SURA EFESO

Table of Contents

 

SURA EFESO

EFESO FAZA 1

I. Fangowai Waulo. II. Fangandrõ saoha gõlõ, ba howuhowu dõdõ andrõ, nitemara khõ Keriso. III. Fangandrõ ena’õ tehagaini na dõdõ mbanua Nefeso andrõ.

1 I. Faulo zanura da’e, sinenge Keriso Yesu, moroi ba nilau dõdõ Lowalangi, ba ni’amoni’õ andrõ, si so ba Nefeso, ba zamati khõ Keriso Yesu. (Kor. I. 1, 2. Hal. zin. 19).

2 Yafalukha ami wa’ebua dõdõ, ba fa’ohahau dõdõ, khõ Namada Lowalangi ba khõ Zo’aya ya’ita, Yesu Keriso. (Rom. 1, 7).

3 II. Nisuno Lowalangi Zo’aya ya’ita, Yesu Keriso, Amania, si no mamahowu’õ ya’ita, fefu ngawalõ wamahowu’õ Geheha andrõ, ba zorugo, ba khõ Keriso. (Kor. II. 1, 3). 

4 Itõrõ wanutuyunia ya’ita, ba khõnia andrõ, fõna wolata tanõ, ena’õ sohauhau ita, si lõ sinegu, fõnania. (F. 3, 11. Tim. II. 1. 9. Kol. 1, 22). 

5 Moroi ba wa’omasinia ita, wa no ihõnagõ ihonogõi, ena’õ ono ita khõnia, moroi khõ Yesu Keriso, dali zomasi ia, nilau dõdõnia; (F. 2, 4. Rom. 8, 29); 

6 ba wanuno lakhõmi wa’ebua dõdõnia, ni’amualagõnia khõda, ba zomasi ia andrõ. (Rom. 3, 24. Mat. 3, 17). 

7 Ba da’õ so khõda wangõhõli andrõ, ba ndronia, fangefa lalõ andrõ, dali wa no a’oi so wa’abua dõdõnia, (Kol. 1, 14. Fet. I. 1, 18. Efes. 2, 7. Rom. 9, 23), 

8 nihõnania fangoroma’õ khõda, ba ngawalõ wa’atuatua fefu, ba ba ngawalõ wa’aboto ba dõdõ, 

9 noa sa ibokai khõda zi no tobini andrõ, nilau dõdõnia, dali zomasi ia, nihonogõinia tõdõnia, (F. 3, 9 b. t.), 

10 nifatõrõnia ba ginõtõ ndrõfi andrõ, ba wamarahugõ fefu, hadia ia, ba khõ Keriso, he si so ba zorugo, ba he si so ba guli danõ, ba khõnia. (Kol. 1, 20). 

11 Ba da’õ tasõndra gõi dana khõda andrõ, ya’ita nihonogõi fõna sa’ae, dali nihuku zamalua fefu, hadia ia, ba gera’era nilau dõdõnia andrõ, (F. 1, 4. Rom. 8, 28 b. t.), 

12 ena’õ fanuno lakhõminia ita, ya’ita, si no tohõna manõtõna khõ Keriso. (Hal. zin. 26, 6. 7). 

13 Ba da’õ gõi so ami, me no mirongo daroma li si duhu andrõ, turia somuso dõdõ andrõ, fangorifimi, ba ba da’õ te’a’aro’õ gõi ami, Eheha ba gamabu’ula li andrõ, ni’amoni’õ, me no mamati ami. (Kol. 1, 5. 6. Kor. II. 1, 22).

14 Eheha andrõ we’ewe’e dõdõ, ba gondrõita andrõ khõda, ba wangorifi tána khõnia andrõ, ba wanuno lakhõminia andrõ. (F. 4, 30. Kor. II. 5, 5).

15 III. Andrõ ya’odo gõi, me no urongo wamati andrõ, ba khõmi, khõ Zo’aya ya’ita, Yesu, ba fa’omasimi ni’amoni’õ andrõ fefu, (Kol. 1, 3. 4).

16 ba lõ ubato wangandrõ saoha gõlõ, ba khõmi andrõ, itõrõ ligu, ba wangandrõgu, (Fil. 1, 3), 

17 ena’õ ibe’e khõmi Geheha ba wa’atuatua andrõ Lowalangi Zo’aya ya’ita andrõ, Yesu Keriso, Ama lakhõmi andrõ, Eheha ba wama’ele’õ, ba wa’aboto ba dõdõmi ia. 

