HALÕŴÕ ZINENGE

Table of Contents

 

HALÕŴÕ ZINENGE

HALÕŴÕ ZINENGE

FAZA 1

 

I. Famobõrõ II. Fanahae Yesu. III. Lahalõ awõra Matia andrõ sinenge.

1 I. No awai khõgu zura si fõfõna andrõ, ya’ugõ Teofilo, no usura fefu nibõrõtaigõ Yesu, folau ba famahaõ, (Luk. 1, 1—3), 

2 irugi luo tefazaŵa ia, me no ibe’e goroisa ba zinenge andrõ, ni’anutuyu’õnia Eheha ni’amoni’õ, (Mat. 28, 19. Luk. 24, 44 b. t.),

3 ba ni’oya’õnia tandra, wangoroma’õ wa no auri ia, me no aefa itaõgõ wamakao andrõ; õfa wulu wongi wa’ara i’oromaroma’õ ia khõra, i’ombakha’õ khõra ngawalõ mbanua Lowalangi andrõ. (Mar. 16, 14. Yoh. 20, 19—30).

4 II. Ba me orudu ira, me manga ira, ba iŵa’õ khõra, bõi larõi Yeruzalema, labaloi gamabu’ula li Nama andrõ, nirongomi khõgu (iŵa’õ). (Luk. 24, 49. Yoh. 14, 16). 

5 Idanõ sa nibayagõ Yohane, ba nibayagõ Eheha ni’amoni’õ ami, lõ ara tõ. (Mat. 3, 11. F. 2, 4; 11, 15 b. t.).

6 Ba lasofu khõnia si so ba da’õ, lamane: He Tua, hadia õfuli õ’a’azõkhi iya’e dania nõri Ndraono Gizeraëli? (Luk. 19, 11 b. t.; 24, 21). 

7 Ba imane khõra: Tenga si nangea ya’ami zangila baŵa ba bu’u li, nihonogõi Nama ba wa’abõlõnia, (Mat. 24, 36), 

8 ba mitema dania wa’abõlõ Geheha ni’amoni’õ, si mõi khõmi, ba samaduhu’õ ami khõgu ba Yeruzalema, ba ba danõ Yudaia, ma’asagõrõ, ba ba Zamaria, ba irugi wondrege danõ. (Yoh. 15, 27. F. 5, 32. Luk. 24, 47).

9 Ba me aefa iŵa’õ da’õ, ba tefazaŵa ia, anehe ira, ihalõ ia lawuo, ba lõ’õ sa’ae oroma ia khõra. (Mar. 16, 19). 

10 Ba me latõngõ mbanua si yaŵa, me mofanõ ia, ba hiza, darua zi so ba da’õ khõra niha, sobaru safusi, (Yoh. 20, 12), 

11 sanguma’õ gõi: Hana wa so ami ba da’e, wa mitõngõ mbanua, ya’ami banua Galilaia? Mangawuli dania Yesu andrõ, nihalõ ba zorugo moroi ba khõmi, si mane me mi’ila ia, me mofanõ ia ba zorugo. (Luk. 21, 27. Fam. 1, 7). 

12 Aefa da’õ, ba mangawuli ira ba Yeruzalema, moroi ba hili andrõ, sotõi hili wanikha, ba ngai Yeruzalema, mato sambadu fofanõ. 

13 Ba me no larugi yomo, ba mõi ira yaŵa ba mbate’e ba zi sagõtõ, ba da’õ sosó ira, Fetero ba Yohane ba Yakobo ba Andrea ba Filifo ba Toma ba Batolomaio ba Mataio ba Yakobo, ono Galifaio, ba Simoni selote ba Yuda, ono Yakobo. (Mat. 10, 2 b. t.).

14 Da’õ fefu zi lõ aefa’aefa mangandrõ, ha sara dõdõ, awõ ndra alawe andrõ, ba awõ Maria, ina Yesu, ba ira talifusõnia. (Luk. 24, 53. Yoh. 7, 5. F. 2, 46).

15  III. Ba me luo da’õ, ba maoso Wetero, me falukha dalifusõ (ba so mato otu a dua wulu wa’ato niha, sowulo ba da’õ) imane: 

16 He ya’ami, ira talifusõ, lõ tola lõ itõrõ zi so ba zura andrõ, si no ihõnagõ ifaŵa’õgõ Eheha ni’amoni’õ, ni’ombakha’õ Dawido, ba khõ Yuda andrõ, si no tobali samasao sondra’u Yesu. (Sin. 41, 10. Mat. 26, 47). 

17 Noa sa te’erai ia, awõda, ba no itema dana khõnia, halõŵõ andrõ. (Luk. 6, 16). 

18 Ba noa sa isõndra mbenua nibe’e bõli luo walõ’atulõ andrõ, ba no aekhu tou ia, ba no aboto dalu, ba no aduwa mbetu’ania ma’afefu. (Mat. 27, 3—10. Nga’õt. II. 25, 12). 

19 Ba no larongo fefu, banua Yeruzalema, andrõ labe’e tõi mbenua andrõ Akhelidama, ba lira, benua ndro geluahania. 

20 Noa sa musura ba zura zinunõ: ”Sadudu nahania, ba bõi i’onaha niha” ba: ”Yamutema niha bõ’õ halõŵõnia andrõ. (Sin. 69, 26; 109, 8). 

21 Ba lõ’õ sa tola lõ tahalõ niha, samõsa, ba zi no faofao khõda, gõtõ wa’ara wangõrõngõrõ Zo’aya ya’ita, Yesu, khõda, (Yoh. 15, 27), 

22 ibõrõtaigõ ba wamayagõ idanõ andrõ khõ Yohane, irugi luo tefazaŵa ia moroi ba khõda; samõsa da’õ zamaduhu’õ femaosonia, awõda. (F. 2, 32; 10, 37—41). 

23 Ba lafa’aso zi darua, Yosefo, nifotõi Barasaba, si so tõi Yuso na gõi, ba Matia. 

24 Ba mangandrõ ira, lamane: He So’aya, sangila tõdõ niha fefu, oroma’õ nituyumõ, samõsa, ba zi darua andre, (F. 15, 8. Yoh. 21, 17), 

25 sanema naha andrõ, ba halõŵõ andrõ, awõ wamaigimaigi, nirõi Yuda, ba we’amõi ba nahania. 

26 Ba lalau fadahõdahõ ba khõra andrõ, ba gõna Matia, ba tobali famõnõkhi zinenge andrõ, si felendrua ia. (Amaed. 16, 33).

 

HALÕŴÕ ZINENGE

FAZA 2

I. Folau Eheha ni’amoni’õ. II. Huhuo Wetero andrõ. III. Amuata niha Keriso si fõfõna.

1 I. Ba me luo wendrakose (si 50) ba no owulo ira fefu, ha sambua naha. (Moz. III. 23, 15). 

2 Ba i’ozumagõ so zihõngõ, si otarai mbanua si yaŵa, hulõ na itõrõ angi sabõlõbõlõ, ba ifõnui nomo andrõ, ma’asambua, ba zi dadao ira. (Yoh. 3, 8. F. 3, 1. 11; 5, 12). 

3 Ba oroma khõra dalinga wandru, si fabalibali, alitõ wamaigira, ba idozigõ ira, ahono ba hõgõra. (Mat. 3, 11). 

4 Ba fahõna khõra Geheha ni’amoni’õ, ba labõrõtaigõ lalau li bõ’õ, si mane nibe’e Geheha khõra fanõtõi. (Mar. 16, 17. F. 4, 31; 11, 15; 10, 46). 

5 Ba so zi fatewu gana ba Yeruzalema, niha Yehuda, niha sangata’ufi Lowalangi, soroi fefu soi ba guli danõ. 

6 Ba me so zihõngõ andrõ, ba aekhu niha sato ba tobali dõdõra, me larongo wehedera ba li khõra, dozi ira. 

7 Ba tobali dõdõra, dozi ira, ahõlihõli dõdõra ba lamane: Hiza, tenga banua Galilaia ira, dozi sihede andrõ? (Yoh. 7, 52). 

8 Ba he wisa wa tarongo lida, dozi ita, li ba danõda, ba zi tumbu ita? 

9 Ya’ita Dawa Waretia ba Dawa Media ba Dawa Gelama, awõ zi so ba Mezofotamia, ba ba Yudaia ba ba Gafadokia, ba Wondro ba ba Azia, (Fet. I. 1, 1), 

10 ba Werigia ba ba Wambilia, ba danõ Miserayi ba ba danõ Libia, tánõ ba Girene, awõ zi fatewu gana ba Roma, niha Yehuda, awõ zi no mõi banuara, 

11 Dawa Gereta ba Dawa Ara, ba tarongo, lalau lida, wangombakha segebua andrõ, nilau Lowalangi. 

12 Ba tobali dõdõra, dozi ira, lõ la’ila watahõgõ, faoma lamane khõ nawõra: He wisa da’õ dania?

13 Ba so zangaohangaoha õsa, lamane: Si mabu agu sami. (Kor. I. 14, 21 b. t.).

14 II. Ba maoso Wetero, awõ zi felezara, muhede ia, imane khõra: He ya’ami, niha Yehuda, awõ zi so ba Yeruzalema fefu, ya’aboto ba dõdõmi da’e, ba mifondrondrongo niŵa’õgu! 

15 Tenga sa si mane niŵa’õmi, wa si no mabu da’e, awena sa gõi labõzi siŵa. 

16 Da’õ sa ia, niŵa’õ Yoëli, sama’ele’õ andrõ: (Yoël. 2, 28—32). 

17 ”Ba so dania, na luo safuria, iŵa’õ Lowalangi, ba ulau ba niha fefu wõfõ Gehehagu, ba mama’ele’õ nonomi matua, awõ nonomi alawe, ba la’ila gangilata ono matua khõmi ba mangifi zatua khõmi. 

18 Ba genonigu ira matua ba ba genonigu ira alawe ulau õsa Gehehagu, na luo da’õ, ba mama’ele’õ ira. 

19 Ba ufazõkhi gila’ila ba mbanua si yaŵa ba tandra ba guli danõ si tou, do ba alitõ ba simbo. (Luk. 21, 25). 

20 Ba tobali sogõmigõmi luo ba do mbaŵa, fatua lõ irugi luo Zo’aya andrõ, sebua. 

21 Ba tobali auri dozi si angarõfi li tõi Zo’aya,” (Rom. 10, 13). 

22 He ya’ami, Iraono Gizeraëli, mifondrondrongo da’e! Yesu andrõ, banua Nazareta, niha nifaduhu’õ, Lowalangi ba khõmi, ba wa’abõlõ ba ba gila’ila ba ba dandra, nifafazõkhi’õ Lowalangi khõnia, ba khõmi, ni’ilami andrõ. (F. 10, 38. Rom. 1, 4). 

23 Da’õ mege mihalõ, me no mube’e ba dangami ia, me no ihonogõi ihuku Lowalangi, me no tohõna mege i’ila, ba no mi’osõ ia ba rõfa tanga niha baero, wamunu ya’ia. (F. 4, 28; 3, 15 b. t.). 

24 Da’õ nisusugi Lowalangi, me no i’efa’õ khõnia wa’afõkhõ wa’amate, me tebai sa at õ itaha ia fa’amate. (Luk. 11, 22). 

25 Imane sa Dawido ba khõnia andrõ: ”Lõ aefa’aefa ba duduma hõrõgu Zo’aya ya’o, noa sa so ia ba gambõlõgu, fa lõ mangiwa ndra’o. (Sin. 16, 8 b. t.). 

26 Andrõ waomuso dõdõgu ba manunõ lelagu, ba õsigu gõi, ba molombase dania, ba wanõtõna, 

27 lõ’õ sa õrõi ba mbanua tou nosogu, ba lõ õtehe, i’ila wa’obou ni’amoni’õ andrõ khõu. (F. 13, 35 b. t.). 

28 No õ’ombakha’õ khõgu lala ba wa’auri, õhõna khõgu wa’omuso dõdõ tánõ fõnau.” 

29 He ya’ami, ira talifusõ, akha lõ aiwõ ndra’o muhede khõmi, ba khõ duada Dawido, wa no mate ia, awõ wa no lako’o, ba so ba khõda lewatõnia, irugi ma’õkhõ andre. (Sal. I. 2, 10). 

30 Ba me no sama’ele’õ ia, me no i’ila, no ifabu’u khõnia Lowalangi fahõlusa, ifedadao ba dadaomania ma’uwunia, (Sin. 132, 11 b. t. Luk. 1, 32. Rom. 1, 3), 

31 me no i’ila zi so na furi dania, ba itõrõ linia wemaoso Keriso, wa lõ’õ sa terõi ia ba mbanua tou, awõ wa lõ’õ gõi i’ila õsinia wa’obou. 

32 Yesu andrõ nisusugi Lowalangi, si so na mbõrõ ba da’õ ndra’aga fefu. (F. 1, 8; 3, 15). 

33 Ba me no te’alaŵa’õ ia iada’e kambõlõ Lowalangi, ba me no itema gamabu’ula li andrõ, Eheha ni’amoni’õ andrõ, khõ Nama, ba no ilau da’e, ni’ilami, nirongomi andre. (F. 5, 31. Yoh. 12, 32; 14, 26. Sin. 68, 19). 

34 Tenga sa Dawido zi mõi yaŵa ba zorugo, ba ya’ia zanguma’õ: ”No iŵa’õ So’aya khõ Zo’aya ya’o: Dadao ba gambõlõgu, (Sin. 110, 1), 

35 irege ube’e tou barõ gaheu zi fa’udu khõu.” 

36 Ya’aboto sibai iada’e ba dõdõ ma’uwu Gizeraëli fefu, wa no ibali’õ So’aya ba Keriso da’õ Lowalangi, Yesu andrõ, niforõfami. (Fil. 2, 11). 

37 Ba me larongo da’õ, ba manga ia ba dõdõra ba lamane khõ Wetero ba ba zinenge bõ’õ andrõ: He mawisa ena’õ, ya’ami, ira talifusõ? (Heb. 4, 12. F. 16, 30).

38 Ba imane khõra Fetero: Mifalalini gera’erami ba mifabayagõ’õ idanõ ami, dozi ami, ba dõi Yesu Keriso, ba wangefa’õ horõmi andrõ, ba mitema dania mbuala andrõ, Eheha ni’amoni’õ. (F. 3, 19; 10, 45). 

39 Khõmi sa gamabu’ula li andrõ ba ba ndraonomi ba ba zi so ba zarõu fefu, gofu ha wa’ato nikaoni Zo’aya, Lowalangida. (Yoël. 2, 28. Yoh. 10, 16). 

40 Ba so na niŵa’õnia, tánõ bõ’õ, famaduhu’õ, ba ifarou dõdõra, imane: Ya’aefa ami ba niha si tefuyu tõdõ andre. (Fil. 2, 15).

41 Ba lafabayagõ’õ idanõ ira samonaha taroma linia ba dõdõra, ba mato tõlu ngahõnõ niha, si te’anõ, ha si ma’õma’õkhõ andrõ. (Yes. 53. 11. 12).

42 III. Ba lõ tebulõ ira nifahaõ zinenge, ba he ba wefao, ba he ba wamoboto roti ba ba wangandrõ. (F. 20, 7). 

43 Ba dozi ata’u niha, ba oya gila’ila ba oya dandra, nifazõkhi zinenge. (F. 5, 11. 12). 

44 Ba no orudu zamati, fefu, faoma khõra zi so khõra, fefu. (F. 4, 32). 

45 Ba la’amawa mbenuara, awõ gamagamara, ba ladozigõ wamaosa, lafaigi zabõlõ moguna. 

46 Ba ero ma’õkhõ so ira ba gosali, lõ aefa’aefa, ha sambua dõdõra, laboboto roti ba nomo misa, latema gõra ba da’õ, omuso dõdõra ba atulõ. (F. 2, 42). 

47 Lasuno Lowalangi, ba ebua khõra dõdõ niha sato fefu, ba ero ma’õkhõ ifa’anõ khõra So’aya zanõndra fangorifi andrõ. (F. 4, 4).

 

HALÕŴÕ ZINENGE

FAZA 3

 

I. Niha sombuyumbuyu, ni’abe’e’õ Wetero. II. Huhuo Wetero ba niha sato.

1 I. Mõi miyaŵa ndra Fetero Yohane ba gosali, me inõtõ wangandrõ, me labõzi tõlu. (F. 10, 3. Luk. 1, 10). 

2 Ba hiza niha, sombuyumbuyu moroi ba dalu ninania, nilu’i. Ero ma’õkhõ lafedadao ia ba zinga mbawandruhõ gosali, nifotõi si sõkhi, ba wangandrõ bõli gõ ba zi mõi ba gosali. (F. 14, 8). 

3 Ba me i’ila ndra Fetero Yohane, si mõi ba gosali, ba mangandrõ bõli gõ ia khõra. 

4 Ba inehegõ ia Fetero, awõ Yohane imane: Faigi ndra’aga. 

5 Ba ifaigi ira, iwai so zinemania khõra. 

6 Ba imane Fetero: Lõ khõgu firõ ba lõ ana’a, ba hadia zi so khõgu, ba ba ube’e khõu: Ba dõi Yesu Keriso, banua Nazareta, owaõwaõ, (Mat. 10, 9. Mar. 16, 17 b. t.). 

7 Ba ira’u dangania kambõlõ, ifazizio. Ba i’anema’õ abe’e gahenia, awõ mbu’u gawononia, 

8 ifarõga ia ba muzizio ba mowaõwaõ; ba mõi ia ba gosali, fao ia khõra, mowaõwaõ ia ba mamarõga ba isuno Lowalangi. (Yes. 35, 6. Luk. 5, 25; 17, 15). 

9 Ba la’ila niha sato fefu, mowaõwaõ ia ba manuno Lowalangi ia, 

10 Ba la’ila ia, wa ya’ia da’õ, sidaodao ba mbawandruhõ gosali si sõkhi ba wangandrõ bõli gõ; ba a’oi so wa’ahõlihõli dõdõra ba fa’atobali dõdõra, ba zi no falukha ia. (Luk. 5, 26).

11 Ba me lõ irõi ndra Fetero Yohane, ba owulo khõra niha sato fefu ba newali, nifotõi ewali Zelomo, (ewali nifolose) no tobali dõdõra. (Yoh. 10, 23).

12 II. Ba me i’ila da’õ Fetero, ba itema li niha sato, imane: He ya’ami, Iraono Gizeraëli hadia wa ahõlihõli dõdõmi ba da’õ, ba hadia wa mifaigifaigi ndra’aga, hulõ na ya’aga zamowaõwaõ niha andre ba wa’abõlõma, ba ma ba wa’atulõ dõdõma? 

13 Lowalangi ndra Aberahamo, Iza’aki, Yakobo, Lowalangi ndra tuada, no ifolakhõmi nononia Yesu, nibe’emi ba danga Wilato, ni’osilõ’õgõmi fõnania, he no iŵa’õ da’õ, la’efa’õ. (Luk. 23, 22. 23). 

14 Ba ya’ami, ba no mi’osilõ’õgõ ni’amoni’õ andrõ, satulõ, ba no mi’andrõ, latehe khõmi zange’e. (Mat. 27, 20. 21). 

15 Ba no mibunu zalaŵa sangorifi andrõ, nisusugi Lowalangi, moroi ba ngai zi mate, ba zi so ba mbõrõ ndra’aga. (F. 5, 31; 4, 33. Luk. 24, 48). 

16 Ba famati ba dõinia mbõrõ, wa no i’abõlõ’õ tõinia da’e, ni’ilami, nirongomi andre; ba famati andrõ, ni’asogõnia zame’e khõnia fangabe’e andre, ba zanehe ami fefu. (F. 4, 10—12). 

17 Ba iada’e, ya’ami, ira talifusõ, u’ila, me lõ mi’ila watahõgõ, andrõ mimanõ, ba si manõ gõi zalaŵami. (F. 13, 27. Luk. 23, 34. Kor. I. 2, 8). 

18 Ba no ifatõrõ ba zi manõ Lowalangi nihõnagõnia fama’ombakha’õgõ ba zama’ele’õ andrõ fefu, wa itaõgõ wamakao Keriso andrõ khõnia. (Yes. 53, 5. Luk. 24, 25 b. t.). 

19 Andrõ mifalalini gera erami, ba mifuli ami, ba wamabeta’õ horõmi, ena’õ alua gõtõ wa’ohahau dõdõ, na inehegõ ita Lowalangi, (F. 2, 38), 

20 ba ena’õ ifatenge nihonogõi khõmi andrõ, Keriso Yesu andrõ. (Yes. 57, 15. 16).

21 Lõ’õ sa tola lõ ifonaha ia sorugo, irege gõtõ wanga’azõkhi fefu, hadia ia, niŵa’õ Lowalangi, ni’ombakha’õ zama’ele’õ andrõ khõnia, ni’amoni’õ, i’otarai mbõrõta danõ’a. (F. 1, 11. Kor. I. 15, 25. 28). 

22 Noa sa iŵa’õ Moze: ”I’asogõ khõmi So’aya Lowalangida zama’ele’õ, talifusõmi, si mane ya’o; da’õ nifondrondrongomi li, fefu hadia ia niŵa’õnia khõmi.” (Moz. V. 18, 15 b. t. Heb. 3, 2 b. t.). 

23 Ba tobali, fefu gofu ha niha zi lõ mamondrongo li zama’ele’õ andrõ, ba nihori ba mbanua andre.” 

24 Ba dozi gõi sama’ele’õ, i’otarai Zamu’eli, awõ moroi furinia, ha wa’ato zi no muhede, ba noa gõi la’ombakha’õ luo da’e. (Luk. 1, 70 b. t.). 

25 Ya’ami ma’uwu zama’ele’õ andrõ, ono wawu’usa li andrõ ami, ni’asogõ Lowalangi khõ ndra tuada, me iŵa’õ khõ Gaberahamo: ”Ba khõ ma’uwumõ dania tefahowu’õ fefu soi ba guli danõ.” (Moz. I. 22, 18. Rom. 9, 4 b. t.). 

26 Khõmi i’ofõnai’õ Lowalangi, wamatenge ononia, me no isusugi, ba wamahowu’õ ya’ami, na mifuli ami fefu, na mirõi zi lõ sõkhi andrõ khõmi. (F. 13, 46. Mat. 10. 6).

 

HALÕŴÕ ZINENGE

FAZA 4

 

I. La’ohe ba rafe sebua ndra Fetero Yohane. II. Fangandrõ niha Keriso si fõfõna andrõ. III. Fa’awõsara, hulõ zi fatalifusõ.

1 I. Ba me laŵa’õ da’õ ba niha sato, ba maoso khõra gere andrõ, awõ gumandra ba gosali, awõ zadukaio, 

2 afõkhõ khõra, me lafahaõ niha, me la’ombakha’õ, khõ Yesu so wemaoso zi mate. (F. 23, 8). 

3 Ba lara’u ira ba lakuru, irugi mahemulu õ; noa sa arakha bongi. 

4 Ba ato zamati, samondrongo li andrõ, ba tobali lima ngahõnõ wa’ato ndra matua. (F. 2, 41. 47; 5, 14). 

5 Ba mahemolu õ, ba falukha zalaŵara ba satuara ba sangila amakhõita khõra, 

6 ba Yeruzalema, ba Hanasi, ere sebua andrõ, ba Kayafa ba Yohane ba Alesandro ba si fatalifusõ khõ ndra ere sebua, fefu. (Yoh. 18, 13). 

7 Ba lafa’aso ira ba gotaluara ba lasofu: Ha niha zanehe khõmi ba ha tõi khõmi, wolau da’õ? (Mat. 21, 23). 

8 Ba imane khõra Fetero, si no fahõna Eheha ni’amoni’õ: He ya’ami, salaŵa mbanua andre ba ya’ami, satua! (Luk. 12, 11. 12). 

9 Na tesekhegõ ndra’aga ma’õkhõ andre, ba wanoloma andrõ, ba niha sofõkhõ andrõ, hadia wangabe’enia,

10 ba ya’aboto ba dõdõmi fefu ba ba dõdõ Ndraono Gizeraëli fefu: ba dõi Yesu, banua Nazareta, niforõfami, nisusugi Lowalangi, moroi ba ngai zi mate, ba dõi da’õ abe’e da’e, fõnami, (F. 3, 6. 16; 5, 30). 

11 Da’õ gowe andrõ, ni’ositengagõmi, ya’ami sotomo, gowe si no tobali toyo ba watalinga. (Mat. 21, 42. Sin. 118, 22). 

12 Ba lõ fangorifi ba dánõ bõ’õ, ba lõ’õ sa gõi tõi bõ’õ nibe’e ba niha, ba guli danõ, ba wangorifi ya’ita. (F. 2, 21; 10, 43).

13 Ba me la’ila wa lõ aiwõ ndra Fetero Yohane, ba me no larongo, niha si lõ mufahaõ ira, ono mbanua, ba ahõlihõli dõdõra, ba la’ila ira, wa no awõ Yesu ira fõna. 

14 Ba me la’ila, awõra niha andrõ nifadõhõ fõkhõ, ba tebai labu’a. 

15 Ba laŵa’õ khõra, mofanõ ira, laheta ira ba rafe sebua: mamagõlõ ira, lamane: 

16 He tawisa ba niha andrõ, noa sa oroma ba zi so ba Yeruzalema fefu, wa no lafazõkhi dandra sanehe niha, ba tebai ta’osilõ’õgõ, (F. 3, 8—10. Yoh. 11, 47), 

17 ba fa bõi tedou terongo ba niha, ba tafeta’u ira, bõi sa’ae itõrõ lira dõi andrõ, gofu ha khõ. 

18 Ba humede ira khõra, laŵa’õ khõra, bõi manõ sa’ae muhede ira ba bõi namahaõ, wangombakha tõi Yesu. (F. 5, 28. 40).

19 Ba latema lira ira Fetero Yohane, lamane khõra: Mi’era’era tõdõmi, na afulõ khõ Lowalangi, na la’o’õ khõmi, moroi ba wolo’õ khõ Lowalangi; (F. 5, 29), 

20 tebai sa khõma, lõ maŵa’õ ni’ilama, nirongo dõgi dalingama. (Yoh. I. 1, 1 b. t.). 

21 Ba me no lafeta’u ira na, ba la’efa’õ, me lõ lasõndra, he lawisa, wangotu’õ ya’ira, ba niha sato, me no oi dozi lasuno Lowalangi ba da’õ no mege; (F. 5, 26),

22 noa sa tõra õfa wulu fakhe niha andrõ nifazõkhi tandra andrõ, famadõhõ fõkhõ.

23 II. Ba me no aefa ira, ba mõi ira ba nawõra, ba la’ombakha’õ fefu niŵa’õ ndra ere sebua, ba satua, khõra. 

24 Ba me no larongo, ba mangandrõ ira khõ Lowalangi, ha sara dõdõ, lamane: He So’aya, ya’ugõ zamazõkhi sorugo, awõ danõ, awõ nasi, awõ nõsinia fefu, (F. 14, 15. Moz. I. 1, 1. Neh. 9, 6), 

25 ya’ugõ zanguma’õ ni’ombakha’õ duama Dawido enonimõ andrõ, moroi ba Geheha ni’amoni’õ: Hana wa mofõnu niha baero, ba hana wa la’alualui soi zi lõ boto? (Sin. 2, 1—2). 

