SURA HEBERAI’O

Table of Contents

 

SURA HEBERAI’O

 

HEBERAI’O

FAZA 1

 

I.                  Fama’ele’õ Lowalangi ya’ia, ba khõ Nononia andrõ. II. Fa’asalaŵa Nononia; yaŵa mala’ika ia.

 

1 I. Me no aefa wehede Lowalangi fõna, khõ ndra tuada, si no asese, ba si no oya ngawalõ, nifa’ema zama’ele’õ andrõ, ba no muhede ia, me luo safuria andre, khõda, nifa’ema Nononia. (Moz. IV. 12, 6 b. t. Hal. zin. 3, 22. 24. Fet. I. 1, 20. Yoh. 15, 15).

2 II. Nifataronia sanema ondrõita, fefu, hadia ia, nibe’enia gõi samazõkhi danõ’a, (F. 2, 7. 8. Efes. 1, 20 b. t. Yoh. 1, 3. 10), 

3 si no haga lakhõminia andrõ ba dumaduma mbotonia, sanaya fefu hadia ia, taroma li fa’abõlõnia andrõ, ba no isõndra wangehao andrõ, fameta horõ, ba no mudadao ia ba gambõlõ wa’asalaŵa andrõ, ba zalaŵa yaŵa; (Kor. II. 4, 4. Kol. 1, 15. F. 9, 14. 26; 12, 2); 

4 ba no tohude ia moroi ba mala’ika, ndrohundrohu wa’atohude dõi andrõ, nitemania, moroi ba dõira. (Fil. 2, 9). 

5 Ha niha sa mala’ika, ba zi no irai iŵaõ: ”Onogu ndra’ugõ, ma’õkhṍ andre no mo’ono ndra’o ya’ugõ?” Ba imane zui: ”Amania ndra’odo ba Onogu ia.” (F. 5, 5. Sin. 2, 7. Sam. II. 7, 14). 

6 Ba so zui, me ifataro ba guli danõ zi a’a ba wa’atumbu andrõ, ba imane: ”Ba yamangalulu khõnia mala’ika Lowalangi, fefu.” (Kol. 1, 15. Rom. 8, 29. Sin. 97, 7. Efes. 1, 21). 

7 Ba imane sa ba mala’ika andrõ: ”Samali’õ angi mala’ikania, ba samali’õ holahola galitõ enoninia”. (Sin. 104, 4). 

8 Ba ba Nono andrõ, ba imane: ”Dadaomamõ, ya’ugõ Lowalangi, ba no si lõ tebulõ, gõtõgõtõ wa’ara, ba si’o ba wa’atulõ zi’o zalaŵa andrõ khõu. (Sin. 45, 7. 8). 

9 No omasi ndra’ugõ wa’atulõ, ba no fa’udu ndra’ugõ ba zi lõ atulõ; andrõ no ibayoini ndra’ugõ Lowalangiu, ya’ugõ Lowalangi, fanikha fa’owuawua dõdõ, no ihude’õ ndra’ugõ, moroi ba nawõu.” (Yes. 61, 1). 

10 Ba: ”Ya’ugõ So’aya zolata tanõ, ba mbõrõta, ba nifazõkhi dangau mbanua si yaŵa; (Sin. 102, 26—28); 

11 ya’ia, ba sadudu dania, ba ya’ugõ, ba si lõ tebulõ; ba atua dania da’õ fefu, timba mbaru, (Yes. 51, 6. Fet. II. 3, 10), 

12 ba õgõlugõ dania, hulõ lembe, ba tobali dania, ba ya’ugõ, ba ya’uya’ugõ manõ, ba si lõ aetu ndrõfiu.” 

13 Ba ha niha ba mala’ika, ba zi no irai iŵa’õ: ”Dadao ba gambõlõgu, irege no ube’e danedane gaheu zi fatiu tõdõ khõu?” (Sin. 110, 1). 

14 Tenga no a’oi bekhu enoni ira, nifatenge sanolo ba zanema fangorifi andrõ dania? (Sin. 34, 8; 92, 11 b. t. Mat. 18, 10).

 

HEBERAI’O

FAZA 2

 

I.                  Famangelama, fa bõi la’ositengagõ lala wangorifi andrõ, khõ Lowalangi. II. Fa’asalaŵa Keriso, me no aefa i’ide’ide’õ ia. III.  tobali talifusõda ia, ba wangorifi ya’ita.

 

1 I. Andrõ mendrua manõ ta’olembai ena’õ nirongoda andrõ, fa bõi ahani ita. 

2 Na no aro sa’ae daroma li andrõ, ni’ombakha’õ mala’ika, ba na no tesulõni si nangea khõnia fefu ngawalõ wanawõ, awõ ngawalõ wa lõ molo’õ fefu, (Hal. zin. 7, 53. Gal. 3, 19), 

3 ba he tawisa wangefa’õ ya’ita, na ta’ositengagõ wangorifi si manõ fa’ebua? nifobõrõ ba wangombakha Zo’aya andrõ, nifaduhu’õ zamondrongo khõnia andrõ, khõda, (F. 10, 29. Mar. 1, 14),

4 nifo’awõ famaduhu’õ andrõ khõ Lowalangi, ba dandra andrõ, ba ba gila’ila, ba ba ngawalõ hadia ia wa’abõlõ, ba ba wame’eme’e Eheha ni’amoni’õ andrõ, dali zomasi ia. (Hal. zin. 14, 3. Kor. I. 12, 4. 11).

5 II. Tenga sa barõ mbawa mala’ika ibe’e zi sagõtõ tanõ dania, niŵa’õŵa’õma. (Fet. II. 3, 13). 

6 Ba noa sa so zamaduhu’õ, samuza, no imane: ”Hadia niha, wa itõrõ tõdõu? ba ono niha, wa õfaigi ia? (Sin. 8, 5 b. t.). 

7 No õ’ide’ide’õ ia, si lõ ararā, tou mala’ika; no õfotakula ia, lakhõmi ba sumange, (Luk. 22, 43), 

8 no õbe’e barõ gahenia fefu, hadia ia.” Ba wame’e barõ mbawa andrõ sa fefu, hadia ia, ba lõ nisaigõnia, si lõ mube’e barõ mbawania. Ba iada’e, ba lõ’õ na ta’ila, no mube’e barõ mbawania fefu, hadia ia. (F. 1, 2. Mat. 28, 18. Yoh. 3, 35). 

9 Ba ni’ide’ide’õ andrõ, tou mala’ika, si lõ ararā, Yesu, ba ta’ila, nifo’aya lakhõmi ba sumange, bõrõ wamakao andrõ, nitahania, fa’amate andrõ, ena’õ itandra wa’amate, salahi niha fefu, balazi wa’ebua dõdõ Lowalangi. (Fil. 2, 8. 9 b. t. Kor. II. 5, 14. 15).

10 Da’õ sa zi nangea khõnia, si no bõrõ hadia ia, fefu, ba zoroi fefu, hadia ia, me ato ndraono i’ohe ba lakhõmi: ba wamakao ifo’ahonoa solohe ya’ira ba wangorifi andrõ. (Rom. 11, 36. F. 5, 8. 9. Hal. zin. 5, 31).

11 III. Ba he si amoni’õ sa, ba he ni’amoni’õ andrõ, ba ha samõsa duara fefu; da’õ gõi mbõrõ, wa lõ aila ia fatalifusõ khõra, (Yoh. 17, 19. Mar. 3, 34 b. t.), 

12 imane: ”U’ombakha’õ dõimõ ba dalifusõgu andrõ, ba zowulo banua usuno ndra’ugõ.” (Sin. 22, 23. Rom. 8, 29). 

13 Ba imane zui: ”Sanõtõna khõnia dania ndra’odo.” Ba so zui, ba imane: ”Hiza, ya’o ba iraono andrõ, nibe’e Lowalangi khõgu.” (Yes. 8, 17. 18). 

14 Ba me no õsi niha gõi nõsi ndraono, ba no itema gõi dána khõnia da’õ, no fakhilikhili, ena’õ ifakiko ba wa’amate andrõ zi so fa’abõlõ wa’amate. Afõkha andrõ; (Rom. 8, 3. Tim. II. 1, 10. Yoh. I. 3, 8);

15 ba ena’õ i’efa’õ zi no sawuyu, sagõtõ ya’ira, ba wa’ata’ura wa’amate andrõ. (Rom. 6, 17 b. t.). 

16 Tenga sa atõ mala’ika nitolonia, no ma’uwu Gaberahamo andrõ itolo. 17 Andrõ lõ tola lõ fagõlõgõlõ ia ba dalifusõnia, gofu he wisa wamaigida, ena’õ sahakhõ tõdõ ia, ba ere sebua, si lõ farõi, khõ Lowalangi, ba wame’e hõli ba horõ mbanua andrõ. (F. 4, 15; 5, 1 b. t.). 

18 Ndrohundrohu zi no itaha famakao sa, si no tetandraigõ ia, ba i’ila itolo nitandraigõ andrõ. (F. 4, 16).

 

 

HEBERAI’O

FAZA 3

 

I.                  Yaŵa Moze Keriso. II. Bõi zi lõ mamati ira, bõi lafuli furi; ndramangelama, me no la’ila wamaedo, ba Ndraono Gizeraëli andrõ, si no mangawuli furi.

 

1 I. Andrõ, ya’ami, ira talifusõ, ni’amoni’õ, si no mo’urakha ba wogaoni andrõ, moroi ba zorugo, mitõngõni zinenge andrõ, ere sebua, ba wamaduhu’õda andrõ, Yesu, (Fil 3, 14. F. 4, 14), 

2 si lõ farõi andrõ, khõ zamataro ya’ia, si mane Moze gõi, yomo khõnia fefu. (Moz. IV. 12, 7). 

