AGENDRE WANEMA MANGAWULI BA MBANUA NIHA KERISO SI NO MÖI BA GOLONGA BÖ’Ö BA SI NO MUBAYAGÖ IDANÖ

Table of Contents

 

AGENDRE WANEMA MANGAWULI BA MBANUA NIHA KERISO

SI NO MÖI BA GOLONGA BÖ’Ö BA SI NO MUBAYAGÖ IDANÖ

 

 

1.      Manunö Buku Zinunö numero 215:1-3

 

2.      Fangahono dödö: Ya falukha ami fefu wa’ebua dödö Zo’aya ya’ita Yesu Keriso. Yaduhu!

 

3.      Fogaoni

Ya’ugö (ya’ami), talifusöma ba khö Yesu Keriso! No so ndra’ugö (ami) föna Lowalangi, ba föna niha Keriso sato ma’ökhö, ba wangoroma’ö fehulu dödöu (dödömi), ena’ö tefuli tetema ndra’ugö (ami) talifusöma ba BNKP. No ötema (mitema) wamahaö nifodanedane ba daroma Li Lowalangi. Ba iada’e, me ohitö dödöu (dödömi) wamaduhu’ö föna zato wa lö  faröi ndra’ugö (ami) ba wamati khö Yesu Keriso ba zi so fönada, ba ena’ö tola alua da’ö, ba da ta’andrö wa tolosa Zo’aya ya’ita.

 

4.      Fangandrö

Mangandrö ita:

He Lowalangi Ama, si lö ambö fa’abölö, ba si no fahöna fa’ahakhö dödö. Masuno Ndra’ugö, me lö mamalömalö Ö’ozaragö mbanua-U, ba Öhagaini dödöma taromali-U, awö wa tola matema Wamayagö Idanö ba Femanga Gö Ni’amoni’ö, molo’ö oroisa nibe’e Nono-U andrö Yesu Keriso. Ma’andrö   khö-U, ena’ö ö’amualagö Geheha-U khö dalifusöma nitema mangawuli ba mbanua niha Keriso ma’ökhö andre, afu tola itehe bewenia, wa So’aya Yesu, sifaduhu dödönia, ena’ö lö aefa ia ba wamati, irugi wa’amate. Ba döi Nono-U omasiö Yesu Keriso So’aya ya’aga. Yaduhu!

 

5.      Fombaso li Lowalangi: I Korindro 1:23-31 ma zui  Roma 3:21-28

 

6.      Manunö Buku Zinunö No: 191:1-2

 

7.      Fanofu:

(1)   Masofu khöu (khömi) föna Lowalangi, ba föna niha sato, hadia faduhu dödöu (dödömi) wa lö umbu awö ndrali ba wanörö lala niha Keriso, baero zura ni’amoni’ö, ba hadia faduhu göi dödöu (dödömi) wa yaẅa daroma Li Lowalangi, moroi ba goroisa nibe’e niha, gofu hadia ia? Na simanö, ba tema (mitema) ligu:  “Faduhu-dödögu (dödöma).”

(2)   Hadia, faduhu sibai-dödöu (dödömi), ha sambalö balazi wa’ahakhö dödö Lowalangi manö, soroi ba wamati khö Yesu Keriso, tatema wangorifida?  Hadia fatehe dödöu (dödömi), wa tebai tatema na moroi ba wa’abölöda, to’ua ya’ita? Na si manö ba tema (mitema) ligu : “Fatehe dödögu (dödöma)!”

(3)   Hadia, lö aefa ndra’ugö (ami) ba wamati ba daroma Li Lowalangi, ba wamayagö-idanö, ba ba wemanga gö ni’amoni’ö, ba ba gowuloa niha Keriso BNKP ? Hadia, edöna’ö  (edöna ami) wolo’ö amakhoita BNKP ? na simanö tema ligu (mitema ligu) “Edönado (Edönaga) ya mutologa Lowalangi.”

 

8.      Fanema’ö

(Ira’u danga nitema sondrönia’ö ba wanga’aro’ö fanema ya’ira) ba imane: me no öfaduhu’ö (mifaduhu’ö), ba me no fawu’u li ndra’ugö (ami), ba ya’odo andre nifataro ba wangombakha taroma Li Lowalangi, ba matema mangawuli ndra’ugö (ami) awöma ndrotondroto niha Keriso ba BNKP. I’otarai luo andre, ba tola fao ndra’ugö (ami) ba halöẅö sakramen, awö wa mangurakha ndra’ugö (ami) ba ngawalö howuhowu ni’amualagö Yesu ba mbanua-Nia.

 

9.      Howuhowu

Mihonogö dödömi wanema howuhowu:

Ya mu’a’aro’ö halöẅöu (halöẅömi) si sökhi andrö si no ibörögö ba dödöu (dödömi) Lowalangi Ama si so ba zorugo, ya mudou’ö khöu (khömi) mbuala Geheha Ni’amoni’ö sanga’aro’ö famatiu (famatimi) sangabölö’ö ya’ugö (ya’ami) ba wolo’ö somasi Lowalangi, same’e khöu (khömi) fanaha tödö, ba ngawalö wamakao fefu, ba solohe ya’ugö (ya’ami) ba wogamö tötönafö andrö sohahau dödö. Börö Yesu Keriso, So’aya ya’ita. Yaduhu!

 

10.  Fangandrö:

Mangandrö ita:

He Lowalangi si fahöna fa’ahakhö dödö, moroi si’ai ba dödöma masuno Ndra’ugö, awö wa ma’andrö saohagölö khö-U, wa lö mamalömalö örorogö mbanua-U, awö wa Öfahowu’ö ira. Si manö göi, wa no Öfasao dalifusöma, ba wa’aboto ba dödö Turia Somuso Dödö andrö khö-U. No iẅa’ö   Ono-U Yesu Keriso (Luka 11:13): ba na ya’ami, si lö sökhi, mi’ila mibe’e game’ela si sökhi ba ndraonomi, ba tenga mendruamanö Ibe’e Ama moroi ba zorugo, Geheha Ni’amoni’ö ba zangandrö khö-Nia? Da’e mbörö wa ma’andrö khö-U: Abölö’ö dalifusöma Eheha-U Ni’amoni’ö fa böi faröi ia (ira) ba wolo’ö Turia Somuso-dödö    khö-U, afu ilaẅa (lalaẅa) Gafökha, ba he fa’atebai nösinia (nösira), fa böi ibusi dödö (labusi dödö) Geheha Ni’amoni’ö, ba fa böi te’ala mbanua-U ni’amoni’ö andre, ba wolau si fatuwu khö-U. Amualagö khönia (khöra) wa’ebua dödö-U, ena’ö tobali fanuno lakhömi-U wa’aurinia (wa’aurira).  Masuno ndra’ugö he Lowalangi si samösa tölu; Ama, Ono, ba Eheha Ni’amoni’ö. Yaduhu!

 

11.  Manunö Buku Zinunö No: 191:3

 

 

Nitöngöni:

Stola ni’oguna’ö ya’ia da’ö molo’ö töi migu.