26 Molaŵa zalaŵa ba guli danõ ba samatõrõ andrõ, ba mamagõlõ, ba khõ Zo’aya ba ba khõ Keriso andrõ khõnia.” 

27 Ba si ndruhu, noa sa falukha ira ba mbanua andre ba khõ nonou andrõ, ni’amoni’õ, nibayoiniu, Herode ba Fondrio Filato, awõ niha baero, awõ soi Ndraono Gizeraëli, (Luk. 23, 12), 

28 ba wolau hadia nihõnagõ dangau, awõ gera’erau, wangohonogõi, salua dania. (F. 2, 23). 

29 Ba iada’e, ya’ugõ So’aya, ba nehegõ wameta’ura andrõ, ba tolo genonimõ, ena’õ lõ’õ manõ aiwõ ira, wangombakha limõ, 

30 ba oro’õ dangau, ba wamadõhõ fõkhõ, ena’õ so dandra, awõ gila’ila, bõrõ dõi nonou andrõ, ni’amoni’õ, Yesu.

31 Ba me no mangandrõ ira, ba humeuheu nomo andrõ, sowulo ira, ba tehõna khõra fefu Geheha ni’amoni’õ, ba lõ aiwõ ira, wangombakha li Lowalangi. (F. 2, 2; 13, 52).

32 III. Ba ha sambua dõdõ, ha wa’ato zamati, ha sambua gera’era, ba samõsa lõ sanguma’õ khõnia hadia ia nibayabayania, faoma sa khõra manõ fefu. (F. 2. 44 b. t. Yoh. 17, 21. 22). 

33 Ba abõlõ sibai zinenge, wamaduhu’õ femaoso Yesu Keriso, So’aya, ba abõlõ wa’ebua dõdõ ba khõra fefu. (F. 2, 24). 

34 Ba lõ’õ sa gõi sambõ balazo ba khõra, dozi sa sokhõ benua, ba ma omo, ba la’amawa, ba la’ohe mbõli ni’amawara andrõ. (Luk. 12, 33), 

35 labe’e ba danga zinenge, ba lafosasi ba zamõsana, lafaigi zabõlõ moguna. (Kor. II. 8, 14). 

36 Ba Yosefo, nibe’e zinenge tõi Baranaba, ”ono wondrara dõdõ” geluahania, ono Lewi, moroi ba hulo Gifero mbõrõta, (F. 11, 22), 

37 me so khõnia mbenua, ba i’amawa, ba i’ohe mbõli, ibe’e ba danga zinenge.

 

HALÕŴÕ ZINENGE

FAZA 5

 

I. Anania ba Safira. II. Tandra nifazõkhi zinenge. III. Lakuru zui zinenge ba te’efa’õ dania. IV. Gamalieli.

1 I. Ba i’amawa mbenua khõnia si samõsa, Anania dõinia, ba awõnia wo’omonia, 

2 Safira, ba ihalõ khõnia õsa, mbõlinia, fo’omonia gõi zangila, ba i’ohe õsa, ibe’e ba danga zinenge. (F. 4, 35). 

3 Ba imane Fetero: He Anania, hana wa no fahõna ba dõdõu Zatana, fa õlimo Geheha ni’amoni’õ ba õhalõ khõu õsa, mbõli mbenua andrõ? (Luk. 22, 3. Yoh. 8, 44). 

4 Tenga khõu, na lõ mu’amawa ia mena’õ, ba me no mu’amawa, ba tenga ba dangau manõ so? Ba hana wa õfa’amõi ba dõdõu wolau si manõ? Tenga niha nilimou, no Lowalangi õlimo. 

5 Ba me irongo niŵa’õnia andrõ, ba alau tou ia, ba aetu noso. Ba ihawui fa’ata’u dozi samondrongo da’õ. 

6 Ba maoso nono matua, laheta ia, la’ohe baero ba lako’o. (Moz. III. 10, 5). 

7 Ba so mato tõlu za gotalua, ba so wo’omonia, lõ nirongonia da’õ no mege. 

8 Ba imane khõnia Fetero: Ombakha’õ khõgu, na si manõ wa’ebua mbõli mbenua andrõ khõmi? Ba imane: E, si manõ. (Yos. 7, 19). 

9 Ba imane khõnia Fetero: Hana wa mamagõlõ ami, ba wanandraigõ Eheha Zo’aya? Hiza, so sa’ae moroi tou zogo’o fo’omou mege, ba la’ohe baero ndra’ugõ gõi. 

10 Ba i’anema’õ alau tou ia, fõnania, ba aetu noso. Ba me mõi yomo nono matua, andrõ, ba la’ila, no mate ia, ba la’ohe baero, lako’o ba ngai wo’omonia.

11 Ba ihawui fa’ata’u sebua mbanua fefu, awõ dozi samondrongo da’õ.

12 II. Ba oya nifazõkhi ndra sinenge tandra ba ila’ila, ba niha. Ba no orudu ira, ba newali Zelomo andrõ, (ewali nifolose) ira ha sambua dõdõ. (F. 2, 43; 4, 30; 3, 11). 

13 Ba ata’u dánõ bõ’õ fefu, orudu khõra, ba lasuno zui ira niha sato. 

14 Ba ato sa nifa’anõ, samati khõ Zo’aya, ato ndra matua ba ato ndra alawe, (F. 4, 4), 

15 irege la’ohe baero baolayama zofõkhõ, ba gaso ba ba heahea, ena’õ na mato samõsa na atõ zi gõna lumõ Wetero, na so ia. (F. 19, 11. 12. Yoh. 14, 12).

16 Ba la’ondrasi gõi niha sato, moroi ba mbanua si fasui Yeruzalema, la’ohe zofõkhõ, awõ nifakao mbekhu si ra’iõ, ba ahori tefadõhõ. (F. 8, 7. Mar. 16, 17).

17 III. Ba maoso gere sebua ba awõnia fefu, si faehu huku andrõ, sadukaio, mofõnu dõdõra. (F. 4, 1; 3, 6). 

18 Lara’u zinenge, ba lakuru, ba gurunga gumandru. 

19 Ba ba zi bongi, ba ibokai mbawandruhõ gurunga mala’ika Lowalangi, i’ohe baero ira ba imane: (F. 12, 7 b. t.). 

20 Mi’ae mi’oroma’õ ami ba mi’ombakha’õ ba gosali ba niha sato daroma li fangorifi andrõ fefu. (Yoh. 6, 68; 17, 3).

21 Ba me no larongo da’õ, ba mõi ira ba gosali, me moluo sibai, mamahaõ ira. Ba me so gere sebua ba awõnia, ba lafakaoni’õ zalaŵa rafe sebua ba satua ba Ndraono Gizeraëli fefu, ba lafatenge, ba wangai ya’ira. 

22 Ba me mõi genoni, ba lõ lasõndra ba gurunga. Ba lafuli ira, la’ombakha’õ, 

23 lamane: Noa sa muhaogõ wokusi kurunga, me soga, no so ba zinga mbawandruhõ zanaro, ba me no mabokai, ba lõ niha bakha. 

24 Ba me larongo niŵa’õra andrõ kumandra ba gosali ba ira ere sebua, ba abu dõdõra, ba khõra andrõ, he wisa da’õ dania. 

25 Ba so zangombakha khõra: Hiza, niha andrõ, nibe’emi ba gurunga, no so ba gosali, mamahaõ niha. 

26 Ba mõi gumandra, awõ genoni andrõ, lahalõ ira. Tenga ni’anõsõ’õ, ata’u sa ira niha sato, fa lõ latebu kara ira. (F. 4, 21). 

27 Ba la’ohe ira ba rafe sebua. 

28 Ba isofu, khõra ere sebua, imane: No mahaogõ wanguma’õ khõmi, bõi mamahaõ ami, wangombakha tõi andrõ, ba hiza, anõnõ Yeruzalema famahaõmi mibe’e, ba edõna ami mi’ohe ba huluma ndro niha andrõ. (F. 4, 18. Mat. 27, 25). 

29 Ba latema linia Fetero ba ira sinenge, lamane: Ni’o’õ khõ Lowalangi, moroi ba wolo’õda ba niha. (F. 4. 19 b. t.). 

30 No isusugi Lowalangi ndra tuada Yesu andrõ, nibunumi, nifanaŵa ba dõla geu. (F. 3, 13 b. t.; 10, 39). 

31 Da’õ ni’alaŵa’õ Lowalangi yaŵa, tangania kambõlõ, solohe ba sangorifi, ba wame’e famalalini era’era ba Ndraono Gizeraëli, ba fangefa horõ. (F. 2, 33. 36). 

32 Ba ya’aga zi so ba mbõrõ, ba niŵa’õ andre, awõ Geheha ni’amoni’õ, nibe’e Lowalangi ba zolo’õ khõnia.

33 Ba me larongo da’õ, ba afõkhõ sibai ba dõdõra, ba mamagõlõ ira, ba wamunu ya’ira. (F. 7, 54).

34 IV. Ba maoso zamõsa ba rafe sebua, farizaio, Gamaliëli dõinia, samahaõ ba goroisa, ni’omasi’õ niha sato, iŵa’õ lafofanõ baero ma’ifu niha andrõ. (F. 22, 3). 

35 Ba imane khõra: He ya’ami, Iraono Gizeraëli, mi’angelama, ba nilaumi ba niha andrõ. 

36 Lõ ara na sa, ba maoso Doida andrõ, sanguma’õ sebua ia, ba mõi awõnia niha, mato õfa ngaotu; ba no labunu ia ba tefazawili fefu, ha wa’ato zi fao khõnia, ba tobali faya. (F. 21, 38). 

37 Aefa da’õ, ba maoso Yuda andrõ, banua Galilaia, me luo latanõ ba zura dõi niha, ba idõnisi niha, ba wolo’õ khõnia; ba nibunu gõi da’õ, ba nifazawili fefu, ha wa’ato zolo’õ khõnia. (Luk. 2, 2). 

38 Ba iada’e ba uŵa’õ khõmi: Mibõhõli niha andrõ, ba bõi mitegu ira. Na moroi ba niha lala andrõ, awõ nilau andrõ, ba si lõ fozu dania. (Mat. 15, 13). 

39 Ba na moroi ba Lowalangi, ba tebai mitenaŵa, fa bõi gõi samadaõ khõ Lowalangi ami. (Amaed. 21, 30. Yes. 8, 10. F. 23, 9). 

40 Ba la’o’õ khõnia; ba humede ira ba zinenge no mege, lafabõzi’õ, ba laŵa’õ khõra, bõi latõtõi dõi Yesu andrõ; ba la’efa’õ ira. (F. 4, 17. 18). 

41 Ba larõi sa’ae rafe sebua, omuso dõdõra, me no tetehe khõra, la’o’aya ira, bõrõ dõi andrõ. (Mat. 5, 10—12. Luk. 21, 17. Fet. I. 4, 13). 

42 Ba lõ labato wamahaõ ba fangombakha Yesu Keriso ba gosali ba ba nomo misa, ero ma’õkhõ. (Mar. 16, 15).

 

HALÕŴÕ ZINENGE

FAZA 6

 

I. Fanutuyu sondrorogõ si numana. II. La’adugõ Zitefano niha Yehuda.

1 I. Ba me luo da’õ, me tobali ato nifahaõ, ba tesao wekõkõkõkõ Ndrawa Heleni ba niha Heberaio, me te’ositengagõ lakha mbanua khõra, ba dolotolo andrõ, sero ma’õkhõ. (F. 4, 35). 

2 Ba lafalukha’õ nifahaõ sato si felendrua, lamane: Lõ omasiga, marõi daroma li Lowalangi, ba we’amõi ngoningoni ba wemanga. (F. 4, 33). 

3 Ba mifaigi niha, ba khõmi, ya’ami, ira talifusõ, dafitu, si sõkhi turia, si no fahõna Eheha ba fa’atutua, nifataroda ba halõŵõ andrõ. (Tim. I. 3, 8 b. t.). 

4 Ba lõ tebulõ ndra’aga ba wangandrõ ba ba halõŵõ fangombakha taroma li. (F. 1, 14. Tim. I. 5, 17). 

5 Ba omasi zato fefu niŵa’õ andrõ, ba latutuyu Zitefano andrõ, niha si no fahõna famati ba Eheha ni’amoni’õ, ba Filifo ba Ferokhoro ba Nikanoro ba Timo ba Faremena ba Nikola’o, si no mõi banuara, banua Gandriokhia, (F. 8, 5; 21, 8), 

6 la’ohe ira ba zinenge, ba mangandrõ da’õ ba latufa hõgõra tanga. (F. 1, 23; 8, 15. 17. Tim. I. 4, 14; 5, 22).

7 Ba monõnõnõnõ li Lowalangi, ba tobali ato sibai nifahaõ ba Yeruzalema, ato gõi gere, si faduhu tõdõ, solõ’õ. (F. 12, 24. Rom. 1, 5).

8 II. Ba ifazõkhi gila’ila, awõ dandra sebua ba niha, Sitefano, si no fahõna fa’ebua dõdõ ba fa’abõlõ. 

9 Ba maoso õsa ono zekola andrõ, sotõi sekola Liberitini ba banua Girene ba banua Alesandria ba ono zekola zi otarai Gilikia ba Azia, fahuhuo ira khõ Zitefano. (F. 11, 20; 18, 24). 

10 Ba tebai lalaŵa wa’atuatua andrõ awõ Geheha khõnia, ba wahuhuosa. (Luk. 21, 15). 

11 Awena lafawe’e niha, sanguma’õ: No marongo, me itandraŵaisi Moze, awõ Lowalangi, da’e. 

12 Ba la’o’ou niha sato, awõ zatua, awõ zangila amakhoita. Ba maoso ira, lasõbi da’ionia, la’ohe ba rafe sebua, 

13 ba la’asogõ zi so ba mbõrõ, sofaya, sanguma’õ: Lõ ibatobato niha andre, wangosiwawõi naha ni’amoni’õ andrõ, awõ goroisa. (Mat. 26, 59. F. 21, 28; 7, 48 b. t. Yer. 26, 11). 

14 No marongo, me iŵa’õ: Idudugõ dania naha andrõ Yesu andrõ, banua Nazareta, ba iwu’ai dania huku andrõ, nibe’e Moze khõda. (Mat. 24, 2; 5, 17). Ba lanehegõ ia dozi sidadao ba rafe sebua, ba hulõ mbawa mala’ika mbawania, wamaigira.

 

HALÕŴÕ ZINENGE

FAZA 7

 

I. Huhu Zitefano. II. Fa’amatenia.

1 I. Ba imane ere sebua: Hadia, duhu, si manõ da’õ? 

2 Ba imane Sitefano: He ya’ami, ira talifusõ, ba ya’ami, ira ama, mifondrondrongo! No i’roma’õ ia Lowalangi lakhõmi andrõ khõ duada Aberahamo, me so ia ba Mezofotamia, me lõ’õ na si mõi ia ba Harana, (F. 22, 1), 

3 imane khõnia: ”Heta’õ ba danõmi ba ba dalifusõu ba ae ba danõ ni’oroma’õgu khõu dania.” (Moz. I. 11, 31; 12, 1 b. t.). 

4 Ba iheta ia ba danõ Galedaia, ba Harana so ia. Ba me no mate namania, ba iheta ia ba da’õ Lowalangi, i’ohe ba danõ andre, ba zi so ami iada’e. (Yes. 24, 2. 3). 

5 Ba lõ ibe’e khõnia ba da’e tanõ ondrõita, mitou dania, sambalahe lõ’õ. Ba ifabu’u linia, ibe’e khõnia dania, ba khõ ma’uwunia mitou; he ŵa’ae lõ ono na khõnia. (Moz. I. 12, 7). 

6 Imane sa Lowalangi: ”Si fatewu gana dania ma’uwumõ, ba danõ bõ’õ, ba la’osawuyu ira, ba lafakao, õfa ngaotu fakhe. (Moz. I. 15, 13 b. t. Moz. II. 12, 40. Gal. 3, 17). 

7 Ba uhuku dania soi andrõ, ba zi mõi sawuyu ira, iŵa’õ Lowalangi; ba aefa da’õ ba aheta ira, ba lafosumange ndra’õ ba danõ andre.” (Moz. II. 3, 12). 

8 Ba no ibe’e khõnia wawu’usa li famoto andrõ, ba mo’ono ia, Iza’aki andrõ, ba iboto, me no alua zi fitu bongi; ba si manõ Giza’aki khõ Yakobo ba Yakobo ba wurugõ andrõ, sifelendrua. (Moz. I. 17, 10 b. t.; 21, 2 b. t.; 25, 26; 35, 22 b. t.). 

9 Ba afõkhõ dõdõ wurugõ andrõ khõ Yosefo, ba la’amawa ba danõ Miserayi, ba itolo ia Lowalangi, (Moz. I. 37), 

10 ba i’efa’õ ba zamakao ya’ia fefu, ba ibe’e khõnia wa’ebua dõdõ ba fa’atuatua, fõna Wara’o, razo Miserayi, ba ifataro kumandru ba danõ Miserayi ia Fara’o, ba barõ mbawania so zi samba omo ndra Fara’o. (Moz. I. 32; 41, 37 b. t. Sin. 105, 21). 

11 Ba so lofo ba danõ Miserayi ma’asagõrõ, ba ba danõ Gana’ana ma’asagõrõ, famakao sebua, ba lõ lasõndra gõ ira tuada. (Moz. I. 41, 54 b. t.). 

12 Ba me no irongo Yakobo, ba danõ Miserayi so wakhe, ba ifatenge ndra tuada, si fõfõna andrõ. (Moz. I. 42, 1 b. t.). 

13 Ba me lafuli mõidania, ba i’ombakha’õ ia Yosefo khõ ndra talifusõnia, ba terongo khõ Wara’o dalifusõ Yosefo andrõ. (Moz. I. 45, 1; 4, 16). 

14 Ba ifatenge Yosefo, ifakaoni’õ namania Yakobo, awõ zoroiyomonia fefu fitu ngafulu a lima niha. (Moz. I. 45, 9 b. t. 46, 27). 

15 Ba mõi misi tou Yakobo, ba danõ Miserayi, ba mate, ya’ia ba ira tuada. (Moz. I. 46, 1; 49, 33). 

16 Ba la’ohe ira misi yaŵa, ba Zikhema, labe’e ba lewatõ andrõ, ni’õli Gaberahamo khõ nono Hemori, ba Zikhema firõ mbõli. (Moz. I. 50, 13; 23, 16. 17). 

17 Ba itugu ahatõ mbu’u li andrõ, nifabu’u Lowalangi khõ Gaberahamo, ba itugu tedou ira, tobali ato, ba danõ Miserayi, (Moz. II. 1, 7 b. t.), 

18 irege so razo bõ’õ ba danõ Miserayi, si lõ mangila Yosefo. 

19 Da’õ zangonekhesi ba niwada, ifakao ndra tuada, ena’õ latibo’õ nonora, ena’õ bõi la’orifi. (Moz. II. 1, 10. 22. Moz. V. 26, 6). 

20 Me luo da’õ tumbu Mose, ba ono si sõkhi ia wamaigi Lowalangi, ba tõlu waŵa la’orifi ia ba nomo namania. (Moz. II. 2, 2. Heb. 11, 23). 

21 Ba me no latibo’õ ia, ba ihalõ ia ono Wara’o alawe, ba i’e’ebua, ononia. (Moz. II. 2, 5—10). 

22 Ba tefahaõ Moze ba ngawalõ wa’atuatua Ndrawa Miserayi fefu, ba abõlõ ia ba huhuo ba ba nifazõkhi dangania. 

23 Ba me no õfa wulu fakhe ia, ba itõrõ tõdõnia wamaigi iwara, Iraono Gizeraëli. (Moz. II. 2, 11 b. t.). 

24 Ba me i’ila nifakao, ba zi lõ bõrõ, ba itolo, ilau mbalõ nifalangõgõ andrõ, ibunu Ndrawa Miserayi andrõ. 

25 Ba iwai aboto ba dõdõ niwara, i’efa’õ iratangania Lowalangi, ba lõ aboto ba dõdõra. 

26 Ba mahemolu õ, ba so ia, me fasoso ira, ba i’a’atulõ ira ena’õ, afu labato, imane: Si fatalifusõ ami, hana wa mifakao nawõmi, ba zi lõ bõrõ? (Moz. II. 2, 13).

27 Ba ituli’õ ia samalangõgõ awõnia no mege, imane: Ha niha zamataro ya’ugõ salaŵa ba sanguhuku, ba khõma? 

28 Hadia, õbunu gõi ndra’o ena’õ, si mane famunumõ Dawa Miserayi andrõ, no menewi? 

29 Ba moloi Moze, ba niŵa’õnia andrõ, ba tobali si fatewu ia ba danõ Midiano, mo’ono ia ba da’õ, ono matua, dombua. (Moz. II. 2, 15 b. t.; 18, 3. 4). 

30 Ba me no irugi õfa wulu fakhe, ba i’oroma’õ ia khõnia mala’ika, ba danõ si mate ba gahe hili Zina’i, ba holahola galitõ, ba ngafu ndroi. (Moz. II. 3, 2 b. t.). 

31 Ba me i’ila da’õ Moze ba ahõlihõli dõdõnia gangilata andrõ. Ba me i’ondrasi, ba wamaigi, ba humede Zo’aya, imane: 

32 ”Lowalangi ndra tuau ndra’odo, Lowalangi ndra Aberahamo, Iza’aki, Yakobo.” Ba manizinizi Moze, ata’u ia ifaigi. (Mat. 22, 32). 

33 Ba imane khõnia So’aya: ”Heta mbadagahe ba gaheu: tanõ ni’amoni’õ sa danõ andrõ, ba zi so ndra’ugõ. (Moz. II. 3, 5. Yos. 5, 15). 

34 No ufaigi si bai wamakao banuagu andrõ, si so ba danõ Miserayi, ba fangarõngarõra ba no urongo, ba no mõido tou mangefa’õ ya’ira, ba aine sa, da’ufatenge ndra’ugõ ba danõ Miserayi.” (Moz. II. 3, 7 b. t.). 

35 Moze andrõ, ni’ositengagõra, me lamane: Ha niha zamataro ya’ugõ salaŵa ba sanguhuku? Da’õ nifatenge Lowalangi salaŵa ba sangefa’õ, nitolo tanga mala’ika, sangoroma’õ ya’ia khõnia, ba ngafu ndroi andrõ. (Moz. II. 3, 19. 20. Yes. 63, 9—12). 

36 Da’õ zamawu’a ya’ira, wamazõkhi ila’ila ba tandra, ba danõ Miserayi ba ba nasi soyo ba ba danõ si mate, õfa wulu fakhe wa’ara. (Moz. II. 7, 10 b. t.; 14, 21 b. t. Sin. 106, 21 b. t.). 

37 Da’õ Moze andrõ, sanguma’õ ba Ndraono Gizeraëli: ”I’asogõ khõmi Lowalangi zama’ele’õ, si mane ya’õ, talifusõmi.” (Moz. V. 18, 15). 

38 Da’õ zi so ba walukhata andrõ, ba danõ si mate, awõ mala’ika andrõ, sihede khõnia, ba hili Zina’i, ba awõ ndra tuada, ya’ia zanema taroma li sauri, ba wama’ema khõda; (Moz. II. 19, 3. 20. Moz. V. 32, 47); 

39 ya’ia zi lõ edõna lafondrondrongo li ira tuada; latimba ia, ba lõ aefa dõdõra ba danõ Miserayi, (Moz. II. 16, 3), 

40 wanguma’õ khõ Ga’aroni: Fasõkhi khõda Lowalangi, sowaõwaõ fõnada. Lõ’õ sa ma’ila, hadia zi gõna Moze andrõ, sangeheta ya’aga ba danõ Miserayi. (Moz. II. 32, 1 b. t.). 

41 Ba lafazõkhi nono zaŵi, me luo da’õ, ba labe’e zumange ba nadu andrõ, ba omuso dõdõra ba nifazõkhi dangara andrõ. (Hes. 20, 7 b. t.). 

42 Ba i’erogõ ira Lowalangi, ilulu ira, ena’õ lafosumange zabõlõ mbanua si yaŵa; si mane nisura ba zura zama’ele’õ: ”Hadia, no mibe’e khõgu zumange nitaba ba sumange bõ’õ, si õfa wulu fakhe no, ba danõ si mate, ya’ami Iraono Gizeraëli? (Rom. 1, 24 b. t. Moz. V. 17, 2 b. t. Yer. 7, 23 b. t. Amos. 5, 25 b. t.). 

43 Ba no mi’osa’õ nose Molokho andrõ, awõ ndrõfi Lowalangi andrõ, Refano, famaedo andrõ, nifazõkhimi, ba wangalulu khõnia. Ba ufawu’a ami, ba zi tambai Mbabilona u’ohe ami.” (Sal. I. 11, 7. Sal. II. 17, 6 b. t.). 

44 No so khõ ndra tuada nose wamaduhu’õ andrõ, ba danõ si mate; no la’o’õ niŵa’õ zihede khõ Moze, wamazõkhi ya’ia, la’o’õ wamaedo andrõ ni’ilania. (Moz. II. 25, 9. 40; 26, 30). 

45 La’ohe gõi ba danõ da’õ ira tuada, me no latema, awõ Yosua, me lalaŵa niha baero andrõ, nitimba Lowalangi fõna ndra tuada, irugi luo so Dawido, (Yos. 3, 14 b. t. Moz. II. 23, 29 b. t.; 34, 11), 

46 si falukha fa’ebua dõdõ Lowalangi. Ba i’andrõ, ena’õ na isõndra naha khõ Lowalangi Yakobo. (F. 13, 22. Sam. I. 16, 12. Sin. 132, 5). 

47 Ba Selomo zolau omo khõnia. (Sal. I. 6). 

48 Ba lõ i’onahia Fondrege Zalaŵa nifazõkhi tanga niha; imane sama’ele’õ: (Sal. I. 8, 27 b. t.). 

49 ”Dadaomagu zorugo ba danedane gahegu danõ. Hadia nomo nilaumi khõgu? iŵa’õ So’aya, ba hadia naha wolombase khõgu. (Yes. 66, 1. 2. Yer. 23, 24. Mat. 5, 34). 

50 Tenga no tangagu zamazõkhi da’e fefu?” 

51 He ya’ami, sabe’e bõrõ du’i, si lõ muboto tõdõ ba tõgi dalinga! Lõ aetu mamadaõ ami khõ Geheha ni’amoni’õ, hulõ si mane ira tuami, si manõ gõi ami. (Moz. V. 9, 24; 10, 16. Yer. 6, 10; 9, 26). 

52 Hezo zama’ele’õ, si lõ lagohi ira tuami? Ba no labunu zangõhõnagõ mangombakha fa’aso zatulõ andrõ, ni’ami bõli iada’e, nibunumi, (Nga’õt. II. 36, 16. Mat. 23, 31. 37),

53 ya’ami, si no manema oroisa, nifa’ema mala’ika, ba si lõ molo’õ ya’ia. (Moz. II. 20. Yoh. 7, 19. Heb. 2, 2. Gal. 3, 19).