3 Ebua sa dána khõnia lakhõmi, moroi khõ Moze, ndrohundrohu wa’atohude wa’ebua zotomo, moroi ba wa’ebua nomo. (F. 8, 6). 

4 Fefu nomo sa, ba so zotomo, ba samazõkhi fefu, hadia ia, ba ya’ia Lowalangi. 

5 Ba Moze, ba si lõ farõi sa, yomo khõnia fefu, enoni ia, ba wamaduhu’õ ni’ombakha’õ dania. (Yoh. 5, 46).

6 Ba Keriso, ba no Ono, ba nomonia; ba omonia ita, na lõ tabõhõli wa lõ mangiwa, awõ duriada andrõ, ba wanõtõna irugi gamozua; na ta’aro’õ khõda. (Yoh. 8, 35. Fet. I. 2, 5. F. 6, 11).

7 II. Andrõ, si mane niŵa’õ Geheha: ”Ma’õkhṍ andre, na mirongo linia, (F. 4, 7. Sin. 95, 8 b. t.), 

8 ba bõi mi’abe’e’õ dõdõmi, si mane ba wa’abao dõdõ andrõ, me luo wanandraigõ andrõ, ba danõ si mate, (Moz. II. 17, 7. V. 6, 16), 

9 me latandraigõ ndra’o ira tuami, wombaya ya’o, banoa sa’ae la’ila nilaugu, õfa wulu fakhe wa’ara; (Moz. IV. 14, 22); 

10 andrõ mofõnu ndra’o, ba niha andrõ, ba umane: Lõ mamalõmalõ wa’elungu dõdõra; ba lõ aboto ba dõdõra lalagu andrõ,11 tobali fahõlu ndra’o, ba wõnugu andrõ, umane: Bõi yalakhamõ wolombase andrõ, khõgu.” (Moz. IV. 14, 23. 28—35). 

12 Mifaigi, ya’ami ira talifusõ, bõi yatesõndra ba khõmi, ha niha ia, si so tõdõ si lõ sõkhi, tõdõ ba wa lõ mamati, ba wangerogõ Lowalangi sauri; 

13 faoma mifarou dõdõ nawõmi, ero ma’ṍkhõ, gõtõ wa laŵa’õ ”ma’õkhõ andre,” fa bõi tesõndra ba khõmi, ha niha ia, ni’abe’e’õ tõdõ, ba walimosa horõ andrõ. 

14 Noa sa tobali awõ Keriso ita, na lõ’õ sa atṍ tabõhõli mbõrõta wa faduhu dõdõ andrõ, irugi gamozua, na ta’aro’õ khõda. 

15 Na no muŵa’õ: ”Ma’õkhṍ andre, na mirongo linia, ba bõi mi’abe’e’õ dõdõmi, si mane ba wa’abao dõdõ andrõ,” — (F. 3, 7), 

16 ba ha niha ira, samondrongo, sabao tõdõ andrõ? Tenga dozi ira, si otarai danõ Miserayi, ni’oloi’õ Moze? (Moz. IV. 14, 1 b. t.). 

17 Ba ha khõ mofõnu ia, si õfa wulu fakhe andrõ? Hadia, tenga ba zanao horõ andrõ? botora, ba no adudu ba danõ si mate. (Moz. IV. 14, 29. Kor. I. 10, 5). 

18 Ba ha khõ tetandrõsaigõ, me fahõlu ia, bõi yalakhamõ wolombase andrõ khõnia, na tenga ba zi lõ molo’õ andrõ? 

19 Ba no ta’ila, wa tebai lakhamõ, bõrõ wa lõ mamati. (Moz. V. 1, 32 b. t.).

 

 

HEBERAI’O

FAZA 4

 

I.                  Famarou tõdõ, ena’õ bõi zi lõ lakhamõ wolombase, nifabu’u andrõ, bõi zi lõ mamati ira. II. Fa’abe’e li Lowalangi andrõ. III. Famarou tõdõ, ba wa’anau gõlõ, ba ba wanõtõna.

 

1 I. Ba data’ata’ufi, fa bõi tesõndra ba khõmi, ha niha ia, si hulõ zi no torõi furi, me no so na gamabu’ula li, ba wogamõ folombase andrõ khõnia. (F. 12, 15). 

2 Noa sa mu’ombakha’õ khõda gõi, si mane khõra, ba ba khõra, ba lõ sonahia daroma li wangombakha andrõ, me lõ si tefabõbõ ba zamondrongo andrõ, ba wamati. 

3 Sogamõ folombase andrõ sa ita, ya’ita samati, si mane niŵa’õnia: ”Tobali fahõlu ndra’o, ba wõnugu andrõ, umane: Bõi yalakhamõ wolombase andrõ khõgu,” he ŵa’ae no awai nilau andrõ, i’otarai wamazõkhi danõ’a andrõ. (F. 3, 11. Sin. 95, 11). 

4 Noa sa itõrõ linia, samuza, luo si fitu andrõ, no imane: ”Ba molombase Lowalangi, ba luo si fitu andrõ, me no awai nilaunia fefu.” (Moz. I. 2, 2). 

5 Ba imane zui ba da’e: ”Bõi yalakhamõ wolombase andrõ khõgu!” 

6 Ba me so sa na dania, lakhamõ ia õsa, ba me lõ nikhamõ nituriagõ yaia, si fõfõna, ba wa lõ molo’õ, (F. 3, 19),

7 ba ifuli i’õtõ mbongi: ”ma’õkhṍ,” Dawido zama’ema linia, me no si manõ wa’ara gotalua, si mane niŵa’õ mege: ”Ma’õkhṍ andre, na mirongo linia, ba bõi mi’abe’e’õ dõdõmi.” (F. 3, 7). 

8 Na Yosua sa mena’õ zolohe ya’ira ba wolombase, ba lõ itõrõ ena’õ linia luo bõ’õ, furi da’õ no mege. (Moz. V. 31, 7. Yos. 22, 4). 

9 Tobali so na sa dania wolombase mbanua Lowalangi andrõ, folombase ba luo sabato. 

10 Si no mogamõ folombase khõnia sa, ba molombase gõi, na awai halõŵõnia, si mane Lowalangi, me no awai halõŵõnia. (Fam. 14, 13).

11 Ba dataforege, ba wogamõ folombase andrõ, ena’õ lõ falukha so zalau, ha niha ia, wolo’õ famaedo andrõ, ba wa lõ molo’õ. (Fet. II. 1, 10. Kor. I. 10, 11. 12).

12 II. Sauri sa daroma li Lowalangi andrõ, ba sabõlõ, ba no atarõ, moroi ba gari si faoma bawa, ba isõsõ, irugi ifabali ira noso geheha, ba bu’u ba uto, ba ihuku gera’era dõdõ, ba sõndra dõdõ, (Fet. I. 1, 23. Rom. 1, 16. Efes. 6, 17. Fam. 1, 16),

13 ba lõ hadia ia, nifazõkhi Lowalangi, si tobini fõnania, fefu, hadia ia, ba lõ balubalu, no mubokai, ba wamaigi zanofunofu khõda andrõ. (Yob. 28, 24).

14 III. Ba me no so khõda gere sebua, salaŵa, si no manõrõi sorugo andrõ, Yesu, Ono Lowalangi andrõ, ba bõi tabõhõli wamaduhu’õ andrõ. (F. 8, 1; 9. 11. 24; 10, 23). 

15 Tenga sa ere sebua si tebai ahakhõ tõdõ, ba wa’ambõ wa’abõlõda, zi so khõda, no ere sebua si no mutandraigõ, ba ngawalõ hadia ia, fefu, hulõ si mane ya’ita; ba lõ horõ. (F. 5, 2; 2. 17. 18; 7, 26). 

16 Ba data’ondrasi daroma wa’ahakhõ dõdõ andrõ, bõi aiwõ ita, ena’õ tatema wa’ahakhõ dõdõ, ba ena’õ falukha ita wa’ebua dõdõ, fanolo, na baŵa moguna. (F. 10, 22. Rom. 3, 25).

 

HEBERAI’O

FAZA 5

 

I. Lowalangi zamataro Keriso, ere sebua. II. Na areu dõdõda, ba lõ aboto ba dõdõda zi manõ.

1 I. Dozi ere sebua sa, nihalõ ba niha, ba ba niha tefataro ia, ba halõŵõ, khõ Lowalangi, ba wame’e ame’ela ba sumange, fameta horõ; (F. 2, 17; 8, 3); 

2 si no mangila ndrohundrohu wamologõ tõdõnia, ba zi lõ mangila watahõgõ, ba ba zelungu, me ya’ia gõi zi no falukhalukha fa’ambõ fa’abõlõ. (F. 4, 15). 3 Ba me bõrõ da’õ, wa lõ tola lõ ibe’e zumange, ba khõnia gõi, si mane ba zato, fameta horõ. (F. 7, 27. Moz. III. 9, 7; 16, 6. 11. 17). 

4 Ba lõ ira’u khõnia wa’ebua andrõ niha, ha nikaoni Lowalangi, si mane A’aroni andrõ gõi (Nga’õt. II. 26, 18. Moz. II. 28, 1). 

5 Si manõ gõi Keriso, lõ ni’ebua’õnia ya’ia, ba we’amõi ere sebua, ha sanguma’õ khõnia: ”Onogu ndra’ugõ, ma’õkhṍ andre no mo’ono ndra’o ya’ugõ.” (Yoh. 8, 54. F. 1, 5). 

