SURA KORINDO I

Table of Contents

 

SURA KORINDO I

 

KORINDRO I.

FAZA 1

 

I.                  Fangowai Waulo. II. I’andrõ saoha gõlõ khõ Lowalangi, me no i’ebua’õ dõdõnia ba mbanua Gorindro andrõ. III. Ifangelama ira; bõi fabali dõdõ ba bõi laŵa’õ tõdõra satuatua ira.

 

1 I. Faulo zanura da’e, nikaoni sinenge Keriso Yesu, moroi ba nilau dõdõ Lowalangi, ba Sotene, talifusõ andrõ, (Kol. 1, 1. Hal. zin. 18, 17), 

2 ba mbanua Lowalangi andrõ ba Gorindro, nihaogõ ba khõ Keriso Yesu, ni’amoni’õ, nikaoni, fabaya fefu zangarõfi li tõi Zo’aya ya’ita, Yesu Keriso, fefu gofu heza, he ba khõra, ba he ba khõma. (Hal. zin. 18, 1 b. t. Yoh. 17, 19. Rom. 1, 7).

3 Yafalukha ami wa’ebua dõdõ ba fa’ohahau dõdõ khõ Namada Lowalangi, ba khõ Zo’aya, Yesu Keriso. (Efes. 1, 2).

4 II. Lõ mamalõmalõ u’andrõ saoha gõlõ khõ Lowalangigu, ba khõmi andrõ, ba wa’ebua dõdõ Lowalangi andrõ, si no falukha ami, ba khõ Keriso Yesu, (Rom. 1, 8. 9), 

5 me no fahõna khõmi fefu hadia ia, ba khõnia andrõ, he ba ngawalõ huhuo, ba he ba ngawalõ wa’aboto ba dõdõ fefu. (Kol. 1, 9. 10), 

6 wa no mu’a’aro’õ ba dõdõmi wamaduhu’õ Keriso andrõ. 

7 Tobali lõ ambõ ami buala fa’ebua dõdõ andrõ fefu, hadia ia, ba sombalombaloi fa’ato’ele Zo’aya ya’ita, Yesu Keriso, ami, (Tit. 2, 13), 

8 sangabe’e’õ gõi ya’ami, irugi gamozua, fa lõ sinegu, na baŵa Zo’aya ya’ita, Yesu Keriso. (Fil. 1, 6. 10. 11. Tes. I. 5, 23. 24).

9 Lõ farõi Lowalangi, si no mamakaoni’õ ya’ami ba wefao khõ Nononia Yesu Keriso, So’aya ya’ita, (F. I. 10, 13; Tim. II. 1, 9; Yoh. 6, 44).

10 III. Ba u’andrõ khõmi, ya’ami ira talifusõ, moroi ba dõi Zo’aya ya’ita andrõ, Yesu Keriso, ena’õ ha sara limi fefu, ba ena’õ lõ falukha ba khõmi fabali dõdõ; mi’atulõ’õ, mi’osara’õ gera’erami ba tõdõmi. (F. 11, 18. Rom. 15, 5. Fil. 2, 1. 2). 

11 Noa sa mu’ombakha’õ khõgu, ba khõmi andrõ, ya’ami ira talifusõgu, si so yomo khõ Kheloë andrõ zangombakha, no so waguagusa ba khõmi. (F. 3, 3 b. t.). 

12 Da’õ niŵa’õgu, me iŵa’õ si samõsa ba khõmi: Khõ Waulo ndra’o, ba si samõsa, ba: Khõ Afolo ndra’o, ba si samõsa, ba: Khõ Gefa ndra’o, ba si samõsa, ba: Khõ Keriso ndra’o. (Hal. zin. 18, 24. Yoh. 1, 43). 

13 Hadia, no fabali Keriso? Hadia, Faulo niforõfa salahimi? ba ma ba dõi Waulo tebayagõ idanõ ami mege? 

14 Usuno Lowalangi, me samõsa lõ nibayagõgu idanõ ba khõmi, baero Gerifo ba Gayo andrõ, (Hal. zin. 18, 8. Rom. 16, 23), 

15 fa bõi laŵa’õ, no ba dõigu ubayagõ idanõ niha. 

16 Ba noa sa gõi ubayagõ idanõ zi samba omo ndra Sefana, baero õ, ba lõ u’ila, na so niha bõ’õ nibayagõgu idanõ. (F. 16, 15. 17). 

17 Tenga sa ba wamayagõ idanõ ifatenge ndra’o Keriso, no ba wangombakha turia somuso dõdõ ifatenge ndra’o, tenga fa’onekhe ba huhuo, fa bõi tobali faya rõfa Keriso andrõ. (F. 2, 1 b. t.). 

18 Turia rõfa andrõ, ba faya sa ba niha si tetibo, ba ba khõda, ni’orifi, ba no fa’abõlõ Lowalangi ia. (F. 1, 23. 24. Rom. 1, 16). 

19 Noa sa so ba zura: ”Ufakiko dania wa’atuatua zatuatua andrõ ba fa’aboto ba dõdõ ba zaboto ba dõdõ andrõ, ba utayaigõ.” (Yes. 29, 14. Yob. 5, 12).

20 Hezo zatutua? hezo zonekhe ba wasosota andrõ, ba gõtõ danõ andre. Hadia, tenga no ibali’õ faya wa’atuatua ba guli danõ andre Lowalangi? (F. 3, 19. Yes. 19, 12). 

21 Me no lõ’õ sa aboto ba dõdõ niha guli danõ Lowalangi, ba wa’atuatuania andrõ, ba wa’atuatuara, ba no omasi Lowalangi i’orifi zamati andrõ, faya andrõ, fangombakha. (Mat. 11, 25). 

22 La’andrõ sa dandra niha Yehuda ba la’alui wa’atuatua Dawa Heleni, (Mat. 12, 38. Hal. zin. 17, 18. 32),

23 ba ya’aga, ba maturiagõ Keriso, niforõfa andrõ, si fatuwu ba niha Yehuda, ba si no faya ba dõdõ niha baero, (F. 2, 2. 14. Rom. 9, 32 b. t.), 

24 ba ba nikaoni andrõ, he niha Yehuda, ba he Dawa Heleni, ba no Keriso, fa’abõlõ Lowalangi ba fa’atuatua Lowalangi ia. (F. 1, 18; 2, 5. Kol. 2, 3). 

25 Fayafaya andrõ sa, soroi Lowalangi, ba no atuatua moroi ba niha, ba si lõ abõlõ andrõ, soroi Lowalangi, ba no abõlõ moroi ba niha. 

26 Mifaigi sa’ae wogaoni ya’ami andrõ, ya’ami ira talifusõ, lõ ato zatuatua, na dali wa’atuatua niha, lõ ato zabõlõ, lõ ato zalaŵa. (Yoh. 7, 48. 49). 

27 Hadia ia zi no fayafaya, wamaigi niha guli danõ, da’õ nitutuyu Lowalangi, ena’õ i’ailasi zatuatua andrõ, ba hadia zi lõ abõlõ, wamaigi niha guli danõ, da’õ nitutuyu Lowalangi, ena’õ i’ailasi zabõlõ andrõ. (Yak. 2, 1—5). 

28 Ba ha niha zi tenga salaŵa, wamaigi niha guli danõ, ba hadia ni’ositengagõ, da’õ nitutuyu Lowalangi, hadia zi lõ’õ andrõ, ena’õ lõ moguna zi so, ibe’e, (Gal. 6, 3),

29 ena’õ lõ isuno ia niha, ha niha ia, fõna Lowalangi. (Efes. 2, 6. Yes. 40, 6). 

30 Ba khõnia mi’oroi, ya’ami andrõ, ba khõ Keriso Yesu, nibali’õ Lowalangi fa’atuatua khõda ba fa’atulõ dõdõ ba fangohauhau ba fangõhõli, (Yer. 1, 24. Yer. 23, 6. Kor. II. 5, 21. Heb. 2, 11. Rom. 3, 24. Efes. 1, 7), 

31 ena’õ itõrõ zi so ba zura: ”Na so zanuno ya’ia, ba ba khõ Zo’aya yamusuno ia”. (Yer. 9, 23. 24. Kor. II. 10, 17).

 

KORINDRO I.

FAZA 2

 

Tenga fa’atuatua niha guli danõ ni’ombakha’õ Waulo, lõ fa’onekhe ba huhuo andrõ khõnia, ha fa’atuatua Lowalangi, huhuo si oroi ba Geheha.

 

1  Ba ya’odo gõi, me mõido khõmi, ya’ami ira talifusõ, ba tenga fa’abõlõ ba huhuo ni’ohegu, ba tenga fa’abõlõ wa’atuatua, wanuriagõ khõmi famaduhu’õ Lowalangi andrõ. (F. 1, 17. Yoh. I. 5, 9). 

2 Lõ’õ sa niŵa’õgu tõdõgu, so hadia ia ni’ilagu ba khõmi andrõ, baero Yesu Keriso, noforõfa andrõ, (F. 15, 3. Gal. 6, 14). 

3 Ba ya’o, ba si lõ abõlõ ba sata’u ba salaŵõlaŵõ sibai, ba khõmi andrõ. (Hal. zin. 18, 9. Kor. II. 10, 10; 11, 30). 

4 Ba fehedegu ba fangombakha’õgu, ba tenga huhuo zatuatua, si faduhu dõdõ niha, ha fangoroma’õ Eheha ba fa’abõlõ, (Tes. I. 1, 5), 

5 fa bõi fa’atuatua niha dandrõsa wamatimi, ena’õ fa’abõlõ Lowalangi dandrõsania. (F. 1, 18. 24). 

6 Fa’atuatua sa wehedema ba zi no mo’ahonoa, ba tenga fa’atuatua niha guli danõ andre, tenga gõi fa’atuatua zalaŵa ba guli danõ andre, si tetibo dania. 

7 Fa’atuatua Lowalangi wehedema, si no tobini, si no tobalu, nihonogõi Lowalangi, gõtõgõtõ wa’ara sa’ae, ba wamolakhõmi ya’ita. (Sin. 51, 8. Efes. 3, 8. 9). 

8 Si lõ irai aboto ba dõdõ zalaŵa ba guli danõ andre, ha niha ia gõi: na no aboto ba dõdõra sa, ba lõ laforõfa mena’õ zalaŵa lakhõmi andrõ; (Hal. zin. 13, 27; 3, 17). 

9 Si mane si so ba zura sa: ”Si lõ irai i’ila hõrõ niha, si lõ irai irongo tõgi dalinga niha, si lõ irai mõi ba dõdõ niha, ni’asiwai Lowalangi ba zangomasi’õ ya’ia.” (Yes. 64, 4). 

10 Ba khõda no ifa’ele’õ Lowalangi, balazi Gehehania; fefu hadia ia sa, ba i’alualui Eheha, irege wa’abakha Lowalangi andrõ. (Yoh. 16, 13. Dan. 2, 23). 

11 Ha niha sa zangila hadia ba dõdõ niha, baero geheha niha andrõ, si so ba dõdõnia? Si manõ gõi wa lõ saboto ba dõdõ hadia zi so ba dõdõ Lowalangi, baero Geheha Lowalangi andrõ. 

12 Ba ya’ita, ba tenga eheha ba guli danõ andre nitemada, no Eheha si otarai Lowalangi nitemada, ena’õ ta’ila, hadia nibe’e Lowalangi bualania khõda. (Rom. 8, 15. Fet. II. 1, 3). 

13 Ba da’õ gõi wehedema, tenga taroma li nisõndra ba niha, fa’atuatua niha; no taroma li nisõndra khõ Geheha, soroi ba Geheha tefaedogõ ba zoroi ba Geheha. (F. 2, 1. 4; Fet. II. 1, 21). 

14 Na to’ua tõdõ niha, ba lõ i’o’õ hadia zi otarai khõ Geheha Lowalangi, noa sa fayafaya khõnia, ba tebai aboto ba dõdõ, me moroi ba Geheha ena’õ wangalui eluahania. (F. 1, 23; Mat. 16, 17; Yud. 19; Yoh. 14, 17). 

15 Ba si so Eheha, ba isõndra geluaha hadia ia fefu, ba ya’iá, ba si lõ aboto ba dõdõ niha bõ’õ. (Yoh. I. 2, 20). 

16 Ha niha sa, zi no aboto ba dõdõ era’era Zo’aya, ha niha zamahaõ ya’ia? Ba ya’ita, ba no era’era Keriso gera’erada. (Yes. 40, 13; Yer. 23, 18).

 

KORINDRO I.

