SURA FETERO II
SURA
FETERO II
FETERO
II.
FAZA
1
I.
Fangowai. II. Famarou tõdõ ba wa’owõlõ’õlõ ba mbuabua niha
Keriso. III. Si duhu wamahaõ niha Keriso andrõ.
1 I. Simoni Fetero
zanura da’e, enoni Yesu Keriso ba sinengenia, ba zi no falukha famati omasi’õ
andrõ, si mane khõma, ba wa’atulõ dõdõ andrõ, khõ Lowalangida, ba khõ Zo’aya ya’ita,
Yesu Keriso.
2 Yafalukha ami wa’ebua
dõdõ ba fa’ohahau dõdõ, yafahõna, ba wa’aboto ba dõdõmi Lowalangi, awõ Yesu, So’aya
ya’ita! (Yoh. 17, 3. Fet. I. 1, 2).
3 II. Me noa sa i’amualagõ
khõda, ba wa’abõlõ Lowalangi andrõ khõnia, fefu zoguna ba wangorifi ba ba wolo’õ
khõ Lowalangi, balazi wa’aboto ba dõdõda zogaoni ya’ita andrõ, moroi ba lakhõmi
andrõ ba moroi ba wa’asõkhi dõdõ andrõ khõnia, (Fet. I. 2, 9),
4 ba ni’amualagõ khõda
fondrege zebua gamabu’ula li andrõ, sebua bõli, ena’õ mõi khõmi gõi gamuata
Lowalangi andrõ, ba da’õ, na no mi’efa’õ ami ba wa’atekiko andrõ, ba wangisõ
andrõ, ba guli danõ. (Yoh. 1, 12. Yoh. I. 2, 15—17).
5 Ba andrõ ya’a’oi
so wa’owõlõ’õlõmi, ba wangoroma’õ buabua si sõkhi, ba wamatimi andrõ, ba ba mbuabua
si sõkhi, ba fa’aboto ba dõdõ,
6 ba ba wa’aboto
ba dõdõ, ba fanaha tõdõ, ba ba wanaha tõdõ, ba fa’anau gõlõ, ba ba wa’anau
gõlõ, ba fangata’ufi Lowalangi,
7 ba ba wangata’ufi
Lowalangi, ba fangomasi’õ talifusõ, ba ba wangomasi’õ talifusõ, ba fangomasi’õ
niha fefu. (Fet. I. 1, 22. Tes. I. 3, 12).
8 Na so khõmi da’õ
sa, ba na tedoudou, ba lõ areu ami, ba tenga si lõ bua ibe’e, ba wa’aboto ba
dõdõmi Zo’aya ya’ita, Yesu Keriso; (Tit. 3, 14. Yoh. 15, 16);
9 si lõ da’õ sa,
ba sau’a da’õ, no abõsi, ba no olifu ia wangehao andrõ, fameta horõnia fõna
andrõ. (Yoh. I. 2, 9—11).
10 Andrõ mendrua
manõ mi’owõlõ’õlõgõ, ya’ami ira talifusõ, wanga’aro’õ fogaoni ya’ami andrõ, awõ
wanutuyu ya’ami andrõ; na milau da’õ sa, ba lõ’õ manõ te’ala ami.
11 Na si manõ sa,
ba lõ te’ambõsi khõmi dania lala ba mbanua si lõ tebulõ andrõ, khõ Zo’aya ya’ita
andrõ, sangorifi ya’ita, Yesu Keriso.
12 Andrõ wa lõ ufamalõmalõ
wamasugi ba dõdõmi da’õ, he ŵa’ae no mi’ila, ba he ŵa’ae no aro dõdõmi ba zi duhu
andrõ, si so khõmi. (Rom. 15, 14. 15).
13 Ba no amaedola
gõmõgu da’õ, uŵa’õ tõdõgu, fatua sodo ba nose andre, fa bõi mõrõ ami ube’e, na ufasugi
ba dõdõmi, (Kor. II. 5, 1. 4),
14 me no u’ila, lõ
ara tõ, ba urõi nosegu andre, me no ibokai gõi khõgu da’õ So’aya ya’ita, Yesu
Keriso. (Tim. II. 4, 6. Yoh. 21, 18. 19).
15 Ba uforege gõi,
ena’õ lõ mamalõmalõ so khõmi, na no mofanõdo, fa mi’ila mifasugi ba dõdõmi da’õ.
16 III. Tenga sa fayafaya,
nifakhai dõdõ, dali khõma mege, me ma’ombakha’õ khõmi wa’abõlõ Zo’aya ya’ita, Yesu
Keriso, ba fa’ato’elenia; noa sa si no anehenehe fa’asalaŵania ndra’aga; (Tim.
