SURA MOZE III.

Table of Contents

 

SURA MOZE III.

SURA MOZE III.

Faza 1

I. Amakhoita ba zumange nitunu, saŵi. II. Biribiri ba nambi. III. Marafadi.

1 I. Ba humede Yehowa khõ Moze, fahuhuo ia khõnia, moroi ba nose wama’ele’õ, imane: (Moz. II. 29, 42):

2 Hede ba Ndraono Gizeraëli ba ŵa’õ khõra: na so ba khõmi zame’e sumange Yehowa, ba urifõnia ibe’e sumange, saŵi, ba ma urifõ side’ide.

3 Na saŵi ibe’e sumange nitunu, ba si matua, si lõ sala ibe’e. Yamu’ohe ba zinga mbawandruhõ nose wama’ele’õ, ena’õ somasi Yehowa ia, ibe’e. (Moz. II. 29, 10).

4 Ba yamutufa tangania hõgõ zumange andrõ, ba ni’omasi’õ ia ba aefa horõnia ibe’e.

5 Awena dania itaba nono zaŵi andrõ, fõna Yehowa; ba iraono Ga’aroni, ere andrõ, zame’e do andrõ. Latefe naha wame’e sumange do andrõ fasui, naha wame’e sumange andrõ ba zinga mbawandruhõ nose.

6 Ba ibo’a guli zumange ba itatawi nõsi.

7 Ba iraono Ga’aroni, ere andrõ, zangebua alitõ ba dete naha wame’e sumange ba labahogõ ba galitõ geu nisisila.

8 Ba lahaogõ Iraono Ga’aroni, ere andrõ, wame’e yaŵa ba mbaho geu andrõ ba galitõ ba naha wame’e sumange ngawalõ andrõ, hõgõ ba tawõ.

9 Ba alakhaõ ba ahe, ba lasasai ba nidanõ, ba ifarahugõ itunu ba naha wame’e sumange ere sumange nitunu, sumange nibe’e khõ Yehowa, nifatõrõ ba galitõ, samohua.

10 II. Ba na urifõ side’ide — ono mbiribiri, ba ma nambi — zumange andrõ, nibe’enia sumange nitunu, ba si matua, si lõ sala ibe’e.

11 Yamutaba fõna Yehowa yõu naha wame’e sumange; ba iraono Ga’aroni, ere andrõ, zanefe naha wame’e sumange do andrõ, fasui.

12 Ba itatawi, ba ihaogõ ere, wame’e ba mbaho geu andrõ ba galitõ ba naha wame’e sumange ngawalõ andrõ, awõ hõgõ, awõ dawõ.

13 Ba alakhaõ ba ahe, ba lasasai ba nidanõ, ba ifarahugõ ere, wame’e ya’ia, itunu ba dete naha wame’e sumange; sumange nitunu ia, sumange nibe’e khõ Yehowa, nifatõrõ ba galitõ, samohua.

14 III. Ba na sumange fofo zumange andrõ, nibe’enia khõ Yehowa, ba fune ba ma ono marafadi ibe’e sumange.

15 Ba ere zolohe ba naha wame’e sumange, iboto hõgõ ba itunu ba galitõ ba naha wame’e sumange, ba do, ba nifera’õ ba ngai naha wame’e sumange.

16 Ba horokina ba bu, ba iheta ba itibo’õ ba niduwagõ awu, tánõ ba gatumbukha, i’otarai naha wame’e sumange.

17 Ba ilõwa gafi ba lõ ifaefa; ba itunu ere ba naha wame’e sumange, ba mbaho geu andrõ ba galitõ yaŵa; sumange nitunu ia, sumange nibe’e khõ Yehowa, nifatõrõ ba galitõ, samohua.

SURA MOZE III.

Faza 2

I. Sumange ni’ā, hamo ba kue. II. Sumange bua zinanõ, sahulõ.

1 I. Na so zame’e khõ Yehowa sumange ni’ā, ba ya hamo si sõkhi zumange andrõ khõnia; yamulau wanikha yaŵa ba yamube’e gumõyõ. (Moz. IV. 15, 4).

2 Ba i’ohe ba ndraono Ga’aroni, ere andrõ; ba yamuhalõ zi tambai tanga ere, hamo andrõ ba fanikha andrõ, nilau, ba kumõyõ, andrõ, ahori, ba yamutunu ba naha wame’e sumange zamohua andrõ khõnia, sumange nibe’e khõ Yehowa, nifatõrõ ba galitõ, samohua.

3 Ba si tosai sumange ni’ā andrõ, fefu, ba tána khõ Ga’aroni ba ba ndraononia; ni’amoni’õ sibai da’õ ba zumange Yehowa andrõ, nifatõrõ ba galitõ. (F. 10, 12).

4 Ba na edõna õbe’e sumange ni’ā nibogõ ba galitõ, ba kue si lõ mu’aisõni õbe’e, kue hamo si sõkhi, nifaruka ba kue sanifi, si lõ mu’aisõni, nigule’õ fanikha.

5 Ba na sumange ni’ā ba gali õbe’e, ba hamo si sõkhi nifaruka fanikha ba si lõ mu’aisõni õfake;

6 õboboto ia, sambasambawa ba õlau wanikha yaŵa — sumange ni’ā ia.

7 Ba na sumange ni’ā, nirino ba mbowoa, ba hamo si sõkhi, awõ wanikha õbe’e.

8 Ba õ’ohe khõ Yehowa zumange ni’ā andrõ, nimanõ famazõkhi; labe’e ba danga gere, ena’õ ya’ia zolohe ba naha wame’e sumange.

9 Ba ihalõ ere ndrohundrohu, samohua andrõ, ba zumange ni’ā andrõ, ba itunu ba naha wame’e sumange, sumange nibe’e khõ Yehowa, nifatõrõ ba galitõ, samohua.

10 Ba si tosai sumange ni’ā andrõ fefu, ba tána khõ Ga’aroni ba ba ndraononia, ni’amoni’õ sibai da’õ ba zumange Yehowa andrõ, nifatõrõ ba galitõ.

11 Fefu zumange ni’ā andrõ, nibe’emi khõ Yehowa, ba lõ tola si no mu’aisõni mibe’e; tanõmõ roti sa, ba ŵe ŵani, ba lõ tola mitunu ba galitõ, sumange Yehowa, nifatõrõ ba galitõ.

12 Hana na mibe’e bõrõta zumange khõ Yehowa, ba lõ tola mõi ba naha wame’e sumange, samohua ena’õ.

13 Ba fefu zumange ni’ā, nibe’eu, ba õlau nasio; lõ’õ manõ tola lõ õbe’e nasio wawu’usa li andrõ, nihonogõi Lowalangiu, ba zumange ni’ā andrõ khõu: ba zumange andrõ khõu fefu, ba õfao nasio. (Mar. 9, 49).

 

14 II. Ba na edõna’õ õbe’e sumange Yehowa mbua zinanõ sahulõ, ba ngalai nibogõ ba galitõ ba ma bõra nirekha, bua si bohou mubasi, õbe’e sumange ni’ā khõu, bua zahulõ.

15 Ba õlau wanikha ba õbe’e yaŵa gumõyõ, — sumange ni’ā ia.

16 Ba ihalõ ndrohundrohu, samohua, ere, bõra nirekha andrõ ba fanikha, nibe’e andrõ, — ba kumõyõ andrõ khõnia, ba ahori, ihalõ, ba itunu ba galitõ sumange Yehowa, nifatõrõ ba galitõ.

SURA MOZE III.

Faza 3

I. Sumange fangorifi, saŵi. II. Biribiri. III. Nambi.

1 I. Ba na sumange fangorifi nibe’enia, ba na saŵi zedõna ibe’e, ba si lõ sala ifaigi, ma zi matua, ba ma si alawe, ni’ohenia khõ Yehowa.

2 Ba itufa tangania hõgõ zumange andrõ khõnia, ba itaba ba zinga mbawandruhõ nose wama’ele’õ; ba iraono Ga’aroni, ere andrõ, zanefe naha wame’e sumange do andrõ, fasui. (Moz. II. 29, 12).

3 Ba yamuhalõ ba zumange fangorifi andrõ, nibe’e sumange Yehowa nifatõrõ ba galitõ, dawõ wali’a andrõ ba murumuru mbetu’a ba bua si dombua,

4 fabaya tawõnia, ba ba rami lafoyo, ba si fabõbõ ba gate; ba mbua i’etu’õ.

5 Ba ndra mutunu iraono Ga’aroni ba dete naha wame’e sumange, yaŵa ba zumange nitunu andrõ, si so ba dete mbaho geu andrõ ba galitõ, latunu sumange nibe’e khõ Yehowa nifatõrõ ba galitõ, samohua. (Moz. II. 29, 25).

6 II. Ba na urifõ side’ide nibe’enia sumange Yehowa, sumange fangorifi ba si lõ sala ifaigi, ma si matua, ba ma si alawe, nibe’enia.

7 Na ono mbiribiri sedõna ibe’e sumange, ba yamu’ohe fõna Yehowa,

8 ba yamutufa tangania hõgõ zumange andrõ khõnia, ba yamutaba sa’ae fõna nose wama’ele’õ; ba iraono Ga’aroni zanefe naha wame’e sumange do andrõ, fasui.

9 Ba yamube’e sumange Yehowa nifatõrõ ba galitõ zumange fangarifi andrõ õsa, tawõnia andrõ: i’o sotawõ andrõ, ma’asara, ba mbõrõ gi’o sibai ifaefa — awõ dawõ wali’a andrõ, ba murumuru mbetu’a, fefu, ba bua si dombua,

10 fabaya tawõnia ba ba rami lafoyo ba si fabõbõ ba gate; ba mbua i’etu’õ.

11 Ba itunu ba naha wame’e sumange ere, õ sumange nifatõrõ ba galitõ, khõ Yehowa. (F. 21, 6).

12 III. Ba na nambi zumange khõnia, ha yamu’ohe fõna Yehowa,

13 yamutufa tangania hõgõ ba yamutaba fõna nose wama’ele’õ; ba iraono Ga’aroni zanefe naha wame’e sumange do andrõ, fasui.

14 Ba ihalõ ba da’õ zumange andrõ khõnia, nibe’e, sumange khõ Yehowa, nifatõrõ ba galitõ, tawõ wali’a andrõ ba murumuru mbetu’a,

15 fefu, ba bua si dombua, fabaya tawõnia ba ba rami lafoyo, ba si fabõbõ ba gate; ba mbua i’etu’õ.

16 Ba ere zanunu ba naha wame’e, sumange, õ nibe’e khõ Yehowa, sumange nifatõrõ ba galitõ, samohua. Fefu dawõ, ba khõ Yehowa. (F. 7, 23).

17 Amakhoita si lõ tebulõ da’õ, nitõrõmi, gõtõgõtõ wa’ara, fefu gofu heza so ami: Tawõ ba do, ba alõsu lõ tola mi’ā! (Moz. I. 9. 4. Hal. zin. 15, 20).

SURA MOZE III.

Faza 4

I. Sumange fameta horõ gere, si lõ la’ila watahõgõ mege. II. Fameta horõ mbanua, si manõ. III. Fameta horõ zalaŵa, si manõ. IV. Fameta horõ zi ha samõsa, si manõ.

1 I. Ba humede Yehowa khõ Moze, imane:

2 Hede ba Ndraono Gizeraëli, ba ŵa’õ khõra: Na so zanawõ oroisa Yehowa andrõ zambalõ, hadia ia, si lõ mu’odõdõgõ, na ilau hadia nilakha’õ [ba mimane:]

3 Na ere nibayoini andrõ zosala, si mõi sala zato, ba ibe’e khõ Yehowa sumange fameta horõ nono zaŵi si matua, si lõ sala, sulõ lalõ andrõ, horõnia andrõ.

4 I’ohe ba zinga mbawandruhõ nose wama’ele’õ, fõna Yehowa, nono zaŵi andrõ, ba itufa tangania hõgõ nono zaŵi ba itaba nono zaŵi, fõna Yehowa.

5 Ba yamuhalõ õsa ndro zaŵi andrõ ere nibayõini andrõ ba yamu’ohe bakha ba nose wema’ele’õ. (F. 16, 14. Moz. IV, 19, 4).

6 Ba yamu’ungugõ durunia ba ndro ere, ba mewitu yamutefe tou zalo do andrõ õsa, fõna mba’aba’a andrõ, ba ni’amoni’õ, fõna Yehowa.

7 Ba yamugule’õ ba dandru naha wame’e sumange, fõna Yehowa, ba nose wama’ele’õ ndro andrõ ma’ifu ere, ifabaya zamohua andrõ, nitunutunu; ba do nono zaŵi, soya andrõ, ba iduwagõ tou ba zinga naha wame’e sumange nitunu andrõ, ba zinga mbawandruhõ nose wama’ele’õ. (F. 9, 9).

8 Ba ahori yamuhalõ dawõ nono zaŵi sumange fameta horõ andrõ, tawõ wali’a andrõ ba murumuru mbetu’a

9 ba bua si dombua, fabaya tawõnia, ba ba rami lafoyo, awõ zi fabõbõ ba gate; ba mbua i’etu’õ —,

10 si mane fangai ba zaŵi si matua, sumange fangorifi; ba itunu ere ba naha wame’e sumange nitunu.

11 Ba ba guli nono zaŵi andrõ ba ba nõsinia, numalõ hõgõnia ba ahenia ba betu’ania ba tainia,

12 ono zaŵi andrõ, ma’asageu, ba ni’ohe baero golombaseŵa, ba naha si sõkhi — ba naha niduwagõ awu andrõ — ba nitunu ba mbaho geu; ba naha niduwagõ awu andrõ latunu ia. (Moz. II. 29, 14. Heb. 13, 11).

13 II. Ba na samba banua Iraono Gizeraëli zosala, si lõ mu’odõdõgõ, si lõ aboto ba dõdõ zato, na lasawõ goroisa Yehowa andrõ zambalõ, hadia ia, horõra,

14 ba sato zame’e ono saŵi, sumange fameta horõ, na no murongo lalõ andrõ, horõra.

15 La’ohe fõna nose wama’ele’õ, ba latufa tangara hõgõ nono zaŵi andrõ satua mbanua, fõna Yehowa ba lataba ia, fõna Yehowa.

16 Ba i’ohe bakha ba nose wama’ele’õ ndro nono zaŵi andrõ õsa ere nibayoini andrõ.

17 Ba i’ungugõ ba ndro andrõ durunia ere ba mewitu itefe tou zalo do andrõ ma’ifu fõna Yehowa — fõna mba’aba’a andrõ.

18 Ba ma’ifu gõi igule’õ ba dandru naha wame’e sumange, fõna Yehowa, ba nose wama’ele’õ do andrõ; ba do soya andrõ, ba iduwagõ tou ba zinga naha wame’e sumange nitunu, ba zinga mbawandruhõ nose wama’ele’õ.

19 Ba tawõnia fefu, ba ihalõ, ba itunu ba naha wame’e sumange.

20 Ba ono zaŵi andrõ, ba ifatõrõ ba nifatõrõnia saŵi si matua andrõ sumange fameta horõ — ba da’õ gõi ifatõrõ. Na no imanõ ere, wamaigi khõra fameta horõ, ba tebe’e aefa khõra.

21 Ba ono zaŵi andrõ, ba ni’ohe baero golombaseŵa ba nitunu, si mane fanunu saŵi si matua no mege. Sumange fameta horõ mbanua da’õ.

 

22 III. Ba na salaŵa zanawõ oroisa Lowalanginia Yehowa, zambalõ, horõnia, si lõ mu’odõdõgõ,

23 ba na no mu’ombakha’õ khõnia lalõnia, horõnia andrõ, ba yamube’e sumange nambi si matua, si lõ sala,

24 itufa tangania hõgõ nambi andrõ, ba itaba ba nitataba sumange nitunu andrõ fõna Yehowa; sumange fameta horõ ia.

25 Ba ihalõ ma’ifu ndro zumange fameta horõ andrõ ere, turunia, ba igule’õ ba dandru naha wame’e sumange nitunu, ba do soya, ba iduwagõ tou, ba zinga naha wame’e sumange nitunu.

26 Ba tawõ, ba ahori itunu ba naha wame’e sumange, si mane tawõ zumange fangorifi andrõ. Na no ifaigi khõnia ere wameta lalõnia andrõ, ba tebe’e aefa khõnia.

 

27 IV. Ba na ono mbanua zolalõ wanawõ oroisa Yehowa zambalõ, horõnia, si lõ mu’odõdõgõ,

28 ba na no mu’ombakha’õ khõnia, lalõnia andrõ, horõnia, ba yamube’e nambi si alawe, si lõ sala, sumange fameta zala andrõ horõnia andrõ,

29 itufa tangania hõgõ zumange fameta horõ andrõ, ba itaba, ba nitataba sumange nitunu andrõ.

30 Ba ihalõ ma’ifu ndro andrõ ere, turunia, ba igule’õ ba dandru naha wame’e sumange nitunu. Ba do soya, ba iduwagõ tou, ba zinga naha wame’e sumange.

31 Ba tawõ, ba ahori ihalõ, si mane fangai ya’ia ba zumange fangorifi andrõ, ba itunu ere ba naha wame’e sumange, samohua khõ Yehowa. Na no imanõ ere, wamaigi khõnia fameta horõ, ba tebe’e aefa khõnia.

32 Ba na ono mbiribiri zumange andrõ, nibe’enia sumange fameta horõ, ba si alawe, si lõ sala, ibe’e.

33 Ba itufa tangania hõgõ zumange fameta horõ, ba itaba sumange fameta hõrõ, ba nitataba sumange nitunu andrõ.

34 Ba ihalõ ma’ifu ndro zumange fameta horõ andrõ ere, turunia, ba igule’õ ba dandru naha wame’e sumange. Ba do soya, ba iduwagõ tou ba zinga naha wame’e sumange.

35 Ba tawõ, ba ahori ihalõ, si mane fangaingai tawõ nono mbiribiri andrõ, sumange fangorifi, ba itunu ere, ba naha wame’e sumange, ba zumange Yehowa nifatõrõ ba galitõ. Na no imanõ ere, wamaigi khõnia fameta sala andrõ, horõnia andrõ, ba tebe’e aefa khõnia.

SURA MOZE III.

Faza 5

I. Tohutohu gamakhoita ba zumange fameta horõ. II. Sumange ogauta ba zala ba ni’amoni’õ andrõ, si lõ mu’odõdõgõ.

1 I. Na so zi sala, na no irongo wangelifi, na tola sasi ia, ma no i’ila [zangelifi] ba ma no irongo, ba na lõ ni’ombakha’õnia, si tobali horõnia —

2 ma no so zi no mombambaya salakha, ma amatela gutu ndru’u salakha, ba ma amatela gurifõ salakha ba ma zui amatela guõkuõ salakha, si lõ i’ila mege, ba na irongo dania, si tobali horõnia, — (Hag. 2, 13. Kor. II. 6, 17),

3 ba ma zui tobaya khõnia zalakha, ba niha, ba ma hadia ia zalakha, ba zi hulõ zi ra’ira’iõ niha, si lõ i’ila mege, ba nirongonia dania, si tobali horõnia, —

4 ba ma zui na fahõlu niha, sambõ fangerangera, na iŵa’õ ilau hadia ia ba na numalõ linia fahõlusa, si lõ aboto ba dõdõnia ua, ba na aboto ba dõdõnia dania, na tobali horõnia zi mane da’õ,

5 ba yamu’ombakha’õ hadia horõnia, na no tobali horõnia zi mane da’õ;

6 ba ibe’e sumange Yehowa, sumange fameta horõ zageu, urifõ side’ide, si alawe, ma biribiri ba ma nambi, ogauta ba golalõŵa andrõ, horõnia andrõ, ba ifaigi khõnia wameta lalõ andrõ ere.

7 Ba na tebai ibe’e nambi, na si numana ia, ba dombua wune, ba ma dumbua nono marafadi; si sambua, ba sumange fameta horõ, ba si sambua, ba sumange nitunu. (F. 12, 8).

8 Yamu’ohe khõ gere; ba yamu’ofõnai’õ wame’e nihonogõi sumange fameta horõ da’õ; iboto hõgõ, tánõ ba mbõrõ du’i, ba bõi yamufaefa. (F. 1, 15).

9 Ba do zumange fameta horõ andrõ, ba igule’õ ba ngai naha wame’e sumange ma’ifu; ba do soya, ba nifera’õ tou, ba zinga naha wame’e sumange; sumange fameta horõ ia.

10 Ba si sambua, ba i’asiwai sumange nitunu; i’o’õ nifakhoi andrõ. Na no imanõ ere wamaigi khõnia fameta lalõ andrõ, horõnia andrõ, ba tebe’e aefa khõnia.

11 Ba na tebai ibe’e wune andrõ, si dombua, ba he ono marafadi, si dombua, ba wa’anumanania, ba yumube’e sumange ba lalõnia andrõ, sumange fameta horõ, zi samba hinaoya hamo si sõkhi, ba bõi yamulau wanikha, ba he kumõyõ, me sumange fameta horõ.

12 Ba yamu’ohe khõ gere; ba ihalõ zi tambai tanga ere, ndrohundrohu, samohua, ba itunu ba naha wame’e sumange ba zumange Yehowa andrõ, nifatõrõ ba galitõ — sumange fameta horõ ia. (F. 2, 2).

13 Na no imanõ ere, wamaigi khõnia fameta zala andrõ, horõnia heza andrõ, ba tebe’e aefa khõnia. Ba khõ gere [zumange si manõ], si mane sumange ni’ā andrõ.

 

14 II. Ba humede Yehowa khõ Moze, imane:

15 Na so zi falimo, na ihalõ hadia ia ni’amoni’õ khõ Yehowa, si lõ mu’odõdõgõ, ba ibe’e sumange Yehowa, sumange fameta horõ, ogauta, mbiribiri si matua, si lõ sala — ba gurifõnia side’ide ihalõ — si lõ ambõ dombua rufia fowõli, wamatõu bõli.

16 Ba yamufuli nihalõnia ni’amoni’õ andrõ ba ifo’uwu, sambua ni’olima ya’ia. Ba danga gere ibe’e, ba yamufaigi khõnia wameta zala ere, ba zumange fameta horõ, biribiri andrõ, ba tebe’e aefa khõnia.

17 Ba na so zi sala, sanawõ oroisa Yehowa zambalõ, horõnia, na tohare khõnia golalõŵa, si lõ mu’odõdõgõ,

18 ba yamu’ohe khõ gere mbiribiri si matua si lõ sala — ba gurifõnia side’ide ihalõ — ba ya’ugõ zangukuku fa’ebua, yamube’e sumange ogauta, ba ifaigi khõnia wameta lalõ andrõ ere, lalõ andrõ si lõ mu’odõdõgõ, ba tebe’e aefa khõnia.