FAZA 3

 

I.                  Itegu Faulo, me no fabali dõdõ mbanua Gorindro andrõ. II. Enoni Lowalangi zamahaõ andrõ, sanolo ba halõŵõ khõnia, ba isofu hõra dania, he wisa wohalõŵõra. III. Bõi laŵa’õ tõdõra, no atuatua ira.

 

1 I. Ba ya’o, ba tebai fahuhuodo khõmi si mane ba zi so Eheha, ya’ami ira talifusõ, si mane ba zi ha zambalõ õsi niha huhuogu khõmi, si mane ba ndraono sawuyu, ba khõ Keriso. (F. 2, 15; Yoh. 16, 12). 

2 Susu nifabadugõgu khõmi, tenga õ sabe’e; me tebai mitaha na, ba iada’e gõi, ba tebai zui mitaha; (Heb. 5, 12 b. t.; Fet. I. 2, 2); 

3 solo’õ õsi niha na sa ami. Na so na wa’afõkhõ dõdõ ba faguaguasa ba khõmi, ba tenga solo’õ õsi niha ami, ba tenga huku ba niha dali mbuabuami? (F. 1, 10. 11; Gal. 5, 19. 20; Yak. 3, 14—16).

4 Na iŵa’õ si samõsa: Khõ Waulo ndra’odo, ba si samõsa, ba: Khõ Afolo ndra’odo, ba tenga huku ba niha mi’o’õ? (F. 1, 12).

5 II. Hadia sa Afolo andrõ? Ba hadia Waulo andrõ? Enoni ira, si no mama’ema famati andrõ khõmi, balazi nitema zamõsana khõ Zo’aya. (F. 4, 1). 

6 Ya’o zananõ, Afolo zombuwui, ba Lowalangi zamanõi. (F. 12, 11. Hal. zin. 18, 27; 19, 1). 

7 Tobali faya zananõ, ba faya zombuwui, ha Lowalangi, samanõi, zi ndruhu. 

8 Ba sananõ ba sombuwui, ba ha sambua, ba itema sa luonia zamõsana, balazi halõŵõnia. (F. 4, 5; Sin. 62, 13). 

9 Sanolo sa ndra’aga, ba halõŵõ, khõ Lowalangi; nowi Lowalangi ami, tomosa khõ Lowalangi. (Kor. II. 6, 1. 16. Mat. 25, 14).

10 No ufotoyo, si mane sotomo, si no atuatua, dali wa’ebua dõdõ Lowalangi andrõ, si no falukha ndra’o; tánõ bõ’õ zamedadao. Ba yamufaigi zamõsana, he wisa wotomonia. (F. 15, 10. Rom. 15, 20). 

11 Toyo bõ’õ ba lõ’õ sa i’ila ibe’e tou niha, ha niha la gõi, baero zi no mube’e, Yesu Keriso andrõ. (F. 16, 22. Fet. I. 2, 4. 6). 

12 Ba na so zangotomosi ba dete doyo andrõ, ma balaki, ba ma firõ, ba ma manimani, ba ma eu, ba ma du’u sokõli, ba ma tõla wakhe, 

13 ba oroma dania halõŵõ zamõsana, i’oroma’õ sa dania baŵa andrõ, me ba galitõ tefa’ele’õ dania, ba he wisa halõŵõ zamõsana, ba alitõ wanandraigõ. 

14 Na manaha nifazõkhinia, ni’otomosinia, ba itema luo. 

15 Ba na akhozi nifazõkhinia, ba te’ala ia, ba ya’ia, ba ni’orifi, ba hulõ nifatõrõ ba galitõ. (Yud. 23). 

16 Hadia, lõ mi’ila, wa no osali Lowalangi ami, awõ wa no nahia Geheha Lowalangi dõdõmi? (F. 6, 19. Rom. 8, 9).

17 Na so zamakiko osali Lowalangi andrõ, ba nifakiko Lowalangi dania da’õ: ni’amoni’õ sa gosali Lowalangi andrõ, ba ya’ami da’õ.

18 III. Bõi yamufaelungu ia nihá. Na so ba khõmi, ba guli danõ andre, zanguma’õ tõdõnia, satuatua ia, ba yatobali sambõ era’era, ena’õ tobali satuatua ia. (Amaed. 3, 5. 7. Rom. 12, 16. F. 4, 10). 

19 Fa’atuatua niha guli danõ andre sa, ba no fa’ambõ era’era ba khõ Lowalangi. Si mané sa ba zura: ”Sondra’u satuatua andrõ, ba wa’onekhera.” (F. 1, 20; Rom. 1, 22. Yob. 5, 13). 

20 Ba so zui, ba : ”I’ila So’aya gera’era zatuatua andrõ, wa faya.” (Sin. 94, 11). 

21 Andrõ bõi yamusuno ia niha, ha niha ia; a’oi sa khõmi manõ, (F. 1, 31. Yer. 17, 5), 

22 he Faulo ba he Afolo ba he Kefa ba he uli danõ ba he fa’auri ba he fa’amate ba he gõtõ da’e ba he gõtõ dania, oi khõmi manõ, (F. 3, 4. Rom. 8, 28. 38. 39), 

23 ba ya’ami, ba khõ Keriso, ba Keriso, ba khõ Lowalangi.

 

 

KORINDRO I.

FAZA 4

 

I.                  Halõŵõ zinenge andrõ. II. Famakaora ba he wisa ira ba da’õ. III. Famarou tõdõ.

 

1 I. Dao ndramuŵa’õ tõdõra, dozi, ba khõma andre, enoni Keriso ndra’aga, samatõrõ si tobini andrõ, khõ Lowalangi. (F. 3, 5; Kor. II. 4, 5. Kol. 1, 25. 26). 

2 Ba ba zamatõrõ andrõ, ba da’õ sa nifaigi ba khõra, ena’õ lõ falimo zamõsana. (Luk. 12, 42; Fet. I. 4, 10). 

3 Lõ’õ sa ba dõdõgu, na tehuku ndra’o khõmi, ba ma ba rafe niha bõ’õ, lõ’õ sa gõi uhuku ndra’odo. 

4 Ba he sa lõ ni’ilagu hadia ia, ba tenga na sa bõrõ da’õ, wa laŵa’õ ena’õ satulõ ndra’o. Ba So’aya zanguhuku ya’o. (Kor. II. 1, 12; 5, 10. 11; Sin. 19, 13; 143, 2). 

5 Andrõ bõi mi’etu’õ huku, hadia ia, na tenga inõtõ na, irege so Zo’aya, sohagaini gõi si no tobini ba zogõmigõmi, sama’ele’õ sõndra dõdõ andrõ, ba awena dania tesuno zamõsana khõ Lowalangi. (Rom. 2, 16. Sangomb. 12, 14. Kor. II. 10, 18). 

6 Khõgu ba khõ Afolo no ubõbõgõ da’õ, ya’ami ira talifusõ, bõrõ ami, ena’õ mitõngõni khõma, fa bõi fayaŵa ami, fa bõi italu’i zi so ba zura, fa lõ ifahokha zamõsana, ba wangebua’õ ba zi samõsa ba ba wangambõzi zi samõsa. (Rom. 12, 3). 

7 Ha niha sa zamaehusi ya’ugõ? Hadia khõu, si lõ mube’e khõu? Ba na nibe’e khõu, ba hadia wa õsuno ndra’ugõ, hulõ tenga nibe’e khõu? (Yak. 1, 17).

8 No abuso ami, no fahõna khõmi, no samatõrõ ami, ba zi lõ ya’aga! Ena’õ na duhu wa no samatõrõ ami, fa samatõrõ gõi ndra’aga, awõmi! (Fam. 3, 17).

9 II. Ba dõdõgu sa, ba no oroma wa no fondrege zide’ide ndra’aga, ya’aga sinenge, ibe’e Lowalangi, hulõ zi no mu’etu’õ huku famunu, me no tobali maimai ndra’aga ba nõsi guli danõ, ba mala’ika ba ba niha. (Kor. II. 4, 11. Heb. 10, 32. 33). 

10 Sambõ tõdõ ndra’aga, bõrõ Keriso, ba ya’ami, ba no satuatua, ba khõ Keriso; si lõ abõlõ ndra’aga, ba ya’ami, ba sabõlõ; nifosumange ami, ba ni’ositengagõ ndra’aga. (F. 1, 18 b. t; 3, 18). 

11 Irugi ma’õkhṍ andre, ba solofo ndra’aga ba sowõkhi tõdõ, no sambõ nukha, ba no nibõzibõzi ndra’aga, ba lõ nahama, sahono ndra’aga, (Kor. II. 11, 23—27), 

12 ba ma’eregeisi dõdõma, mohalõhalõŵõ dangama; latandraŵaisi ndra’aga, ba mafahowu’õ ira, lagohi ndra’aga, ba mataha dõdõma; (F. 9, 15. Hal. zin. 18, 3. Rom. 12, 14. Mat. 5, 44);

13 labõbõgõ khõma zi lõ sõkhi, ba mangandrõ ndra’aga; no tobali hulõ zasao ba guli danõ ndra’aga, hulõ ndra’i, ba niha fefu, irugi da’e. (Hal. zin. 22, 22).

14 III. Tenga ba wangailasi ya’ami usura da’õ, ha ba wamarou tõdõmi, si mane iraonogu, somasi ndra’o. (Tes. I. 2, 11 b. t.). 

15 He sa fulu ngahõnõ khõmi mandru, ba khõ Keriso, ba lõ ato nama khõmi. Ba khõ Keriso Yesu sa no mo’onodo ya’ami, moroi ba duria somuso dõdõ andrõ. (Gal. 4, 19. Filem. 10). 

16 Andrõ u’andrõ khõmi, mihalõ famaedo khõmi ndra’odo. (F. 11, 1). 

17 Da’õ mbõro, wa no ufatenge khõmi Dimoteo andrõ, onogu andrõ, ba khõ Zo’aya, somasi ndra’o, si lõ farõi, da’õ dania zamasugi ba dõdõmi lala andrõ khõgu, ba khõ Keriso Yesu, si mane famahaõgu fefu gofu heza, ba mbanua fefu. (F. 16, 10. Tim. I. 1, 2. Tim. II. 1, 5). 

18 Ba no mohokha õsa, hulõ na lõ mõido khõmi. 

19 Ba lõ ara tõ, ba mõido khõmi, na itolo Lowalangi, ba tenga li zohokha andrõ dania usofu, ha fa’abõlõra. (F. 16, 5. 6. Yak. 4, 15). 

20 Tenga sa li dayadaya mbanua Lowalangi andrõ, no fa’abõlõ dayadayania. (F. 2, 4. Luk. 17, 21). 

21 Hadia zomasi ami, hadia, ue u’ohe, na mõido khõmi, ba ma fa’omasi ba Eheha wa’ebolo dõdõ andrõ? (Kor. II. 13, 10).

 

KORINDRO I.

FAZA 5

 

I.                  Itegu ira Faulo, me no tõra wa’ebolo dõdõra ba zohorõ. II. Bõi orudu ira ba zamazõkhi horõ.

 

1 I. Fohorõ ba khõmi zabõlõ teturia, ba fohorõ si lõ’õ na i murongo ba niha baero, wa ihalõ ndronga namania niha. (F. 6, 15 b. t. Tes. I. 4, 3—5. Moz. III. 18, 7. 8). 

2 Ba sohokha ami, ba lõ’õ sa abu dõdõmi, fa tetibo ena’õ banuami zolau da’õ. (F. 4, 6 b. t.). 

3 Ba ya’odo andre, ba si ndruhu sa, lõ ya’o, botogu andre, ba sodo sa tõdõgu, noa sa uhuku, hulõ na no so ndra’o, ba zamazõkhi da’õ, si manõ, (Kol. 2, 5), 

4 na no falukha ita ba dõi Zo’aya ya’ita, Yesu, ya’ami ba tõdõgu andre, ba na fao wa’abõlõ Zo’aya yaita, Yesu; (Mat. 16, 19; 18, 18. 20);

5 ba nibe’e ba danga Zatana zi manõ, ba wamakiko õsinia, ena’õ auri mbekhu, na baŵa Zo’aya ya’ita Yesu. (Tim. I. 1, 20. Kor. II. 2, 6 b. t.).

6 II. Tenga si sõkhi duriami andrõ. Hadia, lõ mi’ila, wa aisõ nifaruka ma’afefu ibe’e tanõmõ roti si ha ma’ifu? (Gal. 5, 9). 

7 Mitibo’õ danõmõ si no ara andrõ, ena’õ si bohou mufaruka ami; noa sa si lõ mu’aisõni ami, noa sa mutaba wasa khõda gõi, Keriso. (Moz. II. 12, 15. 19. Fet. I. 1, 18. 19). 