18 Ena’õ tefehaga hõrõ dõdõmi, fa mi’ila hadia dõtõnafõ, ba wogaoninia andrõ, ba he wisa, wa no a’oi so lakhõmi gondrõitania andrõ, ba ni’amoni’õ andrõ, 

19 ba he wisa ginõtõ wa’abõlõnia andrõ, si no fahõna, ba khõda, samati, dali wolaunia ba wa’abe’e wa’abõlõnia andrõ. (F. 3, 7. 20. Kol. 2, 12). 

20 Da’õ zi no i’oroma’õ ba khõ Keriso, me isusugi moroi ba ngai zi mate, ba me ifedadao ba gambõlõnia, ba zorugo, (Fet. I. 3, 22. Sin. 110, 1), 

21 alaŵa yaŵa zamatõrõ andrõ fefu, ba yaŵa zalaŵa andrõ, ba yaŵa zabõlõ, ba yaŵa zo’aya andrõ, ba yaŵa zi so tõi fefu, nitõtõi, tenga ha ba gõtõ danõ da’e, ba gõtõ dania gõi. (Fil. 2, 9 b. t.). 

22 Ba no ibe’e barõ gahenia fefu hadia ia, ba no ibe’e hõgõ hadia ia fefu ia, ba mbanua andrõ. (Kor. I. 15, 27. Efes. 4, 15; 5. 23), 

23 si no tobali botonia, ahonoa zamo’ahonoa fefu hadia ia, ba khõra fefu. (F. 3, 19). (Kor. I. 12, 27. Kol. 2, 9).

 

EFESO FAZA 2

I. He wisa gamuata mbanua Nefeso fõna, ba he wisa iada’e. II. Ba khõ Keriso orudu ira, he niha Yehuda, ba he niha baero.

1 I. Khõmi gõi, si no mate fõna, ba golalõŵami andrõ, ba ba horõmi andrõ, (Kol. 2, 13), 

2 nitõrõmi fõna, dali huku ba guli danõ andre, dali zalaŵa andrõ, sokhõ fa’abõlõ andrõ, ba dalu mbanua, bekhu andrõ, sabõlõ iada’e na, ba ndraono wa lõ molo’õ andrõ, (F. 6, 12. Tit. 3, 3 b. t. Kor. II. 4, 4), 

3 nitõrõda gõi fõna, dozi ita, ba wangisõ nõsida andrõ, me talau zomasi nõsi, awõ gaso’ala dõdõda andrõ, ba me to’ua iraono si gõna fõnu ita, si mane tánõ bõ’õ gõi. (Kol. 3, 7. Rom. 8, 7. 8). 

4 Ba Lowalangi andrõ, si no a’oi so fa’ahakhõ dõdõ, ba wa’omasinia andrõ, si no fahõna, fa’omasinia ita, (F. 1, 5—7. Yoh. I. 3, 1), 

5 he me no si mate ita, ba golalõŵa andrõ, ba no i’orifi ita, awõ Keriso — fa’ahakhõ dõdõ, wa no auri ami — (F. 5, 14. Kol. 2, 12 b. t. Hal. zin. 15, 11), 

6 ba no ifao wanusugi ya’ita ba famawu’a ya’ita, fama’aso ya’ita ba mbanua zorugo, ba khõ Keriso Yesu. (Fil. 3, 20),

7 ena’õ i’oroma’õ ba gõtõ dania wa’ahakhõ dõdõnia andrõ, si no a’oi so, si no fahõna, ba wa’ebua dõdõnia khõda, ba khõ Keriso Yesu. (F. 1, 7). 

8 Fa’ahakhõ dõdõ sa, wa no auri ami, moroi ba wamati, ba tenga moroi khõmi da’õ, no buala Lowalangi. (Rom. 3, 24. Gal. 2, 16),

9 tenga moroi ba mbuabua, fa bõi isuno ia niha. (Rom. 3, 27).

10 Nifazõkhinia sa ita, nifazõkhi ba khõ Keriso Yesu, ba mbuabua si sõkhi, ba nihonogõi Lowalangi ya’ita, fõna sa’ae, ena’õ tatõrõ. (Tit. 2, 14. Kor. II. 5, 17).

11 II. Andrõ bõi mi’olifugõ ami, ya’ami si no niha baero fõna, to’ua ya’ami, niŵa’õ si lõ muboto, ba zi so tõi niboto, niboto tanga, ba nõsi, (Rom. 2, 26. 29. Kol. 2, 13), 

12 wa no lõ Keriso khõmi, me luo da’õ, wa no tenga so’urakha ami ba mbanua Ndraono Gizeraëli, wa no niha bõ’õ ami, ba wawu’usa li andrõ, ba gamabu’ula li andrõ, wa no si lõ Lowalangi, ba guli danõ andre. (Rom. 9, 4). 

