SURA MOZE IV.

Table of Contents

 

SURA MOZE IV.

SURA MOZE IV.

Faza 1

I. Fangofaya niha; salaŵara. II. Sabõlõ zi felendrua tua. III. Teoniagõ Nono Lewi.

 

1 I. Ba humede Yehowa khõ Moze ba danõ si mate, ba gahe hili Zina’i, ba nose wama’ele’õ andrõ, me fasulõna ba mbaŵa si dua, me dõfi si dua, aefa aheta ira ba danõ Miserayi, imane: (Moz. V. 1, 3):

2 Mi’ofaya ha wa’ato mbanua Ndraono Gizeraëli andrõ, sambusambua mado ba sawusawōē, ba tõira, sambusambua, dozi motõi matua, samõsamõsa. (Moz. II. 30, 12).

3 Dozi solohe baluse, ba Ndraono Gizeraëli, i’otarai zi 20 fakhe fa’ebua, ba si a’a moroi andrõ, ba mi’ofaya, sambasambawá, ya’ugõ ba A’aroni.

4 Ba sambusambua mado, ba samõsamõsa tebe’e awõmi, hõgõ niwara andrõ. 5 Da’õ dõi nibe’e awõmi: ba mado Rubeno, ba Elisuri, ono Zedeuri.

6 Ba ba mado Zimeoni, ba Selumiëli, ono Zuri-Sada’i.

7 Ba ba mado Yuda, ba Nahaso, ono Gaminadabi.

8 Ba ba mado Isasari, ba Natana’eli, ono Zuara.

9 Ba ba mado Zebuloni, ba Eliabi, ono Helono.

10 Ba ba Ndraono Yosefo: ba mado Geferayi, ba Elizama, ono Gamihudi, ba ba mado Manase, ba Gameliëli, ono Wedasuri.

11 Ba ba mado Mbeniyami, ba Abidano, ono Gideono.

12 Ba ba mado Dano, ba Ahiëzeri, ono Ami-Sada’i.

13 Ba ba mado Gaseri, ba Fagiëli, ono Okherana.

14 Ba ba mado Gado, ba Eliazafi, ono Deguëli.

15 Ba ba mado Nafetali, ba Ahira, ono Genano.

16 Da’õ nituyu ba zato, hõgõ niwara andrõ, hõgõ ngahõnõ Ndraono Gizeraëli.

17 II. Ba lafakaoni’õ niha andrõ, si no mutõtõi khõra, ira Moze A’aroni,

18 ba lafalukha’õ mbanua ma’afefu, me fasulõna ba mbaŵa si dua. Ba lafatanõ’õ ba zura wa’atumbu dõira, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, samõsamõsa.

19 Dali niŵa’õ Yehowa khõ Moze; si manõ sa wangofayania ya’ira ba danõ si mate, ba gahe hili Zina’i.

20 Ba fa’ato nga’õtõ ndraono Rubeno, si a’a ndraono Gizeraëli, iwara ba ngafura ba tõira, si ha sambusambua, ni’ofaya, samõsamõsa — dozi motõi matua, i’otarai zi 20 fakhe fa’ebua ba si a’a moroi andrõ, dozi solohe baluse,

21 ha wa’ato ni’ofaya, mado Rubeno, ba no 46,500.

22 Ba fa’ato nga’õtõ ndraono Zimeoni, iwara ba ngafura ba tõira, si ha sambusambua, ni’ofaya, samõsamõsa — dozi motõi matua, i’otarai zi 20 fakhe fa’ebua ba si a’a moroi andrõ, dozi solohe baluse,

23 ha wa’ato ni’ofaya, mado Zimeoni ba no 59,300.

24 Ba fa’ato nga’õtõ ndraono Gado, iwara, ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

25 ha wa’ato ni’ofaya, mado Gado, ba no 45,650.

26 Ba fa’ato nga’õtõ ndraono Yuda, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

27 ha wa’ato ni’ofaya, mado Yuda, ba no 74,600.

28 Ba fa’ato nga’õtõ ndraono Izasari, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

29 ha wa’ato ni’ofaya, mado Izasari, ba no 54,400.

30 Ba fa’ato nga’õtõ ndraono Zebuloni, iwara ba ngafura ba tõira, si ha sambusambua, i’otarai zi 20 wulu fakhe fa’ebua ba si a’a moroi andrõ, dozi solohe baluse,

31 ha wa’ato ni’ofaya, mado Zebuloni, ba no 57,400.

32 Ba ba ndraono Yosefo andrõ, ba fa’ato nga’õtõ ndraono Geferayi, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

33 ha wa’ato ni’ofaya, mado Geferayi, ba no 40,500.

34 Ba fa’ato nga’õtõ ndraono Manase, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

35 ha wa’ato ni’ofaya, mado Manase, ba no 32,200.

36 Ba fa’ato nga’õtõ ndraono Mbeniyami, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe, baluse,

37 ha wa’ato ni’ofaya, mado Mbeniyami, ba no 35,400.

38 Ba fa’ato nga’õtõ ndraono Dano, iwara ba ngafura ba tõira, si ha sambusambua, i’otarai si 20 fakhe fa’ebua ba si a’a moroi andrõ, dozi solohe baluse,

39 ha wa’ato ni’ofaya, mado Dano, ba no 62,700.

40 Ba fa’ato nga’õtõ ndraono Gaseri, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

41 ha wa’ato ni’ofaya mado Gaseri, ba no 41,500.

42 Ba fa’ato nga’õtõ ndraono Nafetali, iwara ba ngafura ba tõira, si ha sambusambua, i’otarai zi 20 fakhe fa’ebua ba si a’a moroi andrõ, dozi solohe baluse,

43 ha wa’ato ni’ofaya, mado Nafetali, ba no 53,400.

44 Da’õ ni’ofaya andrõ, ni’ofaya ndra Moze A’aroni ba salaŵa Ndraono Gizeraëli; felendrua da’õ, sambusambua mado, ba samõsamõsa.

45 Ba dozi ni’ofaya, Iraono Gizeraëli, ngafura andrõ, i’otarai zi 20 fakhe fa’ebua ba si a’a moroi andrõ, dozi solohe baluse ba Ndraono Gizeraëli —

46 dozi ni’ofaya, ba no 603,550.

47 III. Ba Ono Lewi andrõ, iwara andrõ, ba lõ lafao khõra ba wangofaya. (Moz. II. 38, 26).

48 Ba humede Yehowa khõ Moze, imane:

49 Ono Lewi andrõ, ba lõ tola õ’ofaya, lõ tola õ’erai wa’atora, ba ngai Ndraono Gizeraëli bõ’õ.

50 Ba nahia zura goroisa õfataro Nono Lewi, ba ba wakakenia, fefu, ba ba zi fabõbõ khõnia, fefu. Ya’ira zangosa’õ ose andrõ, awõ wakake andrõ ba khõnia fefu, ba ya’ira zangai halõŵõ ba da’õ, lafasui nose wame’e nahiara.

51 Ba na mofanõ nose, ba Ono Lewi zanudugõ, ba na tebato nose, ba Ono Lewi zama’anõ, ba na so niha bõ’õ, si hatõ’õ ya’ia, ba nibunu.

52 Ba Iraono Gizeraëli bõ’õ, ba yamufaigi nahania zamõsana ba zinga mandrera khõra, dali ngawawara andrõ.

53 Ba Ono Lewi, ba lafasui nahia zura goroisa, wame’e nahara, fa bõi gõna fõnu Lowalangi Ndraono Gizeraëli sato. Ba lahalõhalõ halõŵõ ba nahia zura goroisa Ono Lewi andrõ.

54 Ba la’o’õ sibai Iraono Gizeraëli niŵa’õ Yehowa khõ Moze — ba da’õ labe’e.

SURA MOZE IV.

Faza 2

Famõfõ’õ nahia olombaseŵa Ndraono Gizeraëli, si õfa nahia: I. Mado Yuda ba mado Rubeno. II. Mado Geferayi ba mado Dano.

 

1 I. Ba humede Yehowa khõ ndra Moze A’aroni, imane:

2 Ba nahia olombaseŵa andrõ ba Ndraono Gizeraëli, ba ba mandrera khõnia ifaigi zamõsana ba ba dandra niwara; ba gamaudu nose wama’ele’õ labe’e nahara, fasui.

3 Tánõ fõna, tánõ ba gatumbukha, ba mandrera ba golombaseŵa ba mado Yuda, dali ngawawara, ba solohe Iraono Yuda, Nahaso andrõ, ono Gaminadabi,

4 awõ zato andrõ khõnia, ni’ofaya andrõ, 74,600.

5 Ba ba ngaira monaha mado Izasari, ba solohe Iraono Izasari, Natanaëli andrõ, ono Zuara,

6 awõ zato andrõ khõnia, ni’ofaya andrõ, 54,400.

7 Ba mado Zebuloni, ba solohe Iraono Zebuloni, Eliabi andrõ, ono Helono,

8 awõ zato andrõ khõnia, ni’ofaya andrõ, 57,400.

9 Dozi ni’ofaya andrõ, si fabõbõ ba nahia olombaseŵa ba mado Yuda andrõ, ngawawara andrõ, ba 186,400: ya’ira zi so fõna ba wofanõ.

10 Ba tánõ miraya, ba mandrera ba golombaseŵa ba mado Rubeno, ba ngawawara andrõ, ba solohe Iraono Rubeno, Elisuri andrõ, ono Zedeuri,

11 awõ zato andrõ khõnia, ni’ofaya, 46,500.

12 Ba ba ngaira monaha mado Zimeoni, ba solohe iraono Zimeoni, Selumiëli andrõ, ono Zuri-Sada’i,

13 awõ zato andrõ khõnia ni’ofaya, 59,300.

14 Ba mado Gado, ba solohe Iraono Gado, Eliazafi andrõ, ono Regueli,

15 awõ zato andrõ khõnia, ni’ofaya, 45,650.

16 Dozi ni’ofaya ba nahia olombaseŵa ba mado Rubeno, ba ngawawara andrõ, ba 151,450; da’õ wanete zi so fõna, ba wofanõ.

17 Ba ose wama’ele’õ, olombaseŵa Nono Lewi, ba ba dõdõ golombaseŵa bõ’õ andrõ lafazaŵa ira; balazi heza nahiara mege, ba wamazaŵara ya’ira, ba nahania i’agõ zamõsana, dali mandrera khõra.

18 II. Ba mandrera ba golombaseŵa ba mado Geferayi, ba ngawawara andrõ, ba tánõ ba gaekhula tebe’e, ba solohe Iraono Geferayi, Elisama andrõ, ono Gamihudi,

19 awõ zato andrõ khõnia, ni’ofaya, 40,500.

20 Ba ba ngaira, ba mado Manase ba solohe Iraono Manase, Gameliëli andrõ, ono Wedasuri,

21 awõ zato andrõ khõnia, ni’ofaya andrõ, 32,200.

22 Ba mado Mbeniyami ba solohe Iraono Mbeniyami, Abidano andrõ, ono Gideono,

23 awõ zato andrõ khõnia, ni’ofaya andrõ, 35,400.

24 Dozi ni’ofaya, ba nahia olombaseŵa ba mado Geferayi, ba ngawawara andrõ, ba no 108,100. Fanete zi dua bawá no mege da’õ, ba wofanõ.

25 Ba mandrera ba golombaseŵa ba mado Dano, ba ngawawara andrõ, ba tánõ miyõu tebe’e, ba solohe Iraono Dano, Ahiëzeri andrõ, ono Ami-Sada’i,

26 awõ zato andrõ khõnia, ni’ofaya andrõ, 62,700.

27 Ba ba ngaira monaha mado Gaseri ba solohe Iraono Gaseri, Fagieli andrõ, ono Okherana,

28 awõ zato andrõ khõnia, ni’ofaya, 41,500.

29 Ba mado Nafetali, ba solohe iraono Nafetali, Ahira andrõ, ono Genani,

30 awõ zato andrõ khõnia, ni’ofaya andrõ, 53,400.

31 Dozi ni’ofaya ba nahia olombaseŵa ba mado Dano, ba no 157,600. Da’õ zafuria, ba wofanõ; dali mandrera andrõ khõra.

32 Da’õ ni’ofaya andrõ, Iraono Gizeraëli, ba niwara andrõ; fa’ato ni’ofaya andrõ, ba golombaseŵa, ba ngawawara andrõ, ba no 603,550. (F. 1, 46).

33 Ba Ono Lewi, ba lõ’õ sa la’ofaya, lõ lafao ba Ndraono Gizeraëli bõ’õ, dali niŵa’õ Yehowa khõ Moze. 3

4 Ba la’o’õ sibai Iraono Gizeraëli niŵa’õ Yehowa khõ Moze wamaigi nahiara olombasewa, dali mandrera andrõ khõra; ba si manõ gõi na lafazaŵa ira, dali niwara, ha ma’uwu ira.

SURA MOZE IV.

Faza 3

I. Tehonogõi ere ndraono Ga’aroni. II. Famõfõgõ Ono Lewi, ba hadia halõŵõra. III. Tebe’e salahi zi a’a ndraono ba Ndraono Gizeraëli Nono Lewi.

 

1 I. Ba da’e nga’õtõ ndra A’aroni Moze, me luo fahuhuo Yehowa khõ Moze, ba hili Zina’i.

2 Da’e dõi ndraono Ga’aroni andrõ: Nadabi, si a’a, ba Abihu; ba Eleazari ba Itamari.

3 Da’õ dõi ndraono Ga’aroni andrõ, tõi gere andrõ, nibayoini, nifo’õsi tanga, ena’õ lahalõhalõ halõŵõ gere. (Moz. II. 28, 41).

4 Ba si mate fõna Yehowa Nadabi ba Abihu, me la’ohe fõna Yehowa galitõ si tenga, ba danõ si mate, ba gahe hili Zina’i; ba lõ khõra ono matua. Ba Eleazari ba Itamari sa’ae zangaingai halõŵõ gere, barõ mbawa namara. (Moz. III. 10, 1).

5 Ba humede Yehowa khõ Moze, imane:

6 Hede ba mado Lewi, ohe khõ Ga’aroni ere, ena’õ ngoningoninia ira.

7 Ba ya’ira zangaingai hadia ia nihalõhalõ khõnia, ba ba zato fefu, fõna nose wama’ele’õ; ya’ira zangaingai halõŵõ ba nose.

8 Ba ba dangara tebe’e fefu wakake ba nose wama’ele’õ ba hadia ia ba Ndraono Gizeraëli; sangaingai halõŵõ ba nose ira.

9 Õbe’e barõ mbawa ndra A’aroni iraononia Nono Lewi, tána khõnia manõ nibe’e Ndraono Gizeraëli bõ’õ.

0 Ba A’aroni ba iraononia, ba õfataro, ba wangai halõŵõra, halõŵõ gere; niha bõ’õ, si hatõ’õ ya’ia, ba nibunu. (F. 16, 40).

11 II. Ba humede Yehowa khõ Moze, imane:

12 Ya’odo zanutuyu ba Ndraono Gizeraëli bõ’õ Ono Lewi andrõ, salahi zi a’a bawa’atumbu, fefu, ba Ndraono Gizeraëli, — si a’a ndraono khõ ninara — ena’õ tána khõgu Nono Lewi andrõ. (F. IV. 8, 16).

13 Me no tána khõgu fefu zi a’a ba wa’atumbu; me luo ubunu zi a’a nono fefu, ba danõ Miserayi u’amoni’õ khõgu fefu zi a’a ba wa’atumbu ba Ndraono Gizeraëli, ya’odo andre, Yehowa; he niha ba he urifõ; tána khõgu ira. (Moz. II. 13, 2).

14 Ba humede Yehowa khõ Moze, ba danõ si mate, ba gahe hili Zina’i, imane:

15 Ofaya Nono Lewi andrõ, ba ngafura ba ba watalifusõta khõra, dozi motõi matua, i’otarai zi sara wawa fa’ebua, ba si a’a moroi andrõ, õ’ofaya, ya’irá.

16 Ba i’ofaya ira Moze, i’o’õ goroisa Yehowa andrõ, dali niŵa’õnia khõnia.

17 Ba da’e dõi ndraono Lewi andrõ: Gereso ba Kahati ba Merari. (Moz. II. 6, 16).

18 Ba tõi ndraono Gereso, ba ngafura, ba Libeni ba Sime’i.

19 Ba iraono Gahati, ba ngafura, ba Ameramo ba Yesehari ba Heberona ba Uziëli. 20 Ba iraono Merari, ba ngafura, ba Maheli ba Musi. Da’õ nga’õtõ Lewi ba ira amara.

21 Nga’õtõ Gereso ndraono Libeni andrõ ba iraono Zime’i. Nga’õtõ ndraono Gereso da’õ.

22 Fa’ato ni’ofaya, ya’ira — dozi motõi matua, i’otarai zi sara waŵa fa’ebua ba si a’a moroi andrõ — ba no 7,500.

23 Nga’õtõ Gereso andrõ, ba ba gero nose sosó golombaseŵara, tánõ ba gaekhula luo.

24 Ba hõgõ ndraono Gereso andrõ, ba Eliazafi, ono La’eli.

25 Ba halõŵõ ndraono Gereso andrõ ba nose wama’ele’õ, ba famaigi õsi nose, awõ dufo sagõ andrõ ba balubalu dufo sagõ ba ba’aba’a mbawandruhõ nose wama’ele’õ,

26 ba ba’aba’a golayama andrõ ba ba’aba’a mbawa gõli ba golayama, samasui ose, awõ naha wame’e sumange, ba sinalinia — fabaya fefu hadia ia halõŵõ ba da’õ.

27 Ba madou Gahati, ba ya’ia nga’õtõ Ameramo andrõ, awõ nga’õtõ Yesehari, awõ nga’õtõ Heberona, awõ nga’õtõ Uziëli. Da’õ nga’õtõ ndraono Gahati.

28 Ba fa’atora — dozi motõi matua, i’otarai zi sara waŵa fa’ebua ba si a’a moroi andrõ, ba no 8,600, si so halõŵõ ba ni’amoni’õ andrõ.

29 Ba nga’õtõ ndraono Gahati andrõ, ba ba ngai nose sosó golombaseŵara, tánõ miraya.

30 Ba hõgõ nga’õtõ ndraono Gahati andrõ, ba Elisafa, ono Uziëli.

31 Ba halõŵõra, ba famaigi tawõla andrõ ba meza ba naha wandru, awõ naha wame’e sumange, awõ wakake ni’amoni’õ andrõ, ni’oguna’õ ba wangaingai halõŵõ andrõ, ba ba’aba’a andrõ — fabaya fefu hadia ia halõŵõ ba da’õ.

32 Ba hõgõ zatua Nono Lewi andrõ, ba Eleazari, ono Ga’aroni ere andrõ, ya’ia mandru zangai halõŵõ ba ni’amoni’õ.

33 Ba nga’õtõ Merari, ba ya’ia ndraono Maheli andrõ ba iraono Musi; da’õ nga’õtõ Merari.

34 Ba fa’ato ni’ofaya, ya’irá — dozi motõi matua, i’otarai zi sara waŵa fa’ebua ba si a’a moroi andrõ, ba no 6,200.

35 Ba hõgõ nga’õtõ Merari andrõ, ba Suriëli, ono Gabiha’ili, ba ba zi tambai nose sosó golombaseŵa khõra, tánõ miyõu.

36 Ba nibe’e ba danga ndraono Merari, ba ya’ia wafa [dõladõla] nose, awõ lazi, awõ daru nahe andrõ, fabaya ahe, awõ wakakenia fefu, fabaya fefu hadia ia halõŵõ ba da’õ.

37 Ba baero õ, ba taru nahe ba golayama andrõ, fasui, fabaya ahe ba tarutaru ba sinali.

38 Ba ba mbawa duasa nose, tánõ mifõna — fõna nose wama’ele’õ, tánõ ba gatumbukha luo, — ba olombaseŵa Moze, awõ ndra A’aroni iraononia, sangaingai halõŵõ andrõ, ba ni’amoni’õ, hadia zoguna ba Ndraono Gizeraëli; ba niha bõ’õ si hatõ’õ ya’ia, ba nibunu.

39 Ba dozi ni’ofaya, Ono Lewi, ni’ofaya ndra Moze A’aroni, sawusawōē, wolo’õ niŵa’õ Yehowa — dozi motõi matua, i’otarai zi sara waŵa fa’ebua ba si a’a moroi andrõ, ba no 22,000.

40 III. Ba imane Yehowa khõ Moze: Ofaya fefu nono matua si a’a, ba Ndraono Gizeraëli, i’otarai zi sara waŵa fa’ebua ba si a’a moroi andrõ ba tanõ ba zura dõira, ha wa’ato.

41 Ba Ono Lewi andrõ õhalõ khõgu, khõ Yehowa, salahi zi a’a ba wa’atumbu fefu, ba Ndraono Gizeraëli; ba urifõ nono Lewi, ba õbe’e salahi zi a’a ba wa’atumbu ba gurifõ Ndraono Gizeraëli [bõ’õ].

42 Ba i’ofaya fefu zi a’a ba wa’atumbu ba Ndraono Gizeraëli Moze, dali niŵa’õ Yehowa khõnia.

43 Ba fa’ato dõi nono matua si a’a fefu, i’otarai zi sara waŵa fa’ebua ba si a’a moroi andrõ, dozi ni’ofaya, ba no 22,273.

44 Ba humede Yehowa khõ Moze, imane:

45 Ono Lewi halõ salahi zi a’a ba wa’atumbu fefu, ba Ndraono Gizeraëli, ba urifõ Nono Lewi, ba õbe’e salahi gurifõra; ena’õ tána khõgu Nono Lewi andrõ; Yehowa ndra’odo.

46 Ba ba wananu si 273 andrõ, si a’a ba wa’atumbu ba Ndraono Gizeraëli, sanalu’i fa’ato Nono Lewi,

47 ba lima rufia zamõsa õŵa’õ; saga ni’amoni’õ ni’anulo’õ; samba sekeli [rufia] ba 20 gera. (Moz. II. 30, 13).

48 Ba ana’a andrõ, ba ba danga ndra A’aroni iraononia õbe’e, fananu zi tõra andrõ, ba khõra.

49 Ba iŵa’õ wananu andrõ Moze ba zi tõra andrõ ba nibe’e fananu Ono Lewi.

50 Ba zi a’a ba wa’atumbu ba Ndraono Gizeraëli iŵa’õ, 1365 ba rufia, saga ni’amoni’õ.

51 Ba ibe’e ba danga ndra A’aroni iraononia wananu andrõ Moze, dali li Yehowa, si mane niŵa’õ Yehowa khõ Moze.

SURA MOZE IV.

Faza 4

Halõŵõ Nono Lewi andrõ, na mofanõ ira. I. Halõŵõ ndraono Gahati. II. Halõŵõ ndraono Gereso. III. Halõŵõ ndraono Merari. IV. Fangofaya Ono Lewi, si tola mangai halõŵõ.

 

1 I. Ba humede Yehowa khõ ndra Moze A’aroni, imane:

2 Mi’ofaya ba Nono Lewi ha wa’ato ndraono Gahati, sawusawōē, ba sambusambua watalifusõta,

3 i’otarai zi 30 fakhe ba si a’a moroi andrõ, irugi zi 50 fakhe, dozi si mõi ngoningoni, sangai halõŵõ ba nose wama’ele’õ.

4 Ba da’õ halõŵõ ndraono Gahati andrõ ba nose wama’ele’õ: famaigi ni’amoni’õ sibai andrõ.

5 Ba na mifazaŵa ami ba zolombase ami, ba mõi si bakha ndra A’aroni iraononia, lahalõ tou mba’aba’a andrõ ba labe’e balubalu dawõla zura goroisa.

6 Ba labe’e na dufo uli guaza mina ba ba dete da’õ labologõ lembe sadõlõ ungu sowōē waruwaru, ba labe’e heahea andrõ.

7 Ba meza roti nifaigifaigi andrõ, ba labalugõ lembe ungu sowōē waruwaru ba labe’e yaŵa mako ba figa ba mako wamadu andrõ, awõ gundri, soguna ba zumange nibadu, ba yaso gõi yaŵa roti andrõ, ni’ali’ali.

8 Ba da’õ fefu, ba nibalugõ lembe kirimisi, ba balubalu da’õ, ba tufa uli guaza mina; awena dania labe’e heaheania.

9 Ba lahalõ na lembe ungu sowōē waruwaru, ba labe’e balubalu naha wandru andrõ, fabaya fandru ba guti wandru ba gali andrõ, awõ naha wanikha khõnia fefu, soguna ba wangehao ya’ia.

10 Ba la’olohuni ia — fabaya fakakenia fefu — lohulohu uli guaza mina, ba labe’e ba heahea.

11 Ba naha wame’e sumange andrõ ana’a, ba labalugõ lembe ungu sowōē waruwaru, ba latõtõwui tufo uli guaza mina, ba labe’e heaheania.

12 Ba lahalõ fefu wakake soguna ba halõŵõ andrõ, nifakefake ba wangaingai halõŵõ andrõ ba ni’amoni’õ, ba la’olohuni lembe ungu sowōē waruwaru; ba latõtõwui tufo uli guaza mina, ba labe’e ba heahea.

13 Ba lahaogõ naha wame’e sumange, laheta nawu, ba labe’e balubalunia lembe ungu soyo.

14 Ba ba dete da’õ labe’e wakake andrõ, fefu, nifakefake ba wangaingai halõŵõ ba khõnia, gali andrõ ba garafu ba sundrusundru ba figa, fefu wakake ba naha wame’e sumange; ba latõtõwui ia tufo uli guaza mina, ba labe’e heaheania.

15 Ba na no mo’ahonoa khõ Ga’aroni ba ba ndraononia wangolohuni ngawalõ andrõ fefu, ni’amoni’õ fefu, na lafazaŵa ira sato, ba ndra mufa’aso ira iraono Gahati andrõ, ba wamahea; ba lõ tola lababaya ni’amoni’õ andrõ, fa bõi mate ira. (Sam. I. 6, 19; II. 6, 6).

16 Ba ba danga Geleazari, ono Ga’aroni ere, ba tebe’e wanikha wandru ba samohua andrõ nitunutunu ba sumange ni’ā andrõ, sero ma’õkhõ ba fanikha famayoini andrõ, fabaya famaigi ose ma’afefu, awõ nõsinia fefu, hadia ia ngawalõ ni’amoni’õ ba fakake andrõ khõnia.

17 Ba humede Yehowa khõ ndra Moze A’aroni, imane:

18 Bõi mibe’e nihori nga’õtõ Gahati andrõ, ba Nono Lewi.

19 Mimane wamaigi, ya’ira, ena’õ auri ira ba ni’amoni’õ sibai andrõ —: Mõi bakha ndra A’aroni iraononia ba lafataro ba halõŵõnia zamõsana, hadia nihalõ ba hadia ni’ohe.

20 Ba bõi mõi ira bakha, ba wamaigi ni’amoni’õ andrõ, he ha mamõ’i hõrõ wa’ara, fa bõi mate ira.

21 II. Ba humede Yehowa khõ Moze, imane:

22 Ofaya gõi wa’ato ndraono Gereso, sambusambua watalifusõta ba sawusawōē,

23 i’otarai zi 30 fakhe ba si a’a moroi andrõ, irege zi 50 fakhe õ’ofaya, dozi si mõi ba halõŵõ andrõ, ba wangaingai hadia ia ba nose wama’ele’õ.

24 Ba da’õ halõŵõ nga’õtõ Gereso andrõ — nihalõra ba ni’ohera:

25 Ni’ohera, ba kulambu nose andrõ ba ose wama’ele’õ, sagõnia andrõ, awõ dufo uli guaza mina, balubalunia ba ba’aba’a mbawandruhõ nose wama’ele’õ.

26 Ba ba’aba’a ba golayama ba ba’aba’a mbawa gõli ba golayama, samasui ose, awõ naha wame’e sumange, fabaya sinali andrõ khõnia ba fakake fefu, si fabõbõ ba da’õ nihalõra, ba fefu hadia ia halõŵõ ba da’õ, ba halõŵõra da’õ.

27 Dali niŵa’õ ndra A’aroni iraononia khõra ba halõŵõra andrõ, ba ni’ohera andrõ fefu ba ba nihalõhalõra fefu; ba fefu hadia ia norora, ba mituturu khõra, mitõtõi dõi.

28 Da’õ halõŵõ nga’õtõ ndraono Gereso andrõ, ba nose wama’ele’õ; ba mandrura ba halõŵõra, ba Itamari, ono Ga’aroni ere andrõ.

29 III. Ba iraono Merari, ba õ’ofaya gõi, sawusawōē ba sambusambua watalifusõta,

30 i’otarai zi 30 fakhe ba si a’a moroi andrõ, irege zi 50 fakhe, õ’ofaya, dozi si mõi ba halõwõ andrõ, sangaingai nihalõhalõ andrõ ba nose wame’ele’õ.

31 Ba da’õ ni’ohera, da’õ fefu nibe’e ba dangara, fõfõ nose wama’ele’õ: Fafa [dõladõla] nose ba lazi ba taru nahe, fabaya ahe;

32 ba taru nahe ba golayama fasui, fabaya ahe ba tarutaru ba sinali, awõ wakakenia fefu, awõ nihalõhalõ ba da’õ, fefu; ba fakake andrõ, norora, ba mituturu khõra, mitõtõi dõi.

33 Da’õ halõŵõ nga’õtõ ndraono Merari andrõ, nihalõhalõra ba nose wama’ele’õ, barõ mbawa Gitamari andrõ, ono Ga’aroni ere.

34 IV. Ba la’ofaya ndraono Gahati ira Moze A’aroni ba satua mbanua, sawusawōē ba sambusambua watalifusõta,

35 i’otarai zi 30 fakhe ba si a’a moroi andrõ, irege zi 50 fakhe, dozi si mõi ba halõŵõ andrõ, ba nihalõhalõ ba nose wama’ele’õ.

36 Ba fa’ato ni’ofaya andrõ, sawusawōē, ba no 2750.

37 Da’õ ni’ofaya nga’õtõ Gahati, dozi si so halõŵõ ba nose wama’ele’õ, ni’ofaya ndra Moze A’aroni, dali ni’oroi’õ Yehowa khõ Moze.

38 Ba ba ni’ofaya iraono Gereso, sawusawōē ba sambusambua watalifusõta, 39 i’otarai zi 30 fakhe ba si a’a moroi andrõ, irege zi 50 fakhe, dozi si mõi ba halõŵõ andrõ, ba nihalõhalõ ba nose wama’ele’õ, ba fa’ato ni’ofaya, 40 sawusawōē ba sambusambua watalifusota, ba no 2630.

