SURA KOLOSE

Table of Contents

 

SURA KOLOSE

 

KOLOSE

FAZA 1

 

I.                  Fangowai Waulo. II. Fangandrõ saoha gõlõ ba fangandrõ salahi mbanua Golose andrõ. III. Fa’asalaŵa Yesu, ba lakhõminia. IV. Halõŵõ Waulo.

 

1  I. Faulo, sinenge Yesu Keriso andrõ, moroi ba wa’omasi Lowalangi, ba talifusõ andrõ, Timoteo, zanura da’e, (Fil. 1, 1),

2 ba ni’amoni’õ andrõ, ba Golose, talifusõ samati andrõ, ba khõ Keriso Yesu. Yafalukha ami wa’ebua dõdõ ba fa’ohahau dõdõ, khõ Namada Lowalangi. (Tes. I. 1, 1).

3 II. Ma’andrõ saoha gõlõ khõ Lowalangi Zo’aya ya’ita, Yesu Keriso, khõ Namania, lõ mamalõmalõ, na mangandrõga, salahimi, (Efes. 1, 15. 16), 

4 me no marongo wamatimi andrõ khõ Keriso Yesu, ba fa’omasi andrõ, si so khõmi, fa’omasimi ni’amoni’õ fefu. (Filem. 5). 

5 Bõrõ dõtõnafõ andrõ, ni’irõ’õ khõmi, ba zorugo, si no mirongo sa’ae, ba daroma li si duhu andrõ, ba duria somuso dõdõ, (Fet. I. 1, 3. 4. Efes. 1, 13), 

6 si no mõi khõmi, si mane ba guli danõ ma’asagõrõ gõi, ba mowua ba manõi, si mane ba khõmi gõi, i’otarai luo andrõ, me mirongo ia, ba me aboto ba dõdõmi wa’ebua dõdõ Lowalangi andrõ, ba zi duhu. (Yes. 55, 11. Mar. 4, 8). 

7 Si mane nirongomi khõ Gefafera, awõma ba halõŵõ, ni’omasi’õ andrõ, enoni Keriso, si lõ farõi, ba khõmi. (F. 4, 12). 

8 Ya’ia gõi zangombakha khõmi wa’omasimi andrõ, soroi ba Geheha. 

9 Ba andrõ ya’aga gõi, lõ mabato, i’otarai luo andrõ, me marongo, mangandrõga salahimi, maandrõ, ena’õ tehõna khõmi wa’aboto ba dõdõmi zomasi ia, na tebe’e khõmi ngawalõ wa’atuatua fefu, awõ ngawalõ wangila fefu, soroi ba Geheha; (Efes. 1, 15 b. t.),

10 ena’õ amuata dána khõ Zo’aya gamuatami, fa bõi si lõ omasi ia khõmi, ena’õ mowua ami, fefu ngawalõ mbuabua si sõkhi, ba ena’õ tedou wa’aboto ba dõdõmi Lowalangi; (Efes. 4, 1. Heb. 13, 21); 

11 ena’õ abõlõ ami, ena’õ tedou khõmi fefu ngawalõ wa’abõlõ, dali wa’abõlõ lakhõminia andrõ, ena’õ a’oi so khõmi wanaha tõdõ, awõ wa’ebolo dõdõ, ba ena’õ omuso dõdõmi, (Efes. 3, 16), 

12 wangandrõ saoha gõlõ khõ Nama, si no mangehao ya’ita, ba wanema tána ba niha ni’amoni’õ andrõ, ba haga andrõ; 

13 si no mangefa’õ ya’ita ba wa’abõlõ zogõmigõmi andrõ, si no mamawu’a ya’ita, si no molohe ya’ita ba mbanua Nono wa’omasinia andrõ. (Hal. zin. 26, 18).