13 Ba iada’e, ba khõ Keriso Yesu, ba no tobali ahatõ ami, ya’ami, si no arõu fõna, bõrõ ndro Keriso andrõ. (Yes. 57, 19. Efes. 1, 7). 

14 Fangatulõda sa ia, ya’ia, si no mangorudugõ si dua ngasi andrõ, si no manudugõ oto’oto, õli andrõ, (Yes. 9, 6. Kol. 1, 20), 

15 fa’udusa andrõ, me no iheta goroisa amakhoita, nifakhoi andrõ, ba nõsinia, ena’õ ibali’õ niha si bohou, si ha samõsa, zi darua andrõ, ba khõnia, wangatulõ’õ ya’ira, (Kol. 2, 14),

16 ba ena’õ i’atulõ’õ khõ Lowalangi zi dua ngasi andrõ, ba mboto andrõ, si ha sambua, moroi ba rõfa andrõ, na no ibunu wa’udusa andrõ, ba da’õ yaŵa. (Kol. 1, 21). 

17 Ba me so ia, ba ituriagõ wangatulõ, turia somuso dõdõ, khõmi, sarõu, ba fangatulõ gõi ba zahatõ. (F. 2, 13. Hal. zin. 10, 36). 

18 Me moroi khõnia, wa no faoma so khõda lala khõ Nama, ha sambua Geheha. (F. 3, 12. Rom. 5, 2). 

19 Ba tobali tenga sa’ae niha bõ’õ ami, ba tenga sa’ae si fatewu, no banua ni’amoni’õ ami, ba soroiyomo Lowalangi. (F. 2, 12; 3, 6), 

20 nifa’anõ ba dete danedane andrõ, sinenge andrõ ba sama’ele’õ, ba zi no tobali toyo ba watalinga Keriso Yesu, (Kor. I. 3, 9 b. t. Yes. 28, 16),

21 ba zanõi tomosa andrõ, ma’asambua, nifa’anõ, tobali osali ni’amoni’õ, ba khõ Zo’aya, (F. 4, 16); 

22 ba nifa’anõ gõi ya’ami, awõ, omo Lowalangi, ba Geheha. (Kor. I. 3, 16. Fet. I. 2, 5).

 

EFESO FAZA 3

I. Halõŵõ Waulo, halõŵõ zinenge, ba niha baero. II. Fangandrõnia, salahi mbanua Nefeso.

1 I. Andrõ ya’o, Faulo, nikuru andrõ khõ Keriso, bõrõ ami, ya’ami niha baero fõna — (F. 4, 1. Hal. zin. 21, 33. Tim. II. 1, 8), 

2 na no mirongo nihonogõi Lowalangi, ba wa’ebua dõdõnia andrõ, nibe’e ba dangagu, ba khõmi andrõ, (Gal. 2, 7 b. t.), 

3 wa no mu’oroma’õ khõgu zi no tobini andrõ, ba wama’ele’õ, nitõrõ ligu mege ma’ifu. (F. 1, 9 b. t. Gal. 1, 12). 

4 Ba da’õ tola mi’ila wa’aboto ba dõdõgu zi no tobini andrõ, khõ Keriso, na mibaso, (Rom. 16, 25 b. t.), 

5 si lõ mu’oroma’õ ba nono niha, ba gõtõ fõna, si mane fangoroma’õ ya’ia iada’e, ba zinengenia ba ba zama’ele’õ andrõ khõnia, ni’amoni’õ, ba Geheha, (Kor. I. 2, 10), 

6 wa nifanema gõi niha baero, ba gondrõita andrõ, wa no ndrotondroto gõi ira ba sanema, ba gamabu’ula li andrõ, ba khõ Keriso Yesu, moroi ba duria somuso dõdõ andrõ. 

7 Ba da’õ no tobali enoni ndra’o, dali mbuala andrõ fa’ebua dõdõ Lowalangi, nibe’e khõgu, balazi wolaunia, ba wa’abõlõnia, (Rom. 1, 5), 

8 ya’o, fondrege zide’ide ni’amoni’õ, si no falukha fa’ebua dõdõ andrõ, ba wangombakha ba niha baero, wa no a’oi so khõ Keriso, wa no lõ famaedo, (Kor. I. 15, 9. 10), 

9 ba ba wamotokhi ba dõdõra, he wisa nihonogõi, ba zi no tobini andrõ, si no mubini’õ, gõtõgõtõ wa’ara, ba dõdõ Lowalangi, sombõi fefu hadia ia. (Kol. 1, 15 b. t. Rom. 16, 25).

