e, niheta. (Yoh. I. 4, 3). 

8 Ba awena dania oroma zo’olalõŵa andrõ, nifakiko Zo’aya, Yesu, dania, Eheha mbawania andrõ, nifufunia dania lakhõmi wa’asonia andrõ. (Yes. 11, 4. Dan. 7, 11).

 9 Fa’abõlõ Zatana wama’aso ya’ia, oi so wa’abõlõ ba tandra ba ila’ila faya, (Yoh. 8, 44. Mat. 24, 24. Fam. 13, 13 b. t.), 

10 ba oi so wamaelungu horõ andrõ, ba zi tetibo andrõ, sulõ wa lõ nifonahara fa’omasi zi duhu andrõ, fangorifira mena’õ. (Kor. II. 4, 3. 4). 

11 Ba andrõ ifa’ohe’õ khõra Lowalangi zabõlõ wamaelungu, ena’õ faduhu dõdõra ba waya andrõ. (F. 2, 3. 9. Mat. 24, 5. 11. Raz. I. 22, 22), 12 ena’õ tehuku fefu zi lõ faduhu tõdõ ba zi duhu andrõ, si no omasi si lõ atulõ. (Yoh. 3, 18).

13 II. Ba ya’aga, ba mo’õmõ khõ Lowalangi, bõi mamalõmalõ wangandrõma saoha gõlõ khõnia, bõrõ ami, ya’ami ita talifusõ, ni’omasi’õ, me no itutuyu ami Lowalangi, iotarai mbõrõta, ba wangorifi andrõ, ba wangohauhau Geheha andrõ, ba ba wamati ba zi duhu, (Efes. 1, 4),

14 ba nikaoninia ya’ami, turia somuso dõdõ andrõ khõma ba wangalui lakhõmi andrõ, khõ Zo’aya ya’ita, Yesu Keriso. (Tes. I. 5, 9). 

15 Ba mi’abe’e’õ ami, ya’ami ira talifusõ, ba bõi mibõhõli gamakhoita andrõ, ni’ombakha’õ khõmi, he ba daroma li, ba he ba zura andrõ khõma. 

16 Ba ya’ia, So’aya ya’ita, Yesu Keriso ba Lowalangi, Amada, si no mangomasi’õ ya’ita, ba si no mame’e fondrara dõdõ khõda, si lõ aetu, awõ wanõtõna, si sõkhi, ba wa’ebua dõdõ, (Fet. I. 5, 10),

17 ba yamurara dõdõmi ba yamu’a’aro’õ ba ngawalõ mbuabua fefu, ba ba ngawalõ daroma li, si sõkhi. (Tes. I. 3, 13).

 

TESALONIKA II.

FAZA 3

 

I.                  Ena’õ latolo wangandrõ banua Desalonika andrõ. II. Fanegu si lõ sõkhi buabua. III. Fango’ozui sura.

 

1 I. Ba hadia na mbõ’õnia, ya’ami ira talifusõ, ba mi’angandrõ, salahima ena’õ alio terongo misa daroma li Zo’aya andrõ, ba ena’õ tefolakhõmi, si mane ba khõmi, (Tes. I. 5, 25. Kol. 4, 3), 

2 ba ena’õ te’efa’õ ndra’aga ba niha andrõ, si lõ tõdõ, ba si lõ sõkhi; lõ’õ sa dozi mamati. (Yoh. 6, 44. Hal. zin. 18, 1—17). 

3 Ba lõ’õ sa farõi Zo’aya, ba ya’ia zangabe’e ya’ami, ba irorogõ ami, itimba khõmi zi lõ sõkhi andrõ. (Tes. I, 5, 24). 

4 Ba madõnadõna khõmi, ba khõ Zo’aya, mi’o’õ niŵa’õma khõmi, he iada’e, ba he dania. (Gal. 5, 10).

5 Ba ya So’aya zamatõrõ tõdõmi ba wa’omasi Lowalangi andrõ, ba ba wanaha tõdõ andrõ, khõ Keriso.

6 II. Ba maŵa’õ khõmi, ya’ami ira talifusõ, ba dõi Zo’aya ya’ita andrõ, Yesu Keriso, mifabali ami ba dalifusõ si lõ sõkhi buabua, gofu ha niha ia, si lõ manõrõ lala nirongora khõma. (Rom. 16, 17. Kor. I, 5, 11).

7 Noa sa mi’ila he wisa wolo’õ khõma; lõ’õ sa nitõrõma si lõ gõna, ba khõmi andrõ; (Tes. I. 2. 10); 

8 ba lõ’õ gõi nihalõma balazo, si lõ nibe’ema bõli, noa sa erege dõdõma, ba no akao ndra’aga, wohalõŵõ, bongi ma’õkhõ, fa bõi abu dõdõmi khõma, ha niha ami. (Tes. I. 2, 9).

9 Tenga fa lõ tola mena’õ, ba ena’õ mabe’e famaedo ndra’aga khõmi, ena’õ mi’o’õ khõma. (Hal. zin. 23, 35. Kor. I. 9, 6; 4, 16). 

10 Da’õ sa gõi niŵa’õma khõmi, me soga khõmi; si lõ edõna mohalõŵõ, ba bõi yamanga gõi. (Moz. I. 3, 19). 

11 Noa sa marongo, so õsa ba khõmi zi lõ sõkhi buabua, ma’ifu lõ mohalõŵõ, molau fayafaya. 

12 Ba da’õ niŵa’õma ba zi manõ, ba mafarou dõdõra, ba khõ Zo’aya, Yesu Keriso: ena’õ lahonogõ ira ba halõŵõra, ba ena’õ la’ā gõlõra, balazora. (Tes. I. 4, 11).

13 Ba ya’ami ira talifusõ, ba bõi atage ami wolau si sõkhi. (Gal. 6, 9).

14 Ba na so zi lõ molo’õ niŵa’õma andrõ, ba zura, ba bõi olifu ami, bõi fahuwu ami khõnia, ena’õ aila ia. (F. 3, 6. Tit. 3, 10).

15 Ba bõi hulõ zi fa’udu ami khõnia, ba mitegu ia, si mane si fatalifusõ. (Mat. 18, 15 b. t. Tes. I. 5, 14).

16 III. Ba ya’ia, So’aya fa’ohahau dõdõ andrõ, ba yamube’e khõmi wa’ohahau dõdõ andrõ, bõi yamamalõmalõ, gefu he wisa lala. Yamutolo ami fefu So’aya. (Rom. 15, 33).

17 Fangowaigu da’e, tangagu zanura, tanga Waulo andre; da’õ dandra ba zuragu fefu, si manõ wanuragu. (F. 2, 2. Kor. I. 16, 21). Yafalukha ami fefu wa’ebua dõdõ khõ Zo’aya ya’ita, Yesu Keriso. (Tes. I. 5, 28).