SURA ROMA

Table of Contents

 

SURA ROMA

ROMA FAZA 1

I. Fangowai. II. Humulu dõdõ Waulo, ba we’amõi khõra. III. Fa’abõlõ duria somuso dõdõ andrõ. IV. Horõ niha baero.

1 I. Faulo zanura da’e, enoni Keriso Yesu, nikaoni sinenge, nituyu, ba wangombakha turia somuso dõdõ andrõ khõ Lowalangi, (Gal. 1, 10. 15 b. t. Hal. zin. 9, 15), 

2 nifafabu’u’õnia fõna ba zama’ele’õ andrõ khõnia, ba zura ni’amoni’õ, (Tit. 1, 2. 3. Luk. 24, 44), 

3 turia Nononia andrõ. Ma’uwu Dawido ba nga’õtõ niha, (Hal. zin. 2, 30; 13, 23), 

4 nifataro Ono Lowalangi, nibe’e fa’abõlõ, dali Geheha ni’amoni’õ, moroi ba wemaoso moroi ba ngai zi mate: Yesu Keriso, So’aya ya’ita. (Hal. zin. 13, 33. 34. Yoh. 10, 36. Fet. I. 3, 18). 

5 Khõnia no tatema wa’ebua dõdõ, awõ halõŵõ zinenge, ba wanga’asogõ folo’õ famati andrõ, ba niha fefu, ba wangebua tõinia andrõ. (F. 15, 15—19. Efes. 3, 8 b. t.). 

6 Ba zi te’u’u gõi ami, nikaoni Yesu Keriso; (F. 9, 24)

7 ba ni’omasi’õ Lowalangi andrõ fefu, nikaoni andrõ, ni’amoni’õ, si so ba Roma. Yafalukha ami wa’ebua dõdõ ba fa’ohahau dõdõ khõ Namada Lowalangi ba khõ Zo’aya ya’ita, Yesu Keriso! (Kor. I. 1, 2. 3).

8 II. Si fõfõna, ba usuno Lowalangigu andrõ, dali Yesu Keriso, ba khõmi fefu, me no teturiagõ wamatimi andrõ ba guli danõ ma’asagõrõ. (F. 16, 19. Kor. I. 1, 4 b. t. Tes. I. 1, 2. 8). 

9 Irongo sa ligu Lowalangi, si mõido enoni tõdõgu, ba wangombakha turia somuso dõdõ andrõ khõ Nononia andrõ, wa lõ tebulõ itõrõ, tõdõgu ami. (Fil. 1, 8). 

10 Lõ aetu u’andrõ, na mangandrõ ndra’o, ma atṍ salõfõgu samuza, ma aoha gõlõ Lowalangi, mõi ndra’o khõmi. (F. 15, 23. 32. Hal. zin. 19, 21). 

11 Humulu sa dõdõgu wamaigi ya’ami, ena’õ ufa’ema khõmi ma’ifu, ame’ela Geheha, ba wangabe’e ya’ami, (Tes. I. 3, 10), 

12 ya’ia na terara dõdõgu gõi awõmi, ba khõmi andrõ, bõrõ wa no faoma samati ita, he ya’ami, ba he ya’o. (Amaed. 11, 25). 

13 Ba tebai ubini’õ khõmi, ya’ami ira talifusõ, wa no asese uŵa’õ tõdõgu, mõido khõmi — ba no tetabi ndra’o irugi da’e — ena’õ usõndra ba khõmi gõi mbua ma’ifu, si mane ba niha bõ’õ gõi. (F. 15, 22). 

14 So’õmõ ndra’odo, he ba Ndrawa Heleni, ba he ba zi tenga Dawa Heleni, he ba zatuatua, ba he ba zi lõ atuatua. (Kor. I. 1, 22—24).

15 Andrõ si manõ wa’edõna dõdõgu, na balazi ndra’o, wangombakha turia somuso dõdõ andrõ, ba khõmi gõi, ba Roma. (Hal. zin. 28, 31).

16 III. Lõ’õ sa ailado ba duria somuso dõdõ andrõ; noa sa fa’abõlõ Lowalangi ia, ba wangorifi samati andrõ fefu, ba niha Yehuda ua ba ba Ndrawa Heleni gõi. (Tim. II. 1, 8—12. Sin. 119, 46. Kor. I. 1, 18. Hal. zin. 13, 46).

17 Tefa’ele’õ sa ba khõnia wa’atulõ dõdõ khõ Lowalangi, moroi ba wamati ba ba wamati zui lualua, si mane si so ba zura: ”Ba wamati isõndra wa’auri satulõ tõdõ.” (F. 3, 21 b. t. Hab. 2, 4).

18 IV. Tefa’ele’õ sa moroi ba zorugo wõnu Lowalangi ba golalõŵa andrõ ba ba zi lõ atulõ andrõ fefu, ba niha, sanaisi si duhu ba wa lõ atulõ andrõ, (F. 2, 5—8. Heb. 10, 26 b. t.), 

19 me no oroma ba khõra zi tola ta’ila khõ Lowalangi; noa sa ifa’ele’õ khõra Lowalangi. (Hal. zin. 14, 17; 17, 25 b. t.). 

20 La’ila sa tõdõra, ba nifazõkhinia, zi lõ oroma andrõ, amuatania, i’otarai wamazõkhi danõ’a, fa’abõlõnia andrõ, si lõ aetu ba fa’alowalanginia fa lõ famu’a khõra. (Sin. 8, 2 b. t. 19, 2 b. t. Yes. 40, 26). 

21 Me no aboto ba dõdõra Lowalangi ba me lõ ni’olowalangira ya’ia, wanuno ya’ia, ba me lõ ni’andrõra saoha gõlõ khõnia me no arõrõ dõdõra ba waya ba me no tobali ogõmigõmi dõdõra, sambõ era’era andrõ. (Efes. 4, 17. Sin. 50, 23). 

22 Me no satuatua ira, laŵa’õ, ba no tobali, sambõ tõdõ ira. (Yer. 10, 14. Kor. I. 1, 19 b. t.).

23 Ba no lafalalini, no labõhõli lakhõmi Lowalangi, andrõ, si lõ tebulõ, ba no labe’e salahinia khalakhala wamaedo niha si matemate ba khalakhala wamaedo wofo ba khalakhala wamaedo zaliŵaliŵa ba danõ si õfa ahe, awõ zanana andrõ. (Moz. V. 4, 16 b. t. Sin. 106, 20). 

24 Andrõ no ibõhõli ira Lowalangi, fa la’o’õ wangisõ dõdõra andrõ, si ta’unõ andrõ, ena’õ te’o’aya nõsira andrõ. (Hal. zin. 14, 16. Sin. 81, 13. Tes. I. 4, 4. 5), 

25 ya’ira andrõ, si no mamalalini si duhu andrõ khõ Lowalangi, ba waya, si no mamosumange nifazõkhi andrõ, si no mangarõfi li ya’ia, moroi ba wamosumangera samazõkhi, moroi ba we’angarõfi li da’õ, nisuno irugi zi lõ aetu. Yaduhu. 

26 Andrõ no ibõhõli ira Lowalangi, fa la’o’õ wangisõ si lõ sõkhi: he ira alawe khõra, no labõhõli lala, ba no lasalahini si tenga lala. (Moz. III. 18, 22 b. t.). 

27 Ba si manõ gõi ndra matua, no labõhõli lala wa’orudu ba ndra alawe, ba no tesao wa faoma la’isõ nawõra, tobali no lahorõni ndra matua ira matua, ba no latema zi nangea luora ba wa’elungura andrõ, ba nõsira. (Kor. I. 6, 9). 

28 Ba me no lõ ba dõdõra wa’aboto ba dõdõra Lowalangi, ba no ilulu ira Lowalangi, ena’õ la’o’õ gera’era si lõ gõna ba wolau si lõ tola; 

29 no a’oi so zi lõ atulõ fefu, awõ walõsõkhi, awõ wa’afaito, awõ wa’omasi gana’a, no fahõna wa’afõkhõ dõdõ, awõ wange’e, awõ waguaguasa, awõ wa’onekhe, awõ walimosa, (Efes. 5, 3 b. t. Gal. 5, 19 b. t.), 

30 samatomatou awõra ira ba sanandraŵaisi ba si lõ omasi Lowalangi ba sangosiwawõi awõra ba si fayaŵa ba samahokha ba samakhai si lõ sõkhi ba si lõ molo’õ li zatua, (Tim. II. 3, 2 b. t.); 

31 ba sambõ era’era ba si farõi ba sabe’e tõdõ ba si lõ ahakhõ tõdõ. 

32 La’ila sa huku Lowalangi andrõ, wa no huku famunu huku zolau si manõ, ba tenga ha fa lalau da’õ, omasi na gõi ira, na so zolau si manõ, niha bõ’õ.

 

ROMA FAZA 2

I. Fa’atulõ dõdõ Lowalangi, lõ ebua dõdõnia zambuana. II. Si so horõ gõi niha Yehuda.

1 I. Andrõ tebai õbu’a ba hulumõ, ya’ugõ ono niha, ha niha ndra’ugõ sanguhuku awõnia; hukumõ õ’etu’õ, na õhuku danõ bõ’õ; faoma sa nilaumi, ya’ugõ sanguhuku. (F. 3, 9—19; 14, 10. Sam. II. 12, 5. Yoh. 8, 7). 

2 Noa sa ta’ila, wa satulõ wanguhuku Lowalangi solau si manõ. 

3 Ma õwai, aefa ndra’ugõ ba huku andrõ, nifatõrõ Lowalangi, ya’ugõ niha, sanguhuku solau si manõ, na no faoma nilaumi? (Sin. 50, 16—22). 

4 Ma õ’ositengagõ wa’abõlõ wa’ebua dõdõnia ba fanahania tõdõnia ba fa’ebolo dõdõnia, ba lõ õ’ila, wa ifarou’õ ba wamalalini era’era fa’ebua dõdõ Lowalangi andrõ? (Luk. 13, 2 b. t. Fet. II. 3, 9. 15. Yud. 4). 

5 Ba ba wa’abe’e dõdõu andrõ ba ba wa lõ edona’õ õfalalini gera’era dõdõu, ba õhõna khõu wõnu ba mbaŵa wõnu andrõ, ba mbaŵa wama’ele’õ fanguhuku satulõ andrõ, khõ Lowalangi: (Yob. 36, 13), 

6 idozigõ dania niha wamasulõni buabuara; (Fam. 22. Mat. 16, 27. Kor. II. 5, 10. Yer. 17, 10); 

7 ibe’e wa’auri si lõ aetu ba zanau õlõ ba mbuabua si sõkhi, wangalui lakhõmi ba sumange ba fa lõ tekiko, 

8 ba ba zi lõ atulõ tõdõ, si lõ molo’õ si duhu, solo’õ si lõ atulõ, ba fõnu ba bakhubakhu dõdõ. (Tes. II. 1, 8 b. t.). 

9 Famakao ba fa’abu dõdõ ba niha fefu, samazõkhi si lõ sõkhi, ofõna ba niha Yehuda, ba ba Ndrawa Heleni gõi. (Luk. 12, 47. 48. Mat. 11, 22). 

10 Ba lakhõmi ba sumange ba fa’ohahau dõdõ ba zolau si sõkhi, fefu, ofõna ba niha Yehuda ba ba Ndrawa Heleni gõi. (F. 1, 16). 

11 Ba Lowalangi, ba lõ’õ sa famaigi bawa niha. (Moz. V. 10, 17. Hal. zin. 10, 34). 

12 Ha wa’ato sa ita samazõkhi horõ, lõ oroisa, ba tetibo gõi, lõ oroisa, ba ha wa’ato zamazõkhi horõ, si so oroisa, ba dali goroisa wanguhuku ya’ira. (F. 1. 32. Yoh. 5, 45). 

13 Tenga sa samondrongo oroisa zatulõ fõna Lowalangi, ha solo’õ oroisa niŵa’õ satulõ. (Yoh. 1. 22. 25. Luk. 10, 25 b. t. Yoh. I. 3, 7). 

14 Ba na lalau niŵa’õ ba goroisa, to’ua ya’ira, niha baero, si lõ oroisa, ba tobali oroisa ira khõra, ya’ira, si lõ oroisa, (Sin. 147, 20), 

15 tobali la’oroma’õ, wa no musura ba dõdõra niŵa’õ ba goroisa andrõ, ba fao wamaduhu’õ dõdõra, awõ wa faoma la’aduadugõ nawõra era’erara, ba he wa faoma labu’abu’a ba hulu nawõra. (F. 1, 19. Heb. 8, 10).

16 Oroma dania na luo ifahuku’õ dania Lowalangi khõ Keriso Yesu zi tobini ba dõdõ niha, si mane niŵa’õgu, wangombakha turia somuso dõdõ andrõ. (Mat. 25, 31. Kor. I. 4, 5. Sin. 90, 8).

17 II. Ba niha Yehuda ndra’ugõ õŵa’õ, ba õdõnadõna ba goroisa, ba õsuno ndra’ugõ ba khõ Lowalangi. (Yes. 58, 2. Mikh. 3, 11). 

