SURA GALATIA
SURA
GALATIA
GALATIA
FAZA
1
I.
Fangowai Waulo. II. Mangarõngarõ ia, me no ambõ wa’aro dõdõ
Ndrawa Galatia andrõ. III. Ifaduhu’õ khõra, wa no tenga nitemania ba niha duria
somuso dõdõ andrõ, ni’ombakha’õnia.
1 I.
Faulo zanura da’e, sinenge, tenga moroi ba niha ba tenga gõi nifa’ema niha khõnia,
moroi khõ Yesu Keriso ba moroi khõ Lowalangi Ama, si no manusugi ya’ia moroi ba
ngai zi mate, (Tit. 1, 3),
2 ba
talifusõ andrõ awõgu, fefu: ba mbanua andrõ misa, ba Galatia mafa’ohe’õ. (Kor.
I. 16, 1).
3 Yafalukha
ami wa’ebua dõdõ ba fa’ohahau dõdõ, khõ Lowalangi Ama, ba khõ Zo’aya ya’ita, Yesu
Keriso, (Efes. 1, 2. Yoh. II. 3),
4 si
no mame’e ya’ia, ba horõda andrõ, ena’õ i’efa’õ ita ba nõsi guli danõ andre, si
lõ sõkhi, dali zõmasi Lowalangi, Amada, (F. 2, 20. Mat. 20, 28. Efes. 5, 2. Yoh.
I. 5, 19),
5 nifosumange
irugi zi lõ aetu. Yaduhu. (Tim. II. 4, 18).
6 II. Ahõlihõli
dõdõgu, me no alio sibai mifaheta’õ ami ba zogaoni ya’ami ba wa’ebua dõdõ
Keriso andrõ, me no alio mi’otahõgõ duria somuso dõdõ bõ’õ. (F. 5, 8. Kor. II.
11, 4).
7 Ba
lõ’õ sa tánõ bõ’õ, ha ba niha andrõ õsa, samakuyu ya’ami, sedõna mamalia’õ turia
somuso dõdõ andrõ khõ keriso. (F. 5, 10. Hal. zin. 15, 1. 24).
8 Ba
he na ya’aga, ba ma mala’ika moroi ba zorugo, zangombakha khõmi turia sumuso
dõdõ bõ’õ si tenga ni’ombakha’õma khõmi, ba yagõna ia fangelifi! (Kor. I. 16,
22).
9 Si
mane fanguma’õma fõna, si manõ gõi ufuli uŵa’õ iada’e: na so zangombakha khõmi
turia somuso dõdõ, si lõ faudu ba nitemami andrõ, ba yagõna ia fangelifi!
10 Hadia sa iada’e, hadia, ena’õ faduhu dõdõ niha khõgu u’alui,
ba ma ena’õ faduhu dõdõ Lowalangi khõgu? Hadia, ena’õ la’omasi’õ ndra’o niha u’alui?
Na u’alui na, ena’õ la’omasi’õ ndra’o niha, ba tenga enoni Keriso ndra’odo ena’õ.
(Tes. I. 2, 4).
11 III. Ba lõ ubini’õ
khõmi, ya’ami ira talifusõ: ba duria somuso dõdõ andrõ, ni’ombakha’õgu, ba
tenga dali niha. (Kor. I. 15, 1 b. t.).
12 Ba tenga sa gõi nitemagu ba niha, ba tenga nifahaõ ndra’odo,
no moroi ba wama’ele’õ Yesu Keriso ia. (Hal. zin. 26, 16).
13 Noa sa mirongo gamuatagu fõna, ba huku ba niha Yehuda, wa
no uforege wolohi banua Lowalangi, wa no ufakiko, (Hal. zin. 26, 4 b. t. Tim.
I. 1, 13),
14 ba no ato utalu’i si faziazia’a khõgu, iwama, ba huku ba
niha Yehuda andrõ, ba no uforege, ba wolo’õ nifa’ema ndra tuama. (Hal. zin. 22,
3).
15 Ba me no omasi zi no mangoniagõ ya’o, moroi ba dalu ninagu,
si no mogaoni ya’o, ba wa’ebua dõdõnia, (Hal. zin. 9, 15. Efes. 3, 7),
16 ifa’ele’õ Nononia andrõ ba dõdõgu, ena’õ uturiagõ ia ba
niha baero, ba i’anema’õ lõ ube’e dali niha, (Mat. 11, 27. Hal. zin. 26, 16 b.
t. Efes. 3, 8 b. t.),
17 lõ’õ gõi si mõido misi yaŵa ba Yeruzalema, ba khõra si no
sinenge fõnagu; mõido ba danõ Ndrawa Ara, ba ufulido zui ba Ndramaseko.
