AGENDRE WANGEFA’Ö NDROTONDROTA MBANUA NIHA KERISO BA BNKP

Table of Contents

 

AGENDRE WANGEFA’Ö

NDROTONDROTA MBANUA NIHA KERISO BA BNKP

 

 

1.      Manunö: Buku Zinunö No: 215:5

 

2.      Li Famaehagö

 

Ya’ami ira talifusö ni’omasi’ö ba khö Keriso Yesu.

No sa’ae aboto ba dödöda wa Banua Niha Keriso (ma Gereja), no angowuloa zamati khö Yesu, si no mubohouni, ni’amoni’ö, ha sambua boto, ba Yesu Keriso samösa högö ba mbanua-Nia. Andrö wa tekaoni fefu zamati, ena’ö latörö lala haga. Imane taroma Li Lowalangi: “Noa sa sogömigömi ami föna, ba iada’e, ba no haga ami ba khö Zo’aya; lala ndraono haga mitörö” (Efeso 5:8).

 

Ya’ami banua niha Keriso! No mirongo sa’ae horö andrö, nifazökhi nawöda Niha Keriso sotöi .................., ba horönia andrö, ba no i’o’aya Lowalangi, ba no saila göi niha Keriso fefu ibe’e. Ba me no i’efa’ö ia samösa, börö horönia andrö, ha sara dödöda wa aefa ia niha Keriso ma’ökhö andre. Sökhi na la’efa’ö ia, moroi na lahalö dumaduma ia niha Keriso bö’ö. Goigoi si no i’osiwawöi, ya’ia da’ö: (alui fasambua):

 

(1)   No mamakaerua. No aboto ba dödönia me tefara’u tanga ia khö wo’omonia si föföna wa tebai manö “mamodombua donga”, ba no göi aboto ba dödönia gambakhoita ba BNKP, ba hiza no isawö mbu’u li awö goigoi andrö. Börö da’ö  te’efa’ö ia banua niha Keriso ba BNKP.

 

(2)   No tehonogöi wa tefatörö ia (ira) ba wamahaö/fokubali börö horö olalöwa si no lafalua, ba hiza lö omasi ira la’o’ö, lö omasi mamalalini era’era  no lasawa golonga tanö bö’ö. Börö da’ö te’efa’ö ia banua niha Keriso ba BNKP.

 

(3)   No la’ositengagö lala wamahaö ba BNKP, sanandrösa ba wamayagö idanö. Molo’ö taroma Li Lowalangi ba Roma 6:3-4 wa famayagö idanö andrö no fefao ba wa’amate, fogo’o ba femaoso Zo’aya ya’ita Yesu Keriso.  Ba na so zamayagö idanö ya’ia samuzatö, ba no si fagölö samoröfa Yesu si mendrua zi manö. Andrö lö faudu ba wamahaö ba BNKP na so zamomendrua famayagö idanö ya’ia si. Börö da’ö te’efa’ö ia banua niha Keriso ba BNKP.

 

Ba iada’e, ba mitöngönia daroma Li Lowalangi me imane: “Sindruhu niẅa’ögu khömi, hadia niböbömi ba gulidanö, da’ö niböbö göi ba zorugo; ba hadia ni’efa’ömi ba gulidanö, da’ö ni’efa’ö göi ba zorugo.” (Matai’o 18:18). Andrö ya’ugö (ya’ami) ira talifusö nitötöi töi mege, ya’odo andre nifataro sangombakha Li Lowalangi, u’ombakha’ö ma’ökhö andre, wa abölö li andrö khöu, nibe’e Yesu ba mbanua-Nia, wangefa’ö ya’ugö niha Keriso.

 

Ya’ami niha Keriso, me no aefa dalifusö andre………………… niha Keriso, ba aefa ia göi ba ngawalö nibe’e Yesu ba mbanua-Nia. Lö sa’ae fao ia (ira) ba halöwö sakramen (Femanga Gö Ni’amoni’ö; Famayagö Idanö); awö ngawalö lala halöwö nifalua ba BNKP.

 

Ba ya’ami niha Keriso, me no tenga sa’ae ndrondrondroto mbanua niha Keriso ba BNKP ndra talifusö andre………………, andrö i’otarai luo andre, ba böi olifu ami niẅa’ö Waulo, Sinenge Yesu andrö, ba niha Keriso ba mbanua Gorindro me imane: “Ba döi Zo’aya ya’ita Yesu Keriso, maẅa’ö khömi: mifabali ami ba niha Keriso si lö sökhi buabua, gofu ha niha ia. Ba böi  hulö zi fa’udu ami khönia, mitegu ia si mane si    fatalifusö.” Da’ö mitanö ba dödömi, ba mi’o’ö!  Ba mangandrö ita salahira ena’ö falukha ira wamalalini era’era, ena’ö lö tekiko ira,  ba falukha ira wa’ebua dödö Lowalangi.

 

3.      Mangandrö

Mangandrö ita:

He Lowalangi, si  so ba zorugo yaẅa, ba si lö ambö fangi’ila. Ö’ila göi dödöma iada’e, Ö’ila wa sabutödö ndra’aga, börö me no aefa awöma niha Keriso ba BNKP dalifusö andre. Ba lö tobini   khö-U göi mbörö wa’aefania (wa’aefara). He Lowalangi, matou’ö ba danga-U dalifusö andre. Ba na tola fangandröma, ba ma’andrö khö-U, ena’ö ifalalini (lafalalini) gera’erania/ra. Kaoni ira ba wa’omasi-Mö, fa böi manö aekhu ba wa’atekiko lualua lalania/ra dania. Ba ya’aga andre fefu, ba dozigö ndra’aga wamatumbu’ö ba dödöma fangata’ufi Ya’ugö, afu möna ndra’aga ba ngawalö wanandraigö, si falukhalukha khöma ba döröẅama ba gulidanö, ba rorogö ndra’aga ba lala saekhu ba khö-Mö. Yaduhu!

 

 

Nitöngöni:

Stola ni’oguna’ö ya’ia da’ö molo’ö töi migu.