18 No aboto ba dõdõu zomasi ia, no õtimba tõdõu hezo zi sõkhi, me no nifahaõ ba goroisa ndra’ugõ. (Fil. 1, 10). 

19 Õŵa’õ tõdõu solohe tanga zau’a ndra’ugõ, sohagaini si so ba zogõmigõmi, (Mat. 15, 14),

20 samamaha sambõ era’era, samahaõ iraono, si so dali wangila ba dali zi duhu, ba goroisa; 

21 ba ya’ugõ samahaõ niha tánõ bõ’õ, ba hadia, lõ õfahaõ ndra’ugõ? Ya’ugõ, sanguma’õ ba niha, bõi managõ, ba managõ’õ? (Mat. 5. 23, 3. 4. Sin. 50, 16 b. t.). 

22 Sanguma’õ, bõi mohorõ, ba mohorõ’õ? Sangogorofi adu, ba õ’anagõi ira ba gosali? (Yoh. 8, 9). 

23 Ya’ugõ, sanuno ya’ugõ ba goroisa, ba õ’o’aya Lowalangi wanawõ oroisa? 

24 ”Bõrõ sa ami, wa tetandraŵaisi dõi Lowalangi ba niha baero”, itõrõ zi so ba zura. (Yes. 52, 5. Hes. 36, 20—23). 

25 Moguna sa wamoto andrõ, na õ’o’õ goroisa, ba na sanawõ oroisa ndra’ugõ, ba tobali botolõ zi no muboto andrõ khõmõ. (Yer. 4, 4. Kor. I. 7, 19. Moz. V. 10, 16). 

26 Ba na itõrõ lala goroisa si lõ muboto andrõ, ba tenga no tobali amaedola zi no muboto mbotolõ andrõ khõnia? (Kol. 2, 11. Gal. 5, 6). 

27 Ba ihuku ndra’ugõ dania si to’ua lõ muboto, solo’õ oroisa andrõ, ya’ugõ andrõ, sanawõ oroisa, he no so zura, ba he no muboto ndra’ugõ. 

28 Tenga sa da’õ niha Yehuda, si no niha Yehuda wamaigi niha, ba tenga gõi da’õ wamoto, ni’ila hõrõ, ba nõsi niha. (F. 9, 6 b. t. Yoh. 8, 39). 

29 Ha si no niha Yehuda ba zi tobini ba famoto tõdõ, na dali Geheha; si tenga dali niŵa’õ ba zura. Na so zi manõ, ba tenga nisuno niha, no nisuno Lowalangi. (Moz. V. 30, 6. Fil. 3, 3).

 

ROMA FAZA 3

I. Famu’a na so zamadaõ. II. Faoma gõna ira huku, he niha Yehuda, ba he niha baero. III. Ha ba wamati falukha ira wa’omasi Lowalangi ira.

1 I. Ba hadia zi tohude ba niha Yehuda, ba hadia guna wamoto andrõ? (F. 2, 25). 

2 Ebua sa, gofu he wisa wamaigida. Si fõfõna ua, wa no mube’e ba dangara daroma li Lowalangi andrõ. (F. 9, 4 b. t. Hal. zin. 7, 38. Moz. V. 4, 7 b. t. Sin. 147, 19). 

3 Ma he wisa? na so õsa zi lõ mamati, hadia, iwu’ai wa lõ farõi Lowalangi wa lõ mamati ira? (F. 11, 1. 2. 29. Tim. II. 2, 13). 

4 Tenga si manõ. Fozunia, ba si ndruhu Lowalangi ba sofaya niha fefu, itõrõ zi so ba zura: ”Ena’õ satulõ ndra’ugõ, laŵa’õ, ba niŵa’õu andrõ, ba ena’õ mõna ndra’ugõ, na lahuku’õ.” (Sin. 116, 11; 51, 6. Moz. IV. 23, 19). 

5 Ba na i’aro’õ wa’atulõ Lowalangi wa lõ atulõ ita, ba hadia niŵa’õda? Hadia, si lõ atulõ Lowalangi, na ifatõrõ wõnu? (tõdõ niha niŵa’õgu). (F. 9, 14).

6 Tenga si manõ. Na si manõ ena’õ, ba he iwisa Lowalangi wanguhuku õsi guli danõ? (Moz. I. 18, 25). 

7 Ba na tedou wa’aduhu Lowalangi andrõ, ba wayagu andrõ, fangebua lakhõminia, ba hadia wa lafatõrõ na khõgu huku zamazõkhi horõ?

8 Ba tenga itõrõ, na latandraŵaisi ita, na so õsa zanguma’õ, no maŵa’õ: ”Datalau zi lõ sõkhi, ena’õ si sõkhi lualuania.” Si nangea nihuku zi manõ. (F. 6, 1. 2).

9 II. Ba he wisa? No tohude ita? Tenga sa ya’ia manõ. Noa sa mege ta’adugõ ira, he niha Yehuda, ba he Dawa Heleni, wa no a’oi sawuyu horõ ira, (F. 1. 2. Gal. 3, 22), 

10 itõrõ zi so ba zura: ”Lõ satulõ tõdõ, samõsa lõ’õ, (Sin. 14, 1—3), 11 lõ satuatua, lõ sangalui sibai Lowalangi. 

12 No ahori fabali ira, no fatutu manõ, lõ gunara, lõ solau si sõkhi, samõsa lõ’õ, 

13 Lewatõ sobawa dõlõtõlõra, lalau falimo lelara, sõfu gulõ no so ba mbewera. (Sin. 5, 10. 140, 4). 

14 Ba mbawara ba no fahõna wangelifi ba fatiusa, (Sin. 10, 7), 

15 ahera, ba no aliolio ba wange’e, (Yes. 59, 7. 8), 

16 ba lalara, ba no so wamakiko, awõ wa’abu dõdõ; 

17 lala wa’ohahau dõdõ andrõ, ba lõ saboto ba dõdõra, 

18 Fangata’ufi Lowalangi ba lõ’õ, fametahõra.” (Sin. 36, 2).

19 Ba no ta’ila, fefu hadia ia niŵa’õ ba goroisa, ba ba khõra teŵa’õ si so barõ mbawa goroisa, ena’õ nifa’afu mbawara fefu ba ena’õ mo’õmõ khõ Lowalangi dozi niha ba guli danõ.

20 Bõrõ wa samõsa lõ niha niŵa’õ satulõ, fõnania, ba wolo’õ oroisa andrõ. Soroi ba goroisa sa, ba fa’aboto ba dõdõ horõ. (Gal. 2, 16. Sin. 143, 2. F. 7, 7 b. t.).

21 III. Ba noa sa’ae to’ele wa’atulõ dõdõ khõ Lowalangi, baero goroisa, nifaduhu’õ goroisa ba nifaduhu’õ zama’ele’õ andrõ, (F. 1. 17. Hal. zin. 10, 43), 

22 fa’atulõ dõdõ khõ Lowalangi soroi ba wamati khõ Yesu Keriso, ba zamati andrõ fefu; lõ’õ sa fa’afaehu. (Fil. 3, 9; Kor. II. 5, 21; F. 10, 10. 12). 

23 Noa sa ahori mamazõkhi horõ ira, ba lõ’õ sa si sõkhi turiara khõ Lowalangi. (Raz. I. 8, 46). 

24 Ba saoha gõlõ wa iŵa’õ Lowalangi satulõ ira, fa’ebua dõdõnia, bõrõ wangõhõli andrõ, ba khõ Keriso Yesu, (Hal. zin. 13, 38 b. t.; Efes. 2, 8 b. t.), 

25 nifataro Lowalangi hõli, ba ndrõnia andrõ, balazi wamati, ba wangoroma’õ fa’atulõ dõdõnia, bõrõ wa no i’osilõmilagõ horõ fõna, (Moz. II. 25. 17; Heb. 4, 16; Hal. zin. 17, 30), 

26 gõtõ wa’ebolo dõdõ Lowalangi, ba wangoroma’õ fa’atulõ dõdõnia ba gõtõ da’e, ena’õ satulõ ia ba ena’õ satulõ gõi, iŵa’õ, zamati khõ Yesu. (F. 8, 3. 4).

27 Ba heza so khõda wanuno ya’ita? Lõ’õ sa ya’ia. Hadia lala? Hadia, balazi mbuabua? Tenga. No lala wamati andrõ. (F. 4, 2; 8, 2). 

28 Ba da’õ niŵa’õda, bõrõ wamati, wa satulõ niha iŵa’õ Lowalangi, baero wolo’õ oroisa. (Gal. 2, 16. Hal. zin. 13, 38. 39). 

29 Ma ha Lowalangi niha Yehuda Lowalangi? Tenga Lowalangi niha baero gõi? Ya’ia, Lowalangi niha baero gõi. (F. 9, 24 b. t. 10, 12 b. t.). 

30 Na duhu ha samõsa Lowalangi, sanguma’õ dania satulõ zi no muboto, moroi ba wamati, awõ zi lõ muboto, ba wamati andrõ. (F. 4, 11. 12; Hal. zin. 15, 11. Gal. 3, 8). 

31 Ba hadia, tawu’ai goroisa, ba wamati andrõ? Tenga da’õ. Ta’aro’õ goroisa. (F. 6, 15. Mat. 5, 17. Yak. 2, 14 b. t.).

 

ROMA FAZ 4

Ibe’e famaedo Gaberahamo Faulo, me no ba wamati isõndra wa’atulõ, ba tenga ba mbuabuania.

1  Ba ha taŵa’õ, hadia nisõndra Gaberahamo, furugõda, ba lala niha ba guli danõ? (Yes. 51, 2). 

2 Na moroi ba wolo’õ oroisa sa’ae, wa iŵa’õ Lowalangi satulõ Gaberahamo, ba nisuno ia, ba tenga nisuno Lowalangi. (Yak. 2, 21. Kor. I. 1, 29. 31). 

3 Ba hadia sa niŵa’o ba zura? ”Ba mamati Gaberahamo khõ Lowalangi, ba tebe’e fa’atulõ dõdõnia da’õ”. (Moz. I. 15, 6. Gal. 3, 6. Yak. 2, 23). 

4 Ba ba zohalõŵõ, ba tenga fa’ebua dõdõ, wa tebe’e luonia, no õmõ. (F. 11, 6). 

5 Ba ba zi tenga balazi mbuabua, samati khõ zanguma’õ satulõ zi no mangerogõ Lowalangi mege, khõnia tebe’e fa’atulõ dõdõnia wamatinia andrõ. (F. 3, 26. 28). 

6 Si manõ gõi wamahowu’õ Dawido niha niŵa’õ Lowalangi satulõ ia, he lõ folo’õ oroisa, imane: (Sin. 32, 1. 2). 

7 ”Ya’ahowu zi no mube’e aefa lalo andrõ, si no mubalugõ horõ! 

8 Ya’ahowu niha ba zi lõ ibe’e horõ lalõ andrõ So’aya”. 

9 Ba famahowu’õ andrõ, hadia, ha famahowu’õ si no muboto, ba ma famahowu’õ si lõ muboto gõi? Noa sa taŵa’õ: No tebe’e fa’atulõ dõdõ Gaberahamo wamatinia andrõ. 

10 Ba ha mege tebe’e fa’atulõ dõdõnia, hadia, me no muboto ia, ba ma me lõ muboto na? Tenga me no muboto, no me lõ muboto na. 

11 Ba itema dandra, famoto andrõ, famaduhu’õ fa’atulõ dõdõ andrõ, ba wamati andrõ, si so khõnia, me lõ muboto ia na, ena’õ tobali tua zamati lõ muboto fefu ia, ena’õ tebe’e fa’atulõ dõdõra wa’atulõ dõdõ andrõ, (F. 2, 28 b. t. Moz. I. 17, 10. 11. Gal. 3, 7 b. t.), 

12 ba ena’õ tua zi no muboto gõi ia, ba zi tenga ha famoto, sanara gõi lahe wamati andrõ, si so khõ duada Aberahamo, me lõ muboto ia na. (Yoh. 8, 39. Mat. 3, 9). 

13 Tenga sa ba goroisa tefa’ema gamabu’ula li andrõ khõ Gaberahamo, ba he ba ma’uwunia, wa ya’ia zokhõ uli danõ dania, no ba wa’atulõ dõdõ ba wamati tefa’ema. (Gal. 3, 16—18. Moz. I. 22, 16 b. t.). 

14 Na solo’õ oroisa sa zanema ondrõita, ba no tobali faya wamati andrõ, ba si lõ boto gamabu’ula li andrõ. 15 Samobõrõ fõnu sa goroisa, ba ba zi lõ oroisa, ba lõ’õ gõi fanawõ. (F. 3, 20; 7, 8. 10; 5, 13). 

16 Andrõ moroi ba wamati, ena’õ fa’ebua dõdõ, ena’õ aro gamabu’ula li andrõ, ba ma’uwunia fefu, tenga ha ba ma’uwunia moroi ba goroisa, no ba ma’uwunia moroi ba wamati gõi, moroi ba wamati Gaberahamo, si no tuada fefu, (Gal. 3, 7. 9. 14), 

17 si mane si so ba zura: ”No ube’e furugõ ndra’ugõ, oya soi ma’uwumõ dania”; ba khõ Lowalangi andrõ, ba zamati ia, sangorifi si no mate, sanõtõi si lõ’õ na, hulõ na no so (Moz. I. 17, 5 Heb. 11, 19), 

18 samati manõ, wanõtõna, he lõ tõtõnafõ, ena’õ oya soi ma’uwunia, na itõrõ niŵa’õ andrõ: ”Si manõ ma’uwumõ dania.” (Heb. 11, 1. Moz. I. 15, 5). 