18 Awena dania, medõlu fakhe furi õ, ba mõido misi yaŵa ba Yeruzalema,
ena’õ falukhado khõ Gefa, ba felelima wongigu khõnia; (Hal. zin. 9, 26);
19 ba sinenge bõ’õ, ba lõ ni’ilagu, ha Yakobo, talifusõ Zo’aya
andrõ. (F. 2, 9. Hal. zin. 12, 17. Mat. 13, 55).
20 Ba hadia nisuragu, ba hiza, anehe Lowalangi, wa tenga sofaya
ndra’odo. (Rom. 9, 1).
21 Ba awena mõido ba mbanua Ziria misa ba ba mbanua Gilikia
andrõ.
22 Ba lõ’õ sa marai fa’ila bawa mbanua Keriso ba Yudaia.
23 Ha da’õ nirongora: Solohi ya’ita fõna, ba ituriagõ iada’e
wamati andrõ, nifakikonia fõna,
24 ba lasuno Lowalangi ba khõgu andre.
GALATIA
FAZA
2
I Fe’amõi Waulo ba Yeruzalema. II. Ha sara
dõdõra zinenge bõ’õ. III. Itegu Wetero Faulo.
1 I. Ba aefa da’õ,
meweleõfa fakhe furi õ, ba ufuli mõi misi yaŵa, ba Yeruzalema, awõ Mbaranaba,
ba u’ohe gõi awõgu Dito andrõ. (Hal. zin. 15, 2. Kor. II. 8, 23).
2 Ba fama’ele’õ mbõrõ, wa
mõido misi yaŵa, ba u’ombakha’õ khõra duria somuso dõdõ andrõ, nituriagõgu ba
niha baero, ofõna ba zi no motõi andrõ, ba wamaigi na zayazaya gõlõgu halõŵõgu,
ba ma halõŵõgu fõna. (Hal. zin 13, 2).
3 Ba he Tito andrõ, awõgu,
Dawa Heleni, ba lõ mu’o’ou, ena’õ ifaboto’õ ia.
4 Ba ba dalifusõ faya
andrõ, si no tetewu, si no manõndragõ ya’ira bakha, ba wamaigi hadia zi tola khõma,
ba khõ Keriso Yesu, ena’õ labali’õ sawuyu ndra’aga. (Hal. zin. 15, 24. Gal. 5,
1).
5 Ba saza lõ alulu dõdõma,
ba wolo’õ khõra mena’õ, ena’õ lõ tebulõ khõmi wa’aduhu duria somuso dõdõ andrõ.
6 II. Ba ba zi so tõi andrõ — ha niha ira
fõna, ba ma’ifu lõ ba dõdõgu da’õ; lõ’õ sa ifaigi mbawa nina Lowalangi, — ba lõ’õ
sa ninõnõ zi so tõi andrõ khõgu. (Rom. 2, 11).
7 Ba tenga ha da’õ; me
larongo, wa no mube’e ba dangagu duria somuso dõdõ andrõ, ba niha si lõ muboto,
si mane khõ Wetero ba niboto — (Hal. zin. 15, 12; Rom. 1, 5) sanolo khõ Wetero
sa,
8 ba halõŵõ zinenge andrõ,
ba niboto, da’õ gõi zanolo ya’o, ba niha baero, — (Rom. 15, 15 b. t.),
9 ba me no aboto ba dõdõra
wa’ebua dõdõ andrõ, si no falukha ndra’o, Yakobo andrõ ba Kefa ba Yohane, si no
amaedola gehomo, laŵa’õ niha sato, ba fara’u tanga ira khõgu ba khõ Mbaranaba,
tandra wa fa’awõ, ena’õ ba niha baero mangombakha ndra’aga, ba ya’ira, ba ba niboto;
(Efes. 3, 8 b. t.);
10 ha fa bõi olifu ndra’aga
zi numana, ba noa gõi uforege wolo’õ da’õ. (Kor. I. 16, 1. Hal. zin. 11. 29.
30).
11 III. Ba me mõi ba Gandriokhia Gefa, ba
no utegu ia, muhededo khõnia, me no mosinegu ia.
12 Me lõ si so niha andrõ
sa, si otarai khõ Yakobo, ba orudu manga ia ba zi no niha baero fõna, ba me no
so ira, ba iheta ia, ba i’oniagõ ia, fa’ata’unia niboto. (Hal. zin. 21, 18; 11,
3).
13 Ba mamini tõdõ gõi,
awõnia, niha Yehuda bõ’õ andrõ, ba tobali adõni gõi Mbaranaba, ba wamini tõdõ
andrõ khõra.