54 II. Ba me larongo da’õ, ba afõkhõ sibai ba dõdõra, ba lafatangi mbohara khõnia. (F. 5, 33). 

55 Ba no fahõna khõnia Geheha ni’amoni’õ, ba ifaõga hõrõnia ba zorugo, ba i’ila lakhõmi Lowalangi, awõ Yesu, si so ba gambõlõ Lowalangi; (F. 6, 5. Mat. 26, 64) 

56 ba imane: Hiza, teboka zorugo, u’ila ba so ba gambõlõ Lowalangi Nono Niha. (Fet. I. 3, 22). 

57 Ba mu’ao ira, ebua lira, laduhõ dõgi dalingara, lahurufai ia, ha sara dõdõ, 

58 ba latuli’õ baero mbanua, ba latebu kara. Ba si so ba mbõrõ andrõ, ba labe’e samaigi nukhara nono matua, sotõi Saulo. (Moz. V. 17, 7. F. 8, 1; 22, 20).

59 Ba latebu kara Zitefano; ba mangandrõ ia, imane: He Yesu, So’aya, tema nosogu! (Sin. 31, 6. Luk. 23, 46). 

60 Ba ibalõduhini tou danõ, mu’ao ia, ebua linia: He So’aya, be’e aefa khõra horõ andre! Ba aefa iŵa’õ da’õ, ba aetu noso. Ba omasi Zaulo, me labunu ia. (Mat. 5, 44. Luk. 23, 34. Yoh. 8, 51).

 

HALÕŴÕ ZINENGE

FAZA 8

 

I. Igohi mbanua Yesu Saulo. II. Mõi ba Zamaria Wilifo. III. Simoni, sebua elemu. IV. Enoni razo, moroi ba danõ Ndrawa saitõ.

1 I. Ba tobali lagohi sibai mbanua Yesu ba Yeruzalema, me luo da’õ, ba oi lafazawili ira ba danõ Yudaia ba ba danõ Zamaria, ba lõ fao zinenge. (F. 7, 58, 13. 9. Mat. 10, 23). 

2 Ba lako’o Zitefano niha sangata’ufi Lowalangi, ba la’e’esi sibai ia. (Moz. I. 50, 10).

3 Ba ifufu mbanua Yesu Saulo andrõ, itõrõi nomo misa, isõbi ndra matua, awõ ndra alawe, ifabe’e’õ ba gurunga. (F. 9, 1; 13, 31. Kor. I. 15, 9).

4 II. Ba ya’ira, si no muzaewe, ba latõrõi danõ, la’ombakha’õ daroma li somuso dõdõ. (F. 11, 19). 

5 Ba me irugi si tou mbanua Zamaria Filifo, ba i’ombakha’õ khõra Keriso. (F. 6, 5). 

6 Ba ha sara dõdõ niha sato, wamondrongo niŵa’õ Wilifo, me larongo ba me la’ila dandra andrõ, nifazõkhinia. 

7 Ato zaheta bekhu, si so bekhu si ra’iõ, mu’ao ira, ebua li; ba ato zabe’e, si mate dambai, awõ zombuyumbuyu tõla. (F. 5, 16).

8 Ba tobali fa’omuso dõdõ sabõlõbõlõ ba mbanua andrõ.

9 III. Ba no tohõna ba mbanua andrõ niha, sebua elemu, Simoni dõinia, ba tobali dõdõ Ndrawa Zamaria ibe’e, sebua ia iŵa’õ. (F. 13, 6. 8). 

10 Khõnia lafaigi fefu, he iraono, ba he satua, lamane: Da’õ wa’abõlõ Lowalangi, niŵa’õ sebua ia. 

11 Ba lafaigifaigi khõnia, me no ara ahõlihõli dõdõra ibe’e, ba wakelemusania andrõ. 

12 Ba me mamati ira khõ Wilifo, sangombakha turia mbanua Lowalangi ba turia dõi Yesu Keriso, somuso dõdõ, ba lafabayagõ’õ idanõ ira, ira matua ba ira alawe. 

13 Ba Simoni andrõ gõi, ba mamati, ba me no tebayagõ idanõ ia, ba lõ irõirõi Wilifo, ba i’ila dandra andrõ, awõ wa’abõlõ andrõ, ba tobali dõdõnia. 

14 Ba me larongo sinenge ba Yeruzalema, la’o’õ li Lowalangi, ba Zamaria, ba lafatenge khõra Wetero ba Yohane. 

15 Ba me larugi si tou, ba mangandrõ ira, ba khõra andrõ, ena’õ tebe’e khõra Geheha ni’amoni’õ. 

16 Lõ’õ manõ na si mõi ia khõra, samõsa lõ sanema, ha fa no tebayagõ idanõ ira, ba dõi Yesu So’aya. 

17 Awena latufa hõgõra tanga, ba latema Geheha ni’amoni’õ. (F. 6, 6). 

18 Ba me i’ila Simoni, tebe’e Geheha, na latufa ira tanga sinenge, ba i’ohe khõra gana’a, 

19 imane: Mibe’e khõgu gõi wa’abõlõ andrõ, ena’õ na itema Geheha ni’amoni’õ nitufagu tanga. 

20 Imane khõnia Fetero: Yamõi ba wa’atekiko gana’au, awõ ndra’ugõ! me õwai ana’a mbõli mbuala Lowalangi andrõ! (Mat. 10, 8). 

21 Lõ urakhau ba lõ sinemau ba daroma li andrõ; lõ’õ sa atulõ dõdõu fõna Lowalangi. (Neh. 2, 20). 

22 Andrõ falalini gera’erau, erogõ golalõŵau andrõ, ba andrõ khõ Zo’aya, ma atõ i’efa’õ khõu gera’era dõdõu, si lõ sõkhi andrõ. 

23 Oroma sa khõgu, wa no fahõna ba dõdõu gawõkhu safeto, ba no ibõbõ ndra’ugõ si lõ atulõ. (Moz. V. 29, 18). 

24 Ba itema linia Simoni, imane: Mi’andrõ khõ Zo’aya, salahigu, ena’õ lõ itõrõ ndra’o niŵa’õmi andrõ fefu. (Moz. II. 10, 17. Fam. I. 12, 19).

25 Ba ya’ira, me no lafaduhu’õ li Zo’aya, me no la’ombakha’õ, ba lafuli ira ba Yeruzalema, ba la’oya’õ banua Ndrawa Zamaria, wanuriagõ turia somuso dõdõ.

26 IV. Ba muhede mala’ika Zo’aya khõ Wilifo, imane: Faoso, ae miraya, ba lala andrõ, si otarai Yeruzalema, saekhu ba Gasa, sanõrõ tanõ si mate. 

27 Ba maoso ia, mõi ia. Ba hiza niha, Dawa Gaitiofia, salaŵa, mandru yomo, khõ Kandrake, razo Ndrawa Gaitiofia, ira alawe, nibe’e barõ mbawa ana’a razo fefu; no mõi ia mangandrõ ba Yeruzalema. (Sal. I. 8, 41. Sef. 3, 10. Yoh. 12, 20). 

28 Ba mangawuli ia, dumadao ia ba guretania, mamaso sura Yesaya, sama’ele’õ andrõ. 

29 Ba imane Eheha khõ Wilifo: Ondrasi gureta andrõ, ba bõi rõirõi ia. 

30 Ba fagohi Wilifo, i’ondrasi ba irongo, mamaso sura Yesaya, sama’ele’õ, niha andrõ, ba imane: Hadia, aboto gõi ba dõdõu nibasomõ? 

31 Ba imane: He uwisa sa, na lõ samobawa lala khõgu? Ba i’andrõ khõ Wilifo, mõi ia yaŵa mudadao ba ngainia. 

32 Ba si mané ba zura andrõ, nibasonia: ”Hulõ mibiribiri te’ohe ia ba wanaba ya’ia, ba hulõ nono mbiribiri, si lõ hedehede ba danga zoguti bunia, si manõ gõi wa lõ hedehedenia. (Yes. 53, 7. 8). 

33 Ba wa’ide’idenia te’etu’õ wanguhuku ya’ia; ha niha zanutunõ nga’õtõnia? teheta sa ba guli danõ nosonia.” 

34 Ba itema li mandru andrõ, imane khõ Wilifo: U’andrõ khõu, ha niha nitõrõ li zama’ele’õ andrõ, wanguma’õ da’õ? hadia, ya’ia, hadia niha bõ’õ? 

35 Ba muhede Wilifo, i’otarai zura da’õ, ituriagõ khõnia duria somuso dõdõ andrõ, khõ Yesu. (Kor. I. 15, 3 b. t.). 

36 Ba me latõrõ lala, ba larugi nidanõ, ba imane mandru andrõ: Hiza nidanõ! Hadia wanenaŵa, na tebayagõ idanõ ndra’o? (F. 10, 47). 

37 Ba imane Filifo: Na ahori dõdõu wamati, ba tola. Itema linia, imane khõnia: Mamati ndra’o Ono Lowalangi Yesu Keriso andrõ. (Mar. 16, 16. Mat. 16, 16). 

38 Ba iŵa’õ labadugõ gureta, ba mõi ira tou, ba nidanõ, darua ira, Filifo mandru andrõ, ba ibayagõ idanõ ia Filifo. 

39 Ba me no mõi ira miyaŵa moroi ba nidanõ, ba iheta Wilifo Eheha Zo’aya, ba lõ’õ sa’ae i’ila ia mandru andrõ; omuso sa dõdõnia, ba wanõrõ lalania. (Sal. I. 18, 12). 

40 Ba ba Gasoto tesõndra Wilifo, ba itõrõi danõ wanuriagõ turia somuso dõdõ andrõ, idozigõ banua, irugi Kaizaria. (F. 21, 8. 9).

 

HALÕŴÕ ZINENGE

FAZA 9

 

I. Famalalini era’era Zaulo. II. Ifadõhõ wõkhõ Fetero, ba III. isusugi Dabita.

1 I. Ba lõ’õ na tebato wa’omasi Zaulo, ifeta’u nifahaõ Zo’aya ba ibunu; mõi ia khõ ndra ere sebua, (F. 8, 3), (A. 2—9: F. 22, 4—10; 26, 9—18.)
2 i’andrõ khõnia zura, nibe’e ba Ndramaseko ba zekola, ena’õ ibõbõ na falukha ia zolo’õ huku da’õ, ira matua ba ira alawe, ba i’ohe ba Yeruzalema. 

3 Ba ba wofanõ, me ahatõ ia ba Ndramaseko, ba i’ozumagõ ifasui ia haga, moroi si yaŵa ba mbanua. 

4 Ba alau tou ia ba danõ, ba irongo li, imane khõnia: He Saulo! he Saulo! hana wa õgohido? (Mat. 25, 40. 45. Luk. 22, 31). 

5 Ba imane: He So’aya, ha niha ndra’ugõ? Ba imane: Yesu ndra’o, nigohiu. (Kor. I. 15, 8). 

6 Ba faoso ba ae ba mbanua andrõ, ba laŵa’õ khõu he õwisa. (F. 2, 37). 

7 Ba labadugõ ira niha andrõ, awõnia ba lala, lõ hedehede; larongo sa li andrõ, ba lõ oroma khõra niha. (F. 22, 9). 

8 Ba maoso Zaulo moroi ba danõ, ba me ifehaga ia, ba lõ i’ila hadia ia; ba la’ohe dangania, lafasao ia ba Ndramaseko.

9 Ba tõlu bongi lõ i’ila niha, lõ manga ia ba lõ ibadu nidanõ. (A. 10—19; F. 22, 12—16.)

10 Ba so ba Ndramaseko nifahaõ, Anania dõinia, ba imane ba da’õ So’aya, ba gangilata: He Anania! Ba imane: Ya’e ndra’o, Tua! 

11 Ba imane khõnia So’aya: Faoso, ae ba newali andrõ, nifotõi ”sadõlõ” ba sofu zotõi Saulo andrõ, banua Dareso, ba nomo Yuda. Hiza sa, mangandrõ ia, (F. 21, 39), 

12 ba no i’ila niha, sotõi Anania, si mõi khõnia yomo, sanufa hõgõnia tanga, ena’õ ifuli i’ila niha. 

13 Ba itema linia Anania, imane: He Tua, no ato zangombakha niha andrõ, nirongogu, i’abõlõgõ wamakao ni’amoni’õ andrõ khõu, ba Yeruzalema, laŵa’õ. 

14 Ba ba da’e, ba no latehe khõnia ere sebua, tola ibõbõ dozi si angarõfi li tõimõ. 

15 Ba imane khõnia So’aya: Ae’e, me no fakake nituyu da’õ khõgu, ba wolohe ba niha baero tõigu ba ba zalaŵa ba ba Ndraono Gizeraëli. (F. 3, 2; 22, 21; 26, 2; 27, 24. Rom. 1, 1. 5. Tim. I. 2, 7). 

16 U’oroma’õ sa khõnia, ha wa’oya zi lõ tola lõ gõna ia famakao, bõrõ dõigu andrõ. (F. 20, 23. Kor. II. 11, 23 b. t. Tim. II. 3, 11). 

17 Ba mõi Ganania, mõi ia yomo ba nomo andrõ, itufa hõgõ Zaulo tangania, imane: He talifusõgu Saulo, So’aya zamatenge ya’o, Yesu, sangoroma’õ ya’ia khõu, ba lala nitõrõu, ena’õ ifuli õ’ila niha, ba ena’õ tehõna khõu Geheha ni’amoni’õ (F. 8, 17). 

18 Ba i’anema’õ abo’a ba hõrõnia zi hulõ hunahuna, ba ifuli i’ila niha; ba maoso ia, ifabayagõ’õ idanõ ia, ba i’ā gõnia, fangabe’enia. 

19 Ba so ia ma’ifu ba da’õ ba Ndramaseko, awõ ndra nifahaõ. 

20 Ba i’anema’õ i’ombakha’õ Keriso, ba zekola, wa ono Lowalangi da’õ. 

21 Ba tobali dõdõ dozi samondrongo da’õ, ba lamane: Tenga da’õ zamakiko no, ba Yeruzalema si angarõfi li tõi andrõ, ba si mõi ba da’e, ba wamõbõ ya’ira ba ba wolohe ya’ira khõ ndra ere sebua? (Gal. 1, 13). 

22 Ba itugu abõlõ na Zaulo, fawuka dõdõ niha Yehuda, si fatewu ba Ndramaseko, ibe’e, wama’ele’õ, wa Keriso Yesu. (F. 18, 28. Yoh. 4, 42).

23 Ba me no ara ma’ifu, ba mamagõlõ niha Yehuda, ba wamunu ya’ia. (F. 23, 12). 

24 Ba irongo Saulo dõdõra andrõ. Ba manaro gõi ira ba mbawa gõli, bongi ma’õkhõ, ba wamunu ya’ia. (Kor. II. 11, 32 b. t.).

25 Ba latolo ia nifahaõnia ba zi bongi, ladada baero gõli, ba ragaraga. 

26 Ba me no irugi Yeruzalema, ba itandraigõ ifaogõ ia khõ ndra nifahaõ, ba a’oi ata’u ira, lõ faduhu dõdõra, wa no nifahaõ ia. (Gal. 1, 18 b. t.). 

27 Ba itolo ia Baranaba, i’ohe khõ ndra sinenge, idunõdunõ khõra, he wisa wangilania So’aya ba lala, awõ wa no muhede khõnia, ba he wisa wamahaõnia, wangombakha tõi Yesu, ba Ndramaseko, wa lõ aiwõ ia. (F. 4, 36). 

28 Ba faofao ia khõra, ba Yeruzalema, heza mõi ira, ba lõ aiwõ ia, wamahaõ, wangombakha tõi Zo’aya. (F. 22, 17 b. t.). 

29 Ba muhede ia gõi ba Ndrawa Heleni, fahuhuo ira, ba ya’ira, ba la’alui wamunu ya’ia. 

30 Ba me larongo da’õ talifusõ, ba la’ohe ia misi tou ba Kaizaria, ba lafatenge ba Dareso. (F. 11, 25).

31 Ba ohahau dõdõ mbanua Yesu, ba danõ Yudaia ma’asagõrõ, awõ ba Zamaria, itugu aro ira, ba latõrõ lala Zo’aya, la’ata’ufi ia, ba fahõna khõra wondrara dõdõ khõ Geheha ni’amoni’õ. (Yud. 20. Yoh. 14, 16).

32 II. Ba me itõrõi ira Fetero, ba tobali irugi gõi si tou, ni’amoni’õ, banua Lida. (F. 8, 14). 

33 Ba falukha ia ba da’õ niha, Ainea dõinia, si no meŵalu fakhe fa’ara tou ba zalo manõ, si mate dambai. 

34 Ba imane khõnia Fetero: He Ainea! Ifadõhõ wõkhõu Yesu Keriso; faoso, ba ya’ugõ mamazõkhi naha wemõrõ khõu. Ba i’anema’õ maoso. (F. 3, 6. Mat. 9, 6).

35 Ba oi la’ila ia banua Lida fefu ba banua Zarona, ba la’o’õ khõ Zo’aya. (Yes. 35, 2).

36 III. Ba so ba Yofe nifahaõ, ira alawe, Tabita dõinia, Doreka (nago), na la’ali, si no fahõna buabua si sõkhi, ba oya ibe’e ame’ela ba zi numana. (F. 10, 2). 

37 Ba tobali, me luo da’õ, ba mofõkhõ ia ba mate. Ba lafemondri ia, ba labe’e ba mbate’e ba zi sagõtõ. 

38 Ba me no ahatõ ba Yofe Lida andrõ, ba me no larongo ira nifahaõ, so ba da’õ Wetero, ba lafatenge khõnia niha, darua, sangandrõ khõnia: Bõi aragõ we’amõi khõma. 

39 Ba maoso Wetero, mõi ia awõra. Ba me irugi, ba la’ohe ia ba zi sagõtõ, ba la’ondrasi ia fefu lakha mbanua, mege’ege ira, ba la’oroma’õ khõnia nukha andrõ, awo lembe, nifazõkhi Doreka andrõ, me so ia khõra. 

40 Ba ifofanõ ira baero fefu Fetero, ibalõduhini tou zalo, mangandrõ; ba ibali’õ ia ba mboto zi mate andrõ, imane: Faoso, Tabita! Ba ifehaga ia, ba me i’ila Wetero, ba mudadao ia. (Mar. 5, 40. 41. Sal. I. 17, 19 b. t.). 

41 Ba i’oro’õ khõnia danga, ifazizio. Ba humede ia ba ni’amoni’õ ba ba lakha mbanua andrõ, ba i’oroma’õ khõra, no auri. 

42 Ba terongo ba mbanua Yofe, fefu, ba ato zamati khõ Zo’aya. (Yoh. 10, 42). 

43 Ba ara Wetero ba Yofe, tome Zimoni tuka guli zaŵi.

 

HALÕŴÕ ZINENGE

FAZA 10

 

Folo’õ gumandra Konelio andrõ.

1 Ba so ba Kaizaria niha, Konelio dõinia, kumandra zaradadu Gitalia andrõ; (Mat. 8, 5), 

2 niha satulõ tõdõ, sangata’ufi Lowalangi, awõ zoroiyomonia fefu; oya ibe’e ba zi numana ame’ela, ba si lõ mamalõmalõ wangandrõnia khõ Lowalangi. (Sin. 112, 9. Luk. 7, 5). 

3 Ba i’ila ba gangilata, oroma sibai, mala’ika Lowalangi, si mõi yomo khõnia, so labõzi tõlu, imane khõnia: He Konelio! (Luk. 1, 22). 

4 Ba itõngõ, ata’u ia, imane: Hadia da’õ, Tua? Ba imane khõnia: No itõrõ tõdõ Lowalangi, si yaŵa, wangandrõu ba ame’elamõ andrõ. (Luk. 1, 12. 29. Sin. 141, 2). 

5 Ba iada’e, ba fatenge niha ba Yofe, ba fakaoni’õ Zimoni andrõ, 

6 nifotõi Fetero; no mõi ia tome khõ Zimoni andrõ, tuka guli zaŵi, ba mbewe nasi so nomonia. (F. 9, 43; 11, 14). 

7 Ba me no mofanõ mala’ika andrõ, sihede khõnia, ba humede ia ba zawuyunia, darua, ba ba zaradadu samõsa, sangata’ufi Lowalangi, 

8 ngoningoninia, ba me no idunõdunõ khõra fefu hadia ia, ba ifatenge ira ba Yofe. 

9 Ba sara wongi, me so ira ba lala, me ahatõ sa’ae ira ba mbanua, ba mõi yaŵa Wetero ba zi sagõtõ, mangandrõ, so laluo. (Dan. 6, 10). 

10 Ba olofo ia, omasi ia manga. Ba me la’asiwai gõnia, ba abeta nosonia. (F. 11, 5 b. t.; 22, 17). 

11 Ba i’ila, teboka mbanua si yaŵa, ba numalõ mitou nahia, hulõ lembe sebolo, nifotaŵitaŵi fatalinga si õfa, wanada ya’ia ba guli danõ. 

12 So bakha fefu ngawalõ zaliŵaliŵa ba danõ, si õfa ahe, ba fefu ngawalõ guõkuõ ba danõ, ba fefu ngawalõ wofo ba dalu mbanua. 

13 Ba so zihede khõnia, imane: Faoso, Fetero, taba ba ā! 

14 Ba imane Fetero: Ai, tebai Tua, me lõ urai u’ā zi lõ sõkhi, awõ zi ra’iõ. (Moz. III. 11, 4 b. t.). 

15 Ba imane zui khõnia sihede andrõ: Bõi bali si lõ sõkhi nihaogõ Lowalangi. (Mat. 15, 11. Tim. I. 4, 5). 

16 Ba medõlu zi manõ, ba i’anema’õ tedõni miyaŵa ba mbanua si yaŵa nahia andrõ. 

17 Ba me ibusi tõdõ Fetero, hadia gangilata andrõ, ni’ilania, ba hiza, ba no so tou niha andrõ, nifatenge Konelio, no lasofu nomo Zimoni. 

18 Ba mu’ao ira, lasofu, na so ba da’õ tome Zimoni, nifotõi Fetero. 

19 Ba me ifatoutou na tõdõnia Fetero gangilata andrõ, ba imane Eheha khõnia: Hiza niha, sangalui ya’ugõ, (F. 8, 29), 

20 ba faoso, ae tou, ba ae awõra, bõi manufa dõdõu, me no ya’o zamatenge ya’ira. (F. 15, 7). 

21 Ba mõi tou Wetero, i’ondrasi niha andrõ, imane: Hiza, ya’odo ni’aluimi. Hadia mbõrõ, wa so ami? 

22 Ba lamane: Konelio andrõ, kumandra, niha satulõ tõdõ, sangata’ufi Lowalangi, si sõkhi turia gõi ba niha Yehuda fefu; no ifaŵa’õgõ khõnia Lowalangi ba mala’ika ni’amoni’õ, ifakaoni’õ ndra’ugõ ba nomonia, ba wamondrondrongo niŵa’õu. 

23 Ba i’ohe ira yomo, ibe’e gõra. Ba sara wongi, ba mõi ia, fao ia khõra: ba mõi awõnia dalifusõ õsa, banua Yofe. (F. 11, 12). 

24 Ba mahemolu õ, ba larugi Kaizaria. Ba no ibalobaloi ira Konelio, no ikaoni zahatõ khõnia, awõ zabõlõ fahuwu khõnia. 

25 Ba me mõi yomo Wetero, ba ifaondragõ ia Konelio, ituhi danõ fõnania, mangalulu. 

26 Ba ifaoso Fetero, imane: Faoso! niha gõi ndra’odo. (F. 14, 15. Fam. 19, 10; 22, 8. 9). 

27 Ba fahuhuo ira, mõi ira yomo, ba i’ila zato, si no so ba da’õ, Fetero. 

28 Ba imane khõra: Mi’ila, lõ tõla ba niha Yehuda, orudu ia ba niha bõ’õ, ba lõ tola mõi ia khõra; ba khõgu, ba no i’oroma’õ Lowalangi, bõi uŵa’õ, si lõ sõkhi, ba ma si ra’iõ niha, gofu ha niha ia. (F. 11, 3. Yoh. 18, 28). 

29 Andrõ gõi lõ ufadaõ we’amõi, me lafakaoni’õ ndra’odo. Usofu iada’e, hadia mbõrõ, wa no mifakaoni’õ ndra’o? 

30 Ba imane Konelio: Õfa bongi ma’õkhõ, me mangandrõ ndra’o, yomo ba da’e khõgu, me labõzi tõlu, ba hiza niha, si so fõnagu, sobaru sihaga, (F. 1, 10), 

31 ba imane: He Konelio! No tefondrondrongo wangandrõu ba no itõrõ tõdõ Lowalangi game’elamõ andrõ. 

32 Andrõ fatenge ba Yofe, ba fakaoni’õ Zimoni andrõ, nifotõi Fetero; no mõi ia tome ba nomo Zimoni, tuka guli zaŵi, ba mbewe nasi. 

33 Ba u’anema’õ ufatenge khõu, ba sõkhi me no so ndra’ugõ. Ba no soga fefu iada’e, fõna Lowalangi, ba wamondrondrongo fefu niŵa’õ Zo’aya khõu. 

34 Ba humede Wetero, imane: Awena si ndruhu aboto ba dõdõgu, lõ ifaigi mbawa niha Lowalangi, (Moz. V. 10, 17. Sam. I. 16, 7), 

35 dozi sa, ha soi ira, sangata’ufi ya ia, solau satulõ, da’õ zomasi ia. (F. 2, 39; 15, 9. Yes. 56, 6. 7). 

36 Da’õ daroma li andrõ, nifa’ohe’õnia ba Ndraono Gizeraëli, wamaturiagõ’õ fa’ohahau dõdõ khõ Yesu Keriso, no da’õ Zo’aya niha fefu. (F. 13, 26. 46. Yes. 52, 7. Efes. 2, 14 b. t. Fil. 1, 11). 

37 No mirongo duria andrõ, ba danõ Yudaia ma’asagõrõ, si bõrõgõ ba Galilaia, me no aefa wamayagõ idanõ andrõ, ni’ombakha’õ Yohane; (Mat. 4, 12 b. t. Mar. 1, 1 b. t.), 

38 Yesu andrõ, banua Nazareta, fombayoini Lowalangi ya’ia, Eheha ni’amoni’õ ba fa’abõlõ, sanõrõi tanõ, wanolo niha ba famadõhõ fõkhõ nifakao Gafõkha fefu, me no itolo ia Lowalangi. (F. 2, 22. Luk. 4, 14. 18. Mat. 9, 35. Yoh. 3, 2). 

39 Ba ya’aga zi so ba mbõrõ ba nilaunia fefu, he ba danõ niha Yehuda, ba he ba Yeruzalema, ba no lataŵi ia ba dõla geu, no labunu. (F. 1, 8; 2, 23; 3, 15. Luk. 23, 33. Fet. I. 2, 24). 

