AGENDRE WAMATARO SATUA NIHA KERISO, EVANGELIS ba DIAKEN[1]

Table of Contents

 

AGENDRE WAMATARO

SATUA NIHA KERISO, EVANGELIS ba DIAKEN[1]

 

Manunö	:	Buku Zinunö No:129:1-2  (Tola  numero tanö bö’ö)
Fangahono Dödö	:	Famataro SNK/Evangelis/Diaken andre - tefalua ba döi Lowalangi Ama, ba döi Yesu Keriso, ba ba döi Geheha Ni’amoni’ö. Yaduhu.
		Imane Yesu:  Tenga ya'ami zanuyu Ya'o, Ya'o sa zanutuyu ya'ami, ba no Ufataro ami, ena'ö möi ami mowua, ba ena'ö lö tebulö mbuami. (Yoh. 15:16a). Yaduhu!   I’otarai föna sa’ae, tetutuyu ndra sohalöwö ba gotalua mbanua niha Keriso. Andrö si mane ba zura Halöẅö Zinenge: (Faza 14:23). “Ba ladozigö banua wanutuyu satua khöra, ba mangandrö ira ba mamoni, wanou’ö ya’ira  ba danga Zo’aya ba zamati ira.” Ba imane Faulo ba zurania khö Dimoteo andrö: (I Timoteo 5:17 ) “Satua andrö, sangehaogö fangai halöẅöra, ba mifodua winaeta zumangera, ba mendrua manö ba zi so halöẅö fahuhuosa, ba famahaö.” “Ba ifarou göi Dito andrö, ena’ö idozigö banua, wamataro satua ena’ö i’o’ö niẅa’önia khönia.”  Ba si manö göi wa latutuyu ndra enoni samalua halöwö wa’omasi, ba wondrorogö si numana ba si tosasa tödö. Si mane niwa’ö ba Halawö Zinenge 6:1-3: “Ba me luo da’õ, me tobali ato nifahaõ, ba tesao wekõkõkõkõ Ndrawa Heleni ba niha Heberaio, me te’ositengagõ lakha mbanua khõra, ba dolotolo andrõ, sero ma’õkhõ. Ba lafalukha’õ nifahaõ sato si felendrua, lamane: Lõ omasiga, marõi daroma Li Lowalangi, ba we’amõi ngoningoni ba wemanga. Ba mifaigi niha, ba khõmi, ya’ami, ira talifusõ, dafitu, si sõkhi turia, si no fahõna Eheha ba fa’atutua, nifataroda ba halöẅö andrõ. Ba lõ tebulõ ndra’aga ba wangandrõ ba ba halöẅö fangombakha taroma Li.   Ba da’ö ta’ila, wa tenga nifakhoi dödö manö, halöẅö zatua, halöẅö fangombakha, awö halöẅö fangomasi’ö andrö, no niẅa’ö Zinenge Zo’aya sa, ba wangebua’ö banua niha Keriso; ba ba wangehao ya’ia.   Ya’ami banua niha Keriso. Me no mitutuyu nawömi andre, ba no göi si fao dödö zato ba walukhata, andrö tafataro ira ba halöẅöra iada’e ba te’a’aro’ö ira.
Manunö	:	Buku Zinunö No: 139:1 (tola numero tanö bö’ö)
Fangandrö	:	Mangandrö ita: He Lowalangi Ama ba zorugo! No oi Ö’ila dani wa’owuloma ba da’e. Ma’andrö khö-U ena’ö tenga ya’aga zamataro niha andre tobali Satua Niha Keriso/Evangelis/Diaken, ena’ö Ya’ugö zamataro.  Aohasi gölö-U wanehe ya’ia (ya’ira):  höna  khönia (khöra) Geheha-Mö, ena’ö sökhi lalania (lalara), ba ena’ö manandrösa halöẅö nilaunia (nilaura) ba wangebua’ö banua-U, ba ba wanga’azökhi, ba ba wanuno töi-Mö sebua andrö. Yaduhu!
Manunö	:	Buku Zinunö No:139:2 (tola numero tanö bö’ö)
Fangombakha Lala Halöwö	:	He ya’ami ira talifusö, modanedane ba goigoi si no mufa’anö ba Peraturan BNKP No 07/BPMS-BNKP/2008 ba mitöngöni zitobali tuho halöẅö ba nifataro ya’ami:
		Halöẅö Zatua Niha Keriso: Ba da’e halöẅö zatua andrö si tölu ngawalö andre:   Siföföna Falulu ira ba wangombakha taroma Li Lowalangi. Faoma la’owölö’ölögö wamaigimaigi, fa lö taya wamati mbanua niha Keriso, ba mendrua manö latolo, fa tedou gamuata si sökhi, amuata niha Keriso, fa la’ombakha’ö khöra lala Lowalangi, fa lö aefa wangenanö, awö huku si sökhi, ba fa tetenaẅa fefu ngawalö wangala. Fa la’ata’ufi Lowalangi si faronga, fa lö fabali ira, fa lö fasoso, fa lategu ndraono ba zi lö sökhi. Böi la’ata’ufi niha, satua andrö, böi so ba dödöra, wa’omasi niha ira. Böi möi börö da’ö wa lö lategu ena’ö gamuata si lö sökhi, sinegu Lowalangi, la’oroma’ö lala satulö ba zolalö, lafarou dödöra ba wanörö lala da’ö, hulö na ifarou dödö nononia ama, latolo, lira, ba he amuatara, nibe’e tulada; ena’ö atulö fefu hadia ia, ba mbanua niha Keriso.   Sidua: Lafaigi satua andrö, fa lö faguagua ba gosali, fa oi ahono, wamondrondrongo Li Lowalangi, ni’ombakha’ö. Ba lafaigi göi, fa lö la’oguna’ö ba wolau si lö atulö luo ni’amoni’ö andrö, luo Migu; ena’ö la’angenanöi wangamoni’ö, ba ena’ö la’o’ö goroisa Lowalangi ba da’ö.   Sitölu: Mo’ömö zatua andrö, la’oigö dödöra wanolo fefu zigöna fa’abu dödö, hadia ia. Latolo zi lö ama, si lö ina, si lö talifusö, hulö na onora. Böi olifu ira, wamolala tödö zinumana, awö zofökhö. Lahaogö wondrorogö kefe nibe’e ba dangara, ame’ela ba zinumana; böi ebua dödöra zambuana lahaogö wama’ema ame’ela andrö, ena’ö atulö, ba ena’ö molakhömi Lowalangi ba halöẅö da’ö.
		Halöwö Evangelis:   Siföföna: Falulu fohalöẅö ira faoma ndra enoni bö’ö ba wanuriaigö Turia Somuso Dödö ba mbanua niha Keriso   Sidua: Manuriagö Turia Somuso Dödö ba niha si lö samondrongo ba si lö sanema’ö Yesu. Sitölu: Mangondrasi banua niha keriso ba nahiara zamösa, he si no awuwu famati, si lö möi ba gowuloa zamati, ba ma si no abe’e tödö ba wangombakha Fa’omasi Lowalangi ba niha gulidanö, ba wanusugi tödöra, ba ba wamolala tödö zi no teduhö tödö, ena’ö falukha ira wa’ebua dödö Lowalangi ba khö Yesu Keriso.
		Halöwö Diaken:   Siföföna: Falulu fohalöwö ira faoma ndra enoni bö’ö ba wanga’asogö ba ba wondrorongö ngawalö zoguna ba mbanua niha Keriso, si mane nahia wasumangeta, nahia ndra sohalöẅö, awö ngawalö gokhöta mbanua niha Keriso.   Sidua: Mondrönia’ö sato ba wamalua halöẅö Diakonia (fanolo sinumana, lakha mbanua, si lö ama si lö ina, sofökhö, ba si tosasa tödö, ba tanö bö’önia), he ba gotalua mbanua niha Keriso, he göi ba zi fasui.   Sitölu: Fao ba wangotomosi ba ba wondrou’ö bosi wa’auri mbanua niha Keriso, awö nono wobanuasa si so ba nahia zamösana, he göi ba nahia bö’ö.
Fanofu	:	Da’ö halöẅö Zatua ba Mbanua Niha Keriso/Evangelis/ Diaken. Ba halöẅö da’ö lafataro ami iada’e! Andrö usofu khömi ba zanehe Lowalangi, sogaoni ya’ami, ba ba zanehe mbanua niha Keriso, ba zimöi ami enoni. Hadia edöna ami mi’o’ö li Lowalangi, mi’ohe ba wamati, ba wa’omasi, ba ba wanötöna  mbanua niha Keriso andre, ba wangai halöẅömi andrö sawena te’ombakha’ö khömi? Na edöna ami, mibe’e dödömi, mi’osindruhugö, ba lö faröi ami wangai ya’ia, ba mitema ligu wanguma’ö: “Edönado (edönaga), ya itolodo (itologa) Lowalangi ba wa’ebua dödö-Nia andrö!”