19 Sumange ogauta da’õ, me no molalõ ia khõ Yehowa.

SURA MOZE III.

Faza 6

I. Sumange ogauta ba walimosa fanagõ. II. Amakhoita ba zumange nitunu. Bõi mate galitõ ba naha wame’e sumange. III. Amakhoita ba zumange ni’ā. IV. Sumange ba wamataro ere. V. Amakhoita ba zumange fameta horõ.

1 I. Ba humede Yehowa khõ Moze, imane:

2 Na so zi sala, na falimo ia khõ Yehowa, horõnia, na i’osilõ’õgõ khõ nawõnia nibe’e ba dangania, ma nifa’irõ’õgõ, ba ma nirabu, ba ma na ibe’e te’ala nawõnia,

3 ba ma na i’osilõ’õgõ nisõndrania, saekhu, ba ma na mõi ia ba hõlu ba zi lõ duhu, na so nilau hadia ia, sosala niha, —

4 na molalõ ia si manõ, horõnia, ba yamufuli nirabunia andrõ, ba ma si falau horõ ia, ba ma nibe’e ba dangania, ba ma saekhu no mege, nisõndrania, (Moz. IV. 5, 6),

5 ba ma si mõi ia ba hõlu si lõ duhu — fefu, gofu hadia ia —; bõlinia ma’afefu ifuli, ba sambua ni’olima ibe’e uwunia; ba zokhõ ibe’e, na luo ibe’e gogauta andrõ.

6 Ba khõ Yehowa ibe’e ogauta mbiribiri si matua, si lõ sala — ba gurifõnia side’ide ihalõ — ya’ugõ zanguhuku fa’ebua, yamu’ohe khõ gere, sumange ogauta.

7 Ba yamufaigi khõnia wameta zala khõ Yehowa ere, ba tebe’e aefa khõnia — hadia ia nilau, horõ zamõsaná.

 

8 II. Ba humede Yehowa khõ Moze, imane:

9 Be’e lala khõ Ga’aroni ba ba ndraononia, õmane: Da’õ gamakhoita ba zumange nitunu andrõ: Sumange nitunu andrõ, ba sara wongi lõ tebulõ ba naha wame’e sumange, ba nitunu ya’ia, irege mahemolu mbanua, fangebua galitõ ba naha wame’e sumange, fa lõ mate.

10 Ba yamu’obaru gamezania ere, ba yamubalugõ zaila ia saraeŵa tarafali ba yamuheta nawu andrõ, awu zumange nitunu andrõ ba galitõ ba naha wame’e sumange, ba yamuduwagõ ba ngai naha wame’e sumange.

11 Aefa da’õ, ba yamufohani ia, ba yamu’ohe baero golombaseŵa nawu andrõ, ba naha si sõkhi.

12 Ba nibe’e fangebua galitõ ba naha wame’e sumange ia, bõi manõ mate. Ero mahemolu itunu yaŵa geu ere, ifa’anõ yaŵa geu, ba itunu yaŵa ba da’õ dawõ zumange fangorifi andrõ.

13 Si lõ tebulõ galitõ ba naha wame’e sumange, lõ tola mate ia.

14 III. Ba da’õ gamakhoita ba zumange ni’ā andrõ: Iraono Ga’aroni zolohe khõ Yehowa, ba naha wame’e sumange. (F. 2, 1 b. t.).

15 Ba ihalõ õsa, tambai tanga — hamo si sõkhi andrõ ba fanikha, nibe’e sumange ni’ā — ba kumõyõ andrõ, hawuhawu zumange ni’ā andrõ, ba ahori ihalõ, ba itunu ba naha wame’e sumange, sumange nifatõrõ ba galitõ, samohua, ndrohundrohunia, samohua, khõ Yehowa.

16 Ba si tosainia, ba õ ndra A’aroni iraononia; ni’ā lõ mu’aisõni, ba naha ni’amoni’õ: ba golayama nose wama’ele’õ la’ā ia.

17 Lõ tola labogõ nifaruka tanõmõ roti. Utehe khõra urakhara ba zumangegu andrõ nifatõrõ ba galitõ; ni’amoni’õ sibai ia si mane sumange fameta horõ andrõ ba si mane sumange ogauta.

18 Dozi motõi matua ba ndraono Ga’aroni zi tola manga ya’ia; amakhoita si lõ tebulõ ha wa’ara, nitehe khõmi ba zumange Yehowa andrõ, nifatõrõ ba galitõ, gõtõgõtõ wa’ara; sombambaya ya’ia, ba no ni’amoni’õ gõi. (Moz. II. 29, 37).

19 IV. Ba humede Yehowa khõ Moze, imane:

20 Da’õ zumange Yehowa, nibe’e Ga’aroni ba iraononia, na luo tebayoini ia: Samba hinaoya hamo si sõkhi, sumange ni’ā, sero ma’õkhõ — si matongania, ba na mahemolu mbanua, ba si matonga, ba na owī.

21 Ba gali la’asosoi, nifaruka fanikha; õfakhõyõ ua, atõ õbe’e, sinaba zumange ni’ā andrõ nigore õbe’e, samohua khõ Yehowa.

22 Ere andrõ, nibayoini fangalinia, nituyu ba ndraononia andrõ, da’õ zangasiwai; amakhoita Yehowa si lõ tebulõ da’õ, gõtõgõtõ wa’ara; ahori tetunu khõ Yehowa.

23 Fefu zumange nibe’e gere, ba ahori tebe’e sumange; lõ tola la’ā niha.

24 V. Ba humede Yehowa khõ Moze, imane:

25 Hede khõ Ga’aroni ba ba ndraononia, ŵa’õ khõra: Da’õ gamakhoita ba zumange fameta horõ andrõ: ba nitaba sumange nitunu, fõna Yehowa, ba da’õ gõi tetaba zumange fameta horõ; ni’amoni’õ sibai ia.

26 Ere andrõ, same’e sumange fameta horõ andrõ, da’õ zi manga ya’ia; ba naha ni’amoni’õ te’ā ia, ba golayama nose wama’ele’õ.

27 Dozi sombambaya õsinia andrõ, ba no ni’amoni’õ gõi; ba na tokana ba mbaru ndronia õsa, ba ba naha ni’amoni’õ õsasai nikanania andrõ.

28 Bowoa tanõ, fondrinonia, ba niboto; ba na bowoa tõla wondrinonia, ba nidukhu ba nihaogõ fangogumi.

29 Dozi motõi matua ba gere zi manga ya’ia; ni’amoni’õ sibai ia.

30 Ba sumange fameta horõ fefu ni’ohe do õsa ba nose wama’ele’õ, ba wolau fameta horõ, ba ni’amoni’õ, ba lõ tola te’ā; nitunu da’õ. (F. 4, 5. Heb. 13, 11).

SURA MOZE III.

Faza 7

I. Tohutohu gamakhoita ba zumange ogauta. II. Sumange fangandrõ saoha gõlõ ba sumanga fanuno ba sumange amabu’ula li. III. Fanenaŵa femanga daŵo ba do. IV. Urakha gere ba zumange andrõ.

1 I. Ba da’õ gamakhoita ba zumange ogauta andrõ; ni’amoni’õ sibai ia.

2 Ba nitataba sumange nitunu andrõ, ba da’õ gõi lataba zumange ogauta, ba donia, ba fanefe naha wame’e sumange, fasui.

3 Ba tawõnia fefu, ba nibe’e sumange: i’o sotawõ andrõ ba tawõ wali’a ba bua si dombua,

4 fabaya tawõnia ba ba rami lafoyo ba si fabõbõ ba gate; ba mbua i’etu’õ.

5 Ba itunu ere ba naha wame’e sumange sumange nibe’e khõ Yehowa, nifatõrõ ba galitõ; sumange ogauta ia.

6 Dozi motõi matua ba gere zi manga ya’ia; ba naha ni’amoni’õ te’ā; ni’amoni’õ sibai ia.

7 Si mane ba zumange fameta horõ, si manõ gõi ba zumange ogauta, fagõlõgõlõ: khõ gere andrõ, same’e ya’ia, fameta horõ ia.

8 Ba khõ gere andrõ, same’e sumange nitunu andrõ, ni’ohe niha, guli zumange nitunu andrõ, nibe’enia.

9 Si manõ gõi zumange ni’ā andrõ, nibogõ bawu, fefu, ba he nirino ba mbowoa, fefu, ba he nigore ba gali, ba khõ gere, same’e ya’ia.

10 Ba fefu zumange ni’ā, he nifaruka fanikha ba he sotufo ba ba ndraono Ga’aroni, faoma khõra.

11 II. Ba da’õ gamakhoita ba zumange fangorifi, nibe’e khõ Yehowa:

12 na so zame’e ya’ia fangandrõ saoha gõlõ, ba ifo’awõ zumange fangandrõ saoha gõlõ andrõ kue nifaruka fanikha, si lõ mu’aisõni ba kue sanifi, si lõ mu’aisõni nigule’õ fanikha, ba hamo si sõkhi, si no mufaruka — kue nilau fanikha ba wamazõkhi —.

13 Ba kue roti si lõ mu’aisõni ifao ba zumange andrõ khõnia, lõ lai zumange urifõ, nibe’enia sumange fanuno, fangandrõ saoha gõlõ.

14 Ba sagõsagõrõ kue zambalõ sumange ibe’e amaedola zumange fegero khõ Yehowa; ba khõ gere andrõ, sanefe do zumange fangorifi andrõ ia.

15 Ba õsi zumange fangorifi andrõ fangandrõ saoha gõlõ, ba na luo tebe’e zumange andrõ te’ā ia; lõ tola lasaigõ hadia ia irege mahemolu mbanua.

16 Ba na amabu’ula li mbõrõ zumange andrõ, nibe’enia, ba ma na saoha gõlõ, ba na luo da’õ gõi te’ā, ba si tosai, ba hana na mahemolu õ la’ā; (F. 19, 6);

17 ba hadia zi tosai na õsi zumange, ba zi dua wongi, ba nitunu.

18 Ba na te’ā na ba zi dua wongi nõsi zumange fangorifi andrõ, ba lõ ibe’e ni’omasi’õ zame’e ya’ia andrõ; lõ’õ sa tebe’e hare, tobali sa amaedola no i’ā zobou, ba si manga ya’ia, ba ifalu’igõ khõnia horõ.

19 Ba he nagole si no fabaya ba zalakha, hadia ia, ba lõ tola te’ā, nitunu ia. Ba ba nagole [bõ’õ], ba dozi si lõ hadia ia salakha, ba tola la’ā nagole.

20 Ba si manga nõsi zumange fangorifi andrõ nibe’e khõ Yehowa, fatua so khõnia zalakha, ba nihori da’õ ba niwara andrõ.

21 Ba na so zi fabaya ba zalakha, hadia ia, he ba zalakha ba niha ba he ba zalakha urifõ ba he ba zogoro ita, hadia ia, si ta’unõ, ba na i’ā [zui] nõsi zumange fangorifi andrõ, nibe’e khõ Yehowa, ba nihori da’õ ba niwara andrõ.

22 III. Ba humede Yehowa khõ Moze, imane:

23 Hede ba Ndraono Gizeraëli, ba ŵa’õ khõra: Lõ tola mi’ā hadia ia dawõ zaŵi ba tawõ mbiribiri ba tawõ nambi.

24 Tawõ gurifõ si mate ba he nisasawi, ba hana na la’oguna’õ ba ngawalõ hadia ia, ba lõ tola mi’ā.

25 Dozi sa si manga dawõ gurifõ andrõ, nibe’e sumange Yehowa, nifatõrõ ba galitõ, ba nihori da’õ — si manga ya’ia — ba niwara andrõ.

26 Ba lõ’õ gõi tola mi’ā ndro, ba nahiami fefu, he do wofo, ba he do zi õfa ahe. (Moz. I. 9, 14).

27 Dozi si manga ndro, ba nihori ba niwara.

28 IV. Ba humede Yehowa khõ Moze, imane:

29 Hede ba Ndraono Gizeraëli ba ŵa’õ khõra: Same’e khõ Yehowa sumange fangorifi, ba ibe’e khõ Yehowa ndruhundrohu, ba zumange fangorifi andrõ, õmõnia khõnia.

30 Ya’ia zolohe ngawua andrõ, tána khõ Yehowa, sumange nifatõrõ ba galitõ: tawõ ba osu yamu’ohe; osu andrõ, ena’õ lahahae, nihahae fõna Yehowa. (Moz. II. 29, 24).

31 Ba tawõ, ba itunu ere ba naha wa’me’e sumange, ba osu andrõ, ba khõ Ga’aroni ba ba ndraononia.

32 Ba faha kambõlõ ba zumange fangorifi andrõ khõmi, ba ba gere gõi mibe’e, amaedola fegero. (Moz. II. 29, 27).

33 Ono Ga’aroni andrõ, same’e do zumange fangorifi andrõ ba tawõnia, zanema faha kambolõ, tána khõnia.

34 Osu andrõ sa, nihahae andrõ ba faha andrõ nibe’e fegero, ba zumange fangorifi andrõ, nibe’e Ndraono Gizeraëli, ba ya’o zi okhõgõ, ba ube’e khõ Ga’aroni ere andrõ, ba ba ndraononia, tána khõra, õmõ Ndraono Gizeraëli, si lõ mamalõmalõ. (Moz. IV. 18, 11).

35 Da’õ dána khõ Ga’aroni ba tána ba ndraononia, ba zumange Yehowa andrõ, nifatõrõ ba galitõ, na baŵa nifa’asonia ya’ira, ba wangai halõŵõ gere khõ Yehowa,

36 nihonogõi Yehowa khõra, me luo ibayoini ira, ame’ela Ndraono Gizeraëli, tána khõ, õmõra si lõ mamalõmalõ, gõtõgõtõ wa’ara.

37 Da’õ gamakhoita ba zumange nitunu andrõ ba ba zumange ni’ā ba ba zumange fameta horõ ba ba zumange ogauta ba ba zumange famataro ba ba zumange fangorifi,

38 niŵa’õ Yehowa khõ Mose ba hili Zina’i, me iŵa’õ lala ba Ndraono Gizeraëli, ba wame’e sumange khõ Yehowa, ba danõ si mate Sina’i.

SURA MOZE III.

Faza 8

I. Famonukha gere. II. La’amoni’õ nose, awõ naha wame’e sumange, labe’e zumange. III. Sumange ba we’amoni’õ A’aroni ba iraononia.(A. 1—32: Moz. II. 29, 1—35.)

1 I. Ba humede Yehowa khõ Moze, imane:

2 Ohe Ga’aroni, awõ ndraononia, awõ nukha andrõ ba fanikha famayoini, ba ono zaŵi, sumange fameta horõ, ba biribiri si matua andrõ, si dua geu, ba kude andrõ, si so bakha si lõ mu’aisõni andrõ,

3 ba falukha’õ zato fefu, fõna mbawandruhõ nose wama’ele’õ.

4 Ba i’o’õ niŵa’õ Yehowa khõnia Moze, ba owulo zato fõna mbawandruhõ nose wama’ele’õ.

5 Ba imane Moze ba zato: Da’e ia, niŵa’õ Yehowa, nilau.

6 Ba ifa’aso Ga’aroni ba iraononia Moze ba ifemondri ira.

7 Aefa da’õ, ba ifobaru Ga’aroni kameza andrõ ba ifamõbõ talu bõbõ talu andrõ ba ifobaru baru sebua ba ono mbaru ba doto andrõ; ba ibõbõ khõnia mbõbõ nono mbaru andrõ, wangaro’õ khõnia. (Moz. II. 28).

8 Ba ibe’e ba dotonia mbola andrõ, ba ibe’e bakha ba mbola Urimi ba Tumimi andrõ.

9 Ba ibe’e ba hõgõnia mbala hõgõ andrõ; ba tánõ fõna ba mbala hõgõ andrõ ibe’e detenia andrõ, ana’a, diadema ni’amoni’õ andrõ, si mane niŵa’õ Yehowa khõ Moze.

10 II. Ba ihalõ wanikha famayoini Moze, ibayoini nose, awõ fefu hadia ia zi so bakha, we’amoni’õ ya’ia.

11 Ba itefe gõi ba naha wame’e sumange õsa, mewitu, ibayoini naha wame’e sumange andrõ, awõ wakake khõnia, fefu, ba he gala andrõ, fabaya ahenia, we’amoni’õ ya’ia.

12 Ba ilau ba hõgõ Ga’aroni õsa wanikha famayoini, ibayoini ia, we’amoni’õ ya’ia.

13 Ba ifa’aso gõi ndraono Ga’aroni, ifobaru ira kameza, ba ifamõbõ talu bõbõ talu andrõ ba ifokofia, si mane niŵa’õ Yehowa khõ Moze.

14 Ba ifa’aso nono zaŵi andrõ, sumange fameta horõ, ba latufa hõgõ nono zaŵi andrõ ira A’aroni iraononia, tangara.

15 Ba itaba Moze, ihalõ ndro, igule’õ ba dandru naha wame’e sumange, fasui, turunia, fameta sala ba naha wame’e sumange; ba do soya, ba iduwagõ tou ba zinga naha wame’e sumange; i’amoni’õ naha wame’e sumange andrõ, wolau khõnia fameta sala andrõ.

16 Ba ahori ihalõ dawõ wali’a, ba si fabõbõ ba gate ba bua si dombua, fabaya tawõnia, ba itunu Moze, ba naha wame’e sumange.

17 Ba ono zaŵi andrõ, fabaya uli, ba õsinia ba tainia, ba baero golombaseŵa itunu, si mane niŵa’õ Yehowa khõ Moze.

18 Ba awena ifa’aso mbiribiri si matua andrõ, sumange nitunu, ba latufa hõgõnia ira A’aroni iraononia, tangara.

19 Ba itaba Moze ba itefe naha wame’e sumange do andrõ, fasui.

20 Ba biribiri andrõ, ba itatawi, ba itunu hõgõ, awõ ngawua andrõ, awõ dawõ.

21 Ba alakhaõ ba ahe, ba isasai ba nidanõ; aefa da’õ, ba itunu mbiribiri andrõ, ma’asageu Moze, sumange nitunu, samohua, õ nibe’e khõ Yehowa, nifatõrõ ba galitõ, si mane niŵa’õ Yehowa khõ Moze.

22 III. Aefa da’õ ba ifa’aso mbiribiri si sageu andrõ, biribiri famataro, ba latufa hõgõnia ira A’aroni ononia, tangara. (Moz. II. 29, 10 b. t.).

23 Ba itaba Moze ba ihalõ ndro ma’ifu, ba igule’õ ba doyo dalinga Ga’aroni ba gambõlõ ba ba duru sebua ba dangania kambõlõ ba ba duturu kahe sebua kambõlõ.

24 Ba ifa’aso gõi Ndraono Ga’aroni Moze ba igule’õ gõi ma’ifu ndro ba doyo dalingara kambõlõ ba ba duru sebua ba dangara kambõlõ ba ba duturu kahe sebua kambõlõ, ba do soya, ba ibe’e fanefe naha wame’e sumange, fasui.

25 Ba ihalõ dawõ: i’o sotawõ andrõ ba tawõ mbetu’a fefu, ba si fabõbõ ba gate ba bua si dombua, fabaya tawõnia, ba faha kambõlõ.

26 Ba ihalõ ba gude, si so si lõ mu’aisõni andrõ, fõna Yehowa, zagõrõ kue si lõ mu’aisõni ba sagõrõ kue roti nifaruka fanikha ba sagõrõ kue sanifi, ba i’orudugõ ba dawõ no mege ba ba waha andrõ, faha kambõlõ;

27 ba ifarahugõ wame’e ba danga ndra A’aroni iraononia, ihahae, nihahae fõna Yehowa. (Moz. II. 29, 24).

28 Awena ifuli ihalõ ba dangara Moze ba itunu ba naha wame’e sumange, yaŵa ba zumange nitunu, sumange famataro, samohua, sumange nibe’e khõ Yehowa, nifatõrõ ba galitõ.

29 Ba ihalõ nosu mbiribiri famataro andrõ Moze ba ihahae, nihahae fõna Yehowa; tána khõ Moze ia, si mane niŵa’õ Yehowa khõ Moze.

30 Ba ihalõ õsa Moze fanikha famayoini ba do, si so ba naha wame’e sumange, ba itefe Ga’aroni, awõ nukhania, ba iraononia, awõ nukhara, i’amoni’õ Ga’aroni, fabaya nukhania ba iraononia, fabaya nukhara.

31 Ba imane Moze khõ ndra A’aroni iraononia: Mirino nagole andrõ, fõna mbawandruhõ nose wama’ele’õ, ba mi’ā ba da’õ, awõ roti andrõ, si so ba gude, nifao ba zumange famataro andrõ, si mane niŵa’õ khõgu ba goroisa andrõ; A’aroni ba iraononia zi manga ya’ia. (Moz. II. 29, 32).

32 Ba si tosai nagole ba roti, ba mitunu.

33 Ba fitu bongi lõ tola mirõi mbawandruhõ nose wama’ele’õ, irugi luo no ahõwõ mbongi andrõ, nihonogõi ba wamataro ya’ami; fitu ngaluo sa wa’ara lafo’õsi’õsi dangami.

34 Si mane nilau ma’õkhõ, si manõ ni’oroi’õ Lowalangi folaulau, ba wameta salami.

35 Fitu bongi wa’ara, ba bongi ma’õkhõ mi’iagõ zinga mbawandruhõ nose wama’ele’õ, mi’o’õ goroisa Yehowa, fa bõi mate ami — si manõ niŵa’õ khõgu!

36 Ba la’o’õ A’aroni ba iraononia fefu ni’oroi’õ Yehowa khõ Moze.

SURA MOZE III.

Faza 9

I. Sumange nibe’e Ga’aroni, si fõfõna, fameta horõnia. II. Sumange fameta horõ zato, si fõfõna. III. Oroma ba zato lakhõmi Yehowa.

1 I. Ba fitu bongi, ba humede Moze khõ ndra A’aroni iraononia ba ba zatua Ndraono Gizeraëli, imane khõ Ga’aroni:

2 Halõ khõu nono zaŵi, ono’ono, sumange fameta horõ ba biribiri si matua, sumange nitunu, faoma si lõ sala, ba ohe fõna Yehowa.

