SURA KORINDRO II

Table of Contents

 

SURA KORINDRO II

 

KORINDRO II.

FAZA 1

 

I.                  Fangowai Waulo. II. Isuno Lowalangi, me no irara dõdõnia ba me no i’orifi ia, me gõna ia famakao. III. Itunõ khõra, wa mõi ia khõra mena õ.

 

1 I. Faulo zanura da’e, sinenge Keriso Yesu andrõ, moroi ba wa’omasi Lowalangi, ba Timoteo, talifusõ andrõ, ba mbanua Lowalangi andrõ, si so ba Gorindro, awõ ni’amoni’õ andrõ fefu, si so ba danõ Nakhaya ma’asagõrõ. (Kor. I. 1, 1; 16, 10. 11. Fil. 1, 1).

2 Yafalukha ami wa’ebua dõdõ ba fa’ohahau dõdõ, khõ Namada, Lowalangi ba khõ Zo’aya ya’ita, Yesu Keriso! (Gal. 1, 3).

3 II. Nisuno Lowalangi Zo’aya ya’ita, Yesu Keriso, Amania, Ama wa’ahakhõ dõdõ andrõ, Lowalangi wondrara dõdõ, fefu, (Fet. I. 1, 3),

4 sondrara tõdõma, ba wa’afõkhõ andrõ fefu, khõma, ena’õ ma’ila marara dõdõ zi gõna fa’afõkhõ hadia ia ngawalõ, moroi ba wondrara dõdõ andrõ, si falukha ndra’aga khõ Lowalangi. (F. 7, 6. Sin. 94, 19).

5 Hulõ si mane famakao andrõ khõ Keriso, si no fahõna khõma, si manõ gõi wondrara dõdõ andrõ, fahõna zi falukha ndra’aga khõ Keriso. (Kol. 1, 24). 

6 Ba he si gõna fa’afõkhõ ndra’aga, ba ba wondrara tõdõmi ba ba wangorifi ya’ami, ba he nirara tõdõ ndra’aga, ba ba wondrara tõdõmi, si mõi fangabõlõ ba wanaha tõdõ, na gõna ami famakao andrõ, si gõna ndra’aga gõi. Ba no abe’e dõdõma, wanõtõna, ba khõmi andrõ, 

7 me no ma’ila, faoma mo’urakha ami, hulõ si mane ba wamakao andrõ, si manõ gõi ba wondrara dõdõ andrõ. 

8 Ba lõ edõna mabini’õ khõmi, ya’ami ira talifusõ, ba wa’afõkhõ andrõ khõma, si no gõna ndra’aga ba Azia, irege no abõlõbõlõ sibai, irege tebai mataha sa’ae, tobali lõ’õ sa’ae madõnadõna auriga. (Kor. I. 15, 32. Hal. zin. 19, 23 b. t.). 

9 Na ba dõdõma sa, ba no maŵa’õ si mate ndra’aga, ena’õ lõ madõnadõna ba khõma, ena’õ ha ba Lowalangi andrõ, sanusugi si mate, madõnadõna. 

10 No i’efa’õ ndra’aga ba wa’amate si manõ, ba i’efa’õ na dania; ba khõnia madõnadõna, wa itohugõ na wangefa’õ ya’aga. (Tim. II. 3, 11; 4, 18). 

11 Me no sanolo ya’aga gõi ami, fangandrõ, ena’õ ato gõi zangandrõ saoha gõlõ ba wa’ebua dõdõ andrõ, ni’andrõ zato khõma, bõrõ ndra’aga. (F. 4, 15. Rom. 15, 30). 

12 Da’õ sa khõma, na masuno ndra’aga, wa ifaduhu’õ khõma tõdõma, no ohauhau ndra’aga, wanõrõ lalama ba guli danõ andre, ba mendrua manõ ba khõmi andrõ, lõ si fabaya hadia ia, ibe’e Lowalangi, tenga dali wa’atuatua nõsi niha, dali wa’ebua dõdõ Lowalangi. (Heb. 13, 18. Kor. I. 2, 4. 13. Tes. I. 2, 10). 

13 Lõ’õ sa masura khõmi mbõ’õnia, ha nibasomi andrõ ba si no aboto ba dõdõmi; ba udõnadõna aboto ba dõdõmi irugi gamozua;

14 si mane fa’aboto ba dõdõmi õsa ndra’aga, wa no bõrõ wanunomi ya’ami ndra’aga, si mane ya’ami khõma, na baŵa Zo’aya ya’ita, Yesu. (F. 3, 2 b. t. Fil. 2, 16; 4, 1).

15 III. Ba me no so khõgu wanõtõna da’õ, ba mõido mena’õ khõmi fõna, ena’õ samuza tõ falukha ami wa’ebua dõdõ. (Kor. I. 16, 5 b. t.).

16 Ba utõrõ ena’õ ami, we’amõi ba Makedonia, ba na u’otarai Makedonia, ba mõido zui khõmi, ba ena’õ mifasao ndra’odo ba Yudaia. 

17 Ba hadia, me edõnado da’õ hadia, no nifolau zambõ era’era nilaugu? Ma na uhonogõi hadia ia, hadia tõdõ niha dali wangohonogõigu ya’ia, ena’õ itaria ”ya’ia” ba itaria ”tenga”, ba khõgu. (Yak. 5, 12). 

18 Ba lõ farõi Lowalangi, fa bõi faoma lima khõmi, he si no ”ya’ia” ba he si ”tenga”. (Kor. I. 1, 9). 

19 Ono Lowalangi andrõ sa, Yesu Keriso, ni’ombakha’õma ba khõmi, ya’odo ba Siliwano ba Timoteo, ba no tenga faoma, he si no ”ya’ia” ba he si ”tenga”, no ba khõnia so wa ”ya’ia”. (Tes. I. 1, 1. Fam. 3, 14). 

20 Ha wa’oya sa gamabu’ula li Lowalangi, ba no ba khõnia so wa ”ya’ia”, andrõ wa moroi ba khõnia gõi wamaduhu’õ andrõ, sumange Lowalangi khõma. 

21 Ba sangabe’e ya’aga ba ya’ami, ba khõ Keriso, ba ya’ia Lowalangi, si no mamayoini ya’ita gõi; (Yoh. I. 2, 27); 22 si no manga’aro’õ gõi ya’ita, si no mame’e we’ewe’e dõdõ andrõ, Eheha andrõ, ba dõdõda. (F. 5, 5. Efes. 1, 13. 14). 

23 Ba u’angarõfi Lowalangi, ba nosogu andre, wa no bõrõ wa alimagõ ami khõgu, wa lõ si mõido sa’ae khõmi ba Gorindro. (F. 12, 20. 21). 

24 Tenga sa laŵa’õ amatõrõŵama wamatimi andrõ, ba no sanolo ndra’aga ena’õ falukha ami wa’omuso dõdõ; noa sa abe’e ami wamati. (F. 4, 5. Fet. I. 5, 3. Fil. 1, 25).

 

KORINDRO II.

FAZA 2

I.                  Ifarou ira Faulo, ena’õ lafuli lahalõ awõra zohorõ andrõ. II. I’andrõ saoha gõlõ khõ Lowalangi, me no arõu misa terongo duria somuso dõdõ andrõ ibe’e.

 

1 I. Ba no uhonogõi tõdõgu da’õ, bõi ifuli abu dõdõgu, na mõido khõmi. (F. 12, 21). 

2 Na ubusi dõdõmi, ba ha niha zangomosoi’õ tõdõgu, na tenga nibusigu tõdõ andrõ? 

3 Ba no usura da’õ khõmi, fa lõ abu dõdõgu, na mõido, labe’e somuso dõdõgu ena’õ; me no udõnadõna ba khõmi fefu, wa fa’omuso dõdõmi fefu wa’omuso dõdõgu andrõ. (Kor. I. 5). 

4 Noa sa a’oi so wa’afõkhõ khõgu, awõ wa’atosasa dõdõgu, me ufa’ohe’õ zura andrõ khõmi, tenga ha ma’ifu mowõi dawa hõrõgu; tenga sa ena’õ abu dõdõmi, ena’õ aboto ba dõdõmi wa’omasi andrõ, si so khõgu; wa no abõlõ omasido ami, moroi ba niha bõ’õ. (F. 7, 8 b. t.). 