14 Ba me u’ila, lõ sõkhi
nilaura, lõ latõrõ zi duhu andrõ, turia somuso dõdõ, ba muhededo khõ Gefa, ba
zi so ira fefu, umane: Na õ’o’õ huku ba niha baero, ya’ugõ niha Yehuda, ba na
tenga huku ba niha Yehuda õ’o’õ, ba hadia wa õ’o’ou niha baero, ba wolo’õ huku
ba niha Yehuda? (Tim. I. 5, 20).
15 Ya’ita, ba no to’ua niha Yehuda,
ba tenga si so horõ, nga’õtõ niha baero. (Efes. 2, 3 b. t.).
16 Ba me no ta’ila, wa tenga
moroi ba wolo’õ oroisa atulõ niha, iŵa’õ Lowalangi, ha moroi ba wamati andrõ, khõ
Keriso Yesu; ba no mamati ita, khõ Keriso Yesu, ena’õ atulõ ita, iŵa’õ
Lowalangi, moroi ba wamati andrõ, khõ Keriso, ba tenga moroi ba wolo’õ oroisa,
me samõsa lõ’õ, satulõ, iŵa’õ Lowalangi, moroi ba wolo’õ oroisa. (F. 3, 11.
Hal. zin. 15, 10. 11. Rom. 3, 20. 28; 4, 5).
17 Ba na no oroma, wa no
niha si so horõ gõi ita, ya’ita sangalui ena’õ atulõ ita, iŵa’õ Lowalangi, ba khõ
Keriso, ba ma no sanolo ba horõ Keriso? Bõi si manõ!
18 Na ufuli sa ufazõkhi zi
no ududugõ, ba tobali solalõ ndra’o ube’e.
19 Ya’o sa, ba si no mate ba
goroisa andrõ, moroi ba goroisa, ena’õ khõ Lowalangi auri ndra’o. (F. 6, 14;
Rom. 7, 4; 6, 4—6).
20 No muforõfa ndra’o, awõ
Keriso; auri ndra’o, ba tenga sa’ae ya’o, Keriso zauri ba dõdõgu. Ba fa’aurigu
iada’e, ba mboto andre, ba no fa’auri ba wamati khõ Nono Lowalangi, si no
mangomasi’õ ya’o, si no mame’e salahigu ya’ia. (Kor. II. 13, 5; 5, 15. 17. Gal.
1, 4).
21 Lõ u’ositengagõ wa’ebua
dõdõ Lowalangi andrõ; na moroi ba goroisa wa’atulõ dõdõ andrõ mena’õ, ba no zayazaya
gõlõ, wa no mate Keriso. (Heb. 7, 11).
GALATIA
FAZA
3
I.
Ba wamati tesõndra wa’atulõ dõdõ, tenga ba wolo’õ oroisa. II. Lõ’õ
sa iwu’ai gamabu’ula li andrõ oroisa andrõ. III. Ha samamaha ba khõ Keriso ia.
1 I. He ya’ami, banua
Galatia, si lõ tõdõtõdõ! Ha niha zolau elemunia khõmi, khõmi, si no mube’e
famaedo Yesu Keriso, ba duduma hõrõ, famaedo Yesu Keriso niforõfa? (F. 5, 7.).
2 Ha da’õ nisofugu khõmi:
Hadia, moroi ba wolo’õ oroisa, wa no mitema mege Geheha, ba ma moroi ba duria
wamati andrõ? (Hal. zin. 2, 38).
3 Hadia, si manõ wa’ambõ tõ
lõ andrõ khõmi? Ba Geheha mibõrõtaigõ no, ba hadia, ba nõsi niha wozu khõmi
dania?
4 Hadia, ha wa’oya’oya zi
no itõrõ ami, hadia, zayazaya gõlõ? Si ndruhu zayazaya gõlõ taŵa’õ?
5 Ba sama’ema khõmi Eheha
andrõ, sanga’asogõ khõmi fa’abõlõ, hadia, moroi ba wolo’õ oroisa, wa ilau da’õ,
ba ma moroi ba duria wamati andrõ?
6 Si mane Aberahamo,
”mamati ia khõ Lowalangi, ba tebe’e fa’atulõ dõdõnia”. (Moz. I. 15, 6. Rom. 4,
3).
7 Ba aboto sa’ae ba dõdõmi:
ha niha zi otarai wamati, da’õ ma’uwu Gaberahamo. (Rom. 4, 11. 12. Yoh. 8, 39).
8 Ba me no tohõna oroma ba
zura, wa moroi ba wamati andrõ atulõ niha baero, iŵa’õ Lowalangi, andrõ
tehõnagõ te’ombakha’õ khõ Gaberahamo duria somuso dõdõ, imane Lowalangi: ”Moroi
ba khõu tefahowu’õ dania fefu soi ba guli danõ” (Moz. I. 12, 3).