6 Si mane niŵa’õnia, si samuza gõi: ”Ere ndra’ugõ, irugi zi lõ aetu, dali gamuata Melekhisede andrõ.” (Sin. 110, 4. Sakh. 6, 13).

7 Me luo niha ia, ba no i’ohe wangandrõ, awõ wakaosa, khõ zangila mangefa’õ ya’ia ba wa’amate, no fao we’ao’ao sabõlõbõlõ, ba taŵa hõrõ, ba no mufondrondrongo linia, ba no mu’efa’õ ia ba wa’ata’u andrõ. (Mar. 14, 34; Mat. 26, 37 b. t. Luk. 22, 44 b. t.). 

8 Ba he ŵa’ae Ono ia, ba no itamaha ia ba wolo’õ, ba wamakao andrõ, nitaõgõnia; (Fil. 2, 8); 

9 no mufo’ahonoa ia, ba no tobali bõrõ wangorifi ba mbanua furi ia, ba zamondrongo linia, fefu, (F. 2, 10; 7, 25),

10 nifotõi Lowalangi ere sebua, dali gamuata Melekhisede andrõ. (F. 6, 1 b. t.).

11 II. Ba da’õ oya huhuoda, ba afõkhõ wamotokhi, me no awe’ewe’e dõgi dalingami andrõ. (F. 6, 1 b. t.). 

12 Samahaõ sa’ae ami ena’õ, me no ara, ba tobali moguna khõmi lafahaõ zui ami, ba wamobõrõ daroma li Lowalangi andrõ, ba tobali moguna khõmi zusu, ba tenga õ sabe’e; (Kor. I. 3, 1 b. t.); 

13 ba ha niha zamadu susu, ba lõ i’ila watahõgõ huhuo satulõ andrõ, me no iraono ia. 

14 Ba ba zi no mo’ahonoa, ba õ sabe’e nibe’e, ba zi no mamamaha ya’ira, si no to’õlõ tõdõ, ba wamaehusi hadia zatulõ, hadia zi lõ atulõ. (Kor. I. 2, 6).

 

HEBERAI’O

FAZA 6

 

I.                  Famangelama, fa bõi lafuli furi, ba huku fõna. II. Famarou tõdõ, ena’õ si lõ tebulõ ira, me no aro gamabu’ula li Lowalangi andrõ gõi.

 

1 I. Andrõ tabõhõli sa’ae wamobõrõ fangombakha Keriso andrõ, ba tafa’ese ba wamo’ahonoa; bõi sa’ae tafuli wamodanedane, famalalini era’era ba mbuabua si mate, ba famati ba Lowalangi, (F. 5, 12. Hal. zin. 20, 21), 

2 ba famahaõ ba wamayagõ idanõ andrõ, ba ba wanufa tanga, ba ba wemaoso zi mate, ba ba wanguhuku si lõ tebulõ andrõ. (Hal. zin. 2, 38; 8, 17; 24, 25. 15). 

3 Ba da’õ nilauda, na itehe Lowalangi. 

4 Tebai sa, na so zi no muhagaini tõdõ zamuza, si no manandra ame’ela andrõ moroi ba zorugo, ba si no mo’urakha Eheha ni’amoni’õ andrõ, (F. 10, 26 b. t.), 

5 ba si no manandra taroma li Lowalangi andrõ, si sõkhi, awõ wa’abõlõ andrõ, 

6 ba gõtõ dania, ba na lafuli furi, ba tebai te’a’azõkhi zui ira, ba wamalalini era’era, ya’ira, si no mamorõfa khõra zamuza tõ Ono Lowalangi, si no mame’e ni’o’aya ya’ia. (Fet. II. 2, 20. 21). 

7 Tanõ andrõ sa, samadu teu andrõ, sasese aekhu ba khõnia, si so sinanõ, soguna ba zamahaogõ’õ ya’ia, ba no itema dána khõnia howuhowu khõ Lowalangi. (Yes. 55, 11). 

8 Ba na sa’asa’a mao ba lato zi tumbu khõnia, ba lõ faduhu dõdõda khõnia, ba no ahatõ khõnia wangelifi; ba fozunia, ba fanunu ya’ia. (Yes. 5, 4 b. t.). 

9 Ba ba khõmi, ya’ami ni’omasi’õ, ba no faduhu dõdõma, ba zi sõkhi, ba zoguna ba wangorifi andrõ, he ŵa’ae no si manõ lima.

10 Tenga sa si lõ atulõ Lowalangi, fa olifu ia ena’õ mbuabuami, awõ wa’omasi andrõ, nifa’ele’õmi, fa’õmasimi dõinia, me mõi ami enoni ni’amoni’õ andrõ, awõ wa enonira na ami iada’e. (Fam. 2, 2. 19. F. 10, 33 b. t.).

11 II. Ba omasi ndra’aga, ena’õ dozi ami mi’oroma’õ wa’owõlõ’õlõ andrõ, ena’õ a’oi so wa’aro wanõtõna andrõ, irugi gamozua, 

12 ena’õ bõi abe’e dõdõmi, ena’õ mibe’e famaedo khõmi zanema amabu’ula li andrõ, ba wamati, ba ba wa’ebolo dõdõ. (F. 11, 13. 7. Yak. 5, 7). 

13 Me ibe’e gamabu’ula li khõ Gaberahamo Lowalangi, ba fahõlu ia, ba khõnia, me lõ khõnia sebua, nibe’e hõlu ena’õ, 

14 imane: ”Si ndruhundruhu, ufahowu’õ sibai ndra’ugõ, ba a’oi so dania wangoya’õgu ya’ugõ.” (Moz. I. 22, 16. 17). 

15 Ba me no imanõ wamologõ tõdõnia, wombaloi, ba no itema gamabu’ula li andrõ. (F. 10, 36). 

16 Na niha sa, ba labe’e hõlu zebua, ba tebato wamadaõ fefu, ba wahõlusa andrõ, ba wangaro’õ niŵa’õ. (Moz. II. 22, 11). 

17 Andrõ ifake wahõlusa Lowalangi, me i’oroma’õ sibai na mena’õ, ba zanema amabu’ula li andrõ, wa tebai awu’a gera’erania, (Luk. 1, 73), 

18 ena’õ tobali dombua balõ zi lõ awu’a, ba zi tebai mofaya Lowalangi, nibe’e famarou dõdõda, sabõlõbõlõ, ya’ita, si no manaŵa da’õ, wa lõ tabõhõli dõtõnafõ andrõ, si so fõnada, (Tit. 1, 2. Tim. I. 6, 12), 

19 si no mõi sao nosoda, si no aro, si no abe’e, si rugi gõi bakha barõ mba’aba’a andrõ, (F. 9, 3. 24), 

20 ba zi no mõi bakha sowaõwaõ salahida, Yesu andrõ, me tobali ere sebua ia, dali gamuata Melekhisede andrõ, irugi zi lõ aetu. (F. 4, 14; 5, 6).

 

HEBERAI’O

FAZA 7

 

I.                  No fakhilikhili ira Keriso Melekhisede andrõ. II. Ebua wa’a’ere Keriso, moroi ba wa’a’ere nono Lewi andrõ.

 

1 I. Melekhisede andrõ sa, razo Zalema, ere Lowalangi Fondrege Zalaŵa, samaondragõ Aberahamo, ba samahowu’õ ya’ia me mangawuli ia, me i’otarai mangalani razo andrõ, (Moz. I. 14, 18 b. t.),

2 nibe’e Gaberahamo gõi sambua ni’ofulu, fefu, hadia ia, ba no razo ba wa’atulõ ua, geluaha dõinia, ba aefa da’õ, ba razo Zalema gõi, razo wa’ohahau dõdõ geluaha da’õ, (Sin. 72, 1 b. t.; Yes. 9, 6. 7),

3 lõ ama, lõ ina, ba lõ tua moroi yaŵa, lõ bõrõta mbaŵania, ba lõ fa’aetu nosonia, ba si no mufakhilikhili khõ Nono Lowalangi, ba lõ tebulõ ere ia, lõ mamalõmalõ. 

4 Ba mifaigi, ha wa’ebua da’õ, nibe’e Gaberahamo gõi sambua ni’ofulu gahuluania nitutuyu andrõ, Aberahamo, furugõ andrõ. (Moz. I. 14, 20). 

5 Ba nono Lewi andrõ sa, si tobali ere, ba no mu’oroi’õ, latema zambua ni’ofulu, ba niha sato, ba dalifusõra, dali goroisa andrõ, he ŵa’ae ba lõwilõwi Gaberahamo mbõrõtara. (Moz. IV. 18. 21. 32). 

6 Ba si tenga ya’ira andrõ, ba no ihalõ zambua ni’ofulu, khõ Gaberahamo, ba no ifahowu’õ zi so amabu’ula li andrõ. (Moz. I. 12, 3. Gal. 3, 16). 

7 Ba lõ fulitõ, side’ide zi tefahowu’õ khõ zebua. 

8 Ba ba da’e, ba niha si mate dania zanema si sambua ni’ofulu, ba ba da’õ, ba no nifaduhu’õ, wa sauri ia. 

9 Ba no hulõ ba khõ Gaberahamo tefo’õmõ gõi Lewi, si sambua ni’ofulu, Lewi andrõ, sanema si sambua ni’ofulu dania. 10 No ba lõwilõwi duania so ia na, me ifaondragõ ia Melekhisede andrõ.

11 II. Ba na no so mena’õ wamo’ahonoa ba wa’a’ere nono Lewi andrõ (ba da’õ sa tetandrõsaigõ goroisa andrõ, nibe’e khõra), ba hadia guna na, tefataro gere bõ’õ dali gamuata Melekhisede, awõ wa lõ laŵa’õ, dali gamuata Ga’aroni andrõ? (F. 8, 7. Gal. 2, 21). 

