SURA MATAI’O

Table of Contents

 

SURA MATAI’O

 

MATAIO

Faza 1

 

I.                  Tua Yesu. II. Fa’atumbunia. (A. 1—17: Luk. 3, 23—38.)

 

1 I. Sura mbõrõta Yesu Keriso, ma’uwu Dawido andrõ, ma’uwu Gaberahamo. (Sam. II. 7, 12, 13).

2 Iza’aki nono Gaberahomo, Yakobo nono Giza’aki, Yuda nono Yakobo ba talifusõnia andrõ. (Moz. I. 21, 3; 25, 26; 29, 35). 3 Feresi nono Yuda ba Sera, ononia khõ Damara andrõ. Eseromo nono Weresi. Aramo nono Geseromo. (Moz. I. 38, 29). (Rut. 4, 18—21).

4 Aminadabi nono Garamo, Na’aso nono Gaminadabi, Salemo nono Na’aso.

5 Boasi nono Zalemo, ononia khõ Rakhaba andrõ. Yobedi nono Mboasi, ononia khõ Ruti andrõ. Iza’i nono Yobedi.

6 Dawido nono Giza’i, Dawido razo andrõ. Selomo nono Dawido, ononia khõ wo’omo Guria andrõ. (Sam. II. 12, 24).

7 Rehabeamo nono Zelomo. Abia nono Rehabeamo. Asa nono Gabia. (Nga’õt. I. 3, 10—17).

8 Yozafati nono Asa. Yoramo nono Yozafati Usia nono Yoramo.

9 Yotamo nono Usia. Ahasi nono Yotamo.

10 Hisikia nono Gahasi. Manase nono Hisikia. Amoni nono Manase.

11 Yosia nono Gamoni. Yekhonia nono Yosia ba talifusõnia andrõ, me luo tefawu’a ira, me te’ohe ba Mbabilona. (Eser. 3, 2).

12 Ba me no aefa tefawu’a ira, me te’ohe ba Mbabilona, ba mo’ono Yekhonia, Selatieli nononia. Serubabeli nono Zelatiëli.

13 Abiudi nono Zerubabeli. Eliaki nono Gabiudi. Asori nono Geliaki.

14 Sadoki nono Gasori. Akhimi nono Zadoki. Eliudi nono Gakhimi.

15 Eleasari nono Geliudi. Matana nono Geleasari. Yakobo nono Matana.

16 Yosefo nono Yakobo, Yosefo fo’omo Maria andrõ, ina Yesu, nifotõi Keriso. (F. 27, 17. 22).

17 Tobali fele’õfa nga’õtõ fefu, i’otarai Gaberahamo, irugi Dawido, ba feleõfa nga’õtõ i’otarai Dawido, irugi tefawu’a ira, te’ohe ba Mbabilona; ba i’otarai tefawu’a ira, te’ohe ba Mbabilona, irugi Keriso, ba feleõfa nga’õtõ zui.

18 II. Ba si mané wa’atumbu Yesu Keriso andrõ: Me no ifohu nina Yesu, Maria, Yosefo andrõ, me lõ sorudu ira na, ba terongo, manabina ia khõ Geheha ni’amoni’õ. (Luk. 1, 26—38).

19 Ba ibõhõi manõ ia mena’õ Yosefo, soniha ya’ia, lõ i’ombakha’õ, me niha satulõ ia, lõ edõna i’ailasi. (Moz. V. 24, 1 b. t.).

20 Ba me ifatoutou tõdõnia da’õ, ba hiza, oroma khõnia mala’ika Zo’aya ba wangifi, imane: He Yosefo, ma’uwu Dawido, bõi ata’ufi wangai Maria andrõ, nihamõ; tabina andrõ, si so ba dalunia ba no moroi ba Geheha ni’amoni’õ. (Rom. 3, 1.).

21 Ba madono ia dania, ono matua, ba õbe’e tõi nono andrõ Yesu, me ya’ia zangefa’õ banuania ba horõra. (Luk. 1, 31. Hal. zin. 4, 12; 5, 31).

22 Ena’õ itõrõ niŵa’õ Zo’aya, ni’ombakha’õ zama’ele’õ, andrõ si manõ da’õ fefu; imane sama’ele’õ andrõ:

23 ”Hiza, so dania nono alawe sanabina, ba madono ono maetua, ba labe’e tõi nono andrõ ”Emanu’eli’, ”awõda Lowalangi” geluahania, na la’ali [ba li niha].” (Yes. 7, 14. Tim. I. 3, 16).

24 Ba me tokea Yosefo, ba i’o’õ niŵa’õ mala’ika Zo’aya andrõ khõnia, ihalõ nihania.

25 Ba lõ orudu ira, irugi madono ia, ono matua, ba ibe’e tõi nono Yesu. (Luk. 2, 7. 21).

 

MATAIO

Faza 2

 

I.                  Ere si otarai danõ ba gatumbukha lua. II. Foloi ba danõ Miserayi. III. Famunu ono ba Mbetilekhema. IV. Fangawuli moroi ba danõ Miserayi.

 

1 I. Ba me no tumbu Yesu ba Mbetilekhema, ba Yudaia, me luo razo Herode andrõ, ba hiza gere, moroi ba danõ ba gatumbukha, si mõi ba Yeruzalema. (Luk. 2, 4 b. t.).

2 Lamane: Hezo razo Niha Yehuda andrõ, sawena tumbu? No oroma khõma ndrõfinia ba danõ ba gatumbukha, ba mõiga mangalulu khõnia. (Moz. IV. 24, 17).

3 Ba me irongo da’õ razo andrõ, Herode, ba tobali dõdõnia ba samba banua manõ Yeruzalema, awõnia.

4 Ba ifalukha’õ gere sebua fefu, awõ zangila amakhoita ba niha Yehuda, ba izofuzofu khõra, hadia niŵa’õ, heza tumbu Keriso.

5 Ba lamane khõnia da’õ: Ba Mbetilekhema ba Yudaia, si mané sa ba zura zama’ele’õ: (Yoh. 7, 42).

6 ”Ba ya’ugõ, Betilekhema, ba danõ mado Yuda, ma’ifu tenga fondrege zide’ide ndra’ugõ bazolohe mado Yuda andrõ, me ba khõu i’otarai dania solohe andrõ, sokubaloi banuagu andrõ Iraono Gizeraëli”. (Mikh. 5, 1).

7 Awena ifakaoni’õ gere no mege Herode, ibini’õ wamakaoni’õ, ba izofuzofu sibai khõra, ha mega oroma ndrõfi andrõ (Yes. 60, 1).

8 Ba ifatenge ira ba Mbetilekhema, imane: Mi’ae’e, mi’alualui sibai, heza so nono andrõ, ba na no misõndra, ba mi’ombakha’õ khõgu, ena’õ mõido gõi mangalulu khõnia.

9 Ba me no larongo niŵa’õ razo andrõ, ba mõi ira, ba hiza ndrõfi andrõ, ni’ilara ba danõ ba gatumbukha, mowaõwaõ fõnara, irugi tebato ia faudu zi so ono andrõ.

10 Ba me la’ila ndrõfi andrõ ba omuso sibai dõdõra. 11 Ba mõi ira yomo ba da’õ, ba hiza nono, awõ ninania Maria, ba labalõduhini tou danõ, mangalulu khõnia ba labokai naha gana’ara, mamuala ira khõnia, balaki ba kumõyõ ba emuri. (Sin. 72, 10, b. t.).

12 Ba iŵa’õ khõra Lowalangi, ba wangifi, bõi lafuli ira khõ Herode; ba latõrõ lala bõ’õ, wangawuli ba danõra.

13 II. Ba me no mofanõ ira, ba hiza mala’ika Zo’aya, sangoroma’õ ya’ia khõ Yosefo, ba wangifi, imane: Faoso, ohe nono, awõ ninania, ba oloi ba danõ Miserayi ba ba da’õ iagõ, irege muhededo khõu; i’alui sa dania nono Herode, ba wamakiko ya’ia.

14 Ba maoso ia, i’ohe nono, awõ ninania, ba zi bongi ba isaŵa danõ Miserayi.

15 Ba ba da’õ so ia irugi wa’amate Herode, ena’õ itõrõ niŵa’õ Zo’aya, ni’ombakha’õ zama’ele’õ andrõ, me imane: ”No ukaoni nonogu moroi ba danõ Miserayi”. (Hos. 11, 1).

16 III. Ba me i’ila Herode, no lalimo ia ere andrõ ba mofõnu sibai ia, ba ifatenge, ifabunu’õ fefu ndraono ba Mbetilekhema ba ba zi fasui fefu, i’otarai zi mendrua fakhe fa’ebua, no malõ ba zide’ide moroi andrõ, da i wa’ara andrõ nizofuzofunia ba gere andrõ.

17 Ba da’õ itõrõ niŵa’õ Yeremia andrõ, sama’ele’õ, me imane:

18 ”No terongo wangarõngarõ ba Rama, fege’ege, ba fange’esi sabõlõbõlõ; i’e’esi nononia Rakhela, ba lõ edõna ia larara dõdõnia, me lõ ya’ira sa’ae”. (Yer. 31, 15).

19 IV. Ba me no mate Herode, ba hiza mala’ika Zo’aya, sangoroma’õ ya’ia khõ Yosefo, ba wangifi, ba danõ Miserayi.

20 Imane: Faoso, ohe nono, awõ ninania ba fuli’õ ba danõ Ndraono Gizeraëli, noa sa mate zamunu ono andrõ ena’õ.

21 Ba maoso ia, i’ohe nono, awõ ninania, ba isaŵa danõ Ndraono Gizeraëli.

22 Ba me irongo, no tobali razo Yudaia Gerikhela’o, fangali namania Herode, ba ata’u ia mõi ba da’õ. Ba humede khõnia Lowalangi, ba wangifi; ba isaŵa danõ Galilaia.

23 Mõi ia ba mbanua sotõi Nazareta, ena’õ itõrõ niŵa’õ zama’ele’õ, wa banua Nazareta dania dõinia. (Luk. 2, 39. Yes. 11, 1; 53, 2. Sakh. 6, 12).

 

MATAIO

Faza 3

 

I. Yohane samayagõ idanõ. II. Fangombakhania. III. Tebayagõ idanõ Yesu.

(A. 1—12: Mar. 1, 1—8. Luk. 3, 1—20. Yoh. 1, 6—28.)

 

1 I. Ba me luo da’õ, ba so Yohane andrõ, samayagõ idanõ, mangombakha ia ba danõ si mate, ba Yudaia, imane:

2 Mifalalini gera’erami, noa sa’ae ahatõ mbanua zorugo andrõ. (F. 4, 17).

3 Da’õ sa niŵa’õ Yesaya, sama’ele’õ andrõ, me imane: ”So li zi’ao ba danõ si mate, imane: Mihaogõ lala Zo’aya, mifadaya lalania. (Yes. 40, 3).

4 Ba baru Yohane andrõ, ba bu gondra ba uli zaŵi mbõbõ talu, ba õnia, ba tamo, awõ ŵe ŵani ba gatua. (Luk. 1, 15. Sal. II. 1, 8).

5 Ba mõi baero khõnia mbanua Yeruzalema ba banua Yudaia andrõ, fefu, awõ mbanua si fatambai Yoridano, fefu.  

6 Ba lafabayagõ’õ idanõ ira khõnia ba Yoridano ba la’ombakha’õ horõra. (Hal. zin. 19, 3. 4).

7 II. Ba me i’ila, ato zi mõi khõnia farizaio ba sadukaio, nibayagõ idanõ, ba imane khõra: He ya’ami, ono gulõ! ha niha zangoroma’õ khõmi lala wangefa ba wõnu andrõ dania? (F. 12, 34; 23, 33).

8 Mi’a’asogõ sa’ae mbuabua, si nangea buabua wamalalini era’era.

9 Bõi miwai, tola miŵa’o tõdõmi: Furugõma Gaberahamo; uŵa’õ sa khõmi, i’ila Lowalangi, ibali’õ ma’uwu Gaberahamo gara andre. (Yoh. 8, 33, b. t.).

10 Ba no mutaudugõ wato ba ŵa’a geu, ba fefu dõla geu sa’ae, si lõ bua si sõkhi, ba la’obõ ba latibo’õ ba galitõ. (F. 7, 19. Yoh. 15, 6).

11 Ya’odo, ba idanõ ubayagõ khõmi, ba wamalalini era’era, ba si so furigu dania, ba sabõlõ moroi khõgu; ambõ solohe badagahenia ndra’odo, ba Eheha ni’amoni’õ ba alitõ ibayagõ khõmi da’õ. (Hal. zin. 13, 24. 25; 2, 3. 4; Yes. 4, 4).  

12 So ba dangania dõrinia ba ihaogõ golayama mbasitõ khõnia ba ulitõ, ba ifa’anõ ba halasa ba adaya andrõ, ba itunu ba galitõ si lõ matemate. (A. 13—17: Mar. 1, 9—11. Luk. 3, 21. 22. Yoh. 1, 31—34.)

13 III. Me luo da’õ so Yesu, i’otarai Galilaia, isaŵa Yoridano, khõ Yohane, ba wamabayagõ’õ idanõ ya’ia khõnia.

14 Ba itenaŵa ia Yohane, imane: Moguna sa khõgu tebayagõ idanõ ndra’o khõu, ba mõi ndra’ugõ khõgu?

15 Ba itema linia Yesu, imane khõnia: Lau manõ ua; si manõ sa zi nangea khõda, ba wolo’õ satulõ andrõ, hadia ia fefu.

16 Awena itehe khõnia. Ba me no mubayagõ idanõ Yesu, ba i’anema’õ mõi miyaŵa moroi ba nidanõ; ba hiza, tebokai mbanua si yaŵa, ba i’ila Geheha Lowalangi, si mõi mitou, hulõ marafadi, we’amõi khõnia.

17 Ba hiza li, si otarai zorugo, imane: Onogu da’õ, ono omasiõ, wa’omasigu. (Yes. 11, 2; 42, 1. F. 17, 5. Luk. 9, 25. Fet. II. 1, 17).

 

 

MATAIO

Faza 4

 

I.                  Itandraigõ Yesu Afõkha. II. Mõi ba Galilaia Yesu. III. Ikaoni nifahaõnia si fõfõna andrõ. IV. Mamahaõ ia ba mamadõhõ fõkhõ. (A. 1—11: Mar. 1, 12. 13. Luk. 4. 1—13.)

 

1 I. Aefa da’õ, ba i’ohe ba danõ si mate Yesu Eheha, ena’õ itandraigõ ia Afõkha. (Heb. 4, 15. Moz. I. 3).

2 Ba me lõ si manga ia, õfa wulu wongi wa’ara, ba olofo ia, me aefa da’õ.

3 Ba mõi khõnia zanandraigõ andrõ, imane khõnia: Na ono Lowalangi ndra’ugõ, ba ŵa’õ, ena’õ tobali roti gara andre.

4 Ba itema linia, imane: ”Tenga ha ba gõnia auri niha, ba ngawalõ li fefu, si otarai mbawa Lowalangi, auri ia”. (Moz. V. 8, 3).

5 Ba i’ohe ia ba mbanua ni’amoni’õ andrõ Afõkha, ba mbumbu gosali ifa’aso.

6 Ba imane khõnia: Na ono Lowalangi ndra’ugõ, ba tibo’õgõ tou, noa sa so ba zura: ”Iŵa’õ ba mala’ika andrõ khõnia dania, ba khõmõ andrõ, ba lataya tangara ndra’ugõ, fa lõ manendre gaheu ba gara.” (Sin. 91, 11 b. t.).

7 Imane khõnia Yesu: So gõi ba zura: ”Bõi tandraigõ Zo’aya, Lowalangiu.” (Moz. V. 6, 16).

8 Ba i’ohe zui ia Afõkha, ifasao ba hili salaŵa sibai, i’oroma’õ khõnia mbanua ba guli danõ fefu, awõ lakhõminia,

9 ba imane khõnia: Ahori ube’e khõu da’õ, na õtuhi danõ, ba wangalulu khõgu. 10 Ba imane khõnia Yesu: Beta’õgõ Satana! Noa sa so ba zura: ”Khõ Zo’aya, Lowalangiu, mangalulu ndra’ugõ ba ha ya’ia õfosumange”. (Moz. V. 6, 13. Fam. 22, 8. 9).  

11 Awena irõi ia Afõkha, ba hiza, ba la ondrasi ia mala’ika, mõr ira ngoningoninia. (Heb. 1, 14). (A. 12—17: Mar. 1, 14. 15. Luk. 4, 14. 15.)

12 II Ba me irongo Yesu, no tekuru Yohane, ba ifuli ia ba Galilaia. (F. 14, 3. Luk. 4, 14. 15).

13 Ba iheta ia ba Nazareta, mõi ia fatewu ba Gafanauma, ba zinga mbaŵa nidanõ andrõ, ba danõ mado Nafetali, ba ngai mado Zebuloni. (Luk. 4, 16—31).

14 Ena’õ itõrõ niŵa’o Yesaya, sama’ele’õ andrõ, me imane:

15 ”Tanõ Ndraono Zebuloni ba tanõ Ndraono Nafetali, tanõ ba zinga mbaŵa, yefo Yoridano. Galilaia niha baero andrõ, niha andrõ,

16 sidadao ba zogõmigõmi, ba no la’ila haga sebua, ba no tumbu haga ba zidadao ba danõ wa’amate ba ba lumõ wa’amate.” (Yes. 9, 1. 2).

17 I’otarai da’õ, ba ibõrõtaigõ mangombakha Yesu, imane: Mifalalini gera’erami, noa sa’ae ahatõ mbanua zorugo andrõ! (F. 3, 2). (A. 18—22: Mar. 1, 16—20. Luk. 5, 1—11.)

18 III. Ba me mowaõwaõ ia ba zinga mbaŵa Galilaia andrõ, ba i’ila niha, si fatalifusõ, Simoni, nifotõi Fetero ba Andrea talifusõnia, lalau giri ba mbaŵa, me no tuka giri ira. (Yoh. 1, 35 b. t.).

19 Ba imane khõra: Mi’o’õ ndra’o, ba ubali’õ sama’u’u niha ami.

20 Ba i’anema’õ larõi giri, ba la’o’õ ia. (F. 19, 27).

21 Ba me mofanõ ia ba da’õ, ba i’ila dánõ bõ’õ, darua zui, si fatalifusõ gõi, Yakobo, ono Zebedaio ba Yohane, talifusõnia, no so ba dundraha, awõ namara Sebedaio, mamõnõ kirira. Ba humede ia khõra.

22 Ba la’anema’õ larõi dundraha, awõ namara, ba la’o’õ ia.

23 IV. Ba itõrõi danõ Galilaia ma’afefu, mamahaõ ia ba zekola khõra ba manuriagõ turia somuso dõdõ, turia mbanua Lowalangi andrõ, ba ifadõhõ ngawalõ wõkhõ fefu, awõ ngawalõ wa’atebai, ba niha. (F. 9, 35. Hal. zin. 10, 38).

24 Ba humõngõ duriania ba danõ Ziria ma’asagõrõ. Ba la’ohe khõnia fefu zofõkhõ, hadia ia ngawalõ wõkhõ, ma hadia ia zafõkhõ khõra, awõ zobekhu, awõ zaniri, awõ zi no mate dambai, ba ifadõhõ. (Mar. 3, 7, b. t.).

25 Ba ato zolo’õ ya’ia banua Galilaia, ba si fulu banua, ba banua Yeruzalema, ba banua Yudaia, ba banua yefo Yoridano andrõ. (Luk. 6, 17, b. t.).

 

MATAIO

Faza 5

 

Huhuo Yesu ba hili: I. Famahowu’o si sõkhi buabua. II. Famarou tõdõ nifahaõ. III. Famobawa lala satulõ. (Faz. 5—7: faigi gõi Luk. 6, 20—49.)

 

1 I. Ba me i’ila niha sato andrõ, ba mõi ia ba hili, ba me no mudadao ia, ba la’ondrasi ia nifahaõnia.

2 Ba ibõrõtaigõ fahuhuo, ifahaõ ira, imane:

3 Ya’ahowu zi numana tõdõ, me khõra mbanua zorugo andrõ. (Luk. 6, 20. Yes. 57, 15).

4 Ya’ahowu zebolo tõdõ, me ya’ira zokhõ uli danõ dania. (Sin. 126, 5. Kor. II. 7, 10).

5 Ya’ahowu zabu tõdõ, me ya’ira nirara tõdõ dania. (Sin. 37, 11).

6 Ya’ahowu zolofo ba sowõkhi tõdõ fa’atulõ dõdõ andrõ, me ya’ira ni’abusoi’õ dania. (Luk. 6, 21. Yoh. 6, 35).

7 Ya’ahowu zahakhõ tõdõ, me ya’ira nihakhõsi tõdõ dania. (F. 25, 35. b. t. Luk. 6, 36. Yak. 2, 13).

8 Ya’ahowu zohauhau tõdõ, me ya’ira zangila Lowalangi dania. (Sin. 24, 3—5. Yoh. I. 3, 2. 3).

9 Ya’ahowu zangatulõ’õ niha, me ya’ira nofotõi ono Lowalangi dania. (Heb. 12, 14).

10 Ya’ahowu nigohi ba wa’atulõ dõdõ andrõ, me khõra dania mbanua zorugo andrõ. (Fet. I. 3, 14).

11 Ya’ahowu ami, na la’o’aya ami niha, ba na lagohi ami, ba na siŵa mbalõ labõbõgõ khõmi si lõ sõkhi, na bõrõ ndra’o. (Luk. 6, 22, 23. Fet. I. 4, 14).  

12 Mi’omusoi’õ dõdõmi ba mi’owuawua’õ dõdõmi, me ebua luomi ba zorugo. No si manõ gõi ira, wolohi sama’ele’õ andrõ, fõnami. (Yak. 5, 10. Hal. zin. 7, 52).

13 II. Ya’ami nasio ba guli danõ. Ba na taya wa’asi’asi nasio, ba ha labe’e fangasingasinia? Lõ gunania sa’ae, hatõ fanibo ya’ia, fa lahundrahundra niha. (Mar. 9, 50. Luk. 14, 34. 35).

14 Ya’ami haga ba niha ba guli danõ. Tebai tobini mbanua, si so ba hili yaŵa. (Fil. 2, 15).

15 Lõ’õ gõi tatunu wandru ba tabalugõ tumba yõu, tabe’e yaŵa ba naha wandru, ba ihagaini hadia ia, khõra fefu, si so yomo. (Mar. 4, 21. Luk. 11, 33).  

16 Yasi manõ hagami andrõ, yahumaga ba niha, ena’õ la’ila mbuabuami andrõ, si sõkhi, ba ena’õ lasuno Namami andrõ, si so ba zorugo. (Fet. I. 2, 12).

17 III. Bõi miŵa’õ tõdõmi, ba wowu’ai oroisa, awõ zura zama’ele’õ andrõ, mõi ndra’o; tenga ba wowu’ai, ba wolo’õ oroisa mõi ndra’o. (Rom. 3, 31).

18 Si ndruhu sa niŵa’õgu khõmi, irugi adudu mbanua si yaŵa, awõ danõ, ba lõ awu’a zambua dandra zura andrõ, ba he si sambua niti, ba goroisa andrõ, irege no ahori itõrõ. (Yes. 40, 8. Luk. 16, 17).

19 Andrõ, na so zowu’ai oroisa sambalõ, fondrege zide’ide, ba na imanõ wamahaõ niha, da’õ nifotõi fondrege zide’ide ba mbanua zorugo andrõ. Ba na so zolo’õ ya’ia, ba na samahaõ niha ia, da’õ nifotõi sebua ba mbanua zorugo. (Yak. 2, 10. Dan. 12, 3).

20 Uŵa õ sa khõmi, na lõ arõu tohude wa’atulõ dõdõmi, moroi ba wa’atulõ dõdõ zangila amakhoita andrõ, ba moroi ba wa’atulõ dõdõ warizaio andrõ, ba tebai mõi ami ba mbanua zorugo andrõ. (F. 23, 2. b. t. Luk. 18, 11. 12). 21 No mirongo, wa no muŵa’õ khõ ndra tua: Bõi ange’e; ba na so zange’e, ba gõna ia huku. (Moz. II. 20, 13; 21, 12).

22 Ba ya’o, ba uŵa’õ khõmi: Fefu, ha niha zofõnu khõ dalifusõnia, ba si gõna huku; ba sanguma’õ khõ dalifusõnia: ”sowõhõ mowa ndra’ugõ”, ba nihuku ba rafe sebua andrõ, ba sanguma’õ ”sowõhõ ndra’ugõ”, ba si gõna narako alitõ. (Ysh. 1. 3, 15).

23 Andrõ, na õbe’e game’elau ba naha wame’e sumange, ba na itõrõ tõdõu ba da’õ so hadia ia zinegu dalifusõu khõu, (Mar. 11, 25)

24 ba rõi ba da’õ game’elau fõna naha wame’e sumange, ba ae ua, ba atulõ’õ ndra’ugõ khõ dalifusõu, ba awena õfuli’õ, ba õbe’e game’elau andrõ. (F. 6, 14).

25 Ta’ita’i folo’õ khõ zi fa’udu khõu, fatua so ami ba lala, fa lõ ibe’e ba danga zanguhuku andrõ ndra’ugõ si fa’udu khõu andrõ, ba ibe’e ba danga wazuri ndra’ugõ sanguhuku ba tebe’e ba gurunga ndra’ugõ. (F. 18, 34. 35. Luk. 12, 58. 59).

26 Si ndruhu niŵa’õgu khõu, lõ aefa’õ ba da’õ, na tosai zi sakefe õmõu, si lõ mubu’a.

27 No mirongo, wa no muŵa’õ: Bõi ohorõ! (Moz. II. 20, 14).

28 Ba ya’o, ba uŵa’õ, khõmi: Dozi, ha niha zamaigi ira alawe, wangisõ ya’ia, ba no ihorõni tõdõnia. (Yob. 31, 1).

29 Ba na i’alani ndra’ugõ hõrõu kambõlõ, ba tema koë ia ba tibo’õ. Mohare’õ sa ba da’õ, na tekiko ndrotondrotou zambua, moroi tetibo ba narako mbotou ma’asambua. (F. 18, 9. Mar. 9, 47. Gal. 5, 24).

30 Ba na i’alani ndra’ugõ tangau kambõlõ, ba tema eŵa ia ba tibo’õ. Mohare’õ sa ba da’õ, na tekiko ndrotondrotou zambua moroi tetibo ba narako mbotou ma’asambua. (F. 18, 8. Mar. 9, 43).

31 Ba no muŵa’õ: ”Na so zangefa’õ ngambatõnia ba yamube’e khõnia zura wangefa’õ”. (Mat. 19, 3—9. Moz. V. 24).

32 Ba ya’o, uŵa’õ khõmi: Dozi, ha niha zangefa’õ ngambatõnia, na tenga horõ mbõrõ, ba samohorõ ngambatõnia da’õ, ba sangowalu ni’efa’õ, ba sohorõ. (Luk. 16, 18. Kor. I. 7, 11).

33 No mirongo gõi, wa no muŵa’õ khõ ndra tua: ”Bõi ae ba hõlu, na si lõ duhu, ba õtõro khõ Zo’aya ba zi mõi’õ ba hõlu”. (Moz. III. 19, 12. Moz. IV. 30, 37).

34 Ba ya’o, ba uŵa’õ khõmi: Bõi manõ mi’ae ba hõlu. Bõi mibe’e hõlu mbanua si yaŵa, me no dadaoma Lowalangi. (Yes. 66, 1; F. 23, 16 b. t.).