41 Da’õ ni’ofaya nga’õtõ ndraono Gereso, dozi si so halõŵõ ba nose wama’ele’õ, ni’ofaya ndra Moze A’aroni, dali goroisa Yehowa.

42 Ba ba ni’ofaya nga’õtõ ndraono Merari, sawusawōē ba sambusambua watalifusõta,

43 i’otarai zi 30 fakhe ba si a’a moroi andrõ, irege zi 50 fakhe, dozi si mõi ba halõŵõ andrõ, ba nihalõhalõ ba nose wama’ele’õ,

44 ba fa’atõ ni’ofaya andrõ, sawusawōē, ba no 3200.

45 Da’õ ni’ofaya andrõ, nga’õtõ ndraono Merari, ni’ofaya ndra Moze A’aroni, dali ni’oroi’õ Yehowa khõ Moze.

46 Ba ba ni’ofaya andrõ fefu, ni’ofaya ndra Moze A’aroni ba satua Ndraono Gizeraëli, Ono Lewi sawusawōē ba sambusambua watalifusõta,

47 i’otarai zi 30 fakhe ba si a’a moroi andrõ, irege zi 50 fakhe, si mõi ba wangai halõŵõ andrõ, ba nose wama’ele’õ ba ba halõŵõ fonoro andrõ,

48 fa’ato ni’ofaya andrõ khõra, ba no 8580.

49 Ba lafataro ba halõŵõnia zamõsana — Moze zamaigi — dali goroisa Yehowa, hadia halõŵõra, hadia norora, ni’ofayania andrõ, dali niŵa’õ Yehowa khõ Moze.

SURA MOZE IV.

Faza 5

 

I. Niheta ba golombaseŵa zi ra’iõ. II. Nisalahini zinagõ. III. Folohe ba duna na so ndra alawe niŵa’õ sohorõ.

 

1 I. Ba humede Yehowa khõ Moze, imane:

2 Ŵa’õ ba Ndraono Gizeraëli, laheta ba golombaseŵa dozi si no gõna bou auri ba si so si hulõ zonana, ba dozi si no ra’iõ, me no lababaya mboto zi mate. (Moz. III. 13, 46; 21, 1).

3 He ira matua, ba he ira alawe, ba ni’ohe baero, fa bõi ra’iõ nahiara labe’e, me no ya’odo zi sosó ba khõra.

4 Ba la’o’õ da’õ Iraono Gizeraëli, la’ohe baero golombaseŵa, dali niŵa’õ Yehowa khõ Moze, si manõ wolau Ndraono Gizeraëli.

5 II. Ba humede Yehowa khõ Moze, imane:

6 Ŵa’õ ba Ndraono Gizeraëli: Na lafazõkhi horõ, he ira matua, ba he ira alawe, horõ nifazõkhizõkhi niha, na lalimo Yehowa, ba na tobali mo’õmõ niha si manõ, (Moz. III. 6, 2),

7 ba ndra mu’ombakha’õ horõ andrõ, nifazõkhira, ba la’ali zinagõra andrõ, bõi ambõ, ba sambua ni’olima wa’ebuania lanõnõ, ba ba nilimora labe’e. (Moz. III. 5, 5).

8 Ba na lõ sahatõ ba da’õ, ba nibe’e ogauta andrõ ena’õ, ba khõ Yehowa mõi gogauta andrõ nibe’e, tána ba gere, lõ lai mbiribiri si matua andrõ, fangatulõ, nibe’e ba wangatulõ ya’ia.

9 Ba fefu zi no amaedola wegero andrõ, fõfõ game’ela Ndraono Gizeraëli andrõ, ni’amoni’õ, fefu, ni’ohera khõ gere, ba tána khõnia.

10 Fefu hadia ia ni’amoni’õ niha, ba khõnia; hadia ia nibe’e niha khõ gere, ba no khõnia.

11 III. Ba humede Yehowa khõ Moze, imane:

12 Hede ba Ndraono Gizeraëli, õmane khõra: Na mosala ndronga niha, na ilimo ia,

13 na so zorudu khõnia [niha bõ’õ] ba na lõ irongo sodonga ya’ia, na lõ teboka, he ŵa’ae no rai’õ ia ibe’e, ba na lõ’õ gõi si so ba mbõrõ, na lõ mura’u baewawõ,

14 ba na tesao khõnia wa’olohu, na oloho ia ba khõ ndrongania, me no ra’iõ ia ibe’e — ma na tesao khõnia wa’olohu, fa olohu ia ba khõ ndrongania, he ŵa’ae lõ si ra’iõ ia —,

15 ba yamu’ohe khõ gere ndrongania niha da’õ, ba i’olohe’õ sumange andrõ, niŵa’õ, nibe’e, ba khõnia andrõ: sadumba hamo gandru, ba lõ tola ilau yaŵa wanikha, ba he kumõyõ, ba lõ tola ilau. Me no sumange ni’ā, ba wa’olohu, sumange ni’ā fama’ele’õ, famokai horõ.

16 Ba yamufa’aso ia [ndra alawe andrõ] ere, yamube’e fõna Yehowa.

17 Ba ihalõ nidanõ ni’amoni’õ ere, ba nahia tanõ; ba tanõ ma’ifu ihalõ ere, tou, baose, ba ilau ba nidanõ andrõ.

18 Ba ibe’e fõna Yehowa ndra alawe andrõ ere, idudugõ mbunia ba ibe’e ba dangania zumange ni’ā andrõ, sumange fama’ele’õ — no sumange ni’ā, ba wa’olohu; ba idanõ safeto andrõ, idanõ fangelifi, ba i’ohe tangania ere.

19 Ba idõni ba duna ndra alawe ere, imane khõnia: Na lõ sorudu khõu niha, na lõ si sala ndra’ugõ ba na tenga si ra’iõ ndra’ugõ ba na lõ horõu khõ ndrongau, ba bõi yatobali famunumõ nidanõ safeto andre, idanõ fangelifi.

20 Ba na no atõ mosala ndra’ugõ, na so horõu khõ ndrongau, na no ra’iõ ndra’ugõ õbe’e, na no urudu khõu niha bõ’õ, baero ndrongau —

21 (ba yamube’e ba hõlu ndra alawe andrõ ere, ba hõlu fangelifi, imane ba ndra alawe andrõ ere:) Yamube’e ni’elifi ndra’ugõ Yehowa, ba niwami; yamube’e Yehowa ariri zolamõ ba abao dalumõ;

22 ba yamutõrõ mbetu’au idanõ fangelifi andre, ena’õ abao dalumõ ba ena’õ ariri zolamõ! Ba imane dania ira alawe: Yaduhu! Yaduhu!

23 Ba itanõ ba zura wangelifi andrõ ere, ba isasai ba nidanõ safeto andrõ,

24 ba ifabadugõ ba ndra alawe andrõ nidanõ safeto andrõ, idanõ fangelifi, ena’õ itõrõ dalunia idanõ fangelifi andrõ ba ena’õ afeto khõnia.

25 Ba ihalõ sa’ae ba danga ndra alawe zumange ni’ā andrõ ere, sumange ba wa’olohu andrõ; ihahae zumange ni’ā andrõ fõna Yehowa, ba i’ohe ba naha wame’e sumange.

26 Ba ihalõ zi sadane ere, fõfõ zumange ni’ā andrõ, ihalõ samohua, nibe’e, fõfõnia, ba itunu ba naha wame’e sumange; aefa da’õ, ba ifabadugõ ba ndra alawe andrõ nidanõ andrõ.

27 Ba na no ifabadugõ khõnia nidanõ, ba na si ra’iõ ia, na no ilimo ndrongania, ba itõrõ dalunia idanõ fangelifi andrõ, ba tobali afeto khõnia: abao dania dalunia ba ariri zolania, ba ni’elifi ndra alawe andrõ na niwara.

28 Ba na tenga si ra’iõ ndra alawe andrõ, na lõ fa’ara’iõnia, ba lõ gõna ia hadia ia, ba tola manabina ia.

29 Da’õ gamakhoita ba wa’olohu. Na mosala ndra alawe, na so horõnia khõ ndrongania, na si ra’iõ ia,

30 ba ma zui na tesao wa’olohu ba ndra matua, na olohu ia ba khõ ndrongania, ba yamu’ohe fõna Yehowa ndra alawe andrõ, ba yamufatõrõ khõnia nifakhoi andrõ, fefu.

31 Ba ira matua andrõ, ba si lõ horõ; ba ira alawe si manõ ba ilu’i horõnia.

SURA MOZE IV.

Faza 6

I. Amakhoita ba ni’amoni’õ khõ Lowalangi. II. Famahowu’õ gere niha sato.

 

1 I. Ba humede Yehowa khõ Moze, imane:

2 Hede ba Ndraono Gizeraëli, õmane khõra: Na so ndra matua, ba ma ira alawe, sedõna mamabu’u ya’ia khõ Lowalangi, na i’amoni’õ ia khõ Yehowa,

3 ba lõ tola ibadu nagu ba hadia ia nibadu si mabu niha; ba he na no mubali’õ nirõ aisõ (zuka), ba lõ tola ibadu; fefu hadia ia, na õsi mbua nagu mbõrõta, ba lõ tola ibadu, ba bua nagu, he sauri, ba he ni’okõli’õ, ba lõ tola i’ā. (Sanguhuk. 13, 4. 5. Luk. 1, 15).

4 Gõtõ ni’amoni’õ ia, ba lõ tõla i’ā hadia ia nihalõ ba nagu, he hunõ, ba he uli.

5 Gõtõ wa’ara, nifabu’unia ya’ia ni’amoni’õ ba lõ tola itõrõ hõgõnia fanõŵõ. Irege no numalõ gõtõ nifabu’unia ya’ia, ba ni’amoni’õ ia laŵa’õ; bunia, ba ifotuwu. (Sam. I. 1, 11).

6 Gõtõ wa’ara nifabu’unia ya’ia khõ Yehowa, ba lõ tola mõi ia ba zi mate.

7 Na mate namania, ba ma inania, ba ma talifusõnia matua, ba ma talifusõnia alawe, ba lõ tola ihalõ fa’ara’iõnia, me no tohare khõnia we’amoni’õ andrõ khõ Lowalanginia.

8 Gõtõ we’amoni’õ andrõ khõnia, ba ni’amoni’õ khõ Yehowa ia.

9 Ba na so zi mate, si lõ mudõnadõna, ba zi so ia, na ra’iõ ba zi manõ hõgõnia andrõ, si no mu’amoni’õ, ibe’e, ba itõwõ mbunia; na luo si fitu itõwõ.

10 Ba na luo si ŵalu, ba dombua i’ohe fune ba ma ono marafadi, dombua, i’ohe khõ gere, ba zinga mbawandruhõ nose wama’ele’õ. (Moz. III. 5, 7).

11 Ba ibe’e sumange fameta horõ zi sambua ere, ba sumange nitunu zi sambua, ifaigi khõnia wangatulõ ba da’õ, me no mosala ia ba zi mate andrõ; ba na luo da’õ, ba ifuli ni’amoni’õ hõgõnia iŵa’õ,

12 ba ifuli i’amoni’õ ia khõ Yehowa fa’ara nifabu’unia [fõna], ba ono mbiribiri si dõfi fa’ebua i’ohe sumange ogauta; ba tobali si lõ mu’erai zi no numalõ irege da’õ, me no ra’iõ we’amoni’õ andrõ khõnia.

13 Ba da’õ gamakhoita ba ni’amoni’õ khõ Lowalangi: na no ahõwõ gõtõ we’amoni’õ andrõ, nifabu’unia, ba la’ohe ia ba zinga mbawandruhõ nose wama’ele’õ.

14 Ba sumange nibe’enia khõ Yehowa, ba ono mbiribiri si lõ si sala, si dõfi fa’ebua, sumange nitunu, ba ono mbiribiri si alawe, si lõ si sala, si dõfi fa’ebua, sumange fameta horõ, ba biribiri si matua, si lõ si sala, sumange fangorifi. 15 Ba baero õ, ba samba kude kue si lõ mu’aisõni, hamo si sõkhi, nifaruka fanikha ba kue sanifi, nigule’õ fanikha, ba sumange ni’ā andrõ ba sumange nibadu, si fabõbõ ba da’õ.

16 Ba i’ohe fõna Yehowa ere, ba i’asiwai khõnia zumange fameta horõ ba sumange nitunu.

17 Ba biribiri si matua andrõ, ba i’asiwai sumange Yehowa, sumange fangorifi, awõ gude andrõ, si so si lõ mu’aisõni; ba he sumange ni’ā ba sumange nibadu andrõ, ba i’asiwai khõnia ere.

18 Ba yamutõwõ sa’ae mbunia, ba hõgõnia ni’amoni’õ, niha andrõ, ni’amoni’õ khõ Lowalangi, ba da’õ, fõna mbawandruhõ nose wama’ele’õ, ba yamuhalõ mbunia andrõ, ni’amoni’õ, yamutibo’õ ba galitõ zumange andrõ, ba galitõ zumange fangorifi andrõ. (Hal. zin. 21, 24).

19 Aefa da’õ, ba ihalõ ere da’io mbiribiri si matua andrõ, si no murino, ba sagõrõ kue si lõ mu’aisõni ba gude no mege ba sagõrõ kue sanifi, si lõ mu’aisõni, ba ibe’e ba danga ni’amoni’õ andrõ, na no itõwõ mbunia andrõ, ni’amoni’õ.

20 Ba ihahae ere fõna Yehowa nihahae; tána khõ gere ia, ame’ela ni’amoni’õ, lõ lai nosu andrõ, nihahae ba faha andrõ, fegero andrõ. Awena tola ibadu nagu niha ni’amoni’õ andrõ. (Moz. II. 29, 27).

21 Da’õ gamakhoita ba ni’amoni’õ andrõ, si no mamabu’u ya’ia — hadia gõmõnia ba Lowalangi, ba we’amoni’õ ya’ia andrõ, lõ lai zi tola ibe’e na [baero õ]. Õmõ ba gamabu’ula li andrõ, me ifabu’u ia, ba itõrõ, dali gamakhoita andrõ, ba we’amoni’õ andrõ khõnia.

22 II. Ba humede Yehowa khõ Moze, imane:

23 Hede khõ ndra A’aroni iraononia, õmane: Na mifahowu’õ Ndraono Gizeraëli, ba mimane khõra:

24 Yamufahowu’õ ndra’ugõ Yehowa, yamurorogõ ndra’ugõ! (Sin. 64, 2; 134, 3).

25 Yamufohaga mbawania khõu Yehowa, yamu’ebua’õ dõdõnia khõu!

26 Yamufalemba hõrõnia khõu Yehowa, yamube’e wa’ohahau dõdõ khõu!

27 Ndramube’e tohare ba Ndraono Gizeraëli dõigu, ba ya’odo zamahowu’õ ya’ira.

SURA MOZE IV.

Faza 7

I. Sumange nibe’e zatua Ndraono Gizeraëli ba we’amoni’õ ose wama’ele’õ. II. Nibe’e zamõsana hõgõ mado andrõ, si felendrua, buala. III. Orudua nibe’e andrõ, fefu.

 

1 I. Ba me no awai ifa’anõ nose andrõ Moze ba me no ibayoini ba me no i’amoni’õ, awõ wakake khõnia fefu, ba me no ibayoini gõi naha wame’e sumange ba me no i’amoni’õ, awõ wakake khõnia fefu,

2 ba la’ohe zumange satua Ndraono Gizeraëli, hõgõ madora andrõ — salaŵa ganara andrõ, satua ni’ofaya no.

3 Ni’ohera khõ Yehowa, ame’elara, ba õnõ gureta nifosagõ, ba felendrua nono zaŵi — darudarua zalaŵa, ba sambusambua kureta ba sara nono zaŵi zamõsa; da’õ la’ohe fõna nose.

4 Ba imane Yehowa khõ Moze:

5 Tema khõra, ena’õ te’oguna’õ ba nilau andrõ, ba nose wama’ele’õ; ba ba danga Nono Lewi õbe’e, õfaigi hadia zoguna ba holõŵõ zamõsana.

6 Ba itema Moze gureta andrõ, awõ nono zaŵi ba ibe’e ba danga Nono Lewi.

7 Dombua gureta ba õfa nono zaŵi ibe’e ba danga ndraono Gereso, balazi hadia zoguna ba halõŵõra.

8 Ba õfa gureta ba ŵalu nono zaŵi ibe’e ba danga ndraono Merari, balazi hadia zoguna ba halõŵõra, barõ mbawa Gitamari andrõ, ono Ga’aroni ere.

9 Ba ba ndraono Gahati, ba lõ’õ, me solohe ni’amoni’õ [sibai] andrõ ira; ni’osa’õ da’õ.

10 Ba la’ohe salaŵa game’ela ba we’amoni’õ naha wame’e sumange, me luo tebayoini ia; fõna naha wame’e sumange labe’e zumange andrõ khõra salaŵa.

11 Ba imane Yehowa khõ Moze: Samõsa ma’õkhõ ndramube’e salaŵa zumange andrõ khõra, ba we’amoni’õ naha wame’e sumange.

12 II. Ba si bõrõtaigõ mame’e sumange khõnia, ba Nahaso, ono Gaminadabi, mado Yuda.

13 Ba sumange andrõ khõnia, ba mako firõ, 130 rufia fanulo, ba figa sebua, firõ, 70 rufia fanulo ba zaga ni’amoni’õ, faoma nifo’õsi hamo si sõkhi, nifaruka fanikha, sumange ni’ā, ba sambua wiga ana’a,

14 10 rufia fanulo, nifo’õsi samohua nitunu, ba sara nono zaŵi,

15 si matua, ba sageu mbiribiri si matua, ba sara nono mbiribiri, si matua, si dõfi fa’ebua, sumange nitunu, ba sageu nambi si matua,

16 sumange fameta horõ;

17 ba sumange fangorifi, ba dua rozi nono zaŵi, ba lima nga’eu mbiribiri si matua ba lima nga’eu nambi si matua, ba lima rozi nono mbiribiri, si matua, si dõfi fa’ebua. Da’õ game’ela Nahaso andrõ, ono Gaminadabi.

18 Ba mahemolu õ, ba Natana’eli, ono Zuara, salaŵa mado Izasari.

19-23 Ba sumange khõnia ba mako firõ, 130 rufia fanulo, ba si manõ sa’ae, si mane khõ Nahaso no mege. Da’õ game’ela Natana’eli andrõ, ono Zuara.

24 Ba me luo si tõlu, ba salaŵa Ndraono Zebuloni, Eliabi andrõ, ono Helono.

25-29 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Geliabi andrõ, ono Helono.

30 Ba me luo si õfa, ba salaŵa Ndraono Rubeno, Elisuri andrõ, ono Zedeuri.

31-35 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Gelisuri andrõ, ono Zedeuri. 3

6 Ba me luo si lima, ba salaŵa Ndraono Zimeoni, Selumiëli andrõ, ono Zuri-Sada’i.

37-41 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Zelumiëli andrõ, ono Zuri-Sada’i.

42 Ba me luo si õnõ, ba salaŵa Ndraono Gado, Eliazafi andrõ, ono Degueli.

43-47 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Geliazafi andrõ, ono Degueli.

48 Ba me luo si fitu, ba salaŵa Ndraono Geferayi, Eliazama andrõ, ono Gamihudi.

49-53 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Geliazama andrõ, ono Gamihudi.

54 Ba me luo si ŵalu, ba salaŵa Ndraono Manase, Gameliëli andrõ, ono Wedasuri.

55-59 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Gameliëli andrõ, ono Wedasuri.

60 Ba me luo si siŵa, ba salaŵa Ndraono Mbeniyami, Abidano andrõ, ono Gideono.

61-65 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Gabidano andrõ, ono Gideono.

66 Ba me luo si fulu, ba salaŵa Ndraono Dano, Ahiëzeri andrõ, ono Ami-Sada’i.

67-71 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Gahiezeri andrõ, ono Ami-Sada’i.

72 Ba me luo si felezara, ba salaŵa Ndraono Gaseri, Fagiëli andrõ, ono Okherana.

73-77 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Wagiëli andrõ, ono Okherana.

78 Be me luo si felendrua, ba salaŵa Ndraono Nafetali, Ahira andrõ, ono Genani.

79-83 Ba sumange khõnia, ba mako firõ, ba si manõ sa’ae, si mane khõ Nahaso no mege. Da’õ game’ela Gahira andrõ, ono Genani.

84 III. Da’õ we’amoni’õ naha wame’e sumange andrõ, me luo tebayoini ia, nibe’e zalaŵa Ndraono Gizeraëli: 12 mako firõ ba 12 wiga sebua firõ ba 12 wiga ana’a; sambusambua mako,

85 ba 130 rufia fanulo, ba sambusambua figa sebua, ba 70 rufia; firõ gamagama andrõ fefu, ba 2400 rufia fanulo, ba zaga ni’amoni’õ.

86 Felendrua wiga ana’a, nifo’õsi samohua nitunu; sambusambua figa ba 10 rufia fanulo, ba zaga ni’amoni’õ; ana’a wiga andrõ fefu, ba 120 rufia fanulo.

87 Ba saŵi fefu, sumange nitunu, ba 12 nono zaŵi; ba 12 mbiribiri si matua, ba 12 rozi nono mbiribiri, si matua, si dõfi fa’ebua, awõ zumange ni’ā andrõ, nifao ba da’õ, ba 12 nambi si matua, sumange fameta horõ.

88 Ba fefu zaŵi, sumange fangandrõ saoha gõlõ, ba 24 nono zaŵi; ba 60 mbiribiri si matua, ba 60 nambi si matua, ba 60 rozi nono mbiribiri, si matua, si dõfi fa’ebua. Da’õ we’amoni’õ naha wame’e sumange andrõ, me no tebayoini ia.

89 Ba na mõi bakha Moze ba nose wama’ele’õ, fahuhuo khõ Yehowa, ba irongo linia khõnia, moroi ba lagõlagõ andrõ, ba dete dawõla zura goroisa, moroi ba naha andrõ ba gotalua gerubi andrõ, si dombua; si manõ wehedenia khõnia. (Moz. II. 25, 22).

SURA MOZE IV.

Faza 8

I. Fangehao fandru, ba naha wandru yaŵa. II. Fangehao Ono Lewi. III. Ha me uga fakhe ira, na labõrõgõ we’amõi ba halõŵõra.

 

1 I. Ba humede Yehowa khõ Moze, imane:

2 Hede khõ Ga’aroni, ba õmane khõnia: Na õbe’e ba naha wandru wandru andrõ, ba mifõna naha wandru haga wandru andrõ, si fitu, õbe’e. (Moz. II. 25, 37).

3 Ba i’o’õ da’õ A’aroni; tánõ fõna ba naha wandru ibe’e wandru andrõ, dali niŵa’õ Yehowa khõ Mose.

4 Ba naha wandru andrõ, ba no ana’a nibõbõzi mege, wamazõkhi ya’ia; he tõlania, ba he bunga andrõ khõnia, oi ana’a nibõbõzi, dali wamaedo andrõ, ni’oroma’õ Yehowa khõ Moze, si manõ ifazõkhi naha wandru andrõ.

5 II. Ba humede Yehowa khõ Moze, imane:

6 Tutuyu Nono Lewi ba Ndraono Gizeraëli bõ’õ, ba haogõ ira.

7 Õmane khõra, wangehao ya’ira: Õtefe ira idanõ fameta horõ, ba latõŵõ mbura, ma’asageu ya’ira, lababago nukhara ba lahaogõ ira.

8 Ba lahalõ nono zaŵi, si matua, awõ zumange ni’ā, si fabõbõ ba da’õ — hamo si sõkhi nifaruka fanikha — ba ya’ugõ, ba sara tõ õhalõ ono zaŵi, si matua, sumange fameta horõ.

9 Ba õfa’aso nono Lewi fõna nose wama’ele’õ ba õfalukha’õ zato Ndraono Gizeraëli fefu.

10 Awena dania muhede’õ ba nono Lewi, fõna Yehowa ba latufa tangara Nono Lewi Iraono Gizeraëli.

11 Ba ihahae Nono Lewi A’aroni, fõna Yehowa, sumange nihahae, nibe’e Ndraono Gizeraëli, ena’õ lahalõhalõ halõŵõ andrõ khõ Yehowa. (Moz. II. 29, 24).

12 Ba Ono Lewi, ba latufa tangara hõgõ nono zaŵi andrõ, ba õ’asiwai, si sara, ba sumange fameta horõ, ba si sara, ba sumange nitunu khõ Yehowa, ba wameta sala Nono Lewi.

13 Ba õ’ohe khõ ndra A’aroni iraononia Nono Lewi, ba õhahae ira sumange nihahae khõ Yehowa.

14 Ba õ’oniagõ Nono Lewi ba Ndraono Gizeraëli, ena’õ tána khõgu Nono Lewi andrõ.

15 Ba aefa da’õ, ba hana na mõi bakha Nono Lewi, ba wangai halõŵõ ba nose wama’ele’õ; õmanõ wangehao ya’ira ba õhahae sumange nihahae.

16 Buala Ndraono Gizeraëli khõgu manõ sa’ae ira, salahi zi a’a ba wa’atumbu, fefu, si a’a ndraono ba Ndraono Gizeraëli fefu, wa no uhalõ ira khõgu. (F. 3, 12).

17 Me no khõgu fefu zi a’a ba wa’atumbu, ba Ndraono Gizeraëli, he ba niha, ba he ba gurifõ. Me luo ubunu no zi a’a ba wa’atumbu ba danõ Miserayi u’amoni’õ ira khõgu. (Moz. II. 13, 2).

18 Ba no uhalõ Nono Lewi, salahi zi a’a andrõ, fefu, ba Ndraono Gizeraëli.

19 Ba no ube’e tána khõ ndra A’aroni iraononia Nono Lewi andrõ nitutuyu ba Ndraono Gizeraëli, ena’õ lahalõhalõ halõŵõ andrõ ba nose wama’ele’õ, soguna ba Ndraono Gizeraëli, ba ena’õ ba’aba’a Ndraono Gizeraëli ira, fa lõ gõna famakao Ndraono Gizeraëli, na lahatõ’õ ena’õ ira ba ni’amoni’õ andrõ.

20 Ba lamanõ ba Nono Lewi andrõ ira Moze A’aroni ba sato Ndraono Gizeraëli fefu; la’o’õ sibai niŵa’õ Yehowa khõ Moze, ba Nono Lewi andrõ; si manõ wolau Ndraono Gizeraëli khõra.

21 Ba lafabeta’õ horõra Ono Lewi, ba lababago nukhara; ba ihahae ira A’aroni sumange nihahae, ba ifaigi khõra wangatulõ, ba wangehao ya’ira.

22 Ba aefa da’õ, ba mõi bakha ba nose Nono Lewi, ba wangai halõŵõra ba nose wama’ele’õ, barõ mbawa ndra A’aroni iraononia; dali niŵa’õ Yehowa khõ Moze ba Nono Lewi andrõ; si manõ wolaura khõra.

 

23 III. Ba humede Yehowa khõ Moze, imane:

24 Da’õ ia, ba Nono Lewi andrõ: Na 25 fakhe ia ba ma si a’a moroi andrõ, ba lafataro ia, ba wanolo ba halõŵõ andrõ, ba nose wama’ele’õ. (F. 4, 3).

25 Ba na 50 fakhe ia, ba aefa ia ba halõŵõ; alakha lõ’õ sa’ae mohalõŵõ.

26 Ba hana na mõi ia tohutohu danga dalifusõnia ba nose wama’ele’õ, ba wangai halõŵõ andrõ; ba si ndruhu halõŵõ, ba lõ’õ sa’ae ihalõ. Si manõ wolaumõ ba Nono Lewi andrõ, ba halõŵõra andrõ.

SURA MOZE IV.

Faza 9

I. He wisa wolau owasa fasa. II. He wisa zi tebai fao. III. Boto lawuo andrõ yaŵa nose.

 

1 I. Ba humede Yehowa khõ Moze, ba danõ si mate, ba gahe hili Zina’i, me dõfi si dua, aefa aheta ira ba danõ Miserayi, me baŵa si fõfõna, imane:

2 Bõi zi lõ lalau gowasa fasa Iraono Gizeraëli, na baŵania. (Moz. III. 23, 5).

3 Ba zi meweleõfa ba baŵa da’e lalau, na bongibongi, ba ginõtõnia; mi’o’õ nifakhoi fefu, awõ nihonogõi ba khõnia, wolau ya’ia.

4 Ba iŵa’õ Moze ba Ndraono Gizeraëli, lalau wasa andrõ.

5 Ba lalau wasa ba mbaŵa si fõfõna andrõ, ba zi meweleõfa, me bongibongi, ba danõ si mate, ba gahe hili Zina’i; la’o’õ sibai niŵa’õ Yehowa khõ Moze; si manõ wolau Ndraono Gizeraëli.

 

6 II. Ba so niha si no ra’iõ ba zi mate, ba tobali tebai lalau wasa, me luo da’õ. Ba mõi ira khõ ndra Moze A’aroni, me luo da’õ,

7 lamane khõnia: No ra’iõ ndra’aga ba zi mate, ba hana wa te’ambõsi ndra’aga, me tebai ba ginõtõnia mabe’e zumange andrõ khõ Yehowa, awõ Ndraono Gizeraëli bõ’õ?

8 Ba imane khõra Moze: Mibase’õ, da’ufondrondrongo ua, hadia niŵa’õ Yehowa ba khõmi andrõ.

9 Ba humede Yehowa khõ Moze, imane:

10 Ŵa’õ ba Ndraono Gizeraëli: Na so, ha niha ia, ba khõmi, ba ma ba nga’õtõmi dania, zi no ra’iõ ba zi mate, ba ma si no mofanõ mukoli, ba ilau zui wasa khõ Yehowa.

11 Ba mbaŵa si dua, ba zi meweleõfa, na bongibongi, lalau, lafo’awõ roti si lõ mu’aisõni ba gulegule safeto, wemanga ya’ia. (Moz. II. 12, 8).

12 Lõ tola lasaigõ hadia ia, irege mahemolu, ba sara tõla lõ tola lafatõ khõnia; la’o’õ fefu nifakhoi ba wolau fasa andrõ, wolau ya’ia. (Moz. II. 12, 46).