3 Ba ba Ndraono Gizeraëli, ba õmane: Mihalõ nambi si matua, sumange fameta horõ, ba ono zaŵi ba biribiri, sagesageu, faoma si dõfi fa’ebua ba si lõ sala, sumange nitunu,

4 ba saŵi si matua ba biribiri si matua, sumange fangorifi, ba wanaba fõna Yehowa, ba nifao zumange ni’ā, nifaruka fanikha; ma’õkhõ sa i’oroma’õ ia khõmi Yehowa.

5 Ba la’ohe niŵa’õ Moze, la’ohe ba golayama nose wama’ele’õ, ba so zato fefu, la’ondrasi Yehowa.

6 Ba imane Moze: Da’o ia, ni’oroi’õ Yehowa khõmi folau, ena’õ oroma khõmi lakhõmi Yehowa.

7 Ba imane Moze khõ Ga’aroni: Ae ba naha wame’e sumange, ba be’e zumange fameta horõ andrõ khõu ba sumange nitunu, ena’õ aheta horõu, awõ horõ zato, õbe’e; aefa da’õ, ba be’e zumange nibe’e zato, ena’õ aheta horõra, õbe’e, si mane niŵa’õ Yehowa. (F. 16, 6. Heb. 5, 1; 7, 27).

8 Ba mõi ba naha wame’e sumange Ga’aroni, itaba nono zaŵi andrõ, nihonogõi sumange fameta horõ khõnia.

9 Ba iraono Ga’aroni zangoro’õ khõnia do andrõ; ba i’ungugõ durunia bakha ba igule’õ ba dandru naha wame’e sumange. Ba do soya, ba iduwagõ tou ba zinga naha wame’e sumange.

10 Ba tawõ zumange fameta horõ, awõ mbua, awõ zi fabõbõ ba gate, ba itunu ba naha wame’e sumange, si mane niŵa’õ Yehowa khõ Moze.

11 Ba õsi ba uli, ba baero golombaseŵa itunu. (F. 4, 11. 12).

12 Aefa da’õ, ba itaba zumange nitunu; ba iraono Ga’aroni zangoro’õ khõnia do andrõ, ba ibe’e fanefe naha wame’e sumange, fasui.

13 Ba sumange nitunu andrõ, ba la’oro’õ khõnia nitatawi, awõ hõgõ, ba itunu ba naha wame’e sumange.

14 Ba alakhaõ ba ahe, ba isasai ba nidanõ ba itunu ba naha wame’e sumange, yaŵa ba zumange nitunu.

15 II. Aefa da’õ, ba ibe’e zumange nibe’e zato: ihalõ nambi si matua andrõ, nihonogõi zumange fameta horõ zato, itaba ba ibe’e sumange fameta horõ, si mane mege.

16 Aefa da’õ, ba ibe’e zumange nitunu andrõ, ba lala nifakhoi ifatõrõ.

17 Ba ibe’e gõi zumange ni’ā andrõ; ihalõ õsa, si tambai tanga, ba itunu ba naha wame’e sumange, lõ lai zumange nitunu andrõ na mahemolu mbanua.

18 Aefa da’õ, ba itaba nono zaŵi andrõ, awõ mbiribiri si matua andrõ, sumange fangorifi, si tefaudu ba zato; ba iraono Ga’aroni zangoro’õ khõnia do andrõ ba ibe’e fanefe naha wame’e sumange, fasui.

19 Ba ba ngawua dawõ zaŵi andrõ, ba ba gi’o mbiribiri, sotawõ andrõ, awõ dawõ wali’a ba bua ba si fabõbõ ba gate,

20 ba lafalaetegõ ba ngawua nosu ngawua dawõ andrõ, ba itunu ngawua dawõ andrõ, ba naha wame’e sumange.

21 Ba ngawua nosu, awõ waha kambõlõ, ba ihahae A’aroni, nihahae fõna Yehowa, si mane niŵa’õ Moze.

22 III. Ba i’oro’õ dangania A’aroni, yaŵa zato, ifahowu’õ ira; ba me no i’asiwai zumange fameta horõ ba sumange nitunu ba sumange fangorifi, ba mõi ia mitou.

23 Ba mõi bakha ba nose wama’ele’õ ndra Moze A’aroni, ba me lafuli ira baero, ba lafahowu’õ niha sato. Ba oroma ba niha sato fefu lakhõmi Yehowa.

24 Ba so galitõ si oroi Yehowa, ba i’ā zumange nitunu andrõ, awõ ngawua dawõ andrõ, ba naha wame’e sumange. Ba me la’ila da’õ sato fefu, ba owuawua dõdõra ba lafalõgu tou ira. (Sanguhuk. 6, 21. Raz. I. 8, 11; 18, 38. Nga’õt. II. 7, 1).

SURA MOZE III.

Faza 10

I. Tehuku ndra Nadabi Abihu ba galitõ bõ’õ andrõ. II. Lõ tola tebadu nagu ba halõŵõ ni’amoni’õ andrõ. III. Hadia dána ba gere ba zumange andrõ nifatõrõ ba galitõ.

1 I. Ba lahalõ gali mbo galitõ khõra iraono Ga’aroni andrõ Nadabi ba Abihu, labe’e galitõ yaŵa ba lalau nitunu, samohua, ba tobali la’ohe fõna Yehowa galitõ si tenga, si tenga niŵa’õnia khõra. (Moz. II. 30, 9. Moz. IV. 3, 4. Nga’õt. I. 24, 2).

2 Ba so galitõ, si oroi Yehowa, ba i’ā ira, tobali mate ira [ba da’õ] fõna Yehowa.

3 Ba imane Moze khõ Ga’aroni: Ba da’õ itõrõ niŵa’õ Yehowa, me imane: ”Ba zahatõ khõgu u’oroma’õ, wa ni’amoni’õ ndra’odo, ba ba zi so sato fefu ufa’ele’õ lakhõmigu.” Ba lõ hedehede Ga’aroni. (Moz. II. 19, 22).

4 Ba humede Moze khõ ndra Miza’eli Elisafa, ono Uziëli andrõ, ama Ga’aroni si akhi, imane khõra: Mi’aini, miheta fõna ni’amoni’õ dalifusõmi andrõ, mi’ohe baero golombaseŵa.

5 Ba mõi ira, la’ohe baero golombaseŵa, la’o’õ niŵa’õ Moze; lõ muheta gamezara andrõ.

6 Ba imane Moze khõ Ga’aroni ba khõ nononia Eleazari ba Itamari: Lõ tola miheta kofiami ba lõ tola mitika nukhami, fa bõi mate ami ba fa bõi mofõnu Yehowa ba zato fefu! Ba talifusõmi andrõ ba ma’uwu Gizeraëli fefu, ba hana na la’e’esi nitunu Yehowa andrõ.

7 Ba lõ’õ gõi tola mirõi nose wama’ele’õ, we’amõi baero, fa bõi mate ami, me no tohare khõmi wanikha wamayoini andrõ khõ Yehowa! Ba la’o’õ niŵa’õ Moze. (F. 21, 12).

8 II. Ba humede Yehowa khõ Ga’aroni, imane:

9 Agu ba hadia ia nibadu, si mabu niha, ba lõ tola mibadu — he ya’ugõ ba he iraonou — na mõi ami bakha ba nose wama’ele’õ, fa bõi mate ami. Amakhoita si lõ tebulõ da’õ, gõtõgõtõ wa’ara. (Hez. 44, 21. Tit. 1, 7).

10 Ba mifaehusi ira ni’amoni’õ zi tenga ni’amoni’õ ba salakha ba si lõ alakha,

11 ba mifahaõ Ndraono Gizeraëli ba gamakhoita andrõ fefu, nifa’ema Yehowa khõra khõ Moze.

12 III. Ba ibe’e lala Moze khõ Ga’aroni ba khõ ndra Eleazari Itamari, si tosai ononia na, imane: Mihalõ zumange ni’ā andrõ, si tosai na sumange nibe’e khõ Yehowa, nifatõrõ ba galitõ, ba mi’ā lõ mu’aisõni, ba ngai naha wame’e sumange, me no ni’amoni’õ sibai ia. (F. 2, 10).

13 Andrõ wa ba naha ni’amoni’õ mi’ā; noa sa tána khõu, si mõi khõu ba ba ndraonou, fõfõ zumange Yehowa andrõ, nifatõrõ ba galitõ — si manõ niŵa’õ khõgu. (F. 6, 16).

14 Ba osu andrõ, nihahae ba faha fegero, ba mi’ā onou matua ba onou alawe, ba naha si sõkhi, noa sa mutehe khõmi, tána khõmi, si mõi khõmi iraonou, fõfõ zumange fangorifi andrõ, nibe’e Ndraono Gizeraëli.

15 Ba faha andrõ, fegero, ba osu nihahae, ba nifao ba ngawua dawõ andrõ, nihonogõi sumange nifatõrõ ba galitõ, ena’õ tehahae, nihahae fõna Yehowa; ba khõmi iraonou dania, tána khõmi si lõ tebulõbulõ, ha wa’ara, si mane niŵa’õ Yehowa.

16 Ba i’alualui nambi si matua andrõ, sumange fameta horõ, Moze, ba hiza, no mutunu. Ba mofõnu sibai ia khõ ndra Eleazari Itamari, ono Ga’aroni andrõ, si tosai na khõnia, ba imane:

17 Hana sa wa lõ mi’ā zumange fameta horõ andrõ, ba naha ni’amoni’õ? noa sa ni’amoni’õ sibai ia, ba no ibe’e khõmi, ba wameta horõ mbanua, ba ba wangatulõ’õ ya’ira khõ Yehowa.

18 Hiza, no lõ mu’ohe si bakha ba ni’amoni’õ ndronia andrõ, ba mi’ā mena’õ, ba ni’amoni’õ, si mane niŵa’õgu.

19 Ba imane A’aroni khõ Moze: Hiza, no labe’e zumange fameta horõ, awõ zumange nitunu khõra, khõ Yehowa ma’õkhõ, ba no gõna ndra’o si manõ, ba na u’ā ena’õ zumange fameta horõ ma’õkhõ, hadia, omasi maõ Yehowa?

20 Ba me irongo da’õ Moze, ba ibato wanegu ya’ira.

SURA SURA MOZE III.

Faza 11

I. Saliŵaliŵa ba danõ si tola la’ā ba salakha. II. Amatela ba kuõkuõ.

(Faigi gõi Moz. V. 14, 2—21.)

1 I. Ba humede Yehowa khõ ndra Moze A’aroni, iŵa’õ li khõra, imane:

2 Mimane ba Ndraono Gizeraëli: Da’õ zaliŵaliŵa ba danõ, si tola mi’ā, fefu, si õfa ahe ba guli danõ. (Moz. I. 7, 2. Moz. V. 14, 4. Hal. zin. 10, 14).

3 Fefu zi õfa ahe ba si no fabali sa’a, si no alua fabali, ba samomendrua fonganga gõra ba tola mi’ā.

4 Ba ba zamomendrua fonganga gõra ba ba zi no fabali sa’a, ba da’õ zi lõ tola mi’ā: ondra andrõ; ifomendrua sa wonganga gõnia, ba tenga si no alua fabali sa’a — salakha ia miŵa’õ.

5 Ba kelindri; ifomendrua sa wonganga gõnia, ba tenga si no fabali sa’a, ba salakha ia miŵa’õ.

6 Ba kawelu, ifomendrua wonganga gõnia, ba tenga si no fabali sa’a: ba salakha ia miŵa’õ.

7 Ba bawi; noa sa salua fabali sa’ania, ba tenga samomendrua fonganga gõnia; salakha ia miŵa’õ.

8 Lõ tola mi’ā nõsira ba lõ tola mibabaya gamatela; salakha ira miŵa’õ.

9 Ba da’õ zi tõla mi’ā, saliŵaliŵa ba nidanõ, fefu: fefu zaliŵaliŵa ba nidanõ, he ba nasi, ba he ba nidanõ, soferefere ba sohunahuna, ba tola mi’ā.

10 Ba fefu zi so ba nasi ba ba nidanõ, si lõ ferefere ba si lõ hunahuna, ba zaliŵaliŵa ba nidanõ, fefu, ba ba zi so noso, si so ba nidanõ, ba sogoro ami da’õ.

11 Sogoro ami ira: õsira, ba lõ tola mi’ā, ba amatelara, ba mi’ogorofi.

12 Fefu zaliŵaliŵa ba nidanõ, si lõ ferefere, ba si lõ hunahuna, ba sogoro ami. 13 Ba ba wofo, ba da’õ ni’ogorofimi — tebai ni’ā, ni’ogorofi: moyo ba fofo basi ba moyo nasi.

14 Ba razo wali, awõ ngawalõ ala’ala,

15 awõ ngawalõ gaga fefu.

16 Ba fofo ondra, ba katawaena ba samari, awõ ngawalõ wõtõ.

17 Ba tugõu ba belibi ba lamuhu,

18 ba meu ba engangi ba banga.

19 Ba lakilaki, awõ ngawalõ mbangau, ba meragai ba bõgi. 20

 Fefu zaliŵaliŵa side’ide, si so afi ba si õfa ahe, ba sogoro ami.

21 Fefu zaliŵaliŵa side’ide, si so afi ba si õfa ahe, ba ha da’õ zi tola mi’ā, si dua faha, yaŵa gahera, ba wanoka ba danõ.

22 Ba da’õ ba tola mi’ā ngawalõ damo andrõ, ya’ia ngawalõ damo solama, awõ ngawalõ damo hara goli, awõ ngawalõ damo hagabi.

23 Ba bõ’õnia, saliŵaliŵa side’ide, si so afi, ba si õfa ahe, ba sogoro ami.

24 Tobali si ra’ira’iõ da’õ mibe’e; dozi sombambaya amatela, ba si ra’iõ, irege bongi. (F. 5, 2).

25 Ba ha niha zolohe amatela, zambua, ba lõ tola lõ ibabago nukhania, ba si ra’iõ ia, irege bongi —

26 ba zaliŵaliŵa ba danõ, fefu, si no fabali sa’a, si lõ alua fabali, ba si tenga samomendrua fonganga gõnia. Salakha ira miŵa’õ, dozi sombambaya ya’ira ba ra’iõ.

27 Ba fefu gõi zosa’a, sa’a mao, ba zaliŵaliŵa ba danõ, si õfa ahe, ba salakha miŵa’õ; dozi sombambaya amatela, ba ra’iõ, irege bongi.

28 Ba solohe amatela, ba lõ tola lõ ibabago nukhania, ba ra’iõ ia, irege bongi — salakha ira miŵa’õ.

29 II. Ba da’õ zalakha, miŵa’õ, ba zaliŵaliŵa ba danõ side’ide: bituru ba te’u ba bayakomo, hadia ngawalõ.

30 Ba anaka ba koakhi ba leta’a ba khometi ba loa.

31 Da’õ ira zalakha, miŵa’õ, ba zaliŵaliŵa ba danõ side’ide; dozi sombambaya, na no mate, ba ra’iõ irege bongi.

32 Ba fefu hadia ia nilangõ zi manõ, ba wa’amate, ba ra’iõ, he nahia eu fefu ba he nukha ba he uli ba he goni — fefu wakake, ni’oguna’õ. Ni’ungugõ ba nidanõ, ba lõ tebulõ wa’ata’unõ irege bongi; awena ifuli sõkhi.

33 Ba na aekhu ba nahia tanõ zara, da’õ, ba ta’unõ nõsi ma’afefu, ba nirasa [nahia andrõ].

34 Fefu ngawalõ gõ, ni’aga’aga niha, ba ta’unõ, na gõna nidanõ si manõ; ba si manõ gõi nibadu hadia ia, nibadubadu niha, gofu hadia ia nahia, ba ta’unõ [ba zi manõ].

35 Ba fefu hadia ia, nilangõ gamatela zi manõ, ba ta’unõ: bowoa roti ba nirasa ba awu, ba nidudugõ. Si ta’unõ ia ba si ta’unõ miŵa’õ.

36 Ha umbu ba ba’a, õ idanõ, ba tenga si ta’unõ; ba ha niha zombambaya amatela bakha, ba ra’iõ.

37 Ba na gõna ba mbua zinanõ hadia ia, tanõmõ, gamatela zi manõ, ba tenga si ta’unõ da’õ.

38 Ba na no muwuwui idanõ danõmõ zinanõ andrõ, ba ilangõ dania amatela zi manõ, ba si ta’unõ ia miŵa’õ.

39 Ba na mate zaliŵaliŵa ba danõ andrõ, si tola mi’ā, ba na so zombambaya amatelania, ba ra’iõ ia, irege bongi.

40 Ba na so zi manga gamatela andrõ, ba ibabago nukhania, ba ra’iõ ia, irege bongi; ba solohe amatela, ba ibabago nukhania, ba ra’iõ ia, irege bongi.

41 Fefu zaliŵaliŵa ba danõ, side’ide, ba sogoro ami, miŵa’õ, ba lõ tola te’ā.

42 Fefu zi’anana’õ talu ba fefu zi õfa ahe, fabaya fefu, soya ahe, moroi andrõ, ba zaliŵaliŵa ba danõ, side’ide andrõ, ba lõ tola mi’ā, sogoro ami sa ira miŵa’õ.

43 Bõi mibali’õ sogoro niha ami ba guõkuõ andrõ, hadia ia, ba bõi mita’unõi ami ba da’õ, fa ra’iõ ami ba da’õ.

44 Me no Yehowa ndra’o, Lowalangimi; ba mi’amoni’õ ami; yani’amoni’õ ami, me no ni’amoni’õ ndra’odo. Ba bõi mita’unõi ami ba zaliŵaliŵa ba danõ andrõ, side’ide, solihaliha ba guli danõ. (Moz. II. 22, 31. Fet. I. 1, 16).

45 Me no Yehowa ndra’odo, si no mangeheta ya’ami ba danõ Miserayi, ena’õ Lowalangimi ndra’o; andrõ yani’amoni’õ ami, me no ni’amoni’õ ndra’odo.

46 Da’õ nihonogõi ba zi õfa ahe andrõ ba ba wofo ba ba zonoso fefu, saliŵaliŵa ba nidanõ, ba ba zaliŵaliŵa ba danõ fefu,

47 ena’õ lafaehusi ira zalakha zi tenga salakha ba si tola te’ā ba si lõ tola te’ā.

SURA MOZE III.

Faza 12

Oroisa ba zadono ba sumange fangehao khõra.

1  Ba humede Yehowa khõ Moze, imane:

2 Hede ba Ndraono Gizeraëli, ŵa’õ khõra: Na mo’ono ndra alawe, ono matua, ba fitu bongi wa’ara ra’iõ ia, fa’ara wa’ara’iõnia na afõkhõ dalunia, ra’iõ ia.

3 Ba na aefa zi fitu bongi, ba niboto nono. (Moz. I. 17, 10).

4 Ba 33 bongi dania ia ba ndro wangehao andrõ khõnia; lõ tola ibabaya hadia ia ni’amoni’õ, ba lõ tola mõi ia ba ni’amoni’õ, irege no ahõwõ mbongi wangehaonia andrõ.

5 Ba na ono alawe nononia, ba dua migu wa’ara ra’iõ ia, si mane na afõkhõ dalunia, ba 66 wongi ia ba ndro wangehao andrõ khõnia.

6 Ba na no ahõwõ mbongi wangehao andrõ khõnia — he ba nono matua, ba he ba nono alawe — ba i’ohe khõ gere ba mbawandruhõ nose wama’ele’õ nono mbiribiri si dõfi fa’ebua, sumange nitunu, ba ono marafadi, ba ma funé, sumange fameta horõ.

7 Ba ere zame’e khõ Yehowa, ifaigi khõnia wameta sala, ba nihaogõ zui ia ba wendro dalu andrõ. Da’õ nihonogõi ba zadono andrõ, he ba nono matua, ba he ba nono alawe.

8 Ba na abõlõ numana ia, ba wamaigi biribiri, ba yamuhalõ zi dombua fune, ba ma dombua nono marafadi; si sambua, ba sumange nitunu, ba si sambua, ba sumange fameta horõ, ba yamufaigi khõnia wameta sala ere, ba nihaogõ ia. (F. 5, 7. Luk. 2, 24).

SURA MOZE III.

Faza 13

I. Oroisa ba mbou auri ba niha. II. Ba mbou auri ba nukha.

1 I. Ba humede Yehowa khõ ndra Moze A’aroni, imane:

2 Na oroma ba dete guli niha zobu’u, ba ma gigimõ, ba ma safusi, na ibõrõtaigõ bou auri, ba ni’ohe khõ Ga’aroni ere andrõ ia, ba ma khõ nononia, ha niha, ere andrõ.

3 Ba na ifaigi ere zofõkhõ andrõ ba gulinia, wa no ahuwa mbu ba da’õ, awõ wa hulõ zahõndrõ, moroi ba guli bõ’õ, ba no si ndruhu mbou auri; ba ha i’ila si’aikõ da’õ ere, ba si ra’iõ niha da’õ yamuŵa’õ.

4 Ba na so zafusi ba gulinia, si tenga sahõndrõ, moroi ba guli bõ’õ ba si lõ ahuwa bu, ba i’oniagõ zi gõna da’õ ere, fitu bongi.

5 Ba na ifaigi dania ia ere, na no irugi fitu bongi, ba na i’ila, si manõmanõ zi gõna andrõ, wamaiginia, ba lõ si tedou wõkhõ andrõ, ba guli; ba ifuli i’oniagõ ia ere, fitu bongi tõ.

6 Ba na ifuli ifaigi ere, na no irugi fitu bongi, ba na i’ila no ahoë nahia andrõ, ba lõ si tedou wõkhõ andrõ, ba guli, ba tenga si ra’iõ ia yamuŵa’õ ere — ha gigimõ; ba ibabago sa nukhania, ba tenga si ra’iõ ia.

7 Ba na tedoudou gigimõ andrõ, ba guli, aefa mbaŵa wangoroma’õnia ya’ia khõ gere, ba wanguma’õ tenga si ra’iõ ia, ba na ifuli i’oroma’õ ia khõ gere, ba na isõndra ere,

8 no tedoudou gigimõ andrõ, ba guli, ba si ra’iõ ia yamuŵa’õ ere: bou auri sa’ae. 9 Na te’ila ba niha zi gõna bou auri ia, ba ni’ohe khõ gere.

10 Ba na isõndra ere, so ba guli zi hulõ waosa, safusi, si no ahuwa bu, ba sotawõtawõ,

11 ba no bou auri si no ara, ba gulinia, ba iŵa’õ ere, si ra’iõ ia, lõ’õ sa’ae i’oniagõ, si ra’iõ sa’ae ia.

12 Ba na bou auri manõ, sageu ya’ia, ba gulinia, na no anõnõ bou auri guli zi gõna andrõ, ma’asageu i’otarai hõgõ, numalõ ba gahe, heza gõi ifaigi ere, ba na i’ila ere,

13 no tehawu manõ bou auri nõsinia ma’afefu, ba tenga si ra’iõ zi gõna andrõ yamuŵa’õ: no fatutu wa’afusi, ba tobali tenga si ra’iõ.