14 Ba zi so khõda fangõhõli, fangefa’õ horõ andrõ. (Efes. 1, 7).

15 III. Famaedo Lowalangi si lõ oroma andrõ ia, si a’a moroi ba nifazõkhi andrõ, fefu hadia ia. (Heb. 1, 3. Fam. 3, 14). 

16 Ba khõnia sa mbõrõ wamazõkhi hadia ia, fefu, he si so ba zorugo, ba he si so ba guli danõ, soroma ba si lõ oroma, he sidadao, ba he so’aya, ba he samatõrõ, ba he salaŵa andrõ. Fefu, hadia ia, ba oi ya’ia zamazõkhi, ba oi ba khõnia, wa tefazõkhi, (Yoh. 1, 3. 10. Kol. 2, 10), 

17 ba ya’ia, ba no fõna dánõ bõ’õ fefu, ba ba khõnia aro fefu, hadia ia. (Fam. 22, 13. Yoh. 17, 5). 

18 Ba ya’ia hõgõ mboto andrõ, hõgõ mbanua, ya’ia mbõrõta, si a’a zi otarai zi mate andrõ, ena’õ fõna ia, fefu gofu heza. (Efes. 1, 22 b. t. Fam. 1, 5. Kor. I. 15, 20). 

19 Me no si manõ wa’omasi Lowalangi, wa ba khõnia monahia zi fahõna andrõ, fefu, (F. 2, 9. Yoh. 1, 16), 

20 awõ wa ya’ia zangatulõ fefu hadia ia, khõnia, na i’atulõ’õ donia andrõ, ba rõfania, ya’ia mbõrõ, he ba zi so ba guli danõ, ba he ba zi so ba zorugo. (Kor. II. 5, 18. Efes. 2, 14. 16). 

21 Ya’ami gõi, me no fabali ami fõna, me no fa’udu ami, ba gera’erami, ba mbuabuami andrõ, si lõ sõkhi, ba no i’atulõ’õ ami iada’e, (Rom. 5, 6. 10. Efes. 2, 15 b. t.), 

22 fa’amate andrõ, ba mboto nõsinia andrõ, ba wamali’õ ni’amoni’õ ya’ami, si dõ sala, si lõ sinegu, fõnania; (Tit. 2, 14);

23 na lõ’õ sa atṍ mamalõmalõ wamatimi, na no modanedane ami, na aro, na lõ tebulõ ami ba wanõtõna andrõ, niŵa’õ ba duria somuso dõdõ andrõ, nirongomi, ni’ombakha’õ ba nifazõkhi Lowalangi andrõ, si so ba guli danõ, fefu, si no tobali enoni ndra’o, ya’odo, Faulo andre. (Kor. I. 15, 58. Kol. 2, 7; 1, 6).

24 IV. Iada’e omuso dõdõgu, ba wamakao andre, salahimi, ba ubõnõkhi ba nõsigu andre zambõ na ba wamakao Keriso andrõ, salahi mbotonia, banua andrõ, (Efes. 3, 1. 13. Hal. zin. 9, 16), 

25 ba zi no tobali enoni ndra’odo, dali nihonogõi Lowalangi andrõ, nibe’e ba dangagu, ba khõmi andrõ, ba wamo’ahonoa fangombakha taroma li Lowalangi andrõ, (Efes. 3, 7), 

26 si no tobini andrõ, si lõ oroma, gõtõgõtõ wa’ara, ba ba nga’õtõ ndra tua andrõ, ba iada’e, ba no tefa’ele’õ ia, ba ni’amoni’õ andrõ khõnia. (Rom. 16, 25 b. t.). 

27 Khõra edõna Lowalangi i’oroma’õ, he wisa wa’ebua lakhõmi zi no tobini andrõ, ba niha baero, ya’ia Keriso ba khõmi, tõtõnafõ lakhõmi andrõ. (Kor. II. 13, 5. Efes. 3, 17). 

28 Ya’ia ni’ombakha’õma ba madozigõ niha, wamarou tõdõra, madozigõ niha, wamahaõ ya’ira ba ngawalõ wa’atuatua, fefu, ena’õ dozi niha mo’ahonoa fa’atulõ, ba khõ Keriso, mabe’e. 