13 Ba si lõ fa’ara’iõ ba si tenga si mõi mukoli, ba na lõ ilau wasa, ba nise’e ia a niwara, me no lõ nibe’enia sumange andrõ khõ Yehowa, me inõtõnia; no tohare khõnia horõ ibe’e niha si manõ.

14 Ba na so ba khõmi niha bõ’õ, ba na ilau wasa khõ Yehowa, ba dali khõnia nifakhoi andrõ, awõ nihonogõi ba wolau fasa andrõ. Ha sara gamakhoita khõmi fefu, he ba niha bõ’õ, ba he ba niha ba danõ. (Moz. II. 12, 49).

 

15 III. Ba me luo tefa’anõ nose andrõ, ba ibalugõ lawuo nose — ose nahia zura goroisa — ba na bongi, ba yaŵa nose so ia, hulõ haga galitõ. (Moz. II. 40, 38).

16 Ba si manõmanõ dania: ibalugõ ia lawuo, ba ba zi bongi, ba hulõ haga galitõ, irugi moluo.

17 Ba ero na ifazaŵa ia lawuo, na iheta ia ba nose, ba lafazaŵa gõi ira Iraono Gizeraëli, ba ba zadada lawuo andrõ, ba da’õ molombase Ndraono Gizeraëli.

18 Dali goroisa Yehowa ba wamazaŵa Ndraono Gizeraëli ya’ira ba dali goroisa Yehowa ba wolombasera; fatua ahono yaŵa nose lawuo, ba lõ labulõ’õ ira ba golombaseŵa. (Moz. II. 40, 37).

19 Ba na iradõ ia yaŵa nose lawuo, ba la’o’õ nilau Yehowa Iraono Gizeraëli, lõ lafazaŵa ira.

20 Ba so gõi, ba ha mato tõlu bongi lawuo yaŵa nose; dali goroisa Yehowa ba wolombasera ba dali goroisa Yehowa ba wamazaŵara ya’ira.

21 Ba so gõi, ba sara wongi lawuo, ba na ifazaŵa ia na moluo, ba lafazaŵa gõi ira. Ba so zui, ba sara luo sara mbongi ia, ba na ifazaŵa ia lawuo, ba lafazaŵa gõi ira.

22 Ba so, ba dua wongi ia ba ma sara waŵa, ba ma ara moroi andrõ, na iradõ ia yaŵa nose lawuo, na ahono ia yaŵania, ba lõ labulõ’õ ira ba golombaseŵa Iraono Gizeraëli, lõ lafazaŵa ira. Ba na isaŵa yaŵa lawuo, ba lafazaŵa gõi ira.

23 Dali goroisa Yehowa, ero na molombase ira, ba dali goroisa Yehowa, ero na lafazaŵa ira; la’o’õ nifakhoi Yehowa, dali goroisa Yehowa khõ Moze.

SURA MOZE IV.

Faza 10

 

I. Torofe ba wame’e tandra. II. Aheta ira ba gahe hili Zina’i ba he wisa wofanõra. III. Ifasao ira Hobaba andrõ. IV. Fangandrõ Moze na mofanõ ba na tebato.

 

1 I. Ba humede Yehowa khõ Moze, imane:

2 Fazõkhi khõu dorofe, dombua, nibõbõzi, wamazõkhiu ya’ia, — soguna ba wame’e tandra ba zato, na lafazaŵa ira ba golombaseŵa.

3 Na telau, ba sowulo khõu zato fefu fõna nose wama’ele’õ.

4 Ba na ha sambua telau, ba salaŵa andrõ — hõgõ Ndraono Gizeraëli — zowulo khõu.

5 Ba na milau, fangekhugõ niha, ba si so ba golombaseŵa tánõ ba gatumbukha luo zamazaŵa ya’ira.

6 Ba na milau zamuza tõ, fangekhugõ niha, ba si so ba golombaseŵa tánõ miraya zamazaŵa ya’ira; nilau fangekhugõ niha, na lafazaŵa ira ena’õ.

7 Ba na ba wangowulo sato, ba milau manõ, si tenga fangekhugõ niha.

8 Ba iraono Ga’aroni, ere andrõ zolau torofe andrõ; ba folau ya’ia, ba huku khõmi dania, si lõ tebulõ, gõtõgõtõ wa’ara.

9 Ba na lasuwõ ami ba danõmi emalimi, samakao ya’ami, ba na milau dorofe andrõ, ba itõrõ tõdõ Yehowa, Lowalangimi, ami, ba te’efa’õ ami ba danga nemalimi andrõ.

10 Ba he gõi na baŵa wa’omuso dõdõ khõmi, ba gowasa andrõ khõmi ba ba wasulõna, ba milau dorofe andrõ, na mibe’e zumange nitunu ba sumange fangorifi; ena’õ itõrõ tõdõ Lowalangi ami ibe’e; Yehowa ndra’odo, Lowalangimi.

 

11 II. Ba ba ndrõfi si dua, me baŵa si dua, ba zi mendrõfa gofayaõ, ba isaŵa yaŵa lawuo andrõ, moroi ba nose zura goroisa.

12 Ba lafazaŵa ira Iraono Gizeraëli, monizanizara, laheta ira ba danõ si mate, ba gahe hili Zina’i, ba ba danõ si mate Farana adada lawuo.

13 Bõrõta wamazaŵara ya’ira da’õ, dali ni’oroi’õ Lowalangi khõ Moze.

14 Si fõfõna aheta, ba mandrera ba golombaseŵa Ndraono Yuda sambasambawá; ba hõgõ ngawawá andrõ khõra, ba Nahaso andrõ, ono Gaminadabi.

15 Ba solohe ngawawá mado ndraono Izasari, ba Natana’eli andrõ, ono Zuara,

16 ba solohe ngawawá mado ndraono Zebuloni, ba Eliabi andrõ, ono Helono.

17 Ba na no mududugõ nose, ba lafazaŵa ira iraono Gereso ba iraono Merari, sangosa’õ ose.

18 Aefa da’õ, ba aheta mandrera ba golombaseŵa mado Rubeno, sambasambawá; ba solohe ngawawá andrõ, si fabõbõ ba da’õ, ba Elisuri andrõ, ono Zedeuri.

19 Ba solohe ngawawá mado ndraono Zimeoni, ba Selumiëli andrõ, ono Zuri-Sadai’i.

20 Ba solohe ngawawá mado ndraono Gado, ba Eliasafi andrõ, ono Degueli.

21 Aefa da’õ, ba lafazaŵa ira nga’õtõ Gahati, sangosa’õ ni’amoni’õ andrõ; ba irege so ira, ba no mufa’anõ nose.

22 Ba awena aheta mandrera ba golombaseŵa ndraono Geferayi sambasambawá: ba solohe ngawawá si fabõbõ ba da’õ, ba Elisama andrõ, ono Gamihudi.

23 Ba solohe ngawawá mado ndraono Manase, ba Gameliëli andrõ, ono Wedasuri. 24 Ba solohe ngawawá mado ndraono Mbeniyami, ba Abidano andrõ, ono Gideono.

25 Ba aefa da’õ ba aheta mandrera ba golombaseŵa ndraono Dano, angohorita golombaseŵa fefu, sambasambawá; ba solohe ngawawá, si fabõbõ ba da’õ, ba Ahiëzeri andrõ, ono Ami-Sada’i.

26 Ba solohe ngawawá mado ndraono Gaseri, ba Fagiëli andrõ, ono Okherana.

27 Ba solohe ngawawá mado ndraono Nafetali, ba Ahira andrõ, ono Genani. 28 Da’õ wamõfõ’õ, na monizanizara Ndraono Gizeraëli wamazaŵa ya’ira, sambasambawá.

 

29 III. Ba me mofanõ ira, ba imane Moze khõ la’onia Hobaba, ono Regueli, Iraono Midiano andrõ: Hiza, mofanõ sa’ae ndra’aga, masaŵa danõ nifabu’u Yehowa, wanguma’õ: ube’e khõmi; ae awõma, ba lõ ma’ambõsi mbõli gõlõu; noa sa ifabu’u zi sõkhi sibai ba Ndraono Gizeraëli Yehowa!

30 Ba imane: Lõ omasido mõido awõmi; ufulido ba khõma, ba niwama.

31 Ba i’andrõ [khõnia Moze], imane: Bõi erogõ ndra’aga; noa sa sangila ndra’ugõ, heza mabe’e nahama wolombase, ba danõ si mate, ba akha sangombakha lala khõma ndra’ugõ.

32 Na mõi’õ awõma ba na falukhaga dania zi sõkhi sibai andrõ fefu, nibe’e Yehowa khõma, ba lõ ma’ambõsi mbõli gõlõu.

33 Ba laheta ira ba gahe hili Yehowa, mofanõ ira, tõlu ngaluo, ba sowaõwaõ fõnara dawõla andrõ, nahia zura goroisa Yehowa, zi tõlu ngaluo fofanõ andrõ, ba wangalui naha wolombase khõra.

34 Ba lawuo andrõ khõ Yehowa, ba yaŵara so na ma’õkhõ, na laheta ira ba golombaseŵa.

 

35 IV. Ba na mofanõ dawõla, ba imane Moze: Faoso Yehowa! ena’õ muzaewe zi fa’udu khõu, ba ena’õ moloi fõnau zi fatiu tõdõ khõu! (Sin. 68, 2).

36 Ba na irugi golombaseŵa, ba imane: Fuli’õ Yehowa ba zi mewulu ngahõnõ wa hõnõ andrõ Iraono Gizeraëli!

SURA MOZE IV.

Faza 11

I. Te’otu’õ alitõ wekõkõkõkõ zato. II. Folu’alu’a zato ba fa’anuzu dõdõra ”mana” andrõ. III. Mangarõngarõ Moze ba wa’abe’e halõŵõnia, ba hadia niŵa’õ Lowalangi. IV. Satua mbanua andrõ si fitu ngafulu. V. Siate; fotu wolu’alu’a andrõ.

 

1 I. Ba latahigõ Yehowa niha sato, wa hulõ nifakao ira, lafarongogõ khõ Yehowa. Ba me irongo Yehowa ba mofõnu ia; ba ifatõrõ khõra galitõ Yehowa, si manga golombaseŵa õsa. (Moz. II. 16, 2. Moz. III. 10, 2. Sin. 78, 21).

2 Ba la’angarõfi li Moze sato; ba mangandrõ Moze khõ Yehowa, ba mate galitõ andrõ.

3 Andrõ wa labe’e tõi naha andrõ Dabera (anunua), me no itõrõ ira alitõ andrõ, khõ Yehowa, ba da’õ.

4 II. Ba tesao wangisõ ba niha bõ’õ andrõ, si no fao khõra; ba ifuli labõrõtaigõ gõi Iraono Gizeraëli mangarõngarõ, lamane: Ha niha zame’e khõma diwo? (Moz. II. 12, 38. Sin. 106, 14. Kor. I. 10, 6).

5 Itõrõ tõdõma gi’a andrõ, ni’ama mege ba danõ Miserayi, si lõ bõli, ba la’izu andrõ, ba baŵa limi ba kalamboza ba baŵa ba dasu. (F. 21, 5).

6 Ba iya’e, ba si mate olofo ndra’aga, me lõ hadia ia; lõ hadia ia ma’ila, ha ”mana” andrõ.

7 Ba ”mana” andrõ, ba no hulõ mbua gatumba ba si mane mutiara wamaigida. (Moz. I. 2, 12).

8 Ba latõrõi danõ wangozaragõ ya’ia ba lakisa, ba so gõi, ba latutu; awena dania larino ba mbowoa, ba labali’õ kue sanifi; ba hulõ kue nisala ba wanikha wa’ami. (Moz. II. 16, 21).

9 Ba na aekhu namo ba golombaseŵa ba zi bongi, ba aekhu gõi yaŵa ”mana” andrõ.

 

10 III. Ba me irongo Moze mangarõngarõ zamõsana ba mbawandruhõ nosenia, niha sato, sambasamba omo, ba mofõnu sibai Yehowa ba anuzu sibai dõdõ Moze gõi.

11 Ba imane Moze khõ Yehowa: Hana wa õfakao genoniu, ba hana wa lõ’õ sa’ae ba dõdõu ya’odo, wa õbe’e manõ ba hulugu zi sambua soi andre?

12 Hadia, ya’odo mege zanabina si sambua soi andre ba ya’odo zadono ya’ia, wa õŵa’õ khõgu iada’e: Hagi ia, si mane sangai ono ba ndraono si lõ aefa na ba mbagi zusu, ba ohe ba danõ andrõ, nifabu’ugu khõ ndra tuara fahõlusa?

13 Heza uhalõ ndriwo, ba wame’e ba zi sambua soi andre? Mangarõngarõ ira khõgu, lamane: Faigi khõma ndriwo, õma!

14 Tebai u’ohe noro andrõ, si so ba hulugu, ba zi sambua soi andre, tebai, na ha ya’odo; no tenga inõtõ norogu.

15 Na õlau khõgu da’õ, ba si sõkhinia, na õdõlõ wamunu ya’o, na so atõ ba dõdõu ndra’odo, fa bõi sa’ae ufaigifaigi wamakaogu andrõ.

16 Ba imane Yehowa khõ Moze: Kaoni khõgu niha, 70, satua Ndraono Gizeraëli, ni’ilau wa no salaŵa ira ba mbanuara ba samaigimaigi sato; ba nose wama’ele’õ ohe ira, ena’õ la’iagõ ngaimõ ba da’õ. (Moz. II. 18, 21).

17 Ba mõido tou dania fahuhuo khõu ba da’õ, ba uhalõ ma’ifu Geheha andrõ, si no ahono khõu, ba ufa’ema khõra, ena’õ latolo’õ wolohe noro andrõ ba niha andre, fa bõi ha ya’ugõ zi onoro ya’ia.

18 Ba ba niha sato, ba õmane: Mifaigi, fa lõ fa’ara’iõmi mahemolu, so gõmi diwo donia; noa sa mangarõngarõ ami, nirongo Yehowa, me mimane: Ha niha zame’e khõma diwo, õma? Noa sa ohahau dõdõma ba danõ Miserayi mege! Ba so dania khõmi ndriwo ibe’e Yehowa, ena’õ lõ ambõ õmi. (Yos. 3, 5).

19 Tenga ha ma’õkhõ ba tenga ha dua ngaluo, ba tenga ha lima ba tenga ha fulu ba tenga ha dua wulu ngaluo mi’amanga’õ,

20 alo’o sara waŵa wa’ara dania, irege tebai sa’ae mi’ago hua, irege ogoro ami; noa sa lõ ba dõdõmi Yehowa, si sosó ba khõmi, ba no mangarõngarõ ami ba no mimane: Hadia atõ, wa aheta mege ita ba danõ Miserayi? (F. 21, 5).

21 Ba imane Moze: Õnõ ngaotu ngahõnõ zabõlõ niha andrõ, si so ndra’o, ba õfabu’u, wanguma’õ: Modiwo ira ube’e, ba tobali alo’o sara waŵa wa’ara la’amanga’õ?

22 Hadia, tola tetaba õra mbiribiri ba saŵi, balazi abõnõ õra?

23 Ba imane Yehowa khõ Moze: Hadia, no ambõ wa’abõlõ Yehowa? Awena dania õ’ila, na itõrõ nifabu’ugu khõu, ba na lõ’õ. (Yes. 50, 2).

 

24 IV. Ba mõi baero Moze mangombakha ba niha sato niŵa’õ Yehowa. Ba ikaoni zi fitu ngafulu, salaŵa mbanua, baero nose ifa’aso, fasui.

25 Ba mõi tou Yehowa ba lawuo andrõ, fahuhuo khõnia. Ba ihalõ ma’ifu Geheha andrõ, si no ahono khõnia ba ifa’ema ba zi fitu ngafulu niha andrõ, salaŵa andrõ. Ba me manandrõsa khõra Geheha ba mama’ele’õ ira, ba dania, ba lõ’õ sa’ae. (Hal. zin. 10, 44).

26 Ba darua zi no torõi furi, ba golombaseŵa; Eledado dõi zi samõsa ba Medado zi samõsa. Ba ba khõra gõi mõi Geheha, noa sa awõ nitanõ ba zura ira, ba lõ si mõi ira ba nose, ba tobali ba golombaseŵa mama’ele’õ ira.

27 Ba fagohi nono matua samõsa, isaŵa Moze, imane khõnia: Mama’ele’õ ba golombaseŵa ndra Eledado Medado!

28 Ba imane Yosua andrõ, ono Nuni, si no ngoningoni Moze, i’otarai iraono ia: He Tuagu, Moze, tenaŵa ira!

29 Ba imane khõnia Moze: Hadia, ya’ugõ zame’e lala khõgu? Ena’õ na sama’ele’õ manõ mbanua Yehowa fefu, ena’õ ifa’ema khõra Gehehania Yehowa!

30 Ba ifuli ia ba golombaseŵa Moze, awõ zatua Ndraono Gizeraëli andrõ.

 

31 V. Ba tesao nangi nifatõrõ Yehowa, sangoloi’õ siate moroi ba mbewe nasi, ifatõrõ ba golombaseŵa; ma’õkhõ fofanõ tánõ andre ba ma’õkhõ fofanõ tánõ sa, ba zi tefasui olombaseŵa, dua hela wa’awe’ewe’e aefa ba danõ. (Moz. II. 16, 13. Sin. 78, 27).

32 Ba maoso ira, ma’õma’õkhõ ba sara wongi ba ma’õma’õkhõ mahemolu la’ozaragõ ziate; si lõ oya’oya mangozaragõ, ba no mato 14 ngaso’e, ba labologõ ba zi tefasui olombaseŵa [ba wangokõli’õ].

33 Ba me la’aga’aga na ndriwo andrõ, me lõ sahori na, ba tesao wõnu Yehowa khõra, ba ifatõrõ khõra wamakiko sabõlõbõlõ. (Sin. 78, 30. 31).

34 Andrõ wa labe’e tõi naha andrõ Kiberoti hata’awa (lewatõ zolu’alu’a), me ba da’õ lako’o niha solu’alu’a andrõ.

35 Ba i’otarai Kiberoti hata’awa, ba lasaŵa Haseroti, ba tebato ira ba Haseroti andrõ.

SURA MOZE IV.

Faza 12

I. Mukõkõkõkõ ndra Miriya A’aroni khõ Moze. II. Ibu’a ba hulu genoninia Moze Lowalangi. III. Tebe’e fotu Miriya mbou auri, ba ifuli dõhõ ba wangandrõ Moze.

 

1 I. Ba labõbõgõ khõ Moze zi lõ sõkhi ira Miriya A’aroni, bõrõ ndra alawe Ndrawa Gaitiofia andrõ; noa sa ira alawe Ndrawa Gaitiofia nihalõnia. (Moz. II. 2, 21).

2 Ba lamane: Hadia, ha khõ Moze mege fahuhuo Yehowa? Hadia, lõ si fahuhuo ia khõma? Ba irongo Yehowa.

3 Ba no sebolo sibai tõdõ Moze andrõ, moroi ba niha bõ’õ fefu ba guli danõ.

 

4 II. Ba i’ogomuzaõ imane Yehowa khõ ndra Moze A’aroni Miriya: Mi’ae ba nose wama’ele’õ, datõlu ami!

5 Ba mõi ira, datõlu ira. Ba mõi tou Yehowa, ba mboto lawuo, i’iagõ mbawandruhõ nose, muhede ia khõ ndra A’aroni Miriya; ba mõi baero zi darua andrõ.

6 Ba imane: Mifondrondrongo niŵa’õgu! Na so ba khõmi zama’ele’õ ba u’oroma’õ ndra’o khõnia ba gangilata, ba ma ba wangifi muhededo khõnia.

7 Ba tenga si manõ khõ genonigu Moze andrõ; no ba dangania tebe’e fefu hadia ia yomo khõgu. (Heb. 3, 2).

8 Fahuohuo ndra’o khõnia, faudu wawa ndra’aga, ba tenga ba dahõdahõ, anehe ia nga’eu Yehowa. Ba hana wa lõ ata’u ami mibõbõgõ zi lõ sõkhi khõ genonigu andrõ, khõ Moze andrõ? (Moz. II. 33, 11).

 

9 III. Ba mofõnu sibai khõra Yehowa, ba iheta ia,

10 ba iheta gõi ia ba nose lawuo. Ba i’ozumagõ tehawu bou auri Miriya, afusi, hulõ mbetua. Ba me i’otahõgõ ia A’aroni, ba no tehawu bou auri ia, si lõ mudõnadõna. (Moz. V. 24, 9).

11 Ba imane A’aroni khõ Moze: He Tua, bõi be’e horõma, me no hulõ zowõhõ mowa ndra’aga ba me no molalõ ndra’agá!

12 Bõi hulõ nono si no mate moroi ba dalu ia, si no matonga obou õsi, na i’otarai dalu ninania!

13 Ba i’angarõfi li Yehowa Moze, imane: He Lowalangi, fadõhõ khõnia!

14 Ba imane Yehowa khõ Moze: Hadia na no idiloi mbawania amania, ba hadia, tenga fitu bongi wa’ara aila ia? Ba fitu bongi yamu’iagõ baero golombaseŵa, ni’oniagõ; ba na aefa da’õ, ba hana na lafuli lafa’amõi ia. (Moz. III. 13, 46).

15 Ba la’oniagõ Miriya, baero golombaseŵa, fitu bongi. Ba lõ latohugõ wofanõ, irege no mufuli mufa’amõi Miriya.

16 Ba aefa da’õ, ba laheta ira ba Haseroti andrõ, ba ba danõ si mate Farana molombase ira dania. (F. 10, 12).

 

SURA MOZE IV.

Faza 13

I. Tefatenge zamauze tanõ Gana’ana. II. Mõi ria. III. Abu dõdõ zato, ba irara Kalebi.

 

1 I. Ba humede Yehowa khõ Moze, imane:

2 Fatenge niha, ena’õ lafauzeï danõ Gana’ana andrõ, nibe’egu ba Ndraono Gizeraëli dania; samõsa zambua mado mifatenge, ha sambalõ salaŵara.

3 Ba ifatenge Moze, moroi ba danõ si mate Farana, dali goroisa Yehowa, ha sambalõ si no salaŵa ba Ndraono Gizeraëli. (Moz. V. 1. 22).

4 Ba da’e dõira: Mado Rubeno, ba Samua, ono Zakuri;

5 ba mado Zimeoni, ba Safata, ono Hori;

6 ba mado Yuda, ba Kalebi, ono Yefune; ba mado Izasari,

7 ba Igeala, ono Yosefo; ba mado Geferayi,

8 ba Hosea, ono Nuni;

9 ba mado Mbeniyami ba Falati, ono Rafu,

10 ba mado Zebuloni, ba Gadiëli, ono Zodi; ba mado Yosefo,

11 mado Manase andrõ, ba Gadi, ono Zusi; ba mado Dano, ba Amiëli,

12 ono Gamali; ba mado Gaseri,

13 ba Seturo, ono Mikha’eli;

14 ba mado Nafetali, ba Nahebi, ono Wofisi;

15 ba mado Gado, ba Gõeli, ono Makhi.

16 Da’õ dõi niha andrõ nifatenge Moze, ba wamauze tanõ. Ba tõi Hosea andrõ, ono Nuni, ba Yosua ibe’e Moze.

17 Ba ifatenge ira Moze ba wamauze tánõ Gana’ana andrõ. Ba imane khõra: Mi’ae miyaŵa ba da’õ ba danõ tánõ raya, misõsõ hili andrõ;

18 mifaigi he wisa danõ andrõ, ba na sabõlõ niha andrõ, si so ba danõ, ba na samomó, ba na sambõ fa’ato, ba na si no ato;

19 he wisa gamuata danõ andrõ, ba zi so ira, na si sõkhi, ba na si lõ sõkhi, ba he wisa mbanua, nahiara andrõ, na ba danõ manõ so ira, ba na ba mbanua saro;

20 ba he wisa nowi gõi, na satabõ sinanõ, ba na safuo; na so dõla geu, ba na lõ’õ. Ba mi’abe’e’õ sa’ae dõdõmi ba mi’ohe ba da’e õsa mbua danõ! Ba no baŵa mbua nagu sahulõ.

21 Ba mõi ira misi yaŵa, lafauzeï danõ, i’otarai danõ si mate Sini andrõ, irugi Rehobi, irege wabaliŵa lala ba Hamata.

22 II. Mõi ira misi yaŵa ba danõ tánõ raya ba larugi Heberona, banua ndra Ahima, Sezai, Talamai, nga’õtõ Genaki andrõ. Ba Heberona andrõ, ba mewitu fakhe fõna wanaru’õ Soana ba danõ Miserayi tetaru’õ mege. (Yos. 15, 14).

23 Ba me larugi ndraso Esikoli andrõ, ba lataba zara ndraha nagu, fabaya bua, sangamohi, ba darua zamabea, ba lahalõ gõi mbua dalimo õsa ba bua ara õsa.

24 Ba andrõ wa labe’e tõi ndraso andrõ ndraso Esikoli, ba mbua nagu andrõ, nitaba Ndraono Gizeraëli ba da’õ.

 

25 III. Ba me no irugi 40 wongi, me no lafauzeï danõ, ba lafuli ira.

26 Mowaõwaõ ira, ba larugi ndra Moze A’aroni ba Iraono Gizeraëli fefu, sato, ba danõ si mate Farana, ba Gadesi; ba la’ombakha’õ khõra ba ba zato fefu lualua, ba la’oroma’õ khõra mbua danõ andrõ.

27 Ba ladunõdunõ khõ Moze, lamane: No marugi danõ andrõ, nifatengeu ya’aga. Si ndruhu sa, si falawu susu ba ŵe ŵani, ba yā’e mbua danõ;

28 ba si ndruhu gõi niha andrõ, si so ba danõ, ba no sabõlõ, ba banua, ba saro ba sebua sibai, ba noa gõi ma’ila ba da’õ nga’õtõ Genaki andrõ. (Moz. V. 9, 2).

29 Ba danõ tánõ raya, ba Iraono Gamaleki; ba ba hili, ba Iraono Kheti, ba Iraono Yebusi ba Iraono Gamori; ba Dawa Gana’ana zi hene asi ba fatambai Yoridano. 30 Ba Kalebi zondrara tõdõ zato ba khõ Moze, imane: Mõi zui ita misi yaŵa, tahalõ khõda danõ; tenga safõkhõ sibai wolaŵa ya’ira!

31 Ba lamane awõnia si fao khõnia mege misi yaŵa: Tebai tasuwõ niha andrõ, no sabõlõ abe’e ira!

32 Ba si lõ sõkhi la’ombakha’õ ba Ndraono Gizeraëli, ba danõ andrõ, nifauzeïra, lamane: Tanõ andrõ nitõrõima, ba wamauze ya’ia, ba i’aga’aga niha si so ba khõnia, ba niha andrõ fefu, ni’ilama ba da’õ, ba no si tenga inõtõ fa’ebua.

33 Ba no ma’ila gõi ba da’õ niha andrõ sebua sibai, nga’õtõ Genaki andrõ, awõ zebua sibai andrõ, ba amaedola lareŵe ndra’aga fõnara, wamaigima, ba si manõ gõi wamaigira.

SURA MOZE IV.

Faza 14

I. Molaŵa zato ba tebai lahonogõ ira ira Yosua Kalebi. II. Ifeta’u ira Lowalangi ba mangandrõ Moze. III. Te’ombakha’õ khõra, wa 40 fakhe irõrõ ira ba danõ si mate Lowalangi. IV. Te’ala zabe’e tandro andrõ, labe’e Dawa Gana’ana.

 

1 I. Ba mu’ira’ira niha sato fefu, mangarõngarõ ira ba zi bongi andrõ.

2 Ba dozi Iraono Gizeraëli, ba kumõkõkõkõ khõ ndra Moze A’aroni, lamane khõra sato fefu: Alai ndra’aga! ena’õ na mate mege ndra’aga ba danõ Miserayi, ba ma ba da’e, ba danõ si mate! (Sin. 106, 25).

3 Hana wa edõna i’ohe ita ba danõ andrõ Yehowa, ena’õ ba mbawa zi’õli mate ita? Ba õ nemali wo’omoda ba iraono sawuyu khõda. Hadia, tenga si sõkhinia, na tafuli ita ba danõ Miserayi!

4 Ba faoma lamane khõ nawõra: Datafaigi khõda zolohe ya’ita, ba tafuli ita ba danõ Miserayi!

5 Ba lafalõgu tou ira ba danõ ira Moze A’aroni, fõna Ndraono Gizeraëli sato, fefu, si no owulo ba da’õ.

6 Ba lasika nukhara ira Yosua, ono Nuni, Kalebi, ono Yefune, si no fao gõi ba wamauze tanõ andrõ,

7 ba lamane ba Ndraono Gizeraëli sato, fefu: Tanõ andrõ, nitõrõima, ba wamauze ya’ia, ba no tanõ si maulu fa’asõkhi.

8 Na ebua dõdõ Yehowa khõda, ba i’ohe ita ba danõ andrõ ba ibe’e khõda — tanõ si falawu susu ba ŵe ŵani!

9 Ba bõi milaŵa Yehowa ba bõi mi’ata’ufi niha ba danõ andrõ; ta’ā sa’ae ira dania. No aheta khõra mba’aba’ara andrõ, ba ya’ita, ba nitolo Yehowa; bõi mi’ata’ufi ira! (Moz. V. 20, 3. Rom. 8, 31).

10 Ba me hatõ ma’ifu tõ latebu kara ira sato fefu, ba oroma lakhõmi Yehowa ba Ndraono Gizeraeli fefu, ba nose wama’ele’õ.

 

11 II. Ba imane Yehowa khõ Moze: Ha wa’ara tebato wango’aya niha andrõ ya’o, wa lõ faduhu dõdõra khõgu, lõ lai dandra andrõ fefu, si no ulau ba khõra andrõ!

12 Da’ubunu ira fõkhõ waba, use’e ira, ba ya’ugõ ube’e furugõ soi [si bohou], sebua ba sato niha moroi khõra! (Moz. II. 32, 10).

13 Ba imane Moze khõ Yehowa: Ba larongo Dawa Miserayi; noa sa õ’ohe miyaŵa, moroi ba khõra, soi andre fa’abõlõmõ andrõ,

14 ba la’ombakha’õ ba niha ba danõ andre, ba zi no terongo, wa ba hunõ niha andre so ndra’ugõ, ya’ugõ Yehowa, awõ wa no õ’oroma’õ ndra’ugõ, fa fa’ila bawa. Ya’ugõ Yehowa, awõ wa no so yaŵara lawuo andrõ khõu, wa mowaõwaõ’õ fõnara, na ma’õkhõ, ba boto lawuo, ba ba zi bongi, ba boto galitõ. (Moz. II. 13, 21).

