SURA FILEMO

Table of Contents

 

SURA FILEMO

 

FILEMO

FAZA 1

 

I.                  Fangowai Waulo. II. Fa’omuso dõdõnia, ba wamati Wilemo andrõ, ba ba wa’omasinia dalifusõ. III. I’andrõ khõ Wilemo Faulo, ena’õ ifuli ihalõ Gonesimo andrõ. IV. Fango’ozui sura.

 

1 I. Faulo, nikuru andrõ khõ Keriso Yesu, zanura da’e, ba Timoteo, talifusõ andrõ, khõ Wilemo andrõ, ni’omasi’õ, awõma, ba halõwõ andrõ, (Efes. 3, 1; 4, 1; Kor. II. 1, 1), 

2 ba khõ Gafia, talifusõ alawe andrõ, ba khõ Garikhifo, awõma andrõ, ba wasõndrata, ba ba mbanua andrõ, yomo khõu. (Kol. 4, 15. 17).

3 Yafalukha ami wa’ebua dõdõ ba fa’ohahau dõdõ, khõ Namada Lowalangi, ba khõ Yesu Keriso, So’aya ya’ita! (Kol. 1, 2).

4 II. Lõ mamalõmalõ wangandrõgu saoha gõlõ khõ Lowalangigu, na itõrõ tõdõgu ndra’ugõ, na mangandrõ ndra’o, (Rom. 1, 8), 

5 bõrõ me urongo wa’omasiu andrõ, ba famati andrõ khõu, khõ Zo’aya, Yesu, ba ba ni’amoni’õ andrõ, fefu; (Kol. 1, 4); 

6 ena’õ abõlõ wa’awõsa andrõ ba wamatimõ, ba wamotokhi ba dõdõu fefu hadia ia zi sõkhi, ba khõda, khõ Keriso. (Gal. 5, 6).

7 Noa sa abõlõ wa’omuso dõdõgu, ba fondrara dõdõgu, ba wa’omasiu andrõ, me no te’okafui dõdõ ni’amoni’õ andrõ, ba khõmõ, ya’ugõ talifusõ.

8 III. Andrõ, he ŵa’ae tola manõ, ba khõ Keriso, ube’e goroisa khõu, ba zi nangea andrõ, ba edõnado zui mangandrõ khõu, bõrõ wa’omasi andrõ: Ya’odo andre, 

9 Faulo satua andre, ba nikuru gõi iada’e, khõ Keriso Yesu, (Tim. II. 1, 8), 

10 u’andrõ khõu, ba khõ nonogu andrõ, nisõndragu onogu, ba gurunga andre, Onesimo (”soguna”) andrõ, (Kor. I. 4, 15. Kol. 4, 9), 

11 si no si lõ guna khõu fõna, ba soguna iada’e, he khõu, ba he khõgu. 

12 Ufatenge ia mangawuli; tõdõgu nifatengegu. 

13 Utaha ia mena’õ khõgu, ena’õ ngoningonigu ia, salahiu, ba gurunga andre, ba duria somuso dõdõ andrõ. 14 Ba lõ’õ sa edõnado ulau hadia ia, na lõ niteheu, fa bõi hulõ zabua õlõ ndra’ugõ, ba dolotolomõ andrõ, ena’õ saoha gõlõ. 

15 Ma andrõ aefa ia khõu ma’ifu, ena’õ lõ’õ sa’ae tebulõ ia khõu, 

16 tenga sa’ae sawuyu, si tõra moroi ba zawuyu, no talifusõ ni’omasi’õ, ofõna khõgu, ba mendrua manõ na i khõu, he botonia, ba he ba khõ Zo’aya. (Tim. I. 6, 1. 2. Efes. 6, 5). 

17 Ba na belau ndra’odo, õŵa’õ, ba tema ia, hulõ na ya’o mena’õ. 

18 Ba na no te’ala ndra’ugõ, ibe’e mege, ba ma na so gõmõnia khõu, ba be’e õmõgu. 

19 Ya’o, Faulo, zanura da’e, tangagu: Ya’o zamu’a; fa lõ uŵa’õ khõu, õmõu khõgu ndra’ugõ andrõ gõi. (Tes. II. 3, 17).

20 Si ndruhu, ya’ugõ ga’a, ena’õ mohare ndra’o khõu, ba khõ Zo’aya! Okafui dõdõgu andre, ba khõ Keriso! (A. 10. 11).

21 IV. Me no udõnadõna wolo’õmõ, andrõ usura khõu da’õ, me no u’ila, tenga ha niŵa’õgu andrõ õ’o’õ, otõraigõ na i. 

22 Ba endrongagõ gõi wamaigi naha khõgu; udõnadõna sa, tebe’e buala ndra’o khõmi, bõrõ wangandrõmi andrõ. (Heb. 13, 19). 

23 I’owai ndra’ugõ Efafera, awõgu nikuru andrõ, ba khõ Keriso Yesu, (Kol. 1, 7), 

24 ba Mareko ba Arisaro ba Dema ba Luka, awõgu ba halõŵõ andrõ. (Kol. 4, 10. 14). 

25 Yafalukha dõdõmi wa’ebua dõdõ Zo’aya, Yesu Keriso. (Tim. II. 4, 22).