10 Ena’õ te’oroma’õ iada’e ba zamatõrõ andrõ ba ba zalaŵa andrõ, ba zorugo, ba mbanua Keriso andrõ, zi siŵa mbalõ wa’atuatua Lowalangi andrõ, (Fet. I. 1, 12), 

11 dali gera’era andrõ, si no gõtõgõtõ wa’ara, nifaluania ba khõ Keriso Yesu, So’aya ya’ita, (F. 1, 4. 9), 

12 ba zi so khõda wa lõ aiwõ, awõ lala, ba wanõtõna, moroi ba wamati andrõ khõnia. (F. 2, 18. Heb. 4, 16).

13 Andrõ u’andrõ, ena’õ lõ atage ndra’o, ba wamakao andrõ khõgu, salahimi; si tobali lakhõmimi. (Tes. I. 3, 3. Kol. 1, 24).

14 II. Andrõ ubalõduhini tou danõ, fõna Nama, (F. 1, 3), 

15 ba zoroi tõi soi fefu, he ba zorugo, ba he ba guli danõ, 

16 ena’õ ibe’e khõmi, moroi ba lakhõminia andrõ, si no a’oi so, fa tedou wa’abõlõmi, moroi ba Gehehania, ba niha bakha andrõ; (F. 6, 10. Kol. 1, 11 b. t.);

17 ena’õ monahia Keriso ba dõdõmi, ba wamati andrõ, (Yoh. 14, 23),

18 ena’õ soŵa’a ami, ba wa’omasi, ba nifodanedane, ena’õ tola aboto ba dõdõmi, awõ ni’amoni’õ andrõ fefu, he wisa wa’ebolo, ba he wisa wa’anau, ba he wisa wa’abakha, ba he wisa wa’alaŵa, 

19 ba ena’õ aboto ba dõdõmi wa’omasi Keriso andrõ ita, si tebai aboto ba dõdõ niha mena’õ, ena’õ tehõna khõmi zi no fahõna andrõ khõ Lowalangi, fefu. (Kol. 2, 2 b. t.). 

20 Ba ya’ia, sangila manalu’i na fefu hadia ia, wolau, fa arõu italu’i ni’andrõda, awõ zi fabõbõ ba gera’erada, dali wa’abõlõ andrõ, si no abõlõ ba dõdõda, (Rom. 16, 25 b. t.), 

21 ya’ia nifosumange ba mbanua andrõ, ba ba khõ Keriso Yesu, gõtõgõtõ wa’ara, irugi zi lõ aetu! Yaduhu. (Fil. 4, 20).

 

EFESO FAZA 4

I. Famarou tõdõ, ena’õ na ha sara dõdõra, ba II. ena’õ na la’alui gera’era si bohou ba fa’ohauhau dõdõ ba fa’adõlõ dõdõ, ena’õ na ebolo dõdõra khõ nawõra, ba ena’õ na sõkhi mbuabuara.

1 I. Ba u’andrõ khõmi, ya’o nikuru andre, ba khõ Zo’aya, ena’õ mitõrõ zi nangea lala nikaoni andrõ, me no mukaoni ami. (F. 3, 1; 6, 20. Kol. 1, 10. Tes. I. 2, 12). 

2 Ya a’oi so wa lõ fayaŵa ami, awõ wa’asõkhi dõdõ, awõ wa’ebolo dõdõ, mibologõ dõdõmi khõ nawõmi, mi’omasi’õ ia; (Kol. 3, 12. Rom. 12, 10); 

3 mi’oigõ dõdõmi, ena’õ lõ tebulõ wa ha sara dõdõ, ena’õ fabõbõ ami, famabõbõ fa’atulõ andrõ: (Kol. 3, 13, 14. Rom. 12, 16). 

4 Ha sambua mboto, ba ha sambua dõdõ, si mane fagaoni ya’ami gõi, ba zi ha sara fanõtõna, ba nikaoni ya’ami. (Rom. 12, 5. Kor. I. 12, 13. 27). 

5 Ha samõsa Zo’aya, ha sambua wamati, ha sambua wamayagõ idanõ; (Mat. 23, 8) 

6 ha sambua Lowalangi ba Amara fefu, yaŵara fefu, ba sanõrõ ya’ira fefu, ba ba dõdõra fefu. (F. 3, 14. 15. Kor. I. 8, 6. Mal. 2, 10). 

7 Ba dozi ita, ba no mube’e wa’ebua dõdõ andrõ, dali ndrohundrohu mbuala Keriso andrõ; (Rom. 12, 3. 6. Fet. I. 4, 10); 

8 andrõ imane sama’ele’õ: ”No numalõ ia miyaŵa, ba no i’ohe nikuru, ba no mamuala ia ba niha.” (Sin. 68, 19). 