15 Ba na õbunu soi andre, hulõ na ha samõsa, ba lamane dania soi bõ’õ, si no mamondrongo turiamõ andrõ:

16 Me no tebai Yehowa, i’ohe ba danõ andrõ, nifabu’unia khõra fahõlusa, soi andrõ, andrõ wa ibubunu ira ba danõ si mate. (Moz. V. 9, 28).

17 Ena’õ na oroma sibai wa’abõlõu, ya’ugõ Yehowa, si mane nifabu’umõ, me õmane.

18 Sebolo tõdõ Yehowa ba si no fahõna fa’ahakhõ dõdõ; sala ba olalõŵa, ba ibe’e aefa, ba lõ’õ sa aefa sibai wotu; horõ ndra ama ihuku ba ndraono, irugi tõlu, õfa nga’õtõ. (Moz. II. 34, 6. 7. Yon. 4, 2).

19 Be’e aefa horõ niha andre, ba wa’ebua wa’ahakhõ dõdõu andrõ, si mane fame’eu aefa horõra i’otarai ba danõ Miserayi, irugi ma’õkhõ!

 

20 III. Ba imane Yehowa: Ube’e aefa khõra, u’o’õ ni’andrõu.

21 Ba si ndruhundruhu: faya wa no sauri ndra’o, na faya wa anõnõ dania guli danõ lakhõmi Yehowa,

22 ba na la’ila dania danõ andrõ niha andrõ fefu, si no mangila lakhõmigu andrõ, awõ dandra andrõ fefu, nilaugu ba danõ Miserayi ba ba danõ si mate, ba si no manandraigõ zui ya’odo, no mewulu sa’ae, ba si lõ mamondrongo ligu,

23 na la’ila danõ andrõ, nifabu’ugu khõ ndra tuara fahõlusa; samõsa lõ sangila dania, ya’irá andrõ, fefu, si no mango’aya ya’o, (Moz. V. 1, 35. Sin. 95, 10. 11. Heb. 4, 3).

24 Ba enonigu Kalebi andrõ, si so Eheha bõ’õ, ta’ila, ba si no molo’õ sibai khõgu, ba u’ohe ba danõ andrõ, si mõi ia mege ba la’okhõgõ dania madounia. (Yos. 14, 9).

25 Ba Iraono Gamaleki ba Dawa Gana’ana, ba ba zalo’o tanõ so. Mahemolu, ba mifuli ami, mi’ae ba danõ si mate, mitõrõ lala saekhu ba nasi zukhu.

26 Ba humede Yehowa khõ ndra Moze A’aroni, imane:

27 Ha wa’ara dõhõ wekõkõkõkõ niha si lõ sõkhi andrõ khõgu? Fekõkõkõkõ Ndraono Gizeraëli andrõ khõgu, ba no urongo!

28 Õmane khõra: Faya wa no sauri ndra’o, iŵa’õ Yehowa, na lõ ufatõrõ khõmi niŵa’õmi andrõ, nirongo dõgi dalingagu.

29 Ba danõ si mate andre adudu mbotomi, ha wa’ato ami ni’ofaya no — dozi, i’otarai zi 20 fakhe fa’ebua ba si a’a moroi andrõ, ya’ami si no mukõkõkõkõ khõgu! (F. 26, 65. Heb. 3, 17).

30 Samõsa lõ sondrugi tanõ andrõ, motõi ya’ami andrõ, tanõ si no ututuru khõmi, nahami, fabõlusa, baero Kalebi andrõ, ono Yefune, ba Yosua, ono Nuni. (Yos. 14, 1).

31 Ba iraono sawuyu khõmi, niwa’õmi õ nemali dania — da’õ u’ohe ba danõ dania, ena’õ la’ila danõ andrõ, ni’ositengagõmi.

32 Ba botomi, ba sadudu ba danõ si mate.

33 Ba iraonomi, ba 40 fakhe wa’ara lakubaloi gurifõra ba danõ si mate, huku wolaŵami andrõ, balazi no ahori ase’e ami ba danõ si mate.

34 Dali zi 40 ngaluo, me mifauzeï danõ andrõ — sara ngaluo, ba dõfi labe’e — tobali 40 fakhe milu’i huku lalõmi andrõ; ena’õ aboto ba dõdõmi, he wisa na ubõda dangagu!

35 Ya’odo andre, Yehowa, zanguma’õ; si ndruhu, si manõ dania wolaugu ba niha si lõ sõkhi andrõ fefu, si no mamagõlõ ba wolaŵa ya’odo; ba danõ si mate andre ahori ira, ba da’e mate ira.

36 Ba mate niha andrõ nifatenge Moze, ba wamauze tanõ andrõ, ba si no mamobõrõ fekõkõkõkõ zato fefu khõnia, me mangawuli ira, wangombakha sata’u ira ba danõ andrõ — niha andrõ,

37 si no mangombakha sata’u ira ba danõ andrõ, ba mate fõna Yehowa, fa’amate si lõ mudõnadõna. (Kor. I. 10, 10. Yud. a. 5).

38 Awai zi lõ mate niha andrõ, si no mõi mamauze tanõ andrõ, ha Yosua, ono Nuni, ba Kalebi, ono Yefune.

39 Ba me i’ombakha’õ ba Ndraono Gizeraëli fefu niŵa’õ andrõ Moze, ba abu sibai dõdõra.

 

40 IV. Ba mahemolu õ, ba lahulõ wongi wanaŵa miyaŵa hili, lamane: Omasiga mõi miyaŵa ba danõ andrõ, niŵa’õ Yehowa; noa sa mosala ndra’aga.

41 Ba imane Moze: Hana wa edõna ami misawõ zui niŵa’õ Yehowa? Lõ’õ sa fakhai! (Moz. V. 1, 41).

42 Bõi mi’ae miyaŵa, lõ’õ sa fao khõmi Yehowa; fa bõi te’ala ami labe’e emalimi andrõ.

43 Udumi sa ba da’õ Ndraono Gamaleki ba Dawa Gana’ana, ba mate ami ba mbawa zi’õli. Me no mi’erogõ Yehowa, ba lõ’õ sa’ae itolo ami!

44 Ba lõ alulu; mõi ira miyaŵa ba hili laŵa’õ ba tawõla zura goroisa Yehowa ba he Moze, ba lõ aheta ba golombaseŵa.

45 Ba so Ndraono Gamaleki, awõ Ndrawa Gana’ana, sowanua ba hili andrõ, mõi ira mitou, latimba ira ba muzawili irege Horema, labe’e.

SURA MOZE IV.

Faza 15

I. Famakhoi sumange ni’ā ba sumange nibadu. II. Sumange si a’a gõ ba sumange fameta horõ. III. Fotu zanawõ oroisa ba zabato. IV. Nifobowobowo nukha.

 

1 I. Ba humede Yehowa khõ Moze, imane:

2 Hede ba Ndraono Gizeraëli, õmane khõra: Na mirugi dania danõ andrõ, nibe’egu nahami,

3 ba na mibe’e khõ Yehowa zumange nifatõrõ ba galitõ, he sumange nitunu ba he sumange nitaba, ma ba wanõrõ amabu’ula li, ba ma ame’ela saoha gõlõ, ba ma na baŵa gowasa andrõ khõmi, ba wame’e samohua khõ Yehowa, saŵi, ba ma biribiri,

4 ba same’e sumange Yehowa andrõ, khõnia, ba sambua ni’ofulu hamo si sõkhi nifaruka fanikha, samba hinaoya, ifao sumange ni’ā. (Moz. III. 6, 14).

5 Ba agu, sumange nibadu, ba samba hinaoya ba zi sara ono mbiribiri, õfao ba zumange nitunu ba ba zumange nitaba.

6 Ba ba mbiribiri si matua, ba õfao sumange ni’ā dombua ni’ofulu hamo si sõkhi nifaruka si tõlu kata fanikha, ba agu, sumange nibadu,

7 ba tõlu kata õbe’e khõ Yehowa, samohua.

8 Ba na ono zaŵi, si matua õbe’e sumange nitunu, ba ma sumange nitaba, ba wanõrõ amabu’ula li, ba ma sumange Yehowa, fangorifi, ba nifao ba nono zaŵi andrõ,

9 sumange ni’ā, ba tõlu ni’ofulu hamo si sõkhi, nifaruka si sadumba fanikha. 10 Ba agu, sumange nibadu, ba sadumba õbe’e, sumange Yehowa, nifatõrõ ba galitõ, samohua.

11 Si manõ wolau ba nono zaŵi fefu ba ba mbiribiri si matua fefu ba ba nono mbiribiri ba ba nono nambi fefu.

12 Dali ha uga geu nibe’emi, ba sagesageu, ba mimanõ.

13 Dozi niha ba danõ zolo’õ amakhoita andrõ, na labe’e zumange Yehowa, nifatõrõ ba galitõ, samohua.

14 Ba na so ba khõmi niha bõ’õ, ba ma si no ahono khõmi, ba si manõ gõi ilau, dali wolaumi.

15 Ha sara lala, dozi, he ya’ami, ba he niha bõ’õ, si sosó khõmi. Amakhoita si lõ tebulõ da’õ, gõtõgõtõ wa’ara; ba zumange Yehowa, ba faoma, he ba niha bõ’õ, ba he ba khõmi. (Moz. II. 12, 49).

16 Ha sara nihohogõi ba ha sara nifakhoi, he ba khõmi, ba he ba niha bõ’õ, si soso ba khõmi.

 

17 II. Ba humede Yehowa khõ Moze, imane

18 Hede ba Ndraono Gizeraëli, ba õmane khõra: Na mirugi dania danõ andrõ, ni’ohegu ya’ami,

19 ba na mi’ā mbua danõ, ba mibe’e khõ Yehowa zi no amaedola wegero, fõfõnia.

20 Si a’a hamo ni’otambõni khõmi, ba sagõrõ kue mibe’e fegero, lala wame’e fegero ba golayama mbasitõ wame’emi ya’ia.

21 Si a’a hamo ni’otambõni andrõ khõmi, ba mibe’e khõ Yehowa õsa, sumange fegero, gõtõgõtõ wa’ara dania. (Moz. II. 23, 19).

22 Ba na so hadia ia zi lõ mitõrõ amakhoita andrõ, si lõ mu’odõdõgõ, oroisa Yehowa andrõ khõ Moze, (Moz. III. 4, 2),

23 hadia ia, ni’oroi’õ Yehowa khõmi, khõ Moze, i’otarai luo andrõ, me ibe’e goroisa Yehowa, ba dania na, gõtõgõtõ wa’ara,

24 na tenga ni’odõdõgõ zato, wa lõ mutõrõ da’õ, ba sato fefu zame’e ono zaŵi, si matua, sumange nitunu, samohua khõ Yehowa, nifao sumange ni’ā ba sumange nibadu, nifaofao ba da’õ, lalania, ba sageu nambi si matua, sumange fameta horõ.

25 Ba na no ifaigi ere wameta sala Ndraono Gizeraëli sato, fefu, ba tebe’e aefa khõra. Noa sa tenga ni’odõdõgõ, ba no labe’e zumange khõra, sumange Yehowa nifatõrõ ba galitõ, awõ zumange fameta horõ, khõ Yehowa, ba lalõra andrõ.

26 Ba tebe’e aefa zala Ndraono Gizeraëli sato fefu ba sala niha bõ’õ, si sosó ba khõra; noa sa horõ zato fefu, lalõ andrõ.

27 Ba na so zi sala si lõ mu’odõdõgõ, na ha samõsa, ba nambi si dõfi fa’ebua ibe’e sumange fameta horõ.

28 Ba yamufaigi ere wameta sala zi no mosala khõ Yehowa, si tenga ni’odõdõgõ, wolau fameta sala andrõ khõnia, ba tebe’e aefa khõnia.

29 Ha sara lala khõmi — he ba niha ba danõ, Iraono Gizeraëli, ba he ba niha bõ’õ, si sosó ba khõra, na so zolau hadia ia, si lõ mu’odõdõgõ.

30 Ba na so zolalõ ni’odõdõgõ, he niha ba danõ, ba he niha bõ’õ, ba sanandraŵaisi Yehowa, ba nise’e ba niwara niha si manõ.

31 Noa sa si lõ guna li Yehowa ba si lõ boto goroisania ibe’e; ba lõ fulitõ, ba nise’e niha si manõ — ilu’i horõnia.

 

32 III. Ba me so ba danõ si mate andrõ Ndraono Gizeraëli, ba falukha ira niha sangozaragõ eu, me luo sabato.

33 Ba la’ohe ia khõ ndra Moze A’aroni ba ba zato fefu si fakhamõ khõnia, me i’ozaragõ geu, ba lakuru ia,

34 me lõ’õ na oroisa ba da’õ, he lawisa khõnia. (Moz. III. 24, 12).

35 Ba imane Yehowa khõ Moze: Niha andrõ, ba nibunu; sato fefu zanebu kara ya’ia, baero golombaseŵa. 36 Ba la’ohe ia baero golombaseŵa sato fefu ba latebu kara, labunu, dali niŵa’õ Yehowa khõ Moze.

37 IV. Ba humede Yehowa khõ Moze, imane:

38 Hede ba Ndraono Gizeraëli, õŵa’õ khõra lafobowobowo gahe mbarura ya’ira ba madoura dania; ba bowobowo andrõ, ba ladozigõ sinali ungu sowōē waruwaru. (Moz. V. 22, 12. Mat. 23, 5).

39 Ba da’õ geluaha mbowobowo andrõ khõmi: na mifaigi ia, ba itõrõ tõdõmi goroisa Yehowa andrõ fefu, ena’õ mi’o’õ ia, ba bõi mihole’õ ami ba gisõisõ dõdõmi ba ba gomasiõ hõrõmi, famaelungumi ba wangerogõ Yehowa.

40 Ena’õ lõ olifu ami goroisagu andrõ fefu ba ena’õ mi’o’õ, fa ni’amoni’õ ami fõna Lowalangimi.

41 Yehowa ndra’odo, Lowalangimi, si no mangeheta ya’ami ba danõ Miserayi, ba we’amõi Lowalangimi, ya’odo andre, Yehowa, Lowalangimi!

SURA MOZE IV.

Faza 16

I. Molaŵa ndra Kora, Datano, Abiramo. II. Ihuku zolaŵa andrõ Lowalangi.

 

1 I. Ba molaŵa Gora, ono Yesehari ono Gahati ono Lewi, ba awõnia Datano ba Abiramo, iraono Geliabi andrõ, ono Walu ono Rubeno. (Yud. a. 11).

2 Lalaŵa Moze, ba 250 niha nawõra, Iraono Gizeraëli, satua mbanua, salaŵa rafe, sebua tõi.

3 Mõi ira falukha khõ ndra Moze A’aroni, lamane khõra: Tenga inõtõ khõmi! Ni’amoni’õ sa zato fefu, dozi ira, ba sosó khõra Yehowa; ba hana wa mibali’õ salaŵa mbanua Yehowa ami? (Moz. II. 19, 6).

4 Ba me irongo da’õ Moze, ba ifalõgu tou ia ba danõ.

5 Ba imane khõ Gora ba ba zato andrõ khõnia fefu: Mahemolu i’oroma’õ Yehowa, ha niha dána khõnia ba ha niha ni’amoni’õ, fa ifa’amõi khõnia; somasi ia, ba ifa’amõi khõnia.

6 Ba mimane: Mihalõ gali ba wanunu samohua, Kora ba sato andrõ khõnia fefu;

7 mibe’e yaŵa galitõ ba milau zamohua nitunu, fõna Yehowa; ba ha niha nitehe Yehowa, da’õ ni’amoni’õ taŵa’õ. Noa irege da’õ, ya’ami ono Lewi!

8 Ba imane Moze khõ Gora: Mifondrondrongo, ya’ami, ono Lewi!

9 Hadia, ambõ na khõmi, wa no i’oniagõ ami ba Ndraono Gizeraëli sato, ba wama’amõi khõnia ya’ami, ena’õ mihalõhalõ halõŵõ andrõ ba nahia Yehowa, ba ena’õ mõi ngoningoni zato ami ba wangaingai halõŵõ khõra? (F. 3, 6).

10 Ba no ifa’amõi ndra’ugõ, awõ dalifusõu fefu, ono Lewi, ba hadia, mi’andrõ na gõi khõmi, ena’õ latehe ere ami?

11 Andrõ mamagõlõ ami, udu Yehowa, ya’ugõ ba sato andrõ khõu fefu — hadia sa Ga’aroni, wa kumõkõkõkõ ami khõnia?

12 Ba ifakaoni’õ ndra Datano Abiramo, iraono Geliabi andrõ, Moze; ba lamane: Lõ mõiga!

13 Hadia, ambõ na, wa no õhetaga ba danõ si falawu susu ba ŵe ŵani, wa no õ’ohega ba da’e, ba wamunu ya’aga ba danõ si mate; hadia, õbali’õ salaŵama na gõi ndra’ugõ?

14 Noa sa õhaogõ wolohe ya’aga ba danõ si falawu susu ba ŵe ŵani, awõ wame’e benua khõma ba kabu nagu, tána khõma. Hadia, õwai õ’ila õ’abõsi’õ niha?

15 Lõ mõiga! Ba mofõnu sibai Moze, ba imane khõ Yehowa: Bõi otahõgõ zumange andrõ khõra! Sageu kalide lõ nihalõgu khõra, samõsa lõ ba khõra ni’abusigu tõdõ! (Sam. I. 12, 3).

16 Ba imane Mose khõ Gora: Ya’ugõ ba sato andrõ khõu fefu, mahemolu mi’ondrasi Yehowa — ya’ugõ ba ya’ira ba A’aroni!

17 Ba dozi ami mihalõ gali ba wanunu samohua khõmi, milau yaŵa zamohua, ba i’ohe fõna Yehowa gali khõnia zamõsana — 250 gali; ba ya’ugõ gõi ba A’aroni, ba faoma so gali khõmi.

18 Ba dozi lahalõ gali khõra, labe’e yaŵa galitõ ba lalau zamohua nitunu. Ba la’iagõ golayama nose wama’ele’õ, awõ ndra Moze A’aroni.

19 Ba ifalukha’õ zato fefu udura Kora, ba golayama nose wama’ele’õ. Ba to’ele ba zato fefu lakhõmi Yehowa.

 

20 II. Ba humede Yehowa khõ ndra Moze A’aroni, imane:

21 Mi’oniagõ ami a niha andrõ, ena’õ u’ozumagõ uhori ira!

22 Ba lafalõgu tou ira ba danõ, lamane: He Lowalangi. So’aya noso ba mboto niha fefu! Hadia, na ha samõsa zamazõkhi horõ, ba mofõnu ndra’ugõ ba zato fefu. (F. 27, 16. Heb. 12, 9).

23 Ba humede Yehowa khõ Moze, imane:

24 Hede ba zato, õmane khõra: Miheta ami ba zahatõ ba nahia ndra Kora, Datano, Abiramo!

25 Ba maoso Moze, mõi ia khõ ndra Datano Abiramo, ba la’o’õ ia satua Ndraono Gizeraëli.

26 Ba humede ia ba zato, imane: Mita’ita’i miheta ami ba nose niha sebua horõ andrõ, ba bõi mibabaya hadia ia nibayabayara, fa bõi tese’e ami [gõi], ba horõra andrõ fefu.

27 Ba laheta ira ba zahatõ ba nahia ndra Kora, Datano, Abiramo. Ba Datano ba Abiramo, ba no mõi tou, la’iagõ newali nosera, awõ wo’omora, ba onora, he segebua, ba he sigide’ide.

28 Ba imane Moze: Ba da’õ dania aboto ba dõdõmi, wa no Yehowa zamatenge ya’odo, ba wolau nilau andrõ fefu, wa tenga moroi khõgu manõ:

29 Na si mane fa’amate niha bõ’õ fefu wa’amate da’e, na ha sanõrõ niha bõ’õ fefu itõrõ ira, ba no tenga Yehowa zamatenge ya’o.

30 Ba na ilau Yehowa zi lõ murai murongo, na ifaboka mbawania tanõ ba na itõlõ ira, fabaya fefu zi so khõra, na numalõ ba mbanua tou, auri, ba aboto ba dõdõmi, wa no latandraŵaisi Yehowa niha andrõ.

31 Ba me no a’ozu khõnia huhuo andrõ, ba fabali danõ barõ gahera,

32 ifaboka mbawania tanõ, itõlõ ira, fabaya nosera, ba awõ niha fefu, tána khõ Gora, numalõ nibayabayara. (F. 26, 10. Moz. V. 11, 6. Sin. 106, 17).

33 Numalõ mitou ira ba mbanua tou, auri, fabaya fefu zi so khõra, ba fahalõ danõ, yaŵara, tobali taya manõ ira ba hunõ zato.

34 Ba dozi Iraono Gizeraëli ba zi tefasui ya’ira, ba moloi ba we’ira’irara, lamane sa: ma itõlõ ita gõi tanõ!

35 Ba itõrõ alitõ, si oroi Yehowa, ba i’ā niha andrõ, si 250, sanunu samohua andrõ.

SURA MOZE IV.

Faza 17

I. Famufu gali andrõ. II. Ifuli kumõkõkõkõ zato. Fotu ba fangatulõ. III. Molewiõ zi’o Ga’aroni ba mobowo.

 

1 I. Ba humede Yehowa khõ Moze, imane:

2 Ŵa’õ khõ Geleazari, ono Ga’aroni ere andrõ, yamuhalõ gali andrõ ba gakhozila andrõ, ba yamufazawili galitõ ba zarõu ma’ifu;

3 amonita sa’ae gali zebua horõ andrõ, me no mate ira; nibõbõzi, ni’anifi’õ ba nibe’e uli naha wame’e sumange. Noa sa la’ohe fõna Yehowa, ba amonita sa’ae. Ba hana na tandra sa’ae ba Ndraono Gizeraëli.

4 Ba ihalõ gali tõla andrõ Eleazari, gali ba wanunu samohua andrõ, ni’ohe zakhozi andrõ ba labõbõzi, la’anifi’õ, uli naha wame’e sumange,

5 tandra ba Ndraono Gizeraëli, fa samõsa bõi mõi, si tenga nga’õtõ Ga’aroni, ba wanunu samohua fõna Yehowa, fa bõi gõna ia zi no gõna Gora andrõ ba awõnia andrõ, nifa’ombakha’õgõ Yehowa khõnia khõ Moze.

 

6 II. Ba mahemolu õ, ba kumõkõkõkõ Ndraono Gizeraëli sato fefu khõ ndra Moze A’aroni, lamane: No mibunu niha tána khõ Yehowa.

7 Ba me aekhu zato udu ndra Moze A’aroni, ba lafaigi nose wama’ele’õ da’õ; ba no ibalugõ ia lawuo andrõ, ba to’ele lakhõmi Yehowa.

8 Ba mõi ba golayama nose wama’ele’õ ndra Moze A’aroni. (Heb. 9, 4).

9 Ba humede Yehowa khõ Moze, imane:

10 Miheta ami ba zato andrõ, ena’õ use’egõ ira, ahou zamõ’i!

11 Ba lafalõgu tou ira ba danõ. Ba imane Moze khõ Ga’aroni: Halõ gali ba wanunu samohua, lau yaŵa galitõ ba naha wame’e sumange, ba be’e zamohua ba ta’ita’i ohe ba hunõ zato, ba wamaigi fameta salara; noa sa mofõnu sibai Yehowa, ba no ibõrõgõ famakao.

12 Ba ihalõ gali A’aroni, si mane niŵa’õ Moze, fagohi ia, isaŵa hunõ zato; noa sa ibõrõgõ famakao ba khõra; ba itunu zamohua fameta zala zato.

13 Ba me so ia ba da’õ, ba gotaluara zi mate zauri, ba dõhõ wamakao andrõ.

14 Ba fa’ato zi no tekiko ba wamakao andrõ, ba no 14,700; lõ lai zi tekiko mege bõrõ Gora andrõ.

15 Ba ifuli ia A’aroni khõ Moze, ba golayama nose wama’ele’õ, ba no dõhõ wamakao andrõ.

16 III. Ba humede Yehowa khõ Moze, imane:

17 Hede ba Ndraono Gizeraëli, ŵa’õ khõra, ndramu’ohe khõu zi’o, sambua mado, ba sara zi’o, si’o zalaŵara, dozi mado, 12 zi’o fefu. Ba tõi zamõsana, ba sura ba zi’onia,

18 ba tõi Ga’aroni, ba ba zi’o mado Lewi õsura; samõsa hõgõ mado, ba sara zi’o.

19 Ba õtou’õ tou ba nose wama’ele’õ, fõna dawõla zura goroisa, ba ni’oro’oroma’õgu ya’odo khõu.

20 Ba si’o nituyugu, ba molewiõ dania, ena’õ ufadõhõ wekõkõkõkõ Ndraono Gizeraëli khõmi, fa bõi [sa’ae] abua khõgu.

21 Ba me no i’ombakha’õ da’õ ba Ndraono Gizeraëli Moze ba labe’e khõnia zi’ora salaŵara fefu, dozi mado, samõsa hõgõ, ba sara zi’o, 12 zi’o fefu; ba lafao ba zi’ora andrõ zi’o Ga’aroni.

22 Ba itou’õ tou zio andrõ Moze, fõna Yehowa, ba nose goroisa.

23 Ba mahemolu õ, me mõi ba nose goroisa Moze, ba no auri zi’o Ga’aroni, si’o mado Lewi andrõ, no molewi’õ ba mobowo sa’ae ba mowua, bua manalu si no o’õli.

24 Ba i’ohe baero ni’amoni’õ zi’o andrõ fefu Moze, i’oroma’õ ba Ndraono Gizeraëli fefu, ba lafaigi, ba ihalõ zi’onia zamõsana.

25 Ba imane Yehowa khõ Moze: Fuli be’e tou zi’o Ga’aroni andrõ fõna zura goroisa, ena’õ te’irõ’õ ia tandratandra ba zabe’e tandro, ba ena’õ dõhõ wekõkõkõkõra andrõ, fa bõi [sa’ae] abua khõgu; fa bõi mate ira.

26 Ba i’o’õ Moze niŵa’õ Yehowa khõnia; si manõ wolaunia.

27 Ba lamane Iraono Gizeraëli khõ Moze: Hiza, si mate ndra’aga, si tekiko ndra’aga, dozi ndra’aga, ba si tekiko!

28 Ha niha zi hatõ’õ ya’ia ba nose Yehowa andrõ, ba si mate; hadia sa, õhori manõ ndra’aga?

SURA MOZE IV.

Faza 18

I. Halõŵõ gere ba halõŵõ nono Lewi. II. Urakha gere ba zumange ba ba zi a’a mbua danõ ba ba zi a’a nono gurifõ. III. Si sambua ni’ofulu nitehe ba Nono Lewi ba si sambua ni’ofulu zi sambua ni’ofulu nitehe ba gere.

 

1 I. Ba imane Yehowa khõ Ga’aroni: Ya’ugõ ba iraonou andrõ ba iwami zolu’i sala ba ni’amoni’õ andrõ, ba he si sala halõŵõ gere andrõ khõmi, ba ya’ugõ ba iraonou zolu’i.

2 Ba talifusõu andrõ gõi, mado Lewi, iwami, ba fa’amõi, awõu, ena’õ fao ira khõu, ngoningoniu, na mihalõhalõ halõŵõ ba golayama nose goroisa, ya’ugõ ba iraonou. (Moz. V. 18, 5).

3 Ba halõŵõra nihalõhalõ khõu ba hadia nihalõhalõ ba nose, ma’asambua. Ba bõi lahatõ’õ ira ba wakake ni’amoni’õ andrõ ba ba naha wame’e sumange, fa bõi faoma mate ami, he ya’ira ba he ya’ami.

4 Ba ndrafao khõu, ndra muhalõhalõ halõŵõ ba nose wama’ele’õ, fefu hadia ia halõŵõ ba nose; ba niha bõ’õ, ba lõ tola ihatõ’õ ia khõmi.

5 Ba ya’ami zangai halõŵõ ba ni’amoni’õ andrõ, awõ halõŵõ ba naha wame’e sumange, fa bõi ifuli gõna fõnu Ndraono Gizeraëli.

6 Hiza, no utuyu ba Ndraono Gizeraëli nono Lewi andrõ, bualagu khõmi, nibe’e tána khõ Yehowa, ena’õ lahalõhalõ halõŵõ ba nose wama’ele’õ.

7 Ba ya’ugõ ba iraonou andrõ, ba mihalõhalõ halõŵõmi, halõŵõ gere, hadia ia fefu ba naha wame’e sumange, ba bakha barõ mba’aba’a andrõ; mihalõhalõ halõŵõ. Bualagu khõmi halõŵõ gere andrõ: ba niha bõ’õ, si hatõ’õ ya’ia, ba nibunu.

 

8 II. Ba imane Yehowa khõ Ga’aroni: Hiza, utehe khõu nibe’e yaŵa sumangegu si no amaedola wegero andrõ; ba game’ela Ndraono Gizeraëli andrõ ni’amoni’õ fefu utehe khõu ba ba ndraonou, tána khõmi, õmõ nibe’ebe’e, si lõ mamalõmalõ. (Moz. III. 7, 35).

9 Ba da’õ dána khõu ba game’ela andrõ ni’amoni’õ sibai — na no muhalõ dána nitunu andrõ —: fefu game’elara sumange ni’ā ba sumange fameta horõ ba sumange ogauta, nibe’era khõgu, fangali [nilimo]; khõu ba ba ndraonou, ni’amoni’õ sibai.

10 Ba naha ni’amoni’õ sibai õ’ā ia; dozi motõi matua zi manga ya’ia: ni’amoni’õ ia õŵa’õ.

11 Ba da’õ zi mõi khõu si hulõ wegero, ba game’elara [bõ’õ] andrõ, ba zumange Ndraono Gizeraëli andrõ nihahae: utehe khõu ba ba nonou matua ba ba nonou alawe; õmõ, nibe’e, si lõ mamalõmalõ; dozi si lõ si ra’iõ moroi yomo khõu zi manga ya’ia. (Moz. II. 29, 27).