14 Ba na si tawõtawõsõ khõnia, ba si ra’iõ ia;

15 ba na i’ila zi no tawõtawõsõ andrõ ere, ba si ra’iõ yamuŵa’õ: si tawõtawõsõ andrõ sa, ba si ra’iõ, no bou auri.

16 Ba na ifuli taya zi tawõtawõsõ andrõ ba na afusi, ba yamõi khõ gere.

17 Ba ifaigi ia ere ba na i’ila, no afusi nahia andrõ si no gõna, ba tenga si ra’iõ zi gõna andrõ yamuwa’õ ere; no tenga si ra’iõ ia.

18 Na so zi tumbu faosa ba guli ba na ifuli dõhõ, ba na obu’ubu’u dania,

19 safusi ba ma soyoramõ, ba yamu’oroma’õ ia khõ gere.

20 Ba na isõndra ere, no ahõndrõ, moroi ba guli bõ’õ, wamaigida, awõ wa no ahuwa mbu khõnia, ba si ra’iõ ia yamuŵa’õ ere; no si ndruhu bou auri, salua ba waosa andrõ.

21 Ba na ifaigi nahia andrõ ere ba na i’ila, lõ sahuwa bu khõnia ba tenga sahõndrõ moroi ba guli bõ’õ ba no ahoë ma’ifu, ba yamu’oniagõ niha da’õ ere, fitu bongi.

22 Ba na itugu tedoudou dania zafusi andrõ, ba guli, ba si ra’iõ niha da’õ yamuŵa’õ ere; no gõna nahia andrõ.

23 Ba na lõ si tedou zafusifusi andrõ, na lõ sanananana, ba no laheto waosa no mege, ba tenga si ra’iõ ia yamuŵa’õ ere.

24 Na so ba guli niha zakhozi, ba na oyoramõ, ba ma na safusi nagole andrõ, sanõi ba zakhozi andrõ,

25 ba na ifaigi ere ba na i’ila, no ahuwa mbu ba zafusifusi andrõ, ba no ahõndrõ, moroi ba guli bõ’õ, wamaigida, ba no bou auri, salua ba zakhozi andrõ, ba si ra’iõ niha da’õ yamuŵa’õ ere; no si ndruhu bou auri.

26 Ba na i’ila ere, na ifaigi, lõ sahuwa mbu ba nahia safusifusi andrõ ba tenga sahõndrõ ia, moroi ba guli bõ’õ ba no ahoë ma’ifu, ba yamu’oniagõ niha da’õ ere, fitu bongi.

27 Ba na ifaigi ia ere, na no irugi fitu bongi, ba si ra’iõ ia iŵa’õ ere, na tedoudou nahia andrõ, ba guli — no si ndruhu bou auri.

28 Ba na lõ si tedou nahia safusifusi andrõ, na lõ sanananana ia ba na no ahoë ma’ifu, ba no sobu’ubu’u zakhozi andrõ ba tenga si ra’iõ ia yamuŵa’õ ere; noa sa laheto zakhozi andrõ.

29 Na so ndra matua, ba ma ira alawe, si so tandra ba hõgõ, ba ma ba gambi,

30 ba na ifaigi ere dandra andrõ, ba na isõndra, no ahõndrõ, moroi ba guli bõ’õ, wamaiginia ba mobu sise’ise, sa’usõ, ba si ra’iõ ia yamuŵa’õ ere, no gigimõ bou auri ba hõgõ, ba ma ba gambi.

31 Ba na i’ila ere — na ifaigi gigimõ andrõ — tenga sahõndrõ moroi ba guli bõ’õ ba lõ bu saitõ khõnia, ba yamu’oniagõ zi gõna gigimõ andrõ ere, fitu bongi. 32 Ba na ifaigi nahia si gõna andrõ ere, na no irugi fitu bongi, ba na i’ila, lõ si tedou gigimõ andrõ, ba lõ bu sa’usõ, ba tenga sahõndrõ moroi ba guli bõ’õ gigimõ andrõ,

33 ba yamutõwõ ia — ha gigimõ andrõ zi lõ itõwõ —; ba awena dania ifuli i’oniagõ ere zi no gõna gigimõ andrõ, fitu bongi zui.

34 Ba na ifaigi gigimõ andrõ ere, na no irugi fitu bongi, ba na i’ila, lõ si tedou gigimõ andrõ, ba guli, ba na tenga sahõndrõ ia, moroi ba guli bõ’õ, ba tenga si ra’iõ ia yamuŵa’õ ere; ba yamubabagõ nukhania, ba tenga si ra’iõ ia.

35 Ba na tedoudou gigimõ andrõ, ba guli, na no muŵa’õ tenga si ra’iõ zi gõna andrõ,

36 ba na ifaigi ia ere ba na i’ila, no tedou gigimõ andrõ ba guli, ba alakha lõ i’alui mbu sa’usõ andrõ ere — si ra’iõ ia.

37 Ba na si manõmanõ gigimõ, wamaigida ba na no tumbu khonia mbu saitõ, ba no dõhõ gigimõ andrõ — tenga si ra’iõ ia, ba yamuŵa’õ ere, wa tenga si ra’iõ ia. 38 Na oroma ba guli ndra matua, ba ma ba guli ndra alawe dandra, tandra safusifusi,

39 ba na ifaigi ere ba na i’ila ba guli dandra safusifusi, si no ahoë, ba no gigimõ si lõ ata’u ita, si tumbu ba guli — tenga si ra’iõ niha si manõ.

40 Ba na batule niha, ba no si batule tánõ ba mbõrõ du’i — tenga si ra’iõ niha si manõ.

41 Ba na batule ia yaŵa gangango, ba no si batule tánõ fõna — tenga si ra’iõ niha si manõ.

42 Ba na tumbu ba zi batule tánõ furi, ba ma tánõ fõna gigimõ soyoramõ, ba no bou auri, salua ba zi batule andrõ tánõ furi, ba ma tánõ fõna.

43 Ba na ifaigi ia ere, ba na i’ila gigimõ soyoramõ ba zi batule andrõ khõnia tánõ furi, ba ma tánõ fõna, si mane bou auri ba guli nõsi, wamaigida,

44 ba si no gõna bou auri zi manõ. Si ra’iõ ia; yamuŵa’õ manõ ere, si ra’iõ ia; no ba hõgõnia so wõkhõ andrõ.

45 Ba si no gõna bou auri andrõ, si so fõkhõ andrõ ba nõsi, ba yamu’onukha nukha si no atika ba bõi yamufake mbalubalu hõgõ ba yamubalugõ gambinia ba yamu’ao: Si ra’iõ! si ra’iõ!

46 Gõtõ so khõnia wõkhõ andrõ, ba si ra’iõ ia. Si ra’iõ ia; ni’oniagõ nahiania — baero golombaseŵa i’iagõ. (Raz. II. 7, 3; 15, 5).

47 II. Ba na ba mbaru oroma zi hulõ mbou auri, sambua nahia — he ba mbaru luo, ba he ba mbaru tarafali,

48 ba ma ba nukha bõ’õ, nukha nisoso, he tarafali, ba he baru luo, ba ma ba guli zaŵi, ba ma ba gamagama uli zaŵi, hadia ia, ba na no mowuge’e,

49 ba ma na no oyoramõ nahia andrõ, ba mbaru, ba ma ba guli zaŵi, ba ma ba nukha nisoso, ba ma ba gamagama uli zaŵi, hadia ia, ba no bou auri, ba ni’oroma’õ khõ gere.

50 Ba na no ifaigi nahia andrõ, si gõna, ere, ba yamukusi ba naha zi no gõna bou auri andrõ, ere, fitu bongi.

51 Ba na i’ila, na no irugi fitu bongi, no tedou zi hulõ gigimõ andrõ, ba mbaru, ba ma ba nukha nisoso, ba ma ba guli zaŵi, ba ma ba gamagama hadia ia, ni’oguna’õ uli zaŵi, wamazõkhi hadia ia, ba no bou auri safaito gigimõ andrõ; si ra’iõ zi manõ;

52 ba nitunu mbaru andrõ, ba ma nukha nisoso, baru luo ba ma tarafali, ba ma gamagama uli zaŵi, ba zoroma gigimõ andrõ; noa sa bou auri safaito; nitunu ia.

53 Ba na ifaigi ere, ba na i’ila, lõ si tedou gigimõ andrõ, ba mbaru, ba ma ba nukha nisoso, ba ma ba gamagama uli zaŵi, hadia ia,

54 ba yamuŵa’õ ere, nibabago zi gõna gigimõ andrõ, ba yamufuli mukusi ba naha, fitu bongi zui.

55 Ba na ifuli ifaigi ere, na no mubabago mege nahia andrõ, si no gõna, ba na i’ila, si manõmanõ nahia andrõ, wamaigida, he ŵa’ae lõ si tedou gigimõ andrõ, ba si ra’iõ ia; nitunu — no si no mogao, he tete, ba he arõ.

56 Ba na i’ila ere — na ifaigi — no ahoë nahia andrõ, si gõna, na no aefa lababago, ba nisaka [nahia andrõ], ba mbaru, ba ma ba guli zaŵi, ba ma ba nukha nisoso.

57 Ba na ifuli tumbu mbou auri ba mbaru, ba ma ba nukha nisoso, ba ma ba gamagama uli zaŵi, hadia ia, ba no si bohou alua; nitunu zi gõna gigimõ andrõ.

58 Ba baru andrõ, ba he nukha nisoso, ba he gamagama uli zaŵi, hadia ia ngawalõ, ba zi no taya gigimõ andrõ, na no mubabago, ba nifuli nibabago, awena dania tenga si ra’iõ.

59 Da’õ nihonogõi ba mbou auri andrõ ba mbaru luo ba ba mbaru tarafali ba he ba gamagama uli zaŵi, hadia ia, ba wanguma’õ na tenga si ra’iõ ba na si ra’iõ.

SURA MOZE III.

Faza 14

I. Sumange fangehao ba hadia nifakhoi tánõ bõ’õ ba zi gõna bou auri. II. Bou auri ba nomo.

1 I. Ba humede Yehowa khõ Moze, imane:

2 Da’õ gamakhoita ba zi gõna bou auri, na baŵa wangehao ya’ia: Ni’ohe khõ gere. (Mat. 8, 4. Mar. 1, 44. Luk. 5, 14; 17, 14).

3 Ba si mõi baero golombaseŵa gere, ba na isõndra ere — na ifaigi ia — no dõhõ wõkhõ nahia andrõ, si gõna bou auri ia,

4 ba yamuŵa’õ ere, ndramu’ohe wofo sauri, dombua, si tenga salakha, ba eu, eresi, ba kirimisi ba sufo, ba zi mõi nihaogõ andrõ. (Sin. 51, 9).

5 Ba yamuŵa’õ ere, lataba wofo si sambua ba nahia tanõ, yaŵa nidanõ gumbu.

6 Ba fofo sauri andrõ ba eu eresi ba kirimisi ba sufo andrõ, ba yamu’ungugõ ba ndro wofo andrõ, nitaba yaŵa nidanõ gumbu no mege, fabaya fofo sauri andrõ.

7 Ba mewitu itefe niha andrõ, si mõi nihaogõ, ba mbou auri andrõ, wangehao ya’ia; ba fofo sauri andrõ, ba yamufoloi ba mbenua.

8 Ba si mõi nihaogõ andrõ, ba ibabago nukhania, ba itõwõ mbunia, ihori, ba mondri, ba nihaogõ ia. Aefa da’õ ba tola mõi ia ba golombaseŵa, ba baero nosenia i’iagõ, fitu bongi.

9 Ba na no irugi fitu bongi, ba itõwõ mbunia fefu, he ba hõgõ, ba he gambi, ba he rõngõrõngõ, bunia ma’afefu itõwõ; ba ibabago nukhania ba mondri, ba abeta wa’ara’iõnia. (Raz. II. 5, 10).

10 Ba na irugi ŵalu bongi, ba yamuhalõ nono mbiribiri, dua rozi, si lõ sala, ba sara nono mbiribiri si alawe, si lõ sala, si dõfi fa’ebua, ba tõlu ni’ofulu [zu’asu’a] hamo si sõkhi, nifaruka fanikha, sumange ni’ā, ba matonga kata wanikha.

11 Ba yamu’angaruwusi khõ Yehowa niha andrõ si mõi nihaogõ, awõ da’õ no mege, ere andrõ, solau fangehao andrõ, fõna mbawandruhõ nose wama’ele’õ.

12 Ba yamuhalõ nono mbiribiri si sara ere, yamube’e sumange ogauta, awõ wanikha andrõ, si matonga kata; faoma yamuhahae fõna Yehowa.

13 Ba nitataba sumange fameta horõ ba sumange nitunu, lataba nono mbiribiri andrõ, ba naha ni’amoni’õ; si mane sumange fameta horõ sa, si manõ gõi zumange ogauta andrõ: khõ gere; ni’amoni’õ sibai ia.

14 Ba ihalõ ma’ifu ndro zumange ogauta andrõ ere ba igule’õ ba mbõrõ dalinga zi mõi nihaogõ andrõ, ba gambõlõ ba ba duru sebua ba danga kambõlõ ba ba duturu kahe sebua kambõlõ.

15 Ba ma’ifu ihalõ fanikha andrõ, si matonga kata, ere, ba ilau ba dangania — ba danga gere — kabera.

16 Ba i’ungugõ ba wanikha andrõ durunia kambõlõ ere, ba wanikha ba dangania kabera, ba itefe fõna Yehowa wanikha andrõ turunia, mewitu.

17 Ba fanikha si tosai ba dangania, ba igule’õ ba mbõrõ dalinga zi mõi nihaogõ andrõ, kambõlõ ba ba duru sebua ba dangania kambõlõ ba ba duturu kahenia sebua kambõlõ ba dete ndro zumange ogauta andrõ.

18 Ba hadia zi tosai na do ba danga gere, ba yamulau ba hõgõ zi mõi nihaogõ andrõ, ena’õ iheta zalania khõ Yehowa ere, ba zi manõ.

19 Ba i’asiwai zumange fameta horõ andrõ ere, ba wameta sala zi mõi nihaogõ andrõ ba wa’ara’iõnia andrõ; ba awena dania itaba zumange nitunu andrõ.

20 Ba ibe’e zumange nitunu andrõ ere, awõ zumange ni’ā, ba naha wame’e sumange; ba na no imanõ ere, wamaigi fameta zala khõnia, ba aheta wa’ara’iõnia.

21 Ba na si numana ia, na tebai ibe’e [niŵa’õ andrõ], ba ha sara yamuhalõ ono mbiribiri, sumange ogauta, ena’õ tehahae ba ena’õ tefaigi khõnia wameta zala, ba sambua ni’ofulu hamo si sõkhi, nifaruka fanikha, sumange ni’ā, ba matonga kata wanikha, ba dombua wune,

22 ba ma dombua nono marafadi — hadia zi tola ibe’e —, ena’õ sumange fameta horõ zi sambua ba sumange nitunu zi sambua.

23 Ba na no alua fitu bongi, i’otarai tehaogõ ia, ba yamu’ohe khõ gere, ba zinga mbawandruhõ nose wama’ele’õ, fõna Yehowa.

24 Ba yamuhalõ nono mbiribiri andrõ, sumange ogauta, ere, fabaya fanikha andrõ, si matonga kata, ba faoma yamuhahae ere, nihahae fõna Yehowa.

25 Ba ndramutaba nono mbiribiri andrõ, sumange ogauta, ba yamuhalõ ma’ifu ndro zumange ogauta andrõ ere, ba yamugule’õ ba mbõrõ dalinga zi mõi nihaogõ andrõ, ba gambõlõ ba ba duru sebua ba dangania kambõlõ, ba ba duturu kahenia sebua kambõlõ.

26 Ba fanikha andrõ, ba yamulau ba dangania ma’ifu ere — ba danga gere — kabera,

27 ba yamutefe ere wanikha andrõ õsa, si so ba dangania kabera, turunia kambõlõ, mewitu, fõna Yehowa.

28 Ba igule’õ ba mbõrõ dalinga zi mõi nihaogõ andrõ ma’ifu wanikha andrõ ba dangania, ere, ba ba duru sebua, ba dangania kambõlõ ba ba duturu kahenia sebua, kambõlõ, yaŵa ba dete ndro zumange ogauta andrõ.

29 Ba si tosai fanikha ba danga gere, ba yamulau ba hõgõ zi mõi nihaogõ andrõ, ena’õ ifaigi khõnia wameta zala khõ Yehowa.

30 Ba yamu’asiwai wune si sambua andrõ, ba ma ono marafadi, si tola ibe’e,

31 hadia zi tola ibe’e — si sambua, ba sumange fameta horõ, ba si sambua, ba sumange nitunu, awõ zumange ni’ā andrõ, ifaigi ba zi mõi nihaogõ andrõ wameta zala khõ Yehowa ere, ba zi manõ. 32 Da’õ nihonogõi, ba zi no gõna bou auri, ba si tebai mame’e [niŵa’õ andrõ], ba wangehao ya’ia.

33 II. Ba humede Yehowa khõ ndra Moze A’aroni, imane:

34 Na mirugi dania danõ Gana’ana, nibe’egu khõmi dania, ba na tumbu zi hulõ mbou auri ba nomo heza, ube’e, ba danõ andrõ, si no tána khõmi,

35 ba mõi mu’ombakhaõ khõ gere zokhõ omo andrõ, imane: No tumbu ba nomogu zi hulõ mbou auri!

36 Ba yamuŵa’õ ere, laheta nõsi nomo, atõ mõi yomo gere, ba wamaigi nahia andrõ si gõna, fa bõi laŵa’õ dania, si ra’iõ manõ nõsi nomo ma’afefu. Awena dania mõi yomo gere, ba wamaigi omo andrõ.

37 Ba na isõndra — na ifaigi nahia si no gõna bou auri andrõ — ba mbagolõ nomo so, mogao ba mowuge’e ba oyoramõ, hulõ zahõndrõ ba mbolo mbagolõ,

38 ba mõi tou gere ba mbawandruhõ, ba ikusi nomo andrõ, fitu bongi.

39 Ba na ifuli dania ia ere, na no irugi fitu bongi, ba na i’ila — na ifaigi — no tedou mbou auri andrõ ba mbagolõ nomo,

40 ba yamuŵa’õ ere, ladeha gara andrõ, soroma bou auri andrõ, ba latibo’õ baero mbanua, ba naha si ta’unõ.

41 Ba omo andrõ, ba ni’o’oi tánõ bakha, fasui, ba o’oila la’uri andrõ, ba niduwagõ baero mbanua, ba naha si ta’unõ.

42 Ba lahalõ gara bõ’õ ba labe’e fangali gara no mege; ba si manõ la’uri bõ’õ, ba wangalõsõ omo andrõ.

43 Ba na ifuli tumbu mbou auri ba nomo andrõ, na no muheta gara andrõ ba na no mu’o’oi nomo, ba na no mufuli mu’alõsõigõ,

44 ba yamõi yomo gere, ba na i’ila — na ifaigi — no tedou mbou auri ba nomo andrõ, ba no bou auri safaito, ba nomo: si ra’iõ ia.

45 Ba nidudugõ nomo andrõ, ba karania ba eunia ba la’uri fefu, ba nomo, ba ni’ohe baero ba naha si ta’unõ, baero mbanua.

46 Ba si mõi yomo ba nomo andrõ, fatua, no mukusi, ba niŵa’õ si ra’iõ, irege bongi.

47 Ba si no mõrõ yomo, ba ibabago nukhania; ba he si no manga yomo, ba ibabago nukhania.

48 Ba na mõi yomo gere, ba na i’ila, ba wamaiginia, lõ si tedou mbou auri, ba nomo andrõ, me no mufuli mu’alõsõigõ nomo, ba tenga si ra’iõ sa’ae nomo andrõ, yamuŵa’õ ere, noa sa dõhõ wõkhõ andrõ.

49 Ba yamuhalõ wofo, dombua ba eu eresi ba kirimisi ba sufo, ba wameta sala nomo andrõ.

50 Fofo si sambua, ba itaba ba nahia tanõ, yaŵa nidanõ gumbu;

51 ba eu eresi andrõ ba sufo ba kirimisi ba fofo sauri andrõ, ba ihalõ ba i’ungugõ ba ndro wofo nitaba andrõ ba ba nidanõ gumbu, ba omo, ba mewitu itefe,

52 ba wameta sala nomo do wofo andrõ ba idanõ gumbu ba fofo sauri andrõ ba eu eresi ba sufo ba kirimisi andrõ.

53 Ba fofo sauri andrõ, ba yamufoloi baero mbanua, ba mbenua; si manõ wametania sala nomo andrõ: abeta wa’ara’iõnia.

54 Da’õ nihonogõi ba ngawalõ mbou auri andrõ ba ba gigimõ,

55 ba ba mbou auri ba nukha ba ba nomo,

56 ba ba dandra ba guli ba ba zi hulõ mbõni ba ba dandra safusi andrõ,

57 ba wangombakha hadia zi ra’iõ ba hadia zi tenga si ra’iõ. Da’õ gamakhoita ba ba mbou auri andrõ.

SURA MOZE III.

Faza 15

I. Sonana si ra’iõ ba ndra matua. II. Ba ndra alawe.

1 I. Ba humede Yehowa khõ ndra Moze A’aroni, imane:

2 Mihede ba Ndraono Gizeraëli, ba mimane khõra: Na so zi hulõ zonana famatua, ba fonana si ra’ira’iõ zi manõ.

3 Ba da’õ wa’ara’iõnia ba wonana andrõ: he na mowõi wamatunia, ba he na no teduhu, fa lõ alua nana — si ra’iõ ia.

4 Fefu gaso, nifõrõni zi so sonana andrõ, ba si ra’iõ, ba fefu dadaoma nidadaoninia, ba si ra’iõ.

5 Sombambaya kasonia, ba ibabago nukhania ba mondri, ba si ra’iõ ia, irege bongi.

6 Ba si dadaoni dadaoma andrõ, nidadaoni zi so sonana andrõ, ba isasai nukhania ba mondri, ba si ra’iõ ia, irege bongi.

7 Ba sombambaya õsi zi so sonana andrõ, ba ibabago nukhania ba mondri, ba si ra’iõ ia, irege bongi.

8 Ba na idiloi zi lõ si ra’iõ si so sonana andrõ, ba ibabago nukhania da’õ ba mondri, ba si ra’iõ ia, irege bongi.

9 Ba fefu sela, ba zi fakudo zi so sonana andrõ, ba si ra’iõ.

10 Ba sombambaya hadia ia danedanenia, ba si ra’iõ, irege bongi. Ba solohe misa, ba ibabago nukhania ba mondri, ba si ra’iõ ia, irege bongi.