19 Ba lõ sangiwa dõdõnia wamati, wamaigi botonia, wa no atua — no mato atu fakhe — ba ma talu Zara andrõ, si no amaedola zi mate; (Heb. 11, 11. 12. Moz. I. 17, 1. 17; 18, 11); 

20 lõ sangiwa dõdõnia ba gamabu’ula li Lowalangi andrõ, fa lõ mamati ia, abe’e dõdõnia wamati, ifosumange Lowalangi, (Yak. 1, 6), 

21 no faduhu sibai dõdõnia, i’ila ifalua gõi Lowalangi hadia nifabu’unia. (Sin. 115, 3; Luk. 1, 37). 22 Andrõ gõi tebe’e fa’atulõ dõdõnia, 

23 ba tenga ha ba khõnia, wa tesura, wa no mube’e fa’atulõ dõdõnia, 

24 ba khõda gõi, ba nibe’e dania, khõda samati khõ zanusugi Yesu, So’aya ya’ita, moroi ba ngai zi mate, (F. 15, 3; 10, 9. Fet. I. 1, 21), 

25 nibe’e nibunu ba lalõda andrõ, nisusugi ba wangatulõ’õ ya’ita. (F. 3, 25; 8, 32. 34. Fet. I. 1, 3).

 

ROMA FAZA 5

I. Fa’atulõ khõ Lowalangi lualua wamati. II. Khõ duada Adamo i’otarai fa amate ba khõ Yesu Keriso i’otarai fa’auri.

1 I. Ba me no satulõ tõdõ ita, iŵa’õ Lowalangi, balazi ba wamati, ba no atulõ ita Lowalangi, bõrõ Zo’aya ya’ita, Yesu Keriso. (Yes. 32, 17. 18. Efes. 2, 14 b. t.). 

2 Moroi khõnia gõi, wa tola ta’ondrasi mege wa’ebua dõdõ andrõ, si lõ tebulõ, khõda, ba tasuno ita, me tadõnadõna lakhõmi Lowalangi andrõ. (Efes. 3, 12. Heb. 10, 19). 

3 Ba tenga ha da’õ, tasuno gõi ita ba wamakao andrõ, me no ta’ila, i’a’asogõ wanaha tõdõ famakao andrõ; (Fet. I. 4, 13. Yak. 1, 2 b. t.); 

4 ba fanaha tõdõ andrõ, ba i’a’asogõ wa’abe’e, ba fa’abe’e andrõ, ba i’a’asogõ wanõtõna. (Fet. I. 1, 6—9); 

5 ba fanõtõna andrõ, ba tebai te’ala ita, ibe’e, me no mulau ba dõdõda wa’omasi Lowalangi andrõ, ba khõ Geheha ni’amoni’õ andrõ, nibe’e khõda. (Sin. 34, 6. Fil. 1, 20. Yoh. I. 4, 12. 13. 16). 

6 Noa sa mate Keriso, me luo lõ abe’e ita na, salahi zi no mangerogõ Lowalangi. (Heb. 4, 15. Fet. I. 3, 18). 

7 Ba si lõ lokha lõ mate niha salahi zatulõ, ba zi sõkhi sa, ba ma ta’ila tola mate ia. (Yoh. 15, 13). 

8 Ba i’oroma’õ wa’omasinia ita Lowalangi, me no mate salahida Keriso, me samazõkhi horõ ita na. (F. 8, 32. Yoh. 3, 16).

9 Ba mendrua manõ aefa ita ba wõnu andrõ iada’e, ba khõnia, me no satulõ ita, iŵa’õ Lowalangi, ba ndronia andrõ. (Efes. 1, 7. Kol. 1, 14). 

10 Na noa sa mu’a’atulõ ita Lowalangi, ba wa’amate Nononia, me si fa’udu ita, ba mendrua manõ te’orifi ita ba wa’aurinia andrõ, me no atulõ ita. (F. 4, 25. Kor. II. 5, 19. Kol. 1, 21 b. t.).

11 Ba tenga ha da’õ; me tasuno gõi ita ba khõ Lowalangi, bõrõ Zo’aya ya’ita, Yesu Keriso, nitemada fa’atulõ iada’e. (Kor. I. 30, 31).

12 II. Andrõ, si mane bõrõta horõ andrõ ba guli danõ, wa no ha samõsa niha zamobõrõ, awõ lualua horõ andrõ, fa’amate, awõ wa no ikhamõ niha fefu fa’amate andrõ, bõrõ wa no dozi samazõkhi horõ ira — (F. 6, 23. Moz. I. 3, 6; 2, 17. Tim. I. 2, 14) 

13 noa sa so horõ ba guli danõ, me lõ oroisa na, ba lõ tebe’e horõ horõ andrõ, na lõ oroisa, (F. 4, 15), 

14 ba no salaŵa zui wa’amate andrõ, i’otarai Gadamo, irugi Moze, he ba zi lõ lalõ si mane lalõ Gadamo, si no tobali famaedo zi so dania. — (Kor. I. 15, 45). 

15 Ba buala fa’ebua dõdõ andrõ, ba tenga si mane lalõ andrõ. Na sato sa zi mate ba lalõ zi ha samõsa, ba mendrua manõ, wa a’oi irugi zato fa’ebua dõdõ Lowalangi ba buala andrõ, moroi ba wa’ebua dõdõ niha si ha samõsa andrõ, Yesu Keriso. (Kor. I. 15, 21. 22. Yoh. 1, 16. 17). 

16 Ba bõ’õ wa’ebua dõdõ andrõ, bõ’õ zoroi ba zi ha samõsa, samazõkhi horõ andrõ. Moroi ba zi ha samõsa huku andrõ, ba wanibo, ba buala fa’ebua dõdõ andrõ, ba moroi ba lalõ soya, ba wanga’atulõ. 

17 Na ha samõsa sa mbõrõ, wa no salaŵa wa’amate, moroi ba lalõ zi ha samõsa andrõ, ba mendrua manõ abõlõ ba wa’auri zanema fa’ebua dõdõ andrõ, awõ mbuala andrõ, fa’atulõ dõdõ, si no a’oi so, bõrõ zi ha samõsa andrõ, Yesu Keriso. 

18 Tobali si mane ba lalõ zi ha samõsa andrõ, me no mõi bõrõ wanibo niha fefu, si manõ gõi ba wanga’atulõ zi ha samõsa andrõ, noa gõi mõi fanga’atulõ niha fefu, ba wangorifi. 

19 Hulõ si mane ba wa lõ molo’õ niha andrõ, si ha samõsa sa, me no mõi bõrõ, wa no a’oi sokhõ horõ zato, si manõ gõi ba wolo’õ zi ha samõsa andrõ, noa gõi mõi bõrõ wanga’atulõ ba zato. (Yes. 53, 11. F. 3, 24 b. t. Heb. 5, 8). 

20 Ba no fatewu goroisa, ena’õ a’oi so lalõ andrõ. Ba ba zi no a’oi so horõ, ba mendrua manõ wa no a’oi so wa’ahakhõ dõdõ gõi, (F. 7, 13. Gal. 3, 19), 

21 ena’õ si mane fa’abõlõ horõ andrõ, ba wamunu, si manõ gõi wa’abõlõ wa’ahakhõ dõdõ andrõ, moroi ba wanga’atulõ andrõ, ba wa’auri si lõ aetu, bõrõ Yesu Keriso, So’aya ya’ita. (F. 6, 23).

 

ROMA FAZA 6

I. Si no mate niha Keriso, ba horõ, me no mubayagõ idanõ. II. Sawuyu horõ ia fõna, ba yamõi enoni Lowalangi iada’e.

1 I. Ba hadia niŵa’õda? Hadia, lõ tabulõ’õ ita ba horõ, ena’õ a’oi so dania wa’ahakhõ dõdõ andrõ? (F. 5, 20; 3, 5. 8). 

2 Bõi si manõ. Ya’ita, si no mate ba horõ, ba hana wa edõna ita auri ba khõnia. (Gal. 2, 17. Fet. I. 2, 24). 

3 Ma lõ mi’ila, wa ba wa’amate Keriso Yesu tebayagõ idanõ ita fefu, ya’ita, si no mubayagõ idanõ ba khõnia? (Gal. 3, 27). 

4 Ba noa sa teko’o ita, awõnia, famayagõ idanõ andrõ, ba wa’amate, ena’õ hulõ si mane Keriso, si no mususugi lakhõmi Nama, moroi ba ngai zi mate, si manõ gõi ita, tatõrõ lala si bohou. (F. 8, 10; 7, 6. Kol. 2, 12 b. t. Kor. II. 5, 15. 17). 

5 Na noa sa’ae fabõbõ ita khõnia, me no fakhilikhili ira wa’amateda wa’amatenia, ba si manõ sa gõi ba wemaoso dania; (Tim. II. 2, 11. Fil. 3, 10. 11); 

6 me aboto ba dõdõda, wa no mufarahugõ niha si tõhõna khõda, wamorõfa ya’ia, ena’õ tehõndrõgõ mboto andrõ, samazõkhi horõ, fa bõi sa’ae sawuyu horõ ita. (Gal. 5, 24; 6, 14. Efes. 4, 22 b. t.). 

7 Si no mate sa, ba no mu’atulõ’õ, no aefa ba horõ. (Gal. 2, 19). 

8 Ba na no mate ita, awõ Keriso, ba no faduhu dõdõda, auri gõi ita dania, awõnia. (Gal. 2, 20. Kol. 3, 3. 4).

9 Me no ta’ila, lõ’õ sa’ae mate Keriso, me no aefa tesusugi ia moroi ba ngai zi mate; lõ’õ sa’ae ilaŵa ia fa’amate. (Yes. 53, 8. 10. Heb. 7, 24. Fam. 1, 18). 

10 Fa’amatenia andrõ, ba ba horõ andrõ mate ia, samuza; ba fa’aurinia, ba khõ Lowalangi auri ia. (Heb. 9, 26. 28).

11 Si manõ gõi ami, si no mate sa, ba horõ, ami, miŵa’õ tõdõmi, ba sauri ba khõ Lowalangi, bõrõ Keriso Yesu. (F. 6, 4. 8).

12 II. Ba bõi abõlõ horõ ba mbotomi andrõ, si mate, ba wolo’õ fangisõnia. (Moz. I. 4, 7). 

13 Ba bõi ba horõ mitehe ndrotondrotomi, fangõna ba zi lõ atulõ, mi’oro’õ ami khõ Lowalangi, si mane si no auri, si otarai wa’amate, ba Lowalangi mitehe ndrotondrotomi, fangõna ba zatulõ. (F. 6, 19; 12, 1. Efes. 2, 4. 5). 

14 Tebai sa ilaŵa ami horõ; tenga sa barõ mbawa goroisa so ami, no barõ mbawa wa’ahakhõ dõdõ so ami. (F. 7, 4 b. t.; 8, 2. Tim. I. 1, 9. Gal. 5, 16. 18). 

15 Ba he wisa? Hadia tafazõkhi horõ, me tenga barõ mbawa goroisa, me no barõ mbawa wa’ahakhõ dõdõ so ita? Bõi si manõ. (F. 6, 1 b. t.). 

16 Hadia, lõ mi’ila, ha khõ mitehe ami, sawuyu, ba wolo’õ linia, khõnia ami, sawuyu, ba wolo’õ linia, he ba horõ, ba wa’amate, ba he ba wolo’õ, ba wanga’atulõ. (Yoh. 8, 34. Fet. II. 2, 19). 

17 Ba nisuno Lowalangi, me no aefa wa sawuyu horõ ami, ba me no moroi ba dõdõmi mi’o’õ wamaedo andrõ, famahaõ andrõ, ba ni’ohe ya’ami. (Yoh. 8, 32—36). 

18 Ba me no mu’efa’õ ami ba horõ, ba no tobali enoni zatulõ ami. (Fet. I. 2, 16).

19 Fehede niha wehedegu, bõrõ wa no sambõ fa’abõlõ nõsimi. Si mane fanehemi sa fõna ndrotondrotomi sawuyu zi ra’iõ ba sawuyu wanawõ oroisa, ba wanawõnawõ oroisa, si manõ mitehe iada’e ndrotondrotomi enoni zatulõ, ba wangohauhau. (F. 1, 24. 29; 6, 13).

20 Me sawuyu horõ ami sa, ba no aefa ami ba wa’atulõ dõdõ andrõ.

21 Ba hadia haremi, me luo da’õ? saila ami iada’e; fa’amate sa wozunia. (F. 7, 5; 8, 6). 

22 Ba iya’e, me no aefa ami ba horõ, me no tobali enoni Lowalangi ami, ba no so haremi ba wangohauhau, ba fozunia, ba fa’auri si lõ aetu. (Gal. 6, 8. Fet. I. 1, 9). 

23 Luo horõ sa, ba fa’amate, ba buala fa’ebua dõdõ Lowalangi andrõ, ba no fa’auri si lõ aetu ba khõ Keriso Yesu, So’aya ya’ita. (F. 5, 12. Yak. 1, 15. Yoh. I. 5, 11).

 

ROMA FAZA 7

I. Khõ Keriso niha Keriso, tenga sa’ae barõ mbawa goroisa so ira. II. Oroisa andrõ, he ŵa’ae si sõkhi ia, ba tobali bõrõ horõ. III. Fa’abõlõ horõ andrõ, ba nõsi niha andrõ.

1 I. Ma lõ mi’ila, ya’ami, ira talifusõ, — ba zi no aboto ba dõdõ oroisa muhehedo — wa no barõ mbawa goroisa andrõ so niha, irugi mate ia. (F. 2, 17 b. t.). 