40 Da’õ nisusugi Lowalangi, me no aefa zi dua wongi, ba no ibe’e oroma ia. (Mat. 28, 6), 

41 tenga ba niha sato, ha ba zamaduhu’õ andrõ, nihõnagõ Lowalangi wanutuyu ya’ira, khõma, si no orudu manga khõnia, zi no mamadu idanõ awõnia, me no aefa maoso ia moroi ba ngai zi mate. (F. 13, 31. Yoh. 15, 27. Luk. 24, 43. Mat. 26, 29). 

42 Ba no iŵa’õ khõma wangombakha ba niha andre ba famaduhu’õ, wa da’õ nihonogõi Lowalangi sanguhuku niha sauri awõ zi no mate. (F. 17, 31. Yoh. 5, 22). 

43 Ya’ia nifaduhu’õ zama’ele’õ, fefu, wa ba dõinia lasõndra wameta horõ dozi si faduhu tõdõ khõnia. (F. 4, 12. Yes. 53, 11. Yer. 31, 34. Dan. 9, 24. Rom. 3, 21 b. t.). 

44 Ba lõ’õ na saetu wehede andrõ, ba aekhu Geheha ni’amoni’õ ba zamondrongo taroma li andrõ fefu, (F. 11, 15). 

45 Ba tobali dõdõ zamati niboto, fefu, ha wa’ato ira, zi no fao khõ Wetero, we’amõi, me telau gõi ba niha baero game’ela andrõ, Eheha ni’amoni’õ. (F. 2, 17. 38). 

46 Larongo sa’ae, molau li bõ’õ ira ba lasuno Lowalangi. Ba imane Fetero: Hadia, tola tatenaŵa nidanõ, fa bõi tebayagõ idanõ da’e, si no manema Eheha ni’amoni’õ, si mane ya’aga? (F. 2, 4; 19, 6). 

47 Ba iŵa’õ khõra lafabayagõ’õ idanõ ira, ba dõi Yesu Keriso. Ba la’andrõ khõnia, ena’õ i’aragõ ia ma’ifu khõra.

 

HALÕŴÕ ZINENGE

FAZA 11

 

I. Ibu’a ba hulunia Fetero, me no ifa’amõi banua Yesu niha baero. II. Si fõfõna molo’õ ba Gandriokhia. III. Agabo.

1 I. Ba larongo sinenge ba talifusõ, ba Yudaia misa, la’o’õ gõi li Lowalangi niha baero. (F. 10, 44 b. t. Efes. 3, 1 b. t.). 

2 Ba me so moroi si tou Wetero, me mõi ba Yeruzalema, 

3 ba lategu ia niboto, lamane: No mõi’õ ba niha si lõ muboto, no orudu manga ndra’ugõ khõra. (F. 10, 28). 

4 Ba ibõrõtaigõ Fetero, izarazara wanutunõ khõra, imane: 

5 Sodo ba Yofe, mangandrõ ndra’o; ba u’ila, me abeta nosogu, gangilata, nahia silalõ mitou, hulõ lembe sebolo, nifotaŵitaŵi fatalinga si õfa, wanada ya’ia moroi ba mbanua si yaŵa, ba irugi ndra’odo. (F. 10, 9 b. t.). 

6 Ba utõngõ, ufaigifaigi, ba u’ila bakha zaliŵaliŵa ba danõ, si õfa ahe, awõ gutu ndru’u si fara’u ba kuõkuõ ba fofo ba dalu mbanua. 

7 Ba urongo gõi li, imane khõgu: Faoso Fetero, taba ba ā! 

8 Ba umane: Ai tebai, Tua, me lõ irai itõrõ mbawagu si lõ sõkhi ba si ra’iõ. 

9 Ba itema zui ligu sihede andrõ, moroi ba mbanua si yaŵa, imane: Bõi bali si lõ sõkhi nihaogõ Lowalangi. 

10 Ba medõlu zi manõ, ba tedõni zui miyaŵa, ba mbanua si yaŵa, fefu. 

11 Ba hiza, ba da’õ sibai so baolayama nomo andrõ, ba zi soga, niha andrõ, nifatenge khõgu, moroi ba Kaizaria. 

12 Ba iŵa’õ khõgu Eheha, mõido awõra, bõi manufa dõdõgu. Ba mõi gõi awõgu dalifusõ, si daõnõ andre, ba mõiga yomo ba nomo niha andrõ. (F. 10, 23). 

13 Ba i’ombakha’õ khõma, he wisa wangilania mala’ika andrõ, yomo khõnia, sanguma’õ: Fatenge ba Yofe, ba fakaoni’õ Zimoni andrõ, nifotõi Fetero, 

14 da’õ zanguma’õ khõu taroma li, fangorifiu, ba fangorifi zoroiyomou fefu. (F. 10, 6; 16, 30. 31). 

15 Ba me ubõrõtaigõ fahuhuo, ba aekhu Geheha ni’amoni’õ ba khõra, si mane ba khõda gõi, ba mbõrõta. (F. 10, 44). 

16 Ba itõrõ tõdõgu niŵa’õ Zo’aya, me imane: ”Idanõ nibayagõ Yohane, ba ya’ami, ba nibayagõ Eheha ni’amoni’õ.” (F. 1, 5). 

17 Ba na faoma game’ela, nibe’e Lowalangi khõra nibe’enia khõda, samati khõ Zo’aya ya’ita, Yesu Keriso, ba ha niha ndra’o? Hadia tola utenaŵa Lowalangi? (F. 17, 47).

18 Ba me larongo da’õ, ba lõ hedehedera, ba lasuno Lowalangi, lamane: Ba noa sa ibe’e ba niha baero gõi Lowalangi wamalalini era’era ba wangorifi. (F. 5, 31).

19 II. Ba latõrõi danõ si no musaewe andrõ, moroi ba wamakao andrõ, si no tesao ba khõ Zitefano, irugi danõ Wõnikia ba Kifero ba Andriokhia, ba lõ la’ombakha’õ daroma li Loŵalangi, gofu ha khõ, ha ba niha Yehuda. (F. 8, 1. 4). 

20 Ba so õsa ba khõra, Dawa Gifero ba banua Girene, da’õ zangombakha ba Ndrawa Heleni gõi, me larugi Gandriokhia, laturiagõ khõra Yesu, So’aya. (F. 8, 35). 

21 Ba itolo ira tanga Zo’aya, ba ato zi faduhu tõdõ, la’o’õ khõ Zo’aya. (F. 2, 47). 

22 Ba terongo duria andrõ khõra, ba dõgi dalinga mbanua Yesu ba Yeruzalema, ba lafatenge Mbaranaba, ba Gandriokhia. (F. 9, 27). 

23 Ba me irugi, me i’ila wa’ebua dõdõ Lowalangi andrõ, ba omuso dõdõnia, ba ifarou dõdõra fefu, ena’õ na la’aro’õ dõdõ wangiagõ khõ Zo’aya, (F. 13, 43), 

24 me no niha si sõkhi ia ba me no fahõna khõnia Geheha ni’amoni’õ, awõ wamati. Ba ato niha si tefabõbõ khõ Zo’aya. (F. 6, 5). 

25 Ba mõi ia ba Dareso, ba wangalui Saulo andrõ, ba me no isõndra, ba i’ohe ba Gandriokhia. (Gal. 2, 11 b. t.).

26 Ba tobali dõfi wa’ara falukhalukha ira ba mbanua andrõ, ba ato nifahaõra niha, ba ba Gandriokhia mbõrõta, wa labe’e tõi nifahaõ niha Keriso. (F. 26, 28. Fet. I. 4, 16).

27 III. Ba me luo da’õ, ba mõi misi tou ba Gandriokhia zama’ele’õ moroi ba Yeruzalema. (F. 13, 1. Efes. 4, 11). 

28 Ba maoso zi samõsa da’õ, Agabo dõinia, ifa’ele’õ moroi ba Geheha lofo sebua, si so dania ba guli danõ ma’asagõrõ; salua me luo Kaizaro Kalaudio. (F. 21, 10). 

29 Ba lahonogõi ira nifahaõ fefu, lafa’ohe’õ dolotolo ba dalifusõ ba Yudaia, ebua labe’e sebua ana’a. (Rom. 15, 25. 26). 

30 Ba alua gõi lafa’ohe’õ khõ zatua, Baranaba ba Saulo zolohe. (F. 12, 25).

 

HALÕŴÕ ZINENGE

FAZA 12

 

I. Labunu Yakobo. II. Lakuru Wetero ba te’efa’õ. III. Fa’amate Herode.

1 I. Me luo da’õ ibabaya õsa, mbanua Yesu, razo, Herode, ba wamakao ya’ira. (F. 4, 3. Luk. 21, 12).

2 Ba ibunu si’õli Yakobo, talifusõ Yohane. (Mat. 4, 21).

3 II. Ba me i’ila omasi niha Yehuda, ba itohugõ, ifara’u’õ Wetero gõi. (Ba baŵa roti si lõ mu’aisõni). (Mar. 14, 1). 

4 Ba me no ifara’u’õ, ba ifabe’e’õ ba gurunga, ibe’e ba danga zaradadu si mendrõfa wa daõfa, ba wanaro ya’ia, edõna ifa’ele’õ ba niha sato, na aefa wasa. 

5 Ba latarogõ sa’ae Wetero ba gurunga. Ba mangandrõ khõ Lowalangi mbanua, ba khõnia, moroi si’aikõ ba dõdõra. (Efes. 6, 18 b. t.). 

6 Ba me ifa’ele’õ ena’õ Herode, ba ba gotalua zaradadu si darua mõrõ Wetero, ba zi bongi andrõ, dua rozi rate mbilagunia, ba so zanaro ba ngai mbawandruhõ gurunga. 

7 Ba hiza, so mala’ika Zo’aya, ba so haga, sihaga ba mbate’e andrõ. Ba ibõzi ngai Wetero, isusugi, imane: Faoso, aliogõ! Ba atoru mbilagu ba dangania. (F. 5, 19; 27, 23). 

8 Ba imane khõnia mala’ika andrõ: Amõbõ talu ba amadagahe mbadagahemõ! Ba i’o’õ da’õ. Ba imane khõnia: Amaru mbarumõ sebua, ba o’õ ndra’o! 

9 Ba mõi ia baero, i’o’õ, lõ i’ila wa si duhu nilau mala’ika andrõ, iwai sa angilata ni’ilania. 

10 Ba me no latõrõ naha zanaro, si fõfõna larugi, awõ naha wanete da’õ, ba larugi mbawandruhõ si’õli andrõ, lala ba newali, ba teboka manõ da’õ fõnara; ba mõi ira baero, latõrõ newali si sara, ba i’anema’õ iheta ia khõnia mala’ika andrõ. 

11 Ba imane Fetero, me i’era’era tõdõnia: Awena u’ila, si ndruhundruhu, no ifatenge mala’ikania So’aya, ba no i’efa’õ ndra’o ba danga Herode ba ba nibalobaloi niha Yehuda fefu. (Sin. 34, 8; 91, 11. Dan. 6, 22. Heb. 1, 14). 

12 Ba me no aboto ba dõdõnia da’õ, ba irugi nomo Maria andrõ, ina Yohane, nifotõi Mareko; ba no ato zowulo ba da’õ, mangandrõ. (F. 15, 37. Tim. II. 4, 11). 

13 Ba me ibõkõ mbawandruhõ fõna, ba so nono alawe, Rode dõinia, ba wamondrongo, 

14 ba me irongo li Wetero, ba lõ ibokai mbawandruhõ, ba wa’omuso dõdõ, fagohi ia, isaŵa yomo, i’ombakha’õ, so baero Wetero. 

15 Ba lamane khõnia: Owõhõ’õ! Ba lõ ibõhõli, si duhu iŵa’õ. Ba lamane: Mala’ikania. (Luk. 24, 37). 

16 Ba itohugõ wamõkõ Fetero; ba me labokai, ba la’ila ia, ba tobali dõdõra. 

17 Ba ifazaŵa dangania khõra, bõi humede ira, ba idunõdunõ, heiwisa So’aya, wangefa’õ ya’ia ba gurunga, ba imane: Mi’ombakha’õ khõ Yakobo ba ba dalifusõ. Ba mofanõ ia, isaŵa naha bõ’õ. (F. 15, 13. Gal. 1, 19). 

18 Ba me moluo, ba tenga ha ma’ifu ŵa’abu dõdõ zaradadu andrõ, hadia khõ Wetero andrõ.

19 Ba me isofu ia Herode ba me lõ isõndra, ba isekhegõ zanaro, ba iŵa’õ labunu. Ba mõi ia misi tou, irõi Yudaia, isaŵa Kaizaria, ba da’õ soso ia.

20 III. Ba so wõnunia sabõlõbõlõ ba mbanua Diro ba ba mbanua Zidona. Ba mõi ira khõnia, ha sara dõdõ, lafawe’e Mbalaso andrõ, mandru yomo khõ razo ba la’andrõ wangatulõ, me ba danõ razo andrõ lasõndra mbalazora. (Hes. 27, 17. Sal. I. 5, 9. 11). 

21 Ba ha samuza mo’õkhõ, ba i’obaru mbaru razo Herode mudadao ia ba dadaomania andrõ, ba muhede ia khõra. 

22 Ba mu’ao niha sato khõnia: Li Lowalangi da’õ, ba tenga li niha. 

23 Ba i’anema’õ ibõzi ia mala’ika Zo’aya, me tenga Lowalangi ifusumange; ba mate ia, ni’ā gukuõ. (Sal. II. 19, 35. Hes. 28, 2. Dan. 5, 20). 

24 Ba monõnõnõnõ li Lowalangi, tobali ato ira. (F. 19, 20. Yes. 55, 11). 

25 Ba mangawuli Mbaranaba, awõ Zaulo, moroi ba Yeruzalema, me no la’asiwai wame’e tolotolo andrõ, ba la’ohe awõra Yohane andrõ, nifotõi Mareko. (F. 11, 29. 30; 13, 5).

 

HALÕŴÕ ZINENGE

FAZA 13

 

I. Fekoli Waulo ba niha baero, si fõfõna. II. Sebua elemu, Elima. III. Huhuo Waulu ba Gandriokhia ba Wizidia. IV. Lafakao ia niha Yehuda.

1 I. Ba so ba Gandriokhia, ba mbanua Yesu ba da’õ, zama’ele’õ ba samahaõ, Baranaba andrõ ba Simeoni, nifotõi Nigero, ba Lukio, banua Girene, ba Mena’e, awõ Herode, salaŵa andrõ ba zi sagõrõ ni’o’õfa tanõ, me iraono ira, ba Saulo. (F. 11, 25 b. t.). 

2 Ba me lafosumange Zo’aya ba me mamoni ira, ba imane Eheha ni’amoni’õ: Mi’oniagõ khõgu Mbaranaba andrõ, awõ Zaulo ba halõŵõ andrõ, ba nikaonigu ya’ira. (F. 14, 26). 

3 Ba mamoni ira, ba mangandrõ, ba latufa hõgõra tanga, ba lafofanõ. (F. 6, 6). 

4 Ba ya’ira, nifatenge Geheha ni’amoni’õ, ba mõi misi tou ba Zeloikia, ba moroi ba da’õ moloyo ira, lasaŵa Gifero.

5 Ba me no larugi Zalami, ba mangombakha li Lowalangi ira, ba zekola niha Yehuda. Ba fao gõi khõra Yohane, ngoningonira. (F. 12, 25).

6 II. Ba me latõrõi hulo andrõ, ma’asagõrõ, irugi Wafo, ba falukha ira niha sebua elemu, sama’ele’õ sofaya, niha Yehuda, Bariyesu dõinia, (F. 8, 9), 

7 si so khõ gumandru, Seregio Faulo; ba no niha satuatua gumandru andrõ. Ba ifakaoni’õ khõnia ndra Baranaba Saulo kumandru andrõ, omasi ia ifondrondrongo li Lowalangi. 

8 Ba itenaŵa ira Elima, (si manõ dõinia, na la’ali) sebua elemu andrõ, i’alui wamaelungu kumandru, fa bõi faduhu dõdõnia. 

9 Ba inehegõ ia Saulo, sotõi Faulu gõi, si no fahõna Eheha ni’amoni’õ, (F. 9, 17), 

10 imane: He ono Gafõkha, si no fahõna fa’onekhe ba falimosa fefu, sanuzu tõdõ satulõ fefu, hadia ia, lõ õbato wamila’õ lala sadõlõ andrõ khõ Zo’aya? (Moz. V. 13, 13). 

11 Ba iada’e ba hiza, ba ikhamõ ndra’ugõ tanga Zo’aya ba au’a ndra’ugõ, ba lõ õ’ila luo, irege no irugi baŵa khõu. Ba i’anema’õ ihawui ia fa’andrundrumõ ba fa’ogõmigõmi, ba mowaõwaõ ia misa, mangalui solohe tangania. (Sin. 32, 4).

12 Ba me i’ila da’õ kumandru, ba faduhu dõdõnia, tobali dõdõnia ba huku Zo’aya.

13 III. Ba moloyo ndra Faulu, la’otarai Wafo, lasaŵa Werege ba Wambilia; ba irõi ira Yohane, mangawuli ba Yeruzalema. (F. 15, 37 b. t.). 

14 Ba ya’ira, ba latõrõ danõ, ba larugi Gandriokhia ba Wizidia, ba mõi ira ba zekola, me luo sabato, mudadao ira. 

15 Ba me no aefa wombaso sura goroisa, awõ zura zama’ele’õ, ba lafahede’õ khõra satua zekola, lamane: Na so hadia ia khõmi, ya’ami, ira talifusõ, niŵa’õ ba zato, famarou dõdõ, ba miŵa’õ. (F. 15, 21). 

16 Ba maoso Waulo, ifazaŵa dangania, ba imane: He ya’ami, Iraono Gizeraëli ba ya’ami, sangata’ufi Lowalangi, mifondrondrongo! 

17 No ituyu ndra tuada Lowalangi Ndraono Gizeraëli andrõ, ba no i’ebua’õ soi andrõ, me si fatewu ira ba danõ Miserayi, ba no iheta ira ba da’õ tangania sabõlõ andrõ. (F. 7, 2. Moz. V. 26, 18. 19. Moz. II. 12, 37 b. t. Yes. 63, 12. Hes. 20, 5 b. t.). 

18 Ba mato õfa wulu fakhe wa’ara irorogõ ira ba danõ si mate andrõ, (Moz. IV. 14, 34. Moz. V. 1, 31; 8, 15. 16. Sin. 78. Heb. 3, 9),

19 ba fitu soi ihori ba danõ Gana’ana ba ibe’e khõra danõra andrõ, ondrõita mitou. (Moz. V. 7, 1. Yos. 24, 11; 14, 2). 

20 Ba aefa da’õ, ba i’asogõ khõra zanguhuku, mato õfa ngaotu a lima wulu fakhe wa’ara, irugi Zamu’eli, sama’ele’õ andrõ. (Sanguh. 2, 16 b. t. Sam. I. 3, 20). 

21 Ba i’otarai da’õ, ba la’andrõ razo, ba ibe’e khõra Lowalangi Zaulo andrõ, ono Gisi, mado Mbeniyami, õfa wulu fakhe. (Sam. I. 8, 5; 9, 1. 2. 16). 

22 Ba me no itibo’õ da’õ, ba ibe’e razo Dawido andrõ, nifaduhu’õnia, me imane: ”No usõndra Dawido, ono Giza’i andrõ, niha somasi dõdõgu, solo’õ fefu zomasido.” (Sam. I. 16, 1; 13, 13. 14. Sin. 89, 21). 

23 Ba ma’uwu da’õ no i’asogõ Lowalangi sangorifi Iraono Gizeraëli Yesu, dali gamabu’ula li andrõ, (Rom. 1, 3. Yes. 11, 1. Luk. 1, 27), 

24 me no aefa i’ombakha’õ Yohane fõna wa’asonia andrõ, wamayagõ idanõ andrõ, ba wamalalini era’era, ba Ndraono Gizeraëli fefu. (F. 19, 4). 

25 Ba me awai halõŵõ Yohane andrõ, ba imane: Hadia ba dõdõmi, ha niha ndra’odo? Tenga ya’odo; hiza sa, so furigu dania zambõ ndra’o utoto’õ mbadagahe ba gahenia. (Luk. 3, 15 b. t. Yoh. 1, 20 b. t.). 

26 He ya’ami, ira talifusõ, madou Gaberahamo, ba ha niha ba khõmi, sangata’ufi Lowalangi, khõmi tefa’ohe’õ daroma li fangorifi andrõ. (F. 3, 26; 10, 36). 

27 Lõ’õ sa aboto da’õ ba dõdõ mbanua Yeruzalema, ba he ba dõdõ zalaŵara, ba itõrõ gõi li zama’ele’õ andrõ, nibasobaso, ero na luo sabato, labe’e, me la’etu’õ huku. (F. 3, 17. Yoh. 16, 3. Yes. 29, 11). 

28 Ba he lõ nisõndrara bõrõ wamunu, ba la’andrõ zui khõ Wilato, labunu ia. (Mat. 27, 20. 22. 23). 

29 Ba me no latõrõ fefu zi so ba zura ba khõnia, ba laheta ia ba dõla geu, labe’e ba lewatõ. (Luk. 18, 13. Mat. 27, 59 b. t.). 

30 Ba no isusugi Lowalangi, moroi ba ngai zi mate. (F. 3, 15). 31 Ara ma’ifu i’oromaroma’õ ia khõra, si fao khõnia moroi ba Galilaia, we’amõi misi yaŵa ba Yeruzalema, samaduhu’õ ya’ia iada’e ba niha sato. (F. 1, 3; 10, 40. 41). 

32 Ba ya’aga mangombakha khõmi amabu’ula li andrõ khõ ndra tua, wa no itõrõ sibai da’õ Lowalangi ba ma’uwu, khõda, me isusugi Yesu. (Luk. 24, 27). 

33 Si mane si so ba zinunõ fanete zi fõfõna andrõ: ”Onogu ndra’ugõ, ma’õkhõ andre no mo’onodo ya’ugõ.” (Sin. 2, 7). 

34 Ba imane wangombakha fanusuginia ya’ia moroi ba ngai zi mate, fa lõ’õ sa’ae mangawuli ia ba wa’obou: ”Ube’e khõmi ni’amoni’õ andrõ khõ Dawido, si ndruhu andrõ.” (F. 2, 27. Yes. 55, 3). 

35 Me imane gõi ba zi sambua: ”Lõ õfa’ila’õ wa’obou ba ni’amoni’õ andrõ khõu. (Sin. 16, 10. Sakh. 13, 7).

36 Noa sa mate Dawido, me no i’o’õ dõdõ Lowalangi, ba niha si sagõtõ andrõ, si faendronga khõnia, ba no te’orudugõ ia khõ ndra tuania, ba no i’ila wa’obou. (F. 2, 29 b. t.). 

37 Ba lõ ni’ila nisusugi Lowalangi andrõ fa’obou. 

38 Andrõ ya’aboto ba dõdõmi, ya’ami, ira talifusõ, te’ombakha’õ khõmi wangefa horõ, soroi ba da’õ; (F. 10, 43. Luk. 24, 47); 

39 fefu zi tebai aefa khõmi ba goroisa Moze, ba aefa ba da’õ, ba zamati fefu. (Rom. 3, 28). 

40 Andrõ mifaigi, fa lõ itõrõ ami niŵa’õ ba zura zama’ele’õ andrõ: (Yes. 28, 14. Hab. 1, 5): 

41 ”Mifaigi, ya’ami, si lõ ba dõdõ, ba ya’ahõlihõli dõdõmi, yalõ oroma ami sa’ae; me uhalõ halõŵõ ba gõtõmi, halõŵõ ba zi lõ faduhu dõdõmi, na so zanutunõ ya’ia khõmi.” 

42 Ba me larõi zekola, ba la’andrõ khõra lafuli, la’ombakha’õ khõra daroma li andrõ, na luo sabato dania.

43 Ba me no aefa zekola, ba ato niha Yehuda, awõ zi no mõi banuara, samosumange Lowalangi, solo’õ ira Faulo Baranaba. Ba fahuhuo ira khõra, lafarou dõdõra, fa bõi labulõ’õ ira ba wa’ebua dõdõ Lowalangi andrõ. (F. 11, 23).

44 IV. Ba me luo sabato fanete da’õ, ba arakha samba banua manõ andrõ zangondrasi, ba wamondrongo taroma li Zo’aya. 

45 Ba me la’ila niha sato andrõ niha Yehuda andrõ, ba tesao wa’afõkhõ dõdõra ba lafadaõ niŵa’õ Waulo, mamadaõ ba manandraŵa. (Tes. I. 2, 14—16).

46 Ba lamane ira Faulo Baranaba, lõ aiwõ ira: Lõ tola lõ te’ofõnai’õ khõmi wangombakha taroma li Lowalangi, ba me mitimba ia, me tenga si nangea mitema wa’auri si lõ aetu andrõ, miŵa’õ, ba hiza, ba masaŵa niha baero. (F. 3, 26; 28, 28. Mat. 10, 6; 21, 43; 22, 3—8). 

47 Si manõ sa ni’oroi’õ Zo’aya khõma: ”No ube’e haga niha baero ndra’ugõ, ena’õ fangorifi ndra’ugõ, irugi ba wondrege danõ”. (F. 1, 8. Yes. 49, 6). 

48 Ba me larongo da’õ niha baero, ba omuso dõdõra ba lasuno daroma li Zo’aya, ba mamati, ha wa’ato nihonogõi ba wanema fa’auri si lõ aetu. (Rom. 8, 29. 30). 

49 Ba te’ombakha’õ daroma li Zo’aya, ba danõ andrõ ma’asagõrõ. 

50 Ba lafarou niha Yehuda ndra alawe zalaŵa, sangata’ufi Lowalangi, awõ zalaŵa mbanua, ba tobali lagohi ndra Faulo Baranaba, lafofanõ ira ba danõra. (F. 14, 2; 17, 5). 

51 Ba ya’ira, ba la’anotogõ khõra gawugawu andrõ ba gahera, mõi ira ba Nikonia. (F. 18, 6. Mat. 10, 14). 

52 Ba fahõna ba nifahaõ wa’omuso dõdõ ba Eheha ni’amoni’õ.

 

HALÕŴÕ ZINENGE

FAZA 14

 

I. Fe’aso ndra Faulo Baranaba ba Nikonia, II. ba ba Lisitera. III. Fangawulira ba Gandriokhia.

1 I. Ba ba Nikonia, ba fao ira we’amõi ba zekola niha Yehuda, ba ba wangombakha’õra, ba faoma mamati, he niha Yehuda, ba he Dawa Heleni, ato ira. (F. 11, 20. 21). 

2 Ba lafarou dõdõ niha baero niha Yehuda si lõ molo’õ, lafabõrõ ba dalifusõ. (F. 13, 45. 50). 

3 Ba ara zui ma’ifu ira ba da’õ, lõ aiwõ ira wangombakha, bõrõ Zo’aya, samaduhu’õ taroma li fa’ebua dõdõnia; ibe’e khõra, lafazõkhi tangara dandra, awõ gila’ila. (Mar. 16, 20. Heb. 2, 4). 

