FAMA’ELE’Õ
FAMA’ELE’Õ
FAMA’ELE’Õ
FAZA 1
I.
Famobõrõ.
II. Fangowai Yohane banua niha Keriso andrõ, ba Azia. III. Fama’ele’õ Yesu ya’ia
ba oroisania khõ Yohane.
1 I.
Fama’ele’õ Yesu Keriso da’e, nibe’e Lowalangi khõnia, ba wangoroma’õ ba
genoninia andrõ, he wisa dania, si lõ arā tõ; ba no ifa’ila’õ, no ifa’ohe’õ ba
mala’ikania, khõ genoninia Yohane andrõ. (F. 22, 6. 7).
2 Si
no mamaduhu’õ taroma li Lowalangi, awõ wamaduhu’õ Yesu Keriso andrõ, ha wa’oya
ni’ilania. (Yoh. 21, 24. F. 19, 10. Yoh. I. 1, 1. b. t.).
3 Ya’ahowu
zombaso taroma li fama’ele’õ andrõ, ba samondrongo ya’ia, ba solo’õ nisura
andrõ ba da’õ; noa sa ahatõ ginõtõnia andrõ. (F. 22, 7. 10. Luk. 11, 28. Fet.
I. 4, 7).
4 II. Yohane zanura da’e, ba mbanua niha Keriso andrõ, si fitu, ba
Azia, Yafalukha ami wa’ebua dõdõ, ba fa’ohahau dõdõ, khõ zi so andrõ, si no so
fõna, ba si mõi dania, ba ba Geheha andrõ, si fitu, si so fõna dadaomania
andrõ, (F. 4, 8; 3, 1. Yes. 11, 2),
5 ba
khõ Yesu Keriso, samaduhu’õ andrõ, si lõ farõi, si a’a zi oroi ba ngai zi mate,
ba samatõrõ razo andrõ, ba guli danõ, khõ zangomasi’õ ya’ita andrõ, si no
mangefa’õ ya’ita ba horõda andrõ, donia, (F. 3, 14. Yes. 55, 4. Yoh. 18, 37.
Kol. 1, 18. Efes. 5, 25; 1, 7),
6 ba
si no mame’e banua ya’ita ba ere Namania Lowalangi, ya khõnia lakhõmi ba fa’abõlõ,
irugi zi lõ aetu! Yaduhu. (F. 5, 10. Fet. 1. 2, 5. 9).
7 Hiza,
so ia ba lawuo, ba la’ila dania ia dozi hõrõ, ba samahõ ya’ia andrõ, ba mege’ege
dania ba khõnia fefu soi niha ba guli danõ. Ya’ia, Yaduhu. (Mat. 24, 30. Dan.
7, 13. Sakh. 12, 10). 8 Alafa ndra’o ba omega ndra’o, iŵa’õ So’aya
Lowalangi, si so, ba si no so fõna, ba si mõi dania, samatõrõ fefu, hadia ia.
(F. 22, 13. Yes. 41, 4).
9 III. Ya’o, Yohane, talifusõmi ba wamakao andrõ, ba ba mbanua
andrõ, ba ba wanaha tõdõ andrõ, ba khõ Yesu, no sodo ba hulo andrõ, Fatemo dõi,
bõrõ daromali Lowalangi ba famaduhu’õ Yesu andrõ. (Fet. I. 5, 1. Tim. II. 2,
12. F. 20, 4).
10 Ba
aheta nosogu, me luo Zo’aya, ba urongo furigu li sebua, hulõ li dorofe, (F. 4,
1. 2),
11 imane:
Hadia ni’ilau, ba tanõ ba zura, ba fa’ohe’õ ba mbanua niha Keriso, si fitu
andrõ, ba Nefeso, ba ba Zimina, ba ba Weregamo, ba ba Diatira, ba ba Zade, ba
ba Wiladefia, ba ba La’odikia. (Yes. 48, 12).
12 Ba
ubali’õ ndra’odo, ba wamaigi li andrõ, sihede khõgu; ba me ubali’õ ndra’o, ba u’ila
naha wandru ana’a, fitu, (Sakh. 4, 2),
13 ba
ba gotalua naha wandru andrõ, ba si hulõ Nono Niha, no mobaru sanau, ba no
mamõbõ talu ana’a, ba dõlõ’ania. (F. 2, 1; 14, 14. Dan. 7, 13; 10, 5).
14 Ba
hõgonia ba bunia, ba no afusi, hulõ mbu mbiribiri safusi, hulõ mbetua, ba
hõrõnia, ba no hulõ holahola galitõ, (Dan. 7, 9. F. 2, 18),
15 ba
ahenia, ba hulõ garamba nifahele, ba galitõ, ba linia, ba no hulõ wegosogoso
nidanõ sebua. (F. 10, 1; 14, 2. Dan. 10, 6).
16 Ba
so ba dangania kambõlõ ndrõfi, fitu, ba i’otarai mbawania gari satarõ, si faoma
bawa, ba bawania, ba no hulõ wehaga luo, ni fondrege wa’abõlõnia. (F. 1, 20; 2,
12; 19, 15. Heb. 4, 12).
17 Ba
me u’ila ia, ba alaudo tou, fõnania, hulõ zi mate. Ba itufa ndra’o tangania
kambõlõ, imane: ”Bõi ata’ufi, si fõfõna ndra’o, ba safuria, (F. 2, 8),
18 ba
sauri andrõ; ba no mate ndra’o, ba hiza, no auri ndra’o, irugi zi lõ aetu ba so
khõgu wogoë ba wa’amate ba ba mbanua tou. (Rom. 6, 9. 10. F. 3, 7).
19 Ba
tanõ ba zura hadia ni’ilau, ba hadia iada’e, ba hadia dania, na aefa da’e. (F.
4, 1).
20 Si
no tobini khõu andrõ, dõfi andrõ, si fitu, ni’ilau ba dangagu kambõlõ, awõ naha
wandru ana’a, andrõ, si fitu: Dõfi andrõ, si fitu, ba no mala’ika mbanua si fitu
andrõ, ba naha wandru andrõ, si fitu, ba no fitu banua.” (F. 2, 1).
FAMA’ELE’Õ
FAZA
2
I. Sura ba mbanua
niha Keriso ba Nefeso, ba II. Ba Zimina, ba III. ba Weregamo, ba IV. ba
Diatira.
1 I. Ba mala’ika mbanua
andrõ, ba Nefeso, ba da’õ sura: Da’õ niŵa’õ zolohe tangania kambõlõ dofiandrõ
si fitu, sowaõwaõ ba gotalua naha wandru ana’a andrõ, si fitu: (F. 1, 13—20).
2 No u’ila mbuabuau
andrõ, ba fa’erege dõdõu, ba fa’anau gõlõu, awõ wa tebai õtaha zi lõ sõkhi; ba
no õtandraigõ zanguma’õ sinenge ira, ba tenga sa ya’ia, ba no õsõndra, wa sofaya
ira; (Tes. I. 1, 3. Efes. 5, 11. Yoh. I. 4, 1);
3 ba no õtaha dõdõu
ba no õtaõgõ wamakao, bõrõ dõigu andrõ, ba lõ satage ndra’ugõ.
4 Ba da’õ zi fatuwu khõgu,
ba khõmõ andrõ, wa no õbõhõli wa’omasiu ba mbõrõta andrõ.
5 Andrõ tõrõtõrõ tõdõu
hadia zi fahole khõu, ba falalini gera’erau, ba alui mbuabua ba mbõrõta andrõ;
ba na lõ õ’o’õ da’õ, ba mõido khõu, ba utuli’õ naha wandru andrõ khõu, ba
nahania, na lõ õfalalini gera’erau. (F. 1, 20).
6 Ba da’õ zi so khõu;
õ’ogorofi wolau nikola’iti andrõ, ni’ogorofigu gõi. (F. 2, 15. Sin. 139, 21.
22. Fet. II. 2, 2 b. t.).
7 Si so tõgi dalinga,
ba yamufondrondrongo hadia niŵa’õ Geheha ba mbanua andrõ: Ha niha zi mõna, ba ube’e
õnia mbua geu fangorifi andrõ, si so ba waradaiso andrõ, khõ Lowalangi! (Mat.
11, 15. F. 21, 7; 22, 2. Moz. I. 2, 9).
8 II. Ba ba mala’ika mbanua andrõ ba
Zimina, ba da’õ sura: Da’õ niŵa’õ zi fõfõna andrõ ba safuria, si no mate fõna,
ba si no auri iya’e: (F. 1, 17. 18).
9 No u’ila wamakaomõ
andrõ, ba fa’anumanamõ — ba no so’ana’a ndra’ugõ — ba fanandraŵaisi ya’ugõ
andrõ, ba zanguma’õ niha Yehuda ira, ba tenga sa ya’ia, ha sekola Zatana ira.
(Kor. II. 6, 10. F. 3, 9. Yoh. 8, 39. 44).
10 Bõi ata’ufi hadia
ia, nitaõgõu dania. Hiza, ibe’e ba gurunga õsa ami Afõkha, ena’õ tetandraigõ
ami, ba nifakao ami, fulu bongi. Bõi farõi ndra’ugõ, irugi wa’amate, ba ube’e khõu
dakula fa’auri andrõ. (Mat. 10, 28. Fet. I. 4, 12. Kor. I. 9, 25. Yak. 1, 12).
11 Si so tõgi dalinga,
ba yamufondrondrongo hadia niŵa’õ Geheha ba mbanua andrõ: Ha niha zi mõna, ba
tebai i’alani fa’amate si samuza andrõ. (F. 20, 6. 14).
12 III. Ba ba mala’ika mbanua andrõ, ba
Weregamo, ba da’õ sura: Da’õ niŵa’o zi so gari satarõ andrõ, si faoma bawa: (F.
1, 16).
13 U’ila heza so nahau,
ba zi so dadaoma Zatana andrõ. Ba lõ nibõhõliu tõigu andrõ, ba lõ ni’osilõ’õgõu
famati andrõ khõgu, me luo Gandrifa andrõ, samaduhu’õ ya’o, si lõ farõi andrõ,
nibunu ba khõmi, ba zi so naha Zatana. (F. 3, 8).
14 Ba so ma’ifu zi fatuwu
khõgu, ba khõmõ andrõ, me no so khõu ba da’õ zolo’õ famahaõ Mbile’amo andrõ.
Samahaõ Balaki andrõ, ba wamobõrõ fangala fõna Ndraono Gizeraëli, ba wemanga gõ
nadu ba ba wohorõ. (Moz. IV. 31, 16. Yud. a. 11).
15 Ba so khõu gõi zolo’õ
famahaõ nikola’iti andrõ, si manõ gõi. (F. 2, 6).
16 Falalini gera’erau.
Ba na lõ da’õ, ba alio mõido khõu, ba usuwõ ira gari mbawagu andrõ. (Yes. 11,
4. F. 19, 15).
17 Si so tõgi dalinga,
ba yamufondrondrongo hadia niŵa’õ Geheha, ba mbanua andrõ: Ha niha zi mõna, ba ube’e
khõnia ”mana” si tobini andrõ, ba ube’e khõnia gara safusi, ba tõi si bohou nisura
ba dete gara andrõ, si lõ i’ila niha, baero zanema ya’ia andrõ. (Yoh. 6, 32. Yes.
62, 2).
18 IV. Ba ba mala’ika mbanua andrõ ba
Diatira, ba da’õ sura: Da’õ niŵa’õ Nono Lowalangi andrõ, si so hõrõ andrõ, si hulõ
holahola galitõ, ba si so ahe, si hulõ garamba: (F. 1, 14. 15. Hal. zin. 16,
14).
19 No u’ila mbuabuau
andrõ, ba fa’omasi andrõ, ba famati andrõ, ba fanolou andrõ, ba fanaha tõdõ
andrõ, awõ wa tedou mbuabuau safuria andrõ, moroi ba zi fõfõna. (Heb. 6, 10).
20 Ba da’õ zi fatuwu khõgu,
ba khõmõ andrõ, wa õtehe galawe andrõ, Izebela, sanguma’õ sama’ele’õ ia, ba no
samahaõ enonigu andrõ ba samaelungu ya’ira, ba wohorõ, ba ba wemanga gõ nadu.
(Raz. I. 16, 31. Moz. II. 34, 15).
21 Ba no ufonoso ia,
ena’õ ifalini gera’erania, ba lõ edõna ia ifalalini, ba wamõhõi fohorõnia andrõ
ena’õ.
22 Hiza, utuli’õ tou
ia ba zalo; ba awõnia sohorõni ya’ia, ba ube’e ba wamakao sabõlõbõlõ, na lõ
lafalalini gera’erara, ba wamõhõi buabuania andrõ.
23 Ba ononia, ba ububunu
ba ya’aboto ba dõdõ mbanua niha Keriso fefu misa, ya’o zanekhegõ bua, aŵo dõdõ,
ba udozigõ ami wanulõni buabua zamõsana. (Raz. II. 10, 7—18. Sin. 7, 10. Mat.
16, 27. F. 20, 12. 13).
24 Ba uŵa’õ khõmi, ya’ami
zi tosai ba Diatira, ha wa’ato zi lõ famahaõ andrõ, si lõ aboto ba dõdõ fa’abakha
dõdõ Zatana andrõ, niŵa’õra: Lõ’õ sa’ae ufonoro ami noro bõ’õ.
25 Ba hadia zi so khõmi,
ba bõi mibõhõli, irege sodo. (F. 3, 11).
26 Ba ha niha zi mõna,
ba si lõ mamõhõi halõŵõ khõgu, irugi gamozua, ba ube’e barõ mbawania niha
baero, (F. 20, 4; 22, 5. Kor. I. 6, 2),
27 ba ikubaloi ira si’o
si’ōli, si mane na larasa mbowoa tanõ, si mane fanemagu gõi mege khõ Namagu;
(F. 19, 15. Sin. 2, 8. 9).
28 Ba ube’e khõnia
madala andrõ. (Fet. II. 1, 19).
29 Si so tõgi dalinga,
ba yamufondrondrongo hadia niŵa’õ Geheha ba mbanua andrõ! (F. 3, 6).
FAMA’ELE’Õ
FAZA
3
I. Sura ba mbanua
niha Keriso ba Zade, ba II. ba Wiladefia, ba III. ba La’odikia.
1 I. Ba ba mala’ika
mbanua andrõ ba Zade, ba da’õ sura: Da’õ niŵa’õ zi so Eheha Lowalangi andrõ, si
fitu, awõ ndrõfi andrõ, si fitu: No u’ila mbuabuau andrõ, wa no tõimõ zauri, ba
no si mate ndra’ugõ. (F. 1, 4. 16. F. 5, 6).
2 Faoso, ba abe’e’õ
zi tosai andrõ, si lõ ara tõ mate; tenga sa so’ahonoa mbuabuau andrõ, fõna
Lowalangigu, wamaigigu. (Hes. 34, 4. 16).
3 Andrõ tõrõtõrõ tõdõu
he wisa wanemau mege, ba he wisa wamondrongou, ba bõi bõhõli, ba falalini gera’erau.