12 Fefu zi sõkhi fanikha ba fefu zi sõkhi agu ba fakhe, fondrege zi sõkhinia, nibe’era khõ Yehowa, ba no utehe khõu.

13 Fefu zi a’a mbua danõ khõra, nibe’era khõ Yehowa, ba khõu; dozi si lõ si ra’iõ, moroi yomo khõu, zi manga ya’ia.

14 Fefu hadia ia nilakha’õ ba Ndraono Gizeraëli, ba khõu. (Moz. III. 27, 28). 15 Fefu zi a’a ba wa’atumbu, fefu nibe’ebe’e khõ Yehowa, he niha, ba he urifõ, ba khõu, ba si a’a nono niha, ba õbe’e nisanu, ba si manõ gõi zi a’a nono gurifõ si ra’iõ. (Moz. II. 13, 2).

16 Ba ba wananu ya’ia [ba nono niha], ba na sara waŵa wa’ebua, ba ma na ebua moroi andrõ õbe’e nisanu, dali watõ, lima sekeli (rufia) wananu, ba zaga ni’amoni’õ, si samba sekeli, ba 20 gera. (Moz. II. 30, 13).

17 Ba si a’a nono zaŵi ba he ono mbiribiri ba he ono nambi, ba lõ tola õbe’e nisanu: ni’amoni’õ da’õ; donia, ba õbe’e fanefe naha wame’e sumange, ba taŵõnia, ba õtunu, sumange nifatõrõ ba galitõ, nibe’e khõ Yehowa, samohua.

18 Ba õsira, ba khõu, si mane osu andrõ, nihahae ba faha andrõ kambõlõ, khõu ia.

19 Fefu zumange si hulõ wegero andrõ, fõfõ game’ela ni’amoni’õ andrõ nibe’e Ndraono Gizeraëli amaedola wegero khõ Yehowa, ba khõu utehe ba ba nonou matua ba ba nonou alawe, õmõ, nibe’e, si lõ mamalõmalõ. Amabu’ula li nilau asio da’õ, si lõ tebulõ, gõtõgõtõ wa’ara, khõu ba ba nga’õtõu dania. (Moz. III. 2, 13. Nga’õt. II. 13, 5).

 

20 III. Ba imane Yehowa khõ Ga’aroni: Lõ labe’e dána khõu ba danõra, lõ benuau ba khõra. Ya’odo sa dána khõu ba amaedola gondrõita khõu ba hunõ Ndraono Gizeraëli. (Moz. V. 10, 9).

21 Ba nitehegu ba nono Lewi, ba sambua ni’ofulu ba Ndraono Gizeraëli, amaedola gondrõita, ba halõŵõ andrõ, nihalõhalõra, halõŵõ ba nose wama’ele’õ.

22 Ba Iraono Gizeraëli, ba lõ tola sa’ae lahatõ’õ ira ba nose wama’ele’õ, fa bõi lahalõ horõra ba fa bõi mate ira.

23 Ono Lewi zangaingai halõŵõ ba nose wama’ele’õ, ba ya’ira zolu’i sala dánõ bõ’õ, dali nifakhoi andrõ khõmi, si lõ tebulõ, gõtõgõtõ wa’ara; ba tána khõra tanõ, ba lõ labe’e khõra ba Ndraono Gizeraëli. (Yos. 13, 14).

24 Me utehe ba nono Lewi zi sambua ni’ofulu andrõ ba Ndraono Gizeraëli nibe’era khõ Yehowa sumange si no amaedola wegero, ube’e amaedola gondrõita khõra; andrõ wa no ufakhoi ba khõra andrõ, wa lõ labe’e khõra dána khõra tanõ ba Ndraono Gizeraëli.

25 Ba humede Yehowa khõ Moze, imane:

26 Ŵa’õ ba nono Lewi, õmane khõra: Na mitema ba Ndraono Gizeraëli zi sambua ni’ofulu andrõ, nitehegu khõmi tána khõmi ba khõra andrõ, ba mibe’e õsa sumange si no amaedola wegero, khõ Yehowa, sambua ni’ofulu zi sambua ni’ofulu andrõ. (Neh. 10, 38).

27 Ba lafotõi khõmi zumange fegero andrõ khõmi, amaedola wakhe ba golayama mbasitõ ba amaedola zi tõra ba wolazi nagu.

28 Ba si manõ ba ni’ofulu andrõ fefu, sinemami, nitemami ba Ndraono Gizeraëli, mibe’e õsa, sumange fegero khõ Yehowa; ba sumange fegero andrõ fõfõnia, nihonogõi khõ Yehowa, ba ba danga Ga’aroni ere mibe’e.

29 Fefu game’ela, si mõi khõmi, ba lõ tebulõ mibe’e õsa sumange fegero khõ Yehowa, fefu zi sõkhinia mibe’e õsa, amakhoita. Ame’ela ni’amoni’õ, fõfõnia.

30 Õmane khõra: Na mimanõ, wame’e si sõkhinia, ba tefotõi ba nono Lewi, amaedola nõsi golayama mbasitõ ba amaedola nõsi wolazi nagu. 31 Fefu gofu heza, ba tola mi’ā, ya’ami ba soroiyomomi fefu, me no luomi ba halõŵõmi ba nose wama’ele’õ.

32 Ba lõ tohare khõmi horõ ba da’õ, asala mibe’e zi sõkhinia, ba da’õ, asala mibe’e zi sõkhinia, ba lõ’õ sa mifatõrõ zalakha ba game’ela Ndraono Gizeraëli andrõ, ni’amoni’õ, ba lõ mate ami.

SURA MOZE IV.

Faza 19

I. Labe’e fangehao nawu zaŵi soyo. II. Idanõ fangehao ba he lawisa wangoguna’õ ya’ia.

 

1 I. Ba humede Yehowa khõ ndra Moze A’aroni, imane:

2 Da’õ gamakhoita, nifakhoi Yehowa, me imane: Ŵa’õ ba Ndraono Gizeraëli, ndramu’ohe khõu zaŵi soyo, si lõ si sala, si lõ hadia ia zi lõ gõna ba ba zi lõ murai muhare’õ kalo mbagi.

3 Ba mibe’e ba danga Geleazari ere andrõ; ba la’ohe baero, fõna golombaseŵa, ba lataba ba zanehe ia. (Heb. 13, 11).

4 Ba ihalõ ndronia ma’ifu Eleazari ere andrõ, turunia, ba mewitu itefe do andrõ õsa gamaudu mbawa duasa nose wama’ele’õ.

5 Aefa da’õ, ba latunu zaŵi andrõ ba zanehe ia; ulinia ba õsinia ba donia, ba nitunu, fabaya tainia. (Moz. II. 29, 14).

6 Ba ihalõ geu eresi ere ba sufa ba kirimisi, ba itibo’õ ba galitõ fanunu zaŵi andrõ. (Moz. III. 14, 6).

7 Aefa da’õ, ba ibabago nukhania ere ba mondri. Awena tola ifuli ia ba golombaseŵa; ba si ra’iõ na gere, irege bongi.

8 Ba sanunu ya’ia [saŵi andrõ] gõi, ba ibabago nukhania ba mondri ba si ra’iõ ia, irege bongi.

9 Ba si lõ si ra’iõ zangozaragõ awu zaŵi andrõ, ba itou’õ tou ba naha si sõkhi, baero, fõna golombaseŵa, ena’õ te’irõ’õ soguna ba Ndraono Gizeraëli sato, nifaruka ba nidanõ fangehao; sumange fameta horõ ia. (Heb. 9, 13).

10 Ba sangozaragõ awu zaŵi andrõ, ba ibabago nukhania ba si ra’iõ ia irege bongi. Ba huku si lõ tebulõ ba Ndraono Gizeraëli ba ba niha bõ’õ, si sosó ba khõra da’õ, si gõtõgõtõ fa’ara:

 

11 II. Ha niha zombambaya si mate, hadia ia mboto niha si no mate, ba fitu bongi ra’iõ ia.

12 Da’õ zame’e fameta zalania ya’ia [idanõ no mege], na luo si tõlu ba na luo si fitu, ba abeta wa’ara’iõnia. Ba na lõ iheta zalania, na luo si tõlu ba na luo si fitu, ba dõrõdõrõ ra’iõ ia.

13 Ha niha zombambambaya si mate, boto niha si no mate, ba lõ iheta zalania, ba ra’iõ nose Yehowa ibe’e, ba nise’e ba Ndraono Gizeraëli niha si manõ; me lõ mutefe ia idanõ fangehao, ba si ra’ira’iõ ia; falemba khõnia wa’ara’iõnia, si lõ mamalõmalõ.

14 Ba da’õ gamakhoita, na so zi mate baose: Dozi si mõi baose andrõ ba dozi si tohõna bakha, ba fitu bongi wa’ara ra’iõ.

15 Ba fefu nahia, si lõ lagõlagõ, lagõlagõ nibõbõ sinali, ba ra’iõ.

16 Si manõ gõi dozi si fabaya ba nibunu baero ba mbenua ba ma ba zi mate ba da’õ ba ma ba dõla zi mate ba ma ba lewatõ, ba fitu bongi wa’ara ra’iõ.

17 Ba ba zi no ra’iõ si manõ ba ndramuhalõ nawu zumange fameta horõ andrõ, si no mutunu, labe’e ba nahia ba lalau yaŵa nidanõ gumbu.

18 Ba si lõ fa’ara’iõ zangai sufa, i’ungugõ ba nidanõ andrõ ba itefe nose andrõ, awõ gamagama fefu, awõ niha, si so baose, awõ zi no fabaya ba dõla zi mate ba ma ba nibunu, ba ma ba zi mate manõ ba ma ba lewatõ. (Sin. 51, 9).

19 Na luo si tõlu ba na luo si fitu itefe zi ra’iõ si lõ fa’ara’iõ, ba aheta zalania ibe’e, na luo si fitu andrõ. Ba ibabago nukhania ba mondri, ba aheta wa’ara’iõnia na bongi.

20 Ba na so zi ra’iõ ba lõ iheta zalania, ba nise’e ba zato zi manõ; noa sa ra’iõ ni’amoni’õ andrõ khõ Yehowa ibe’e: lõ mutefe ia idanõ fangehao, andrõ wa si ra’iõ ia.

21 Amakhoita si lõ tebulõ khõmi da’õ, nitõrõ, gõtõgõtõ wa’ara. Ba sanefe idanõ fangehao andrõ, ba ibabago nukhania, ba sombambaya idanõ fangehao, ba ra’iõ, irege bongi. 22 Ba fefu hadia ia, nibabaya zi nora’iõ andrõ, ba ra’iõ, ba si manõ gõi dozi sombambaya ya’ia, bara’iõ, irege bongi.

 

SURA MOZE IV.

Faza 20

I. Fa’amate Miriya. Mukõkõkõkõ zato, me lõ õra idanõ. II. Idanõ moroi ba gara. Fotu wangiwa dõdõ ndra Moze A’aroni. III. Lõ latehe Iraono Gedomo latõrõ danõra. IV. Mate Ga’aroni; fangalinia Geleazari.

 

1 I. Ba larugi danõ si mate Sini Iraono Gizeraëli fefu, ba ba Gadesi tebato ira; ba mate ba da’õ Miriya ba lako’o ia ba da’õ.

2 Ba lõ õ zato idanõ. Ba aekhu ira khõ ndra Moze A’aroni, (Moz. II. 17, 3),

3 fasoso zato khõ Moze, lamane: Ena’õ na tekiko mege ndra’aga gõi, me tekiko dalifusõma fõna Yehowa!

4 Hana wa õ’ohe ba danõ si mate mbanua Yehowa, ena’õ mate ba da’e ndra’aga, awõ gurifõma!

5 Hana wa no õheta ndra’aga ba danõ Miserayi, ba wolohe ya’aga ba danõ andre, si lõ sõkhi, ba zi tebai monowi ita, ba zi lõ bua ara ba he agu ba he dalimo ba ba zi lõ õma idanõ!

6 Ba larõi zato ira Moze A’aroni, mõi ira ba zinga mbawandruhõ nose wama’ele’õ ba lafalõgu tou ira ba danõ; ba to’ele khõra lakhõmi Yehowa.

7 II. Ba humede Yehowa khõ moze, imane: Halõ zi’o, owuloi niha sato, darua ami, ga’au A’aroni ba mihede ba gara andrõ, ba zanehe ira, ba alua khõnia nidanõ. 8 Falua ba gara andrõ gõra idanõ, asogõ nibadu niha sato, awõ gurifõra!

9 Ba ihalõ zi’o Mose, ba ni’amoni’õ, i’o’õ niŵa’õ Yehowa khõnia.

10 Ba la’owuloi zato ira Moze A’aroni, fõna gara andrõ, ba imane khõra: Mifondrondrongo, ya’ami sabe’e tandro! Hadia ma’ila maõ mafalua ba gara andre gõmi idanõ?

11 Ba ifazaŵa dangania Moze, ibõzi gara andrõ si’onia, mendrua. Ba abõlõ nidanõ salua khõnia, tobali labadu niha sato ba urifõra.

12 Ba imane Yehowa khõ ndra Moze A’aroni: Me no aombõ dõdõmi khõgu, me no lõ nifosumangemi ya’odo, ya’odó, ni’amoni’õ andre, ba zanehe Ndraono Gizeraëli, ba bõi ya’ami zolohe niha andre ba danõ andrõ nibe’egu khõra. (F. 27, 14. Moz. V. 1, 37; 32, 51).

13 Da’õ nidanõ wasosota andrõ: si fasoso Ndraono Gizeraëli khõ Yehowa, ni’oroma’õnia khõra lakhõminia. (Sin. 81, 8; 106, 32).

 

14 III. Ba i’otarai Gadesi ifatenge zinenge Moze khõ razo Ndraono Gedomo, imane: Da’õ niŵa’õ nakhiu Izeraëli: No õrongo wamakao andrõ fefu, si no gõna ndra’aga,

15 wa no mõi ba danõ Miserayi ndra tuama, awõ wa no ara ndra’aga ba danõ Miserayi, awõ wa no lafakao sibai ndra’aga Dawa Miserayi, ba he ira tuama mege sa’ae.

16 Ba no ma’angarõfi li Yehowa ba no ifondrondrongo wakaosama andrõ, ba no ifatenge mala’ika; da’õ zangeheta ya’aga ba danõ Miserayi. Ba ba da’e, ba Gadesi andre soga ma’õkhõ, ba mbanua ba nola danõu.

17 Damatõrõ danou! Lõ matõrõ nowi ba lõ matõrõ kabu nagu, ba lõ mabadu nidanõ ba mba’a; lala sebua ma’osisi, lõ mahole’õ ndra’aga, he ba gambõlõ, ba he ba gabera, irege no aefaga ba danõu.

18 Ba imane razo Ndraono Gedomo: Lõ tola õtõrõ danõgu, fa bõi fasuwõ ndra’o khõu.

19 Ba lamane khõnia Iraono Gizeraëli: Lala sebua ma’osisi, ba na mabadu gõu idanõ, ya’aga ba urifõma, ba mabe’e mbõli; ha fa matõrõ manõ!

20 Ba imane: Lõ tola õtõrõ! Ba lafaondragõ ira Iraono Gedomo; ato zabõlõ, solohe baluse.

21 Tobali lõ latehe Iraono Gedomo latõrõ danõra Iraono Gizeraëli; ba labõhõli ira Iraono Gizeraëli, lahole’õ ira.

 

22 IV. Ba lafazaŵa ira ba Gadesi andrõ ba lasaŵa hili Hori Iraono Gizeraëli fefu.

23 Ba imane Yehowa khõ ndra Moze A’aroni, ba da’õ, ba gahe hili Hori ba nola danõ Ndraono Gedomo:

24 A’aroni, ba ni’orudugõ sa’ae khõ ndra amami; lõ’õ sa tola ihundragõ danõ andrõ, nibe’egu ba Ndraono Gizeraëli, me no lõ nifondrondrongomi niŵa’õgu, ba nidanõ wasosota no.

25 Halõ Ga’aroni ba ononia Eleazari, ba ohe miyaŵa ira ba hili Hori, (F. 33, 38. Moz. V. 32, 50),

26 heta nukha Ga’aroni ba be’e nukha nononia Eleazari; ba A’aroni, ba ni’orudugõ [khõ ndra amami]; mate dania ia ba da’õ.

27 Ba i’o’õ Moze niŵa’õ Yehowa khõnia, mõi ira miyaŵa ba hili Hori ba zanehe zato fefu.

28 Ba iheta nukha Ga’aroni Moze, ibe’e nukha nononia Eleazari. Ba mate ba da’õ Ga’aroni, ba zuzu hili andrõ; ba lafuli ira mitou, moroi ba hili, ira Moze Eleazari. 29 Ba me la’ila sato fefu, no mate Ga’aroni, ba la’e’esi ia Iraono Gizeraëli fefu, tõlu ngafulu wongi wa’ara.

SURA MOZE IV.

Faza 21

I. Te’ala Ndrawa Gana’ana labe’e. II. Kumõkõkõkõ zui zato ba te’otu’õ ulõ. Ulõ tõla andrõ. III. Sinunõ Ndraono Gizeraëli, bõrõ wemõnara andrõ. IV. Te’ala ndra Sihona Ogi labe’e.

 

1 I. Ba me irongo Dawa Gana’ana andrõ, razo Garadi, ba danõ tánõ raya, so moroi sa ba Gatari Ndraono Gizeraëli, ba itema fasuwõ khõra ba ira’u õsa. (F. 33, 40).

2 Ba lafabu’u lira khõ Yehowa Iraono Gizeraëli, lamane: Na õbe’e ba dangama niha andrõ, ba malakha’õ mbanuara.

3 Ba i’o’õ wangandrõ Ndraono Gizeraëli Yehowa, ibe’e ba dangara Ndrawa Gana’ana andrõ; ba lalakha’õ ira, awõ mbanuara. Ba tebe’e tõi mbanua andrõ Horema.

 

4 II. Ba laheta ira ba hili Hori, latõrõ lala ba nasi zukhu, ba wamahene tanõ Ndraono Gedomo. Ba ba lala andrõ ba lõ sõkhisõkhi dõdõ zato.

5 Latahigõ Lowalangi ba he Moze, lamane: Hadia, andrõ mihetaga ba danõ Miserayi, ena’õ tekiko ndra’aga ba danõ si mate? Lõ’õ sa õma kue ba lõ õma idanõ ba anuzu dõdõma gõ si lõ sõkhi andrõ.

6 Ba ifatõrõ khõra gulõ sosõfu Yehowa, sondrou niha, tobali ato zi mate Iraono Gizeraëli. (Kor. I. 10, 9).

7 Ba mõi ira khõ Moze, lamane: Horõma mege, me matahigõ Yehowa, awõ ndra’ugõ; angandrõ khõ Yehowa, salahimõ, ena’õ iheta khõma gulõ andrõ! Ba mangandrõ Moze, salahi zato.

8 Ba imane Yehowa khõ Moze: Fazõkhi wamaedo gulõ sosõfu ba tuwu yaŵa, ba na so nidou, ba na ifaigi da’õ, ba auri ia.

9 Ba ifazõkhi gulõ tõla Moze, ba ituwu yaŵa; ba na ladou niha ulõ andrõ ba na ifaigi gulõ tõla andrõ, ba auri ia. (Raz. II. 18, 4. Yoh. 3, 14).

 

10 III. Ba lafazaŵa ira Iraono Gizeraëli, mofanõ, ba ba Goboto tebato dania.

11 Ba laheta ira ba Goboto ba ba Iye Ha’abari molombase, ba danõ si mate, tánõ ba gatumbukha luo, i’otarai danõ Ndraono Moabi.

12 Ba mofanõ ira ba da’õ, ba molombase ba ndraso Zaredi.

13 Ba mofanõ ba da’õ, ba yefo Garono ba danõ si mate, molombase; Arono so’ulu ba danõ Ndraono Gamori. Ola Ndraono Moabi Garono andrõ, tánõ ba Ndraono Gamori. (Sanguhuk. 11, 18).

14 Andrõ wa si mané ba zura wanuwõ Yehowa: ”Wahebi ba Zufa, awõ ndraso andrõ, Arono andrõ, ba sanõsõ andrõ,

15 ba ngai ndraso, irugi tánõ ba Ari, si faola ba danõ Ndraono Moabi.”

16 Ba moroi ba da’õ lasaŵa Mbe’eri; da’õ gumbu andrõ, niŵa’õ Yehowa, me imane khõ Moze; Owuloi niha sato, ena’õ ube’e gõra idanõ!

17 Me luo da’õ, ba lamanõ wanunõ Iraono Gizeraëli: ”Angumbu, ya’ugõ umbu! Mi’anunõ khõnia!

18 Ba’a nikharu zalaŵa, nikhao zebua tõi ba zato, nikharu si’o zalaŵa, nikharu si’ora!” Ba moroi ba danõ si mate andrõ, ba lasaŵa Matana; ba i’otarai Matana, 19 ba numalõ ba Nahaliëli, ba moroi ba Nahaliëli, ba lasaŵa Mbamoti;

20 ba i’otarai Mbamoti ba numalõ ba zalo’o andrõ ba danõ Ndraono Moabi, lafaudugõ zuzu hili Wisiga, fetahõ danõ si mate.

 

21 IV. Ba lafatenge zinenge khõ Zihona, razo Ndraono Gamori, Iraono Gizeraëli, lamane khõnia; (Moz. V. 2, 26);

22 Damatõrõ danõu; nowi ba kabu nagu, ba lõ mahundragõ, ba idanõ ba mba’a, ba lõ mabadu; lala sebua matõrõ, irege aefaga ba danõu.

23 Ba lõ itehe ba Ndraono Gizeraëli Sihona latõrõ danõnia, itema i’owuloi zabõlõ khõnia, ba ifaondragõ Ndraono Gizeraëli ba danõ si mate, ba me no irugi Yahasi, ba ilau fasuwõ khõra.

24 Ba te’ala ia ba mbawa zi’õli labe’e Iraono Gizeraëli ba lahalõ khõra danõnia, i’otarai Garono, numalõ ba Yaboko, irege nola Ndraono Gamoni; ola Ndraono Gamoni andrõ, ba noa sa mu’aro’õ.

25 Ba atu’a ba mbanua ba da’õ fefu Ndraono Gizeraëli, labali’õ banuara mbanua Ndraono Gamori fefu, Hesibona andrõ, fabaya banua side’ide, si fabõbõ khõra, fefu. (Yos. 24, 8. Sin. 136, 19).

26 Hesibona andrõ, ba banua razo Ndraono Gamori, Sihona andrõ; noa sa isuwõ razo Ndraono Moabi fõna da’o, ba no ihalõ khõnia danõnia fefu, irugi ba mbewe Garono.

27 Andrõ wa lamane sanunõ: ”Mitabu ba Hesibona, nitaru’õ ba ni’aro’õ mbanua Zihona andrõ!

28 Noa sa i’otarai alitõ Hesibona, holahola galitõ i’otarai mbanua Zihona; da’õ zi manga Ari Moabi, ba õsi mbanua ba hilihili ba mbewe Garono. (Yer. 48, 45).

29 Alai ndra’o ndra’ugõ, Moabi! Si tekiko ami, ya’ami, banua Khamosi andrõ! Tobali soloi nononia matua, ba nira’u Zihona, razo Ndraono Gamori, nononia alawe ibe’e. (Raz. I. 11, 17).

30 No ma’efasi wana khõra, ba si lõ boto sa’ae Hesibona, numalõ ba Dibona; no adudu mbanua mabe’e, irege Nofa; alitõ malau, irugi Medeba.”

31 Ba aro sa’ae Ndraono Gizeraëli ba danõ Ndraono Gamori.

32 Ba ifatenge zamauze Moze ba Ya’ezeri ba atu’a ira ba mbanua, fabaya ba halama soya khõra. Tobali latimba Ndraono Gamori sowanua ba da’õ.

33 Ba lafuli ira furi ba latõrõ lala ba Mbazana. Ba ifaondragõ ira Ogi, razo Mbazana, i’ohe zabõlõ khõnia fefu, mõi fasuwõ khõra. (Moz. V. 3, 1).

34 Ba imane Yehowa khõ Moze: Bõi ata’ufi ia, ube’e sa ba dangau ia, fabaya banuania fefu, ba tanõnia, ba hana na õlau khõnia nilaumõ khõ Zihona no, ba Hesibona.

35 Ba te’ala ia labe’e, fabaya ononia ba sabõlõ khõnia fefu, tobali samõsa lõ lasaigõ khõnia, soloi ena’õ, ba lahalõ khõra danõnia.

 

SURA MOZE IV.

Faza 22

I. Lõ i’o’õ Bileamo andrõ, me ifakaoni’õ ia Balaki. II. Ifuli ifatenge zinenge khõ Mbileamo Balaki. Mõi ia ba iba’a lala galidenia mala’ika. III. Irugi Mbalaki Bileamo.

 

1 I. Aefa da’õ, ba latohugõ wofanõ Iraono Gizeraëli ba molombase dania ba zalo’o, ba danõ Ndraono Moabi, yefo Yoridano, ba gamaudu Yerikho.

2 Ba i’ila Balaki, ono Zifori andrõ, fefu nilau Ndraono Gizeraëli ba Ndraono Gamori. 3 Ba ata’u sibai Ndraono Mo’abi Ndraono Gizeraëli; ato sibai sa ira, ba humokha mbu Ndraono Moabi Ndraono Gizeraëli andrõ.

4 Ba lamane Iraono Moabi ba zalaŵa Ndraono Midiano: Ba ni’ilada ma’õkhõ, ba la’ā manõ fefu zi tefasui ya’ita niha sato sibai andrõ, si mane saŵi si matua, na la’ā ndru’u ba mbenua. Ba razo Ndraono Mo’abi, me luo da’õ, ba ya’ia Mbalaki andrõ, ono Zifori.

5 Ba ifatenge zinenge khõ Mbileamo, ono Mbeori, ba Wetori, ba mbewe Oiferati, ba danõ niwara, ba wogaoni ya’ia, imane khõnia: So niha, saheta ba danõ Miserayi; no lahawui danõ, ha wa’ebolo, ba iada’e, ba molombase ba gamaudugu. (Yos. 24, 9).

6 Ba aine ba elifi khõgu niha andrõ, me tebai ulaŵa; ma atõ u’ila dania u’alani ira ba utimba ba danõgu. U’ila sa: nifahowu’õmõ, ba dõrõdõrõ nifahowu’õ ba ni’elifimõ, ba dõrõdõrõ ni’elifi!

7 Ba mangefa zatua Ndraono Moabi ba satua Ndraono Midiano, la’ohe luo waetasa, ba larugi Mbileamo, ba lafa’ema khõnia niŵa’õ Mbalaki.

8 Ba imane khõra: Mifõrõ, ba uŵa’õ li khõmi, balazi hadia niŵa’õ Yehowa khõgu. Ba la’iagõ khõ Mbileamo, satua Ndraono Moabi andrõ.

9 Ba mõi Lowalangi khõ Mbileamo, imane khõnia: Ha niha domeu andrõ?

10 Ba itema li Lowalangi Bileamo, imane: Balaki andrõ, ono Zifori, razo Ndraono Moabi, no ifatenge zinenge khõgu, imane:

11 Hiza niha, saheta ba danõ Miserayi, no lahawui danõ ha wa’ebolo, ba aine, ba elifi ira khõgu ma atõ abe’e ndra’o usuwõ ira ba utimba.

12 Ba imane Lowalangi khõ Mbileamo: Lõ tola mõi’õ awõra, lõ tola õ’elifi niha andrõ, me no nifahowu’õ.

13 Ba me moluo ba iŵa’õ li Bileamo ba zatua andrõ khõ Mbalaki, imane: Mifuli manõ ami ba khõmi; lõ’õ sa itehe khõgu Yehowa, mõido awõmi.

14 Ba lafazaŵa ira satua Ndraono Moabi ba larugi Mbalaki ba lamane: Lõ edõna Mbileamo mõi awõma.

 

15 II. Ba ifuli ifatenge zinenge Balaki, sato ba salaŵa, sebua moroi ba da’õ no mege.

16 Ba me larugi Mbileamo da’õ, ba lamane khõnia: Da’õ niŵa’õ Mbalaki, ono Zifori: Bõi ŵa’õ lõ mõi’õ khõgu!

17 Ebua sibai luou ube’e, ba fefu hadia ia niŵa’õu khõgu, ba u’o’õ; ba ae elifi khõgu niha andrõ!

18 Ba imane Bileamo ba mbanua Mbalaki andrõ: Ba he afõnu nomonia firõ ba ana’a ibe’e khõgu Balaki, ba tebai sa atõ ufadaõ niŵa’õ Lowalangigu Yehowa, he ba huhuo side’ide, ba he ba huhuo sebua.

19 Ba mifõrõ gõi ba da’e, bongī, ena’õ urongo, hadia niŵa’õ Yehowa iada’e.

20 Ba ba zi bongi, ba mõi Lowalangi khõ Mbileamo, imane khõnia: Na ba wogaoni ya’ugõ mõi niha andrõ, ba faoso, ba ae awõra, ba bõi lau zi tenga niŵa’õgu khõu.

21 Ba ihulõ wongi ifosela galidenia Bileamo, mõi ia awõ zalaŵa draono Moabi andrõ.

22 Ba mofõnu Lowalangi, bõrõ we’amõinia andrõ; ba iagõ lalania mala’ika Yehowa ba wanenaŵa ya’ia; no fakudo ia ba hulu galidenia ba fao khõnia zawuyunia, darua.

23 Ba me i’ila kalidenia, no so ba lala mala’ika Yehowa ba sara wõda ba dangania, si no isõbi, ba ihole’õ ia ba zinga lala, itõrõ mbenua, Ba ibõzi galide Bileamo, ena’õ ifuli itõrõ lala.

24 Ba i’agõ zise’ise lala mala’ika Yehowa, ba gotalua kabu nagu, ba zi so õli, faoma fatambai.

25 Ba me i’ila mala’ika Yehowa kalide, ba ifadege ia ba gõli, ilazi gahe Mbileamo ba gõli; ba ifuli ibõzi ia.

26 Ba ifuli mowaõwaõ mala’ika Yehowa ba i’agõ zise’ise sibai, si lõ lala wangohole’õ, he ba gambõlõ ba he ba gabera.

27 Ba me i’ila mala’ika Yehowa kalide, ba ibalõduhini tou danõ, barõ Mbileamo. Ba mofõnu Mbileamõ, ihare’õ khõnia mbõzibõzi.

28 Ba ifehede galide Yehowa; ba imane khõ Mbileamo: Hadia horõgu khõu, wa õbõzibõzido, no medõlu sa’ae? (Fet. II. 2, 16. Yud. a. 11).