4 Ba fabali dõdõ mbanua andrõ, so zi fa’awõ ba niha Yehuda, ba so zi fa’awõ ba zinenge. 

5 Ba me maoso dõdõ niha baero, awõ dõdõ niha Yehuda, fabaya salaŵara, ba wamakao ya’ira ba ba wanebu kara, (Tim. II. 3, 10. 11), 

6 ba me terongo khõra, ba moloi ira, lasaŵa mbanua Lika’onia, Lisitera ba Dareba, ba ba zi fasui andrõ. (Mat. 10, 23).

7 Ba da’õ la’ombakha’õ duria somuso dõdõ.

8 II. Ba so ba Lisitera niha, sidaodao, si tebai mofanõ, sombuyumbuyu tõla, moroi ba dalu ninania, alukhõ mowaõwaõ ia. (F. 3, 2 b. t.). 

9 Ba irongo, me fahuhuo Waulo. Ba inehegõ ia Faulo, i’ila, so khõnia wamati, wa tola dõhõ wõkhõnia, (Mat. 9, 28), 

10 ba imane, ebua linia: Atulõ’õ wezizio ba gaheu! Ba i’amarõga’õ ya’ia ba mowaõwaõ. (F. 3, 8). 

11 Ba me la’ila niha sato nilau Waulo, ba lamane ba li Lika’onia: No tobali fakhilikhili ndra Lowalangi ba niha, ba no mõi mitou khõda. (F. 28, 6). 

12 Ba labe’e tõi Mbaranaba Yufitero ba tõi Waulo, ba Merekuri, me ya’ia zi fahuhuo. 

13 Ba i’ohe ba mbawa gõli gõrõbao ba bunga ere Yufitero andrõ, si so ba ngai mbanuara, ba mõi awõnia niha sato, lafosumange ira ena’õ. 

14 Ba me larongo da’õ sinenge Baranaba ba Faulo, ba lasika nukhara, fagohi ira lasaŵa zato, mu’ao ira, lamane: 

15 He ya’ami, hana wa mimanõ? Niha gõi ndra’aga, si mane ya’ami, sangombakha khõmi turia somuso dõdõ, ena’õ mirõi waya andrõ, ba ena’õ mifuli ami khõ Lowalangi sauri, samazõkhi banua si yaŵa, awõ danõ, awõ nasi, awõ nõsi fefu; (F. 10, 26; 17, 23. 24. Tes. I. 1, 9); 

16 si no manehe ba gõtõ si no numalõ, latõrõ larara niha baero fefu; (F. 17, 30. Rom. 1, 24);

17 he ŵa’ae lõ ibini’õ ia, wanolo, wame’e khõmi teu moroi yaŵa ba baŵa sowua zinanõ, ba wangabuso tõdõmi õ ba fa’omuso dõdõ. (Rom. 1, 19 b. t. Yer. 5, 24. Mat. 5, 45). 

18 Ba me laŵa’õ da’õ, ba ha si’aikõ fanenaŵa sato, fa lõ lafosumange ira. 

19 Ba so niha Yehuda, si otarai Gandriokhia ba Ikonia, ba lafarou niha sato, ba latebu kara Waulo, ba lafondrõni hakhi baero mbanua, lawai no mate ia. (F. 13, 14. 50. Kor. II. 11, 25).

20 Ba me lafasui ia nifahaõ, ba maoso ia, mõi ia miyomo. Ba sara wongi aefa da’õ, ba mofanõ ia, awõ Mbaranaba, lasaŵa Ndrarebe.

21 III. Ba la’ombakha’õ duria somuso dõdõ ba mbanua andrõ, ba me no ato nibali’õra nifahaõ, ba lafuli ira ba Lisitera ba ba Nikonia ba ba Gandriokhia. 

22 La’a’aro’õ dõdõ nifahaõ, lafarou dõdõra, fa bõi labulõ’õ ira ba wamati; laŵa’õ khõra, lõ tola lõ oya zi gõna ita famakao ba lala ba mbanua Lowalangi andrõ. (F. 13, 43. Tim. II. 3, 12. Rom. 8, 17. Sin. 34, 20). 

23 Ba me no ladozigõ banua, wanutuyu satua khõra, ba mangandrõ ira ba mamoni, wanou’õ ya’ira ba danga Zo’aya, ba zamati ira. (F. 20, 28; 13, 3). 

24 Ba latõrõ Wizidia, lasaŵa Wambilia. 

25 Ba me no la’ombakha’õ daroma li ba Werege, ba mõi ira misi tou ba Gatalia. 

26 Moroi ba da’õ moloyo ira, lasaŵa Gandriokhia, ba nitou’õ ya’ira ba wa’ebua dõdõ Lowalangi, ba halõŵõ andrõ, nihalõra. (F. 13, 1—3; 15, 40). 

27 Ba me larugi, ba lafalukha’õ mbanua, la’ombakha’õ he iwisa Lowalangi khõra, awõ wa no ifolala ba wamati niha baero. (F. 21, 19). 

28 Ba ara ma’ifu ira ba da’õ, awõ ndra nifahaõ.

 

HALÕŴÕ ZINENGE

FAZA 15

 

I. Falukhata zinenge ba Yeruzalema; huhuo ba wamoto andrõ. II. Sura ba da’õ ba niha Keriso ba Gandriokhia. III. Fabali ira Mbaranaba Waulo.

1 I. Ba so zi mõi misi tou õsa moroi ba Yudaia, lafahaõ dalifusõ, lamane: Na lõ laboto ami, na lõ mi’o’õ huku Moze, ba tebai misõndra wa’auri andrõ. (Gal. 5, 1 b. t.). 

2 Ba me tobali fabali dõdõ, ba me tenga side’ide huhuo ndra Faulo Baranaba khõra, ba lahonogõi, mõi misi yaŵa ndra Faulo Baranaba ba awõra bõ’õ õsa, ba zinenge ba ba zatua, ba Yeruzalema, ba huhuo andrõ. (F. 11, 30). 

3 Ba ya’ira, me no lafasao ira banua, ba latõrõ Wõnikia ba Samaria, ladunõdunõ wolo’õ niha baero andrõ, omuso sibai dõdõ dalifusõ fefu labe’e. (F. 14, 27). 

4 Ba me larugi Yeruzalema, ba latema ira banua ba sinenge ba satua; ba la’ombakha’õ he wisa Lowalangi khõra. 

5 Ba maoso õsa zi faehu huku andrõ, farizaio, si no mamati, lamane: Lõ tola lõ laboto ira, ba lõ tola lõ laŵa’õ khõra, la’o’õ goroisa Moze. (F. 26, 5). 

6 Ba falukha ndra sinenge, awõ zatua, ba wame’e ba huhuo niŵa’õra andrõ. 

7 Ba me oya huhuo, ba maoso Wetero, ba imane khõra: He ya’ami, ira talifusõ, mi’ila, wa no ara sa’ae, me ihonogõi Lowalangi ba khõda, ena’õ khõgu larongo niha baero daroma li turia somuso dõdõ andrõ ba wamati. (F. 10, 20. 34 b. t.). 

8 Ba no ifaduhu’õ ira Lowalangi, sangila tõdõ niha, me ibe’e khõra Geheha ni’amoni’õ, si mane khõda gõi, 

9 ba ma’ifu lõ ifaehusi ira khõda, wangehao tõdõra famati andrõ. (F. 10, 15. 17. Rom. 10, 12). 

10 Ba iada’e, ba hana wa mitandraigõ Lowalangi, wangahare’õ kalo ba mbagi ndra nifahaõ, si tebai ta’ohe, he ira tuada mege, ba he ya’ita. (Gal. 3, 10. 20. Mat. 23, 4). 

11 Ba no faduhu dõdõda, wa moroi ba wa’ebua dõdõ Zo’aya, Yesu, wa te’orifi ita, ha sara lala, khõra gõi. (Rom. 3, 20 b. t. Efes. 2, 4—10). 

12 Ba lõ hedehede zato fefu, lafondrondrongo khõ Mbaranaba ba khõ Waulo, sanutunõ ha wa’oya nifazõkhi Lowalangi tandra ba ila’ila tangara, ba niha baero. 

13 Ba me no labato wehede, ba itema lira Yakobo, imane: He ya’ami, ira talifusõ, mifondrondrongo khõgu! (F. 21, 18). 

14 No idunõdunõ Simoni, wa no i’ofõnai’õ Lowalangi wamaigi soi andre, si ha sambua, nituyu ba niha baero, ba dõinia andrõ. 

15 Ba si faudu da’õ niŵa’õ zama’ele’õ, si mane si so ba zura: (Amos. 9, 11. 12). 

16 ”Aefa da’õ, ba ufulido, ba ufuli u’otomosi nose Dawido andrõ, si no aso’a, ufuli u’otomosi zadudunia, ufuli u’a’azõkhi ia, 

17 ena’õ la’alui Zo’aya si tosai niha, fefu soi, ba zi no mutõtõi tõigu, iŵa’õ So’aya, 

18 samarongogõ da’õ i’otarai gõtõ fõna sa’ae.” 

19 Andrõ, ni’ŵa’õgu, tenga nifakao zolo’õ andrõ khõ Lowalangi, niha baero, ba tafazõkhi zura khõra, 

20 ena’õ bõi lababaya wana’unõi ya’ira ba nadu andrõ, ba fohorõ, ba nitõgi bagi, ba do. (F. 21, 25. Kor. I. 10, 7. 8. Tes. I. 4, 3 b. t. Moz. III. 17, 10—16. Moz. I. 9, 4).

21 I’otarai mbõrõta, ba dozi banua, ba so sa khõ Moze zangombakha ya’ia, me labasobaso ba zekola, ero na luo sabato. (F. 13, 15).

22 II. Ba omasi ndra sinenge, awõ zatua, awõ mbanua fefu, latutuyu niha ba khõra, nifatenge ba Gandriokhia, awõ ndra Faulo Baranaba, Yuda andrõ, sotõi Barasaba, ba Sila satua dalifusõ. 

23 Lafa’ohe’õ khõra zura, lamane: ”Lafahowu’õ sinenge ba talifusõ satua dalifusõ andrõ ba Gandriokhia ba ba Ziria ba ba Gilikia, si no niha baero mbõrõta. 

24 Me no marongo, no lafawukaisi dõdõmi huhuora õsa, si otarai ba khõma, lõ sõkhisõkhi dõdõmi labe’e, si lõ oroisama; (F. 15, 1. Gal. 1, 7; 2, 4), 

25 andrõ maŵa’õ, me no ha sara dõdõ, matutuyu niha nifatenge khõmi, awõ zomasiga andrõ, Baranaba, ba Faulo andrõ, 

26 niha si no mangositengagõ nosora, bõrõ dõi Zo’aya ya’ita andrõ, Yesu Keriso. (F. 14, 19). 

27 Ba no mafatenge ndra Yuda Sila, sangombakha gõi khõmi, si manõ gõi. 

28 Noa sa omasi Geheha ni’amoni’õ ba ya’aga gõi, bõi sa’ae lafonoro ami, baero zi lõ tola lõ’õ andrõ: 

29 Fa bõi mibabaya gõ nadu, ba do, ba nitõgi bagi, ba fohorõ; na lõ mibabaya da’õ, ba ohahau dõdõmi, Ya’ahowu ami!” (Kor. I. 8. Moz. II. 34, 15 b. t. Fam. 2, 14. 29). 

30 Ba me no lafofanõ ira, ba mõi ira misi tou ba Gandriokhia, lafalukha’õ zato ba labe’e ba dangara zura andrõ. 

31 Ba me no labaso, ba omuso dõdõra, ba wondrara dõdõ andrõ. 

32 Ba oya huhuo ndra Yuda Sila fondrara dõdõ ba fangarõ dõdõ dalifusõ, me no sama’ele’õ ira gõi. (F. 14, 22). 

33 Ba me no ara ma’ifu ira, ba lafofanõ ira talifusõ ba zamatenge ya’ira, lafahowu’õ ira.

34 Ba omasi Zila, torõi ia.

35 III. Ba la’iagõ Gandriokhia ira Faulo Baranaba, mamahaõ ira ba mangombakha taroma li Zo’aya, ba ato na nawõra bõ’õ. 

36 Ba lõ ara, ba imane Faulo khõ Mbaranaba: Tafuli ita, tafaigi dalifusõ tadozigõ banua misa, ba ni’ombakha’õda taroma li Zo’aya; he wisa ira. 

37 Ba omasi Mbaranaba la’ohe awõra gõi Yohane andrõ, sotõi Mareko. (F. 12, 25. Kol. 4, 13). 

38 Ba niŵa’õ Waulo, tenga si nangea, na la’ohe awõra zi no fabali khõra no, ba Wambilia, si lõ mõi awõra ba halõŵõ no. (F. 13, 13). 

39 Ba tobali faoma mõfonu ira khõ nawõra, irege fabali ira, ba i’ohe awõnia Mareko andrõ Baranaba, moloyo ira, lasaŵa Gifero. (Tim. II. 4, 11). 

40 Ba i’ohe Zila Faulo, ba mofanõ, me no latou’õ ia ba wa’ebua dõdõ Lowalangi talifusõ. (F. 14, 26; 15, 22). 

41 Ba itõrõ Ziria ba Kilikia, i’a’aro’õ dõdõ mbanua Yesu. (F. 12, 22).

 

HALÕŴÕ ZINENGE

FAZA 16

I. I’ohe Dimoteo Faulo. II. Isaŵa Makedonia. III. Folo’õ Lidia andrõ. IV. Folo’õ zanaro ba gurunga andrõ.

1 I. Ba irugi si tou Ndrarebe ba Lisitera, ba hiza, so ba da’õ nifahaõ, Timoteo dõi, niha Yehuda ninania, samati, ba Dawa Heleni namania. (F. 19, 22. Rom. 16, 21. Tim. I. 1, 2. Tim. II. 1, 5; 3, 14). 

2 Sõkhi duriania ba dalifusõ, ba Lisitera ba ba Nikonia. (Tes. I. 3, 2). 

3 Ba omasi Waulo, na mõi awõnia da’õ. Ba ihalõ, iboto, bõrõ niha Yehuda, si so ba mbanua andrõ, oi dozi sa la’ila, wa Dawa Heleni namania. (Kor. I. 9, 19 b. t. Gal. 2, 3). 

4 Ba me latõrõi mbanua, ba lafa’ema khõra goroisa andrõ, ni’o’õ, nihonogõi zinenge ba satua, ba Yeruzalema. (F. 15, 23—30). 

5 Ba itugu sa aro dõdõ mbanua, wamati, ba ero ma’õkhõ tedou wa’atora. (F. 14, 22; 4, 4). 

6 Ba latõrõ Wirigia, awõ danõ Galatia, me no itenaŵa ira Eheha ni’amoni’õ, fa bõi ba Azia la’ombakha’õ daroma li. (F. 18, 23). 

7 Ba me larugi tánõ ba Mizia, ba latandraigõ we’amõi ba Mbitinia, ba lõ ifa’amõi ira Eheha Yesu.

8 Ba lahene Mizia, larugi si tou Deroa.

9 II. Ba oroma khõ Waulo gangilata, ba zi bongi, Dawa Makedonia. So ia, mangandrõ ia khõnia, imane: Ae si yefo, ba Makedonia, orifiga. (F. 18, 9; 9, 12. Tim. I. 2, 4). 

10 Ba me aefa i’ila gangilata andrõ, ba i’anema’õ ma’alui we’amõi ba Makedonia, me masõndra tõdõma, Lowalangi zogaoni ya’aga, ba wangombakha turia somuso dõdõ khõra. 

11 Moloyo ndra’aga, marõi Deroa, madõlõga ba Zamoterake, ba mahemolu õ, ba marugi Neafoli. 

12 Moroi ba da’õ masaŵa Wilifi, sebua mbanua ba Makedonia tánõ andrõ, banua nifataro. Ba ara ma’ifu ndra’aga ba mbanua andrõ.

13 Ba me luo sabato, ba mõiga baero mbanua, ba zinga nidanõ, ba da’õ mõi ira mangandrõ maŵa’õ, ba dumadaoga, fahuhuoga ba ndra alawe, si no mõi ba da’õ. (F. 17, 4. 12).

14 III. Ba ifondrondrongo ira alawe, Lidia dõi, saniaga baru luo, banua Diatira, sangata’ufi Lowalangi; ba ibokai dõdõnia So’aya, fa lõ olifu ia, niŵa’õ Waulo. (F. 13, 16. Tes. I. 2, 13. Luk. 8, 15).

15 Ba me no tebayagõ idanõ ia awõ zoroiyomonia, ba mangandrõ ia khõma, imane: Na ba dõdõmi, samati khõ Zo’aya ndra’odo, ba mi’ae yomo ba nomogu, mi’iagõ da’õ, ba iforege wanguma’õ khõma. (F. 16, 31. 34).

16 IV. Ba me mõiga mangandrõ ba falukhaga zawuyu ono alawe, si so bekhu waetasa, ebua lasõndra sokhõ ya’ia ibe’e, ba waetasania andrõ. (Sam. I. 28, 7). 

17 Ba i’o’õga, ira Faulo ndra’aga, mu’ao ia, imane: Enoni Lowalangi Fondrege zalaŵa niha andrõ, sangombakha khõmi lala wangorifi. 

18 Ba ara si manõmanõ ia. Ba mofõnu Waulo, ibali’õ ia, imane ba mbekhu andrõ: Uŵa’õ khõu, ba dõi Yesu Keriso, heta’õ khõnia. Ba i’anema’õ iheta ia. (Mar. 1, 34; 16, 17). 

19 Ba me la’ila sokhõ ya’ia, no aheta mbõrõ wangaluira andrõ, ba lara’u ndra Faulo Sila, ladõni ba kade ba zalaŵa. (F. 15, 40). 

20 Ba la’ohe khõ gumandru, lamane: Lafakuyu khõda mbanua niha andre, ba no niha Yehuda ira; (F. 17, 6 b. t. Amos. 7, 10); 

21 la’ombakha’õ huku si lõ tola tatema, si lõ tola ta’o’õ, me Dawa Roma ita. 

22 Ba maoso gõi niha sato khõra; ba laheta khõra nukhara ira kumandru ba laŵa’õ, labõzi. (Kor. II. 11, 25. Tes. I. 2, 2). 

23 Ba me no laforege wamõzi ya’ira, ba lakuru, laŵa’õ khõ zanaro ba gurunga, ihaogõ wanaro ya’ira. 

24 Ba me no irongo goroisa andrõ, ba ibe’e ira ba gurunga tánõ bakha, ikalo gahera. (F. 12, 4). 

25 Ba mato talu mbongi, ba mangandrõ Waulo, awõ Zila, lasuno Lowalangi, ba lafondrondrongo khõra nikuru. (F. 5, 41). 

26 Ba i’ozumagõ so ndruru sabõlõbõlõ, irege dumõgõdõgõ latalata gurunga. Ba i’anema’õ teboka mbawandruhõ fefu, ba oi’dozi aefa rate khõra. 

27 Ba me tokea zanaro ba gurunga, me i’ila, no teboka mbawandruhõ gurunga, ba isõbi wõda, ibunu ia ena’õ, iwai no moloi nikuru. 

28 Ba mu’ao Waulo, ebua linia, imane: Bõi fakiko’õ, dozi sa so ndra’aga ba da’e! 

29 Ba iŵa’õ wandru, isaŵa si bakha, fagohi, ituhi danõ, fõna ndra Faulo Sila, manizinizi, 

30 ba ifasao ira baero, imane: He uwisa, Tua, fa usõndra wangorifi? (F. 2, 37). 

31 Ba lamane: Amati khõ Zo’aya, Yesu, ba te’orifi ndra’ugõ, awõ zoroiyomou fefu.

32 Ba la’ombakha’õ khõnia daroma li Zo’aya ba ba si so ba nomonia fefu. 

33 Ba ihalõ ira, ba da’õ sibai, ba zi bongi, isasai khõra zesokho ba wamõzi andrõ, ba i’anema’õ tebayagõ idanõ ia, awõ zoroiyomonia fefu. 

34 Ba i’ohe ira yomo, ibe’e gõra, ba owuawua dõdõnia, me no samba omo manõ ira mamati ba Lowalangi. 

35 Ba me no moluo, ba lafatenge wazuri ira kumandru, lamane: Efa’õ niha andrõ! 

36 Ba i’ombakha’õ sanaro ba gurunga lira andrõ khõ Waulo, imane: No lafatenge ira kumandru, ena’õ la’efa’õ ami. Ba iada’e, ba mi’ae baero, mi’ofanõ, ya’ohahau dõdõmi! 

37 Ba imane khõra Faulo: No labõzi ndra’aga, ba zanehe niha, lõ musekhegõ, he ŵa’ae banua Roma ndra’aga, ba no lakuru ndra’aga, ba hadia, labini’õ iada’e wamofanõ ya’aga? Bõi sa! Ndramõi sa’ae, ya’ira andrõ, ba wangefa’õ ya’aga. 

38 Awena la’ombakha’õ fazuri khõ ndra kumandru niŵa’õra andrõ. Ba ata’u ira, me larongo, wa banua Roma ira; ba mõi ira, la’o’ou, 

39 la’ohe baero, la’andrõ khõra, laheta ira ba mbanuara. 

40 Ba me no larõi gurunga, ba mõi ira khõ Lidia andrõ; ba me la’ila dalifusõ, ba lafarou dõdõra, ba mofanõ ira.

 

HALÕŴÕ ZINENGE

FAZA 17

 

I. Ba Desalonika so Waulo ba II. ba Mberoia ba III. ba Natena.

1 I. Ba me no latõrõ Gambifoli, awõ Gafolonia, ba larugi Desalonika, ba zi so sekola niha Yehuda. (Tes. I. 2, 2). 

2 Ba me no huku Waulo zi manõ, ba mõi ia bakha khõra, ba tõlu sabato lahuhuo’õ zi so ba zura. 

3 Ibokai khõra, i’oroma’õ khõra, wa lõ tola lõ tefakao Keriso ba maoso moroi ba ngai zi mate, awõ wa da’õ Keriso, Yesu andrõ, ni’ombakha’õgu khõmi, iŵa’õ. (Luk. 24, 27. 45). 

4 Ba so õsa ba khõra zi faduhu tõdõ, ba faofao ira khõ ndra Faulo Sila, ba ato gõi Ndraŵa Heleni, sangata’ufi Lowalangi, ba ira alawe zalaŵa, ato. 

5 Ba mofõnu niha Yehuda, lahalõ awõra niha si lõ halõŵõ, õsa, niha si lõ sõkhi, la’ekhugõ niha, lafawukaisi dõdõ mbanua, lasaŵa nomo Yaso andrõ, la’alui ira, la’ohe ba niha sato ena’õ. 

6 Ba me lõ lasõndra ira, ba lasõbi ba zalaŵa mbanua Yaso andrõ, awõ dalifusõ õsa, mu’ao ira, lamane: ”No mõi ba da’e gõi niha andrõ, samawukaisi õsi guli danõ ma’afefu! (F. 16, 20). 

7 Ba no ifa’amõi ira baomo khõnia Yaso, tomenia, ba dozi ira, ba lasaŵõ goroisa kaizaro, wanguma’õ, tánõ bõ’õ razo, Yesu andrõ.” (Luk. 23, 2). 

8 Ba tobali dõdõ zato, labe’e, awõ dõdõ zalaŵa, samondrongo da’õ.

9 Ba me no lafali’õ ira khõra Yaso ba awõnia, ba la’efa’õ da’õ.

10 II. Ba la’anema’õ talifusõ, lafofanõ ba Mberoia ndra Faulo Sila, ba zi bongi; ba me larugi, ba mõi ira ba zekola niha Yehuda. 

11 Ba si sõkhi tõdõ da’õ, moroi ba zi so ba Desalonika, omasi ira lafondrondrongo daroma li, ero ma’õkhõ la’alu’alui ba zura, na si ndruhu. (Yoh. 5, 39). 

12 Ba ato ba khõra zamati, ato gõi ma’ifu zalaŵa Ndrawa Heleni, ira alawe ba ira matua. 

13 Ba me larongo niha Yehuda, ba Desalonika, wa ba Mberoia gõi i’ombakha’õ li Lowalangi Faulo, ba mõi ira, lafawukaisi dõdõ zato ba da’õ gõi, lafakuyu. (Tes. I. 2, 15). 

14 Ba la’anema’õ lafofanõ Waulo talifusõ, ena’õ isaŵa mbewe nasi; ba torõi furi ba da’õ Zila ba Timoteo. (F. 16, 1).

15 Ba lafasao Waulo awõnia, irugi Natena, ba i’oroi’õ khõra, laŵa’õ khõ ndra Sila Timoteo, ena’õ lata’ita’i, we’amõi khõnia, ba mofanõ ira.

16 III. Ba me ibalobaloi ira ba Natena Faulo, ba mofõnu bakha dõdõnia, me i’ila, no fahõna nadu ba mbanua. 

17 Andrõ fahuhuo ia ba zekola ba niha Yehuda, ba ba zangata’ufi Lowalangi, ba ba kade, ero ma’õkhõ, ba zi so ba da’õ. 

18 Ba falukha khõnia gõi õsa wilosofo, efikuraio ba sito’iko, ba lamane õsa: Hadia niŵa’õ zi faweawea andrõ? Ba so zanguma’õ: Hulõ na sangombakha Lowalangi bõ’õ ia; me i’ombakha’õ khõra Yesu ba femaoso zi mate andrõ. (Kor. I. 4, 12). 

19 Ba lasõbi ia, la’ohe ba hilihili Garesi, lamane: Hadia, tola marongo, hadia huku si bohou andrõ, ni’ombakha’õu? 

20 Si bohou sa õfarongogõ khõma, andrõ omasiga, marongo, hadia ia. 

21 Awai sa zomasi mbanua Natena andrõ fefu, awõ niha bõ’õ, si no fatewu khõra, ha fangombakha ba famondrongo si bohou so. 

22 Ba ba dalu hilihili Garesi so Waulo, ba imane: He ya’ami, banua Natena! oroma manõ khõgu, wa no sabõlõ mangata’ufi Lowalangi ami. 

23 Me utõrõi wamaigi sibai nifosumangemi, ba noa sa usõndra gõi naha wame’e sumange, nisura yaŵa: ”Khõ Lowalangi si lõ ta’ila.” Ba ni’ata’ufimi andrõ, he lõ mi’ila ia, da’õ ni’ombakha’õgu khõmi. 

24 Lowalangi andrõ, samazõkhi danõ’a ba õsinia, fefu, ba lõ i’onahia gosali nifazõkhi tanga niha, me no So’aya sorugo ia, ba So’aya tanõ; (F. 7, 48); 

25 tebai gõi tefosumange ia tanga niha, hulõ na moguna khõnia hadia ia, me no ya’ia zame’e ba niha fefu noso ba hanuhanu, awõ fefu hadia ia. (Sin. 50, 8. 9). 

26 Ba moroi khõnia wa no dumadao fefu soi niha ba guli danõ ma’asagõrõ, si ha sambua bõrõta; ba no i’õtõ khõra mbongi, no ihõnagõ ihonogõi, awõ nola nahara andrõ. (Moz. V. 32, 8). 

27 Ena’õ la’alui Lowalangi, ma atõ la’ila lababaya ia ba lasõndra, me lõ’õ sa atõ arõu ia khõda fefu; ba khõnia sa auri ita, 

28 ba khõnia maliŵaliŵa ita, ba khõnia so ita, si mane niŵa’õ zanunõ õsa khõmi gõi: ”Nga’õtõnia sa ita.” 