Ba na si mõrõ ndra’ugõ, ba sodo dania, hulõ zanagõ, ba lõ’õ manõ õ’ila ha wa’alaŵa
luo urugi ndra’ugõ. (F. 16, 15. Tes. I. 5, 2 b. t.).
4 Ba so õsa khõu dõi
ba Zade, si lõ mamoda’i nukhara, lõ larai, ba awõgu dania ira, nukha safusi nukhara,
me no si nangea ira. (F. 7, 14. Yes. 64, 6).
5 Si manõ zi mõna
andrõ, nifonukha nukha safusi, ba lõ’õ manõ sa’ae ubunu dõinia ba zura wa’auri
andrõ, ba u’ombakha’õ dõinia, ba zi so Amagu, ba ba zi so mala’ika andrõ khõnia.
(F. 6, 11. Fil. 4, 3. Mat. 10, 32 b. t.).
6 Si so tõgi dalinga,
ba yamufondrondrongo hadia niŵa’õ Geheha ba mbanua andrõ!
7 II. Ba ba mala’ika mbanua andrõ ba
Wiladefia, ba da’õ sura: Da’õ niŵa’õ ni’amoni’õ andrõ, si duhu andrõ, si so
fogoë andrõ khõ Dawido, samokai si lõ sokusi, ba sokusi si lõ samokai. (F. 6,
10; 1, 18. Yes. 22, 22. Mat. 16, 19).
8 No u’ila mbuabuau
andrõ; hiza, no ube’e fõnau mbawandruhõ si no teboka, si lõ i’ila ikusi niha,
ha niha ia; si lõ arõurõu sa wa’abõlõu, ba lõ’õ sa nibõhõliu taroma ligu andrõ,
ba lõ ni’osilõ’õgõu tõigu. (Kor. I. 16, 9).
9 Hiza, uhalõ niha ba
zekola Zatana andrõ, sanguma’õ niha Yehuda ira, ba tenga sa ya’ia; sofaya ira.
Hiza, mõi ira ube’e, ba mangalulu ira, latuhi danõ fõnau. Ba aboto ba dõdõra,
wa no u’omasi’õ ndra’ugõ. (F. 2, 9. Yes. 49, 23; 60, 14).
10 Me no lõ nibõhõliu
taroma li ba wa’anau gõlõ andrõ, khõgu, ba lõ’õ gõi ubõhõli ndra’ugõ, na baŵa
wanandraigõ andrõ, sondrugi dania uli danõ ma’afefu, ba wanandraigõ niha sowanua
ba guli danõ. (Fet. II. 2, 9. Mat. 24, 21 b. t.).
11 Alio sodo; bõi
bõhõi zi ho so khõu, fa bõi lahalõ dakulamõ andrõ. (F. 2, 10. 25. Kol. 2, 18).
12 Ha niha zi mõna, ba
ube’e ehomo ba gosali Lowalangigu, ba lõ’õ manõ sa’ae aheta ia, ba usura ba
detenia dõi Lowalangigu andrõ, ba tõi mbanua Lowalangigu andrõ, tõi Yeruzalema
si bohou, si mõi mitou, moroi ba zorugo, moroi ba Lowalangigu, ba tõigu, si
bohou andrõ. (Yes. 56, 5. F. 2, 17; 22, 4; 21, 2).
13 Si so tõgi dalinga,
ba ya’mufondrondrongo hadia niŵa’õ Geheha ba mbanua andrõ!
14 III. Ba ba mala’ika mbanua andrõ ba
La’odikia, ba da’õ sura: Da’õ niŵa’õ zi ”yaduhu” andrõ, samaduhu’õ andrõ, si lõ
farõi ba si duhu, bõrõta nifazõkhi Lowalangi andrõ: (Kol. 4, 13. 15. F. 1. 5.
Kor. II. 1, 20. Kol. 1, 15 b. t.):
15 No u’ila mbuabua
andrõ, wa tenga sokafu ndra’ugõ, ba tenga gõi saukhu. Ena’õ na fasambalõ ndra’ugõ,
ma sokafu, ba ma saukhu.
16 Ba me no si manõ,
me no sanakhõnakhõ ndra’ugõ, tenga saukhu ba tenga sokafu, ba utura’õ ndra’ugõ
ba mbawagu.
17 Õŵa’õŵa’õ sa: ”Niha
si so ndra’o, no usõndra, lõ hadia ia zambõ khõgu,” ba lõ’õ sa õ’ila, wa no sebua
akaola ndra’ugõ, ba sahakhõ dõdõda, ba si numana, ba sau’a, ba si lõ nukha.
(Hos. 12, 9. Kor. I. 4, 8).
18 Uŵa’õ sa khõu, õtuka
gana’a khõgu, si no mukhozi ba galitõ, ena’õ mo’ana’a ndra’ugõ, ba nukha safusi,
ena’õ monukha’õ, fa lõ oroma zaila’õ, me no lõ nukhau, ba daludalu hõrõ, ba wogule’õ
ba hõrõu, ena’õ õ’ila niha. (Amaed. 8, 10 b. t. Sakh. 13, 9. F. 16, 15).
19 Ha niha sa zomasi
ndra’o, ba utegu, ba u’otu’õ; andrõ forege, ba falalini gera’erau. (Yob. 5, 17.
Heb. 12, 6).
20 Hiza no so ndra’o
moroi tou, ba ubõkõbõkõ mbawandruhõ. Na so zamondrongo ligu, ba samokai bawandruhõ,
ba khõnia mõido yomo, ba orudu manga ndra’aga. (Luk. 12, 36 b. t. Yoh. 14, 23).
21 Ha niha zi mõna, ba
utehe khõnia, mudadao ia awõgu, ba dadaomagu andrõ, si mane ya’o, me no mõnado,
ba me no dumadaodo, awõ Namagu, ba dadaomania. (Luk. 22, 29. Heb. 12, 2).
22 Si so tõgi dalinga,
ba yamufondrondrongo hadia niŵa’õ Geheha ba mbanua andrõ!
FAMA’ELE’Õ
FAZA
4
I. Dadaoma
Lowalangi. II. Satua andrõ, si dua wulu a õfa, ba saliŵaliŵa ba danõ andrõ, si
õfa nga’eu. III. Fangalulu khõ Lowalangi, si lõ aetu andrõ.
1 I. Ba aefa da’õ, ba
so ni’ilagu, ba hiza mbawandruhõ, si no teboka, ba zorugo, ba li andrõ, si
fõfõna urongo mege, si hulõ li dorofe, me humede ia khõgu, ba imane: Ae miyaŵa
ba da’e, ba u’oroma’õ khõu hadia dania, na aefa da’e. (Hes. 1, 1).
2 Ba i’anema’õ aheta
nosogu, ba hiza dadaoma nifedadao ba zorugo, ba ba dadaoma andrõ, ba so
zidadao, (F. 1, 10; 20, 11),
3 ba sidadao andrõ,
ba no hulõ weremata yasibi ba hulõ weremata aki andrõ, wamaigigu, ba no tefasui
dumi dadaoma andrõ, hulõ zumurudi, wamaigigu. (Hes. 1, 26—28).
4 II. Ba no tefasui dadaoma andrõ
dadaoma bõ’õ, dua wulu a õfa, ba dua wulu a õfa zatua, sidadao ba dadaoma
andrõ, si so nukha safusi, ba takula ana’a, ba hõgõra. (F. 11, 16; 19, 4).
5 Ba si otorai
dadaoma no mege, ba gari mbanua, ba li niha, ba fe’ugu’ugu mbanua, ba fitu zulu
alitõ siholahola, fõna dadaoma andrõ, ya’ia Geheha Lowalangi andrõ si fitu. (F.
1, 4).
6 Ba fõna dadaoma
andrõ, ba hulõ mbaŵa nidanõ sõrõmi, faoma ira mbaluri; ba ba dalu dadaoma, ba
ba zi fasui dadaoma, ba õfa nga’eu zaliŵaliŵa ba danõ, no falawu hõrõ, he moroi
fõna, ba he moroi furi. (F. 15, 2; 5, 6. 8. Hes. 1, 5; 18, 22).
7 Si sageu, ba hulõ
zingo, ba si sageu, ba hulõ nono zaŵi, ba bawa zi sageu, ba hulõ mbawa niha, ba
si sambua, ba hulõ moyo sihombo. (Hes. 1, 10).
8 III. Ba ba zaliŵaliŵa ba danõ andrõ
si õfa nga’eu, ba õnõ gafi zageu, ba no afõnu ira hõrõ, fasui, ba mibakha, ba
lõ labatobato bongi ma’õkhõ, lamane: Ni’amoni’õ, ni’amoni’õ, ni’amoni’õ Zo’aya,
Lowalangi, samatõrõ fefu hadia ia, si no so fõna, ba si so iada’e, ba si moi
dania! (Hes. 1, 6. 11. Yes. 6, 2. 3. F. 1, 4).
9 Ba ero na labe’e
saliŵaliŵa ba danõ lakhõmi ba sumange ba fangandrõ saoha gõlõ, ba zidadao
andrõ, ba dadaoma, sauri, irugi zi lõ aetu, (F. 4, 2; 5, 14),
10 ba latuhi danõ satua
andrõ, si dua wulu a õfa, fõna zidadao andrõ, ba dadaoma andrõ, mangalulu ira, khõ
zauri andrõ, irugi zi lõ aetu, ba latou’õ tou dakulara no mege, fõna dadaoma,
ba lamane:
11 No si nangea manema
ndra’ugõ lakhõmi ba sumange ba fa’abõlõ, ya’ugõ So’aya ya’aga, Lowalangima, me
no ya’ugõ zamazõkhi fefu hadia ia, ba bõrõ nilau dõdõu, wa so ia, awõ wa tefazõkhi
ia. (F. 5, 12. 13. Yoh. 1, 3).
FAMA’ELE’Õ
FAZA
5
I. Sura andrõ, si
fitu tandro, II. Fanuno Ono mbiribiri andrõ, samokai dania.
1 I. Ba u’ila ba
danga zidadao ba dadaoma andrõ, ba dangania kambõlõ, zura, nisura tánõ bakha ba
tánõ baero, si no mufotandro, fitu dandronia. (F. 4, 2. 9. Hes. 2, 9. 10).
2 Ba u’ila mala’ika
sabõlõ, si’ao, ebua linia, imane: Ha niha zi nangea mamokai sura andrõ, ba si
nangea mamo’a tandronia andrõ?
3 Ba lõ sangila, he
ba zorugo, ba he ba guli danõ, ba he barõ danõ, lõ sangila mamokai sura andrõ,
ba famaigi ya’ia.
4 Ba mege’ege sibai
ndra’odo, me lõ falukha zi nangea mamokai sura andrõ, ba famaigi ya’ia.
5 Ba imane khõgu satua
andrõ, si samõsa: Bõi e’e; hiza, no mõna zingo andrõ, mado Yuda, lewiõ ba ŵa’a
Dawido andrõ, ba wamokai sura andrõ, ba tandro andrõ, si fitu. (F. 4, 4; 22,
16. Moz. I. 49, 9. 10. Rom. 15, 12).
6 II. Ba u’ila ba dalu dadaoma andrõ,
ba ba gotalua zaliŵaliŵa ba danõ andrõ, si õfa nga’eu, ba ba gotalua zatua
andrõ Nono mbiribiri, sizizio, hulõ nitaba, fitu dandrunia, ba fitu hõrõ, ya’ia
Geheha Lowalangi andrõ, si fitu, nifatenge ba guli danõ ma’asagõrõ. (F. 22, 1;
1, 4. Yoh. 1, 29. Sakh. 3, 9; 4, 10).
7 Ba so ia, ba ihalõ
zura andrõ, ba danga zidadao ba dadaoma andrõ, ba dangania kambõlõ.
8 Ba me ihalõ zura
andrõ, ba latuhi danõ saliŵaliŵa ba danõ andrõ, si õfa nga’eu, ba satua andrõ,
si dua wulu a õfa, fõna Nono mbiribiri andrõ, no dozi ira biola ba figa ana’a,
si no afõnu kumõyõ, ya’ia wangandrõ niha ni’amoni’õ andrõ. (F. 4, 9. 10; 14, 2;
8, 3. 4).
9 Ba manunõ ira, sinunõ
si bohou, lamane: No si nangea ndra’ugõ, ba wangai sura andrõ, ba ba wamokai
tandronia; me no mutaba ndra’ugõ, ba me no õhõli niha domõ, khõ Lowalangi,
moroi ba ngawalõ niwa fefu, ba moroi ba ngawalõ li, ba moroi ba ngawalõ mado,
ba moroi ba ngawalõ soi fefu, (F. 14, 3, 4. Hal. zin. 20, 28. Kol. 1, 14. Fet.
I. 1, 18. 19),
10 ba no õbali’õ banua
Lowalangida ba ere ira, ba salaŵa ira dania, ba guli danõ. (F. 1, 5. 6; 20, 6.
Fet. I. 2, 9).
11 Ba u’ila ba urongo
zi hulõ li mala’ika si no ato, si fasui dadaoma andrõ, ba saliŵaliŵa ba danõ
andrõ, ba satua andrõ, ba fa’atora, ba no mewulu ngahõnõ wa fulu ngahõnõ ba
mehõnõ wa hõnõ; (Dan. 7, 9. 10);
12 ebua lira, lamane;
No si nangea Nono mbiribiri andrõ, si no mutaba, ba wanema fa’abõlõ ba fo’ana’a
ba fa’atuatua ba fa’abe’e ba sumange ba lakhõmi ba howuhowu! (F. 4, 11).
13 Ba fefu, hadia ia,
nifazõkhi Lowalangi, si so ba zorugo ba ba guli danõ ba barõ danõ ba ba nasi,
ba õsinia fefu, ba lamane urongo: Khõ zidadao andrõ, ba dadaoma andrõ, ba khõ
Nono mbiribiri andrõ, ba howuhowu ba sumange ba lakhõmi ba fa’abõlõ, irugi zi
lõ aetu! (F. 7, 10—12. Fil. 2, 10).
14 Ba lamane saliŵaliŵa
ba danõ andrõ si õfa nga’eu; Yaduhu! Ba latuhi danõ satua andrõ, mangalulu ira.
(F. 19, 4).
FAMA’ELE’Õ
FAZA
6
Famokai tandro
andrõ, si õnõ.
1 Ba u’ila me ibokai
dandrõ si fõfõna, ba zi fitu andrõ, Ono mbiribiri ba urongo, me muhede zaliŵaliŵa
ba danõ andrõ, sisageu, hulõ we’ugu’ugu mbanua linia, imane: Aine! (F. 5, 1—5;
4, 6 b. t.).
2 Ba u’ila, ba hiza kudo
safusi, ba khõ zi fakudo yaŵa, ba so wana sinali, ba tebe’e khõnia dakula, ba
mofanõ ia, si mane si mõna, ba ena’õ mõna ia. (F. 19, 11—16).
3 Ba me ibokai dandro
fanete zi fõfõna, ba urongo me iŵa’õ saliŵaliŵa ba danõ andrõ, si sageu: Aine!