5 Ba na so zi no mamusi tõdõ naŵonia, ba tenga ya’õ nibusinia tõdõ, ya’ami fefu — fa bõi abõlõbõlõ wanguma’õgu — ba ya’ami õsa. (Kor. I. 5, 1. 2). 

6 Ba no abõnõ ba zi manõ wotu andrõ, me no ato zangotu’õ ya’ia. (F. 7, 11. Kor. I. 5, 5). 

7 Tola mibalia’õ sa’ae, mibe’e aefa khõnia ba mirara dõdõnia, fa bõi tehawu zi manõ fa’abu dõdõ, na no abõlõbõlõ sibai. 

8 Andrõ u’andrõ khõmi, mifatõrõ khõnia wa’omasi. 

9 Andrõ sa gõi ufa’ohe’õ zura khõmi, ena’õ u’ila, na tola ami, na mi’o’õ fefu hadia ia. 

10 Ba na so niha ni’efa’õmi hadia ia, ba ya’odo gõi, u’efa’õ gõi. Ya’o sa gõi, hadia ni’efa’õgu, na so ni’efa’õgu, ba bõrõ ami, ba zanehe Keriso, (Yoh. 20, 23),

11 ena’õ lõ i’alani ita Satana; tenga sa fa lõ aboto ba dõdõda gera’erania.

12 II. Ba me no urugi Deroa, ba wangombakha turia somuso dõdõ andrõ khõ Keriso, ba me no teboka khõgu mbawandruhõ ba khõ Zo’aya, (Hal. zin. 20, 6. Kor. I. 16, 9), 

13 ba lõ’õ sa ahono bakha dõdõgu, me lõ usõndra Dito andrõ, talifusõgu; ba u’angonasi ira ba usaŵa Makedonia. (F. 7, 5. 6). 

14 Ba u’andrõ saoha gõlõ khõ Lowalangi, same’e mõna ya’aga, si lõ mamalõmalõ, ba khõ Keriso, sama’oroma’õgõ hua wa’aboto ba dõdõ ia andrõ, khõma, fefu gofu heza. (Kor. I. 15, 57. Efes. 3, 8 b. t.). 

15 Fa’amohua khõ Keriso sa ndra’aga, khõ Lowalangi, ba ni’orifi andrõ ba ba zi tetibo andrõ. (Kor. I. 1, 18). 

16 Ba nitibo’õ andrõ, ba hua soroi ba wa’auri si saŵa fa’amate, ba ba ni’orifi andrõ, ba hua soroi ba wa’auri si saŵa fa’auri. Ba ha niha zogamõ da’õ? (Luk. 2, 34. Rom. 1, 16. Yoh. 3, 17. 18). 

17 Tenga sa si mane sato andrõ, samali’õ faniaga taroma li Lowalangi andrõ, ndra’aga; fehedema, ba moroi ba zi lõ fabaya hadia ia, moroi ba Lowalangi, fõna Lowalangi, ba khõ Keriso. (F. 4, 2).

 

KORINDRO II.

FAZA 3

 

I.                  Amaedola zura mbanua Gorindro andrõ, khõ Waulo. II. Fa’atohude gamabu’ula li si bohou andrõ.

 

1 I. Hadia, mabõrõtaigõ zui wamaduhu’õ ya’aga? Moguna khõma zura wamaduhu’õ, nifa’ohe’õ khõmi, ba ma nifa’ohe’õmi, si mane ba dánõ bõ’õ õsa? (F. 5, 12; 11, 13 b. t.). 

2 Surama ami, nisura ba dõdõma bakha, si no aboto ba dõdõ niha fefu, nibasobasora. (F. 7, 3).

3 No oroma, wa sura Keriso ami, nisurama, halõŵõma; tenga taŵa wanura ya’ia, Eheha Lowalangi sauri andrõ wanura ya’ia, tenga ba gara wanura andrõ, no ba kara nagole, ba dõdõ. (Yer. 31, 33. Hes. 11, 19. Heb. 8, 10). 

4 Ba no so khõma wanõtõna si manõ, moroi khõ Keriso, ba khõ Lowalangi; 

5 tenga sa taŵa’õ tola manõ ndra’aga, na moroi khõma, ba wamabõbõ tõdõma hadia ia, hulõ na tõdõma manõ; hadia zi tola ndra’aga, ba no moroi ba Lowalangi, (Fil. 2, 13),

6 si no manolo gõi ya’aga, ena’õ tola enoni ndra’aga ba gamabu’ula li si bohou andrõ, tenga ba dandra zura andrõ, no ba khõ Geheha; famunu sa dandra zura andrõ, ba Eheha andrõ, ba sangorifi. (F. 5, 18. Yoh. 6, 63. Rom. 7, 10).

7 II. Ba na no molakhõmi halõŵõ ba wamunu andrõ, ba dandra zura andrõ, nisura ba gara, na no tobali tebai latõngõ mbawa Moze Iraono Gizeraëli andrõ, ba wa’amohaga mbawania, si taya sa atõ; (Moz. II. 34, 1. 29, 30); 

8 ba tenga mendrua manõ molakhõmi halõŵõ ba khõ Geheha andrõ? 

9 Na molakhõmi sa’ae halõŵõ ba wanibo andrõ, ba mendrua manõ, wa no a’oi so lakhõmi halõŵõ ba wangatulõ andrõ? (F. 5, 19—21. Gal. 3, 10). 

10 Tobali si lõ mufolakhõmi sa ”nifolakhõmi” andrõ, ba da’õ, bõrõ lakhõmi andrõ, si no a’oi so. 

11 Na molakhõmi sa’ae zi taya andrõ, ba mendrua manõ molakhõmi zi lõ tebulõ andrõ. (Heb. 7, 21 b. t.). 

12 Ba me no so khõma wanõtõna si manõ, ba no a’oi so wa lõ aiwõ ndra’aga. 

13 Ba tenga si mane Moze, sombalugõ bawania, fa bõi lafaigi Iraono Gizeraëli andrõ gamozua zi taya andrõ. (Moz. II. 34, 33 b. t.). 

14 Ba no mu’abe’e’õ dõdõra; irugi ma’õkhõ andre, ba lõ saheta mbalubalu andrõ, ba wombaso sura gamabu’ula li si fõfõna andrõ, lõ muheta, me ba khõ Keriso aheta ia. (Rom. 11, 25. Yes. 6, 10. 29, 11. 12). 

15 Ba irege ma’õkhõ andre, na labaso zura Moze andrõ, ba no so mbalubalu ba dõdõra. 

16 Ba na lafuli ira khõ Zo’aya, ba aheta mbalubalu andrõ. (Rom. 11, 23). 

17 Ba So’aya Geheha andrõ; ba ba zi so Eheha Zo’aya andrõ, ba da’õ so wangefa. (Kor. I. 15, 45. Yoh. 4, 24; 8, 36). 

18 Ba ya’ita fefu, ba ta’ila’ila lakhõmi Zo’aya andrõ, lõ balubalu mbawada; hulõ na ba zõrõmi, ba tobali ita, i’ohia’õ wamaedo da’õ, tedou lakhõmi safuria moroi ba lakhõmi si fõfõna, moroi khõ Geheha Zo’aya andrõ. (Kor. I. 13, 12. Rom. 8, 29).

 

KORINDRO II.

FAZA 4

 

I.                  Fa lõ farõi Waulo ba halõŵõnia fangombakha turia somuso dõdõ andrõ. II. Fa’erege dõdõnia ba fa’afõkhõ andrõ khõnia. III. Fondrara dõdõnia.

 

1 I. Andrõ: me no mufataro ndra’aga ba halõŵõ andrõ, dali wa’ahakhõ dõdõ andrõ, si no falukha ndra’aga, ba lõ ma’ila wa’ata’u; (F. 3, 6. Tim. I. 13, 16); 

2 noa sa matimba wamini andrõ, ba wa’aila andrõ, me lõ matõrõ walimosa, ba me lõ mafuyu’õ daroma li Lowalangi; mafaduhu’õ ndra’aga ba dõdõ niha fefu, fõna Lowalangi, wama’ele’õ si duhu andrõ. (F. 2, 17; 5, 11). 

3 Ba na no tobalu gõi duria somuso dõdõ andrõ, khõma ba ba zi tetibo andrõ tobalu ia, (F. 2, 15. 16), 

4 ba nimbaŵaino Lowalangi zi sagõtõ tanõ andre era’era, era’era zi lõ mamati, fa lõ ihagaini ira haga duria somuso dõdõ andrõ, turia lakhõmi Keriso andrõ, si no famaedo Lowalangi. (Efes. 2, 2. Yoh. 12, 31; 14, 9. Heb. 1, 3). 