29 Ba khõ da’õ sa gõi mohalõŵõdo, fasõndrado, balazi wa’abõlõnia, sangabõlõ’õ sibai ya’odo. (F. 4, 12).

 

 

KOLOSE

FAZA 2

 

I.                  Famarou tõdõ, ba wanga’aro’õ famati. II. Famangelama, ba zamaelungu, ba ba wa’atuatuara faya andrõ.

 

1 I. Omasi sa ndra’o, na mirongo he wisa wa’abu dõdõgu andrõ, bõrõ ami ba ya’ira ba La’odikia, ba dozi si lõ irai fa’ila khõgu, (F. 4, 13),

2 ena’õ terara dõdõra, na no fabõbõ ira, ba wa’omasi andrõ, ba ena’õ lakhamõ a’oi so wangila andrõ, lõ manufa dõdõ, ena’õ aboto ba dõdõ zi no tobini andrõ, khõ Lowalangi, Keriso andrõ, 

3 ba zi no tobini fefu ngawalõ girõgirõ fa’atuatua, awõ girõgirõ fa’aboto ba dõdõ. (Kor. I. 1, 24). 

4 Andrõ uŵa’õ da’õ, fa bõi ilimo ami niha, ha niha ia, ba huhuo famowõhõ. (Efes. 5, 6). 

5 He sa lõ botogu andre, ba sodo sa ba khõmi tõdõgu; omuso dõdõgu, wangila fa’ehao andrõ khõmi, awõ wa’aró dõdõmi, wamati khõ Keriso. (Kor. I. 14, 40). 

6 Ba si mane fanemami Yesu Keriso, So’aya,

7 si manõ gõi mitõrõ lalania, ba khõnia yamoŵa’a ami, si tedoudou, ni’abe’e’õ, ba wamati andrõ, dali wamahaõ ya’ami andrõ; yafahõna khõmi wangandrõ saoha gõlõ, (F. 1, 23. Efes. 2, 20; 4, 15).

8 II. Mifaigi, fa bõi ilimo ami niha, ha niha ia, ba wa’atuatua niha guli danõ andrõ, ba ba wayafaya andrõ, wolo’õ nifa’ema niha, huku ba niha guli danõ; si tenga folo’õ khõ Keriso. (Efes. 4, 14. Rom. 16, 18). 

9 Ba khõnia sa monahia gahonoa wa’alowalangi andrõ, ma’afefu, moboto. (F. 1, 19. Yoh. 1, 14). 

10 Ba khõnia, wa no fahõna khõmi; ba ba zamatõrõ andrõ, fefu, ba ba zalaŵa andrõ, fefu, ba no ya’ia hõgõ. (F. 1, 16. Efes. 1, 21. 23). 

11 Ba khõnia gõi no muboto ami, tenga ni’amoto’õ tanga, famoto fangeheta boto nõsi andrõ, famoto khõ Keriso andrõ, (Fil. 3, 3. Kol. 3, 5—9), 

12 me no teko’o ami, awõnia, ba wamayagõ idanõ andrõ; ba khõnia gõi no mususugi ami, awõnia, bõrõ wamati ba wa’abõlõ Lowalangi andrõ, si no manusugi ya’ia moroi ba ngai zi mate. (Rom. 6, 4. 5. Efes. 2, 5 b. t. Kol. 3, 1). 

13 Ya’ami gõi, si no mate fõna, ba wanawõnawõ oroisa andrõ, ba ba nõsimi andrõ, si lõ muboto, ba no i’orifi, awõnia, me no ibe’e bualania khõda lalõ andrõ fefu, (Efes. 2, 1; 5, 11. Kor. II. 5, 19), 

14 me no ibunu zura gõmõda andrõ, fangadugõ ya’ita andrõ, amakhoita andrõ, ududa; no iheta, me no i’osõ ba rõfa; (Efes. 2, 15); 

15 me iheta wangõna zamatõrõ andrõ, ba fangõna zalaŵa andrõ, me ibali’õ aya ira ba zanehe zato, me i’oroma’õ, wa no abõlõ ia moroi khõra, ba rõfa andrõ. (Luk. 11, 22). 