2 Ira alawe si no muhalõ, ba noa sa tefabõbõ ba ndra matua, ba goroisa andrõ, gõtõ wa’anau noso ndra matua; ba na mate ndra matua, ba lõ’õ sa’ae oroisa, famabõbõ ya’ia khõnia. (Kor. I. 7, 39). 

3 Tobali labe’e tõinia sohorõ, na orudu ia ba ndra matua bõ’õ, fatua auri ndra matuania. Ba na mate ndra matua, ba aefa ia ba goroisa, fa tenga sa’ae sohorõ ia, na mõi ia donga ndra matua bõ’õ. (Mat. 5, 32). 

4 Andrõ ya’ami gõi, ya’ami ira talifusõgu, si no mubunu ami, ba goroisa, ba mboto Keriso andrõ, ena’õ tánõ bõ’õ zokhõ ya’ami, ya’iá andrõ, si no mususugi moroi ba ngai zi mate, ena’õ so mbuabuada khõ Lowalangi. (F. 6, 5. 7. Kor. II. 11, 2. Gal. 2, 19). 

5 Me no ba nõsi so ita, ba no abõlõ wangisõ horõ andrõ, nifasugi goroisa andrõ, ba ndrotondrotoda, ena’õ so mbuabuania ba wa’amate. (F. 6, 21).

6 Ba iya’e, ba no aefa ita ba goroisa, me no mate ita ba zanaha ya’ita fõna, tobali enoni ita ba lala si bohou andrõ, khõ Geheha, ba tenga ba lala fõna, si so ba zura. (F. 6, 4).

7 II. Ba hadia niŵa’õda? Hadia, horõ goroisa andrõ? Tenga si manõ. Ba lõ’õ sa aboto ba dõdõgu horõ andrõ mena’õ, na tenga moroi ba goroisa. Lõ’õ sa gõi u’ila mena’õ, hadia wangisõ andrõ, na lõ muŵa’õ ba goroisa andrõ: Bõi mangisõ. (F. 3, 20. Moz. II. 20, 17). 

8 Ba no i’oguna’õ nifakhoi andrõ horõ andrõ, ba no ifasugi ba dõdõgu fefu ngawalõ wangisõ; na lõ oroisa sa, ba no si mate horõ, (F. 5, 13. Yoh. 15, 22), 

9 ba ya’o, ba sauri lõ oroisa, fõna. Ba me so nifakhoi andrõ, ba auri horõ, ba ya’o, ba mate, 

10 ba no tobali famunugu goroisa andrõ, nibe’e fangorifi. (Moz. V. 5, 32. 33. Gal. 3, 12). 

11 Noa sa i’oguna’õ nifakhoi andrõ horõ andrõ, no ibe’e famaelungu ya’o, ba famunu ya’o.

12 Tobali ni’amoni’õ goroisa andrõ, ba nifakhoi andrõ, ba ni’amoni’õ ba satulõ ba si sõkhi. (Tim. I. 1, 8).

13 III. Ba hadia no tobali famunugu zi sõkhi andrõ? Tenga si manõ. Horõ andrõ a’ine; ba ena’õ oroma, wa horõ ia, na ibe’e famunugu zi sõkhi andrõ, ena’õ a’oi so wa horõ ia, moroi ba nifakhoi andrõ. (F. 6, 23. Kor. I. 15, 56). 

14 Ta’ila sa, wa no moroi ba Geheha goroisa andrõ, ba õsi niha ndra’odo, ni’amawa ba horõ andrõ. (F. 8, 3. Mat. 5, 22. 28). 

15 Hadia nilaugu sa, ba no si lõ aboto ba dõdõgu. Tenga sa somasi ndra’o nilaugu, si fa’udu ndra’o, da’õ ulau. (Gal. 5, 17). 

16 Ba na ulau zi lõ omasido ba no utehe goroisa andrõ, wa no si sõkhi. 

17 Ba tenga sa’ae ya’o zolau ya’ia, horõ andrõ a’ine, si no so ba nõsigu, zolau. 

18 Noa sa u’ila, wa lõ si sõkhi ba khõgu, ba nõsigu andrõ. So sa khõgu wa’edõna, ba famalua si sõkhi andrõ, ba lõ’õ. (Moz. I. 8, 21. Fil. 2, 13). 

19 Tenga si sõkhi, somasi ndra’o, ulau, si lõ sõkhi, si lõ edõna ndra’o, da’õ nilaugu. 

20 Ba na ulau zi lõ omasido, ba tenga sa’ae ya’o zolau ya’ia, horõ andrõ a’ine, si so ba nõsigu, zolau. 

21 Ba tobali oroma khõgu, na to’ua ya’o, ba omasido ulau zi sõkhi ba no ahatõ zi lõ sõkhi. (Heb. 12, 1). 

22 Omasido sa goroisa Lowalangi, na balazi dõdõgu bakha, (F. 2, 14. 15), 

23 ba u’ila goroisa bõ’õ ba ndrotondrotogu, si fasõndra ba goroisa andrõ, si so ba dõdõgu, ba samõbõ ya’o, sawuyu goroisa horõ andrõ, si so ba ndrotondrotogu (F. 7, 15). 

24 Alai ndra’o, niha nifakao! Ha niha zangefa’õ ya’o ba mboto ba wa’amate andrõ? (F. 8, 10 b. t.). 

25 Nisuno Lowalangi, bõrõ Yesu Keriso, So’aya ya’ita. Tobali solo’õ oroisa Lowalangi ndra’o tõdõgu, ba solo’õ oroisa horõ andrõ õsigu. (F. 8, 2. 37; Kor. I. 15, 57).

 

ROMA FAZA 8

I. Buabua niha Keriso ba lala Geheha. II. Ono Lowalangi ira. III. Tõtõnafõra.

1 I. Ba lõ’õ sa’ae fanibo zi so ba khõ Keriso Yesu. (F. 10, 4. Yoh. 5, 24; Gal. 5, 16. 25). 

2 Noa sa i’efa’õ ndra’ugõ ba goroisa horõ ba ba goroisa ba wa’amate andrõ oroisa Geheha sangorifi andrõ, ba khõ Keriso Yesu. (Yoh. 8, 36. Kor. II. 3, 17). 

3 Si tebai goroisa andrõ sa, me no lõ abõlõ ia ibe’e õsi niha andrõ, da’õ nilau Lowalangi, wamatenge Ononia, famaedo nõsi niha andrõ, si no so barõ mbawa horõ, bõrõ horõ andrõ, ba no i’etu’õ huku horõ andrõ, ba nõsi niha, (Heb. 7, 18. 19; 2, 14. Gal. 3, 21; 4, 4. Fil. 2, 7. Kor. II. 5, 21), 

4 ena’õ itõrõ niŵa’õ ba goroisa andrõ, ba khõda, si lõ manõrõ lala nõsi niha, sanõrõ lala Geheha. (F. 8, 1). 

5 Si so ba lala nõsi niha sa, ba hadia ia ba nõsi niha lagohi tõdõra, ba si so ba lala Geheha, ba hadia ia ba Geheha lagohi. (Kor. I. 2, 14). 

6 Era’era nõsi niha sa, ba no fa’amate, ba era’era Geheha, ba no fa’auri ba fa’ohahau dõdõ. (F. 6, 21. 22. Gal. 6, 8). 

7 Me no fa’udusa khõ Lowalangi gera’era nõsi niha; lõ’õ sa i’o’õ goroisa Lowalangi, me tebai gõi. (Yak. 4, 4). 

8 Tebai omasi Lowalangi zi so ba lala nõsi niha. 

9 Ba ya’ami, ba tenga si so ba lala nõsi niha, si so ba lala Geheha ami, na so atõ ba dõdõmi Geheha Lowalangi. Ba na so zi lõ Eheha Keriso, ba tenga khõ Keriso da’õ. (Kor. I. 3, 16. Efes. 3, 17. Yoh. 14, 23). 

10 Ba na so Keriso ba dõdõmi, ba boto zi mate sa mboto, bõrõ horõ andrõ, ba tõdõ si bohou andrõ, ba sauri, bõrõ wa’atulõ dõdõ andrõ. (F. 5, 12; 7, 24. Kol. 2, 12. 13). 11 Ba na so ba dõdõmi Geheha zanusugi Yesu moroi ba ngai zi mate, ba i’orifi dania gõi mbotomi, si mate andrõ, Ehehania andrõ, si no so ba dõdõmi si no manusugi Keriso Yesu moroi ba ngai zi mate. (F. 6, 4. Kor. II. 4, 14).

12 II. Ba tobali so’õmõ ita, ya’ami ira talifusõ, tenga so’õmõ ba nõsi niha, fa fatõrõ lala nõsi niha. (F. 6, 18). 

13 Na mitõrõ lala nõsi niha sa, ba si mate ami dania. Ba na mibunu mbuabua mboto andrõ Eheha, ba sauri ami. (F. 8, 6). 

14 Ha niha sa ira fefu nifarou Geheha Lowalangi, da’õ nono Lowalangi. (Gal. 5, 18). 

15 Tenga sa Eheha zawuyu nitemami, ena’õ ata’u zui ami; Eheha ndraono nitemami; moroi khõnia wa mu’ao ita: He Aba, Ama! (Gal. 4, 1—6. Tim. I. 1, 7).

16 Ya’iá, Eheha andrõ gõi, zamaduhu’õ tõdõda, wa ono Lowalangi ita. 

17 Ba na ono ita, ba sanema ondrõita gõi, sanema ondrõita khõ Lowalangi, awõ Keriso, na nifakao gõi ita awõnia, ena’õ tefolakhõmi gõi ita awõnia. (Gal. 4, 7. Fam. 21, 7. Tim. II. 2, 11. 12. Yoh. 17, 22).

18 Tõdõgu sa, ba lõ oroma wamakao ba gõtõ da’e, ba ngai lakhõmi andrõ, nifa’ele’õ dania ba khõda andre. (Kor. II. 4, 17).

19 III. Ibalobaloi sa nifazõkhi Lowalangi andrõ, idõnadõna wama’ele’õ ono Lowalangi andrõ. (Kol. 3, 4). 

20 Noa sa mube’e barõ mbawa zi lõ boto andrõ nifazõkhi Lowalangi andrõ, lõ aoha gõlõ; no moroi ba zame’e ya’ia, ba wanõtõna, (Fangomb. 1, 2 b. t. Moz. I. 3, 17), 

21 me ya’ia gõi, nifazõkhi Lowalangi andrõ, ni’efa’õ ba wangosawuyu wa’atekiko andrõ, ba wolohe ya’ia ba wa’aefa nono Lowalangi andrõ, si so lakhõmi. (Fet. II. 3, 13). 

22 Noa sa ta’ila, mangarõngarõ fefu nifazõkhi Lowalangi, awõda, afõkhõ khõnia, irugi da’e. 

23 Ba tenga ha da’õ, ya’ita gõi, si no so famobõrõ Geheha andrõ, mangarõngarõ ita tõdõda, wanõtõna fa ono ita, fangefa’õ botoda andrõ. (Kor. II. 5, 2. Luk. 21, 28). 

24 Noa sa te’orifi ita, ba wanõtõna da’õ. Ba tõtõnafõ ni’ila hõrõda, ba tenga tõtõnafõ; hana wa idõnadõna na sa niha zi no i’ila hõrõnia? (Kor. II. 5, 7; Heb. 11, 1). 

25 Ba na tadõnadõna zi lõ i’ila hõrõda, ba tabalobaloi, tataha dõdõda. (Kor. II. 4, 18. Heb. 10, 36). 

26 Ba si manõ gõi Geheha, itolo ita, me no ambõ wa’abõlõda. Hadia ni’andrõda ena’õ, he wisa zi sõkhi, ba lõ’õ sa ta’ila; ba ya’ia, Eheha andrõ, i’iagõ salahida, ba wangarõngarõ si lõ alua baeha. 

27 Ba sanekhegõ tõdõ andrõ, ba i’ila hadia niŵa’õ Geheha, me no i’o’õ zomasi Lowalangi we’amõi salahi niha ni’amoni’õ. (Kor. I. 2, 10). 

28 Ba no ta’ila, ba zangomasi’õ Lowalangi, ba oi ba zi sõkhi manõ lualua hadia ia, fefu, ba khõra si no mukaoni, nihonogõi ba da’õ. (Efes. 1, 11). 

29 Si no i’ila fõna sa, da’õ gõi nihonogõinia, ena’õ famaedo Nononia ira dania, ena’õ si a’a ia, ba no ato dalifusõ. (F. 11, 2; Fil. 3, 21; Kol. 1, 15). 

30 Ba ha niha zi no ihonogõi, da’õ gõi nikaoninia, ba ha niha nikaoninia, da’õ gõi zatulõ, iŵa’õ, ba ha niha zatulõ, iŵa’õ, da’õ gõi nifolakhõminia. (Tes. II. 2, 13. 14. Tim. II. 1, 2). 

31 Ba hadia niŵa’õda ba da’õ? Na i’o’awõgõ ita Lowalangi, ba ha niha zi fa’udu khõda? (Sin. 118, 6). 

32 Ya’ia, si lõ alimagõ Ononia, si no mame’e da’õ salahida fefu, hadia lõ ifabaya manõ ba da’õ wame’e buala khõda da’õ fefu? (Yoh. 3, 16; Kor. I. 3, 22). 