9 Ba hadia geluaha, wa ”no numalõ ia miyaŵa”, na tenga wa no numalõ ia mitou gõi ua, ba mbanua tou? (Fet. I. 3, 19. Mat. 12, 40). 

10 Si no numalõ mitou andrõ, da’õ gõi zi no numalõ miyaŵa, yaŵa zorugo fefu, ena’õ ifo’ahonoa fefu hadia ia. (Yoh. 3, 13). 

11 Ba ya’ia gõi zangohonogõi: sinenge õsa, ba sama’ele’õ õsa, ba sangombakha turia somuso dõdõ õsa, ba kubalo õsa, ba samahaõ, (Kor. I. 12, 28. Hal. zin. 21. 8. Fet. I. 5, 2), 

12 ba wangehao ni’amoni’õ andrõ, ba halõŵõ andrõ, nihalõ, ba wama’anõ boto Keriso andrõ, (F. 2, 22), 

13 ena’õ oi takhamõ, fa ha sara dõdõ wamati, ba fa aboto ba dõdõda Nono Lowalangi, fa ira matua, si no mo’ahonoa, ita, dali ndrohundrohu wa’ebua Keriso andrõ, si no mo’ahonoa. (F. 3. 18. 19. Luk. 6, 40). 

14 Bõi sa’ae iraono ita, nifaheuheu ba nifangõ õngõrõ ba nangi wamahaõ andrõ, fefu, hadia ia ngawalõ, moroi ba walimosa niha, moroi ba wa’onekhe, ba wolohe ba gowõhõna; (Kor. I. 3, 1. Kol. 2, 8); 

15 ena’õ na atulõ ita, ba wa’omasi andrõ, ba ena’õ na manõi fefu hadia ia, ba khõnia, si no tobali hõgõ, Keriso. (F. 3, 17; 3, 23. Kol. 2, 19).

16 Ba khõnia mobõrõ, wa tefa’anõ mboto andrõ, ma’asambua, awõ wa tefabõbõ, ba wamakhai andrõ fefu, ba dolotolo andrõ, dali wa’abõlõ andrõ, ba zi no motána zambuana, ena’õ tobali boto, ba wa’atedounia, ba wa’omasi. (F. 2, 21. Rom. 12, 4 b. t. Kor. I. 12, 12 b. t.).

17 II. Ba da’õ niŵa’õgu, ba ufaduhu’õ, ba khõ Zo’aya, ena’õ amuatami andrõ, ba bõi sa’ae si mane amuata niha baero gõi, ba wayafaya dõdõra andrõ, (Rom. 1, 21. Fet. I. 4, 3), 

18 si no mu’ogõmigõmisi tõdõ, si no olifu wa’auri andrõ, khõ Lowalangi, ba wa lõ aboto ba dõdõra, ba wa’abe’e dõdõra andrõ, sanõrõ lala hokha, 

19 me no mate bakha dõdõra, ba wamalua si lõ sõkhi andrõ, fefu, ba wa tebai abuso. (Rom. 1, 24 b. t.). 

20 Ba ya’ami, ba tenga si manõ wanõngõnimi Keriso, (Tit. 2, 11. 12), 

21 na no mirongo atṍ ia, ba na no mufahaõ ami, ba khõnia, wa khõ Yesu so zi duhu, (Yoh. 1, 17), 

22 wa niheta niha si tohõna andrõ khõmi, ba lala fõna andrõ, samakiko ya’ia, ba wangisõ andrõ, ba wa’elungu. (Kol. 3, 8 b. t.). 

23 Ba nibohouni ami, ba gera’era dõdõmi andrõ. (Rom. 12, 2), 

24 ba mi’onukha niha si bohou andrõ, nibe’e famaedo Lowalangi, wamazõkhi ya’ia, ba wa’atulõ dõdõ ba ba wa’ohauhau, ba zi duhu. (Kol. 3, 10. Rom. 13, 14). 

25 Andrõ mibõhõli waya, faoma si duhu milau khõ nawõmi, me no faoma ndrotondroto ita. (Sakh. 8, 16. Kol. 3, 9). 

26 Na mofõnu, ba bõi mifazõkhi horõ; bõi mi’ekhugõ luo ba wõnumi. (Sin. 4, 5; 37, 8. Yak. 1, 19. 20). 

27 Ba bõi mifonaha Gafõkha. (Yak. 4, 7), 

28 si no managõnagõ, ba bõi yamanagõnagõ sa’ae, ba yamohalõŵõ, yamufazõkhi zi sõkhi, tangania, ena’õ so khõnia, ba wame’e ba zi numana. (Tes. I. 4, 11). 