16 Ba bõi sa’ae yamuhuku ami niha ba ni’ā, ba ma ba nibadu, ba ma ba luo ni’amoni’õ, ba ma ba wasulõna, ba ma ba zabato. (Heb. 9, 10. Rom. 14, 2 b. t. Moz. III. 23). 

17 Lumõ zi so dania da’õ, ba khõ Keriso mboto. (Heb. 8, 5; 10, 1). 

18 Bõi ilimo ami niha, ha niha ia, ba luo zabõlõ andrõ, niha somasi fa’adugudugu, ba famosumange mala’ika, niha solo’õ angilatania, si so hokha si lõ bõrõ, ba gera’era dõdõ nõsinia, (Tim. I. 6, 3 b. t.), 

19 ba si lõ molemba ba hõgõ andrõ; ba moroi ba da’õ sa tetolo mboto ma’afefu, ba wamabõbõ andrõ, ba ba nuo, moroi ba da’õ tefabõbõ ia, ba manõi, ba wa’ebua andrõ nibe’e Lowalangi. (Efes. 4, 15. 16). 

20 Ba na no mate ami, awõ Keriso, ba huku niha guli danõ andrõ, ba hana wa labe’e goroisa khõmi, hulõ ba zi lõ mate na, ba niha guli danõ, wanguma’õ: (Gal. 4, 9). 

21 Bõi halõ! bõi ā! bõi babaya! (Moz. III. 5, 2. Tim. I. 4, 3),— 

22 ba oi sa atõ ba wa’atekiko tebe’e ia, ba wangoguna’õ ya’ia — wolo’õ amakhoita ba famahaõ ba niha: (Mat. 15, 9. 17. 18); 

23 fa’atuatua sa laŵa’õ, ba wame’e sumange si lõ mu’oroi’õ, ba ba wa’adugudugu, ba ba wamakao boto, be tenga ba wangõhõndrõgõ fa’abõlõ nõsi andrõ. (Tim. I. 4. 8).

 

 

KOLOSE

FAZA 3

 

I.                  Famarou tõdõ, ba wangalui si so ba zorugo. II. Famarou tõdõ, ba zatulõ, ba III. ba wangomasi’õ awõ. IV. He lawisa niha Keriso, ba khõra moroi yomo.

 

1 I. Ba na no maoso ami, awõ Keriso, ba mi’alui zi so si yaŵa, ba zi so Keriso, sidadao ba gambõlõ Lowalangi. (F. 2, 12. 13. Heb. 12, 2). 

2 Si so si yaŵa mifatoutou tõdõmi, bõi si so ba guli danõ (Mat. 6, 33). 

3 Noa sa mate ami, ba no tobini wa’aurimi andrõ, awõ Keriso, ba khõ Lowalangi. (Rom. 6, 2. 11).

4 Ba na to’ele dania Keriso, fa’aurimi andrõ, awena dania to’ele gõi ami, awõnia, ba lakhõmi. (Fil. 1, 21. Tes. II. 1, 7. 10. Fet. I. 4, 13).

5 II. Ba mibunu sa’ae ndrotondroto andrõ, si so ba guli danõ: fohorõ, ba fa’ara’ira’iõ, ba hokha, ba fangisõ si lõ sõkhi, ba fa’omasi gana’a; no famosumange adu da’õ; (Efes. 5, 3. 5); 

6 da’õ fefu mbõrõ, wa tesao wõnu Lowalangi. (Efes. 5, 6). 

7 Ya’ami gõi, ba no mitõrõ da’õ fõna, me ba da’õ nahami. (Efes. 2, 1—3). 

8 Ba iada’e, ba mibõhõli gõi da’õ fefu: Fõnu, ba fa’abao dõdõ, ba fa’afaito, ba fanandraŵa, ba fehede si lõ sõkhi, si oroi mbewemi. (Yak. 1, 21. Efes. 4, 29; 5, 4). 