11 Ba dozi nibabaya zi so sonana andrõ na lõ nisasainia tangania, ba lababago nukhara ba mondri, ba si ra’iõ, irege bongi.

12 Nahia tanõ, nibabaya zi so sonana andrõ, ba niboto, ba nahia eu, ba nisasai ba nidanõ.

13 Ba na dõhõ zonana andrõ khõnia, ba i’erai mbongi, fitu bongi, i’otarai dõhõ khõnia; ba awena dania ibabago nukhania ba mondri ba nidanõ gumbu — ba aheta wa’ara’iõnia.

14 Ba na no alua fitu bongi, ba ihalõ wune, dombua, ba ma ono marafadi dombua, ba mõi ia fõna Yehowa, ba zinga mbawandruhõ nose wama’ele’õ, ba ibe’e ba danga gere wofo andrõ.

15 Ba i’asiwai ere: si sambua, ba sumange fameta horõ, ba si sambua, ba sumange nitunu; ba si manõ gere wamaigi khõnia fameta zala khõ Yehowa, ba zonana andrõ khõnia.

16 Na no ahele gula ba niha, ba ifemondri nõsinia ma’asageu, ba si ra’iõ ia, irege bongi.

17 Ba fefu nukha ba uli zaŵi, si gõna ula andrõ, ba nibabago, ba si ra’iõ, irege bongi.

18 Ba na so zorudu ba ndra alawe ba na no ahele gula, ba faoma mondri ira, ba si ra’iõ ira, irege bongi.

19 II. Na afõkhõ dalu ndra alawe, landro, ba fitu bongi wa’ara ra’iõ ia, ba dozi sombambaya ya’ia, ba si ra’iõ, irege bongi.

20 Ba hadia nifõrõninia fefu, gõtõ wa’ara’iõnia, ba ra’iõ, awõ nidadaoninia fefu, ba ra’iõ.

21 Ba dozi sombambaya kasonia, ba lababago nukhara ba mondri, ba si ra’iõ, irege bongi.

22 Ba dozi sombambaya hadia ia nidadaoninia, ba lababago nukhara ba mondri, ba si ra’iõ, irege bongi.

23 Ba sombambaya hadia ia zi so ba gasonia, ba ma ba dadaomania, ba ra’iõ, irege bongi.

24 Ba na so zorudu khõnia, ba na gõna khõnia zi rai’õnia, ba fitu bongi wa’ara ra’iõ ia ba fefu gaso, ba zi mõrõ ia, ba ra’iõ.

25 Ba na ara wa’afõkhõ dalu ndra alawe, na tenga baŵa landro khõnia, ba na mendro, sanalu’i baŵa landro khõnia, ba si ra’iõ ia, gõtõ wa’ara wendro andrõ khõnia, si mane na baŵa zatulõ landro khõnia, si ra’iõ ia. (Mat. 9, 20).

26 Fefu gaso nifõrõninia, gõtõ wendro andrõ khõnia ba si mane kasonia, na satulõ landro khõnia, iŵa’õ, ba fefu dadaoma, nidadaoninia, ba ra’iõ, si mane fa’ara’iõnia na satulõ landro khõnia.

27 Sombambaya da’õ no mege, ba ra’iõ; ibabago nukhania ba mondri, ba dõrõdõrõ ra’iõ, irege bongi.

28 Ba na no dõhõ khõnia wendro andrõ, ba yamu’erai mbongi, fitu bongi: ba awai wa’ara’iõnia laŵa’õ.

29 Ba na no alua fitu bongi, ba yamuhalõ wune, dombua, ba ma ono marafadi, dombua, ba i’ohe khõ gere ba zinga mbawandruhõ nose wama’ele’õ.

30 Ba yamu’asiwai ere: si sambua, ba sumange fameta horõ, ba si sambua, ba sumange nitunu; ifaigi khõnia wameta zala khõ Yehowa ere, ba zi manõ, ba wendronia andrõ, si ra’iõ.

31 Si manõ wanenaŵamõ Iraono Gizeraëli, ba wa’ara’iõ andrõ khõra, fa bõi mate ira bõrõ wa’ara’i’õra andrõ, na lata’unõi nahiagu andrõ, ba khõra.

32 Da’õ nihonogõi ba zi so sonana ba ba zahele ula, fa ra’iõ ia ba da’õ,

33 ba ba zolandro satulõ, ba ba zi so si hulõ zonana, he ira matua, ba he ira alawe, ba ba zorudu ba zi no ra’iõ.

SURA MOZE III.

Faza 16

I. Baŵa wangatulõ. Mõi ba ni’amoni’õ gere sebua. II. Fangatulõ ere, awõ zato. III. Biribiri si matua, foloitõ. IV. Fangohonogõi baŵa da’õ.

1 I. Ba humede Yehowa khõ Moze, me no mate ndraono Ga’aroni andrõ; me no la’ondrasi Yehowa, si mate ira. (F. 10, 1).

2 Ba imane Yehowa khõ Moze: Ŵa’õ khõ ga’au A’aroni, bõi yamõi manõ ba ni’amoni’õ, barõ mba’aba’a andrõ, fõna lagõlagõ andrõ, ba dete dawõla — fa bõi mate ia! Me ba lawuo andrõ u’oroma’õ ndra’odo, yaŵa lagõlagõ andrõ. (Moz. II. 30, 10; 40, 34. Raz. I. 8, 10. Heb. 9, 7).

3 Awena tola mõi bakha ba ni’amoni’õ Ga’aroni, na ibe’e nono zaŵi si matua, sumange fameta horõ ba biribiri si matua, sumange nitunu.

4 Kameza tarafali ni’amoni’õ i’obaru, ba saraeŵa tarafali mbalubalu zaila ia, ba bõbõ talu tarafali i’amõbõ talu ba bala hõgõ tarafali ibe’e ba hõgõnia. Nukha ni’amoni’õ da’õ — i’onukha na no aefa mondri ia.

5 II. Ba ba zato Ndraono Gizeraëli, ba dua geu ihalõ nambi si matua, sumange fameta horõ, ba sageu mbiribiri si matua, sumange nitunu.

6 Ba A’aroni, ba i’ohe nono zaŵi andrõ, sumange fameta horõ tána khõnia, fameta zalania ba sala moroi yomo khõra.

7 Ba awena dania ibe’e fõna Lowalangi nambi si matua andrõ si dua geu ba zinga mbawandruhõ nose wama’ele’õ.

8 Ba ilau dahõdahõ A’aroni ba nambi andrõ: sambua dahõdahõ khõ Yehowa ba sambua khõ Azazeli (Afõkha).

9 Ba i’ohe nambi andrõ, si gõna khõ Yehowa, A’aroni, ba i’asiwai sumange fameta horõ.

10 Ba si sageu andrõ, si gõna khõ Azazeli, ba labe’e auri, fõna Yehowa, ena’õ lafatõrõ khõnia nilau ba wameta sala, ba ena’õ lafofanõ khõ Azazeli, ba danõ si mate. (Yes. 13, 21. Mat. 12, 43. Fam. 18, 2).

11 Ba yamuhalõ nono zaŵi, sumange fameta horõ tána khõnia, ba wameta salania ba sala moroi yomo khõra, ba yamutaba nono zaŵi andrõ fameta zala, khõnia.

12 Ba yamuhalõ zamba gali mbo galitõ ba naha wame’e sumange, fõna Yehowa, awõ nitunu samohua, ni’ohama, sandra’u, ba yamu’ohe bakha, barõ mba’aba’a andrõ.

13 Ba ilau ba galitõ zamohua andrõ, fõna Yehowa, ena’õ iba’a lagõlagõ andrõ yaŵa zura goroisa simbo zamohua andrõ, fa bõi mate Ga’aroni.

14 Ba ihalõ ma’ifu ndro nono zaŵi andrõ ba ibe’e fanefe dete lagõlagõ andrõ, tánõ fõna, turunia; ba fõna lagõlagõ, ba mewitu itefe do andrõ õsa, turunia. (F. 3, 2. Heb. 10, 3. 4).

15 Awena dania itaba nambi si matua andrõ sumange fameta horõ ba zato, ba donia, ba i’ohe bakha barõ mba’aba’a, ba ilau si mane mege ba ndro nono zaŵi andrõ, ibe’e fanefe lagõlagõ andrõ ba fõna lagõlagõ misa itefe,

16 wameta sala ba ni’amoni’õ andrõ, bõrõ wa’ara’iõ Ndraono Gizeraëli ba lalõra andrõ, si no molalõ ira, ba si manõ gõi ilau ba nose wama’ele’õ, nifa’anõ ba khõra, ba hunõ wa’ara’iõra.

17 Ba lõ tola so niha ba nose wama’ele’õ, na mõi ia bakha, ba wolau nilau ba wameta sala, ba ni’amoni’õ andrõ, irege ifuli mõi baero. Si manõ wametania salania ba sala moroi yomo khõra ba sala zato Ndraono Gizeraëli fefu.

18 Awena dania mõi ia baero, ba zinga naha wame’e sumange, fõna Yehowa, ba wameta sala ba da’õ; ihalõ ma’ifu ndro nono zaŵi andrõ ba do nambi ma’ifu ba igule’õ ba dandru naha wame’e sumange, fasui,

19 ba mewitu itefe naha wame’e sumange do andrõ, turunia, wangehao ya’ia ba fe’amoni’õ ya’ia, bõrõ wa’ara’iõ Ndraono Gizeraëli andrõ.

20 III. Ba na no imanõ, wangasiwai fameta sala ba ni’amoni’õ andrõ ba ba nose wama’ele’õ ba ba naha wame’e sumange, ba i’ohe ba da’õ nambi si matua andrõ, sauri;

21 ba itufa hõgõ nambi andrõ sauri A’aroni tangania ma’adua ba i’ombakha’õ yaŵania zala Ndraono Gizeraëli fefu, awõ lalõ fefu, solalõ ira heza, ba ihare’õ ba hõgõ nambi andrõ, ba ifa’ohe’õ ba danõ si mate nambi, ba niha, si no ihõnagõ ba da’õ.

22 Ba ba hulunia i’ohe misa ba danõ sarõu golalõŵara fefu nambi si matua andrõ, ba ba danõ si mate ladudu ia.

23 Ba mõi bakha Ga’aroni ba nose wama’ele’õ, iheta nukha tarafali andrõ, nukhania me mõi ia ba ni’amoni’õ, ba ibe’e tou ba da’õ.

24 Ba mondri ia ba naha ni’amoni’õ ba ifuli i’onukha nukhania; awena mõi ia baero, ba wangasiwai sumange nitunu khõnia ba sumange nitunu ba niha sat, ba wameta salania ba sala zato.

25 Ba tawõ zumange fameta horõ andrõ, ba itunu ba naha wame’e sumange.

26 Ba solohe baero nambi si matua andrõ khõ Azazeli, ba ibabago nukhania ba mondri, awena tola ifuli ia ba golombaseŵa.

27 Ba ono zaŵi andrõ, ba nambi si matua sumange fameta horõ, ni’ohe bakha do, ba wolau nilau ba wameta sala, ba ni’amoni’õ, ba ni’ohe baero golombaseŵa, ba uli ba õsi ba tai, ba nitunu. (F. 6, 30. Hez. 43, 21. Heb. 13, 11).  

28 Ba sanunu ya’ia, ba ibabago nukhania ba mondri, awena tola ifuli ia ba golombaseŵa.

29 IV. Ba da’õ huku ba khõmi, gõtõgõtõ wa’ara: ba mbaŵa si fitu, ba zi mewulu, ba mifakao ami, ba lõ tola mihalõ holõŵõ, hadia ia, he niha ba danõ, ba he si fatewu, si so ba ngaimi. (F. 23, 27).

30 Na baŵa da’õ sa lafaigi khõmi wameta zala, ba wangehao ya’ami; horõmi fefu niheta fõna Yehowa.

31 Baŵa salõsu lõ mohalõŵõ ami ia khõmi ba mifakao ami; huku si lõ mamalõmalõ khõmi da’õ.

32 Ere zolau fameta horõ andrõ, nibayoini ba nifo’õsi tanga, ena’õ ihalõ halõŵõ gere, fangali namania; ba i’onukha nukha tarafali andrõ, nukha ni’amoni’õ, (Moz. II. 28, 41),

33 ba iheta zala ba wondrege ni’amoni’õ andrõ; ba sala ba nose wama’ele’õ ba ba naha wame’e sumange, ba iheta; ba ba gere ba ba zato fefu ifaigi wameta zala.

34 Ba huku ba khõmi da’õ, gõtõgõtõ wa’ara dania, wa samuza zi dõfi lafaigi ba Ndraono Gizeraëli wameta horõra fefu. Ba la’o’õ niŵa’õ Yehowa khõ Moze.

SURA MOZE III.

Faza 17

I. Bõi lataba gurifõ na tenga ba naha ni’amoni’õ. II. Tefasugi ba dõdõ, wa lõ tola la’ā ndro ba hadia ia nisasawi.

1 I. Ba humede Yehowa khõ Moze, imane:

2 Hede khõ Ga’aroni ba ba ndraononia ba ba Ndraono Gizeraëli fefu, õmane khõra: Da’õ ia, ni’oroi’õ Yehowa:

3 Dozi Iraono Gizeraëli, na so zanaba ono zaŵi, ba ma ono mbiribiri, ba ma nambi, na ba golombaseŵa itaba, ba ma baero golombaseŵa,

4 ba na lõ i’ohe ba zinga mbawandruhõ nose wama’ele’õ, ba wame’e sumange ya’ia khõ Yehowa, fõna nahia Yehowa andrõ, ba tebe’e horõnia fange’e: no aduwa ndro ibe’e, ba nise’e niha si manõ ba niwara,

5 ena’õ la’ohe Iraono Gizeraëli zumange nitaba andrõ khõra, nibe’ebe’era sumange baero, ba mbenua; khõ Yehowa la’ohe, ba zinga mbawandruhõ nose wama’ele’õ, khõ gere, ba lataba sumange fangorifi khõ Yehowa.

6 Ba itefe naha wame’e sumange khõ Yehowa do andrõ ere, fõna mbawandruhõ nose wama’ele’õ, ba tawõ, ba itunu samohua khõ Yehowa. (F. 4, 31).

7 Ba bõi sa’ae labe’e sumange mbekhu, ba zohorõhorõ ira, zumange nitaba andrõ khõra. Huku si lõ mamalõmalõ khõra da’õ, gõtõgõtõ wa’ara dania.

8 Ba õmane khõra: Dozi ma’uwu Gizeraëli, awõ niha bõ’õ, si so ba khõra, na so zame’e sumange nitunu, ba ma sumange nitaba,

9 ba na lõ i’ohe ba zinga mbawandruhõ nose wama’ele’õ, ba wame’e khõ Yehowa, ba nise’e niha si manõ, ba niwara.

10 II. Ba dozi, he ma’uwu Gizeraëli, ba he niha bõ’õ, si so ba khõra, na so zi manga ndro, ba si fa’udu ndra’o ba niha si manõ, ba use’e ba niwara.

11 Noso nõsi sa zi so ba ndro, ba no utehe khõmi ba naha wame’e sumange, ena’õ labe’e fameta zalami; fameta zala sa ndro andrõ, ba noso andrõ khõnia. (Moz. I. 9, 4. 5. F. 7, 27. Sam. I. 14, 33).

12 Andrõ wa no uŵa’õ ba Ndraono Gizeraëli: Samõsa lõ ba khõmi zi tola manga ndro! He niha bõ’õ, si so ba khõmi, ba lõ tola i’ā ndro.

13 Ba dozi Iraono Gizeraëli, awõ niha bõ’õ, si so ba khõra, na so zahulu hadia ia ba ma fofo, si tola la’ā, ba ifowõi ndro ba ibalugõ tanõ,

14 me no ba ndro fangorifinia andrõ so noso nõsi fefu, hadia ia. Andrõ wa no uŵa’õ ba Ndraono Gizeraëli: Lõ tola mi’ā ndro nõsi, hadia ia, me ba ndro so noso nõsi fefu, hadia ia — dozi si manga ya’ia, ba nihori.

15 Ba dozi si manga gamatela, ba ma nisasawi [gutu ndru’u], he niha ba danõ, ba he niha bõ’õ, ba ibabago nukhania ba mondri, ba ra’iõ, irege bongi; awena abeta wa’ara’iõnia. (Moz. II. 22, 31).

16 Ba na lõ ibabago nukhania, ba na lõ mondri, ba ilu’i horõnia.

SURA MOZE III.

Faza 18

I. Bõi la’o’õ huku niha baero. II. Bõi orudu ira ba ndra alawe sahatõ khõra ba bõi lahalõ. III. Fanenaŵa fohorõni donga zodonga ba horõ bõ’õ ba hadia ia na zi lõ sõkhi ba niha baero.

1 I. Ba humede Yehowa khõ Moze, imane:

2 Hede ba Ndraono Gizeraëli ba õmane khõra: Ya’odo Yehowa, Lowalangimi.

3 Bõi mi’o’õ wolau ba danõ Miserayi, ba zi so ami mege, ba bõi gõi mi’o’õ wolau ba danõ Gana’ana, ba ni’ohegu ya’ami dania; bõi mitõrõ huku khõra.

4 Huku khõgu mi’o’õ ba nifakhoigu mitõngõni ba mitõrõ; no ya’odo Yehowa, Lowalangimi.

5 Andrõ mitõngõni nifakhoigu, awõ huku khõgu: ba zolo’õ ya’ia mõi fangorifi ia; Yehowa ndra’odo. (Hez. 20, 11. Rom. 10, 5. Gal. 3, 12).

6 II. Bõi yamuhatõ’õ ia ha niha ba ndra alawe sabõlõ ahatõ khõnia, bõi yamuheta mbalubalu zaila ia; Yehowa ndra’odo.

7 Saila namau ba saila ninau, ba tebai õheta mbalubalu; no inau, lõ tola õheta mbalubalu zaila ia. (Moz. I. 19, 33).

8 Saila wo’omo namau, ba lõ tola õheta mbalubalu, no saila namau. (F. 20, 11. Moz. V. 27, 20).

9 Saila nakhiu, ono namau, ba ma ono ninau, he ono yomo, ba he baero mege tumbu ia — lõ tola õheta mbalubalu zaila ia. (Moz. V. 27, 22. Sam. II. 13, 14).

10 Saila nono nonou matua ba saila nono nonou alawe — lõ tola õheta mbalubalu zaila ia; noa sa saila ndra’ugõ.

11 Saila nono wo’omo namau, ono namau — lõ tola õheta mbalubalu zaila ia; no talifusõu.

12 Saila dalifusõ namau alawe, ba lõ tola õheta mbalubalu; no fondrege zahatõ khõ namau. (F. 20, 19).

13 Saila dalifusõ ninau alawe, ba tebai õheta mbalubalu, noa sa fondrege zahatõ khõ ninau.

14 Saila dalifusõ namau matua, ba tebai õheta mbalubalu, lõ tola õhatõ’õgõ khõ wo’omonia; no inau. (F. 20, 20).

15 Saila numõnõu, ba tebai õheta mbalubalu: no fo’omo nonou, tebai õheta mbalubalu zaila ia. (Moz. I. 38, 18. Hez. 22, 11).

16 Saila wo’omo dalifusõu, ba tebai õheta mbalubalu, no saila dalifusõu. (Mat. 14, 4).

17 Saila ndra alawe ba saila nononia alawe, ba tebai faoma õheta mbalubalu; ono nononia matua ba ono nononia alawe, ba lõ tõla õhalõ, wameta balubalu zaila ia; no fondrege zahatõ khõu ira — horõ sebua da’õ. (F. 20, 14).

18 Ba lõ’õ gõi tola õfakaerua zi fatalifusõ, wamobõrõ fa’udusa, na õheta zaila ia, ba ngai zi sambua, fatua auri ia. (Moz. I. 29, 27).

19 III. Lõ tola õhatõ’õgõ ba ndra alawe, ba wameta balubalu zaila ia, gõtõ wa’ara’iõnia andrõ. (F. 20, 18. Hez. 22, 10).

20 Lõ tola orudu ndra’ugõ khõ wo’omo nawõu, wangai fa’ara’iõ khõu. (F. 20, 10. Sam. II. 11, 4).

21 Lõ tola õbe’e nonou, ba wame’e sumange Molokho andrõ ya’ia, fa bõi õ’o’aya dõi Lowalangiu; Yehowa ndra’odo. (F. 20, 2. Raz. II. 17, 17).

22 Lõ tola orudu’õ ba ndra matua, lala wa’orudu ba ndra alawe; sogoro ita zi manõ. (Moz. I. 19, 5. F. 20, 13. Rom. 1, 27).

23 Ba zaliŵaliŵa ba danõ, ba lõ tola orudu’õ, wangai fa’ara’iõ khõu; ba ira alawe, ba lõ tola i’edogõ ia ba zaliŵaliŵa ba danõ, ena’õ urudu khõnia; horõ sebua zi manõ. (Moz. V. 27, 21).

24 Ba da’õ fefu, ba bõi mihalõ wa’ara’iõ khõmi; noa sa da’õ fefu mbõrõ wa’ara’iõ niha baero, nitimbagu fõnami. (Raz. II. 17, 15).

25 Ba da’õ ra’iõ danõ, ba ba khõnia uhuku golalõŵania, tobali i’uta’õ zowanua ba khõnia tanõ.

26 Ba mitõngõni sa’ae nifakhoigu andrõ, awõ huku andrõ khõgu, ba sambalõ bõi milau zogoro ita andrõ, he niha ba danõ, ba he niha bõ’õ, si so ba khõmi.

27 Noa sa lafazõkhi horõ andrõ fefu niha ba danõ, fõnami, ba no ra’iõ danõ;

28 fa bõi i’uta’õ ami tanõ, na ra’iõ ami, mibe’e, si mane fanguta’õnia soi niha andrõ fõnami.

29 Ha niha sa zolau sambalõ andrõ, sogoro ita — ba nise’e ba niwara zolau ya’ia.

30 Ba mi’o’õ nifakhoigu andrõ, fa bõi mi’ohia’õ huku andrõ, sihokha mbuda, nilau fõnami, wangai fa’ara’iõ khõmi; Yehowa ndra’odo, Lowalangimi.

SURA MOZE III.