29 Bõi alua ba mbewemi wehede si lõ sõkhi, he ha sambua li; hadia zonahia, ba wanga’azõkhi, na moguna, ena’õ omasi zamondrongo. (F. 5, 4. Mat. 12, 36. Kol. 4, 6; 3, 16). 

30 Ba bõi mibusi dõdõ Geheha ni’amoni’õ andrõ, fangaromi, ba luo wangorifi andrõ. (F. 1, 13. 14). 

31 Fefu ngawalõ wotõtõisa, ba fa’abao dõdõ, ba fõnu ba faguaguasa, ba fanandraŵa, ba yatebato khõmi, awõ fefu, hadia ia zi lõ sõkhi. (Fet. I. 2, 1). 

32 Ba faoma mihaogohaogõ khõ nawõmi, faoma mihakhõsi tõdõ, faoma mibe’e aefa zala nawõmi, si mane fangefa’õ Lowalangi khõmi gõi, ba khõ Keriso. (Kol. 3, 12. 13. Mat. 18, 35).

 

EFESO FAZA  5

I. Tohutohu wamarou tõdõ, ba wangohauhau. II. Si sõkhi amuata zi faronga, khõ nawõra.

1 I. Ba mi’o’õ khõ Lowalangi, si mane iraono omasiõ. (Mat. 5, 48. Luk. 6, 36). 

2 Ba mitõrõ lala wa’omasi andrõ, si mane fangomasi’õ Keriso ya’ita, awõ wa no ibe’e ia salahida, ame’ela ba sumange, samohua khõ Lowalangi. (E. 4, 1. 2. Yoh. 13, 34. Gal. 2, 20. Heb. 9, 14). 

3 Ba fohorõ, ba hadia ia ngawalõ wa’ara’ira’iõ fefu, ba fa’omasi gana’a, ba bõi na i terongo ba khõmi, si manõ zoadu ba ni’amoni’õ. (Kol. 3, 5. 6. Kor. I. 6, 18 b. t.). 

4 Ba fehede si lõ sõkhi, ba fayafaya, ba fawudesa si lõ boto, si lõ moadu; si sõkhinia, na fangandrõ saoha gõlõ. (F. 4, 29).

5 Da’õ sa ya’aboto ba dõdõmi: lõ mo’urakha ba mbanua Keriso, ba mbanua Lowalangi andrõ, zohorõ, ba si ra’ira’iõ, ba somasi ana’a, ha niha ia, si no same’e adu. (Kor. I. 6, 9. 10. Mat. 6, 24.). 

6 Bõi yamufaelungu ami niha, fehede si lo boto; da’õ sa mbõrõ wa mofõnu Lowalangi ba ndraono si lõ mamondrongo li. (F. 4, 14. Kor. I. 15, 33. Mat. 7, 15). 

7 Andrõ bõi awõra ami. 

8 Noa sa sogõmigõmi ami fõna, ba iada’e, ba no haga ami ba khõ Zo’aya; lala ndraono haga mitõrõ, (Fet. I. 2, 9. Fil. 2, 15. Yoh. 12, 35. 36). 

9 Buabua haga sa, ba ya’ia ngawalõ wa’asõkhi dõdõda, khõ nawõda, awõ wa’atulõ dõdõ, awõ wa’aduhu. (Gal. 5, 22). 

10 Ba mitimba tõdõmi, hadia zomasi Zo’aya, (Rom. 12, 2), 

11 ba bõi fao ami ba wama’ua buabua wa’ogõmigõmi andrõ, si lõ boto, mi’otu’õ na i gõi. (Kor. II. 6, 14). 

12 Hadia nilaura sa, ba zi tobini, ba aila ita na i tatõtõi. 

13 Ba fefu da’õ, hadia ia, ba ni’otu’õ ba haga, ba ni’oroma’õ; fefu, hadia ia sa, zoroma, ba haga da’õ. (Yoh. 3, 20. Kor. I. 4, 5). 

14 Andrõ so ba zura: ”Faoso, ya’ugõ, si no mõrõ, fazaŵa’õ moroi ba ngai zi mate, ba ihagaini ndra’ugõ Keriso” (Yes. 60, 1. 2. Rom. 13, 11). 

15 Ba mifaigi sibai, he wisa wanõrõmi lalami; bõi si mane sambõ era’era, si mane satuatua a’ine. (Mat. 10, 16. Yak. 3, 13). 