5 Tenga sa ya’aga ni’ombakha’õma, no Keriso Yesu, So’aya, ma’ombakha’õ, ba ya’aga, ba enonimi, maŵa’õ, bõrõ Yesu. (F. 1, 24; 5, 20).

6 Lowalangi andrõ sa, sanguma’õ; yatumbu haga andrõ ba zogõmigõmi, da’õ zamatumbu’õ ba dõdõma haga andrõ, ena’õ humaga wa’aboto ba dõdõ lakhõmi Lowalangi andrõ, ba mbawa Keriso. (Moz. I. 1, 3. Fet. II. 1, 19. Efes. 1, 18 b. t.).

7 II. Ba ba nahia tanõ so khõma girõgirõ andrõ, ena’õ khõ Lowalangi, wa no fahõna wa’abõlõ, ba bõi moroi ba khõma. (F. 5, 1). 

8 Fefu gofu heza, ba no mufalangõgõ ndra’aga, ba tenga sa nimama; nibusi tõdõ ndra’aga, ba so zui lala dõdõ; (F. 1, 8; 6, 4. 5); 

9 nigohi, ba tenga nirõi; nitibo’õ tou, ba tenga nifakiko; (Mat. 5, 10); 

10 lõ aefa ba mbotoma wamunu Yesu andrõ, ma’ohe’ohe, ena’õ te’oroma’õ gõi wa’auri Yesu andrõ, ba mbotoma andre. (Kor. I. 15, 31. Gal. 6, 17. Rom. 6, 8).

11 Lõ aetu sa tefatõrõ ndra’aga ba wamunu, ya’aga sauri andre, bõrõ Yesu, ena’õ tefa’ele’õ gõi wa’auri Yesu andrõ, ba nõsima andre, si mate. (Rom. 8, 36. Kor. I. 4, 9).

12 III. Tobali ba khõma abõlõ wa’amate, ba ba khõmi, ba fa’auri zabõlõ. (F. 13, 9). 

13 Ba me no so khõma Geheha wamati andrõ, si mane si so ba zura: ”No mamati ndra’o, andrõ humede ndra’o”, ba mamati ndra’aga gõi, ba andrõ muhedega gõi. (Sin. 116, 10). 

14 Me no ma’ila, si no manusugi Yesu, So’aya ya’ita, ba isusugi gõi ndra’aga dania, awõ Yesu, ba ifa’aso ndra’aga, awõmi. (Kor. I. 6, 14. Rom. 8, 11). 

15 Bõrõ sa ami, ba da’õ fefu, ena’õ amaedola zi tedoudou na wa’ebua dõdõ (Lowalangi) andrõ, ba ena’õ fahõna; wangandrõ saoha gõlõ, ena’õ ato zangandrõ, ba wamolakhõmi Lowalangi. (F. 1, 6. 11. Sin. 50, 23. Kol. 1, 24). 

16 Andrõ lõ ma’ila wa’ata’u, he ŵa’ae tekiko mbotoma andre, ba tebohouni niha bakha, ero ma’õkhõ. (Efes. 3, 16). 

17 Famakaoda andrõ sa, si lõ arara, si lõ abõlõbõlõ, ba i’a’asogõ khõda lakhõmi sebua, si lõ aetu, irege fahõna; (Rom. 8, 17. 18. Fet. I. 1, 6 b. t.); 

18 me lõ tefaigi zoroma andrõ, ha si lõ oroma. Soroma sa, ba lõ ararā, ba si lõ oroma, ba irugi zi lõ aetu. (Rom. 8, 24. Heb. 10, 34; 11, 1. 26).

 

KORINDRO II.

FAZA 5

 

I.                  Tõtõnafõ Waulo. II. Iforege wolo’õ somasi Zo’aya. III. Halõŵõnia angombakha fangatulõ andrõ.

 

1 I. Noa sa ma’ila, na tedudugõ nahama andre, ba guli danõ, ose andre, ba so khõma ni’otomosi Lowalangi, omo, si tenga nifazõkhi tanga, si lõ tebulõ, ba zorugo. (Fet. II. 1, 13. 14. Heb. 9, 11; 11, 10). 

2 Ba da’õ sa gõi mangarõngarõga, humulu dõdõma, ena’õ tefonukha ndra’aga nahama andrõ, soroi ba zorugo; (Rom. 8, 23); 

3 me tenga sa si lõ nukha ndra’aga, wamaigi ya’aga, na no ma’onukha ia. (Mat. 22, 11. Efes. 4, 24. Fam. 3, 18). 

4 Andrõ mangarõngarõga, ya’aga si so ba nose andrõ, sonoro ndra’aga, me lõ omasiga, na aheta nukhama, me omasiga na tefalaete, ena’õ i’ā fa’auri andrõ zi mate andrõ. (Rom. 8, 19. 22. Kor. I. 15, 51—53). 

5 Ba sangehao ya’aga ba da’õ, ba ya’ia Lowalangi, si no mame’e khõma we’ewe’e dõdõ andrõ, Eheha andrõ. (F. 1, 22. Rom. 8, 14). 

6 Andrõ wa lõ mamalõmalõ wa’arara dõdõma, ba no mi’ila, na ba mboto soga, ba no arõu ndra’aga khõ Zo’aya, no sikoli ndra’aga. (Heb. 13, 14). 

7 Lala wamati sa lalama, ba tenga famaigi. (Kor. I. 13, 12. 13. Fet. I. 1, 8). 

8 Ba no arara dõdõma, ba abõlõ omasiga awu’a ndra’aga, marõi mboto, ba ahono ndra’aga khõ Zo’aya. (Fil. 1, 23). 

9 Andrõ gõi maforege, he sahono ndra’aga yomo, ba he sikoli, ena’õ omasi ia ndra’aga. (Kol. 1, 10 b. t.).

10 Lõ’õ sa tola lõ oroma dania ita fefu fõna dadaoma ba wanguhuku andrõ khõ Keriso, ena’õ itema zamõsana zulõ nilaunia, me ba mboto, so ia, he si sõkhi, ba he si lõ sõkhi. (Rom. 14, 10. Kor. I. 4, 5).

11 II. Ba me no aboto ba dõdõda wangata’ufi So’aya, ba tadõnisi niha; ba noa sa oroma ita khõ Lowalangi, ba udõnadõna, ba dõdõmi gõi oroma ndra’o. (Kor. I. 9, 20. Kor. II. 4, 2). 

12 Lõ’õ sa mafuli mafaduhu’õ ndra’aga khõmi, ba mafobõrõ khõmi wanuno ya’ami ba khõma andre, ena’õ so khõmi wanuno, ba zanuno ya’ira ba zoroma ba niha, ba tenga ba zi so ba dõdõ. (F. 3, 1; 10, 12). 

13 Na sowõhõ ndra’aga, ba no khõ Lowalangi owõhõga, ba na si so era’era ndra’aga, ba ba khõmi. 

14 Fa’omasi Keriso andrõ sa zango’ou ya’aga. (Rom. 6, 3 b. t.). 

15 Da’õ niŵa’õma: Na no mate zamõsa, salahi zato fefu, ba no ahori mate ira fefu. Ba no mate ia salahi zato fefu, ena’õ tenga sa’ae khõra auri zauri, ena’õ khõ zi mate salahira, khõ nisusugi andrõ, salahira, auri ira. (Rom. 14. 7 b. t.). 

16 Tobali, i’otarai da’e, ba lõ’õ sa’ae ma’ila niha, na dali mboto. Ba he no ma’ila Keriso, dali mboto, ba lõ’õ sa’ae ma’ila ia iada’e.

17 Tobali na ba khõ Keriso so niha, ba no si bohou mufazõkhi ia, no numalõ zi tohõna andrõ, ba hiza, ba no tobali bohou. (Rom. 8, 1. Gal. 6, 15. Fam. 21, 5).

18 III. Ba fefu da’õ, ba moroi ba Lowalangi, si no mangatulõ’õ ya’ita khõnia, ba khõ Yesu Keriso, si no mame’e gõi khõda halõŵõ fangatulõ andrõ. (Rom. 5, 10). 