8 Ba datalu gowasa fasa, bõi fao danõmõ roti si no ara, ba bõi gõi fao danõmõ roti andrõ, falõsõkhi ba fa’asilõyaŵa, ha si lõ mao’aisõni andrõ, fa’adõlõ dõdõ ba fa’aduhu, nifao. 

9 No usura khõmi ba zura no andrõ, bõi fabaya ami ba zohorõ. 

10 Tenga sohorõ manõ, ba niha guli danõ, niŵa’õgu, ba somasi ana’a ba sorabu ba samosumange adu, na si manõ ena’õ, ba lõ tola lõ miheta manõ sa’ae ami ba guli danõ andre ena’õ. (Yoh. I. 5, 19). 

11 Ba no usura khõmi, bõi fabaya ami, na so zanguma’õ, talifusõ ia, ba na sohorõ ia, ba ma somasi ana’a, ba ma samosumange adu, ba ma sanandraŵaisi awõnia, ba ma si mabumabu, ba ma sorabu; na so zi manõ, ba bõi na i orudu manga ami khõnia. (F. 6, 9. 10. Mat. 18, 17). 

12 Hadia sa wa uhalõ khõgu wanguhuku si so baero andrõ? Hadia, tenga ya’ami zanguhuku si te’u’u khõmi? (Kol. 4, 5). 

13 Lowalangi dania zanguhuku si so baero andrõ. Mibe’e baero zi lõ sõkhi, miheta ba khõmi. (Tes. II. 3, 6).

 

KORINDRO I.

FAZA 6

 

I.                  Itegu Faulo, me mangadu ira ba zanguhuku si tenga niha Keriso. II. Ifangelama ira ba wohorõ.

 

1 I. Hadia, so ba khõmi zi lõ ata’u, na so hadia ia nifadõninia khõ naŵonia, ifahuku’õ ba niha si lõ atulõ, ba tenga ba ni’amoni’õ? (Mat. 5, 40). 

2 Ma lõ mi’ila, wa sangohuku niha guli danõ dania ni’amoni’õ andrõ? Ba na sanguhuku niha guli danõ ami, ba hadia, lõ tolo mihuku ngawalõ hadia ia, zide’ide sibai? (Dan. 7, 22. Mat. 19, 28). 

3 Hadia, lõ mi’ila, wa sanguhuku mala’ika dania ita? ba tenga mendrua manõ tola ba mbalazo? (Fet. II. 2, 4). 

4 Ba na so nifadõni balazo, ba hadia, mifataro sanguhuku ni’ositengagõ mbanua niha Keriso? 

5 Ba wangailasi ya’ami uŵa’õ da’õ; Hadia: tobali samõsa lõ satuatua ba khõmi, sangila manguhuku hadia ia ba zi fatalifusõ? 

6 Hadia, i’adugõ dalifusõnia sotalifusõ, ba ba zi tenga samati na i? 

7 Noa sa’ae sala sibai ami, me so wamadõnimi khõ nawõmi. Hana wa lõ mitaha manõ dõdõmi, na lafatõrõ khõmi zi lõ atulõ? Hana wa lõ mitaha, na la’alani ami? (Mat. 5, 39 b. t.). 

8 Ba ya’ami zamatõrõ si lõ atulõ, ba mi’alani nawõmi, ba talifusõ na i. (Tes. I. 4, 6). 

9 Ma lõ mi’ila, wa tebai tefa’amõi ba mbanua Lowalangi zi lõ atulõ? Bõi elungu ami, he sohorõ, ba he samosumange adu, ba he sohorõni donga zodonga, ba he sombuyutõ, ba he sohorõni ira matua, (Gal. 5, 19 b. t. Efes. 5, 5. Fam. 21, 8; 22, 15), 

10 ba he sanagõ, ba he somasi ana’a, ba he si mabumabu, ba he sanandraŵaisi awõnia, ba he sorabu, ba tebai tefa’amõi ba mbanua Lowalangi andrõ.

11 Ba no si manõ õsa ami fõna. Ba no musasai ami, no mu’ohauhau’õ, no atulõ ami, iŵa’õ Lowalangi, moroi ba dõi Yesu Keriso, So’aya, ba moroi ba Geheha Lowalangida andrõ. (Tit. 3, 3 b. t. Fet. I. 4, 3 b. t. Hal. zin. 22, 16. Fam. 1, 5; 7, 14).

12 II. Fefu hadia ia, ba tola ulau, ba so zi lõ guna. Fefu hadia ia, ba tola ulau, ba lõ utehe i’osawuyu ndra’o hadia ia. (F. 10, 23).

13 Õ andrõ, ba ba mbetu’a nahania, ba betu’a andrõ, ba no naha gõ. Ba faoma iheta dania Lowalangi. Ba boto, ba bõi ba wohorõ, no khõ Zo’aya, ba So’aya, ba ba mboto. (Mat. 15, 17. Tes. I. 4, 3—5). 

14 Ba no isusugi Zo’aya Lowalangi, ba isusugi gõi ita dania fa’abõlõnia andrõ. (F. 15, 15. 20 b. t. Tes. I. 4, 14. Rom. 8, 11). 

15 Hadia, lõ mi’ila, wa no ndrotondroto Keriso mbotomi andrõ? Ba hadia, uhalõ ndrotondroto Keriso, ba ube’e ndrotondroto zohorõ? Bõi si manõ. (F. 12, 27). 

16 Ma lõ mi’ila, wa ha sambua boto ira, na so zorudu ba zohorõ ira alawe? noa sa muŵa’õ, ”ha sambua õsi zi darua andrõ.” (Moz. I. 2, 24). 

17 Ba na so zi olembai So’aya, ba ha sambua Eheha ira. (Yoh. 17, 21. 22). 

18 Mi’angelamaisi wohorõ andrõ. Fefu ngawalõ horõ, nifazõkhi niha, ba baero mboto, ba sohorõ, ba ba mbotonia ifazõkhi horõ. (F. 10, 8. Kor. II. 7, 1). 

19 Ma lõ mi’ila, wa no osali Geheha ni’amoni’õ andrõ, si so ba dõdõmi, nibe’e Lowalangi khõmi, mbotomi andrõ, awõ wa tenga khõmi ami? (F. 3, 16 b. t.). 

20 Noa sa ebua mege hõlimi; ba mifosumange Lowalangi ba mbotomi andrõ. (F. 7. 23. Fet. I. 1, 18. 19).

 

KORINDRO I.

FAZA 7

 

Famobawa lala: I. Ba zi faronga, ba II. ba zi lõ donga, ba III. ba lakha mbanua.

 

1 I. Ba ba nisurami andrõ khõgu, ba sõkhi ba niha, na lõ ibabaya ndra alawe. (F. 7, 25. 26. Mat. 19, 10 b. t.). 

2 Ba ba wohorõ andrõ, ba yamodonga zamõsana, ndra matua, ba si manõ gõi ndra alawe. 

3 Yamutõrõ gõmõnia ba ndra alawe ira matua, ba ya si manõ gõi ndra alawe ba ndra matua. 

4 Tenga samatõrõ botonia ndra alawe, ira matua zamatõrõ, ba si manõ gõi ndra matua, tenga ya’ia zamatõrõ botonia, ira alawe zamatõrõ. 

5 Bõi mifabali ami khõ nawõmi, atö na lõ ara, na ha sara limi, fa lõ mangoloi dõdõmi, ba wangandrõ, ba mifuli zui orudu, fa lõ itandraigõ ami Satana, na tebai mitaha dõdõmi. 

6 Fa utehe khõmi, uŵa’õ da’õ, tenga oroisa. 

7 Omasido sa ena’õ, na si mane ya’o fefu niha; ba no faehu nitema zamõsana, khõ Lowalangi, bõ’õ ba zi samõsa, ba bõ’õ ba zi samõsa. (Mat. 19, 11. 12). 

8 Ba da’õ niŵa’õgu ba zi lõ donga ba ba lakha mbanua: sõkhi khõra, na lõ tebulõ si mane ya’o ira gõi. (F. 9, 5). 

9 Ba na tebai lataha, ba ndramangowalu ba ndramõi nihalõ; sõkhi sa mangowalu, moroi aukhu ira. (Tim. I. 5, 14). 

10 Ba da’õ goroisagu ba zi so donga; tenga na i ya’o zangoroi’õ, So’aya zangoroi’õ: bõi fabali ndra alawe ba ndra matua. (Mar. 10, 9. 12. Mal. 2, 14 b. t.). 

11 Ba na so zi no fabali, ba bõi yamõi nihalõ sa’ae, atṍ na ifuli i’atulõ’õ ia ba ndra matua; ba ira matua gõi, ba bõi yamutibo’õ ndra alawe. (Mal. 5, 32). 

12 Ba da’õ niŵa’õgu ba dánõ bõ’õ, tenga niŵa’õ Zo’aya: Na so dalifusõ, si so ira alawe si tenga samati, ba na edõna ndra alawe sosó khõnia, ba bõi yamutibo’õ. 

13 Ba na so ndra alawe, si so ira matua si tenga samati, ba na edõna ndra matua sosó khõnia, ba bõi yamurõi. 

14 Noa sa mu’amoni’õ ndra matua si tenga samati, ba ndra alawe andrõ, ba ira alawe si tenga samati, ba no mu’amoni’õ, ba ndra matua andrõ. Na tenga si manõ mena’õ, ba no si ra’iõ ndraonomi, ba iya’e, ba no ni’amoni’õ. (Hal. zin. 16, 1. Rom. 11, 16). 

15 Ba na edõna fabali zi tenga samati, ba yawabali ia; lõ mubõbõ dangara ba zi manõ, he talifusõ matua, ba he talifusõ alawe. Ba wa’atulõ sa ikaoni ita Lowalangi. (Kol. 3, 15). 

16 Hana wa õ’ila ya’õ, ya’ugõ ira alawe, õ’orifi dania ndra matua? ba ma ya’ugõ, ira matua, hana wa õ’ila, õ’orifi dania ndra alawe? (Fet. I. 3, 1. 2). 

17 Awai nifaigi: He wisa nibe’e Zo’aya ba zamõsana, he wisa wogaoni Lowalangi zamõsana, da’õ yamutõrõ. Ba si manõ nihonogõigu ba mbanua misa fefu. (F. 7, 7. 20. 24. Efes. 4, 1). 

18 Na so nikaoni si no muboto, ba bõi yamubalugõ. Ba na so nikaoni si lõ muboto, ba bõi yamufaboto’õ ia. (Gal. 5, 2). 

19 Faya wamoto, ba faya na lõ muboto, ha folo’õ oroisa Lowalangi zoguna. (Gal. 5, 6). 

20 He wisa mege zamõsana, me tekaoni ia, ba bõi yamubulõ’õ. 

21 Na sawuyu ndra’ugõ, me tekaoni ndra’ugõ, ba bõi abusi tõdõ; ba he gõi õsõndra lala wangefa’õ ya’ugõ, ba iagõ manõ da’õ. (Tim. I. 6, 1. 2. Kol. 3, 22). 

22 Na so nikaoni ba khõ Zo’aya, sawuyu, ba si no aefa sawuyu ia, khõ Zo’aya. Si manõ gõi na so nikaoni si tenga sawuyu, ba no sawuyu Keriso ia. (Yoh. 8, 36. Efes. 6, 6). 

23 No ebua mege hõlimi, bõi mi’ae sawuyu niha.

24 He wisa zamõsana, me tekaoni ia, ya’ami ira talifusõ, ba bõi yamubulõ’õ ia ba da’õ, khõ Lowalangi.

25 II. Ba ba nono alawe andrõ, ba lõ khõgu oroisa Zo’aya, ba era’eragu manõ u’ombakha’õ, me no falukhado wa’ebua dõdõ Zo’aya, fa lõ mofaya ndra’o. (Kor. II. 8, 10. Tim. I. 1, 13. 16). 

26 Ba da’õ dõdõgu: da’õ zi sõkhi, me no ahatõ wamakao, sohahau dõdõ niha, na si manõ ia. 

27 Na no fabõbõ ndra’ugõ ba ndra alawe, ba bõi alui wangefa’õ ya’ugõ, ba na si lõ donga ndra’ugõ, ba bõi alui ndra alawe. 

28 Ba he mangowalu ndra’ugõ, ba tenga samazõkhi horõ ndra’ugõ. Ba na mõi nihalõ nono alawe, ba tenga samazõkhi horõ ia; ba falukha sa wamakao ba guli danõ zi manõ. Ba ya’o, ba omasido, na si lõ famakao ami. (Tim. I. 4, 1. 3). 