16 Mi’oguna’õ ginõtõ andrõ, me no si lõ sõkhisõkhi mbaŵa da’e. (Kol. 4, 5). 

17 Andrõ bõi sambõ era’era ami, ya’aboto ba dõdõmi hadia zomasi Zo’aya. (F. 5, 10). 

18 Ba bõi mibusi ami agu, tobali famakuyu da’õ; yafahõna khõmi Geheha; (Amaed. 20, 1; 23, 20. 29); 

19 milaulau khõ nawõmi zinunõ, ba lailõ, ba manõmanõ nibe’e Geheha, mifalailõ tõdõmi, ba mi’anunõ, khõ Zo’aya. (Kol. 3, 16. Sin. 96, 1). 

20 Bõi mifamalõmalõ wangandrõ saoha gõlõ, khõ Lowalangi Ama, nitemada khõnia fefu, ba dõi Zo’aya ya’ita, Yesu Keriso. (Kol. 3, 17. Tes. I. 5, 18).

21 Faoma mi’o’õ li nawõmi, ba wa’ata’uda Keriso. (Mat. 20, 26. Fet. I. 5, 5).

22 II. Ira alawe, ba ndramu’o’õ li ndra matuara, hulõ na li Zo’aya, (Moz. I. 3, 16. Kol. 3, 18), 

23 me no hõgõ ndra alawe ndra matua, si mane Keriso gõi, me no hõgõ mbanua ia, ba sangorifi boto ia. (F. 1, 22. 23. Kor. I. 11, 3). 

24 Ba si mane banua, me no la’o’õ li Keriso, ya si manõ ndra alawe, ba ndra matua, ba ngawalõ hadia ia, fefu. (Fet. I. 1, 3). 

25 Ya’ami, ira matua, mi’omasi’õ ndra alawemi, si mane Keriso, me no i’omasi’õ mbanua, ba me no ibe’e salahira ia. (Kol. 3, 19. Efes. 5, 2), 

26 ena’õ i’amoni’õ ira, me no ihaogõ ira, femondri andrõ, ba daroma li, (Yoh. 17, 17. 19; 15, 3. Tit. 3, 5), 

27 ena’õ molakhõmi mbanua andrõ khõnia, ibe’e, si lõ hadia ia da’i, ba ma si tekuru, ba ma hadia ia, ena’õ ohauhau, si lõ sinegu. (F. 1, 4. Kol. 1, 21. 22).

28 Ya si manõ wa’omasi ndra matua ndra alawe khõra, si mane fa’omasira mbotora. Somasi ngambatõnia, ba i’omasi’õ mbotonia. 

29 Lõ irai fa’udu niha ba nõsinia, irorogõ, ba ihaogõhaogõ, si mane Keriso gõi ba mbanua, 

30 me no ndrotondroto mbotonia ita. (Rom. 12, 5). 

31 ”Andrõ irõi namania, awõ ninania niha, ba molemba ia ba ngambatõnia, ba tobali ha sambua õsi zi darua andrõ.” (Moz. I. 2, 24).

32 No ebua zi no tobini andrõ; ba fehedegu, ba ba khõ Keriso ba ba mbanuania faekhu. (Kor. II. 11, 2). 

33 Ba ba khõmi, ba yamu’omasi’õ ngambatõnia zamõsana, si mane fa’omasinia ia; ba ira alawe, ba ena’õ na i’ata’ufi ndra matua.

 

EFESO FAZA 6

I. Si sõkhi amuata ndraono, khõ ndra amara, ba amuata ndra ama, ba ndraono, ba II. amuata zokhõ niha bõ’õ, ba zawuyura, ba amuata zawuyu, ba zokhõ ya’ira. III. Famarou tõdõ, ba wanganau’õ õlõ, ba wasõndrata andrõ, ba ba wa lõ mõrõ, ba ba wangandrõ. IV. Fango’ozui sura.

1 I. Ya’ami iraono, mi’o’õ li ndra amami inami, ba khõ Zo’aya; da’õ sa zatulõ. (Kol. 3, 20). 

2 ”Fosumange namau, awõ ninau,” da’õ mbõrõta goroisa si so amabu’ula li: 

3 ”ena’õ ohahau dõdõu, ba ena’õ anau nosou, ba guli danõ.” (Moz. II. 20, 12).

4 Ba ya’ami, ira ama, bõi mi’andrõ wõnu ndraonomi, mifamahamaha ira, mibe’e wotu, ba mifarou dõdõra, khõ Zo’aya. (Kol. 3, 21. Moz. I. 18, 19).

5 II. Ya’ami sawuyu, mi’o’õ li zokhõ botomi; sata’u ami, ba sanizinizi, ya’adõlõ dõdõmi, hulõ na khõ Keriso. (Kol. 3, 22 b. t. Fet. I. 2, 18). 