35 Ba bõi gõi tanõ, me no danedane gahenia, ba bõi gõi Yeruzalema andrõ, me no banua razo sebua. (Sin. 48, 3).

36 Bõi gõi be’e hõlu hõgõu, me sara mbu lõ õ’ila õ’afusi’õ ba lõ õ’ila õ’aitõni. 37 Da’õ wehedemi: Ya’ia, na ya’ia! ba: lõ’õ, na lõ’õ! Ba moroi ba Gafõkha zi tõra da’õ. (Yak. 5, 12).

38 No mirongo, wa no muŵa’õ: ”Hõrõ fangali hõrõ ba ifõ fangali nifõ.” (Moz. II. 21, 23. 24).

39 Ba ya’o, ba uŵa’õ khõmi: Bõi milaŵa zi lõ sõkhi andrõ. Ba na so zamalisi bo’õmõ kambõlõ, ba oro’õ khõnia zi tambai gõi. (Luk. 6, 29. Amaed. 24, 29). 40 Ba na so zangadugõ ya’ugõ, ba wangai barumõ, ba lulu khõnia lembe gõi. (Kor. I. 6, 7).

41 Ba na so zamorege khõu, ba wolohe ya’ugõ awõnia ba lala zi saza fa’arõu, ba ae awõnia zi dua za.

42 Be’e ba zangandrõ khõu, ba bõi erogõ, na so zamalali khõu hadia ia. (Moz. V. 15, 7, b. t. Luk. 6, 30. 34).

43 No mirongo, wa no muŵa’õ: ”Omasi’õ zahatõ khõu, ba yafatiu dõdõu ba zi fatiu tõdõ khõu.” (Moz. III. 19, 18; 23, 3 b. t.).

44 Ba ya’o, ba uwa’õ khõmi: Mi’omasi’õ zi fatiu tõdõ khõmi ba mi’angandrõ, salahi zolohi ya’ami; (Amaed. 25, 21. 22. Luk. 6, 27 b. t. Luk. 23, 34. Hal. zin. 7, 60, Fet. I. 3, 9. Rom. 12, 14—20),

45 ena’õ tobali ono Namami andrõ, si so ba zorugo, ami, me ifatumbu’õ luonia andrõ ba zi lõ sõkhi ba ba zi sõkhi, ba teu andrõ khõnia, ba ibe’e ba zatulõ ba ba zi lõ atulõ. (Luk. 6, 35. Efes. 5, 1).

46 Na mi’omasi’õ sa zomasi ya’ami, ba hadia luomi? Tenga lamanõ gõi sanema beo andrõ? (Luk. 6, 32).

47 Ba na ha talifusõmi mi’owai, ba hadia zi sõkhi nilaumi?

48 Tenga lamanõ gõi niha baero? Andrõ yamo’ahonoa ami, si mane fa’amo’ahonoa Namami andrõ ba zorugo. (Luk. 6, 36. Kol. 3, 15).

 

MATAIO

Faza 6

 

Fanohugõ huhuo ba hili andrõ: I. He wisa wame’e ame’ela ba zi numana. II. He wisa wangandrõ. III. He wisa wamoni. IV. Bõi omasi ita gana’a. V. Bõi ta’abusi tõdõ mbalazo.

 

1 I. Ba mifaigi wa’atulõmi andrõ, bõi ha ba zanehe niha atulõ ami, ena’õ la’ila ami; ba na si manõ, ba lõ luomi khõ Namami andrõ, si so ba zorugo. (F. 23, 5). 

2 Andrõ, na õbe’e game’ela bi zi numana, ba bõi falau’õ dorofe fõnau, si mane samini tõdõ andrõ, ba zekola ba ba newali, ena’õ lasuno ira niha. Si ndruhu niŵa’õgu khõmi, no latema luora. 

3 Ba na mame’e ame’e la ndra’ugõ ba zi numana, ba bõi ya’i’ila tangau kabera hadia nilau dangau kambõlõ, (Rom. 12, 8),

4 ena’õ lõ oroma game’elamõ andrõ; ba isulõni khõu Amau andrõ, sangila si tobini. (Luk. 14, 14).

5 II. Ba na mangandrõ ami, ba bõi si mane samini tõdõ ami. Noa sa omasi ira ba zekola so ira, ba ma ba newali, ba waerua lala misa, na mangandrõ ira, afura oroma ira ba niha. Si ndruhu niŵa õgu khõmi, no latema luora. 

6 Ba ya’ugõ, na mangandrõ’õ, ba ae si bakha ba mbate’e khõu ba kusi mbawandruhõ khõmõ, ba angandrõ khõ Nawau andrõ, ba zi tobini, ba isulõni khõu Amau andrõ, sangila si tobini. (Sal. II. 4, 33). 

7 Ba na mangandrõ ami, ba bõi mi’oya’õ li, si mane niha baero; lawai sa tefondrondrongo khõra, ba wa’oya lira. (Sal. I. 18, 26. Yes. 1, 15). 

8 Andrõ bõi mifaomagõ ami khõra, noa sa i’ila Amami andrõ, hadia zoguna khõmi, he lõ’õ na ni’andrõmi khõnia. (Sin. 38. 10). 

9 Andrõ mimane wangandrõ: He Ama khõma si so ba zorugo! Yate’amoni’õ dõiu. (Luk. 11, 2—4. Sin. 115, 1). 

10 Yatobali banuau fefu niha. Ya’itõrõ zomasi ndra’ugõ, hulõ ba zorugo, yasi manõ gõi ba guli danõ. (Luk. 17, 20 b. t. 22, 42. Sin. 103, 21). 

11 Oma sirugi ma’õkhõ be’e khõma ma’õkhõ andre. (Amaed. 30, 8). 

12 Ba efa’õ khõma horõma, si mane fangefa’õma sala ba zi so sala khõma. (F. 18, 21 b. t.). 

13 Ba bõi ohe ndra’aga ba wanandraigõ, ba efa’õga ba Gafõkha. Me khõu mbanua, awõ wa’abõlõ, awõ lakhõmi, irugi zi lõ aetu. Yaduhu. (F. 26, 41. Kor. I. 10, 13. Tim. II. 4, 18). 

14 Na mi’efa’õ sa’ae zala niha ba i’efa’õ gõi khõmi Amami andrõ, si so ba zorugo. (Mar. 11, 25. 26. Kol. 3, 13).

15 Ba na lõ mi’efa’õ zala niha, ba lõ’õ gõi i’efa’õ khõmi horõmi Amami andrõ.

16 III. Ba na mamoni ami, ba bõi mifangerau mbawami, si mane samini tõdõ; me labalugõ mbawara, afura oroma ira ba niha, ba wamonira andrõ. Si ndruhu niŵa’õgu khõmi no latema luora. (Yes. 58, 5). 

17 Ba ya’ugõ, na mamoni’õ, ba bayoini hõgõu ba sasai mbawau;

18 ena’õ lõ oroma ba niha, na mamoni’õ, ba ena’õ oroma khõ Namau andrõ, si so ba zi tobini, ba isulõni khõu Amau andrõ, sangila si tobini.

19 IV. Bõi mihõna khõmi girõgirõ ba guli danõ, nifakiko hama ba ni’ā howu, nikharu zanagõ ba nitagõ. (F. 19. 21; Luk. 16, 9). 

20 Ba zorugo mihõna khõmi girõgirõ, ba zi lõ ifakiko hama, ba zi lõ i’ā howu, ba zi lõ lakharu sanagõ, ba zi lõ latago. (Luk. 12, 33. Tim. I. 6, 17 b. t.). 

21 Ba zi so girõgirõ khõu sa, ba da’õ gõi so dõdõu dania. 

22 Haga mboto hõrõ; na si sõkhi hõrõu, ba mohaga mbotou ma’asambua. (Luk. 11, 34 b. t.). 

23 Ba na no mofõkhõ hõrõu, ba ogõmigõmi mbotou ma’asambua. Andrõ, na no sogõmigõmi haga andrõ, si so ba dõdõu, ba ha wa’abõlõ wa’ogõmigõmi andrõ.

24 Tebai enoni zi darua nihá, ma fa’udu ia ba zi samõsa ba i’omasi’õ zi samõsa, ba ma zui molemba ia ba zi samõsa, ba i’ositengagõ zi samõsa. Tebai enoni Lowalangi ami ba enoni gana’a gõi. (Luk. 16, 13, Kor. II. 6, 14 b. t. Sal. I. 18, 21). (A. 25—33: Luk. 12, 22—31.)

25 V. Andrõ uŵa’õ khõmi; Bõi mi’abusi tõdõ nosomi, hadia mbalazomi, ba ma botomi, hadia nukhami. Tenga no ebua noso, moroi ba gõ, ba tenga no ebua mboto, moroi ba nukha? (Fil. 4, 6. Fet. I. 5. 7.) 

26 Mifaigi wofo andrõ, ba dalu mbanua, lõ manaru ira ba lõ mamasi, lõ mangõhõna ba halasa ira, ba ibalazoi ira Amami andrõ, si so ba zorugo. Tenga no arõu faehu ami wofo? (F. 10, 29—31). 

27 Ba ha niha ba khõmi zangila mondrou’õ fa’anau nosonia samba si’u, na i’abusi tõdõ? 

28 Ba ba nukha, ba hana wa mi’abusi tõdõ? Mitõngõni ladari mbõhõ andrõ ba danõ, he wisa wanõinia, lõ mohalõŵõ ia, lõ managu. 

29 Ba uŵa’õ khõmi, lõ si manõ wa’asõkhi nukha Zelomo, ba lakhõminia andrõ fefu, si mane nukha zi sara da’õ. 

30 Ba na imanõ Lowalangi wamonukha du’u ba danõ, si so ma’õkhṍ andre, nitibo’õ ba galitõ mahemolu, ba tenga mendrua manõ imanõ khõmi, ya’ami sambõ famati? 

31 Andrõ bõi mibusi dõdõmi ba bõi miŵa’õ: Ha ma’ā? ma: ha mabadu? ma: ha ma’onukha? 

32 A’oi sa ni’alui niha baero da’õ fefu; no’a sa i’ila Amami andrõ, ba zorugo, wa soguna khõmi da’õ fefu. 

33 Mi’ofõnai’õ wangalui banua Lowalangi andrõ, awõ wa’atulõ dõdõ andrõ khõnia, ba tebe’e nõnõnõnõ dania khõmi da’õ fefu. (Luk. 10, 42; 12, 31). 

34 Andrõ bõi mi’abusi tõdõ zoguna mahemolu; mahemolu tesõndra lala zabu dõdõ mahemolu. Noa manõ wamakao zi sarasara ngaluo.

 

MATAIO

Faza 7

 

Fango’ozui huhuo ba hili andrõ: I. Bõi manguhuku niha ita. II. Bõi ta’o’aya ni’amoni’õ. III. Tefondrondrongo wangandrõda. IV. Tuho goroisa. V. Lala ba mbanua Lowalangi. VI. Bõi tafondrondrongo li zamahaõ, samini tõdõ. VII. Amaedola: Omo nitaru’õ ba dete gara. (A. 1—5: Luk. 6, 37—42.)

 

1 I. Bõi mihuku niha, fa bõi tehuku ami. (Rom. 2, 1. b. t.; 14, 10).

2 Hadia huku nifatõrõmi ba niha bõ’õ, da’õ nifatõrõ khõmi zui dania; ba su’asu’a ni’anu’a’õmi, ba la’anu’a’õ zui dania ba wanu’a khõmi. (Mar. 4, 24). 

3 Ba hana wa õ’ila golowingõ, si so ba hõrõ dalifusõu, ba lõ ba dõdõu mboto geu andrõ ba hõrõmõ? 

4 Ba hadia wa õŵa’õ khõ dalifusõu: Base’õ, da’uheta golowingõ andrõ ba hõrõu, ba hiza mboto geu ba hõrõ khõu.

5 Ofõnai’õ ba hõrõu, wangeheta boto geu andrõ, samini tõdõ, ba awena dania õfaigi wameta olowingõ andrõ ba hõrõ dalifusõu.

 

6 II. Bõi mibe’e õ nasu ni’amoni’õ andrõ, ba bõi mitibo’ṍ ba mba’o mbawi manimani andrõ khõmi, fa bõi lahundragõ ahera bawi ba fa bõi labali’õ ira furi, ba wanasawi ya’ami. (A. 7—11: Luk. 11, 9—13.)

7 III. Mi’angandrõ ba tebe’e khõmi; mi’angalui, ba misõndra, mibõkõbõkõ mbawandruhõ, ba tebokai khõmi. (F. 21, 22, Yoh. 14, 14).

8 Dozi sangandrõ manema, ba sangalui, ba isõndra, ba khõ zamõkõmõkõ bawandruhõ, ba tebokai. 

9 Ma ha niha ba khõmi niha, same’e khõ nononia kara, na i’andrõ roti khõnia? 

10 Ba ma same’e ulõ, na i’andrõ gi’a?

11 Andrõ, na mi’ila mibe’e ba ndraonomi game’ela si sõkhi, ya’ami si lõ sõkhi, ba tenga mendrua manõ ibe’e zi sõkhi Amami andrõ, si so ba zorugo, ba zangandrõ khõnia? (Yak. 1, 5. 6. 17).

 

12 IV. Andrõ, fefu hadia ia zomasi ami lalau khõmi niha, da’õ gõi milau khõra; da’õ sa goroisa andrõ ba da’õ niŵa’õ zama’ele’õ andrõ. (Luk. 6, 31. Rom. 13, 8—10).

 

13 V. Mitõrõ mbawa gõli sise’ise andrõ, me no ebua mbawa gõli ba me no ebolo lala saekhu ba wa’atekiko andrõ, ba me no ato zanõrõ ya’ia. (Luk. 13, 24).

14 Ba me no ide’ide mbawa gõli ba me no ise’ise lala saekhu ba wa’auri andrõ, ba me lõ ato zanõndra ya’ia.

15 VI. Mi’angelamaisi zama’ele’õ andrõ, si falimo, si mõi khõmi, si so nukha mbiribiri, ba bakha, ba asu gatua, si manga niha, ira. (F. 24, 4. 5. 24. Hal. zin. 20, 29). 

16 Ba mbuabuara aboto ba dõdõmi ira. Hadia, teteteu mbua nagu ba za’asa’a mao, ba ma bua marafala ba lato? (Luk. 6, 44. Yak. 3, 12). 

17 Si manõ wa i’owua mbua si sõkhi fefu geu si sõkhi, ba eu sobou, ba i’owua mbua si lõ sõkhi. (F. 12, 33 b. t.). 

18 Tebai i’owua mbua si lõ sõkhi eu si sõkhi ba tebai i’owua mbua si sõkhi eu sobou. 

19 Fefu geu si lõ mowua bua si sõkhi, ba te’obõ ba tetibo’õ ba galitõ. (F. 3, 10). 

20 Andrõ, ba mbuabuara aboto ba dõdõmi ira. 

21 Lõ dozi molala dania ba mbanua zorugo andrõ si faso’aya khõgu, wanguma’õ: He So’aya! he So’aya! ha solo’õ somasi Namagu andrõ, si so ba zorugo. (Luk. 6, 46. Yak. 1, 22—25). 

 

22 Ato dania zanguma’õ khõgu, na luo da’õ: He So’aya! he So’aya! Hadia, tenga tõimõ khõma, ba wama’ele’õ, ba hadia, tenga tõimõ khõma, wamofanõ bekhu, ba hadia, tenga no oya nifazõkhima tandra, soroi ba dõimõ andrõ? (Luk. 13, 25 b. t.).

23 Ba ha da’õ dania, ba lõ ubini’õ khõra, umane: Lõ urai fa’ila khõmi, miheta ami khõgu, ya’ami solau si lõ atulõ. (F. 25, 41).

24 VII. Andrõ, fefu ha niha zamondrongo niŵa’õgu andre, ba solo’õ, ba ba niha satuatua, sanaru’õ omonia ba zokara, fakhilikhili ia. (Luk. 6, 47. 48. Yoh. 13, 17). 

25 Ba ilau teu sabõlõbõlõ, so molõ, ilau angi, itõrõ nomo andrõ, ba lõ aso’a ia, me no nitaru’õ ba dete gara. 

26 Ba fefu ha niha zamondrongo niŵa’õgu andre, si lõ molo’õ, ba ba niha sambõ tõdõ, sanaru’õ omonia ba gawu nasi, fakhilikhili ia. (Luk. 6, 49). 

27 Ba ilau teu sabõlõbõlõ, so molõ, ilau angi, itõrõ nomo andrõ, ba aso’a, abõlõbõlõ wa’aso’ania. (Hez. 13, 11 b. t.). 

28 Ba tobali, me no i’o’ozui huhuonia andrõ Yesu, ba tobali dõdõ zato ba wamahaõnia. (Mar. 1, 22. Luk. 4, 32). 

29 Me no famahaõ zabõlõ wamahaõnia ya’ira, ba tenga si mane ba zangila amakhoita andrõ khõra.

 

MATAIO

Faza 8

 

I.                  Ifadõhõ mbou auri Yesu, II. ba fõkhõ zawuyu gumandra andrõ ba Gafanauma III. ba fõkhõ matua Wetero, ira alawe, IV. ifahaõ ira ba wolo’õ ya’ia, V. itenaŵa mbade; VI. ifadõhõ wõkhõ zobekhu, darua. (A. 1—4: Mar. 1, 40—45; Luk. 5, 12—15.)

 

1 I. Ba ato zolo’õ ya’ia, me mõi ia mitou, moroi ba hili. 

2 Ba hiza zobou auri, si mõi khõnia, mangalulu khõnia, imane: He Tua, õ’ila õfadõhõ wõkhõgu, na edõna ndra’ugõ. 

3 Ba i’oro’õ dangania, ibabaya, imane: Edõna ndra’o, yadõhõ! Ba i’anema’õ dõhõ mbou aurinia.

4 Ba imane khõnia Yesu: Faigi, fa bõi õ’ombakha’õ ba niha, ba ae oroma’õ ndra’ugõ khõ gere ba be’e game’ela andrõ, niŵa’õ Moze, ba wamaduhu’õ khõra. (Luk. 17, 14. Moz. III. 14, 2 b. t.). (A. 5—13: Luk. 7, 1—10.)

5 II. Ba me mõi ia miyomo ba Gafanauma ba i’ondrasi ia kumandra, mangandrõ khõnia, imane: 

6 He Tua, so yomo zawuyugu, tou ba zalo manõ, no mate dambai, a’oi so wa’afõkhõ. 

7 Imane khõnia: Mõido mufadõhõ wõkhõnia. 

8 Ba itema linia kumandra andrõ, imane: He Tua, ambõ ndra’o mõi’õ ba nomogu, ba hede manõ, ha sambua li, ba dõhõ wõkhõ zawuyugu. (Sin. 107, 20). 

9 Ya’odo sa gõi, ba no niha si so barõ mbaŵa zalaŵa, ba so barõ mbawagu zaradadu, ba na uŵa’õ ba zi samõsa: Ae’e, ba mofanõ ia, ba ba zi samõsa: Aine, ba so ia; ba na uŵa’õ khõ zawuyugu: Halõŵou da’õ, ba ihalõ. 

10 Ba me irongo da’õ Yesu, ba ahõlihõli dõdõnia, ba imane ba zolo’õ ya’ia: Si ndruhu niŵa’õgu khõmi, ba Ndraono Gizeraëli na i, ba lõ nisõndragu famati si manõ. 

11 Ba uŵa’õ khõmi, ato dania zi otarai danõ ba gatumbukha, awõ zi otarai danõ ba gaekhula ba manga ira, awõ ndra Aberahamo, Iza’aki, Yakobo ba mbanua zorugo andrõ, (Luk. 13, 29), 

12 ba nitibo’õ baero nono mbanua andrõ ba zogõmigõmi, baero sibai, ba fege’ege dania ba da’õ, ba fatangisa mboha. (F. 23, 13; 25, 30).

13 Ba imane Yesu khõ gumandra andrõ: Fuli’õ, ya’itõrõ zi faduhu dõdõu. Ba ba da’õ sibai dõhõ wõkhõ zawuyu no mege. (F. 9, 22. 29; 15, 28). (A. 14—17: Mar. 1, 29—34. Luk. 4, 38—40.)

14 III. Ba me mõi yomo Yesu ba nomo Wetero, ba i’ila matuania ira alawe, tou ba zalo, akhõmõ. (Kor. I. 9, 5). 

15 Ba ira’u danga ba dõhõ wa’akhõmõ, maoso ia mangai gõ Yesu. 

16 Ba me bongi, ba ato la’ohe khõnia sobekhu; ba ifofanõ mbekhu linia ba dozi sofõkhõ, ba ifadõhõ wõkhõ.

17 Ena’õ itõrõ niŵa’õ Yesaya, sama’ele’õ andrõ, me imane: ”No iheta wa’atebaida ba no yaia zolui fõkhõda.” (Yes. 53, 4. Fet. I. 2, 24).

18 IV. Ba me i’ila Yesu, ato niha, sowulo khõnia, ba iŵa’õ la’õtõ mbaŵa. (Luk. 8, 22). 

19 Ba i’ondrasi ia sangila amakhoita, samõsa, imane khõnia: He samahaõ, u’o’õ ndra’ugõ, gofu heza mõi’õ. (Luk. 9, 57 b. t.). 

20 Ba imane khõnia Yesu: So dõgi narõ hili ba zigõlu ba so gazuni ba wofo ba dalu mbanua, ba khõ Nono Niha, ba lõ naha wemõrõ. (Kor. II. 8, 9). 

21 Ba imane khõnia nifahaõ bõ’õ: He Tua, tehe khõgu, ena’õ mõido ua mogo’o amagu.

22 Ba imane khõnia: O’õ ndra’o ba ndramuko’o zi mate khõra niha si mate. (Efes. 2, 1 b. t.). (A. 23—27: Mar. 4, 35—41. Luk. 8, 23—25.)

23 V. Ba me mõi ia baowo, ba la’o’õ ia nifahaõnia. 

24 Ba hiza, ilabu bade sabe’e ba mbaŵa andrõ, tobali tehawu dulu nowo, ba ya’ia, ba no mõrõ. 

25 Ba la’ondrasi ia, lasusugi, lamane: Tolo Tua, tekiko ita! 

26 Ba imane khõra: Ha lõ ata’u ami, sambõ famati! Awena maoso ia, itenaŵa nangi, awõ ndrulu, ba tobali ahono sibai. (F. 14, 31. Sin. 107, 29).

27 Ba ahõlihõli dõdõ niha, lamane: Ha niha da’õ, me lafondrondrongo gõi linia angi ba dulu? (A. 28—34: Mar. 5, 1—20. Luk. 8, 26—39.)

28 VI. Ba me irugi si yefo, danõ mbanua Gadara, ba falukha ia niha sobekhu, darua, la’otarai lewatõ, no owõhõ sibai, tebai itõrõ lala andrõ niha bõ’õ labe’e. 

29 Ba hiza, mu’ao ira, lamane: Hadia niŵa’õu khõma, Ono Lowalangi? Hadia, ba wamakao ya’aga mõi’õ ba da’e, ba tenga inõtõ na? (Mar. 1, 24. Luk. 4, 41). 

30 Ba so ba da’õ, sarõu khõra, mbawi, sambawá sebua, nikubaloi. 

31 Ba la’andrõ khõnia bekhu andrõ, lamane: Na õfofanõ ndra’aga, ba fatengega ba mbawi si sambawá andrõ. 

32 Ba imane khõra: Mi’ae’e. Ba larõi niha andrõ, lasaŵa mbawi. Ba hiza, fagohi ira ba zanaere, latibo’õ ira ba mbaŵa, sambawá manõ, ba alõmõ. 

33 Ba moloi gubalo, lasaŵa mbanua, ba la’ombakha’õ da’o fefu, ba hadia ia ba zobekhu andrõ. 

34 Ba hiza, mõi ira baero, samba banua manõ, ba wamaondragõ Yesu, ba me la’ila ia, ba la’andrõ khõnia, ena’õ iheta ia ba danõra andrõ.

 

MATAIO

Faza 9

 

I.                  Ifadõhõ wõkhõ zi mate dambai Yesu. II. Ikaoni Mataio andrõ. III. Lõ mamoni nifahaõnia. IV. Ifadõhõ wõkhõ ndra alawe sendro talu. V. Isusugi nono Ya’iro andrõ. VI. Ifadõhõ wõkhõ hõrõ zau’a darua ba fõkhõ zobekhu, samõsa. VII. Ebolo mbasitõ, ba lõ ato zamasi. (A. 1—8: Mar. 2, 1—12. Luk. 5, 17—26.)

 

1 I. Ba mõi ia baowo, isaŵa si yefo, mbanuara. 

2 Ba hiza, la’ohe khõnia zi mate dambai, si mõrõmõrõ ba gaso. Ba me i’ila wamatira Yesu, ba imane ba zi mate dambai andrõ: Bõi ata’ufi, onogu, no te’efa’õ khõu horõu. 

3 Ba hiza, lamane dõdõra õsa, sangila amakhoita: Sangaohangaoha da’õ. 

4 Ba me i’ila gera’erara Yesu, ba imane: Hana wa lõ sõkhi gera’erami, ba dõdõmi bakha? (Yoh. 2, 24. 25).

5 He zaoha ira sa, fanguma’õ: No te’efa’õ khõu horõu, ba ma fanguma’õ: Faoso, ba owaõwaõ? 

6 Ba ena’õ mi’ila, tola i’efa’õ Ono Niha horõ ba guli danõ, (ba awena imane ba zi mate dambai andrõ): Faoso, fazaŵa gasomõ ba fuli’õ khõmi. (Yoh. 5, 8). 

7 Ba maoso ia, ifuli ia khõra.

8 Ba me la’ila da’õ niha sato, ba ata’u ira ba lasuno Lowalangi, same’e fa’abõlõ si manõ ba niha. (A. 9—13: Mar. 2, 13—17. Luk. 5, 27—32.)

9 II. Ba, me itõrõ Yesu, me i’otarai da’õ, ba i’ila niha, sidadao ba naha wanema beo, Mataio dõinia, ba imane khõnia: O’õ ndra’o. Ba maoso ia, i’o’õ. 

10 Ba me manga ia yomo, ba hiza, ato zi mõi sanema beo, awõ zebua horõ, orudu manga ira khõ Yesu ba khõ nifahaõnia. 

11 Ba me la’ila da’õ farizaio, ba lamane ba nifahaõnia: Hana wa orudu manga zamahaõ ya’ami ba zanema beo ba ba zebua horõ? (Lud. 15, 2). 

12 Ba imane, me irongo da’õ: Ba zabõlõ, ba lõ moguna zame’e daludalu, ha ba zofõkhõ moguna.

13 Ba mi’ae mibe’e ba dõdõmi, hadia niŵa’õ andrõ: ”Fa’ahakhõ dõdõ zomasido, ba tenga sumange.” Tenga sa ba wogaoni satulõ mõi ndra’o, ha ba wogaoni si so horõ. (F. 12, 7. Hos. 6, 6. Tim. I. 1, 15).

14 III. Ba da’õ mõi khõnia nifahaõ Yohane andrõ, lamane: Hana ndra’aga ba farizaio, wa mamoni ba gõ ndra’aga, ba lõ’o sa mamoni nifahaõmõ? (Luk. 18, 12). 

15 Ba imane khõra Yesu: Hadia, tola abu dõdõ zi mõi ba walõŵa, fatua awõra zangowalu? Ba irugi baŵa dania, ba aheta khõra zangowalu, ba awena dania mamoni ba gõ ira, (Yoh. 3, 29). 

16 Ba lõ sombalo baru satua balobalo si bohou; asika zui sa mbaru, ba zinga mbalobalo andrõ, ba tobali ebua zasikania.

17 Ba lõ’õ gõi lalau nagu si bohou ba nahia satua. Ba na lalau, ba asika nahia andrõ ba aduwa nagu ba tekiko nahia. Ba nahia si bohou lalau nagu si bohou, ba faoma lõ hadia ia. (A. 18—26: Mar. 5, 22—43. Luk. 8, 41—56.)