12 Na tobali wa’a’ere sa, ba lõ fulitõ tobali gõi goroisa. 

13 Ba nitandrõsaigõ da’õ sa, ba no soi bõ’õ, si lõ irai mõi ere nihá, ha niha ia. 

14 Noa sa murongo, wa no mado Yuda Zo’aya ya’ita, mado ba zi lõ niŵa’õ Moze, ba gere andrõ. (Moz. I. 49, 10. Mikh. 5, 2. Yes. 11, 1. Fam. 5, 5). 

15 Ba no mendrua manõ na oroma, na tefataro gere bõ’õ, dali wa fakhilikhili ia khõ Melekhisede andrõ, 

16 si tenga balazi oroisa, amakhoita dali nõsi niha, si no balazi wa’abõlõ wa’auri andrõ, si lõ tebulõ. 

17 Noa sa tefaduhu’õ ia: ”Ere ndra’ugõ, irugi zi lõ aetu, dali gamuata Melekhisede andrõ.” (F. 5, 6). 

18 Tewu’ai sa goroisa fõna andrõ, bõrõ wa no sambõ fa’abõlõ, awõ wa lõ gunania sa’ae, (F. 10, 1—4. Rom. 8, 3), 

19 (Lõ’õ sa hadia ia nifo’ahonoa goroisa); ba tefatewu wanõtõna si sõkhi moroi andrõ, ba nihatõ’õda ya’ita, khõ Lowalangi. (Hal. zin. 13, 39). 

20 Ba ndrohundrohu zi so fahõlusa — ba khõra sa, ba lõ fahõlusa, na tobali ere ira, (F. 6, 17), 

21 ba ba khõnia, ba so wahõlusa, fahõlusa zanguma’õ khõnia: ”No fahõlu Zo’aya, ba lõ ifuli mangesa dõdõnia: ere ndra’ugõ, irugi zi lõ aetu” — (Sin. 110, 4), 

22 ndrohundrohu da’õ gõi no tobali we’ewe’e dõdõ, ba wawu’usa li si sõkhi moroi andrõ, Yesu, (F. 8, 6; 9, 15; 12, 24). 

23 Ba ba khõra, ba ato zi mõi ere, bõrõ wa tebai si lõ tebulõ ira, me matemate. 

24 Ba khõnia, me si lõ tebulõ, ireogi zi lõ aetu, ba so wa’a’ere si lõ mamalõmalõ. 

25 Andrõ gõi i’ila ifo’ahonoa wangorifi sangondrasi Lowalangi, nifa’emania, me no si lõ mamalõmalõ fa’auri, ba wolului khõra fanguma’õ. (F. 10, 14; 9, 24. Yoh. 14, 7. Rom. 8, 34. Yoh. I. 2, 1). 

26 Si manõ sa zi nangea ere sebua khõda, si no ohauhau, si lõ sala, si lõ hadia ia zi lõ gõna, si no tonia ba niha si so horõ, si no yaŵa zorugo, (F. 4, 15), 

27 salakha lõ ero ma’ṍkhõ mame’e sumange ba horõnia ua, ba aefa õ, ba ba horõ zato, si mane ere sebua andrõ fõna; noa sa i’osamuzaigõ wolau da’õ, me ibe’e sumange ia. (Moz. III. 16, 17. Heb. 9, 12. 26 b. t.). 

28 Oroisa sa, ba ifataro ere sebua niha, sambõ fa’abõlõ, ba taroma li wahõlusa andrõ, me no aefa goroisa, ba ifataro Nono andrõ, si no mo’ahonoa, irugi zi lõ aetu. (F. 5, 1; 2, 9).

 

HEBERAI’O

FAZA 8

 

Razo Keriso, ere sebua, ba gamabu’ula li si bohou, si sõkhi moroi ba zi fõfõna andrõ.

 

1  Da’õ duho ba niŵa’õ andrõ: No so khõda gere sebua si manõ, si no dumadao ba gambõlõ daroma wa’asalaŵa andrõ, ba zorugo, (F. 4, 14; 1, 3), 

2 barõ mbawania ni’amoni’õ andrõ, awõ nose si ndruhu andrõ, nifazõkhi Zo’aya, tenga niha. (F. 9, 11). 

3 Dozi ere sebua sa, ba ba wame’e ame’ela ba sumange tefataro ira; andrõ lõ tola lõ so khõnia gõi nibe’e. (F. 5, 1. Efes. 5, 2). 

4 Ba na ba guli danõ so ia ena’õ, ba tenga na i ere ia, me no so zame’e ame’ela andrõ, dali goroisa, nibe’e enoni, 

5 ba wamaedo zi so ba zorugo andrõ, ba lumõlumõnia, si mane niŵa’õ khõ Moze, me ifobõrõ wamazõkhi ose andrõ, imane: ”Faigi, õ’ohia’õ wa’maedo andrõ, ni’oroma’õ khõu ba hili, wamazõkhi fefu, hadia ia.” (F. 10, 1. Kol. 2, 17. Moz. II. 25, 40). 

6 Ba iada’e, ba no si sõkhi wamatõrõ nibe’e ba dangania, ndrohundrohu zi tedou wa’asõkhi wawu’usa li andrõ, ba zi no sama’ema ia, nitandrõsaigõ ba gamabu’ula li si sõkhi moroi ba zi fõfõna andrõ, wangohonogõi ya’ia. (F. 7, 22). 

7 Na lõ sinegu sa mena’õ, ba zi fõfõna andrõ, ba lõ mena’õ te’alui naha zi sambua. (F. 7, 18. 19). 

8 Ba itegu, imane khõra: ”Hiza, irugi baŵa dania, iŵa’õ So’aya, ba ulau fawu’u li ba ma’uwu Gizeraëli ba ba ma’uwu Yuda, fawu’usa li si bohou; (Yer. 31, 31—34); 

9 tenga dali wawu’usa li andrõ, me fawu’u li ndra’o, khõ ndra tuara, me luo u’ohe dangara, ba wangeheta ya’ira ba danõ Miserayi; noa sa labõhõli wawu’usa li andrõ khõgu, ba no u’ositengagõ gõi ira, iŵa’õ So’aya. (Moz. II. 19, 3 b. t. Yer. 15, 1 b. t.). 

10 Ba da’õ sa wawu’usa li andrõ, na ulau fawu’u li ba ma’uwu Gizeraëli, na no aefa gõtõ da’e, iŵa’õ So’aya: ube’e ba gera’erara goroisa andrõ, khõgu, ba usura ba dõdõra, ba Lowalangira dania ndra’odo, ba banuagu ira. (Hes. 36, 26 b. t.; Sakh. 8, 8). 

11 Ba lõ’õ manõ sa’ae ifahaõ nawõnia banua zamõsana, ba lõ’õ sa’ae ifahaõ dalifusõnia, wanguma’õ: Ya’aboto ba dõdõu Zo’aya, me no a’oi la’ila ndra’o, he iraono, ba he satua. (Yoh. I. 2, 27). 

12 Ebolo sa dania dõdõgu, ba zi lõ atulõ andrõ, khõra, ba lõ’õ manõ sa’ae itõrõ tõdõgu horõra andrõ.” (Yes. 43, 25). 

13 Ba wanguma’õ, ”si bohou”, ba no atua zi fõfõna, ibe’e; ba hadia zatua, ba hadia zi no numalõ dõfi, ba no ahatõ wa’ataya.

 

HEBERAI’O

FAZA 9

 

I.                  Famosumange Lowalangi ba gamabu’ula li si fõfõna andrõ, ba no ha famaedo zo’ahonoa andrõ, dania; II. ere sebua ba da’õ Keriso.

 

1 I. Ba ba zi fõfõna sa gõi, ba so gamakhoita, nitõrõ, awõ ni’amoni’õ andrõ, dali ba guli danõ. 

2 Tefazõkhi sa nose tánõ fõna andrõ, ba da’õ so naha wandru andrõ, awõ meza andrõ, awõ roti nifaigifaigi andrõ, ba tõinia, ba ni’amoni’õ; (Moz. II. 25); 3 ba ba gero mba’aba’a si sagõrõ andrõ, ba ose andrõ, nifõtõi fondrege ni’amoni’õ. (Moz. II. 26, 33). 

4 Ba da’õ so naha wanunu kumõyõ andrõ, balaki, ba tawõla gamabu’ula li, nifo’uli balaki, ma’afefu, ba bakha ba da’õ, ba migõ balaki, nifo’õsi ”mana” andrõ, ba si’o Ga’aroni andrõ, solewiõ, ba kara wanura andrõ, sura wawu’usa li. (Moz. II. 30, 34 b. t.; 25, 10; 16, 33; Moz. IV. 17, 10. Raz. I. 8, 9). 

5 Ba yaŵa da’õ, ba kerubi lakhõmi, si lumõ’õ lagõlagõ andrõ, fameta horõ andrõ, ba tenga nizarazara iada’e, wamatunõ da’õ. (Moz. II. 25, 17 b. t.). 

6 Da’õ wakakenia; ba ba nose tánõ fõna andrõ, ba mõimõi gere, si lõ mamalõmalõ, na lahalõhalõ halõŵõra, (Moz. IV. 18, 7), 

7 ba ba zi sambua, ba ha samuza zi dõfi mõi gere sebua, ha ya’ia, ba lõ’õ sa, na lõ do, ni’ohenia, ba khõnia, ba ba lalõ zato andrõ, ba wa lõ mangila watahõgõ. (Moz. II. 30, 10. Moz. III. 16). 