29 Imane Bileamo khõ galide: Me no õ’o’aya ndra’odo! Ena’õ na so khõgu zi’õli, ba noa sa’ae ubunu’õ!

30 Ba imane kalide khõ Mbileamo: Hadia, tenga sa kalideu ndra’o, si fakudo ndra’ugõ ba hulu, sagõtõ fa’ara, irege ma’õkhõ andre? Hadia, no irai amuatagu, ulau khõu zi manõ? Ba imane: Lõ’õ!

31 Ba ibokai hõrõ Mbileamo Yehowa, ba i’ila mala’ika Yehowa, si so ba lala, sara wõda nidõni ba dangania. Ba ifaondrõ ia, ba ifalõgu tou ia ba danõ.

32 Ba imane khõnia mala’ika Yehowa: Hana wa õbõzibõzi galide andrõ khõu, no medõlu sa’ae? Ya’odo a’i zomba’a lala khõu, me no lala si lõ sõkhi wamaigigu.

33 Ba kalide andrõ, ba no i’ilado, ba no medõlu ihole’õ ia khõgu; na lõ ihole’õ ia mena’õ, ba mege sa’ae ubunu ndra’ugõ, ba ya’ia, ba u’orifi mena’õ.

34 Ba imane Bileamo khõ mala’ika Yehowa andrõ: Horõgu da’õ, lõ’õ sa u’ila, wa ya’ugõ zomba’a lala khõgu; ba na fatuwu khõu, ba ufulido.

35 Ba itema li Mbileamo mala’ika Yehowa, imane. Ae manõ awõ niha andro; ba bõi ŵa’õ hadia zi tenga niŵa’õgu khõu! Ba fao Mbileamo ba zalaŵa andrõ khõ Mbalaki.

 

36 III. Ba me irongo Balaki, no so ba lala Mbileamo, ba ifaondragõ ia, irege Iri Moabi ba mbewe Garono, ba wondrege nola danõ.

37 Ba imane Balaki khõ Mbileamo: Hadia, tenga no mato mendrua ufatenge zinenge khõu, ba wogaoni ya’ugõ? Hadia mbõrõ, wa lõ mõi’õ khõgu? Hadia, tebai ufosumange ndra’ugõ!

38 Ba imane Bileamo khõ Mbalaki: Ba no sodo ae. Ba hadia, tola maõ uŵa’õ hadia ia? Taroma li nibe’e Lowalangi ba mbewegu, da’õ niŵa’õgu dania!

39 Ba fao Mbileamo khõ Mbalaki, ba larugi Giriati Khusoti.

40 Ba ibe’e sumange [Lowalangi] zaŵi ba biribiri Balaki, ba ifa’ohe’õ [wõfõ] õ Mbileamo ba õ zalaŵa andrõ, awõnia fao.

41 Ba mahemolu õ, ba ihulõ wongi Balaki wolohe Bileamo, ifasao miyaŵa ba Mbamoti Mba’ali; ba da’õ oroma khõnia Ndraono Gizeraëli õsa.

 

SURA MOZE IV.

Faza 23

I. Fama’ele’õ Mbileamo si fõfõna. II. Fanete wama’ele’õ ai fõfõna.

 

1 I. Ba imane Bileamo khõ Mbalaki: Ŵa’õ wama’anõ naha wame’e sumange ba da’e, fitu, ba fitu hõnagõ khõgu ba da’e ono zaŵi si matua ba fitu mbiribiri si matua.

2 Ba i’o’õ Balaki niŵa’õ Mbileamo, ba labe’e zumange Balaki ba Bileamo, sambusambua naha wame’e sumange, ba sarasara nono zaŵi ba sagesageu mbiribiri si matua.

3 Ba imane Bileamo khõ Mbalaki: Iagõ da’e, ba ngai zumange nitunu; mofanõ ndra’o, tabe’e ifa’ele’õ ia khõgu Yehowa, ba hadia ni’oroma’õnia khõgu, ba u’ombakha’õ khõu. Ba mõi ia ba hilihili.

4 Ba i’oroma’õ ia Lowalangi khõ Mbileamo, ba imane khõnia da’õ: Naha wame’e sumange andrõ, si fitu, ba no ufa’anõ, ba sambusambua naha wame’e sumange, ba no sarasara nono zaŵi ba sagesageu mbiribiri si matua ube’e sumange.

5 Ba ibe’e ba mbewe Mbileamo daroma li Yehowa, imane khõnia: Fuli’õ khõ Mbalaki, ba õmanõ khõnia.

6 Ba ifuli ia khõnia; ba lõ si tebulõ ia ba ngai zumange andrõ khõnia, ba awõnia zatua Ndraono Moabi fefu.

7 Ba iŵa’õ niŵa’õnia andrõ, imane: ”Moroi ba Garamo ifahalõ’õ ndra’o Balaki, moroi ba hili tanõ ba gatumbukha luo ifakaoni’õ ndra’o razo Ndraono Moabi: ”Ae elifi khõgu ma’uwu Yakobo, ae lakha’õ khõgu Ndraono Gizeraëli!”

8 He uwisa wangelifi si tenga ni’elifi Lowalangi, ba he uwisa wolakha’õ si tenga nilakha’õ Yehowa?

9 Moroi ba zokara hili sa u’ila ira, moroi ba zalaŵa tanõ oroma ira khõgu. Soi si no tonia nahia, si lõ mamadoro ya’ia ba ngenoli niha baero.

10 Ha niha zangila mangerai ngawua gawu andrõ khõ Yakobo, ba ha niha zangila mama’oli liwu Ndraono Gizeraëli? Ena’õ na fa’amate zatulõ tõdõ wa’amategu dania, ba ena’õ na fa’aetu nosorā wa’aetu nosogu!”

11 Ba imane Balaki khõ Mbileamo: Hadia nilaumõ andrõ khõgu! Ba wangelifi emaligu ufa’aso ndra’ugõ; ba hiza, ba no õfahowu’õ!

12 Ba imane: Hadia, tenga ha sambalõ nibe’e Yehowa ba mbewegu uŵa’õ?

 

13 II. Ba imane khõnia Balaki: Tabu ba nahia bõ’õ, soroma ira khõu — ba ha balõra õila, lõ ahori õ’ila ira — ba ba da’õ elifi ira khõgu.

14 Ba i’ohe ia ba mbenua Zofimi ba zuzu hili Wisiga, ba fitu ifa’anõ naha wame’e sumange, ba sambusambua naha wame’e sumange, ba sarasara nono zaŵi ba sagesageu mbiribiri si matua ibe’e sumange.

15 Ba imane Bileamo khõ Mbalaki: Base’õ ba da’e, ba ngai zumange nitunu, da’ufaondragõ [Lowalangi] ba da’õ.

16 Ba ifa’ele’õ ia Yehowa khõ Mbileamo, ibe’e ba mbewenia daroma li, ba imane khõnia: Fuli’õ khõ Mbalaki ba õmanõ khõnia.

17 Ba irugi Mbalaki; ba lõ si tebulõ ia ba ngai zumange andrõ khõnia, ba awõnia zatua Ndraono Moabi. Ba isofu khõnia Balaki, imane: Hadia niŵa’õ Yehowa?

18 Ba iŵa’õ niŵa’õnia, imane: ”Lau, ya’ugõ Balaki, fondrondrongo! Be’e mbõrõ dalingau khõgu, ya’ugõ, ono Zifori!

19 Tenga niha Lowalangi, fa ifuli linia, ba tenga ono niha, fa mangesa dõdõnia ba ngawalõ hadia ia. Hadia, iŵa’õ hadia ia, ba lõ itorõ. (Sam. I. 15, 29. Yak. 1, 17).

20 Famahowu’õ niŵa’õ khõgu, ba da mamahowu ndra’o ba lõ ufuli ligu!

21 Famakao, ba lõ ta’ila ba ma’uwu Yakobo, ba fa’abu dõdõ, ba lõ falukha ba Ndraono Gizeraëli; itolo ira Lowalangira Yehowa, ba fa’owuawua dõdõ zalaŵa tarongo ba khõra. (Yer. 50, 20).

22 No iheta ira ba danõ Miserayi Lowalangi; no fa’abõlõ gõrõbao wa’abõlõra.

23 Lõ fakhai wanaka ba ma’uwu Yakobo, ba lõ molemba gelemu ba Ndraono Gizeraëli. Awai niŵa’õda maõkhõ, ba khõ ma’uwu Yakobo, ba khõ Ndraono Gizeraëli andrõ: Wa’ebua nilau Lowalangi!

24 Famazaŵa zingo si alawe ya’ia wamazaŵara ya’ira, ba femaoso zingo si matua wemaosora; lõ mõrõ ira, na lõ mu’ā gahulua ua, na lõ mubadu ndro nibunu!” (Moz. I. 49, 9).

25 Ba imane Balaki khõ Mbileamo: Bõi elifi ira ba bõi fahowu’õ.

26 Itema li Mbalaki Bileamo, imane khõnia: Tenga no uŵa’õ khõu: Fefu hadia ia niŵa’õ Yehowa, da’õ ulau.

27 Ba imane Balaki khõ Mbileamo: Tabu, da’u’ohe ndra’ugõ ba nahia bõ’õ, ma itehe Lowalangi, ba da’õ õ’elifi ira khõgu.

28 Ba i’ohe ba zuzu hili Weoro Mbileamo Balaki, hili si otahõgõ tanõ si mate.

29 Ba imane Bileamo khõ Mbalaki: Ŵa’õ wama’anõ naha wame’e sumange khõgu, fitu, ba fitu rozi hõnagõ khõgu ba da’e ono zaŵi ba fitu nga’eu biribiri si matua.

30 Ba i’o’õ Balaki niŵa’õ Mbileamo; ba sambusambua naha wame’e ba sarasara nono zaŵi ba sagesageu mbiribiri si matua ibe’e sumange.

SURA MOZE IV.

Faza 24

 

I. Fama ele’õ Mbileamo fanete zi dua balõ. II. Fango’ozui fama’ele’õ.

 

1 I. Ba me i’ila Bileamo, omasi Yehowa, tefahowu’õ Ndraono Gizeraëli, ba lõ i’alui wama’ele’õ si mane ba zi mendrua mege, itema i’otahõgõ danõ si mate.

2 Ba me ifakhõlõ ia, ba me i’ila Ndraono Gizeraëli solombase ba da’õ, sambusambua mado ba sambusambua nahia, ba so khõnia Geheha Lowalangi.

3 Ba iŵa’õ niŵa’õnia, imane: ”Da’e niŵa’õ Mbileamo andre, ono Mbeori; da’e niŵa’õ niha andrõ, si no teboka hõrõ.

4 Da’e niŵa’õ zamondrongo fehede Lowalangi, sanehe angilata khõ Zi lõ ambõ fa’abõlõ, si no alau tou ba si no muheta balubalu hõrõ:

5 Ha lõ agasõkhi nosemi, ya’ami ma’uwu Yakobo! nahiami andrõ, ya’ami Iraono Gizeraëli.

6 Si mane daso, si no ebolo misa, si mane kabu ba mbewe nidanõ sebua, si mane gõna farasi, nitanõ Yehowa, si mane eresi ba mbewe nidanõ!

7 Aduwa nidanõ ba dimba andrõ khõnia, ba si lõ ambõ idanõ nowinia. Sabõlõ moroi khõ Agagi andrõ razora, sebua sibai wa’asalaŵania. (Sam. I. 15, 8).

8 Lowalangi andrõ zangeheta mege ba danõ Miserayi, ba no amaedola wa’abõlõ gõrõbao khõra. Niha si fa’emali khõra, ba la’ā, larasa dõla, lafatõ nono wana khõra.

9 No lafadõlõ ira, mõrõ ira tou, si mane singo, ba si mane singo si alawe; ha niha zi keani ya’ira? Ha niha zamahowu’õ ya’ugõ, ba nifahowuhowu’õ, ba ha niha zangelifi ya’ugõ, ba ni’elifi!” (Moz. I. 12, 3).

 

10 II. Ba mofõnu sibai Mbalaki khõ Mbileamo, ilau datawõ. Ba imane khõ Mbileamo: Ba wangelifi emaligu ufakaoni’õ ndra’ugõ, ba no ha sambalõ famahowu khõu, no medõlu ae!

11 Ba fuli’õ manõ sa’ae khõmi; tõdõgu, ba u’ebua’õ luou, ba si lõ luo ndra’ugõ ibe’e Yehowa.

12 Ba imane Bileamo khõ Mbalaki: Hadia, tenga no uŵa’õ ba zinenge andrõ, nifatengeu khõgu:

13 He afõnu nomonia firõ ba ana’a ibe’e khõgu Balaki, ba tebai zui ufadaõ niŵa’õ Yehowa ba tebai ulau zomasi ndra’o, ha nibe’e Yehowa ba dõdõgu, ha da’õ uŵa’õ. (Neh. 13, 2).

14 Ba ufulido sa’ae ba niwama; ba hiza, da’ubokai khõu hadia nilau niha andrõ ba mbanuau dania.

15 Ba iŵa’õ niŵa’õnia, imane: ”Da’e niŵa’õ Mbileamo andre, ono Mbeori, niha andrõ, si no teboka hõrõ.

16 Da’e niŵa’õ zamondrongo fehede Lowalangi, si no aboto ba dõdõ Fondrege zalaŵa andrõ, sanehe angilata khõ Zi lõ ambõ fa’abõlõ, si no alau tou ba si no muheta balubalu hõrõ;

17 ”U’ila ia, ba lõ’õ na anehedo ia, ba arõu na ma’ifu. Tumbu ndrõfi ba ma’uwu Yakobo, ba si’o zalaŵa i’otarai Ndraono Gizeraëli; da’õ worasa dangidangi Ndraono Moabi, fabaya amu’u ma’uwu Zeti fefu. (Sam. II. 8, 2. Yer. 48, 45). 18 Tanõ Ndraono Gedomo, ba mõi barõ mbawara, ba Se’ira, emalira, ba mõi barõ mbawara. Ba sebua turia nilau Ndraono Gizeraëli, (Sam. II. 8, 14).

19 Ba ma’uwu Yakobo i’otarai salaŵa, ba ihori zi no moloi mege, ba mbanua misa!”

20 Ba me i’ila Ndraono Gamaleki, ba iŵa’õ niŵa’õnia, imane: ”Si a’a niha baero andrõ, ba ya’ia Ndraono Gamaleki, ba fozunia, ba fa’atekiko!” (Sam. I. 15, 3). 21 Ba me i’ila ma’uwu Geni andrõ, ba iŵa’õ niŵa’õnia, imane: ”No aro nahiamõ, nifanuge ba dete gara gazunimõ. (Moz. I. 15, 19).

22 Ba fa’atekiko sa atõ fõna Ga’ino, ha wa’ara tõ na, ba la’oloi’õ ndra’ugõ Dawa Asiria.”

23 Ba imane na: ”Alai ita, ha niha zauri, na ifatõrõ zi manõ Lowalangi!

24 Ba hiza nowo moroi sa ba Ndrawa Giti, fangõhõndrõgõ Ndrawa Asiria, fangõhõndrõgõ danõ si yefo; ba da’õ gõi, ba fa’atekiko fõnania.” 2

5 Ba ifazaŵa ia Bileamo, ba wamuli ya’ia ba khõra, ba mofanõ gõi Mbalaki.

 

SURA MOZE IV.

Faza 25

I. Lahorõni nono alawe Ndraono Midiano Iraono Gizeraëli. Fotu horõ andrõ. II. Fõnu Wineha andrõ, me no lasawõ goroisa Lowalangi, ba te’aro’õ ia ere, amaedola luonia. Lasuwõ Ndraono Midiano.

 

1 I. Ba me sosó ba Zitimi Ndraono Gizeraëli, ba ibõrõtaigõ lahorõhorõni nono alawe Ndraono Moabi.

2 Lakaoni ira ba wemanga ba wame’e adu khõra Iraono Moabi; ba manga ira ba mangalulu ba nadu khõra.

3 Ba molemba ba Mba’ali-Weoro Ndraono Gizeraëli; ba mofõnu Yehowa ba Ndraono Gizeraëli: (Moz. V. 4, 3. Yos. 22, 17. Sin. 106, 28. Hos. 9, 10).

4 Ba imane Yehowa khõ Moze: Owuloi zatua mbanua fefu, ba taŵi ira ba zino, khõ Yehowa, ena’õ dõhõ wõnu Yehowa andrõ ba Ndraono Gizeraëli, si no abõlõbõlõ.

5 Ba imane Moze ba zanguhuku ba Ndraono Gizeraëli. Ibunu mbanuania zamõsana, ya’ami, banuania si no molemba ba Mba’ali-Weoro andrõ! (Moz. II. 32, 27).

6 Ba so zamõsa, Iraono Gizeraëli, solohe ba khõra ono alawe Ndraono Midiano, ba zanehe Moze ba Iraono Gizeraëli sato, fefu, me mangarõngarõ ira ba golayama nose wama’ele’õ.

7 Ba me i’ila da’õ Fineha, ono Geleazari, ma’uwu Ga’aroni ere, ba maoso ia ba hunõ zato, ituyu doho,

8 ba i’o’õ mbanuara andrõ misi bakha, ba faoma itaru’õ ba dalu doho, darua ira iwara andrõ alawe andrõ; ba dõhõ wamakao andrõ, ba Ndraono Gizeraëli.

9 Ba fa’ato zi no tekiko ba wamakao andrõ, ba no 24,000. (Kor. I. 10, 8).

 

10 II. Ba humede Yehowa khõ Moze, imane:

11 Fineha andrõ, ono Geleazari, ma’uwu Ga’aroni ere, ba no ibe’e alõ wõnugu ba Ndraono Gizeraëli, me no mofõnu ia khõra, si mane na mofõnufõnu ndra’o khõra, si mane na mofõnufõnu ndra’o khõra, ba tobali lõ uhori Ndraono Gizeraëli, ba wõnugu andrõ.

12 Andrõ õŵa’õ khõnia: Hiza, ufabu’u khõnia wangorifi khõgu.

13 Nitehe ere ia, awõ nga’õtõnia dania, gõtõgõtõ wa’ara; bõli gõlõnia, me no mofõnu ia ba zõfõnu Lowalanginia, ba me no ifaigi wameta sala ba Ndraono Gizeraëli.

14 Ba tõi mbanuara andrõ nibunu, awõ ndra alawe Iraono Midiano andrõ, ba Simeri, ono Zálu, satua mbanua ba mado Zimeoni.

15 Ba ira alawe Iraono Midiano nibunu andrõ, ba Kosibi dõi, ono Zuri, satua mbanua, satua zi sawōē ba Ndraono Midiano.

16 Ba humede Yehowa khõ Moze, imane:

17 Misuwõ Ndraono Midiano, mi’alani ira.

18 Noa sa lasuwõ ami falimosara andrõ, nilaura khõmi, ba Weoro andrõ ba ba mbanuara andrõ, Kosibi, ono zalaŵa Ndraono Midiano nibunu me luo tefatõrõ khõmi wamakao andrõ, ba Weoro andrõ. (F. 31, 2).

 

SURA MOZE IV.

Faza 26

I. Lafuli la’ofaya niha. II. Tefakhoi wamaosa tanõ. Iraono Lewi.

 

1 I. Ba me no dõhõ wamakao andrõ, ba imane Yehowa khõ Moze, ba khõ Geleazari, ono Ga’aroni ere:

2 Mi’ofaya Ndraono Gizeraëli fefu, si 20 fakhe ba si a’a moroi andrõ, sambusambua mado, dozi solohe baluse ba Ndraono Gizeraëli. (F. 1, 2).

3 Ba laŵa’õ li ira Moze Eleazari khõra, ba zalo’o tanõ Ndraono Moabi, ba gamaudu Yerikho,

4 khõra si 20 fakhe ba si a’a moroi andrõ, dali niŵa’õ Yehowa khõ Moze. Ba da’e Ndraono Gizeraëli, si otarai danõ Miserayi:

5 Rubeno, si a’a Ndraono Gizeraëli. Ba iraono Rubeno, ba Hanokhi, tua nga’õtõ Hanokhi andrõ; ba Walu, tua nga’õtõ Walu andrõ. (Moz. I. 46, 8 b. t.)

6 Ba Heseroni, tua nga’õtõ Heseroni andrõ; ba Karemi, tua nga’õtõ Garemi andrõ.

7 Da’õ nga’õtõ Rubeno andrõ. Ba fa’ato ni’ofaya ya’ira, ba no 43,730. 8 Ba ono Walu andrõ, ba Eliabi.

9 Ba iraono Geliabi, ba Nemuëli ba Datano ba Abiramo. Da’õ zalaŵa rafe andrõ, Datano ba Abiramo, si fao khõ Gora no, me fasoso ira khõ Yehowa, (F. 16, 1 b. t.),

10 me ifaboka mbawania tanõ, me itõlõ ira, awõ Gora, me tekiko zi fao andrõ, me i’ā alitõ zi 250 niha, me tobali tandra [famangelama] ira.

11 Ba lõ si tekiko ndraono Gora. (Sin. 42, 1).

12 Ba ba nga’õtõ ndraono Zimeoni, ba Nemuëli, tua nga’õtõ Nemuëli andrõ, ba Yamini, tua nga’õtõ Yamini andrõ, ba Yakhino, tua nga’õtõ Yakhino andrõ,

13 ba Sera, tua nga’õtõ Zera andrõ, ba Saulo, tua nga’õtõ Zaulo andrõ;

14 da’õ nga’õtõ Zimeoni andrõ, no 22,200.

15 Ba ba nga’õtõ ndraono Gado andrõ, ba Sefono, tua nga’õtõ Zefono andrõ, ba Hagi, tua nga’õtõ Hagi andrõ, ba Suni, tua nga’õtõ Zuni andrõ,

16 ba Osini, tua nga’õtõ Gosini andrõ, ba Eri,

17 tua nga’õtõ Geri andrõ, ba Arodi, tua nga’õtõ Garodi andrõ, ba Areli, tua nga’õtõ Gareli andrõ.

18 Da’õ nga’õtõ ndraono Gado andrõ, ha wa’ato ira, ni’ofaya, no 40,500.

19 Ba ono Yuda, ba Eri ba Onani, ba Eri andrõ ba Onani, ba si mate ba danõ Gana’ana. (Moz. I. 38, 3. 4).

20 Ba ba nga’õtõ ndraono Yuda andrõ, ba Sela, tua nga’õtõ Zela andrõ, ba Faresi, tua nga’õtõ Waresi andrõ, ba Sera, tua nga’õtõ Zera andrõ.

21 Ba ba ndraono Waresi andrõ, ba Eseromo, tua nga’õtõ Geseromo andrõ, ba Hamuli, tua nga’õtõ Hamuli andrõ.

22 Da’õ nga’õtõ Yuda andrõ, ha wa’ato ira, ni’ofaya no 76,500.

23 Ba ba nga’õtõ Isasari andrõ, ba Tola, tua nga’õtõ Dola andrõ, ba Fuwa, tua nga’õtõ Wuwa andrõ,

24 ba Yasubi, tua nga’õtõ Yasubi andrõ, ba Simeroni, tua nga’õtõ Zimeroni andrõ.

25 Da’õ nga’õtõ Isasari andrõ, ha wa’ato ira, ni’ofaya, no 64,300.

26 Ba ba nga’õtõ Zebuloni, ba Seredi, tua nga’õtõ Zeredi andrõ, ba Elono, tua nga’õtõ Gelono andrõ, ba Yaleëli, tua nga’õtõ Yaleëli andrõ.

27 Da’õ nga’õtõ Zebuloni andrõ, ha wa’ato ira, ni’ofaya, no 60,500.

28 Ba nga’õtõ Yosefo, ba ononia andrõ, Manase ba Eferayi.

29 Ba ba ndraono Manase, ba Makhiro, tua nga’õtõ Makhiro andrõ. Ono Makhiro, ba Gileadi, tua nga’õtõ Gileadi andrõ.

30 Ono Gileadi andrõ, ba Yezeri, tua nga’õtõ Yezeri andrõ, ba Heleki, tua nga’õtõ Heleki andrõ,

31 ba Aseriëli, tua nga’õtõ Gaseriëli andrõ, ba Sikhema, tua nga’õtõ Zikhema andrõ,

32 ba Semida, tua nga’õtõ Zemida andrõ, ba Heferi, tua nga’õtõ Heferi andrõ.

33 Ba Selofadi andrõ, ono Heferi, ba si lõ ono matua, ha ono alawe; ba tõi nononia alawe andrõ, ba Mala ba Noa ba Hogela ba Milika ba Tirisa.

34 Da’õ nga’õtõ Manase, ha wa’ato ira ni’ofaya, no 52,700.

35 Ba da’e nga’õtõ ndraono Geferayi andrõ: Sutela, tua nga’õtõ Zutela andrõ, ba Bekheri, tua nga’õtõ Mbekheri andrõ, ba Tahana, tua nga’õtõ Dahana andrõ.

36 Ba da’e Ndraono Zutela andrõ: Erano, tua nga’õtõ Gerano andrõ.

37 Da’õ nga’õtõ ndraono Geferayi, ha wa’ato ira, ni’ofaya, no 32,500. Da’õ nga’õtõ ndraono Yosefo andrõ.

38 Ba ba nga’õtõ ndraono Mbeniyami, ba Bela, tua nga’õtõ Mbela andrõ ba Asibeli, tua nga’õtõ Gasibeli andrõ, ba Ahiramo, tua nga’õtõ Gahiramo andrõ,

39 ba Sufama, tua nga’õtõ Zufama andrõ, ba Hufama, tua nga’õtõ Hufama andrõ.

40 Ba ono Mbela andrõ, ba Aradi ba Na’ama; Aradi, ba tua nga’õtõ Garadi andrõ, ba Na’ama, ba tua nga’õtõ Na’ama andrõ.

41 Da’õ nga’õtõ ndraono Mbeniyami andrõ, ha wa’ato ira, ni’ofaya, no 45,600.

42 Ba da’e nga’õtõ ndraono Dano andrõ: Suha, tua nga’õtõ Zuha andrõ; da’õ nga’õtõ Dano, ba watalifusõta andrõ khõra.

43 Fefu nga’õtõ Zuha andrõ, ha wa’ato ira, ni’ofaya, ba no 64,400.

44 Ba ba nga’õtõ ndraono Gaseri, ba Yimena, tua nga’õtõ Yimena andrõ, ba Yisiwi, tua nga’õtõ Yisiwi andrõ, ba Beria, tua nga’õtõ Mberia andrõ.

45 Ba iraono Mberia, ba Heberi, tua nga’õtõ Heberi andrõ, ba Malekiëli, tua nga’õtõ Malekiëli andrõ.

46 Ba ono Gaseri alawe, ba Sera dõi.

47 Da’õ nga’õtõ ndraono Gaseri, ha wa’ato ira, ni’ofaya, no 53,400.

48 Ba ba nga’õtõ ndraono Nafatali, ba Yaseëli, tua nga’õtõ Yaseëli andrõ, ba Guni, tua nga’õtõ Guni andrõ,

49 ba Yeseri, tua nga’õtõ Yeseri andrõ, ba Silemi, tua nga’õtõ Zilemi andrõ. 50 Da’õ nga’õtõ Nafetali ba wafalitusõta andrõ khõra, ba fa’ato ni’ofaya, ya’irá, ba no 45,400.

51 Da’õ ni’ofaya, Iraono Gizeraëli, no 601,730.

 

52 II. Ba humede Yehowa khõ Moze, imane:

53 Khõra andrõ lafaosa danõ, nitutu tanõ, balazi ha wa’ato ira.

54 Sato niha, ba ebolo danõ labe’e tána khõra, ba ba zi õna’õna fa’ato, ba la’õnaigõ wogoi tána khõra; balazi ha wa’ato ni’ofaya, ya’ira, ba wogoi tána khõra. (F. 33, 54. Yos. 14, 2).

55 Ba nilau dahõdahõ ba wamaosa tanõ, sambusambua mado zanema, balazi dõi duara.

56 Dali dahõdahõ, ba wamaosa khõra, tána khõra, ba zato niha ba ba zambõ fa’ato.

57 Ba da’õ ni’ofaya ono Lewi, sambusambua watalifusõta: Gereso andrõ, tua nga’õtõ Gereso, ba Kahati, tua nga’õtõ Gahati andrõ, ba Merari, tua nga’õtõ Merari andrõ. (Moz. II. 6, 16).

58 Da’õ nga’õtõ Lewi andrõ: nga’õtõ Libeni andrõ, ba nga’õtõ Heberona, ba nga’õtõ Maheli, ba nga’õtõ Husi, ba nga’õtõ Gora. Ba ono Gahati, ba Ameramo andrõ;

59 ba fo’omo Gameramo, ba Yokhebe, ono Lewi alawe, ononia ba danõ Miserayi; ba ono da’õ khõ Gameramo, ba A’aroni ba Moze ba talifusõra alawe andrõ, Miriya. (Moz. II. 6, 20).

60 Ba ono Ga’aroni, ba Nadabi ba Abihu ba Eleazari ba Itamari.

61 Ba Nadabi andrõ ba Abihu, ba mate, me la’ohe fõna Yehowa galitõ si tenga. (Moz. III. 10, 2).

62 Ba fa’ato ni’ofaya, ya’irá, ba no 23,000, dozi motõi matua, si sara waŵa fa’ebua ba si a’a moroi andrõ. Lõ’õ sa mufao ira ba wangofaya Iraono Gizeraëli bõ’õ mege, me lõ sinemara tána khõra tanõ, ba ngai Ndraono Gizeraëli bõ’õ.

63 Da’õ ni’ofaya ndra Moze Eleazari ere andrõ, sangofaya Iraono Gizeraëli ba zalo’o tanõ Ndraono Moabi, ba mbewe Yoridano, ba gamaudu Yerikho.

64 Ba samõsa lõ’õ sa’ae ba da’õ ni’ofaya ndra Moze A’aroni ere no, me la’ofaya Ndraono Gizeraëli ba danõ si mate ba gahe hili Zina’i.

65 Noa sa iŵa’õ khõra Yehowa, si mate ba danõ si mate ira; ba no tobali samõsa lõ si tosai, ya’irá andrõ, baero Galebi, ono Yefune, ba Yosua, ono Nuni. (F. 14, 23).

 

SURA MOZE IV.

Faza 27

I. Amakhoita ba nono alawe sanema ondrõita. II. I’ombakha’õ wa’amate Moze Yehowa ba iŵa’õ wamataro Yosua, fangali Moze.

 

1 I. Ba so nono Zelofadi alawe, Selofadi ono Heferi ono Gileadi ono Makhiro ono Manase, nga’õtõ Manase andrõ, ono Yosefo, ba tõi nononia andrõ, ba Mala ba Noa ba Hogela ba Milika ba Tirisa.