I. 1, 4. Mat. 17, 1. 2. Yoh. I. 1, 1);
17 noa sa itema khõ
Lowalangi Ama zumange ba lakhõmi, me tetandrõsaigõ khõnia li andrõ, moroi ba lakhõmi
andrõ, si no ebua sibai, me imane: ”Onogu omasiõ da’õ, wa’omasigu ia.” (Mat. 3,
17; 17, 5).
18 Ba li andrõ, ba
no marongo, moroi ba mbanua si yaŵa, me soga khõnia, ba hili ni’amoni’õ andrõ,
(Mar. 9, 2),
19 ba no sambua na
wa’aro li zama’ele’õ andrõ, khõda, ba si sõkhinia, na mitõngõni ia, hulõ wandru,
sohagaini naha si no ogõmigõmi, irege tobaha fa’amoluo, ba irege no tumbu
madala andrõ ba dõdõmi. (Yoh. 5, 39. Sin. 119, 105. Kor. II. 4, 6. Fam. 2, 28.
Mal. 2, 4).
20 Na si a’a zaboto
ba dõdõmi, wa tenga lualua gera’era niha fefu, hadia ia, wama’ele’õ andrõ, ba zura.
(Kor. I. 2, 11).
21 Lõ’õ sa irai tumbu
hadia ia wama’ele’õ ba wa’edõna niha, nifatõrõ Geheha ni’amoni’õ niha, na humede
ira; ba Lowalangi moroi. (Sam. II. 23, 2. Yes. 34, 16. Mat. 10, 20; 22, 43).
FETERO II.
FAZA 2
I.
Samaelungu andrõ, ba huku si gõna ira dania. II. Fondrege zi lõ
sõkhi ira.
1 I. Ba so gõi zama’ele’õ
sofaya ba khõra fõna, si mane ba khõmi, me so gõi dania zamahaõ sofaya,
samobõrõ dania fa’atonia, ba wamakiko, sangosilõ’õgõ gõi So’aya, si no
mangõhõli ya’ira, ba sangasogõ khõra fa’atekiko salio. (Moz. V. 13, 1 b. t.
Mat. 24, 11. Hal. zin. 20, 30. Yoh. I. 4, 1. Yud. a. 4).
2 Ba ato dania zolo’õ khõra,
ba wa’asilõyaŵara andrõ, ba bõrõ ira, wa tetandraŵaisi dania lala si duhu
andrõ. (F. 2, 10. 13, 18. Rom. 2, 24).
3 Ba ba wa’omasira gana’a,
ba lafakhai waya, ba lalimo ami, ba i’otarai fõna sa’ae, ba lõ ahou huku si
gõna ira, ba fa’atekikora, ba tenga si mõrõ. (Tim. I. 6, 5).
4 Lõ’õ sa salimagõ khõ
Lowalangi mala’ika andrõ, si no mamazõkhi horõ, noa sa itibo’õ ba narako,
nirate ba zogõmigõmi, no ibe’e nitaha, ba wanguhuku dania, (Yud. a. 6. Fam. 20,
1; 9, 1. 11),
5 ba lõ salimagõ khõnia õsi
guli danõ fõna, ha ira No’akhi andrõ, sanuriagõ fa’atulõ dõdõ andrõ, ni’orifinia,
ba daŵalu, me ifatõrõ goloro ba niha si lõ sõkhi andrõ. (F. 3, 6. Fet. I. 3,
20).
6 Ba no itunu mbanua Zodoma
andrõ ba banua Gomora, i’etu’õ huku ba wanudugõ, no ibe’e famaedo, ba niha si
lõ sõkhi dania; (Moz. I. 19, 24. Yud. a. 7);
7 ba no i’orifi Loti andrõ,
satulõ tõdõ, nifakaokao andrõ, ba nilau zi si lõ yaŵa andrõ, ba wa’asilõyaŵara;
(Moz. I. 19, 16. 29);
8 afõkhõ sa ba zatulõ andrõ
wamaigi, me no si fatewu ia khõra, ba afõkhõ wamondrongo; ero ma’ṍkhõ falukha afõkhõ bakha
dõdõnia, si no atulõ andrõ, ba mbuabua si lõ sõkhi andrõ.
9 I’ila So’aya i’efa’õ
zangata’ufi Lowalangi, ba wanandraigõ, ba i’ila itaha zi lõ atulõ andrõ, irege
luo wanguhuku ba wangotu’õ ya’ira; (Sin. 91, 15. Kor. I. 10, 13);
10 ba ofõna zanõrõ lala nõsi
niha andrõ, wangisõ si ra’ira’iõ andrõ, ba sangositengagõ salaŵa; safaito
andrõ, si fayaŵa, — lõ afa’u ira latandraŵaisi zolakhõmi. (Yud. a. 8, Tit. 3,
1. 2. Moz. II. 22, 28).