8 Da’õ nifa’ele’õ Geheha ni’amoni’õ ba da’õ: lõ’õ na mu’oroma’õ lala ba ni’amoni’õ andrõ, fatua lõ tebulõ nose tánõ fõna andrõ, (F. 9, 24. 25; 10, 19), 

9 si no mube’e amaedola ba gõtõ da’e, dali wame’e ame’ela ba sumange, si tebai mamo’ahonoa sangai halõŵõ andrõ, ba dõdõ andrõ; (F. 10, 1. 2);

10 ha ba gõ, ba ba nibadu, ba ba ngawalõ wanasa aekhu, amakhoita ba nõsi niha, nifakhoi, irugi ginõtõ wangatulõ andrõ. (Moz. III. 11. Moz. IV. 8, 7; 19, 7).

11 II. Ba me so Keriso, ere sebua ba zi sõkhi andrõ, si so dania, ba no itõrõ nose si sõkhi ba so’ahonoa moroi andrõ, si tenga nifazõkhi tanga, ya’ia wa tenga moroi ba guli danõ andre, (F. 4, 14. Yes. 33, 20), 

12 ba tenga gõi balazi ndro mbiribiri si matua, ba tenga balazi ndro nono zaŵi, no balazi ndronia, me mõi ia ba ni’amoni’õ andrõ, no i’osamuzaigõ, ba no isõndra wangõhõli si lõ aetu. (F. 10, 10; Yes. 45, 17. Fam. 1, 5). 

13 No ihaogõ sa’ae nõsi do mbiribiri si matua andrõ, ba do zaŵi si matua, ba awu zigelo zaŵi andrõ, fanefe zi ra’ira’iõ andrõ, (Moz. III. 16, 14. 15. Moz. IV. 19), 

14 ba tenga mendrua manõ ndro Keriso andrõ, si no mame’e sumange, si lõ sinegu, ya’ia, khõ Lowalangi, balazi Geheha si lõ aetu andrõ, iheta ba dõdõmi mbuabua si mate, ena’õ mõi ami enoni Lowalangi sauri! (F. 10, 22. Kol. 1, 14. Yoh. I. 1, 7). 

15 Ba andrõ sama’ema ba wawu’usa li si bohou ia, ena’õ latema nikaoni andrõ gamabu’ula li andrõ, ondrõita si lõ aetu, na no mutõrõ wa’amate, ba wangõhõli ba lalõ andrõ, ba wawu’usa li si fõfõna. (F. 7, 22; 8, 8. Tim. I. 2, 5. Rom. 3, 25). 

16 Ba zi so oroisa zi mate sa, ba lõ tola lõ alua ua wa’amate zangoroi’õ andrõ. 

17 Oroisa si manõ sa, ba ba wa’amate aro, me no lõ gunania fatua auri zangoroi’õ. 

18 Andrõ tenga gõi si lõ do fõna, me te’amoni’õ zi fõfõna andrõ. 

19 Me no i’ombakha’õ Moze fefu ngawalõ gamakhoita, ba niha sato, fefu, dali goroisa, ba ihalõ ndro nono zaŵi andrõ, awõ ndro mbiribiri si matua, awõ nidanõ, ba bu mbiribiri soyo, ba sufo, ba itefe zura andrõ, awõ niha sato fefu, (Moz. II. 24, 3—8), 

20 ba imane: ”Do andre, ba no do ba wawu’usa li andrõ, ni’oroi’õ Lowalangi khõmi”. (Mat. 26, 28). 

21 Ba ose gõi, ba fakake ba halõŵõ, fefu, ba itefe gõi do andrõ, si manõ gõi. (Moz. III. 8, 15. 19). 

22 Ba arakha fefu, hadia ia, ba do wangehao ya’ia, dali goroisa, ba lõ fangefa, na lõ aduwa ndro. (Moz. III. 17, 11). 

23 Ba tobali lõ tola na tenga da’õ wangehao wamaedo zi so ba zorugo andrõ, ba ba khõnia, si so ba zorugo, ba lõ tola lõ falukha zumange si sõkhi moroi andrõ, wangehao ya’ia. 

24 Tenga sa ba ni’amoni’õ nifazõkhi tanga mõi Keriso, tenga ba wamaedo zi duhu, no ba zorugo mõr ia, ba wama’ele’õ ya’ia iada’e khõ Lowalangi, salahida. (F. 9, 11; 7, 25).

25 Ba tenga sa gõi ena’õ i’asese’õ wame’e sumange ya’ia, si mane ere sebua andrõ, si no ero rõfi mõi ba ni’amoni’õ andrõ molohe do tánõ bõ’õ. 

26 Na si manõ ena’õ, ba lõ tola lõ asese itaõgõ wamakao andrõ, i’otarai mbõrõta danõ andre; ba iada’e, ba no ha samuza to’ele ia, ba gamozua gõtõ danõ andre, ba wameta horõ, wame’e sumange ya’ia. (F. 9, 12). 

27 Ba si mane ba niha, me no muhonogõi khõnia, wa samuza mate ia, ba aefa da’õ, ba fanguhuku, (Yob. 30, 23. Kor. II. 5, 10), 

28 si manõ gõi Keriso, me no samuza tebe’e sumange ia, ba wameta horõ zato, ba ba zi samuza dania, ba lõ horõ, na to’ele ia, ba zombalombaloi ya’ia, ba wangorifi. (F. 10, 12 b. t. Rom. 6, 10. Mat. 26, 28).

 

 

HEBERAI’O

FAZA 10

 

I.                  No mo’ahonoa wameta horõ andrõ, me no ibe’e sumange ia Keriso, si samuza andrõ. II. Famangelama, ena’õ lõ lafuli furi, ba wa lõ mamati, ba ba horõ. III. Famarou tõdõ, ba wanaha tõdõ.

 

1 I. Me ha lumõlumõ zi sõkhi andrõ, si so dania, ba goroisa andrõ, me tenga si ndruhu famaedo ngawalõ andrõ, ba lõ’õ manõ i’ila ifo’ahonoa zangondrasi andrõ, ba zumange andrõ, si no ero rõfi labe’e, si lõ aetu’aetu. (F. 8, 5; 9, 9. Kol. 2, 16. 17). 

2 Tenga labato ena’õ, wame’e sumange, me lõ itõrõ ena’õ tõdõ zame’e sumange andrõ horõ, na no muhaogõ zamuza? 

3 Ba no ero rõfi tefasugi ba dõdõra horõ, ba da’õ. 

4 Tebai sa iheta horõ do zaŵi si matua, ba do mbiribiri si matua. (Sin. 50, 13). 

5 Andrõ imane, me mõi ia ba guli danõ: ”Sumange ba ame’ela, ba no lõ somasi’õ, ba no õfazõkhi khõgu mboto; (Sin. 40, 7—9); 

6 sumange nitunu ba sumange fameta horõ, ba lõ somasi’õ; (Mikh. 6, 7); 

7 ba umane: ”Hiza, sodo dania, ba ngaõlu zura no musura hadia ia, ba khõgu: ba wolo’õ somasi’õ, ya’ugõ, Lowalangi.” (Yoh. 4, 34). 

8 Me no iŵa’õ mege: ”Sumange ba ame’ela, ba sumange nitunu, ba sumange fameta horõ, ba lõ ba dõdõu, lõ somasi’õ”, 

9 nibe’e, dali goroisa, ba awena imane: ”Hiza, sodo dania, ba wolo’õ somasi’õ.” Si sambalõ iwu’ai, ena’õ ifataro zi sambalõ. (F. 7, 18). 

10 Ba zomasi ia andrõ, ba da’õ te’amoni’õ ita, ba wame’e sumange boto Yesu Keriso andrõ, ni’osamuzaigõ. (F. 9, 12. 28; 13, 12). 

11 Ere andrõ sa fefu, ba ero ma’ṍkhõ so ira, ba wangaingai halõŵõra, ba ba wangasese’õ fame’e sumange andrõ, ha da’õda’õ, si tebai manõ mameta horõ (F. 10, 1). 

12 Ba ya’ia, ba ha sambalõ nibe’enia sumange, ba horõ andrõ, ba no mudadao ia ba gambõlõ Lowalangi, si lõ mamalõmalõ, (F. 1, 3), 

13 ba wombalombaloi sa’ae, ”irege tebe’e tou barõ gahenia zi fa’udu khõnia”. (Kor. I. 15, 25). 

14 Ba wame’e sumange si samuza andrõ sa, ba no ifo’ahonoa ni’amoni’õ andrõ, irugi zi lõ aetu. (F. 9, 26 b. t.). 

15 Ba ifaduhu’õ gõi khõda Eheha ni’amoni’õ. 

16 Me no aefa iŵa’õ: ”Da’õ wawu’usa li andrõ, na ulau fawu’u li khõra, na no aefa gõtõ da’e!” iŵa’õ So’aya: ”Oroisagu ube’e ba dõdõra, ba ba gera’erara usura ia, (Yer. 31, 31 b. t.), 

17 ba lõ’õ sa’ae dania itõrõ tõdõgu horõra ba olalõŵara andrõ.”

18 Ba ba zi so fangefa da’õ, ba lõ’õ sa’ae gõi ame’ela, ba horõ andrõ.

19 II. Ba me no so khõda wa lõ aiwõ, ya’ami ira talifusõ, ba we’amõi bakha ba ni’amoni’õ andrõ, bõrõ ndro Yesu andrõ, (Rom. 5, 2), 

20 ni’amoni’õnia khõda, lala si bohou, lala ba wa’auri, sanõrõ ba’aba’a andrõ, ya’ia nõsinia andrõ, (F. 6, 19. 20. Yoh. 14, 6), 

21 ba me no so khõda gere sebua, ba nomo Lowalangi andrõ, (F. 3, 6), 

22 ba data’ondrasi, ya si ndruhu dõdõda, ya’alõsu lõ mangiwa wamatida, ya’aefa dõdõ sanegu ya’ita, me no mutefe dõdõda, (F. 4, 16. 9, 13. 14. Yoh. I. 1, 7), 

23 ba ena’õ nisasai nõsida idanõ sohahau; bõi tabõhõli wamaduhu’õ tõtõnafõ andrõ, bõi mangiwa; lõ’õ sa farõi zamabu’u andrõ. (Hes. 36, 25). 