2 La’ondrasi ndra Moze Eleazari ere andrõ ba satua ba sato fefu, ba golayama nose wama’ele’õ, lamane:

3 Amama, ba no mate ba danõ si mate, tenga awõ zi fao khõ Gora no, si maoso no, solaŵa Yehowa; ba horõnia [samõsa ya’ia] mate ia. Ba lõ ono matua khõnia.

4 Ba hana wa labe’e taya dõi namama ba nga’õtõ andrõ khõra, me no lõ ono matua khõnia; Khõma mibe’e dána khõma tanõ, ba ngai dalifusõ namama!

5 Ba i’ohe khõ Yehowa huhuora andrõ Moze.

6 Ba imane Yehowa khõ Moze:

7 Si ndruhu niŵa’õ nono Zelofadi andrõ. Õbe’e sa’ae khõra dána khõra, ba ngai dalifusõ namara, tána khõ namara ena’õ, ba khõra mõi õbe’e. (F. 36, 2).

8 Ba õmane ba Ndraono Gizeraëli: Na so zi mate lõ ono matua, ba khõ nononia alawe mõi dána khõnia tanõ mibe’e.

9 Ba na lõ’õ gõi ono alawe khõnia, ba ba dalifusõnia mitehe dána khõnia andrõ.

10 Ba na lõ’õ gõi talifusõnia, ba ba dalifusõ namania mitehe.

11 Ba na lõ’õ gõi talifusõ namania, ba ba zabõlõ ahatõ khõnia ba nga’õtõra andrõ mõi mibe’e; da’õ sa’ae zokhõ. Da’õ dania huku ba Ndraono Gizeraëli, dali niŵa’õ Yehowa khõ Moze.

12 II. Ba imane Yehowa khõ Moze: Ae miyaŵa ba hili Gabari andrõ, ba faigi danõ andrõ, nibe’egu ba Ndraono Gizeraëli. (Moz. V. 32, 49).

13 Ba na no õfaigi, ba la’orudugõ gõi ndra’ugõ khõ ndra tuau, si mane ga’au A’aroni, si no mu’orudugõ, (F. 20, 28),

14 me no lõ nifondrondrongomi niŵa’õgu andrõ, ba danõ si mate Sini, me fasoso zato, me mifolakhõmi mena’õ ndra’odo ba zanehe ira, ba nidanõ andrõ (Idanõ wasosota andrõ da’õ ba Gadesi, ba danõ si mate Sini). (F. 20, 12).

5 Ba humede Moze khõ Yehowa, imane:

16 Ena’õ na ifataro zamõsa solohe sato Yehowa andrõ, So’aya noso ba mboto niha fefu, (F. 16, 22),

17 solohe ya’ira na mofanõ ba na mangawuli, solohe ya’ira na mõi, heza, ba na lafuli ira baose, fa bõi hulõ mbiribiri si lõ kubalo mbanua Yehowa andrõ. (Mat. 9, 36).

18 Ba imane Yehowa khõ Moze: Halõ khõu Yosua andrõ, ono Nuni, niha si so Eheha, tufa hõgõnia tangau, (Moz. V. 1, 38),

19 ba ohe khõ Geleazari ere andrõ ba ba zato fefu, ba wamataro ya’ia ba zanehe ira;

20 ba õhare’õ khõnia õsa lakhõmimõ andrõ, ena’õ lafondrondrongo linia Iraono Gizeraëli sato, fefu.

21 Yamõi khõ Geleazari ere, ena’õ idõni ba duna Urimi andrõ, khõ Yehowa; balazi dania niŵa’õnia na mofanõ ira, ba na molombase, ya’ia ba Iraono Gizeraëli fefu, sato fefu. (Moz. II. 28, 30).

22 Ba i’o’õ Moze niŵa’õ Yehowa khõnia: ihalõ Yosua andrõ ba i’ohe khõ Geleazari ere ba ba zato fefu.

23 Ba itufa hõgõnia tanga, ifataro ia, dali niŵa’õ Yehowa, nifa’ema Moze.

 

SURA MOZE IV.

Faza 28

Amakhoita ba zumange, hadia ia: I. Sumange sero ma’õkhõ. II. Sumange na luo sabato. III. Sumange na fasulõna mbaŵa. IV. Sumange fasa. V. Sumange na luo wendrakose.

 

1 I. Ba humede Yehowa khõ Moze, imane:

2 Be’e li ba Ndraono Gizeraëli, õmane khõra: Bõi olifu ami wame’e ame’ela sumange andrõ khõgu na inõtõ, õgu, sumange nifatõrõ ba galitõ, nihonogõi khõgu, samohua khõgu. (Moz. III. 3, 11; 21, 6).

3 Õmane na khõra: Da’õ zumange nifatõrõ ba galitõ, nibe’emi khõ Yehowa: Sero ma’õkhõ, ba dua rozi nono mbiribiri, si lõ sala, sumange nitunu, si lõ aefa’aefa. (Moz. II. 29, 38).

4 Ono mbiribiri si sara, ba na mahemolu mbanua õbe’e, ba si sara, ba na tánõ owī, ba tõlu kata hamo si sõkhi,

5 ninifakhõyõ fanikha mbua zai nifufu, samba kata, sumange ni’ā. (F. 15, 4). 6 Da’õ zumange nitunu andrõ, si lõ aefa’aefa, nibe’e no, ba gahe hili Zina’i, samohua, nibe’e khõ Yehowa, sumange nifatõrõ ba galitõ.

7 Ba nifao ba zi sarasara ono mbiribiri, sumange nibadu, ba sambasamba kata. Ba ni’amoni’õ labe’e khõ Yehowa zumange nibadu andrõ, agu nilau famasa.

8 Ba ono mbiribiri si sara, ba na tánõ owī õbe’e; ba nifao zumange ni’ā, si mane ba zanguhulõ wongi mege, awõ zumange nibadu andrõ, nifao khõnia, sumange nifatõrõ ba galitõ, nibe’e khõ Yehowa, samohua.

 

9 II. Ba na luo sabato, ba dua rozi nono mbiribiri si dõfi fa’ebua, si lõ sala, ba tõlu hinaoya hamo si sõkhi nifaruka fanikha, sumange ni’ā, ba sumange nibadu andrõ, nifao ba da’õ.

10 Da’õ zumange nitunu andrõ, ero na luo sabato, baero zumange nitunu andrõ, si lõ aefa’aefa, ba sumange nibadu andrõ, nifao ba da’õ.

 

11 III. Ba ero na fasulõna mbaŵa khõmi, ba mibe’e sumange Yehowa, ba dua rozi nono zaŵi, si matua ba sageu mbiribiri si matua ba fitu rozi nono mbiribiri, si dõfi fa’ebua, si lõ sala;

12 ba sarasara ono zaŵi, ba duadua dumba nifao hamo si sõkhi nifaruka fanikha, sumange ni’ā, ba sagesageu biribiri si matua, ba tõlutõlu hinaoya hamo si sõkhi, nifaruka fanikha, sumange ni’ā,

13 ba sarasara ono mbiribiri, ba tõlutõlu kata hamo si sõkhi, nifaruka fanikha, sumange ni’ā, — sumange nitunu, samohua, sumange nifatõrõ ba galitõ, nibe’e khõ Yehowa.

14 Ba ba zumange nibadu andrõ, nifao ba da’õ, ba sarasara ono zaŵi, ba sambasamba hinaoya nagu ba sagesageu biribiri si matua, ba sambasamba kata a matonga, ba sarasara ono mbiribiri, ba sambasamba kata. Da’õ zumange nitunu andrõ nibe’e, ero na fasulõna, dõfi fasui manõ.

15 Ba baero õ, ba sageu nambi si matua, sumange fameta horõ, nibe’e khõ Yehowa; baero zumange nitunu andrõ, si lõ aefa’aefa, ba baero zumange nibadu andrõ, nifao ba da’õ, wame’e da’õ.

 

16 IV. Ba ba zi meweleõfa ba mbaŵa si fõfõna, ba telau wasa andrõ, khõ Yehowa. (Moz. II. 12, 18. 21. Moz. III. 23, 5).

17 Ba ba zi mewelelima ba mbaŵa da’õ, ba aekhu ba danõ gowasa andrõ. Fitu bongi wa’ara te’ā roti si lõ mu’aisõni.

18 Na luo si fõfõna andrõ, ba owulo ba ni’amoni’õ ba lõ tola mihalõ hadia ia halõŵõ ba da’õ. (Moz. III. 23, 7).

19 Ba nibe’e khõ Yehowa sumange nifatõrõ ba galitõ, sumange nitunu, ba dua rozi nono zaŵi, si matua, ba sageu mbiribiri si matua ba fitu rozi nono mbiribiri; si lõ sala, mibe’e.

20 Ba nifao ba da’õ, sumange ni’ā, ba hamo si sõkhi, nifaruka fanikha, dua dumba zi fao ba nono zaŵi, ba tõlu hinaoya ba mbiribiri si matua andrõ;

21 ba sarasara ono mbiribiri si fitu andrõ, ba tõlutõlu kata mifao.

22 Ba baero õ, ba sageu nambi si matua, sumange fameta horõ, ba wameta salami andrõ.

23 Da’õ [fefu] mibe’e, lõ lai zumange nitunu andrõ ba zanguhulõ wongi, nibe’e sumange nitunu si lõ aefa’aefa.

24 Sumange da’õ nibe’e khõ Yehowa, õ sumange nifatõrõ ba galitõ, samohua, ero ma’õkhõ, fitu bongi wa’ara; baero zumange nitunu andrõ si lõ aefa’aefa andrõ, ba baero zumange nibadu andrõ, nifao ba da’õ wame’e ya’ia.

25 Ba na luo si fitu, ba owulo ami ba ni’amoni’õ, ba lõ tola mihalõ hadia ia halõŵõ ba da’õ.

 

26 V. Ba na baŵa wamasi sahulõ, na mibe’e zumange Yehowa, sumange ni’ā, fõfõ mbua zahulõ, na owasa wendrakose khõmi, ba owulo ami ba ni’amoni’õ; ba lõ tola mihalõ hadia ia halõŵõ ba da’õ. (Moz. III. 23, 15).

27 Ba sumange nitunu, samohua, nibe’emi khõ Yehowa, ba dua rozi nono zaŵi ba sageu mbiribiri si matua ba fitu rozi nono mbiribiri.

28 Ba nifao ba da’õ sumange ni’ā, ba hamo si sõkhi nifaruka fanikha, sarasara ono zaŵi ba duadua dumba, ba ba mbiribiri si matua andrõ,

29 ba tõlu hinaoya, ba sarasara ono mbiribiri si fitu andrõ, ba tõlutõlu kata;

30 ba sageu nambi si matua, ba wameta salami.

31 Baero zumange nitunu andrõ, si lõ aefa’aefa andrõ, ba baero zumange ni’ā ba sumange nibadu, nifao ba da’õ, wame’emi ya’ia; si lõ sala mibe’e.

 

SURA MOZE IV.

Faza 29

I. Sumange na owasa nilau torofe. II. Na owasa fangatulõ. III. Na owasa nose daha geu.

 

1 I. Ba na tesa’a lõ faoro, na baŵa si fitu, ba owulo ami ba ni’amoni’õ, ba lõ tola mihalõ hadia ia halõŵõ ba da’õ, baŵa wolau torofe fangekhugõ niha ia khõmi, miŵa’õ. (Moz. III. 23, 24).

2 Ba sumange nitunu, samohua, nibe’emi khõ Yehowa ba da’õ, ba sara nono zaŵi, si matua, ba sageu mbiribiri, si matua ba fitu rozi nono mbiribiri, si dõfi fa’ebua, si lõ sala.

3 Ba nifao ba da’õ, sumange ni’ā, hamo si sõkhi, nifaruka fanikha, ba dua dumba ba nono zaŵi andrõ, ba tõlu hinaoya ba mbiribiri si matua andrõ,

4 ba sarasara ono mbiribiri andrõ si fitu, ba tõlutõlu kata.

5 Ba baero õ, ba sageu nambi si matua, sumange fameta horõ, ba wameta salami,

6 baero zumange nitunu andrõ na fasulõna, awõ zumange ni’ā, nifao ba da’õ, ba baero zumange nitunu andrõ sero ma’õkhõ ba sumange ni’ā andrõ, ba sumange nibadu, nifao, nifakhoi andrõ — samohua, sumange nifatõrõ ba galitõ, nibe’e khõ Yehowa.

 

7 II. Ba ba zi mewulu, ba mbaŵa si fitu andrõ, ba owulo ami ba ni’amoni’õ ba mangalulu ami; hadia ia halõŵõ, ba lõ tola mihalõ ba da’õ. (Moz. III. 23, 27).

8 Ba sumange nitunu, nibe’emi khõ Yehowa, samohua, ba sara nono zaŵi, si matua, ba sageu mbiribiri si matua ba fitu rozi nono mbiribiri si dõfi fa’ebua; si lõ sala mibe’e.

9 Ba nifao ba da’õ, sumange ni’ā, ba hamo si sõkhi nifaruka fanikha, dua dumba ba nono zaŵi andrõ, ba tõlu hinaoya ba mbiribiri si matua,

10 ba sarasara ono mbiribiri andrõ, ba tõlutõlu kata.

11 Ba baero õ, ba sageu nambi si matua, sumange fameta horõ, lõ lai zumange fameta horõ andrõ, ba wameta salami, ba lõ lai zumange nitunu andrõ, sero ma’õkhõ ba sumange ni’ā ba sumange nibadu, nifao ba da’õ.

 

12 III. Ba ba duli ba mbaŵa si fitu andrõ gõi, ba owulo ami ba ni’amoni’õ; ba lõ tola mihalõ hadia ia halõŵõ ba da’õ; owasa nilau khõ Yehowa, fitu bongi wa’ara. (Moz. III. 23, 34).

13 Ba sumange nitunu nibe’emi sumange nifatõrõ ba galitõ, samohua khõ Yehowa, ba feledõlu nono zaŵi, si matua, ba dua geu mbiribiri si matua, ba feleõfa nono mbiribiri, si dõfi fa’ebua; ba si lõ sala.

14 Ba nifao ba da’õ, sumange ni’ā, ba hamo si sõkhi, nifaruka fanikha, sarasara ono zaŵi andrõ, si feledõlu, ba duadua dumba, ba sagesageu biribiri si matua, ba tõlutõlu hinaoya,

15 ba sarasara ono mbiribiri andrõ, si feleõfa, ba tõlutõlu kata.

16 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ ba sumange ni’ā ba sumange nibadu, nifao ba da’õ.

17 Ba mahemolu õ, ba felendrua rozi nono zaŵi, si matua, ba dua geu mbiribiri si matua, ba feleõfa rozi nono mbiribiri, si dõfi fa’ebua, si lõ sala,

18 awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

19 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ ba sumange ni’ā andrõ ba sumange nibadu, nifao ba da’õ.

20 Ba mahemolu õ, ba felezara rozi nono zaŵi, ba dua geu mbiribiri si matua, ba feleõfa nono mbiribiri si lõ sala,

21 si dõfi fa’ebua, awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

22 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ, ba sumange ni’ā andrõ ba sumange nibadu, nifao ba da’õ.

23 Ba mahemolu õ, ba fulu rozi nono zaŵi, ba dua geu mbiribiri si matua ba feleõfa rozi nono mbiribiri, si lõ sala, si dõfi fa’ebua,

24 awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

25 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ ba sumange ni’ā andrõ ba sumange nibadu, nifao ba da’õ.

26 Ba mahemolu õ, ba siŵa rozi nono zaŵi, ba dua geu mbiribiri si matua ba feleõfa rozi nono mbiribiri, si lõ sala, si dõfi fa’ebua,

27 awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

28 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ, ba sumange ni’ā andrõ ba sumange nibadu, nifao ba da’õ.

29 Ba mahemolu õ, ba ŵalu rozi nono zaŵi ba dua geu mbiribiri si matua ba feleõfa rozi nono mbiribiri, si lõ sala ba si dõfi fa’ebua,

30 awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

31 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ, ba sumange ni’ā andrõ ba sumange nibadu, nifao ba da’õ.

32 Ba mahemolu õ, ba fitu rozi nono zaŵi ba dua geu mbiribiri si matua ba feleõfa nono mbiribiri, si lõ sala, si dõfi fa’ebua,

33 awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

34 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ, ba sumange ni’ā andrõ ba sumange nibadu, nifao ba da’õ.

35 Ba na luo si ŵalu, ba owulo ami; ba lõ tola mihalõ hadia ia halõŵõ ba da’õ. (Moz. III. 23, 36).

36 Ba sumange nitunu, nibe’emi sumange nifatõrõ ba galitõ, samohua khõ Yehowa, ba sara nono zaŵi ba sageu mbiribiri si matua, ba fitu rozi nono mbiribiri, si lõ sala, si dõfi fa’ebua,

37 awõ zumange ni’ā andrõ ba sumange nibadu, nifao ba da’õ, ba nono zaŵi andrõ ba ba mbiribiri si matua ba ba nono mbiribiri andrõ, dali wa’oya, balazi nifakhoi andrõ.

38 Ba baero õ, ba sageu nambi si matua, sumange fameta horõ, lõ lai zumange nitunu andrõ, sero ma’õkhõ, ba sumange ni’ā andrõ ba sumange nibadu, nifao ba da’õ.

39 Da’õ zumange nibe’emi khõ Yehowa, na baŵa gowasa andrõ khõmi, baero nibe’emi sumange nitunu ba sumange ni’ā ba sumange nibadu ba sumange fangorifi, he na ba wanõrõ amabu’ula li, ba he na saoha gõlõ.

 

SURA MOZE IV.

Faza 30

I. Amakhoita ba gamabu’ula li ndra matua. II. Ba gamabu’ula li nono alawe ba ba gamabu’ula li zi no muhalõ. III. Ba gamabu’ula li lakha mbanua ba ba gamabu’ula li nitibo’õ ndra matua.

 

1 I. Ba ibe’e li ba Ndraono Gizeraëli Moze, dali manõ niŵa’õ Yehowa khõ Moze.

2 Ba humede Moze ba zatua mado Ndraono Gizeraëli, imane: Da’õ ia, ni’oroi’õ Yehowa.

3 Na so zamabu’u linia khõ Yehowa, ma na mõi ba hõlu, wamabu’u famoni hadia ia, ba lõ tola ifuli linia, yamutõrõ sibai niŵa’õnia andrõ. (Moz. III. 27, 2. Moz. V. 23, 21. Sin. 50, 14).

 

4 II. Ba na ono alawe zamabu’u linia khõ Yehowa, na ifabu’u wamoni hadia ia, fatua ono alawe na ia baomo namania,

5 ba na irongo amania gamabu’ula linia ba famoni andrõ, nifabu’unia, ba na lõ hedehedenia, ba tebai awu’a gamabu’ula linia fefu, ba famoninia fefu, nifabu’unia, ba tebai awu’a.

6 Ba na itenaŵa ia amania, na luo irongo, ba si lõ’õ gamabu’ulania fefu, awõ wamoni andrõ, nifabu’unia; ba ibe’e aefa zalania Yehowa, me no amania zanenaŵa ya’ia.

7 Ba na lahalõ ia lõ mutõrõ gamabu’ula li, ba ma hadia niŵa’õnia, si lõ mu’odõdõgõ sibai, wamabu’u hadia ia,

8 ba na irongo sangai ya’ia, ba na lõ hedehedenia ba da’õ, na luo irongo, ba lõ awu’a gamabu’ula linia, ba famoninia andrõ, nifabu’unia, ba lõ awu’a.

9 Ba na itenaŵa ia fo’omonia, na luo irongo, ba amaedola zi lõ’õ gamabu’ula li andrõ, si lõ mutõrõ na, ibe’e, awõ niŵa’õnia andrõ, si lõ mu’odõdõgõ sibai, wamabu’u hadia ia, ba ibe’e aefa zalania Yehowa.

 

10 III. Ba amabu’ula li zi no mate donga ba amabu’ula li ndra alawe nitibo’õ, fefu nifabu’ura, ba lõ awu’a khõra.

11 Ba na baomo wo’omonia ifabu’u linia, ma si mõi ba hõlu, wamabu’u hadia ia wamoni, ba na irongo fo’omonia,

12 ba na lõ hedehedenia ba da’õ, ba na lõ itenaŵa ia, ba tebai awu’a gamabu’ula linia fefu, ba famoni andrõ fefu, nifabu’unia, ba tebai awu’a.

13 Ba na awu’a ibe’e fo’omonia, na luo irongo nifabu’u andrõ, ba amaedola zi lõ’õ fefu niŵa’õnia, he na amabu’ula li, ba he na famoni nifabu’unia; no si lõ’õ ibe’e fo’omonia, andrõ wa ibe’e aefa zalania Yehowa.

14 Fefu gamabu’ula linia ba fefu wamabu’unia famoni, ba wamakao ya’ia, si no mõi ba hõlu ia, ba fo’omonia zangila mame’e aró, ba fa’omonia gõi zangila mame’e si lõ’õ.

15 Na lõ hedehede wo’omonia ba da’õ, ha uga bongi, ba tebai awu’a ibe’e gamabu’ula linia fefu, si lõ mutõrõ na, ba he famoninia fefu; bõrõ wa lõ hedehedenia, me luo irongo; ba da’õ tebai awu’a.

16 Ba na amaedola zi lõ’õ ibe’e, na no irongo mege, ba ihalõ horõnia horõ ndra alawe andrõ ba da’õ.

17 Da’õ gamakhoita, niŵa’õ Yehowa khõ Moze, amakhoita ba ndra matua ba khõ wo’omonia, ba amakhoita khõ nama ba khõ nononia alawe, si lõ muhalõ, si so baomo namania na.

SURA MOZE IV.

Faza 31

I. Lalau mbalõra ba Ndraono Midiano Iraono Gizeraëli. II. Lasala’õ ira si mõi manuwõ mege ba lasala’õ gõi gahulua. III. Lafaosa gahulua. IV. Labe’e zumange Yehowa salaŵa.

 

1 I. Ba humede Yehowa khõ Moze, imane:

2 Lau mbalõ Ndraono Gizeraëli ba Ndraono Midiano andrõ; ba na aefa da’õ, ba ni’orudugõ khõ ndra tuau ndra’ugõ. (F. 25, 17).

3 Ba humede Moze ba zato, imane: Mi’a’aro’õ niha, banuami ba wanuwõ, ena’õ lasuwõ Ndraono Midiano andrõ, ba wolau balõ Yehowa ba Ndraono Midiano.

4 Dozi mado Ndraono Gizeraëli, ba hõnõhõnõ zambusambua mado mifatenge ba wanuwõ andrõ.

5 Ba latutuyu ba ngahõnõ Ndraono Gizeraëli hõnõhõnõ zambusambua mado, ni’a’aro’õ ba wanuwõ andrõ, felendrua ngahõnõ fefu.

6 Ba ifatenge ira ba wanuwõ Moze, hõnõhõnõ zambusambua mado; ba ifao khõra Wineha andrõ, ono Geleazari andrõ, ba wanuwõ; solohe fakake ni’amoni’õ andrõ da’õ, ba torofe fangekhugõ niha.

7 Ba mõi ira manuwõ Iraono Midiano, dali niŵa’õ Yehowa khõ Moze, ba labunu fefu motõi matua.

8 Ba he razo ba Ndraono Midiano ba labubunu, awõ ni’õ’õtõra andrõ, ya’ia Ewi andrõ ba Dekemi ba Suri ba Huri ba Reba, razo Ndraono Midiano, si dalima; ba he Bileamo andrõ, ono Mbeori, ba labunu bawa zi’õli. (Yos. 13, 21).

9 Ba lara’u ndra alawe Ndraono Midiano Iraono Gizeraëli, fabaya iraono sawuyu khõra, ba la’ohe, ba urifõra sonoro fefu ba urifõra bõ’õ fefu, awõ nibayabayara fefu, ba la’ohe, ahuluara.

10 Ba banuara ba nahiara fefu, ba osera fefu, ba latunu.

11 Ba lahalõ fefu nihalõra andrõ, ahulua andrõ fefu, he niha, ba he urifõ,

12 ba la’ohe khõ Moze niha andrõ, nira’ura ba ahulua bõ’õ, awõ nibayabaya andrõ, nihalõra, ba khõ Geleazari ere ba ba Ndraono Gizeraëli sato, ba golombaseŵa ba zalo’o tanõ Ndraono Moabi ba ndraso Yoridano, ba gamaudu Yerikho.

 

13 II. Ba lafaondragõ ira ira Moze Eleazari ere ba satua mbanua fefu, baero golombaseŵa.

14 Ba mofõnu Moze ba zolohe sanuwõ, ba gumandra zi hõnõ ba ba gumandra zi otu, si oroi, manuwõ.

15 Imane khõra Moze: Hadia, no ahori mi’orifi ndra alawe?

16 No ya’irá mbõrõ wangerogõ Ndraono Gizeraëli Yehowa, me no iŵa’õ khõra Bileamo andrõ, ba Weoro andrõ, tobali itõrõ mbanua Yehowa famakao. (F. 25, 1. Fet. II. 2, 15. Fam. 2, 14).

17 Ba mibunu fefu motõi matua ba ndraono andrõ, ba dozi ira alawe ba zi no orudu ira matua, ba mibunu; (Sanguhuk. 21, 11);

18 ba dozi ono alawe ba zi lõ irai orudu ira matua, ba mi’orifi khõmi.

19 Ba ya’ami, ba fitu bongi mi’iagõ baero golombaseŵa; dozi ami si no mamunu niha ba si no mombambaya nibunu, ba na luo si tõlu ba na luo si fitu, ba misala’õ ami, fabaya ni’ohemi andrõ, nirabu. (F. 19, 11).

20 Ba si manõ gõi nukha fefu ba gamagama uli zaŵi ba gamagama bu mbiribiri fefu ba fakake eu fefu, misala’õ.

21 Ba imane Eleazari ere ba zabõlõ andrõ, si no mõi manuwõ mege: Da’õ goroisa andrõ, ni’oroi’õ Yehowa khõ Moze.

22 Ba ana’a ba firõ ba tõla ba si’õli ba simo mbanua ba simo itõ,

23 fefu hadia ia zanaha ba galitõ, ba mifatõrõ ba galitõ, ba aheta wa’ara’iõnia; hatõ fanasa ya’ia ba nidanõ fangehao andrõ. Ba fefu hadia ia zi lõ manaha ba galitõ, ba ba nidanõ mifatõrõ.

24 Ba na no mibabago nukhami, na luo si fitu andrõ, ba no aheta wa’ara’iõmi, ba tola sa’ae mifuli ami ba golombaseŵa.

 

25 III. Ba humede Yehowa khõ Moze, imane:

26 Ofaya fefu ha wa’oya gahulua andrõ, nihalõ, he niha, ba he urifõ, ya’ugõ ba Eleazari ere ba satua mbanua.

27 Ba si matonga, ba õbe’e ba zi no fao ba wanuwõ, si no mõi mege, ba si matonga, ba ba zato. (Sam. I. 30, 24).

28 Ba ba zanuwõ andrõ, si no mõi mege, ba õhalõ mbeo, khõ Yehowa, sambua ba zi 500, he niha ba he saŵi ba he kalide ba he biribiri.

29 Ba zi matonga tána khõra mihalõ ba mibe’e ba danga Geleazari ere, sumange fegero khõ Yehowa.

30 Ba ba zi matonga ba Ndraono Gizeraëli, ba sambusambua õtutuyu ba zi limalima wulu, he niha ba he saŵi ba he kalide ba he biribiri — urifõ andrõ fefu —, ba õbe’e ba danga nono Lewi, sangaingai halõŵõ andrõ ba nose Yehowa.

31 Ba la’o’õ niŵa’õ Yehowa khõ Moze ira Moze Eleazari ere.

32 Ba fa’oya gahulua andrõ, si tosai ahulua zanuwõ andrõ, ba no 675,000 nga’eu mbiribiri,

33 ba 72,000 zaŵi,

34 ba 61,000 galide:

35 ba ba niha, ba fa’ato nono alawe andrõ, ba zi lõ irai orudu ira matua, ba no 32,000 niha.

36 Ba si matongania andrõ, tána ba zi no mõi manuwõ, ba 337,500 mbiribiri,

37 ba beo khõ Yehowa, biribiri andrõ, ba no 675 nga’eu, ba 36,000 zaŵi, 38 ba beo da’õ khõ Yehowa, ba 72 nga’eu, ba 30,500 galide,

39 ba beo da’õ khõ Yehowa, ba 61 nga’eu;

40 ba 16,000 niha ba beo da’õ khõ Yehowa, ba 32 niha.

41 Ba beo andrõ, nibe’e sumange fegero khõ Yehowa, ba ibe’e ba danga Geleazari ere Moze, dali niŵa’õ Yehowa khõ Moze.

42 Ba ba zi matongania andrõ, tána ba Ndraono Gizeraëli, ni’oniagõ Moze ba dána ba zanuwõ andrõ,

43 (ba dána ba zato, si matonga andrõ, ba no 337,500 mbiribiri,

44 ba 36,000 zaŵi,

45 ba 30,500 galide,

46 ba 16,000 niha), —

47 ba zi matonga andrõ, tána ba Ndraono Gizeraëli, ba itutuyu Moze, sambusambua ba zi limalima wulu, he niha, ba he urifõ, ba ibe’e ba danga nono Lewi, sangaingai halõŵõ andrõ ba nose Yehowa, dali niŵa’õ Yehowa khõ Moze.

 

48 IV. Ba la’ondrasi Moze kumandra nghahõngahõnõ zanuwõ andrõ, kumandra zi hõnõ ba kumandra zi otu, lamane khõ Moze:

49 No la’ofaya wa’ato zanuwõ andrõ ni’ohema, enonimõ, ba samõsa lõ nirongoma si lõ’õ;

50 andrõ mabe’e zumange Yehowa, fangandrõ nosoma khõ Yehowa, hadia nihalõ zamõsana ahulua gamagama ana’a ba kõla ba tõla gasa ba laeduru ba saeru dalinga ba aya bõ’õ.

51 Ba lahalõ khõra gana’a andrõ ira Moze Eleazari ere — hadia ia ngawalõ naya —.

52 Ba fa’ebua gana’a andrõ, nibe’era sumange si no amaedola wegero khõ Yehowa, ba no 16,750 sekeli; nibe’e gumandra zi hõnõ ba kumandra zi otu.