19 Lowalangi sa zi no mangatulõ’õ khõnia õsi guli danõ, ba khõ Keriso, lõ ibe’e õmõra lalõra andrõ, ba no ibe’e ba dõdõma daroma li andrõ, ba wangatulõ andrõ. (Yoh. 14, 10. Rom. 3, 24 b. t. Kol. 1, 19. 20. Yoh. I. 2, 2). 

20 Ba no sinenge ndra’aga, salahi Keriso, hulõ na Lowalangi zamarou tõdõ niha, ba lima andrõ, mangandrõ ndra’aga, salahi Keriso, mamane: Mifa’atulõ’õgõ ami khõ Lowalangi! (Yes. 52, 7. Yoh. 20, 21). 

21 Noa sa ibali’õ horõ zi lõ irai mangila horõ, salahida, ena’õ tobali fa’atulõ khõ Lowalangi ita, ba khõnia andrõ. (Fet. I. 2, 22 b. t.; 3, 18. Gal. 3, 13. Rom. 8, 3. 4.).

 

KORINDRO II.

FAZA 6

 

I.                  Bõi la’ositengagõ wa’ebua dõdõ Lowalangi andrõ, ena’õ lahalõ tulada khõra Waulo. II. Bõi fahuwu ira ba zi lõ mamati ba ba zame’e adu.

 

1 I. Ba ma’andrõ khõmi, ya’aga sanolo ba halõŵõ andrõ, bõi saekhu ba danõ, me no falukha ami wa’ebua dõdõ Lowalangi andrõ. — (F. 1, 24. Heb. 12, 15). 

2 Noa sa imane: ”No ufondrondrongo khõu, me baŵa si sõkhi, ba no utolo’õ, me luo wangorifi. ” Hiza, iya’e mbaŵa si sõkhi, hiza, iya’e luo wangorifi andrõ. — (Yes. 49, 8. Heb. 3, 7. 13). 

3 Lõ’õ sa mafobõrõ wangala hadia ia, gofu ha õkhõ, fa bõi te’o’aya halõŵõ andrõ. 

4 Fefu hadia ia nilauma sa, ba no amuata genoni Lowalangi gamuatama, ba wanaha tõdõ, si no a’oi so, ba ba wa’afõkhõ, ba ba wa’atosasa, ba ba wa’ata’u dõdõ, (F. 4, 8 b. t.), 

5 ba na labõzi ndra’aga, ba na lakuruga, ba na molaŵa niha, ba ba wa’erege dõdõ, ba ba wa lõ mõrõ, ba ba wa lõ si manga, (F. 11, 23—27. Hal. zin. 19, 29; 21, 30), 

6 ba ba wa’ohauhau, ba ba wa’aboto ba dõdõ, ba ba wa’ebolo dõdõ, ba wa’asõkhi dõdõ, ba ba khõ Geheha ni’amoni’õ, ba ba wa’omasi andrõ, si lõ famini tõdõ, 

7 ba daroma li fa’aduhu andrõ, ba ba wa’abõlõ Lowalangi andrõ, moroi ba wangõna fa’atulõ dõdõ andrõ, he ba gambõlõ, ba he ba gabera; (Tim. II. 2, 15. Rom. 15, 19); 

8 He falukha zumange, ba he fango’aya, he labõbõgõ zi lõ sõkhi, ba he lasuno ndra’aga; hulõ zamaelungu, ba no si duhu; 

9 hulõ zi lõ aboto ba dõdõ niha, ba noa sa aboto ba dõdõ niha bõ’õ; hulõ zi mate, ba hiza, ba sauri ndra’aga; hulõ ni’otu’õ ba lõ’õ sa mubunu; (F. 4, 10. 11. Sin. 118, 17. 18);

10 hulõ zabu tõdõ, ba lõ’õ sa mamalõmalõ wa’omuso dõdõ; hulõ zi numana, ba ato nifo’ana’ama; hulõ niha si lõ’õ, ba no a’oi so khõma. (F. 12, 10; 8, 9. Kor. 3, 21).

11 II. No alua baeha lima khõmi, ya’ami banua Gorindro, no ibologõ ia tõdõma. 

12 Lõ ambõ nahami ba dõdõma ba no ide’ide dõdõmi. 

13 Ba misulõni — hulõ wehede ba ndraono wehedegu khõmi — mi’ebolo’õ dõdõmi goi. 

14 Bõi mitolo ba nilau zi lõ mamati andrõ. Hadia, fabõbõ ira wa’atulõ wa lõ atulõ? Ba hadia, awõ haga zogõmigõmi? (Efes. 5, 11). 

15 Hadia, no faudu ira Keriso Mbeliali? Ba hezo zi faoma mo’urakha ira, zamati zi lõ mamati? (Raz. I. 18, 21).

16 Hadia fabõbõ ira gosali Lowalangi nadu? Osali Lowalangi sauri sa ami, si mane niŵa’õ Lowalangi: ”Ba khõra ube’e nahagu, ba udõrõdõrõi ira, ba Lowalangira ndra’o, ba banuagu ira. (Kor. I. 3, 16. Moz. III. 26, 11. 12). 

17 Andrõ miheta ami khõra, mifabali ami, iŵa’õ So’aya, ba bõi mibabaya zi ra’ira’iõ; ba utema ami, (Yes. 52, 11. Fam. 18, 4. Moz. IV. 16, 29), 

18 ba amami ndra’o, ba onogu matua ami ba onogu alawe, iŵa’õ So’aya andrõ, si lõ ambõ fa’abõlõ.” (Yer. 31, 33; 32, 38. Yoh. 1, 12).

 

KORINDRO II.

FAZA 7

 

I.                  Famarou tõdõ, ba wangohauhau. II. Fa’omasi Waulo mbanua orindro. III. Omuso dõnõnia, me no labe’e ba dõdõra niŵa’õnia a zura si fõfõna andrõ.

 

1 I. Ba me no so khõda gamabu’ula li si manõ, ya’ami ni’omasi’õ! ba datahaogõ ita, taheta fefu zi no tokana andrõ, he ba nõsi, ba he ba dõdõ, ba wamalua fangohauhau andrõ; ta’ata’ufi Lowalangi. (F. 6, 17. Yoh. I. 3, 3).

2 II. Mifondrondrongo khõma; lõ nilauma si lõ sõkhi ba niha, lõ nifakikoma niha, lõ ni’alanima. (F. 12, 17). 

3 Tenga fangetu’õ huku, wa uŵa’õ da’õ. Noa sa uŵa’õ mege, ba dõdõma so ami, he ba wa’amate, ba he ba wa’auri, awõma. (F. 6, 11—13). 

4 No abe’e sibai dõdõgu ami, oi so wanunogu ya’o, ba khõmi andrõ; no fahõna wondrara dõdõ khõgu, oi so wa’omuso dõdõgu, ba wa’afõkhõ andrõ fefu khõma. (Fil. 2, 17). 

5 Me no marugi Makedonia sa, ba ma’ifu lõ folombase mbotoma, no fahõna manõ zafõkhõ, fasosota baero, ba bakha ba dõdõ, ba fa’ata’u. (F. 4, 8). 

6 Ba sondrara tõdõ zi numana, Lowalangi, da’õ zondrara tõdõma, ba wa’aso Dito andrõ. (F. 1, 4; 2, 13).

7 Ba tenga ha ba wa’asonia, ba wondrara tõdõ andrõ goi, si no falukha ia khõmi, me i’ombakha’õ khõma wehulu dõdõmi andrõ ba fangarõngarõmi ba fa’owõlõ’õlõmi, ba khõgu andre; tobali no tedou na wa’omuso dõdõgu. (Tes. I. 3, 6—8).

8 III. Ba he sa no ubusi dõdõmi ba zura andrõ, ba lõ’õ sa mangesa dõdõgu. Ba he no mangesa dõdõgu — u’ila sa, wa no abu dõdõmi, ba zura andrõ, he lõ ararā — (F. 2, 2—4) 

9 ba iada’e, ba no omuso dõdõgu, tenga sa me no abu dõdõmi, me no abu dõdõmi ba wamalalini era’era a’ine, dali sa Lowalangi, wa abu dõdõmi, ena’õ lõ hadia ia zi te’ala ami khõma. 

10 Lualua wa’abu dõdõ andrõ sa, na dali Lowalangi, ba famalalini eraera, ba wangorifi ba mbanua furi, si lõ mangesa dõdõ sa’ae, ba lualua wa’abu dõdõ niha guli danõ andrõ, ba fa’amate. (Mat. 5, 4; 26, 75). 