24 Ba datafaoma tafaigi nawõda, ba wamarou tõdõ ba wa’omasi andrõ, ba ba mbuabua si sõkhi. (F. 13, 1. 21). 

25 Ba bõi tabõhõli we’amõi ba migu khõda, si mane nifolaulau dánõ bõ’õ õsa, tafarou dõdõ nawõda, ba mendrua manõ, me itugu mi’ila, ahatõ mbaŵa andrõ. (Kol. 3, 16. Yak. 5, 8. 9). 

26 Na ta’odõdõgõ wamazõkhi horõ sa, na no tasõndra wa’aboto ba dõdõ zi duhu andrõ, ba lõ’õ sa’ae si tosai sumange, fameta horõ, (F. 6, 4 b. t.), 

27 ha fombalombaloi huku, sata’u ita, awõ holahola galitõ andrõ, si manga dania zi fa’udu andrõ. (Moz. V. 32, 22. Sef. 1, 18). 

28 Na so zangositengagõ oroisa andrõ khõ Moze, ba lõ fa’ahakhõ dõdõ, mate ia, ba zi darua, ba ma si datõlu, si so ba mbõrõ; (Moz. IV. 15, 30 b. t. Moz. V. 17, 7); 

29 ba he wisa ba dõdõmi, tenga mendrua manõ wotu, si gõna zi hundragõ Ono Lowalangi andrõ, ba na ba dõdõnia si lõ guna ndro andrõ, ba wawu’usa li andrõ, ba ni’amoni’õ ya’ami, ba na no i’osiwawõi Geheha fa’ebua dõdõ andrõ? (F. 12, 25. Kor. I. 11. 25, 29. Mat. 12, 31). 

30 Noa sa ta’ila zi no manguma’õ: Khõgu wolau balõ, ya’o zanulõni”, ba so zui, ba: ”Ihuku dania mbanuania So’aya.” (Moz. V. 32, 35. 36).

31 Sata’u ita na ba danga Lowalangi sauri aekhu ita. (F. 12, 29).

32 III. Ba mitõrõtõrõ tõdõmi mbaŵa fõna andrõ, me oya mitaõgõ fasõndrata famakao andrõ, me no muhagaini ami; (Tes. I. 2, 14); 

33 so, ba tebe’e maimai mifaigi ami, wango’aya ya’ami, ba famakao ya’ami, ba so, ba tobali awõ zi gõna si manõ ami, (Kor. I. 4, 9). 

34 Noa sa gõi mihakhõsi tõdõ nikuru, ba no mitaha, na terabu zi so khõmi, lõ sabu dõdõmi, me no aboto ba dõdõmi, so khõmi zi sõkhi moroi andrõ, si lõ tebulõ. (F. 13, 2. Mat. 5, 12). 

35 Ba bõi mibõhõli wa’abe’e dõdõ andrõ khõmi, nifoluo sebua dania. (F. 12, 2. 3). 

36 Fa’ebolo dõdõ sa zoguna khõmi, ena’õ mi’o’õ zomasi Lowalangi, ba ena’õ misõndra gamabu’ula li andrõ. (F. 12, 1. Luk. 21, 19). 

37 ”Hatṍ sa ma’ifu sibai tõ, ba so zi mõi andrõ, lõ i’aragõ ia. (Hab. 2, 3. 4. Fam. 22, 12). 

38 Ba satulõ tõdõ andrõ khõgu, ba moroi ba wamati auri ia dania, ba na awuwu ia, ba lõ omasi dõdõgu ia.” (Rom. 1, 17). 

39 Ba ya’ita, ba tenga sawuwu, ba wa’atekiko, no samati ita, ba wangorifi noso. (Tes. I. 3, 3. Fet. I. 1, 9).

 

 

HEBERAI’O

FAZA 11

 

I.                  Amuata wamati andrõ. II. Fa’abõlõnia; khõ ndra tua fõna ta’ila.

 

1 I. Ba famati andrõ, ba no fa’a’ro dõdõ ba nidõnadõna andrõ, fa’afaduhu dõdõ ba ngawalõ, hadia ia, si lõ oroma. (Rom. 8, 24. 25. Kor. II. 4, 18). 

2 Ba khõnia sa lasõndra satua fõna, wa tefaduhu’õ ira.

3 Moroi ba wamati aboto ba dõdõda, wa no taroma li Lowalangi wamazõkhi danõ’a, wa no tobali tenga moroi ba zoroma tumbu zoroma andrõ, (Rom. 1, 20. Sin. 33, 6. Yoh. 1, 3).

4 II. Moroi ba wamati, wa no sõkhi zumange andrõ, nibe’e Habeli khõ Lowalangi, moroi ba nibe’e Ka’ino, ba moroi ba da’õ tefaduhu’õ ia, wa satulõ ia, me ifaduhu’õ game’elania Lowalangi, ba moroi ba da’õ gõi, wa muhede ia na, he ŵa’ae no mate ia. (Moz. I. 4, 4 b. t. Mat. 23, 35).

5 Moroi ba wamati, wa teheta Khenoki, fa lõ i’ila wa’amate, ba lõ lasõndra ia, me no iheta ia Lowalangi; fõna wangeheta ya’ia sa’ae tefaduhu’õ ia, wa no somasi Lowalangi ia. (Moz. I. 5, 24). 

6 Ba na lõ famati, ba tebai i’omasi’õ niha Lowalangi: Sangondrasi Lowalangi ena’õ ba lõ’õ sa tola lõ mamati ia, so Lowalangi, ba ifoluo zangalui ya’ia andrõ. 

7 Moroi ba wamati, wa ilau nowo andrõ Noakhi, ba wangorifi si samba omo ya’ira, me no ibokai khõnia Lowalangi zi lõ oroma na; i’ata’ufi; ba da’õ i’etu’õ huku niha guli danõ, ba tobali sanema fa’atulõ dõdõ ba wamati ia. (Moz. I. 6, 9—22. Fet. II. 2, 5. Rom. 3, 22).

8 Moroi ba wamati, wa molo’õ Gaberahamo, me tekaoni ia, wa awu’a ia, wa isaŵa danõ, nibe’e ondrõita mitou dania khõnia, ba mofanõ ia, he lõ’õ na i’ila, heza isaŵa. (Moz. I. 12, 1—4. Rom. 4, 1 b. t.). 

9 Moroi ba wamati, wa si fatewu ia, ba danõ amabu’ula li andrõ, ba danõ niha bõ’õ ua, ose nahiania, ba si manõ gõi khõ Giza’aki ba khõ Yakobo, awõnia sanema amabu’ula li andrõ gõi. (Moz. I. 12, 7 b. t.; 15, 13).

10 Ibazebaze’õ sa mbanua andrõ, saro danedane, ba zi no mõi tuka ba sotomo Lowalangi. (F. 12, 22; 13, 14). 

11 Moroi ba wamati gõi, wa isõndra wa’abõlõ Sara andrõ, ba wamobõrõ nga’õtõ, ba lõ lai wa no numalõ ndrõfinia, me no faduhu dõdõnia, ba zamabu’u andrõ. (Moz. I. 18, 10; 21, 2. 7. Rom. 4, 20. 21). 

12 Andrõ gõi moma’uwu zi ha samõsa andrõ, ba si no mate, taŵa’õ, timba ndrõfi ba mbanua yaŵa wa’ato, ba timba nene ba mbewe nasi andrõ, si tebai la’erai ngawua. (Rom. 4, 19. Moz. I. 15, 5). 

13 Ba ba wa’amate da’õ fefu, ba dali wamati, lõ si falukha ira amabu’ula li andrõ, ha moroi ba zarõu la’ila, ba la’owai, ba la’ombakha’õ, tome ira ba si fatewu, ba guli danõ andre. (Moz. I. 47, 9. Sin. 39, 13). 

14 Sanguma’õ da’õ sa, ba la’ombakha’õ, wa la’alui zi ndruhu mbanuara. 

15 Ba na da’õ niŵa’õra, ba zi otarai ira, ba fakhamõ mena’õ, mangawuli ira. 

16 Ba me tenga da’õ, ba si sõkhi ni’aluira, ya’ia zi so ba zorugo. Andrõ wa lõ aila khõra Lowalangi, na labe’e tõinia Lowalangira; noa sa itaru’õ khõra mbanua. (Moz. II. 3, 6). 

17 Moroi ba wamati, wa ibe’e sumange Giza’aki andrõ Aberahamo, me tetandraigõ ia, ononia si ha sambua andrõ ibe’e sumange, ya’iá si no manema amabu’ula li andrõ. (Moz. I. 22, 1 b. t.), 

18 ba zi no muŵa’õ: ”Ba khõ Giza’aki tefotõi khõu nga’õtõ.” (Moz. I. 21, 12. Rom. 9, 7). 

19 Da’õ dõdõnia, he moroi ba ngai zi mate, ba i’ila isusugi Lowalangi, moroi ba da’õ gõi itema mangawuli ia, me ilulu. (Rom. 4, 17). 