9 Tobali awõ Gaberahamo,
samati andrõ, tefahowu’õ zi otarai wamati andrõ. (Rom. 4, 16).
10 Ha wa’ato sa zi otarai
wolo’õ oroisa, ba no tohare khõra wangelifi. Noa sa so ba zura: Ni’elifi dozi
si lõ manõrõ fefu, hadia ia, zi so ba zura goroisa andrõ, ba wolo’õ ya’ia.
(Moz. V. 27, 26).
11 Ba no oroma, wa samõsa lõ
satulõ iŵa’õ Lowalangi, ba goroisa andrõ, imane: ”Moroi ba wamati auri dania
zatulõ andrõ.” ( F. 2, 16. Hab. 2, 4. Rom. 1, 17).
12 Ba tenga moroi ba wamati
goroisa andrõ, imane: ”Ha niha zi no molo’õ, da’õ zauri ba da’õ.” (Moz. III.
18, 5. Rom. 10, 5).
13 No ihõli ita Keriso, ba
wangelifi andrõ, ba goroisa andrõ, me no tobali ni’elifi ia, salahida, me no so
ba zura: ”Ni’elifi dozi nitaŵi ba dõla geu,” (Rom. 8, 3. Moz. V. 21, 23),
14 ena’õ falukha niha baero
howuhowu andrõ khõ Gaberahamo, ba khõ Keriso Yesu, ena’õ tatema gamabu’ula li
andrõ, Eheha andrõ, moroi ba wamati. (Moz. I. 12, 3. Yes. 44, 3).
15 II. He ya’ami, ira talifusõ! Fehede niha
wehedegu. Oroisa niha gõi, na no mu’aro’õ, ba lõ la’osilõ’õgõ, ba lõ lasahe.
(Heb. 9, 15 b. t).
16 Ba no muŵa’õ gamabu’ula
li andrõ khõ Gaberahamo ba khõ ma’uwunia; lõ iŵa’õ: ”ba khõ ma’uwu sato”; ha
samo a, no imane: ”ba khõ ma’uwumõ”, ya’ia Keriso. (Moz. I. 13, 15 ; 17, 8 b.
t).
17 Ba da’õ niŵa’õgu: Oroisa
andrõ, ni’a’aro’õ Lowalangi fõna, ba tebai tewu’ai ba goroisa amakhoita andrõ,
si no õfa ngaotu a tõlu ngafulu fakhe si’akhi moroi khõnia, fa lõ’õ sa’ae moguna
gamabu’ula li andrõ mena’õ. (Moz. II. 12, 40).
18 Na moroi ba goroisa sa
wanema ondrõita andrõ ena’õ, ba tenga sa’ae moroi ba gamabu’ula li; ba khõ
Gaberahamo, ba no moroi ba gamabu’ula li, wa i’amualagõ Lowalangi. (Rom. 4, 13
b. t.).
19 Ba he wisa goroisa andrõ?
Bõrõ gola õŵa andrõ, wa tefatewu ia, irege so ma’uwu andrõ, ba nitandrõsaigõ
amabu’ula li andrõ: ni’oroi’õ ba mala’ika goroisa andrõ, nifa’ema zama’ema
andrõ. (Rom. 3, 20; 5, 20).
20 Ba sama’ema, ba tenga ba
zi ha samõsa, ba Lowalangi, ba no ha samõsa. (Moz. V. 4, 35).
21 Ba hadia, fa’udu goroisa
ba gamabu’ula li Lowalangi andrõ? Tenga si manõ. Na no mube’e mena’õ goroisa,
sangila mangorifi niha, ba si ndruhu moroi ba goroisa i’otarai fa’atulõ andrõ.
(Rom. 8, 2—4).
22 Ba ba zura, ba no tefa’u’u
manõ fefu hadia ia, barõ mbawa horõ, ena’õ moroi ba wamati khõ Yesu Keriso tebe’e
gamabu’ula li andrõ, ba zamati andrõ. (Rom. 3, 9; 11, 32. Gal. 3, 14).
23 III. Ba me lõ famati andrõ na sa, ba no
tetarogõ ita, nifa’u’u barõ mbawa goroisa, famati andrõ nituturu, nifa’ele’õ
dania, (F. 4. 2. 3).
24 Ba no tobali samamaha ya’ita
goroisa andrõ, ba khõ Keriso, ena’õ moroi ba wamati andrõ atulõ ita, iŵa’õ
Lowalangi. (Rom. 10, 4).