4 Ba so zi mõi baero
kudo bõ’õ, soyo, ba khõ zi fakudo yaŵa, ba tetehe wangeheta fa’atulõ ba guli
danõ, ba ena’õ faoma labubunu nawõra, ba tebe’e khõnia wõda sebua.
5 Ba me ibokai dandro
fanete zi dombua, ba urongo, me iŵa’õ saliŵaliŵa ba danõ andrõ, fanete zi dua
geu: Aine! Ba u’ila, ba hiza kudo saitõ, ba khõ zi fakudo yaŵa, ba so waliëra,
ba danga.
6 Ba urongo zi hulõ
li niha moroi ba gotalua zaliŵaliŵa ba danõ andrõ si õfa nga’eu, imane: Sasuku
zi samba hinaoya bõra, ba sasuku gõi zi tõlu hinaoya rigi, ba fanikha andrõ ba
agu, ba bõi fakiko.
7 Ba me ibokai dandro
fanete zi tõlu, ba urongo li zaliŵaliŵa ba danõ andrõ, fanete zi tõlu nga’eu,
imane: Aine!
8 Ba u’ila, ba hiza kudo
sa’uzõ’uzõ, ba tõi zi fakudo yaŵa, ba fa’amate, ba i’o’õ ia banua tou, ba
tetehe khõra zi sambua ni’o’õfa tanõ, ba wamunu ya’ira fõda ba lofo ba fõkhõ ba
ba gutu ndru’u andrõ, ba guli danõ. (Hes. 14, 21).
9 Ba me ibokai dandrõ
fanete zi õfa, ba u’ila barõ naha wame’e sumange andrõ mbekhu nibubunu ba
daroma li Lowalangi andrõ ba ba wamaduhu’õ andrõ, si so khõra. (F. 1, 9).
10 Ba mu’ao ira, ebua
lira, lamane: He So’aya, ni’amoni’õ, si ndruhu! ha wa’ara tõ na lõ manguhuku
ndra’ugõ, ba lõ õlau mbalõ ndroma andrõ, ba zowanua ba guli danõ andrõ? (F. 3,
7; 19, 2. Sin. 79, 10).
11 Ba tedozigõ ira baru
safusi, ba laŵa’õ khõra, ena’õ lataha na dõdõra, ma’ifu tõ, irege mo’ahonoa, ha
wa’ato nawõra enoni gõi ba talifusõra, nibubunu na dania gõi, si mane ya’ira
gõi. (F. 3, 5. Heb. 11, 40).
12 Ba u’ila, me ibokai
dandro fanete zi lima, ba so ziheu sabõlõbõlõ, ba tobali aitõ luo, hulõ
gonigoni bu, ba tobali hulõ ndro mbaŵa, ma’asambua. (F. 16, 18. Yes. 13, 13.
10. Mat. 24, 29. Yoël. 2, 10).
13 Ba atoru ba danõ
ndrõfi, moroi ba mbanua si yaŵa, hulõ na atoru mbua marafala, na ifadõgõ angi
sabõlõbõlõ.
14 Ba aheta mbanua si yaŵa,
hulõ na lagõlugõ zura, ba hili misa fefu, ba hulo fefu, ba awu’a ba nahara. (Yes.
34, 4. Sin. 102, 27. F. 16, 20).
15 Ba razo ba guli
danõ, ba sebua, ba kumandra andrõ, ba so’ana’a, ba sabõlõ, ba sawuyu fefu, ba
si tenga sawuyu fefu, ba labini’õ ira, ba dõgi hili misa, ba barõ gara, ba
hili. (Yes. 2, 19).
16 Ba lamane ba hili
ba ba gara andrõ: Milangõgõ ndra’aga, mibalugõ ndra’aga, fa bõi i’ilaga sidadao
ba dadaoma andrõ, ba fa lõ gõnaga fõnu Nono mbiribiri andrõ. (F. 9, 6. Hos. 10,
8. Luk. 23, 30. Sin. 2).
17 Noa sa irugi baŵa
sebua andrõ, baŵa wõnura, ba ha niha zanaha? (Sef. 1, 14).
FAMA’ELE’Õ
FAZA
7
I. Tefotandro
genoni Lowalangi andrõ. II. Niha si no mogamõ fa’auri ba mbanua furi. III. Fa’ohahau
dõdõra.
1 I. Ba aefa da’õ, ba
õfa u’ila mala’ika, si so ba watalinga danõ andrõ si õfa, sanaha angi ba danõ
andrõ, si õfa, fa lõ itõrõ angi danõ ba asi ba hogu geu, fefu. (Sakh. 6, 5).
2 Ba u’ila mala’ika
bõ’õ, si mõi miyaŵa, moroi ba gatumbukha luo, si so tandro khõ Lowalangi sauri,
ba mu’ao ia, ebua linia, ba mala’ika andrõ, si õfa, ba nitehe famakiko uli danõ
ba asi, (F. 5, 2),
3 imane: Bõi mifakiko
guli danõ, ba he asi, ba he eu andrõ, irege no mafotandro genoni Lowalangida
andrõ, ba gangangora! (F. 9, 4. Hes. 9, 4).
4 Ba urongo wa’ato
nifotandro andrõ, otu a õfa wulu a õfa ngahõnõ nifotandro, tedozigõ mado
Ndraono Gizeraëli andrõ: (F. 14, 1).
5 Mado Yuda, ba
felendrua ngahõnõ nifotandro, ba mado Rubeno, ba felendrua ngahõnõ, ba mado
Gado, ba felendrua ngahõnõ, (Moz. II. 1. 1—4),
6 ba mado Gaseri, ba
felendrua ngahõnõ, ba mado Nafetali, ba felendrua ngahõnõ ba mado Manase, ba
felendrua ngahõnõ,
7 ba mado Zimeoni, ba
felendrua ngahõnõ, ba mado Lewi, ba felendrua ngahõnõ, ba mado Isasari,
8 ba felendrua
ngahõnõ, ba mado Zebuloni, ba felendrua ngahõnõ, ba mado Yosefo, ba felendrua
ngahõnõ, ba mado Mbeniyami, ba felendrua ngahõnõ nifotandro. (Moz. I. 49, 22).
9 II. Ba aefa da’õ, ba u’ila, ba hiza
zato sibai, si tebai i’erai niha, moroi ba ngawalõ soi fefu, ba moroi ba
ngawalõ niwa fefu, ba moroi ba ngawalõ mado fefu, ba moroi ba ngawalõ li fefu,
si so fõna dadaoma andrõ ba fõna Nono mbiribiri; nukha safusi nukhara, ba bulu
nohi ba dangara. (F. 5, 9; 3, 5. 18. Mat. 28, 19).
10 Ba mu’ao ira, ebua
lira, lamane: Fangorifi khõ Lowalangida, sidadao ba dadaoma andrõ, ba khõ Nono
mbiribiri andrõ! (F. 5, 13; 19, 1)!
11 Ba no lafasui
dadaoma andrõ mala’ika andrõ fefu, ba satua andrõ, ba saliŵaliŵa ba danõ andrõ,
si õfa nga’eu, ba latuhi danõ fõna dadaoma andrõ, lafalõgu tou ira, mangalulu
ira khõ Lowalangi, (F. 5, 11),
12 lamane: Yaduhu, howuhowu,
ba lakhõmi, ba fa’atuatua, ba fangandrõ saoha gõlõ, ba sumange, ba fa’abõlõ, ba
fa’abe’e, khõ Lowalangida, irugi zi lõ aetu! Yaduhu. (F. 4, 9 b. t.; 5, 12 b.
t.).
13 III. Ba humede zatua andrõ, samõsa,
imane khõgu: Da’õ, si so baru safusi andrõ, ha niha ira, ba heza la’otarai?
14 Ba umane khõnia: Ya’ugõ
zangila, Tuha. Ba imane khõgu: Ya’ira da’õ, si otarai wamakao sabõlõbõlõ andrõ;
ba no lababago mbarura, ba no la’afusi’õ, ba ndro Nono mbiribiri andrõ. (Kor.
II. 4, 8. 17. Yoh. I. 1, 7).
15 Da’õ mbõrõ, wa no
so ira fõna dadaoma Lowalangi andrõ, awõ wa no enoninia ira, bongi ma’õkhõ, ba
gosalinia; ba i’iagõ yaŵara sidadao ba dadaoma andrõ. (F. 21, 3).
16 Lõ’õ sa’ae olofo
ira, ba lõ’õ sa’ae owõkhi dõdõra, ba lõ gõna ira sino, ba he fa’aukhu, hadia
ia, (Yes. 49, 10. Sin. 121, 5. 6),
17 me ikubaloi sa’ae
ira Ono mbiribiri andrõ, si so ba dalu dadaoma andrõ, ba ifasao ira ba gumbu
nidanõ fangorifi, ba Lowalangi zolosi dania fefu daŵa hõrõ ba hõrõra andrõ. (F.
5, 6; 21, 6. 4. Sin. 23, 2. Yes. 25, 8).
FAMA’ELE’Õ
FAZA
8
I.
Famokai
tandro fanete zi õnõ: oroma mala’ika, dafitu, si so torofe. II. Daõfa zolau
torofera andrõ.
1 I. Ba me ibokai
dandro fanete zi õnõ, ba tobali ahono ba zorugo, so tanga za wa’ara. (F. 6, 1).
2 Ba u’ila mala’ika
andrõ, si dafitu, si so fõna Lowalangi, ba tebe’e khõra dorofe, fitu. (Luk. 1,
19. Mat. 24, 31).
3 Ba sa moroi sa mala’ika
bõ’õ, ba i’agõ zinga naha wame’e sumange, ba so khõnia, mako, ba wanunu kumõyõ,
ana’a, ba labe’e khõnia gumõyõ, la’oya’õ, ena’õ ibe’e fonõnõ wangandrõ niha ni’amoni’õ
andrõ, ena’õ idozigõ, ba naha wame’e sumange, ana’a andrõ, fõna dadaoma andrõ.
(F. 5, 8).
4 Ba mõi miyaŵa zimbo
gumõyõ andrõ, fonõnõ wangandrõ niha ni’amoni’õ, moroi ba danga mala’ika andrõ,
fõna Lowalangi. (Sin. 141, 2).
5 Ba ihalõ mako
andrõ, ba wanunu kumõyõ, mala’ika andrõ, ifo’õsi alitõ, moroi ba naha wame’e sumange
no mege, ba itibo’õ tou ba danõ, ba so we’ugu’ugu mbanua, ba li niha, ba gari
mbanua, ba duru danõ. (F. 11, 19).
6 Ba lafa’anõ ira, ba
wolau torofe, mala’ika andrõ, si dafitu, si so torofe andrõ, si fitu.
7 II. Ba ilau dorofe si fõfõna andrõ,
ba ilabu teu kara ba alitõ, si faruka do, ba aekhu ba danõ. Ba saraõ akhozi
tanõ, ba saraõ dõla geu akhozi ba du’u sauri, fefu, ba akhozi. (Moz. II. 9, 23
b. t.).
8 Ba ilau dorofe mala’ika
si samõsa, fanete zi fõfõna, ba tetibo’õ ba nasi zi hulõ hili sebua, si
holahola, ba tobali do zi saraõ nasi,
9 ba saliŵaliŵa ba
nasi andrõ, si so noso, ba saraõ zi mate, ba owo andrõ, ba saraõ zaboto.
10 Ba ilau dorofe mala’ika
fanete zi darua andrõ, ba so zatoru moroi ba mbanua si yaŵa dõfi sebua,
siholahola, hulõ zulu, ba gõna ba zi saraõ nungo nidanõ, ba ba nulu nidanõ
andrõ, (F. 9, 1).
11 Ba tõi ndrõfi
andrõ, ba Abesindro, ba tobali Abesindro zi saraõ nidanõ andrõ, ba ato zi mate
niha, ba nidanõ andrõ, me no afeto.
12 Ba ilau dorofe mala’ika
fanete zi datõlu andrõ, ba tebõzi zi saraõ luo, ba si saraõ mbaŵa, ba si saraõ
ndrõfi, ena’õ aitõ zi saraõ ba ena’õ lõ moluo zi saraõ zi ma’õkhõ, ba si manõ
gõi ba zi bongi.
13 Ba u’ila, ba urongo
moyo sambua, sihombo ba dalu mbanua, mu’ao ia, ebua linia, imane: Alai, alai,
alai zowanua ba guli danõ, ba li dorofe si tosai andrõ, ba mala’ika si datõlu
andrõ, solau dania! (F. 9, 12; 11, 14; 12, 14).
FAMA’ELE’Õ
FAZA
9
I. Ilau dorofe
mala’ika fanete zi daõfa, ba II. ilau dorofe fanete zi lima.
1 I. Ba ilau dorofe
mala’ika fanete zi daõfa, ba u’ila ndrõfi, si no atoru tou ba danõ, moroi ba
mbanua si yaŵa, ba tebe’e khõnia wogoë mbawa gawuwukha andrõ. (F. 8, 10; 20,
1).
2 Ba ikoë mbawa gawuwukha
andrõ, ba moi miyaŵa zimbo, moroi ba mbawania, hulõ zimbo zino wa’u sebua; ba
tobali aitõ luo, ba talu mbanua, ba zimbo mbawania andrõ.
3 Ba so zi otarai
zimbo andrõ tamo, si mõi ba danõ, ba tebe’e khõra wa’abõlõ, si mane fa’abõlõ
dongo ba danõ, (Yoël. 2, 5 b. t.),
4 ba teŵa’õ khõra,
ena’õ bõi lafakiko ndru’u ba danõ, ba he sobulu, fefu, ba he eu, fefu; ha niha
andrõ nifakiko, si lõ tandro Lowalangi andrõ, ba gangango. (F. 7, 3. b. t.).
5 Ba tetehe khõra,
ena’õ bõi labunu, ha lafakao, lima waŵa wa’ara. Ba fa’afõkhõ andrõ ba khõra, ba
no timba wa’afõkhõ ba dongo, na ituo niha. 6 Ba na luo da’õ, ba la’alui wa’amate
niha, ba lõ lasõndra, omasi ira mate, ba i’arõu’õ ia khõra fa’amate. (F. 6,
16).
7 Ba nga’eu damo
andrõ, ba hulõ kudo, ni’aro’õ ba wanuwõ, ba ba hõgõra, ba takula, hulõ gana’a,
ba bawara, ba hulõ mbawa niha. (Yoël. 2, 4. 5).
8 Ba bura, ba hulõ mbu
ndra alawe, ba ifõra, ba hulõ nifõ zingo.
9 Ba mo’õrõba ira, hulõ
gõrõba si’õli, ba ruru gafira andrõ, ba hulõ ruru gureta, soya kudo, si mandruo,
ba wanuwõ.
10 Ba i’ora, ba hulõ
gi’o dongo, ba motuo, ba ba gi’ora so wa’abõlõra, ba wamakiko niha, lima waŵa
wa’ara.
11 So zolohe ya’ira,
razo, mala’ika gawuwukha, si so tõi Abado, ba li Heberaio, ba ba li Ndrawa
Heleni, ba Afolio dõinia andrõ. (Efes. 2, 2. Yob. 28, 22).