20 Moroi ba wamati, wa ifahowu’õ ndra Yakobo Ezau Iza’aki, ba zi falukha ira dania. (Moz. I. 27, 28. 39). 

21 Moroi ba wamati, wa faoma ifahowu’õ nono Yosefo andrõ Yakobo, me arakha mate ia, ba mangalulu ia faudu hõgõ zi’onia. (Moz. I. 48, 1—20; 47, 31). 

22 Moroi ba wamati, wa itõrõ li Yosefo wa’awu’a Ndraono Gizeraëli andrõ, me mate ia, ba ibe’e goroisa, ba wolohe botonia. (Moz. I. 50, 24. 25). 

23 Moroi ba wamati, wa labini’õ Moze ira inania, me sawena tumbu, tõlu waŵa wa’ara, me la’ila, si sõkhi nono andrõ, ba lõ la’ata’ufi goroisa razo andrõ, (Moz. II. 2, 2). 

24 Moroi ba wamati, wa lõ ba dõdõ Moze, na laŵa’õ ono nono Wara’o alawe ia, me no ebua ia, (Moz. II. 2, 10. 11), 

25 awõ wa abõlõ omasi ia, itaõgõ wamakao, awõ mbanua Lowalangi, moroi isõndra wa’omuso dõdõ ba horõ, si lõ ararā; 

26 ba dõdõnia, ebua hare ba wango’aya andrõ, khõ Keriso, moroi ba gana’a Miserayi andrõ; famoluo dania sa ifaigi. 

27 Moroi ba wamati, wa irõi danõ Miserayi, wa lõ i’ata’ufi wõnu razo andrõ; i’olembai sa’ae zi lõ oroma andrõ, hulõ na no i’ila. (Moz. II. 12, 41; 10, 28). 

28 Moroi ba wamati, wa ilau wasa andrõ, awõ wamaduwa do andrõ, fa bõi ibabaya ira samunu ono si a’a andrõ. (Moz. II. 12, 3—14). 

29 Moroi ba wamati, wa latõrõ nasi soyo andrõ, hulõ na tanõ sabe’e, ba zalõmõ Ndrawa Miserayi, me latandraigõ gõi. (Moz. II. 14, 16—31). 

30 Moroi ba wamati, wa adudu gõli kara andrõ, ba Yerikho, me no fitu bongi lafasui. (Yos. 6, 1—20). 

31 Moroi ba wamati, wa lõ tekiko Rakhaba andrõ, sohorõ andrõ, awõ zi lõ molo’õ, me no ifa’amõi yomo khõnia zamauze andrõ, me no ihaogõ khõra. (Yos. 2, 1 b. t.; 6, 17 b. t.). 

32 Ba hadia niŵa’õgu na ena’õ? Lõ’õ sa fakhamõ, na udunõdunõ ena’õ, hadia ia ba khõ Gideono andrõ, ba ba khõ Mbaraki, ba ba khõ Zimesono, ba ba khõ Yefita ba ba khõ Dawido ba ba khõ Zamueli andrõ, ba ba zama’ele’õ andrõ. (Sanguhuk. 6, 11; 4, 6; 13, 24; 11, 1. Sin. 78, 70 b. t. Sam. I. 3, 20; Hal. zin. 3, 24). 

33 Si no molaŵa banua bõ’õ, ba wamati, si no mamalua satulõ, si no manema amabu’ula li, si no mondruhõ bawa zingo, (Sam. II. 8, 1—14. Sam. I. 12, 3. 4. Dan. 6, 22), 

34 si no mamunu fa’abõlõ galitõ, si no aefa ba mbawa zi’õli, si no mogamõ fa’abõlõ, he si lõ abõlõ, mbõrõta, si no abõlõ ba wanuwõ, si no manimba sabõlõ niha bõ’õ. (Dan. 3, 25 b. t. Raz. I. 19, 1—3. Raz. II. 20, 7. Sanguhuk. 15, 8. 15; 16, 28; 7, 13. 22). 

35 No ba wemaoso, moroi ba ngai zi mate, latema mangawuli zi mate khõra ira alawe; ba so niforõfa, sanimba fangefa, ena’õ lakhamõ wemaoso si sõkhi, (Raz. I. 17, 18 b. t. Raz. II. 4, 32 b. t.), 

36 ba so zi no falukha fango’aya ba famõzimõzi, awõ mbõbõ, ba awõ gurunga; (Moz. I. 39, 20. Yer. 20, 2); 

37 no latebu kara ira, no lafakao, no lasila, mate ira nibunu si’õli, mowaõwaõ ira, uli mbiribiri nukhara, ba ma uli nambi, no falukha ira wa’ambõ, ba fa’afõkhõ, ba famakao. (Raz. I. 21, 13; 19, 10. Raz. II. 1, 8. Yak. 5, 10. Hal. zin. 7, 52). 

38 Ya’ira andrõ, si tenga si nangea awõ niha guli danõ mena’õ; ba danõ si mate misa elungulungu ira, ba ba hili misa, ba ba dõgi narõ gara, ba ba zo’arõ hili. (Raz. I. 18, 4; 19, 4). 

39 Ba da’õ fefu, ba lõ nikhamõra amabu’ula li andrõ, he ŵa’ae no nifaduhu’õ ira, moroi ba wamati andrõ; 

40 me no ihõnagõ ifaigi khoda zi sõkhi Lowalangi, ena’õ bõi mo’ahonoa ira lõ ya’ita. (F. 8, 6).

 

 

HEBERAI’O

FAZA 12

 

 

I.                  Famarou tõdõ, fa bõi labõhõli wanõngõni khõ Yesu. II. Moguna na i’otu’õ ira Lowalangi. III. Bõi atage ba bõi la’ositengagõ wa’ebua dõdõ Lowalangi andrõ.

 

1 I. Ba andrõ, ya’ita gõi, me no tefasui ita lawuo samaduhu’õ andrõ, ba datatou’õ tou noro dõdõ andrõ, fefu, awõ horõ andrõ samasui ya’ita, ba data’anau’õ gõlõda wagohisa, ba watandrasa tõla andrõ, si so fõnada, (Kor. I. 9, 24—27. Efes. 4, 22. F. 10, 36). 

2 Ba tafaigi zolohe andrõ, ba samo’ahonoa famati, Yesu, si no manaha rõfa andrõ, salahi wa’omuso dõdõ andrõ, si no so fõnania, si no mangositengagõ fa’aila, ba si no mudadao ba gambõlõ dadaoma Lowalangi andrõ. (F. 2. 10—13. Fil. 2, 8. Fam. 3, 21).

3 Mitõrõtõrõ sa’ae tõdõmi zi no manaha tõdõnia, na lamanõ wamadaõ khõnia niha si so horõ, fa bõi atage ami, ba fa bõi alulu dõdõmi. (Yoh. 15, 20).

4 II. Lõ’õ na sondrugi do fanimbami horõ andrõ, ba wasõndrata khõnia, (Kor. I. 10, 13), 

5 ba no olifu ami wondrara dõdõ andrõ, sihede khõmi, amaedola wehede ba ndraono, imane: ”He onogu! bõi zi lõ ba dõdõu wotu andrõ, khõ Zo’aya, ba bõi abu dõdõu, na i’otu’õ ndra’ugõ; (Amaed. 3, 11. 12. Yoh. 5, 17): 

6 somasi Zo’aya sa, ba i’otu’õ, ba ibagobago fefu ndraono nihalõnia khõnia.” (Fam. 3, 19).

7 Mitaha wotu; tõdõ Lowalangi khõmi, ba no hulõ ba ndraono; heza sa so ndraono, si lõ i’otu’õ ama? 

8 Ba na lõ te’otu’õ ami, si no falukha ira fefu, ba no ono horõ ami, ba tenga si ndruhu nono. 

9 Ba no ae sangotu’õ ya’ita ndra amada, niha, ba no ta’ata’ufi ira, ba tenga mendrua manõ mõi ita barõ mbawa Nama noso andrõ, ena’õ auri ita? (Amaed. 10, 17). 

10 Ba ya’ira sa, ba si lõ ararā, ha uga bongi, la’otu’õ ita, dali dõdõra, ba ya’ia, ba ena’õ moguna, ena’õ mõi khõda gõi wa’ohauhaunia andrõ. (Kor. I. 11, 32). 11 Fefu ngawalõ wotu sa, ba gõtõ iada’e, ba tenga fa’omuso dõdõ, taŵa’õ, ha fa’abu dõdõ, ba dania, ba sohahau dõdõ lualuania, fa’atulõ dõdõ, nifa’emania ba zi no mufamaha ba khõnia andrõ. (Yoh. 16, 20 b. t. Yes. 26, 16 b. t. Yak. 1, 12; 3, 18).

12 III. Andrõ mifuli mi’abe’e’õ danga, si no adada, ba balõduhi, si no atage andrõ; (Yes. 35, 3); 

13 ba mifaigi zadõlõ lala gahemi, fa lõ ahole zi no ombuyumbuyu, ena’õ abe’e atṍ. 

14 Migohi wa’atulõ, ba niha fefu, ba fangohauhau andrõ; lõ’õ sa sangila So’aya dania, niha, na lõ da’õ. (Sin. 34, 15. Rom. 12, 18. Mat. 5, 8. 9). 

15 Ba mifaigi, fa bõi falukha zi torõi furi, ba wa’ebua dõdõ andrõ, fa bõi molewiõ ŵa’a safeto, ba wamoborõ famakuyu, fa bõi ato zi gõna si ra’ira’iõ. (Kor. II. 6, 1. Moz. V. 29, 18). 