33 Ha niha zangadugõ nitutuyu Lowalangi? No Lowalangi zanguma’õ satulõ ira. (Yes. 50, 1. 9. Fam. 12, 10. 11). 

34 Ha niha zangetu’õ huku? No so Keriso Yesu, si no mate, ba mendrua manõ, me no ifuli auri, si so ba gambõlõ Lowalangi, ba si lului manguma’õ, salahida. (F. 4, 25; Heb. 7, 25). 

35 Ha niha zamabali ya’ita ba wa’omasi Keriso ita? Hadia, famakao! ba ma fa’afõkhõ, ba ma folohi, ba ma fa’olofo, ba ma fa’o’afu, ba ma ameta’uõ, ba ma famunu? 

36 Si mane si so ba zura: ”Bõrõ ndra’ugõ, wa nibunu ndra’aga ma’õma’õkhõ, hulõ mbiribiri nitaba ndra’aga, ba dõdõ niha bõ’õ.” (Sin. 44, 23). 

37 Ba ba da’õ fefu, ba mõna sibai ita, ibe’e si no mangomasi’õ ya’ita. (Yoh. I. 5, 4 b. t. Fam. 12, 11). 

38 Noa sa faduhu dõdõgu, he fa’amate, ba he fa’auri, he mala’ika, ba he samatõrõ, he si so iada’e, ba he si so dania, he sabõlõ, (Mat. 10, 28), 

39 ba he fa’alaŵa ba he fa’abakha, ba he hadia ia mbõ’õnia nifazõkhi Lowalangi, ba lõ i’ila ifabali ita ba wa’omasi Lowalangi andrõ ita, ba khõ Keriso Yesu, So’aya ya’ita. (Yoh. 10, 28).

 

ROMA FAZA 9

I. Fa’abu dõdõ Waulo, me no mube’e baero niha Yehuda. II. Ba aro zui gamabu’ulali Lowalangi andrõ. III. Ba balazi manõ Lowalangi, he lala ibe’e. IV. Sala Niha Yehuda mbõrõ, wa no mube’e baero ira.

1 I. Si ndruhu niŵa’õgu, ba khõ Keriso, tenga fayagu, ifaduhu’õ khõgu tõdõgu, ba khõ Geheha ni’amoni’õ, (Tim. I. 2, 7. Hal. zin. 5, 32), 

2 wa no abu sibai dõdõgu, awõ wa lõ mamalõmalõ wa afõkhõ bakha dõdõgu. 

3 Omasido sa, na si tetibo ndra’o khõ Keriso, salahi dalifusõgu andrõ, si oi ya’aga, si ha sambua tua. (Moz. II. 32, 32; Kor. II. 12, 15). 

4 Iraono Gizeraëli andrõ, si so fa’a’ono, awõ lakhõmi, awõ wawu’usa li andrõ, awõ goroisa andrõ, nibe’e khõra, awõ wamosumange Lowalangi, awõ gamabu’ula li andrõ, (Moz. II. 4, 22; 40, 34. Moz. V. 14, 1. Moz. III. 26, 42. Efes. 2, 12. Heb. 9, 1. F. 3, 2),

5 awõ ndra tua andrõ, ba ba zi otarai Keriso, me tobali niha ia, si no Lowalangi, si so barõ mbawa fefu hadia ia, nisuno irugi zi lõ aetu! Yaduhu. (F. 1, 3. Heb. 1, 9. Tim. I. 3, 16. Yoh. I. 5, 20).

6 II. Ba tenga fa uŵa’õ, no awu’a daroma li Lowalangi. Ma’uwu Gizeraëli andrõ, ba tenga si no a’oi Iraono Gizeraëli. (F. 3, 3. 4; 2, 28).

7 Ba no lõ dozi iraono Gaberahamo ira, me no madounia, da’õ niŵa’õ: ”Khõ Giza’aki andrõ dania so nifotõi ma’uwumõ.” (Yoh. 9, 39. Moz. I. 21, 12). 

8 Da’e geluahania: Tenga ono Lowalangi ndraono si otarai mboto, iraono ba gamabu’ula li andrõ, da’õ niŵa’õ: ma’uwu. (Gal. 3, 7; 4, 28). 

9 Taroma li amabu’ula li daroma li andrõ: ”Na mané furi sodo, ba no so nono khõ Zara.” (Moz. I. 18, 10). 

10 Ba tenga ha da’õ, Rebeka gõi, me manabina ia khõ zi ha samõsa andrõ, khõ duada Iza’aki, (Moz. I. 25, 21), 

11 me lõ si tumbu ira na i, me lõ nifazõkhira, he si sõkhi, ba he si lõ sõkhi — ena’õ lõ tebulõ, wa balazi Lowalangi wanutuyu, wa tenga balazi mbuabua, wa moroi ba zogaoni — (F. 8, 28. 29; 11, 5. 6) 

12 ba da’õ teŵa’õ khõnia: ”Sawuyu zi akhi dania zi a’a.” (Moz. I. 25, 23). 13 Si mane si so ba zura: ”Yakobo andrõ, ba no u’omasi’õ, ba khõ Gezau, ba no fa’udu ndra’o.” (Mal. 1, 2. 3).

14 III. Ba hadia niŵa’õda? Hadia, so zi lõ atulõ nilau Lowalangi? Tenga si manõ. (Moz. V. 32, 4. Yob. 34, 10 b. t.). 

15 Imane sa khõ Moze: ”Na so zebua dõdõgu, ba ebua dõdõgu khõnia; ba na so zahakhõ dõdõgu, ba ahakhõ dõdõgu khõnia?” (Moz. II. 33, 19). 

16 Tobali tenga sa fa’edõna niha ba tenga famoregenia, ha fa’ahakhõ dõdõ Lowalangi andrõ. (Fangomb. 9, 11. Efes. 2, 8 b. t.). 

17 Si mané sa niŵa’õ khõ Wara’o, si so ba zura: ”Da’õ sibai mbõrõ, wa u’asogõ ndra’ugõ, ena’õ ufa’ele’õ wa’abõlõgu, ba khõmõ andrõ, ba ena’õ te’ombakha’õ dõigu ba guli danõ ma’asagõrõ.” (Moz. II. 9, 15. 16).

18 Tobali na so zedõna ia, ba ahakhõ dõdõnia, ba na so zedõna ia zui, ba i’abe’e’õ dõdõ da’õ. (F. 11, 30—32. Moz. II. 7, 3; 8, 15). 

19 Ba õmane khõgu: Ba hana wa ibe’e horõda? Ha niha sa zangila molaŵa zomasi ia? 

20 Bõi ua, ya’ugõ niha, ha niha ndra’ugõ, wa õtahigõ Lowalangi? Hadia, tola iŵa’õ ombõila khõ zombõi ya’ya: Hana wa õmanõ wamazõkhi ya’o? (Yes. 45, 9 b. t.). 

21 Ma tenga ba danga zamõsi bowoa so la’uri, fa tola ibali’õ nahia zi sõkhi õsa ba nahia zi lõ sõkhi õsa, zi ha sambua bõrõta? (Yer. 18, 6. Tim. II. 2, 20). 

22 Ba he wisa, na no ibologõ sibai dõdõnia Lowalangi ba nahia andrõ, si gõna fõnu dania, nihonogõi ba wa’atekiko, he no edõna ia i’oroma’õ wõnunia ba ifa’ele’õ wa’abõlõnia, (F. 2, 4 b. t. Fet. I. 2, 8), 

23 ena’õ ifa’ele’õ wa’afahõna lakhõminia andrõ, ba nahia andrõ, sahakhõ dõdõnia, si no ihonogõi, ena’õ lakhamõ lakhõmi? (F. 8, 29. 30. Efes. 1, 4—12. Hal. zin. 13, 48).

24 Ba nikaoninia gõi ya’ita andre, tenga ha moroi ba Niha Yehuda, moroi ba niha baero gõi. (F. 3, 29). 

25 Niŵa’õnia gõi nifa’ema Hosea: ”Ube’e dania tõi zi tenga banuagu mbanuagu ba tõi zi lõ omasi ndra’o fõna zomasi ndra’o, (Hos. 2, 23. Fet. I. 2, 10), 

26 ba tobali ba niŵa’õ khõra fõna: Tenga banuagu ami, ba da’õ tebe’e tõira nono Lowalangi sauri.” (Hos. 1, 10). 

27 Ba si mané li Yesaya, ba khõ Ndraono Gizeraëli andrõ: ”He si mane fa’oya ngawua nene ba mbewe nasi wa’ato Ndraono Gizeraëli, ba si tosai, ba ni’orifi. (Yes. 10, 22. 23).

28 Alua sa niŵa’õnia, itõrõ manõ, lõ ara, ibe’e So’aya, ba guli danõ.”

29 Si mane niŵa’õ Yesaya gõi fõna: ”Na lõ nisaigõ Zo’aya ngahõnõ tanõmõ khõda mena’õ, ba no tobali si mane Sodoma ita ba hulõ si mane Gomora andrõ.” (Yes. 1, 9).

30 IV. Ba hadia niŵa’õda? Niha baero, si lõ mangalui fa’atulõ dõdõ, ba no falukha wa’atulõ dõdõ, fa’atulõ dõdõ moroi ba wamati. (F. 10, 20; 3, 23). 

31 Ba Iraono Gizeraëli andrõ, sangalui lala wa’atulõ dõdõ, ba lõ nisondrara lala. (F. 11, 7 b. t.). 

32 Hana wa si manõ? Me tenga moroi ba wamati, me no si mane na moroi ba mbuabua. Noa sa manendre ira ba gowe nitendre andrõ, (Yes. 58, 2. Kor. I. 1, 23), 

33 itõrõ zi so ba zura: ”Hiza utaru’õ ba Ziona gowe nitendre, gowe wa’ate’ala; ba ha niha zi faduhu tõdõ khõnia, ba tenga saila dania.” (Yes. 8, 14; 28, 16).

 

ROMA FAZA 10

Laforege wangalui fa’atulõ dõdõ niha Yehuda, ba lõ la’ila watahõgõ. La’ositengagõ lala wamati andrõ, nituriagõ.

1  He ya’ami ira talifusõ! Da’õ wa’omasigu ba da’õ wangandrõgu khõ Lowalangi, ba khõra andrõ, ena’õ lasõndra wangorifi. (F. 9, 1 b. t.).

2 Si ndruhu sa, tebai ubini’õ, laforege sa ba khõ Lowalangi, ba no ambõ gere’era. (Hal. zin. 22, 3. Gal. 4, 17). 

3 Me lõ’õ sa aboto ba dõdõra wa’atulõ dõdõ andrõ khõ Lowalangi, ba me la’alui wamoguna’õ fa’atulõ dõdõ khõra, ba lõ la’o’õ wa’atulõ dõdõ andrõ khõ Lowalangi. (F. 9, 31. 32. Yoh. 16, 2 b. t.). 

4 Lualua goroisa sa, ba Keriso, ba wama’ema fa’atulõ dõdõ ba zamati fefu. (Mat. 5, 17. 18. Hal. zin. 13, 39. Gal. 3, 24). 

5 Imane sa Moze ba wa’atulõ dõdõ andrõ, soroi ba goroisa: ”Na so zamalua ya’ia, ba tobali fangorifinia.” (Moz. III. 18, 5. Luk. 10, 28). 

6 Ba imane fa’atulõ dõdõ andrõ, soroi ba wamati: ”Bõi ŵa’õ tõdõu: Ha niha zi mõi yaŵa ba zorugo?” ba wangai Keriso, ba wolohe mitou; (Moz. V. 30, 12. 13); 

7 ba ma: ”Ha niha zi mõi mitou, ba mbanua tou?” ba wangai Keriso, moroi ba ngai zi no mate. 

8 Hadia sa niŵa’õnia? ”No ahatõ khõu daroma li andrõ, ba mbeweu ba ba dõdõu”, taroma li ba wamati andrõ, ni’ombakha’õma. (Moz. V. 30, 14). 

9 Na itehe sa beweu So’aya Yesu ba na faduhu dõdõu, no isusugi ia Lowalangi moroi ba ngai zi mate, ba ni’orifi ndra’ugõ. (Mat. 10, 32. Kor. II. 4, 13. F. 4, 24. 25). 

10 Ba dõdõda sa so wamati, ba wogamõ fa’atulõ dõdõ, ba beweda zanehe, ba wogamõ fangorifi. 

11 Si mané sa ba zura: ”Dozi samati khõnia ba tenga saila dania.” (F. 9, 33. Yes. 28, 16). 

12 Lõ’õ sa faehu ira niha Yehuda Ndrawa Heleni. Ha sa samõsa Zo’aya ya’ira, ba zi no fahõna fefu hadia ia, ba ziangarõfi li ya’ia, fefu. (F. 3, 22. Hal. zin. 15, 9). 

13 ”Dozi sa, ha niha ziangarõfi li tõi Zo’aya, ba ni’orifi.” (Yoël. 2, 32). 

14 Ba he lawisa wa’angarõfi li, ba zi lõ mamati ira? Ba he lawisa wamati ba zi lõ nirongora, ba he lawisa wamondrongo, na lõ sangombakha? 

15 Ba he lawisa wangombakha, na lõ mufatenge ira? Si mane si so ba zura: ”Wa’asõkhi lahe zangombakha turia somuso dõdõ, si sõkhi andrõ.” (Yes. 52, 7). 

16 Ba lõ dozi la’o’õ turia somuso dõdõ andrõ. Imane sa Yesaya: ”He So’aya, ha niha zi faduhu tõdõ ba duria andrõ khõma?” (Yes. 53, 1. Yoh. 12, 38; 4, 24). 