29 Ba da’õ niŵa’õgu, ya’ami ira talifusõ, no fadege, ba iada’e sa’ae, ba ena’õ hulõ zi lõ donga zi so donga; (Luk. 14, 26); 

30 ba sege’ege andrõ, ba ena’õ hulõ zi lõ mege’ege; ba somuso tõdõ andrõ, ba ena’õ hulõ zi lõ omuso tõdõ; ba sowõli andrõ, ba ena’õ hulõ tenga khõra; 

31 ba sangoguna’õ gõtõ danõ andre, ba ena’õ hulõ zi lõ mangoguna’õ ya’ia; ibõrõtaigõ sa tobali danõ’a andre. (Yoh. I. 2, 15—17. Mat. 24, 35). 

32 Ba omasido, na lõ fangabu dõdõ khõmi. Si lõ donga, ba i’abusi tõdõ hadia ia khõ Zo’aya, ena’õ i’omasi’õ ia So’aya. 

33 Ba sangowalu, ba i’abusi tõdõ hadia ia ba guli danõ, ena’õ i’omasi’õ ia ira alawe. (Efes. 5, 29). 

34 Noa gõi faehu ira ndra alawe si no muhalõ nono alawe. Si lõ muhalõ, ba i’abusi tõdõ hadia ia khõ Zo’aya, ena’õ ohauhau ia, he botonia, ba he tõdõnia. Ba si no muhalõ, ba i’abusi tõdõ hadia ia ba guli danõ, ena’õ i’omasi’õ ia ira matua. (Tim. I. 5, 5). 

35 Ba wamobawa lala khõmi, sohare ami, uŵa’õ da’õ, tenga ba wamõbõ tangami, ena’õ moadu ba ena’õ lõ tebulõ ami khõ Zo’aya, ena’õ lõ mangoloi dõdõ. (F. 7, 28). 

36 Ba na so zanguma’õ tõdõnia, lõ moadu khõ nononia alawe, na italu’i ginõtõ wame’e ya’ia; no tobali lõ tola lõ’õ, ba yamutõrõ zomasi ia, tenga samozõkhi horõ ia; ndramõi nihalõ. 

37 Ba na so zabe’e tõdõ, si tenga nilulugõ, si tola molau somasi ia, ba na no ihuku tõdõnia, lõ ibe’e nononia alawe, ba si sõkhi nilau da’õ.

38 Ba tobali, si sõkhi gõi nilau zame’e nihalõ ononia alawe, ba mendrua manõ ilau zi sõkhi si lõ mame’e ya’ia.

39 III. Ira alawe, ba no mubõbõ danga, gõtõ wa’anau noso ndra matua; ba na no mate ndra matua, ba aefa ia, gofu ha niha zangai ya’ia, ba tola mõi ia, ba ha ba khõ Zo’aya. (Rom. 7, 2). 

40 Ba abõlõ ohahau dõdõnia, niŵa’õgu, na lõ’õ sa’ae mõi ia nihalõ; ba ba dõdõgu, so khõgu gõi Geheha Lowalangi.

 

KORINDRO I.

FAZA 8

 

I.                  Femanga nibe’e õ nadu. II. Bõi ta’alani nawõda ba zi tola khõda.

 

1 I. Ba ba gõ nadu andrõ, ba no ta’ila, si so fa’aboto ba dõdõ ita fefu. Famahokha wa’aboto ba dõdõ andrõ ba fa’omasi andrõ, ba fanga’azõkhi. (Hal. zin. 15, 29. Rom. 14, 19; 15, 1—3). 

2 Na so zanguma’õ tõdõnia, so hadia ia zaboto ba dõdõnia, ba tenga si nangea fa’aboto ba dõdõ wa’aboto ba dõdõnia andrõ. (Gal. 6, 3). 

3 Ba na so zangomasi’õ Lowalangi, da’õ zaboto ba dõdõ Lowalangi. (F. 13, 12. Gal. 4, 9). 

4 Ba ba wemanga gõ nadu andrõ, ba no ta’ila, wa faya nadu ba guli danõ, awõ wa lõ Lowalangi, baero zi sambua andrõ. (F. 10, 19 b. t.). 

5 Ba he ŵa’ae so nifotõi Lowalangi, he ba zorugo, ba he ba guli danõ — oya sa Lowalangi ba ato zo’aya — (Yoh. 10, 34 b. t. Sin. 136, 2. 3) 

6 ba khõda sa, ba ha sambua Lowalangi, Ama andrõ, ba zi otarai fefu hadia ia, ba ya’ita, ba ba khõnia ita ba ha samõsa Zo’aya, Yesu Keriso, sama’ema fefu hadia ia, ba ya’ita, ba moroi khõnia. (Mal. 2, 10. Rom. 11, 36). 

7 Ba lõ dozi so wa’aboto ba dõdõ; so õsa, ba irugi da’e itegu ira tõdõra ba nadu andrõ, ba femanga gõ nadu khõra, na la’ā, ba tõdõra andrõ, ba tetutu, me no sambõ fa’abe’e. (F. 10, 27. 28. Rom. 14, 23).

8 Tenga femangada mbalazi, ba khõ Lowalangi; lõ tedou wa’asõkhida, na manga ita, ba lõ i’ambõsi ita, na lõ manga ita. (Rom. 14, 6. 17).

9 II. Ba mifaigi, fa bõi tobali fangalani sambõ fa’abe’e wa no tola khõmi da’õ. (F. 6, 12. Rom. 14, 13. Gal. 6, 13). 

10 Na so zangila ya’ugõ, na manga’õ ba nomo nadu, ya’ugõ andrõ, si no so fa’aboto ba dõdõ, ba hadia, ba lõ tefarou dõdõnia, sambõ fa’abe’e na ba wemange gõ nadu andrõ? 

11 Ba tobali famakiko zambõ fa’abe’e wa’aboto ba dõdõ andrõ khõu, famakiko dalifusõ andrõ, si no bõrõ wa’amate Keriso andrõ. (Rom. 14, 15). 

12 Ba na mosala ami, si manõ, ba dalifusõ, ba no tetutu dõdõra, sambõ fa’abe’e mibe’e, ba khõ Keriso mosala ami. 

13 Andrõ, na te’ala dalifusõgu, ba gõ andrõ, ba lõ’õ manõ u’ā ndriwo, gõtõgõtõ wa’ara, fa lõ ufobõrõ wangala ba dalifusõgu. (Rom. 14, 21).

 

KORINDRO I.

FAZA 9

 

I.                  Lõ edõna itema mbalazonia Faulo ba halõŵõnia fangombakha andrõ; tola sa ena’õ; II. edõna manõ ia, mõi ia enoni zato ba III. iforege wangalui fangorifinia gõi.

 

1 I. Hadia, tenga tola manõ ulau zomasi ndra’o? Hadia, tenga sinenge ndra’o? Hadia, lõ ni’ilagu Yesu, So’aya ya’ita? Hadia, tenga lualua halõŵõgu ami, ba khõ Zo’aya? (F. 15, 8 b. t.; 4, 15; Hal. zin. 9, 4). 

2 Na tenga sinenge ndra’o ba danõ bõ’õ, ba ba khõmi sa atṍ; famaduhu’õ halõŵõgu, halõŵõ zinenge andrõ, ami, ba khõ Zo’aya. (Kor. II. 3, 2. 3; 12, 12). 

3 Famu’agu da’õ, ba zanguhuku ya’o andrõ. (F. 4, 3). 

4 Hadia, lõ tola manga ndra’aga, lõ tola mabadu hadia ia? (Luk. 10, 7). 

5 Hadia, lõ tola ma’ohe’ohe awõma dalifusõ alawe, fo’omoma, si mane sinenge bõ’õ andrõ gõi ba talifusõ Zo’aya ba Kefa? (Hal. zin. 1, 14. Mat. 8, 14). 

6 Ma ha daruaga Baranaba zi lõ tola lõ mohalõŵõ? (Hal. zin. 13, 2. Tes. II. 3, 8. 9). 

7 Ha niha zi mõi sanuwõ, sanaha gõi balazonia? Ha niha zamazõkhi kabu nagu, si lõ manga mbua? Ba ha niha zokubaloi urifõ, si lõ mamadu susu gurifõ andrõ? 

8 Hadia, tõdõ niha dali wehedegu andrõ? Ma tenga si manõ gõi niŵa’õ ba goroisa? 

9 Noa sa musura ba goroisa Moze: ”Bõi fosare’a mbawa gõrõbao samõbõrõ fakhe”. Hadia, so ba dõdõ Lowalangi gõrõbao? (Moz. V. 25, 4. Tim. I. 5, 18). 

10 Ma tenga ya’ita atṍ mbõrõ wanguma’õnia da’õ? Ya’ita sa mbõrõ, wa tesura da’õ, wa lõ tola lõ idõnadõna lualua samaku tanõ; ba si manõ zamõbõrõ fakhe, idõnadõna wemanga. (Yak. 5, 7). 

11 Na no mataru khõmi zoroi ba Geheha, ba hadia, nikata’õ sibai, na mabasi ba khõmi zoguna balazo mboto? (Rom. 15, 27). 

12 Na so dánõ bõ’õ sangokhõgõ gõi hadia ia khõmi, ba hadia, tenga mendrua manõ ndra’aga? Ba lõ ni’oguna’õma, wa tola da’õ mena’õ mataha manõ sa’ae fefu hadia ia, fa lõ mafobõrõ dahataha ba duria somuso dõdõ andrõ, khõ Keriso. (Kor. II. 12, 13. Hal. zin. 20, 33 b. t.). 

13 Hadia lõ mi’ila, wa ba gosali lasõndra gõra si so halõŵõ ba gosali? awõ wa ba naha wame’e sumange mo’urakha zi so halõŵõ ba naha wame’e sumange? (Moz. V. 18, 1 b. t.). 

14 Si manõ gõi, no i’oroi’õ So’aya ba zangombakha turia somuso dõdõ andrõ, ba duria somuso dõdõ andrõ lasõndra gõra. (F. 9, 4. Luk. 10, 7 b. t.). 

15 Ba ya’o, ba lõ ni’oguna’õgu da’õ, ma’ifu lõ’õ. Ba tenga andrõ usura da’õ, ena’õ lafatõrõ khõgu zi manõ; sõkhi na i matedo, moroi faya khõgu mbõrõ wanuno ya’o, ibe’e niha, ha niha ia. (Kor. II. 11, 7 b. t.). 

16 Na u’ombakha’õ duria somuso dõdõ andrõ, ba tenga bõrõ wanuno khõgu; lõ’õ sa tola lõ umanõ, alai sa ndra’o, na lõ u’ombakha’õ duria somuso dõdõ andrõ! (F. 1, 17). 

17 Na nilau dõdõgu sa, ba so luogu; ba na sabua õlõ ndra’o, ba no nibe’e ba dangagu halõŵõ andrõ. (F. 4, 1 b. t.).

18 Ba hadia luogu ya’õ? Da’õ luogu, ube’e buala duria somuso dõdõ andrõ, na u’ombakha’õ, fa lõ u’oguna’õ zi tola ena’õ, ba halõŵõ andrõ, ba duria somuso dõdõ andrõ.

19 II. He ŵa’ae tenga sawuyu niha ndra’odo, ba no ubali’õ sawuyu zato ndra’odo,

ena’õ ato udõnisi. (F. 10, 33. Mat. 20, 27. 28). 

20 Ba niha Yehuda, ba no tobali hulõ niha Yehuda ndra’o, ena’õ udõnisi niha Yehuda. Ba zi so barõ mbawa goroisa, ba hulõ zi so barõ mbawa goroisa ndra’o, — ba tenga sa si so barõ mbawa goroisa — ena’õ udõnisi zi so barõ mbawa goroisa. (Hal. zin. 16, 3; 21, 20 b. t.). 

21 Ba zi lõ oroisa, ba hulõ zi lõ oroisa ndra’o, — ba tenga sa si lõ oroisa ba khõ Lowalangi, solo’õ oroisa Keriso ndra’odo — ena’õ udõnisi zi lõ oroisa. (Gal. 2, 3; 6, 2. Yak. 2, 12). 

22 Ba zambõ fa’abe’e, ba no tobali sambõ fa’abe’e ndra’o, ena’õ udõnisi zambõ fa’abe’e; fefu hadia ia, ba niha fefu ba no ugo’õgo’õ, ena’õ fefu gofu heza, ba fasamõsa na atö u’orifi. (F. 9, 19. Kor. II. 11, 29. Hal. zin. 10, 35; 10, 32).