16 Bõi ta’i’a zohorõ, ba ma si lõ ngaroro, si mane Ezau andrõ, samawa fa’asia’ania, ha samuza femanga mbõli; (F. 13, 4. Moz. I. 25, 29 b. t.); 

17 noa sa mirongo: dania gõi, me edõna itema howuhowu andrõ, ba tetibo ia; lõ’õ sa isõndra lala wamalalini era’era, he ŵa’ae no mowõi daŵa hõrõnia, wangalui ya’ia. (Moz. I. 27, 30 b. t.).

18 Lõ’õ sa nirugimi hili nibabaya andrõ, siholahola andrõ, ba lõ nirugimi sa’ōē, ba sogõmigõmi, ba fe’ugu’ugu mbanua, si fao angi, (Moz. II. 19, 17 b. t. Moz. V. 4, 11. 12), 

19 ba li dorofe, ba li zihede andrõ, me mangandrõ zamondrongo andrõ, bõi sa’ae yamuhede khõra; (Moz. II. 20, 18 b. t.); 

20 me tebai lataha ni’oroi’õ andrõ: ”Ba he ahe zaliŵaliŵa ba danõ zanguhundragõ hili, ba nibunu, nitebu kara;” (Moz. II. 19, 12); 

21 wa’ata’ura zoroma andrõ, tobali imane Moze: ”Oi so wa’ata’ugu, manizinizi ndra’o!” 

22 Ba no mirugi hili Ziona andrõ, ba banua Lowalangi sauri andrõ, Yeruzalema andrõ, si yaŵa, ba zorugo, awõ ngahõnõ mala’ika, (Fam. 14, 1; 3, 12. Yes. 24, 23. Gal. 4, 26. Dan. 7, 10. Yud. a. 14), 

23 ba owuloa andrõ, banua zi a’a, nisura tõi ba zorugo, ba Lowalangi, sanguhuku fefu, ba niha ira, ba bekhu zatulõ andrõ si no mo’ahonoa, (Yak. 1, 18. Fam. 14, 4. Luk. 10, 20), 

24 ba sama’ema andrõ, ba wawu’usa li si bohou, Yesu, ba do fanefe andrõ, si sõkhi fehede, moroi ba ndro Habeli. (F. 9, 15. Fet. I. 1, 2). 

25 Mifaigi, fa bõi mitimba zihede andrõ. Na tebai sa aefa da’õ, sanimba sanguma’õ li ba guli danõ andre, ba tenga mendrua manõ ita, na ta’erogõ zihede moroi ba zorugo andrõ? (F. 2, 1—3; 10, 29). 

26 Me luo da’õ ifaheu danõ linia, ba iada’e, ba no ifabu’u linia, imane: ”Samuza tõ dania ufaheu, tenga ha tanõ, banua si yaŵa gõi”. (Sin. 68, 9. Hag. 2, 6. 21. Mat. 24, 29). 

27 Ba si ”samuza tõ” andrõ, ba ba wamalalini nifaheu andrõ, nifazõkhi andrõ, faekhu, ena’õ si lõ tebulõ zi tebai humede. (Fam. 20, 11. 21, 1. Kor. II. 5, 1). 

28 Andrõ, me no mõi khõda mbanua si tebai humeuheu, ba data’andrõ saoha gõlõ; da’õ zomasi Lowalangi, fe’amõida enoninia, yafao wangerangera ba fa’ata’u; (Dan. 2, 44; 7, 14. 18. Kol. 1, 12. Sin. 2, 11. 12); 

29 alitõ si mangamanga hadia ia sa Lowalangida andrõ. (Moz. V. 4, 24).

 

 

HEBERAI’O

FAZA 13

 

I.                  Famarou tõdõ ba mbuabua si sõkhi, ba II. ena’õ abe’e ira, ba ena’õ lafondrondrongo li zamahaõ. III. Famahowu’õ ba fango’ozui sura.

 

1 I. Fangomasi’õ talifusõ andrõ, andrõ, ba bõi yatebulõ. (Rom. 12, 10). 

2 Bõi mi’olifugõ ami, fa bõi abua gõlõmi ba dome; so sa õsa zi no mame’e gõ mala’ika, si lõ la’ila, ba zi manõ. (Rom. 12, 13. Moz. I. 18, 2 b. t.; 19, 1 b. t.). 

3 Mitõrõtõrõ tõdõmi nikuru andrõ, me no awõra nikuru ami, awõ nifakao andrõ, me si so ba mboto gõi ami. (F. 10, 34. Mat. 25, 36. Kor. I. 12, 26. Rom. 12, 15). 

4 Dozi sa, ba ndramu’onangegõ warongasa, ba ba wa’orudu andrõ, ba bõi yafabaya hadia ia; ihuku sa Lowalangi zohorõ andrõ, awõ zohorõni donga zodonga. (Efes. 5, 5. Tes. I. 4, 3—6). 

5 Bõi fatewu ba gera’erami wa’omasi gana’a, ya’abõnõ khõmi zi ho so. Noa sa ya’ia zanguma’õ: ”Lõ’õ manõ farõido khõu, balõ’õ manõ u’ositengagõ ndra’ugõ.” (Tim. I. 6, 6—10. Yos. 1, 5. Moz. V. 31, 8).

6 Tobali tola abe’e dõdõda, wanguma’õ: ”So’aya zanolo ya’o, lõ ata’u ndra’o. Hadia nilau niha khõgu?” (Sin. 118, 6).

7 II. Mitõrõtõrõ tõdõmi zolohe ya’ami andrõ, si no mangombakha khõmi taroma li Lowalangi; aekhula lalara mitõngõni, ba mi’ohia’õ wamatira andrõ. (F. 6, 12. Tes. I. 2, 13. Fil. 3, 17). 

8 Yesu Keriso andrõ, ba ya’iya’ia manõ, he menewi, ba he ma’õkhṍ, ba he irugi zi lõ aetu. (Fam. 1, 8; 17, 18). 

9 Bõi mibe’e nidõnisi ami, ba wamahaõ si no oya ngawalõ, si no fabõ’õ; si sõkhi sa na moroi ba wa’ahakhõ dõdõ te’abe’e’õ dõdõ, bõi ba gõ, ba zi lõ hare zanõrõ da’õ. (Efes. 4, 14. Kol. 2, 20 b. t. Rom. 14, 17). 

10 No so khõda naha wame’e sumange, ba zi lõ tola manga zangai halõŵõ andrõ, ba nose andrõ. 

11 Baero golombaseŵa sa tetunu nõsi zaliŵaliŵa ba danõ andrõ, ni’ohe gere sebua do ba ni’amoni’õ andrõ fameta horõ. (Moz. III. 16, 27). 

12 Andrõ gõi baero mbawa gõli itaha wamakao Yesu, ena’õ i’amoni’õ mbanua, donia andrõ. (F. 10, 10. Mat. 21, 39. Yoh. 19, 17). 

13 Ba me si manõ, ba damõi ita khõnia, baero golombaseŵa, ba datalu’i wango’aya ya’ia andrõ. (Fet. I. 4, 14). 

14 Lõ’õ sa khõda ba da’e banua si lõ tebulõ, ba si so dania ni’aluida. (F. 11, 10. 13—16. Fil. 3, 20). 

15 Ba datafafa’ema’õ khõnia zumange fanuno, khõ Lowalangi, bõi mamalõmalõ; ya’ia mbuabua mbewe, sangombakha tõinia. (Sin. 50, 14. Efes. 5, 20). 

16 Bõi mi’olifugõ ami, ba wanolo si numana, ba ba dolotolo andrõ; somasi Lowalangi sa zumange si manõ. (Kor. II. 9, 12. 13). 

17 Mifondrondrongo li zolohe ya’ami andrõ, ba mi’o’õ, ya’ira sa zanaro tõdõmi andrõ, khõra tezofuzofu li dania, ena’õ omuso dõdõra wangombakha, ba ena’õ bõi mangarõngarõ ira; tenga sa sohare ami da’õ. (Tes. I. 5, 12 b. t. Hes. 33, 7 b. t.). 

18 Mi’angandrõ salahima, noa sa faduhu dõdõma, wa lõ iteguga tõdõma, me si sõkhi manõ zedõna matõrõ, fefu, hadia ia. (Kor. II. 1, 11. 12).

19 Andrõ mendrua manõ ufarou dõdõmi, ba wolau da’õ, ena’õ alio tefuli ndra’o khõmi.

20 III. Ba Lowalangi wa’ohahau dõdõ andrõ, si no molohe yaŵa, moroi ba ngai zi mate, kubalo mbiribiri andrõ, sebua, balazi ndro wawu’usa li andrõ, si lõ aetu, Yesu andrõ, So’aya ya’ita, (Rom. 16, 20. Hes. 34, 23), 

21 ya’ia yamuhaogõ ami, ba zi sõkhi andrõ fefu, ba wolo’õ somasi ia, yamu’a’asogõ ba dõdõda zomasi ia famaigi, moroi khõ Yesu Keriso, ya khõnia zumange, irugi zi lõ aetu. Yaduhu. (Fil. 2, 13. Tes. I. 5, 23. Gal. 1, 5). 

22 Ba u’andrõ khõmi, ya’ami ira talifusõ, bõi mitimba daroma li wamarou tõdõ andrõ, lõ’õ sa oya’oya nisuragu khõmi. 

23 Bõi zi lõ mirongo, wa no aefa dalifusõda Timoteo andrõ, awõnia dania ndra’o, wamaigi ya’ami, na alio mõi ia. (Tes. I. 3, 2). 

24 Mi’owai zolohe ya’ami andrõ, fefu, awõ ni’amoni’õ, fefu. La’owai ami si so ba Gitalia. 

25 Yafalukha ami fefu wa’ebua dõdõ. (Fam. 22, 21).