17 Tobali moroi ba duria wamati andrõ, ba turia andrõ, ba moroi ba daroma li Keriso. (Yoh. 17, 20. Tes. I. 2, 13). 

18 Ba da’õ niŵa’õgu: Hadia, lõ nirongora? Noa sa: ”No itõrõ danõ ma’afefu lira, ba no irugi wondrege guli danõ niŵa’õra andrõ.” (Sin. 19, 5. Kol. 1, 23). 

19 Ba da’õ niŵa’õgu: Hadia lõ saboto ba dõdõ Ndraono Gizeraëli? Moze zi ofõna manguma’õ: ”Afõkhõ dania dõdõmi, ube’e, ba mbanua si tenga banuagu, ba mofõnu ami ba mbanua sambõ ere’era, ube’e.” (F. 11, 11. Moz. V. 32, 21). 

20 Ba lõ alaŵõ Yesaya ba imane: ”No lasõndra ndra’o si lõ mangalui ya’o, no to’ele ndra’o ba zi lõ manofu ya’o.” (Yes. 65, 1). 

21 Ba ba Ndraono Gizeraëli, ba imane: ”Ma’õma’õkhõ manõ no u’oro’õ dangagu ba mbanua si lõ mamondrongo li, si lõ edõna molo’õ.” (Yes. 65, 2).

 

ROMA FAZA 11

I. Tenga nitibo’õ sibai niha Yehuda andrõ. II. Andrõ bõi fayaŵa niha Keriso, soroi ba niha baero. III. Molo’õ zui na dania niha Yehuda. IV. Fa’ahõlihõli dõdõ ba wa’atuatua Lowalangi.

1 I. Ba da’õ niŵa’õgu: Hadia, no itibo’õ mbanuania Lowalangi? Tenga si manõ! Ya’odo sa gõi, ba Iraono Gizeraëli, ma’uwu Gaberahamo, mado Mbeniyami. (Yer. 31, 37. Fil. 3, 5). 

2 Lõ nitibo’õ Lowalangi banuania, si no i’ila fõna. Ma lõ nirongomi, hadia niŵa’õ ba zura, ba khõ Geliya andrõ? Me humede ia khõ Lowalangi, ba khõ Ndraono Gizeraëli andrõ, me imane: (F. 8, 29 b. t. Sin. 94, 14). 

3 ”He So’aya, no labunu zama’ele’õ andrõ khõu, no ladudugõ naha wame’e sumange khõu, ba hatõ ya’o zi tosai, ba la’alui wamunu ya’o.” (Raz. I. 19, 10. 14). 

4 Ba hadia niŵa’õ Lowalangi, wanema linia? Imane: ”No usaigõ khõgu, 7000 niha, si lõ irai manuhi tanõ fõna Mba’ali andrõ.” (Raz. I. 19, 18). 

5 Ba si manõ gõi ba gõtõ da’e: so zi tosai, dali wanutuyu andrõ, ba wa’ebua dõdõ andrõ. (F. 9, 27). 

6 Ba na moroi ba wa’ebua dõdõ, ba tenga sa’ae moroi ba mbuabua; na si manõ ena’õ, ba tenga sa’ae fa’ebua dõdõ wa’ebua dõdõ andrõ. (F. 4, 4; Gal. 2, 16). 

7 Ba he wisa? ni’alui Ndraono Gizeraëli andrõ, ba lõ nisõndrara; ba no lasõndra nitutuyu andrõ; ba si tosai, ba ni’abe’e’õ tõdõ. (F. 9, 16. 31. Kor. II. 3, 14). 

8 Si mane si so ba zura: ”No ibe’e khõra Lowalangi geheha wanukõnukõu, no ibe’e khõra hõrõ ba wa lõ mangila ba tõgi dalinga ba wa lõ mamondrongo, irugi ma’õkhõ andre.” (Yes. 29, 10; 6, 9. 10. Hal. zin. 28, 26 b. t.). 

9 Ba imane Dawido: ”Yatobali tandraŵa khõra naha wemanga andrõ khõra ba fondra’u ba fa’ate’ala ba sulõ. (Sin. 69, 23. 24). 

10 Nifobalunõ hõrõra, ena’õ lõ la’ila; ba hulura, ba faõndrõ, bõi mamalõmalõ.” 

11 Ba da’õ niŵa’õgu: Hadia, andrõ manendre ira, ena’õ alau? Tenga si manõ. Lalõra mbõrõ wõ sa, wa irugi niha baero fangorifi andrõ, ena’õ tefarou dõdõra. (Hal. zin. 13, 46; F. 10, 19). 

12 Ba na mõi hare niha guli danõ lalõra, ba na hare niha baero de’alara, ba tenga mendrosa manõ na ahori molo’õ ira? (Yer. 4, 1. 2). 

13 Ba da’õ ligu khõmi, ya’ami niha baero: Ndrohundrohu zi no sinenge ba niha baero ndra’o, ba usuno halõŵõ andrõ, niŵa’õ khõgu, (F. 1, 5), 

14 ma atṍ u’ila ufarou dõdõ dalifusõgu andrõ, ma atõ u’ila u’orifi õsa ira. 

15 Na tobali fangatulõ’õ niha guli danõ wanibo ya’ira andrõ, ba hadia wanema ya’ira, na tenga fa’auri moroi ba zi mate? (Hes. 37).

16 Ba na ni’amoni’õ wamobõrõ andrõ, ba ni’amoni’õ gõi zoya, ba na ni’amoni’õ ŵa’a, ba ni’amoni’õ gõi ndraha.

17 II. Ba na no mufafatõ ndraha õsa, ba na no mufatõfa ndra’ugõ, awõra, ya’ugõ andrõ, si no falo ndru’u, ba na no mo’urakha ndra’ugõ ba ŵa’a falo andrõ ba ba wa’amofanikhania, (Yer. 11, 16 b. t. Efes. 2, 11 b. t.), 

18 ba bõi suno ndra’ugõ, ba ndraha andrõ. Ba na õsuno ndra’ugõ, ba tenga sa atṍ ya’ugõ zanaya ŵa’a andrõ, ŵa’a andrõ zanaya ya’ugõ. 

19 Ba õmane: No mufafatõ ndraha andrõ, ena’õ tefatõfa ndra’odo. Duhu! 

20 Me lõ mamati ira, andrõ tefafatõ ira, ba ya’ugõ, ba moroi ba wamati, wa monaha ndra’ugõ. Bõi fayaŵa dõdõu, sata’u ndra’ugõ. (Heb. 3, 19; 4, 2. Kor. I. 10, 12). 

21 Na noa sa itibo’õ Lowalangi zi no to’ua daha; ba itibo’õ gõi ndra’ugõ. (Fet. II. 2, 4. 5). 

22 Andrõ tõngõni wa’ebua dõdõ Lowalangi andrõ ba fa’abe’enia gõi; ba zi no molalõ faigi wa’abe’enia, ba fa’ebua dõdõ Lowalangi, ba ba khõmõ andrõ, na lõ tebulõ ndra’ugõ ba wa’ebua dõdõ andrõ ba na tenga si manõ, ba ni’eŵa gõi ndra’ugõ dania. (Yoh. 15, 2. 6). 

23 Ba ya’ira gõi, na tenga si lõ mamalõmalõ khõra wa lõ mamati andrõ, ba nifatõfa ira dania; lõ’õ sa ambõ wa’abõlõ Lowalangi; i’ila ifuli ifatõfa ira. (F. 14, 4).

24 Na ni’eŵa sa ndra’ugõ ba zi to’ua falo ndru’u ba na nifatõfa ba falo si sõkhi, si tenga lala mena’õ, ba tenga mendru’a manõ ira, si no to’ua ya’ia, nifatõfa ba falo khõra andrõ.

25 III. Tebai sa ubini’õ khõmi, ya’ami ira talifusõ, zi no tobini andrõ, fa bõi miŵa’õ tõdõmi satuatua ami: wa no gõna fangabe’e dõdõ Ndraono Gizeraëli õsa, irugi no molo’õ gahonoa niha baero andrõ, (Luk. 21, 24; Yoh. 10, 9. 16), 

26 ba awena dania te’orifi Ndraono Gizeraëli ma’afefu, si mane si so ba zura: ”Moroi ba Ziona i’otarai dania sangorifi andrõ, iheta dania ba ndraono Yakobo wa lõ ba dõdõra Lowalangi; (Moz. V. 4, 30. 31. Yes. 59, 20. 21); 

27 ba da’õ wawu’usa li andrõ khõgu khõra, na uheta horõra andrõ”. (Yer. 31, 31—34). 

28 Tobali si fa’udu ira na dali lala duria somuso dõdõ andrõ, bõrõ ami; ba na dali wanutuyu ya’ira andrõ, ba ni’omasi’õ ira, bõrõ ndra tua. (Tes. I. 2, 15 b. t. F. 15, 8). 

29 Lõ’õ sa mangesa dõdõ Lowalangi ba game’elania ba ba wogaoninia andrõ (Moz. IV. 23, 19). 

30 Hulõ si mane ya’ami sa, si lõ molo’õ li Lowalangi fõna, ba si no falukha wa’ahakhõ dõdõ iada’e, bõrõ wa lõ molo’õ ira; (Tit. 3, 3 b. t.); 

31 si manõ gõi ira, lõ la’o’õ iada’e, ena’õ falukha ira gõi wa’ahakhõ dõdõ, moroi ba wa’ahakhõ dõdõ andrõ, si no falukha ami.

32 Noa sa ifa’u’u manõ ira fefu Lowalangi, ba wa lõ molo’õ, ena’õ ihakhõsi tõdõ ira fefu. (Gal. 3, 22. Sin. 145, 9).

33 IV. Ha lõ abakha wa no a’oi so manõ khõ Lowalangi ba fa’atuatuania ba fangilania andrõ! Si lõ aboto ba dõtõ niha wanguhukunia, ba si lõ isõndra niha lala andrõ khõnia! (Yob. 11, 6. 7). 

34 Ha niha sa zi no aboto ba dõdõ dõdõ Zo’aya andrõ? ba ha niha zi no mamolala tõdõnia? (Yes. 40, 13. 14; Kor. I. 2, 16). 

35 Ma ha niha zi no mangõhõnagõ fame’e khõnia hadia ia, nisulõni khõnia dania? (Yob. 41, 2). 

36 Moroi khõnia sa fefu hadia ia ba ya’ia zamatõrõ ba ba khõnia lualua hadia ia fefu. Ya’ia nifosumange, irugi zi lõ aetu! Yaduhu. (Kor. I. 8, 6; Rom. 16, 27; Fet. II. 3, 11).

 

ROMA FAZA 12

I. Famarou tõdõ ba wolo’õ li Lowalangi ba II. ba wa lõ fayaŵa ba ba wa lõ farõi, ba III. ba wangoroma’õ wa la’omasi’õ nawõ, he ba zi fa’udu.

1 I. Andrõ ufarou dõdõmi, ya’ami ira talifusõ, moroi ba wa’ahakhõ dõdõ Lowalangi andrõ, ena’õ mibe’e sumange mbotomi, sumange sauri, ni’amoni’õ, somasi Lowalangi; da’õ wamosumange Lowalangi khõmi, si so tõdõ. (F. 6, 13).

2 Ba bõi mifaomagõ ami ba niha zi sagõtõ tanõ andre, mibali’õ ami, wamohouni era’era dõdõmi, ena’õ mi’ila mitimba tõdõmi hadia nilau dõdõ Lowalangi, hadia zi sõkhi, hadia wa’omasinia ba hadia zo’ahonoa. (Efes. 4, 17. 22 b. t.; 5, 10. 17).

3 II. Uŵa’õ sa khõmi, dozi ami, moroi ba wa’ebua dõdõ andrõ, si no falukha ndra’o, bõi fayaŵa zamõsana, ha ndrohundrohu, era’era zatuatua yamu’alui, dali zu’asu’a wamati andrõ, nindrohugõ Lowalangi ba zamõsana. (F. 11, 20. Gal. 6, 3. Kor. II. 10, 13). 

4 Hulõ mbotoda sa, me no oya ndrotondroto khõda, ba me tenga ha sambalõ halõŵõ ndrotondroto andrõ, (Kor. I. 12, 12 b. t.), 

5 si manõ ita ba khõ Keriso, ya’ita si no ato, ha sambua boto ita, ba no ndrotondroto ita, zamõsana ba khõ nawõnia; (Kor. I. 12, 27). 

6 Ba no faehu game’ela andrõ khõda, balazi wa’ebua dõdõ andrõ, si no falukha ita: Na fama’ele’õ, ba yafaudu ba wamati andrõ; (Kor. I. 12, 4; 14, 1); 

7 ba na so zi so halõŵõ, ba yamuhaogõ halõŵõnia, ba na famahaõ, ba yamamahaõ; (Fet. I. 4, 10. 11); 

8 ba na famarou tõdõ, ba yamufarou dõdõ niha; na so zame’e ame’ela, ba ya’adõlõ dõdõnia wame’e; na samatõrõ, ba yamu’oigõ dõdõnia; ba na sahakhõ tõdõ si numana, ba ya moroi ba dõdõnia. (Mat. 6, 2 b. t. Kor. II. 9, 7). 

9 Ba wangomasi’õ awõ andrõ, ba bõi faruka wamini tõdõ. Mi’ogorofi zi lõ sõkhi andrõ, mi’olembai zi sõkhi. (Tim. I. 1, 5. Sin. 34, 15. Amos. 5, 15). 