29 Ba me no nga’õtõ Lowalangi ita, ba lõ tola taŵa’õ tõtõda, no fakhilikhili Lowalangi ba gana’a, ba ma ba wirõ, ba ma ba gara, ba wamaedo nifazõkhi niha, ba wa’atukania ba ba nisõndra dõdõnia. (Moz. I. 1, 27. Luk. 24, 47).

30 Ba noa sa i’osilõmilagõ Lowalangi gõtõ me lõ la’ila watahõgõ niha, ba iada’e, ba iŵa’õ ba niha fefu wamalalini era’era, 

31 gofu heza so ira, me no i’õtõ mbongi, ba nihukunia dania õsi guli danõ, i’atulõ’õ wanguhuku, so zanguhuku, si no ihonogõi, wangoro’õ famati ba niha fefu, wanusugi ya’ia moroi ba ngai zi mate. (Rom. 10, 14). 

32 Ba me larongo wemaoso zi mate andrõ, ba so za’iki õsa, ba so gõi zanguma’õ: Mafuli mafondrondrongo na khõu da’õ. 33 Ba iheta ia khõra Faulo. 

34 Ba lõ larõi ia ira matua õsa ba mamati, samõsa gõi Dionizio, salaŵa rafe ba hilihili Garesi andrõ, ba samõsa ndra alawe, Damari dõi, ba so dánõ bõ’õ na, awõra.

 

HALÕŴÕ ZINENGE

FAZA 18

 

I. Ba Gorindro so Waulo. II. Mofanõ ia, isaŵa Nefeso ba Andriokhia. III. Afolo andrõ, ba Nefeso.

1 I. Aefa da’õ irõi Natena Faulo, mõi ia ba Gorindro. 

2 Ba falukha ia niha Yehuda, Akila dõi, banua Wondro mbõrõta; bohou na me i’otarai Gitalia, awõ wo’omonia, Ferikila dõi, me no ibe’e goroisa kaizaro Kalaudio, laheta ira ba Roma niha Yehuda fefu; ba mõi ia khõra. (Rom. 16, 3). 

3 Ba me no faoma halõŵõra, ba i’iagõ khõra, ba mohalõhalõŵõ ira; sanoso oloso nose ira. (F. 20, 34. Kor. I. 4, 12). 

4 Ba fahuhuo ia ba zekola, ero na luo sabato, ifaduhu’õ dõdõ niha Yehuda, awõ dõdõ Ndrawa Heleni. 

5 Ba me so Zila ba Timoteo, si otarai Makedonia, ba lõ aefa Waulo ba wamahaõ, wamaduhu’õ ba niha Yehuda, wa Keriso Yesu. (F. 17, 14. 15). 

6 Ba me mamadaõ ira ba me manandraŵa, ba i’anotogõ nukhania, imane khõra: Yamõi ba hulumi ndromi! Aefado; i’otarai da’e, ba mõido ba niha baero. (F. 13, 15; 20, 26). 

7 Ba mofanõ ia ba da’õ, isaŵa nomo niha, sotõi Titio Yuso, sangata’ufi Lowalangi, si no fasinga ba nomo zekola nomonia. 

8 Ba mamati khõ Zo’aya Gerifo, satua zekola, awõ zoroiyomonia fefu; ba ato mbanua Gorindro, samondrongo, mamati ba lafabayagõ’õ idanõ ira. 

9 Ba imane So’aya ba zi bongi, ba gangilata, khõ Waulo: Bõi ata’ufi! hede manõ ba bõi bato, 

10 me faofao ndra’o khõu, ba lõ sombambaya ya’ugõ, ba wamakao ya’ugõ, me no ato khõgu niha ba mbanua da’e. (Yer. 1, 18. Hos. 2, 23. Yoh. 10, 16). 

11 Ba dõfi a matonga i’iagõ da’õ, wamahaõ ya’ira ba daroma li Lowalangi. 

12 Ba me kumandru ba Nakhaya Galio, ba maoso niha Yehuda, ba khõ Waulo, ha sara dõdõ, la’ohe ia ba gõdo, 

13 lamane: Lõ i’o’õ goroisa da’e wondrõnisi niha ba wangata’ufi Lowalangi. 

14 Ba me muhede ena’õ Waulo, ba imane Galio ba niha Yehuda: Na so hadia ia zi lõ atulõ, ba ma hadia ia horõ, ya’ami, niha Yehuda, ba lõ zi lõ ufondrondrongo khõmi. (F. 25, 18. 19). 

15 Ba na fasosota ba wamahaõ ba ba dõi niha ba ba goroisa andrõ khõmi, ba ya’ami zamaigi; lõ edõnado uhuhuo’õ zi manõ. (Yoh. 18, 31). 

16 Ba ifofanõ ira ba gõdo.

17 Ba dozi lara’u Zotene, satua zekola, ba labago ia ba gõdo; ba lõ’õ manõ ihalõ khõnia Galio.

18 II. Ba me no ara na ma’ifu Waulo, ba i’angonasi dalifusõ ba moloyo, isaŵa danõ Ziria ba awõnia Werikila andrõ ba Akila, me no itõwõ mbunia ba Gengerea; so gamabu’ula linia. (F. 21, 24. Moz. IV. 6, 9. 18). 

19 Ba irugi Nefeso, ba irõi ira ba da’õ, ba ya’ia, ba mõi ba zekola ba fahuhuo ba niha Yehuda. 

20 Ba me la’andrõ i’aragõ ia ba da’õ, 

21 ba lõ i’o’õ; i’angonasi sa ira ba imane: Ufulido zui khõmi, na omasi Lowalangi; ba moloyo ia, irõi Nefeso. (Kor. I. 4, 19. Yak. 4, 15). 22 Ba me no irugi si tou Kaizaria, ba mõi ia misi yaŵa, i’owai mbanua, ba mõi ia misi tou ba Gandriokhia. (F. 21, 15).

23 Ba me no ara ia ma’ifu ba da’õ, ba mofanõ ia, ifadoro wanõrõ tanõ Galatia ba Ferigia, wanga’aro’õ tõdõ nifahaõ fefu.

24 III. Ba mõi ba Nefeso niha Yehuda, banua Alesandria mbõrõta, Afolo dõinia, niha satutua, sabõlõ ba zura. (Kor. I. 3, 6). 

25 No tefahaõ ia ba lala Zo’aya; ba me no satarõ tõdõ ia, ba fahuhuo ia, i’ombakha’õ sibai hadia ia khõ Zo’aya, Yesu, ba ha famayagõ idanõ andrõ khõ Yohane nirongonia. 

26 Ba ibõrõtaigõ mangombakha ba zekola, lõ aiwõ. Ba me no larongo ia Ferikila andrõ ba Akila, ba la’ohe ia khõra ba lahaogõ na wamotokhi khõnia huku Lowalangi. 

27 Ba me edõna isaŵa Nakhaya, ba lafarou dõdõ nifahaõ talifusõ, lafa’ohe’õ zura, ena’õ lafa’amõi ia khõra. Ba me no irugi, ba itolo sibai zi no mamati, ba wa’ebua dõdõ andrõ; 

28 noa sa abõlõ ia wamu’a niŵa’õ niha Yehuda, ba zanehe niha sato, ba i’oroma’õ moroi ba zura, wa Keriso Yesu. (F. 9, 22; 17, 3).

 

HALÕŴÕ ZINENGE

FAZA 19

 

I. Ba Nefeso so Waulo. II. Tandra, nifazõkhinia ba da’õ. III. I’ekhugõ khõnia niha Demeterio andrõ.

1 I. Ba tobali me so ba Gorindro Afolo, ba irugi si tou Nefeso Faulo, no itõrõ yaŵa danõ andrõ, ba isõndra nifahaõ õsa, 

2 ba imane khõra: Hadia, no mitema Geheha ni’amoni’õ, me awena mamati ami? Ba lamane khõnia: Lõ nirongoma na i so Geheha ni’amoni’õ. (F. 10, 44).

3 Ba imane khõra: Ba hadia sa dandrõsa, ba nibayagõ idanõ ya’ami? Ba lamane: Famayagõ idanõ khõ Yohane andrõ. 

4 Ba imane Faulo: Famayagõ idanõ ba wamalalini era’era wamayagõ idanõ andrõ khõ Yohane, ba no iŵa’õ ba niha wamati khõ zi so furinia dania, famati khõ Yesu. (Mat. 3, 11). 

5 Ba me larongo da’õ, ba lafabayagõ’õ idanõ ira ba dõi Yesu, So’aya. 

6 Ba me no itufa hõgõra Faulo, tangania, ba mõi khõra Geheha ni’amoni’õ, molau li bõ’õ ira ba mama’ele’õ. (F. 8, 17; 10, 44. 46). 

7 So mato felendrua fefu, ndra matua. 

8 Ba mõi ia ba zekola, lõ aiwõ ia muhede, mato tõlu waŵa wa’ara fahuohuo ia ba ifaduhu’õ dõdõra ba ngawalõ mbanua Lowalangi andrõ. 

9 Ba me so õsa zangabe’e’õ tõdõra, si lõ mamati, sango’aya lala andrõ, ba niha sato, ba iheta ia khõra, i’oniagõ ndra nifahaõ, ba ero ma’õkhõ fahuhuo ia ba zekola Dirano. (Tim. II. 1, 15. F. 9, 2).

10 Ba mendrua fakhe zi manõ, tobali ahori larongo li Zo’aya banua Azia andrõ, niha Yehuda ba Dawa Heleni.

11 II. Ba tenga side’ide dandra nifasõkhi Lowalangi tanga Waulo; (F. 14, 3); 

12 irege labalugõ gõi zofõkhõ saefu tanga ba lembe moroi ba nõsinia, ba dõhõ wõkhõ ba aheta mbekhu si lõ sõkhi. (F. 5, 15). 

13 Ba latandraigõ gõi samofanõ bekhu, niha Yehuda, sanõrõnõrõi tanõ, õsa, wanõtõi tõi Yesu, So’aya, ba zi so bekhu si lõ sokhi, lamane: Ufõfanõ ami, ba dõi Yesu, ni’ombakha’õ Waulo andrõ. (Luk. 9, 49). 

14 Dafitu ira, ono gere sebua ba niha Yehuda sotõi Sikoia, zolau da’õ.

15 Ba itema lira bekhu si lõ sõkhi andrõ, imane khõra: Aboto sa ba dõdõgu Yesu, ba u’ila Waulo andrõ, ba ya’ami, ba ha niha ami? 

16 Ba isaŵa ira niha andrõ, si so bekhu si lõ sõkhi andrõ, ilaŵa ira, darua, ibago, irege moloi ira, larõi nomo andrõ; no aheta nukha ba no mesokho ira. 

17 Ba terongo da’õ ba niha Yehuda sato ba ba Ndrawa Heleni, banua Nefeso, ba ihawui ira fefu fa’ata’u, ba tesuno sibai dõi Yesu, So’aya. (F. 5, 5. 11). 

18 Ba ato zi mõi, si no mamati, ba wamokai buabuara; la’ombakha’õ. 

19 Ba ato zi no molau fayafaya mangowuloi sura andrõ ba latunu, ba zanehe zato, ba la’ofaya mbõlinia, ba lasõndra, dua wulu a lima ngahõnõ ba rufia. 

20 Ba ba wa’abõlõ Zo’aya andrõ, ba monõnõnõnõ daroma li, ba abõlõ. (F. 6, 7).

21 Ba me awai da’õ, ba iŵa’õ tõdõnia Faulo, itõrõ Makedonia ba Akhaya, we’amõi ba Yeruzalema, imane: Na aefado ba da’õ, ba lõ tola lõ u’ila Roma gõi. (F. 23, 11).

22 Ba ifowaõwaõ ba Makedonia dohutohu dangania andrõ, darua, Timoteo ba Eraso, ba tebato ia na ma’ifu ba Azia. (F. 17, 14. Rom. 16, 23).

23 III. Ba tesao waguaguasa sabõlõbõlõ ma’ifu, me luo da’õ, ba huku andrõ. (A. 9. Kor. II. 1, 8). 

24 So niha, tuka wirõ, Demeterio dõinia, samazõkhi famaedo gosali Garitemi andrõ, firo, tenga side’ide wangalui nawõnia tuka ibe’e. (F. 16, 1). 

25 Ba ifalukha’õ ira, awõ zi so halõŵõ ba da’õ, ba imane: Mi’ila, ya’ami andre, ba halõŵõ andrõ moroi mbalazoda, 

26 ba anehe ami ba mirongo, tenga ha ba Nefeso, arakha ba danõ Azia ma’asagõrõ sa’ae, ba ato nidõnisi Waulo andrõ niha, nifa’eronia khõda, wanguma’õ tenga Lowalangi nifazõkhi danga niha. 

27 Ba tenga ha si sambalõ andrõ zata’u ita, wa lõ laku nifazõkhida andrõ, lõ’õ gõi ba dõdõra gosali Lowalangi ira alawe sebua andrõ, Aritemi, ba dania, ba tetayaigõ gõi wa’asalaŵania õsa, ni’ata’ufi mbanua Azia fefu, awõ niha fefu, ba guli danõ ma’asagõrõ. 

28 Ba me larongo da’õ, ba mofõnu sibai ira, mu’ao ira, lamane: Ebua Garitemi mbanua Nefeso andrõ! 

29 Ba samba banua manõ fawuka dõdõ, ba ha sara dõdõ wanaŵa omo maimai, fagohi ira ba lasõbi khõra ndra Gayo Arisaro, banua Makedonia, awõ Waulo. (F. 20, 4. Kor. II. 1, 8. 9). 

30 Ba mõi ena’õ Waulo ba niha sato, ba lõ lafofanõ ia nifahaõ. 

31 Ba lafatenge gõi khõnia salaŵa Azia, si no fahuwu khõnia, la’andrõ khõnia, bõi yamu’oroma’õ ia ba nomo maimai. 

32 Ba bõ’õ sa niŵa’õ zi samõsa, bõ’õ niŵa’õ zi samõsa, we’ao’ao; noa sa fawuka manõ dõdõ zowulo andrõ, ba sato, ba lõ la’ila, hana wa owulo ira. 

33 Awena laŵa’õ Alesandro, ba hunõ niha sato, nilulugõ niha Yehuda ia. Ba ifazaŵa dangania Alesandro, muhede ena’õ ia ba niha sato, ibu’a ena’õ. 

34 Ba me larongo wa niha Yehuda ia, ba ha sara li zato, mato dua za wa’ara, mu’ao ira: Ebua Garitemi mbanua Nefeso andrõ! 

35 Ba ihonogõ ira durutuli, ba imane: He ya’ami, banua Nefeso! Ha niha sa zi lõ mangila, wa banua Nefeso zondrorogõ osali Garitemi sebua andrõ, awõ zatoru andrõ moroi ba mbanua si yaŵa? 

36 Ba me tebai niwu’ai da’õ, ba sahono ami ena’õ, ba bõi mida’ida’i wolau hadia ia. 

37 Noa sa mi’ohe ba da’e niha andrõ, ba tenga sorabu gamagama ba gosali ira, ba tenga gõi sango’aya Lowalangimi. 

38 Ba na so sa, ha niha ia, ni’adugõ Demeterio ba awõnia tuka andrõ, ba lalau rafe ba so gumandru, faoma ndramu’adugõ nawõra. 

39 Ba na so hadia ia, ba mbõ’õnia, niŵa’õmi, ba la’asiwai ia ba walukhata satulõ. 

40 Ata’u sa ita, labõbõgõ khõda wolaŵa salaŵa, la’adugõ ita, bõrõ ma’õkhõ andre, me lõ khõda bõrõ wamu’a salada ba wa’aekhu niha andre. 

41 Ba me aefa iŵa’õ da’õ, ba ifofanõ zowulo andrõ.

 

HALÕŴÕ ZINENGE

FAZA 20

 

I. Itõrõ Makedonia Faulo, isaŵa Wilifi. II. Isusugi Oitikho andrõ ba Deroa. III. I’angonasi zatua mbanua Nefeso, ba Mileti.

1 I. Ba me no muhonogõ waguaguasa andrõ, ba ifakaoni’õ khõnia nifahaõ Faulo ba ifarou dõdõra, ba me no i’angonasi ira, ba mofanõ ia, ba we’amõi ba Makedonia. 

2 Ba itõrõ danõ tánõ ba da’õ, ba oya niŵa’õnia khõra famarou dõdõ, ba irugi danõ Hela. 

3 Ba tõlu waŵania ba da’õ. Ba me lafagõnaisi ia niha Yehuda, me moloyo ia ba Ziria mena’õ, ba iŵa’õ tõdõnia, sõkhi na itõrõ Makedonia wangawuli. 

4 Ba awõnia Zofatera, ono Wiro, banua Mberoia ba Arisaro ba Sekundro, banua Desalonika, ba Gayo, banua Ndrarebe, ba Timoteo, ba moroi ba Azia, ba Tikhiko ba Terofimo. (F. 17, 10; 19, 29).

5 Ba mowaõwaõ da’õ ba labaloi ndra’aga ba Deroa. (F. 16, 8).

6 Ba me aefa mbaŵa roti si lõ mu’aisõni andrõ, ba moloyo ndra’aga, marõi Wilifi, ba lima bongi ndra’aga, ba makhamõ ira ba Deroa, ba fitu bongima ba da’õ.

7 II. Ba me luo migu, me owulo ndra’aga, ba wamoboto roti, ba fahuhuo Waulo khõra, sara wongi aefa õ edõna mofanõ ia; ba i’aragõ huhuonia, irege talu mbongi. (Kor. I. 16, 2. F. 2, 42. 46). 

8 Ba oya wandru ba mbate’e andrõ, ba zi sagõtõ yaŵa, ba zowulo ira. 

9 Ba dumadao ba zandrela nono matua, Oitikho dõi, ba mõrõ sibai, me i’aragõ huhuonia Faulo, ba me no abõlõ mõrõ ia, ba aekhu tou ia, dua gõtõ wa’alaŵa; ba lafazaŵa ia, no mate. 

10 Ba mõi tou Waulo, ifalõgu ia ba dotonia, italagui, imane: Bõi mifaguagua, so sa nosonia. (Sal. I. 17, 21). 

11 Ba ifuli ia yaŵa, iboboto roti, ba manga, ba ara na fahuhuo ia, irege moluo, ba mofanõ ia. 

12 Ba la’ohe nono matua no mege, auri, ba tenga ha ma’ifu terara dõdõ. 

13 Ba ya’aga, ba mowaõwaõ baowo, moloyo ndra’aga ba Gaso, ba wangai khõma Faulo, ba da’õ, me no imanõ wangohonogõi, me edõna itõrõ tánõ. 

14 Ba me ikhamõ ndra’aga ba Gaso, ba matema ia, ba marugi Mitilene. 

15 Ba moloyoga moroi ba da’õ, ba mahemolu õ, ba marugi gamaudu Khio; ba sara wongi aefa da’õ, ba masaŵa Zamo, ba mahemolu õ, ba marugi Mileti.

16 Noa sa ihonogõi Faulo, italu’i Nefeso, fa lõ arõrõ ia ba Azia; aõsõ ia; omasi ia ba Yeruzalema so ia na luo wendrakose, na tola ikhamõ. (F. 18, 21; 21, 4. 12).

17 III. Ba moroi ba Mileti, ba infatenge ba Nefeso, ifakaoni’õ zatua mbanua. 

18 Ba me no mõi ira khõnia ba imane khõra: Mi’ila, he uwisa ba khõmi, ero ma’õkhõ, iotarai luo me uhundragõ danõ Azia. (F. 18, 19; 19, 10). 

19 Enoni Zo’aya ndra’o, ma’ifu lõ si fayaŵa ndra’o, mowõi daŵa hõrõgu, ba so wanandraigõ, si gõna ndra’o, ba wamagõnaisi niha Yehuda ya’o. (A. 3). 

20 Mi’ila he uwisa, wa lõ nitahagu soguna khõmi, si lõ u’ombakha’õ khõmi, si lõ ufobawa lala khõmi, ba zi so niha sato ba yomo gõi, 

21 wamaduhu’õ ba niha Yehuda ba ba Ndrawa Heleni famalalini era’era khõ Lowalangi, awõ wamati khõ Zo’aya ya’ita, Yesu Keriso. 

22 Ba hiza iada’e, usaŵa Yeruzalema, amaedola zi so ba wesu dõdõgu; hadia zi gõna ndra’o ba da’õ, ba lõ u’ila, (F. 18, 21; 19, 21), 

23 baero nifaduhu’õ Geheha ni’amoni’õ khõgu, ba mbanua misa, iŵa’õ, ibalobaloi ndra’o bõbõ ba famakao. (F. 9, 16; 21, 4. 11). 

24 Ba lõ ba dõdõgu nosogu, lõ itõrõ ligu na i, ba wango’ozui lalagu, awõ halõŵõgu andrõ, nitemagu khõ Zo’aya, Yesu, famaduhu’õ turia somuso dõdõ, turia wa’ebua dõdõ Lowalangi andrõ. (F. 21, 13). 

25 Ba hiza sa, u’ila, lõ’õ sa’ae fa’ila bawa ita, dozi ami nitõrõgu, wangombakha banua Lowalangi andrõ. 

26 Andrõ ufaduhu’õ khõmi ma’õkhõ andre, lõ horõgu ba ndrora fefu. 

27 Lõ’õ sa nitahagu, fa lõ u’ombakha’õ khõmi gera’era Lowalangi fefu. 

28 Andrõ mifaigifaigi dõdõmi, ba mifaigifaigi nikubaloi andrõ fefu, ba nifataro Geheha ni’amoni’õ ya’ami samaigimaigi, ba wokubaloi banua Zo’aya andrõ, nihõlinia khõnia donia. (Tim. I. 4, 16. Fet. I. 5, 2). 

29 U’ila, na no mofanõ ndra’o, ba so moroi baero nasu gatua samara’u, si mõi khõmi, ba lõ alimagõ khõra nikubaloi andrõ. (Mat. 7, 16). 

30 Ba so gõi niha si otarai khõmi, solau huhuo si tefuyu, ba wondrõnisi khõra nifahaõ. 

31 Andrõ, bõi mifõrõ, mitõrõtõrõ tõdõmi: medõlu fakhe wa’ara, bongi ma’õkhõ, ba lõ nibatogu wamarou tõdõmi dozi ami, mowõi daŵa hõrõgu ba da’õ. (Heb. 13, 7). 

32 Ba iada’e, ba utou’õ ami ba danga Lowalangi ba ba daroma li fa’ebua dõdõnia andrõ, khõnia, sangila manga’aro’õ tõdõmi, sangila mame’e khõmi ondrõita andrõ, awõ ni’amoni’õ andrõ fefu. (F. 14, 3). 

33 Samõsa lõ ni’aluigu firõ, ba ma ana’a, ba ma nukha. (Kor. I. 9, 12. Moz. IV. 16, 15. Sam. I. 12, 3). 

34 Mi’ila ae, tangagu andre zangalui soguna khõgu, awõ zoguna ba nawõgu. (F. 18, 3. Kor. I. 4, 12. Tes. I. 2, 9).

35 Fefu gofu heza, ba no u’oroma’õ khõmi, si manõ wohalõŵõ, ba nitolo zambõ fa’abõlõ, ba bõi olifu ita niŵa’õ Zo’aya, Yesu, me imane: ”Ohahau dõdõ ba wame’e, moroi ba wanema.” 

36 Ba me aefa iŵa’õ da’õ, ba ibalõ duhini tou danõ, mangandrõ ia, ba fao ira fefu. (F. 21, 5). 

37 Ba tobali abõlõbõlõ wege’egera fefu, ba latalagui mbagi Waulo, fa’ago bawa ira khõnia. 

38 Abõlõ abu dõdõra ba niŵa’õnia andrõ, wa lõ’õ sa’ae fa’ila bawa ira. Ba lafasao ia baowo. (A. 25).

 

HALÕŴÕ ZINENGE

FAZA 21

 

I. Moloyo Waulo, isaŵa Yeruzalema. II. Fama’ele’õ Nagabo andrõ. III. Irugi Yeruzalema Faulo. IV. Maoso khõnia niha Yehuda, ba lakuru ia Dawa Roma.

1 I. Ba me no ma’efa’õ ndra’aga khõra, ba moloyo ndra’aga, madõlõga ba Go, ba mahemolu õ, ba marugi Rodo, ba moroi ba da’õ, ba masaŵa Watara. 

2 Ba me masõndra nowo, si mõi ba Wõnikia, ba mõiga yaŵa ba moloyoga. 

3 Ba me oroma khõma Gifero, ba marõi ba gabera ba masaŵa Ziria, marugi si tou Diro; ba da’õ sa labokai nõsi nowo. 

4 Ba me falukhaga nifahaõ, ba tebatoga ba da’õ, fitu bongi. Ba laŵa’õ khõ Waulo, moroi ba Geheha ni’amoni’õ, bõi mõi ia misi yaŵa, ba Yeruzalema. (F. 11, 12; 20, 23). 

5 Ba me no fitu bongima, ba mahetaga, mofanõga, lafasaoga, dozi ira, awõ ndra alawe, awõ ndraono, irugi baero mbanua; ba mabalõduhini tou danõ, baene, mangandrõga. (F. 20, 36). 

6 Ba fabaliga, ba mõiga baowo, ba ya’ira, ba lafuli ira miyomo. 

7 Ba ma’asiwai woloyo, ma’otarai ba Diro, masaŵa Wetolema’i, ma’owai dalifusõ, ba ma’iagõ khõra, sara wongi. 

8 Ba mahemolu õ, ba mofanõga, ba marugi Kaizaria. Ba mõiga yomo khõ Wilifo, sangombakha andrõ, awõ zi dafitu no, ba tebatoga khõnia.

9 Ba so nononia, õfa, ono alawe, sama’ele’õ. (F. 2, 17).

10 II. Ba me ara ma’ifu ndra’aga, ba da’õ, ba so moroi si yaŵa ba Yudaia zama’ele’õ, Agabo dõi. (F. 11, 28). 

11 Ba mõi ia khõma, ihalõ mbõbõ talu Waulo, ibõbõ gahenia, awõ dangania, ba imane: Da’õ niŵa’õ Geheha ni’amoni’õ: Lamanõ dania wamõbõ niha sokhõ bõbõ talu andre niha Yehuda, ba Yeruzalema, ba latou’õ ba danga niha baero. (F. 20, 23). 

12 Ba me marongo da’õ, ba mangandrõ ndra’aga khõ Waulo, awõ mbanua da’õ, bõi mõi ia misi yaŵa, ba Yeruzalema. (Mat. 16, 22). 

13 Ba itema lima Faulo, imane: Hadia khõmi da’õ, wa mege’ege ami, wa mibusi dõdõgu? No aoha manõ sa gõlõgu, tenga ha ba wame’e nibõbõ ya’o, ba wa’amate gõi, ba Yeruzalema, na bõrõ dõi Zo’aya, Yesu.