Faza 19

I. Oroisa: ena’õ la’amõni’õ ira khõ Yehowa Iraono Gizeraëli. II. Amakhoita ba wangomasi’õ awõ. III. Ama hoita bõ’õ: ba danõ ba ba huku niha baero, ba ba zi fatewu ba ba zu’asu’a ba ba zaga.

1 I. Ba humede Yehowa khõ Moze, imane:

2 Hede ba mbanua Ndraono Gizeraëli fefu, ba õmane khõra: Yani’amoni’õ ami, me no ni’amoni’õ ndra’odo, ya’odo andre, Yehowa, Lowalangimi. (Moz. II. 22, 31).

3 Ya mu’ata’ufi ninania, awõ namania zamõsana ba mitõngõni luo wolombase andrõ khõgu; Yehowa ndra’odo, Lowalangimi. (Moz. II. 20, 12; 31, 13).

4 Bõi mi’otahõgõ nadu ba bõi mifazõkhi khõmi Lowalangi nifahele, ya’odo Yehowa, Lowalangimi. (Moz. II. 34, 17).

5 Ba na mitaba zumange fangorifi khõ Yehowa, ba mifaigi wame’e, ena’õ omasi ia ami.

6 Na luo wame’emi ya’ia te’ā ia, ba mahemolu õ; ba hadia zi tosai irege ba zi dua wongi, ba nitunu. (F. 7, 15).

7 Ba na te’ā zui ba zi dua wongi, ba no amaedola zobou, ba tenga omasiõ.

8 Ha niha zi manga, ba ihalõ horõnia; noa sa ilau zalakha ba ni’amoni’õ khõ Yehowa, ba nise’e ba niwara niha si manõ.

9 II. Na mibasi mbua danõ khõmi, ba bõi basi irege hinõlu ba bõi ozaragõ nalõŵa, na no aefa wamasiu.

10 Ba he wo’uwo’u ba kabu nagu khõu ba he bua satoru ba danõ ba kabu nagu khõu, ba bõi ozaragõ: õlulu ba zi numana ba ba zi fatewu; ya’odo Yehowa, Lowalangimi.

11 Bõi managõ ami ba bõi mofaya ba bõi falimo, (Moz. II. 20, 15. Efes. 4, 25. Kol. 3, 9. Tes. I. 4, 6).

12 Bõi mõi ba hõlu, ba dõigu, na faya, wango’aya tõi Lowalangimõ; Yehowa ndra’odo. (Moz. II. 20, 7. Mat. 5, 33).

13 Bõi limo nawõu ba bõi osindra’ui hadia ia khõnia; luo genoni, ba lõ tola õtaha irege mahemolu mbanua. (Moz. V. 24, 15. Yak. 5, 4).

14 Bõi elifi zafiso ba bõi ba’a lala zau’a; õ’ata’ufi Lowalangiu; Yehowa ndra’odo. (Moz. V. 27, 18).

15 Bõi mifuyu’õ huku, na tefatunõ huhuo; bõi õ’awõgõ zi numana ba bõi faigifaigi mbawa zalaŵa, õ’atulõ’õ wangefu’õ huku khõ nawõu. (Moz. V. 1, 17; 16, 19). 16 Bõi samõbõgõ si lõ duhu ndra’ugõ ba niwamõ ba bõi āndrõ wamunu awõu; Yehowa ndra’odo. (Moz. II. 23, 1).

17 Bõi so ba dõdõu watiusa khõ dalifusõu; õfahede nawõu, bõi aiwõ’õ; bõi õfalu’igõ khõu horõ, bõrõ ia. (Yoh. I. 2, 11; 3, 15. Mat. 18, 15).

18 Bõi omasi ndra’ugõ wolau balõ, ba bõi be’e bu’u dõdõ ba niwau hadia ia. Õ’omasi’õ nawõu, si mane fangomasi’õmõ ya’ugõ; Yehowa ndra’odo. (Mat. 5, 39. Rom. 12, 19. Tes. I. 5, 15. Yak. 2, 8).

19 Nifakhoigu, ba mitõngõni: lõ tola õ’orudugõ zi dua balõ urifõu, ba wamo’ono, ba lõ tola õfakhõyõ zi dua balõ sinanõ ba nowiu, ba lõ tola õ’obaru mbaru, si dua balõ bana mege ba wanoso ya’ia. (Moz. V. 22, 9).

20 Na so zorudu ba ndra alawe, si no sawuyu niha bõ’õ, si lõ muhõli, si lõ mu’efa’õ, ba nikhau ira; ba tenga sa nibunu, me no tenga ni’efa’õ ia.

21 Ba i’ohe khõ Yehowa, ba zinga mbawandruhõ nose wama’ele’õ, ogautania mbiribiri si matua, sumange fameta horõ.

22 Ba ifaigi khõnia wameta sala khõ Yehowa ere ba mbiribiri andrõ, sumange fameta horõ, ba horõ andrõ, nifazõkhinia; ba tebe’e aefa khõnia horõ andrõ, nifazõkhinia.

23 II. Na mirugi dania danõ, ba na mitanõ ngawalõ geu sowua, ba bõi miteu gamaedola ”guli” andrõ — si a’a mbua —. Medõlu fakhe wa’ara, ba si lõ muboto miŵa’õ, ba lõ tola te’ā mbua.

24 Ba ba ndrõfi fanete zi medõlu fakhe, ba ni’amoni’õ mbuania fefu, fangandrõ saoha gõlõ. 25 Ba ba ndrõfi fanete zi mendrõfa, ba tola mi’ā mbua, ena’õ tedou mbuania khõmi; Yehowa ndra’odo, Lowalangimi.

26 Bõi mi’ā hadia ia fabaya do. Bõi faeta ami ba bõi fakelemu. (F. 3, 17. Moz. V. 18, 10).

27 Bõi mi’ogaolo wanõwõ bumi, ba bõi mifalo’o gambimi. (F. 21, 5. Hez. 44, 20).

28 Bõi mikhoi nõsimi, na so zi mate, ba bõi misua gulimi; Yehowa ndra’odo.

29 Bõi be’e ba zalakha nonou alawe, wamarou ya’ia ba wohorõ, ena’õ bõi mohorõ danõ ba ena’õ bõi anõnõ horõ.

30 Luo wolombase andrõ khõgu, ba mitõngõni, ba mi’ata’ufi ni’amoni’õ andrõ khõgu; Yehowa ndra’odo.

31 Bõi mi’ae ba zogawi bekhu ba ba zi faeta; bõi misofu khõra hadia ia, fa bõi ra’iõ ami ba khõra mibe’e; Yehowa ndra’odo, Lowalangimi. (F. 20, 6. Sam. I. 28, 8).

32 Na so zi no tohare huwa, ba maoso ndra’ugõ ba õfosumange zatua ba õ’ata’ufi Lowalangimõ; Yehowa ndra’odo.

33 III. Ba na so zi fatewu khõu, ba danõmi, ba bõi mifakao ia.

34 Ya si mane awõmi niha ba danõ niha bõ’õ andrõ, si so ba khõmi, miŵa’õ, õ’omasi’õ ia, si mane fangomasi’õmõ ya’ugõ, noa sa si fatewu gõi ami ba danõ Miserayi no; Yehowa ndra’odo Lowalangimi.

35 Bõi mifuyu’õ huku, na tefatunõ huhuo, ba bõi falimo ba helo, ba ma ba zaga, ba ma ba lauru. (Moz. V. 25, 15).

36 Faliëra satulõ ba saga satulõ ba lauru satulõ ba tumba satulõ mifake; Yehowa ndra’odo, Lowalangimi, si no mangeheta ya’ami ba danõ Miserayi.

37 Mitõngõni sa’ae nifakhoigu andrõ, fefu, awõ huku andrõ khõgu, fefu, ba mi’o’õ; Yehowa ndra’odo.

SURA MOZE III.

Faza 20

I. Fotu na mame’e adu ba na mohorõ. II. Bõi orudu ira ba niha baero.

1 I. Ba humede Yehowa khõ Moze, imane:

2 Õŵa’õ ba Ndraono Gizeraëli: Dozi Iraono Gizeraëli, awõ niha bõ’õ si so ba khõra, na so zame’e ba Molokho andrõ ononia, ba huku mate hukunia; latebu kara ia niha ba danõ. (F. 18, 21).

3 Ba udunia ndra’odo, ba use’e ia ba niwania, bõrõ me no ibe’e ba Molokho andrõ nononia, ba wame’e ra’iõ ni’amoni’õ andrõ khõgu, ba ba wango’aya tõigu andrõ, ni’amoni’õ.

4 Ba na la’osilõmilagõ ena’õ niha ba danõ nilau niha si manõ, na ibe’e ba Molokho andrõ nononia, fa lõ labunu ia,

5 ba udunia sa atõ ndra’odo ba udu nga’õtõnia, ba use’e ia ba niwara, fabaya dozi lolo’õ khõnia, ba wame’e adu andrõ, wamosumange Molokho andrõ.

6 Ba ha niha zi mõi ba zogawi bekhu ba ba zi faeta, si no amaedola zohorõ khõra, ba udunia ndra’odo ba use’e ia ba hunõ niwara. (F. 19, 31).

7 Ba mi’amoni’õ ami, ena’õ ni’amoni’õ ami; Yehowa sa ndra’odo, Lowalangimi. 8 Andrõ mitõngõni nifakhoigu andrõ, ba mi’o’õ; Yehowa ndra’odo, same’e ni’amoni’õ ya’ami.

9 Dozi, ha niha zangelifi amania ba inania, ba huku mate hukunia; noa sa i’elifi namania ba inania — horõ fange’e zi no tohare khõnia. (Moz. II. 21, 17).

10 Ba na so zohorõni donga zodonga, ha niha zohorõni donga nawõnia, ba huku mate hukura, he sohorõ, ba he nihorõni andrõ. (F. 18, 20. Yoh. 8, 5).

11 Ba na so zorudu khõ wo’omo namania, ba no iheta mbalubalu zaila namania ba huku mate hukura, faoma darua ira; amaedola horõ fange’e zi no tohare khõra. (F. 18, 8).

12 Ba na so zohorõni umõnõnia, ba huku mate hukura, faoma darua ira; no horõ sebua nifazõkhira, amaedola horõ fange’e zi no tohare khõra. (F. 18, 10).

13 Ba na so zorudu ba ndra matua, si mane fa’orudu ba ndra alawe, ba no horõ sebua nifazõkhira, faoma darua ira, ba huku mate hukura, no amaedola horõ fange’e zi no tohare khõra. (F. 18, 22).

14 Ba na so zangai ira alawe ba na ihalõ gõi nina, ba horõ sebua da’õ; nitunu auri ia, awõ ndra alawe andrõ, fa bõi mamaha ba khõmi horõ. (F. 18, 17).

15 Na so zohorõni saliŵaliŵa ba danõ ba huku mate hukunia, ba saliŵaliŵa ba danõ andrõ gõi, ba mibunu. (F. 18, 23).

16 Ba na ihatõ’õ ia ba zaliŵaliŵa ba danõ ira alawe, ena’õ orudu khõnia, ba õbunu ndra alawe andrõ, awõ zaliŵaliŵa ba danõ andrõ; huku mate hukura, no amaedola horõ fange’e zi no tohare khõra.

17 Ba na so zangai talifusõnia, ono namania, ba ma ono ninania, na tobali i’ila zaila ia ba na i’ila gõi da’õ zaila ndra matua, ba no salakha, ba nihori ira, ba zanehe niwara; no iheta mbalubalu zaila dalifusõnia ba no tohare khõnia horõ ibe’e. (F. 18, 9).

18 Ba na so zorudu ba ndra alawe gõtõ wa’afõkhõ dalunia, na iheta mbalubalu zaila ia, balubalu gumbu andrõ khõnia, ba na ya’ia gõi zangeheta balubalu gumbu ndro andrõ khõnia, ba nihori ira ba hunõ niwara, faoma darua ira. (F. 18, 19).

19 Saila dalifusõ ninau ba saila dalifusõ namau, ba tebai õheta mbalubalu; sangeheta balubalu wondrege zahatõ khõnia zi manõ, ba no tohare khõra horõ labe’e. (F. 18, 12).

20 Ba na so zorudu khõ wo’omo dalifusõ namania, ba no iheta zaila dána namania, ba no tohare khõra horõ labe’e — si mate lõ ono ira. (F. 18, 14).  

21 Ba na so zangai fo’omo dalifusõnia, ba salakha da’õ; no sangeheta saila dalifusõnia ia — si mate lõ ono ira. (F. 18, 16).

22 II. Ba mitõngõni sa’ae nifakhoigu andrõ, fefu, awõ huku andrõ khõgu, fefu, ba mi’o’õ, fa bõi i’uta’õ ami tanõ, ba ni’ohegu ya’ami dania, ena’õ mowanua ami ba da’õ.

23 Bõi mi’o’õ huku niha andrõ, nitimbagu fõnami, me no lalau da’õ fefu, irege ogorodo ira. (F. 18, 28).

24 Andrõ wa umane khõmi: Khõmi dania danõra, ube’e okhõtami — tanõ si falawu susu ba ŵe ŵani, ya’odo andre, Yehowa, Lowalangimi, si no mangoniagõ ya’ami ba niha baero.

25 Ba mifaehusi sa’ae ira zi õfa ahe salakha zi tenga salakha, ba he fofo salakha ba si tenga salakha, ba bõi mibe’e ni’ogorofi ami ba zi õfa ahe, ba ma ba wofo, ba ma ba ngawalõ hadia ia, saliŵaliŵa ba danõ, ni’oniagõgu, ena’õ salakha ia miŵa’õ.

26 Ba ni’amoni’õ ami khõgu, me no ni’amoni’õ ndra’o, ya’odo andre Yehowa, ba no u’oniagõ ami ba niha baero, ena’õ tána khõgu ami.

27 Ba na so ndra matua, ba ma ira alawe si so bekhu ba wogawi bekhu bõ’õ, ba ma si so bekhu waetasa, ba huku mate hukura, nitebu kara; no horõ fange’e, si tohare khõra.

SURA MOZE III.

Faza 21

I. He lawisa ere andrõ. II. Ba he wisa ere sebua. III. Ha niha zi tebai mõi ere.

1 I. Ba imane Yehowa khõ Moze: Be’e li ba gere andrõ, iraono Ga’aroni, õmane khõra: Lõ tola ihalõ fa’ara’iõnia mboto zi mate ba niwara ere.

2 Ha sahatõ khõnia, fondrege zahatõ, inania ba amania ba ononia matua ba ononia alawe ba talifusõnia matua,

3 ba talifusõnia alawe, sahatõ khõnia, ono alawe, si lõ muhalõ na — ha da’õ zi tola ihalõ fa’ara’iõnia.

4 Lõ tola ibe’e ra’iõ ia ba niwara, wanõrõ salakha khõnia.

5 Lõ tola latõwõ galizuzura ba lõ tola lafalo’o gambira ba he fogoi õsira, ba lõ tola. (F. 19, 27. 28).

6 Ni’amoni’õ khõ Lowalangira irá, ba bõi la’o’aya dõi Lowalangira, me same’e sumange Yehowa ira, sumange nifatõrõ ba galitõ, õ Lowalangira, andrõ wa ni’amoni’õ ira.

7 Sohorõhorõ ba si no muhorõni, ba tebai la’owalu, ba he ira alawe nitibo’õ ndra matua, ba lõ tola lahalõ, me no ni’amoni’õ khõ Lowalanginia gere. (Hez. 44, 22).

8 Andrõ wa ni’amoni’õ ia khõu, me ya’ia zame’e gõ Lowalangiu; ni’amoni’õ ia õŵa’õ; me no ni’amoni’õ ndra’o, ya’odo andre, Yehowa, same’e ni’amoni’õ ya’ami.

9 Ba na ibõrõtaigõ mohorõ nono gere alawe, ba salakha namania ibe’e, nitunu auri ia.

10 II. Ba si no ere sebua ba dalifusõnia, si no mulau ba hõgõ fanikha famayoini andrõ, si no mufo’õsi tanga ba si no mufonukha nukha [ni’amoni’õ] andrõ, ba lõ tola ifehombo mbunia ba lõ tola itika nukhania. (Moz. II. 28, 41).

11 Lõ tola mõi ia yomo si so si mate; amania na’i ba inania, ba lõ tola ibe’e fa’ara’iõnia.

12 Lõ tola irõi ni’amoni’õ andrõ, fa bõi ifatõrõ zalakha ba ni’amoniõ andrõ khõ Lowalanginia; noa sa tohare khõnia we’amoni’õ andrõ ba wanikha famayoini andrõ khõ Lowalanginia; Yehowa ndra’odo. (Moz. II. 28, 38).

13 Si ndruhu nono alawe ihalõ fo’omonia,

14 lakha ba nitibo’õ ba si no muhorõni ba sohorõhorõ, ba lõ tola ihalõ; ha ono alawe iwara, zi tola ihalõ fo’omonia,

15 fa bõi salakha nga’õtõnia ba niwara ibe’e; Yehowa sa ndra’odo, same’e ni’amoni’õ ya’ia.

16 III. Ba humede Yehowa khõ Moze, imane:

17 Hede khõ Ga’aroni, õmane: Na so ba nga’õtõu zi so sala ba nõsinia, he gõtõ iada’e, ba he ba gõtõ dania, ba lõ tola mõi ia, ba wame’e gõ Lowalanginia andrõ.

18 Ha niha sa zi so hadia ia zi sala ba nõsinia, ba lõ tola mõi, he sau’a, ba he sombuyumbuyu tõla ba he si so sabõda, ba he sanau ndrotondroto, zara, 19 ba he safatõ ahe,

20 ba he safatõ ta’io, ba he sa’ebu, ba he si no afuofuo, ba he si bidõyõ, ba he sobõni, ba he si so gigimõ bõ’õ, ba he sabao bazili.

21 Samõsa lõ’õ si tola mõi, nga’õtõ Ga’aroni, si so si sala ba nõsinia, ba wame’e sumange Yehowa andrõ, nifatõrõ ba galitõ; na so zi sala ba nõsinia, ba lõ tola mõi ia, ba wame’e gõ Lowalanginia. (Heb. 7, 26).

22 Ba tola sa i’ā wõfõ gõ Lowalanginia, he ni’amoni’õ sibai andrõ, ba he ame’ela andrõ ni’amoni’õ.

23 Ha fa lõ tola mõi ia bakha barõ mba’aba’a andrõ, ba lõ tola ihatõ’õ ia ba naha wame’e sumange, me no so zi sala, ba nõsinia; fa bõi ifatõrõ zalakha ba ni’amoni’õ andrõ khõgu; me no Yehowa ndra’odo, same’e ni’amoni’õ ya’ia.

24 Ba iŵa’õ da’õ Moze khõ Ga’aroni ba ba ndraononia ba ba Ndraono Gizeraëli fefu.

SURA MOZE III.

Faza 22

I. Bõi lababaya ni’amoni’õ ere, na ra’iõ ira. II. Ha niha zi lõ tola manga ni’amoni’õ andrõ. III. Hadia zi tola sumange.

1 I. Ba humede Yehowa khõ Moze, imane:

2 Ŵa’õ khõ ndra A’aroni iraononia, ndramu’onangegõ ba game’ela Ndraono Gizeraëli andrõ, ni’amoni’õ, ni’amoni’õra khõgu, fa bõi la’o’aya dõigu andrõ ni’amoni’õ; Yehowa ndra’odo.

3 Õmane khõra: Na so ha niha ba nga’õtõmi fefu, he gõtõ iada’e, ba he ba gõtõ dania, zi hatõ’õ ya’ia ba game’ela ni’amoni’õ andrõ, ni’amoni’õ Ndraono Gizeraëli khõ Yehowa, fatua ra’iõ ia, ba nise’e ba duduma hõrõgu zi manõ; Yehowa ndra’odo.

4 Ha niha ba nga’õtõ Ga’aroni zobou auri ba ha niha zi so si hulõ zonana no, ba lõ tola i’ā wõfõ game’ela ni’amoni’õ andrõ, irege ifuli aheta khõnia wa’ara’iõnia andrõ. Na so zi no mombambaya si no ra’iõ ba zi mate, ba ma si no ahele ula, (F. 15, 16),

5 ba ma si no mombambaya kuõkuõ, fangara’iõnia, ba ma niha, fangara’iõnia, na so hadia ia wa’ara’iõ ba niha andrõ,

6 ha niha zombambaya si mane da’õ, ba si ra’iõ, irege bongi, ba lõ tola i’ā wõfõ game’ela ni’amoni’õ andrõ, na lõ mondri ia ua.

7 Ba ha si’ai aekhu luo, ba lõ’õ sa’ae fa’ara’iõ; awena tola i’ā wõfõ game’ela andrõ ni’amoni’õ, õnia sa atõ da’õ.

8 Amatela ba nisasawi [gutu ndru’u], ba lõ tola i’ā, fa ihalõ fa’ara’iõnia; Yehowa ndra’odo. (Moz. II. 22, 31).

9 Ba la’o’õ sa’ae nifakhoigu andrõ, fa bõi lahare’õ khõra horõ ba da’õ, ba fa bõi mõi famunura, na lalau zalakha khõnia; Yehowa ndra’odo, same’e ni’amoni’õ ya’ira.

10 II. Niha bõ’õ, ba lõ tola i’ā ni’amoni’õ, samõsa lõ’õ; si fatewu khõ gere ba enoninia, ba lõ tola la’ā ni’amoni’õ.

11 Ba na ihõli zawuyu ere, ba tola i’ā wõfõ da’õ; si manõ gõi zi tumbu yomo khõnia — ya’ira zi tola manga wõfõ gõnia.

12 Ono gere alawe, nihalõ niha bõ’õ, ba lõ tola i’ā wegero andrõ, nihalõ ba game’ela andrõ ni’amoni’õ.

13 Ba ono gere alawe, si no mate ira matua, ba ma na nitibo’õ ia, ba si lõ ono, sangawuli khõ ndra amania, si mane me iraono ia, ba tola i’ā wõfõ gõ namania; ba niha bõ’õ, ba lõ’õ manõ tola i’ā da’õ.

14 Ba na so zi manga ni’amoni’õ si tenga ni’odõdõgõ, ba sambua ni’olima inõnõ, ba ifuli khõ gere, awõ ni’amoni’õ andrõ.

15 Ba ya’ira andrõ [ere], ba bõi lalau zalakha ba game’ela Ndraono Gizeraëli andrõ ni’amoni’õ — nihalõra si no amaedola wegero khõ Yehowa —,

16 fa bõi lahare’õ khõra horõ ba lalõra andrõ, na la’ā game’elara andrõ, ni’amoni’õ; Yehowa sa ndra’odo, same’e ni’amoni’õ ya’ira.