23 Ba bõrõ duria somuso dõdõ andrõ, wa ulau da’õ fefu, ena’õ mo’urakha gõi ndra’o ba da’õ.

24 III. Hadia, lõ mi’ila ba zi fagohi andrõ, ba lala wagohisa andrõ, wa dozi sa fagohi ira, ba ha samõsa zanema luo andrõ? Ba mimanõ wagohisa, ena’õ mitema! (Fil. 3, 12 b. t.). 

25 Ba dozi si fatandra tõla andrõ, ba labõhõli fefu hadia ia; ba ya’ira andrõ, ena’õ latema dakula si tekiko dania, ba ya’ita, ena’õ tatema zi lõ tebulõ. (Tim. II. 2, 4; 4, 8. Fet. I. 5, 4). 

26 Ba ya’o, ba si fagohi, tenga si mane ba zi lõ ta’ila; si fasõndra ndra’o, ba tenga ba dalu mbanua manõ. (F. 15, 58). 

27 Ufakao mbotogu andre, ba u’osawuyu, fa bõi si lõ guna ndra’o, he no sangombakha lala ba dánõ bõ’õ ndra’odo. (Rom. 8, 13 b. t.; 13, 14).

 

KORINDRO I.

FAZA 10

 

I.                  Ifangelama ira Faulo ba wangisõ si lõ sõkhi andrõ, ba II. ba wame’e adu ba ba wemanga gõ nadu. III. Itenaŵa ira, fa bõi lafobõrõ wangala ba nawõra.

 

1 I. Lõ’õ sa ubini’õ khõmi, ya’ami ira talifusõ; no a’oi barõ lawuo andrõ so ndra tuada, no a’oi latõrõ nasi, (Moz. II. 13, 21; 14, 29. Sin. 78, 13. 14), 

2 no ahori tebayagõ idanõ ira, ba khõ Moze, ba lawuo andrõ ba ba nasi andrõ, 

3 ba no ha sambalõ gõ moroi yaŵa la’ā. (Moz. II. 16, 4. Sin. 78, 24 b. t. Yoh. 6, 49). 

4 Ba no ha sambalõ moroi yaŵa labadu; moroi ba gara andrõ, moroi yaŵa, si fao khõra, labadubadu, ba kara andrõ, ba ya’ia Keriso. (Moz. II. 17, 6. Moz. V. 32, 4. 18). 

5 Ba sato andrõ, ba lõ omasi Lowalangi, noa sa tefakiko ira ba danõ si mate. (Moz. IV. 14, 22. 23. 30. 32. Heb. 3, 16 b. t.). 

6 Ba dumaduma khõda da’õ, wa si manõ, fa bõi ta’isõ zi lõ sõkhi, si mane fangisõra andrõ. (Moz. IV. 11, 4. Sin. 78, 18 b. t.). 

7 Ba bõi gõi mi’ame’e adu, si mane ya’ira õsa, niŵa’õ ba zura: ”Mudadao niha manga ba mamadu hadia ia, ba maoso ira molaya.” (Moz. II. 32, 6). 

8 Ba bõi gõi mohorõ ita, si mane ya’ira õsa, me mohorõ, ba mate zi dua wulu a tõlu ngahõnõ niha, ha ma’õma’õkhõ. (F. 6, 13 b. t. Moz. IV. 25, 1. 9). 9 Ba bõi gõi tatandraigõ Zo’aya, si mane ya’ira õsa, me latandraigõ, ba ibunu ira ulõ. (Moz. IV. 21, 5. 6. Sin. 106, 14 b. t.). 

10 Bõi gõi mikõkõkõkõ, si mane ya’ira õsa, me kumõkõkõkõ, ba ibunu ira samakiko andrõ. (Moz. IV. 14, 2. 37).

11 Ba dumaduma da’õ, wa gõna ira zi manõ, ba famangelama ya’ita, wa tebe’e ia ba zura, ya’ita si fakhamõ amozua gõtõ danõ andre. (Rom. 15, 4. Heb. 4, 11; 9, 26). 

12 Andrõ, na so zanguma’õ tõdõnia sizizio ia, ba yamufaigi, fa bõi alau ia. (Rom. 11, 20).

13 Lõ’õ na si gõna ami fanandraigõ, ha fanandraigõ ba niha; ba lõ farõi Lowalangi, lõ ibe’e tetandraigõ ami, si tebai mitaha, awõ wanandraigõ ifaigi gõi wa’awai, ena’õ tola mitaha. (F. 1, 9. Tes. II. 3, 3. Fet. II. 2, 9).

14 II. Andrõ, ya’ami somasi ndra’o, mi’angelamaisi wame’e adu andrõ. (Yoh. I. 5, 21). 

15 Fehede ba zatuatua wehedegu; mitimba tõdõmi niŵa’õgu. (F. 14, 37). 

16 Mako famahowu’õ andrõ, nifahowu’õda, hadia, tenga famo’urakha ba ndro Keriso? Roti andrõ, nibobotoda, hadia, tenga famo’urakha ba mboto Keriso? (F. 11, 24 b. t. Mat. 26, 27. Hal. zin. 2, 42). 

17 Me ha sambua roti, ba ha sambua boto ita, ya’ita sato; a’oi sa mo’urakha ita ba roti andrõ, si ha sambua. (F. 12, 27).

18 Mifaigi Ndraono Gizeraëli andrõ, si ndruhu madou Yakobo. Hadia, tenga no fabõbõ ba naha wame’e sumange zi manga zumange andrõ? (Moz. III. 7, 6; 15, 16). 

19 Ba hadia niŵa’õgu? Hadia, soboto zumange nadu andrõ, ba ma adu andrõ, hadia, soboto? (F. 8, 4 b. t.). 

20 Tenga si manõ. Hadia zumange, nibe’era, ba ba mbekhu labe’e, tenga khõ Lowalangi. Ba lõ omasido, na ba mbekhu fabõbõ ami. (Moz. III. 17, 7. Fam. 9, 20). 

21 Tebai faoma mibadu, he õsi mako andrõ khõ Zo’aya, ba he õsi mako mbekhu. Tebai faoma mo’urakha ami, he ba wemanga andrõ khõ Zo’aya, ba he ba wemanga ba mbekhu. (Kor. II. 6, 15. Mal. 1, 7).

22 Ma edõna ita ta’andrõ wõnu Zo’aya? Hadia, sabõlõ moroi khõnia ita? (Moz. V. 32, 21).

23 III. Fefu hadia ia, ba tola, ba so zi lõ guna. Fefu hadia ia, ba tola, ba so zi lõ mõi fanga’azõkhi. (F. 6, 12; 8, 1 b. t.). 

24 Bõi yamu’alui zoguna khõnia zamõsana, soguna khõ nawõnia yamu’alui. (F. 13, 5. Rom. 15, 2). 

25 Fefu hadia ia ni’amawa ba onga, ba mi’ā, bõi mizofuzofu, ba dõdõmi andrõ. (Rom. 14, 2 b. t.). 

26 Khõ Zo’aya sa danõ, awõ nõsi guli danõ. (Sin. 50, 12). 

27 Ba na so zogaoni ya’ami tome, si tenga samati, ba na edõna mõi ami, ba fefu hadia ia nibe’e õmi, ba mi’ā, bõi mizofuzofu, ba dõdõmi andrõ. (F. 8, 7). 

28 Ba na so zanguma’õ khõmi; Sumange nadu da’e, ba bõi mi’ā, bõrõ zangombakha andrõ ba tõdõ andrõ. 

29 Tenga tõdõ nifangelama andrõ niŵa’õgu, tõdõ dánõ bõ’õ; hana sa wa ihuku zi tola khõgu tõdõ dánõ bõ’õ? (F. 8, 8 b. t.). 

30 Na u’andrõ saoha gõlõ, na mangado, ba hana wa latandraŵaisi ndra’o ba ni’andrõgu saoha gõlõ? (Moz. V. 8, 10. Tim. I. 4, 4). 

31 Ba he si manga ami, ba he samadu hadia ia, ba ma hadia nilaumi, ba ba wamosumange Lowalangi milau ia fefu. (Kol. 3, 17). 

32 Bõi mifobõrõ wangala, he ba niha Yehuda, ba he ba Ndrawa Heleni, ba he ba mbanua Lowalangi; (Rom. 14, 13. F. 9, 22);

33 hulõ si mane ya’o, me no ugõ’õgo’õ khõra fefu, ha niha ira, me lõ u’alui zoguna khõgu, me ha soguna ba zato u’alui, ena’õ te’orifi ira. (F. 8, 13; 9, 19 b. t.).

 

KORINDRO I.

FAZA 11

 

I.                  He wisa gamuata wangandrõ, II. He lawisa ba wemanga ni’amoni’õ andrõ.

 

1 I. Mibe’e tulada khõmi ndra’odo, si mane ya’o, me no ube’e tulada khõgu Keriso. (F. 4, 16. Fil. 3, 17). 

2 Ba usuno ami, me itõrõtõrõ tõdõmi ndra’o, gofu hadia nilaumi, ba me mi’o’õ gamakhoita andrõ, si mane nifa’emagu khõmi. 

3 Ba omasido na mi’ila; hõgõ ndra matua fefu, ba ya’ia Keriso, ba hõgõ ndra alawe ndra matua, ba hõgõ Keriso Lowalangi. (F. 3, 23. Efes. 5, 23). 

4 Na so ndra matua sangandrõ, ba ma sama’ele’õ, si so balubalu hõgõ, ba i’o’aya hõgõnia. (F. 14, 1). 

5 Ba ira alawe, ba i’o’aya hõgõnia, na lõ balubalu hõgõ, na mangandrõ ia, ba ma na mama’ele’õ ia, faoma sa ira zi no mutõwõ. (F. 14, 34). 

6 Na lõ’õ sa ibalugõ ia ira alawe, ba yamufatõwõ’õ gõi ia. Ba na aila ndra alawe, ifaguti’õ mbunia, ba ma ifatõwõ’õ, ba yamubalugõ ia. 

7 Akha sa lõ ifobalubalu hõgõnia ira matua, me no dumaduma Lowalangi ia ba me no lakhõmi Lowalangi; ba ira alawe, ba no lakhõmi ndra matua. (Moz. I. 1, 27; 2, 22 b. t.). 

8 Tenga sa soroi ba ndra alawe ndra matua, no moroi ba ndra matua ndra alawe. (Tim. I. 2, 13).

9 Tenga sa gõi ira alawe mbõrõ, wa tefazõkhi ndra matua, no ira matua mbõrõ, wa tefazõkhi ndra alawe. (Moz. I. 2, 18). 

10 Andrõ lõ tola lõ so ba hõgõ ndra alawe dandra, wa no barõ mbawa ia, bõrõ mala’ika andrõ. (Moz. I. 24, 65). 

11 Ba tenga ha ira alawe, lõ ira matua, ba tenga ha ira matua, lõ ira alawe, ba khõ Zo’aya. 

12 Hulõ da’õ sa, wa no moroi ba ndra matua ndra alawe, si manõ gõi, wa no moroi ba ndra alawe ndra matua, ba fefu hadia ia, ba no moroi ba Lowalangi. (Yoh. 15, 1). 

13 Mitimba tõdõmi, ha ya’ami. Hadia, moadu ba ndra alawe, na mangandrõ ia khõ Lowalangi, lõ balubalu hõgõ? 

14 Hadia, tenga no to’ua manõ gõi oroma khõmi, wa lõ moadu ba ndra matua, na anau mbunia, (Sam. II. 14, 26), 

15 awõ wa no lakhõmi ndra alawe mbu sanau? me no salahi mbalubalu khõnia, wa no mube’e khõnia mbu andrõ.

16 Ba na so zomasi faguagua ba da’õ, ba tenga huku ba khõma zi manõ, ba tenga gõi huku mbanua Lowalangi misa. (Tim. I. 6, 3—5).

17 II. Ba me itõrõ ligu da’õ, ba tebai usuno gowuloami, me tenga ba wanga’azõkhi, me no ba wa’awuwu. 

18 Si fõfõna ua, ba urongo, lõ ha sara dõdõmi, na owulo mbanua, ba no faduhu dõdõgu, si duhu õsa. (F. 3, 3 b. t.). 

19 Lõ’õ sa tola lõ so zi faehu era’era ba khõmi, ena’õ oroma zi faduhu dõdõda, ba khõmi. (Mat. 18, 7; Yoh. I. 2, 19). 

20 Ba na owulo ami, ba tobali tenga ba wolau femanga andrõ, khõ Zo’aya. 

21 Ihõnagõ i’ā gõnia zamõsana, ba wemanga andrõ, ba no olofo zi samõsa, ba ibusi ia agu si samõsa. 

22 Hadia, lõ khõmi omo, ba wemanga ba ba wamadu hadia ia? Ma lõ ba dõdõmi mbanua Lowalangi andrõ, ba mi’ailasi zi lõ ba danga? Ha uŵa’õ khõmi? Hadia, usuno ami? Ba da’õ lõ usuno ami. (Yak. 2, 5. 6). 