14 Ba me lõ i’o’õ khõma, ba lõ’õ sa’ae muhedega, mamane: Ya’itõrõ zomasi Zo’aya.

15 III. Ba me aefa da’õ, ba mafa’anõ ndra’aga, ba mõiga misi yaŵa ba Yeruzalema. 

16 Ba mõi awõma nifahaõ, banua Kaizaria, õsa, solohe ya’aga ba zi mõiga tome, khõ Menaso, banua Gifero, nifahaõ si no ara. 

17 Ba me no marugi Yeruzalema, ba omuso dõdõ dalifusõ, me no soga. 

18 Ba mahemolu õ, ba i’ohega Faulo, we’amõi khõ Yakobo, ba ahori so zatua. (F. 15, 13. Gal. 1, 19). 

19 Ba me no i’owai ira, ba izarazara wangombakha, he iwisa Lowalangi ba niha baero, ba halõŵõnia andrõ. 

20 Ba ya’ira, me larongo, ba lasuno Lowalangi, ba lamane khõnia: Õ’ila ga’a, ha wa’oya ngahõnõ zi no mamati, ba oi la’o’õ sibai goroisa. (F. 15, 1). 

21 Ba no te’ombakha’õ khõra, ba khõmõ andrõ, õŵa’õ ba niha Yehuda fefu, si fatewu ba niha baero, la’erogõ Moze; õŵa’õ khõra, bõi laboto nonora, ba bõi la’o’õ gamakhoita andrõ. (F. 16, 3. Rom. 10, 4). 

22 Ba he wisa ia? Lõ fulitõ, ato zowulo dania; larongo sa, wa no so’õ. 

23 Ba o’õ da’e, niŵa’õma khõu: Daõfa khõma niha si so amabu’ula li, 

24 khõra ha ya’ira, mifao da’õ, fahaogõ’õ ndra’ugõ, awõra, ba taha gahakhõŵa khõra, ena’õ lafatõwõ’õ ira, ba la’ila mõtõ dozi, wa no faya ni’ombakha’õ khõra, ba khõmõ andrõ, ba õtõrõ sa, ba khõmõ gõi, lala wolo’õ oroisa. (F. 18, 18). 

25 Ba ba zamati niha baero andrõ, ba no mafa’ohe’õ zura, no mahonogõi, bõi lababaya gõ nadu ba do ba nitõgi bagi ba fohorõ. (F. 15, 20, 29).

26 Ba ihalõ awõnia niha andrõ Faulo, ba mahemolu õ, ba mõi ia ba gosali, me no ifahaogõ’õ ia, awõra, i’ombakha’õ wa’awai mbongi wangehao andrõ, irugi tedozigõ ira wame’e sumange andrõ. (Moz. IV. 6, 13. 14).

27 IV. Ba me arakha irugi zi fitu bongi andrõ, ba la’ila ia ba gosali niha Yehuda, banua Azia, ba la’ekhugõ niha sato fefu, ba lara’u ia,

28 mu’ao ira, lamane: He ya’ami, Iraono Gizeraëli, milului! da’e niha andrõ, sondrozigõ niha, gofu heza so ira, wamahaõ ya’ira; bõ’õ wamahaõnia, bõ’õ ba khõda, ba oroisa, ba ba naha andre. Ba no i’ohe na gõi Ndrawa Heleni ba gosali, ra’iõ naha ni’amoni’õ andre ibe’e. (F. 6, 13. 14. Hez. 44, 7). 

29 So zangila mege Terofimo, banua Nefeso, awõnia ba mbanua, ba lawai ni’ohe Waulo ba gosali. (F. 20, 4. Tim. II. 4, 20). 

30 Ba maoso dõdõ niha, samba banua manõ, aekhu niha, ba lara’u Waulo, lasõbi ia baero gosali, ba la’okusi’õ bawandruhõ. 

31 Ba labunu ia ena’õ, ba terongo si yaŵa khõ gumandra zi hõnõ, ba zaradadu andrõ, no fawuka Yeruzalema, samba banua manõ. 

32 Ba i’anema’õ ihalõ khõnia zaradadu ba kumandra zi otu, isaŵa si tou khõra, fagohi. Ba me la’ila gumandra andrõ, awõ zaradadu andrõ, ba labato wamõzimõzi Faulo. 

33 Ba irugi kumandra, ihalõ ia, iŵa’õ, larate ia, dua rozi rate, ba isofu, ha niha ia ba hadia nilaunia. (F. 20, 23). 

34 Ba bõ’õ niŵa’õ zi samõsa, bõ’õ niŵa’õ zi samõsa, ba niha sato andrõ. Ba me tebai irongo zi ndruhunia, ba waguaguasa andrõ, ba iŵa’õ, la’ohe ba hati. 

35 Ba me irugi nora, ba tobali la’osa’õ ia saradadu ba wa’abõlõ niha. 

36 La’o’õ sa niha sato, mu’ao ira: Nitibo’õ ia! (F. 22, 22. Luk. 23, 18). 

37 Ba me la’ohe ba hati ena’õ Waulo, ba imane khõ gumandra: Tola uŵa’õ khõu da’e? Ba imane: Õ’ila li Heleni? 

38 Tenga sa Dawa Miserayi andrõ ndra’ugõ, sangekhugõ niha, bohou na no andrõ, solohe misa ba danõ si mate si õfa ngahõnõ niha, sange’e andrõ? 

39 Ba imane Faulo: Niha Yehuda ndra’odo, banua Dareso, banua si teturia, ma’ifu, ba Gilikia. Ba u’andrõ khõu, tehe khõgu wehede ba niha. (F. 9, 11). 

40 Ba me no itehe, ba i’agõ mbosi nora Faulo, ifazaŵa dangania ba niha. Ba me no ahono sibai, ba muhede ia khõra, ba li Heberaio, imane: (F. 12, 17; 13, 16; 19, 33).

 

HALÕŴÕ ZINENGE

FAZA 22

 

I. Fehede Waulo ba niha sato. II. Ifuli maoso dõdõra khõnia. III. Lõ labõzi ia, me banua Roma ia.

1 I. ”He ya’ami, ira talifusõ ba ira amagu, mifondrondrongo wamu’agu ba hulugu khõmi iada’e. (F. 7, 2; 13, 20). (A. 3—21: Faz. 9, 1—29; 26, 9—18.)

2 Ba me larongo, ilau khõra li Heberaio, ba tedou na wa’ahonora, ba imane: (F. 21, 40). 

3 Niha Yehuda ndra’o, banua Dareso, ba Gilikia, ba ba mbanua da’e ebua ndra’o, ono zekola Gamaliëli, no la’o’õ waabe’e goroisa khõ ndra tua, wamahaõ ya’o, hulõ zolohu ndra’o ba ngawalõ hadia ia khõ Lowalangi, si mane ya’ami fefu na, ma’õkhõ andre. (F. 5, 34). 

4 No u’osisi lala andrõ, irugi wamunu, no ubõbõ ndra matua, awõ ndra alawe, ba no u’ohe ba gurunga. (F. 8, 3). 

5 No si so ba mbõrõ khõgu gere sebua, awõ zatua mbanua fefu, ba nitemagu sura ba dalifusõ, we’amõi ba Ndramaseko, ba wolohe ba Yeruzalema gõi si so ba da’õ, nibõbõ, ena’õ te’otu’õ ira. 

6 Ba ba wofanõ andrõ, me no ahatõ ndra’o ba Ndramaseko, ba i’ozumagõ gõna ndra’o haga sabõlõbõlõ, moroi ba mbanua si yaŵa, so laluo. 

7 Ba alau tou ndra’o, ba danõ, ba urongo li, imane khõgu: He Saulo! He Saulo! hana wa õgohido? 

8 Ba umane: Ha niha ndra’ugõ, Tua? Ba imane khõgu: Yesu ndra’o, banua Nazareta andrõ, nigohiu. 

9 Ba la’ila sa haga andrõ, awõgu fao, ba lõ larongo li zihede khõgu andrõ. 

10 Ba umane: He uwisa, Tua? Ba imane So’aya khõgu: Faoso, ae ba Ndramaseko, ba da’õ dania laŵa’õ khõu fefu nihonogõi khõu, nilaumõ. 

11 Ba lõ u’ila niha, ba wa’abõlõ haga no mege, la’ohe dangagu awõgu ba lala, ba urugi Ndramaseko. 

12 Ba so niha, Anania dõi, sangata’ufi Lowalangi, solo’õ oroisa, si sõkhi turia ba niha Yehuda fefu, si no fatewu ba Ndramaseko. 

13 Ba mõi khõgu da’õ, i’ondrasi ndra’o, ba imane khõgu: He Saulo, talifusõ, yagõ mu’ila zui niha! Ba i’otarai da’õ, ba u’ila ia. 

14 Ba imane: Fõna sa’ae ihonogõi Lowalangi ndra tuada, ena’õ aboto ba dõdõu zomasi ia, ba ena’õ õ’ila zatulõ andrõ, ba ena’õ õrongo linia, na muhede ia. 

15 Me samaduhu’õ ndra’ugõ khõnia dania ba niha fefu, õfaduhu’õ ni’ila hõrõu ba nirongo dõgi dalingau. 

16 Ba iada’e, ba hana wa ara’õ? Faoso, fabayagõ’õ idanõ ndra’ugõ ba fasasai’õ horõu, we’angarõfi li tõi Zo’aya andrõ. 

17 Ba me no ufulido ba Yeruzalema, me mangandrõ ndra’o ba gosali, ba abeta nosogu, (F. 9, 26), 

18 ba u’ila ia, ba imane khõgu: Ta’ita’i, aliogõ, heta’õ ba Yeruzalema, me lõ’õ sa atõ latema wamaduhu’õmõ ya’o. 

19 Ba umane: He Tua, no la’ila, sokuru samati khõu ndra’odo, samõbõzi ya’ira, ba zekola misa, (A. 4), 

20 ba no la’ila, sodo ba ngai, me labunu Zitefano andrõ, samaduhu’õ ya’ugõ, ba omasido da’õ, ba u’irõ’õ nukha zamunu ya’ia andrõ. (F. 7, 57; 8, 1).

21 Ba imane khõgu: Ae’e, ba niha baero ufatenge ndra’ugõ, ba zarõu.” (F. 9, 15; 13, 2).

22 II. Ba lafondrondrongo khõnia irege da’õ, ba mu’ao ira, lamane: Nitibo’õ, niheta ba guli danõ niha si manõ! tenga sa si nangea auri ia. (F. 21, 36). 

23 Ba mu’ao’ao ira, latibo’õ tou nukhara ba lafazaumba gawugawu ba dalu mbanua.

24 Ba iŵa’õ kumandra, la’ohe ba hati ia, i’oroi’õ, labõzi, ba wanekhegõ ya’ia, ena’õ irongo, hadia mbõrõ, wa lamanõ we’ao’ao ba khõnia andrõ.

25 III. Ba me no labõbõ ia ba geu, ba wamõzi ya’ia, ba imane Faulo khõ gumandra zi otu, si so ba da’õ: Hadia, Tola mibõzi manõ mbanua Roma, he lõ muhuku? (F. 16, 37; 23, 27). 

26 Ba me irongo da’õ kumandra zi otu andrõ, ba mõi ia mu’ombakha’õ khõ gumandra zi hõnõ, imane: Hadia nilaumõ? 

27 Banua Roma sa niha da’õ. Ba mõi gumandra zi hõnõ andrõ, imane khõ Waulo: Ombakha’õ khõgu, hadia, banua Roma ndra’ugõ? Ba imane: Ya’ia. 

28 Ba imane kumandra: Ya’odo andre, ba no ebua ube’e ana’a, fa banua andrõ ndra’o. Ba imane Faulo: Ba ya’odo, ba i’otarai tumbu ndra’o. 

29 Ba i’anema’õ labõhõi ia sanekhegõ ya’ia ena’õ. Ba ata’u gõi gumandra, me no irongo, wa banua Roma ba me no irate. 

30 Ba mahemolu õ, me edõna irongo zi ndruhu, hadia nibe’e niha Yehuda horõnia, wangadugõ ya’ia, ba ifa’efa’õgõ rate, ba i’oroi’õ falukha gere sebua, awõ zalaŵa rafe sebua fefu, ba i’ohe mitou Waulo, ifasao khõra.

 

HALÕŴÕ ZINENGE

FAZA 23

 

I. Ba rafe sebua so Waulo. II. Labunu ia ena’õ niha Yehuda. III. La’ohe ia ba Kaizaria, khõ gumandru Felisi.

1 I. Ba inehegõ zalaŵa rafe sebua Faulo, ba imane: He ya’ami, ira talifusõ! Lõ sinegu dõdõgu khõgu, ba wolo’õ khõ Lowalangi, irugi ma’õkhõ andre. (F. 22, 1; 24, 16). 

2 Ba iŵa’õ ere sebua, Anania, ba zi so ba da’õ, lafalisi mbawania. 

3 Ba imane khõnia Faulo: Ifalisi dania ndra’ugõ Lowalangi, bagolõ nilau betua! Dumadao ndra’ugõ wanguhuku ya’o, dali goroisa, ba õsawõ goroisa, wanguma’õ, labõzi ndra’o. (Mat. 23, 27). 

4 Ba lamane si so ba da’õ: Hadia, õtandraŵaisi gere sebua andrõ khõ Lowalangi? 

5 Ba imane Faulo: Lõ u’ila, wa ere sebua ia, ga’a. Si manõ sa ba zura: ”Bõi tandraŵaisi zatua mbanuami.” (Moz. II. 22, 28). 

6 Ba me i’ila Faulo, sadukaio õsa ba farizaio õsa, ba mu’ao ia ba zalaŵa rafe sebua, imane: He ya’ami, ira talifusõ! Farizaio ndra’odo, ono warizaio; fanõtõna femaoso zi mate andrõ mbõrõ, wa tehuku ndra’odo. (F. 22, 3; 26, 5). 7 Ba me no iŵa’õ da’õ, ba tobali faguagua ira, warizaio zadukaio, ba fabali dõdõ zato. 

8 Niŵa’õ zadukaio, ba lõ femaoso ba lõ mala’ika ba lõ bekhu zi mate; ba faoma sa faduhu dõdõ warizaio ba da’õ. (Mat. 22, 23). 

9 Ba tobali faguaguasa sabõlõbõlõ, ba maoso zangila amakhoita õsa, farizaio, fasoso ira, lamane: Ma’ifu lõ masõndra horõ niha da’õ; ba he wisa, na no humede khõnia mbekhu zi mate, ba ma mala’ika? (F. 25, 25; 5, 39). 

10 Ba me no abõlõbõlõ waguaguasa, ba ata’u gumandra, lasila Waulo, ba iŵa’õ mõi mitou zaradadu, ba wamadõni ya’ia khõra, wolohe ba hati.

11 Ba ba zi bongi andrõ, ba mõi khõnia Zo’aya, imane: Bõi ata’ufi! Hulõ si mane famaduhu’õu hadia ia khõgu ba Yeruzalema, si manõ gõi wamaduhu’õu dania ba Roma, lõ tola lõ’õ. (F. 18, 9; 19, 21).

12 II. Ba me no moluo, ba lafagõlõgõlõ ira bõrõ niha Yehuda, la’elifi ira, lõ manga ira ba lõ labadu nidanõ, irege no labunu Waulo. 

13 Tõra õfa wulu ira, sangelifi ya’ira ba da’õ. 

14 Mõi ira khõ ndra ere sebua ba ba zatua mbanua, lamane: No ma’elifi sibai ndra’aga, lõ mababaya hadia ia gõ, irege no mabunu Waulo andrõ. 

15 Andrõ mifaŵa’õgõ khõ gumandra, ya’ami, awõ zalaŵa rafe, yamufa’ohe’õ ia mitou khõmi, hulõ na edõna mirongo sibai na, hadia ia khõnia; ba matarõgõ sa’ae, ba wamunu ya’ia, ba lala. 

16 Ba me irongo wamagõnaisi andrõ ono mbene’õ Waulo, ba mõi ia ba hati, i’ombakha’õ khõ Waulo. 

17 Ba humede Waulo khõ gumandra zi otu, imane khõnia: Ohe khõ gumandra zi hõnõ nono matua andre, so niŵa’õnia khõnia. 

18 Ba i’ohe khõ gumandra zi hõnõ, imane: No muhede khõgu, Waulo andrõ, nikuru, i’andrõ khõgu, u’ohe khõu nono matua andre, so niŵa’õnia khõu. 

19 Ba idõni dangania kumandra, i’ohe ba zi ha ya’ira, ba isofu khõnia: Hadia niŵa’õu khõgu? 

20 Ba imane: No mamagõlõ niha Yehuda, ba wangandrõ khõu, ena’õ õfa’ohe’õ mitou khõra ba rafe mahemolu Waulo andrõ, hulõ na edõna lazofuzofu na ena’õ, hadia ia khõnia.

21 Andrõ bõi fati lira; latarogõ sa’ae ia, tõra õfa wulu niha, banuara, no la’elifi ira, lõ manga ira ba lõ labadu nidanõ, irege no labunu ia. Ba noa sa’ae lafa’anõ ira, ba labaloi niŵa’õu.

22 III. Ba ifofanõ nono matua andrõ kumandra, iŵa’õ khõnia, bõi i’ombakha’õ gofu ha õkhõ, wa no ibokai khõnia da’õ. 

23 Ba darua ifakaoni’õ kumandra zi otu, ba imane: Mifa’anõ zaradadu, dua ngaotu, ba we’amõi ba Kaizaria, awõ zi fakudo, fitu ngafulu, ba dua ngaotu zanoho, 

24 na mõrõ niha; ba ndra mu’asogõ kudo, ba wamakudo Faulo andrõ, ba lahaogõ wolohe ya’ia khõ gumandru Felisi. 

25 Ba ifazõkhi zura, 

26 imane: ”Kalaudio Lisia khõ gumandru Felisi si sõkhi sibai tõdõ, ya’ahowu! 

27 Niha andrõ, nira’u niha Yehuda, nibunura mena’õ, no u’efa’õ, me sodo awõ zaradadu, me no urongo, wa banua Roma ia. (F. 21, 33, 22, 25).

28 Ba usofu mena’õ mbõrõ wangadugõra ya’ia, ba u’ohe ba rafe khõra. (F. 22, 30). 

29 Ba usõndra, faguaguasa ba goroisa khõra mbõrõ, wa la’adugõ ia, ba lõ fangadu bõrõ wamunu, ba he bõrõ worate ya’ia. (F. 18, 14. 15). 

30 Ba me no mu’ombakha’õ khõgu, so ba khõra zamagõnaisi niha andrõ, ba no ufa’ohe’õ ia khõu, ba no uŵa’õ gõi ba zangadu andrõ, ndramuõmbakha’õ khõu.” (F. 24, 8).

31 Ba lahalõ sa’ae Waulo saradadu no mege, la’o’õ niŵa’õ khõra, la’ohe ia ba Gandrifati, ba zi bongi. 

32 Ba mahemolu õ, ba lafatenge awõnia zi fakudo andrõ, ba lafuli ira ba hati. 

33 Ba me no larugi Kaizaria da’õ, ba labe’e ba danga gumandru zura no mege, ba la’ohe gõi khõnia Waulo. 

34 Ba me no ibaso zura, ba isofu, ha banua ia, ba me irongo, wa banua Gilikia, (F. 22, 3), 

35 ba imane: Usekhegõ dania ndra’ugõ, na no so gõi zangadugõ ya’ugõ andrõ. Ba i’oroi’õ, ba gõdo Herode lataha Waulo.

 

 

HALÕŴÕ ZINENGE

FAZA 24

 

I. La’adugõ Waulo niha Yehuda, khõ Welisi. II. Ibu’a ba hulunia. III. Latahataha manõ Waulo.

1 I. Ba lima bongi aefa da’õ, ba mõi misi tou gere sebua andrõ, Anania, awõ zatua mbanua õsa, awõ zi fahuhuo andrõ, Teretulo; ya’ira zi mõi khõ gumandru, ba wangadugõ Faulu. 

2 Ba lafakaoni’õ ia, ba ibõrõgõ wangadugõ ya’ia Teretulo, 

3 imane: Ohahau sibai dõdõma barõ mbawau, ba wa’oya manõ zi sõkhi ba mbanua andre, me no sõkhi dõdõu khõra, ya’ugõ Felisi, si sõkhi sibai tõdõ, lõ mabini’õ, gofu heza soga, lõ mamalõmalõ; ma’andrõ saoha golõu. 

4 Ba fa lõ urõrõ ndra’ugõ, ba u’andrõ khõu, õfondrondrongo khõma ma’ifu, ba wa’ebolo dõdõu andrõ. 

5 Noa sa masõndra, wa no fõkhõ sebua niha andrõ, samagua manõ niha Yehuda andrõ fefu, ba guli danõ misa, ma’asagõrõ; satua zi faehu huku andrõ, banua Nazareta, ia. (F. 17, 6). 

6 Noa sa gõi itandraigõ i’ohe ba gosali zalakha, ba no mara’u ia, 

7 ba so moroi si yaŵa Lisia andrõ, kumandra, abõlõ ira, ba lafadõni ba dangama. 

8 Khõnia tola õrongo fefu mbõrõ wangadugõma ya’ia, na õsofu. (F. 23, 30).

9 Ba lanõnõ niha Yehuda, lafaduhu’õ niŵa’õnia.

10 II. Ba itema lira Faulo, me ifazaŵa dangania khõnia kumandru, tandra wa tola muhede ia, imane; Me u’ila, no ara, ha me uga fakhe sa’ae, sanguhuku ndra’ugõ ba mbanua andre, ba lõ aiwõ ndra’o wamu’a ba hulugu esuanõ andrõ khõgu, 

11 me tola õsofu, wa lõ tõra felendrua wongi, me sodo moroi si tou, me mõido ba Yeruzalema, ba wangandrõ. 

12 Ba lõ ni’ilara ya’o ba gosali, wa fahuhuo ndra’o ba niha bõ’õ, ba ma mangekhugõ niha, ba lõ’õ gõi ba zekola ba lõ’õ gõi ba mbanua misa. (F. 25, 8). 

13 Ba tebai gõi la’ombakha’õ khõu nibõbõgõra khõgu iada’e. 

14 Ba lõ ubini’õ khõu da’õ, wa utõrõ lala da’õ, niŵa’õra si faehu huku, wamosumange Lowalangi ndra tuama, wamati fefu nisura ba zura goroisa ba ba zura zama’ele’õ. (F. 26, 22 b. t.). 

15 Ba so khõgu wanõtõna khõ Lowalangi, si so khõra gõi, wa so wemaoso zi mate, he satulõ, ba he si lõ atulõ. (F. 26, 6—8. Dan. 12, 2). 

16 Andrõ uforege gõi, lõ mamalõmalõ, fa lõ itegudo tõdõgu, he ba khõ Lowalangi, ba he ba niha. (F. 23, 1; Kor. II. 1, 12). 

17 Ba noa sa mõido, me no ara, ba wolohe ame’ela ba mbanuama, ba ba wame’e sumange; (F. 21, 24. Rom. 15, 25 b. t.); 

18 ba da’õ la’ila sa ndra’o niha Yehuda õsa, banun Azia, me utõrõ wangehao andrõ, ba gosali, tenga ba zi no ato niha, ba tenga ba waguaguasa; (F. 21, 27); 

19 ya’ira zi lõ tola lõ so ba da’e khõu ena’õ, ba wangadu, na so hadia ia gesuanõgu khõra. 

20 Ma ndramuŵa’õ da’e, hadia nisõndrara si lõ atulõ, me sodo ba rafe sebua;

21 atõ na ba zi sambua li andrõ, niŵa’õgu, me sodo khõra ba da’õ no, me umane: Femaoso zi mate mbõrõ, wa tehuku ndra’o khõmi ma’õkhõ! (F. 23, 6).

22 III. Ba ifazaŵa khõra mbongi Felisi, me no aboto ba dõdõnia he wisa lala da’õ, ba imane: Na mõi mitou Lisia, kumandra andrõ, ba usofu da’õ khõmi. (F. 23, 26). 

23 Ba iŵa’õ khõ gumandra, latarogõ Waulo, lahaogõ khõnia, ba bõi latenaŵa, na so zi mõi ngoningoninia, sahatõ khõnia. (F. 27, 3; 28, 16). 

24 Ba lõ ara tõ, ba mõi Welisi, awõ Derusila, fo’omonia, niha Yehuda, ifakaoni’õ Waulo, ifondrondrongo khõnia wamati andrõ khõ Keriso Yesu. 

25 Ba me itõrõ linia wa’atulõ dõdõ ba fa bõi mohorõ ba fanguhuku andrõ dania, ba tokea Welisi, ba imane: Ofanõ iada’e, igamõi lõ arõrõŵagu dania, ba ufakaoni’õ ndra’ugõ. (F. 10, 42). 

26 Ba idõnadõna gõi ba ba’õ, ibe’e khõnia gana’a Faulo; andrõ asese ifahalõ’õ, ba wahuhuosa khõnia. 

27 Ba me no irugi mendrua fakhe, ba te’ali Welisi, Forokio Feso wangalinia. Ba omasi Welisi, ebua dõdõ niha Yehuda khõnia, ba irõi furi Waulo, nirate. (F. 25, 9. 14).

 

 

HALÕŴÕ ZINENGE

FAZA 25

 

I. Isekhegõ Waulo Feso. II. I’oroma’õ khõ Agerifa.

1 I. Tõlu bongi Weso ba danõ, ba mõi ia misi yaŵa ba Yeruzalema, moroi ba Kaizaria. (F. 24, 27; 23, 23). 

2 Ba la’ondrasi ia ere sebua ba salaŵa niha Yehuda, ba khõ Waulo andrõ, la’andrõ khõnia, (F. 24, 1),

3 fa’ebua dõdõnia khõra laŵa’õ, ena’õ ifahalõ’õ miyaŵa ba Yeruzalema; labunu ia ba lala, dõdõra. (F. 23, 15). 

4 Ba iŵa’õ khõra Feso, tetahataha Waulo ba Kaizaria ba ya’ia gõi, ba alio ifuli ia ba da’õ. 

5 Ba ha niha sa zalaŵa ba khõmi, iŵa’õ, ba ndrafao we’amõi misi tou, ba wangadugõ niha da’õ, na so hadia ia zalania. (Kor. I. 4, 13; F. 17, 6). 

6 Ba mato ŵalu bonginia khõra, fulu bongi zara sibai, ba mõi ia misi tou ba Kaizaria, ba sara wongi aefa da’õ, ba dumadao ia ba dadaoma zanguhuku, ba i’oroi’õ Waulo. (F. 21, 28 b. t.). 

7 Ba me so ia, ba lafasui ia niha Yehuda, si no mõi mitou, si otarai Yeruzalema, oya ngawalõ labõbõgõ khõnia sala sebua, si tebai la’oroma’õ ngamohi, (F. 24, 13), 

8 me ibu’a ba hulunia Faulo; lõ nisaŵõnia oroisa ba niha Yehuda, iŵa’õ, ba lõ horõnia ba gosali ba lõ’õ gõi khõ kaizaro. (F. 24, 12; 28, 17). 

9 Ba omasi Weso, na ebua dõdõ niha Yehuda khõnia, ba itema li Waulo, imane: Hadia, omasi’õ mõi misi yaŵa ba Yeruzalema, na ba da’õ tehuku ndra’ugõ, ba zi so ya’o, ba zala andrõ? 