Fanema Li	:	EDÖNADO (EDÖNAGA), YA ITOLODO (ITOLOGA)  LOWALANGI BA WA’EBUA DӦDӦNIA ANDRӦ.
Famataro	:	Ba döi Lowalangi Si samösa tölu, si no mogaoni ya’ita: Ufataro ndra’ugö (ami) tobali Satua Niha Keriso/Evangelis/Diaken ba Jemaat ……., Ya Ihöna khöu (khömi) Lowalangi wa’atuatua ba fa’abölö ba wangai halöẅö-Nia andrö. Yaduhu.
Famahowu’ö	:	Mihonogö dödömi ba wanema howuhowu: Ya muhagaini Lowalangi dödömi Eheha-Nia Ni’amoni’ö. Lowalangi Ama, ba zorugo, sogaoni ya’ami, awöma enoni mbanua-Nia, ya mu’abölö’ö ami, ba fa lö faröi ami ba halöẅömi andrö, ba wamosumange Ya’ia, ba ba wanema fa’auri si lö aetu. Yaduhu!
Famatenge		Ba mi’ae’e sa’ae  ya’ami talifusö, mi’oigö dödömi, ena’ö sökhi halöẅömi andrö. Böi miförö, mi’abe’e’ö ami wamati, si mane ira matua, ya’abölö ami, ya a’oi so khömi wangai halöẅö Zo’aya andrö, böi ya mamalömalö, me no mi’ila, tenga zayazaya gölö wa’erege dödömi andrö ba khö Zo’aya
Oroisa ba mbanua niha Keriso		Ba so niẅa’ö khömi ya’ami banua niha Keriso. No mirongo, hadia nifabu’u Zatua Niha Keriso/Evangelis/ Diaken andre khö Lowalangi, börö ami, ba iada’e ba mitema ira, mi’omasi’ö ira, ya faduhu dödömi khöra. Mendrua manö mifosumange ira iada’e ba halöẅöra, nibe’e Zo’aya khöra, ba khömi, ena’ö omuso dödöra, ena’ö aoha gölöra wangai halöẅöra, ba ena’ö lö atage ira.   Mitolo ira, heza mi’ila mitolo! Böi mi’olifugö ami ira, na mangandrö ami, ena’ö ha sara dödöda dozi ita, ba ena’ö faböbö ita, atulö ita, ba oroma ba da’ö wa ndrotondroto mboto andrö ita fefu, ba zi no möi högö Zo’aya ya’ita, Yesu Keriso. Ba faoma tatohu danga nawöda, ba wamanöi boto andrö, ma’asambua, ba wangabölö’ö ya’ira, ba böi aefa wa’omasida nawöda, ba da’ö fefu. Ya mutolo ita fefu ba da’ö Yesu Keriso. Yaduhu!
Mangandrö	:	Muzizio zato, mangandrö ita: He Lowalangi, So’aya, si so ba zorugo! Masuno Ndra’ugö, me no ebua dödö-U khöma, me lö faröi Ndra’ugö, wondrorogö banua-U andrö ba gulidanö, ba me no Öbe’e göi ba mbanua niha Keriso andre niha da’e si no aoha ölö we’amöi enoni-Mö ba wokubaloi ya’ira fa lö taya wamatira, fa lö laröi lala andrö khö-U. Ma’andrö khö-U, be’e khöra ame’ela-U, Geheha Ni’amoni’ö andrö, fa’atuatua, ba fa’abölö-Mö, ba fa’anau-gölö, ba fa’omasi dalifusö, ena’ö lö abua gölöra, ena’ö owölö’ölö ira ba halöẅöra. Fahowu’ö mbanua niha Keriso ma’afefu, ena’ö lö aekhu ba danö, na so daroma Li Lowalangi, ma fondrara dödö, ma fanegu, ma famorou-dödö. Fasao ira ba lala sadölö, Eheha-Mö.   Tolo ira ba wagohisa andrö, ba wolohi luo andrö nifabu’u, me tekaoni ndra’aga fogaoni si’otarai zorugo, ena’ö banua si sökhi ira, si lö sinegu börö Yesu Keriso. Yaduhu! Mudadao zato
Manunö	:	Buku Zinuno No:135:1
		……………Fama’ema SK…………+ Fondra’u danga

 

Nitöngöni:

Stola ni’oguna’ö ya’ia zo la’ala’a soyo (merah), ba molo’ö töi migu la’ala’a lembe meza.

---

[1] Tefalua molo’ö ngasi zohalöẅö sedöna mufataro.