12 No numalõ wa’afõkhõ
si fõfõna andrõ, hiza dua balõ tõ wa’afõkhõ furi da’õ. (F. 8, 13).
13 II. Ba ilau dorofe mala’ika fanete
zi dalima, ba urongo li, moroi ba dandru andro, si õfa, ba naha wame’e sumange,
ana’a andrõ, fõna Lowalangi,
14 imane ba mala’ika
fanete zi dalima andrõ, si so torofe andrõ: Efa’õ mala’ika andrõ, si daõfa,
nibõbõ ba zinga nungo nidanõ sebua andrõ, Oifarati. (F. 7, 1; 16, 12).
15 Ba te’efa’õ mala’ika
andrõ, si daõfa, si no mama’anõ, hadia wa’alaŵa luo, ba hadia luo, ba hadia mbaŵa,
ba hadia ndrõfi, ba wamunu si saraõ niha. (F. 8. 7—12).
16 Ba fa’ato zanuwõ
andro, si fakudo andrõ, ba medua wulu ngahõnõ wa fulu ngahõnõ, urongo wa’atora
andrõ. (F. 5, 11).
17 Ba si mané wangilagu
kudo andrõ, ba gangilata andrõ, awõ zi fakudo yaŵa: no mo’õrõba alitõ ba
sohandru ba sa’usõ, si mane talõ balera; ba hõgõ kudo, ba no hulõ hõgõ zingo,
ba i’otarai mbawara alitõ ba simbo ba talõ balera.
18 Ba wamakao si tõlu
balõ andrõ tebunu zi saraõ niha, ba galitõ andrõ, ba ba zimbo andrõ, ba ba dalõ
balera andrõ, si otarai mbawara.
19 Fa’abõlõ kudo andrõ
sa, ba ba mbawara so, ba ba gi’ora; i’ora sa, ba no hulõ gulõ, mohõgõ; ba da’õ
wamakiko.
20 Ba si tosai niha,
si lõ mubunu, ba wamakao andrõ, ba lõ lafalalini gera’erara, ba wamõhõi mena’õ
nifazõkhi dangara andrõ, ena’o lõ’õ sa’ae mangalulu ira ba mbekhu, ba ba nadu
andrõ ba nadu balaki, ba ba nadu firõ, ba ba nadu aramba, ba na nadu kara, ba
ba nadu eu andrõ, si lõ mangila niha, ba si lõ mamondrongo li niha, ba si tebai
mowaõwaõ. (F. 16, 9. 11. Kor. I. 10, 20. Sin. 115, 4 b. t.).
21 Ba lõ lafalalini
gera’erara, ba wamõhõi mena’õ fange’era andrõ, awõ wakelemusa andro khõra, awõ
wohorõhorõ andrõ, awõ wanagõnagõ andrõ khõra.
FAMA’ELE’Õ
FAZA
10
I. Te’ombakha’õ
wa lõ tola lo itõrõ huku Lowalangi andrõ. II. Itõlõ zura Yohane.
1 I. Ba u’ila mala’ika
bõ’õ, sabõlõ, si moi mitou moroi ba mbanua si yaŵa, lawuo nukhania, ba dumi ba
hõgõnia yaŵa, ba bawania, ba no hulõ luo, ba ahenia, ba no hulõ daru nahe
alitõ.
2 Ba so ba dangania zura
side’ide, si no teboka, ba ihundragõ nasi ahenia kambõlõ, ba ba danõ so gahenia
kabera.
3 Ba mu’ao ia, ebua
linia, hulõ na mundrõndrõndrõndrõ zingo; ba me no mu’ao ia, ba humede we’ugu’ugu
mbanua andrõ, si fitu, alua lira.
4 Ba me no humede we’ugu’ugu
mbanua andrõ, si fitu, ba manurado mena’õ, ba urongo li, moroi ba mbanua si yaŵa,
imane: Fotandro niŵa’õ we’ugu’ugu mbanua andrõ, si fitu, ba bõi sura ia.
5 Ba ifazaŵa dangania
kambõlõ mala’ika andrõ, ni’ilagu, si hundragõ asi ba tanõ, ituturu mbanua, si yaŵa,
6 ba fahõlu ba zauri
andrõ, irugi zi lõ aetu, samazõkhi banua si yaŵa ba õsinia ba tanõ ba õsi guli
danõ ba asi ba õsinia: wa lõ nga’õtõ danõ sa’ae;
7 na luo li mala’ika
fanete zi daõnõ sa, na ilau dorofe dania, ba no alua gõi zi no tobini andrõ, khõ
Lowalangi, itõrõ ni’ombakha’õnia, turia somuso dõdõ, ba genoninia andrõ, sama’ele’õ.
(F. 8, 2; 11, 15. Kor. I. 15, 52).
8 II. Ba humede zui khõgu li andrõ,
nirongogu moroi ba mbanua si yaŵa, imane: Ae halõ zura side’ide andrõ, si no
teboka, ba danga mala’ika andrõ, si hundragõ asi ba tanõ.
9 Ba mõido khõ mala’ika
andrõ, uŵa’õ khõnia, ena’õ ibe’e khõgu zura side’ide andrõ. Ba imane khõgu:
Halõ ia ba tõlõ, afeto sa mbetu’au ibe’e, ba ami ba mbawau, hulõ ŵe ŵani. (Hes.
3, 1—3).
10 Ba uhalõ zura side’ide
andrõ, ba danga mala’ika andrõ, ba utõlõ, ba ba mbawagu, ba ami, hulõ ŵe ŵani,
ba me no utõlõ, ba afeto mbetu’agu.
11 Ba lamane khõgu: Lõ
tola lõ õfuli mama’ele’õ, ba ngawalõ mado, ba ba ngawalõ soi, ba ba ngawalõ li,
ba ba razo soya.
FAMA’ELE’Õ
FAZA
11
I. Oroisa khõ Yohane,
ba wanu’a osali andrõ. II. Samaduhu’õ andrõ, khõ Lowalangi, si darua ba hadia
zi gõna ira. III. Ilau dorofe mala’ika fanete zi daõnõ.
1 I. Ba labe’e khõgu
zukhu, hulõ zi’o, ba lamane khõgu: Faoso ba su’a gosali Lowalangi andrõ, awõ
naha wame’e sumange, awõ zangalulu bakha; (F. 21, 15. Sakh. 2, 1 b. t. Hes. 43,
13);
2 ba olayama gosali
tánõ baero, ba be’e baero, ba bõi su’a ia, me nibe’e ba danga niha baero, ba
lahundragõ dania mbanua ni’amoni’õ andrõ, õfa wulu a rua waŵa wa’ara. (Luk. 21,
24. F. 13, 5. Dan. 8, 13 b. t.).
3 II. Ba ube’e ba zamaduhu’õ andrõ khõgu,
si darua, ba mama’ele’õ ira, hõnõ a dua ngaotu a õnõ ngafulu wongi wa’ara,
gonigoni mbarura. (F. 12, 6. 14. Yoël. 1, 13).
4 Da’õ zi dua geu
tõla falo andrõ, ba si dombua naha wandru andrõ, si so fõna Zo’aya tanõ. (Sakh.
4, 3. 11—14).
5 Ba na so zamakiko ya’ira
ena’õ, ba i’otarai mbawara alitõ, ba i’ā zi fa’udu khõra; na so zamakiko ya’ira
ena’õ, ba si manõ wamununia. (Raz. II. 1, 10. 12. Yer. 5, 14).
6 No mutehe khõra
andrõ wokusi banua si yaŵa, fa lõ aekhu ba danõ deu, gõtõ mbaŵa wama’ele’õra
andrõ; ba no mutehe khõra nidanõ andrõ, ba wamali’õ do ya’ia, ba famatõrõ ba
danõ famakao, fefu, hadia ia, ha wa’asese zomasi ira. (Raz. I. 17, 1. Moz. II.
7, 19).
7 Ba na no la’o’ozui
wamaduhu’õra andrõ, ba isuwõ ira saliŵaliŵa ba danõ andrõ, si otarai moroi si
tou gawuwukha, ba ya’ia zi mõna, ibunu ira. (F. 13, 1–8; 17, 8. Dan. 7, 21).
8 Ba botora, ba tou
ba newali so, ba mbanua sebua andrõ, nifotõi Sodoma ba tanõ Miserayi, amaedola,
ba niforõfa gõi So’aya ya’ira. (F. 16, 19. Sin. 79, 2. Kor. I. 2, 8).
9 Ba la’ila mbotora
andrõ niha, ha mado ira, ba ha iwa, ba hadia lira, ba ha soi, tõlu ngaluo a
matonga wa’ara, ba lõ labe’e niko’o mbotora andrõ. (Dan. 7, 21).
10 Ba omuso dõdõ niha,
sowanua ba guli danõ, ba khõra andrõ, owuawua dõdõra, ba faoma mama’ohe’õ buala
ira khõ nawõra, me no lafakao zowanua ba guli danõ sama’ele’õ andrõ, si darua.
(Esit. 9, 19).
11 Ba me no aefa zi dua
ngaluo a matonga, ba isaŵa ira noso fangorifi, moroi ba Lowalangi, ba muzizio
ira, ba ihawui fa’ata’u sabõlõbõlõ zamaigi ya’ira.
12 Ba larongo li sebua,
moroi ba mbanua si yaŵa, imane khõra: Mi’ae miyaŵa ba da’e! Ba mõi ira yaŵa ba
zorugo, ba lawuo; ba lafaigi ira si fa’udu khõra andrõ.
13 Ba faudu da’õ, ba
so ziheu sabõlõbõlõ, ba sambua ni’ofulu mbanua adudu, ba fitu ngahõnõ zi mate
niha, ba ziheu andrõ, ba si tokea zi tosai, ba lafosumange Lowalangi zorugo
andrõ. (F. 9, 20; 16, 18. Mat. 27, 52).
14 No numalõ wa’afõkhõ
fanete zi fõfõna andrõ, hiza, alio itõrõ fa’afõkhõ fanete zi dua balõ andrõ.
(F. 9, 12).
15 III. Ba ilau dorofe mala’ika fanete
zi daõnõ, ba terongo li segebua ba zorugo, lamane: No mõi khõ Zo’aya ya’ita
wamatõrõ andrõ, ba guli danõ, ba khõ nibayoini andrõ khõnia, ba razo ia, irugi
zi lõ aetu. (F. 10, 7; 12, 10. Dan. 2, 44; 7, 27).
16 Ba latuhi danõ,
lafalõgu tou ira satua andrõ, si dua wulu a õfa, sidadao fõna Lowalangi, ba
dadaomara andrõ, mangalulu ira khõ Lowalangi, (F. 4, 4. 10),
17 lamane: Ma’andrõ
saoha gõlõ khõu, ya’ugõ So’aya, Lowalangi, samatõrõ fefu, hadia ia, si so, ba
si no so fõna, me no õhalõ khõu wa’abõlõ andrõ khõu, si no ebua, ba me no razo
ndra’ugõ. (F. 4, 8; 19, 4. 6).
18 Ba no mofõnu soi
niha baero; ba no tesao wõnumõ, ba no irugi inõto, ba zi mate andrõ, ena’õ tehuku
ira, ba ena’õ õbe’e luo andrõ, ba genoniu andrõ, sama’ele’õ, awõ ni’amoni’õ,
awõ zangata’ufi tõimõ andrõ, he side’ide, ba he sebua, ba ena’õ õfakiko
zamakiko uli danõ andrõ. (F. 6, 17; 20, 12 b. t. 14, 7. Dan. 7, 9 b. t.).
19 Ba tebokai gosali
Lowalangi andrõ, ba zorugo, ba oroma dawõla gamabu’ula li andrõ khõnia, ba
gosalinia andrõ; ba so gari mbanua, ba li niha, ba fe’ugu’ugu mbanua, ba siheu,
ba teu kara sabõlõbõlõ. (F. 15, 5. 8. Heb. 9, 4. F. 16, 18. 21).
FAMA’ELE’Õ
FAZA
12
I. Ira alawe
sadono, ba naga andrõ. II. Fanibo ba danõ naga andrõ. III. Igohi ndra alawe no
mege naga.
1 I. Ba oroma dandra
sebua ba zorugo, ira alawe sonukha luo, ba baŵa barõ gahenia, ba ba hõgõnia, ba
no felendrua ndrõfi, bala hõgõnia.
2 Ba no manabina, ba
mangarõngarõ ia, ba wa’afõkhõ hulu ba ba wa’afõkhõ wadono.
3 Ba oroma dandra bõ’õ,
ba zorugo, hiza naga sebua, so’alitõ, fitu hõgõ ba fulu rozi dandru, ba ba
hõgõnia, ba fitu naya. (F. 13, 1 b. t. F. 17, 9 b. t. Dan. 7, 7).
4 Ba i’onia, ba
ibõzini zi saraõ ndrõfi, ba mbanua si yaŵa, itibo’õ tou ba danõ. Ba i’agõ fõna
ndra alawe no mege, sadono, naga andrõ, ba wemanga ono andrõ, na tumbu.
5 Ba madono ia, ono
matua, sokubaloi dania fefu soi si’o si’õli. Ba te’ohe khõ Lowalangi nononia
andrõ, fõna dadaomania. (F. 2, 27. Sin. 2, 8. 9).
6 Ba moloi ndra alawe
andrõ, isawa danõ si mate, ba zi so naha khõnia, ni’asiwai Lowalangi, ena’õ
labe’e gõnia ba da’õ hõnõ a dua ngaotu a õnõ ngafulu wongi. (F. 11, 3).
7 II. Ba tesao wanuwõ ba mbanua si yaŵa:
Mikhaëli andrõ ba mala’ikania, ba fasuwõ ba naga andrõ. Ba fasuwõ naga andrõ,
awõ mala’ikania. (Dan. 10, 13. 21; 12, 1. Yud. a. 9).
8 Ba tebai ira, ba lõ
nahara sa’ae ba mbanua si yaŵa.
9 Ba tetibo’õ naga
sebua andrõ, ulõ satua andrõ, sotõi Afõkha ba Satana, samaelungu niha ba guli
danõ, fefu; tetibo’õ si tou ia ba danõ ba tetibo’õ gõi mala’ikania andrõ,
awõnia. (F. 20, 2. Luk. 10, 18. Yoh. 12, 31. Kor. II. 11, 3).
10 Ba urongo li sebua,
ba zorugo, imane: ”Awena to’ele wangorifi andrõ khõ Lowalangida, ba fa’abõlõ
andrõ ba famatõrõ andrõ; ba fa’atola andrõ, khõ nibayoini andrõ khõnia; me no
tetibo’õ zangadugõ talifusõda, si no mangadungadugõ ya’ira khõ Lowalangida
andrõ, bongi ma’õkhõ. (F. 11, 15. Sakh. 3, 1 b. t. Yob. 1, 9 b. t.).
11 Ba no lalaŵa ia,
borõ ndro Nono mbiribiri andrõ ba taroma li famaduhu’õra, ba lõ ni’omasi’õra
nosora, irugi wa’amate. (F. 7, 14; 2, 10. Rom. 8, 33. 34. 37. Yoh. 12, 25).