25 Ba me no so wamati andrõ,
ba tenga sa’ae barõ mbawa zamamaha so ita. (Rom. 7, 4. 6).
26 Dozi ami sa, ba no ono
Lowalangi, moroi ba wamati andrõ khõ Keriso Yesu. (F. 4, 5. 7. Yoh. 1, 12).
27 Ha wa’ato ami sa, si no mubayagõ
idanõ, ba khõ Keriso, ba no mi’onukha Keriso. (Rom. 6, 3 b. t.; 13, 14).
28 Ba da’õ lõ niha Yehuda,
ba lõ Dawa Heleni, lõ sawuyu ba lõ si tenga sawuyu, lõ ira matua, ba lõ ira
alawe; dozi ami sa, ba ha samõsa, ba khõ Keriso Yesu. (Kol. 3, 11. Efes. 2, 14.
15).
29 Ba na khõ Keriso ami, ba
no ma’uwu Gaberahamo ami, sanema ondrõita, dali gamabu’ula li andrõ. (F. 9. 3,
16).
GALATIA
FAZA
4
I.
Ono Lowalangi niha Keriso. II. Famarou tõdõ, ena’õ lafuli ira ba
zi duhu. III. Fangefa duria somuso dõdõ andrõ.
1 I. Ba da’õ niŵa’õgu: gõtõ
wa iraono zanema ondrõita, ba lõ faehu ira zawuyu, he ŵa’ae khõnia fefu,
2 hadia ia, barõ mbawa
zondrorogõ so ia ba barõ mbawa zamaigimaigi yomo, gasagasa wa irugi baŵa nihuku
namania.
3 Si manõ gõi ita; gõtõ wa
iraono ita, ba no i’osawuyu ita famobõrõ andrõ, ba guli danõ. (Kol. 2, 8. 20).
4 Ba me no irugi inõtõ
andrõ, ba ifatenge Nononia Lowalangi, ni’adonogõ ndra alawe, ba nibe’e barõ
mbawa goroisa, (Moz. I. 49, 10. Dan. 9, 25. Mat. 5, 17),
5 ena’õ ihõli zi so barõ
mbawa goroisa, ena’õ falukha ita, fa ono ita. (F. 3, 13. 26).
6 Ba me no ono ami, ba no
ifatenge Lowalangi Geheha Nononia andrõ, ba dõdõda, si’ao andrõ: He Aba, Ama!
(Rom. 8, 15).
7 Tobali tenga sa’ae sawuyu
ndra’ugõ, ono ndra’ugõ; ba na ono, ba no sanema ondrõita gõi, ibe’e Lowalangi.
(Rom. 8, 16. 17).
8 II. Ba me luo da’õ sa, me lõ saboto ba
dõdõmi Lowalangi, ba no sawuyu Lowalangi bõ’õ ami, si tenga to’ua Lowalangi.
(Kor. I. 8, 4; 12, 2. Sin. 115, 4).
9 Ba iada’e, me no aboto ba
dõdõmi Lowalangi, me noa sa’ae aboto ba dõdõ Lowalangi gõi ami, ba hana wa mifuli
ami ba wamobõtõ andrõ, sambõ fa’abõlõ, ba si numana, si mõi enoni zui ami ena’õ,
samuza tõ? (Kol. 2, 20 b. t.).
10 Hadia mifaigi ngaluo, ba
baŵa, ba inõ õ, ba dõfi? (Rom. 14, 5). 11 Ata’u ndra’o ba khõmi, ma
dania zayazaya gõ’õgu wohalõŵõgu ba khõmi andrõ.
12 Mibe’e tuladami ndra’odo,
me no si mane ya’ami ndra’odo gõi; he ya’ami ira talifusõ, mangandrõ ndra’o khõmi.
Lõ hadia ia horõmi khõgu.
13 Ba no mi’ila, wa no ambõ
wa’abe’e nõsigu, me u’ombakha’õ khõmi duria somuso dõdõ andrõ, si fõfõna andrõ.
(Kor. I. 2, 3).
14 Ba lõ ni’ositengagõmi
tanandraigõ ya’ami andrõ, ba nõsigu, ba lõ sanuzu dõdõmi; hulõ na mala’ika
Lowalangi ndra’o wanemami ya’o no, hulõ na Keriso Yesu ndra’odo. (Mal. 2, 7. Yoh.
13, 20).
15 Ba heza so iada’e wa’odõŵadõŵa
dõdõmi no, niŵa’õmi? Ufaduhu’õ sa khõmi, na tola mena’õ, ba no mikoë hõrõmi, ba
no mibe’e khõgu.
16 Hadia, no tobali si fa’udu
khõmi ndra’odo, me no uŵa’õ khõmi zi duhu?