18 IV. Me iŵa’õ khõra da’õ, ba hiza zalaŵa, si mõi yomo, mangalulu khõnia, imane: No mate mege nonogu alawe, ba ae tufa ia tangau, ba auri ia. 

19 Ba maoso Yesu, i’o’õ, awõ nifahaõnia. 

20 Ba hiza ndra alawe, sendro talu, no mewelendrua fakhe sa’ae; i’ondrasi Yesu moroi furi, ibabaya gahe mbarunia; 

21 imane sa dõdõnia: He ha barunia ubabaya, ba dõhõ wõkhõgu. (F. 14, 36).

22 Ba ibali’õ ia Yesu, i’ila ba imane: Bõi ata’ufi, onogu; no i’orifi ndra’ugõ famatimõ andrõ. Ba abe’e ndra alawe andrõ, i’otarai da’õ sibai.

23 V. Ba me irugi nomo zalaŵa no mege Yesu, me i’ila zolau sigu, awõ niha sato, si faguagua, ba imane: (Yer. 9, 17). 

24 Miheta ami, tenga sa si mate nono alawe andrõ, si mõrõ. Ba la’igi’igi’õ ia. (Yoh. 11, 11). 

25 Ba me no tefofanõ baero niha sato, ba mõi ia si bakha, ira’u danga, ba maoso nono alawe andrõ.

26 Ba humõngõ duria da’õ ba danõ andrṍ, ma’asagõrõ. (Luk. 7, 17).

27 VI. Ba me mofanõ Yesu ba da’õ, ba la’o’õ ia niha sau’a, darua, mu’ao ira, lamane: Hakhõsi tõdõ ndra’aga, ma’uwu Dawido! (F. 20, 30). 

28 Ba me mõi ia yomo, ba la’ondrasi ia sau’a andrõ, ba imane khõra Yesu: Hadia, faduhu dõdõmi, u’ila ulau da’õ? Lamane khõnia: Faduhu dõdõma, Tua. 

29 Awena ibabaya hõrõra, imane: Ya’itõrõ zi faduhu dõdõmi. (F. 8, 13). 

30 Ba teboka hõrõra. Ba itenaŵa sibai ira Yesu, imane: Mifaigi, bõi irongo da’õ niha, gofu ha nihá. (F. 12, 16. Mar. 1, 44). 

31 Ba mõi ira baero, ba la’ombakha’õ ia ba danõ andrõ ma’asagõrõ. 

32 Ba me no mõi ira baero, ba hiza, la’ohe khõnia niha si lõ hede, sobekhu. (F. 12, 22). 

33 Ba me no tefofanõ mbekhu andrõ, ba humede zi lõ hede no mege, ba ahõlihõli dõdõ niha sato, lamane: Lõ irai oroma zi manõ ba Ndraono Gizeraëli.

34 Ba lamane farizaio: Moroi ba zalaŵa mbekhu andrõ, wa ifofanõ mbekhu. (F. 12, 24. Mar. 3, 22).

35 VII. Ba itõrõi mbanua sebua awõ mbanua side’ide Yesu, mamahaõ ia ba zekola khõra, manuriagõ turia mbanua Lowalangi andrõ, turia somuso dõdõ, ba ifadõhõ fefu ngawalõ wõkhõ ba fefu ngawalõ wa’atebai. (F. 4, 23). 

36 Ba me i’ila niha sato, ba ahakhõ dõdõnia ira, me no nifakao ira, nifazaewe, hulõ mbiribiri, si lõ kubalo. (Hes. 34, 4. 5. Mar. 6, 34). 

37 Ba imane khõ ndra nifahaõnia: Ebolo sa mbasitõ, ba lõ ato zohalõŵõ. (Luk. 10, 2). 

38 Andrõ mi’andrõ khõ zokhõ basitõ andrõ, ena’õ ifatenge zohalõŵõ ba mbasitõnia.

 

MATAIO

Faza 10

 

I.                  Ifatenge zinengenia, si felendrua, Yesu. II. Ifobawa lala khõra. III.  Ifarou dõdõra. (A. 1—15: Mar. 3, 13—19; 6, 7—13. Luk. 6, 14— 16; 9, 1—6.)

 

1 I. Ba humede ia ba nifahaõnia andrõ, si felendrua, itehe khõra, wolaŵa bekhu si ra’iõ, ena’õ lafofanõ ba ena’õ lafadõhõ fefu ngawalõ wõkhõ ba fefu ngaŵalõ wa’atebai.

2 II. Da’e dõi zinenge andrõ, si felendrua: Si fõfõna Zimoni, nifotõi Fetero ba Andrea, talifusõnia; ba Yakobo, ono Zebedaio ba talifusõnia Yohane, (Hal. zin. 1, 13), 

3 ba Filifo ba Batolomaio, ba Toma ba Mataio, sanema beo andrõ, ba Yakobo, ono Galifaio ba Lebaio, 

4 ba Simoni selote, ba Yuda, banua Kariota, si manga mbõlinia dania. 

5 Si felendrua andrõ nifatenge Yesu ba iŵa’õ li khõra, imane: Bõi misaŵa lala niha baero ba bõi mi’ae ba mbanua Ndrawa Zamaria andrõ. 

6 Ba mbiribiri sisuna andrõ, ma’uwu Gizeraëli mi’ae’e. (F. 15, 24. Hal. zin. 13, 46). 7 Mi’ae’e ba mi’angombakha, mimane: No ahatõ mbanua zorugo andrõ. (F. 4, 17. Luk. 10, 9). 

8 Mifadõhõ wõkhõ zofõkhõ, ba misusugi zi mate, ba mifadõhõ mbou auri ba mifofanõ mbekhu. Lõ nibe’emi bõli, ba bõi gõi mihalõ mbõli. (Mar. 16, 17 b. t. Hal. zin. 8, 20).

9 Bõi mi’ohe gana’a ba bõi gõi firõ ba bõi gõi kefe, ba mbõbõ talumi. (Luk. 22, 35). 

10 Bõi mamola ami ba lala, bõi dombua mbarumi, bõi mobadagahe ami ba bõi mani’o, noa sa si nangea labe’e gõ ba zohalõŵõ. (Luk. 10, 7. Kor. I. 9, 7. 14. Tim. I. 5, 18). 

11 Ba ba zi mõi ami ba mbanua sebua, ba ma ba mbanua side’ide, ba mizofuzofu ha niha zi nangea ba da’õ, ba ba da’õ mi’iagõ, irege mofanõ ami. 

12 Ba na mõi ami yomo ba nomo, ba mi’owai ira. (Luk. 10, 5. 6). 

13 Ba na si nangea nomo andrõ, ba yafalukha ia wa’ohahau dõdõ andrõ khõmi. Ba na tenga si nangea ia, ba yamangawuli khõmi wa’ohahau dõdõ andrõ khõmi. 

14 Ba na so zi lõ mama’amõi yomo ya’ami ba si lõ mamondrongo limi, ba miheta ami ba nomo andrõ ba ba mbanua andrõ, mi’anotogõ gawugawu ba gahemi. (Hal. zin. 13, 51; 18, 6). 

15 Si ndruhu niŵa’õgu khõmi, õna’õna na zi gõna mbanua Zodoma ba banua Gomora andrõ, na luo wanguhuku, moroi ba zi gõna mbanua andrõ. (F. 11, 24).

16 Hiza, ufatenge ami, hulõ mbiribiri, ba hunõ nasu gatua. Andrõ ya’onekhe ami, si mane ulõ ba ya’atulõ ami, si mane marafadi. (Luk. 10, 2. Hal. zin. 23, 6). (A. 17—22: Mar. 13, 9—13.) 

17 Ba mi’angelamaisi niha; la’ohe sa dania ami ba rafe, ba ba zekola khõra, labõzibõzi dania ami. (F. 24, 9. Luk. 21, 12. Hal. zin. 5, 40). 

18 Ba ba gumandru ba ba razo te’ohe ami, bõrõ ndra’o, ba wamaduhu’õ khõra ba ba niha baero. (Hal. zin. 25, 23). 

19 Ba na labe’e ba dangara ami, ba bõi mi’abusi tõdõ he miwisa ba hadia niŵa’õmi; tebe’e sa khõmi dania, ba da’õ sibai, hadia niŵa’õmi. (Luk. 12, 11. 12). 

20 Tenga sa ya’ami zihede, Eheha Namami andrõ zihede, na humede ami. 

21 Ibe’e dania nibunu dalifusõnia niha, ba ibe’e nibunu nononia ama, ba maoso ndraono, udu ndra amara, labunu. 

22 Ba dozi ira dania fa’udu khõmi, bõrõ dõigu. Ba sanau õlõ, irugi gamozua, da’õ ni’orifi. (Luk. 21, 16. 17. Yoh. 15, 18—21. F. 24, 13). 

23 Ba na lagohi ami ba mbanua si sambua, ba mi’oloi, misa ŵa mbanua bõ’õ. Si ndruhu niŵa’õgu khõmi: Lõ fakhamõ mi dozigõ mbanua Ndraono Gizeraëli irege so Nono Niha. 

24 Tenga sebua moroi khõ zamahaõ nifahaõ, ba tenga sebua moroi khõ zokhõ ya’ia zawuyu. (Yoh. 13, 16; 15, 20).

25 Abõnõ sa’ae khõ nifahaõ, na tobali faoma ira zamahaõ ya’ia, ba na faoma ira zokhõ zawuyu. Na no labe’e tõi zokhõ omo Mbelesebu, ba tenga mendrua manõ lamanõ gõi ba zoroiyomonia? (F. 12, 24). (A. 26—33: Luk. 12, 2—9.)

26 III. Andrõ bõi mi’ata’ufi ira. Lõ’õ sa hadia ia nibalugõ, si lõ tefa’ele’õ dania, ba lõ nibini’õ, si lõ aboto ba dõdõ dania. (Mar. 4, 22. Luk. 8, 17). 

27 Hadia niŵa’õgu khõmi ba zogõmigõmi, ba niŵa’õ ba zohaga; ba hadia nirongomi tõgi dalingami, ba mituriagõ ba mbawa duwutuwu. 

28 Ba bõi mi’ata’ufi zamunu boto, si tebai mamunu noso. Ba mendrua manõ mi’ata’ufi zangila mamakiko noso, fabaya boto, ba narako. 

29 Tenga dombua zakefe, na la’amawa ziliŵi nali? ba sambua lõ aekhu tou ba danõ da’õ, na tenga moroi khõ Namami andrõ; 

30 ba ba khõmi, ba no te’erai gõi rozi mbu fefu, ba hõgõ yaŵa. 

31 Andrõ bõi ata’u ami; no tohude ami moroi ba ziliŵi nali, he ŵa’ae oya ira. 

32 Ba dozi ha niha zamaduhu’õ ya’o ba niha, da’õ gõi nifaduhu’õgu khõ Namagu, si so ba zorugo. (Rom. 10, 9. 10). 

33 Ba sangosilõ’õgõ ya’o ba niha, ba u’osilõ’õgõ gõi khõ Namagu, si so ba zorugo. (Luk. 9, 26. Tim. II. 2, 12). 

34 Bõi miŵa’õ tõdõmi, ba wolohe fa’atulõ ba guli danõ so ndra’o; tenga ba wolohe fa’atulõ mõi ndra’o, ba wolohe fasõndrata mõido. 

35 Ba wama’udu niha khõ namania mõi ndra’o, ba ba wama’udu ono alawe khõ ninania ba ba wama’udu umõnõ ira alawe khõ ninania matuania. (Mikh. 7, 6), 

36 ba si fa’udu ba niha dania zoroiyomonia. 

37 Ha niha zomasi amania, ba ma inania, moroi ba wa’omasinia ndra’o, ba tenga si nangea khõgu da’õ; ba ha niha zomasi ononia matua, ba ma ononia alawe, moroi ba wa’omasinia ndra’o, ba tenga si nangea khõgu. (Moz. V. 13, 6. b. t. Luk. 14, 26). 

38 Ba ha niha zi lõ manuyu rõfania, ba wolo’õ ya’o, ba tenga si nangea khõgu. (F. 16, 24. b. t. Luk. 14, 26). 

39 Khõ zanõndra nosonia aetu ia, ba ha niha zaetu noso, na bõrõ ndra’o, da’õ zanõndra ya’ia. (Luk. 17, 33. Yoh. 12, 25). 

40 Sama’amõi yomo ya’ami, ba ifa’amõi yomo ndra’o, ba sama’amõi yomo ya’o, ba ifa’amõi yomo zamatenge ya’o andrõ. (F. 18, 5. Yoh. 13, 20). 

41 Sama’amõi yomo sama’ele’õ, me no sama’ele’õ dõinia, ba itema luo zama’ele’õ, ba sama’amõi yomo satulõ, me no satulõ dõinia, ba itema luo zatulõ. (Sal. I. 17. 10 b. t.; Sal. II. 4, 8 b. t.). 

42 Ba ha niha zamabadugõ si samba mako idanõ kafu, he ha da’õ, ba zi samõsa, side’ide andre, me no nifahaõ dõinia, ba si ndruhu niŵa’õgu khõmi, tebai aekhu luonia. (F. 25, 40. Mar. 9, 41).

 

MATAIO

Faza 11

 

I. Ifatenge khõ Yesu nifahaõnia Yohane andrõ. II. Fa’ebua Yohane. III. Itegu mbanua andrõ si lõ molo’õ, Yesu. IV. Ikaoni khõnia zerege tõdõ.

(A. 2—6: Luk. 7, 18—23.)

 

1 I. Ba me no i’o’ozui Yesu wamobawa lala andrõ ba nifahaõnia si felendrua andrõ, ba mofanõ ia ba da’õ, mõi ia mamahaõ ba mangombakha ba mbanua khõra misa. 

2 Ba me irongo nifazõkhi Yesu Yohane andrõ, ba gurunga, ba ifatenge nifahaõnia, (F. 14, 3),

3 ifasofu’õ khõnia, imane: Hadia, ya’ugõ zi mõi andrõ, ma mabalobaloi dánõ bõ’õ? (Moz. V. 18, 15). 

4 Ba itema lira Yesu, imane khõra: Mi’ae mi’ombakha’õ khõ Yohane nirongomi, awõ ni’ila hõrõmi andrõ. 

5 Ifuli la’ila niha sau’a, ba mowaõwaõ zombuyumbuyu tõla, dõhõ mbou auri ba larongo li niha safiso, ba maoso zi mate, ba ba zi numana te’ombakha’õ duria somuso dõdõ, (F. 15, 30. 31. Yes. 35, 5; 61, 1),

6 ba ya’ahowu ba zi lõ fatuwu ndra’o. (A. 1—19: Luk. 7, 24—35.)

7 II. Ba me no mofanõ da’õ, ba ibõrõtaigõ Yesu, imane ba niha sato, ba khõ Yohane andrõ: Hadia nifaigimi, wa mõi baero ami ba danõ si mate? Hadia, sukhu, nifaheuheu nangi? 

8 Ma hadia, wa mõi baero ami? Hadia, ba wamaigi niha sonukha sombuyumbuyu? Hiza, ba nomo razo so zonukha sombuyumbuyu. 

9 Ma hadia, wa mõi baero ami? Hadia, ba wamaigi sama’ele’õ? Si ndruhu niŵa’õgu khõmi, si tõra sama’ele’õ. (Luk. 1, 76). 

10 Ya’ia zi so ba zura: ”Hiza, ufowaõwaõ fõnau zinengegu, sangehao lalamõ fõnau.” (Mal. 3, 1. Mar. 1, 2). 

11 Si ndruhu niŵa’õgu khõmi, lõ irai so zebua moroi khõ Yohane andrõ, samayagõ idanõ, ba ni’adonogõ ndra alawe, ba fondrege zide’ide ba mbanua zorugo andrõ ba no ebua moroi khõnia. 

12 Ba i’otarai luo Yohane andrõ, samayagõ idanõ, irugi da’e, ba teforege wangalui banua zorugo andrõ, ba samorege andrõ, da’õ zondra’u ya’ia khõra. (Luk. 16, 16). 

13 Noa sa mama’ele’õ zama’ele’õ andrõ fefu, awõ goroisa, irugi Yohane, 

14 ba na edõna ami, ba ya’ia Geliya andrõ, niŵa’õ si so. 

15 Si so tõgi dalinga, ba yamufondrondrongo! (F. 13, 9). 

16 Ba ha khõ ufaudugõ niha andre? Amaedola ndraono ira, sidadao ba kade, 

17 si’ao ba nawõra, lamane: No malau zigu khõmi, ba lõ solaya ami, no me’e ndra’aga, ba lõ sabu dõdõmi. 

18 Noa sa so Yohane andrõ, lõ manga ba lõ mamadumadu hadia ia, ba lamane: Sobekhu. (F. 3, 4).

19 Ba no so Nono Niha, mangamanga ba mamadumadu hadia ia, ba lamane: Hiza niha solu’alu’a, samadumadu agu, si fahuwu ba zanema beo andrõ ba ba zebua horõ; ba tobali sa famu’a ba hulu wa’atuatua andrõ nifazõkhi dangania. (F. 9, 10. Yoh. 2, 2).

20 III. Ba da’õ ibõrõtaigõ ihedehede’õ mbanua andrõ, ba zoya tefazõkhi tandra andrõ khõnia, me lõ nifalalinira era’erara, imane: 

21 Alai ndra’ugõ, Khorasi! alai ndra’ugõ, Betisa’ida! Na ba Diro ba na ba Zidona mena’õ tefazõkhi dandra andrõ, nifazõkhi ba khõmi andrõ, ba na fõna sa’ae lafalalini gera’era mena’õ, no la’onukha goni, ba no lalau nawu ba hõgõra mena’õ. (Hes. 2. ba 27. Yob. 42, 6). 

22 Ba uŵa’õ na khõmi: Õna’õna na zi gõna Diro ba Sidona, na luo wanguhuku andrõ, moroi ba zi gõna ami. 

23 Ba ya’ugõ, Kafanauma, tenga no mu’alaŵa’õ ndra’ugõ, irugi mbanua si yaŵa? Irugi mbanua tou tetibo’õ ndra’ugõ dania. Na ba Zodoma mena’õ tefazõkhi dandra andrõ, nifazõkhi ba khõmõ andrõ, ba lõ si tebulõ ia mena’õ, irugi ma’õkhõ andre. 

24 Ba uŵa’õ na khõmi: Ona’õna na zi gõna mbanua Zodoma andrõ, na luo wanguhuku andrõ, moroi ba zi gõna ndra’ugõ. (F. 10, 15. Luk. 12, 47). 

25 Me luo da’õ humede Yesu, imane: Usuno ndra’ugõ, Ama, Sokhõ sorugo, awõ danõ, me no õbini’õ da’õ ba zatuatua, awõ ba zonekhe, ba me no õfa’ele’õ ia ba ndraono. (F. 5, 3. Kor. I. 1, 19—29). 

26 Ya’ia, Ama, me no wa’omasiu zi manõ.

27 Fefu hadia ia, ba no ibe’e ba dangagu Amagu. Ba lõ saboto ba dõdõ Ono, baero Nama, ba lõ saboto ba dõdõ Ama, baero Nono, awõ ba zedõna ifa’ele’õ Ono. (Yoh. 1, 18; 3, 35; 14, 6. F. 28, 18).

28 IV. Mi’aine khõgu, dozi serege tõdõ, awõ zonoro, ba ufolombase ami. (Yer. 31. 25). 

29 Mihare’õ khõmi kalo mbagi andrõ khõgu ba mitõngõni khõgu, me no sebolo tõdõ ndra’o ba si lõ fayaŵa tõdõ, ba falukha ami wolombase dõdõmi. (Sakh. 9, 9. Fil. 2, 5 b. t.) 

30 Moguna sa kalo mbagi andrõ, khõgu, ba no aoha noro andrõ khõgu. (Yoh. I. 5, 3).

 

MATAIO

Faza 12

 

I.                  Ladõdõni lai wakhe ira nifahaõ. II. Ifadõhõ wõkhõ danga sokõlikõli Yesu, me luo sabato. III. Latandraŵaisi Yesu farizaio, ba ibu’a ba hulunia. IV. La’andrõ dandra farizaio. V. Ira ina Yesu. (A. 1—8: Mar. 2, 23—28. Luk. 6, 1—5.)

 

1 I. Me luo da’õ itõrõ nowi Yesu, me luo sabato, ba no olofo nifahaõnia ba labõrõtaigõ ladõdõni lai wakhe ba la’ā nõsi. (Moz. V. 23, 25). 

2 Ba me la’ila da’õ farizaio, ba lamane khõnia: Hiza, lalau zi lõ tola ba luo sabato ira nifahaõmõ. 

3 Ba imane khõra: Hadia, lõ ni’ilami ba zura, he iwisa Dawido, me olofo ia, ba awõnia fao? (Sam. I. 21, 6).

4 Me mõi ia ba nomo Lowalangi, ba me la’ā roti nifaigifaigi andrõ, si lõ tola i’ā ba si lõ tola la’ā awõnia fao? ha ere zi tola manga da’õ. (Moz. III. 24, 5—9. Moz. II. 29, 32—33). 

5 Ba lõ ni’ilami ba zura goroisa andrõ, wa lõ la’amoni’õ luo sabato ere ba gosali, ba lõ salara? (Moz. IV. 28, 9 b. t.). 

6 Ba uŵa’õ khõmi, no so ba da’e zebua moroi ba gosali. 

7 Ba na aboto ba dõdõmi ena’õ, hadia geluaha niŵa’õ andrõ: ”Fa’ahakhõ dõdõ zomasido, ba tenga sumange”, ba lõ mihuku ena’õ zi lõ sala. (F. 9, 13. Hos. 6, 6).

8 So’aya luo sabato sa Nono Niha.

(A. 9—14: Mar. 3, 1—6. Luk. 6, 6—11.)

9 II. Ba mofanõ ia ba da’õ, mõi ia ba zekola khõra. 

10 Ba hiza niha si no ariri tanga, si sara. Ba lasofu khõnia, lamane: Hadia, tola mamadõhõ fõkhõ na luo sabato? ba wangadugõ ya’ia. (Luk. 13, 14; 14, 3 b. t.).

11 Ba imane khõra: Ha niha ba khõmi, si so biribiri, sageu, si lõ mondra’u da’õ, ba wanõbi yaŵa, na aekhu ba dõgi, na luo sabato? 

12 Ba he zi sõkhi ira niha mbiribiri? Tobali tola tafazõkhi zi sõkhi na luo sabato. 

13 Awena iŵa’õ ba niha andrõ: Oro’õ dangau andrõ! Ba i’oro’õ. Ba ifuli sõkhi si mane si sara. 

14 Ba mõi baero warizaio, mamagõlõ, ba khõnia andrõ, ba wamunu ya’ia. (Yoh. 5, 16—18). 

15 Ba me aboto da’õ ba dõdõ Yesu, ba iheta ia ba da’õ. Ba ato zolo’õ ya’ia ba ifadõhõ wõkhõra fefu. 

16 Ba itenaŵa ira, fa lõ la’ombakha’õ ia. (F. 9, 30). 

17 Ena’õ itõrõ niŵa’õ Yesaya andrõ, sama’ele’õ, me imane: 

18 ”Hiza genonigu andrõ, nituyugu, ni’omasi’õgu, somasi dõdõgu andrõ, ube’e khõnia Gehehagu, ba i’ombakha’õ huku ba niha baero. (Yes. 42, 1—4; 11, 2). 

19 Lõ fasoso ia ba lõ mu’ao’ao ba lõ larongo linia ba newali misa. 

20 Ono geu si no tefatõ, ba lõ ifalua ifatõ ba fandru si lõ holahola sa’ae, ba lõ ibunu, irege mõna huku ibe’e.

21 Ba ba dõinia dania manõtõna niha baero.” (Rom. 15, 12). (A. 22—32: Mar. 3, 22—30. Luk. 11, 14—23.)

22 III. Aefa da’õ, ba la’ohe khõnia zobekhu, sau’a ba si lõ hede, ba ifadõhõ, tobali muhede zi lõ hede andrõ ba i’ila niha. (F. 9, 32). 

23 Ba tobali dõdõ niha sato fefu ba lamane: Hadia, tenga ma’uwu Dawido andrõ da’õ? 

24 Ba lamane farizaio, me larongo da’õ: Lõ ifofanõ mbekhu da’õ, na tenga moroi khõ Mbelesebu, salaŵa mbekhu andrõ. (F. 9, 34). 

25 Ba me no i’ila gera’erara, ba imane khõra: Dozi õri adudu, na no fabali dõdõ; ba dozi banua ba dozi omo, ba lõ fakhai, na no fabali dõdõ. 

26 Ba na ifofanõ Zatana Satana, ba noa sa’ae fabali dõdõnia, ba he wisa wa’aro mbanuania? 

27 Ba na moroi khõ Mbelesebu, wa ufofanõ mbekhu ba ha khõ moroi, wa lafofanõ iraonomi? Andrõ ya’ira dania zanguhuku ya’ami. 

28 Ba na moroi khõ Geheha Lowalangi, wa ufofanõ mbekhu, ba noa sa’ae i’ondrasi ami banua Lowalangi andrõ. (Yoh. I. 3, 8). 

29 Ba he wisa niha we’amõi yomo ba nomo zabõlõ, ba worabu gamagamania, na lõ ihõnagõ ibõbõ zabõlõ andrõ? ba awena i’osindra’ui hadia ia ba nomonia. (Yes. 49, 24). 

30 Si lõ fao khõgu, ba no si fa’udu khõgu, ba si lõ mangozara, awõgu, ba samazaewe. (Mar. 9, 40). 

31 Andrõ uŵa’õ khõmi: Fefu hadia ia horõ ba fefu hadia ia wanandraŵa, ba te’efa’õ ba niha; ba fanandraŵaisi Eheha andrõ, ba lõ te’efa’õ. (Heb. 6, 4—6; 10, 26). 

32 Ba na so zamõbõgõ hadia ia khõ Nono Niha ba te’efa’õ khõnia; ba na so zamõbõgõ hadia ia khõ Geheha ni’amoni’õ, ba lõ te’efa’õ khõnia, he ba gõtõ da’e, ba he ba gõtõ dania. (Luk. 12, 10). 

33 Sõkhi dõla geu mibe’e, ba si sõkhi mbuania, ba na lõ’õ, ba sobou dõla geu mibe’e, ba sobou mbuania. Ba mbua sa aboto ba dõdõda dõla geu. (F. 7, 17. Luk. 6, 44). 

34 He ya’ami, ono gulõ! he moroi mi’ila miŵa’õ zi sõkhi, me no si lõ sõkhi ami? Hadia sa zi no fahõna ba dõdõ, da’õ zalua ba mbewe. (F. 3, 7). 

35 Isao’õ baero zi sõkhi niha si sõkhi, moroi ba girõgirõ si sõkhi andrõ; ba niha si lõ sõkhi, ba isao’õ baero zi lõ sõkhi andrõ. (Luk. 6, 45). 

36 Ba uŵa’õ khõmi, tezofuzofu dania, na luo wanguhuku, fefu ngawalõ wehede si lõ guna, nilau niha. (Efes. 4, 29).

37 Moroi ba wehedemõ sa satulõ ndra’ugõ dania, ba moroi ba wehedemõ te’etu’õ hukumõ. (A. 38—42: Luk. 11, 16. 29—32.)

 

38 IV. Ba so õsa zanema linia, sangila amakhoita ba farizaio, lamane: He samahaõ, omasiga ma’ila dandra khõmõ. (F. 16, 1 b. t. Yoh. 6, 30).

39 Ba itema lira, imane khõra: La’andrõ dandra niha andre, si lõ sõkhi, sohorõhorõ, ba lõ tebe’e khõra dandra, ha tandra khõ Yona sama’ele’õ andrõ. (F. 16, 4). 