10 Fangomasi’õ talifusõ andrõ, ba ya moroi ba dõdõmi, faoma mihulõ naŵomi, wamosumange ya’ia. (Heb. 13, 1. Fet. I. 1, 22; 2, 17). 

11 Ba wa’owõlõ’õlõ andrõ, ba bõi atage ami; ya’atarõ dõdõmi, ya enoni Zo’aya ami.

12 Mi’omusoi’õ dõdõmi ba wanõtõna andrõ, mitaha dõdõmi, na gõna ami famakao; bõi mifamalõmalõ wangandrõ. (F. 5, 2 b. t.; 8, 24 b. t. Tes. I. 5, 16. 17).

13 III. Na so ni’amoni’õ, sambõ’ambõ hadia ia, ba mitolo; mifamaha ami ba wame’e gõ dome. (Fet. I. 4, 9. Heb. 6, 10; 13, 2). 

14 Mifahowu’õ zolohi ya’ami; mifahowu’õ ba bõi mi’angelifi. (Mat. 5, 44. Fet. I. 3, 9).

15 Mi’omusoi’õ dõdõmi awõ zomuso tõdõ, ba mi’ege’ege awõ zege’ege. (Luk. 15, 32). 

16 Ya ha sara dõdõmi khõ naŵomi, bõi mifayaŵa, tou mi’iagõ, awõ zide’ide, bõi miŵa’õ tõdõmi satuatua ami. (F. 15, 5. Kor. I. 1, 10. Fil. 2, 2. 3. Yes. 5, 21). 

17 Bõi misulõni zi lõ sõkhi awõnia si lõ sõkhi, ba niha; si sõkhi mifatoutou, ba niha fefu. (F. 12, 14. Amaed. 20, 22. Kor. II. 8, 21). 

18 Na dali ami, ba ya’atulõ ami ba niha fefu. (F. 14, 19. Heb. 12, 14). 

19 Bõi milau mbalõmi, ya’ami ni’omasi’õgu! mifonaha wõnu andrõ; noa sa so ba zura: ”Khõgu wolau balõ, ya’o zanulõni, iŵa’õ So’aya.” (Moz. III. 19, 18. Mat. 5, 39 b. t. Moz. V. 32, 35). 

20 Ba na olofo zi fa’udu khõu, ba be’e gõnia, ba na owõkhi dõdõnia, ba fabadugõ khõnia nidanõ. Na õlau da’õ sa, ba õ’owuloi mbo galitõ ba hõgõnia. (Amaed. 25, 21. 22).

21 Bõi ilaŵa ndra’ugõ si lõ sõkhi, be’e folaŵa zi lõ sõkhi zi sõkhi.

 

ROMA FAZA 13

I. Famarou tõdõ ba wolo’õ li zalaŵa, ba II. ba wangomasi’õ awõ, ba III. ba wa’ohauhau.

1 I. Dozi niha ndrameo’o’õ li zalaŵa, si so ira barõ mbawa: lõ’õ sa fa’asalaŵa, na tenga moroi ba Lowalangi, ba nifataro Lowalangi zalaŵa si so andrõ. (Tit. 3, 1. Fet. I. 2, 13. 14. Yoh. 19, 11). 

2 Tobali, ha niha zolaŵa salaŵa, ba ilaŵa nihonogõi Lowalangi; ba solaŵa andrõ, ba la’a’asogõ khõra huku. 

3 Samatõrõ andrõ sa, ba tenga fameta’u ba mbuabua si sõkhi, no fameta’u ba mbuabua si lõ sõkhi. Ba na omasi’õ lõ ata’u’õ zalaŵa, ba si sõkhi lau, ba isuno ndra’ugõ. 

4 Enoni Lowalangi sa ia, soguna khõu. Ba na õlau zi lõ sõkhi, ba ata’ufi ia; tenga sa maimai, wa so khõnia wõda; enoni Lowalangi sa ia, solau balõ, samatõrõ huku ba zolau si lõ sõkhi. (Nga’õt. II. 19, 6 b. t.). 

5 Andrõ lõ tola lõ ta’o’õ lira tenga ha ba wotu andrõ, fa lõ itegu ita tõdõda gõi. 

6 Andrõ mibe’e mbeo gõi, sangai halõwõ Lowalangi sa ira, lõ tola lõ laŵa’õŵa’õ.

7 Midozigõ ira, wame’e õmõmi, bõli dõla hõgõ ba zanema bõli dõla hõgõ, ba beo ba zanema beo, ba fa’ata’u ba ni’ata’ufi, ba sumange ba nifosumange. (Mat. 22, 21).

8 II. Boi mo’õmõ ami hadia ia, gofu ba õkhõ, ha fa faoma mi’omasi’õ nawõmi; sangomasi’õ awõnia sa, ba no i’o’õ goroisa. (Yoh. 13, 34. Tim. I. 1, 5). 

9 Oroisa andrõ sa: ”Bõi ohorõ!” ”bõi ange’e!” ”bõi anagõ!” ”bõi angisõ!” ba hadia ia goroisa bõ’õ, ba no tefarahugõ ba niŵa’õ andrõ: ”Omasi’õ zahatõ khõu, si mane fa’omasiu ndra’ugõ”. (Gal. 5, 14. Moz. II. 20, 13 b. t. Moz. III. 19, 18. Mat. 22, 39. 40).

10 Fa’omasi andrõ, ba lõ ilau zi lõ sõkhi khõ nawõnia, andrõ wa folo’õ oroisa wa’omasi andrõ. (Kor. I. 13, 4 b. t.).

11 III. Andrõ mi’o’õ da’õ, me no mi’ila ginõtõ andrõ, wa no irugi baŵa khõmi, ba wemaoso moroi ba wemõrõ; noa sa ahatõ khõda wangorifi andrõ iada’e moroi me awena mamati ita. (Efes. 5, 14. 16). 

12 No numalõ zi bongi, moluo sa’ae. Ba databõhõi sa’ae mbuabua ba zogõmigõmi andrõ, ba ta’aro’õ ita fangõna ba zi moluo. (Tes. I. 5, 6. 8. Efes. 5, 11; 6. 13). 

13 Data’onangegõ wanõrõ lalada, si mane na moluo, bõi femangamanga ba famadumadu tuo, bõi fohorõhorõ ba hokha, bõi faguaguasa ba fa’afõkhõ dõdõ; (Luk. 21, 34. Tes. I. 4, 3 b. t. Yak. 3, 14); 

14 mihalõ balubalumi Zo’aya ya’ita, Yesu Keriso, ba fangehaomi õsimi andrõ, ba bõi ba wolo’õ fangisõnia. (Gal. 3, 27; 5, 16. Kor. I. 9, 27. Fet. I. 2, 11).

 

ROMA FAZA 14

I. Bõi tahuku nawõda, na so hadia ia zi fatimba khõda ma’ifu, ba II. bõi ta’alani zambõ fa’abe’e na.

1 I. Si lõ abõlõ famati na, ba mitehe gõi, ba bõi ba wanguhuku tõdõnia. (F. 15, 1 b. t.). 

2 So zanguma’õ tola manõ i’ā fefu, hadia ia, ba sambõ fa’abe’e, ba i’ā gulegule. (Moz. I. 1, 21; 9, 3. Kor. I. 10, 25).

3 Bõi yamu’ambõsi zi lõ manga si manga, ba si lõ manga, ba bõi yamuhuku zi manga; noa sa itema ia Lowalangi. (Kor. I. 8, 8 b. t.; 10, 23 b. t. Kol. 2, 16). 

4 Ya’ugõ andrõ, ha niha ndra’ugõ, wa ohuku genoni mbõ’õ? Khõ zokhõ ya’ia, na abe’e ia, ba khõ zokhõ ya’ia gõi, na alau. Ba sabe’e sa’ae ia; so sa wa’abõlõ Zo’aya, ba wangabe’e ya’ia. (Yak. 4, 11. 12). 

5 So sa zamaehusi luo, ba so zanguma’õ faoma manõ; bõi zi lõ faduhu dõdõ zamõsana. (F. 14, 3. Gal. 4, 10). 

6 Ha niha zamaehusi luo, ba khõ Zo’aya, wa ifaehusi, ba ha niha zi manga, ba khõ Zo’aya wemangania, i’andrõ sa saoha gõlõ khõ Lowalangi; ba ha niha zi lõ manga, ba khõ Zo’aya, wa lõ manga ia, ba i’andrõ gõi saoha gõlõ khõ Lowalangi. (Kol. 3, 17. Tim. I. 4, 4; Moz. V. 1, 10). 

7 Lõ’õ sa ba khõda sauri, ba khõnia manõ, ba lõ si mate, ba khõnia manõ. (Kor. II. 5, 15; Gal. 2, 20). 

8 Na auri ita sa, ba khõ Zo’aya wa’aurida, ba na mate ita, ba khõ Zo’aya wa’amateda; tobali, he sauri ita, ba he si mate ita, ba khõ Zo’aya ita. (F. 6, 10. 11; Tes. I. 5, 10). 

9 Da’õ sa mbõrõ, wa mate Keriso, awõ wa no ifuli auri, ena’õ ifatõrõ zi no mate, awõ zauri. (Hal. zin. 10, 42. Tit. 2, 14). 

10 Ba ya’ugõ, hadia wa õhuku dalifusõu? Ma ya’ugõ gõi, hadia wa õ’ositengagõ dalifusõu? Dozi ita sa, ba fõna dadaoma wanguhuku andrõ khõ Lowalangi so ita dania. (F. 2, 16; Mat. 7, 1 b. t.; Kor. II. 5, 10). 

11 Noa sa so ba zura: ”Faya wa no sauri ndra’o, iŵa’õ So’aya, na lõ dozi dania latuhi danõ fõnagu, ba na lõ dõzi bewe dania zanuno Lowalangi.” (Yes. 45, 23. Fil. 2, 10).

12 Tobali dozi ita tesekhegõ dania khõ Lowalangi, i’ombakha’õ hadia ia khõnia zamõsana. (Mat. 12, 36).

13 II. Ba bõi sa’ae tahuku nawõda; da’õ sa’ae mifaigi, fa lõ te’a’asogõ zi fatuwu, ba ma fangala, ba dalifusõ. (Mat. 18, 7. Kor. I. 8, 9; 10, 32). 

14 U’ila ba no faduhu dõdõgu, ba khõ Zo’aya, Yesu, ba lõ hadia ia zi to’ua alakha, ha ba zanguma’õ tõdõnia, no alakha, hadia ia, khõnia no alakha. (Mat. 15, 11. Tit. 1, 15). 

15 Ba na bõrõ gõ, wa abu dõdõ dalifusõu, ba tenga sa’ae fangomasi’õ awõ dali khõu; bõi be’e famakiko zi no mate Keriso salahi gõu andrõ. (F. 13, 10. Kor. I. 8, 11—13). 

16 Bõi tetandraŵasi zi sõkhi andrõ khõmi. 

17 Banua Lowalangi andrõ sa, ba tenga femangamanga ba famadumadu hadia ia, ha fa’atulõ dõdõ, ba fa’ohahau dõdõ ba fa’omuso dõdõ, ba khõ Geheha ni’amoni’õ. (Kor. I. 4, 20; 8, 8. Mat. 6, 33). 

18 Ha niha sa zi mõi enoni Keriso ba da’õ, da’õ zomasi Lowalangi, da’õ zi faduhu dõdõ niha. 

19 Ba datagohi zoguna, ena’õ atulõ ita, ba ena’õ tedoudou ba zi sõkhi nawõda, tabe’e. (F. 12, 18; 15, 2). 

20 Bõi be’e bõrõ gõ, wamakiko halõŵõ Lowalangi. Oi si sõkhi sa, ba tobali si lõ sõkhi, na i’ā niha ba na fatuwu khõnia. (Hal. zin. 10, 15. Kor. I. 8, 7). 

21 Sõkhi lõ ta’ā ndriwo ba lõ tabadu nagu, ba ma hadia ia, na fatuwu khõ dalifusõda. (Kor. I. 8, 13). 

22 Famati andrõ, si so khõu, ba khõu da’õ, dali ndra’ugõ, fõna Lowalangi. Ya’ahowu zi lõ manufa tõdõ, na si tola ba na si lõ tola, hadia ia. (Yoh. 1, 3, 21). 

23 Ba sanufa tõdõ, ba no muhuku, na i’ā, me no tenga moroi ba wamati. Ba fefu hadia ia zi tenga moroi ba wamati, ba no olalõŵa. (F. 14, 14).

 

ROMA FAZA 15

I. Famarou tõdõ, ena’õ labologõ dõdõ ba zambõ famati na ba ena’õ na ha sara dõdõ. II. Ibe’e golola Faulo, wa tola iŵa’õ manõ khõra da’õ. III. Ifabu’u we’amõi ba Roma. IV. Ifarou dõdõra, ena’õ itõrõ lira ia, na mangandrõ ira.

1 I. Ba no mo’õmõ ita, ya’ita si no abe’e, wamologõ tõdõda ba wa lõ abõlõ zambõ fa’abõlõ na; ba bõi ta’omasi’õ ita. (F. 14, 1 b. t. Kor. I. 9, 22). 

2 Dozi ita, ta’o’õ khõ nawõda, ena’õ moguna khõnia, ena’õ tedoudou ba zi sõkhi nawõda. (F. 14, 19. Tes. I. 5, 11). 

3 Si manõ sa gõi Keriso, lõ i’omasi’õ ia, itõrõ sa zi so ba zura: ”No gõna ndra’o tahi andrõ khõ zanahigõ ya’ugõ.” (Yoh. 8, 50. Sin. 69, 10). 