10 Ba imane Faulo: Fõna dadaoma zanguhuku khõ kaizaro so ndra’o, lõ tola tenga ba da’e tehuku ndra’o. Lõ horõgu ba niha Yehuda, noa sa aboto sibai ba dõdõu gõi. (F. 22, 28). 

11 Ba so atõ horõgu, ba na no ulau hadia ia, bõrõ wamunu ya’o, ba lõ uwõsiwõsido, na nibunu ndra’o. Ba na faya nibõbõgõ da’e khõgu, ba tebai labe’e buala ndra’o khõra. Ufuli khõ kaizaro. (F. 26, 32).

12 Awena fahuhuo Weso ba nawõnia ba rafe, ba imane: Khõ kaizaro no õfuli, ba khõ kaizaro mõi’õ. (F. 27, 24).

13 II. Ba lõ ara furi õ, ba mõi ba Kaizaria razo, Agerifa ba Berenike (ngambatõnia), ba wangondrasi Feso. 

14 Ba me ara ma’ifu ira ba da’õ, ba i’ombakha’õ Feso huhuo andrõ ba khõ Waulo, khõ razo andrõ, imane: So niha nirõi Welisi furi, nikuru. 

15 La’ondrasido ere sebua ba satua mbanua ba niha Yehuda, me sodo ba Yeruzalema, ba khõnia, la’andrõ wame’e huku khõnia. 

16 Ba u’ombakha’õ khõra, tenga huku ba Ndrawa Roma, la’etu’õ manõ huku niha, na lõ lafatutu wawa ira ua zangadu ni’adugõ, na lõ mufolala khõnia wamu’a ba hulunia nibõbõgõ khõnia. 

17 Ba me no falukha ira ba da’e, ba ma’ifu lõ uaragõ, ha sara wongi, ba mudadaodo ba dadaoma zanguhuku, ba u’oroi’õ niha andrõ. 

18 Ba me so zangadugõ ya’ia, ba ma’ifu lõ la’ila la’ombakha’õ sala, 

19 nidõnadõnagu, ha faguaguasa ba wamosumangera Lowalangi la’ombakha’õ, salania, ba ba khõ Yesu andrõ, si no mate, niŵa’õ Waulo no ifuli auri. (F. 23, 29; 26, 8. 23). 

20 Ba me lõ u’ila he uwisa ba huhuo andrõ ba da’õ, ba usofu khõnia, na edõna mõi ia ba Yeruzalema, na andrõ lahuku ia ba da’õ. 

21 Ba me i’andrõ Faulo lataha ia, irege i’etu’õ huku kaizaro, ba u’oroi’õ, lataha ia, irege ufa’ohe’õ ia khõ kaizaro. 

22 Ba imane Agerifa khõ Weso: Omasido urongo gõi niŵa’õ niha andrõ. Imane: Mahemolu tola õrongo. (Luk. 23, 8). 

23 Ba sara wongi aefa da’õ, ba so Agerifa ba Berenike, ebua sibai lakhõmi, mõi ira ba kato, awõ gumandra, awõ zalaŵa mbanua, ba i’oroi’õ Feso, la’ohe Waulo. 

24 Ba imane Feso: He razo, Agerifa, ba ya’ami fefu, si so ba da’e, awõma! Mi’ila da’e; no mangandrõ khõgu niha Yehuda sato ba khõnia, ba Yeruzalema ba ba da’e gõi, mu’ao ira, tenga ni’orifi sa’ae. (F. 22, 22). 

25 Ba me no aboto ba dõdõgu, lõ horõnia, bõrõ wamunu ya’ia, ba me no ifuli gõi khõ kaizaro, ba no uhonogõi, lafa’ohe’õ ia. (F. 23, 9). 

26 Ba lõ nirongogu si ndruhu, ba khõnia, nisuragu khõ zokhõ ya’ita, ena’õ. Andrõ no ufasao ia khõmi, ba ofõna khõu, ya’ugõ razo Agerifa, ena’õ falukhado nisura, na no musekhegõ. (F. 26, 3. 27). 

27 Ba dõdõgu sa, tenga lala, na tafa’ohe’õ nikuru ba lõ ta’ombakha’õ mbõrõ wangadugõ ya’ia. (F. 25, 9. 14).

 

 

HALÕŴÕ ZINENGE

FAZA 26

I. Huhuo Waulo khõ Agerifa, awõ II. niŵa’õ Agerifa.

1 I. Ba imane Agerifa khõ Waulo: Latehe khõu, õbu’a ba hulumõ. Awena ifazaŵa dangania Faulo, ibu’a ba hulunia, imane: (Mat. 10, 18). 

2 He razo, Agerifa, omuso dõdõgu, me tola ubu’a ba hulugu ma’õkhõ andre, fõnau, fefu nibõbõgõ niha Yehuda khõgu. 

3 Me no õ’ila sibai fefu huku ba niha Yehuda, awõ nifadõni andrõ, ba u’andrõ khõu, bologõ dõdõu, wamondrongo khõgu. 

4 Buabuagu i’otarai iraono ndra’o, nilaugu i’otarai mbõrõta, ba khõma ba Yeruzalema, ba no la’ila niha Yehuda fefu; (F. 22, 3 b. t. Gal. 1, 13 b. t.); 

5 me no la’ila ndra’o, i’otarai fõna sa’ae (na edõna ira lafaduhu’õ), wa no u’o’õ wondrege wa’abe’e huku, ba wamosumange Lowalangi ba khõda, wa farizaio ndra’odo. (F. 23, 6).

6 Ba iada’e, ba lahuku ndra’o, bõrõ wanõtõna amabu’ula li andrõ, nifabu’u Lowalangi khõ ndra tuada, (F. 13, 32; 28, 20), 

7 ni’alui zi felendrua tua khõma, fogamõ ya’ia, bongi ma’õkhõ la’owõlõ’õlõgõ wamasumange Lowalangi ba da’õ. Fanõtõna da’õ mbõrõ, ya’ugõ razo, wa la’adugõ ndra’odo niha Yehuda. (F. 24, 14. 15). 

8 Hadia wa laŵa’õ ba khõmi, tebai faduhu dõdõ niha, na isusugi zi mate Lowalangi? (F. 4, 2). 

9 Noa sa uŵa’õ tõdõgu, ni’abõlõgõ wangõhõndrõgõ tõi Yesu, banua Nazareta andrõ. 

10 Ba ulau sa gõi ba Yeruzalema; ba ato ni’amoni’õ nibe’egu ba gurunga, nitehe ndra ere sebua khõgu: ba na labunu ira, ba manehe ndra’odo. (F. 22, 20). 

11 Ba ba zekola misa fefu, ba asese ulau mbalõgu khõra, uforege khõra, irege manandraŵa ira, si lõ awawõ wõnugu khõra, ba ugohi ira, urugi gõi mbanua baero. 

12 Ba mõido ba Ndramaseko, ba zi manõ, no latehe khõgu ira ere sebua, no labe’e zura. 

13 Ba laluo, ya’ugõ razo, ba u’ila ba lala, moroi ba mbanua si yaŵa haga, abõlõ moroi ba haga luo, ifasui ndra’odo, awõ zi fao khõgu ba lala. 

14 Ba alauga tou ba danõ; ba urongo li, sihede, imane khõgu ba li Heberaio: He Saulo! He Saulo! hana wa õgohido? Afõkhõ khõ khõu, na fabõrõ’õ ba dukotuko andrõ. (F. 9, 3 b. t.). 

15 Ba umane: Ha niha ndra’ugõ, Tua? Ba imane So’aya; Yesu ndra’o, nigohiu. 

16 Ba faoso, zizio. Andrõ u’oroma’õ ndra’o khõu, ba wangohonogõi ya’ugõ enoni ba samaduhu’õ ni’ila hõrõu, awõ ni’oroma’õgu khõu dania. (F. 22, 15. Gal. 1, 12). 

17 Ba u’efa’õ ndra’ugõ ba danga mbanuami ba ba danga niha baero, ba nifatengegu ya’ugõ, (F. 22, 21. Yer. 1, 8, 18. 19) 

18 ba wamokai hõrõra ena’õ larõi zõgõmigõmi, ba ena’õ lafuli ira ba haga, ena’õ larõi wa’abõlõ Gafõkha, ba lafuli ira khõ Lowalangi, ena’õ latema wangefa horõ ba ondrõita andrõ, awõ ni’amoni’õ andrõ, wamati khõgu. (Yes. 42, 7. Kol. 1, 12—14. F. 20, 32). 

19 Andrõ lõ u’ositengagõ gangilata andrõ, soroi sorugo ya’ugõ razo Agerifa, (Gal. 1, 16), 

20 mangombakha ndra’o, si ofõna ba mbanua Ndramaseko ba ba Yeruzalema ba ba danõ Yudaia ma’asagõrõ ba ba niha baero, ena’õ lafalalini gera’erara ba ena’õ lafuli ira khõ Lowalangi, wanga’asogõ buabua si nangea buabua wamalalini era’era. (F. 9, 20; 28, 29; 20, 21). 

21 Da’õ mbõrõ, wa lara’u ndra’o niha Yehuda, me sodo ba gosali, wa latandraigo wamunu ya’o. (F. 21, 30. 31). 

22 Ba me no itolodo Lowalangi, andrõ sodo irege ma’õkhõ andre, ba mamaduhu’õ ndra’o ba ndraono ba zatua; lõ ni’ombakha’õgu hadia ia baero niŵa’õ zama’ele’õ andrõ, salua dania, ba he baero niŵa’õ Moze, (Luk. 24, 44, b. t.), 

23 wa nifakao Keriso, awõ wa no ya’ia zi fõfõna ba wemaoso zi mate andrõ, sangombakha dania haga ba mbanua da’e, ba ba niha baero. (Luk. 24, 26 b. t.; 2, 32. Kor. I. 15, 4. 20. F. 13, 47). 

24 Ba me imanõ wamu’a ba hulunia, ba imane Feso, ebua linia: Owõhõ’õ Faulo! ifowõhõ ndra’ugõ sura, soya sibai andrõ. 

25 Ba imane Faulo: Tenga sowõhõ ndra’o, ya’ugõ, Feso si sõkhi! si ndruhu niŵa’õgu, soroi ba dõdõ. 

26 I’ila sa da’õ razo, ba zi lõ aiwõdo muhede; tebai manõ faduhu dõdõgu, so ba da’õ zi lõ irongo mege; tenga sa ba zi tobini telau da’õ no. (Yoh. 18, 20). 

27 Hadia, ya’ugõ razo, Agerifa, faduhu dõdõu ba niŵa’õ zama’ele’õ andrõ? 

28 U’ila, faduhu. Ba imane Agerifa khõ Waulo: Lõ arõu tõ, ba tobali niha Keriso ndra’o, õbe’e.

29 Ba imane Faulo: Mangandrõ ndra’o khõ Lowalangi ena’õ; he arõu, ba he lõ arõu, ba ena’õ tenga ha ya’ugõ, ena’õ dozi samondrongo khõgu ma’õkhõ andre tobali si mane ya’odo andre, baero rate andre. (F. 28, 29).

30 II. Ba maoso razo, awõ gõemandru, awõ Mberenike andrõ, awõ zidadao ba da’õ ba ngaira. (F. 25, 23). 

31 Laheta ira, fahuhuo, ba lamane: Lõ nifazõkhi niha andrõ bõrõ wamunu, ba he bõrõ worate ya’ia. (F. 25, 11). 

32 Ba imane Agerifa khõ Weso: Tola ni’efa’õ niha andrõ, na lõ nifulinia khõ kaizaro mena’õ.

 

HALÕŴÕ ZINENGE

FAZA 27

I. Lafoloyo Waulo, la’otarai Kaizaria, larugi Melite. II. Bade, ba aboto nowo.

1 I. Ba me no muhonogõi, moloyo ndra’aga ba Gitalia, ba labe’e Waulo, awõ nikuru tánõ bõ’õ õsa, ba danga gumandra zi otu, Yulio dõinia, kumandra zaradadu andrõ khõ kaizaro. (F. 25, 12. 21).

2 Ba mõiga ba nowo Gaderamiti, sedõna moloyo ba mbanua Azia misa, ba moloyoga; awõma Garisaro, banua Makedonia, banua Desalonika. (F. 19, 29). 

3 Ba mahemolu õ, ba marugi Zidona. Ba ebua dõdõ Yulio khõ Waulo, fahuohuo ia khõnia, itehe khõnia mõi ia khõ zi fahuwu khõnia ba latolotolo ia. (F. 24, 23). 

4 Ba aefaga ba da’õ, ba matõrõ tou Gifero, me angi moroi fõna. 

5 Ba me no matõrõ nasi tánõ ba Gilikia ba tánõ ba Wambilia, ba marugi si tou Mira, ba Likia. 

6 Ba da’õ isõndra kumandra andrõ nowo Alesandria, sanaŵa Italia, ba i’ohega ba da’õ. 

7 Ba me ara lõ sõkhisõkhi woloyo, me afõkhõ wondrugi Kenido, me lõ ibe’ega angi, ba matõrõ tou Gereta, tánõ ba Zalomone. 

8 Ba afõkhõ wanõrõ singa hulo, ba marugi naha sotõi ”labua si sõkhi”, ba zahatõ banua Lasaia. 

9 Ba no ara, ba nõ ata’u niha woloyo, me no aefa gõi mbaŵa wamoni, ba ifangelama ira Faulo, (Kor. II. 11, 26. Moz. III. 23, 27 b. t.), 

10 imane khõra: He ya’ami, u’ila, gõna ita famakao ba fa’ate’ala sebua ba woloyo andre, tenga ha ba nowo ba ba nõsinia, ba nosoda gõi. 

11 Ba ifondrondrongo kumandra niŵa’õ durumudi, awõ niŵa’õ nakoda, moroi ba niŵa’õ Waulo. 

12 Ba lõ sõkhi labua andrõ, ba wombaloi fa’aefa mbaŵa deu, ba ato zomasi ahetaga ba da’õ, ma tola marugi Wõnika, ba wombaloi fa’aefa mbaŵa deu; labua ba Gereta da’õ, tánõ ba gaekhula.

13 Ba me angi moroi raya, si lõ abõlõbõlõ, ba lawai tola niŵa’õra andrõ, ba ladõni zao ba lahafõ’õ ira, wanõrõ singa Gereta.

14 II. Ba lõ ara, ba ilabu tawuyu nangi, sotõi timu kaduo. 

15 Ba gõna ba nowo ba tebai ilaŵa nangi, ba mabõhõli, ba te’oloi’õ manõ ndra’aga. (Sin. 107, 25 b. t.). 

16 Ba me matõrõ hulo side’ide, sotõi Kalauda, ba ma’ifu tõ, ba tebai masõbi dundraha. 

17 Ba lasõbi yaŵa da’õ, ba lafake wangaro andrõ, labõbõ nowo. Ba ata’u ira tosake ba goso ene andrõ, ba labunu loyo, ba te’oloi’õ manõ nowo. 

18 Ba me iforege khõma angi, ba mahemolu õ, ba latibo’õ nõsi nowo. 

19 Ba dua wongi aefa da’õ ba latibo’õ gamagama ba nowo tangara. (Yon. 1, 5). 

20 Ba me ara lõ oroma luo ba lõ oroma ndrõfi, ba me iforege bade sabõlõbõlõ, ba ma’ifu lõ’õ sa’ae madõnadõna auri ndra’aga. 

21 Ba me no ara lõ si manga, ba mõi khõra Waulo, imane: He ya’ami fefu, ni’o’õ sa mena’õ niŵa’õgu no, fa bõi aheta ita ba Gereta, fa lõ gõna ita famakao andre, awõ wa’ate’ala andre. 

22 Ba iada’e, ba u’andrõ khõmi, bõi mibusi dõdõmi, lõ’õ sa tekiko ami, ha niha ami, ha owo zafufu dania. 

23 Noa sa mõi khõgu me owi mala’ika Lowalangi andrõ, sokhõ ya’o, ba si no mõido enoni gõi, (F. 5, 19), 

24 ba no imane khõgu: Bõi ata’ufi, Faulo, lõ tola lõ õrugi kaizaro, ba hiza, no ibe’e bualania khõu Lowalangi fefu nawõu soloyo. (F. 23, 11; 9, 15). 

25 Andrõ, bõi mibusi dõdõmi, ya’ami fefu! Faduhu sa dõdõgu khõ Lowalangi, itõrõ, si mane niŵa’õ khõgu. 

26 Ba lõ’õ sa tola lõ tosake ita ba hulo. (F. 28, 1). 

27 Ba me no feleõfa bongi sa’ae te’oloi’õ manõ misa ndra’aga ba nasi Aderia, ba talu mbongi, ba laŵa’õ ono nowo, te ahatõ danõ. 

28 Ba lalau wanu’a wa’abakha, ba dua wulu ngarõfa. Ba me no moloyo ma’ifu tõ, ba lafuli lalau, ba felelima ngarõfa. 

29 Ba ata’u ira, ma tosake ha gara, ba latibo’õ zao moroi ba gi’o nowo, õfa, ba omasi ira, na moluo. 

30 Ba la’alui ono nowo woloi moroi ba nowo, ladada ba nasi dundraha, fanguma’õra latibo’õ zao, moroi ba mbagi nowo; 

31 ba imane Faulo khõ gumandra andrõ ba ba zaradadu andrõ: Na aheta da’õ ba nowo, ba tebai auri ami. 

32 Awena la’eŵa daŵitaŵi dundraha saradadu, la’ekhugõ si tou. 

33 Ba gasagasa wa’amoluo, ba ifarou dõdõra fefu Faulo, ba wemanga gõra, imane: No feleõfa bongi ma’õkhõ mom ba lombaloi ami, ba lõ si manga, ma’ifu lõ ni’ami. (Sin. 102, 5). 

34 Andrõ u’andrõ khõmi, mi’ā gõmi, fangorifimi sa da’õ; sara mbu sa lõ’õ ba hõgõmi fefu saekhu. (Luk. 21, 18). 

35 Ba me aefa iŵa’õ da’õ, ba ihalõ roti, i’aohasi gõlõ Lowalangi, fõnara fefu, iboboto ba ibõrõtaigõ manga. (Mat. 14, 19). 

36 Awena terara dõdõra fefu ba la’ā gõi gõra. 

37 Ba dua ngaotu a fitu ngafulu a õnõ ndra’aga fefu ba nowo andrõ. 

38 Ba me no abuso ira õra, ba lakaohasi nowo, latibo’õ si tou mbalazo, ba nasi. 

39 Ba me moluo, ba lõ la’ila watahõgõ danõ andrõ. Ba la’ila zadõni asi, si so ene, ba mamagõlõ ira, ba da’õ ladõlõ nowo, na tola. 

40 Ba la’eŵa zinali zao, larõi ba nasi, ba fao ba da’õ gõi latoto’õ mbõbõ gamuri andrõ, lataŵi loyo sabu, tánõ ba nangi ba la’angamurisi baene nowo. 

41 Ba me gõna ba dure, ba lasakeni, ba tetaru sa mbagi, lõ maliŵaliŵa, ba aboto gi’o ba wa’abõlõ ndrulu. (Kor. II. 11, 25). 

42 Ba mamagõlõ zaradadu, ba wamunu nikuru andrõ, fa bõi moloi, na so zolangi, sanaŵa ene ena’õ. (F. 16, 27). 

43 Ba edõna i’orifi Waulo kumandra andrõ, ba itenaŵa ira, ba iŵa’õ, ofõna latibo’õ ira ba nasi sangila molangi, 

44 ba wogamõ tanõ, ba tánõ bõ’õ, ba ba wafa õsa ba ba gamotola nowo õsa. Ba tobali ahori auri ira ba zi manõ, lakhamõ danõ.

 

 

HALÕŴÕ ZINENGE

FAZA 28

 

I. Nilau Waulo ba Melite, II. Irugi Roma. III. Tetaha ia ba da’õ ba mangombakha ia.

1 I. Ba me no aefaga ba wamakiko andrõ, ba marongo, Melite dõi hulo andrõ. (F. 27, 26. 39). 

2 Ba ebua sibai dõdõ niha bõ’õ andrõ khõma, la’ebua’õ galitõ, ba lafonaha ndra’aga fefu, me no ilabu teu ba me o’afuga. (Kor. II. 11, 27). 

3 Ba me ira’ui zandra’u nono geu Faulo, ba wame’e ba galitõ, ba hiza gulõ, soloi ba wa’aukhu galitõ, ira’u danga Waulo. 

4 Ba me la’ila niha andrõ gulõ andrõ, sanaŵanaŵa ba dangania, ba faoma lamane khõ nawõra: Oroma, wa sange’e niha andrõ, ibunu ia ”solau balõ”, he ŵa’ae no aefa ia ba nasi. (Luk. 13, 2; Moz. V. 32, 24; Amos. 9, 3). 

5 Ba ifazaumba ba galitõ gulõ andrõ, ba lõ gõna ia hadia ia, safõkhõ. (Mar. 16, 18). 

6 Ba labalobalõi, ma abao, ba ma i’ozumagõ manõ alau tou ia ba mate. Ba ara labalobaloi, ba la’ila, lõ hadia zafõkhõ, si gõna ia, ba tobali, Lowalangi ia laŵa’õ. (F. 14, 11). 

7 Ba ba zahatõ ba mbanua andrõ motanõ gumandru hulo andrõ, Fubelio dõinia. Ba ifa’amõiga khõnia, tõlu bongi wa’ara ibe’ebe’e gõma, wa’obõwõ. 

8 Ba mofõkhõ nama Wubelio andrõ, akhõmõ ba mendro dalu. Ba mõi khõnia si bakha Waulo, mangandrõ, itufa tanga zofõkhõ, ifadõhõ wõkhõ. (Mat. 8, 14; Yak. 5, 14 b. t.). 

9 Ba me aefa da’õ, ba mangondra gõi zofõkhõ bõ’õ ba hulo andrõ, ba tefadõhõ wõkhõra. (Mat. 4, 24).

10 Ba lafosumange sibai ndra’aga, ba me mofanõga, ba labe’e zoguna khõma.

11 II. Ba tõlu waŵa, ba moloyoga, ba nowo si no mombaloi fa’aefa mbaŵa deu ba hulo andrõ, moroi ba Alesandria, sotandra sifaero andrõ. 

12 Ba manaoga ba Zirakuso, tõlu bongima ba da’õ. 

13 Ba me no mafasui, ba marugi Regio. Ba sara wongi aefa da’õ, ba ilau angi moroi raya, ba mahemolu õ, ba marugi Wuteoli. 

14 Falukhaga dalifusõ ba da’õ, ba la’andrõ khõma, ma’iagõ khõra, fitu bongi; ba marugi sa’ae Roma. (F. 21, 4). 

15 Ba so moroi ba da’õ dalifusõ, me no larongo ndra’aga, lafaondragõ ndra’aga ba Gafiforo ba ba Daretabene. Ba me i’ila da’õ Faulo, ba isuno Lowalangi ba terara dõdõnia. (Rom. 1, 10 b. t.).

16 Ba me no marugi Roma, ba latehe khõ Waulo, sambua nahania, awõnia zaradadu samõsa, sanato ya’ia. (F. 23, 11; 27, 3).

17 III. Ba tõlu bongi, ba ifalukha’õ Faulo zatua niha Yehuda, si so ba da’õ. Ba me so ira, ba imane khõra: He ya’ami, ira talifusõ, he ŵa’ae lõ horõgu ba khõda, ba he ŵa’ae lõ si sala ndra’o ba huku ndra tua, ba no labõbõ ndra’o ba Yeruzalema, ba no labe’e ba danga Ndrawa Roma ndra’odo. (F. 25, 8). 

18 Ba la’efa’õ ndra’o mena’õ da’õ, me no lasekhegõ, me lõ hadia ia mbõrõ wamunu ya’o khõgu. (F. 26, 32). 

19 Ba me mamadaõ niha Yehuda, ba lõ lala bõ’õ khõgu, baero wamuli khõ kaizaro, tenga sa taŵa’õ so ni’adugõgu talifusõgu. (F. 25, 11. 12). 

20 Da’õ sa mbõrõ, wa ufakaoni’õ ami, ena’õ u’ila ami, ba fahuhuodo khõmi: fanõtõna Ndraono Gizeraëli andrõ sa mbõrõ, wa terate ndra’o rate andre. (F. 26, 6 b. t. Tim. II. 1, 16). 

21 Ba lamane khõnia: Lõ’õ sa nitemama sura, ba khõmõ, moroi ba Yudaia, ba lõ’õ gõi si mõi dalifusõ, sangombakha hadia ia zi lõ sõkhi ba khõu. 

22 Ba niŵa’õma, sõkhi marongo khõu, he wisa gera’erau; ba zi faehu huku andrõ sa, ba no marongo, tefadaõ manõ niŵa’õra, fefu gofu heza so ira. (F. 24, 5. 14. Luk. 2, 34). 

23 Ba la’õtõ khõnia mbongi, ba ato zi mõi khõnia ba zi mõrõ ia. Ba ibotokhi khõra mbanua Lowalangi andrõ ba ifaduhu’õ dõdõra khõ Yesu, moroi ba goroisa Moze ba moroi ba zura zama’ele’õ, i’otarai si hulõ wongi, irugi tánõ owi. (F. 18, 5 b. t.; 19, 8. Luk. 24, 27). 

24 Ba so õsa zi faduhu tõdõ ba niŵa’õnia, ba so gõi zi lõ mamati. (F. 17, 4; 14, 4). 

25 Ba me lõ ha sara dõdõ, ba mofanõ ira, me iŵa’õ zambua li Faulo, me imane: Duhu niŵa’õ Geheha ni’amoni’õ, ni’ombakha’õ Yesaya, sama’ele’õ andrõ, khõ ndra tuami, (Fet. II. 1, 21), 

26 me imane: ”Ae ba niha andrõ, ba õmane: Mirongo tõgi dalingami, ba lõ’õ manõ aboto ba dõdõmi, ba anehe hõrõmi, ba lõ’õ manõ mi’ila geluaha. (Yes. 6, 9 b. t. Mat. 13, 14 b. t.). 

27 Noa sa abe’e dõdõ niha andrõ ba no afisofiso dõgi dalingara, ba hõrõra, ba no lafakifu, fa lõ la’ila hõrõra, fa lõ larongo tõgi dalingara, fa lõ aboto ba dõdõra, fa lõ lafuli ira, fa lõ u’orifi ira.” 

28 Ba ya’aboto ba dõdõmi, no tefa’ohe’õ ba niha baero wangorifi andrõ, khõ Lowalangi, ba mamondrongo gõi da’õ. (F. 13, 46 b. t.). 

29 Ba me aefa iŵa’õ, ba mofanõ niha Yehuda, wa’abõlõ wasosotara khõ nawõra. 

30 Ba alo’o mendrua fakhe Waulo ba nomo andrõ niwawalõnia, ba ifa’amõi fefu zi mõi yomo khõnia. 

31 Ituriagõ mbanua Lowalangi ba ifahaõ niha ba duria Zo’aya, Yesu, ma’ifu lõ aiwõ ia ba lõ mutenaŵa. (Efes. 6, 18—20).