53 Ba sanuwõ sato, ba no oi zara morabu gõi:

54 Ba lahalõ gana’a andrõ khõ gumandra zi hõnõ ba khõ gumandra zi otu ira Moze Eleazari ere, ba labe’e ba nose wama’ele’õ, ena’õ itõrõtõrõ tõdõ Yehowa Ndraono Gizeraëli.

SURA MOZE IV.

Faza 32

I. La’andrõ khõra danõ yefo Yoridano mado Rubeno ba mado Gado. Fanimba Moze. II. Na latolo ua nawõra, ba latehe khõra ba ba zi matonga mado Manase danõ andrõ. Lahalõ khõra.

 

1 I. Ba ba mado Rubeno ba ba mado Gado, ba no oya sibai gurifo, no fahõna. Ba me no lafaigi danõ Ya’ezeri andrõ ba tanõ Gileadi, ba la’ila, sõkhi sibai tanõ zoya urifõ danõ andrõ.

2 Ba so ira, mado Gado ba mado Rubeno, lamane khõ ndra Moze Eleazari ere ba ba zatua mbanua:

3 Ataroto andrõ ba Dibona ba Ya’ezeri ba Nimera ba Eleale ba Sebama ba Nebo ba Beono,

4 tanõ andrõ, nitolo Yehowa Iraono Gizeraëli, ba wame’e barõ mbawara, ba no sõkhi sibai tanõ zoya urifõ, ba no soya urifõ zawuyumõ andre.

5 Ba lamane na: Na no atõ falukha ndra’aga wa’ebua dõdõu, ba he wisa na tetehe ba zawuyumõ andre danõ da’õ, khõra ba ba nga’õtõra mitou; bõi fa’õtõ ba Yoridano ndra’aga!

6 Ba imane Moze ba mado Gado andrõ ba ba mado Rubeno: Hana, si mõi manuwõ dalifusõmi, ba si iagõ da’e ami?

7 Hana wa mibe’e ata’u dalifusõmi, we’amõi miyefo ba danõ andrõ, nibe’e Yehowa khõra?

8 Si manõ sibai wolau ndra amami mege, me ufatenge ira no, i’otarai Gadesi Mbarenea, ba wamaigi tanõ andrõ.

9 Me no larugi ndraso Esikoli, ba lafeta’u Ndraono Gizeraëli, tobali lõ edõna mõi ira ba danõ andrõ, nibe’e Yehowa khõra. (F. 13, 24).

10 Ba me luo da’õ, ba mofõnu Yehowa, ba fahõlu ia, imane:

11 Niha andrõ, si otarai danõ Miserayi, si no dua wulu fakhe ba si a’a moroi andrõ, ba bõi yala’ila danõ andrõ, nifabu’ugu khõ ndra Aberahamo, Iza’aki, Yakobo, fahõlusa, me no lõ ni’oigõra tõdõra wolo’õ khõgu,

12 baero Galebi andrõ, ono Yefune, ma’uwu Geni andrõ, ba Yosua, ono Nuni, me no ya’ira zolo’õ sibai khõgu. (Yos. 15, 17).

 

13 Ba mofõnu Yehowa ba Ndraono Gizeraëli; ba ifangõrõngõrõ ira ba danõ si mate, õfa wulu fakhe wa’ara, erege noahori mate zi sagõtõ niha andrõ, si no mosala khõ Yehowa.

14 Ba iada’e, ba no maoso ami, fangali ndra namami, madou zamazõkhi horõ, ba wondrou’õ na fõnu Yehowa andrõ ba Ndraono Gizeraëli, si no to’ua abõlõbõlõ.

15 Ba na mi’erogõ ia, ba iradõ na ira ba danõ si mate, ba mibe’e tekiko ira fefu.

16 Ba la’ondrasi ia, ba lamane: Damafazõkhi kandra mbiribiri ba da’e, nahia gurifõma andrõ, ba mataru’õ mbanua nahia [wo’omoma ba nahia], ndraono suwuyu khõma;

17 ba ya’aga, ba ma’aro’õ ndra’aga, ba fõna Ndraono Gizeraëli soga, irege no ma’ohe ira ba nahara; ba ba mbanua saro la’iagõ [fo’omoma ba] iraono sawuyu khõma, bõrõ niha ba danõ andrõ, [si fa’emali khõda].

18 Lõ mangawuliga ba nahiama, irege no mõi ba Ndraono Gizeraëli fefu dána khõra andrõ, tanõ.

19 Lõ’õ sa manema ndra’aga tána khõma, awõra, yefo Yoridano, no tána khõma danõ tánõ ba gatumbukha luo, i’otarai Yoridano.

 

20 II. Ba imane khõra Moze: Na mimanõ, na mi’aro’õ ami, fõna Yehowa, ba wanuwõ, (Yos. 1, 12),

21 ba na mi’õtõ Yoridano, fõna Yehowa, dozi ami, si no mangaro, irege no itimba fõnania zi fa’udu khõnia, ba na awena dania mifuli ami,

22 na no ibe’e barõ mbawania danõ Yehowa, ba aefa ami ba khõ Yehowa ba ba Ndraono Gizeraëli, ba taná khõmi dania danõ andre, dali zomasi Yehowa.

23 Ba na tenga si manõ wolaumi, ba mosala ami ba da’õ khõ Yehowa, ba mi’ila dania hadia zi gõna ami, ba lalõmi andrõ.

24 Mitaru’õ khõmi mbanua, nahia [wo’omomi ba nahia] ndraono sawuyu khõmi, ba mifazõkhi kandra mbiribirimi ba mi’o’õ niŵa’õgu khõmi.

25 Ba latema li Moze mado Gado ba mado Rubeno, lamane: La’a’õ niŵa’õu sawuyumõ, ya’ugõ Tua!

26 Iraono sawuyu khõma ba fo’omoma, ba urifõma, numalõ urifõma sonora fefu, ba hana na torõi furi ba da’e, ba mbanua Gileadi andre.

27 Ba ya’aga sawuyumõ andre, ba ma’õtõ Yoridano fõna Yehowa, ba wanuwõ, ha wa’ato ndra’aga, si no mangarõ, si mane niŵa’õu, ya’ugõ Tua.

28 Ba ibe’e li Moze khõ Geleazari ere ba khõ Yosua, ono Nuni ba ba zatua mado Ndraono Gizeraëli, ba khõra andrõ; imane khõra Moze:

29 Na no mõi miyefo Yoridano mado Gado ba mado Rubeno, awõmi, fõna Yehowa, ba wanuwõ, ha wa’ato ira, si no mangaró, ba na no mube’e barõ mbawami danõ, ba mibe’e khõra danõ Gileadi, tána khõra ba ba nga’õtõra mitou.

30 Ba na lõ fao ira khõmi miyefo, si no mangaró ba wanuwõ, ba ba danõ Gana’ana tefataro ira, ba ngaimi.

31 Ba lamane mado Gado ba mado Rubeno: Hadia niŵa’õ Yehowa ba khõma, ya’aga, sawuyumõ andre, ba ma’o’õ.

32 Mangaró ndra’aga ba mõiga miyefo ba danõ Gana’ana, fõna Yehowa, ena’õ lõ tebulõ khõma dána khõma ba zi tambai Yoridano.

33 Ba ibe’e khõra Moze –– ba mado Gado ba ba mado Rubeno ba ba zi matonga mado Manase, ono Yosefo — ibe’e khõra, ba amatõrõŵa Zihona andrõ, razo Ndraono Gamori, awõ gamatõrõŵa Ogi andrõ, razo Mbazana, tanõ andrõ, fabaya banua ba danõ, awõ mbenuara, banua ba danõ misa. (Moz. V. 3, 12).

34 Ba mado Gado andrõ, ba lafuli lataru’õ Dibona ba Ataroto ba Aroëri, 35 ba Ateroti Zofana ba Ya’ezeri ba Yogebeha,

36 ba Beti Nimera ba Beti Harana, banua saró, awõ kandra mbiribiri.

37 Ba mado Rubeno, ba lafuli lataru’õ Hesibona ba Eleale ba Kiriata’i,

38 ba Nebo ba Ba’ali Meono, nifalalini tõi, ba Sibema; ba banua andrõ nifulira fanaru’õ, ba lafotõi si bohou.

39 Ba iraono Makhiro andrõ, ono Manase, ba ba Gileadi mõi, ba lahalõ khõra, latimba Ndraono Gamori, banua si tohõna andrõ.

40 Ba itehe khõ Makhiro, ono Manase, Gileadi andrõ Mose, ba ibali’õ banuania.

41 Ba Ya’iro andrõ, ono Makhiro, ba mõi mu’okhõgõ halama soya khõra, ba ibe’e tõinia halama soya khõ Ya’iro. 42 Ba Noba andrõ, ba mõi mu’okhõgõ Genata, fabaya halama soya khõra, ba tõinia Noba andrõ ibe’e tõi.

 

SURA MOZE IV.

Faza 33

I. Olombaseŵa Ndraono Gizeraëli. II. Oroisa ba wangai khõra tanõ Gana’ana, ba wanimba Dawa Gana’ana.

 

1 I. Da’e dõrõŵa Ndraono Gizeraëli, nitõrõra, me la’otarai danõ Miserayi, me solohe ndra Moze A’aroni.

2 Ba itanõ ba zura Moze mbanua andrõ si ota’otarai ira wofanõfanõ, i’o’õ niŵa’õ Yehowa; ba da’e dõroŵara i’ota’otarai nahia si sambua, numalõ ba zi sambua.

3 Ba Ramesi la’otarai wofanõ, me tuli ba mbaŵa si fõfõna. Sara wongi aefa wasa mangefa Ndraono Gizeraëli; no mangaró, ba zanehe Ndrawa Miserayi fefu, (Moz. II. 12, 37),

4 me lako’oko’o Dawa Miserayi ndraono si a’a andrõ fefu, nibunu Yehowa khõra; noa sa i’oroma’õ ba Lowalangira wa’abõlõnia Yehowa.

5 Ba mangefa Ndraono Gizeraëli ba Ramesi, ba ba Zukota molombase.

6 Ba laheta ira ba Zukota ba ba Getama molombase, ba zinga danõ si mate (Moz. II. 13, 20).

7 Ba laheta ira ba Getama ba lasaŵa Wi-Hahiroti, tánõ ba gatumbukha luo i’otarai Mba’ali Zefono, ba ba Migidola molombase. (Moz. II. 14, 2).

8 Ba laheta ira ba Wi-Hahiroti, ba la’õtõ nasi andrõ, miyefo ba danõ si mate, ba tõlu ngaluo fofanõ mowaõwaõ ba danõ si mate ba Getama, ba ba Mara molombase. (Moz. II. 15, 23).

9 Ba laheta ira ba Mara, ba larugi Gelima; ba ba Gelima andrõ, ba felendrua gumbu nidanõ ba fitu ngafulu nga’eu dõla khorema, ba molombase ira ba da’õ. (Moz. II. 15, 27).

10 Ba laheta ira ba Gelima, ba ba mbewe nasi zukhu molombase.

11 Ba laheta ira ba mbewe nasi zukhu, ba ba danõ si mate Sini molombase. (Moz. II. 16, 1).

12 Ba laheta ira ba danõ si mate Sini, ba ba Dofeka molombase.

13 Ba laheta ira ba Dofeka, ba ba Galusi molombase.

14 Ba laheta ira ba Galusi, ba ba Rafidi molombase; ba lõ õ zato idanõ ba da’õ. (Moz. II. 17, 1).

15 Ba laheta ira ba Rafidi, ba ba danõ si mate ba gahe hili Zina’i molombase.

16 Ba laheta ira ba danõ si mate ba gahe hili Zina’i, ba ba niko’o solu’alu’a andrõ molombase. (F. 11, 34).

17 Ba laheta ira ba niko’o solu’alu’a, ba ba Haseroti molombase.

18 Ba laheta ira ba Haseroti, ba ba Ritima molombase.

19 Ba laheta ira ba Ritima, ba ba Rimo Waresi molombase.

20 Ba laheta ira ba Rimo Waresi, ba ba Libena molombase.

21 Ba laheta ira ba Libena, ba ba Risa molombase.

22 Ba laheta ira ba Risa ba ba Gehelata molombase.

23 Ba laheta ira ba Gehelata, ba ba gahe hili Zaferi molombase.

24 Ba laheta ira ba gahe hili Zaferi, ba ba Harada molombase.

25 Ba laheta ira ba Harada, ba ba Makeloti molombase.

26 Ba laheta ira ba Makeloti, ba ba Dahata molombase.

27 Ba laheta ira ba Dahata, ba ba Dara molombase.

28 Ba laheta ira ba Dara, ba ba Mitika molombase.

29 Ba laheta ira ba Mitika, ba ba Hasimona molombase.

30 Ba laheta ira ba Hasimona, ba ba Mozeroti molombase.

31 Ba laheta ira ba Mozeroti, ba ba Mbene Ya’aka molombase. (Moz. V. 10, 6). 32 Ba laheta ira ba Mbene Ya’aka, ba ba Hori Hagidigada molombase.

33 Ba laheta ira ba Hori Hagidigada, ba ba Yotabata molombase.

34 Ba laheta ira ba Yotabata, ba ba Gaberona molombase.

35 Ba laheta ira ba Gaberona, ba ba Gesionogeberi molombase.

36 Ba laheta ira ba Gesionogeberi, ba ba danõ si mate Sini molombase, ya’ia ba Gadesi andrõ. (F. 20, 1).

37 Ba laheta ira ba Gadesi, ba ba gahe hili Hori molombase, ba nola danõ Ndraono Gedomo.

38 Ba mõi miyaŵa ba hili Hori andrõ Ga’aroni ere, niŵa’õ Yehowa, ba mate ia ba da’õ, õfa wulu fakhe dania aefa wa’aheta Ndraono Gizeraëli ba danõ Miserayi; me tesa’a lõ faoro ba mbaŵa si lima (F. 20, 25).

39 No otu a dua wulu a tõlu fakhe Ga’aroni, me mate ia ba hili Hori andrõ.

40 Ba irongo so moroi sa Ndraono Gizeraëli Dawa Gana’ana andrõ, razo Garadi, ba danõ Gana’ana tánõ raya. (F. 21, 1).

41 Ba laheta ira ba gahe hili Hori, ba ba Zalomona molombase.

42 Ba laheta ira ba Zalomona, ba ba Wuno molombase.

43 Ba laheta ira ba Wuno, ba ba Gobota molombase.

44 Ba laheta ira ba Gobota, ba ba Iye Abari molombase, ba danõ Ndraono Moabi.

45 Ba laheta ira, ba Iye Abari, ba ba Dibona Gado molombase.

46 Ba laheta ira ba Dibona Gado, ba ba Galimona Dibelata’i molombase.

47 Ba laheta ira ba Galimona Dibelata’i ba ba gahe hili Gabari molombase, tánõ ba gatumbukha, i’otarai Nebo.

48 Ba laheta ira ba gahe hili Gabari, ba ba zalo’o tanõ Ndraono Moabi molombase, ba ndraso Yoridano, ba gamaudu Yerikho.

49 Ba ndraso Yoridano molombase ira, i’otarai Mbeti Hayezimota, irugi Habeli Hasili, ba zalo’o tánõ Ndraono Moabi andrõ.

 

50 II. Ba humede Yehowa khõ Moze ba zalo’o tanõ Ndraono Moabi andrõ, ba ndraso Yoridano ba gamaudu Yerikho, imane:

51 Hede ba Ndraono Gizeraëli, ba õmane khõra: Na no mi’õtõ Yoridano, na no mirugi danõ Gana’ana,

52 ba mitimba fõnami fefu niha ba danõ, ba adura, ba ahori mifufu: adura nifahele gõi fefu mirasa, ba hilihili andrõ khõra fefu, ba midudugõ. (Moz. V. 7, 5).

53 Ba mi’okhõgõ danõra ba ba da’õ so ami: noa sa ube’e khõmi danõ andrõ, ena’õ ya’ami zokhõ.

54 Ba fadahõdahõsa wamaosa tanõ, sambusambua mado; ba zato niha, ba ebolo labe’e tána khõ tanõ, ba ba zambõ niha, ba si õna’õna labe’e. Heza zi gõna dahõdahõ khõnia, da’õ tána ba zamõsana; ba zi sambusambua mado tebe’e tána khõ danõ. (Yos. 14, 2).

55 Ba na lõ mitimba fõnami niha ba danõ andrõ, ba tobali doi ba hõrõmi nisaigõmi andrõ ba zuzumõ ba ngaimi, ba lafakao dania ami ba danõ andrõ, ba zi so ami, (Sanguhuk. 2, 3),

56 ba khõmi dania ufatõrõ zi so ba dõdõgu, nifatõrõgu khõra mena’õ.

 

SURA MOZE IV.

Faza 34

 

I. Ola danõ Gana’ana. II. He wisa wamaosa tanõ.

 

1 I. Ba humede Yehowa khõ Moze, imane:

2 Be’e li ba Ndraono Gizeraëli, õmane khõra: Na mirugi danõ Gana’ana andrõ, ba tanõmi dania da’õ, si mõi khõmi ba ba nga’õtõmi mitou: tanõ Gana’ana andrõ, ma’asagõrõ.

3 Ola tánõ raya, ba i’otarai danõ si mate Sini mibe’e, sangehene tanõ Ndraono Gedomo; bõrõta nola raya tánõ ba gatumbukha luo, ba balõ zilua’asi nasio.

4 Ba itõrõ raya Akerabi olami andrõ, isaŵa misa Zini, ba tetohugõ, irugi mbalõnia, raya Gadesi Mbarenea. Ba numalõ ba Hasara Adara, ba misa ba Asemona.

5 Ba moroi ba Asemona, ba ituturu mbombo Miserayi andrõ, irege ba mbewe nasi aetu.

6 Ba ola tánõ ba gaekhula luo khõmi, ba asi sebua andrõ; da’õ nolami tánõ ba gaekhula.

7 Ba olami tánõ yõu, ba i’otarai nasi sebua, numalõ ba hili Hori mibe’e ia;

8 ba i’otarai hili Hori, ba mirugi lala ba Hamata, ba balõ nola, ba Sedadi.

9 Ba itõrõ Ziferono, ba irugi Hasara Enana, balõnia. Da’õ nolami tánõ yõu.

10 Ba ola tánõ ba gatumbukha luo nibe’emi, ba i’otarai Hasara Enana ba isaŵa Zefama.

11 Ba i’otarai Zefama, ba numalõ mitou ba Haribela, tánõ ba gatumbukha, i’otarai Ga’ini; ba numalõ mitou na ba ihene mboto hili andrõ, tánõ ba gatumbukha i’otarai mbaŵa Kinereti.

12 Ba numalõ mitou ba mbewe Yoridano nola, irugi zilua’asi nasio, balõnia. Da’õ nola danõmi, fasui.

13 Ba ibe’e li ba Ndraono Gizeraëli Moze, imane: Da’õ danõ andrõ, nifosasi khõmi, tána khõmi, balazi dahõdahõ, niŵa’õ Yehowa, nibe’e ba zi siŵa mado a matonga andrõ.

14 Ba mado Rubeno andrõ, fatalifusõta andrõ khõra, ba mado Gado, fatalifusõta andrõ khõra, ba si matonga mado Manase, ba no latema dána khõra.

15 Si dombua mado a motonga, ba yefo Yoridano tánõ ba gatumbukha, ba gamaudu Yerikho no latema dána khõra.

 

16 II. Ba humede Yehowa khõ Moze, imane:

17 Da’õ dõi zamaosa tanõ khõmi: Eleazari ere andrõ ba Yosua, ono Nuni.

18 Ba samõsamõsa zambusambua mado miŵa’õ awõra, salaŵa, ba wamaosa tanõ andrõ.

19 Ba da’õ dõi da’õ: Ba mado Yuda, ba Kalebi andrõ, ono Yefune.

20 Ba ba mado Zimeoni, ba Samueli, ono Gamihudi.

21 Ba ba mado Mbeniyami, ba Elidado, ono Giselono.

22 Ba salaŵa ba mado Dano, ba Buki, ono Yogelisi.

23 Ba ba ndraono Yosefo andrõ: salaŵa ba mado Manase, ba Haniëli, ono Gefodi.

24 Ba salaŵa ba mado Geferayi, ba Kemuëli, ono Zifetano.

5 Ba salaŵa ba mado Zebuloni, ba Elisafa, ono Waranakhi.

26 Ba salaŵa ba mado Isasari, ba Falatiëli, ono Gasana.

27 Ba salaŵa ba mado Gaseri, ba Ahihudi, ono Zelomi.

28 Ba salaŵa ba mado Nafetali, ba Fedaheli, ono Gamihudi.

29 Da’õ ira, ba niŵa’õ Yehowa famaosa ba Ndraono Gizeraëli tána khõra ba danõ Gana’ana andrõ.

SURA MOZE IV.

Faza 35

I. Banua Nono Lewi andrõ. II. Banua fangorifi. III. He lawisa ba zange’e.

 

1 I. Ba humede Yehowa khõ Moze, ba zalo’o tanõ Ndraono Moabi andrõ, ba ndraso Yoridano, ba gamaudu Yerikho, imane:

2 Be’e li ba Ndraono Gizeraëli, ena’õ latehe banua Nono Lewi, nahiara, mbanua tána khõra õsa; ba ba mbanua andrõ ba Nono Lewi, ba mifao mbenua si tefasui ya’ira, nidudura urifõ. (Yos. 21, 2).

3 Ba banua andrõ, ba nahiara, ba benua, ba ba gurifõra sonoro ba ba ngawalõ gurifõra bõ’õ.

4 Ba benua andrõ ba zinga mbanua, nitehemi ba Nono Lewi, ba hõnõ hela wa’ebolo, i’otarai gõli mbanua fasui, mibe’e.

5 Ba misu’a baero mbanua, tánõ ba gatumbukha, ba 2000 hela, ba si manõ gõi tánõ raya, 2000 hela, ba tánõ ba gaekhula luo 2000 hela ba tánõ yõu 2000 hela, ba dalu bakha so mbanua. Da’õ mbenua khõra, ba zinga mbanua, nidudura urifõra.

6 Ba ba mbanua adrõ nitehemi ba Nono Lewi, ba õnõ mitehe banua fangorifi, ena’õ ba da’õ isaŵa woloi si no mamunu niha; ba 42 na baero õ mitehe khõra. 7 Fa’oya mbanua fefu, nitehemi ba Nono Lewi, ba 48 mbanua, awõ mbenua andrõ, nifao ba da’õ.

8 Mado Ndraono Gizeraëli sato niha, ba oya latehe banua tána khõra, ba sambõ fa’ato, ba fa’onaigõ; balazi wa’ebolo danõ, nibe’e khõra, tána khõra, ba wamaigi ha uga mbanua, nitehe zi sambua mado ba Nono Lewi.

 

9 II. Ba humede Yehowa khõ Moze, imane:

10 Hede ba Ndraono Gizeraëli ba õmane khõra: Na no mi’õtõ Yoridano, na no mirugi danõ Gana’ana,

11 ba miŵa’õ mbanua si gõna, ena’õ banua fangorifi khõmi; ba da’õ yamusaŵa si no mange’e, si no manunu niha, si lõ mu’odõdõgõ. (Moz. II. 21, 13).

12 Saŵatõ khõmi mbanua andrõ, ba zolau balõ, fa bõi labunu zange’e andrõ, lõ mu’etu’õ huku ba walukhata mbanua.

13 Ba banua fangorifi andrõ, nitehemi, ba õnõ.

14 Tõlu mitehe banua yefo Yoridano ba tõlu gõi ba danõ Gana’ana. Banua fangorifi dania. (Moz. V. 4, 41. Yos. 20, 7).

15 Saŵatõ mbanua andrõ, si õnõ, he ba Ndraono Gizeraëli, ba he ba niha bõ’õ, ba zi fatewu gana ba khõmi, ena’õ ba da’õ lasaŵa dozi si no mamunu niha, si lõ mu’odõdõgõ.

 

16 III. Ba na fakake si’õli wamõzinia ya’ia, wamunu ya’ia, ba no sange’e ia, ba sange’e, ba nibunu gõi. (Moz. II. 21, 12).

17 Ba na no igõnaisi kara, wamunu ya’ia, kara si so ba dangania mege, sikhamõ famunu niha, ba no sange’e, ba nibunu gõi.

18 Ba na no ibõzi fakake eu, wamunu ya’ia, fakake si so ba dangania mege, sikhamõ famunu niha, ba no sange’e ia, ba sange’e, ba nibunu gõi.

19 Ba solau balõ zamunu sange’e andrõ; na fakhamõ ia khõnia, ba yamubunu.

20 Ba na no ituli’õ bõrõ ba watiusa, ba ma na no ihaluni hadia ia, ni’odõdõgõ, wamunu ya’ia, (Moz. V. 19, 11),

21 ba ma na igukhui, bõrõ ba watiusa, wamunu ya’ia, ba nibunu gõi zogukhui ya’ia; no sange’e; solau balõ zamunu sange’e andrõ, na fakhamõ ia khõnia.

22 Ba na no ituli’õ lõ mu’õdõdõgõ, lõ fatiusa, ba ma na no ihaluni hadia ia, lõ mu’odõdõgõ, ma kara,

23 sikhamõ famunu niha, igõnaisi, wamunu ya’ia, ba na lõ si fatiu dõdõnia khõnia, na tenga tõdõnia wolau khõnia si lõ sõkhi,

24 ba banua zamatunõ huhuora sange’e solau balõ,

25 ba ndramu’orifi zange’e andrõ banua, ba zolau balõ andrõ; lafa’ohe’õ mangawuli ia ba mbanua andrõ, nisaŵania woloi, ba wangorifi ya’ia, ba yamu’iagõ da’õ, irege mate gere sebua andrõ, nibayoini fanikha ni’amoni’õ.

26 Ba na iheta ia ba danõ mbanua andrõ, nisaŵania,

27 sauri ia, ba na fakhamõ khõnia zolau balõ, baero danõ mbanua andrõ, saŵatõnia, ba na ibunu dania zange’e andrõ solau balõ, ba lõ horõnia.

28 Sangiagõ banua andrõ saŵatõnia sa zange’e andrõ, irege mate gere sebua, ba na no mate gere sebua, ba tola mangawuli ba dána khõnia zange’e andrõ.

29 Da’õ huku ba khõmi dania, gotõgõtõ wa’ara dania, ba mbanuami fefu.

30 Na so zamunu niha, ba nibunu zange’e andrõ, balazi hadia niŵa’õ zi so ba mbõrõ; ba tebai tebunu niha, na ha samõsa zi so ba mbõrõ. (Moz. V. 19, 15).

31 Ba lõ tõla mitema hõli nosonia ba zange’e, nibunu ena’õ; nibunu sa’ae ia.

32 Ba lõ’õ gõi tola mitema hõli, fa alakha lõ isaŵa mbanua andrõ, sauari ia, fa tola mangawuli ia, fa tola i’iagõ heza ba danõ, fatua lõ si mate gere sebua.

33 Ba bõi mibe’e rai’õ danõ andrõ si so ami; do andrõ, ba ra’iõ danõ ibe’e, ba lõ’õ sa aheta ba danõ zala andrõ, ba ndro andrõ, na tenga ba ndro niha andrõ, same’e aduwa ya’ia.

34 Ba bõi mibe’e ra’iõ danõ andrõ, si so ami, si so ya’odo gõi: ba hunõ Ndraono Gizeraëli sa so ndra’o, ya’odo andre, Yehowa.

SURA MOZE IV.

Faza 36

I. He wisa wame’e nihalõ ono alawe andrõ sanema ondrõita. II. Ono Zelofadi andrõ.

1 I. Ba so zatua nga’õtõ ndraono Gileadi andrõ, ono Makhiro ono Manase, nga’õtõ ndraono Yosefo andrõ; so niŵa’õra khõ Moze ba ba zalaŵa, satua mado Ndraono Gizeraëli, lamane:

2 No iŵa’õ khõu Yehowa, ya’ugõ Tua, dahõdahõ mbalazi ba wame’e ba Ndraono Gizeraëli tána khõra tanõ; ba noa gõi õtema goroisa khõ Yehowa, ya’ugõ Tua, ondrõita niwama Selofadi andrõ, ba õbe’e ba nononia alawe. (F. 27, 7. Yos. 17, 4).

3 Ba na mado Ndraono Gizeraëli bõ’õ zangai ya’ira, ba tobali aefa ba dána khõ niwama dána khõra tanõ andrõ, ba mõi ba dána ba mado andrõ sangai ya’ira, ba te’ambõsi dána khõma andrõ.

4 Ba irugi dania dõfi wa’owuawua dõdõ andrõ, ba tobali tefabõbõ ba dána ba mado andrõ, sangai ya’ira, dána khõra, ba aheta ba dána niwama.

5 Ba ibe’e li ba Ndraono Gizeraëli Moze, dali niŵa’õ Yehowa, imane: Si ndruhu niŵa’õ nga’õtõ ndraono Yosefo andrõ.

6 Da’õ ni’oroi’õ Yehowa, ba ndraono Zelofadi andrõ: Hana na heza zomasi ira mõi nihalõ irá, asala iwara zangai ya’ira,

7 fa bõi tefa ema ba mado bõ’õ khõra dána ba Ndraono Gizeraëli tanõ; dozi Iraono Gizeraëli, ba bõi labõhõli dána ba niwara.

8 Ba dozi ono alawe sanema ondrõita ba mado Ndraono Gizeraëli heza, ba ba niwara mõi nihalõ ira, fa bõi aefa ba Ndraono Gizeraëli fefu gondrõita ndra amara;

9 ba bõi tefa’ema ba mado si sambua dána ba zi sambua; dozi mado Ndraono Gizeraëli, ba bõi ndra mubõhõli dána khõra andrõ.

 

10 II. Ba ono Zelofadi andrõ, ba la’o’õ niŵa’õ Yehowa khõ Moze,

11 Mala andrõ ba Tirisa ba Hogela ba Milika ba Noa, ba si fasamba ama khõra zangai.

12 Nga’õtõ ndraono Manase andrõ, ono Yosefo, zangai ya’ira, tobali lõ tebulõ ba madora dána khõra tanõ, ba mado ndra amara.

13 Da’õ goroisa Yehowa, ba da’õ nifakhoinia ba zalo’o tanõ Ndraono Moabi andrõ, ba ndraso Yoridano, ba gamaudu Yerikho, nifaŵa’õgõnia khõ Moze.