4 Hadia ia sa nisura fõna, ba ba wamahaõ ya’ita tesura ia, ena’õ so khõda wanõtõna andrõ, moroi ba wa’ebolo dõdõ andrõ ba moroi ba wondrara dõdõ andrõ, nirongoda ba zura. (F. 4, 23. 14). 

5 Ba Lowalangi wa’ebolo dõdõ, Lowalangi wondrara dõdõ, ba yamutolo ami, ena’õ ha sara dõdõmi, ba khõ nawõmi, dali Keriso Yesu; (F. 12, 16); 

6 ena’õ ha sara dõdõmi ba ha sara limi, wanuno Lowalangi, Ama Zo’aya ya’ita Yesu Keriso. (Hal. zin. 4, 24). 

7 Andrõ faomo mifonaha naŵomi, si mane famonaha Keriso ya’ami, ba wamolakhõmi Lowalangi. (F. 14, 1).

8 Da’õ sa niŵa’õgu: no tobali enoni niboto Keriso, bõrõ wa’aduhu Lowalangi, ba wanga’aro’õ amabu’ula li andrõ khõ ndra tua. (Mat. 15, 24; 20, 28). 

9 Ba fa’ahakhõ dõdõ andrõ mbõrõ, wa lafolakhõmi Lowalangi niha baero, si mane si so ba zura: ”Andrõ usuno ndra’ugõ ba niha baero, ba ube’e bõrõ wanuno dõimõ.” (Sin. 18, 50). 

10 Ba so zui, ba imane: ”Mi’omusoi’õ dõdõmi, ya’ami, niha baero, awõ mbanuania.” (Moz. V. 32, 43). 

11 Ba so zui: ”Misuno Zo’aya, dozi ami, motõi niha baero, ndramusuno ia fefu soi.” (Sin. 117, 1). 

12 Ba so zui, ba imane Yesaya: So dania lewiõ ba mbõrõ Iza’i andrõ, ba si maoso dania, ba wamatõrõ niha baero; khõnia manõtõna dania niha baero. (Yes. 11, 1. 10. Mat. 12, 21).

13 Ba Lowalangi wanõtõna andrõ, ba yamuhõna khõmi fefu wa’omuso dõdõ ba fa’ohahau dõdõ ba wamati andrõ, ena’õ a’oi so khõmi wanõtõna andrõ, soroi ba wa’abõlõ Geheha ni’amoni’õ. (F. 5, 1. 2).

14 II. Ba noa gõi faduhu dõdõgu, ya’ami ira talifusõgu, ba khõmi andrõ, wa no fahõna khõmi gõi gera’era si sõkhi, wa no a’oi so wa’aboto ba dõdõmi, awõ wa tola faoma mifarou dõdõ nawõmi. (Fet. II. 1, 12).

15 Ba no lõ alaŵõdo ma’ifu, wanura khõmi, hulõ ba wamasugi ba dõdõmi, moroi ba wa’ebua dõdõ andrõ, si no falukha ndra’o khõ Lowalangi, 

16 ena’õ enoni Yesu Keriso ndra’o, ba niha baero, ere, ba halõŵõ ni’amoni’õ andrõ, fangombakha turia somuso dõdõ andrõ, khõ Lowalangi, ena’õ ni’omasi’õ zumange andrõ, niha baero, ni’omasi’õ ba khõ Geheha ni’amoni’õ. (F. 11, 13; 12, 1. Yes. 66, 20). 

17 Ba so khõgu wanuno ya’o, ba khõ Keriso Yesu, ba halõwõgu andrõ khõ Lowalangi. (Kor. II. 1, 12—14). 

18 Lõ’õ sa zi lõ ata’uda utunõ, hadia ia, zi lõ itolodo Keriso, wolau ya’ia, ba wõndrõnisi niha baero ba wolo’õ, he taroma li, ba he nihalõ danga. (Kor. II. 3, 5; 4, 5. F. 1, 5). 

19 Ba wa’abõlõ dandra ba ba wa’abõlõ gila’ila, ba wa’abõlõ Geheha Lowalangi, tobali no ufalua wangombakha turia somuso dõdõ andrõ khõ Keriso, i’otarai Yeruzalema, numalõ ba zi fasui, irugi Iliria, (Kor. II. 12, 12. Hal. zin. 14, 3). 

20 Ba u’alui, ena’õ lõ uturiagõ ba zi no murongo dõi Keriso, fa bõi uhalõ halõŵõgu halõŵõ niha bõ’õ, (Kor. II. 10, 15. 16),

21 ena’õ itõrõ zi so ba zura: ”Ba zi lõ mu’ombakha’õ na hadia ia, ba khõnia, da’õ zangila dania, ba ba zi lõ murongo na ia, da’õ zaboto ba dõdõ dania.” (Yes. 52, 15).

22 III. Da’õ gõi zasese mõi bõrõ, wa tetabi ndra’o we’amõi khõmi mena’õ. (F. 1, 13). 

23 Ba iada’e, me lõ nahagu sa’ae ba danõ da’e misa, ba me no humulu dõdõgu we’amõi khõmi, ha me uga fakhe sa’ae, (F. 1, 10 b. t.), 

24 ba mõido khõmi, na mõido ba Zifania; udõnadõna sa, u’ila ami, na utõrõ, ba fao ami khõgu ba da’õ, na no usõndra ua wangabe’e ma’ifu, ba khõmi andrõ. 

25 Ba iada’e, ba usaŵa Yeruzalema, mõido enoni ni’amoni’õ andrõ. (Hal. zin. 19, 21; 24, 17). 

26 Noa sa nilau dõdõ mbanua Makedonia ba banua Nakhaya, wanolo si numana ba ni’amoni’õ andrõ ba Yeruzalema. (Hal. zin. 11, 29 b. t.). 

27 Nilau dõdõra sa ba õmõra khõra gõi. Na no mo’urakha sa’ae niha baero ba mbalazo dõdõ khõra, ba õmõra gõi latolo ira ba mbalazo mboto. (Kor. I. 9, 11). 28 Ba na no awai khõgu da’õ, na no ube’e ba dangara mbuala andrõ, ba utõrõ ami, we’amõi ba Zifania.

29 Ba no u’ila, na mõido khõmi, ba a’oi u’ohe howuhowu andrõ, khõ Keriso. F. 1, 11).

 

30 IV. Ba u’andrõ khõmi, ya’ami ira talifusõ, moroi khõ Zo’aya ya’ita, Yesu Keriso ba moroi ba wa’omasi Geheha andrõ, mitolo ndra’o wangandrõngandrõ khõ Lowalangi, ba khõgu andre, (Kor. II. 1, 11. Efes. 6, 18. 19), 

31 ena’õ te’efa’õ ndra’o ba danga zi lõ mamati andrõ, ba Yudaia, ba ena’õ omasi ni’amoni’õ wanologu Yeruzalema andrõ, (Tes. II. 3, 1. 2. Hal. zin. 21, 11. 27 b. t.), 

32 ena’õ omuso dõdõgu we’amõi khõmi, na omasi Lowalangi, ba ena’õ faoma ta’okafui dõdõ nawõda. (F. 1, 10). 

33 Ba yamutolo ami fefu Lowalangi wa’ohahau dõdõ andrõ! Yaduhu. (F. 16, 20. Tes. I. 5, 23. Tes. II. 3, 16).

 

ROMA FAZA 16

I. I’andrõ Faulo, ena’õ lafa’amõi khõra Woibe andrõ ba ena’õ latolo ia. II. Fangowai samati. III. Famarou tõdõ. IV. Fangowai ni’oroi’õ zamati. V. Fanuno Lowalangi.

1 I. U’andrõ khõmi, ba khõ Woibe andrõ, talifusõda alawe, enoni ba mbanua ba Gengerea, (Tim. I. 5, 9. b. t. Hal. zin. 18, 18),

2 ena’õ mitema ia, ba khõ Zo’aya, si nangea ba ni’amoni’õ, ba ena’õ mitolo ia ba halõŵõ fefu, ba zoguna ami khõnia; ya’ia gõi, ba no ato nitolonia, ba ya’odo gõi, ba no itolo. (Fil. 2, 29).

3 II. Mi’owai Werikila ba Akila, awõgu ba halõŵõ, ba khõ Keriso Yesu, (Hal. zin. 18, 2),

4 si no mamelegõ bagira ba nosogu; tenga ha ya’o zangandrõ saoha gõlõra, no dozi banua niha Keriso ba niha baero gõi; 

5 ba mi’owai mbanua niha Keriso andrõ yomo khõra. Mi’owai Gefaineto andrõ, somasi ndra’o, bõrõta mbanua Keriso ba Azia. (Kor. I. 16, 19). 

6 Mi’owai Maria andrõ, si no erege tõdõ khõmi. 

7 Mi’owai Gandroniko andrõ ba Yunio andrõ, iwama, awõgu nikuru, si no teturia, ba zinenge andrõ, ba noa gõi fõnagu tobali niha Keriso ira. 

8 Mi’owai Gambeliato andrõ, somasi ndra’o, ba khõ Zo’aya. 

9 Mi’owai Guribano andrõ, awõma ba halõŵõ, ba khõ Keriso, ba Sitakhi andrõ, somasi ndra’o. 

10 Mi’owai Gafele andrõ, si no faduhu dõdõda, ba khõ Keriso. Mi’owai zi so yomo khõ Garisobulo andrõ. 

11 Mi’owai Herodiano andrõ, iwama. Mi’owai niha Keriso andrõ, yomo khõ Narikiso andrõ. 

12 Mi’owai Derifena andrõ ba Terifosa, serege tõdõ ba khõ Zo’aya. Mi’owai Weresi andrõ, ni’omasi’õ andrõ, si no abõlõ halõŵõ ba khõ Zo’aya. 

13 Mi’owai Rufo andrõ, ba khõ Zo’aya, ba inania, si no tobali inagu gõi. (Mar. 15, 21). 

14 Mi’owai Gasikerito andrõ ba Felego ba Hereme ba Fateroba ba Herema ba talifusõ andrõ, awõra. 

15 Mi’owai Wilologo andrõ ba Yulia andrõ ba Nereo ba talifusõnia alawe andrõ ba Olifa, awõ ni’amoni’õ andrõ fefu, awõra.

16 Faoma mi’owai nawõmi fa’agosa bawa ni’amoni’õ andrõ. La’owai ami banua Keriso fefu. (Kor. I. 16, 20. Fet. I. 5, 14).

17 III. Ba u’andrõ khõmi, ya’ami ira talifusõ, mifaigi zamobõrõ famabali ba fangala, si lõ faudu ba wamahaõ andrõ, me lafahaõ ami; mi’erogõ ira. (Mat. 7, 15 b. t.; Fil. 3, 2; Tim. I. 6, 3—5; Tit. 3, 10 b. t.). 

18 Tenga sa enoni Zo’aya ya’ita, Yesu Keriso niha si manõ, enoni dalura ira. Ba me no si sõkhi lira, ba me lahaogõhaogõ, ba lafaelungu dõdõ zadõlõ tõdõ. (Fil. 3, 18. 19; Fet. II. 2, 1. 14 b. t.; Kol. 2, 4). 

19 Noa sa terongo wolo’õmi ba niha fefu, ba omuso dõdõgu khõmi andrõ, ba omasido na atuatua ami ba zi sõkhi, ba na owõhõwõhõ ami ba zi lõ sõkhi. (F. 1, 8; Mat. 10, 16; Kor. I. 14, 20).

20 Lõ ara tõ, ba imama barõ gahemi Zatana Lowalangi wa’ohahau dõdõ andrõ. Yafalukha ami wa’ebua dõdõ Zo’aya ya’ita, Yesu Keriso! (F. 15, 33; Moz. I. 3, 15).

21 VI. I’owai ami Timoteo andrõ, awõgu ba holõŵõ, ba Lukio andrõ ba Yaso ba Sosifatero, iwama. (Hal. zin. 16, 1; 13, 1; 17, 5; 20, 4). 

22 U’owai ami, ya’o Teresio, sanura sura andre, ba khõ Zo’aya. (Yer. 36, 4). 

23 I’owai ami Gayo, si no mõi tome ndra’o; ba hulõ zi no mõi tome khõnia mbanua ma’afefu. I’owai ami Eraso andrõ, durutuli mbanua ba Kurato, talifusõ andrõ. (Kor. I. 1, 14; Tim. II. 4, 20).

24 Yafalukha ami fefu wa’ebua dõdõ Zo’aya ya’ita, Yesu Keriso. (Kor. I. 16, 23).

25 V. Ba khõnia, sangila manga’aro’õ tõdõmi ba duria somuso dõdõ andrõ, khõgu, ba ba duria Yesu Keriso andrõ, fama’ele’õ zi no tobini andrõ, si lõ mu’ombakha’õ, gõtõgõtõ wa’ara mege, (Tes. II. 3, 3. Kol. 1, 26. Fet. I. 1, 20), 

26 nifa’ele’õ iada’e, nifarongogõ ba niha baero fefu, moroi ba zura wama’ele’õ andrõ, me no i’oroi’õ Lowalangi si lõ aetu, ba wolo’õ andrõ, ba wamati, (Efes. 3, 4. 5), 

27 khõ Lowalangi satuatua andrõ, ha ya’ia, moroi khõ Yesu Keriso, ya khõnia zumange, irugi zi lõ aetu! Yaduhu. (F. 11, 36. Tim. I. 1, 17).