9 Bõi milimo nawõmi, me no miheta niha si tohõna andrõ, fabaya nilaulaunia andrõ, (Efes. 4, 22. 25), 

10 ba me no mi’onukha zi bohou andrõ, nibohouni, ba wa’aboto ba dõdõ andrõ, dali wamaedo zamazõkhi ya’ia andrõ, (Efes. 4, 24. Moz. I. 1, 27),

11 ba zi lõ Dawa Heleni ba lõ niha Yehuda, ba lõ niboto ba lõ si lõ muboto, lõ niha bõ’õ, ba lõ Sikito, lõ sawuyu, ba lõ si tenga sawuyu, ha sambalõ Keriso manõ, ba dõdõra fefu. (Gal. 3, 28; 5, 6).

12 III. Ba me no nitutuyu Lowalangi ami, ni’amoni’õ ba ni’omasi’õ, ba mi’onukha wa’ahakhõ dõdõ, ba fa’ebua dõdõ, ba fa lõ fayaŵa, ba fa’ebolo dõdõ, ba fanaha tõdõ. (Efes. 4, 2. 32). 

13 Faoma mibologõ dõdõmi khõ nawõmi, ba faoma mi’efa’õ zala nawõmi khõmi, na so zinegu zamõsana khõ nawõnia; si mane fangefa’õ Keriso khõmi, si manõ gõi ami. (Efes. 5, 2. Mat. 6, 14 b. t.). 

14 Ba baero da’õ fefu, ba fa’omasi; da’õ wamabõbõ fa’amo’ahonoa. (Yoh. 13, 34; 15, 12. Fet. I. 4, 8). 

15 Ba yamufatõrõ dõdõmi fa’ohahau dõdṍ andrõ, khõ Keriso, ba nikaoni ya’ami; ha sambua boto; ba mi’andrõ saoha gõlõ. (Fil. 4, 7).

16 Yamonaha ba khõmi daroma li Keriso andrõ, yafahõna; ya’a’oi so wa’atuatuami, ba wamahaõ awõmi ba ba wamarou tõdõra, sinunõ ba umanõ ba lailõ dõdõ, yafao wangandrõ saoha gõlõ; misuno Lowalangi ba dõdõmi. (Efes. 5, 19. Kor. I. 14, 26).

17 Ba fefu hadia ia nilaumi, he taroma li, ba he halõŵõ, ba ba dõi Yesu, So’aya, milau ia, fefu, wangandrõ saoha gõlõ khõ Lowalangi Ama; Yesu zama’ema. (Kor. I. 10, 31. Efes. 5, 20).

18 IV. Ya’ami ira alawe, mi’o’õ li ndra matua; si manõ zi nangea, ba khõ Zo’aya. (Efes. 5, 22 b. t.). 

19 Ya’ami ira matua, mi’omasi’õ ndra alawe, ba bõi abao dõdõmi khõra. 

20 Ya’ami iraono, mifondrondrongo li ndra amami gofu hadia ia niŵa’õ khõmi, da’õ sa ni’omasi’o, ba khõ Zo’aya. (Efes. 6, 1 b. t.). 

21 Ya’ami ira ama, bõi mi’andrõ wõnu ndraonomi, fa bõi ada’uda’u ira. 

22 Ya’ami sawuyu, mifondrondrongo li zokhõ botomi, gofu hadia ia niŵa’õ khõmi, bõi ha ba zanehe ira, si mane niha sangalui fa’omasi niha ira; moroi si’aikõ ba dõdõmi, me no sangata’ufi So’aya ami. (Efes. 6, 5 b. t.). 

23 Hadia ia nifazõkhimi, ba moroi ba dõdõ milau ia, hulõ na khõ Zo’aya, 

24 ba na tenga ba niha, me no mi’ila, wa khõ Zo’aya mitema dania luo, ondrõita andrõ; enoni Zo’aya, Keriso, ami. 

25 Itema sa zulõ zi lõ atulõ andrõ, nilaunia, solau si lõ atulõ, ba lõ ebua dõdõ zambuana. (Kor. II. 5, 10. Rom. 2, 11).

 

 

KOLOSE

FAZA 4

 

I.                  Famarou tõdõ ba wangandrõ, ba ba wangenanõ. II. Fango’ozui sura.

 

1 I. Ya’ami sokhõ niha bõ’õ, hadia zatulõ, hadia zi nangea, da’õ milau ba zawuyu andrõ, me no mi’ila, so Zo’aya ya’ami gõi ba zorugo. (Efes. 6, 9). 