17 III. Ba humede Yehowa khõ Mose, imane:

18 Hede khõ ndra A’aroni iraononia ba ba Ndraono Gizeraëli fefu, ba õmane khõra: Na so ma’uwu Gizeraëli, ba ma niha bõ’õ, si so ba khõra, same’e sumange — ame’ela amabu’ula li hadia ia, ba ma saoha gõlõ, nibe’era khõ Yehowa sumange nitunu —,

19 ba [mifaigi] ena’õ ni’omasi’õ ami ibe’e: urifõ si lõ sala, si matua, saŵi, ba ma ono mbiribiri, ba ma nambi.

20 Si so si sala hadia ia, ba lõ tola mibe’e; lõ’õ sa ibe’e omasiõ ami ena’õ. (Mal. 1, 8).

21 Ba na so zame’e khõ Yehowa sumange fangorifi, saŵi, ba ma biribiri, he ba wanõrõ amabu’ula li, ba he na saoha gõlõ, ba si lõ sala nibe’e, ena’õ omasiõ ia ibe’e; lõ tola so hadia ia zi sala ba khõnia.

22 Si lõ hõrõ ba si no afatõ ndrotondroto zara ba si no mesokho ba sofaosa ba si so gigimõ hadia ia, ba lõ tola mibe’e khõ Yehowa zi manõ, ba lõ tola mibe’e ba naha wame’e sumange, sumange Yehowa, nifatõrõ ba galitõ. (Moz. V. 15, 21).

23 Ba saŵi, ba ma biribiri si tõra fa’anau gahe, ba ma si tõra fa’adogodogo ba tola õbe’e saoha gõlõ; ba na mibe’e sumange amabu’ula li ena’õ, ba lõ ibe’e omasiõ ami.

24 Ba he si no aboto bazili; ba ma si no murasa, ba ma si no mu’etu’õ, ba ma si no mufõlõ, ba lõ tola mibe’e khõ Yehowa. Lõ tola mibali’õ si manõ hadia ia, ba danõmi,

25 ba lõ’õ gõi tola mihalõ ba niha bõ’õ, nibe’e õ Lowalangimi; noa sa molemba khõra zi sala — sambõ zolemba khõra — andrõ wa lõ labe’e omasiõ ami.

26 Ba humede Yehowa khõ Moze, imane:

27 Na so zi tumbu, ma ono zaŵi, ba ma ono mbiribiri, ba ma ono nambi, ba fitu bongi labe’e nifaenu ninania, ba na no aefa zi fitu bongi ba na ara moroi andrõ, ba omasiõ na tebe’e sumange Lowalangi, nifatõrõ ba galitõ.

28 Saŵi ba biribiri, ba lõ tola mi’endrongagõ khõ nononia wanaba ya’ia, si ha ma’õkhõ.

29 Ba na mibe’e khõ Yehowa zumange fangandrõ saoha gõlõ, ba mifaigi, ena’õ omasiõ ami ibe’e.

30 Na luo da’õ te’ā ia; lõ tola misaigõ hadia ia, irege mahemolu mbanua; Yehowa ndra’odo.

31 Ba mitõngõni sa’ae goroisagu andrõ, ba mi’o’õ; Yehowa ndra’odo.

32 Ba bõi mi’o’aya dõigu andrõ, ni’amoni’õ, ena’õ ni’amoni’õ ndra’o ba hunõ Ndraono Gizeraëli; Yehowa ndra’odo, same’e ni’amoni’õ ya’ami,

33 si no mangeheta ya’ami ba danõ Miserayi, ba we’amõi Lowalangimi — ya’odo andre, Yehowa.

SURA MOZE III.

Faza 23

I. Oroisa ba luo sabato. II. Owasa fasa. III. Owasa ba wamasi. IV. Owasa nilau torofe. V. Owasa fangatulõ. VI. Owasa nose daha geu.

1 I. Ba humede Yehowa khõ Moze, imane:

2 Hede ba Ndraono Gizeraëli, ba õmane khõra: Ba mbaŵa gowasa andrõ khõ Yehowa, niŵa’õmi owuloa ba gowasa ba ni’amoni’õ — ba da’õ mbaŵa gowasa andrõ khõgu:

3 Õnõ ngaluo wa’ara, ba tola tehalõhalõ halõŵõ; ba luo si fitu andrõ, ba baŵa wolombase manõ, ba owuloa ba ni’amoni’õ andrõ; sambalõ lõ tola mihalõ halõŵõ ba da’õ, ba nahiami fefu, — bawa wolombase ia khõ Yehowa. (Moz. II. 20, 10; 23, 12).

4 II. Da’õ mbaŵa gowasa khõ Yehowa, baŵa gowuloa ba ni’amoni’õ, nifarongogõmi, na no irugi inõtõ:

5 Ba mbaŵa si fõfõna, ba zi meweleõfa, na tánõ owi, ba fasa khõ Yehowa. (Moz. II. 12, 18. 43. Moz. IV. 28, 16. Moz. V. 16, 1).

6 Ba ba zi mewelelima ba mbaŵa da’õ, ba owasa roti si lõ mu’aisõni khõ Yehowa; fitu bongi wa’ara mi’ā roti si lõ mu’aisõni.

7 Ba mbõrõta mbaŵa da’õ, ba owuloa khõmi ba ni’amoni’õ, ba lõ tola mihalõ hadia ia halõŵõ, na luo da’õ.

8 Ba fitu bongi wa’ara mibe’ebe’e zumange Yehowa, nifatõrõ ba galitõ; ba na luo si fitu, ba owuloa zui ba ni’amoni’õ andrõ; ba sambalõ lõ tola mihalõ halõŵõ na luo da’õ.

9 Ba humede Yehowa khõ Mose, imane:

10 Hede ba Ndraono Gizeraëli, ba õmane khõra: Na no mirugi danõ andrõ, nibe’egu khõmi dania, ba na mamasi ami ba da’õ, ba sambõbõ mi’ohe khõ gere, si a’a nibasi, ba ihahae ngambõbõ andrõ,

11 fõna Yehowa, ena’õ omasiõ ami ibe’e; sara wongi aefa sabato ihahae ere.

12 Ba na luo ihahae ngambõbõ andrõ, ba mibe’e nono mbiribiri si lõ sala, si dõfi fa’ebua, sumange nitunu, khõ Yehowa,

13 ba sambua ni’ofulu hamo si sõkhi, nifaruka fanikha, sumange ni’ā, sumange nifatõrõ ba galitõ, samohua khõ Yehowa, awõ zumange nibadu, samba selefe agu.

14 Ba roti ba bõra nifakõë ba he nifufu, ba lõ tola mi’ā, irege luo da’õ, irege no mibe’e zumange andrõ khõ Lowalangimi. Amakhoita si lõ tebulõ da’õ, gõtõgõtõ wa’ara dania, nitõrõmi, gõtõgõtõ wa’ara mitou, ba nahiami fefu.

15 III. Ba mi’erai dania mbongi, i’otarai luo andrõ na aefa zabato andrõ, ba nibe’emi ngambõbõ nihahae andrõ, alo’o fitu migu, (Moz. V. 16, 9),

16 irege luo aefa luo sabato si fitu mi’erai, 50 wongi, ba mibe’e khõ Yehowa zumange ni’ā, fakhe si bohou andrõ.

17 Samba omo ami, ba dombua mibe’e roti nihahae; roti si dombua ni’ofulu hamo si sõkhi mege, ba nibe’e tanõmõ roti ba wamogõ ya’ia, si a’a zumange khõ Yehowa.

18 Ba awõ roti andrõ, ba mibe’e: fitu rozi nono mbiribiri si lõ sala, si dõfi fa’ebua, ba sageu nono zaŵi si matua, ba dua geu mbiribiri si matua, ni’ohe sumange nitunu khõ Yehowa da’õ, awõ zumange ni’ā andrõ ba sumange nibadu, si fabõbõ ba da’õ, sumange nifatõrõ ba galitõ, samohua khõ Yehowa.

19 Ba awõ da’õ ba sageu mibe’e nambi si matua, sumange fameta horõ, ba dua rozi nono mbiribiri, si dõfi fa’ebua, sumange fangorifi.

20 Ba ihahae ere, awõ zi a’a roti andrõ, sumange nihahae fõna Yehowa, awõ nono mbiribiri andrõ, zi dua rozi; ni’amoni’õ khõ Yehowa da’õ, ba tána khõ gere.

21 Ba na luo da’õ mifarongogõ — milau gowuloa ba ni’amoni’õ; ba sambalõ lõ tola mihalõ halõŵõ na luo da’õ. Amakhoita si lõ tebulõ da’õ, gõtõgõtõ wa’ara dania, nitõngõnimi ba nahiami fefu, gõtõgõtõ wa’ara.

22 Ba na mibasi mbua danõ, ba bõi õbasi nowi irege hinõlu ba bõi õ’ozaragõ nalõŵa, na no aefa wamasiu: faoma õlulu ba zi numana ba ba zi fatewu; Yehowa ndra’odo, Lowalangimi. (F. 19, 9).

23 IV. Ba humede Yehowa khõ Moze, imane:

24 Hede ba Ndraono Gizeraëli, õmane: Ba mbaŵa si fitu, ba luo wolombase khõmi ba wasulõna; milau dorofe, famasugi ba dõdõ, ba owuloa ba ni’amoni’õ. (Moz. IV. 29, 1).

25 Sambalõ lõ tola mihalõ halõŵõ na luo da’õ, ba mibe’e khõ Yehowa zumange nifatõrõ ba galitõ.

26 V. Ba humede Yehowa khõ Moze, imane:

27 Ba si mewulu ba mbaŵa si fitu andrõ, ba baŵa wangatulõ; milau gowuloa ba ni’amoni’õ na luo da’õ, ba mangalulu ami, ba mibe’e khõ Yehowa zumange nifatõrõ ba galitõ. (F. 16, 29. Moz. IV. 29, 7).

28 Ba na luo da’õ, ba sambalõ lõ tola mihalõ halõŵõ, me baŵa wangatulõ, ena’õ lafaigi khõmi wameta sala khõ Yehowa, Lowalangimi.

29 Ha niha sa zi lõ mangalulu, na luo da’õ, ba nise’e ba niwara.

30 Ba ha niha zangai hadia ia halõŵõ, na luo da’õ, ba uhori ba hunõ niwara.

31 Lõ tola mihalõ hadia ia halõŵõ, na luo da’õ; amakhoita si lõ tebulõ da’õ, gõtõgõtõ wa’ara dania, ba nga’õnga’õtõ mitou, ba nahiami fefu.

32 Baŵa wolombase manõ miŵa’õ ba mangalulu ami. Bongibongi ba zi meziŵa ba mbaŵa da’õ — i’otarai na bongibongi, irugi bongibongi mahemolu — ba mitõngõni wolombase andrõ niŵa’õ.

33 VI. Ba humede Yehowa khõ Moze, imane:

34 Hede ba Ndraono Gizeraëli, õmane: Ba zi mewelelima ba mbaŵa si fitu andrõ, ba lalau gowasa nose daha geu andrõ khõ Yehowa, fitu ngaluo wa’ara. (Moz. II. 23, 16. Moz. IV. 29, 12. Moz. V. 16, 13).

35 Ba mbõrõta ngaluo da’õ, ba owuloa ba ni’amoni’õ; sambalõ lõ tola mihalõ halõwõ, na luo da’õ.

36 Fitu bongi wa’ara ba mibe’ebe’e zumange Yehowa, nifatõrõ ba galitõ; ba na luo si ŵalu, ba milau gowuloa ba ni’amoni’õ ba mibe’e zumange Yehowa, nifatõrõ ba galitõ — owuloa na luo da’õ, ba lõ tola mihalõ hadia ia halõŵõ. (Yoh. 7, 37).

37 Da’õ ginõtõ gowasa andrõ, nifarongogõmi owuloa ba ni’amoni’õ, ena’õ labe’e zumange Yehowa, nifatõrõ ba galitõ — sumange nitunu ba sumange ni’ā ba sumange nitaba ba sumange nibadu, balazi mbaŵa nibe’e ya’ia,

38 lõ lai zabato andrõ khõ Yehowa ba lõ lai game’elami andrõ ba he sumange amabu’ula li khõmi, fefu, ba he ame’elami saoha gõlõ, fefu, nibe’emi khõ Yehowa.

39 Ba ba zi mewelelima ba mbaŵa si fitu andrõ, na mibasi mbua danõ, ba fitu ngaluo milau gowasa andrõ khõ Yehowa; luo si fõfõna, ba luo wolombase ba si manõ gõi luo si ŵalu.

40 Ba na luo si fõfõna andrõ, ba mihalõ khõmi mbua geu si sõkhi ba bulu nohi ba daha geu sarege bulu ba daha mbou ba fitu bongi wa’ara omuso dõdõmi fõna Lowalangimi Yehowa,

41 ba ero rõfi milau ia, owasa khõ Yehowa, fitufitu bongi wa’ara; amakhoita si lõ tebulõ da’õ, gõtõgõtõ wa’ara dania, nitõngõnimi gõtõgõtõ wa’ara: ba mbaŵa si fitu milau ia.

42 Ba nose daha geu sosó ami ba da’õ, fitu bongi wa’ara; dozi niha ba danõ, Iraono Gizeraëli, ba baose sosó,

43 ena’õ aboto ba dõdõ nga’õtõmi dania, wa no baose ufa’aso Ndraono Gizeraëli, me uheta ira ba danõ Miserayi, ya’odo andre, Yehowa, Lowalangimi.

44 Ba i’ombakha’õ ba Ndraono Gizeraëli ginõtõ gowasa andrõ khõ Yehowa Moze.

SURA MOZE III.

Faza 24

I. Fangehao fandru ba famazõkhi roti andrõ, nifaigifaigi. II. Fanguhuku sango’aya Lowalangi. III. Oroisa ba wolau balõ.

1 I. Ba humede Yehowa khõ Moze, imane:

2 Ŵa’õ ba Ndraono Gizeraëli, ndramu’ohe khõu zi ndruhu wanikha mbua zai nifufu, fanikha wandru andrõ, ena’õ bõi matemate wandru. (Moz. II. 27, 20).

3 Baero mba’aba’a, fomba’a zura goroisa, ba nose wama’ele’õ, ibe’e A’aroni, bõi tebulõ fõna Yehowa, i’otarai na bongi, irugi moluo. Amakhoita si lõ tebulõ da’õ, gõtõgõtõ wa’ara dania, nitõngõnimi, gõtõgõtõ wa’ara.

4 Ba naha wandru andrõ, si ndruhu mbalaki, ibe’e wandru andrõ, si lõ tebulõ fõna Yehowa.

5 Ba õhalõ hamo si sõkhi ba õbali’õ kue, felendrua nga’õrõ — dombua ni’ofulu zagõrõ kue —

6 ba õbahogõ ba meza si ndruhu mbalaki andrõ, fõna Yehowa, dombua baho, õnõ’õnõ nga’õrõ zambua baho.

7 Ba sambusambua baho, ba õfao zi ndruhu gumõyõ, samobua da’õ, awõ roti andrõ, amaedola zumange nifatõrõ ba galitõ, nibe’e khõ Yehowa.

8 Ero na luo sabato ibahogõ fõna Yehowa, bõi mamalõmalõ, õmõ Ndraono Gizeraëli, si lõ tebulõ, gõtõgõtõ wa’ara dania.

9 Ba õ ndra A’aroni iraononia dania ena’õ ba naha ni’amoni’õ la’ā; tána khõnia sa, ni’amoni’õ sibai, fõfõ zumange andrõ, nifatõrõ ba galitõ; huku si lõ tebulõ, gõtõgõtõ wa’ara dania. (Moz. II. 29, 32. Sam. I. 21, 6. Mat. 12, 4).

10 II. Ba mõi ba Ndraono Gizeraëli nono Ndraono Gizeraëli ira alawe — Dawa Miserayi namania — ba fasoso da’õ ba Ndraono Gizeraëli bõ’õ samõsa.

11 Ba i’o’aya dõi Yehowa ono Ndraono Gizeraëli ira alawe andrõ ba mangelifi; ba la’ohe ia khõ Moze (tõi ninania, ba Selomita, ono Dibiri, mado Dano).

12 Ba lakuru ia, irege larongo lala, niŵa’õ Yehowa.

13 Ba humede Yehowa khõ Moze, imane:

14 Fa’ohe’õ baero golombaseŵa zangelifi andrõ, ba dozi samondrongo mege, ba latufa hõgõnia tangara, ba awena labunu ia, latebu kara sato fefu.

15 Ba ba Ndraono Gizeraëli, ba õmane: Ha niha zangelifi khõ Lowalanginia, ba ilu’i horõnia.

16 Ba sango’aya tõi Yehowa, ba huku mate hukunia; lõ’õ sa tola lõ latebu kara ia sato fefu. He si fatewu, ba he niha ba danõ na i’o’aya dõi Yehowa, ba nibunu.

17 III. Na so zamunu niha, ba huku mate hukunia. (Moz. II. 21, 12).

18 Na so zamunu urifõ zageu, ba i’ali — noso wangali noso.

19 Na so zamesokho awõnia, ba nisulõni khõnia nilaunia:

20 Safatõ wangali zafatõ, hõrõ wangali hõrõ, boha wangali mboha; nilaunia khõ nawõnia, da’õ nilau khõnia.

21 Samunu urifõ [sageu], ba i’ali; ba samunu niha, ba nibunu gõi.

22 Ha sara huku nibe’e ba khõmi, he ba zi fatewu, ba he ba niha ba danõ; Yehowa sa ndra’odo, Lowalangimi.

23 Ba humede Moze ba Ndraono Gizeraëli; ba la’ohe baero golombaseŵa zangelifi no mege ba latebu kara. La’o’õ Iraono Gizeraëli ni’oroi’õ Yehowa khõ Moze.

SURA MOZE III.

Faza 25

I. Amakhoita ba ndrõfi sabato. II. Dõfi wa’owuawua dõdõ. III. Ya’ia mbalazi ba wowõli hadia ia ba ba wananu. IV. Fanenaŵa famohare ana’a. V. Oroisa he lawisa ba zawuyu, Iraono Gizeraëli.

1 I. Ba humede Yehowa khõ Moze ba hili Zina’i, imane:

2 Hede ba Ndraono Gizeraëli ba õmane khõra: Na no mirugi dania danõ, nibe’egu khõmi, ba mosabato khõ Yehowa danõ. (Moz. II. 23, 11).

3 Me õnõ fakhe wa’ara õhalõhalõ danõ nowi ba õgutiguti nagu khõu, ba õ’ozaragõ mbua.

4 Ba ba ndrõfi si fitu, ba mosabato danõ, sabato khõ Yehowa. Ba lõ tola õhalõ nowiu ba da’õ ba lõ tola ogutiguti nagu khõu.

5 Ba hadia zowua manõ, aefa wamasiu mege, ba lõ tola õbasi, ba bua nagu andrõ, si lõ mugutiguti, ba lõ tola õ’ozaragõ, me dõfi sabato ba danõ. (Moz. V. 15, 1).

6 Hadia mbua danõ gõtõ wolombase andrõ, ba õmi — õu, ba õ zawuyumõ, ono matua ba ono alawe, ba õ genoniu, ba õ zi fatewu khõu, yomo khõu.

7 Ba õ gurifõu gõi ba õ gutu ndru’u ba danõmi fefu mbua danõ andrõ.

8 II. Ba õ’erai ndrõfi sabato andrõ, fitu — mewitu wa fitu fakhe, tobali õfa wulu a siŵa fakhe gõtõ ndrõfi sabato si fitu.

9 Ba ba da’õ õfalau’õ dorofe, ba zi mewulu ba mbaŵa si fitu; na baŵa wangatulõ andrõ, ba sagõrõ tanõ mifalau’õ dorofe,

10 ba mi’amoni’õ ndrõfi si lima wulu andrõ, mifarongogõ ba da’õ wa’aefa, fa’aefa niha fefu ba danõ. Dõfi wa’owuawua dõdõ miŵa’õ, ba dozi ami, ba mangawuli khõmi gokhõtami, ba mangawuli ba niwara zamõsana.

11 Dõfi wa’owuawua dõdõ ia, miŵa’õ, ndrõfi si lima wulu andrõ. Ba lõ tola manaru ami ba da’õ, ba lõ tola mibasi zowua manõ, ba he bua nagu andrõ, si lõ mugutiguti, ba lõ tola mi’ozaragõ.

12 Me no dõfi wa’owuawua dõdõ, ba ni’amoni’õ ia, miŵa’õ. Moroi ba danõ mi’ā mbuania.

13 Da’õ ndrõfi wa’owuawua dõdõ andrõ, ba zangawuli ba zamõsana okhõtania.

14 III. Na so ni’amawau khõ nawõu, ba ma na õ’õli hadia ia khõ nawõu, ba faoma bõi mibe’e te’ala nawõmi.

15 Balazi ha me uga fakhe aefa ndrõfi wa’owuawua dõdõ, na õ’õli hadia ia khõ nawõu, ba balazi ha me uga fakhe mamasi na, na i’amawa khõu. 16 Na oya na ndrofi, ba õ’ebua’õ khõnia mbõli, ba na ambõ fa’oya, ba õ’ambõsi nibe’e; ha me uga famasi sa i’amawa khõu.

17 Bõi yamube’e te’ala nawõnia zamõsana; ata’ufi Lowalangiu, me no Yehowa ndra’odo Lowalangimi. 18 Andrõ mi’o’õ nifakhoigu, mitõngõni huku andrõ khõgu ba mi’o’õ, ena’õ lõ hadia ia khõmi ba danõ.

19 Ba mowua dania danõ, ena’õ abuso ami ba ena’õ lõ hadia ia khõmi ba danõ. 20 Ba na miŵa’õ ena’õ: Hadia gõma ba ndrõfi si fitu andrõ, na lõ manaruga ba na lõ tola ma’ozaragõ mbua danõ?

21 ba na dõfi si õnõ andrõ, ba ube’e li ba howuhowu andrõ khõgu, ena’õ ndrohundrohu ba zi medõlu fakhe misõndra khõnia, ibe’e.

22 Ba na manaru ami, na dõfi si ŵalu, ba mi’aga’aga mbua danõ mege; irugi ba ndrõfi si siŵa — tobali mi’aga’aga zi tohõna, irege so zi bohou.

23 Tanõ, ba lõ tola mi’amawa tenga sanutõ, me no khõgu danõ, niha bõ’õ sa ami ba si fatewu khõgu.

24 Andrõ mitehe wananu benua, fefu gofu heza ba danõ andrõ, si no mõi tanõmi. 25 Na tobali numana dalifusõu, ba na i’amawa osa mbenuania, ba yamõi sananu, salahinia, wondrege zahatõ khõnia, yamusanu ni’amawa dalifusõnia andrõ. (Rut. 4, 4. Yer. 32, 7).