12 Andrõ mi’omusoi’õ
dõdõmi, ya’ami banua si yaŵa, awõ zi so nahia ba da’õ. Ba alai guli danõ, awõ
nasi, me no mõi mitou Gafõkha andrõ khõmi, ba me no ebua wõnunia, ba me no i’ila,
lõ ara nitehe khõnia”. (Yes. 49, 13. Fet. I. 5, 8).
13 III. Ba me i’ila naga andrõ, tetibo’õ
ba danõ ia, ba igohi ndra alawe andrõ, si no madono ono matua andrõ.
14 Ba tebe’e ba ndra
alawe andrõ gafi, dombua, afi moyo sebua, ena’õ muhombo ia, ena’õ isaŵa danõ si
mate, nahania andrõ ba nibe’e gõnia, sagõtõ, ba dua gõtõ, ba matonga nga’õtõ wa’ara,
nibini’õ ba gulõ andrõ. (Dan. 12, 7. F. 8. 13).
15 Ba i’uta’õ ulõ
andrõ nidanõ, furi ndra alawe andrõ, hulõ nidanõ ba nungo nidanõ wa’abõlõbõlõ,
ba wangahanigõ yaia.
16 Ba itolo ndra alawe
tanõ, ibokai mbawania tanõ, ibadu nidanõ andrõ, ni’uta’õ naga.
17 Ba mofõnu naga ba
ndra alawe, ba mofanõ ia manuwõ si tosai ma’uwunia solo’õ oroisa Lowalangi
andrõ, ba si so famaduhu’õ andrõ khõ Yesu Keriso. (F. 14, 12; 6, 9).
18 Ba mõi baene ndra’o
ba mbewe nasi.
FAMA’ELE’Õ
FAZA
13
I. Saliŵaliŵa ba
danõ andrõ si fifu hõgõ ba si fulu tandru. II. Saliŵaliŵa ba danõ andrõ, si dua
rozi tandru.
1 I. Ba u’ila zi mõi yaŵa
moroi ba nasi saliŵaliŵa ba danõ, sageu, si fulu rozi tandru ba si fitu hõgõ,
ba ba dandrunia andrõ, ba fulu naya, ba ba hõgõnia andrõ, ba tõi fanandraŵaisi.
(F. 11, 7; 12, 3).
2 Ba saliŵaliŵa ba
danõ andrõ, ni’ilagu, ba no hulõ harimo, ba ahenia, ba hulõ gahe mberua, ba
bawania, ba hulõ mbawa zingo: ba ibe’e khõnia wa’abe’enia naga andrõ, awõ
dadaomania, awõ wa’abõlõnia, si no ebua. (Dan. 7, 4–6. F. 12, 3. 9).
3 Ba si sambua
hõgõnia, ba hulõ nifesokho ba wamunu; ba tobali dõhõ zokhonia ba wamunu andrõ.
Ba ahõlihõli dõdõ niha ba guli danõ fefu, moroi furi zaliŵaliŵa ba danõ andrõ.
4 Ba mangalulu ira ba
naga andrõ, me no ibe’e ba zaliŵaliŵa ba danõ andrõ wa’abõlõ, ba mangalulu ira
ba zaliŵaliŵa ba danõ andrõ, lamane: Ha niha zi mane saliŵaliŵa ba danõ andrõ
ba ha niha zangila fasuwõ khõnia?
5 Ba tebe’e khõnia
mbawa, ba wanguma’õ fayaŵasa ba ba wanandraŵaisi, ba tetehe khõnia wolau da’õ,
õfa wulu a rua waŵa wa’ara. (Dan. 7, 8. 11. F. 11, 2).
6 Ba humede ia, ba
wanandraŵaisi Lowalangi, ba wanandraŵaisi tõinia, awõ nahania, awõ zowanua ba
mbanua si yaŵa. (Dan. 7, 25).
7 Ba tetehe khõnia
wanuwõ ni’amoni’õ andrõ, ba folaŵa ya’ira, ba tebe’e ba dangania fefu hadia
ngawalõ niwa, ba hadia ngawalõ mado, ba hadia ngawalõ li, hadia ngawalõ soi.
(F. 11, 7. Dan. 7, 21. b. t.).
8 Ba mangalulu dania khõnia
fefu zowanua ba guli danõ, si lõ musura tõi ba zura wa’auri andrõ khõ Nono
mbiribiri andrõ, nitaba, i’otarai wamobõrõ danõ’a. (F. 17, 8; 3, 5).
9 Si so tõgi dalinga,
ba yamufondrondrongo! (F. 2, 7).
10 Sokuru niha, ba ni’ohe
ba gurungu dania; samunu niha si’õli ba nibunu si’õli dania. Ba da’e so wa’anau
gõlõ ni’amoni’õ andrõ ba famatira. (Mat. 26, 52. Moz. I. 9, 6. F. 14, 12).
11 II. Ba u’ila zaliŵaliŵa ba danõ tánõ
bõ’õ, si otarai moroi tou danõ, ba dua rozi dandru, hulõ ba nono mbiribiri, ba
fehedenia, ba no hulõ wehede naga. (Moz. I. 3, 1. 4. 5).
12 Ba ifalua fefu
goroisa zaliŵaliŵa ba danõ andrõ, si fõfõna, fõnania, ba mangalulu ba zaliŵaliŵa
ba danõ si fõfõna andrõ, si no dõhõ sokho ba wamunu andrõ, guli danõ, awõ zowanua
ba guli danõ, ibe’e. (F. 19, 20).
13 Ba ifazõkhi dandra
sebua, ena’õ gõi ibe’e aekhu tou galitõ ba danõ, moroi ba mbanua si yaŵa, ba
zanehe niha. (Mat. 24, 11. 24. Tes. II. 2, 9).
14 Ba ifaelungu zowanua
ba guli danõ, ba dandra andrõ, nitehe khõnia famazõkhi, fõna zaliŵaliŵa ba danõ
andrõ, wanguma’õ ba niha sowanua ba guli danõ, ena’õ lafazõkhi wamaedo zaliŵaliŵa
ba danõ andrõ, si so sokho andrõ, ba wõda, ba sauri.
15 Ba tetehe khõnia
wamonoso famaedo zaliŵaliŵa ba danõ andrõ, ena’õ muhede gõi wamaedo zaliŵaliŵa
ba danõ andrõ, ba ena’õ ibe’e nibunu fefu ha wa’ato zi lõ mangalulu ba wamaedo
zaliŵaliŵa ba danõ andrõ.
16 Ba ibe’e lafazõkhi khõra
dandra ba dangara kambõlõ ba ma ba gangangora, dozi, he iraono, ba he satua, he
so’ana’a, ba he si numana, he si tenga sawuyu, ba he sawuyu, (F. 14, 9–11),
17 ena’õ lõ tola
mowõli niha, ha niha ia, ba lõ tola mamawa hadia ia, ha si so tandra andrõ, tõi
zaliŵaliŵa ba danõ andrõ, ba ma numero tõinia andrõ. (F. 15, 2).
18 Ba da’e so wa’atuatua!
Ha niha zi si so fa’aboto ba dõdõ, ba yamu’erai wangerai saliŵaliŵa ba danõ
andrõ. Fangerai niha sa wangerai ya’ia. Ba numeronia andrõ, ba 666. (F. 17, 9).
FAMA’ELE’Õ
FAZA
14
I. Ono mbiribiri
andrõ ba samosumange ya’ia. II. Mala’ika samangelama, datõlu. III. Fa’odõŵadõŵa
dõdõ niha si no mate. IV. Famasi ba V. faneteu bua nagu.
1 I. Ba u’ila, ba
hiza Nono mbiribiri andrõ, ba hili Ziona so, ba otu a õfa wulu a õfa ngahõnõ
nawõnia, nisura ba gangangora tõinia ba tõi Namania andrõ. (F. 5, 6 b. t.; 7,
3. 4).
2 Ba urongo li moroi
ba mbanua si yaŵa, hulõ wegosogoso nidanõ sebua, ba hulõ we’ugu’ugu mbanua
sabõlõbõlõ; ba hulõ li mbiola, na lalau, li andrõ nirongogu. (F. 1, 15; 5, 8;
19, 6).
3 Ba manunõ ira, sinunõ
si bohou, fõna dadaoma andrõ, ba fõna zaliŵaliŵa ba danõ andrõ si õfa nga’eu,
ba fõna zatua andrõ. Ba lõ sangila mamodomaesi sinunõ andrõ, ha si otu a õfa wulu
a õfa ngahõnõ andrõ, nihõli moroi ba guli danõ. (F. 5, 9).
4 Ya’ira da’õ zi lõ
si fabaya hadia ia, ba ndra alawe; amaedola nono alawe sa ira. Ya’ira zolo’õ
Ono mbiribiri andrõ, heza mõi. Ya’ira nihõli ba niha, nibe’e si a’a khõ
Lowalangi, ba khõ Nono mbiribiri andrõ, (F. 3. 4. Kor. II. 11, 2),
5 ba lõ mu’ila ba
mbewera waya. Si lõ sinegu sa ira. (Efes. 5, 27. Sef. 3, 13).
6 II. Ba u’ila mala’ika bõ’õ, sihombo,
ba dalu mbanua si yaŵa, si so turia somuso dõdõ si lõ aetu, ba wanuriagõ ba zi
so ba guli danõ, ba ngawalõ soi fefu, ba ba ngawalõ niwa, ba ba ngawalõ li, ba
ba ngawalõ mado fefu, (Mat. 24, 14),
7 no ebua linia,
imane: Mi’ata’ufi Lowalangi, ba mibe’e khõnia zumange, me no irugi inõtõ wanguhuku
andrõ khõnia, ba mi’angalulu khõ zamazõkhi banua si yaŵa, ba tanõ, ba asi, ba umbu
nidanõ andrõ. (F. 15, 4. Hal. zin. 14, 15. Sin. 146, 6).
8 Ba i’o’õ mala’ika
bõ’õ, samõsa tõ, imane: No adudu, no adudu Mbabilona sebua andrõ, si no mamabadugõ
ba ngawalõ soi niha fefu agu wõnu andrõ, ba wohorõnia. (F. 17, 2. 4. 5; 18, 2.
3).
9 Ba i’o’õ ira mala’ika
bõ’õ, datõlu mõi da’õ, mu’ao ia, ebua linia, imane: Na so zangalulu ba zaliŵaliŵa
ba danõ andrõ, ba ba wamaedonia, nifatõfa tandra andrõ ba gangangonia, (F. 13,
15–17),
10 ba ma ba dete
dangania, ba ibadu gõi wõfõ nagu wõnu andrõ, khõ Lowalangi, si no mufazõkhi, lõ
mufaruka, ba mako wõnunia andrõ, ba nifakao alitõ ba talõ balera ia, fõna mala’ika
ni’amoni’õ ba fõna Nono mbiribiri andrõ. (F. 16, 19; 19, 20. Sin. 75, 9. Mar.
9, 44).
11 Ba numalõ dania miyaŵa
zimbo ba wamakao ya’ira andrõ, irugi zi lõ aetu. Ba lõ folombase khõra, bongi
ma’õkhõ, khõra si no mangalulu ba zaliŵaliŵa ba danõ andrõ ba ba wamaedonia,
awõ zi no mufatõfa tandra dõinia andrõ. (F. 19, 3. Yes. 34, 9. 10. Mat. 25,
46).
12 Ba da’e so wa’anau
gõlõ ni’amoni’õ andrõ, solo’õ oroisa Lowalangi andrõ, ba si lõ mamulõ’õ famati
andrõ khõ Yesu. (F. 13, 10; 22, 14).
13 III. Ba urongo li
moroi ba mbanua si yaŵa, imane: Sura: Ya’ahowu zi no mate, si mate ba khõ Zo’aya,
i’otarai da’e. Si ndruhu, iŵa’õ Eheha, ena’õ molombase ira me no aefa wa’erege
dõdõra andrõ; i’o’õ sa ira buabuara. (F. 19, 9. Yes. 57, 1. 2. Hebr. 4, 9. 10).
14 IV. Ba u’ila, ba hiza lawuo safusi
ba so zidadao ba dete lawuo andrõ, si hulõ Nono Niha, so ba hõgõnia dakula ana’a
ba ba dangania, ba sabi satarõ. (F. 1, 13. Dan. 7, 13 b. t.).
15 Ba so mala’ika bõ’õ,
si otarai gosali andrõ, mu’ao ia, ebua linia, ba zidadao ba lawuo andrõ, imane:
Fatõrõ zabimõ andrõ ba amasi, noa sa irugi inõtõ wamasi, me no okõlikõli
mbasitõ andrõ ba danõ! (Yoël. 3, 13).
16 Ba ifatõrõ ba danõ
zabinia sidadao ba lawuo andrõ, ba tebasi danõ. (Mat. 13, 39).
17 V. Ba so mala’ika bõ’õ, si otarai
gosali andrõ, ba zorugo, so khõnia gõi zabi satarõ; (F. 15, 5);
18 ba so mala’ika bõ’õ,
si otarai naha wame’e sumange andrõ, ba no mube’e ba dangania galitõ andrõ, ba
mu’ao ia, ebua linia, ba zi so sabi satarõ andrõ, imane: Fatõrõ zabimõ satarõ
andrõ, ba taba mbua nagu ba dõla, ba guli danõ, me no asoso mbuania andrõ! (F.
16, 7).
19 Ba ifatõrõ ba danõ
zabinia mala’ika andrõ, itaba mbua nagu andrõ, ba guli danõ, ba itibo’õ ba
wolazi sebua andrõ, fõnu Lowalangi. (F. 19, 15).
20 Ba baero mbanua tehundragõ
wolazi andrõ, ba mangele ndro, moroi ba wolazi andrõ, irugi kaka mbawa kudo,
felendrua ngaluo fofanõ wa’arõu. (Hes. 32, 6. Yes. 63, 3 b. t.).
FAMA’ELE’Õ
FAZA
15
I. Dafitu mala’ika
si so ngawalõ wamakao andrõ, safuria, si fitu. II. Fanunõ zolaŵa saliŵaliŵa ba
danõ andrõ. III. Tebe’e ba mala’ika andrõ mako wõnu andrõ.
1 I. Ba u’ila dandra
bõ’õ ba zorugo, sebua ba sahõlihõli dõdõ: dafitu mala’ika, si so famakao andrõ,
si fitu balõ, safuria, me ba da’õ te’o’ozui wõnu Lowalangi andrõ. (F. 16, 1;
17, 1).
2 II. Ba u’ila, ba hulõ mbaŵa nidanõ
sõrõmi, si faruka alitõ, ba ba zinga mbaŵa sõrõmi andrõ so zi no molaŵa saliŵaliŵa
ba danõ andrõ ba famaedonia ba fangerai tõinia andrõ, so khõra mbiola
Lowalangi. (F. 4, 6; 12, 11).
3 Ba manunõ ira, sinunõ
genoni Lowalangi andrõ, Moze, ba sinunõ Nono mbiribiri andrõ, lamane: ”No ebua
wolaumõ andrõ ba sahõlihõli dõdõ, ya’ugõ So’aya, Lowalangi, samatõrõ fefu,
hadia ia; satulõ ba si ndruhu lalamõ andrõ, ya’ugõ, razo soi niha andrõ. (Moz.