2 Bõi mibõhõli wangandrõ; bõi mõrõ ami ba da’õ, yafao wangandrõ saoha gõlõ. (Efes. 6, 18. Tes. I. 5, 17). 

3 Ba ya’itõrõ gõi limi ndra’aga, ba da’õ, ena’õ ifolala khõma Lowalangi daroma li andrõ, ba wangombakha si no tobini andrõ, khõ Keriso, da’õ gõi mbõrõ, wa no murate ndra’o. (Efes. 6, 19. 20). 

4 Ena’õ u’ila ubokai ia, ba ena’õ u’ila u’o’õ niŵa’õ khõgu, wangombakha. 

5 Bõi zi lõ atuatua ami, ba wolau nilaumi, ba zi so baero andrõ, ba mifaigi ginõtõ, si gõna. (Efes. 5, 15. 16).

6 Bõi tebulõ khõmi wangehao fehedemi, nilau asio, fa mi’ila, he miwisa wanema li zamõsana. (Mar. 9, 50. Amaed. 10, 32).

7 II. Fefu hadia ia, ba khõgu andre, ba i’ombakha’õ khõmi dania Tikhiko, talifusõ ni’omasi’õ andrõ, enoni si lõ farõi andrõ, awõgu sangai halõŵõ, ba khõ Zo’aya. (Efes. 6, 21. 22). 

8 Da’õ mbõrõ, wa ufatenge ia khõmi, ena’õ mirongo he wisa ba khõma andre, ba ena’õ irara dõdõmi. 

9 Awõnia Gonesimo, talifusõ andrõ, si lõ farõi, ni’omasi’õ, banuami. La’ombakha’õ dania khõmi fefu, he wisa ba da’e. (Filem. 10 b. t.). 

10 I’owai ami Arisaro, awõgu nikuru andrõ, ba Mareko, talifusõ Mbaranaba andrõ, ba nitemami oroisa — na irugi ami, ba mifa’amõi ia khõmi — (Hal. zin. 27, 2. Tim. II. 4, 11), 

11 ba Yesu andrõ, sotoi Yuso. Ha da’õ nawõgu niha niboto, sohalõŵõ ba mbanua Lowalangi; no tobali fondrara dõdõgu ira. 

12 I’owai ami Efafera, banuami andrõ, enoni Keriso Yesu; lõ tebulõ wa iforege wangandrõ, salahimi, ena’õ abe’e ami, ena’õ mo’ahonoa, ba ena’õ faduhu sibai dõdõmi, ba zomasi Lowalangi andrõ, fefu. (F. 2, 1. Fam. 3, 14). 

13 Ufaduhu’õ khõmi, ba khõnia andrõ, wa no erege dõdõnia, bõrõ ami ba banua La’odikia andrõ ba banua Hierafoli. 

14 I’owai ami Luka, doto andrõ, ni’omasi’õ, ba Dema. (Filem. 24). 

15 Mi’owai dalifusõ andrõ, ba La’odikia, ba Nimefa, ba banua andrõ, baomo khõnia. 

16 Ba na no mubaso zura andre, ba khõmi, ba mibe’e nibaso ba mbanua ba La’odikia gõi, ba ena’õ tebaso gõi ba khõmi zura ba mbanua La’odikia andrõ. 

17 Ba mimane khõ Arikhifo andrõ: ”Faigi halõŵõ andrõ nitemau ba khõ Zo’aya, fa õ’asiwai.” (Filem. 2). 

18 Fangowaigu da’e, tangagu zanura, tanga Waulo andre. Mitõrõtõrõ tõdõmi rategu andre. Yafalukha ami wa’ebua dõdõ. (Kor. I. 16, 21, Heb. 13, 3. Tes. I. 5, 28).