11 Ba mala’ika andrõ, sabe’e
ba sabõlõ moroi khõra, ba lõ latandraŵaisi ira khõ Zo’aya. (Yud. a. 9).
12 II. Ba ya’ira andrõ, ba no timba zaliŵaliŵa
ba danõ si lõ tõdõ, si no to’ua sondra’u ba samakiko, latandraŵaisi zi lõ la’ila
na i, ba ba wa’atekikora andrõ tekiko ira dania, (Yud. a. 10),
13 falukha ira luo wa lõ atulõ
andrõ, me no fa’omasira laŵa’õ tõdõra wemangamanga andrõ, ba zi ma’ṍkhõ, si ra’ira’iõ ira ba saila
ita, mangamanga ira, ba walimosara andrõ, ba lahaogõhaogõ gõra, awõmi. (Yud. a.
12. Luk. 16, 19. Fil. 3, 19).
14 Ba hõrõra, ba no ha
sambalõ ira alawe sohorõ, ba lõ labatobato wanao horõ, ladõnisi dõdõ si lõ aro
na; tõdõra, ba no mufamaha ba wa’omasi gana’a, ono ni’elifi ira. (Tim. II. 3,
6).
15 No larõi lala satulõ, ba
no elungu ira, no latõrõ lala Mbileamo, ono Mbozoro andrõ, si no omasi luo wa
lõ atulõ andrõ, (Yud. a. 11; Moz. IV. 22, 5. 7. Fam. 2, 14),
16 ba si falukha gõi fotu
golalõŵania andrõ: kalide andrõ, nifonoro, si lõ li, ba ilau li niha, itenaŵa
wa lõ tõdõ zama’ele’õ andrõ. (Moz. IV. 22, 28 b. t.).
17 Ya’ira andrõ, ba umbu si
lõ idanõ ira, lawuo ni’oloi’õ nangi sabõlõ, ba ni’iro’õ si bongi andrõ
sogõmigõmi andrõ. (Yud. a. 12. 13. Amaed. 25, 14. Dan. 12, 3).
18 Lalau waya, hokha, ba
ladõnisi niha, ba wa’asilõyaŵa, isõ’isõ nõsi niha andrõ, niha si no aefa ma’ifu
ba zanõrõ lala elungua andrõ. (Yud. a. 16).
19 Lafabu’u khõra wa’aefa,
ba ya’ira, ba no sawuyu wa’atekiko; ba zabõlõ moroi khõnia sa mõi sawuyu niha.
(Yoh. 8, 34. Rom. 6, 16).
20 Na si no aefa ira sa ba
wa’ara’ira’iõ andrõ, ba niha guli danõ, ba wa’aboto ba dõdõra Zo’aya ya’ita,
sangorifi ya’ita, Yesu Keriso, ba na ifuli zui te’u’u ira da’õ, na ifuli te’ala
ira, ba no tobali abõlõbõlõ zafuria andrõ khõra, moroi ba zi fõfõna. (Heb. 6,
4—6. Mat. 12, 45).
21 Sõkhi sa ena’õ khõra, na
lõ irai aboto ba dõdõra lala satulõ andrõ, moroi na no aboto ba dõdõra, ba lafuli
furi, ba la’erogõ zui goroisa andrõ, ni’amoni’õ, nifa’ema khõra. (Heb. 10, 26
b. t. Luk. 12, 47).
22 No itõrõ ba khõra niŵa’õ
ba gamaedola andrõ, si duhu: ”Asu samuli ya’ia ba gutania, ba bawi nifemondri
sangawuli ba getuna.” (Amaed. 26, 11).
FETERO II.
FAZA 3
I.
Tenga faya wangawuli Keriso andrõ. II. Famarou tõdõ, ena’õ
lahaogõ, ba wamaondragõ ya’ia.
1 I. Sambua sa’ae zilalõ suragu,
ya’ami ni’omasi’õ, nisuragu khõmi, ba no faoma famasugi ba dõdõmi gera’era sohauhau,
(F. 1, 13. Fet. I. 5, 12),
2 ena’õ itõrõ tõdõmi daroma
li andrõ, nihõnagõ zama’ele’õ ni’amoni’õ andrõ fanguma’õ, ba oroisa zinenge
andrõ khõmi, ba khõ Zo’aya ya’ita, sangorifi ya’ita. (Yud. a. 17).
3 Da’õ zi a’a zaboto ba
dõdõmi ena’õ wa so dania zango’aya, na luo safuria andrõ, sanõrõ lala wangisõ
andrõ khõra. (Tim. I. 4, 1. Yud. a. 18),
4 ba sanguma’õ: Hezo gamabu’ula
linia andrõ, ba wa’asonia? Me no aefa mate ndra tua sa, ba lõ tebulõ fefu,
hadia ia, si mane ya’ia i’otarai ba mbõrõta nifazõkhi Lowalangi. (Hes. 12, 22. Yes.