17 Tenga sa si sõkhi wangaluira
tõdõmi, edõna lafabali ami khõgu, ena’õ mi’alui ira. (F. 6, 12, Hal. zin. 20,
30).
18 Ba si sõkhi sa, na te’alui
zi zõkhi, si lõ mamalõmalõ; ba tenga ha na sodo khõmi.
19 He ya’ami, ira onogu, ni’adonogõgu
zamuza tõ, safõkhõ khõgu, irege tobali famaedo Keriso ami. (Kor. I, 4, 15).
20 Ena’õ na sodo khõmi iada’e,
ba ena’õ na u’ila ufalalini ligu; no abu dõdõgu ami.
21 III. Mi’ombakha’õ khõgu, ya’ami, sedõna
mõi barõ mbawa goroisa, hadia lõ mifondrondrongo goroisa?
22 Noa sa so ba zura: dombua
nono Gaberahamo, sambua ba zawuyu andrõ, ba sambua ba zi tenga sawuyu. (Moz. I.
16, 15; 21, 2 b. t.).
23 Ba ba lala wo’ono ba niha
tesõndra zi sambua, ba zawuyu andrõ, ba si sambua, ba zi tenga sawuyu, ba moroi
ba gamabu’ula li. (Rom. 9, 7—9).
24 Amaedola da’õ: ya’ia sa
zi dua balõ wawu’usa li andrõ, si sambua, ba moroi ba hili Zina’i, so’ono ba wa’asawuyu,
ya’ia Hagara andrõ, (Moz. II. 19, 18. Moz. I. 16, 1. Heb. 12, 18 b. t.).
25 Hagara sa hili Zina’i
andrõ ba li Ndrawa Ara, ba no falaŵa ia ba Yeruzalema ma’õkhṍ; noa sa sawuyu da’õ,
awõ ndraononia.
26 Ba Yeruzalema yaŵa andrõ,
ba tenga sawuyu, ya’ia ninada, ya’ita fefu. (Heb. 12, 22. Fam. 3, 12).
27 Noa sa so ba zura: ”Omusoi’õ
dõdõu, ya’ugõ, si lõ ono, si lõ irai madono; karakaraini wa’iki ba owuawua’õ
dõdõu, ya’ugõ, si lõ fa’afõkhõ hulu, noa sa oya ndraono ba zi ha samõsa andrõ,
no tohude ia, moroi ba zi so ira matua”. (Yes. 54, 1).
28 Ba ya’ami ira talifusõ,
ba no ono gamabu’ula li ami, dali Giza’aki.
29 Ba hulõ si mane ba da’õ,
me igohi nisõndra ba lala Geheha nisõndra ba lala wo’ono ba niha, si manõ gõi
iada’e. (Moz. I. 21, 9).
30 Ba hadia niŵa’õ ba zura?
Imane: ”Tibo’õ zawuyu andrõ, awõ nononia, lõ’õ sa tola manema ondrõita nono zawuyu
andrõ, awõ nono zi tenga sawuyu.” (Moz. I. 21, 10. 12). 31 Andrõ, ya’ami ira talifusõ,
tenga ono zawuyu ita, no ono zi tenga sawuyu.
GALATIA
FAZA
5
I.
Famarou tõdõ, ena’õ aro dõdõra, bõi labe’e ni’osawuyu ira, ba
bõi gõi la’oguna’õ ba zi lõ sõkhi, wa si no aefa ira, II. ena’õ la’omasi õ
nawõra, ba ena’õ latõrõ lala Geheha.
1 I. Ba fa bõi sawuyu ita,
ba no i’efa’õ ita Keriso. Ba mi’abe’e’õ, bõi mibe’e nifokalo mbagimi, ba wa’asawuyu.
(F. 2, 4; 4, 9. Yoh. 8, 32. 36. Hal. zin. 15, 10).
2 Hiza, ya’o, Faulo, uŵa’õ khõmi,
na mifaboto’õ ami, ba lõ guna Keriso khõmi. (F. 2, 21 Hal. zin. 15, 1).
3 Ba ufaduhu’õ zui ba niha
fefu, ha niha zamaboto’õ ya’ia, wa mo’õmõ ia folo’õ oroisa ma’afefu. (F. 6,
13).
4 No mifabali ami khõ
Keriso, na ba goroisa mi’alui wangatulõmi, no aefa ami ba wa’ahakhõ dõ lõ
andrõ.
5 Ya’ita sa, ba ba Geheha,
moroi ba wamati andrõ, tadõnadõna dõ õnafõ andrõ, fangatulõ. (Rom. 5, 1 b. t.
Tim. II. 4, 8).