11 Hiza sa da’õ, wa no abu dõdõmi, dali Lowalangi, he wisa wamarounia tõdõmi, ba wamu’a sa’ae, ba ba wofõnu, ba ba wa’ata’u, ba ba wehulu dõdõ, ba ba wamorege, ba ba wangotu’õ! Gofu hadia ia, niŵa’õda, ba no mi’oroma’õ, wa lõ esuanõ khõmi ba da’õ. 

12 Ba he no ufa’ohe’õ zura khõmi, ba no tenga bõrõ zi so sala andrõ, ba tenga bõrõ ba zosala ia, da’õ mbõrõ, ena’õ oroma ba khõmi, fõna Lowalangi, wa no sosó dõdõmi ndra’aga. (F. 2, 5, 9). 

13 Andrõ no falukha ndra’aga wondrara dõdõ. Ba noa na mõi fonõnõ wondrara dõdõma wa’omuso dõdõma andrõ, si no fahõna, moroi ba wa’omuso dõdõ Dito andrõ, me no falukha ia wangokafu dõdõ, ba khõmi fefu. 

14 Ba na no usuno ndra’o ma’ifu khõnia, ba khõmi andrõ, ba lõ saila ndra’o, si mane niŵa’õma khõmi fefu, me no si duhu, si manõ gõi wanunoma ya’aga khõ Dito, no si duhu. 

15 Ba noa na tedou wa’omasima ami, me itõrõ tõdõnia wolo’õmi andrõ, dozi ami, me mitema ia, me ata’u ami, ba me manizinizi ami. 

16 Omuso sa dõdõgu, me no abe’e dõdõgu ami, fefu gofu hadia ia.

 

KORINDRO II.

FAZA 8

 

I.                  Ifarou dõdõra Faulo ba wanolo si numana, ena’õ labe’e tulada khõra niha Keriso ba Makedonia. II. Iŵa’õ li khõra ba zinenge andrõ, si mõi mangozaragõ tolotolo andrõ.

 

1 I. Ba lõ’õ sa mabini’õ khõmi, ya’ami ira talifusõ, wa’ebua dõdõ Lowalangi andrõ, ni’oroma’õnia ba mbanua (niha Keriso), ba Makedonia misa. (F. 9, 1. 2. Rom. 15, 26). 

2 No oya wanandraigõ, fa’afõkhõ, ba no fahõna gõi wa’omuso dõdõ, no numana sibai ira, ba no abõlõ wa’ahakhõ dõdõra, lualua. 

3 Ndrege zi tola ira, lõ ubini’õ, italu’i na i zi tola, fa’aoha gõlõra. 

4 No laforege wangandrõ khõma, ena’õ matehe khõra, awõ gõi ira ba wanolo ni’amoni’õ andrõ. (Hal. zin. 11, 29). 

5 Ba tenga ha nidõnadõnama andrõ, botora lalulu, khõ Zo’aya ua, ba khõma dania, me no omasi Lowalangi. 

6 Tobali mafarou dõdõ Dito andrõ, ena’õ ifalua gõi nifobõrõnia, ba dolotolo andrõ, ba khõmi gõi. (F. 7, 13—15; 12, 18). 

7 Ba me no fahõna khõmi fefu hadia ia, he famati, ba he famahaõ andrõ, ba he fa’aboto ba dõdõ, ba he ngawalõ wa’owõlõ’õlõ fefu, ba he fa’omasimi ndra’aga, ba ena’õ a’oi gõi so khõmi dolotolo andrõ. (Kor. I. 1, 5). 

8 Tenga oroisa, na uŵa’õ khõmi, ba ena’õ utandraigõ, na si ndruhu wa’omasimi andrõ, ena’õ ube’e fanandraigõ wa’owõlõ’õlõ dánõ bõ’õ. (Yoh. I. 3, 17. 18). 

9 Noa sa aboto ba dõdõmi wa’ahakhõ dõdõ Zo’aya ya’ita, Yesu Keriso, wa no ifa’anumana ia, bõrõ ami, he ŵa’ae no fahõna khõnia, ena’õ fahõna dania khõmi ba wa’anumanania andrõ. (Luk. 9, 58. Fil. 2, 6 b. t.). 

10 Ba da’õ dõdõgu ba da’õ — da’õ sa zõguna khõmi, me no mifobõrõ me ndrõfia, tenga ha famalua, no fa’edõna gõi, — (F. 9, 2) 

11 ba mi’asiwai gõi wolau iada’e, ena’õ hulõ si mane fa’aoha gõlõ andrõ ba wa’edõna, si manõ gõi wamalua andrõ, dali zi so khõmi. (Amaed. 3, 9).

12 Na so wa’aoha gõlõ sa, ba no ni’omasi’õ; dali zi so khõnia, tenga dali zi lõ’õ. (F. 9, 7. Amaed. 3, 27. 28. Luk. 21, 3. 4). 

13 Tenga sa ena’õ ohahau dõdõ dánõ bõ’õ, ba ena’õ afõkhõ khõmi; ena’õ fagõlõgõlõ a’ine: hadia zi tõra khõmi, gõtõ iada’e, ba yamõi fonõnõ ba zambõ khõra, 

14 ena’õ gõi mõi fonõnõ ba zambõ khõmi zi tõra khõra, ena’õ fagõlõgõlõ. (F. 9, 12). 

15 Si mane si so ba zura: ”Ba zi no oya, ba lõ si tõra, ba ba zi lõ oya’oya, ba lõ sambõ.” (Moz. II. 16, 18). 

16 Ba nisuno Lowalangi, si no mame’e ba dõdõ Dito fa’owõlõ’olõ andrõ, ba khõmi andrõ.

17 Lõ’õ sa abua khõnia me lafarou ia, ba noa sa fahõna khõnia wa’aterou dõdõ, ba mõi manõ ia khõmi, no aoha gõlõnia.

18 II. Ba no mafatenge awõnia dalifusõ andrõ, si sõkhi turia ba mbanua misa fefu, ba duria somuso dõdõ andrõ. (F. 12, 18). 

19 Ba tenga ha da’õ, noa gõi nituyu mbanua andrõ ia, awõma, ba dolotolo andrõ, si so ba dangama, ba wamosumange So’aya, ba ba wamarou tõdõma. 

20 Andrõ malau da’õ, fa lõ labõbõgõ khõma zi lõ sõkhi, ba dolotolo sebua andrõ, nifa’emama. 

21 Si sõkhi sa ni’aluima, tenga ha ba zanehe Zo’aya, ba zanehe niha gõi. (Rom. 12, 17). 

22 Ba no mafatenge awõra dalifusõda andrõ, si no faduhu dõdõma, wa sowõlõõlõ ia; no asese ma’ila, no oya ngawalõ; ba mendrua manõ owõlõõlõ ia iada’e, me no faduhu sibai dõdõnia khõmi. 

23 Ba he ba khõ Dito andrõ, ba awõgu ia, ba khõmi andrõ, ba sanolo ya’o ba halõŵõ andrõ, ba he talifusõda andrõ, ba no sinenge mbanua andrõ ira, lakhõmi Keriso. 

24 Ba na mi’oroma’õ khõra wa’omasimi, awõ mbõrõ wanunoma ya’ami, ba no amaedola zi no so mbanua fefu. (F. 7, 14 b. t.).

 

KORINDRO II.

FAZA 9

 

I.                  Itohugõ na Faulo wamarou tõdõra, ba dolotolo andrõ. II. Hadia gunania.

 

1 I. Ba dolotolo andrõ sa ba ni’amoni’õ andrõ, ba alakha lõ’õ sa’ae usura khõmi hadia ia. (F. 8, 4. 20). 

2 Noa sa u’ila wa’aoha gõlõmi, ba nisunogu ya’ami, ba mbanua Makedonia, wa no aoha gõlõ mbanua Nakhaya, me ndrõfia sa’ae; ba no mõi famarou dõdõ zato wa’owõlõ’õlõmi. 

3 Ba no ufatenge dalifusõ andrõ, fa bõi tobali faya wanunoma ya’ami, ba da’õ; ena’õ itõrõ niŵa’õgu, ena’õ aoha gõlõmi. (F. 8, 22. 24). 