5, 19).
5 Noa sa ni’odõdõgõ wa
tobini khõra, wa no i’otarai fõna sa’ae so mbanua si yaŵa ba tanõ tou, moroi ba
nidanõ, moroi ba daroma li Lowalangi, (Sin. 136, 6; 33, 6),
6 si moi gõi famakiko danõ’a
da’õ; inõnõi idanõ. (F. 2, 5. Moz. 1, 7. 11 b. t.).
7 Ba banua si yaŵa iada’e
ba tanõ iada’e, ba no mutenagõ, ba daroma li da’õ gõi, no mutaha, ba wamatõrõ
ba galitõ, na luo wanguhuku andrõ, no luo wa’atekiko niha si lõ mangata’ufi
Lowalangi. (F. 2, 9. Mat. 24, 35 b. t. ).
8 Ba bõi yatobini khõmi zi
sambalõ andrõ, ya’ami ni’omasi’õ; khõ Zo’aya, ba no timba zi hõnõ fakhe zi ma’õma’õkhõ,
ba timba zi ha ma’õma’õkhõ zi hõnõ fakhe. (Sin. 90, 4).
9 Nõ i’aragõ gamabu’ula li
andrõ So’aya, si mane niŵa’õ niha õsa, wa fangaragõ, ha fa’ebolo dõdõnia, bõrõ
ita, ba lõ omasi ia tekiko õsa, ena’õ ahori falukha ira wamalalini era’era. (F.
3, 15. Heb. 10, 37. Hes. 18, 23; 33, 11).
10 Ba hulõ wa’aso zanagõ, na
irugi dania luo Zo’aya andrõ, ba zofetu dania banua si yaŵa, wa’ataya, ba ba
zadudu bõrõtania, ba wa’akhõzi, ba zakhozi tanõ, awõ nifazõkhi, ba guli danõ
andrõ. (Mat. 24, 43 b. t. Tes. I. 5, 2. Yes. 51, 6. Sin. 102, 27).
11 II. Ba me sadudu da’õ fefu, ba hadia, lõ
miforege wanõrõ lala satulõ andrõ, awõ wangata’ufi Lowalangi? (Luk. 21, 36), 12 ba wanõtõna, ena’õ irugi
luo Lowalangi andrõ, ba wehulu dõdõ ba da’õ ya’ia mbõrõ wa adudu mbanua si yaŵa,
ba galitõ, ba bõrõ wa’alau mbõrõtania andrõ, ba wa’akhozi. (Fil. 3, 20).
13 Ba tadõnadõna mbanua si yaŵa,
si bohou, ba tanõ si bohou, dali gamabu’ula linia andrõ — ba zahono fa’atulõ
dõdõ. (Yes. 65, 17. Heb. 2, 5. Fam. 21, 27).
14 Andrõ, ya’ami ni’omasi’õ,
me midõnadõna zi manõ, ba mi’owõlõ’õlõgõ, ena’õ lõ hadia ia zi tokana ba sinegu
khõmi, fõnania, na ifaigi, ba wa’atulõ. (Tes. I. 5, 23).
15 Ba fangorifi, miŵa’õ
tõdõmi, wa’ebolo dõdõ Zo’aya ya’ita andrõ, si mane nisura Waulo gõi khõmi,
talifusõda ni’omasi’õ andrõ, ba wa’atuatua andrõ, nibe’e khõnia, (F. 3, 9. Rom.
2, 4),
16 si mane fehedenia gõi, na
itõrõ linia da’õ, ba zura andrõ, fefu, ba zi so õsa zafõkhõ famotokhi, nifuyu’õ
zi lõ mufahaõ andrõ ba si lõ aro tõdõ, si mane sura bõ’õ andrõ gõi, ba wamakiko
ya’ira. (Rom. 8, 19).
17 Ba ya’ami ni’omasi’õ, me
no tohõna mi’ila, ba mi’angelama, fa lõ adõni ami gõi ba wa’elungu zi lõ molo’õ
andrõ, ba fa lõ tebulõ ami ba wa’aromi andrõ. (Tes. II. 2, 2. Kor. I. 15, 58).
18 Ba yatedou khõmi wa’ebua
dõdõ andrõ, ba fa’aboto ba dõdõmi Zo’aya ya’ita, Yesu Keriso, sangorifi ya’ita.
Ya khõnia zumange, he iada’e, ba he na luo si lõ aetu andrõ. (Kol. 1, 9—11.
Fet. I. 5, 11).
Posting Komentar