23 Ya’odo sa, ba no khõ Zo’aya utema, nifa’emagu khõmi gõi: So’aya ya’ita, Yesu, me bongi andrõ, me te’ā mbõlinia, ihalõ roti, (Gal. 1, 12. Mat. 26, 26 b. t.), 

24 ba i’aohasi gõlõ Lowalangi, ba iboboto roti ba imane: Botogu da’e, salahimi, mitõrõtõrõ tõdõmi ndra’o ba zi mané. 

25 Si manõ gõi mako, me no aefa manga ira, ba imane: Amabu’ula li si bohou mako andre, ba ndrogu. Gofu ha me uga mibadu da’e, ba mitõrõtõrõ tõdõmi ndra’odo. (Luk. 22, 20). 

26 Ha me uga mi’ā roti andrõ sa, ba ha me uga mibadu nõsi mako andrõ, ba mi’ombakha’õ wa’amate Zo’aya, irugi so ia. (Moz. II. 12, 26. 27. Mat. 26, 29). 

27 Tobali, na so zi manga roti andrõ, ba ma samadu õsi mako andrõ, khõ Zo’aya, si tenga si nangea, ba mosala ia ba mboto Zo’aya andrõ ba ba ndronia. (F. 10, 21). 

28 Ba yamusekhegõ dõdõnia zamõsana, ba awena yamu’a wõfõ roti andrõ ba yamubadu wõfõ nõsi mako andrõ. (Kor. II. 13, 5). 

29 Si manga sa ba samadu, ba i’ā khõnia huku ba ibadu khõnia, na lõ ifaehusi mboto andrõ. (F. 10, 16. 17). 

30 Andrõ ato ba khõmi zambõ fa’abõlõ ba sofõkhõ, ba tenga si lõ ato zi no mate. 

31 Ba na ya’ita zanguhuku ya’ita, ba lõ tehuku ita ena’õ. (Sin. 32, 5). 32 Ba na tehuku ita, ba ni’otu’õ ita, khõ Zo’aya, ena’õ lõ tetibo ita, awõ niha guli danõ. (Heb. 12, 5. 6). 

33 Andrõ, ya’ami ira talifusõgu, na owulo ami ba wemanga, ba yamubase’õ nawõnia zamõsana. 

34 Na so zolofo, ba yomo yamanga, fa bõi mifobõrõ khõmi huku, na owulo ami. Ba hadia ia dánõ bõ’õ, ba uŵa’õ li, na sodo. (F. 16, 5).

 

KORINDRO I.

FAZA 12

 

I.                  Lõ faoma mbuala Geheha andrõ, ba lõ faoma halõŵõ. II. Hulõ ndrotondroto ba mboto niha, si no faehu, si manõ gõi niha Keriso andrõ.

 

1 I. Ba lõ omasido, lõ mi’ila watahõgõ, ya’ami ira talifusõ, ba mbuala Geheha andrõ. (F. 14, 2). 

2 Lõ solifu ami: me luo niha baero ami, ba ba nadu si lõ hede andrõ misaŵa, nidõni ta’io. (F. 6, 11). 

3 Andrõ u’ombakha’õ khõmi: lo e’ilifi Yesu sihede moroi ba Geheha Lowalangi, ba tebai faso’aya khõ Yesu niha, na tenga moroi ba Geheha ni’amoni’õ. (Mar. 9, 39 b. t. Yoh. 13, 13. Yoh I. 4, 2. 3). 

4 Ba no faehu mbuala fa’ebua dõdõ andrõ, ba ha sambua Geheha, (Rom. 12, 6), 

5 ba no faehu halõŵõ, ba ha samõsa Zo’aya, (F. 12, 28; 8, 6), 

6 no faehu wa’abõlõ, ba ha sambua Lowalangi, sanga’asogõ fefu hadia ia, ba dõdõ zi no ato andrõ fefu. (Efes. 4, 6). 

7 Ba ena’õ ba zato moguna, andrõ tebe’e wama’ele’õ Geheha andrõ ba zamõsana. (F. 14, 26). 

8 Ba zi samõsa, ba tebe’e moroi ba Geheha daroma li fa’atuatua, ba ba zi samõsa, ba taroma li fangaboto ba dõdõ, moroi ba Geheha da’õ gõi; (F. 13, 2); 

9 ba ba zi samõsa, ba buala ba wamadõhõ fõkhõ, moroi ba Geheha si ha sambua andrõ; (F. 14, 1. 5. 24. 29. Yoh. I. 4, 1);

10 ba ba zi samõsa, ba famazõkhi sahõlihõli dõdõ; ba ba zi samõsa, ba fama’ele’õ; ba ba zi samõsa, ba fangila amuata Geheha; ba ba zi samõsa, ba oya ngawalõ li; ba ba zi samõsa, ba famotokhi li andrõ. (F. 14, 1. 5. 24. 29. Yoh. I. 4, 1).

11 Ba fefu hadia ia zi manõ, ba oi Eheha da’õ, si ha sambua, zanga’asogõ; ifosasi, ibe’e ba zamõsana zomasi ia. (Rom. 12, 3).

12 II. Hulõ mbotoda andrõ, si ha sambua, ba no oya ndrotondroto, ba tobali ha sambua boto ndrotondroto mboto andrõ, ha wa’oya ira, si manõ gõi khõ Keriso. (Rom. 12, 4 b. t.). 

13 Ha sa sambua Geheha, me tebayagõ idanõ ita fefu, ena’õ ha sambua boto ita, he niha Yehuda, ba he Dawa Heleni, he sawuyu, ba he si tenga sawuyu; ba ha sambua Geheha nifabadugõ khõda. (F. 10, 2—4). 

14 Botoda andrõ sa gõi, ba tenga ha sambua ndrotondroto, no oya. 

15 Na iŵa’õ ena’õ ahe: Me tenga tanga ndra’odo, ba tenga si fabõbõ ba mboto ndra’o, ba no tenga bõrõ da’õ, wa tenga si fabõbõ ba mboto ia. 

16 Ba na iŵa’õ ena’õ talinga: Me tenga hõrõ ndra’odo, ba tenga si fabõbõ ba mboto ndra’o, ba no tenga bõrõ da’õ, wa tenga si fabõbõ ba mboto ia. 

17 Hadia na ha sambalõ hõrõ mboto, ba heza dõgi dalinga? Ba na ha sambalõ tõgi dalinga, ba hezo dõgi nikhu? 

18 Ba noa sa ifonaha ndrotondroto andrõ Lowalangi, no ifasambua ba mboto, balazi zomasi ia. (F. 15, 38). 

19 Ba na ha sambua ndotondroto ena’õ, ba heza so mboto? 

20 Ba iya’e ba noa sa oya ndrotondroto, ba ha sambua boto. 

21 Ba tebai iŵa’õ hõrõ ba danga: Lõ gunau khõgu. Ba tebai gõi iŵa’õ hõgõ ba gahe: Lõ gunami khõgu. 

22 Tobali sa moguna khõda ndrotondroto mboto andrõ, niŵa’õda sambõ fa’abõlõ. 

23 Ba niŵa’õda ni’ositengagõ ba mboto andrõ, ba no abõlõ tafosumange, ba si lõ moadu khõda, ba abõlõ tafoadu; 

24 ba zoadu khõda, ba lõ moguna. Noa sa ifa’anõ mboto andrõ Lowalangi, no abõlõ ifoadu zide’idenia, 

25 ena’õ lõ fa’afabali ba mboto andrõ, ena’õ faoma larorogõ nawõra ndrotondroto andrõ. 

26 Ba na so zafõkhõ ba zi sambua ndrotondroto, ba oi afõkhõ ba ndrotondroto fefu, ba na so nifosumange, ndrotondroto, ba oi zara, omuso dõdõ ndrotondroto bõ’õ andrõ gõi. (Rom. 12, 15). 

27 Ba ya’ami, ba boto Keriso, ba no ndrotondroto zamõsana. (Rom. 12, 5). 

28 Ba so nifataro Lowalangi, ba mbanua: si fõfõna, ba sinenge, ba fanete, ba sama’ele’õ, ba fanete, ba samahaõ, awena zahõlihõli dõdõ andrõ, awena mbuala ba wamadõhõ fõkhõ, ba fanolo ba famatõrõ, ba soya ngawalõ li. (F. 12, 8—10. Efes. 4, 11. 12). 

29 Hadia, a’oi sinenge ira? Hadia, a’oi sama’ele’õ? Hadia, a’oi samahaõ? Hadia, oi dozi so khõra zahõlihõli dõdõ andrõ? 

30 Hadia, oi dozi so khõra mbuala andrõ, ba wamadõhõ fõkhõ? oi dozi so ngawalõ li? oi dozi ira zamotokhi? 

31 Miforege wangalui buala si sõkhi andrõ. Ba u’oroma’õ na khõmi lala si sõkhi moroi ba da’õ. (F. 14, 1 b. t.).

 

KORINDRO I.

FAZA 13

 

Fa’omasi andrõ: I. Moguna sibai. II. Amuatania. III. Si lõ aetu ia.

 

1 I. He fehede niha ba fehede mala’ika wehedegu, ba na lõ khõgu fa’omasi andrõ, ba hulõ garamba soli ba hulõ ritiriti ndra’odo. (F. 14, 6—9). 

2 Ba he no so khõgu wama’ele’õ, ba he no u’ila fefu zi no tobini andrõ, awõ wa’aboto ba dõdõ andrõ fefu, ba he no a’oi so khõgu wamati andrõ, ba wamawu’a hili, ba na lõ khõgu fa’omasi andrõ, ba faya ndra’odo. (F. 12, 8. 9. Mat. 7, 22; 17, 20).

3 Ba he ahori ube’e balazo zi numana zi so khõgu, ba he ululu mbotogu, ena’õ latunu auri, ba na lõ khõgu fa’omasi andrõ, ba lõ gunania. (Mat. 6, 1 b. t. Dan. 3, 28. Sin. seb. 8, 7).

4 II. Fa’omasi andrõ, ba no sebolo tõdõ, no sebua tõdõ; fa’omasi andrõ, ba lõ i’atõkhõi tõdõ nawõnia, lõ isuno ia, lõ mohokha. (Yak. 3, 17). 

5 Lõ ilau zi lõ moadu, lõ i’alui dána khõnia; lõ mofõnu ia; lõ itanõ ba dõdõnia zi lõ sõkhi; (F. 10, 24. Fil. 2, 4); 

6 lõ omuso dõdõnia ba zi lõ atulõ, ba omuso dõdõnia awõ zi duhu.

7 Fefu hadia ia zi falukha ia, ba itaha dõdõnia; fefu hadia ia, ba faduhu dõdõnia; fefu hadia ia, ba idõnadõna, fefu hadia ia, ba itaõgõ. (Rom. 15, 1. Amaed. 10, 12).

8 III. Si lõ mamalõmalõ wa’omasi andrõ; he fama’ele’õ sa, ba tebato dania, ba he ngawalõ li, ba tebato, ba he fa’aboto ba dõdõ andrõ, ba tebato dania. 

9 Sambõ’ambõ sa wa’aboto ba dõdõda andrõ, ba sambõ’ambõ wama’ele’õda andrõ. 

10 Ba na so zo’ahonoa andrõ, ba tebato zambõ’ambõ andrõ. 

11 Me iraono ndra’odo, ba no fehede ndraono wehedegu ba tõdõ ndraono dõdõgu ba era’era ndraono gera’eragu, ba me no tobali ira matua ndra’odo, ba ubõhõli nifolau ndraono. 

12 Ha sa dahõdahõ ni’ilada iada’e, ba zõrõmi, ba ba da’õ dania, ba fa’ila bawa. Iada’e ambõ’ambõ wa’aboto ba dõdõgu, ba ba da’õ dania, ba u’ila, si mane fangila ya’odo andrõ. (Moz. IV. 12, 8. Kor. II. 3, 18; 5, 7. F. 8, 3. Yoh. I. 3, 2). 

13 Ba me si manõ, ba si lõ tebulõ wamati ba fanõtõna ba fa’omasi, si tõlu andrõ, ba sebuara, ba fa’omasi andrõ. (Tes. I. 1, 3. Heb. 10, 22—24. Kol. 3, 14).

 

KORINDRO I.

FAZA 14

 

I.                  Hadia guna, na lasõndra ngawalõ li andrõ ba famahaõ andrõ. II. He lawisa wamoguna’õ ba gowuloa niha Keriso andrõ.