4 Ena’õ lõ aila ndra’aga — me no madõnadõna da’õ, na mõi awõgu mbanua Makedonia, ba na lõ aoha gõlõmi la’ila. 

5 Andrõ wa no uŵa’õ tõdõgu, moguna u’andrõ ba dalifusõ andrõ, ena’õ mowaõwaõ ira ba khõmi, ba wangasiwai howuhowu andrõ khõmi, si no awai tefabu’u, ena’õ awai, ba ena’õ howuhowu, ba bõi si hulõ wa’atali. 

6 Ba da’õ niŵa’õgu: Na so zangataliso tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. (Amaed. 11, 24. 25; 28, 27). 

7 Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi. (F. 8, 12. Moz. V. 15, 7. 10. Rom. 12, 8). 

8 Ba no abõlõ Lowalangi, ba wangõhona khõmi fefu ngawalõ wa’ebua dõdõ, ena’õ lõ mamalõmalõ wa a’oi so khõmi fefu hadia ia, ba ena’õ so zi tõra, ba wolau si sõkhi, hadia ia fefu. (Fil. 4, 19).

9 Si mane si so ba zura: ”No ifazaewe, no ibe’e ba zi numana, lõ mamalõmalõ wa’atulõ dõdõ andrõ, khõnia, irugi zi lõ aetu.” (Sin. 112, 9).

10 II. Ba same’e tanõmõ ba zanaru ba ibe’e gõi gõ ni’ā ba i’oya’õ mbua zinanõmi, ba idou’õ lualua wa’atulõ dõdõmi andrõ. (Yes. 55, 10. Hos. 10, 12). 

11 Ena’õ fahõna khõmi fefu, hadia ia, ba wanolo andrõ fefu, famasugi wangandrõ saoha gõlõ khõ Lowalangi; sama’ema ndra’aga. (F. 8, 7). 

12 Tolotolo andrõ, ame’ela andrõ, ba tenga ha famõnõkhi sambõ ba ni’amoni’õ andrõ, mohare sibai gõi, me ifasugi wangandrõ saoha gõlõ khõ Lowalangi, ba zato andrõ, (F. 8, 14),

13 na lasuno Lowalangi, me no si ndruhu wanolo andrõ, ba wolo’õmi andrõ, wa lõ mi’osilõ’õgõ duria somuso dõdõ andrõ khõ Keriso, ba ba wa’ebua dõdõ andrõ, me no mihalõ noro dõdõmi gõi zabu dõdõra ba sabu dõdõ zato fefu. 

14 Ba ba wangandrõra, salahimi, me no humulu dõdõra khõmi, bõrõ wa’ebua dõdõ Lowalangi andrõ khõmi, si no fahõna. 

15 Ba nisuno Lowalangi, ba mbualania andrõ, si tebai taŵa’õ fa’ebua. (Rom. 6, 23).

 

KORINDRO II.

FAZA 10

 

Ibu’a ba hulunia nibõbõgõ khõnia Faulo.

 

1  Ba ya’o, Faulo, ufarou dõdõmi ba wa’ebolo dõdõ Keriso andrõ, ba ba wa’asõkhi dõdõnia; ya’o, si no ide’ide na fa’ila bawa ita, na sodo khõmi, ba si no abe’e wanguma’õ khõmi hadia ia, na ba zarõu sodo. 

2 Ba u’andrõ khõmi: ena’õ alakha lõ abe’e ndra’o na sodo, ena’õ alakha lõ ufake wa lõ aiwõ andrõ, si tola ufake niŵa’õgu, ba niha õsa, sanguma’õ tõdõra, dali khõma nõsi niha ba lalama. (F. 13, 1—10; 1, 12. 17). 

3 Õsi niha sa khõma ba lalama, ba ba wasõndrata andrõ, ba tenga dali nõsi niha khõma. 

4 Ba wangõnama andrõ, ba wasõndrata andrõ, ba tenga dali nõsi niha, noa sa abe’e, ba khõ Lowalangi, ba wanudugõ hati. (Efes. 6, 10. 13 b. t.). 

5 Madudugõ nifakhai dõdõ, awõ ngawalõ wayaŵasa fefu, solaŵo ena’õ fa’aboto ba dõdõ niha Lowalangi, ba mabõbõ fefu ngawalõ gera’era, ba wolo’õ khõ Keriso. (Rom. 15, 18). 

6 Ba matarogõ, ba wangotu’õ fefu ngawalõ wa lõ molo’õ, na no a’oi so wolo’õmi. 

7 Mitõngõni duduma hõrõ andrõ. Na so zabe’e tõdõ ba khõnia, wa no khõ Keriso ia, ba yamu’ofanõi tõdõnia, wa si mane ya’ia gõi ndra’aga, khõ Keriso. 

8 Ba he na udou’õ na ma’ifu tõ wanuno ya’o, me no itehe khõma So’aya, wanga’azõkhi ya’ami, ba tenga famakiko, ba lõ’õ sa atõ falukha aila ndra’odo, (F. 12, 6; 13, 10), 

9 fa bõi hulõ na ufeta’u ami ba zura andrõ. 

10 Me laŵa’õ: sura andrõ, ba no abe’e, no abõlõ, ba na so ia, ba no ambõ fa’abe’e, ba huhuo andrõ, ba lõ gõna ba dõdõ. (F. 11, 6).

11 Ba yamube’e ba dõdõnia sanguma’õ da’õ: si mane fehedema ba zura, na lõ ya’aga, si manõ gõi wolauma, na soga. (F. 13, 2 b. t.). 

12 Ata’u sa ndra’aga mafaomagõ ndra’aga ba mafakhilikhili ndra’aga ba niha andrõ, samaduhu’õ ya’ira; ba ya’ira, ba no sambõ era’era, na labe’e dali ira ba wamaigi suara ba he wisa ira. 

13 Ba ya’aga, ba lõ mafalawu wanuno ya’aga, mabe’e dali nifakhoi andrõ, nifakhoi Lowalangi khõma, fondrege wa no marugi gõi ami. (Rom. 12, 3). 

14 Lõ taŵa’õ, lõ nirugima ya’ami, ba mafaigi sa’ae zi tõra fa’arõu; noa sa marugi ami gõi, wangombakha turia somuso dõdõ andrõ khõ Keriso. (Kor. I. 9, 2). 

15 Lõ mafalawu wanuno ya’aga, ba halõŵõ niha bõ’õ; ba madõnadõna, na tedou wamatimi andrõ, ba ebua ndra’aga, ba khõmi andrõ, dali nifakhoi andrõ khõma, irege a’oi makhamõ, 

16 ba wangombakha turia somuso dõdõ andrõ, ba zi tambaimi, ba bõi ba nifakhoi ba dánõ bõ’õ, ba zi no awai halõŵõ, ba wanuno ya’aga ba da’õ. (Rom. 15, 20). 

17 Na so zanuno ya’ia, ba ba khõ Zo’aya yamusuno ia. (Kor. I. 1, 31). 

18 Tenga sa ba zamaduhu’õ ya’ia faduhu dõdõda, ba nifaduhu’õ Zo’aya faduhu dõdõda. (Kor. I. 4, 5. Amaed. 27, 2).

 

KORINDRO II.

FAZA 11

 

Itohugõ Faulõ wamu’a ba hulunia nibõbõgõ khõnia; itõrõ linia wamakao andrõ, nitaõgõnia.

 

1  Ena’õ mibologõ dõdõmi ma’ifu, ba wa’ambõ tõdõ andrõ khõgu! Ba mibologõ sa gõi dõdõmi khõgu. (F. 11, 16—19; 12, 6). 

2 Solohu sa ndra’o, ba khõmi andrõ, fa’olohu Lowalangi. No ufohu ami ba niha, si ha samõsa, ena’õ u’ohe ami khõ Keriso, ono alawe si sõkhi. (Efes. 5, 25 b. t.). 

3 Ba ata’u ndra’o, tefakiko gera’erami, aheta ba zadõlõ andrõ, ba khõ Keriso, hulõ si mane famaelungu gulõ andrõ Khawa, ba wa’onekhenia. (Moz. I. 3, 1—13). 

4 Na so sa zi mõi khõmi, mangombakha Yesu tánõ bõ’õ, si tenga ni’ombakha’õma, ba ma na mitema Geheha tánõ bõ’õ, si tenga nitemami, ba ma turia somuso dõdõ tánõ bõ’õ, si tenga nihalõmi khõmi, ba faduhu dõdõda, na lõ mitimba. (Gal. 1, 6 b. t.). 