40 Hulõ si mane Yona sa, me tõlu ngaluo tõlu mbongi ia ba dalu gi’a sebua andrõ, si manõ gõi Nono Niha dania, tõlu ngaluo tõlu mbongi dania ia ba hunõ danõ. (Yon. 2, 1). 

41 Maoso dania mbanua Niniwe andrõ, na luo wanguhuku, udu niha da’e ba la’etu’õ huku niha da’e; me no lafalalini gera’erara ba wangombakha Yona andrõ, ba hiza, so ba da’e zebua moroi khõ Yona. (Yon. 3, 5 b. t.).

42 Maoso dania razo ira alawe andrõ, moroi raya, na luo wanguhuku, udu niha da’e, ba i’etu’õ huku niha da’e, me no mõi ia moroi ba wondrege danõ, ba wamondrongo fa’atuatua Zelomo andrõ; ba hiza, so ba da’e zebua moroi khõ Zelomo. (Sal. I. 10. 1 b. t.). (A. 43—45: Luk. 11, 24—26.)

43 Ba na aheta mbekhu si ra’iõ ba niha, ba itõrõi danõ si lõ idanõ, mangalui nahia wolombase, ba lõ isõndra. 

44 Awena dania imane: Da’ufulido ba nomogu, ba zi otarai ndra’o. Ba na so ia, ba lõ mu’onahia i’ila, ba no labõzini ba no lahaogõ.

45 Ba mõi ia, ihalõ awõnia mbekhu bõ’õ, dafitu, safaito moroi khõnia, ba mõi ira bakha, labe’e nahiara da’õ, ba tobali tedou walõsõkhi zafuria ba niha andrõ, moroi ba zi fõfõna mege. Si manõ gõi dania ba niha si lõ sõkhi andre. (Fet. II. 2, 20). (A. 46—50: Mar. 3, 31—35. Luk. 8, 19—21.)

46 V. Ba lõ nibatonia na huhuonia andrõ ba niha sato, ba hiza ninania, awõ ndra talifusõnia, so ira baero, la’alui lala, so niŵa’õra khõnia. (Yoh. 7, 5). 

47 Ba so zanguma’õ khõnia: Hiza baero ninau, awõ ndra talifusõu, la’alui lala, so niŵa’õra khõu. (F. 13, 57). 

48 Ba itema li, imane ba zanguma’õ khõnia: Ha niha ninagu, ba ha niha dalifusõgu?

 49 Ba i’oro’õ dangania, yaŵa ndra nifahaõnia, imane: Ya’e ninagu ba talifusõgu! 

50 Ha niha sa zolo’õ somasi Namagu andrõ, si so ba zorugo, da’õ dalifusõgu matua ba talifusõgu alawe ba inagu.

 

MATAIO

Faza 13

 

Amaedola. I. Samazaewe tanõmõ zinanõ. II. Du’u barõ wakhe. III. Tanõmõ lada. IV. Tanõmõ roti. V. Girõgirõ nibini’õ ba mbenua. VI. Manimani. VII. Kiri. VIII. La’ositengagõ Yesu banuara. (A. 1—23: Mar. 4, 1—20. Luk. 8, 4—15.)

1 I. Me luo da’õ mõi baero Yesu, mudadao ia ba zinga mbaŵa andrõ. 

2 Ba ato zowulo khõnia niha, ba mõi ia baowo ba mudadao, ba baene so niha sato fefu. 

3 Ba oya huhuonia khõra, amaedola, imane: Hiza, mõi ba nowi zamazaewe tanõmõ, ba wamazaewe tanõmõ zinanõ. 

4 Ba ba wamazaewenia, ba so zi gõna ba lala, ba so wofo, ba la’ā. 

5 Ba so zi gõna ba zokara, ba zi lõ awe’ewe’e tanõ khõnia, ba i’anema’õ motalinga, me lõ awe’ewe’e danõ khõnia. 

6 Ba me tumbu luo, ba angongo ba mate, me no ambõ ŵa’ania. 

7 Ba so zi gõna barõ ndroi, ba ebua ndroi ba mate zinanõ ibe’e. 

8 Ba so zi gõna ba danõ si sõkhi, ba mowua, so zowua si dua wulu, so zi felendrua ba so zi õnõ, zamba yõu. 

9 Si so tõgi dalinga, ba yamufondrondrongo! (F. 11, 15). 

10 Ba la’ondrasi ia nifahaõnia, lamane khõnia: Hana wa amaedola niŵa’õu khõra? 

11 Ba itema li, imane: Khõmi no mube’e wa’aboto ba dõdõ zi no tobini andrõ, ba mbanua zorugo andrõ, ba khõrá, ba lõ mube’e. (F. 11, 25; 16, 17. Kor. I. 2, 7—10). 

12 Ba zi ho so sa, ba tebe’e na, lahõna khõnia, ba ba zi lõ’õ, ba laheta gõi zi no so khõnia. (F. 25, 29. Mar. 4, 25. Luk. 8, 18; 19. 26). 

13 Da’õ mbõrõ wa amaedola huhuogu khõra, me lõ mangila ira, he ŵa’ae no teboka hõrõra, ba me lõ mamondrongo, he ŵa’ae larongo, ba me lõ aboto ba dõdõra. 

14 Ba itõrõ ba khõra nifa’ele’õ Yesaya, me imane: ”Mirongo dania ia tõgi dalingami, ba lõ’õ manõ aboto ba dõdõmi; anehe hõrõmi, ba lõ mi’ila. 

15 Noa sa mu’abe’e’õ dõdõ niha andre ba no afisofiso ira, ba no lafakifu hõrõ, ena’õ lõ la’ila hõrõra ba ena’õ lõ larongo tõgi dalingara ba ena’õ lõ aboto ba dõdõra, fa lõ lafuli ira, ena’õ u’orifi ira.” 

16 Ba ya’ahowu hõrõmi, me la’ila, ba tõgi dalingami, me larongo. (Luk. 10, 23, b. t.). 

17 Si ndruhu niŵa’õgu khõmi: No ato zama’ele’õ ba no ato zatulõ somasi mangila ni’ilami andrõ, ba lõ ni’ilara, ba somasi mamondrongo nirongomi andrõ, ba lõ nirongora. (Fet. I. 1, 10. Heb. 11, 13). 

18 Ba mifondrondrongo geluaha gamaedola andrõ, samazaewe tanõmõ zinanõ: 

19 Na so zamondrongo turia mbanua andrõ, ha niha ia, ba na lõ aboto ba dõdõnia, ba so Gafõkha, i’oloi’õ nifazaewe ba dõdõnia; da’õ nifazaewe tanõmõ si gõna ba lala andrõ. 

20 Ba nifazaewe ba zokara, ba da’õ ia: Irongo daroma li andrõ, ba i’anema’õ itema, omuso dõdõnia. 

21 Ba lõ moŵa’a ba dõdõnia, lõ’õ sa anaunau gõlõ; ba na tesao wamakao, ba ma folohi, na bõrõ daroma li andrõ, ba i’anema’õ mangawuli furi. 

22 Ba nifazaewe barõ ndroi, ba da’õ ia: Irongo daroma li andrõ, ba so wa’abu dõdõ ba guli danõ andre, awõ wamaelungu andrõ, ba gana’a, ba ibunu daroma li, ba tobali lõ mowua. (F. 19, 23. Tim. I. 6, 9).

23 Ba nifazaewe ba danõ si sokhi, ba da’õ ia: Irongo daroma li, ba aboto ba dõdõnia, ba ya’ia zowua, so zowua si dua wulu, so zi felendrua ba so zi õnõ, zamba yõu.

24 II. Amaedola tánõ bõ’õ iŵa’õ khõra, imane: No fakhilikhili ira mbanua zorugo andrõ niha samazaewe tanõmõ si sõkhi ba nowinia. 

25 Ba me no mõrõ niha, ba so zi fatiu tõdõ khõnia, mõi mufazaewe, danõmõ ndru’u barõ zinanõ ba ilau mofanõ. 26 Ba me no ebua zinanõ, me molai, awena gõi oroma ndru’u andrõ. 

27 Ba so genoni zokhõ, lamane khõnia: He Tua! hadia, tenga tanõmõ zinanõ si sõkhi nifazaeweu ba nowiu? Ba he moroi khõnia ndru’u andrõ? 

28 Ba imane khõra: Niha si fatiu tõdõ zolau da’õ. Ba lamane khõnia enoni: Ba hadia, omasi’õ na mõiga mu’ozaragõ ia? 

29 Ba imane: Bõi, ma dania mifao wondrõni sinanõ, na mi’ozaragõ ndru’u. (Yes. 65, 8).

30 Akha faoma ebua ia, irege wamasi, ba na baŵa wamasi, ba uŵa’õ ba zamasi, umane: Mi’ofõnai’õ wangozaragõ du’u ba milau ba ngambõbõ, ba wanunu ya’ia, ba bua zinanõ, ba mi’owuloi ba halasa khõgu. (F. 3, 12. Sam. II. 23, 6). (A. 31—34: Mar. 4, 30—34. Luk. 13, 18—21.)

31 III. Amaedola tanõ bõ’õ iŵa’õ khõra, imane: No fakhilikhili ira mbanua zorugo andrõ hunõ lada, nihalõ niha, nifazaewenia ba nowinia.

32 Fondrege zide’ide mbua zinanõ sa ia, ba na no manõi, ba ebua ia moroi ba gulegule bõ’õ ba tobali motõla, tobali mõi wofo ba dalu mbanua, mangazuni ba ndrahania.

33 IV. Amaedola tánõ bõ’õ iŵa’õ khõra, imane: No fakhilikhili ira mbanua zorugo andrõ danõmõ roti, nihalõ ndra alawe, nifarukania ba zi tõlu yõu hamo, irege aisõ ma’afefu. 

34 Da’o fefu niŵa’õ Yesu ba niha sato, amaedola, lõ bõ’õnia, huhuonia khõra, ha sambalõ amaedola. 

35 Ena’õ itõrõ niŵa’õ zama’ele’õ andrõ, me imane: ”Damuhededo, ulau gamaedola, ubokai zi no tobini, i’otarai mbõrõta danõ.” (Sin. 78, 2. Kor. I. 2, 7). 

36 Aefa da’õ, ba ifofanõ niha sato ba mõi ia yomo. Ba mõi khõnia nifahaõnia, lamane: Ombakha’õ khõma geluaha gamaedola andrõ, du’u ba nowi. 

37 Ba itema lira, imane: Samazaewe tanõmõ zinanõ si sõkhi andrõ, ba ya’ia Nono Niha, 

38 ba nowi andrõ, ba ya’ia niha ba guli danõ; ba tanõmõ si sõkhi andrõ, ba ono mbanua andrõ; ba du’u, ba ono Gafõkha. (Yoh. 8, 44; Yoh. I. 3, 8). 

39 Ba si fatiu tõdõ andrõ, samazaewe ya’ia, ba ya’ia Gafõkha andrõ. Ba famasi, ba amozua gõtõ danõ andre; ba samasi, ba mala’ika andrõ. (Fam. 14, 15). 

40 Ba hulõ si mane na la’ozaragõ ndru’u, nitunu ba galitõ, si manõ gõi dania ba gamozua gõtõ danõ andre. 

41 Ifatenge dania mala’ikania Ono Niha, ba la’ozaragõ fefu wangala ba mbanuania andrõ, awõ zamazõkhi si lõ atulõ, (F. 24, 31),

42 ba latibo’õ ba mbaho galitõ andrõ, ba fege’ege dania ba da’õ ba fatangisa mboha. (Sin. 50. Fam. 19, 20).

43 Ba humaga dania zatulõ andrõ, hulõ luo, ba mbanua Namara andrõ. Ha niha zi so tõgi dalinga, ba yamufondrondrongo! (Dan. 12, 3. Kor. I. 15, 40 b. t.).

44 V. No fakhilikhili ira mbanua zorugo andrõ girõgirõ nibini’õ ba mbenua, nisõndra niha, ba ibini’õ; ba ba wa’omuso dõdõnia andrõ, ba mõi ia, i’amawa fefu hadia ia zi so khõnia, ba i’õli mbenua andrõ. (Fil. 3, 7).

45 VI. Fakhilikhili zui ira mbanua zorugo andrõ niha saniaga, sangalui manimani si sõkhi.

46 Ba me isõndra zambua manimani sebua bõli, ba mõi ia, i’amawa fefu hadia ia zi so khõnia ba i’õli da’õ. (Amaed. 8, 10. 11).

47 VII. Fakhilikhili zui ira mbanua zorugo andrõ giri, nilau ba nasi, fama’u’u fefu hadia ia ngawalõ gi’a. 

48 Ba na no afõnu ia, ba ladõni yaŵa baene ba mudadao ira, la’ozaragõ zi sõkhi, lalau ba nahia ba si lõ sõkhi, ba latibo’õ. 

49 Si manõ gõi dania ba gamozua gõtõ danõ andre. Mõi dania mala’ika andrõ ba lafabali zi lõ sõkhi andrõ ba zatulõ; 

50 ba latibo’õ ba mbaho galitõ andrõ, ba fege’ege dania ba da’õ ba fatangisa mboha. (F. 22, 13; 24, 51). 

51 Hadia, no aboto ba dõdõmi da’õ fefu? Lamane khõnia: Noa.

52 Ba imane khõra: Me si manõ, ba dozi sangila amakhoita, nifahaõ ba ngawalõ mbanua Lowalangi andrõ, ba no fakhilikhili ba niha, satua baomo, sanao’õ baero, moroi ba girõgirõnia andrõ, si bohou, awõ zi no ara. (A. 53—58: Mar. 6, 1—6. Luk. 4, 16. 22—24.)

53 VIII. Ba me no i’o’ozui Yesu gamaedola andrõ, ba iheta ia ba da’õ. 54 Ba me irugi mbanuara, ba ifahaõ ira ba zekola khõra, irege tobali dõdõra, ba lamane: Heza moroi khõnia wa’atuatua andrõ, awõ wa’abõlõ andrõ? 

55 Tenga ono duka andrõ ia? Tenga Maria dõi ninania andrõ, ba tenga Yakobo ba Yosefo ba Simoni ba Yuda dõi dalifusõnia matua andrõ? (F. 12, 46. Yoh. 6, 42). 

56 Ba talifusõnia alawe andrõ, ba tenga khõda so ira, fefu? Ba heza moroi khõnia da’õ fefu? 

57 Ba fatuwu ia khõra. Ba imane khõra Yesu: Lõ’õ sa te’ositengagõ zama’ele’õ, na tenga ba mbanuara ba na tenga moroi yomo khõra. (Yoh. 4, 44). 58 Ba lõ oya ifazõkhi ba da’õ tandra, bõrõ wa lõ mamati ira.

 

MATAIO

Faza 14

 

I. Labunu Yohane andrõ, samayagõ idanõ. II. Tebe’e gõ ba niha si lima ngahõnõ. III. Mowaõwaõ ba dete nidanõ Yesu. IV. Oya ifadõhõ fõkhõ.

(A. 1—12: Mar. 6. 14—31. Luk. 9, 7—9.)

 

1 I. Me luo da’õ irongo duria Yesu andrõ Herode, razo ba zi sagõrõ ni’o’õfa tanõ andrõ. 

2 Ba imane ba genoninia: Yohane da’õ, samayagõ idanõ; no maoso da’õ moroi ba ngai zi mate, andrõ so khõnia wa’abõlõ andrõ. (F. 16, 14). 

3 Noa sa ifara’u’õ Yohane andrõ Herode, no ifabõbõ’õ ba no ifabe’e’õ ba gurunga, bõrõ Herodia andrõ, fo’omo dalifusõnia [Filifo]. (Luk. 3, 19. 20). 

4 Noa sa iŵa’õ khõnia Yohane; Lõ tola so ia khõu. (Moz. III. 18, 16). 

5 Ba ibunu ena’õ Yohane Herode, ba ata’u ia niha sato, me ba dõdõra sama’ele’õ Yohane andrõ. (F. 21, 26). 

6 Ba me baŵa wa’atumbu khõ Herode, ba manari nono Herodia andrõ khõra ba da’õ, ba omasi Herode. 

7 Andrõ ifabu’u khõnia, fahõlu ia, ibe’e khõnia hadia ia ni’andrõnia. 

8 Ba me no isofu khõ ninania ua; ba imane: Be’e khõgu ba da’e, ba wiga yaŵa, hõgõ Yohane andrõ, samayagõ idanõ. 

9 Ba abu dõdõ razo, ba ba wahõlusa no mege ba ba domenia andrõ, ba i’oroi’õ labe’e. 

10 Ba ifatenge, ifa’eŵa’õ mbagi Yohane ba gurunga. 

11 Ba la’ohe hõgõnia, ba wiga, ba labe’e khõ nono alawe andrõ, ba i’ohe khõ ninania.

12 Ba so ndra nifahaõnia, lahalõ mbotonia ba lako’o; ba mõi ira mangombakha da’õ khõ Yesu. (A. 13—21: Mar. 6. 31—44. Luk. 9, 11—17. Yoh. 6, 1—14.)

13 Ba me irongo Yesu, ba iheta ia ba da’õ, moloyo ia, isaŵa danõ si mate, ba zi ha ya’ia; ba me larongo niha sato, ba la’o’õ ia, latõrõ tanõ, moroi ba mbanua misa.

14 II. Ba me irugi Yesu, ba i’ila niha sato sibai andrõ, ba ahakhõ dõdõnia ira ba ifadõhõ wõkhõ ba zofõkhõ khõra. (F. 9, 36). 

15 Ba me tánõ owi, ba mõi khõnia nifahaõ, lamane: Tanõ si mate da’e, ba bongi; fofanõ sa’ae niha sato, ena’õ mõi ira ba mbanua misa, mowõli gõra. 

16 Ba imane khõra: Alakha lõ mofanõ ira, mibe’e gõra, ya’ami. 

17 Ba lamane khõnia: Lõ khõma ba da’e, ha lima roti ba ha dua rozi gi’a. 

18 Ba imane: Mi’ohe ia khõgu ba da’e. 

19 Ba iŵa’õ mudadao niha sato ba ndru’u, ba ihalõ roti andrõ, si lima, awõ gi’a andrõ, si dua rozi, ifaõga hõrõnia miyaŵa ba zorugo, i’aohasi gõlõ Lowalangi ba iboboto ba ibe’e khõ ndra nifahaõ roti no mege, ba ira nifahaõ zame’e ba niha sato. (F. 15, 32 b. t.). 

20 Ba manga ira fefu ba abuso, ba la’ozaragõ zi tõra, akhõkhõla, felendrua kude.

21 Ba si manga andrõ, ba mato lima ngahõnõ ndra matua, baero ndra alawe, baero ndraono. (A. 22—35: Mar. 6, 45—56. Yoh. 6, 15—21.)

22 III. Ba ifarou nifahaõ, ena’õ mowaõwaõ ira baowo, moloyo miyefo, gasagasa wamofanõnia niha sato. 

23 Ba me no ifofanõ niha sato, ba mõi ia ba hili, ha ya’ia, mangandrõ. Ba me no bongi, ba ha ya’ia ba da’õ. 

24 Ba no so ba dalu mbaŵa nowo no mege, no tosasa ba ndrulu, noa sa zuzumõ nangi. 

25 Ba me miwo manu, ba mõi khõra Yesu, mowaõwaõ ba dete nidanõ. (Yoh. 9, 8). 

26 Ba me la’ila ia, sowaõwaõ ba dete nidanõ, ba tokea ira, lamane: Bekhu! ba mu’ira’ira ba wa’ata’u. (Luk. 24, 37.) 

27 Ba i’anema’õ muhede khõra Yesu, imane: Mihonogõ ami, ya’odo; bõi mi’ata’ufi! 

28 Ba itema linia Fetero, imane: Na ya’ugõ, Tua, ba ŵa’õ khõgu, mõido khõu ba dete nidanõ. 

29 Ba imane: Aine! Ba mõi tou Wetero, moroi ba nowo, mowaõwaõ ia ba dete nidanõ, i’ondrasi Yesu. 

30 Ba me i’ila nangi, ba ata’u ia ba ibõrõtaigõ ahõndrõ, ba imane: He Tua, orifido! 

31 Ba i’anema’õ i’oro’õ dangania Yesu, ira’u, imane khõnia: He sambõ famati, hana wa manufa dõdõu? (F. 8, 26). 

32 Ba me mõi ira baowo, ba tebato nangi.

33 Ba mangalulu khõnia zi so baowo, lamane: Duhu, Ono Lowalangi ndra’ugõ. (F. 16, 16).

34 IV. Ba la’õtõ mbaŵa, lasaŵa danõ Genezare. 

35 Ba me la’ila ia banua da’õ, ba lafatenge zinenge ba zi fasui andrõ fefu ba la’ohe khõnia fefu zi so fõkhõ. 

36 Ba la’andrõ khõnia, ena’õ ha ahe mbarunia lababaya, ba dozi sombambaya, ba dõhõ wõkhõ. (F. 9, 21. Luk. 6, 19).

 

MATAIO

Faza 15

 

I. Oroisa niha, si lõ guna. II. Ifadõhõ wõkhõ nono ndra alawe Gana’ana andrõ Yesu. III. Ibe’e gõ ba niha si õfa ngahõnõ. (A. 1—20: Mar. 7, 1—23.)

 

1 I. Me luo da’õ mõi khõ Yesu warizaio ba sangila amakhoita, banua Yeruzalema, lamane: 

2 Hana wa lasawõ niŵa’õ ndra tua ira nifahaõmõ? Lõ’õ sa mombanõ ira, na la’ā gõra. (Luk. 11, 38). 

3 Ba itema li, imane khõra: Ba hana ami gõi, wa misawõ goroisa Lowalangi, ba nifakhoimi andrõ? 

4 Noa sa i’oroi’õ Lowalangi, imane: ”Fosumange namau, awõ ninau ba: ”si mate zangelifi amania ba ma inania.” (Moz. II. 20, 12; 21, 17. Amaed. 23, 22). 

5 Ba ya’ami, ba mimane: Na so zanguma’õ khõ namania, ba ma khõ ninania: Tebe’e sumange [Lowalangi] zinemau khõgu ena’õ, ba alakha lõ ifusumange namania, awõ ninania. 

6 Ba no miwu’ai goroisa Lowalangi andrõ, ba nifakhoimi andrõ. 

7 He ya’ami, samini tõdõ! Si ndruhu wama’ele’õ Yesaya ba khõmi andrõ, me imane: 

8 ”Lafosumange ndra’o bewera niha andrõ, ba tõdõra, ba no arõu khõgu. 

9 Zayazaya gõlõra wamosumangera ya’o, me no nifakhoi niha wamahaõra andrõ.” 

10 Ba ikaoni khõnia niha sato, ba imane khõra: Mifondrondrongo ba ya’aboto ba dõdõmi! 

11 Tenga da’õ zana’unõi niha si mõi bakha ba mbawania, ha si mõi baero, si oroi mbawania da’õ zana’unõi niha. (Hal. zin. 10, 15. Rom. 14, 14). 

12 Ba so ndra nifahaõ, lamane khõnia: Hadia, õ’ila wa no fatuwu ba warizaio, me larongo niŵa’õu andrõ? 

13 Ba itema li, imane: Fefu zinanõ, si tenga nitanõ Namagu andrõ ba zorugo, ba ladeha dania. (Hal. zin. 5, 38). 

14 Mibõhõi ira; niha sau’a ira, samasao sau’a, ba na ifasao nawõnia sau’a sau’á, ba faoma aekhu ira ba gohokoho. (F. 23, 16. Luk. 6, 39. Rom. 2, 19). 

15 Ba itema linia Fetero, imane khõnia: Ombakha’õ khõma geluaha gamaedola andrõ. 

16 Ba imane: Hadia, lõ’õ na saboto ba dõdõmi gõi? 

17 Hadia, lõ mi’ila, wa isaŵa mbetu’a fefu zi mõi bakha ba mbawa, awõ wa ifuli mõi baero ba dõgitõgi? 

18 Ba hadia ia zi otarai mbawa, ba ba dõdõ i’otarai, ba da’õ zana’unõi niha. (Yak. 3, 6). 

19 Moroi ba dõdõ sa i’otarai era’era si lõ sõkhi, ba fange’e, ba fohorõni donga zodonga ba fohorõ bõ’õ ba fanagõ ba famõbõgõ si lõ duhu ba fanandraŵa. (Moz. I. 6, 5. Rom. 7, 18).

20 Ya’ia wana’unõi niha. Ba lõ ita’unõi niha, na manga lõ mombanõ. (A. 21—31: Mar. 7, 24—31.)

21 II. Ba iheta ia ba da’õ Yesu, isaŵa danõ Diro ba tanõ Zidona. 

22 Ba hiza ndra alawe Gana’ana, siotarai danõ da’õ; mu’ao ia, imane: Hakhõsi tõdõ ndra’o Tua, ma’uwu Dawido! ifakao sibai nonogu alawe bekhu. 

23 Ba lõ itema linia, sambua li lõ’õ. Ba mõi khõnia ndra nifahaõnia, mangandrõ ira khõnia, lamane: Fofanõ ia, me si ao’ao moroi furida. 

24 Ba itema lira, imane: Ha ba mbiribiri sisuna andrõ, ma’uwu Gizeraëli, tefatenge ndra’o. (F. 10, 6). 

25 Ba mõi ndra alawe no mege, ituhi danõ fõnania, imane: He Tua, tolodo! 

26 Ba itema linia, imane: Lõ tola lahalõ gõ ndraono, ba wame’e õ nasu. 

27 Ba imane: Si ndruhu Tua, ba la’ā sa atṍ asu gakhõkhõla, saekhu tou, na manga zokhõ ya’ira. 

28 Ba itema linia Yesu, imane khõnia: He alawe, no ebua wamatimõ andrõ, yafalukha’õ zomasi ndra’ugõ! Ba dõhõ wõkhõ nononia alawe, ba da’õ sibai. (F. 8, 10. 13). 

29 Ba iheta ia ba da’õ Yesu, isaŵa mbaŵa Galilaia andrõ, ba mõi ia ba hili, mudadao ia ba da’õ. 

30 Ba ato zangondrasi ya’ia niha, si so sogombuyumbuyu ba sagau’a ba si lõ hede ba sagabõda ba bõ’õnia, ato, ba latou’õ tou fõnania; ba ifadõhõ wõkhõra, (F. 11, 5. Yes. 35, 5 b. t.),

31 tobali ahõlihõli dõdõ niha sato, me la’ila humede zi lõ hede andrõ ba dõhõ wõkhõ zagabõda ba mowaõwaõ zogombuyumbuyu ba la’ila niha sagau’a; ba lasuno Lowalangi Ndraono Gizeraëli. (A. 32—39: Mar. 8, 1—10.)

32 III. Ba humede Yesu ba nifahaõnia, imane: Ahakhõ dõdõgu niha sato andrõ, me no tõlu bongi wa’ara lõ nirõira ya’o, ba lõ õra, ba lõ omasido ufofanõ ira lõ manga, fa lõ mate olofo ba lala. (F. 14, 15 b. t.).

33 Ba lamane khõnia nifahaõ: Heza tahalõ gõ si manõ fa’oya, ba danõ si mate, fangabuso niha si manõ fa’ató? 

34 Ba imane khõra Yesu: Ha uga roti, si so khõmi? Ba lamane: Fitu, ba so ma’ifu gi’a. 

35 Ba iŵa’õ ba niha sato, ena’õ mudadao ira ba danõ; 

36 ba ihalõ roti andrõ si fitu, awõ gi’a andrõ, ba i’aohasi gõlõ Lowalangi, ba iboboto ba ibe’e khõ ndra nifahaõ, ba ira nifahaõ zame’e ba niha sato. 37 Ba manga ira fefu, ba abuso; ba la’ozaragõ zi tõra, akhõkhõla, fitu kude. 38 Ba si manga andrõ, ba no õfa ngahõnõ ndra matua, baero ndraono, baero ndra alawe. 39 Ba ifofanõ niha sato, ba mõi ia baowo, isaŵa danõ Magada.

