AGENDRE WANEMA MANGAWULI NIHA SI NO MU’EFA’Ö NDROTONDROTO MBANUA NIHA KERISO

Table of Contents

 

AGENDRE WANEMA MANGAWULI

NIHA SI NO MU’EFA’Ö NDROTONDROTO MBANUA NIHA KERISO

 

 

 

1.      Manunö Buku Zinunö numero 215:1-3

 

2.      Fangahono dödö: Ya falukha ami fefu wa’ebua dödö Zo’aya ya’ita Yesu Keriso. Yaduhu!

 

3.      Fangombakha

 

Ya’ami banua niha Keriso! Me no i’andrö . . .   andre, ena’ö faböbö ia awöda ba mbanua niha Keriso zui, me no itörö/latörö wamahaö molo’ö amakhoita, ba me no faodödö walukhata majelis jemaat.........., andrö tefuli tetema ia awöda ba mbanua niha Keriso.

 

4.      Manunö Buku Zinunö 191:1-2

 

5.      Fanofu

Ba so nisofuda khönia (khöra) ua:

 

(1)   Ya’ugö ………………... ! Hadia aboto ba dödöu, wa no mosala ndra’ugö luo no, ba aboto ba dödöu göi wa no enahöi wangefa’ö ya’ugö niha Keriso, börö zalau andrö? Na sindruhu aboto ba dödöu, da’ö, ba tema ligu: “Aboto ba dödögu!”

(2)   No ötema ligu, wanguma’ö: aboto ba dödögu, ba hiza, fa’aboto ba dödö horö zamobörö fa’abu dödö ba horö, andrö usofu khöu: Hadia, abudödöu ba horöu andrö, abudödöu ba wa’abe’e dödöu luo no? Na sinddruhu da’ö, na tenga ha li mbeweu manö, ba tema ligu: “Sindruhu, abudödögu ba horögu luo no!”

(3)   No ötema ligu wanguẅa’ö: “Abudödögu!” ba hiza, niha sindruhu sabutödö ba horönia, ba i’andrö aefa horönia, he khö Lowalangi ba he ba niha göi. Andrö usofu khöu iada’e. Hadia, ö’andrö wangefa khö Lowalangi, ni’o’ayamö luo no;  ba hadia, ö’andrö göi wangefa horöu ba mbanua niha Keriso andre, ni’ailasimö? Na sindruhundruhu ö’andrö da’ö ba tema ligu wanguma’ö: “Moroi ba dödögu, u’andrö wangefa horögu!”

(4)   Ba sambalö tö nisofugu khöu: Hadia, edöna ndra’ugö molo’ölo’ö li Lowalangi i’otarai ma’ökhö andre, awö gamakhoita andrö, nihonogöi mbanua niha Keriso wanörö ya’ia, edöna ndra’ugö ö’angenanöi wanörö lala sise’ise andrö, fa böi göna ndra’ugö fa’abu dödö sabölöbölö moroi ba zigöna ndra’ugö luo no? Na edöna ndra’ugö, ba tema ligu:  “Edönado!”

                   

Ya’ami banua niha Keriso, no mirongo iada’e li dalifusö andre! Ba me si manö linia, ba ta’oguna’ö wa’abölö andrö, nibe’e Yesu So’aya ya’ita ba mbanua-Nia, ba wanoto’ö böbö andrö, ni’amöbö’ö ya’ia luo no.

 

6.      Fanema’ö

                   

       Ya’ugö talifusö (ira’u danga ni’efa’ö andrö, sangombakha)

Matema mangawuli ndra’ugö ma’ökhö andre, awöma niha Keriso, si no ihöli Yesu fa’amate-Nia andrö, fa’amate ba röfa. Ba malau da’ö ba Döi Lowalangi Ama, ba ba Döi Yesu Keriso, ba ba Döi Geheha Ni’amoni’ö. Yaduhu!

 

I’otari luo andre, ba tola mo’urakha ndra’ugö zui ba ngawalö howuhowu, nifabu’u Yesu ba mbanua-Nia. Ya’aro dödöu ba wamati khö Zo’aya ero ma’ökhö, irugi wa’amateu dania.

 

7.      Fangandrö

Mangandrö ita:

He So’aya ya’aga, Lowalangi saẅatöma  Ndra’ugö si lö mamalömalö. Saẅatöma  Ndra’ugö me luo wa’abu dödö, ba he göi na luo wa’omuso dödöma. Ma’ondrasi Ndra’ugö ma’ökhö andre ba wanuno      töi-Mö, ba ba wangandrö saohagölö-U fefu hadia ia nibe’e-U khöma.

Ma’andrö saohagölö-U daroma Li-Mö, si no Öfarongogö khöma, ba wangefa’ö ya’aga ba wa’atekiko dania, ba ba wangorifi nosoma göi. Ma’andrö saohagölö-U me no ifalalini gera’erania talifusö andre………………..  ; irege Ötehe tetema ia mangawuli awöma niha Keriso si no manörö lala elungua meföna, lala saekhu ba wa’atekiko ena’ö. Nisofuma khönia ba no Örongo, ba fanemania li, ba no Örongo zui. He Lowalangi, lö hadia ia zi tobini föna-U. Era’era dödö niha, si no tobini sibai ba khö-U no oroma. Hiza, lö tobini khö-U na niha sadölö tödö ndra’aga, ba na tenga. Ma’andrö khö-U, be’e dödö si lö falimosa khö dalifusöma andre, si no mafuli matema awöma ba mbanua-U. Lului khönia fa böi ifuli olifu ia gamabu’ula li andrö, nifabu’unia ma’ökhö, he khö-U, ba he ba mbanua niha Keriso. Ba dozigö ndra’aga fefu wame’e tödö si lö falimosa, ba he fayaẅasa göi, me ha da’ö zogamö fangorifi dania. Yaduhu!

 

8.      Manunö Buku Zinunö 191:3

 

 

Nitöngöni:

Stola ni’oguna’ö ya’ia da’ö molo’ö töi migu.