5 Ba dõdõgu sa, ba ma’ifu lõ ide’ide ndra’o, moroi ba zinenge salua yaŵa andrõ. (F. 12, 11; 10, 12. Kor. I. 15, 9. 10). 

6 Ba he no sambõ tõdõ ndra’odo ba huhuo, ba tenga sa ba wa’aboto ba dõdõ; gofu hadia ia, ba no u’oroma’õ manõ ia, ba khõmi andrõ. (F. 10, 10. Kor. I. 2, 1. 13). 7 Ma horõgu, me no u’ide’ide’õ ndra’o, ena’õ mõi yaŵa ami, ube’e, me no saoha gõlõgu wangombakha khõmi turia somuso dõdõ andrõ khõ Lowalangi? (F. 12, 13. Kor. I. 9, 12). 

8 Banua bõ’õ, ba no ufo’õmõ, me no uhalõ mbõli gõlõgu, ba we’amõi enonimi; ba me sodo khõmi, me ambõ khõgu, ba lõ nibusigu tõdõ niha, ha niha ia. (Fil. 4, 10. 55. Hal. zin. 18, 3). 

9 Sambõ khõgu andrõ, ba noa sa labõnõkhi talifusõ andrõ, si otarai Makedonia; ba fefu hadia ia, ba lõ nibusigu tõdõmi, ba lõ’õ gõi ubusi dõdõmi dania. (Kor. I. 16, 17. Tes. I. 2, 9). 

10 Faya zi duhu andrõ khõ Keriso ba dõdõgu, na ube’e toba’a khõgu wanuno ya’o andrõ, ba mbanua Nakhaya misa. (Kor. I. 9, 15). 

11 Hana wa si manõ? Hadia me lõ omasido ami? I’ila Lowalangi. 

12 Ba nilaugu iada’e, ba utohugõ, ena’õ utimba mbõrõ andrõ, ba zangalui bõrõ, ba wangai tulada khõra ya’aga, ba nisunora ya’ira. 

13 Sinenge faya sa niha si manõ, sohalõŵõ si falimo, sanagõ amuata zinenge Keriso. (F. 2, 17. Fil. 3, 2). 

14 Ba lõ’õ sa ahõlihõli dõdõda; Satana sa gõi, itagõ gamuata mala’ika haga. (Mat. 4, 5. 6. Hal. zin. 16, 16. 17). 

15 Ba hana wa takata’õ sibai, na latagõ enoninia gõi gamuata genoni ba zatulõ? Ba i’ohia’õ mbuabuara amozuara dania. (Fil. 3, 19). 

16 Samuza tõ uŵa’õ: Bõi yamuŵa’õ tõdõnia niha, sambõ tõdõ ndra’odo; ba na so zui, ba lau, ba yasambõ tõdõ ndra’o khõmi, ena’õ tõla usuno gõi ndra’o ma’ifu. (F. 11, 1). 

17 Hadia niŵa’õgu iada’e, ba tenga dali Zo’aya, wa uŵa’õ ia; hulõ ba wa’ambõ tõdõ sa, me no abe’e dõdõgu wanuno ya’o. (F. 12, 19). 

18 Me ato zanuno ya’ira, dali nõsi niha, ba usunodo gõi. (Fil. 3, 3 b. t.). 

19 No edõna ami, mibologõ dõdõmi ba zambõ tõdõ, me no satuatua ami. (Kor. I. 4, 10). 

20 Mitaha sa, na so zangosawuyu ya’ami, na so zi manga ya’ami, na so zondra’u ya’ami, na so zi fayaŵa, na so zamalisi baŵami. (Kor. I. 7, 23). 

21 Fangaila, wa uŵa’õ: noa sa ambõ wa’abe’ema. Ba na so zabe’e dõdõ niha bõ’õ (fehede zambõ tõdõ wehedegu) ba abe’e gõi dõdõgu. 

22 Niha Heberaio ira? ya’odo gõi. Iraono Gizeraëli ira? ya’odo gõi. Ma’uwu Gaberahamo ira? ya’odo gõi. (Hal. zin. 22, 3). 

23 Enoni Keriso ira? (fehede zambõ tõdõ wehedegu) no tõra ndra’o; no abõlõ wa’erege dõdõgu, no asese labõbõzi ndra’o, no asese lakurudo, no asese ahatõ wa’amate. (Kor. I. 4, 1). 

24 No melima lahare’õ khõgu niha Yehuda zi sara ambõ õfa wulu. (Moz. V. 25, 3). 

25 No medõlu tebõzi ue ndra’o, samuza no latebudo kara; no medõlu falukhado wa’aboto nowo; sara luo sara mbongi si no alõmõ ba nasi ndra’odo. (Hal. zin. 16, 22; 14, 19; 27, 41 b. t.). 

26 No asese mukoli ndra’o, falukha ndra’o gameta’uõ ba nidanõ ba ameta’uõ sange’e, ba ameta’uõ ba niwama, ba ameta’uõ ba niha baero, ba ameta’uõ ba mbanua misa, ba ameta’uõ ba danõ si mate, ba ameta’uõ ba nasi, ba ameta’uõ ba dalifusõ sofaya; 

27 ba halõŵõ ba ba wa’erege dõdõ; ba wa’asese lõ mõrõ ba zi bongi; ba wa’olofo ba ba wa’owõkhi dõdõ, ba wa’asese lõ manga, ba wa’o’afu ba ba wa lõ nukha; (F. 6, 4. 5. Kor. I. 4, 11); 

28 lõ lai baero õ, wa ero ma’õkhõ lahurufai ndra’o, wa u’abusi tõdõ mbanua misa, fefu. 

29 Ha niha zamomó, zi lõ amomó ndra’o gõi? Ha niha zi falukha fangala, si lõ afõkhõ bakha dõdõgu? (Kor. I. 9, 22). 

30 Na lõ tola lõ usuno ndra’o, ba ba wa’ambõ wa’abõlõgu usunodo. (F. 12, 5. 9. 10). 

31 Lowalangi Zo’aya ya’ita Yesu, Amania, nisunosuno irugi zi lõ aetu, da’õ zangila, wa tenga faya niŵa’õgu. 

32 Ba Ndramaseko ifatarogõ’õ mbanua Ndramaseko kumandru razo Areta andrõ, ba wondra’u ya’o; (Hal. zin. 9, 24 b. t.);

33 ba ba zandrela lafatõrõ ndra’o, wanada ya’o, ba gero gõli kara, ba ragaraga, ba aefa ndra’o ba dangania.

 

KORINDRO II.

FAZA 12

 

I. I’ide’ide’õ ia Faulo. II. Lõ nihalõnia bõli gõlõnia ba mbanua Gorindro; i’omasi’õ ira.

1 I. Lõ tola lõ usuno ndra’o, ba lõ’õ sa gunania; ba alakha sa itõrõ ligu gangilata andrõ, ba fama’ele’õ andrõ, khõ Zo’aya. (Hal. zin. 26, 16. Gal. 2, 2). 

2 So ni’ilagu niha, ba khõ Keriso, si no mu’ohe yaŵa, irugi tõlu nga’õtõ zorugo, me meweleõfa fakhe (na ba mboto so ia, ba lõ u’ila, ba na baero mboto, ba lõ’õ zui u’ila; Lowalangi zangila). (Hes. 11, 24. Hal. zin. 22, 17). 

3 Ba no u’ila niha andrõ (na ba mboto, ba na baero mboto, ba lõ u’ila; Lowalangi zangila) 

4 wa no mu’ohe ia ba waradaiso, awõ wa no irongo daroma li si tebai laŵa’õ niha, si lõ tola iŵa’õ niha, ha niha ia gõi. (Luk. 23, 43). 

5 Da’õ mbõrõ wa usuno ndra’o, ba na ba khõgu, ba lõ edõnado usunodo, ha ba wa’ambõ wa’abõlõgu andrõ. (F. 11, 30). 

6 Na edõnado sa usuno ndra’o, ba tenga nifolau zambõ tõdõ wolaugu, me si duhu niŵa’õgu; ba utaha dõdõgu, fa lõ iwai niha, ha niha ia, ebua ndra’o, moroi ba ni’ilania khõgu, ba moroi ba nirongonia. (F. 10, 8). 

7 Ba ena’õ bõi fayaŵa ndra’o, ba nifa’ele’õ andrõ khõgu, me no ebua, ba no mutaru’õ khõgu zuzumõ ba nõsi, mala’ika Zatana, ena’õ igukhugukhui ndra’o, fa bõi fayaŵa ndra’odo. (Yob. 2, 7. Gal. 4, 14).