 

MATAIO

Faza 16

 

I. Tandra moroi ba mbanua si yaŵa. II. Tanõmõ roti warizaio andrõ. III. Famaduhu õ Wetero. IV. Ibõrõtaigõ mangombakha famakao ya’ia Yesu. V. Ifobawa lala ba wolo’õ ya’ia. (A. 1—12: Mar. 8, 11—21.)

 

1 I. Ba mõi khõnia warizaio ba sadukaio, latandraigõ ia, la’andrõ khõnia, ena’õ na i’oroma’õ khõra dandra, moroi si yaŵa ba mbanua. (F. 12, 38). 

2 Ba itema li, imane khõra: Na tánõ owi, ba mimane: Lõkhõ dania, me no oyo mbanua; (Luk. 12, 54, b. t.) 

3 ba na mahemolu mbanua, ba mimane; Moteu sabõlõbõlõ ma’õkhṍ, me no oyo mbanua ba me no alu. Amuata mbanua andrõ, ba mi’ila mihuku, ba tandra ginõtõ andrõ, ba tebai mihuku.

4 La’alui dandra niha si lõ sõkhi, sohorõhorõ, ba lõ tebe’e khõra dandra, ha tandra khõ Yona andrõ. Ba irõi ira, mofanõ ia. (F. 12, 39. Yon. 2, 1).

5 II. Ba me no larugi si yefo ira nifahaõ, ba no olifu ira wolohe roti. 

6 Ba imane khõra Yesu: Mifaigi, mi’angelama ba danõmõ roti warizaio andrõ ba ba danõmõ roti zadukaio. (Luk. 12, 1. Gal. 5, 9. Kor. I. 5, 6).

7 Ba lafatoutou tõdõra, lamane: Me lõ ni’oheda roti. 

8 Ba me i’ila da’õ Yesu, ba imane: Hadia nifatoutoumi tõdõmi, sambõ famati, wa lõ ni’ohemi roti? 

9 Hadia, lõ’õ na saboto ba dõdõmi, ba hadia, lõ itõrõ tõdõmi roti no, si lima ba zi lima ngahõnõ niha ba ha uga kude ni’ozaragõmi? (F. 14, 17 b. t.). 

10 Ba he roti si fitu ba zi õfa ngahõnõ niha, ba ha uga kude ni’ozaragõmi? (F. 15, 34 b. t.). 

11 Hana wa lõ aboto ba dõdõmi, wa tenga roti niŵa’õgu khõmi, me umane: Mi’angelama ba danõmõ roti warizaio andrõ ba ba danõmõ roti zadukaio?

12 Awena aboto ba dõdõra, wa tenga da’õ niŵa’õnia: Mi’angelama ba danõmõ roti warizaio andrõ ba ba danõmõ roti zadukaio, wa famahaõ warizaio ba famahaõ zadukaio niŵa’õnia. (A. 13—20: Mar. 8, 27—30. Luk. 9, 18—21.)

13 III. Ba me irugi Yesu danõ Kaisaria Wilifo, ba isofu khõ ndra nifahaõnia, imane: Hadia laŵa’õ niha, ha niha Nono Niha? 

14 Ba lamane: So zanguma’õ Yohane andrõ, samayagõ idanõ ba so zanguma’õ Eliya, ba so, ba Yeremia lawa’õ, ba ma fasamõsa zama’ele’õ andrõ. (F. 14, 2; 17, 10). 

15 Ba imane khõra: Ba ya’ami, ba ha miŵa’õ, ha niha ndra’odo? 

16 Ba itema li Simoni Fetero, imane: Keriso ndra’ugõ, Ono Lowalangi sauri andrõ. (F. 14, 33. Yoh. 6, 69; 11, 27).

17 Ba itema linia Yesu, imane khõnia: Ya’ahowu ndra’ugõ Simoni, ono Yona, me no tenga niha zama’ele’õ khõu da’õ, me Amagu andrõ, si so ba zorugo, zama’ele’õ. (Gal. 1, 16. Kor. I. 2, 14). 

18 Ba ya’odo gõi, uŵa’õ khõu: Fetero ndra’ugõ, ba ba dete gowe andrõ utaru’õ mbanuagu andrõ dania, ba lõ lalaŵa ia bawa gõli mbanua tou. (Yoh. 1, 43. Hal. zin. 15, 7). 

19 Ube’e dania khõu wogoē mbanua zorugo andrõ, ba na so nibõbõmõ ba guli danõ, ba nibõbõ gõi ba zorugo, ba hadia ni’efa’õu ba guli danõ, ba ni’efa’õ gõi ba zorugo. (F. 18, 18. Yoh. 20, 23).

20 Aefa da’õ iŵa’õ khõ ndra nifahaõ, bõi laŵa’õ ba niha, wa Keriso ia. (A. 21—28: Mar. 8, 31—38; 9, 1; Luk. 9, 22—27.)

21 IV. I’otarai da’õ, ba ibõrõtaigõ Yesu ibokai khõ ndra nifahaõnia, wa lõ tola lõ mõi ia ba Yeruzalema, awõ wa la’oya’õ dania wamakao ya’ia satua andrõ ba ere sebua ba sangila amakhoita, awõ wa labunu dania ia, awõ wa tesusugi dania ia, na no irugi tõlu ngaluo. (F. 17, 22, 23; 20, 18, 19). 

22 Ba isõbi ia khõnia Fetero, ibõrõtaigõ itenaŵa, imane: Yamutimba khõu Lowalangi, Tua!

23 Bõi gõna ndra’ugõ si manõ. Ba ibali’õ ia, imane khõ Wetero: Ae furigu, Satana! fangalagu ndra’ugõ; me lõ õfatoutou zomasi Lowalangi, ha somasi niha õfatoutou. (Sam. II. 19, 22).

24 V. Aefa da’o, ba imane Yesu khõ ndra nifahaõnia: Na so zedõna molo’õ ya’o, ba yamu’ositengagõ ia ba yamulu’i rõfania ba yamu’o’õ ndra’o. (F. 10, 38). 

25 Ba zangalui fa’anau nosonia, aetu ia, ba saetu noso, na bõrõ ndra’o, da’õ zanõndra ya’ia. (Luk. 17, 33. Yoh. 12, 25). 

26 Hadia sa guna ba niha, na isõndra harenia fefu hadia ia zi so ba guli danõ, ba na te’ala ia nosonia? Ba hadia ena’õ nibe’e niha hõli nosonia? (Sin. 49, 8. 9). 

27 So sa dania Nono Niha, so khõnia lakhõmi Namania, awõnia mala’ika khõnia, ba ba da’õ ibe’e zulõ ba zamõsana, dali mbuabuania. (F. 24, 30; 25, 31. Kor. II. 5, 10). 

28 Si ndruhu niŵa’õgu khõmi, so õsa, zi so ba da’e, si lõ mate, irege no la’ila so Nono Niha ba mbanuania andrõ. (F. 10, 23).

 

MATAIO

Faza 17

 

I. Famolakhõmi Yesu. II. Ifadõhõ wõkhõ zaniri Yesu. III. Ifa’ele’õ wamakao ya’ia. IV. Fame’e bobotolõ. (A. 1—13: Mar. 9, 2—13. Luk. 9, 28—36.)

 

1 I. Ba õnõ bongi aefa da’õ, ba iŵa’õ awõnia Yesu Wetero ba Yakobo ba Yohane, talifusõ Yakobo, ba i’ohe ira ba hili salaŵa, ba zi ha ya’ira. (F. 26, 37 b. t.). 

2 Ba tobali ia fõnara, humaga mbawania, hulõ luo, ba nukhania, ba afusi, hulõ haga. (Fet. II. 1, 16—18). 

3 Ba hiza, oroma khõra Moze ba Eliya, si fahuhuo khõnia. 

4 Ba humede Wetero, imane khõ Yesu: He Tua, ba da’e zi sõkhi nahada, na omasi ndra’ugõ, ba da’ulau nose ba da’e, tõlu, sambua khõu ba sambua khõ Moze ba sambua khõ Geliya. 

5 Ba me muhede ia na, ba hiza lawuo sihaga, si lumõ’õ ya’ira, ba hiza li, si otarai lawuo andrõ, imane: Onogu da’õ, ono omasiõ, wa’omasigu; mifondrondrongo linia. (F. 3, 17. Moz. V. 18, 15). 

6 Ba me larongo da’õ ira nifahaõ, ba lafalõgu tou ira, ata’u sibai. 

7 Ba mõi khõra Yesu, itufa ira tangania, imane: Mifaoso, ba bõi mi’ata’ufi. 

8 Ba me lafaõga hõrõra, ba lõ ni’ilara niha, ha Yesu. 

9 Ba me latueli hili, ba iŵa’õ khõra Yesu, bõi la’ombakha’õ gangilata andrõ, gofu ha õkhõ, irege no maoso Nono Niha moroi ba ngai zi mate. 

10 Ba lasofu khõnia nifahaõ andrõ, lamane: Ba hana wa laŵa’õ sangila amakhoita, lõ tola lõ mõi Geliya ua? (Mal. 3, 1; 4, 5). 

11 Ba itema li, imane: Mõi sa Geliya ba ifuli i’a’azõkhi fefu hadia ia. (Fam. 11, 3 b. t.). 

12 Ba uŵa’õ khõmi: Noa sa’ae mõi Geliya, ba lõ saboto ia ba dõdõra, ba no lalau khõnia hadia zomasi ira. Si manõ gõi ba Nono Niha; lafakao dania. (F. 11, 14; 14, 8. Luk. 1, 17).

13 Awena aboto ba dõdõ ndra nifahaõ, wa khõ Yohane, samayagõ idanõ andrõ, tetandrõsaigõ niŵa’õnia khõra. (A. 14—21: Mar. 9, 14—29. Luk. 9, 37—43.)

14 II. Ba me larugi niha sato, ba i’ondrasi ia niha, ituhi danõ fõnania, imane: 

15 He Tua, hakhõsi tõdõ nonogu andrõ, maniri, mofõkhõ sibai; asese sa’ae alau ia ba galitõ ba asese gõi ba nidanõ. 

16 Ba no u’ohe ia khõ ndra nifahaõmõ, ba tebai lafadõhõ. 

17 Ba itema linia Yesu, imane: He ya’ami, niha si lõ famati, si no tefuyu tõdõ! ha wa’aragu na khõmi ena’õ? ha wa’ara utaha wolaumi andrõ? Mi’ohe ia khõgu ba da’e. 

18 Ba itenaŵa ia Yesu, ba aheta khõnia mbekhu andrõ, ba dõhõ wõkhõ nono andrõ, i’otarai da’õ sibai. 

19 Aefa da’õ, ba mõi ndra nifahaõ khõ Yesu, ba zi ha ya’ira, lamane: Hana ndra’aga, wa tebai mafofanõ ia? 

20 Ba imane khõra: Ba wa’ambõ wamatimi andrõ. Si ndruhu sa niŵa’õgu khõmi, na so khõmi wamati, sezai bua lada, ba miŵa’õ ba hili andrõ: Fawu’a’õ ba da’e, fa’ese’õ ba da’õ! ba ifawu’a ia; ba lõ hadia ia zi tebai khõmi. (F. 21, 21. Mar. 11, 23. Luk. 17, 6).

21 Ba lõ aheta zi sambalõ andrõ, na tenga ba wangandrõ ba ba wamoni. (A. 22. 23: Mar. 9, 30. 32. Luk. 9, 43—45.)

22 III. Ba me orudu ira ba Galilaia, ba imane khõra Yesu; Tebe’e dania Nono Niha ba danga niha,

23 ba labunu ia, ba na no irugi tõlu ngaluo, ba maoso ia, ifuli auri. Ba abu sibai dõdõra.

24 IV. Ba me larugi Gafanauma, ba mõi khõ Wetero zanema bobotolõ andrõ, lamane: Hadia, lõ ibe’e mbobotolõ andrõ samahaõ ya’ami? (F. 22, 17). 

25 Imane: Ibe’e. Ba me no mõi ia yomo, ba ihulõ linia Yesu, imane: Hadia ba dõdõu, Simoni, razo ba guli danõ andrõ, ha khõ lahalõ mbeo ba seŵa? hadia, ba ndraonora, hadia, ba niha bõ’õ? 

26 Ba me imane: Ba niha bõ’õ, ba imane khõnia Yesu: Ba tobali aefa ndraono andrõ. 

27 Ba fa bõi fatuwu ita khõra, ba ae ba mbaŵa, ba lau gai, ba halõ gi’a andrõ, si fõfõna mõi yaŵa, ba na õbokai mbawania, ba õsõndra bakha zambua rufia; da’õ halõ ba be’e õmõda darua ita. (F. 3, 15. Rom. 13, 7. Kor. I. 10, 32).

 

MATAIO

Faza 18

 

I. Bõi fayaŵa ita. II. Bõi tafobõrõ wangala khõ nawõda. III. He tawisa, na mosala khõda nawõda. IV. Amaedola: Razo same’e buala sugilõnia khõ sawuyunia, si lõ fa’ahakhõ dõdõ dania. (A. 1—5: Mar. 9, 33—37. Luk. 9, 46—48.)

 

1 I. Ba da’õ mõi khõ Yesu ndra nifahaõnia, lamane: Ha niha atõ zebua ba mbanua zorugo andrõ? 

2 Ba humede ia ba ndraono, ifa’aso fõnara, ba imane: 

3 Si ndruhu niŵa’õgu khõmi, na lõ mifuli ami, ba na lõ tobali hulõ ndraono ami, ba lõ’õ manõ lalami ba mbanua zorugo andrõ. (F. 19, 14 b. t. Mar. 10, 15. Kor. I. 14, 20). 

4 Ba ha niha zangide’ide’õ ya’ia, si mane iraono andre, da’õ zebua ba mbanua zorugo andrõ. (F. 23, 12).

5 Ba na so zama’amõi yomo khõnia iraono si manõ, sambua, ba dõigu, ba ya’o nifa’amõinia yomo. (F. 30, 40). (A. 6—9: Mar. 9, 42—48.)

6 II. Ba na so zangalani side’ide andrõ, samõsa, samati khõgu, ba sõkhi khõnia ena’õ, na lataŵi ba mbaginia gara sebua ba na latibo’õ ia ba dalu nasi. (Luk. 17, 2). 

7 Alai niha ba guli danõ, ba wangala andrõ! Lõ’õ sa tola lõ fangala, ba alai niha samobõrõ fangala. (Luk. 17, 1. Kor. I. 11, 19). 

8 Ba na i’alani ndra’ugõ tangau, ba ma aheu, ba tema eŵa ia ba tibo’õ; mohare’õ na sabõda ndra’ugõ, ba ma sakelakela, ba õkhamõ wa’auri, moroi dua dangau ba dua gaheu, ba tetibo ndra’ugõ ba galitõ andrõ, si lõ matemate. (F. 5, 30). 

9 Ba na i’alani ndra’ugõ hõrõu, ba tema koë ia ba tibo’õ; mohare’õ na si bakole ndra’ugõ ba õkhamõ wa’auri, moroi dombua hõrõu, ba tetibo ndra’ugõ ba narako alitõ andrõ. (F. 5, 29). 

10 Mifaigi, fa bõi mi’ositengagõ zide’ide andrõ, samõsa. Uŵa’õ sa khõmi, mala’ikara andrõ ba zorugo, ba lõ mamalõmalõ wa la’ila mbawa Namagu andrõ, si so ba zorugo. (Sin. 34, 8. Heb. 1, 14).

11 Ba wangorifi si no elungu sa mõi Nono Niha. (9, 13; Luk. 19, 10. Tim. I. 1, 15). (A. 12—14: Luk. 15, 4—7.)

12 Hadia ba dõdõmi? Na so niha, si so biribiri, otu nga’eu, ba na no elungu zi sageu; hadia, lõ irõi zi siŵa wulu a siŵa ba hili misa ba mõi mangalui selungu andrõ? 

13 Ba na tobali isõndra, ba si ndruhu niŵa’õgu khõmi, abõlõ wa’omuso dõdõnia ba da’õ, moroi ba wa’omuso dõdõnia ba zi siŵa wulu a siŵa, si lõ elungu.

14 Si manõ gõi khõ Namami andrõ, si so ba zorugo; tenga nilau dõdõnia taya zamõsa, side’ide andrõ.

15 III. Ba na mosala khõu dalifusõu, ba ae tegu ia, ba zi ha ya’ami, daruami; na ifondrondrongo khõu, ba no õsõndra dalifusõu. (Moz. III. 19, 15. Gal. 6, 1.) 

16 Ba na lõ ifondrondrongo, ba halõ awõu zamõsa tõ ba ma darua, ena’õ aro huhuo fefu ba niŵa’õ zi darua, ba ma si datõlu, si so ba mbõrõ. (Yoh. 8, 17). 

17 Ba na lõ ifondrondrongo khõra andrõ, ba ombakha’õ ba mbanua. Ba na lõ’õ gõi ifondrondrongo niŵa’õ mbanua, ba ya hulõ niha baero ia khõu, ya hulõ zanema beo. (Kor. I. 5, 11. 13. Tes. II. 3, 6. 14. 15). 

18 Si ndruhu niŵa’õgu khõmi, hadia nibõbõmi ba guli danõ, ba nibõbõ gõi ba zorugo; ba hadia ni’efa’õmi ba guli danõ, ba ni’efa’õ gõi ba zorugo. (F. 16, 19. Yoh. 20, 23). 

19 Ba uŵa’õ gõi khõmi, na darua ba khõmi zangosara’õ tõdõra, ba guli danõ, ba ngawalõ hadia ia, ni’andrõra, ba ibe’e khõra Amagu andrõ, si so ba zorugo. (Mar. 11, 24).

20 Ba zorudu zi darua, ba ma si datõlu, ba dõigu, ba da’õ sodo khõra ba gotaluara. (F. 28, 20. Luk. 24, 36).

21 IV. Ba mõi khõnia Wetero, imane khõnia: He Tua, ha me uga u’efa’õ zala dalifusõgu, na mosala in khõgu? Hadia irugi mewitu? (Luk. 17, 3. 4). 

22 Imane khõnia Yesu: Uŵa’õ khõu: tenga ha irugi zi mewitu, irugi zi mewitu ngafulu wa fitu. 

23 Andrõ fakhilikhili ira mbanua zorugo andrõ razo, sedõna mangerai õmõ khõ zawuyunia. 

24 Ba me ibõrõtaigõ mangerai, ba te’ohe khõnia zamõsa, so’õmõ si fulu ngahõnõ balaki. 

25 Ba me lõ khõnia famu’a, ba iŵa’õ sokhõ, la’amawa ia, awõ wo’omonia, awõ nononia, awõ fefu hadia ia zi so khõnia, famu’a gõmõ. 

26 Ba ituhi dano sawuyu andrõ, mangalulu ia khõnia, imane: Bologõ dõdõu khõgu, ba ahori ubu’a ia khõu. 

27 Ba ahakhõ dõdõ zokhõ zawuyu andrõ, i’efa’õ ba ibe’e bualania khõnia zugilõ andrõ. 

28 Ba me mõi baero zawuyu andrõ, ba falukha ia nawõnia sawuyu, so’õmõ khõnia si lima wulu rufia. Ba ira’u, itõgi mbagi, imane: Bu’a gõmõu khõgu. 

29 Ba ituhi danõ awõnia sawuyu andrõ, mangandrõ khõnia, imane: Bologõ dõdõu khõgu, ba ubu’a khõu. 

30 Ba lõ edõna ia; mõi ia, ifakuru’õ, irege ibu’a gõmõ. 

31 Ba me la’ila da’õ awõnia sawuyu bõ’õ, ba abu sibai dõdõra ba mõi ira, la’ombakha’õ khõ zokhõ ya’ira da’õ no mege fefu. 

32 Ba ifakaoni’õ ia sokhõ ya’ia, imane khõnia: He sawuyu si lõ sõkhi! Õmõ no andrõ fefu, ba no ube’e bualagu khõu, me no mangandrõ ndra’ugõ khõgu; 

33 ba hadia, lõ õhakhõsi tõdõ gõi mena’õ nawõu sawuyu, si mane ya’o, me no uhakhõsi tõdõ ndra’ugõ? (Yak. 2, 13). 

34 Ba mofõnu zokhõ ya’ia, ibe’e ba danga zamakao, irege ibu’a gõmõnia khõnia fefu. (F. 3, 25. 26). 

35 Si manõ gõi ilau khõmi dania Amagu andrõ ba zorugo, na tenga moroi ba dõdõmi mi’efa’õ zala, dozi ami, ba dalifusõmi. (F. 6, 15. Mar. 11, 25 b. t.).

 

MATAIO

Faza 19

 

I. Lasofu, na tola itibo’õ ngambatõnia niha. II. Ifahowu’õ ndraono Yesu. III. Ono matua andrõ, so’ana’a. IV. Ha waraõ isõndra lala wangorifi so’ana’a.

(A. 1—9: Mar. 10, 1—12.)

 

1 I. Ba me no i’o’ozui Yesu huhuo andrõ, ba iheta ia ba Galilaia, isaŵa danõ Yudaia, yefo Yoridano. 

2 Ba ato zolo’õ ya’ia niha, ba ifadõhõ wõkhõra ba da’õ. 

3 Ba mõi khõnia warizaio, latandraigõ ia, lamane: Hadia, tola itibo’õ ngambatõnia niha, gofu hadia mbõrõ? (Mar. 10, 8). 

4 Ba itema li, imane: Hadia, lõ ni’ilami ba zura, wa ira matua ba ira alawe nifazõkhi zombõi ba mbõrõta? (Moz. I. 2, 27; 5, 2), 

5 ba no imane: ”Andrõ irõi dania namania, awõ ninania, niha, ba i’olembai ngambatõnia, ba tobali ha sambua boto zi darua andrõ”? (Moz. I. 2, 24. Efez. 5, 31). 

6 Ba tenga sa’ae darua ira, ha sambua boto. Ba bõi yamufabali niha nifabõbõ Lowalangi. (Kor. I. 7, 10). 

7 Lamane khõnia: Ba hana wa no i’oroi’õ Moze labe’e zura wangefa, ba latibo’õ ia? (F. 5, 31). 

8 Imane khõra: Bõrõ wa’abe’e dõdõmi, wa itehe khõmi Moze wanibo’õ ira alawemi; ba moroi ba mbõrõta, ba tenga si manõ. 

9 Ba uŵa’õ khõmi: Na so zanibo’õ ira alawenia, na tenga horõ mbõrõ, ba na ihalõ dánõ bõ’õ, ba sohorõ da’õ. (F. 5, 32. Luk. 16, 18). 

10 Lamane khõnia nifahaõnia: Na si manõ huku niha ba ndra alawe, ba lõ sõkhi wangowalu. (Kor. I. 7, 1). 

11 Ba imane khõra: Lõ dozi aboto ba dõdõ huhuo andre, ha ba nibe’e fa’aboto ba dõdõ. (Kor. I. 7, 2; 7, 17)

12 So sa nikhai, si no tohõna si manõ, moroi ba dalu nina; ba so nikhai, nikhai niha, ba so nikhai, si no mogai ya’ira tangara, bõrõ mbanua zorugo andrõ. Sangila mamotokhi ba dõdõnia, ba yamubotokhi. (Kor. I. 7, 26. 32 b. t. Tim. I. 4, 3. Tim. II. 3, 6). (A. 13—15: Mar. 10, 13—16. Luk. 18, 15—17.)

13 II. Ba la’ohe khõnia ndraono sawuyu, ena’õ itufa ira tanga ba mangandrõ. Ba latenaŵa ira nifahaõ. 

14 Ba imane khõra Yesu: Mifa’amõi ndraono, bõi mitaha ira we’amõi khõgu, ba zi manõ sa mbanua zorugo andrõ. (F. 18, 3).

15 Ba itufa ira tanga, ba iheta ia ba da’õ. (A. 16—22: Mar. 10, 17—22. Luk. 18, 18—23.)

16 III. Ba hiza niha si mõi khõnia, imane: He samahaõ! hadia zi sõkhi nilaugu, ena’õ usõndra wa’auri si lõ aetu andrõ? (Luk. 10, 25).

17 Ba imane khõnia: Hadia wa õsofu khõgu zi sõkhi? Ha samõsa zi sõkhi. Ba na omasi’õ õkhamõ wa’auri, ba o’õ goroisa andrõ. (Luk. 10, 26—28. Gal. 3, 12. 21). 

18 Imane: Hadia goroisa? Ba imane Yesu: Da’õ: Bõi ange’e! Bõi ohorõ! Bõi anagõ! Bõi bõbõgõ zi lõ duhu! (Moz. II. 20, 12 b. t.). 

19 Fosumange namau, awõ ninau! ba: Omasi’õ zahatõ khõu, si mane fa’omasiu ndra’ugõ! (F. 22, 39. Moz. III. 19, 18). 

20 Imane khõnia ono matua andrõ: No ahori u’o’õ da’õ, hadia zambõ ndra’o? 

21 Imane khõnia Yesu: Na omasi’õ mo’ahonoa, ba ae amawa zi so khõu ba be’e ba zi numana, ba so khõu girõgirõ ba zorugo ba tabu, o’õ ndra’o. (F. 5, 48; 6, 20. Luk. 12, 33. 34).

22 Ba me irongo da’õ ono matua andrõ, ba mofanõ ia, abu dõdõ; me no sebua ana’a ia. (A. 23—30: Mar. 10, 23—31. Luk. 18, 24—30.)

23 IV. Ba imane Yesu ba nifahaõnia: Si ndruhu niŵa’õgu khõmi, afõkhõ sibai ba zo’ana’a wogamõ banua zorugo andrõ. (Tim. I. 6, 9).

24 Ba uŵa’õ gõi khõmi, aoha na i itõrõ dõgi walõlõŵa kudo, moroi ikhamõ mbanua zorugo so’ana’a. (F. 13, 22). 

25 Ba me larongo da’õ nifahaõnia, ba tobali sibai dõdõra, ba lamane: Ba ha niha zogamõ fa’auri? 

26 Ba ifaigi ira Yesu ba imane khõra: Na ba niha, ba tebai; ba ba Lowalangi, ba molala fefu hadia ia. (Luk. 1, 37). 

27 Ba humede Wetero, imane khõnia: Faigi ndra’aga, no marõi fefu hadia ia ba no ma’o’õ ndra’ugõ, ba hadia khõma dania? (F. 4, 20). 

28 Ba imane khõra Yesu: Si ndruhu niŵa’õgu khõmi, ya’ami solo’õ ya’o, ba ba wangazõkhi dania, na mudadao Nono Niha ba dadaoma lakhõminia andrõ, ba dumadao gõi ami, felendrua dadaoma ba sanguhuku mado Gizeraëli andrõ, si felendrua, ami. (F. 25, 31. Luk. 22, 28 b. t. Fam. 3, 21. Kor. I. 6, 2). 

29 Ba dozi si no mondrõi talifusõ matua, ba ma talifusõ alawe, ba ma ama, ba ma ina, ba ma ono, ba ma benua, na bõrõ dõigu, ba oya winaeta lasõndra mangawuli, ba latema wa’auri si lõ aetu andrõ, amaedola gondrõita. 

30 Ba ato zi mõi furi dania si so fõna iada’e, ba si mõi fõna, si so furi iada’e. (F. 20, 8. 16. Luk. 13, 30).

 

MATAIO

Faza 20

 

I. Amaedola: Luo zohalõŵõ ba kabu nagu. II. Ifuli i’ombakha’õ wamakao ya’ia Yesu. III. Ina nono Zebedaio andrõ. IV. Ifadõhõ Yesu hõrõ niha sau’a, darua.

 

1 I. Noa sa fakhilikhili ira mbanua zorugo andrõ niha, satua baomo, si mõi, si hulõ wongi, mangoni sohalõŵõ ba kabu nagu khõnia. (F. 21, 33). 