 

1 I. Migohi wa’omasi andrõ, ba mi’alualui mbuala Geheha andrõ, ba si ofõna, ba ena’õ mi’ila mama’ele’õ. (F. 12, 1 b. t. 31). 

2 Solau ngawalõ li andrõ, ba tenga ba niha muhede, no khõ Lowalangi muhede ia, lõ’õ sa samondrongo, niha, ba moroi ba Geheha iŵa’õ zi no tobini. (Hal. zin. 10, 46). 

3 Ba sama’ele’õ, ba ba niha muhede, fanga’azõkhi ba famarou dõdõ, ba fondrara dõdõ. 

4 Solau ngawalõ li andrõ, ba ya’ia ni’a’asõkhinia, ba sama’ele’õ, ba banua i’a’asõkhi. 

5 Ba omasido, na dozi ami milau ngawalõ li, ba mendrua manõ, na mama’ele’õ ami. Ba ebua zama’ele’õ, moroi ba zolau ngawalõ li andrõ, atö na ibotokhi, ena’õ mõi fanga’azõkhi mbanua. (Moz. IV. 11, 29). 

6 Ba me no si manõ, ya’ami ira talifusõ, ba na mõido khõmi ena’õ, molau ngawalõ li, ba hadia gunagu khõmi, na lõ muhededo khõmi, ma famokai hadia ia, ba ma famotokhi, ba ma fama’ele’õ, ba ma famahaõ? 

7 Si manõ gõi ba maimai si lõ noso andrõ, soli, he sigu, ba he biola, na lõ faehu li, salua, ba he lawisa wamondrongo hadia li zigu ba hadia li mbiola? 

8 Ba torofe gõi, na li si lõ mila manõ linia, ba ha niha zama’anõ ya’ia ba wanuwõ? 

9 Si manõ gõi ami, na si lõ mila wehedemi, na milau ngawalõ li, ba he moroi aboto ba dõdõ niŵa’õ andrõ? ba dalu mbanua sa’ae muhede ami. 

10 Ta’ila ha wa’oya ngawalõ li ba guli danõ, ba lõ si lõ eluaha. (Sin. 19, 4 b. t.). 

11 Ba na lõ u’ila geluaha li andrõ, ba niha bõ’õ ndra’o, khõ zihede andrõ, ba sihede andrõ, ba niha bõ’õ ia khõgu.

12 Si manõ gõi ami, me no solohi Eheha ami, ba mi’alui, ena’õ fahõna khõmi, ba wanga’azõkhi banua.

13 II. Andrõ, na so zolau ngawalõ li andrõ, ba yamu’andrõ, ena’õ i’ila ibotokhi. 

14 Na mangandrõ ndra’o, wolau ngawalõ li, ba tõdõgu zangandrõ, ba era’eragu, ba si lõ guna. 

15 Ba he wisa? Da’u’angandrõ’õ dõdõ ba u’angandrõ’õ gõi gera’era; u’anunõ’õ dõdõ ba u’anunõ’õ gõi gera’era. (Yak. 5, 13). 

16 Na tenga si manõ, ba he iwisa si lõ to’õlõ ba da’õ, wamaduhu’õ fanunõmõ, na õ’anunõ’õ dõdõ, me lõ i’ila, hadia niŵa’õu. (Nga’õt. I. 16, 36. Neh. 8, 6). 

17 Te sõkhi sa wanunõu, ba lõ mõi fanga’azõkhi dánõ bõ’õ. 

18 Usuno Lowalangi, me asese ulau ngawalõ li andrõ, moroi khõmi fefu. 

19 Ba na ba mbanua, ba omasido, ha lima ngawua li uŵa’õ, soroi ha gera’eragu, ena’õ ufahaõ dánõ bõ’õ gõi, moroi fulu ngahõnõ ngawua li uŵa’õ, wolau ngawalõ li andrõ. 

20 He ya’ami ira talifusõ! bõi mibali’õ iraono ami, ba gera’era andrõ; ba zi lõ sõkhi mibali’õ iraono ami, ba ba gera’era andrõ, ba ena’õ mo’ahonoa ami. (Mat. 10, 16. Rom. 16, 17). 

21 Noa sa so ba zura goroisa: ”Li niha bõ’õ ulau dania ba niha andrõ, ba bewe niha bõ’õ ufake, wehede khõra, ba he si manõ, ba lõ’õ zui lafondrondrongo ligu, iŵa’õ So’aya.” (Yes. 28, 11. 12). 

22 Tobali tandra ngawalõ li andrõ, tenga ba zamati, no ba zi lõ mamati, ba fama’ele’õ andrõ, ba tenga ba zi lõ mamati, no ba zamati. 

23 Ba na owulo ena’õ mbanua fefu, ba na oi zara lalau ngawalõ li ena’õ, ba na so zi mõi bakha si lõ to’õlõ ba da’õ, ba ma si tenga samati, hadia, lõ laŵa’õ sowõhõ ami? (Hal. zin. 2, 12. 13). 

24 Ba na a’oi mama’ele’õ, ba na so zi mõi bakha si tenga samati, ba ma si lõ to’õlõ ba da’õ, ba tefaduhu dõdõnia khõra fefu, ba tehuku ia khõra fefu, (Heb. 4, 12), 

25 ba oroma zi tobini andrõ ba dõdõnia, ba tobali ifalõgu tou ia, mangalulu ia khõ Lowalangi, ba i’ombakha’õ, si ndruhu so Lowalangi ba dõdõmi. (Yes. 60, 14). 

26 Ba he wisa, ya’ami ira talifusõ? Na owulo ami, ba oi dozi so hadia ia, ma sinunõ, ba ma famahaõ, ba ma famokai hadia ia, ba ma ngawalõ li, ba ma famotokhi; ba fefu hadia ia, ba ba wanga’azõkhi yamoguna. 

27 Ba na so zolau ngawalõ li, ba darua, datõlu zato sibai, ba nizarazara, ba samõsa zamotokhi. 

28 Ba na lõ samotokhi, ba bõi yamuhede ba gowuloa, ba khõnia yamuhede, ba khõ Lowalangi. (F. 14, 2—4). 

29 Ba sama’ele’õ, ba darua, ba ma datõlu ndramuhede, ba ndramuhuku tánõ bõ’õ. (F. 12, 10. Hal. zin. 17, 11). 

30 Ba na falukha dánõ bõ’õ sidadao, wama’ele’õ, ba yamubato wehede si fõfõna andrõ. 

31 Tola sa mizarazara wama’ele’õ, dozi ami, ena’õ oi dozi tefahaõ ira, ba ena’õ oi dozi tefarou dõdõ. 

32 Ba eheha zama’ele’õ andrõ, ba la’o’õ ba zama’ele’õ. 

33 Tenga sa Lowalangi wamakuyu Lowalangi, no Lowalangi wa’atulõ ia. (F. 11, 16). 

34 Ira alawe, ba bõi ndrahumede ba gowuloa, si mane ba gowuloa ni’amoni’õ fefu; lõ’õ sa tola fahuhuo ira, ha folo’õ khõra, si mane niŵa’õ ba goroisa gõi. (Tim. I. 2, 12. Moz. I. 3, 16). 

35 Ba na omasi ira, lasõndra hadia ia, ba yomo ndramusofu ba ndra matuara; lõ’õ sa moadu ba ndra alawe, na fahuhuo ia ba gowuloa. 

36 Ma ba khõmi i’otarai taroma li Lowalangi andrõ? ba ma ha ba khõmi irugi? 

37 Na so zanguma’õ tõdõnia, sama’ele’õ ia, ba ma si so Eheha ia, ba ya’aboto ba dõdõnia nisuragu andre, wa moroi khõ Zo’aya. (F. 10, 15). 

38 Ba na so zi lõ mangila watahõgõ, ba yalõ i’ila watahõgõ. 

39 Andrõ, ya’ami ira talifusõgu, mi’alui wama’ele’õ, ba bõi mitenaŵa wolau ngawalõ li andrõ; ba fefu hadia ia, 

40 ba oi ni’angenanõi ba oi nifõfõgõ. (Kol. 2, 5).

 

KORINDRO I.

FAZA 15

 

I.                  Famaduhu’õ femaoso zi mate andrõ, moroi ba wemaoso Keriso. II. Amuata wemaoso andrõ ba inõtõ.

 

1 I. Ba lõ ubini’õ khõmi, ya’ami ira talifusõ, duria somuso dõdõ andrõ, ni’ombakha’õgu khõmi, nihalõmi khõmi gõi, ba zaro ami gõi, (Gal. 1, 11. 12), 

2 ba nisõndrami fangorifi gõi, na mi’o’õ zi mane ni’ombakha’õgu khõmi, na lõ mibõhõli; atö na zayazaya gõlõmi, wa no mamati ami. 

3 Da’õ sa zi a’a nifa’emagu khõmi, nitemagu gõi, wa no mate Keriso, bõrõ horõda andrõ; wa no itõrõ zi so ba zura andrõ; (F. 11, 23. Yes. 53, 8 b. t. Dan. 9, 26. Hal. zin. 17, 2 b. t.); 

4 awõ wa no muko’o ia, awõ wa no mususugi ia, me no irugi tõlu ngaluo, wa no itõrõ zi so ba zura; (Sin. 16, 10. Hos. 6, 2. Mat. 12, 40); 

5 awõ wa no i’oroma’õ ia khõ Gefa andrõ, ba aefa da’õ, ba ba zi felendrua. (Luk. 24, 34. 36). 

6 Aefa da’õ, ba i’oroma’õ ia ba dalifusõ andrõ, si tõra lima ngaotu, i’osamuzaigõ; so sa zi no mate õsa, da’õ, ba ato zauri. (Mat. 28, 10). 

7 Aefa da’õ, ba i’oroma’õ ia khõ Yakobo andrõ, ba aefa da’õ, ba ba zinenge andrõ fefu. (Luk. 24, 50). 

8 Ba ba gafuriata sibai, ba no i’oroma’õ ia gõi khõgu, si hulõ zi lõ irugi baŵa ba wa’atumbu. (F. 9, 1. Hal. zin. 9, 3 b. t.). 

9 Fondrege zide’ide sa ndra’odo, ba zinenge andrõ, tenga sa si nangea labe’e tõigu zinenge, me no ugohi mbanua Lowalangi andrõ. (Efes. 3, 8. Tim. I. 1, 13). 

10 Ba bõrõ wa’ebua dõdõ Lowalangi, wa si manõ ndra’odo iada’e, ba tenga sa zayazaya gõlõ wa’ebua dõdõnia ba khõgu andre, tobali sa ebua halõŵõ nihalõgu, moroi ba nihalõra fefu, ba tenga sa ya’odo, no fa’ebua dõdõ Lowalangi andrõ, fanolo ya’odo. (Tim. I. 1, 14. Kor. II. 5, 23). 

11 Ba he ya’odo, ba he ya’ira andrõ, ba si manõ wangombakha’õma, ba si manõ wamatimi. (F. 3, 7). 

12 Ba na teturiagõ Keriso, wa no mususugi ia moroi ba ngai zi mate, ba hana wa so õsa ba khõmi sanguma’õ, lõ femaoso zi mate? (Tim. II. 2, 17. 18. Mat. 22, 23). 

13 Na lõ femaoso zi mate sa, ba lõ’õ gõi mususugi Keriso. 

14 Ba na lõ mususugi Keriso, ba no zayazaya gõlõ gõi wangombakha’õma, ba zayazaya gõlõ gõi wamatimi. 

15 Ba no tobali sasi sofaya ndra’aga ba khõ Lowalangi, me no mabõbõgõ khõ Lowalangi, no isusugi Keriso si tenga nisusuginia; na duhu, lõ tesusugi zi mate. 

16 Na lõ’õ sa tesusugi zi mate, ba lõ mususugi Keriso. 

17 Ba na lõ mususugi Keriso, ba si lõ boto wamatimi andrõ, ba lõ si tebulõ ami ba horomi; 

18 tobali si no tetiko gõi zi no mate andrõ, ba khõ Keriso. (Tes. I. 4, 14). 

19 Na ha ba gõtõda andre manõtõna ita, khõ Keriso, ba no numana ita, moroi ba niha bõ’õ fefu. (F. 15, 32; 4, 9). 

20 Ba iada’e, ba no mususugi Keriso, moroi ba ngai zi mate, no si a’a ia ba zi no mate andrõ. (Hal. zin. 26, 23. Kol. 1, 18). 