26 Ba na so zi lõ sananu, ba na i’ila i’alui ndrohundrohu wananu,

27 ba yamusõbi ndrõfi andrõ aefa wamawa, ba hadia zi tosai, ba yamufuli ba ni’amawania ya’ia, ena’õ mangawuli khõnia gokhõtania.

28 Ba na lõ isõndra zoguna fananu, ba lõ tebulõ khõ zowõli ni’amawania andrõ, irege dõfi wa’owuawua dõdõ andrõ; ba da’õ dania aefa, tobali mangawuli khõnia gokhõtania andrõ.

29 Ba na so zamawa omo, bakha barõ gõli mbanua, ba tola ifuli isanu na barõ ndrõfi andrõ, ni’amawania ya’ia; irege da’õ lafonoso ia, ba wananu.

30 Ba na lõ musanu irege alua ndrõfi; ba tetutu danõ ba zowõli andrõ ba ba nga’õtõnia, ba nomo andrõ, bakha barõ gõli mbanua, ba lõ’õ sa’ae mangawuli ba ndrõfi wa’owuawua dõdõ andrõ.

31 Ba omo ba mbanua side’ide, si lõ mufasui õli, ba si fabõbõ ba mbenua miŵa’õ; tola nisanu, ba mangawuli na dõfi wa’owuawua dõdõ andrõ.

32 Ba ba nomo nono Lewi andrõ — omo ba mbanua misa, khõra — ba tetehe ba nono Lewi wananu, gofu ha wa’ara.

33 Ba na so nono Lewi si lõ mananu ya’ia, ba mangawuli khõnia nomo andrõ, ni’amawania, na dõfi wa’owuawua dõdõ andrõ, ba mbanua si so okhõtania; omo andrõ sa, ba mbanua nono Lewi, ba si lõ tebulõ khõra, ba hunõ Ndraono Gizeraëli.

34 Ba benua andrõ ba zinga mbanua khõra, ba lõ tola te’amawa, me no khõrakhõra, gõtõgõtõ wa’ara, okhõta si lõ tebulõ.

35 IV. Ba na tobali numana dalifusõu, na awuwu ia ba ngaiu, ba õtolo ia, amaedola niha bõ’õ, amaedola zi fatewu, ena’õ isõndra mbalazonia ba ngaimõ.

36 Lõ tola õfohare gana’au khõnia, bõi fabali khõnia, õ’ata’ufi Lowalangiu, ena’õ isõndra mbõli gõnia talifusõu, ba ngaimõ. (Moz. II. 22, 25).

37 Ana’au, ba lõ tola õfohare khõnia, ba õnia, nibe’eu, ba bõi fabali.

38 Yehowa ndra’odo, Lowalangimi, si no mangeheta ya’ami ba danõ Miserayi, ba wame’e khõmi tanõ Gana’ana, ba we’amõi Lowalangimi.

39 V. Ba na tobali numana dalifusõu ba ngaiu ba na i’amawa ia khõu, ba bõi fohalõŵõ ia halõŵõ zawuyu. (Moz. II. 21, 2).

40 Amaedola enoni ia khõu õbe’e, ba amaedola zi fatewu, yamõi ngoningoniu, irege dõfi wa’owuawua dõdõ andrõ.

41 Ba da’õ dania õ’efa’õ ia, awõ ndraononia, ba ifuli ia ba niwara, ba mangawuli khõnia gondrõita namania.

42 Enonigu sa ira, nihetagu, ba danõ Miserayi; lõ tola la’amawa sawuyu ira.

43 Bõi faitoisi wamatõrõ ya’ia, õ’ata’ufi Lowalangiu. (Efes. 6, 9. Kol. 4, 1).

44 Ba na omasi’õ zawuyu ono matua ba sawuyu ono alawe, ba ba niha baero, si tefasui ya’ami — ba khõra mihõli zawuyu ono matua ba sawuyu ono alawe.

45 Ba he iraono zi fatewu andrõ, ba khõmi, ba hana na mihõli õsa, awõ nga’õtõra andrõ, ba khõmi, si tumbu ba danõmi; hana na khõmi da’õ.

46 Ba hana na mifa’ema ba ndraonomi furimi, ondrõita, ena’õ okhõtara, ba hana na lõ tebulõ sawuyumi ira. Ba ba dalifusõmi andrõ, Iraono Gizeraëli — ba faoma bõi mifaitoisi, wamatõrõ awõmi. (Raz. I. 9, 22).

47 Ba na falukha niha bõ’õ, ba ma si fatewu, õna’õna so khõnia ba ngaiu, ba na tobali numana dalifusõu ba ngainia, ba na i’amawa ia ba niha bõ’õ, ba ma ba zi fatewu, ba ma ba nga’õtõ niha bõ’õ ba ngaimõ,

48 ba nitehe khõnia wananu, na no i’amawa ia; hana na talifusõnia zananu ya’ia;

49 ma tána mamania ba ma ono dána namania zananu ya’ia, ba ma ha niha zabõlõ ahatõ khõnia, iwara, zananu ya’ia, ba ma zui, na isõndra gana’a, ba hana na ya’ia zananu ya’ia.

50 Ba i’erai khõ zowõli ya’ia, i’otarai ndrõfi, me i’amawa ia, irugi ndrõfi wa’owuawua dõdõ andrõ. Ba ba mbõli, ba balazi ha me uga fakhe, me i’amawa ia; amaedola genoni ia, gõtõ we’asonia khõnia.

51 Ba na oya na ndrõfi si tosai, ba i’erai ba wamuli õsa, bõlinia, ba wananu ya’ia.

52 Ba na ambõ fa’oya ndrõfi si tosai, irege dõfi wa’owuawua dõdõ andrõ, ba i’erai khõnia; balazi ha me uga fakhe ia khõnia, ha wa’ebua ifuli, ba wananu ya’ia.

53 Amaedola zi manga gazi, dõfidõfi, ia khõnia; lõ tola õfaigi manõ lõ hedehede, na ifaitoisi wamatõrõ ya’ia.

54 Ba na lõ falukha ia wananu si manõ, ba ba ndrõfi wa’owuawua dõdõ andrõ dania aefa ia, awõ ndraononia.

55 Khõgu sa Ndraono Gizeraëli, enonigu; enonigu, nihetagu ba danõ Miserayi, ya’odo andre, Yehowa, Lowalangimi.

SURA MOZE III.

Faza 26

I. Famabu’u howuhowu. II. Famangaha fangelifi. III. Tefuli tetema ira, na mangalulu ira.

1 I. Lõ tola mifazõkhi khõmi nadu, ba ma famaedo, kara nitoto, ba bõi mitaru’õ khõmi harefa, ba he gowe ni’oniha, ba bõi mifataro ba danõmi, ba wangalulu khõnia, me no Yehowa ndra’odo Lowalangimi. (Moz. II. 20, 4. Moz. V. 16, 22).

2 Luo wolombase andrõ khõgu mitõngõni, ba mi’ata’ufi ni’amoni’õ andrõ khõgu; Yehowa ndra’odo.

3 Ba na mi’o’õ nifakhoigu ba na mitõngõni goroisagu, wolo’õ ya’ia, (F. 19, 30),

4 ba ube’e deu khõmi, ero na inõtõ, ena’õ mowua danõ, ba he eu sowua ba mbenua, ba ena’õ na mowua. (Moz. V. 11, 14; 28, 1 b. t.).

5 Ba irugi dania wangozara bua nagu famõbõrõ fakhe, ba khõmi ba fangozara bua nagu andrõ, ba irugi wanaru, ena’õ fahõna khõmi mbalazo, ba ena’õ lõ hadia ia khõmi, ba danõ.

6 Lõ fanuwõnuwõ ube’e, ena’õ mi’ila mõrõ lõ si keani ya’ami. Uheta ba danõmi gutu ndru’u andrõ, ba lõ irugi danõmi si’õli ube’e. (Yob. 11, 19).

7 Emalimi, ba mitimba dania ba ikhamõ ira si’õlimi, ba woloira khõmi.

8 Dalima ami, ba otu migohi, ba otu ami, ba fulu ngahõnõ migohi, ba ikhamõ nemalimi si’õlimi, ba woloira khõmi. (Yos. 23, 10).

9 Ba u’otahõgõ ami, ba tedou ami ube’e, ato ami, ba aro wawu’usa li andrõ khõda ube’e.

10 Bua danõ me ndrõfia gõmi: ba tobali miheta zi tohõna, ba wamonaha si bohou [mubasi].

1 Ba u’iagõ ba khõmi, lõ anuzu dõdõgu ami. (Moz. II. 29, 45).

12 Udõrõdõrõi ami, ba Lowalangimi ndra’odo, ba banuagu ami.

13 Yehowa ndra’odo, Lowalangimi, si no mangeheta ya’ami ba danõ Miserayi, fa bõi sa’ae sawuyura ami; no ufatõ dõladõla galo mbagimi, ba mi’ila mifaõga mbagimi ube’e.

14 II. Ba na lõ mifondrondrongo khõgu, na lõ’õ manõ mi’o’õ goroisagu, (Moz. V. 28, 15 b. t. Mal. 2, 2),

15 na lõ ba dõdõmi nifakhoigu andrõ ba na anuzu dõdõmi huku andrõ khõgu, na tobali lõ’õ manõ mi’o’õ goroisagu, wanudugõ fawu’usa li andrõ khõgu,

16 ba u’ohia’õ gõi da’õ, wolau khõmi; sata’u ita ufatõrõ khõmi: fõkhõ baõsi ba fa’aukhu, same’e abõsi hõrõ ba ariri noso. Ba yatobali zayazaya gõlõ wanarumi; emalimi sa’ae zi manga ya’ia.

17 Ba fa’udu ndra’o khõmi, tobali te’ala ami ba nemalimi, ba labe’e barõ mbawara ami si fa’udu khõmi, ba moloi ami, he gõi lõ solohi ya’ami. (Amaed. 28, 1).

18 Ba na lõ’õ zui na mifondrondrongo khõgu dania, ba mewitu u’abe’õ wangotu’õ ya’ami, ba horõmi andrõ,

19 ba uhõndrõgõ hokhami andrõ, si no abe’e, ba timba zi’õli mbanua yaŵami ube’e, ba timba dõla garamba danõmi [wa’abe’e].

20 Ba tobali mifakao ami lõ boto: tanõ, ba lõ mowua, ba he eu sowua ba danõ, ba si lõ bua.

21 Ba na milau zi lõ faudu khõgu, na lõ mifondrondrongo khõgu, ba utohugõ ubago ami, mewitu, luomi ba horõmi.

22 Ba ududu khõmi gutu ndru’u andrõ, ena’õ la’oloi’õ ndraonomi ba ena’õ labubunu gurifõmi, ena’õ alõ wa’atomi labe’e, ena’õ lõ nihaniha ba lala khõmi misa.

23 Ba na lõ’õ zui falukhado ata’u ami ba da’õ, na milau na zi lõ faudu khõgu,

24 ba ulau gõi zi lõ faudu khõmi, ba mewitu ubago ami, ba horõmi andrõ.

25 Ba itõrõ ami si’õli ube’e, folau mbalõ, me no mududugõ wawu’usa li andrõ. Ba na mi’owuloi dania ami yomo ba mbanua, ba ufatõrõ khõmi wõkhõ waba, ba tebe’e ba danga nemali ami.

26 Ba na ufatõ khõmi dendrotendro gõ, ba dafulu dania ndra alawe zamogõ roti khõmi, ha sambua mbowoa, ba lafuli khõmi roti andrõ, nitulo, ba manga ami, ba lõ abuso. (Hos. 4, 10. Mikh. 6, 14).

27 Ba na lõ’õ zui mifondrondrongo khõgu, na milau na zi lõ faudu khõgu,

28 ba ulau gõi zi lõ faudu khõmi, ba wõnugu, ba mewitu u’otu’õ ami, ba horõmi andrõ.

29 Ba mi’ā dania nõsi nonomi matua ba õsi nonomi alawe mi’ā. (Raz. II. 6, 28. Yer. 19, 9. Ngen. Yer. 4, 10).

30 Ba ufufu hilihili andrõ khõmi, ba gowe luo andrõ khõmi, ba urasa, ba u’orudugõ ba mboto nadumi mbotomi si mate, ba ogorodo ami.

31 Banuami, ba ubali’õ adudula, awõ ni’amoni’õ andrõ khõmi, ududugõ, ba lõ’õ sa’ae u’ago wa’amohua zumange andrõ khõmi, si no omasiõ ena’õ.

32 Ya’odo andre zamali’õ tanõ si mate tanõ, ena’õ tobali dõdõ nemalimi andrõ ba da’õ, emalimi si mõi mowanua ba danõ.

33 Ba ya’ami, ba ufazawili ba niha baero, ba usõbi zi’õli moroi furimi; ba yatobali tanõ si mate danõmi ba banuami, ba yatobali adudula.

34 Ba te’ali dania ba danõ ndrõfi wolombase andrõ khõnia, gõtõ tanõ si mate ia, fatua ba danõ nemalimi so ami. Ba da’õ dania molombase danõ, ba itõrõ ndrõfi wolombase andrõ khõnia. (Nga’õt. II. 36, 21).

35 Gõtõ tanõ si mate ia molombase ia — folombase si lõ falukha ia mege, na dõfi wolombase andrõ, niŵa’õ khõmi, me so ami ba danõ.

36 Ba ha niha ami si tosai, ba lõ lala dõdõ ube’e, ba danõ nemalira, ena’õ moloi ira ba weruru zi sagõrõ bulu lehu, ena’õ moloi, si mane foloi na so zi’õli, ba ena’õ alau, he ŵa’ae lõ solohi. (Yes. 30, 17).

37 Ba lalangõ nawõra wa’alau, si mane na so zi’õli moroi furi, he ŵa’ae lõ solohi; ba ya tebai milaŵa nemalimi.

38 Ba yatekiko ami ba niha baero andrõ, hana na i’ā ami tanõ nemalimi andrõ.  

39 Ba ha niha ami si tosai dania, ba hana na ariri ira ba danõ nemalimi, bõrõ horõra andrõ; ba bõrõ gõi golalõŵa ndra tuara õsa, wa sariri ira, si mane da’õ mege.

40 III. Ba na latehe dania horõra, awõ horõ ndra tuara andrõ — wa no farõi ira khõgu — awõ wa no lalau zi lõ faudu khõgu, (Moz. V. 4, 30; 30, 2),

41 bõrõ wa ulau gõi khõra si lõ faudu khõra, awõ wa no u’ohe ira ba danõ nemalira — na mangalulu dania dõdõra andrõ, si lõ muboto, ba na tesulõni khõra horõra andrõ,

42 ba itorõ tõdõgu wawu’usa li andrõ khõgu khõ Yakobo ba fawu’usa li khõ Giza’aki ba fawu’usa li khõ Gaberahamo, ba itõrõ tõdõgu, ba tanõ andrõ, ba itõrõ tõdõgu.

43 Ba saheta sa ira ba danõ, ena’õ tetõrõ khõnia ndrõfi wolombase andrõ, fatua tanõ si mate ia, na no aheta ira; ba khõrá, ba tesulõni horõra andrõ, me no la’ositengagõ huku andrõ khõgu, ba me no anuzu dõdõra nifakhoigu.

44 Ba he ba da’õ dania, na ba danõ nemalira so ira, ba lõ ogorodo ira, fa uhori ira ena’õ, fa ududugõ wawu’usa li andrõ khõma, ena’õ, me no Yehowa ndra’odo, Lowalangimi.

45 Ba itõrõ tõdõgu — ba khõra andrõ — wawu’usa li andrõ khõgu khõ ndra tua, nihetagu ba danõ Miserayi, ba zanehe niha baero, ba we’amõi Lowalangira, ya’odo andre, Yehowa.

46 Da’õ gamakhoita andrõ ba huku ba oroisa, nibe’e Yehowa ba hili Zina’i andrõ, nifa’ema Moze, lala niŵa’õnia ba Ndraono Gizeraëli.

SURA MOZE III.

Faza 27

I. Amakhoita ba gamabu’ula li, na niha ba na urifõ ba na omo ba na benua. II. He lawisa ba zi a’a ba wa’atumbu ba ba nibe’e salakha. III. Khõ Yehowa zi sambua ni’ofulu andrõ, hadia ia.

1 I. Ba humede Yehowa khõ Moze, imane:

2 Hede ba Ndraono Gizeraëli, ba õmane khõra: Na so zanõrõ amabu’ula li khõ Yehowa, ba na niha, dali watõnia, (Moz. IV. 30, 3. Moz. V. 23, 21),

3 ba fatõ ndra matua si dua wulu fakhe, irege õnõ ngafulu, ba lima wulu rufia ba zaga ni’amoni’õ andrõ;

4 ba na ira alawe, ba tõlu ngafulu rufia watõnia.

5 Ba na si melima fakhe, irugi dua wulu fakhe, ba fatõ nono matua, ba dua wulu rufia ba fatõ nono alawe, ba fulu rufia.

6 Ba na si sara waŵa, irugi melima fakhe, ba fatõ nono matua, ba lima rufia, ba fatõ nono alawe, ba tõlu rufia.

7 Ba na si õnõ ngafulu fakhe ba na si tõra, ba fatõ ndra matua, ba felelima rufia, ba fatõ ndra alawe, ba fulu rufia.

8 Ba na no abõlõ numana niha si manõ, na tebai itõrõ watõ andrõ, ba la’ohe khõ gere, ba yamufatõ mbõlinia ere; yamufaigi ere, ha wa’ebua zi tola ibe’e samabu’u andrõ. 9 Ba na urifõ, si tola labe’e sumange Yehowa, ba ni’amoni’õ laŵa’õ fefu nibe’e khõ Yehowa.

10 Lõ tola ifalalini ba lõ tola isalahini, wame’e si sõkhi salahi zi lõ sõkhi, ba ma si lõ sõkhi salahi zi sõkhi; ba na ifalalini zui gurifõ andrõ, ba faoma ni’amoni’õ.

11 Ba na urifõ salakha, si tebai labe’e sumange Yehowa, ba ndramu’ohe khõ gere.

12 Ba yamufatõ mbõlinia ere, na si sõkhi, ba na sambõ fa’asõkhi; ba ba watõ andrõ, niŵa’õ gere, ahono.

13 Ba na edona isanu, ba sambua ni’olima watõ andrõ inõnõ.

14 Ba na so zi amoni’õ khõ Yehowa omonia, ba yamufatõ mbõlinia ere, na si sõkhi, ba na sambõ fa’asõkhi, ba fatõ niŵa’õ gere mbõlinia.

15 Ba na edõna ifuli isanu nomonia si amoni’õ ya’ia mege, ba sambua ni’olima watõnia andrõ inõnõ, ba khõnia sa’ae.

16 Ba na so zi amoni’õ khõ Yehowa benua, fõfõ gondrõita namania mege, ba ba watõnia, ba balazi ha uga lauru tanõmõ; si 25 lauru tanõmõ, ba 50 rufia watõnia.

17 Na ba ndrõfi wa’owuawua dõdõ andrõ i’otarai we’amoni’õ benuania andrõ, ba fatõnia itõrõ.

18 Ba na no aefa ndrõfi wa’owuawua dõdõ na i’amoni’õ, ba yamu’erai khõnia mbõli ere, balazi ha me uga fakhe na, irugi ndrõfi wa’owuawua dõdõ dania, ba lasõbi dania ndrohundrohu ba watõnia andrõ.

19 Ba na edõna zui isanu mbenua andrõ si amoni’õ ya’ia, ba sambua ni’olima watõnia andrõ inõnõ; ba lõ tebulõ wa khõnia.

20 Ba na lõ isanu mbenua andrõ, ba na i’amawa zui ba niha bõ’õ, ba tebai tefuli tesanu;

21 benua andrõ, na aefa dania, na dõfi wa’owuawua dõdõ andrõ, ba ni’amoni’õ khõ Yehowa laŵa’õ, si mane benua nilakha’õ; okhõta gere sa’ae ia.

22 Ba na so zi amoni’õ khõ Yehowa benua ni’õlinia, si tenga fõfõ mbenua ondrõita namania mege, ba yamu’erai khõnia ere,

23 he wisa fatõnia, irege dõfi wa’owuawua dõdõ andrõ, ba fatõ da’õ, ba na luo da’õ ibe’e, ame’ela ni’amoni’õ khõ Yehowa.

24 Ba na dõfi wa’owuawua dõdõ, ba mangawuli ba ni’olinia ya’ia mbenua andrõ, ba zokhõ ya’ia mege ondrõita namania.

25 Fefu watõ, ba saga ni’amoni’õ mbalazi; si samba sekeli [rufia] ba 20 gera. (Moz. II. 30, 13).

26 II. Ba si a’a nono gurifõ, si mõi khõ Yehowa, me no si a’a, ba lõ tola la’amoni’õ; he saŵi, ba he biribiri — khõ Yehowa ia sa’ae.

27 Ba na urifõ salakha, ba nihõli, balazi watõ, ba sambua ni’olima mbõli inõnõ; ba na lõ lasanu, ba ni’amawa, balazi watõ.

28 Ba ba nilakha’õ, ni’amoni’õ niha khõ Yehowa, wolakha’õ ya’ia, nituyu ba zi so khõnia fefu, he niha, ba he urifõ, ba he benua, ondrõita mege, ba lõ’õ manõ tola la’amawa ba lõ tola lasanu; fefu nilakha’õ ba no ni’amoni’õ sibai khõ Yehowa.

29 Na so ha niha, niha nilakha’õ, ba lõ tola lasanu, nibunu sa’ae. (Sam. I. 15, 3).
30 III. Sambua ni’ofulu, fefu, he benua, ba he bua danõ, ba he bua geu, ba khõ Yehowa, ni’amoni’õ khõ Yehowa.

31 Ba na so zomasi mananu õsa ni’õfulu andrõ khõnia, ba sambua ni’olima mbõlinia inõnõ.

32 Ba ba zi sambua ni’ofulu zaŵi ba biribiri, ba ba nifatõrõ si’o [gubalo] fefu, ba ni’erai, fulufulu nga’eu, ba sagesageu ni’amoni’õ khõ Yehowa. (Yer. 33, 13). 33 Bõi lafaigi, na si sõkhi, ba na si lõ sõkhi, ba lõ tola lafalalini. Ba na so zamalalini zui, ba faoma ni’amoni’õ ira, ba lõ tola lasanu.

34 Da’õ goroisa andrõ, ni’oroi’õ Yehowa khõ Moze, ba hili Zina’i, ba Ndraono Gizeraëli.