2 Ba me no mamagõlõ ira zohalõŵõ, sasuku ma’ṍkhõ luora, ba ifatenge ira ba kabu nagu andrõ khõnia. 

3 Ba me ifuli mõi, me labõzi siŵa, ba i’ila dánõ bõ’õ, si so ba kade, si lõ halõŵõ, 

4 ba imane khõra: Mi’ae’e, ya’ami gõi, ba kabu nagu, ba si nangea luomi, ba ube’e khõmi. 

5 Ba mõi ira. Ba ifuli mõi me laluo ba me labõzi tõlu, ba imanõ zui. 

6 Ba me mõi ia me labõzi lima, ba falukha ia dánõ bõ’õ, si so ba da’õ, ba imane khõra: Hadia wa mi’oma’õkhõi manõ ba da’e, lõ halõŵõ? 

7 Lamane khõnia: Me lõ sangoni ya’aga. Imane khõra: Mi’ae’e gõi, ba kabu nagu andrõ. 

8 Ba me bongi sa’ae, ba imane sokhõ kabu nagu andrõ khõ durutulinia: Hede ba zohalõŵõ andrõ ba be’e luora; bõrõgõ ba zafuria mõi, numalõ ba zi fõfõna andrõ. (F. 19, 30). 

9 Ba la’ondrasi ni’oni me labõzi lima, ba sasuku zamõsa luora. 

10 Ba me so zi fõfõna andrõ, ba lawai ebua zinemara. Ba tebe’e sasuku zamõsa khõra gõi. 

11 Ba me no latema da’õ, ba kumõkõkõkõ ira khõ zatua baomo andrõ, (Luk. 15, 29 b. t.), 

12 lamane: Ha saza wohalõŵõ zafuria andrõ, ba no fagõlõgõlõ ndra’aga õbe’e, ya’aga si no manaha fa’afõkhõ andrõ, ma’õma’õkhõ, awõ wa’aukhu zino. (F. 19, 29). 

13 Ba itema li zi samõsa andrõ, imane: He le, lõ ulimo ndra’ugõ. Tenga no mamagõlõ ita ba zi sasuku? 

14 Halõ dána khõu ba ofanõ. Somasido, ufagõlõgõlõ wame’e khõmi safuria andre. 

15 Ma lõ tola u’o’õ manõ nilau dõdõgu ba zi so khõgu? Ma afõkhõ dõdõu, me no sebua tõdõ ndra’o? (Rom. 9, 21, b. t.).

16 Si manõ wa tobali si so fõna zi so furi, awõ wa tobali si so furi zi so fõna. (F. 19, 30; 22, 14). (A. 17—19: Mar. 10, 32—34. Luk. 18, 31—34.)

17 II. Ba me mõi misi yaŵa Yesu ba Yeruzalema, ba i’ohe awõnia zi felendrua, ba zi ha ya’ira ba imane khõra ba lala: 

18 Hiza, mõi ita misi yaŵa ba Yeruzalema; ba tebe’e dania ba danga gere sebua ba ba danga zangila amakhoita andrõ Nono Niha, ba la’etu’õ hukunia, huku famunu, (F. 16, 21),

19 ba labe’e ia ba danga niha baero, ba wango’aya ya’ia ba ba wamõbõzi ba ba wamorõfa; ba na no irugi tõlu ngaluo, ba maoso ia, ifuli auri. (E. 27, 2 b. t.). (A. 20—28: Mar. 10, 35—45.)

20 III. Ba mõi khõnia nina nono Zebedaio andrõ, awõ nononia, ituhi danõ fõnania, so ni’andrõnia khõnia. (F. 10, 2). 

21 Ba imane khõnia: Hadia niŵa’õu? Imane khõnia: Ŵa’õ, ena’õ dumadao dania nonogu andre, si darua, samõsa ba gambõlõu ba samõsa ba gaberau, ba mbanuau andrõ. 

22 Ba itema linia Yesu, imane: Lõ mi’ila watahõgõ hadia ni’andrõmi. Hadia mi’ila mibadu nõsi mako andrõ, nibadugu dania? Lamane khõnia: Ma’ila. (F. 26, 39. Luk. 12, 50). 

23 Imane khõra: Mibadu sa nõsi mako andrõ khõgu dania, ba fedadao andrõ ba gambõlõgu ba ba gaberagu, ba tenga ia’o zanguma’õ; ha da’õ zidadao ba da’õ, nihonogõi Namagu fedadao. (F. 25, 34). 

24 Ba me larongo da’õ si dafulu, ba lõ sõkhisõkhi dõdõra ba zi darua andrõ, si fatalifusõ. 

25 Ba humede khõra Yesu, imane: Mi’ila, lafatõrõ mbanuara salaŵa niha ba labe’e barõ mbawara niha sebuara. (Luk. 22, 25 b. t.). 

26 Ba ba khõmi, ba bõi si manõ; ha niha zomasi ebua ba khõmi, ba yamõi enonimi; (F. 23, 11; Mar. 9, 35; Efes. 5, 21), 

27 ba na so ba khõmi zomasi mõi fõnami, ba yamõi sawuyumi.

28 Si mane Ono Niha, tenga si mõi mangoni, no si mõi enoni, si mõi mame’e nosonia hõli zato. (Luk. 22, 27. Yes. 53, 10. 12. Tim. I. 2, 6. Fet. I. 1, 18. 19). (A. 29—34: Mar. 10, 46—52. Luk. 18, 35—43.)

29 IV. Ba me mofanõ ira, me aefa ira ba Yerikho, ba ato zolo’õ ya’ia niha. 

30 Ba hiza niha sau’a, darua, sidadao ba zinga lala; me larongo itõrõ Yesu, ba mu’ao ira, lamane: Hakhõsi tõdõ ndra’aga, ma’uwu Dawido! (F. 9, 27). 

31 Ba latenaŵa ira sato, ena’õ labato. Ba lahõtõi fe’ao, lamane: He Tua, ma’uwu Dawido, hakhõsi tõdõ ndra’aga! 

32 Ba ibadugõ ia Yesu, muhede ia khõra, imane: Hadia zomasi ami, he uwisa khõmi? 

33 Lamane khõnia: He Tua, ena’õ teboka hõrõma! 

34 Ba ahakhõ dõdõ Yesu ba ibabaya hõrõra, ba i’anema’õ ifuli la’ila niha ba la’o’õ ia.

 

MATAIO

Faza 21

 

I. Fe’amõi Yesu miyomo ba Yeruzalema. II. Fangehao osali. III. Marafala si mate. IV. Lasofu, hana wa tola imanõ Yesu. V. Amaedola: Sohalõŵõ ba kabu nagu. (A. 1—11: Mar. 11, 1—10. Luk. 19, 29—38. Yoh. 12, 12—18.)

 

1 I. Ba me no ahatõ ira ba Yeruzalema, me larugi Mbetifage, ba gahe hili wanikha, ba ifatenge nifahaõnia Yesu, darua, 

2 imane khõra: Mi’ae ba mbanua side’ide andrõ, fõnami, ba i’anema’õ falukha ami galide si alawe ni’amõhõgõ ba so gõi nono; mitoto’õ wesu ba mi’ohe ia khõgu. 

3 Ba na so zanguma’õ khõmi hadia ia, ba mimane: Moguna khõ Dua, ba i’anema’õ ifa’ohe’õ. 

4 Andrõ si manõ, ena’õ itõrõ niŵa’õ zama’ele’õ andrõ, me imane: ”Miŵa’õ khõ nono Ziona alawe andrõ: 

5 ”Hiza, i’ondrasi’õ razomõ, sebolo tõdõ, fakudo ia ba hulu galide, ba ba hulu nono zonoro”. (Sakh. 9, 9). 

6 Ba mõi nifahaõ andrõ, la’o’õ niŵa’õ Yesu, khõra, la’ohe galide andrõ, 

7 awõ nono, ba labologõ nukha ba hulu ba fakudo ia yaŵa. 

8 Ba ato niha samologõ ba lala nukhara; ba so zoleŵa tuturu geu ba lafazawili ba lala. (Sal. II. 9, 13). 

9 Ba mu’ao niha sato, si so fõna, awõ zolo’õ moroi furi, lamane: ”Hozana khõ ma’uwu Dawido andrõ, ya’ahowu zi so andrõ, ba dõi Zo’aya; hozana ba zalaŵa yawa!” (Sin. 118, 25. 26). 

10 Ba me irugi yomo ba Yeruzalema, ba humufa mbanua ma’afefu, lamane: Ha niha da’õ?

11 Ba lamane niha sato: Da’õ zama’eleõ andrõ, Yesu, banua Nazareta, ba Galilaia. (F. 2, 23. Yoh. 1, 46). (A. 12—17: Mar. 11, 15—17. Luk. 19, 45. 46).

12 II. Ba mõi ba gosali Lowalangi andrõ Yesu, ba ifofanõ baero fefu zamawamawa hadia ia, awõ zowõliwõli ba gosali, ba iso’agõ meza zanuka ana’a, awõ dadaoma zamawa marafadi. (Yoh. 2, 14 b. t.). 

13 Ba imane khõra: No so ba zura: ”Omo wangandrõ dõi nomogu.” Ba ya’ami, ba no mibali’õ tõgi narõ hili naha zorabu. (Yes. 56, 7. Yer. 7. 11).

14 Ba la’ondrasi ia sau’a, awõ zombuyumbuyu tõla, ba gosali, ba ifadõhõ wõkhõra. 

15 Ba me la’ila ere sebua ba sangila amakhoita zahõlihõli dõdõ andrõ, nilaunia, ba me larongo li ndraono, si’ao ba gosali, sanguma’õ: ”Hozana khõ ma’uwu Dawido andrõ!” ba lõ sõkhisõkhi dõdõra. 

16 Ba lamane khõnia: Õrongo, hadia niŵa’õ da’õ? Ba imane khõra Yesu: Urongo. Hadia, lõ mirai mi’ila ba zura: ”No õ’asogõ khõu wanuno si oroi mbewe ndraono si lõ humede na, ba si oroi mbewe zamaenu?” (Sin. 8, 3).

17 Ba irõi ira, mõi ia baero mbanua, isaŵa Mbetania, ba mõrõ ia ba da’õ. (Mar. 11, 11. 19). (A. 18—22: Mar. 11, 12—14. 20—24.)

18 III. Ba me mangawuli ia miyomo ba Yeruzalema, si hulõ wongi, ba olofo ia. 

19 Ba me i’ila marafala, sageu, ba ngai lala, ba mõi ia ba da’õ, ba lõ yaŵa bua ni’ilania, ha bulu. Ba imane khõnia: Bõi yamowua ndra’ugõ sa’ae, irugi zi lõ aetu. Ba i’anema’õ mate marafala andrõ. 

20 Ba me la’ila da’õ nifahaõ, ba ahõlihõli dõdõra ba lamane: Ha lõ alio mate marafala andrõ! 

21 Ba humede Yesu, imane khõra: Si ndruhu niŵa’õgu khõmi: Na so khõmi wamati, na lõ manufa dõdõmi, ba tenga ha da’õ milau, ba marafala andrõ; na miŵa’õ gõi ba hili andrõ: Fazaŵa’õ ba tibo’õgõ ba nasi, ba itõrõ niŵa’õmi. (F. 17, 20).

22 Ba hadia ia, fefu, ni’andrõmi ba wangandrõ, na mamati ami ba lõ zi lõ mitema. (F. 7, 7; 18, 19). (A. 23—27: Mar. 11, 27—33. Luk. 20, 1—8.)

23 IV. Ba me mõi ia ba gosali, ba la’ondrasi ia ere sebua ba satua mbanua, me mamahaõ ia, lamane: Hadia, wa tola õlau da’õ ba ha niha zanehe khõu? (Yoh. 2, 18). 

24 Ba itema lira Yesu, imane khõra: So gõi nisofugu khõmi zambalõ; na miŵa’õ khõgu da’õ, ba uŵa’õ gõi khõmi, hadia, wa tola ulau da’õ. 

25 Famayagõ idanõ andrõ khõ Yohane, he moroi ia, hadia, moroi ba zorugo, hadia moroi ba niha? Ba la’era’era tõdõra, ba lamane: (Luk. 3, 3; 7, 30). 

26 Na taŵa’õ: Moroi ba zorugo, ba imane khõda dania: Ba hana wa lõ mamati ami no khõnia? Ba na taŵa’õ: Moroi ba niha, ba ata’u ita niha sato, me ba dõdõra fefu, sama’ele’õ Yohane andrõ. (F. 14, 5). 

27 Ba latema li Yesu, lamane: Lõ ma’ila. Ba imane khõra gõi: Ba lõ’õ gõi uŵa’õ khõmi, hadia, wa tola ulau da’õ. 

28 Ba hadia ba dõdõmi? So niha, si so ono matua, darua. Ba mõi ia ba zi samõsa, imane: He onogu, ae ohalõŵõ ba kabu nagu ma’õkhõ. 

29 Ba itema linia, imane: Lõ edõnado. Ba aefa da’õ, ba mangesa dõdõnia, ba mõi ia. 

30 Ba mõi ia ba zi samõsa, ba imanõ gõi. Ba itema linia da’õ, imane: Mõi ndra’o, ama, ba lõ mõi ia. 

31 Ha niha ba zi darua andrõ zolo’õ somasi nama? Lamane: Si fõfõna andrõ. Imane khõra Yesu: Si ndruhu niŵa’õgu khõmi, ofõna molala ba mbanua Lowalangi andrõ zanema beo ba sohorõ, moroi khõmi. (Luk. 3, 12; 18, 14).

32 Noa sa mõi Yohane khõmi, wangombakha lala satulõ, ba lõ samati ami khõnia, ba no mamati khõnia zanema beo ba sohorõ. Ba me mi’ila da’õ, ba lõ sangesa dõdõmi, furi õ, ba wamati khõnia ena’õ. (F. 3, 17).

(A. 33—46: Mar. 12, 1—12. Luk. 20, 9—19.)

33 V. Mifondrondrongo gamaedola bõ’õ: So niha, satua baomo, samazõkhi kabu nagu, ifasui õli, iko’o ba danõ wolazi, ba i’otomosi malige, ba ibe’e niseŵa kabu andrõ ba zohalõŵõ, ba ilau mofanõ. (Yes. 5, 1 b. t. Yer. 2, 21). 

34 Ba me no ahatõ mbaŵa wangai bua, ba ifatenge zawuyunia ba zohalõŵõ andrõ, ba wanema bua nagu khõnia. 

35 Ba lara’u zawuyunia andrõ sohalõŵõ: so nibõbõzi, so nibunu manõ, ba so nibunu nitebu kara. (F. 22. 6). 

36 Ba ifuli ifatenge zawuyu bõ’õ, ato moroi ba zi fõfõna andrõ, ba lamanõ gõi ba da’õ. 

37 Ba ba gafuriata, ba ifatenge khõra nononia, imane: Ata’u ira nonogu. (Heb. 1, 1. 2). 

38 Ba me la’ila nononia andrõ sohalõŵõ, ba lamane dõdõra: Sanema ondrõita da’õ, talabu, tabunu ia ba tahalõ khõda gondrõita andrõ khõnia. (F. 26, 3. 4. 66; 27, 23). 

39 Ba lara’u ia, latuli’õ baero kabu nagu, ba labunu. (F. 23, 37. Heb. 13, 12). 

40 Ba na mõi zokhõ kabu nagu andrõ, ba he iwisa ba zohalõŵõ andrõ? 

41 Lamane khõnia: Ihaogõ wamakiko sebua horõ andrõ, ba kabu nagu andrõ, ba ibe’e niseŵa ba zohalõŵõ bõ’õ, same’e bua khõnia na baŵania. 

42 Imane khõra Yesu: Hadia, lõ mirai mi’ila ba zura: ”Gowe andrõ, nitibo’õ zotomo andrõ, ba no tobali toyo ba watalinga; khõ Zo’aya moroi da’õ, ba sahõlihõli dõdõda.” (Sin. 118, 22. 23. Hal. zin. 4, 11. Yes. 28, 16). 

43 Andrõ uŵa’õ khõmi: Laheta dania khõmi mbanua Lowalangi andrõ, ba labe’e ba niha sowua buania. (Hal. zin. 13, 46). 44 Ba sarasa zalau ba gowe andrõ, ba nilangõnia, ba imama. (Yes. 8, 14. 15. Dan. 2, 34 b. t.). 

45 Ba me larongo gamaedola andrõ khõnia ere sebua ba farizaio, ba aboto ba dõdõra, wa khõra itandrõsaigõ da’õ. 

46 Ba la’alui wondra’u ya’ia, ba no ata’u ira niha sato, me ba dõdõra sama’ele’õ ia. (Luk. 7, 16. Luk. 19, 48. Mar. 12, 12).

 

MATAIO

Faza 22

 

I. Amaedola; Falõŵa. II. Lasofu, na labe’e mbeo, ba na lõ’õ, ba III. he wisa ba wemaoso zi mate andrõ, ba IV. hadia zebua goroisa. V. Ha ma’uwu Keriso?

 

1 I. Ba humede Yesu, amaedola zui ilau khõra, imane: (A. 2—14: Luk. 14, 16—24). 

2 No fakhilikhili ira mbanua zorugo andrõ razo niha, samangowalu ononia. 

3 Ba ifatenge zawuyunia, ba wehede ba zi ho kumaoni, ba we’amõi ba walõŵa, ba lõ edõna mõi ira. 

4 Ba ifuli ifatenge zawuyu bõ’õ, imane: Mimane ba zi ho kumaoni andrõ: Hiza, no u’asiwai gõ andrõ khõgu, õrõbao khõgu ba hadia ia gurifõ ni’a’atabõ, ba no tumaba ba no awai fefu hadia ia, mitabu ba walõŵa. 

5 Ba lõ ba dõdõra; mofanõ ira, so zi mõi ba nowi khõnia, ba so zi mõi maniaga. 

6 Ba tánõ bõ’õ, ba lara’u zawuyunia andrõ, la’o’aya ba labunu. (F. 21, 35. 36). 

7 Ba mofõnu razo no mege, ba ifatenge zaradadunia, ifafakiko’õ zange’e andrõ ba banuara, ba ifatunu’õ. (Dan. 9, 26). 

8 Aefa da’õ, ba imane ba zawuyunia: Noa sa mulau walõŵa, ba tenga si nangea mõi nikaoni andrõ. (Hal. zin. 13, 46). 

9 Ba mi’ae ba wabaliŵa lala misa, ba ha wa’ato zi falukha ami, ba mikaoni ba walõŵa. 

10 Ba mõi ba lala zawuyu no mege, ba la’ozaragõ fefu zi falukha ira, si sõkhi, awõ zi lõ sõkhi, ba afõnu niha si manga naha walõŵa. 

11 Ba me mõi baulu razo, ba wamaigi si manga andrõ, ba i’ila zamõsa ba da’õ, si lõ baru ba walõŵa. (Yes. 61, 10. Efes. 4, 22—24). 

12 Ba imane khõnia: He le, hadia wa mõi’õ yomo ba da’e, ba lõ baru ba walõŵa? Ba lõ hedehedenia. 

13 Ba imane razo ba genoni: Mibõbõ gahenia ba tangania, ba mitibo’õ ia ba zogõmigõmi, baero sibai; ba fege’ege dania ba da’õ ba fatangisa mboha. (F. 8, 12).

14 Ato sa nikaoni, ba lõ ato nitutuyu. (F. 20, 16).

(A. 15—22: Mar. 12, 13—17. Luk. 20, 20—26.)

15 II. Ba mõi mamagõlõ warizaio, ena’õ la’alani ia ba huhuonia. 

16 Ba lafatenge khõnia nono zekola andrõ khõra, awõ zi faofao khõ Herode, lamane: He samahaõ! ma’ila, satulõ ndra’ugõ ba si ndruhu wangombakha’õu lala Lowalangi, ba lõ ba dõdõu niha, lõ’õ sa õfaigi mbawa niha. 

17 Ba ŵa’õ khõma, hadia ba dõdõu, tola labe’e mbeo khõ kaizaro, ma lõ’õ? 

18 Ba me no aboto ba dõdõ Yesu walõsõkhira, ba imane: Hana wa mitandraigõ ndra’o, samini tṍdõ? 

19 Mi’oroma’õ khõgu hua mbeo andrõ. Ba la’oro’õ khõnia zambua hua suku. 

20 Ba imane khõra Yesu: Ha famaedo da’e, ba ha õkhõ zura andre? Lamane: Khõ kaizaro. 

21 Ba imane khõra: Ba mibe’e khõ kaizaro hadia khõ kaizaro, ba khõ Lowalangi hadia khõ Lowalangi. (Luk. 23, 2. Rom. 13, 7).

22 Ba me larongo da’õ, ba ahõlihõli dõdõra ba larõi ia, lalau mofanõ. (A. 23—33: Mar. 12, 18—27. Luk. 20, 27—39.)

23 III. Me luo da’õ mõi khõnia zadukaio andrõ, sanguma’õ lõ femaoso zi mate, ba lasofu khõnia, (Hal. zin. 23, 6. 8). 

24 lamane: He samahaõ, no iŵa’õ Moze, na so zi mate niha, si lõ ono, ba yamu’owalu wo’omonia talifusõnia, yamufonga’õtõ dalifusõnia andrõ. (Moz. V. 25, 5). 

25 Ba no so ba khõma, dafitu si fatalifusõ, ba mangowalu zi a’a ba mate; ba me lõ ononia, ba khõ nakhinia wo’omonia. 

26 Si manõ gõi wanete da’õ ba fanete zi darua, irugi dafitu ira. 

27 Ba ba gafuriata, furira fefu, ba mate gõi galawe andrõ. 

28 Ba ba wemaoso zi mate andrõ, ba ha fo’omo ia ba zi dafitu andrõ? noa sa’ae dozi zangai ya’ia. 

29 Ba itema lira Yesu, imane khõra: Selungu ami, lõ saboto ba dõdõmi zura ba lõ saboto ba dõdõmi wa’abõlõ Lowalangi andrõ. 

30 Ba wemaoso zi mate andrõ sa, ba lõ mangowalu ira, ba lõ mõi nihalõ, hulõ mala’ika Lowalangi andrõ ba zorugo sa’ae ira. (Luk. 20, 35). 31 Ba ba wemaoso zi mate andrõ, ba hadia, lõ nibasomi niŵa’õ Lowalangi khõmi, me imane: (Moz. II. 3, 6). 

32 ”Lowalangi Gaberahamo ndra’o ba Lowalangi Giza’aki ba Lowalangi Yakobo?” Ba tenga Lowalangi zi mate ia, no Lowalangi zauri.

33 Ba me larongo da’õ niha sato, ba tobali dõdõra ba wamahaõnia andrõ. (A. 34—40: Mar. 12, 28—34.)

34 IV. Ba me larongo farizaio, no ifa’afu mbawa zadukaio, ba falukha ira. 

35 Ba so zamõsa khõra, sonekhe ba goroisa, sanofu khõnia, ba wanandraigõ ya’ia, imane: 

36 He samahaõ, hezo zebua goroisa ba zura goroisa andrõ? 

37 Ba imane khõnia: ”Omasi’õ Zo’aya ya’ugõ, Lowalangiu andrõ, moroi si’aikõ ba dõdõu, nosou ma’asambua zangomasi’õ ya’ia, ba õhorigõ gera’erau, wangomasi’õ ya’ia.” (Moz. V. 6, 5; 10. 12). 

38 Da’õ zebua goroisa, da’õ zi fõfõna. 

39 Ba sambua tõ, si fakhilikhili khõnia: ”Omasi’õ zahatõ khõu, si mane fa’omasiu ndra’ugõ.” (Yoh. I. 4, 20. 21. Moz. III. 19, 18. Rom. 13, 9).

40 Ba goroisa si dombua andrõ manandrõsa goroisa fefu, awõ niŵa’õ zama’ele’õ andrõ. (A. 41—46: Mar. 12, 35—37. Luk. 20, 41—44.)

41 V. Ba me falukha warizaio, ba isofu khõra Yesu, imane: 

42 Hadia ba dõdõmi ba khõ Keriso andrõ? ha ma’uwu ia? Lamane khõnia: Ma’uwu Dawido. 

43 Ba imane khõra: Ba hadia wa ibe’e tõinia Zo’aya Dawido, nifarou Geheha, me imane: 

44 ”No iŵa’õ So’aya khõ Zo’aya ya’o: Dadao ba gambõlõgu, irege ube’e tou barõ gaheu zi fatiu tõdõ khõu.” (Sin. 110, 1. Hal. zin. 2, 34, 35. Heb. 1—13). 

45 Ba na ibe’e tõinia Zo’aya Dawido, ba he wisa wa ma’uwunia? Ba lõ sangila manema linia, hadia ia, ba lõ si lõ ata’u manofu khõnia sa’ae, i’otarai luo da’õ.

 

MATAIO

Faza 23

 

I. Itegu warizaio Yesu. II. I’e’esi mbanua Yeruzalema andrõ.

(A. 1—14: Mar. 12, 38—40. Luk. 20, 45—47.)

 

1 I. Ba humede Yesu ba niha sato ba khõ ndra nifahaõnia, imane: 

2 Ba dadaoma Moze dumadao zangila amakhoita andrõ ba farizaio. 

3 Ba fefu hadia ia, niŵa’õra khõmi, ba mi’o’õ, bõi misawõ, ba bõi mi’o’õ ba mbuabuara; laŵa’õwa’õ sa, ba lõ latõrõ. (Rom. 2, 21). 

4 Ba labõbõ noro sabua ba lahare’õ ba galisi niha, ba ya’ira, ba sara turura lõ labe’e, ba wamaliŵa ya’ia. (Luk. 11, 46). 

5 Afu’afura la’ila ira niha, andrõ lalau fefu nilaura andrõ. La’ebolo’õ sa zura wangerangera andrõ khõra, ba la’ebua’õ mbowobowo mbarura andrõ. (F. 6, 1. 2. Moz. IV. 15, 38. Moz. V. 6, 8). 

6 Ba no omasi ira naha tánõ si yaŵa ba gowuloa ba dadaoma tánõ si yaŵa ba zekola; (Luk. 11, 43)

7 ba omasi ira na la’owai ira ba kade, ba na labe’e tõira zamahaõ niha tánõ bõ’õ. 

8 Ba bõi ndramube’e tõimi zamahaõ, ha sa samõsa zamahaõ ya’ami, ba si fatalifusõ ami fefu. 

9 Ba bõi fa’ama ami ba niha ba guli danõ, ha sa samõsa Namami, si so ba zorugo. 

10 Ba bõi ndramaube’e tõimi zolohe, me ha samõsa zolohe ya’ami, Keriso. 

11 Enonimi zebuami. (F. 20, 26, 27). 

12 Ba samali’õ salaŵa ya’ia, ba ni’ide’ide’õ dania, ba sangide’ide’õ ya’ia, ba nibali’õ salaŵa. (F. 18, 4. Luk. 14, 11; 18, 14. Amaed. 29, 23; Fet. I. 5, 5). 

13 Ba alai ami, sangila amakhoita, ba farizaio, samini tõdõ! me mikusi mbanua zorugo andrõ fõna niha; lõ’õ sa mõi ami bakha, ba lõ mifa’amõi bakha zi mõi ena’ṍ. (Luk. 11, 52). 

14 Alai ami, sangila amakhoita ba farizaio, samini tõdõ! me no si manga nomo lakha mbanua ami, ba me mi’oroma’õ wangandrõ sarā; andrõ tedou huku, nifatõrõ khõmi. 

15 Alai ami, sangila amakhoita ba farizaio, samini tõdõ! me no sanõrõi asi, awõ danõ, ami, ba wamali’õ solo’õ huku khõmi samõsa niha, ba na no i’o’õ, ba mibali’õ ono narako, mendrua manõ na sa moroi khõmi. 