6 Ba khõ Keriso Yesu sa, ba
tebai wamoto, ba tebai wa lõ muboto, ha famati andrõ, si no abõlõ, ba wa’omasi
andrõ. (F. 6, 15; 3, 28. Kor. I. 7, 19; 13, 2).
7 No sõkhi wolo’õmi fõna;
ha niha zanenaŵa ya’ami, fa lõ mifondrondrongo zi duhu? (F. 1, 1—3).
8 Fondrõnisi andrõ, ba
tenga moroi ba zogaoni ya’ami. (F. 1, 6).
9 Ha ma’ifu danõmõ roti, ba
ahori i’aisõni gombõila roti fefu. (Kor. I. 5, 6).
10 No faduhu dõdõgu khõmi,
ba khõ Zo’aya, wa ha da’õ dõdõmi, ba samakuyu ya’ami andrõ, ba ilu’i dania hukunia,
gofu ha niha ia. (F. 1, 7).
11 Ba ya’odo andre, ya’ami
ira talifusõ, na u’ombakha’õ na ena’õ wamoto andrõ, ba hana wa lagohi na ndra’odo?
Noa sa dõhõ mena’õ, wa fatuwu rõfa andrõ. (F. 6, 12. 14. Kor. I. 1, 23).
12 Ena’õ na lafakhai’õ ira,
samawukaisi tõdõmi andrõ! (Sin. 12, 4).
13 II. Ya’ami sa, ba ba wa bõi sawuyu
tekaoni ami, ya’ami ira talifusõ, ha fa bõi tobali lala nõsi niha, wa tenga sawuyu
ami, faoma mitolo nawõmi, moroi ba wa’omasi andrõ. (Kor. I. 8, 9. Fet. I. 2,
16).
14 Oroisa andrõ sa ma’afefu,
ba ba zi ha sambua li andrõ tetõrõ ia fefu, na imane: ”Omasio’õ zahatõ khõu, si
mane fa’omasiu ndra’ugõ”. (Rom. 13, 9. 10).
15 Ba na fara’ura’u ami, na
faoma mi’ā nawõmi, ba mifaigi, fa bõi faoma mibe’e ahori nawõmi.
16 Ba da’õ niŵa’õgu: mitõrõ
lala Geheha, ba lõ mifalua wangisõ nõsi andrõ. (Rom. 7, 6; 8, 4. 5. Fet. I. 2,
11).
17 Mangisõ sa nõsi si no fa’udu
ba Geheha, ba omasi Geheha zi fa’udu ba nõsi; faoma sa fa’udu ira khõ nawõra,
ena’õ lõ milau zomasi ami ena’õ. (Rom. 7, 23; 8, 6).
18 Ba na nifarou Geheha ami,
ba tenga, barõ mbawa goroisa so ami. (Rom. 8, 14; 6, 14).
19 Ba no oroma mbuabua nõsi
andrõ, ya’ia wohorõ, ba fa’ara’ira’iõ, ba fa’atebakha, (Kor. I. 6, 9 b. t. Kol.
3, 5),
20 ba fame’e adu, ba fakelemusa,
ba fatiusa, ba fasosota, ba fatõtõisa, ba fõnu, ba fanandraŵa, ba fa’udusa, ba
fa’erosa, (Fam. 21, 8. Kor. II. 12, 20. Kor. I. 11, 19),
21 ba fa’afõkhõ dõdõ, ba
femabumabu, ba femangamanga, ba hadia ia na nawõnia, ba uhõnagõ uŵa’õ khõmi, si
mane niŵa’õgu no sa’ae khõmi, solau si manõ, ba tebai isõndra mbanua Lowalangi.
(Rom. 13, 13. Efes. 5, 5).
22 Ba buabua Geheha andrõ,
ba ya’ia wa’omasi, ba fa’omuso dõdõ, ba fa’ohahau dõdõ, ba fa’ebolo dõdõ, ba fa’asõkhi
dõdõ, ba fa’ebua dõdõ, ba fa lõ farõi. (Efes. 5, 9. Rom. 14, 7),
23 ba fa lõ mofõnu, ba
famoni; na so zi manõ, ba lõ ihuku oroisa. (Tim. I. 1, 9).
24 Ba tána khõ Keriso Yesu
andrõ, ba no laforõfa nõsira, awõ wangisõ andrõ, ba awõ wa’omasi si lõ sõkhi.
(F. 2, 19. Rom. 6, 6).
25 Na ba Geheha auri ita, ba
datatõrõ gõi lala Geheha.
26 Bõi fayaŵa ita ba waya,
bõi ta’arõ’arõ nawõda, bõi afõkhõ dõdõda khõ nawõda. (Fil. 2, 3).