6 Bõi ha na anehe ira, si mane sangalui fa’omasi niha ira; ena’õ na si mane enoni Keriso, solo’õ somasi Lowalangi, 

7 soroi ba dõdõ, si no aoha gõlõ, we’amõi enoni, hulõ na khõ Zo’aya, ba na tenga ba niha; 

8 si no mangila: hadia zi sõkhi, nilau zamõsana ba tesulõni khõnia, khõ Zo’aya, he sawuyu ia, ba he si tenga sawuyu. (Kor. II. 5, 10).

9 Ba ya’ami, sokhõ niha bõ’õ, ba mimanõ gõi khõra, ba mibato wameta’u ya’ira, me no mirongo, so ba zorugo Zo’aya ya’ami, So’aya ya’ira gõi, ba lõ ba khõnia famaigi bawa niha. (Moz. III. 25, 43. Kol. 4, 1. Rom. 2, 11).

10 III. Ba hadia baero õ, ba mi’abõlõ’õ ami, ba khõ Zo’aya, ba ba wa’abõlõ wa’abe’enia andrõ. (Kor. I. 16, 13). 

11 Mi’a’aro’õ ami, fangaro andrõ, khõ Lowalangi, ena’õ abe’e ami, ba wa’onekhe Gafõkha andrõ. 

12 Tenga sa fasõndrata ba niha wasõndratada, no fasõndrata ba zamatõrõ andrõ, ba zalaŵa andrõ, ba zokhõ uli danõ andre, ba zogõmigõmi andre, fasõndrata ba mbekhu si lõ sõkhi andrõ, ba mbanua si yaŵa. (F. 2, 2. Luk. 22, 31). 

13 Andrõ mihalõ wangaró andrõ khõ Lowalangi, ena’õ tola milaŵa, na baŵa si lõ sõkhi, ba ena’õ tola mi’asiwai fefu hadia ia, ba ena’õ mõna ami. (Kor. II. 10, 4). 

14 Ba mi’abe’e’õ ami, bõbõ lõwilõwimi zi duhu, ba õrõbami wa’atulõ dõdõ, (Luk. 12, 35. Yes. 11, 5), 

15 badagahe ba gahemi wa no mifa’anõ ami, ba wangombakha turia somuso dõdõ andrõ, ba wa’atulõ. 

16 Ba awõ da’õ fefu, ba mihalõ mbaluse famati andrõ, si tola mibe’e fangokafu nono wana Gafõkha andrõ, so’alitõ; (Amaed. 30, 5. Sin. 7, 11); 

17 ba mihalõ detenaulu fangorifi andrõ, awõ wõda Geheha andrõ taroma li Lowalangi. (Tes. I. 5, 8. Yes. 59, 17. Heb. 4, 12). 

18 Fefu hadia ia ngawalõ wangandrõ, awõ ngawalõ wakaosa, milau, bõi mifamalõmalõ, soroi ba Geheha ba bõi mifõrõfõrõ ba da’õ, ya’a’oi so wa’anau gõlõ, awõ wangandrõ, salahi ni’amoni’õ andrõ fefu, (Luk. 18, 1. Kol. 4, 2. 3), 

19 ba salahigu, ena’õ tebe’e khõgu hadia niŵa’õ, na fahuhuo ndra’odo, ena’õ lõ aiwõ ndra’o, wangombakha si no tobini andrõ, turia somuso dõdõ andrõ, (Tes. II. 3, 1),

20 ba nibe’e sinenge ya’odo, ba rate andre, ena’õ lõ alaŵõlaŵõdo ba da’õ, ena’õ si nangea huhuo huhuogu andrõ. (Kol. 4, 4. Kor. II. 5, 20).

21 IV. Ba ena’õ mi’ila gõi, he wisa khõgu, hadia nilaugu, ba i’ombakha’õ khõmi dania fefu hadia ia, Tikhiko andrõ, talifusõ ni’omasi’õ andrõ, enoni si lõ farõi ba khõ Zo’aya; (Kol. 4, 7 b. t.); 

22 nifatengegu khõmi, ba da’õ, ena’õ mirongo, he wisa khõma, ba ena’õ irara dõdõmi. 

23 Ndrafalukha dalifusõ wa’ohahau dõdõ ba fa’omasi ba famati, khõ Lowalangi Ama, ba khõ Zo’aya ya’ita, Yesu Keriso, (Fet. I. 5, 14). 

24 Ndrafalukha wa’ebua dõdõ dozi sangomasi’õ So’aya ya’ita, Yesu Keriso, si lõ tebulõ. (Fil. 4, 23).