16 Alai ami, solohe tanga niha bõ’õ, ba no au’a ami, sanguma’õ: Na so zame’e hõlu osali, ba si lõ’õ da’õ, ba na so zame’e hõlu ana’a gosali, ba nitõrõ. 

17 He sambõ tõdõ, si no au’a! he zebua ira sa, ana’a, ba ma osali, same’e amonita ana’a andrõ? 

18 Ba mimane: Na so zame’e hõlu naha wame’e sumange andrõ, ba si lõ’õ da’õ, ba na so zame’e hõlu sumange andrõ, si so yaŵa, ba nitõrõ. 

19 He sau’a! he zebua ira sa, sumange andrõ, ba ma naha wame’e, same’e amonita sumange andrõ? (Moz. II. 29, 37). 

20 Andrõ, same’e hõlu naha wame’e sumange, ba ibe’e hõlu da’õ, fabaya si so yaŵa fefu. 

21 Ba same’e hõlu osali, ba ibe’e hõlu da’õ, fabaya si onahia osali. (Sal. I. 8, 13). 

22 Ba same’e hõlu sorugo, ba ibe’e hõlu dadaoma Lowalangi fabaya sidadao yaŵa. (F. 5, 34). 

23 Alai ami, sangila amakhoita ba farizaio, samini tõdõ! me mibe’e zambua ni’ofulu lõnga ba hõwa ba lada, ba no olifu ami zebua goroisa, fanguhuku ba fa’ahakhõ dõdõ ba fa lõ farõi; ni’o’õ zi sambalõ, ba tenga gõi ni’ositengagõ zi sambalõ. (Luk. 11, 42). 

24 He solohe tanga niha, si no au’a, mitafi’õ nibadu, ba wameta di, ba mitõlõ kudo. 

25 Alai ami, sangila amakhoita ba farizaio, samini tõdõ! me mihaogõ gero mako ba ero wiga, ba yaŵa, ba no fahõna warabu ba folu’alu’a. (Luk. 11, 39 b. t.). 

26 He farizaio sau’a! ofõnai’õ wangehao yaŵa, mako, ena’õ sõkhi gõi geronia. (Tit. 1, 15). 

27 Alai ami, sangila amakhoita ba farizaio, samini tõdõ, me no hulõ lewatõ nilau betua ami, si sõkhi sa moroi baero, wamaigida, ba bakha, ba no fahõna dõla zi mate, awõ fefu hadia ia zi ta’unõ. (Luk. 11, 44). 

28 Si manõ gõi ami, niha satulõ ami, wamaigida, moroi baero, ba bakha, ba no fahõna wamini tõdõ ba fa lõ atulõ. 

29 Alai ami, sangila amakhoita ba farizaio, samini tõdõ! me mi’a’azõkhi lewatõ zama’ele’õ andrõ, ba me mihaogõ dandra lewatõ zatulõ, (Luk. 11, 47. 48), 

30 ba me mimane: Na ya’aga mena’õ ba gõtõ ndra tuada, ba lõ fao ndra’aga khõra, ba wamunu sama’ele’õ andrõ. 

31 Tobali mifaduhu’õ dõdõ niha bõ’õ khõmi, wa no ma’uwu zamunu sama’ele’õ andrõ ami. (Hal. zin. 7, 52). 

32 Ba mifõnui zu’asu’a andrõ khõ ndra tuami. (Tes. I. 2, 16).

33 He ulõ, ono gulõ! he miwisa wangefa’õ ya’ami ba wanguhuku andrõ, ba narako? (Mat. 3, 7). (A. 34—36: Luk. 11, 49—51.)

34 II. Andrõ, hiza, ufatenge khõmi zama’ele’õ ba satuatua ba sangila amakhoita, ba so dania ba mibunu, miforõfa, ba so, ba mibõzibõzi ba zekola khõmi ba migohi, i’otarai mbanua si sambua, numalõ ba zi sambua, (F. 10, 17), 

35 ena’õ mõi ba hulumi fefu ndro zatulõ andrõ, niduwagõ ba guli danõ, i’otarai ndro Habeli satulõ andrõ, irugi ndro Zakharia, ono Mbarakhia andrõ, nibunumi ba gotaluara gosali naha wame’e sumange. (Moz. I. 4, 8. Nga’õt. II. 24, 20 b. t.).

36 Si ndruhu niŵa’õgu khõmi, tohare dania da’õ fefu ba niha si sagõtõ andre. (A. 37—39: Luk. 13, 34. 35.)

37  He Yeruzalema! he Yeruzalema! samunu sama’ele’õ andrõ, sanebu kara nifatenge khõnia, ha me uga no utandraigõ mangowuloi onou, si mane sifagelo, na i’owuloi nononia barõ gafinia, ba lõ sedõna ami. 

38 Hiza, terõi khõmi nomomi, adudu. (F. 24, 2. Sal. I. 9, 7). 

39 Uŵa’õ sa khõmi, lõ’õ sa’ae mi’ila ndra’o, i’otarai da’e, irege miŵa’õ dania: Ya’ahowu zi so ba dõi Zo’aya! (F. 21, 9. Yoh. 12, 

 

MATAIO

Faza 24

 

I. Fama’ele’õ fanudugõ Yeruzalema. II. Fama’ele’õ fa’atua danõ. III. Famarou tõdõ, ba wa lõ mõrõ. (A. 1—28: Mar. 13, 1—23. Luk. 21, 5—24.)

 

1 I. Ba mõi baero Yesu, irõi gosali, mofanõ ia, ba mõi khõnia nifahaõnia, ba wanuturu osali andrõ khõnia. 

2 Ba itema lira, imane khõra: Hadia, lõ mi’ila da’õ fefu? Si ndruhu niŵa’õgu khõmi, sambua lõ torõi ba da’õ ba dete nawõnia yaŵa, kara, si lõ ladudugõ. (Luk. 19, 44). 

3 Ba me mudadao ia ba hili wanikha, ba mõi khõnia nifahaõnia, ba zi ha ya’ira, lamane: Ombakha’õ khõma, ha wa’ara da’õ, ba hadia dandra wa’asomõ ba tandra wa’atua danõ. 

4 Ba itema lira Yesu, imane khõra: Mifaigi, fa bõi ifaelungu ami niha, ha niha ia. (F. 7, 15. Tes. II. 2, 3). 

5 Ato sa dania zi mõi, sanagõ tõigu, sanguma’õ: Ya’odo Keriso, ba ato lafaelungu. (Yoh. 5, 43. Hal. zin. 5, 36 b. t.). 

6 Ba mirongo dania wanuwõ ba fe’ira’ira ba wanuwõ; mifaigi, bõi tokea ami; lõ’õ sa tola lõ si manõ, ba tenga fa’atua danõ na sa. 

7 Maoso dania zi sambua soi, udu zi sambua; ba si sara õri, udu zi sara; ba sosó lofo mbanua awõ ndruru danõ misa. 

8 Ba bõrõta wa’afõkhõ da’õ fefu. 

9 Ba da’õ dania la’ohe ami ba wamakao ba labunu ami; ba dozi soi dania zi fatiu tõdõ khõmi, bõrõ dõigu andrõ. (F. 10, 17 b. t. Yoh. 16, 2. Fam. 2, 10). 

10 Ba ato dania ba da’õ zi te’ala, ba faoma dania la’ā mbõli nawõra, ba faoma fatiu dõdõra khõ nawõra. 

11 Ba ato zi maoso sama’ele’õ sofaya, ba ato lafaelungu. (Yoh. I. 4, 1). 

12 Ba me monõnõ wa lõ atulõ, ba ato zi taya fa’omasi. (Tim. II. 3, 1 b. t.). 

13 Ba sanau õlõ irugi gamozua, da’õ ni’orifi. (F. 10, 22. Yak. 1, 12). 

14 Ba teturiagõ dania mbanua Lowalangi andrõ, turia somuso dõdõ, ba guli danõ misa, ma’asagõrõ, ba wamaduhu’õ ba niha fefu, ba awena dania fa’atua danõ. (Rom. 10, 18). 

15 Ba na mi’ila dania wa’adudu andrõ, sihokha mbuda, niŵa’õ Daniëli, ba naha ni’amoni’õ — yatumõrõ tõdõnia sombaso da’e — (Dan. 9, 27; 12, 13) 

16 ba ndramoloi zi so ba Yudaia, ndramusaŵa hili. 

17 Bõi yamõi tou zi so ba dete nomonia yaŵa, ba wangai hadia ia ba nomonia, (Luk. 17, 31), 

18 ba bõi yamufuli ia furi si so ba nowi, ba wangai barunia. 

19 Ba alai zanabina ba si so ono ba mbagi zusu, na luo da’õ! (Luk. 23, 29). 

20 Ba mi’angandrõ, fa bõi baŵa deu, ba fa bõi luo sabato, na luo woloimi andrõ. 

21 So sa wamakao sabõlõbõlõ ba da’õ dania, si lõ irai si manõ, i’otarai mbõrõta danõ, irege da’e, ba lõ’õ gõi si manõ dania. (Dan. 12, 1). 

22 Ba na tenga ni’õnaigõ luo da’õ ena’õ, ba samõsa lõ auri niha. Ba bõrõ nitutuyu andrõ, wa te’õnaigõ luo andrõ. 

23 Ba na so ba da’õ zanguma’õ khõmi: Faigi, so ba da’e Keriso, ba ma: ba da’õ so ia, ba bõi mifati. (Luk. 17, 21. 23 b. t.). 

24 Maoso sa dania Keriso faya ba sama’ele’õ sofaya, ba lafazõkhi dandra sebua, awõ gila’ila, ba wamaelungu nitutuyu andrõ, na bõla. (Tes. II. 2, 9). 

25 Hiza, no uhõnagõ uŵa’õ khõmi. 

26 Ba na lamane khõmi: Hiza, ba danõ si mate so ia, ba bõi mi’ae’e; ba ma: Hiza, ba mbate’e, ba bõi mifati. 

27 Hulõ gari mbanua sa si otarai gatumbukha luo, sihaga, irege gaekhula, si manõ dania wa’aso Nono Niha andrõ. (Luk. 17, 24).

28 Ba zi so amatela, ba da’õ owulu moyo. (Yob. 39, 30. Luk. 17, 37). (A. 29—36: Mar. 13, 24—32. Luk. 21, 25—33.)

29 II. Ba aefa si’aikõ wamakao andrõ, na luo da’õ, ba taya haga luo, ba lõ’õ sa’ae humaga mbaŵa, ba atoru ndrõfi moroi ba mbanua si yaŵa, ba humeuheu wangaro mbanua si yaŵa. (Yes. 13, 10. Fam. 6, 12 b. t.). 

30 Ba aefa da’õ, ba oroma dandra Nono Niha andrõ ba mbanua si yaŵa, ba mege’ege fefu soi ba guli danõ, ba la’ila dania Nono Niha, si so moroi si yaŵa, ba dete lawuo ba mbanua, fao wa’abõlõ ba lakhõmi sebua. (F. 25, 31, Dan. 7, 13. Fam. 1, 7. Mar. 14, 62). 

31 Ba ifatenge mala’ikania, telau dorofe sebua li, ba la’owuloi khõnia nitutuyunia andrõ, moroi ba zi fasui, i’otarai wondrege danõ, numalõ ba wondregenia tánõ sa. (F. 13, 41. Tes. I. 4, 16). 

32 Ba ba marafala mitõngõni wamaedo andrõ: Na mo’idanõ ndrahania, na tumbu lehelehe, ba mi’ila, no ahatõ mbaŵa wa’aukhu zino. (Luk. 21, 37). 

33 Si manõ gõi ami, na mi’ila da’õ fefu, ba oroma khõmi, no ahatõ ia. 

34 Si ndruhu niŵa’õgu khõmi, lõ fakhamõ atua niha si sagõtõ andre, ba no alua da’õ fefu. (F. 16, 28). 

35 Atua mbanua ba atua danõ, ba lõ awu’a niŵa’õgu.

36 Ba baŵa andrõ ba inõtõ, ba lõ sangila, he mala’ika ba zorugo, he Ono; ha Ama zangila. (Tes. I. 5, 1 b. t.). (A. 37—41: Luk. 17, 26—36.)

37 Ba hulõ si mane me luo Noakhi, si manõ gõi wa’aso Nono Niha andrõ dania. (Moz. I. 6, 5. 11 b. t.). 

38 Hulõ si mane ya’ira sa, me luo fõna wa’anõnõ danõ andrõ, mangamanga ira ba mamadumadu hadia ia, mangowalu ba mame’e nihalõ, irugi luo mõi baowo Noakhi, 

39 ba lõ aboto ba dõdõra, irege so wa’anõnõ andrõ ba irege ahori ira fefu, si manõ gõi dania wa’aso Nono Niha andrõ. 

40 Darua dania zi so ba nowi; samõsa nihalõ ba si samõsa, ba nirõi.

41 Darua ndra alawe sanutu fakhe ba lõsu; samõsa nihalõ ba si samõsa, ba nirõi.

42 III. Andrõ, bõi mifõrõ, me lõ mi’ila mbaŵa wa’aso Zo’aya ya’ami. (F. 25, 13. Mar. 13, 33). 

43 Ba da’õ mibe’e ba dõdõmi: Na i’ila ena’õ sokhõ omo, ha wa’alaŵa mbongi so zanagõ, ba lõ mõrõ ia ena’õ, ba itimba ena’õ zanagõ, fa lõ mõi yomo khõnia. (Luk. 12, 39 b. t. Fet. II. 3, 10. Fam. 3, 3).

44 Andrõ ya’ami gõi, mihõnagõ mifa’anõ ami, me si lõ midõnadõna dania Nono Niha, na so ia. (A. 45—51: Luk. 12, 42—46.)

45 Ba ha niha zawuyu andrõ, si lõ farõi, satuatua, nibe’e zokhõ ya’ia barõ mbawa si so yomo khõnia, ba wame’e gõra, na inõtõ wemanga? 

46 Ya’ahowu zawuyu andrõ, na i’ila sokhõ ya’ia, na so ia, no i’o’õ da’õ. 

47 Si ndruhu niŵa’õgu khõmi, ibe’e barõ mbawania fefu hadia ia, zi so khõnia. 

48 Ba na iŵa’õ tõdõnia sawuyu si lõ sõkhi: Mogasa wa’aso zokhõ ya’o, 

49 ba na ibõrõtaigõ ibõzibõzi nawõnia sawuyu, ba na mangamanga ia, ba na ibadubadu hadia ia, awõ zi mabumabu andrõ; 

50 ba so dania zokhõ sawuyu andrõ, na luo lõ idõnadõna ba gamaudu wa’alaŵa luo, na iwai lõ ya’ia na; 

51 ba i’õtõ dalu zawuyu andrõ, ba ibe’e gurakhania awõ zamini tõdõ andrõ; ba fege’ege dania ba da’õ ba fatangisa mboha. (F. 22, 13; 25, 30).

 

MATAIO

Faza 25

 

I. Amaedola: Ono alawe si dafulu. II. Amaedola: Ana’a, nibe’e ba zohare. III. Fanguhuku ba gamozua.

 

1 I. Ba da’õ dania fakhilikhili ira mbanua zorugo andrõ nono alawe, dafulu, sangai fandrura, ba we’amõi mamaondragõ sangowalu. (Fam. 19, 7 b. t. Kor. II. 11, 2). 

2 Ba dalima ira zambõ tõdõ, ba dalima zatuatua. 

3 Lahalõ sa wandrura sambõ tõdõ andrõ, ba lõ la’ohe wanikha. 

4 Ba satuatua andrõ, ba la’ohe wanikha ba nahia, fabaya fandrura. 

5 Ba me ara zangowalu, ba manukõu ira fefu ba mõrõ. 

6 Ba me talu mbongi, ba so zi’ao: Hiza zangowalu, mi’ae mifaondragõ ia! 

7 Awena maoso nono alawe andrõ fefu ba lahaogõ wandrura. (Luk. 12, 36). 

8 Ba lamane sambõ tõdõ andrõ ba zatuatua: Mibe’e fanikhama wanikhami ma’ifu, mate sa wandruma andre. 

9 Ba latema lira satuatua, lamane: Ma dania faoma ambõ khõda; sõkhi na mõi ami ba zolafo, ba na mi’õli khõmi. 

10 Ba me no mõi ira mowõli, ba so zangowalu, ba si no mama’anõ, ba mõi yomo, awõnia ba walõŵa, ba lakusi mbawandruhõ. (Luk. 13, 25 b. t.). 

11 Ba aefa da’õ, ba so gõi nono alawe no mege, si tosai, lamane: He Tua! he Tua! bokai khõma! 

12 Ba itema lira, imane: Si ndruhu niŵa’õgu khõmi, lõ u’ila, ha niha ami. (F. 7, 22. 23. Luk. 13, 27).

13 Andrõ bõi mifõrõ, me lõ mi’ila mbaŵa, aŵo ginõtõ. (A. 14—30: Luk. 19. 11—28.)

14 II. Hulõ niha sofanõ: Humede ia ba zawuyunia, ibe’e ba dangara zi so khõnia. 

15 Ibe’e ba zi samõsa, ba lima balaki, ba ba zi samõsa, ba dua balaki, ba ba zi samõsa, ba samba fondruyu, dali wa’abõlõ zamõsana, ba mofanõ ia. 

16 Ba i’anema’õ mõi nibe’e si lima balaki, ilau ba waniaga, ba fabali. 

17 Si manõ gõi nibe’e si dua balaki, fabali ibe’e. 

18 Ba nibe’e si samba fondruyu, ba mõi mogo’oli tanõ, ibini’õ bakha gana’a zokhõ ya’ia. 

19 Ba me no ara, ba so zokhõ sawuyu andrõ, ba mangerai õmõ ia khõra. 

20 Ba i’ondrasi ia nibe’e si lima balaki, i’ohe gõi zi lima balaki harenia, imane: Lima balaki nibe’eu ba dangagu, Tua faigi, lima balaki tõ, nisõndragu, harenia. 

21 Imane khõnia sokhõ ya’ia: Lau, sawuyu si sõkhi, si lõ farõi; lõ si farõi ndra’ugõ ba zi lõ oya’oya, ba ube’e barõ mbawau zoya; tabu ba wa’omuso dõdõ andrõ khõ zokhõ ya’ugõ. (F. 24, 45. 47). 

22 Ba i’ondrasi gõi ia nibe’e si dua balaki, imane: Dua balaki nibe’eu ba dangagu, Tua, faigi dua balaki tõ nisõndragu harenia. 

23 Imane khõnia sokhõ ya’ia: Lau, sawuyu si sõkhi, si lõ farõi; lõ si farõi ndra’ugõ ba zi lõ oya’oya, ba ube’e barõ mbawau zoya; tabu ba wa’omuso dõdõ andrõ khõ zokhõ ya’ugõ. 

24 Ba i’ondrasi ia gõi nibe’e si samba fondruyu andrõ, imane: He Tua, no u’ila ndra’ugõ, wa niha sabe’e huku ndra’ugõ; mamasi ndra’ugõ ba zi lõ nitarumõ ba mangozara’õ ba zi lõ nifazaeweu, 

25 ba no ata’u ndra’o, ba no mõido mubini’õ zi samba fondruyu andrõ khõu barõ danõ; ba ya’ae khõu gana’au. 

26 Ba itema linia sokhõ ya’ia, imane khõnia: He sawuyu si lõ sõkhi, sareu! Na no õ’ila mamasi ndra’o,ba zi lõ nitarugu ba mangozara ndra’o, ba zi lõ nifazaewegu; 

27 ba õbe’e mena’õ nifalali wirõgu andrõ, ba zamalali ana’a, ba na so ndra’o, ba utema ena’õ gana’agu, fabaya hare. 

28 Ba mihalõ khõnia zi samba fondruyu andrõ, ba mibe’e ba zi so si fulu balaki. 

29 Dozi sa, ba zi so ba tebe’e na ba tehõna khõra; ba ba zi lõ õ, ba teheta gõi zi so khõnia. (F. 13, 12).

30 Ba sawuyu andrõ, si lõ guna, ba mitibo’õ baero ba zogõmigõmi. Ba fege’ege dania ba da’õ ba fatangisa mboha. (F. 8, 12).

31 III. Ba na so Nono Niha, na si so lakhõmi ia, na fao khõnia mala’ika andrõ fefu, ba da’õ dania dumadao ia ba dadaoma lakhõminia andrõ. (F. 16, 27. Luk. 21, 27). 

32 Ba te’owuloi dania fõnania fefu soi, ba ifõfõ’õ ira, si mane na ifõfõ’õ ira mbiribiri si alawe mbiribiri si matua kubalo. (Rom. 14, 10. Kor. II. 5, 10). 

33 Ba ifa’aso ba gambõlõnia mbiribiri si alawe, ba ba gaberania mbiribiri si matua. (Hes. 34, 17 b. t.).

34 Ba imane dania razo andrõ ba zi so ba gambõlõnia: Mi aine, ya’ami, nifahowu’õ Namagu, mitema gondrõita andrõ, banua andrõ, ni’asiwai khõmi, i’otarai mbõ õta danõ. 

35 Me olofo ndra’o, ba no mibe’e gõgu; me owõkhi dõdõgu, ba no nifabadugõ khõgu nidanõ; me tome ndra’o, ba no mifa’amõido yomo; (Yes. 58, 7); 

36 me lõ nukhagu, ba no mifonukha ndra’o; me mofõkhõ ndra’o, ba no mõi ami mufaigi ndra’o; ba me sodo ba gurunga, ba no mõi ami khõgu. 

37 Ba latema dania linia satulõ andrõ, lamane: He Tua, ha mega ma’ila solofo ndra’ugõ, ba mabe’e gõu! ba ma sowõkhi tõdõ ndra’ugõ, ba mafabadugõ khõu nidanõ? 

38 Ba ha mega ma’ila, tome ndra’ugõ, ba mafa’amõi’õ yomo? ba ma si lõ nukha ndra’ugõ, ba mafonukha’õ?

39 Ba ha mega ma’ila sotõkhõ ndra’ugõ, ba ma si so ba gurunga, ba mõiga khõu? 

40 Ba itema dania lira razo andrõ, imane khõra: Si ndruhu niŵa’õgu khõmi, ndrege nilaumi ba dalifusõgu andrõ, fondrege zi numana, ha niha ia, ba khõgu no milao da’õ. (F. 10, 40. Amaed. 19, 17. Mar. 3, 35). 

41 Awena dania imane gõi ba zi so ba gabera: Milabu ami, ya’ami, ni’elifi, mi’ae ba galitõ andrõ, si lõ matemate, ni’ebua’õ khõ Gafõkha andrõ ba ba mala’ikania. (F. 7, 23. Yes. 30, 33. Fam. 20, 10. 15; 21. 8). 

42 Olofo ndra’o, ba lõ nibe’emi õgu; owõkhi dõdõgu, ba lõ nifabadugõmi khõgu; (Yak. 4, 17); 

43 tome ndra’o, ba lõ nifa’amõimi yomo ya’o; lõ nukhagu, ba lõ nifonukhami ya’odo; mofõkhõ ndra’o, ba ba gurunga sodo, ba lõ si mõi ami mamaigi ya’o. 

44 Ba latema dania linia, ya’ira gõi, lamane: He Tua, ha mega ma’ila solofo ndra’ugõ, ba ma sowõkhi tõdõ, ba ma tome, ba ma si lõ nukha, ba ma sofõkhõ, ba ma si so ba gurunga ndra’ugõ, si lõ si mõiga ngoningoniu? 

45 Ba itema dania lira, imane: Si ndruhu niŵa’õgu khõmi, ndrege zi lõ nilaumi khõ wondrege zi numana andrõ, ha niha ia, ba khõgu gõi lõ nilaumi da’õ. 

46 Ba mõi da’õ ba wa’afõkhõ si lõ aetu andrõ, ba satulõ andrõ, ba mõi ba wa’auri si lõ aetu. (Dan. 12, 2. Yoh. 5, 29).

 

MATAIO

Faza 26

 

I. Famagõlõ gere, ba wamunu Yesu. II. Tebayoini Yesu, ba Mbetania. III. I’ombakha’õ zi manga mbõlinia. IV. I’oroi’õ wemanga ni’amoni’õ andrõ. V. Mangandrõ Yesu ba kabu Gezemane. VI. Lara’u ia. VII. Te’etu’õ hukunia ba rafe sebua andrõ. VIII. I’osilõ’õgõ Yesu Fetero. (A. 1—5: Mar. 14, 1. 2. Luk. 22, 1. 2.)

 

1 I. Ba me no i’o’ozui Yesu huhuonia andrõ fefu, ba imane khõ ndra nifahaõnia: 

2 Mi’ila, dua wongi tõ wasa, ba tebe’e ba danga niha Nono Niha, ba wamorõfa ya’ia. (Yoh. 13, 1). 

3 Ba falukha ndra ere sebua ba satua mbanua, baolayama gere sebua andrõ, sotõi Kayafa. (Yoh. 11, 47 b. t.). 

4 Ba mamagõlõ ira, ena’õ la’onekhesi wondra’u Yesu, ba wamunu ya’ia. 5 Ba lamane: Bõi ba gowasa, fa lõ aekhu niha. (A. 6—13: Mar. 14, 3—9: Yoh. 12, 1—8.)

6 II. Ba me so ba Mbetania Yesu, ba nomo Zimoni andrõ, sobou auri, ba i’ondrasi ia ira alawe, 

7 so khõnia zamba bulibuli wanikha samohua, sebua bõli, ba ifaduwa ba hõgõ Yesu, me manga ia. 

8 Ba me la’ila da’õ nifahaõ, ba kumõkõkõkõ ira, lamane: Hadia wa la’alimagõsi? 

9 Tola sa la’amawa mena’õ, ebua mbõli, ba labe’e ba zi numana mena’õ. 

10 Ba me i’ila da’õ Yesu, ba imane khõra: Hadia wa mibusi dõdõ ndra alawe andre? si sõkhi sa nilaunia khõgu. 

11 Lõ’õ sa mamalõmalõ khõmi zi numana, ba ya’odo, ba tenga si lõ mamalõmalõ khõmi. 

12 Ba wangehao ya’o, ba wogo’o ya’o, ilau ba nõsigu wanikha andre.

13 Si ndruhu niŵa’õgu khõmi, fefu gofu heza, ba nituriagõ turia somuso dõdõ andrõ, ba guli danõ ma’asagõro, ba da’õ gõi te’ombakha’õ nilau da’e, ba wanõrõ tõdõ ya’ia. (F. 24, 14). (A. 14—16: Mar. 14, 10. 11. Luk. 22, 3—6.)

14 Ba mõi zi samõsa, awõ zi felendrua, si so tõi Yuda, banua Kariota, isaŵa gere sebua, imane: 

15 Ha wa’ebua mibe’e khõgu, ba u’ombakha’õ ia khõmi? Ba latulo khõnia zi tõlu ngafulu rufia. (Sakh. 11, 12. Moz. II. 21, 32. F. 27, 9).

16 Ba i’otarai da’õ, ba i’alui lala, ba wangombakha ya’ia. (Tim. I. 6, 9. 10). (A. 17—20: Mar. 14, 12—16. Luk. 22, 7—18.)

17 III. Ba me baŵa roti si lõ mu’aisõni, si fõfõna, ba mõi khõ Yesu ndra nifahaõ, lamane: Hezo zomasi’õ ma’asiwai khõu, ba wemanga wasa? (Moz. II. 12, 3 b. t.). 

18 Ba imame: Mi’ae miyomo ba mbanua, khõ zane, ba mimane khõnia: Da’õ niŵa’õ zamahaõ khõu: No ahatõ ginõtõ andrõ khõgu; ba khõu u’ā wasa, awõ ndra nifahaõgu. 