II. 15. Yes. 12. Sin. 111, 2 b. t. 145, 17. F. 16, 7).
4 Ha niha zi lõ ata’u,
ya’ugõ So’aya, ba ha niha zi lõ manuno tõimõ andrõ? Me ha ya’ugõ ni’amoni’õ, me
mõi dania soi niha fefu, ba wangalulu khõu, me no mufa’ele’õ huku andrõ khõu.”
(Yer. 10, 7. Sin. 98; 86, 9. 10).
5 III. Ba me aefa da’õ, ba u’ila, ba
tebokai gosali, ose wamaduhu’õ andrõ, ba zorugo, (F. 11, 19),
6 ba mõi baero mala’ika
andrõ si dafitu, si so famakao andrõ, si fitu balõ, la’otarai gosali andrõ, muko
si sõkhi, si takile, mbarura, ba balaki mbõbõ dõtõ’ara. (F. 1, 13; 19, 8).
7 Ba si sageu saliŵaliŵa
ba danõ andrõ, ba zi õfa nga’eu, ba ibe’e ba mala’ika andrõ, si dafitu, mako
balaki, fitu, nifõnui fõnu Lowalangi andrõ, sauri irugi zi lõ aetu. (F. 6, 1;
4, 8. 9).
8 Ba tobali afõnu
simbo gosali andrõ, ibe’e lakhõmi Lowalangi andrõ, ba fa’abõlõnia, ba lõ
sangila mõi ba gosali bakha, irege no mufalua wamakao andrõ, si fitu balõ, ba
mala’ika andrõ, si dafitu. (Moz. II. 40, 34. Raz. I. 8, 11. Yes. 6, 4).
FAMA’ELE’Õ
FAZA
16
Lafaduwa nõsi
mako andrõ, si fitu, mala’ika andrõ.
1 Ba urongo li sebua,
moroi ba gosali, imane ba mala’ika andrõ, si dafitu: Mi’ae mifaduwa ba danõ
nõsi mako wõnu Lowalangi andrõ, si fitu. (F. 15, 5–7).
2 Ba mõi zi fõfõna
andrõ, ifaduwa ba danõ nõsi mako andrõ khõnia; ba tumbu waosa si lõ sõkhi ba
sangobou ba niha andrõ, si no mufatõfa tandra zaliŵaliŵa ba danõ andrõ, ba si
no mangalulu ba wamaedonia. (Moz. II. 9, 9. F. 13, 14–17).
3 Ba ifaduwa ba nasi
nõsi mako khõnia mala’ika fanete zi fõfõna andrõ, ba tobali do, hulõ ndro zi
mate, ba mate zi so noso fefu, si so ba nasi. (F. 8, 8. 9. Moz. II. 7, 17 b.
t.).
4 Ba ifaduwa ba nungo
nidanõ ba ba gumbu nidanõ nõsi mako khõnia mala’ika fanete zi darua andrõ, ba
tobali do.
5 Ba urongo, me iŵa’õ
mala’ika nidanõ andrõ: Satulõ ndra’ugõ, ya’ugõ si so, ba si no so fõna, ni’amoni’õ,
me no õmanõ wanguhuku; (F. 19, 2);
6 me no aduwa ndro ni’omoni’õ,
labe’e, awõ ndro zama’ele’õ, ba no õfabadugõ khõra ndro, no si nangea luora da’õ.
(F. 18, 24. Sin. 79, 2. 3. Mat. 23, 34).
7 Ba urongo, me imane
naha wame’e sumange andrõ: Si ndruhu, ya’ugõ So’aya, Lowalangi, samatõrõ fefu,
hadia ia, si ndruhu ba satulõ huku andrõ khõu. (F. 15, 3; 6, 3).
8 Ba ifaduwa ba luo
nõsi mako khõnia mala’ika fanete zi datõlu andrõ.
9 Ba tetehe khõnia
wogozi niha ba galitõ; ba akhozi niha ba wa’aukhu sabõlõbõlõ, ba latandraŵaisi
dõi Lowalangi, samatõrõ famakao andrõ, ba lõ lafalalini gera’erara, ba wamosumange
ya’ia ena’õ, (F. 9, 20. 21. Yes. 9, 13).
10 Ba ifaduwa ba
dadaoma zaliŵaliŵa ba danõ andrõ nõsi mako khõnia mala’ika fanete zi daõfa
andrõ, ba tobali ogõmigõmi mbanuania andrõ; ba langanga lelara, ba wa’afõkhõ;
(F. 13, 1. 2. Moz. II. 10, 22 b. t.);
11 ba latandraŵaisi
Lowalangi zorugo andrõ, ba wa’afõkhõ andrõ khõra, ba ba waosara andrõ, ba lõ
lafalalini gera’erara, ba wamõhõi buabuara andrõ ena’õ. (F. 16, 9).
12 Ba ifaduwa ba
nidanõ sebua andrõ, Oifarati, nõsi mako khõnia mala’ika fanete zi dalima andrõ,
ba ogo’õ nidanõnia, ena’õ molala ndra razo andrõ, moroi ba gatumbukha luo. (F.
9, 14).
13 Ba u’ila mbekhu si
ra’ira’iõ, tõlu, si otarai mbawa naga andrõ, ba bawa zaliŵaliŵa ba danõ andrõ,
ba bawa zame’ele’õ andrõ, sofaya, hulõ dalaho. (F. 12, 3. 9; 13, 11; 19, 20).
14 Bekhu zi mate sa
ira, samazõkhi tandra, si mõi ba razo andrõ, ba guli danõ, ma’asagõrõ, ba
wangowuloi ya’ira, ba wanuwõ andrõ, na baŵa sebua khõ Lowalangi, samatõrõ fefu
hadia ia. (F. 13, 13, b. t. 19, 19 b. t. Mat. 24, 24).
15 Hiza, hulõ we’amõi
zanagõ na sodo! Ya’ahowu zi lõ mõrõ, si no mama’anõ nukhania, fa bõi si lõ nukha
ia, ba wowaõwaõ, fa bõi oroma zaila ia. (F. 3, 3. 4. 18. Fet. II. 3, 10. Kor.
II. 5, 3).
16 Ba i’owuloi ira ba
mbanua andrõ, sotõi Hamagedo, ba li Heberaio. (Sakh. 12, 11; 14, 4).
17 Ba ifaduwa ba dalu
mbanua nõsi mako khõnia mala’ika fanete zi daõnõ, ba so li sebua, si otarai
gosali andrõ, moroi ba dadaoma andrõ, imane: No awai! (F. 15, 5; 21, 6).
18 Ba so gari mbanua
ba li niha ba fe’ugu’ugu mbanua; ba so ziheu sabõlõbõlõ, si lõ larai mila, gõtõ
we’aso niha ba guli danõ; lõ irai si manõ wa’abõlõbõlõ ziheu. (F. 11, 13. 19).
19 Ba tobali ni’otõlu
mbanua sebua andrõ, ba adudu mbanua soi niha andrõ. Ba itõrõ tõdõ Lowalangi
Mbabilona sebua andrõ, ba wame’e khõnia õsi mako nagu andrõ, fõnunia andrõ, saukhu.
(F. 14, 8. 10. Yes. 51, 22. 23). 20 Ba moloi hulo fefu, ba lõ mu’ila hili sa’ae. (F.
6, 14).
21 Ba aekhu ba danõ deu
kara, so safiku zambua ngawua, gõna ba niha, ba latandraŵaisi Lowalangi niha,
ba wamakao andrõ, teu kara, me no abõlõbõlõ sibai wamakao andrõ, khõnia. (F.
11, 19. Moz. II. 9, 18).
FAMA’ELE’Õ
FAZA
17
I. Babilona
andrõ. II. Eluahania, ba eluaha zaliŵaliŵa ba danõ andrõ.
1 I. Ba so mala’ika,
samõsa, awõ zi dafitu andrõ, si so mako andrõ, si fitu, humede ia khõgu, imane:
Tabu, da’u’oroma’õ khõu wanguhuku sohorõ sebua andrõ, sidadao yaŵa nidanõ sebua
andrõ. (F. 15, 6 b. t.; 16, 19. Nakh. 3, 4).
2 Nihorõni razo
andrõ, ba guli danõ; ba no mabu zowanua ba guli danõ agu wohorõnia andrõ. (F.
18, 3. 9).
3 Ba i’ohe ndra’o ba
danõ si mate; no aheta nosogu. Ba u’ila ndra alawe sidadao ba hulu zaliŵaliŵa
ba danõ, soyo kirimisi, safõnu tõi wanandraŵaisi, fitu hõgõ ba fulu rozi dandru.
(F. 13, 1 b. t.).
4 Ba nukha ndra alawe
andrõ, ba no baru luo ungu ba baru luo kirimisi, ba no mufo’aya ana’a ba indra’indra
ba manimani, ba so ba dangania mako ana’a, safõnu horõ, awõ zi ta’unõ, ba
wohorõnia andrõ. (F. 18, 16).
5 Ba ba gangangonia,
ba no musura dõi, si lõ aboto ba dõdõ niha: Babilona sebua andrõ, ina zohorõ ba
ina hokha andrõ, ba guli danõ. (Tes. II. 2, 7. F. 14, 8; 18, 2. 10).
6 Ba u’ila, mabu ndra
alawe andrõ, do ni’amoni’õ andrõ, ba do zamaduhu’õ Yesu. Ba ahõlihõli sibai
dõdõgu, me u’ila ia. (F. 18, 24).
7 II. Ba imane khõgu mala’ika andrõ:
Hana wa ahõlihõli dõdõu? Da’u’ombakha’õ khõu zi lõ aboto ba dõdõ niha andrõ, ba
ndra alawe andrõ, ba ba zaliŵaliŵa ba danõ andrõ, solu’i ya’ia, si fitu hõgõ,
ba si fulu rozi tandru.
8 Saliŵaliŵa ba danõ
andrõ, ni’ilau, ba no so fõna, ba lõ ya’ia iada’e, ba mõi ia miyaŵa dania, i’oroi
gawuwukha, ba isaŵa wa’atekiko; ba ahõlihõli dania dõdõ zowanua ba guli danõ
andrõ, si lõ musura tõi ba zura wa’auri andrõ, i’otarai wamobõrõ danõ’a, na la’ila
zaliŵaliŵa ba danõ andrõ, me no so ia fõna, ba me lõ ya’ia iada’e, ba me so
dania. (F. 11, 7; 20, 12. 15).
9 Ba da’e moguna
dõdõ, si so fa’atuatua! Hõgõ andrõ, si fitu, ba fitu hili, dadaoma ndra alawe
andrõ; (F. 13, 1. 18);
10 ba razo, dafitu. Si
dalima, ba no tekiko, si samõsa, ba so iada’e, ba si samõsa zui, ba lõ si so
na, ba na so ia, ba lõ tola ara ia.
11 Ba saliŵaliŵa ba
danõ andrõ, si no so fõna, ba si lõ’õ iada’e, ba ya’ia wanete zi dafitu andrõ,
ba samõsa ia ba zi dafitu andrõ, ba isaŵa wa’atekiko.
12 Ba tandru andrõ, si
fulu rozi, ni’ilau, ba no razo, dafulu, si lõ sanema na amatõrõŵa, ba lasõndra
wa’abõlõ razo, saza wa’ara, awõ zaliŵaliŵa ba danõ andrõ. (F. 13, 1. Dan. 7,
20. 24). 13 Ha sara dõdõ da’õ,
ba labe’e ba zaliŵaliŵa ba danõ andrõ wa’abe’era ba fa’abõlõra.
14 Ya’ira zi fasuwõ
dania ba Nono mbiribiri andrõ, ba abõlõ Nono mbiribiri moroi khõra, me no So’aya
sokhõ ia, ba me razo razo, ba awõnia andrõ, ba no nikaoni ba nitutuyu ba si lõ
farõi. (F. 16, 14; 19, 16 b. t. Tim. I. 6, 15. Mat. 24, 31).
15 Ba imane khõgu:
Idanõ andrõ, ni’ilau, ba zidadao zohorõ andrõ, ba no ngawalõ mado da’õ, ba niha
sato, ba ngawalõ soi, ba ngawalõ li. (Sin. 93, 3).
16 Ba tandru andrõ, si
fulu rozi, ba saliŵaliŵa ba danõ andrõ, ba ya’ira zi fatiu tõdõ ba zohorõ
andrõ, ba ha ya’iya’ia labe’e, ba si lõ nukha, ba la’ā nõsinia ba latunu ia, ba
galitõ. (F. 18, 7. 8).
17 Noa sa ibe’e ba
dõdõra Lowalangi wamalua gera’erania, ba folau si ha sara dõdõ, ba fame’e
amatõrõŵara ba zaliŵaliŵa ba danõ andrõ, irege te’o’ozui niŵa’õ Lowalangi
andrõ.
18 Ba ira alawe andrõ,
ni’ilau, ba ya’ia mbanua sebua andrõ, samatõrõ razo, ba guli danõ. (F. 16, 19).
FAMA’ELE’Õ
FAZA
18
I. Fangombakha
fanguhuku Babilona andrõ. II. Fange’esi zi fahuwu khõnia. III. Te’ombakha’õ zui
wa’atekikonia.
1 I. Ba me aefa da’õ
ba u’ila mala’ika bõ’õ, si mõi mitou, moroi ba zorugo, sabõlõ sibai, ba
tehagaini guli danõ, ba lakhõminia.
2 Ba mu’ao ia, ebua
linia, imane: No adudu, no adudu Mbabilona sebua andrõ, ba no tobali naha
mbekhu ba kurunga mbekhu si ra’ira’iõ, fefu, ba kurunga wofo si ra’ira’iõ,
fefu, sogoro ita, (F. 14, 8. Yes. 21, 9; 34, 11—14. Yer. 51, 8; 50, 39),
3 me no labadu wõfõ
nagu wõnu andrõ, ba wohorõ andrõ khõnia, fefu soi, ba no mohorõ khõnia razo
andrõ, ba guli danõ ba saniaga andrõ, ba guli danõ, ba ba wa’abõlõ hokhania
lasõndra wo’ana’a. (F. 14, 8. 10. Yer. 51, 7).
4 Ba urongo li bõ’õ,
moroi ba mbanua si yaŵa, imane: Miheta ami khõnia, ya’ami banuagu, fa bõi fao
ami ba horõnia andrõ, ba fa lõ gõna ami õsa, famakao ya’ia, andrõ. (Yes. 48,
20. Yer. 51, 6. 45).
5 Noa sa irugi mbanua
si yaŵa horõra andrõ, ba noa sa itõrõ tõdõ Lowalangi golalõŵara andrõ. (F. 16,
19. Yer. 51, 9).
6 Misulõni khõnia
nilaunia, ba mifodua winaeta khõnia, dali wolaunia andrõ; mako andrõ, nifo’õsinia,
ba mifo’õsi khõnia, mifomendrua. (Yer. 50, 15. 29. Sin. 137, 8).