GALATIA
FAZA
6
I.
Famarou tõdõ, ena’õ na lafobawa lala ba zi so sala, ba II. ena’õ
na lõ tebulo wa’omasira nawõra ba fanolo. III. Fango’ozui sura.
1 I. He ya’ami ira talifusõ,
na so niha sosala, si lõ mudõnadõna, ba mifulu mi’ohe ba zi sõkhi zi manõ Eheha
wa’ebolo dõdõ andrõ, ya’ami, si so Eheha, ba ya’ugõ faigi, fa bõi tetandraigõ
ndra’ugõ gõi. (Tes. I. 5, 14. Mat. 18, 15 b. t. Sin. 141, 5).
2 Faoma mi’onoro noro dõdõ
nawõmi, ba no mi’o’õ goroisa Keriso andrõ. (Rom. 15, 1—3. Kol. 3, 13. Yoh. 15,
12).
3 Na so zanguma’õ tõdõnia,
sebua ia, he ŵa’ae si lõ boto sa atṍ, ba no ilimo ia. (Kor. I. 8, 2).
4 Yamufaigi wolaunia
zamõsana, ba ha khõnia wanunonia ya’ia, ba lõ ifarongogõ ba niha bõ’õ. (Kor. I.
4, 5. 6).
5 Ilu’ilu’i sa noronia
zamõsana. (Rom. 14, 12. Amaed. 9, 12).
6 II. Ba ha niha nifahaõ, ba daroma li
andrõ, ba ya ha sara dõdõ khõ zamahaõ ya’ia, ba zi sõkhi, fefu. (Kor. I. 9, 11.
14).
7 Bõi elungu ami; lõ ibe’e
ni’o’aya ia Lowalangi. Hadia nitaru niha sa, da’õ gõi nibasinia dania. (Yob.
13, 9. Luk. 16, 25).
8 Ha niha zanaru ba
nõsinia, ba moroi ba nõsi ibasi dania wa’atekiko, ba sanaru ba Geheha, ba moroi
ba Geheha ibasi dania wa’auri si lõ aetu andrõ. (Amaed. 22, 8. Yes. 3, 10. Rom.
8, 13).
9 Ba bõi atage ita, wolau
si sõkhi andrõ; na inõtõnia dania, ba mamasi ita, na lõ atage ita. (Tes. II. 3,
13. Sin. 126, 5).
10 Ba talau sa’ae zi sõkhi,
me no baŵania khõda, ba niha fefu, ba ofõna ba zi ha sara lala wamati, awõda.
(Fet. II. 1, 7).
11 III. Mifaigi ha wa’ebua dandra zura khõgu,
wanuragu khõmi, tangagu andre.
12 Ha niha ira, sangalui,
ena’õ la’omasi’õ ira, dali nõsi niha, da’õ zango’ou ya’ami, ena’õ mifaboto’õ
ami, ha fa bõi tefakao ira, moroi ba rõfa Keriso andrõ. (F. 5, 2. 11. Fil. 3,
18).
13 Ya’ira sa gõi, samaboto’õ
ya’ira andrõ, ba lõ la’o’õ goroisa, ba omasi ira, na mifaboto’õ ami, ena’õ lasuno
ira, ba nõsimi andrõ. (F. 5, 3. Hal. zin. 15, 10. Mat. 23, 3. 4).
14 Ba ya’o, ba lõ ufa’amõi
ba dõdõgu wanuno ya’o, na tenga ba rõfa Zo’aya ya’ita andrõ, Yesu Keriso, ba
niforõfa õsi guli danõ khõgu, ba ba niforõfa ya’o, ba nõsi guli danõ. (F. 2,
19. Kor. I. 2, 2).
15 Lõ guna wamoto, ba lõ guna
wa lõ muboto, ha niha si bohou zoguna. (F. 5, 6. Kor. II. 5, 17).
16 Ba ha wa’ato zanõrõ lala
da’õ, ba ndrafalukha wa’ohahau dõdõ, ba fa’ahakhõ dõdõ, ba yasi manõ gõi
Ndraono Gizeraëli andrõ, khõ Lowalangi. (Fil. 3, 16. Sin. 125, 4. 5).
17 Bõi yamubusi sa’ae dõdõgu
niha, ha niha ia. Ugohegohe ba nõsigu andre lade andrõ, khõ Yesu. (Kor. II. 4,
10).
18 Yafalukha dõdõmi wa’ebua
dõdõ Zo’aya ya’ita, Yesu Keriso, ya’ami ira talifusõ! Yaduhu, (Fil. 4, 23. Tim.
II. 4, 22).
Posting Komentar