19 Ba la’o’õ nifahaõ andrõ niŵa’õ Yesu khõra, ba la’asiwai wasa andrõ.

20 Ba me bongi sa’ae, ba mõi ia manga, awõ zi felendrua andrõ. (A. 21—25: Mar. 14, 18—21. Luk. 22, 21—23.)

21 Ba me manga ira, ba imane: Si ndruhu niŵa’õgu khõmi, fasamõsa ami zi manga mbõligu. (Yoh. 13, 21 b. t.). 

22 Ba abu sibai dõdõra, ba labõrõtaigõ lamane khõnia, dozi ira: Hadia, ya’odo, Tua? 

23 Ba itema lira, imane: Si falulu manga khõgu, da’õ zi manga mbõligu. (Sin. 41, 10. Yoh. 13, 18. 26). 

24 Mõi sa Nono Niha, itõrõ nisura andrõ ba khõnia, ba alai niha andrõ, si manga mbõli Nono Niha: mohare mena’õ niha andrõ, na lõ irai tumbu. (Sin. 22. Yes. 53. Luk. 22, 19. 20).

25 Ba itema linia Yuda andrõ, si manga mbõlinia, imane khõnia: Ma ya’odo, samahaõ? Ba imane khõnia: Ya’ia niŵa’õu. (A. 26—29: Mar. 14, 22—25. Luk. 22, 19. 20. Kor. I. 11, 23 b. t.)

26 IV. Ba me manga ira, ba ihalõ roti Yesu, ifahowu’õ, iboboto ba ibe’e khõ ndra nifahaõ ba imane: Mitema, mi’a, botogu da’e. 

27 Ba ihalõ mako, i’aohasi gõlõ Lowalangi, ibe’e khõra ba imane: 

28 Mibadu, dozi ami, dogu sa da’e, do gamabu’ula li andrõ, saduwa dania saiahi zato, ba wangefa’õ horõ. (Mat. 20, 28. Moz. II. 24, 8. Yer. 31, 31 b. t.).

29 Ba uŵa’õ khõmi, lõ’õ sa’ae ubadu nõsi mbua nagu andrõ, i’otarai da’e, irugi luo wamadugu si bohounia, ba mbanua Namagu andrõ, aŵomi. (Luk. 22, 18. 29. 30). (A. 30—35: Mar. 14. 26—31.)

30 V. Ba me no aefa manunõ ira, ba mõi ira baero ba gahe hili wanikha andrõ. (Luk. 21, 37; 22, 39). 

31 Ba imane khõra Yesu: Dozi te’ala ami ba khõgu bongi andre. Noa sa so ba zura: ”Ubago dania gubalo andrõ, ba muzaewe mbiribiri andrõ, nikubaloi.” (Sakh. 13, 7. Yoh. 16, 32). 

32 Ba na aefa maoso ndra’o, ba mowaõwaõdo ba Galilaia, fõnami. (F. 28, 7. 16). 

33 Ba itema linia Fetero, imane khõnia: Ba he dozi te’ala ira ba khõu, ba ya’o, ba tebai te’ala. (Luk. 22, 33 b. t.). 

34 Imane khõnia Yesu: Si ndruhu niŵa’õgu khõu, bongi andre, lõ fakhamõ miŵo zilatao, ba no medõlu õ’osilõ’õgõ ndra’o. (Yoh. 13, 38).

35 Imane khõnia Fetero: Ba he mate ena’õ ndra’o, awõu, ba lõ u’osilõ’õgõ ndra’ugõ. Ba si manõ wanguma’õ ndra nifahaõ fefu. (A. 36—46: Mar. 14, 32—42. Luk. 22, 40—46.)

36 Ba irugi Yesu halama, Gezemane dõinia, fao ira khõnia. Ba imane khõ ndra nifahaõ: Midadao ba da’e, fatua mõido ba da’õ, ba wangandrõ. 

37 Ba i’ohe awõnia Wetero, ba ono Zebedaio andrõ, si darua, ba ibõrõtaigõ abu dõdõ ba alangu dõdõ. (F. 17, 1. Yes. 53, 7). 

38 Ba imane khõra: Abu sibai dõdõgu, irugi wa’amate; mi’iagõ da’e, bõi mifõrõ, awõgu. 

39 Ba mõi ia, lõ arõu, ifalõgu ia tou, mangandrõ ia, imane: He Ama, na so lala, ba yamutalu’i ndra’o mako andrõ. Ba bõi somasi ndra’o, ha somasi ndra’ugõ. (F. 20, 22. Yoh. 5, 7. 8). 

40 Ba mõi ia khõ ndra nifahaõ andrõ, ba no mõrõ ira, me irugi, ba imane khõ Wetero: Ba tebai si lõ mõrõ ami mato saza, awõgu? 

41 Bõi mifõrõ, ba miangandrõ, fa lõ itõrõ ami fanandraigõ. Aoha sa gõlõ dõdõ, ba no sambõ fa’abõlõ nõsi. (Fet. I. 5, 8. Gal. 5, 17). 

42 Ba ifuli mõi, zamuza tõ, mangandrõ ia, imane: He Amagu! na te’ai italu’i ndra’o, fa lõ ubadu ia, ba ya’itõrõ zomasi ndra’ugõ. 

43 Ba me ifuli ia ba noa zui mõrõ ira, me irugi, noa sa abua guli hõrõra. 

44 Ba irõi ira, ifuli mõi mangandrõ, no medõlu, si manõmanõ linia. 

45 Aefa da’õ, ba mõi ia khõ ndra nifahaõ andrõ, ba imane khõra: Ba mifõrõ sa’ae, ba mi’olombase! — Hiza, no fadege, fa tebe’e ba danga niha si so horõ Nono Niha.

46 Mifaoso, talabu, hiza no ahatõ zi manga mbõligu andrõ. (A. 47—57: Mar. 14, 43—50. Luk. 22, 47—53. Yoh. 18, 3—12.)

47 VI. Ba me humede ia na, ba hiza Yuda andrõ, awõ zi felendrua, ba ato zi fao khõnia; so wõda ba bago gama, la’otarai gere sebua ba satua mbanua andrõ. 

48 Ba no iŵa’õ khõra dandra si manga mbõlinia andrõ, no imane: Si fa’ago bawa ndra’o, da’õ ia, da’õ mira’u. 

49 Ba i’anema’õ i’ondrasi Yesu, imane: He samahaõ? ba fa’ago bawa ia khõnia. 

50 Ba imane khõnia Yesu: He le, hadia, wa so ndra’ugõ? Awena la’ondrasi, lababaya Yesu, lara’u. 

51 Ba hiza, ituyu wõdania si samõsa, awõ Yesu, isõbi, ihare’õ khõ zawuyu gere sebua, i’eŵa dalingania, si sambua. 

52 Ba imane khõnia Yesu: Saembugõ wõdamõ! Dozi sa sangai fõda, ba fõda wamunura. (Moz. I. 9, 6. Rom. 13, 4). 

53 Ma owai tebai mangandrõ ndra’o khõ Namagu, ena’õ ifatenge awõgu iada’e mala’ika, tõra felendrua legio? 

54 Ba he wisa itõrõ ba da’õ niŵa’õ ba zura? Lõ tola lõ’õ, si manõ lala. (Luk. 24, 44).

55 Ba da’õ iŵa’õ Yesu ba zato andrõ: Hulõ ba zamara’u mõi ami, no mofõda ami ba mobago gama, ba wondra’u ya’o. Ba no ero ma’õkhõ mudadao ndra’o ba gosali, mamahaõ, ba lõ nira’umi ya’o. (Yoh. 18, 20).

56 Ba andrõ si manõ da’õ fefu, ena’õ itõrõ zi so ba zura zama’ele’õ andrõ. Ba larõi ia nifahaõ fefu, moloi. (Sin. 88, 9). (A. 67—68: Mar. 14, 53—65. Luk. 22, 54. 63—71. Yoh. 18, 12—14. 24.)

57 VII. Ba la’ohe Yesu sondra’u ya’ia andrõ, la’ohe khõ gere sebua andrõ, Kayafa, ba zi falukha zangila amakhoita ba satua mbanua andrõ. 

58 Ba i’o’õ Fetero, arõu moroi furi, irugi golayama gere sebua andrõ, ba mõi ia bakha, dumadao ia ba ngai genoni, ba wamaigi lualua. 

59 Ba la’alui ere sebua ba salaŵa rafe sebua andrõ fefu, he lawisa wamõbõgõ horõ khõ Yesu, ba wamunu ya’ia, (Hal. zin. 6, 13), 

60 ba lõ lasõndra, he ŵa’ae ato zi so samõbõgõ, sofaya. Ba ba gafuriata, ba darua zi so, (Sin. 35, 11; 100, 2. Moz. V. 19. 15), 

61 lamane: No iŵa’õ da’õ: U’ila ududugõ gosali Lowalangi andrõ, ba ha tõlu ngaluo u’angotomosi’õ. (F. 27, 40. Yoh. 2, 10). 

62 Ba maoso gere sebua, imane khõnia: Hadia, lõ õtema li ba nibõbõgõ da’e khõu? 

63 Ba lõ hedehede Yesu. Ba humede gere sebua, imane khõnia: Ube’e ba hõlu ndra’ugõ, khõ Lowalangi sauri andrõ, ena’õ õŵa’õ khõma, na Keriso andrõ ndra’ugõ, Ono Lowalangi. 

64 Imane khõnia Yesu: Ya’ia niŵa õu. Ono Lowalangi ndra’odo. Ba uŵa’õ khõmi, i’otarai da’e, ba mi’ila, dumadao Nono Niha ba gambõlõ wa’abõlo andrõ, ba mi’ila so ia moroi sa, ba dete lawuo, ba mbanua si yaŵa. (Dan. 7, 13. Hal. zin. 7, 55). 

65 Awena isika nukhania ere sebua, imane: No mangaohangaoha ia! Hadia guna zi so ba mbõrõ sa’ae khõda? hiza, faefá mirongo wangaohangaoha andrõ. (Yoh. 10, 33 b. t.). 

66 He wisa ba dõdõmi? Ba latema linia, lamane: Huku tamunu hukunia. (Moz. III. 24, 16. Yoh. 19, 7). 

67 Ba ladidiloi mbawania, lagukhui ia, ba so gõi zamalisi bawania (Yes. 50, 6), 68 lamane: Fa’ele’õ khõma, Keriso, ha niha zamõsi ya’ugõ? (A. 69—75: Mar. 14, 66—72. Luk. 22, 55—62. Yoh. 18, 16—18. 25—27.)

69 VIII. Ba no dumadao Wetero baero ba golayama. Ba mõi khõnia zawuyu, ono alawe, imane: Ya’ugõ gõi nawõ Yesu andrõ, banua Galilaia. 

70 Ba i’osilõ’õgõ fõnara fefu, imane: Lõ u’ila hadia niŵa’õu. 

71 Ba me itõrõ mbawa gõli, we’amõi baero, ba i’ila ia tánõ bõ’õ, ba imane ba zi so ba da’õ: Awõ Yesu, banua Nazareta, da’õ. 

72 Ba ifuli i’osilõ’õgõ, fahõlu ia, imane: Lõ u’ila, ha niha da’õ. (F. 16, 16). 

73 Ba lõ ara gotalua, ba mõi khõ Wetero zi so ba da’õ, lamane khõnia: Duhu, samõsa gõi ndra’ugõ khõra, ifa’ele’õ sa gõi ndra’ugõ liu. 

74 Ba ibõrõgõ i’elifi ia ba fahõlu, imane: Lõ u’ila, ha niha da’õ. Ba i’anema’õ miwo zilatao. 

75 Ba itõrõ tõdõ Wetero niŵa’õ Yesu, me imane: Lõ fakhamõ miwo zilatao, ba no medõlu õ’osilõ’õgõ ndra’o. Ba mõi ia baero, mege’ege sibai. (A. 34).

 

MATAIO

Faza 27

 

I. La’ohe khõ Wilato Yesu. II. Fa’amate Yuda. III. La’etu’õ huku Yesu. IV. La’o’aya. V. Laforõfa. VI. Mate ia. VII. Lako’o. VIII. Latarogõ lewatõ.

 

1 I. Ba me no moluo, ba mamagõlõ ndra ere sebua fefu, awõ zatua mbanua andrõ, ba khõ Yesu, ba wamunu ya’ia. (Mar. 15, 1. Luk. 22, 66—71).

2 Ba labõbõ ia, la’ohe, labe’e ba danga gumandru, Filato. (F. 20. 19. Luk. 23. Yoh. 18, 28).

3 II. Ba me i’ila Yuda andrõ, si no manga mbõlinia, la’etu’õ huku, ba mangesa dõdõnia; ba ifuli zi tõlu ngafulu rufia, ba gere sebua ba ba zatua mbanua andrõ, 

4 imane: Horõgu, me no u’ā mbõli ndro zi lõ horõ. Ba lamane: Hana wa õfuli, khõma? Faigi, he õwisa. 

5 Ba itibo’õ ba gosali rufia andrõ ilau mofanõ, mõi ia muhie mbaginia. (Hal. zin. 1, 18). 

6 Ba lahalõ rufia andrõ ira ere sebua, lamane: Lõ tola tabe’e ba naha game’ela, me bõli ndro. 

7 Ba mamagõ õ ira, ba labe’e bõli mbenua zamõzi bowoa andrõ, nibe’e lewatõ zikoli. 

8 Andrõ labe’e tõi mbenua andrõ mbenua ndro, irugi ma’õkhõ andre. (Hal. zin. 1, 19). 

9 Ba da’õ itṍrõ niŵa’õ Yeremia andrõ, sama’ele’õ, me imane: ”Ba lahalõ zi tõlu ngafulu rufia andrõ, bõli nifatõ bõli andrõ, nifatõ Ndraono Gizeraëli bõli, (Sakh. 11, 13)

10 ba labe’e bõli mbenua zamõzi bowoa andrõ; u’o’õ niŵa’õ Zo’aya khõgu.” (A. 11—26: Mar. 15, 2—15. Luk. 23, 2—4. 17—25. Yoh. 18, 33—40.)

11 III. Ba fõna gumandru so Yesu. Ba isofu khõnia kumandru, imane: Hadia, razo niha Yehuda ndra’ugõ? Ba imane Yesu: Ya’ia niŵa’õu. 

12 Ba me la’adugõ ia ere sebua ba satua mbanua andrõ, ba lõ’õ manõ itema li. (F. 26, 63). 

13 Ba imane khõnia Filato: Hadia, lõ õrongo, hadia ia fefu, wangadugõra ya’ugõ? 

14 Ba lõ itema linia, sambua li lõ’õ, tõbali ahõlihõli sibai dõdõ gumandru. 

15 Ba no mubõwõgõ, ero na owasa ibe’e aefa kumandru ba zato zamõsa nikuru, ha niha zomasi ira. 

16 Ba so khõra nikuru, safaito, me luo da’õ, Baraba dõinia. 

17 Ba me owulo ira, ba imane khõra Filato: Ha niha zomasi ami, u’efa’õ khõmi, Baraba andrõ, ba ma Yesu andrõ, nifotõi Keriso? 

18 Noa sa i’ila, bõrõ wa’afõkhõ dõdõ, wa labe’e ia ba dangania. 

19 Ba me dumadao ia ba dadaoma zanguhuku, ba ifatenge khõnia fo’omonia, imane: Bõi babaya niha satulõ andrõ, noa sa tefakao sibai ndra’o, ba khõnia andrõ, ba wangifi me owi. 

20 Ba lafawe’e zato ira, ere sebua ba satua mbanua andrõ, ena’õ la’andrõ Mbaraba andrõ, ba ena’õ lafakiko Yesu. (Hal. zin. 3, 13. 14). 

21 Ba humede kumandru, imane khõra: Ha niha zomasi ami u’efa’õ khõmi, ba zi darua andrõ? Ba lamane: Baraba andrõ. 

22 Imane khõra Filato: Ba he uwisa khõ Yesu andrõ, nifotõi Keriso? 

23 Lamane fefu: Niforõfa! Ba imane: Ba hadia horõnia? Ba monõnõ we’aora, lamane: Niforõfa! 

24 Ba me i’ila Filato, lõ’õ manõ mana ndrõsa, ba tedou manõ waguaguasa, ba ihalõ nidanõ, isasai dangania, fõna zato, imane: Lõ horõgu ba ndro da’e; mifaigi he miwisa. (Moz. V. 21, 6 b. t. Sin. 26, 6). 

25 Ba latema linia niha sato fefu, lamane: Yamõi ba huluma ndronia ba ba hulu ndraonoma. (F. 23, 35. Hal. zin. 5, 28).

26 Ba aefa da’õ, ba i’efa’õ khõra Mbaraba andrõ, ba Yesu, ba ifabõzi’õ ba ibe’e niforõfa. (A. 27—30: Mar. 15, 16—19. Yoh. 19, 1—3.)

27 IV. Ba la’ohe ba gõdo Yesu saradadu gumandru andrõ, ba la’owuloi khõnia zi sabari andrõ fefu. 

28 Ba laheta khõnia nukhania, ba lafobaru ia baru luo soyo. 

29 Ba lalalau dakula doi ba lafotakula ia ba sara zukhu labe’e ba dangania kambõlõ, ba latuhi danõ fõnania, la’o’aya ia, lamane: Ya’ugõ, razo niha Yehuda?

30 Ba ladidiloi ia, lahalõ zukhu no mege, ba lahare’õ ba hõgõnia. (A. 31—44: Mar. 15, 20—32. Luk. 23, 26; 33—39. Yoh. 19, 16—24.)

31 V. Ba me no aefa la’o’aya ia, ba laheta khõnia mbaru luo andrõ, ba lafonukha ia nukhania, ba la’ohe ia misa, ba wamorõfa ya’ia. 

32 Ba me mõi ira baero, ba falukha ira niha, banua Girene, Simoni dõinia, ba lara’u da’õ, ba wolohe rõfania. (Heb. 13, 12. 13). 

33 Ba me larugi naha andrõ, sotõi Gologota — 

34 sokamu’u geluaha — ba lafabadugõ khõnia nagu nifaruka awõkhu, ba me no itandra, ba lõ edõna ibadu. (Sin. 69, 22. Amaed. 31, 6). 

35 Ba me no laforõta ia, ba lafosasi nukhania, fadahõdahõ ira. (Sin. 22, 19). 

36 Ba dumadao ira, manaro ya’ia ba da’õ. 

37 Ba labe’e yaŵa hõgõnia mbõrõ wa’amatenia, sura: ”Yesu da’e, razo niha Yehuda.” 

38 Ba laforõfa awõnia zamara’u, darua, samõsa ba gambõlõ ba samõsa ba gabera. (Luk. 23, 32. Yes. 53, 12). 

39 Ba latandrawaisi ia sanõrõ, lafalikhõ ira, (Sin. 22, 8), 

40 ba lamane: He sanudugõ osali andrõ, ba sangotomosi ya’ia, si ha tõlu ngaluo, orifi ndra’ugõ, na Ono Lowalangi ndra’ugõ; ba ae tou moroi ba rõfa andrõ! (F. 26, 61; 4, 3. 6). 

41 Si manõ gõi ndra ere sebua, la’o’aya ia, awõ zangila amakhoita awõ zatua mbanua andrõ, lamane: 

42 Niha bõ’õ, ba no i’orifi, ba tebai i’orifi ia. Razo Ndraono Gizeraëli ia, yamõi tou iada’e moroi ba rõfa, ba mamati sa’ae ita khõuia. 

43 No faduhu dõdõnia khõ Lowalangi, ba yamu’efa’õ ia da’õ iada’e, na i’omasi’õ ia: noa sa iŵa’õ: Ono Lowalangi ndra’o. (Sin. 22, 9).

44 Ba si manõ gõi zamara’u andrõ, niforõfa awõnia, wanandraŵaisi ya’ia. (A. 45—56: Mar. 15, 33—41. Luk. 23, 44—49. Yoh. 19, 28—30.)

45 VI. Ba i’otarai laluo, ba tobali ogõmigõmi ba danõ ma’asagõrõ, irugi labõzi tõlu. 

46 Ba so labõzi tõlu, ba mu’ao Yesu, ebua li, imane: Eli! Eli! lema sabakhtani? He Lowalangigu! He Lowalangigu! hana wa no õ’erogõ ndra’o? geluahania. (Sin. 22, 2). 

47 Ba lamane õsa, si so ba da’õ, me larongo da’õ: Mogaoni Eliya da’õ. (F. 17, 10). 

48 Ba i’anema’õ fagohi zamõsa khõra, ihalõ rabo, ifo’õsi niro aisõ, ibe’e ba mbalõ zukhu ba ifabadugõ khõnia. 

49 Ba lamane tánõ bõ’õ: Bõi ua! datafaigi, na mõi Geliya, ba wangorifi ya’ia. 

50 Ba ifuli mu’ao Yesu, ebua li, ba aetu noso. 

51 Ba hiza, asika mba’aba’a andrõ ba gosali, fabali, i’otarai si yaŵa, numalõ mitou, ba moduru danõ, fabali gara, (Moz. II. 26, 31. Heb. 10, 19. 20) 

52 ba teboka lewatõ ba oya zi maoso boto niha ni’amoni’õ, si no mate, larõi lewatõ, 

53 me no aefa maoso Yesu, mõi ira ba mba nua ni’amoni’õ andrõ, ato zangila ya’ira. 

54 Ba me la’ila ira kumandra andrõ ba awõnia sanaro Yesu, ndruru danõ andrõ ba hadia ia fefu, ba ata’u sibai ira, lamane: Duhu, Ono Lowalangi da’õ. 

55 Ba ato zi so ba da’õ ira alawe, samaigimaigi, moroi ba zarõu, si no molo’õ Yesu, moroi ba Galilaia, si no mõi ngoningoninia;

56 ira Maria, banua Magadala, ba Maria ina ndra Yakobo Yosefo, ba ina nono Zebedaio andrõ. (A. 57—61: Mar. 15, 42—47. Luk. 23, 50—55. Yoh. 19, 38—42.)

57 VII. Ba mafi owi, ba so niha so’ana’a banua Garimatia, Yosefo dõinia, si no mõi nifahaõ Yesu gõi. 

58 Da’õ zi mõi khõ Wilato, mangandrõ boto Yesu andrõ. Ba i’oroi’õ Filato labe’e (Moz. V. 21. 23).

59 Ba ihalõ mboto Yosefo, i’olohuni muko si sõkhi, 

60 ba ibe’e ba lewatõ si bohou khõnia, nifakharu’õnia ba gara, ba ifagaõlõ gowe sebua ba mbawa lewatõ andrõ, ba mofanõ ia. (Yes. 53, 9).

61 Ba so ba da’õ Maria andrõ, banua Magadala ba Maria si sambua andrõ, dumadao ira ba gamaudu lewatõ.

62 VIII. Ba sara wongi aefa da’õ, me no aefa luo wangehao andrõ, ba falukha ndra ere sebua ba farizaio, khõ Wilato, (Yoh. 19, 14), 

63 lamane: He Tua, no itõrõ tõdõma, wa no iŵa’õ samaelungu andrõ, me lõ si mate ia na: Na aefa tõlu ngaluo, ba maoso ndra’o; (F. 16, 21; 17, 23) 

64 andrõ oroi’õ, ena’õ latarogõ lewatõ, irege tõlu ngaluo, fa bõi mõi nifahaõnia andrõ managõ ya’ia, ba ma lamane dania ba niha: No maoso ia moroi ba ngai zi mate, ba tobali abõlõbõlõ wamaelungu safuria andrõ, moroi ba zi fõfõna. 

65 Imane khõra Filato: Labe’e khõmi zanaro; mi’ae’e, mihaogõ wanaro. 

66 Ba mõi ira, lafotandro gowe ba lafatarogõ’õ lewatõ ba zanaro no mege.

 

MATAIO

Faza 28

 

I. Femaoso Yesu. II. La’a gana’a sanaro andrõ. III. I’angonasi nifahaõnia Yesu. (A. 1—8: Mar. 16, 1. 2. 5—8. Luk. 24, 5—9.)

 

1 I. Ba ba zi bongi, me no aefa luo sabato, me arakha moluo luo migu, ba mõi Maria andrõ, banua Magadala, awõ Maria si sambua andrõ, mamaigi lewatõ. (Yoh. 20, 1). 

2 Ba hiza ziheu sabõlõbõlõ. No mõi tou mala’ika Zo’aya, moroi ba zorugo, mõi ia mameta gowe andrõ, ba idadaoni. 

3 Ba hulõ gari mbanua wamaigira ya’ia, ba barunia, ba no afusi, hulõ mbetua. (Hal. zin. 1, 10). 

4 Ba manizinizi zanaro andrõ, fa’ata’ura ia bo tobali hulõ zi mate ira. 

5 Ba humede mala’ika andrõ, imane ba ndra alawe andrõ: Bõi mi’ata’ufi! u’ila sa, mi’alui Yesu andrõ, niforõfa. 

6 Lõ ya’ia ba da’e; noa sa maoso ia, itõrõ niŵa’õnia; mi’ae mifaigi naha andrõ, ba zi so ia mege. (F. 12, 40; 16, 21). 

7 Ba mita’ita’i, mi’ae miŵa’õ khõ ndra nifahaõnia, wa no maoso ia moria ba ngai zi mate, ba hiza, mowaõwaõ ia ba Galilaia, ba da’õ mi’ila ia dania. 

8 Hiza, no uŵa’õ khõmi. Ba la’aiio’õ ira, larõi lewatõ, ata’u ira, ba omuso sibai dõdõra, fagohi ira, ba wangombakha ba nifahaõnia. 

9 Ba hiza, falukha ira Yesu, ba imane khõra: Ya’ami! Ba la’ondrasi ia, lara’u gahenia, latuhi danõ fõnania. (Sal. II. 4, 27).

10 Ba imane khõra Yesu: Bõi mi’ata’ufi, mi’ae miŵa’õ ba dalifusõgu, ena’õ mõi ira ba Galilaia, ba ba da’õ la’ilado dania. (Yoh. 20, 17).

11 II. Ba me mõi ira, ba hiza zanaro õsa, mõi ira miyomo ba mbanua, ba la’ombakha’õ da’õ no mege fefu khõ ndra ere sebua. 

12 Ba falukha ira, awõ zatua mbanua andrõ, mamagõlõ ira, ba labe’e gana’a sabõnõ ba zaradadu andrõ, lamane: 

13 Mimane: No mõi ndra nifahaõni andrõ, ba zi bongi, no latagõ ia, me no alau hõrõma. (F. 27, 64). 

14 Ba na terongo khõ gumandru, ba ya’aga zi honogõ ya’ia, ba lõ mabe’e abu dõdõmi.

15 Ba lahalõ gana’a andrõ, la’o’õ niŵa’õ khõra. Ba si manõ duria andrõ, ba Niha Yehuda, irugi ma’õkhõ andre.

16 III. Ba mõi ba Galilaia nifahaõ andrõ, si felezara, ba hili andrõ, niŵa’õ Yesu khõra. (F. 26, 32; 28, 7). 

17 Ba me la’ila ia, ba latuhi danõ; ba so zanufa tõdõ õsa. (Luk. 24, 11). 

18 Ba i’ondrasi ira Yesu, humede ia khõra, imane: Fefu wa’abõlõ andrõ ba zorugo ba ba guli danõ, ba no mube’e khõgu. (F. 11, 27. Luk. 10, 22. Yoh. 13, 3. Fil. 2, 9 b. t.). 

19 Mi’ae’e, mibali’õ nifahaõ fefu soi, wamayagõ idanõ ya’ira ba dõi Nama ba ba dõi Nono ba ba dõi Geheha ni’amoni’õ; (Mar. 16, 15. 16; 16. Hal. zin. 1, 8) 

20 mifahaõ ira ba wolo’õ fefu hadia ia niŵa’õgu khõmi. Ba hiza, fao khõmi ndra’o, ero ma’õkhõ, irugi gamozua gõtõ danõ andrõ. (F. 18, 20. Yoh. 14, 18).