7 Ndrohundrohu
nifolakhõminia ya’ia, ba ndrohundrohu ni’ebua’õnia hokhania, ba mibe’e khõnia
wa’afõkhõ ba fa’abu dõdõ. Me iŵa’õ tõdõnia: Mudadao ndra’o, razo ira alawe, ba
tenga si mate donga ndra’o, ba lõ’õ manõ u’ila wa’abu dõdõ. (Yes. 47, 7 b. t.).
8 Andrõ dania so
wamakaonia, ha ma’õkhõ: Fa’amate, ba fa’abu dõdõ, ba lofo, ba tetunu dania ia,
ba galitõ, me no sabõlõ Zo’aya, Lowalangi, sanguhuku ya’ia andrõ. (F. 17, 16.
Yer. 50, 31 b. t.).
9 II. Ba la’e’esi dania ia, ba fa’ala’alai
khõnia razo andrõ, ba guli danõ, si no mohorõ khõnia, si no molau hokha ba
khõnia andrõ, na la’ila zimbo andrõ, ba wanunu ya’ia. (F. 17. 2. Hes. 36, 26 b.
t.).
10 Ba zarõu so ira, ba
wa’ata’ura wamakao ya’ia andrõ, lamane: Alai ndra’ugõ, alai ndra’ugõ, banua
sebua andrõ, Babilona, banua sabõlõ andrõ, me ha saza wa’aso wanguhuku ya’ugõ!
(Ay. 2. Tes. I. 5, 3).
11 Ba mege’ege zaniaga
andrõ ba guli danõ, ba abu dõdõ, ba khõnia andrõ, me lõ’õ sa’ae sowõli
faniagara andrõ, (Hes. 27, 27—36),
12 faniaga ana’a, ba
firõ, ba indra’indra, ba manimani, ba muko si sõkhi, ba baru luo ungu, ba suto,
ba baru luo kirimisi, ba eu samohua, fefu, ba gamagama ifõ guaza, ba gamagama
eu sebua bõli, fefu; ba aramba,
13 ba si’õli, ba kara
fuala, awõ guli geu sami, ba daludalu amoma, ba hadia ia nitunu, samohua, ba
daludalu nigule’õ, ba kumõyõ, ba agu, ba fanikha, ba hamo si sõkhi, ba gandru,
ba saŵi, ba biribiri, ba kudo, ba kureta, ba boto niha, awõ noso niha. (Hes.
27, 17).
14 Ba bua geu andrõ,
somasi dõdõu, ba no aheta khõu, ba hadia ia lakhõmi fefu, ba hadia ia zoadu ba
sohaga, ba no taya khõu, ba lõ’õ manõ sa’ae oroma ia.
15 Saniaga da’õ, si no
mo’ana’a ba khõnia, ba ba zarõu so, ba wa’ata’ura wamakao ya’ia andrõ, mege’ege
ira, ba abu dõdõra, ba lamane: 16 Alai ndra’ugõ! alai ndra’ugõ! banua sebua andrõ,
si so nukha muko si sõkhi, ba baru luo ungu, ba baru luo kirimisi, fõna, ba
nibe’e ana’a, ba nifo’indra’indra, ba nifomanimani, me ha saza wa’adudu gana’a
si manõ. (F. 17, 4).
17 Ba dozi durumudi,
ba dozi soloyo misa, ba ono nowo, ba ha wa’ato zohalõŵõ ba nasi, ba ba zarõu
so, (F. 18, 11),
18 ba mu’ao, me la’ila
zimbo andrõ, ba wanunu ya’ia, lamane: Hezo zi fagõlõgõlõ ba mbanua sebua andrõ?
19 Ba lalau gawugawu
ba hõgõra, ba mu’ao ira, mege’ege ba abu dõdõ, lamane: Alai ndra’ugo! alai ndra’ugõ!
banua sebua, ba zo’ana’a fefu zi so owo ba nasi balazi gana’ania andrõ; me ha
saza wa’adudu. (Hes. 27, 30).
20 Omusoi’õ dõdõu, ba
khõnia, ya’ugõ sorugo, ba ya’ami ni’amoni’õ, ba ya’ami sinenge, ba ya’ami sama’ele’õ,
me no ilau mbalõmi khõnia Lowalangi. (F. 12, 12. Yer. 51, 48).
21 III. Ba ifazaŵa gowe mala’ika
sabõlõ, si mane gowe zalaŵa sebua, ba itibo’õ ba nasi, imane: Si manõ wa’atetibo
Mbabilona andrõ, banua sebua andrõ, ba nangi sabõlõbõlõ, ba lõ mu’ila ia sa’ae.
(Yer. 51, 63. b. t.).
22 Ba lõ’õ sa’ae
terongo ba khõmõ wolau biola, ba folau hadia ia maimai, ba folau sigu, ba falau
torofe, ba lõ’õ sa’ae tesõndra ba khõmõ duka hadia ia fefu, ba lõ’õ sa’ae
terongo ba khõmõ goko halu ba wanutu fakhe. (Yes. 24, 8).
23 Ba lõ’õ sa’ae
humaga ba khõmõ haga wandru, ba li zangowalu ba li nono nihalõ, ba lõ’õ sa’ae
terongo ba khõmõ, me no salaŵa ba guli danõ zaniaga andrõ khõu, me no
tefaelungu fefu soi, ba wakelemusa andrõ khõmõ! (Yer. 25, 10. Yes. 23, 8).
24 Ba tesõndra ba
khõnia ndro zama’ele’õ, awõ ndro ni’amoni’õ andrõ ba do nibunu andrõ fefu, ba
guli danõ. (F. 17, 6. Mat. 23, 35—37).
FAMA’ELE’Õ
FAZA
19
I. Fanunõ zi so
ba zorugo, me no adudu Mbabilona andrõ. II. Itenaŵa wangalulu khõnia mala’ika
andrõ. III. Ilaŵa Keriso zaliŵaliŵa ba danõ andrõ, ba sama’ele’õ sofaya andrõ,
awõ zi fao khõra.
1 I. Me aefa da’õ, ba
urongo, ba hulõ zebua li niha sato, ba zorugo, lamane: ”Haleluya, khõ
Lowalangida wangorifi andrõ, awõ lakhõmi andrõ, awõ wa’abõlõ andrõ, (F. 12,
10),
2 me no si ndruhu ba
me no satulõ wanguhukunia andrõ: noa sa ihuku zohorõ andrõ, sebua, si no
mamakiko uli danõ, ba wohorõhorõnia andrõ, ba no ilau mbalõ ndro genoninia
andrõ, ba dangania.” (F. 16, 7; 17, 1 b. t.).
3 Ba lamane zui:
”Haleluya, numalõ miyaŵa zimbonia andrõ, irugi zi lõ aetu.” (F. 14, 11; 18, 9.
18. Yes. 34, 10).
4 Ba latuhi danõ
satua andrõ si dua wulu a õfa, awõ zaliŵaliŵa ba danõ andrõ si õfa nga’eu,
mangalulu ira khõ Lowalangi, sidadao ba dadaoma andrõ, lamane: Yaduhu,
Haleluya! (F. 4, 4. 9. 10).
5 Ba so li, si otarai
dadaoma andrõ, imane: Misuno Lowalangida, dozi ami motõi enoninia, sangata’ufi
ya’ia, he iraono, ba he satua. (Sin. 134, 1).
6 Ba urongo, ba hulõ
li zato, ba hulõ wegosogoso nidanõ sebua, ba hulõ we’ugu’ugu mbanua,
sabõlõbõlõ, lamane: ”Haleluya, me no razo Zo’aya, Lowalangida andrõ, samatõrõ
fefu hadia ia! (F. 14, 2; 11, 15. 17).
7 Data’omusoi’õ
dõdõda, ba ta’owuawua’õ dõdõda, ba tafosumange ia; me no irugi walõŵa Nono
mbiribiri andrõ, ba me no ifa’anõ ia ngambatõnia, (Sin. 118, 24. F. 21, 2. 9),
8 ba no tetehe
khõnia, ena’õ i’onukha zi ndruhu muko si sõkhi, sihaga; muko si sõkhi andrõ sa,
ba ya’ia wa’atulõ niha ni’amoni’õ andrõ.” (F. 3, 5; 15, 6. Sin. 132, 9).
9 Ba imane khõgu:
Sura: Ya’ahowu nikaoni ba walõŵa Nono mbiribiri andrõ! Ba imane khõgu: Da’õ li
Lowalangi andrõ, si ndruhu. (F. 14, 13. Mat. 22, 2).
10 II. Ba utuhi danõ
fõna gahenia, ba wangalulu khõnia. Ba imane khõgu: Bõi! Awõu enoni ndra’odo, ba
awõ dalifusõu andrõ, si so famaduhu’õ Yesu andrõ. Khõ Lowalangi angalulu.
Famaduhu’õ Yesu sa, ba ya’ia Geheha wama’ele’õ andrõ. (F. 22, 8 b. t. Hal. zin.
10, 25. 26. F. 12, 17).
11 III. Ba u’ila,
teboka mbanua si yaŵa, ba hiza kudo safusi ba si fakudo yaŵa, ba ”Si lõ farõi”
ba ”Si ndruhu” dõinia, ba atulõ wanguhukunia ba fanuwõnia. (F. 6, 2; 3, 14).
12 Ba no holahola
galitõ hõrõnia, ba ba hõgõnia, ba no oya dakula, so dõinia nisura, si lõ i’ila
niha, ha ya’ia zangila; (F. 1, 14);
13 ba barunia, ba no
mu’ungugõ ba ndro, ba tõinia, ba ”Taroma li Lowalangi”. (Yes. 63, 1—3. Yoh. 1,
1).
14 Ba la’o’õ ia sanuwõ
andrõ, ba zorugo, ba hulu kudo safusi, si ndruhu muko safusi mbarura.
15 Ba i’otarai
mbawania gari satarõ, ena’õ ibe’e famunu soi andrõ. Ba ikubaloi dania ira, si’o
si’õli, ba ihundragõ wolazi nagu fõnu saukhu andrõ, khõ Lowalangi, samatõrõ
fefu, hadia ia. (F. 1, 16; 2, 27; 14, 19. Yes. 63, 2 b. t.).
16 Ba so dõinia,
nisura ba dete mbarunia ba ba zolania: ”Razo razo ba So’aya sokhõ.” (F. 17,
14).
17 Ba u’ila mala’ika,
samõsa, si so ba luo, ba mu’ao ia, ebua li, imane ba wofo fefu, sihombo ba dalu
mbanua: Mi’aine, mi’owuloi ami, ba gowuloa sebua andrõ, khõ Lowalangi, (Hes.
39, 4. 17 b. t.),
18 ba wemanga nõsi
razo, awõ nõsi gumandra, awõ nõsi zabõlõ andrõ, awõ nõsi kudo, fabaya si fakudo
yaŵa, awõ nõsi zi tenga sawuyu, fefu, fabaya sawuyu, ba õsi ndraono, awõ nõsi
zatua.
19 Ba u’ila me owulo
ira zaliŵaliŵa ba danõ andrõ razo ba guli danõ, awõ zabõlõ andrõ khõra, ba
wasuwõta ba zidadao ba kudo andrõ ba ba zabõlõ andrõ khõnia. (F. 13, 1; 17, 12
b. t.).
20 Ba te’ala zaliŵaliŵa
ba danõ andrõ labe’e, fabaya sama’ele’õ sofaya andrõ, samazõkhi tandra andrõ,
mege, fõnania, famaelungu zi no manema tandra zaliŵaliŵa ba danõ andrõ, si no
mangalulu ba wamaedonia andrõ; tetibo’õ auri zi darua andrõ ba mbaŵa alitõ
andrõ, siholahola talõ balera. (F. 16, 13; 13, 11—17; 20, 10—14. Dan. 7, 11).
21 Ba tánõ bõ’õ andrõ,
ba nibunu gari zidadao ba kudo andrõ, gari si otarai mbawania, ba abuso wofo
fefu õsira andrõ.
FAMA’ELE’Õ
FAZA
20
I. Forate naga
andrõ, hõnõ fakhe. II. Amatõrõŵa andrõ si hõnõ fakhe. III. Fanuwõ naga andrõ,
safuria, ba fanguhuku ya’ia. IV. Femaoso zi mate, sato, ba fanguhuku safuria.
1 I. Ba u’ila mala’ika
si mõi mitou, moroi ba zorugo, so khõnia wogoë mbawa gawuwukha andrõ, awõ rate
sebua, ba dangania. (F. 18, 1; 1, 18).
2 Ba ira’u naga
andrõ, ulõ satua andrõ, ya’ia Gafõkha, Satana andrõ, ba irate, hõnõ fakhe wa’ara,
(F. 12, 9. Yes. 24, 21 b. t.),
3 ba itibo’õ ba
gawuwukha andrõ, ba ikusi ba ifotandro ba dete yaŵa, fa bõi sa’ae ifaelungu soi
niha andrõ, irege alua zi hõnõ fakhe. Ba aefa da’õ, ba ni’efa’õ ia, ba lõ
ararā.
4 II. Ba u’ila dadaoma, ba mudadao ira
yaŵa, ba tetehe khõra, wanguhuku; awõ noso niha, ni’eŵa bagi, ba wamaduhu’õ
Yesu andrõ, ba ba daroma li Lowalangi andrõ, ba si lõ irai mangalulu ba zaliŵaliŵa
ba danõ andrõ ba ba wamaedonia andrõ, ba si lõ manema tandra andrõ, ba
gangangora, ba ba dete dangara; ba ifuli auri ira ba salaŵa ira, awõ Keriso,
hõnõ fakhe wa’ara. (Dan. 7, 9. 22. 27. Mat. 19, 28. F. 6, 9; 13, 15 b. t.; 5,
10).
5 Ba tánõ bõ’õ, si
mate, ba lõ auri na, irege no alua zi hõnõ fakhe andrõ. Da’õ wemaoso si fõfõna
andrõ. (Kor. I. 15, 23. 24).
6 Ya’ahowu ba no ni’amoni’õ
zogamõ femaoso si fõfõna andrõ. Tebai ilaŵa da’õ fa’amate si samuza andrõ; ere
ira khõ Lowalangi, ba khõ Keriso, ba salaŵa ira awõnia, zi hõnõ fakhe andrõ.
(F. 2, 11; 20, 14; 1, 6. Fet. I. 2, 5. 9).
7 III. Ba na no alua zi hõnõ fakhe
andrõ, ba te’efa’õ Zatana ba gurungania andrõ.
8 Ba mõi ia baero, ba
wamaelungu soi andrõ, ba watalinga danõ, si õfa, Gogi andrõ ba Magogi, ba
wangowuloi ya’ira ba wanuwõ, ba fa’atora, ba no timba ngawua nene ba mbewe
nasi. (Yes. 11, 12. Hes. 38 ba 38. F. 16, 14).
9 Ba mõi ira miyaŵa,
ba dalu danõ, ba lafasui golombaseŵa niha ni’amoni’õ andrõ, ba banua omasiõ
andrõ. Ba aekhu galitõ, moroi ba mbanua si yaŵa, ba i’ā ira. (Hes. 38, 22; 39,
6).