8 Ba no medõlu mangandrõdo khõ Zo’aya, ena’õ aheta ia khõgu. (Mat. 26, 44). 

9 Ba no iŵa’õ khõgu: Ya’abõnõ khõu wa’ebua dõdõgu khõu, a’oi sa so wa’abõlõ andrõ khõgu ba wa lõ abõlõ. Andrõ wa abõlõ omasido, ba wa lõ abõlõdo andrõ usuno ndra’o, ena’õ abono khõgu wa’abõlõ Keriso andrõ. (Fil. 4, 13. Yes. 40, 29 b. t.).

10 Andrõ omasi ndra’o wa lõ abõlõ ba famakao ba fa’afõkhõ ba folohi ba fa’atosasa, na bõrõ Keriso. Na sambõ fa’abõlõ ndra’o, awena abõlõdo. (F. 6, 10).

11 II. Noa sa tobali sambõ era’era ndra’o; noa sa miforege khõgu. Ya’ami sa zanuno ya’o ena’õ, ma’ifu sa lõ ide’ide ndra’o, moroi ba zinenge andrõ, si no alua yaŵa, he ŵa’ae no si lõ boto ndra’odo. (F. 11, 1. 5. 16). 

12 Tandra, si nangea tandra khõ zinenge, ba no mufalua ba khõmi, no a’oi so wa’anau gõlõ ba dandra ba ba gila’ila ba ba wa’abõlõ. (F. 6, 4—6. Rom. 15, 19). 

13 Hadia sa ni’ambõsi ami, moroi ha mbanua bõ’õ andrõ, baero wa lõ nifonorogu tõdõmi? Mibologõ dõdõmi khõgu, ba zalagu andrõ. (F. 11, 7—11). 

14 Hiza, no ufuli ufa’anõdo, ba we’amõi khõmi, no medõlu, mõi da’e, ba lõ dania ufonoro dõdõmi. Tenga sa nibayabayami ni’aluigu, ha ya’ami u’alui. Tenga sa iraono zangalui ana’a khõ ndra amara, ama zangalui ana’a ba ndraono. (F. 13, 1. Hal. zin. 20, 33). 

15 Ba omasido mangahakhõ, ba he ya’odo na i nibe’e salahi nosomi; na no fahõna wa’omasigu ami, ba hadia, ba la’ambõsi wangomasi’õ ya’o? (Tes. I. 2, 8). 

16 Ba ya’ia ya’õ; lõ nifonorogu tõdõmi, ba me no onekhe ndra’o, ba no ufa’u’u ami fa’onekhe andrõ. 

17 Hadia, no u’alani ami, ba nifatengegu khõmi andrõ, ha niha ia? 

18 No u’andrõ khõ Dito andrõ, ba no ufatenge awõnia dalifusõ andrõ; hadia, no i’alani ami Tito andrõ? Hadia, lõ ha sara dõdõma, wanõrõ lala khõma? Hadia, lõ faoma matara lahe nawõma? (F. 8, 16—18. Kor. I. 16, 10). 

19 I’otarai fõna sa’ae, miŵa’õ tõdõmi, mabu’a ba huluma, ba khõmi andrõ; fõna Lowalangi muhede ndra’aga, ba khõ Keriso. Ba fefu hadia ia da’õ, ya’ami ni’omasi’õ, ba ba wanga’azõkhi ya’ami. (F. 3, 1; 11, 16 b. t.). 

20 Ata’udo sa, na sodo, ba ma tenga somasi ndra’o u’ila ba khõmi, ba ya’ami gõi, ba ma tenga somasi ami, mi’ila khõgu; ma so waguaguasa, ba ma fa’afõkhõ dõdõ, ba ma fõnu, ba ma fasosota, ba ma famõbõgõ si lõ duhu, ba ma fangõngõngõngõsa, ba ma fayaŵasa, ba ma famakuyu; (Kor. I. 1, 11. Gal. 5, 19 b. t.); 

21 ba ma ihõndrõgõ ndra’o Lowalangigu, ba khõmi andrõ, na ufuli mõi khõmi, ba abu dõdõgu ba zato andrõ, si no mamazõkhi horõ, fõna, ba si lõ abu tõdõ ba zi lõ sõkhi andrõ ba ba wohorõ ba ba hokha andrõ, nitõrõra. (Kor. I. 6, 15 b. t.).

 

KORINDRO II.

FAZA 13

 

I.                  Famarou tõdõ, ena’õ lafuli lahaogõ; II. ena’õ lasekhegõ dõdõra. III. Fango’ozui; fangowai.

 

1 I. Ufuli mõi khõmi, medõlu, mõi da’e. Ba niŵa’õ zi darua, ba ma si datõlu, si so ba mbõrõ, ahono dania fefu hadia ia. (F. 12, 14. Mat. 18, 16. Moz. V. 19, 15. Tim. I. 5, 19). 

2 No uhõnagõ uŵa’õ ba ufuli uhõnagõ uŵa’õ, hulõ no so ndra’o, zamuza tõ, he ŵa’ae lõ ya’o iada’e, ba zi no mamazõkhi horõ, fõna, ba ba dánõ bõ’õ fefu, wa lõ u’ila wa’ahakhõ dõdõ, na mõido zamusa tõ. (Kor. I. 5, 3. Kor. II. 1, 23; 12, 21). 

3 Me mi’alualui dandra, wa Keriso zihede ba wehedegu andrõ; Keriso si lõ ambõ fa’abõlõ, ba khõmi andrõ, si no abõlõ ba khõmi. (Rom. 15, 18. Mat. 10, 20).

4 Noa sa muforõfa ia, ba wa lõ abõlõ, ba no auri ia, ba wa’abõlõ Lowalangi. Ya’aga sa gõi, ba no sambõ fa’abõlõ, ba khõnia andrõ, ba auri ndra’aga dania, awõnia, ba wa’abõlõ Lowalangi, ba khõmi andrõ. (Rom. 6, 9. 10. Heb. 2, 9).

5 II. Misekhegõ dõdõmi, na samati ami, mitandraigõ ami; ma lõ aboto ba dõdõmi ami, wa no so ba dõdõmi Keriso Yesu? Atõ no si lõ faduhu dõdõda ami. (Kor. I. 11, 28. Rom. 8, 9. 10. Gal. 2, 20). 

6 Ba udõnadõna, aboto ba dõdõmi dania, wa tenga si lõ faduhu dõdõda ndra’aga. 

7 Ba mangandrõ ndra’aga ba Lowalangi, ena’õ lõ milau hadia ia zi lõ atulõ; tenga sa ena’õ laŵa’õ, niha si faduhu dõdõ niha bõ’õ ndra’aga, ena’õ si sõkhi milau, ba ena’õ hulõ zi lõ faduhu dõdõ niha ndra’aga. 

8 Tebai sa masawõ zi duhu, ha ba zi duhu ma’ila matolo. 

9 Ebua sa dõdõma, na sambõ fa’abõlõ ndra’aga, ba na sabõlõ ami; ba da’õ ni’andrõma, ena’õ mo’ahonoa ami. (Heb. 13, 21).

10 Andrõ usura khõmi da’õ, me lõ ya’o, ena’õ alakha lõ u’abe’e’õ, na sodo, ena’õ alakha lõ ube’e dali wa’abe’e andrõ, nitehe Zo’aya khõgu, ba wanga’azõkhi, ba tenga ba wanudugõ. (F. 2, 3; 10, 8).

11 III. Ba baero õ, ya’ami ira talifusõ, ba mi’omusoi’õ dõdõmi, mibe’e nihaogõ ami, mifondrondrongo wamarou tõdõmi, ya ha sara dõdõmi, ya’atulõ ami ba nawõmi ba itolo ami Lowalangi wa’omasi andrõ, Lowalangi wa’atulõ. (Fil. 4, 4. Kor. I. 14, 20. Rom. 12, 16. 18; 15, 33).

12 Faoma mi’owai nawõmi fa’agosa bawa ni’amoni’õ andrõ. La’owai ami ni’amoni’õ andrõ fefu. (Kor. I. 16, 20. Tes. I. 5, 26). 

13 Yafalukha ami fefu wa’ebua dõdõ Zo’aya ya’ita, Yesu Keriso ba fa’omasi Lowalangi ba fa’awõsa Geheha ni’amoni’õ! (Gal. 6, 18. Rom. 5, 5).