21 Me no moroi ba niha sa wa’amate andrõ, ba moroi ba niha gõi wemaoso zi mate andrõ. (Rom. 5, 12. 18. 21). 

22 Hulõ si mane ba khõ Gadamo sa, wa ahori mate ira ba da’õ, si mano gõi ba khõ Keriso, ahori te’orifi ira dania.

23 Ba oi nifõfõ’õ: Si a’a, ba Keriso, ba fanetenia, ba tána khõ Keriso andrõ, na so ia. (Tes. I. 4. 15, 16). 

24 Ba awena dania gamozua andrõ, na ibe’e ba danga Lowalangi Ama wamatõrõ andrõ, na no iheta wamatõrõ fefu ba fa’asalaŵa fefu ba fa’abõlõ fefu. 

25 Lõ’õ sa tola lõ’õ, salaŵa ia, irege no ibe’e barõ gahenia zi fa’udu, fefu, (Sin. 110, 1. Heb. 10, 12. 13). 

26 Safuria zi fa’udu, niheta, ba ya’ia wa’amate andrõ. (Fam. 20, 14). 

27 ”Fefu hadia ia, ba no ibe’e barõ gahenia.” Ba na laŵa’õ, no mube’e barõ mbawa fefu hadia ia, ba no ta’ila, baero zame’e barõ mbawania fefu hadia ia. (Sin. 8, 7. Mat. 28, 18. Heb. 2, 8). 

28 Ba na no mube’e barõ mbawania fefu hadia ia, ba awena mõi gõi Nono barõ mbawa zi no mame’e barõ mbawania fefu hadia ia, ena’õ ha sambalõ Lowalangi ba khõra fefu. (F. 3, 23; 11, 3). 

29 Na tenga si manõ, ba hadia nilau zamabayagõ’õ idanõ ya’ira salahi zi no mate? Na lõ’õ manõ tesusugi zi mate, ba hana wa lafabayagõ’õ ira idanõ, salahira? 

30 Ba ya’aga gõi, ba hana wa lõ mamalõmalõ, wa lõ ma’ila nosoma. (Rom. 8, 36). 

31 Ero ma’ökhõ matedo; ya lõ usuno ndra’o ba khõmi andrõ, ya’ami ira talifusõ, ba khõ Keriso Yesu, So’aya ya’ita, na fayagu. (Kor. II. 1, 8. 9; 4, 10 b. t.). 

32 Na dali niha, wa no fasõndra ndra’o ba gutu ndru’u andrõ ba Nefeso, ba hadia gunania khõgu? Na lõ tesusugi zi mate, ba ”datalau mangamanga ba datalau mamadumadu hadia ia, mahemolu mate sa atṍ ita.” (Hal. zin. 19, 29 b. t. Yes. 22, 13). 

33 Bõi mibe’e nifaelungu ami. Ifakiko mbõwõ si sõkhi huhuo si lõ sõkhi.

34 Mibõhõli sibai wemabu andrõ ba bõi mifazõkhi horõ; so sa õsa zi lõ aboto ba dõdõ Lowalangi; ba wangailasi ya’ami uŵa’õ da’õ. (Tes. I. 5, 6—8).

35 II. Ba te so zanguma’õ: ba he wisa wanusugi si mate andrõ? He wisa mbotora, na so ira? (Hes. 37, 3. Yes. 26, 19). 

36 He si lõ mangila watahõgõ! tanõmõ nitarumõ andrõ, ba lõ auri, na lõ mate ua. (Yoh. 12, 24). 

37 Ba nitarumõ andrõ, ba tenga boto andrõ si so dania õtaru, he sambalõ ulitõ, ta’ila na gandru, ba ma hadia ia mbõ’õnia. 

38 Ba Lowalangi zame’e khõnia boto, somasi ia; ba sambalõ danõmõ, ba sambalõ mboto dania. (F. 12, 8. Moz. I. 1, 11). 

39 Lõ’õ sa oi fagõlõgõlõ nõsi hadia ia; sambua sa nõsi niha, ba sambua nõsi gurifõ niha, ba sambua nõsi wofo, ba sambua nõsi gi’a. 

40 Ba so mboto yaŵa, ba so mboto ba guli danõ, ba sambua lakhõmi zi so yaŵa, ba sambua lakhõmi zi so ba guli danõ. (Mat. 22, 30. Hal. zin. 12, 7).

41 Sambua haga luo, ba sambua haga mbaŵa, ba sambua haga ndrõfi; a’oi sa faehu na i wa’abõlõ haga ndrõfi. 

42 Si manõ gõi wemaoso zi mate andrõ. Sobou nitanõ, ba si lõ obou nisusugi. 

43 Si lõ tõi nitanõ, ba si so lakhõmi nisusugi; si lõ abõlõ nitanõ, ba sabõlõ nisusugi. (Fil. 3, 21. Kol. 3, 4). 

44 Boto si so noso nitanõ, ba boto si so Eheha nisusugi. Na so mboto si so noso, ba so gõi mboto si so Eheha. 

45 Si manõ gõi ba zura: ”No tobali sonoso niha si fõfõna andrõ, Adamo”, ba Adamo safuria andrõ, ba no tobali Eheha sangorifi, (Moz. I. 2, 7. Yob. 19, 25), 

46 Ba tenga si fõfõna zi so Eheha, si so noso zi fõfõna, awena zi so Eheha. 

47 Moroi ba guli danõ niha si fõfõna andrõ, tanõ, ba moroi ba zorugo niha si sambua. (Moz. I. 3, 19. Yoh. 3, 13. 31). 

48 Si mane si otarai ba danõ andrõ, si manõ fefu zi otarai ba danõ, ba si mane si otarai zorugo andrõ, si manõ fefu mbanua zorugo; 

49 ba si mane foloheda famaedo zi otarai ba danõ andrõ, si manõ gõi dania woloheda famaedo zi otarai zorugo andrõ. (Rom. 8, 29). 

50 Ba da’õ niŵa’õgu, ya’ami, ira talifusõ, tebai isõndra mbanua Lowalangi õsi niha andrõ, ba tebai isõndra wa lõ obou sobou andrõ. (Yoh. 1, 13). 

51 Hiza, si no tobini u’ombakha’õ khõmi: Lõ ahori mate ita, ba ahori tobali, (Tes. I. 4, 15 b. t.), 

52 i’ogomuzaõ, ha mamõ’i hõrõ wa’ara, na telau dorofe safuria andrõ; telau sa ia dania, ba maoso zi no mate andrõ, tebai sa’ae obou, ba ya’ita, ba si tobali. (Mat. 24, 31).

53 Lõ’õ sa tola lõ i’onukha wa tebai obou sobou andre, ba lõ tola lõ i’onukha wa tebai mate si mate andre. (Kor. II. 5, 4). 

54 Ba na no i’onukha wa tebai obou sobou andre, ba na no i’onukha wa tebai mate si mate andre, ba awena itõrõ daroma li andrõ, si so ba zura: ”No alõmõ wa’amate andrõ ba wemõna. (Yes. 25, 8). 

55 Hezo wemõnau, fa’amate? Hezo duomõ, fa’amate?” (Hos. 13, 14). 

56 Ba tuo wa’amate andrõ, ba ya’ia horõ andrõ, ba fa’abõlõ horõ andrõ, ba ya’ia goroisa. (Rom. 5, 12. 13. 20; 7, 9 b. t.). 

57 Ba nisuno Lowalangi same’e khõda femõna andrõ, moroi khõ Zo’aya ya’ita andrõ, Yesu Keriso. (Rom. 7, 25; 8, 37. Yoh. I. 5, 4. 5). 

58 Andrõ, ya’ami ira talifusõgu, somasi ndra’o, ya’abe’e ami, si lõ humeuheu, ya’a’oi so khõmi wangai halõŵõ Zo’aya andrõ, bõi yamamalõmalõ, me no mi’ila, tenga zayazaya gõlõ wa’erege dõdõmi andrõ, ba khõ Zo’aya. (Nga’õt. II. 15, 7. Mat. 25, 13. Kol. 2, 6. 7).

 

KORINDRO I.

FAZA 16

 

I. He wisa wangozaragõ tolotolo andrõ, nifa’ohe’õ ba Yudaia. II. He lawisa na mõi khõra Dimoteo. III. Fango’ozui sura.

1 I. Ba ba dolotolo andrõ, ba ni’amoni’õ andrõ, ba mi’o’õ hadia nifakhoigu ba mbanua misa ba Galatia. (Kor. II. 8, 1 b. t. Rom. 12, 13. Hal. zin. 11, 29). 

2 Ero migu mibe’e yaŵa ma’ifu ba da’õ, dozi ami, balazi wa’ebua nisõndra zamõsana; fa bõi awena la’ozaragõ, na so ndra’o. (Hal. zin. 20, 7. Fam. 1, 10). 

3 Ba na sodo, ba ufatenge zi tola niŵa’õmi, ufa’ohe’õ zura, ba wolohe tolotolomi andrõ ba Yeruzalema. (Kor. II. 8, 16. 19). 

4 Ba na si nangea mõi ndra’odo gõi, ba ndramõi awõgu. 

5 Ba awena mõido khõmi, na no utõrõ Makedonia. Utõrõ sa Makedonia; (Kor. II. 1, 16. Hal. zin. 19, 21); 

6 ba ba khõmi, ba ta’ila na arado, ma ubase’õ gõi wa’aefa mbaŵa deu, ena’õ fao ami khõgu, heza mõido. (Hal. zin. 20, 2 b. t.). 

7 Lõ’õ sa edõnado iada’e ha ba wanõrõ u’ila ami, udõnadõna sa, arado ma’ifu ba khõmi, na itehe So’aya. (F. 4, 19). 

8 Ba ba Nefeso sodo irugi luo wendrakose.

9 Noa sa ebua mbawandruhõ si teboka khõgu ba halõŵõ, ba no ato zi fa’udu. (Hal. zin. 14, 27).

10 II. Ba na so Dimoteo, ba mifaigi, ena’õ lõ ada’uda’u ia ba khõmi; halõŵõ Lowalangi sa ihalõ, si mane ya’o gõi. (F. 4, 17. Fil. 2, 19. 20). 

11 Andrõ, bõi yamu’ositengagõ ia niha, ha niha ia; ba mifasao ia, bõi mibusi dõdõnia, ena’õ mõi ia khõgu; udõnadõna sa ia, awõ dalifusõ andrõ. (Tim. I. 4, 12). 12 Ba ba khõ Afolo andrõ, talifusõ andrõ, ba no uforege wangandrõ khõnia, ena’õ mõi ia khõmi, awõ dalifusõ andrõ; ba lõ’õ manõ edõna ia mõi iada’e, ba mõi sa dania, na isõndra lala. (F. 3, 5. 6).

13 III. Bõi mifõrõ, mi’abe’e’õ ami wamati, si mane ira matua, ya’abõlõ ami! (F. 15, 34. 58. Hal. zin. 20, 31. Mat. 25, 13. Efes. 6, 10). 

14 Fefu hadia ia khõmi, ba moroi ba wa’omasi milau. (Kol. 3, 14). 

15 Ba u andrõ khõmi, ya’ami ira talifusõ: no mi’ila ndra Sefana andrõ, samba omo ira, wa no bõrõta ira ba Nakhaya, awõ wa no mõi ira enoni ni’amoni’õ andrõ; — (F. 1, 16); 

16 ena’õ mifondrondrongo li zi manõ, awõ li zi no manolo ba halõŵõ, fefu, si no erege tõdõ gõi. 

17 Ba omuso dõdõgu, me no so Zefana ba Fotunato ba Akha’iko, me no salahi ira ba zi lõ ya’ami. (Kor. II. 11, 9). 

18 Noa sa la’okafui dõdõgu ba tõdõmi. Andrõ, bõi zi lõ aboto ba dõdõmi zi manõ. (Kor. II. 7, 13. Tes. I. 5, 12. 13). 

19 La’owai ami banua andrõ ba Azia misa. I’owai sibai ami Akila ba Ferikila, ba khõ Zo’aya, awõ zowulo andrõ yomo khõra. (Fam. 1, 4. 11. Hal. zin. 18, 2 b. t.). 

20 La’owai ami tahfusõ andrõ fefu. Faoma mi’owai nawõmi fa’agosa bawa andrõ ni’amoni’õ. (Rom. 16, 16). 

21 Fangowaigu da’e, tangagu zanura, tanga Waulo andre. (Kol. 4, 18). 

22 Na so zi lõ mangomasi’õ So’aya andrõ, ba ya anatema (ni’elifi); maranata (so dania Zo’aya). (Gal. 1, 8). 

23 Yafalukha ami wa’ebua dõdõ Zo’aya ya’ita, Yesu! (Rom. 16, 24). 

24 No falukha ami fefu wa’omasigu, ba khõ Keriso Yesu.