10 Ba Afõkha andrõ,
samaelungu ya’ira, ba tetibo’õ ba mbaŵa alitõ ba balera andrõ, ba zi so gõi
zaliŵaliŵa ba danõ andrõ ba sama’ele’õ sofaya andrõ; ba tefakao ira bongi ma’õkhõ,
irugi zi lõ aetu. (F. 19, 20; 14, 10. 11. Mat. 25, 41).
11 IV. Ba u’ila dadaoma sebua, safusi,
awõ zidadao yaŵa; ba wamaiginia moloi danõ, fabaya banua si yaŵa, ba lõ falukha
naha khõra. (F. 4, 2. Fet. II. 3, 7 b. t.).
12 Ba u’ila zi no mate
fefu, he satua, ba he iraono, fõna dadaoma andrõ so ira, ba tebokai zura; ba
tebokai zura bõ’õ, ya’ia zura wa’auri andrõ. Ba tehuku zi mate andrõ, balazi
nisura ba zura andrõ, dali mbuabuara. (F. 3, 5; 21, 27; 2, 23. Dan. 7, 10. Mat.
16, 27).
13 Ba ibe’e baero asi
zi mate andrõ khõnia, ba fa’amate andrõ, ba banua tou, ba labe’e baero zi mate
andrõ, khõra, ba tehuku, dali mbuabua zamõsana. (Yoh. 5, 28. 29).
14 Ba fa’amate andrõ,
ba banua tou, ba tetibo’õ ba mbaŵa alitõ andrõ, ya’ia wa’amate si samuza andrõ,
baŵa alitõ. (F. 21, 8. Kor. I. 15, 26. 54. 55).
15 Ba na so zi lõ
musõndra tõi, na lõ mutanõ ba zura wa’auri, ba tetibo’õ ba mbaŵa alitõ andrõ.
(F. 20, 10).
FAMA’ELE’Õ
FAZA
21
I. Famohouni
banua ba tanõ. II. He wisa Yeruzalema si bohou andrõ.
1 I. Ba u’ila mbanua
si yaŵa, si bohou, ba tanõ si bohou; noa sa numalõ mbanua si yaŵa si fõfõna,
awõ danõ si fõfõna andrõ, ba lõ asi sa’ae. (F. 20, 11. Yes. 65, 17; 66, 22.
Fet. II. 3, 13).
2 Ba u’ila mbanua ni’amoni’õ
andrõ, Yeruzalema si bohou, silalõ mitou moroi ba mbanua si yaŵa, moroi ba
Lowalangi, nihaogõ, hulõ nono nihalõ, si no mangehao khõ zangai ya’ia. (F. 3,
12. Heb. 12, 22).
3 Ba urongo li sebua,
moroi ba dadaoma andrõ, imane: Hiza nose Lowalangi andrõ ba niha, ba mowanua ia
ba khõra, ba ya’ira, ba banuania, ba ya’ia, Lowalangi, ba awõra, (Hes. 43, 7;
37, 27. Heb. 9, 11),
4 ba i’osi dania daŵa
hõrõ fefu, ba hõrõra, ba lõ fa’amate sa’ae, ba lõ fa’abu dõdõ, ba lõ fege’ege,
ba lõ fa’afõkhõ sa’ae, me no numalõ zi fõfõna andrõ. (F. 7, 17. Yes. 35, 10).
5 Ba imane sidadao ba
dadaoma andrõ: Hiza, ubohouni fefu hadia ia! Ba imane: Tanõ ba zura, me si lõ
tebulõ ba me no si ndruhu daroma li andre. (F. 20, 11. Yes. 43, 18. 19).
6 Ba imane khõgu: No
awai. Alafa ndra’o ba omega, bõrõta ndra’o ba amozua. Ba zowõkhi tõdõ ube’e
nidanõ gumbu, idanõ fangorifi andrõ, saoha gõlõ. (F. 16, 17; 1, 8; 22, 13. 17).
7 Ha niha zi mõna, da’õ
zanema da’õ, ba Lowalanginia ndra’o ba onogu ia. (F. 3, 21. Heb. 1, 5).
8 Ba sada’uda’u
andrõ, ba si lõ mamati, ba si ra’ira’iõ, ba sange’e ba sohorõ, ba si fakelemu,
ba same’eme’e adu, ba dozi sofaya, ba ba mbaŵa andrõ, siholahola alitõ ba talõ
balera, mo’urakha ira, ya’ia wa’amate si samuza andrõ. (F. 22, 15; 19, 20. Gal.
5, 19 b. t. Efes. 5, 5).
9 II. Ba so zamõsa awõ mala’ika si
dafitu andrõ, si so mako andrõ, si fitu, nifo’õsi famakao andrõ, si fitu balõ,
safuria, ba humede ia khõgu, imane: Tabu, da’u’oroma’õ khõu nono nihalõ andrõ,
fo’omo Nono mbiribiri andrõ. (F. 15, 1. 6. 7; 19, 7).
10 Ba i’ohe ndra’o ba
hili sebua, salaŵa, aheta nosogu, ba ioroma’õ khõgu mbanua ni’amoni’õ andrõ,
Yeruzalema, silalõ mitou, moroi ba mbanua si yaŵa, moroi ba Lowalangi, (F. 21,
2. Hes. 40, 2),
11 no so khõnia
lakhõmi Lowalangi. Ba hagania, ba hulõ manimani fondrege zebua bõli, hulõ
yasibi sobaluri. (Hes. 48, 30—35; 43, 2 b. t.).
12 So gõli kara, ebua
ba alaŵa, ba felendrua mbawa gõli, ba ba dete mbawa gõli, ba felendrua mala’ika,
ba tõi, nisura ba dete, tõi mado Ndraono Gizeraëli andrõ, si felendrua.
13 Moroi ba
gatumbukha, ba tõlu mbawa gõli, ba moroi yõu, ba tõlu mbawa gõli, ba moroi
raya, ba tõlu mbawa gõli, ba moroi ba gaekhula, ba tõlu mbawa gõli.
14 Ba toyo gõli kara,
õli mbanua andrõ, ba no felendrua, ba ba detenia, ba felendrua dõi, tõi zinenge
Nono mbiribiri andrõ, si felendrua. (Mat. 16, 18. Efes. 2, 20).
15 Ba khõ zihede khõgu
andrõ, ba so helo ana’a, ba wanu’a banua andrõ, fabaya bawa gõlinia ba õlinia
kara andrõ. (F. 11, 1).
16 Ba õfa sagi naha
mbanua andrõ, ba faoma ira wa’anaunia wa’ebolonia. Ba isu’a mbanua helo no
mege, ba otu ngaluo fofanõ. Faoma ira wa’anaunia wa’ebolonia ba fa’alaŵania.
(Hes. 48).
17 Ba isu’a gõlinia
kara no mege, ba otu a õfa wulu a õfa hela, fanu’a ba niha, ya’ia wanu’a mala’ika.
18 Ba õlinia kara
andrõ, ba yasibi, ba banua, ba si ndruhu mbalaki, hulõ zõrõmi sohahau.
19 Ba toyo gõli mbanua
andrõ, kara, ba nifomanimani, hadia ia ngawalõ, fangehaonia. Toyo si fõfõna
andrõ ba yasibi, ba fanetenia, ba nila, ba fanete da’õ, ba kalisedo, ba fanete
da’õ, ba sumurudi, (Yes. 54, 11. 12),
20 ba fanete da’õ, ba
una, ba fanete da’õ, ba yakudi soyo, ba fanete da’õ, ba firusi, ba fanete da’õ,
ba asaki, ba fanete da’õ, ba yakudi sa’usõ, ba fanete da’õ, ba sasabadiu, ba
fanete da’õ, ba fusifaraga, ba fanete da’õ ba maritaisi. 21 Ba bawa gõli andrõ, si felendrua, ba
no felendrua manimani, sambusambua bawa gõli, ba ha sambusambua manimani. Ba
ewali ba mbanua ba si ndruhu mbalaki, hulõ zõrõmi sohahau. (F. 22, 2).
22 Ba osali, ba lõ u’ila
ba mbanua; osalira sa’ae Zo’aya, Lowalangi, samatõrõ fefu, hadia ia, ba Ono
mbiribiri andrõ.
23 Ba ba mbanua andrõ,
ba lõ moguna luo ba baŵa, ena’õ humaga khõnia; ihagaini sa’ae ia lakhõmi
Lowalangi andrõ, ba sulunia Nono mbiribiri andrõ. (F. 22, 5. Yes. 60, 19).
24 Ba mowaõwaõ ba
hagania soi niha, ba razo andrõ, ba guli danõ, ba la’ohe miyomo khõnia
lakhõmira. (Yes. 60, 3. 5 b. t. Sin. 72, 10).
25 Ba lõ lakusi mbawa
gõlinia, na ma’õkhõ, ba si bongi, ba lõ’õ sa ba da’õ. (Yes. 60, 11. 20. Sakh.
14, 7).
26 Ba la’ohe miyomo
khõnia lakhõmi soi niha, fabaya girõgirõra.
27 Ba lõ’õ manõ mõi
bakha khõnia zi ra’ira’iõ ba solau sogoro ita, awõ waya, ha si no mutanõ ba
zura tõi, ba zura wa’auri andrõ, khõ Nono mbiribiri andrõ. (Yes. 52, 1; 60, 21.
F. 22, 14. 15; 13, 8).
FAMA’ELE’Õ
FAZA
22
I. He wisa
Yeruzalema si bohou andrõ na. II. Tenga faya wama’ele’õ andrõ, ba lõ ara tõ
itõrõ. III. Fango’ozui.
1 I. Ba i’oroma’õ
khõgu zara nungo nidanõ fangorifi, no ohahau, hulõ mbaluri, si otarai dadaoma
Lowalangi andrõ ba dadaoma Nono mbiribiri andrõ, (Hes. 47, 1),
2 ba dalu
golayamania; ba faoma fatambai nidanõ andrõ, ba eu fangorifi andrõ, mewelendrua
mowua, sarasara waŵa, ba so mbuania. Ba bulu geu andrõ, ba famadõhõ wõkhõ soi
niha baero andrõ. (F. 21, 21; 2, 7. Hes. 47, 12).
3 Ba lõ’õ sa’ae
fangelifi, hadia ia. Ba so khõnia dadaoma Lowalangi, ba dadaoma Nono Mbiribiri
andrõ. Ba lafosumange ia enoninia andrõ. (F. 21, 27. Sakh. 14, 11).
4 Ba la’ila mbawania,
ba so ba gangangora dõinia. (Mat. 5, 8. Heb. 12, 14. Sin. 17, 15. F. 3, 12).
5 Ba lõ si bongi sa’ae.
Ba lõ moguna khõra haga wandru, ba he haga luo, me ihagaini ira So’aya,
Lowalangi, ba salaŵa ira, irugi zi lõ aetu. (F. 21, 22—25. Dan. 7, 18. 27. Tim.
II. 2, 12).
6 II. Ba imane khõgu: Si lõ tebulõ ba
si ndruhu daroma li andre. Ba So’aya andrõ, Lowalangi Geheha zama’ele’õ andrõ,
ba no ifatenge mala’ikania, ba wangoroma’õ khõ genoninia andrõ, hadia zi lõ ara
tõ itõrõ. (F. 21, 5; 1, 1). 7 Ba
hiza, alio so ndra’o. Ya’ahowu zolo’õ taroma li fama’ele’õ andrõ, ba zura
andre. (F. 1, 3).
8 Ba ya’o, Yohane,
zangila da’õ ba samondrongo. Ba me aefa urongo, ba me aefa u’ila, ba ulaugõ tou
ndra’o, ba wangalulu ba mala’ika andrõ, sangoroma’õ khõgu da’õ. (F. 1, 4. 9 b.
t. 19, 10).
9 Ba imane khõgu:
Bõi! Awõu enoni ndra’o, ba awõ dalifusõu sama’ele’õ andrõ, ba awõ zolo’õ taroma
li andrõ ba zura andre; khõ Lowalangi angalulu.
10 Ba imane khõgu: Bõi
fotandro daroma li fama’ele’õ andrõ, ba zura andre; noa sa’ae ahatõ ginõtõ
andrõ. (F. 10, 4. Fil. 4, 5).
11 Solau si lõ atulõ,
ba yamutohugõ wolau, ba si ra’ira’iõ, ba yamutohugõ wa’ara’ira’iõ; ba satulõ,
ba yamutohugõ wolau satulõ, ba ni’amoni’õ, ba yamutohugõ we’amoni’õ ya’ia.
(Dan. 12, 10. Tim. II. 3, 13. Kol. 1, 10. 11). 12 Hiza, alio so ndra’o, ba fao khõgu
luo andrõ khõgu, ba wanulõni ba zamõsana, dali mbuabuania. (F. 2, 23. Yes. 62.
11. Rom. 2, 6). 13 Alafa ndra’o ba
omega, si fõfõna ndra’o ba safuria, bõrõta ndra’o ba amozua. (F. 21, 6).
14 Ya’ahowu zamabago
nukhara, ena’õ tetehe khõra geu fangorifi andrõ, ba ena’õ tefa’tõrõ ira ba
mbawa gõli andrõ, miyomo ba mbanua. (F. 14, 12; 21, 12).
15 Baero so nasu
andrõ, awõ zi fakelemu, awõ zohorõ, awõ zange’e, awõ zame’eme’e adu, awõ dozi
solau faya, ba somasi ya’ia. (F. 21, 8. Fil. 3, 2. Kor. I. 6, 9. 10).
16 Ya’o, Yesu andrõ,
no ufatenge mala’ika andrõ khõgu, ba wamaduhu’õ khõmi da’õ, ba mbanua niha
Keriso andrõ. Lewiõ Dawido ndra’odo, lewiõ ba mbõrõ, ba ma’uwunia, madala
andrõ, sihaga. (F. 1, 1. 2. 11; 5, 5. Yes. 11, 1. 10).
17 III. Ba lamane Eheha ba ono nihalõ
andrõ: Aine! Ba ha niha zamondrongo, ba yamuŵa’õ: Aine! Ba ha niha zowõkhi
tõdõ, ba yamõi, ha niha zomasi, ba yamutema nidanõ fangorifi saoha gõlõ. (F.
21, 6. Yes. 55, 1. Yoh. 7, 37; 4, 14).
18 Ufaduhu’õ ba niha
fefu, samondrongo taroma li fama’ele’õ andrõ ba zura andre: Na so zondrou’õ ya’ia,
ba ifatõrõ khõnia Lowalangi wamakao andrõ, nisura ba zura andre. (Moz. V. 4, 2.
Amaed. 30, 6).
19 Ba na so zombuwu
taroma li ba zura wama’ele’õ andre, ba iheta Lowalangi gurakhania ba geu
fangorifi andrõ ba ba mbanua ni’amoni’õ andrõ, nisura ba zura andre. (F. 22,
14; 21, 2. 10).
20 Imane samaduhu’õ da’e:
Ya’ia lõ ara tõ so ndra’o. Yaduhu; aine Yesu, So’aya! (F. 1, 7. Heb. 10, 37 b.
t.).
21 Yafalukha ami fefu
wa’ebua dõdõ Zo’aya ya’ita, Yesu. (Rom. 16, 24).
Posting Komentar